Kan Monu

KAN MONU..! 

Ziaktu: Toni Rãlte

"Inru kher lo va insawirem dan pawh awm reng si a,Mama chu aw" ka nu chuan a ti vawng vawng a. Ni e, ka ú chiah Muanpuia Mama tia kan koh chuan nupui a rawn ru tlat atin ni. Ka nu chu a lungawi tehchiam lo tih ka hria, lungawi lohna chhan tur pahnih a nei. Pakhatnaah chuan kan tette atanga min zirtir thin, "Biak in hawng ngeia nupui pasal hi chu neih hram a tha" tih a ni. Mama chuan a zawm thei ta lo chu a nia! Pahnihnaah chuan Mama hian bialnu nghet kum 1 a lo zui ve tawh U Tei a nei reng. Kan veng a mi a ni nghe nghe. Mahse, zirtirtu hna a hmu a, Thingtlangah kumin kumtir khan a awm ta daih a. A awm tirh te kha chuan an la inbe tha reng, Mama pawh sunday hmangin vawikhat chu a han zin tawh nghe nghe a ni. . mahse, a rei a, Mama chuan a rinawm lohsan ta nge an inngaizawng tih kan hriat miah loh hmeichhia a rawn ru ta mai chu a nia! Ka nu leh U Tei kha an inngaina em em a, U Tei hian a duatin a damdawi tur te hi a leisak bakah a rawn thawn fo thin. Mi hausa neinung pâk chi ni lo mah se; ka nu hian U Tei kha a mizia avangin a ngainain an chhungkua pawh mi ţha chhung, rilru zau leh inpawh tak an nih vangin Mama nupui tur atan chuan a lo duh ve em em a lo ni. Mahse, Zaninah Mama chuan chung a duhthusam te chu a rawn ţhiat ta vek si a. 

Kum 12 ka nih laiin ka pa chuan Stroke vangin min lo boralsan tawh a. Unau pathum kan ni a, kan upa ber hmeichhia hian pasal nei tawhin kei leh Mama leh ka nu tlawng kan khawsa a. Ka nu hi 4th grade niin, Mama hian vanneihthlak takin mi te min sawipuina zarah Police Constable hna a thawk ve bawk a. Kei chauh chu chawmhlawm ka ni. Tunah M. Sc (Geo) ka zir ve mek a, kuminah hian ka tluan chuan ka chhuak dawn nghe nghe. Ka nu hi a fakawm em em a, ka pa boralte khan a la tlawntlaiin ala thalai hle naa, pasal dang neih hi a tum tawh lo bur mai. Pasal nei leh tura han tih fiam changte pawh hian, "Tun laiah mi an tha tawh si lo va, pasal sual deuh te ka nei ang a;in rethei palh ang.. Ka ţulpui law law ang che u" a ti mai thin. Chuvang chuan ka nu chu keini pawn kan zah a, a thu pawh kan awi ve khawp mai. A fapa neihchhun erawh chuan a thu a zawm famkim thei ta bik lo a nih hmel e. 

"In lo puklawk tawh em ni? " Mama te bula va kalin a va ti ta a. Mama chu a kun deuh run a, "umm" a ti sup ringawt. A nupui tura a rawn ruk chu zep thu mi sual tak ni chuan a lang hran lo. A ngawihchawih hmelin, a zûm ve dâk mai. Nula hleitling lam, sam sei tak, cher ria lam deuh a ni a. A hmel pawh a chhe lem lo. 

"A nih Bawihi tu nge i hming le? " ka nu chuan a ti leh a. 

"Vanlalzari ka nia, Vanlal min ti mai zel" a lo ti thlap a. A tawngkam hman dan pawh a fimkhur hle mai. A zam ve te pawh a niang e. 

"A zia lo hle mai. Inruk kher kher hi chu ka ngaihdan a ni lo viau naa, in lo laklawh tawh si a nih chuan kawng dang a awm loah ngai mai ang. Engpawhnise, zan a rei tawh a, naktuk lamah kan la sawi tha dawn nia. Mu phawt ang u" ka nu chuan a ti ta diam a. Ka nu nge nge. Ka u te pawh a room lamah an inzui phei nghal a. Kei pawh ka mu. 

Vanlali tiin ka sawi mai ang. Ks u nupui mah nise, kan inrual chiah a. Amah pawn ú a phut lem chuang lo bawk a. Ka u ta lo mai. Vanlali chhungte pawn ni 2 hnuah an rawn hruai a. Ka nuin palai a tir ta nghal bawk. Nau an lo pai tawh si nen, rem loh ngawt thu awm bik hek suh, thla khat hnuah inkutsuih tur chuan thu an titlu ta a ni. 

"Mam, U teii nen in inthen reng reng a mi? " ka tih chuan, "Then tawh e mawle.. Engmah inhre lo mai mai zawk alawm. A thawhna khuaa thawk ve tho nen an lo inkawp a. A in luahah te pawh an riak dun thin a niaw e. Ka rilru nain Vanlali kha ka kawp ta ringawt a, a lo rai ta bawk si nen, kawng dang ka neilo a nih kha" a tih takah chuan, U Teii laka ka inthlahrunna pawh a nep sawtai. Mak erawh ka ti angreng viau. Engpawhnise, Mo kan nei ve tawh dawn sia, ka nu pawn min zilh reng mai. Mo laka awmdan mawi te.. A tam mai. 

A tawi zawngin sawi ila.. Vanlali leh ka u te chu inneiin, mo kan nei ve ta. 

"Mapui, i u ex kha a thlalak i nei em? " Vanlali'n a tih chuan, "Nei e' ka ti ve mai a. Ka hmuhtir nghal. 

"I u khan a tuar tawp a, min kawp chhan pawh ka hre reng. Mahse, ka nep zo lo va" inthiam loh hmel deuh hian a ti a. 

"Nia, mak ka tawp.. U Teii chu maw" ka lo ti ve a. 

"Mahse, i u hian a la ngai thin ngawt ang" ngui deuh hian a ti leh a. 

"A nupui i ni tawh alawm.. Ngai tawh bik lo vang" ka ti liam puat a. 

Zanah Larry a rawn leng a. Ani nen hian kum 2 chu kan inngaizawng ve ta. Kei aiin kum 2-in a naupang zawk naa, a puitling zawk. Chhungkaw pangngai tak an ni a. Ka nu pawn a sawisel ngai lem lo. Class kan kal dun ziah a, ani erawh M. Sc (Phy) a ni thung. MZU atanga intawng kan ni bawk. 

Thingpui ka lumsak a, Vanlali nen chuan an lo inkawm ve a, Larry te hi Mission vengah an awm a. Vanlali chuan a thian Mission veng ami te ho chu a zawt kual a, tiang chuan innel takin an inkawm ve. A lawmawm ka ti. Chhungte mut vek tawh hnuah kan thu dun leh ran a. Larry thatna leh ka then phal lohna chhan chu sexah a buai ve lo hi a ni. A la virgin tlat! Ka ngaisang a nia aw. 

"U Vanlali chu a fel kha.. Mo sual deuh in nei ang a, a tiduhdah ang che tih ka hlau a." Naupangchhia zet hian a ti a. 

"Ka nu damchhung chuan tuman min tiduhdah lo vang" ka lo ti ve hmak. 

Hun a kal ve zel a. Rai saa innei an ni ka tih kha. Vanlali pawh a dul chu a rawn puar chho tan a, vaccine te pawh a la tha khawp mai. Mama pawh a felin a puitling sawt khawp mai. U Teii erawh a reh ta vang vang a, a chang chuan hmuha zawhna zawh ka chak thin. Ka u kha a hmangaih tehlul nen.. Mak ka ti tawp thei lo. Ka class bang chu ka nu chiah a lo awm a. Ka inthlak sawk sawk a, eirawng ka bawlpui a. 

"Vanlali te in lamah chaw an va ei ve dawn anih kha.. Va lenglut ve thin rawh se.. " tin ka u te chungchang chu a sawi a. 

"Nu, vanlali hi a sual hran lo tiraw? Zep miah loh chuan U tei kha kan monu a nih ka rin lutuk vangin Vanlali pawh hi ka nel loh phah a. Mahse, a fel reuh ka ti" ka ti bawrh bawrh a. Ka nu chuan dawhkana ka alu vel lai min rawn velpui pah chuan, "Mahse, eng emaw dik lo hi awm tlatin ka hria" a ti zawi sap a. Ka nu ka melh vat. Thil eng emaw tak ngaihtuah hmel a pu. 

"Eng nge a? " ka ti vat a. 

"Mama sawi danin an naupai kha thla khat erh awrh chauh a la nia, tunah an inneih atangin thla khat a liam chauh a, a dul hi a puar mah mah ka ti deuh. Thla thum pawh lo ni se, ani vun pan leh sa pan lam tan chuan lan vak a la hunin ka hre lo. Thla 5 vel ni mai tawha mawi a ni" a ti ta a. Khatiang lam engmah ka chîk ve der si lo. Ka hrethiam vak lo bawk nen. 

"Aa.. A lan hma chi te pawh a ni maithei sin" ka ti ringawt a. 

"An inneih te pawh khan a lang tan der tawh alawm. A hnute lah a lianin a kawh bawk si.. Rai la na chi a ni han ti dawn ila, kei raino la na lutuk ka nia, mahse, thla khat lekah chuan ka taksaah engmah a la lang chhuak lo" a ti a. Ka nu rilru tur chu ka hrethiam.. A tu ni miah lo kha a tu angin a pawm ve thei tlat. 

"Zawt tawp la" ka tih chuan, "Ringhlel angah min ngai dawn sia.. Tihian a neih hun nghak phawt ila.. Thudik chu a lang mai ang" a ti a. Han zawh kha a nuam bik dawn lo bawk nen. Chumi zan chuan ka u te nupa chu ka ngaihtuah nasa ve khawp mai. 

Sunday zan dar 1 a ri thuak tawh tihin Information centre atangin chhiat tawh thu an rawn puang ta a. College -a ka kawm ve thin Kimkimi nu a thi a lo ni! A muhil lai a rawn rum vak vak a, an pain kaihthawh a tum chu a rawn meng zuai a, a kal zui nghal mai a niawm e. Min ţhawng hlawm khawp mai. Kei pawh Kimkimi avang pawn kal lo thei loah ka inngai a, Mama pawh a insiam rak rak mai. Ka u nen chuan mitthi in lam chu kan pan ta a. 

"U, U tei nen in inbe thin em? " ka ti ta phawng a. 

"Nupui ka neih dawna kan inbiak bak chu kan inbe tawh lo. A rilru te a rawn tina ve vak a, ka na fe zawk sia" a ti nghut a. Ka zawt zui tawh lo. Kimkimi te in kan thleng a, ţap thawm a ring khawp mai. In vel chu kan singsa a, thalai pawh kan thahnem chak khawp mai. Kimkimi nen hian Kohhranah chuan kan la inkawm zui zel nain a hran paa han inlenpawh vak kan nei ta mang lo va, va hnema va tih kual pawh ka hreh vek. Kan zai ţhât ţhat a. Zai a nuam viau mai. Mama erawh a hna a kal tho a ngai si a, dar 3 velah a haw leh nghal. Kei ka awm tho a a ti ve aniang. 

Ka bula thu kan in piah lawk ami Siami nen zun zungin kan va chhuak ve a. Chutah chuan thilmak deuh a sawi ta a ni. 

"In mo nu hi maw a past life in hre vak lo tiraw? " a ti phawt a. Ka bu nghat. 

"A ex nau te leh ka nau te hi an inkwm ve thin a. An rawn leng nasa bawk nen, hman zanah kan sawi chhuak a. Sawma chuan, 'An inneih rei pawh ka ring lo. U Vli chu a bon tawp a ni mai. Ka u chuan, sakei a ti tawp.. A sawi tha vak duh lo naa, zu te damdawi te pawh a rui ve thin a, bakah amah hi maw hlauhawmna riau a nei. Ka sawi thiam lo, ka u nen an nih lai te khan ka ţih tawp" a tia.. Mak ka ti lutuk a. Ka hrilh ve mai mai che" a ti sar sar a. 

"Aa.. A tunhma nun chu a tunhma nun a nia, tunah chuan a fel lutuk. Sawiselna tur ka hre lo" ka lo ti ve mai a. Ka sawi sual lo bawk. Sawiselna tur em em ka hre tlat lo a ni. 

"Nia, mihringte chuan nun kan sim vek thei alawm tiraw.. "Siami pawh chuan a ti ve mai a. Kan lut zui nghal. Mahse, ka ngaihtuah zui nasa ngang mai. Vli chu rui ve thin a ni ang tih pawh rinngam a harsa a lawm le.. 

Kimkimi nu ruang thlak zanah ka ruh seh a chhuah vangin ka kal ta lo. Larry a rawn leng a, rei a leng lo. Ruah a sur dawn hnai aniang khawpui a ri dur dur reng mai. Kan mizoram power supply lah hian ruah a ngam thei reng reng lo a nih hi.. Inverter kan nei hlauh zawk a, kei thim hi ka ngaina lo va, nuam ka ti lo. Ruah chu a rawn tla fuap fuap a, kei pawh ka mu ta daih. Uaptu ang maiin ka harh hlawl! Dar 2:40 chiah chiah a lo ni. Ka zun a chhuak nasa si a, ruah chu a buakin a baw hawk hawk mai. Ka va zung a, ka zung zo bathroom kawngka ka hawng chiah tihin ka rak nghal tuar. VLi chu a lo ding run mai a. Ka phu chiang em a ni. 

"Min tiphu nasa lutuk" ka ti a. Ka lungphu pawh a rang ngei mai. 

A nui sak a., "Tihpalh' tih pahin a lut ve nghal a. Vli a la meng ve tih ka hriatna chuan min muan deuh. Khumah chuan ka let thla leh tawp a, mutchhuak erawh a bo ta deuh. Phone ka en peih tawh si lo, Larry nen kan inneih huna kan awmdan tur vel ka ngaihtuah ta mai mai. Ka lo muhil leh nge ka harh leh hlawl.. A lo thim vek! Phone ka dap nghal rawk rawk a. Ka phone reng reng ka dap hmu zo lo. Mangang deuhin ka thu chhuak a, inverter kha a la low thei lo asin le. Kan chhit khat tehlul nen. Ruah chu a sur tawh lo va, thli a thaw hum hum thung. Boruak chu a nuam miah lo. Ka hlauh ber hre si loin ka hlau ngawih ngawih mai. Ka phone lah ka hmu zo si lo. Chutah ka khum lu tukverh chu kawngka kik ri ang deuh hian vawi thum lai a rawn ri ta det det a. Ka phu chiang lutuk. Tlan chhuak dawn ila a thim bawk si, ka nu auh mai ka tum laiin, tukverh parda chu a leng lawp a, kawl a phe zuai bawk. Pawn lam ka va hawi phei rual chuan ka tukverh atanga ban phak maia thingfanghma kungah chuan mihring niawm tak bei ţun hi ka va hmu tehreng anih chu! Ka nu au tawh lo vin ka sarak ta chiam a. Ruah a sur tawh lo bawk a; ka rak thawm chuan a tiharh rang kher mai. Ka nu chuan, "Mapui.. Mapui"a rawn ti dat dat a. Ka u pawn "Ngati vak vak nge" a rawn ti bawk. An tawng rual chiah chuan a rawn eng nghal khap. A rang arangin ka room chu ka tlan chhuahsan ta a. Ka nu bulah ka mu ta ringawt mai a ni. A tukah thil awm dan ka sawi chuan, "I hmuhsual anih chu" an ti mai a. A thim bawk nen, ka hlau sa bawk si a, kei pawn ka hmuh sual a nih ka ring. Ka phone kha ka khum hnuaiah a lo awm daih! Mak ka ti. 

Khami zan atanga kar khatnaah chiah ka u thianpa U Rempuia a accident a, ka u pawh a han kal ve a. A hnuk a la chat chiah lo an ti ringawt a, beisei a bo khawp mai. Keini pawh rei meng lovin kan mu a. Hla ngaithla chungin ka lo muhil a. Ka harh pawn a lo la zai rut rut mai. Ka off a, rizai sin thain ka inlet leh nghal thawk. Mahse, phun ser ser thawm ka hre ta tlat! Ka meng nghal kâwk a. Ri chu ka u te room atanga lo chhuak a ni. Thawm hi a hriat lutuk loh naa zan rei tawhah chuan a lo ring deuh a ni mahna le.. Ka u leh Vli an inbia a ni maithei. Mahse, ka u khan, "Ka tlaivar ang, kawngka pawh lo kalh mai r'u" a rawn ti si. Ka nu khan a kalh thlap kha a nia. A lo haw leh thut pawh a ni maithei. 

Phun thawm chu an sawi tak hriat a har mang e. Ka beng chu ka tum vang pawh ni lem loin ka chhi kur mai. An sawi erawh ka hre ta chuang lo. Chutah kan inpindanna bang chu a ri deuh hrâwk hrâwk a, ka sawi thiam danin hamna ni maiin ka hria. 

"Ka duh lo' tih VLi aw ngei mai hi a rawn ri chhuak a. Ka phu zawk mai. Ka thu chhuak a, "VL" ka ti a. A reh tlawk tlawk. Kei pawh ka mu tha ve leh mai. Mahse, minute tam pawh a liam hmain, ka u te room chu a ri ţâwk ţâwk mai a. Ka tho nghal var. Ka chhuak a, an room kawngka chu ka kik nghal, "Vl.. Vl" ka ti a. Ka nu pawh a rawn tho ve bawk. Kawngka a rawn hawng thei bawk si lo, ka u ka ko a, a eih thei bawk si lo. Ka nu nen a ngaihna hre lo zeta kan inmelh lai chuan kawngka chu a rawn inhawng a, Vli chu mutkawr nen phelh phang hian a rawn chhuak a. 

"Ngati nge a.. Nu" tiin ka nu chu a melh a. 

"Thawm kha a ri tawk tawk sia, eng nge a nih kan hre duh mawle.. " ka nu chuan a ti ve mai a. 

"Ka hre lo reng reng. Ka mutui lutuk a" a ti a. A mitmeng ka en chian em vangin dawt a sawi tlata hriatna ka nei. 

"Ka u a lo haw mi? " ka tih chuan, "Haw nang, a tlaivar dawn kha" a lo ti mai a. Phun sur sur thawm kha tu tak ni ang maw? Engmah sawi leh tawh lo chuan kan mu leh ta phawt. 

A tukah Larry bulah An venga Vli hmelhriatte kha ka zawt chiang ta a. 

"An fel em? Eng mizia nge an neih? " ka ti bawk. Mak tih hmel angreng deuh hian, "Ka hre ve vak lo. Mahse, pakhat Teteii a tih kha chu nasa ve thei tawp, in atanga rawl bo chi ang kha a nia. Nikum hmasaah pawh a sam an meh kawnsak tawh" a ti ta a. Engvanga Vli chu hrechiang duh nge ka nih ka inhre bik lo, keimahah hian ngaihthat lohna a awm ve tawp a ni mai. Ka mitmei ru ta reng a, a la felin a la ngai reng chuan ka hria. Mahse, tlai khat ka inbual zo, bathroom atanga ka chhuak chiah chu ka phu zawk. Dawhkan kila ka nu bawkbawn chan mek chu Vli chuan rum em ema melhin a lo chhiatkhum bâwih bâwih mai! Ka aw ka thian a, a pangngai leh nghal. Khata tang phei kha chuan ka hlat ta riau. Sawmi thusawi te kha ka hrechhuak bawk. Vli te venga ka hmelhriatte ho ka be pawp a, Vli chungchang chu ka zawt ta a. 

"Ka hre vak lo naa, Phaiah a awm char char thinin ka hria. A rawn haw chang pawn a chhuak vak lo nge ka hre vak lo" a ti ringawt a. Hmelhriat dang ka nei vak bawk si lo. 

Ka nu sawi ang tak tak khan a dul pawh a Puar lian tawh hle. Nei mai tur angin a lang tawh. Thla nga chauh a la ni bawk si. Ka nu rinhlelhna kha a lo dik zawk mawni le.. Ka u lah hian a rinhlelh hmel vak bawk si loh. Kan department kan picnic a, nuam ti tak chuan ka va hmang ve, Larry awm phei se chuan a nuam lehzual ang. Khaw thim thut thutah kan haw a, Kan CR Puia car-ah thiante nen kan chuang a. Kan zai nasa mai. 

Zemabawk kan hlat vak tawh lo tihin hmeichhe pakhat hi muangchangin hmalam panin a kal chhet chhet a, shawl dum a bat hlun a, kawr fual a dum leh avara tial a ha bawk. Hnunglam atang chuan an deuh a nei. A rai puar tih a kal dan atang chuan a lang bawk. Puia chuan, "Phur ve ila.. A hla tawh chuang lo" a ti a. Mi tlawmngai tih takah. Kan khat chuang lo va, a neitupa berin a tihte chuan tuman kan hnial hran lo. A ding ta a. 

Ka pi, lo chuang ve ta che.. Khaw nge i kal dawn? " tiin a va au a. Nu chuan a shawl sin lai khan a lu a khuh avang leh a thim thet thet tawh avangin a hmel chu chiang takin a hmuh theih loh. "A ngai lo.. Ka lawm e " a ti a. 

"I inthlahrung mi? Lo kal rawh.. Kha nau i pai bawk si" Puia chuan a ti leh a. 

Thiante pawh chuan an lo sawm a. Kei erawh chuan a hmel chu ka enchik hle. A inhup deuh tut tut vang chuan hriat a har bawk sia.. Vli nen an inang ka ti.. Mahse, hetah daih daih eng nge a tih ang? 

"Exer ka la alawm" tih pahin a kal ta daih a. Keini pawn kan kalsan nghal. In ka thlen chuan Vli a lo awm lo tak tak! 

"A nu a nuamsam lo va, a va tlawh anih kha" ka nu chuan a ti mai a. Zanah Mama'n a a lam dawn a niawm e. Ka nu bulah chuan engmah ka sawi rih ta lo. Thil eng emaw hi chu a awm a ni. Mama chuan a va hruai ta a, an rawn thlen chuan a kawrfual a dang ta daih. Mahse, ka chhungrilah hian rinhlelhna a piang tawh. 

Thli a thaw vuk vuk a, thenawmte ui an ţap ruah ruah bawk. Thla eraeh a bial kulh thung. Parda te chu a then phe hlawp hlawp a, ka room kawngka chu rawn inhawng riai riaiin Vli a rawn lut hlawl mai. Ka lo melh reng ringawt. Ka che thei der lo lehnghal. Verther zeta min melh chungin min rawn pan zel a, ka khum mawngah chuan dingin a kut zungchal hian min kawk a. 

"Ka chungchangah inrawlh tawh suh" a ti vawt raih a. A mitmeng chu a rapawm lek lek.. A hmel chu a inthlak tial tial a, kareii! Hmuh fo atan pawha ka duh loh tur hmel rapawm leh maksak tak a rawn pu ta mai! A dâng vek a, a mitmu chu a uai pur bawk. A kareh lah chu a zau em em a, a ang sen huam mai bawk. Min rehhlum tum niawm takin a kut chu a rawn phar huang a.. Ka che thei si lo, ka nu ka ko dawn a, ka aw a chhuak thei hlek lo bawk. Mangang takin ka tal a, maimizialin ka awm tih ka rilruin a hria. Ka kezungpui chu tihchet tumin theihtawp ka chhuah a. Umm.. Ka ti che thei ta. Ka harh zui ta bawk. Ka mut a chhuah leh hma ngeiin ka tho lawp a, tui ka ban nghal. Ka tui in zo kawngka lam ka va melh chu ka bottle ken lai ka thlauh bawl mai. Kawngka chu a lo inhawng nia! Ka mut dawn khan ka kalh thlap tih chiang takin ka hria. Hlauhna chuan min rawn uap nghal a, ka mumanga ka hmuh leh hriat ang chiah khan kan thenawmte ui a rawn ţap nghal! Ka tha a khur der der mai. Ka maimichhing ngam tawh si lo. A va hrehawm tak em.. 

Zinga Vli ka hmuh chuan ka lungphu a rawn rang nghal. Mahse, ka insum hram hram thung. Chaw pawh ka ei tha mang lo. Larry nen pawh kan inbe tlem kher mai. Larry hnenah Vli thian hlui Teteii biak pawhna lo ngaihven turin ka ngen a. Mak ti deuh mah se; a lo ngaihven tur thu a sawi. Teteii atangin eng emaw tak ka hre thei maithei asin. 

In kan thlen hmain ka nuin min lo call a, a thlabar hmel kher mai. "Vli'n nau a chhiat a. Damdawiinah rawn tlang mai ta che" a rawn ti! Khai aw.. Larry nen chuan kan tlang ta nghal a. Ka nu pawh kan va hmu nghal. Vli chu chauh hmel zetin a lo m bel mai. A dâng hle bawk. Ka u erawh ngui deuhin a lo thu ngût a. 

"Naute chu" ka nu melh chungin ka ti a. 

"Thi sain a piang" a lo ti nghat. 

Ka nu bawk chuan, "Tikhan va haw leh mai la, eirawng va bawl la, i u hian rawn lam mai rawh se, kei chu ka riah a ngai maithei aw. Mipa riah an phal si lo va" a ti a. Ka bu nghat. Larry nen chuan kan tlan haw leh ta a. Eirawng ka bawl vat vat a, ka rilru a buai angreng. Vli chuan engtin nge nau a chhiat theih le? thisaa piang a nih chuan a neih a hun tawh tihna a ni thei ang em? Aa… tiang lam hi ka hre ve vak bawk si lo. Mama'n chaw a rawn la a, a han dah ang a, a lo haw leh dawn a ni. Larry a rawn phei hma hlauh a, ka khua a har lutuk hman lo. Teteii biak pawhna pawh chu a lo nei mial mai. Ka save nghal hmak. Ka u pawh a lo haw a, biak a huphurhawm tawp. A lungngai hle niin ka hria. 

Muthmunah Teteii chu ka text ta tawp a. Ka hming leh Vli chu kan mo a nih thu te ka sawi nghal a. Larry sawi danin Home-ah kum khat vel zet a awm hnuah a rawn tha chhuak ta niin a sawi a. Biak pawh a nuam viau mai. 

"Tete, khawngaihin min hrethiam la; ih, min zepsak bawk la.. " tia bultanin Vli chunga ka ngaihthat lohna, a nau pai chungchang te ka sawi ta vek tawp a. Thil zep leh thukhuh hi ka thiam ve vak si lo. 

"A ni maw? A mak hran hleinem. Vli te nen hian college atanga inkawm kan nia, zep loh chuan kan drinks nasa ve thin, damdawite pawh a ti ve hman a. Han riah chhuah changte pawh a nei thin. Kan thiannu pakhat Zodini nen an inzui nasa zual a mahse, Zodini chu a boral tawh a. A boral lai pawn Vli hi a awm ve nghe nghe. Kei pawn kan inkawm laia mak ka tih ruk deuh thin chu, Kan ruih tawh hnute hian a lo bo daih zel a, a hnuah rui miah lo ang hian a lo lang leh thin. Chuan, zan khat Zodini te in hnuaiah kan riak khawm a. Chumi tum chuan Vli chu a sapatal vak vak a, a ruih vak pawh kan hre si lo, a meng pual a, kan hlau khawp mai. 

Chuan, tuma bulah sawi lo la, Zodini thih chungchangah khan Vli khan rinhlelh a kai a, Zodini kha a nghawngah chemtea zai a ni a, Vli nen an inzui lai a lo ni bawk nen, amah Vli sawi danin Zemabawk daiah an spot a, a zun lawk hlanin Zodini chu a au tuar a, a han thlen leh meuh chuan a lo thi fel der tawh a niawm e.. Police custodyah te pawh a awm ve ran tawh alawm. Mahse, finfiahna a awm si lo va, chemte lah chu hmuh tur a awm bawk si lo nen, an chhuah leh ta ringawt a ni. Chutiang vel chu.. " a rawn ti ta hmiah hmiah mai. Mak ka ti khawp a, mahse, ka rinhlelhna a zual telh telh. Tu nge a niha eng nge a nih chiah tih ka hre si lo hian min tibuai a ni ber mai. 

Damdawiin atanga a lo chhuah zan chuan, chhung inkhawm kan nei a. Ka nu chuan chiang leh nghet charhin, "Vl, thu zawh che ka duh a ni. Dawt inhrilh lo hram ila.. I nau pai kha mama fa a ni takzet em? A rawn pian chhuah khan a hunbi a kim thawkhat vek, Doctor pawn a sawi nghe nghe.. Chu chu ka hrechiang duh a ni" a ti ta hmiah mai. Ka u ka va melh a, mak ti hmel a pu lo. Ka nu nen an lo sawi dun vek tawh a nih ka ring. 

Vli chu a insangmar ţeuh a, lungngaih hmel deuh hian, "Ka tihpalh a ni.. Ka nu, min ngaidam hram rawh u. Nia, ka bialpa nena kan fa a nia, min nei duh si lo va, Mama a rawn lang a, mualpho ka zuam loh em vangin Mama fa ang khan ka kaltir ta tawp mai a ni. " a ti ta a. Mama thisen zâm chu a pawng ţãwlh ţãwlh mai. 

Ka nu chuan, "In nupain in awm zel dan tur chu insawi dun dawn nia. Inthutlukna apiang ka pawm e" a ti a. A tawngtai zui nghal. 

Zan boruak nuam lo tak a ni. Ka u te chu an roomah lut nghalin an sawi dun niin ka hria. Keini pawh kan mu ve daih. Zing ka thawh chuan inchei angreng takin Vli chu an room atangin a rawn chhuak a. Ka nu nen kan lo melh tawp. 

Mama a rawn chhuak ve bawk. 

"Ka hawtir dawn ta mai. Min bumtu nena chenho chu ka peih ta lo a ni e.. " a rawn ti ta a. Vli chu ţap ţeuh hmel a pu. Kawngka a kan dawn chiah tihin a rawn hawi let a. Mitmeng sen leh alh phata kan pathuma min melh chung hian, "Ka rawn let leh vat ang" a ti zawi sap a. Hawi let miah lohin a chhuak zui nghal. 

 A tukah bungrua an rawn la bawk. A chhungte chuan engmah an sawi lo. Keini lam pawn kan sawi hek lo. Ka u chu pathlawi a ni ve ta reng mai. Bungrua an lak niah hian thu thinţhawng tak kan hre zui lehnghal, ka u thianpa, Ruatfela a rawn kal a. 

"Mam, i hre tawh em? Tei boral kha" a rawn ti ta a! Ka u chu a nghing dawt niin ka hria. U Teii chu a muhil an kaitho zo lo a nih chu! Mama tan chuan a na ngawt ang le. A ruang chu a thawhna atangin an rawn phur thla a, Kei pawn ka lo hmuak ve. Engkim chu a mak vek, ka rin phak loh thil a ni. Mama erawh a roomah a tawm ngawt ngawt ringawt. Ka hrethiam tawp. A hmangaih hmasa a boral a, a nupui lahin rei tak a bum a, an inthen ta bawk. A tuaran vanpui a chim ve takzet a ni. U Tei hmel chu a that ngaiin a la tha reng, a ruang rawn zui zingah a bialpa ni awm tur chu ka lo melh ru ve a, ka hmu mai lo. A in luahna pain a thih dan a sawi a, a rawn thawh har em vangin kaihthawh tumin an zu kal a. A harh theih mai loh vangin kawngka tichhiain an lut ta tawp a. Khumah fel taka muin a lo thi khawng reng tawh a lo ni. Damdawi a ti ngai lo va, lung lam harsatna a nei ngai hek lo. A mak tih loh rual a ni lo ve. A tawi zawngin sawi ila, U Teii kan vuiliam tlaiah chuan U Teii nau Asangi'n min rawn hmu a, lehkha phek tam tham ve deuh hi min hmehbel chawt chawt a. "I u ta tur" a ti sap a. A kal nghal. Ka hawn chuan ka u chu a lo inbual mek a, ka lo nghak a. A lo chhuah chuan Asangi min pek lehkha chu ka pe ta a.. 

A melh vung vung ringawt. 

Zana thil thleng erawh chuan vawiin thlengin ka tha a la tikhur thei nia! Dar 12 a pel fel tihin ka u room atang chuan thaw hrâwp hrâwp kan hre ta a. Ka nu nen kan va en vat, Mama erawh a lo mutui hle bawk si. Thawm pawh a reh nghal. Ka hlauh vangin ka nu bulah ka mu ta daih a. Kan muhil tan dawn chauh tihin ka nu Almira chu a inhawng ţhuai mai. Kan thu chhuak nghal hlawl. Light a on vat a, a on rualin ka nu room kawngka chu inhawngin kan chhuat dungah chuan hmanhmawh taka ke pen thawm in a zui ngjal a, bathroomah a lut ta niin ka hria.. Rukru a ni ve thei tih hriain ka nu nen kut invuan chungin kan chhuak a, bathroom kawngka chu a inkhar phui lo bawk. Ka nu chuan ngam leh ngam lo in a va nam vak a. Tumah an lo awm lo! Kan din reng laiin ka room atang chuan ţap feih feih thawm a rawn chhuak leh ta. Kan mangang takzet tawh a ni. Mahse, nu nge nge zawng, insehruh chungin Mama room a pan a, Mama chu a kaitho ta a. Phak chuapin a rawn tho a. Ngik feih feih chu a la ri reng tho nia! Mama pawh chuan, "Chu! Eng thawm nge? " a ti hú a. 

A tawng rualin tap ri chu a reh nghal. Kei chu ka ţap tawp tawh. Ka nu chuan aw khur lek lek hian, "Mama, a dik lo tawp mai. Tei'n min rawn tlawh em mawni dawn le" a ti a. 

"A ni mahna le.. " a lo ti duh chauh. Ui an bauh tuar tuar a, kan inmelh hreknhrek ringawt. 

"In mut ngam loh chuan ka lo mutpui dawn che u nia" a ti a. Ka nu roomah kan lut ta dial. Karei! Ka nu room chu a lo hnawk nuaih mai. A puante chu a lo inzam niah nuaih a, bed sheet buang a phah kha a sen lar tawk a lo inphah daih! Ka nu meuh pawh a huaisen zo ta bik lo nge, "Tiru, thenawmah riak mai ang u" a ti ta mai a. Mama erawh chuan, "A tul lo, ka awm hi. Ka hlau ve hleinem.. Ka roomah mu mai ang u' a ti ta a. Hmun danga han riah kha a zahthlak ve bawknsi. Mama roomah a khumah kan pathum chuan kan inhnawh ta a. Chhin khat mah ka chhing lo. 

A tukah titi a tam hle. U tei chuan keimahni chauh a lo tibuai lo va, an in riak te bakah a nuteii te, a thiannu U Rsi te ho pawh a lo tlawh niawm tak a ni. A rapthlak hle mai. Mahse, tihbuai kan ni zui ta rih lo. Ka nu bulah ka mu zel rih.. Keimahin ka mu ngam hlawl lo a ni. Exam a hnai ta deuh bawk a, class pawh kan kal ngawrh leh tawh viau. Lehkha pawh ka zir nasa tan. Zan khat ka zir zo, mu tura ka intihfai lai chuan kawngka kik ri niawm tak ka hria a. Ni e, an rawn kik ngei e. Tun ang huna inleng han neih chu ti rilru chungin ka va hawng a, tumah an awm lo. Hlauthawng reng renga khawsa tih takah ka khar vat a, ka hawi nghal vat vat. Ka inher leh chiah tihin eng emaw mihring taksa ni ngei tur hi ka su thuak mai! Ka chiang khawp mai. Mahse, tumah ka hmu si lo. Ka khur nasa ta mai a. Ka nu room ka pan tur chu ka ke-ah pawttu an awm! Ka rak thawt a, "Nu" ka tih tuar chiah ka hre hman. Ka harh leh chuan Mama nen min lo kil a. 

"I rak nasa lutuk a, kan rawn thawh chuan chhuatah i lo tlu reng a" min tia. Ka kuah nghal tawp. 

. "nu, kan in hi a hrâng.. Chhuak ang u" ka ti ta tawp a. 

Mama chuan, "A hrâng reng reng lo, thil awmzia ka hrethiam tan tawh" a lo ti khauh a. 

Ka nu nen kan melh haw ringawt. A chil lem khalh chungin, "Tei lehkha hnutchhiah kha ka ta tur a ni lo a, Asangi hnena a thawn zawk a ni. Mahse,ka chungchang vek a ni. A thawhpui nen an inngaihzawn dan te pawh a sawi. Tei kha a vanduai takzet a ni. Ni e, kha a thawhpui khan a lo pawngsual alawm.. Ka tana thianghlim tawh lo anga inngaiin, chu pa chu amah tichhetu mah nise, neih ngei a tum ta a. Tikhan, keimah vangin rilru hrehawm takin a lo awm phah a lo ni! Nupui ka neihte khan rilru na em emin hun a lo hmang a, kei lahin ka be duh tawh si lo. Ka lainat takzet a ni. Kan inneih hnu lawkah a thawhpui a bialpa lah chu hmun dangah an sawn a, an sawn atangin a rawn ngaihsak leh tawh bawk si lo. Tikhan, rilru hrehawm leh na reng rengin hun a lo hmang thin a lo nia! 

Ka sawi tum zawk chu kan inneih thlalak kha Asangi'n a lo thawn ve ni ngei tur a ni. Chuta a comment dan zawk chu a nia ka sawi tum. Tei chuan, "Mama nupui hi ka bialpa Sanga cousin kha a ni chiang lutuk, heta ka thawh tirh khan a rawn zin ve alawm.. A van mak em em" a lo tia! Tikhan ngaihtuah thiam in nei em? Vli leh Tei bialpa chu cousin an ni a, Sanga'n Tei a pawngsual a, Vli chu ka nupui a ni ta bawk. Hei hi ruahmanna a nih ka ring a ni. Vli nena kan intawn dan kha zu hmunah a nia! Tei vaga ka nat vanglai ka han petek ve zawk lai khan a ni. Keia ngaihsam pheng khan ka mutpui ta mai a! Aman a lo zir ve bawk si. A rai thu hmangin min thunun zui ta a nih kha. Ka mawl em a, ngaihtuahna ka hmang thiam lo a ni. 

In hriat loh tam tak chu Vli khan chian lohna a nei mawni aw tih chang ka nei thin. Zan tam tak amaha tawng bul bul te, zan rei hnua ka muhil tawh emaw tia a thawh tum te, pawna a vei a vei thin zia te.. A tam mai. Chutiang chu kan inneih chhung khan ka hre vek. Ka nei tawh a, ka nupui a nih tawh si avangin in bulah ka sawi hreh a, bakah ka fa a pai emaw ka tihna lamah ngainatnna leh duhna te a lo piang tawh bawk nen.. Vli hi mi hlauhawm tak niin ka hria" a ti ta dap dap a. Ka nu nen kan lo thaw hawk mai. 

Teteii nen kan inbiak dan te pawh chu ka sawi ve ta vek a. Mak deuha a awmdan te pawh. 

"Umm, ka lo then chu ka inchhir ta lo tawp mai. Mahse, inven fimkhur a tha.. Mi nasa tak a lo nih phei chuan" Mama chuan a ti a. Ka hriatthiam loh erawh zanina ka chunga thil thleng kha a ni. Ka kea pawttu kha tu nge ni ta ang? Chhun engah pawh keimahin ka awm ngam tawh lo. Larry pawh a rawn len zin phah. Lehkha te pawh kan zir dun chang a tam. 

U Tei thih atanga thla chanve vel a liam hnuah kan exam zawh zanah hla zirin ka chhuak ve a. Banah U Mamawia ten min thlah a. Ka nu te chu an mu tawh a ni maithei. A tlai ve tawh deuh bawk a. Kawngka ka hawng a, hmanhmawh deuhin ka kalh nghal. Ka nu room ka pan nghal a, mahse, Ka roomah chuan hmeichhe nui ar ar ri ka hre ta a. Ka ding dawt. Mak tak maiin a hma ang khan ka hlau tawh miah lo. Ka hlau lo erawh ka ti lo. Inhumruh chungin ka room chu ka pan ta a. Rilrua tawngtai chungin kawngka chu ka nam hawng ta ţhuai a.. Ka hnungtawlh nghal dãwrh.. 

Ka khumah chuan Vli ngei mai kha sam thlah hnúp leh min rawn melh kur chungin a lo thu run mai! Ka nu leh Mama ka ko nghal chul a, mahse, Vli chu a rawn nui leh huk a, khum lu tukverhah chuan a zuang chhuak ni maiin ka hria. Tukverh erawh a inhawng miah lo! Ka nu te rawn lan hnuah ka khur nasa lutuk chu ka tlu ta hial a. Ka harh leh chuan damdawiinah ka lo mu tawh. 

Chawhnu lama ka nu zuk haw lawk rawn let leh chuan, "Vli a thi' a rawn ti ta a! Ka melh reng ringawt. 

"A inawkhlum" a ti leh a. Ka chhing sawk. Thurûk tam tak hai chhuah tur a la awm asin le.. Ni 3 lai damdawiinah hun ka hmang a. Ka chhuah zanah Larry pawh a rawn leng. Mama erawh a roomah a tawm deuh reng mai. Larry haw hnuah Mama chuan lehkha phek min pek pahin, "Chhiar la i hrethiam mai ang" a ti a. 

"Mam, tunah chuan in tan hnawksak ka nih tawh loh nan ka thih a ngai tawh tih ka hria e. Ka tihbuai tawhna zawng zawngah che u khan ngaihdam ka dil che u. Heng zawng zawng thlenna chhan hi ka'n sawi ang e. 

Kum 18 ka nih laiin zan khat ka mu chu mangpui ka mang ta a. Mangpui a ni tih pawh ka la hre lo. Mi pakhat hmel tha tak mai hian min rawn tlawhin min mutpui a. Nuam pawh ka lo ti hle. Khami zan atang khan kar khatah vawikhat tal hi rawn kalin min rawn mutpui thin. Mumang mah nise, a tak ang chiahin a feel thin. Ka harh te hian ruak vek ten ka lo awm thin. Ka awmdan mak tak chu ka duh loh em vangin ka mangang a, ka sawi chhuak ngam bawk si lo. Hrehawm takin ka awm chho a, nuam ti tho mah ila, rapthlak ka ti tel bawk a ni. Kha ka rilru hahna khan a ni lo zawngin min hruai a, ruihhlo ka tih phah ta a ni. 

A tawi zawngin ruihhlo bawiha ka tan hnuah phei chuan min tlawh thintu chu a rawn kal zing zual a. Zan khat phei chu ka thawm a lo ring deuh nge, ka pa ten min rawn ko hial a ni. Ka zak a, zak mah ila ka hnar thei si lo. Ka tawngtai ngam bawk si lo. Tichuan, ka rui chho ta zel a. Zan khat ka thiannu te in hnuaiah kan riah khawm tumin min rawn tlawh thintu chu a lo lang leh a, hmeichhe pakhat hi a rawn hruai tel a, chu hmeichhia chu ka taksa chhungah a lut ni maiin ka hria. Ka awmdan te a lo danglam a, ka thiante pawn min buaipui nasa a niawm e. Khata tang chiah khan ramhuai chuan min chenchilh ta a ni. Ka thiannu ngawih ngawih Zodini nunna pawh ka laksak phah ta hial a! A chhan chu ka thuruk kha a lo hria a.. Vawi tam kan riah dun tawh. Avangin mang ramah ramhuai nen kan mudun thin tih chu a lo hre thei tlat a lo ni. Ni e, kan ruih laiin a hrawkhrui ka zai chahsak ta a nih kha. Min puitu a awm tawh tlat a! 

Chuan Mam, ka hmuh che khan mipa ngaihsak ngai reng reng lo khan ka vei ta tlat che a. Ka duhin ka ngai ngawih ngawih che a ni. I chanchin ka chhui nasa a, i bialnu te thlengin. Tei chu a hnawk tih hriain ka unaupa, ka sual rawngbawlpui thin Sanga hmangin ka hnawhbosak ta che a. I nat vanglai takin ka rawn inbarh lut ta a nih kha.. Mahse, ka mutpui thin khan pasal ka neih chu a lo remti awzawng lo va, a fa hial min paitir ta a nih kha. Mahse, ka hmangaihna che kha ka thunun zo ta ngang lo va, thih leh thih tiin ka nei ta che anih kha.. Hun eng emaw chen chu min chenchilhtu te chuan min kiansan ta a. Ka lawm viau laiin an rawn lang leh ta thut si a. Zan tam tak anmahni vang khan mi â ang maiin ka khawsa thin. Mapuii hi tihbuai ve an tum tih ka hriatin ka theihtawpin ka dang a, Ka veng ve thin asin.. 

Ka nau chhiat ni khan, Nang ka then che a nih loh chuan Mapuii chu a siruk laa an buan tur thu an sawi ta a. Ka hlauh em vangin nang then che ka thlang ta zawk a ni. Ka pum chhunga naute, ramhuai fa ni bawk chu ka hrin duh miau loh vang leh nangmah nena kan inthen theihna tur hmanraw awmchhuna ngaiin damdawi ka ei ta a. Ka chhiat ta reng a nih kha.. 

Ka chhuahsan che a, ka ngai thin lutuk che.. Ka kalsan tak che avangin keimah bawk min chenchilh leh ta a. Mahse, Tei thih zan khan ka dan theih rual lohin Tei anga chein an rawn tibuai che u a nih kha.. A chhan ka hre bik lo. Tichuan, kei hi ka thih ngei ngei a ngai ta a ni.. Khawngaih takin Mapuii kha lo venghim hram rawh aw.. " tih thu chu khur zawih zawih chungin ka chhiar chhuak ta.. 

"Eng nge kan tih tak ang? " ka nu chuan a ti a. 

Ka u chuan, "Isua kan nei alawm.. Engkim tithei " a lo ti nghet charh a. 

Kei erawh Incubus target ka ni tih inhre chungin ka damkhawchhuak zo dawn em ni le?