Hmeithai Last

HMEITHAI..(LAST)

Ziaktu : Toni Râlte

Min chhang zui ta lem lo. Dawr hawng tur pawn ka kal hma, ka nu ṭawngkam fek fek leh Kimteii inla mark tha kual vel bula awm hi ka kham riau. Lanpuii min lo biak hun ka nghak a ni ber e, beisei ang ngeiin dar 12 velah min lo call ta a. “Police lamin thuchhuah an rawn nei vatin ka ring a, Bianca thattu nia an rinhlelh te chu an inpuang tawh a. Mateii pawh an thah a nih thu an puang a nih chu, Pakhat hi vai a nia, mahse, Mizoramah a awm rei tawh thung a, pakhat zawk erawh mizo a nia, an pahnih hian Khatlaah in an luah dun a nih awm chu. Chiangkuang takin an chanchin kan la hre bik lo, chhungte an nei em tih pawh. Tun dinhmunah chuan mipui lam an sosan êm vangin police lam pawh an fimkhur a, nang pawn i lo zep rih hram hram dawn nia. “ A rawn ti a. “A va mak ve, engvanga that ringawt nge an nih ang le..chung vel chu an la sawi chiah lo em ni?” Ka ti a. Ka ṭawng zawi deuh bawk. “Aw. Dar 2 velah thu chiang zawk an zawt leh dawn a. Ta ṭang chuan thuchhuah pawh an rawn nei mai ang” a ti a. “Anmahni i va hmu ve em?” Ka tih chuan, “Hmu e, ka la hmuh âwm ka hre lo.” A ti sap a, “Engpawhnise, tlem chuan a ngaihṭhatthlak deuh alawm, a thattu hriat loh ringawt kha chu rilru a hrehawm êm a.” Ka ti duah a. Kan dah ta rih. Investigation kal lai a nih vang nge confidential a nih vangin Mimi leh Johna te takngial pawh ka hrilh rih lo. Social media lamah mipui thinur an so bulh bulh reng a, Mateii pawh an rawn sawikai zel a, tuna an mi mante hi a thattu an lo nih tak tak phei chuan an tan police kuta tluk luh kha a him ber âwm e. 

Bianca kha a chanchin an sawi hmangin, Tleirawl harhvang ve tak, Parlour-a thawk a ni a. A hmel pawh a ṭha, IG lamah reels te pawh a siam ve thin a, amah hrechiangtu te chuan ruihhlo a tih ngai loh thu leh an chhungkua pawh chhungkaw pangngai tak, an khawsak pawh a vantlang tawk an nih thu an sawi. Chutiang tleirawl pawisawi lo chu engvangin nge râwng taka an that ngawt ang le? Kidnap te ni ta zawk se ka la hrethiam, nge inngaihzawnna boruak vel vangte a ni thei ang em? Mizoram, state ralmuanga sawi thin pawh kan râlmuang tak lo hle mai. Ruang an sawngbawl zui dan hriat phei chuan thluak dai raih, thisuk pawh nei eih lo an ni ngei ang a, hetiang mihring hi chu vantlang zinga khawsaktir chi an ni dawn lo nasa. Nilengin an case chuan min kap a ni. Zanriah ei lai pawn ka ngawichawi deuh nge ni, “I nuamsam lo em ni?” Ka niin a ti a, min lo chîk leh viau a niang. “Nuamsam e,.”, ka ti ringawt. Kimteii lah chuan, “Aw a lungleng ve a nih kha. Hrethiam ve mai ta che u.” A lo ti leh hmanhmawh. Ka insum theih loh ka hlau viau. Ka mood a fuh lo nasa si, ka pain thildang a rawn sawi ta hlauh a. Johna a rawn phei a, Ngaihi nen kumthar lama inneih ve mai an rilruk tawh thu te leh a sawi luam a, “Bro, eizawnna bulfuk tak hi ka neih a ngai, tuition hi chu a hlawk tho a, mahse, ka nu bulah chuan ka sawi tawh tho a, ka pain bul min ṭansak theih chuan, Night hostel siam hi ka duh riau,. Ka cousin Lalthlamuana saw warden-ah la ila, keiin Maths chu ka enpui thei ang a, ani sawn subject dang. He tiang taka ṭan ka lak loh chuan nupui han neih ringawt pawh ka zuam lo.” A ti ve nuah nuah a, nupui pasal chungchang kan han sawi meuh chuan ani pawn puitlinna rilru a rawn pu ta alawm. Ṭha ka tihpui thu vel ka sawi ve luam a, Ngaihi hi chuan eng a thawk bik lo va, mahse, lehkhathiam tho a nia, hostel pawh siam se hmeichhe lam a kaihruai thei dawn a, tiang chuan bul han ṭan ve phawt se, an tluan chhoh zel ka ring. 

Johna haw hnuah ka mu nghal daih. Lanpuii nen kan intext zuai a, police lamin eng thu thar mah an la hrilh lo va, naktuk lamah chuan kan hre thei tawh ang chu. Kan beisei ang ngeiin a tukah chuan thu thar a awm ta. Kan rin loh lam daih a ni. Khang an mi man pahnihte kha Lalenkawla leh Zongaihzuala te an ni a, Lanpuii sawi ang khan an pahniha in luah dun an ni. Lalenkawla hi a nu leh pate an boral tawh a, kum 3 liamta khan nupui neiin a nupui nu leh pate in hnuaiah an khawsa ve a, mahse, zu leh damdawi ruih a chin ve tak avangin an inthen a, an inpuiah let tawh loin tihian a thianpa Zongaiha nen in an luah ta a niawm e. Zongaihzuala hi Lanpuii sawi angin vai a ni a, mizo nupuiah neiin tuna Enkawla nen an luah inah hian an khawsa thin a, mahse, anni pawh inhmu thiam loin a nupui leh fate chuan an khaw lamah an hawnsan ta daih a, Enkawla hian a fin ta a niawm e, Two wheeler taxi an khalh ve ve a, ta tanga atanga inkawmngeih chho angin an insawi a ni. Duh inang ta na na na chu an inkawp rem ta phian a niang e. Bianca an thah chhan an sawi thei ta. Bianca hi an hmelhriat ngai pawh a ni lo, a bo zan khan Bianca hian sam pawh tur a nei a, a thiannu nau a nih tho avangin a riah pawh a riak nghal maithei tih a chhungte a hrilh a, amah hi sawi tawh angin beutician a nih vangin dawra a thawh bakah sam pawh, facial leh a dangte tihsak tur a hmuh chuan a pan chilh mai zel a, zana han chhoh zauh zauh a chin avangin a chhungte pawn ngaiah an nei deuh tawh, a scooty-in a kal mai zel a, nun inthlahdah leh sawisep kai a nih ngai loh avangin a chhungte pawn an ringtawk a nih a rinawm. Khami zan Bianca chhuak kha sam an pawt zo kha a tuka dawr kal hma a ngaih thu sawiin riak ta lo chuan a haw a, mahse, laklawh zetin a scooty chu a chhe ta tlat a niang, workshop inhawng hnaivai a hmu mai si lo. Hetih lai tak hian Zongaihzuala leh Enkawla te nen hian innang fuhin tlawmngaih hmel takin an han en kualsak a, zan dar 11 a pel tawh a, motor veivak chu la awm tho mah se; in hriat angin fawr kual tur leh pawimawh dang nei an ni zel bawk si. Bianca hian a chhungte pawh a call a, hruaitu tur ber a nau lah inneihna hmangin Serchhipa a zin lai a nia, a pa hi sroke vanga che hleithei tawh lo a ni bawk si.A thiante pahnih a call bawk a, an la thei lo ve ve bawk. Enkawla te chuan, “Mangang mah ta che, he lai kawngsirah hian i scooter chu dah la, kan va thlah ang che.” Tiin Zongaihzuala taxi-ah zawk chuan an phur ta a, Bianca chuan a tirah chuan a hreh hle niin an sawi. Mahse, Enkawla zawk chuan hnunglam aṭangin a nghawngah damdawi chak tak hmangin a chiu ta thut a, Bianca pawh nikhaw hre lova awm zuiin anni pahnih hian Zongaihzuala scooterah zawk phurin an in luah lam an panpui ta a, duhtawka an pawngsual hnuah a lo harh leh hmain an rekhlum ta a ni. Tichuan, ruang an chharna hmun Falkawn lamah khan zing dar 4 velah an va dah ta niin an sawi. Mateii kha chu an lenkualna lamah rui deuha an hmuh thu leh anni rui phur tawhin an phurh thu te, khawih an tum lai taka a lo harh avanga a au thu te , chumi an hlauhthawn vanga an thah tak mai thu an sawi. Bolero-a phurh tih vel kha chu engmah an hriat loh thuin an ṭang nasa mai a,. Lehlamah Cctv footage-a Mateii kalpuite mipa te nen khan an inan loh thu police lam chuan an sawi a niawm e. Zongaihzuala leh Enkawla hi patê lam ve ve, Enkawla phei chu a lu a kawlh mul a, Mateii hruaitute kha chu an lu a buk hle a nih kha. Ngaihtuah zui vak dan pawh ka hre lo. Mahse, Mateii thattu nia insawi ten hremna an hmuh ngei ka duh hle a, Mateii thlarau pawh a hahdam theih ngei ka beisei. 

In lamah lah ka nuin Lanpuii hming a khât tawkin a lam reng a, ka hne takzet a ni. Kimteii inla mark tha leh ka bula tâp dan a ngaihtuahzia te hi, ka kham takzet. A inthlahrun viau lahin ka khawngaih roh bawk si. Sunday chawhnu chu fellowship turin ka insiam malh malh a, ka nute pawh an fehchhuak dawn a, a kal tawh. Kimteii chu a insu a, a zai rat rat bawk. A ṭha tawh viau ani pawh. Ka chhuah hmain , “Ka khum hi min lo chawisawnpui lawk teh, bed spread hi ka phah duh sia, a buaithlak” a tih vangin ka va chawi sawnpui a, puan chhehchhawl kan tih ang kha a bih a, tawnzau dum a ha bawk. “Ṭang ve vak suh, rit chawi chi i la nih loh kha” ka ti a, a han insiamrem tur chu a puan bih a phelh ta, underpant nen tlawng a ding ta teu mai. Ka va melh kher bawk nen, ani lah chuan, “Awhh,.” Tiin muangchang zetin a bih tha ta a. Min hîp a tum dan hian min hîp ṭhin lo. A khum chu ka chawi sawnsak a,. “Bialpa neih ve ka tum deuh a “ a ti sap a, “A va ṭha ve, nei ve rawh” ka lo ti vat. “Nia, kan duh ten min duh si lo va, min duhtu kan duh mai loh chuan,” tiin a nui sak a. “I ho e a” ka ti ringawt, ka chhuahsan zui ta a. Kohhrana ka han tal luh ve deuh hnu hian a chhunga chengte lo felzia ka hre telh telh, thenkhat ei awm thlawt bik loh, inla fel em em, an bula awma ngaihngam theih loh riauna mize nei an awm tho nain, a hruaitu chin hi chu mi ṭha leh tu tan pawha biak nuam em em an ni thin. A pawimawh bera ka hriat chu a hminga hruaitu dinhmuna din tawh chuan tih bîk, kawm bîk te hi nei lo se, tin pawl reng rengah a bîk bîk a awm hian pawl a chak thei ngai lo. Tu pawh hi kawm theih tum ila, inzir theih a ni. Kawmngeih bik te chu mihring kan nia a neih loh theih loh, mahse, pawl huapa kal khawmna angah chuan intihhran bîk ang hi hmeichhe ho hian an hrat riau a, an kawm ve duh loh tan pawla inhman zui hi a hrehawm duh viau ang. Ka nî hi a fakawm, hetia a senior tak tak hma te pawh khan khawhar inah pawh kalpui a neih loh chuan amahin a lut bawrh zel a, a chang leh pa ho rual ten a kal thul, a eizawnna avang hian thian bulfuk a kawm hleithei lo bawk nen, midang pawi pawh a sawi hman lo ka ti mai. Ka han tlak leh duah anih chu. 

Zanah pawh ka inkhawm thlap, Lanpuii te chu naktuka lo haw tum kha an nia, mahse, a bungraw lak tur thenkhat kha an la tihfel loh vangin Thawhlehah zawk an rawn haw dawn a ni. A khawsik ser ser leh a luhai chu ka ngaihtuah viau. Mampuia erawh a tha rih e. Sailova u Muana kha a zin leh tawh a, an la innêl vak lo a nih hmel. 

Zongaihzuala leh Enkawla te pawh Central Jail lamah an dah thla tawh a, eng emaw kim lo leh fiah lo riau chu a la awm a ni. Mateii bikah khan, nikhua hre mang loa a awm hnua hmu leh phur sawn an nih thu kha an sawi a, a hmaa kalpuitu mipa te kha tu te nge ni ta ang tih chu police lamin an la chhui chhuak êm ang chu, anmahni hi han dâwp deuh se thildang pawh an la sawi theih ka ring tlat,. Engtiangin nge hma an lak dan kan hre ve tawh lo va. Lanpuii paw’n a sawi thui duh vak tawh lo. 

Mut dawn hâ ka nawh laiin ka ni pawn hmai a phih a, “Awii, ka ning, Muanchhana sawn min ngaizawng tlat! Eng chu a hria ni maw?” A ti ta hlut a, ka toothpaste ka hâk lo chauh, a za ve êm a ni. “A fel alawm, nihpui rawh” ka ti a. Mi melh no lo ngang mai, “Fa nei ta ila, ka fa rual a niang chu, a chiin a chi loh” a ti hmak hmak a. Ka pa tv en chuan a lo bengkhawn ve viau ni tur a ni, “Muanchhana, Tlani te fapa saw maw?” A lo ti a. “Ni chiang e, a buaithlak lutuk” ka ni chuan a lo ti a. “A la nau deuh tih lohah chuan a fel riau saw, tunah phei chuan PHE -ah khan a thawk ve tawh lo maw?” Ka pa bawk chuan a ti leh a,. A farnu hian pasal nei ve se a duh a nih ka ring. “Thawk e mawle, bakah Chhana te chu Kohhran a bel bawk si, keyboardist a nih piah lamah TKP-ah pawh hian nakkum chu OB a nih ka ring tawh asin.” Ka lo ti ve hluai a. “A ho a ho, a la nau “ ka ni chuan a lo ti hmawk hmawk. “Nangmah ang rual chu pathlawi fa kawi duah an nih loh paw’n mi pasal an ni vek tawh ang. Pasal chhia ṭha hi chu neih a ṭha, nakinah i upa zel ang a, i vahte pawn kawppui neiin chhungkua an din ve ang a, i hrin ngei fa te nen an inang thei dawn lo a nia. Inngaihtuah deuh rawh.” Ka pa chuan thutak deuh hian a ti ta chhut chhut a, sawi dik ka ti viau. Ka nu pawh tuilum in tur siamin a rawn tho ve leh a, Kimteii’n ka ni chungchang vel a lo sawi chuan, “A ṭul lo, Seni’n pasal a neihin engtin nge kan awm ang, a neih paw’n hetah awmpui rawh se” a ti ta daih mai. Ka pa chuan zawi sup hian, “A teh daih che chuan, hî hê che hian.” A lo ti a. Ka phone a rik avangin pindanah ka luhsan ta a. 

Lanpuii te rawn haw ni chuan ka inkhar hma a, ka inbual vat vat bawk. Dar 3 leh a chanve velah an rawn thleng a, “Tikhan han insingsa fel u la, eirawng bâwl lo mai rawh. Kan dine out ang, ka book vek tawh. “ Ka va ti a, ka hrilh sa loh vangin mak a ti deuh tih ka hria,. “Aw le, boss” a rawn tih zangkhai vah kha. Kimteii bulah chaw ka ei chhuah tur thu ka sawi chuan ka nuin ka eina tur min lo zawt leh nghal chat. “Ka thian ten dawr an hawng thar a, a lawm nan thianhoin kan ei khawm dawn” ka ti ta zaih a. Lanpuii ka sawi rik chuan a ṭêk leh dawn si. “Hmm, zu te kha i va in leh ringawt ang e aw” a lo ti leh vat. “Zu an zuar hleinem.” Ka lo ti. 

Kimteii lah chuan, “Mawina, an nute an lo haw sia, a ei chhuahpui dawn a niang” nui chungin a lo ti a, ka melh râw mai. “Zakim, ngaiw mai mai teh,. Ka ei ai i bialpa thar kha chaw eiah lo sawm mai rawh” ka ti ta daih a. Ka ngaihbel nge a tûm deuh hmak mai. Ka nu chuan, “Chu! Kimte, bialpa i lo nei ve law? Tu nge? Khawi ami nge?” Zawhna a ngah viau. A rukin ka nui vur vur mai, nge mawle, ka nu te awm laiin mi kah fek fek a ching riau vei a nih kha. “Nei mai mai lo, U Tetea hi ka tihder a, bialpa ka nei peih lo” a lo ti sawk sawk. Ka pa lah chuan, “A neihte pawh nei ve rawh, nula a pumpa khatianga awm reng kha a tha lo, i ni Seni aṭang hian inzir rawh” a lo ti ve si, Kimteii chuan lungawi lo hmel a pu tawh. “Aa..mipaho hi an mak em mai, nakinah Pathianin ka tana a ruat chu ka la nei ve mai ang.” A ti nghat a. Chimawm chhuahin, “Nia, pasal i neih dawn paw’n kan in aṭang ngei hian i nei ang chu. Mo hruaina a hla lo deuh ang chu..” ka lo ti ve hmanhmawh, a mitmeng a tur khai tawh. 

Lanpuii te inpeih hnu chuan Zotlang lam panin ka phur a, Mampuia chu a hmaah a ṭhu, “A Û awm ve se tiraw? A nu” a ti ta reuh a, ka rilrua awm reng, ka sawi ngam si loh a ni. “U Tete, engtikah emaw dine out ve ang u, ka châk ve e” a tih laite ka mitthlaah a lang uar uar a, kei ka buai ve nen, a û lah a hna avangin a haw tlai si, ka ei chhuahpui hman ta lo kha a nia. Lanpuii pawh chuan a chhang fumfe bik lo. Pawn lam a thlir vang vang ringawt. Zotlang leh Pukpui inkarah Restaurant nuam deuh an hawng thar a, a awmna hmun a fuh bakah an dawr sak dan a zo reuh si, an thilsiam a tuiin a to over si lo a, ka thianten an sawi deuh reng vangin Lanpuii te nufa eipui kha ka duh ve a ni. Lanpuii chu ka hmu cher deuh, a zin chau leh boruak hip tawn nen, a khua lo sik zeuh zeuh bawk nen, chu chuan a vun te pawh a ti thû deuh niin ka hria, ka mitah erawh tuman an tluk thei lo. Eitur kan han chah a, an curry leh bai mawlh chu a tui teh e, an polite bawk si. Mampuia pawn a ei ve ṭeuh mai. Lanpuii erawh thil ei ṭeuh ṭeuh mi a ni lo bawk a, ina a ei ang thoin a ei a. A eikham washroom-a a va lut a rawn let leh chu eng emaw sawi duh hmel, sawi hreh si hmuh hian ka hmu ta tlat a. Ka lo chîk viau pawh a ni mahna. “Sawi duh deuh i nei em ni?” Ka ti ta thâwr a. “Nei hran lo ve, Mateii ka ngaihtuah chhuak lo thei lo va. Mahse, sawi tawh lovang” a ti a. Ka awih thlap. “Sailova te in aṭanga hruai chhuaktu mipa te kha Enkawla te hian an hriat tho ka la ring fan, Bolero-a chuanpuitu te kha.” Ka ti ta hram a. “Kha khan alawm rilru tibuai em em, Police lam erawh an phur sauhin ka hria. Anni khan damdawi ruih theihin an chiu phawt ang a, khawiah emaw an hnutchhiah ringawt a niang. Mahse, pawngsual a ni bawk si lo, kha lai tak kha a buaithlak e” a ti niah niah a. 

“Tunah rih chuan lo ngaihtuah ve vak lovang, police lamin an chhui chhuak vat tawhin ka ring, Enkawla te hi han dâwp deuh se, Bianca an thah dan an sawi pawh kha kei chu ka awih vak lo deuh.” Ka ti mawlh mawlh a. Ka sawi hmaih pakhat chu Enkawla te an reh chhuah chat theih chhan kha chu an in luah thenawma khawsa hmeichhe naupangin khami zing lam a inthiar turin an chhuak lai kha a lo hmu a niawm e. Ani naupang khan zanah spicy noodles a lo ei ṭeuh a, a khami tuar lo kha khatiang hunah khan a lo inthiar a lo ni. An inthiarna hi veranda-ah a awm a, chutah chuan a lo hmu hlauh niawm a ni, a chhungte bulah a thuphungin a sawi a, khatia Bianca a boa a ruang an hmuh tak siah khan naupang chhungte chuan a thuphungin an thenrual bulah zing lama Enkawla te chhuah thu vel an han sawi kha lo la thutak chhoin police beng hial a thleng ta a ni. Hmeichhe naupang khan Bianca a nih leh nih loh pawh a hre bik lo, Enkawla te an han dâwp deuh tak tak hnu khan tikhan an inpuang ta a ni. Mateii pawh kha an in luaha hruai lut ang khan an insawi a, Mateii kha thawm chhuah vak thei a ni lo nen, an sawi hmangin au chhuah a tum vanga vit hlum ang khan an insawi a, a lo dik ve thei tho. Aa, hun hian hril teh se. 

An inah thingpui hâng ka in zawk a, an chauh ka rin vangin ka haw hma. In ka lut chu ka nui ruh ruh mai, a chhan chu kan lo sawi zuk tawh Muanchhana khan ka nî a lo rim tlat a ni. Ka ni lah chuan min lo melh râw râw a, a zak deuhin ka hria. Inleng a nih miau avangin a kawm a ngai si,. Kan tet laia an rawn rim thin bak kha tun hi an rawn rim leh hmasakna ber a niawm e a, “E! Chhana, i va fel ve” ka han ti puat a. Midangho chu an mu tawh a nih ka ring. Kei pawh tihtur em em nei tawh hek lo ka mu ve ta thuai a. 

Zirtawpnî-ah phai lam aṭanga damdawi an rawn thawn kha Aizawla a tangkhang vangin pick up hire-in driver nen chaw eikhamah va phur turin kan chhuak a, driver hi Chhuana a nia, a tawng duh ve bawk nen kan titi kawng tluan a, kawng pawh a tawi phah hle nghe nghe. Dar 3 velah kan in load fel thei a, riah kha kan tum lem lo bawk nen, Lunglei lam panin kan chhuak leh ta a, kan tlan tluang viau, Mahse, Mualṭhuam leh Haulawng inkar kawng kawiah vai truck rawn tlan nen kan insu ta bur mai. Kha vaipa khan side a la lo ve hrim hrim bawk a, sumo bakah motor veivak dangte chu an rawn ding sap sap hlawm a. Chhuana chuan a chal a tauh thi a, a banrek a tina deuh bawk. A bak hliam dang a nei lo a nih hmel. Kei erawh a tira nâ hre miah lo kha motor atanga ka han chhuk tur chu ka khup dinglam hi a na ta em em a, ka va tauh kher bawk nen, ka khup nâ vang chuan lei ka rap ngam ta awzawng lo mai le. Min kuah chhuak a, ka khur zawih zawih thei hial. Pa pakhat hmel sâr vuah hian, “I khup ruh a keh emaw a khi emaw a ni maithei. X-ray tir vat la, zai a ngaih phei chuan zai hmatir a tha viau ang” tiin ka khup chu a thlek dûk dûk a, a nih ngei ka ring. Ka nute chanchin ka va hrilh a, pickup chu a hmelhem ve nual a, Chhuana paw’n a pu be nghalin police lam te nen an insawi fel ang chu. Vai lam hian pawisa an chawi nual a ngai ve maithei a ni. A chhan chu kan hnunga tlan sumo-a chuangte khan vaipain side a lak lohzia leh a tlan chakzia kha an hmuin a hre ve tlat . Kei erawh ka khup chu a nat tawh êm vangin ka nu mangang chiai chuan motor danga rawn haw vat turin min rawn chah a, mizo kan ni bawk a, tlawmngai thei an lo tam viau,.tichuan, incheck up vat turin Lunglei lam chu kan pan nghal ta chûk chûk a,Pathian zarah damloh hritlan te chu han nei ve mah ila damdawi in-ah ka la awm miah lo, hliam na tak ka la tuar lem lo bawk. Civil hospitalah ka nu leh ka ni ten min lo nghak a, a zan azana luh nghal kha ka duh si lo,min x-ray nghal thei azeng pawh a ni lo va, a tuk lama kal leh turin kan haw ta rih a. Ka ni chuan tuilumin min dehsak a, nachhawkna sang ve deuh takin min jection bawk. Lanpuii pawh a rawn mangang viau a, lehlamah kawchhung lam a nih hran loh avangin ka vannei tho mai. A tukah Mama hoin kan va kal leh a, Ortho doctoc Dr Joseph-a leh ka ni te hi inthiantha deuh mai an lo ni bawk nen, Pu Joseph-a zarah X-ray pawh kan ti hma thei ta hlau a, ka khup ruh chu a lo keh ngei a, zai a ngai dawn. Appoinment kan han siam a, zai tur a lo nei nual si,.a tuk chawhma lama zai turin damdawi in khumah ka nghak ve ta ran mai. Ka rah ngam loh bakah zakdawh tiang ka la hman thiam loh vangin inthiar velah ka tan a buaithlak dawn êm avangin ka ni-in min riahpui ta hlauh a, natna leh hliam dang lian tham ka nei lo chu ka lawm hle mai. Zanah Lanpuii leh Mampuia te pawh an rawn kal ve, Mampuia lah chuan, “Pate, ke nat chu a hrehawm e tiraw..a na si” a ti a ti ve mai a, a ke ruh tliak kha a la theihnghilh bik lo nasa. Ka ni leh Lanpuii’n sawi tur an lo ngah dun nasa, kei pawh min ngaihsak hman meuh lo a ni e. A tukah chuan min zai ta a, ruh lam hi chu a dam har ve deuh a, khup nâ phei hi chu a buaithlak zual. Europian type-ah lo chuan inthiar ngaihna a awm lo. Ka ni a hnaah a buai si nen, A tlawngawl ber Kimteii’n min awmpui lo thei ta lo. Ka peih lo ru hle, mahse, duhthlang thei ka ni si lo. Vanneihthlak takin civil hospitalah chuan extra bed a lak theih a, ka khum bul a lo awl hlauh nen, kan la ta vat a. Kimteii pawh a mu nuam ve deuh ang chu. Chaw pawh ka pain min rawn pe mai a,. Sunday chawhnuah Kimteii chu inbual turin a haw a, Lanpuii a rawn lang ve thung. “Mampuia chu a nu Lateii ten leng turin an rawn sawm a, a phur khawp mai. “ A ti melh melh a. Eitur eng emaw a rawn keng ve a, apple a vel a, a hmaa a khawsik kha incheck up turin ka ti kha a nia, a la incheck up lo chu ka lawm lo hle. Ka hau deuh a, “Seni kha ka râwn alawm, influenza a niang, tunah chuan ka ṭha tawh. “ A ti siam siam a. “Ka dam veleh Thenzawl dilpuiah chuan kan kal dawn nia” ka ti a, kal ve a châk thu a sawi fo a, Johna te leh Lateii te chhungkua nen kan la kal ang chu. “Dam phawt rawh, indim te kha a ngai a nia aw. Khup phei chu” a ti a,. A kut ka vawnsak vawng vawng. A phone a rawn ri a , “Pu Ramtea Case IO kha a nih hi..” a ti hliai a, a be zui mawlh mawlh. Rei erawh a ni lo. Phone a dah hnuah min rawn melh kâwkin, “Bianca postmortem result kha min rawn hrilh ve a nih kha, a kal (kidney) a awm lo” a ti ta mai! “Ehe!” Ka ti hluai a. Damlo dang kantu te pawh an rawn hawi ṭhup mai. “Insum rawh, Tlangzarh chi a ni lo va,. Ngaihdan i nei em?” A ti sar sar a. 

Ka ngawih det hnuah, “ Mateii kha chu engmah an sawi lo tiraw? “ Ka ti leh phawt a, a bu nghat. “Bianca kha a nih chuan an thah hmain a kâl an laksak tihna a ni ngei ang a, Enkawla te thian dun ringawtin chutiang chu an ti thei lovang. A phenah hian thil dang a la awm chiang lutuk. “ Ka ti ta mawlh mawlh a. 

“Mateii kha an thah angin an sawi bawk si, ani erawh a kâl(kidney) bo thu an sawi ve si lo, ka buai nuaih mai.” A ti niah niah a. Rilru a kal thui hle mai, “Bianca kha a phone an check sak em le” ka ti thut a. “Ka hre miah lo chu tak chu. Bianca case hi chu a chhungte kan nih ve loh vang hian min hrilh tha duh vak lo a” a ti a. A dik ve tho ang,”Zongaihzuala leh Enkawla te hian sawi tur an la nei khawp ang, police lamin tihdan an thiam ang. Nghah lam hi peih a ngai a nih hi” ka ti a. 

Kan titi tui lai takin Kimteii a rawn kal ta a, “Awii, U Lanpui, ka nu a lo kal ve ania, pawnah sawn a hmelhriatte a be lawk a. Engtin nge niang?” A ti hlut a. “Aw, a lo kal ve a ni mai lawm, chiâi mah ta che.” Lanpui’n a lo ti dam thlap mai. Kimteii pawh a hrilhhai hmel deuh. Kar lovah ka nu pawh chu a rawn lut ve ta a, Lanpuii a hmuh pawh chuan a hmel a danglam eih lo. Lanpuii lahin a lo be siam siam a, Kimteii nen kan thlir deuh tawp. Mahse, ka nute rawn kal aṭanga 5 mins velah Lateii’n a lo call a, Mampuia va lam turin min hawnsan ta a ni.

“Inthen hi chu kan la hlat deuh a ni maw?” Ka nu chuan a ti leh ta khak mai. Ka nui ringawt, “U Lanpuii hi chu ni ila U tetea hi ka then tawh ang. A tlawmthlak ka ti” Kimteii chuan a ti phawng a, “Hmeichhe pangngai nise bansan a hun tawh, mi kâ aṭang pawn ka ṭawngkam te chu a hre fo tawh ang. Min runluih a nih ber hi” ka nu chuan a ti nghat a. “A luhlulna hi lawm ka duh chhan” ka ti ve ngat. Damdawi ina han inhauh vak kha tihchi ni hek lo, ka nu insûm hmel chuan ka nuihte a tiza deuh, ka nu a nih miau avangin ka haw lo va, min hmangaih vanga hetianga ngaihdan nei pawh hi a ni ve thei. Mahse, mi pahnih inkar hi midang tan tihchhiata ṭhen hran ngawt theih a ni bik lo alawm, min dem em em bik ka ring lo. Ka tawn ang tawng hi in awm ve thoin ka ring. Ka nu pawh rei awm lovin a haw ta vat a, ka lawm zawk. Chaw min rawn kensak bawk a, kan ei tlai angreng. Kimteii pawn a phone a khawih mial mial mai. A tuka doctor hnena chhuah ka dil chuan a nuih a za tawp, “Ekhai! I intina zual ang, a chamte i awm ve ang chu, awmpuitu lah i nei ṭha si” a ti nui vur vur a. Ka lo ner suk ringawt. Ka va han peih tawh lo tak. 

Zun bur ka inchhawp tho a, ka veivak tam lo. Lehlamah Kimteii pawh a fakawm ka ti, kan rilru a inhmu lo deuh a ni mai a, a mawng a zâng bawk si. Ka mut dawn chuan, “Kimte, tui deuhin muhil rawh aw, i fel sia ka lawm lutuk” ka ti ve ta sup a. A nui sen sen mai. 

A tuk chawhnu lam Kimteii haw zawk hlanin ka beisei loh deuhin Lanpuii a rawn lang a, Mampuia erawh dawra a dah rih thu a sawi a. A hmel phelh phang leh buai deuh niaih chuan min tiphâwklêk ve deuh,. Ka kut rawn vuanin, “La sawi chhuah chi a ni lo va, nichin lawk khan Sailova leh a pa an man.. Mateii leh Bianca thihna chungchangah “ a ti ta mai! Khai aw! “Eng nge a awmzia?” Ka lo ti hû a. Thawk a han la tê tê a, “Hei vang hian a nia buai pawh sawi lo va ka rawn kal, sawi chhuahna ka duh lutuk, ka tawt up up a. Case IO nena kan inbiak zawh rualin ka rawn kal nghal” a han ti tê tê a, nghakhlel zetin ka lo ngaichang. 

“Ih, Enkawla te kha tih tak takin an dawp a, Bianca taksa peng bo thu te an han sawi khum a, vai na na na chu a lo dawihzep deuh a niang, Zongaihzuala zawk a inpuang ta vek a ni. Manipura an awm lai aṭangin Sailova te hi police lam pawn an lo ringhlel tawh thin a lo nia, mahse, finfiahna an neih that tawk loh vangin an hling ngawt thei si lo. Anni hlauthawng chuan Mizoram an rawn pan ta a ni. Tichuan, Sailova pa hian a sangawizâwnpui tur pawisa mamawh deuh tur a zawng nghal a niang. Enkawla te kha Sailova pa te office kawtah an ding thin a, ta ṭanga inhria an niawm e. Kâl hmanga an lo sumdawn thin vang a nia an hausak em em, a pa hna ringawt te chu hausakpui tham a ni lo. Keimah pawh an chhungte tak tak ka ni em tih finfiah a la ngai ang. Ka ringhlel vek tawh. Mateii kha awmpui atan min dil ka tih kha, ani kha tleirawl hrisel leh hawiharh tak a ni a, an lo duh hle niawm a ni. 

Khami zan khan Mateii chaw thlengah damdawi an lo phul ru a, tichuan, an doctor thurualpui vai te nen in hnuaiah Mateii taksa peng pawimawh lai chu an la ta a ni. A damchhuak a nih pawn a la hlauhawm thei dawna an hriat avangin an chiu nawn leh a,. Vai doctor leh ka ni pasal ten mask vuah chungin an hruai a, bolero-ah hlangin, Enkawla te kutah khan an dah zui ta a ni. Enkawla te chu an hmanrua mai mai,. Tikhan pawisa pein Mateii chu dahbo turin an ti ta a ni. Mateii kha pawngsual pawh a lo ni ngei alawm. Ka thinrimzia leh rilru natzia hi e, postmortemtu kha an lo tham chu niin tiang khan result dik lo lutuk min hrilh a nih kha. 

Bianca kha chu i ngaihtuah zawm thiam mai ang chu. Ka rilru hi a na ngawih ngawih.” a ti ta mawlh mawlh a. Ka thu hriat chu ka rinphak bak a ni. Sailova te mai mai chu aw. Ka va han hnek châk tak. Ka lo insangmar nasa a niang, ka hah vek thei. 

“Zawnga mai mai chu,.” Tih bak ka sawi thei lo. Ka na vawng vawng, Mateii mangang thlabâr hmel tur ka mitthla hian ka sahâl. An eizawnna rapthlak tak an hrechhuak hma chu ka lawm, mizo engzat nge eizawn nana hman an tum ang le,. A va nunrâwnghlak tehlul êm. 

Kimteii leh Mimi te an rawn lut a, Mimi chuan, “Khup chhepa, dam vat teh, ka ning tawh. Mahnia dawr nghah hi” a rawn ti leh hawr hawr mai,. Lanpuii nen an inbe zui ta hlut a, kei erawh ka hmelhmai a la dik chiah lo nge, Kimteii chuan, “I nuam lo mi? U tete” a ti sap a.” Ka ṭha alawm” ka ti ringawt. 

Sailova te an man thu vel chu police lam pawn thu chhuah an rawn nei ta a,. Mak ti an awm laiin thenkhat inla fing fâl ho lahin, “A tir atanga ka rindan” an rawn ti leh ngei a,nuihte lam a za alawm le. Mahse, a tir atanga keini pawn kan lo rinhlelh ruk tho kha a nia, mahse, chutiang taka nunrâwng an nih erawh ka beisei lo. Mateii thihna phuba chu lakin a awm dawn ta. Court-in thiam loh a chantir ngei ka beisei. 

Titi dang a leng hleithei lo, Kimteii nen pawh kan sawi dun ve deuh reng. Chhuah vat vat ka châk tawh si, ka nu mangangin Doctor bulah a lo ngen ta tawp a,.tiang pawh ka hmang thiam ve sawlh sawlh tawh a, nilai chawhnuah kan chhuak ta hram. Mama te chhungkuain chaw an rawn ei a, kan hlim dar dar hle. 

Chaw ei khama kan thut khawm laiin ka pa chuan, “Kha..Lanpuii ni pasal leh a fapate thiltih kha a rapthlak si a, amah Lanpuii pawh hi an chhungkaw mi leh sa a nih ka ring ta vak lo, an thangkam te hi a ni mai lo’ng maw le” a ti chuar chuar a. 

“Kei pawh ka lo ngaihtuah ve chiah, Lanpuii’n Manipur lam tumah biak pawh tur a hre si lo va, a hma daih pawn zawn chhuahna hun a tam viau alawm le “ Mama chuan a lo ti ve bawk a. “Nia, amah paw’n a ringhlel vek tawh. Nakinah private detective rawihte a tum kha maw. A nî anga inchhal ber sawn a pasal fanaute thiltih hi a hriatpui lo nge, a hriatpui lo a nih chuan a khawngaihthlak letling” ka lo ti ve luam a. 

Ina rawn kal êm chu a hreh ve si, kei lah leng chhuak thei ka ni si lo, Lanpuii nen chuan kan inhmu khât ta viau a, Sundayah phei chuan ka lung a leng em em ringawt. Johna a rawn lawr zing viau a, a zia zia a awm. Eizawnna lam a ngaihtuah nasa bawk a, a pain a lo tuipui ve hlauh bawk nen, a dinhmun a kang sawt khawp mai. Sailova te a huat thu leh Mateii a lainat thu pawh a sawi khât tawk reng a, tihtheih kan nei em em rih si lo. 

Sunday zan ka nute inkhawm hlan chuan Kimteii a rawn lut a, “Ka zût mai ang che aw. Ka nuin lo zût mai rawh a tia, an thu hnufual dawn a niang. “ A ti a, tuilumin min dep phawt a, ka lo chhing duar duar mai. A nuam angreng,.a deh zawha Oil-a a zut phei chuan ka nu zut aiin a nuam daih zawk. “Nuam i va ti awm ve a.” a ti sep a. “Umm, i zut thiam lutuk.” Meng hlei lo chuan ka lo ti a. A chawl det a, ka rin loh deuhin min rawn fâwp thut mai. Ka va meng chiang tak..”Hey’ ka ti tuarh a, a inla hrang vat. “Tihpalh” a ti a, “I rui mi?” Ka tih chuan, “Aw” a ti hmiah. 

“Va mu rawh” ka lo ti ngjal chawt a. A hawihai deuh, “Ka nu ten an hriat hma chein va mu rawh” ka ti leh hmuk. Min melh zauhin a chhuak ta hna hna a. Keimahin ka khup chu ka tuam mawlh mawlh. Kar lovah ka nute pawh an rawn haw ta a. Ka mutui vak lo, Kimteii chu ka hlau chu ka ti lo va, pawisak a nei vak lo chuan buaina min neihtir ka hlau ta viau mai. 

“Nangmah vang a nih hi i hria em? Kimteii tluka fel leh zuanzang kan hmu tawh lovang. Engvangin nge i lo hnawhchhuah a?i va thu âwm ve.” Ka nu awrâwl vin lutuk chu makti zetin ka melh ta reng a, zing dar 7 a pel chauh,. “eng nge a awmzia” ka lo ti hû. “Lalnunpuii, nuthlawi zakthei lo lutukin hnawk a tih vangin i lo hnawtchhuak ve ringawt a maw? I pa thutiam kha i theihnghilh ta em ni? Nunpuii 10 ai pawn Kimteii pakhat mo atan ka duh zawk. I hre khawp ang, ngaihdam i dil lo a nih chuan..” a ti leh hlawih hlawih, a hnua ka ni sawidanin zingkar sumo-ah Kimteii chu a thawmhnaw nen a lo haw daih a lo nia, a kal dawnah ka nu a lo text a,.”U Lanpuii’n min thik tlat a, U Tetea a hmin thiam nen, nizan in inkhawm hlan khan in chhuahsan turin min tia. Ka chhuak ta mai. “ Tiin. Ka hachang ka ṭhial, engvanga dâwt chiang lutuk sawi ngam nge a nih le..

Ka nu chu a la lungawi thei ngang lo va, Chhungkua kan awm kim ṭhep ṭhawp laiin Lanpuii a call ta hmiah mai le. 

“Hello” a rawn ti dam dap a. 

“Nangmah vangin chhungkua kan buai zo tawh, engvangin nge Tetea bulah Kimteii hnawtchhuak tura i lo tih a? I va zak lo ve. “ Ka nu chuan a ti tâwn tâwn a, ka pain khap a tum, mahse, khap hneh hleitheih pawh a ni lo. 

“Chutiang engmah ka ti lo. “ A rawn ti leh a,. A aw pawh a la dam hle. “Dawt sawi suh, hei hi hre rawh, Kimteii hi ka fanu anga ka en a nia, mo atan pawh ka iai lo. Nang a neih dawn ai che chuan Vanlalliana nen hian ka inneihtir ang. “ Ka nu zet chu aw. 

Lanpuii chu a thaw hawk a, “Nu Sai, chutianga i tih dawn rau rau chuan Lalnunkimi kha lo hrilh la, in in chhung hrehawmzia, in mo nih hrehawm turzia leh Tetea rinawm lohzia te, zu a hehzia te leh nang pawh a nin thinzia thu te hi min rawn hrilh tawh suh se aw. Tichuan, hlim takin i mo chu ni rawh se. “ A rawn ti ve ta sak sak mai, ka meng bial kâwk. Lalnunkimi chuan chutiang chuan a lo sawi thin a maw? Ka nu chuan, “Chutiang a ti awkawng lovang e. Chhuanlam zawng suh. “ A ti hlak a, “Kan inbiak tirh atangin a msg hi pakhatmah ka la delete lo, ka rawn thawn dawn che nia. I chhiar ngam ka beisei. Chuan, ka buai rih a, ka dah lawk dawn. “ Tia dah a tum lai mekin hmeichhe aw tliang ral hian,. “Lanpui, thla 1 leh kar 3 a ni tawh a,. Engvangin nge Tetea bulah a fa i pai thu hi i hrilh vat loh le.. “ a rawn ti a.

Ka nu chuan a phone ken lai a chu a thlauh bawl mai. Kei pawh ka za chhuak vek. Vanlalnunpuii a rai ! Ka fa ngei a pai.. Lalpa, a va makin ka va lâwm êm. 

“Pa ka ni ve dawn.” Tiin ka phone ka hmet zawt zawt a, Lanpuii ka call ta nghal. “Ka fa i pai maw? Engvangin nge min hrilh loh?” Ka ti sek sek a. Thawk a la halh a..

“In chhungkaw buaina thlentu nih ka duh loh vang a ni. “ A rawn ti sap a. Ka nu leh pa ka melh tawn sek a, ka pa chuan bu nghutin, “Engkim a ṭha vek e, ka fapa..” a ti nghet churh a..

A TAWP TA.