Hmeithai 14

HMEITHAI..(14)

Ziaktu : Toni Râlte

Ka zui ve vut a, a pute inah pawh rei kan awm lo. Hawn lamah pawh a ngawi tlat a, kei lahin ṭawng ka tum bawk si lo. Kan inkhalh haw mawp mawp a ni mai e. A lum leh deuh tawh avangin ka in leih tleng leh zuai a, Zan lam inkhawm an duh dawn si, chaw ei hma an duh ang tiin Johna te leng chu ka call a, ani pawh a rawn haw ve mai. A rui chhe lo hlauh e. Zanriah ei laiin, “Hlima hi kan khaw tlangval fel leh taimaa sawi a ni thin a, Remi nen an hetih tak hnu hian zu te hi in a ching ve leh zauh a, a dawklak ang tih ka hlau ngawt mai. “ Nu Mawii chuan a ti charh charh a, Johna ka va melh, ngawi rengin chaw a bar mial mial, ka nuih a za bakw si, nuih chi a ni bawk si lo. 

Nu Mawii bawk chuan, “Naktuk chu chaw ei khamah muangmarin in chhuak ang chu tiraw? Tete, hmanhmawh vak a ngai lo a nia, kawng a tha tawh bawk a. Johna chu la cham mai se, he lamah chelhtu a nei tha tlatin ka hria. “ Nui rah rah chung hian a ti leh a, “Hmm, nakinah a hranpain ka la rawn zin zawk ang. In khua hi nuam ka ti lutuk. In fel si.” Johna chuan chaw hmuam ṭûn chung chuan a lo ti ve luam a. Kimteii nen erawh kan ngawichawi ngang mai. Zan inkhawm erawh kan chawl a, Johna phei chu a lo peg hman tawh sia, a chi loh. Kei lah ka phur tehchiam si lo. 

Kimteii a insiam mawlh mawlh a, keini erawh insiam vak a ngai lo. “Miss Mapuii chu a chhe lo em?” Ka tih chuan, “Saiteii nen an inang ṭêp, a vun a nalh a nih saw, bakah lehkhathiam tih takah a polite khawp mai.” A ti lung lung a. “Ngaihi a tluk na nge?” Ka ti leh hram, “E taka! I sawi takah chuan tlaia kan chhuak leh kha kan inbia a, a thinrim tawh lo, ka zin ve daih sia, a lungleng ve a niang. Chuvang alawm zanin pawh nula ka rim loh. Tum loh deuhin ka inham buai ang tih ka hlau” a ti bui bui a. Nia, anni mi puitling ve ve tawh, khatiang vang mai maia an inthen hlen kha ka ring lo sa hrim hrim. Midangin min chim ve reng avangin Mateii chungchanga police ho hmalakna vel pawh ka la hrilh hleithei lo va, in hnuaia kan pahniha kan awm laiin ka hrilh ta a. 

“Mateii bo ni tlaiah maw an zin?” A ti a, a inla detective leh dawn chiang, ka lo bu nghut. Inngaihtuah muk awm fahrana a indawm kun hnuah, “A ni thei lo, ka zeldin dan hi chuan a dik thei lo. “ A han ti thul, “Eng chu nge maw i zeldin leh vak le” ka lo ti. 

“Mateii bo ni kha sunday emaw ka tia, an zin han tih khan ka lo ngaihtuah buai deuh a ni” a ti ve mai a. Ka u kha Inrinni zanah a boral a, Sundayah vui a nia, a tuk Mondayah a bo tih Lanpuii’n min rawn hrilh kha a nia. “Ngawi teh, John, a dik reng alawm, i zeldinna chu, Sunday tlaiah damdawi in atangin Mateii leh Lanpuii ni te an haw a, a zanah a bo a, a tukah a bo thu min rawn hrilh kha a nia. Thil ka hrechhuak, Mateii ni khan khami tlai khan perfume leh pheikhawk a leisak thu a sawi a, sundayah chutiang dawr inhawng an awm dawn em ni? A tirah ka lo ngaihtuah miah lo va, chuan, an thenawmte pawh sunday tlai rum ruma han zin chu ka ti deuh..” ka ti ta zawt zawt a. Ka chhungrilah phurna mak tak a rawn awm nghal. “Chu tak chu lawm, ngaw rawh, Lanpuii hi bia ang.” A ti leh ta sek sek a. Kei pawh chuan îhe loin ka call nghal, Lateii te khan chaw an ei a, an la haw lo maithei. 

“Hello” a rawn tih rual chuan Johna’n phone min chhuhsakin kan thil sawi vel chu a sawi ta mawlh mawlh a, “A mak riau asin, han ngaihtuah teh” tiin a tawp a khar a. Lanpuii chuan a aw thian kharhin, “Perfume leh pheikhawk kha chu ka ni thiannu te monu hian inah a kawl a,an peng haw kha a leisak niin a sawi a, dawt a sawi chu ka ring lo. Chuan, an thenawmte pawh inrinni-a kal tawh tur zawk kha an nia, mahse, an fapa a hruaitu tur ber kha Kolasib-ah eng emaw tiin a tangkhang a, Inrinni zanah a rawn thleng a, tikhan a tuk tlaiah motor hire-in an kal ta zawk a nih hmel, an sawi dan a nia. Ka va hre ve kilh kelh lo..” a rawn ti dap dap a. Hmm, a ho leh ta vek mai. Thildang kan sawi pah ta daih a, Lateii te an la awm tih kan hriat takah chuan kan dah ta rih. 

“Sherlock holmes emaw ka inti tawh asin le” a ti bul bul a. 

“Footage an en hunah a fiah vek mai ang. Naktukah an lo haw dawn alawm.” Ka lo ti a, thil ngaihtuah vak vak pawh a hrehawm, a hmawr kan bâwk leh thei thin si lo. Dar 9 a pel tawh a, keini pawh muthmunah phone kan khawih mial mial. Kimteii pawh, a nu bulah a mu a, a nawmsak vak loh bakah , ‘Kan inhmu leh khat dawn si’ an ti ve deuh a niang. Kimteii nau Spi hi a ṭawngtam vak lo naa che reng mai a ni a, an in pawh a felfai hle rêng a, Kimteii aiin in chhung chetah chuan a fel zawkin ka hria. Ka nuten kumthar lama Aizawla min awmtir an tum thute ka hrilh ve a, “Nau, Nu Saii hi a khirh ve dawnin ka hria. Lanpuii nen hian in innei thei lo maithei, dik tak chuan i nu pawh ka dem lo. Nang pawn han ngaihtuah ve la, amah Lanpuii hi ka va iai e tihna ni loin amaha awm ṭhang, independent, chhungkaw king ang a ni tawh a. Hetiang ho chu mi ina an han mo hian awmdan an thiam lo duh châwk an tia sin. An sual vang ni loin chhungkuaah thuneitu ber an lo ni rei tawh a, mi hnuaia va kun ang deuha hei va inphah hniam kha an thiam tawh lo. Va tlawm dûk tur chu a ni chuang lo va, lehlamah mizo society-ah chuan mo te kan en leh thlir dan kan hre vek a, Lanpuii phei chu fa nei tawh a ni si,. In dinhmun hi a khirh ve riau a nia, nang lah chhuak thei i ni bawk si lo. Ani lah a inthlahrung dawn bawk si..” a ti ve ta mawlh mawlh a, a sawi dik ka ti. Kei chuan hmalam hun hi ngaihtuah loh tawp ka duh. Ka tâwt up up zel. 

“Engpawhnise, hmalam hun chu Pathian kutah dah phawt mai ang” ka ti ve ngial a,. Johna paw’n fiamthu a thawh zui bik lo. Sawi zui vak tawh loin thawnthu a play leh a, ka ngaithla vak ngai lo naa ka phone ka khawih zui peih tawh loh vangin ka chhing vang vang a, ka inngaithla mutchhuak a niang. Ka mutui phian mai. Kimteii’n min rawn call harh a, Johna ka kaitho ve nghal. Kan tlai lutuk hlauin tukṭhuan pawh kan ei hma ta deuh a, Nu Mawii pawn zin leh turin min chah mawlh mawlh mai. Ka nu khan saum a lo chah niawm tak a ni, Buanga’n Rasgula bur khat lai an um sa chu min pe a, Lungleiah chuan pack khat tlemtê 50-in kan lei a nia, bâwl hi kan duh si, ka nu a lâwm teh ang chu. Chawhmeh bakah thei chi hrang hrang nen, Johna pawh a khi vur vur reng mai. Khawpuiah chuan maian tel khat pawh 30 aia tlawm a awm tawh lo. Chhuak hlek ila pawisa hi a ni vek tawh mai a, hei hi nia lehlamah Thingtlang nawmna chu, thenawmte nen an la inban tawn reng a, thlai thar eng ilo an inthar tem reng a. Mahse, harsatna tam tak zawng a awm thei ang chu. Tiang chuan Nu Mawii te chhungkua nen chuan kan invai liam ta a, “Veng hmawrah khan ding lawk rawh aw, ka lu na hi hi thawidam a ngai “ Johna’n a rawn ti leh ta. Ka thaw hawk ringawt. Kimteii pawh a ngawi reng, a lungleng ve deuh a ni maithei. Johna sawi ang chuan zu zuar te in piah deuhah ka ding a, Hlima nen an lo lam tawh vangin a va la hreh lem lo. Buh zu a la ni bawk a, an chhiar tlawm tho si,. “Thingpui vel chu min treat tawh mai rawh” tiin a pawisa la neih zawng zawng chuan Lungleia hawn tur a la a. Ka chek hluk ringawt. Tlan nawm nan tiin no khat chu ka in sak ve, chaw kan eina a la rei si lo va, luak a chhuak tep. Kimteii te khua pawh kan chhuahsan a, Johna pawh kar lovah a muthlu ta bawrh bawrh a, Zai ka play bawk nen, Kimteii nen pawh kan ṭawng lem lo. Ka lakah a la titau deuh nge phei chu ka hre lo. A ho em mai. 

Ṭawipui south-ah bawk kan châwl leh a, kan chawlhna dawr nghaktute a bekbawr sur sur hnuah Johna chuan dawr kil pindan lian lo takah chuan min hui lut a, no 2 ve ve kan in leh, a tha bawk a, kei pawh ka hai deuh chhap mai. Ruih lutuk erawh ka hlau, thil ei pawh a tui e. Kimteii erawh a ngawichawi hle reng a, kan han tlan chhuah leh chuan kan kainam tawh si, Johna nen kan ṭawng dun leh mawlh mawlh a, kalkawng pawh a titawi ve deuh alawm. Johna chhuk hnua kan in lam kan pan laiin, “Ka nuten zu i in tih an hria ang e aw.” A ti sap a. 

“I sawi loh te chuan” ka lo ti. A ngawi leh ta daih a. In kan thleng a, kan thil hawn te kan han phawrh a, kei erawh ka ṭawng bawrh bawrh duh lo, ka nute bulhnaiah phei chuan ka awm duh lo hrim hrim, ka in tih an hriat chuan a ṭêk leh dawn sia e. U Lawmi te pawh kan thil hawn chu kan pe ve a, kawiâm phei chu naupanghoin an lo duh khawp a, a lawmawm tak tak a ni. Kan inah ngei zanriah kan han ei leh thei a, a lawmawm e. 

Chau deuh reuh mah ila tiin Lanpuii te in lam ka pan leh ta poh a, avocado bakah Mampuia ei tura ka dah hran thei velte chu ka kensak ṭât bawk. Vawiin lamah Mateii case an buaipuina vel pawh hmaichhana inhrilh hriat ka duh vangin ka zawt duh lo va, bakah motor ka khalh nen, ani pawn min rawn be buai lem lo. Mampuia’n lehkha a lo zir malh malh a, ka thil hawnte chu ka han pe a, a lawm thiam ngang mai. Thingpui sen hâng ina kan thutdun laiin, “Eng nge vawiin lamah Mateii vel chu..” ka ti a. 

A sana bih zauhin, “Tlaiah an fapa kha a thleng chauh a, police lam an la kal lo. Mahse, an hrilh sa tawh a, an thleng phei tep tawh ang” a ti a. Ni dawn tak e, ka lo hmanhmawh deuh a ni. A kut ka vuan a, “An hrechhuak ngei turah ngai ang aw” ka ti sup a. 

“Nia, ka beisei a, ka hlauthawng tho bawk sia. “ A ti khur dat. “E chuan! Dawr min nghahpui tur nula pakhat ka ruai dawn a, Lateii pasal Kima cousin kha a nia, kei Mampuia school kal hruai ngai ve thin nen, a rintlak ka ring..” a ti leh hluai a. “Umm a tha lawm, nakinah chuan a la ngai dawn tho tho. “ Ka lo ti ve mai a. 

“I nuin sawi a nei leh tawh em?” A ti dat a, ka va melh zawk. “Nei lo, nei mah se, awmzia a awm lo. “ Ka lo ti hmuk. 

“Chutiang a ni ringawt lo, i mawhphurhna hi a sang si a, keimah vanga in buai hi ka hlau a ni. “ A ti leh a, a thutak êm avangin kei pawh ka thutak nghal viau. “Nakkum lamah Aizawla dawr nghahtir min tum a, ka hnial hran lo. Mahse, kan inkar hi nghawng tel lo se ka duh khawp mai. “ Ka ti ta law law a. A ṭawng leh hmain, “Ka nu hi chuan thil a ngaihtuah nasa êm a, Mami lo boral bawk nen, a rilrua awm ang ang a sawi ve mai a nih kha, midang chuan engmah an sawi ngai lo a nia. Tin, ka nu pawh hian a iai che a ni lo va, a duh lo che a ni lo. Hmalam hun a ngaihtuah hian nang hi kan ina lâwi duh turah a ngai thei lo che a, kei ka chhuah daih a hlauh luatah a ṭawng ve mai mai a nih kha.” Ka ti ta mawlh mawlh a. Ni e, zep ṭit ṭet hi neih a ngai tawh lo, thil hi a nihna ang bawl hian sawi ila, puitling ve ve kan ni tawh a, chinfel dan pawh a awm zawk ang. 

“Ka hrethiam alawm,. Fa ka lo nei ve tawh si hian a tibuai a nih hi. Dik tak chuan kei pawh ka rilru hi chu a buai ve thin, ka lo inhamtâng laklawh si, in ina lawi hi ka hreh pawh a ni lo, ka fapa pawh i hmangaih tih ka hria. Mahse, Mampuia nena rawn luh tawp hi ka inthlahrung ve a ni. Mampuia lah a la â ve bawk si. “ A ti ve charh charh a. 

“Engpawhnise, rinawm phawt mai ila, kan kawng tur chu Pathianin min la ruatsak mai ang. “ Ka ti ta ringawt. A lo tlai ve deuh tawh nen, ka hawsan ta rih a,. Police te’n chanchin an rawn hrilh veleh min rawn hrilh ve nghal tur thu a sawi bawk. 

Mami damloh lai aṭang tawh khan Bawihteii hi Kimteii bulah a mu kha a nia, a boral hnuah pawh a la mu zui ta zel a. Ka haw chuan a lo la mu lo chu niin, a pum nâ vangin an lo buai deuh a niawm e. A luak bawk nen, eisual a nei a niang tiin sawhthing te an lo pe a. A mittui a lo parawl kiang mai. “ Damdawi inah han chhohpui lawk ila” ka ti vat a. “I leng rei lutuk a, rawn call che ka tumin i pain a remti si lo, chu chen chen i len reng reng a” ka nu chuan a ti leh hlaih hlaih a. Ka ngawi reng. Ka pa chuan, “Jection te a ngai a niang, Kimteii nen han kalpui lawk mai r’u, i ni awm se a tha tur a nia” a rawn ti ta hlauh a. Bawihteii chu kan chhohpui ta nghal, dar 10 a pel tawh a, a thuhrimin ka pa paw’n motor a khalh thei tho a, Mama pawh a koh theih, kei a awm lo ber min han mawhpuh vel kher chu ka lungawi vak lo. Casualty-ah kan lut nghal a, nurse fel leh biak nuam takin a lo jection ta nghal a, kan let leh nghal. A pum nâ pawh a reh ta a, a luak erawh a la chhuak deuh a niang, a uak leh bârh bârh thin. A nuamsam lo nen a piin, “Kimteii te haw chau nen, Bawihteii chu kan bulah mu mai rawh se,. “ A ti a. A pite hian Mami boral hlim pawh khan mutpuiah an sawm reng, mahse, amah hian a duh tlat lo va. Amaha mut ve a duh vangin a hmaa an nufa roomah khan Kimteii pawh khum hranah muin bawihteii nen pindan khatah an awm tihna a nih chu. Zanin erawh a pi a ngai ve deuh nge an bula mut chu a hreh ta bik lo va,. Mut hmain ka inthiar leh tê tê a, ka chhuak chu ka nuin tuilum a lo in dawn mek a, “Kimteii saw i hau nge? In inbakkaih deuh nge? A va ngawichawi ve. Nidang a ang lo” a lo ti a. Ngaihsam fe hian, “A lung a leng ve niang” ka ti liam puat. Ka pindanah ka luhsan ta daih a. Ka nu hi hriselna lam ngaipawimawh mi a ni bawk a, zingkar leh mut dawn pum ruah lai hian tuilum leh nimbu tui hi a in ngei ngei, hei vang hi a niang a kum ngaihtuahin a hrisel a, a vun a nalhin a pum lam a sawisel ngai lo. Lo ti ve thin teh u. 

Lanpuii’n engmah chanchin thar a la rawn sawi lo, police te chu an va kal lo tawp a niang. Thla a liam tawh a, Mateii case chuan ngaihpawimawh a hlawh ta vak lo te pawh a niang e. A tukah chuan Bawihteii pawh a tho dam ta hle, ka han thlah a, ka pa pawh huan kal turin a insiam mual mual. Ka ni rawn haw lah chu, “Nizan kan tlaivar chiang lutuk a” tiin chaw pawh a ei peih lo, a mu nghal hmak. An hna hi a chang chuan a harsa ve thin a, tlawmngaihna tak tak nena hmachhawn hi a ngai ve bawk a ni. 

Chawhnu lamah Lanpuii aṭangin chanchinthar ka dawng ta a, Cctv footage chu an lo en ngei a, Mateii chu mipa pahnih mask vuahin an kârcheh a, a landanah chuan tihluihna hmanga hruai te pawh an ang a niawm e. Mipate hmel chu mask an vuah tlat avangin hriat ngaihna vak a awm lo va, an thawmhnaw hak erawh an chhinchhiah a, 5’7 ft vel ve ve, sa ṭha lam leh lu buk lam ve ve an ni tih zawng chu an hmuh theih a ni. Beiseina pawh a chuai rawih rawih mai. Police te hnualsuat vang ni loin zawn chhuah an harsat tawh ka ring,. Mihring kan tam ve tawh a, bakah Mizoramah an awm kher ang em tih pawh hriat a ni lo. Pawimawh ta ber chu an chuanna motor number hriat kha a ni, kha lah kha hriat a har hmel si. “Mateii chu tihluihna hmanga hruai an nihte chuan au chhuah tum ang pawn a lang lo em mawni le” ka han ti ngawt a. “Sailova kha chuan, ruih nei niawmin a sawi, amah kha kal pawh kal hleithei lo, a kalpuiten an dawm hram hram vanga kal niin a lang a tia, chuvang chuan aw chhuak tur pawh a nei lo a ni maithei. Police ho ngaihdan pawh a ni a ti..” a rawn ti a. 

“Ka hrethiam tawh lo. Khang misual te khan chet leh hun an nei maithei asin. Misual vakvai, chenna mumal nei lo an nih chu a rinawm loh, Bolero-a an chuan danah khan..” ka ti a, “Nia, engvanga Mateii ber kher that duh nge maw an nih ang le” a ti chuai raih. Hei hi a ni kan hriatthiam theih loh tur chu..

Kan Johna a reh vung vung viau, A zu hawn kha a la chen a nih a rinawm. Ani hi zawng a tih tawh lama kal tlut chi a ni sia, a rawn pangngai ve leh mai ang chu maw. Ni a liam a, kar tawp pawh kan thleng leh dawn ta reng mai, a ngai renga ni hman liam chu nin chang ka nei. Lanpuii hi awm lo phei se chuan engkim hi a hneawm zual ngawt ang. Thuthar lah a awm thei si lo. Kimteii nen pawh kan inbe pangngai leh tawh a, a zia chho viau e. Zirtawp zan a ni a, a hma aṭanga a lo sawi zauh zauh tawh a nak leh tai bawr vel nâ avang chuan Kimteii chuan chaw pawh a ei peih lo va. Ka nu leh paten an ngaihtuah viau. Kei erawh chuan tih vak ngaihna ka hre lo. Lanpuii te ina len tum ka nia, mahse, ka nuin, “I han kalpui mai ang, a hma pawn a sawi reng tawh a, amah hi a chhel êm zawk a, a rilphir te hi a nih ka ring tlat.” A tih avangin Kimteii chu Damdawi inah kan chhohpui a, an lo admit hmak mai. A tukah ultrasoud vel chu a ti dawn a ni. Riahpui a ngaih em em rih loh avangin kan hawnsan leh ta phawt a, a tuka test vel te an han neih chuan ka nu rin ang chiahin a rilphir zai a lo ngai a lo nia! A lo puakkeh lek lek tawh,.chawhnu lama zai turin an inbuatsaih ta chûk chûk a,. Kei pawh dawr ka khar hma phah. Ka nu leh Mama te nupain an han ṭawiawm a, eirawng ka lo bâwl thung. Mama fate leh Bawihteii te lah an che hnawk angreng si, mahni tawkah ka buai ve viau mai. Zanah ka nuin a riahpui a, cabin kan chang tawh si lo, damlo awmpuite mutna hi a nuam lo ve thei sia, mipa riahpui an phal bawk si lo nen, ka nu chuan hrehawm a ti ngawt ang. A tuk sunday a lo ni bawk si. Mahse, vanneihthlak takin Kimteii nau Spi kha Hlima’n bike-in a rawn thlah thei ta hlauh a, hah leh chauh pawh sawi hleithei loin Spi chuan a û chu a han awmpui ta nghal a, ka nu pawh a rawn haw ve ta a ni. Hlima pawh riak turin kan chelh a, Johna a rawn lawr ve nghal zat bawk. An khuaah khati khawp khan min duhsak bawk a tiin kan lo khilai ve ngei a, Kimteii dam lohna chuan min tibuai ve vak lo a nih hmel. 

A tukah Bawihteii thlah pahin Spi chu chaw ka pe a, Kimteii pawh buhhawp a ei thei tawh. Han ngaihtuah vak dan ka hre lo,. Ka nu leh paten an ngaihtuah tho bawk a. Hlima pawh a haw phei ve leh tawh a, zanah ka bialnu duhtak ka rim leh. Mampuia hritlâng âwmna chu a damdawi ei vang nge a muhil hma hle a, ruah a sur cherh cherh a, boruak a tinuam hle. Thutthleng seiah insi riala thuin kan intawn tirh laite kan sawi dun mial mial a, “Mipa dang kha i ang lo alawm,.a mak tawp, keimahah khan danglam a awm tlat..” a tih chuan lawm deuh hian ka melh a, a inrin hmain ka fâwp zui hmiah bawk. Ani pawn min chhanglet tha kher mai. Ka bawhthlu leh ta nge nge a, a ṭang ṭûn bik lo. Kawngka lam ka va melh zawk a, kan kalh thlap bawk, ruah lah a sur cherh cherh si, a tawp thlenpui mai duhnain ka khat ta a, ka han hrâwm nawk nawk a, a vun nel thep leh mam em emte chuan min tizauthau takzet,. A meng diar diar a, a biang tai têk bawk. Ka han insiamrem deuh a, “Te, eng nge i hriat?” Aw lâwi deuh hian a ti a. Ka chhang lo, a nghawng vel chu ka nul thuak thuak a, a thaw hawk, “Tho teh,.” A ti leh a. Hnai taka melhin, “A tawp thlen ka duh, khawngaihin” ka ti zawi sup a. Chiang zet hian min melh a, a mitmeng pawh a buai nak mai. A inngaihtuah fim hmain ka fawp leh vawng vawng,. Dipdaltu nei lo leh inthlahlel tawn bawk si chu chumi zan chuan a tawp ka thlenpui ta. Ka lawm a, ka hlim takzet,. Kan han zawh fel chuan, “Ka riak ve mai dawn” ka ti a, “I zak lo.. “ a ti hlak. Thil tha a ni lo tih chu hre mah ila, ka ta liau liau a ni tih ka lantir thei chuan min tizangkhaiin inrintawkna min neih lentir zual sauh a, tin, ka hmangaihna pawh a pung zual sauh. Ka haw dawn chuan, “Zawngchhang loh tur aw” a ti zauh a. “Sawi lawk theih loh” ka lo tih chuan a ner sawk. Kan inmangtha zui ta a. 

Kha ta ṭang khan kan inpawh zualin kan inthlahlel zual a,. Ka nupui nihtir ngei ka tum ruh hle bawk. Kimteii pawh a kâng ve zel a, zinga chaw ka pek bak ka tlawh lem lo. Nilai zan inkhawm an bang chu len tumin ka lo inṭam mek a, “Khaw nge i kal leh dawn? Leng reng mai, in chhungte hi uap ve rawh. Kimteii pawh han kan ve la,.”ka nuin a ti leh hlak hlak a. “Inkan hun pawh a nih loh hi, bakah tihtur a vâng thei e, damlo kan hi” ka ti ve hluk a. 

“Nunpuii tih ṭuah hum reng mai, a hmaa ka sawi tawhah khan ka la ding reng a nia. I then fel lo a nih chuan a pawi khawp ang “ a ti leh buan buan mai. Ka nî a awm lo va, an meeting dawnin ka hria. Ka pa lah tv enin a ngawi run si. 

“Engvangin nge then tura min duh em em a? A eng ber saw nge i duh loh chhan?” Ka ti ve ta ngat a. Chek hlakin, “Engvangin nge ka duh zawk ang a? Nang aiin a û fê a, chutah fa a la nei zui,. Kan ina a rawn lawi luh hi ka remti lo a ni tawp mai. Amah pawn a duh hek lovang, hruai hran che hi a tum dawn, tun aṭangin ngaihpawimawh berah i neih tawh hi. “ A ti ta sak sak a. 

Ka pain, “Thawm dim r’u,. Bawihtei’n lehkha a zir saw. Tebawih, i nu rilru hi hriatthiam tum rawh. Amah ngau ngau saw kan iai a ni lo. In dinhmun a khirh a nih hi, ṭha tê têin thlah tum rawh. “ A lo ti chuar chuar a, ka pain chutianga a rawn ti ve ta chuan min tina hle. Ka nuin a rilru a lo hmin vek tawh a nih dawn hi. 

“Ka thlah ringawt thei lo. Ka hmangaih alawm.” Ka huaisenna zawng zawng nen ka ti ve ta hmak a. Ka nu chu a thinrim hmel hle, mahse, Vanneih asiamin a phone a rawn ri ta hlauh a, kei pawh chhuak turin ka mood a chhe lutuk, pindanah lutin ka ṭhu tûm bûr mai. 

Kimteii pawh a cham kher nghah ngai loin a rawn chhuak thei ta hlauh a. Spi pawh a thu chal mai, damdawi in-a damlo awmpuitu nih hi hrisel that a ngai khawp mai,. A boruak hrim hrim pawh natpui tham a nih tawh nak alaiin mutna mumal a awm bawk si lo. A damloa te chu an mu a, mut hmunah damdawi an pe a, inthiar hunah awmpuituin a hruai thlap bawk a. An tan chuan han nat belhna tur vak a awm lo, a awmpuitu te hi cabin a nih si loh chuan khawngaihthlak tak an ni. Thutthlengah mu dawn se, a tawi law law si, ke tawma mut zankhua a ngai a, a tam zawk hi chu chhuatah an mu mai zelin ka hria. Ka han sawi duah a nih chu. Spi pawh a la cham rih a ngai tho, ka nu a hnaah a kal tawh sia, Kimteii a la che hleithei si lo nen. Amah pawn a hreh lem lo. A che peih ka tih tawh kha, ka nu pawn a fak leh hle. 

Mampuia te pawn exam an ṭan tawh a, ka leng lutuk lo. Sunday zanah erawh ka ngai tawh bawk nen, ka va leng a. “Thawhlehni-ah an zo dawn a, min rawn chah ngun bawk nen, kan va zin leh maithei. “ A ti a. “Nia, i thu thu,. Mateii chungchang pawh i va nawr ve leh deuh ang a, eng emaw hmuh chhuah tur te a awm mial maithei asin.” Ka ti a. Kan khatih hnuah kha chuan ka ring tawk khawp a, khawiah pawh awm se ka ngaihtuah lem lo. “Kimteii chu a tha zel maw? Rawn kan a tha viau naa, ka hreh deuh a. “ A ti daih a. “Ka nu vang em ni?” Ka lo ti vat a, “Ni deuh e, a nuam chiah lo. Kei chu maw hmalam hun ka ngaihtuah hian ka â dawn tlat zel. A chang chuan ṭha taka in ṭha ṭhen mai hi a tha zawk ang em aw ka ti rum rum” a ti ta hliai a. Ka melh kawk ringawt. 

“A ngai lo “ ka’n ti ngawt a. “Nghak hram hram ang, hun ṭha a inherchhuak em em ang. “ Ka ti leh a. “Keimah hi Aizawlah inbengbel ta daih ila, nang pawh Aizawla i va awm pawh a ngaih ka ring lo. Keimah vang a nia Aizawla awmtir che pawh an tum” a ti tân tân a, tlemin a lungnilo deuh tih ka hai lo. Tiang hian a la âng ngai lo. “A ho lutuk, keiin ka duh che chuan a tawk mai lo mi?” Ka ti a. Han thlem vak dan ka hre lo a ni. 

“Tawk lo, i chhungte duh loh nih kha ka duh bik hleinem. I nu tawngkam te pawh hre lo ka ni bik lo. Dik tak chuan ka hmangaih che avangin ka tlawm ve hram hram tho, nuthlawi ka nia, fa pawh ka nei, ka inhai lo. Kei hian ka zar vang chea inzui ta pawh kan ni bik lo. Chuan, hrereng la ka duh chu ka fapa hi engti kawng zawng mahin ka phatsanin ka kalsan dawn lo “ a ti leh hlaih hlaih a. A thinrim ve takzet tih a lang. 

“Ka hrethiam alawm i rilru chu, kei pawn hrehawm ka ti. Kan inru mai dawn em ni? Nge ka lo awm ve mai dawn?” Ka han ti ngial a, rum zeta min melhin, “Âtthlak lutuk, khatia i awm kha an hlauh vanga tunah pawh inthentir min duh tih i hre ve reng. Inruk leh inluhkhung lam kha chu a sawi pawh sawi tawh suh. “ A ti hmak hmak a. Ni dawn tak e,inṭhen ka duh loh vangin Lanpuii hi ka luhkhung ang a, in ka chhuahsan ang tih an hlau lutuk tak alawm. Ka lo puitling lo hle mai. Mahse, inṭhen ka duh si lo. “Inthen lam kha chu sawi tawh lo phawt rawh. Kei pawn ka theihtawp ka lo chhuah ang a, an rilru hneh te ka lo tum ve ang. Ka nei ngei ngei dawn che. “ Ka ti nghet charh a. Ka thusawi chu ka ti tak tak, hei chen kan kal tawh a, a tawpna hi hlimawm se ka duh a ni. Kei hian ka chhungte rilru ka hneh a ngai a ni. 

Ka haw chu an lo la mu lo va, A tukah Spi a haw tawh dawn vangte pawh a niang. “Lengkunga pawh a rawn haw ve ta hram alawm. “ Ka nu chuan a lo ti leh hram a, “Spi chu haw rih lo mai la, i ngaihawm dawn sia.” Ka lo ti tihsan daih. “Ka nu a buai ve sia, U Buanga te nupain ram hna an thawh a ngai sia, vawk leh ar kan vulh nen,. Haw loh theih loh.” A ti a. Ni e, a awm loh chuan a nu a buai khawp ang. 

Dawr bungrua a lo thleng nen, Mimi nen mawng pawh kan hung hman meuh lo. Dar 3 bawr velah chuan kan ṭhu ve hman hram,. Rilṭam pawh kan hrechang meuh lo. Thil ei pahin phone kan khawih mawlh mawlh a, fb ka lut chu ka wall page-ah Ruang chhar thu an rawn post leh ta. Mateii aia kum 2-a upa, Republic veng nula Bianca Lalpekmawii a ni a, ni 2 kal taa bo niin a bo thu vel post a la awm lo thung, vawiinah a chhungten FIR an theh lut chiah a niawm e. Tichuan, vawiin chawhnuah Falkawn thlen hma mi huan kawngah a ruang an hmu ta a ni. Mateii ka hrechhuak vawng vawng. Ka thauah a man titih nge ka tiril a ṭham veng veng nia mawle, Mateii thattu tho kha a ni ang em? Mimi pawn a hmu ve a niang, a sawi ta hlut a. Ruang chhar chuan rilru a luah ta ngut ngut mai. Mateii case lah a zuzi titih chu a ni ta ringawt si a, he nula thihna atang hian chhui chhuak ve thei se ka ti hle mai. Beiseina pawh ka nei ve leh ta deuh ringawt. 

Thawhleh zanah a tuka Aizawla an zin dawn vangin ka va leng leh a, a lo insiam mial mial, “Engtik thleng nge an chawlh dawn? Mampuia te chu” ka ti a. “Karleh nilaiah an ṭan dawn a, thawhṭan velah rawn haw kan tum ang, bungraw lam khawm pah ka duh bawk sia “ a ti a. Mampuia exam zo thawveng pawh thenawmah a va leng ve zuai a,. Bianca thih chungchang vel kan sawi dun leh hrep, ani pawn beiseina a lo nei ve tho a, “Va fimkhur rawh aw, ka hlauthawng a nia” ka ti deuh reng bawk. “Min tihlauthawng ve vek, ka fimkhur dawn alawm. Min ngai ang em?” A han ti sap a, “Sawi pawh a ngai mi?” Ka lo ti deuh hluk. A dawr pawh a khar rih dawn a ni, a nula chhawr kha a la tir êm a, a awm loh chuan a ringngam lutuk lo a ni maithei. Mampuia a rawn haw a, zinga chhuak tur an ni bawk nen, mu hma se ka duh a, ka hawnsan ta rih. Lehlamah va zin thawveng leh se a pawi lo,. He lamah an nufa chauhin an khawsa bawk si, Mampuia tak pawh a lainatawm. Tin, ka leng lo deuh ang a, ka nu mitmeng râng pawh ka hmu tlem deuh ang chu. Ka muhil thei lawk lo va, ka inlet sek mai. Kimtei’n min lo call a, mak ka ti deuh hle, ka la ve mai bawk. “U Tete, ka khua a sik a, ka thawh dawnin min zaina lai hi a rawn na zual tlat a, khawngaihin nachhawkna min rawn pe lawk thei em le? Ka nute ka tibuai hreh sia” a rawn ti. Chuti na nâ na chu tiin nachhawkna ka va pe a, a pang a lo sa hluah mai. Ka khawngaih ve ta deuh, “Ti nge i rawn sawi vat loh, vawiinah i che leh em ni? La che suh kan tih mawlh mawlh kha” ka ti nghut nghut a. “Ka che vak lo,. Ka nute hrilh suh aw, an buai leh vak ang. Ka tha mai ang” a ti a. Han kalsan tlawng chu nuam ka tih chiah loh avangin khumah chuan ka ṭhu a, “Tuilum in la, a chhawk hma deuh maithei che asin. “ Ka tih chuan a lu a thing a. “Min chhâwk mai ang. “ A ti sep ringawt. 

“Nih chuan ka pheisan ang che aw, eng emaw a awm chuan min lo call leh mai dawn nia” tiin thawh ka tum a, min lo chelh vat. “An zin dawn tiraw?” A ti ta daih a. Engtin nge maw a lo hriat leh hman ni. “Aw, ti nge?” Ka ti nghut a. 

“Ka zawt mai mai che,. Umm, va mu rawh, ka muhil thei tawh ang “ a ti nghat a, ngaihte pawh a tiṭha lo deuh alawm le. 

An chhuah dawna msg min lo hnutchhiah chu ka thawh veleh ka reply nghal a. An kal tluang êm ang chu maw. Kimteii chu rin aiin a rawn tho harh peih a, a lawmawm e. Bawihteii te pawh exam an zo rih bawk a, a thawveng ve hle. Kei pawh dawr lamah bawk ka ṭuan leh a, tunlai chu customer kan nei ṭha ve a, a nuam angreng viau. Lanpuii te pawh rin aiin an thleng hma a, Sailova’n a lo hmuak bawk a, ngaih a ngam ta deuh e. Zanah Johna nen Ngaihi kan rim a, ina han awm ngawt hi ka ning deuh thin. Ka nu a phun peih bawk si. Lanpuii pawh, “Ka khua a sik ser ser a, ka chauh vang nge mawni, ka mu hma ang” a tih avangin kan inmangtha hma a. In ka thlen chuan Kimteii a lo la meng a, “Ti nge i va meng rei ve” ka ti a. “Ka lo nghak che” nui chung hian a ti a, “Hmm, i khuasik leh ang e, va mu tawh rawh” ka ti ve mai a.

“In nu te chu an thleng tluang maw?” A ti leh a, a dilchhut riau zel hi ka ning lek lek zel, an tluan thu ka sawi a, ka ha ka nawhsan ta daih. Zing dar 7 rik hma deuhin Lanpuii’n min lo call a, mak ka ti deuh. “Te, Bianca thattu niawm takte kha an man asin” a rawn ti a. Ka nghing dawt. “Ehe! Tu te nge?” Ka ti hlut a. 

“Ka la hrechiang bik lo, Mateii case IO khan min rawn bia a, beiseina an neih thu a rawn sawi a. Vawiinah Sailova nen stationah kan va kal ang” a rawn ti a. Ka lungphu a rang deuh. “A va tha ve, mi thuhmun lo ni hram se aw. I khawsik eng nge a an?” Ka ti nghal zat a, “Hei ka tho dam ti ila, ka lu a hai deuh a, ka khawsik effect kha a niang. Chanchin kimchang ka rawn hrilh leh ang che.” A ti zung zung a. Kei pawh ka tho zui ve nghal,. Ka nuin, “Teh mial a! I va tho hma ve” a lo ti a. Eng emaw thil a nih loh chuan zing dar 8 vel hi ka thawh hun a ni tlangpui thin. “Nia, ka harh laklawh a” ka ti ringawt. “Mawina, An nuin a rawn kaitho a nih kha” Kimtei’n a rawn ti kher a, ka ner khum vak ringawt. 

“Nuthlawi lungfingi bawk maw?” Ka nu chuan a lo ti leh hlak a. “Zingkar aṭang chuan ka mood tichhe lo teh u.” Ka ti ve ta hmak a.