HMINGDUHAWMA (1)

HMINGDUHAWMA.. (1)

Ziaktu : Toni Râlte

“A thih dan kha ka ringhlel reng a! Hetia a thla an hmu fô pawh hi a mawh lo ve” ka nuin a tih mêk lai chuan, ṭhenawmpa Pu Hlira a rawn lut a. “Lo leng rawh, pu Hlir” tiin ka nu chuan a lo chhâwn nghal var. A tuibur ûm hnûm hlurh tawh chu phawrhin a han hmuam phawt a, muangchangin ṭhuthmun a rem ve ta a. Kei erawh chuan ka bai chhuan lai chu chawk rawk rawkin, “Nu, vawiin chu ka kal ve dawn nia aw, lui kal ka châkna a rei tawh lutuk.” Ka ti a. Ka nu pawh chuan,”Aw, i kal dawn nia, i sawi zing tawh êm mai.” A lo ti ve mai bawk. Ni e, ka ṭhiante nen vawiin chu lui kala lui lama chaw zu fâk mai mai kan châk a, kan rawt hluai a, kan puitlin ve dawn a nih hmel, khua a lumin ṭhal lai a ni bawk a, ina awm pawh a ninawm, khaw lumin min hmet chau tho zel si. 

“I Pu Hlira hi thingpui hâng lo thlit rawh” ka nuin a tih chuan flash-a kan dahsa chu ka thli chhuak nghal a, Pu Hlira chuan muang churh hian, “Kha..Remi, nizan lam boruak chu sawi a va tam ve mawle, in lo hre ve tawh ang chu tiraw?” A ti a. A lo luh laia kan sawi dun kha a ni tih ka hrethiam nghal. Ka nu chuan, “Nia mawle, a zia lo tak tak a ni, Ṭhiannu Thangi ka lainat ngawt mai. Inriak pawh an ṭil zo mai ang tih a hlauhawm a nih kha. A pawi tak tak a ni, tlangvala pumpa dâwt muhlum an sawi a rinawm chiah si loh a.” A ti ve mawlh mawlh a. 

“Kan naua paw’n , ‘Ka pawnthuah ka têl dawn e’ a tia, ka remti rih lo alawm, an lainatawm si a, hetiang thil hi kan khawtlangah hian sawi a awm khât viau asin mawle” Pu Hlira chuan a ti leh chuar chuar a, tukverhah a tuibur hmuam chu a va pit puat a. Ka nu nen an titi chhungin kan kawt zau lem lo tak chu ka va phiat fai a, in ka chhuahsan dawn chuan fel thlarha chhuahsan hi ka duhdan a ni thin. Ni e, tuna ka nu leh Pu Hlira te thusawi kha in hriat châk ka ring deuh..

Kar khat liamtaah khan ka nu ṭhiannu Nu Thangi pasal zan len deng chu a rawn haw hun âwmah pawh a rawn haw theih loh avangin ṭhenawm khawveng leh chhungkhat ten an zuk zawng a, zing lam dar 5 bawr velah lungpui chunga a bawkkhup zawnga a tlu an zuk hmu ta a, an han kawih zangthal chuan a lo thi reng tawh mai a lo ni a, a taksaah hliam engmah hmuh a ni lem si lo, mak tak maiin a hmai leh a kut leh ke hmawr vel chu a duk dum tlat mai a, sangha pawh tlem azawng chu a lo man hman a, a len erawh a tlukna bul lawkah hnawk deuh niaih hian a lo awm a. Tichuan, rawn zawn hawngin a thih dan runthlak tak chuan sawi a hlawh hle nge nge, a ruang chuan rim a neih hma êm vang leh tawrh zawrh rual a nih loh avangin vui hun aia hmain an vui nghe nghe a ni. Khawpui te chu nise a ruang kha postmortem ngei ngei chi a ni a, mahse, kan khaw ṭhenawma PHC-ah pawh postmortem thei doctor an awm bawk si lo, a nu leh pa leh a nupuite remtihnain postmortem lohin an phum ta ngawt kha a nia, a thih sarhu lai tak kha chuan sawi a awm lem lo. Zan 3na aṭang vel khan a thla hmu leh a thawm hria an awm ta fó mai a, inriak tlangval pahnih phei chu zanlaiah hlauhlawpin an inpu chhuak hial a ni. A thla an hmuh dan a inang deuh vek a, a thih laia a hmel duk dum vek leh a mitmu var vekin a lo melh kur thin niawm tak a ni. Tin, thlanmual kawnga awm thenkhatte a rîkrâp nasa thin hle bawk. Thlanmualah patling awrâwl tâwpa ṭap hawm hawm te pawh an hre ta fô a, chu chuan khawtlang titi a luahin khawi hmunah pawh an sawi tihtheih a ni. Ka nu thiannu pasal a nih vangin kei pawn ka hlau ru viau nghe nghe a, ka û te nupa lah an nute khuaa an zin lai a ni bawk si, ka nu nen chauha zan tumtawi chu hrehawm ka ti hle, amaherawhchu, keini nufa chungah chuan zah a ngai nge ni eng êm chu kan tawng lo e. Ka nu erawh chuan, “Chhuana hian sawi duh a nei a ni, a thih danah khan felhlel a awm tlat a tin ni” a ti âwl lo va, a hlau ve mang hlek lo. A nupui Nu Thangi mawlh a khawngaihthlak, an tan a zahthlak dawn bawk si. 

Tukṭhuan kan ei lai chuan, “I û te pawh naktuk lamah chuan an lo hawn ve theih ka ring, naupang awm lo chu a khawharthlak êm mai, lo haw vat teh se..” a ti suam suam a. 

“Nia, bakah zanah a hlauhawm thei si” ka lo ti ve vat, min nuih ringawt. 

“Lo haw har lutuk suh u aw, tui te kha i zu cheng leh vak ang e, zu fimkhur ang che” a ti leh hlak hlak a. Zêp thu a chêng lo, nula puitlinga chhiar tham ka la ni lem lo va, phurthak hun lai, thiante nen chuan engkim nawm vanglai a nia, min zilhna te chu benga rawngah ka thun reng thei bik lo. Ni e, tunah kum 17 chauh ka la ni a, class XII  result ka nghak ve mek chauh a ni. Ka pass chuan kan khua chhuahsan a ngai dawn si a, fail mai pawh pawi ka ti lo ru viau mai ! Ka thian tam zawk te hian zirna an bansan tawh miau a, ram hnathawh mai kha pawi ka ti vak lo zawk, bakah Thingtlang mi tih takah khawpuia awm chu châkawm viau mah se; ka zak ! Ka ṭî hûih ni maiin ka hria. Kan khuaa nuih thler duai duai hi nuam ka la ti viau e. Sen teii’n min lo sawm a, lian lerh lawrhin chaw ka fun a, Hmarcha ro, purunsen leh sawhthing ka bâwk a, phur takin kan chhuak ta. Kan lui kalna tur hi a hla lem lo bawk a, kawng a chho ulh lo bawk, kan thianho 7 lai chu ri nak nakin kan inzui liam ta a. Hmeichhe 3 leh mipa 4 kan ni a, Mami leh Chhana te nen hian result kan nghak ho a, a bak chu zirna bansan tawh vek an ni. Mahse, khawi kipa inzuia inngai em em kan ni a, anni chu zirna an bansan tawh vangin ram lamah an ṭul êm zawk a, sunday bakah ṭhalai tihpui nikhua chuan kan inzui diah diah reng mai a ni. Lui kan zu thleng thla chu kan kûk raih raih a, lui mawng lam kan zawh leh hlek hnuah hmun zawl leh rem takah innghatin kan thil ken ang ang chu kan phawrh ta sap sap a. He lai lui hi chu khua atanga a hnaih deuh bawk avangin NGO lam paw’n an humhalh lem lo va, kaikuang leh nghate man nan tak hian an la hmang ve a ni. Keini pawh Mipa hoin ru atana an lo lak tawh khang chu an rawn phawrh a, kan chhak deuh aṭanga vuak chu an rel thlu ta a. Rei kan thut khawmuan hmain kan che leh ta sang sang mai, ina hawn atana vua kan ni lem lo va, chhun chawfâkna daih a awm chuan kan lawm tawk mai, tichuan, ru chu kan vaw ta tluar tluar a, a phuan thla ve nguai nguai mai. Sangha rui nghah pahin kan thu thlan dai a, kan zinga phawk ber Berhpuia’n fiamthu thawhin kan nui leh ham ham tawh. Tluanga chuan, “Kan bawngpu Pu Kumara fanu ngozia khi aw, Chhana tan hian bemsak ang u, hman zanah pawh kuhva thlum a rawlruk a nia aw” a rawn ti vei zuk a. Kan khaw tawntirhah hian gorkhali chhungkua hi pali vel an awm ve a, bawng an vulh vek a, bawnghnute hi kan hnianghnar phah hle nghe nghe, Pu Kumara fanu Des-i chu kan inrual vel maithei, a hmelthain a vun a nalh em em a, kan khaw tlangval thenkhat pawn an rim ve fo mai , mahse, amah hi zakzum chi, lerh lo mi tak a ni nge a ngaihsak lem lo. Mahse, kan thianpa Chhana hi kumtir atang khan a mitmei ve deuh zeuh zeuh mai a, fiam nan tak kan hmang thin. Chhana hi a hmelchhe lem lo bawk a, lehkha a thiam kher bawk si nen, tlangval to pawl a la ni ngei ngei ang. Berhpuia chuan, “Nia, Chhana hian bawng chaw sat thin se a inhmeh dawn lutuk, zanah kan leng ang.” A ti leh tlut a. Chhana a khi a khi ringawt, ani pawh hian a iai vak pawn ka hre lo ,mahse, Chhana nu hi nu huaisar, zahpah nei lo,.hnamdang hmusit rawngkaia ṭawng cheh mi a ni a, hei tak hi Chhana te unau to loh chhan pawh niin a lang, Chhana farnu pahnihte pawh hi kan khuaah chuan nula hmelthaa sawi hat tham an tlin laiin inleng te hi an nei mang ngai lo, a nu avang hian miin an hmu sirhê tlat zel, amah Chhana tak pawh hi a zak thin. Sangha an rui ṭan a, an rawn inperh at at hlawm mai, lensuah nen kan bei ta hlawm a, kaikuang pawh kan man ve nual mai. Ei khawp zân chu vaukam changel kan phahah chuan kan theh thal ve ta phung a, a hlimawm ngei mai. Tichuan, muangmarin eirêl kan buatsaih ta a. Tluanga leh Berhpuia ten tumbu leh chakawk an vâi a, Chhana leh Bma ten thing an fawm bawk. 

“Awii, Te, kei chu result chhuah a hnai tual tual a, ka zâm tulh tulh” Mami chuan bel ung zet sil pah chuan a ti lâng lâng a, “Sawi lo teh, kei fe” ka lo ti vat. Seni erawh a phone bihin a khi leh vur vur tawh, ani hi chu a dan ve reng a nia, khaw thenawm tlangval nen hian an inbe âwl lo a ni ber e. 

“Nang chu i pass ang, pass ta la, khaw nge college kal i tum deuh tak?” Mami chuan a ti leh a, rilru ka la siam fel chiah lo nain, “Ka nu kha chuan Aizawlah i kal ang min tia, mahse, awii ka peih lo e” ka lo ti nang nang. Ka peih lo tak tak. 

“Kei pawh ka pain Aizawlah i nite hnenah i awm ang min tia, anî te ka nêl vak si lo a, Enteh, kan pass chuan Chhana te nen kan pathum hian in luah ho daih ang u..” a rawn ti leh hluai a, thil ṭha tak a ni ngei ang,nawm pawh a nuam bawk ang. “Nia, result chhuak phawt se” ka ti a. Tumbu leh chakawk nen Tluanga te pawh an rawn thleng ta a, mei te chhemin sangha chu kan bai thak a, chakawk kan thlak hlek bawk. Tumbu erawh Bma’n a vaipaden a, chawhnu lam a ni ta bawk a, ril a ṭâm ta râih mai. chawhmeh vil lai chuan kan duhzawng zawng sawiin kan titi a, Bma chuan, “Pu Chhuana thlahrâng hi ka hmu ve ang tih ka hlau e” a ti ta,. Kan phâwk nghal hrû mai. Seni chuan, “Chutiang sawi hun a nia mi ? Biakmawi, mawla” a ti ta zêk a, Chhana chuan, “Kei chu eng emaw sawi duh a nei a nih hi ka ring e, a inlar danah hian, bakah a thih dan kha khati kha a nia. Thah a nih ngei ka ring.”.a lo ti ve a. Kan zinga ho ber Berhpuia takngial pawh chuan, “Kei pawh thah a nih ka ring, khatianga tluk hlum ringawt thu a awm lo a hmai duk dan te kha, apa chuan tûrin an hrai a niang a tia sin.” A lo ti ve a. Kei pawh hei hi ka rin rûk dan a ni, mahse, ka sawi kher lem lo. Postmortem a ni lo kha a pawi ta ber a ni. Mami chuan, “Tu thah nge ni ta ang le? Pa Chhuana te chu mi tluang leh zaidam, tu pawi mah sawi ngai lo a ni sia” a lo ti khauh a. “Dik chiah, a ṭawng tlem sia, mi pawi a sawi lo ve e” ka lo ti a. Kan ngaihtuahna kan kawm rauh rauh hlawm mai, Chutah kan mei tuaha mau kan tuah tel chu a rawn puak dur mai a, kan ṭeh nghal hak, Tluanga’n a va la chhuak ta thuai a, kan thaw huai mai. Chawhmeh a hmin ta bawk a, changel hnah phahin chaw fâk zai kan rêl ta a, hmeichhe ho hlei hlei chuan kan ei theiin ka hria, kei phei chu ka kham tur ka ding lawk thei lo hial, a manhla mang e aw. Kan han ṭhu thlan dai leh a, kan puar zualpui a reh ta maw tihah tui kan cheng leh zuai zuai a, kei chu ka la puar êm vangin ka cheng rei peih meuh lo. Tluangtea leh Chhana ten chakawk an va veh a, vawi khat ei ṭheuh kan hawn thei a, a zia khawp mai. Tichuan, muang marin kan haw ve ta a.

“Nu, chaw ka ei peih tawh lovang, ka la puar lutuk” ka inbual dawn chuan ka ti sap a. “Mahnia ei chu a va peihawm loh ve aw” a ti niah niah mai. Inbual pah chuan ka zai rât rât a, ka chemkalna a ni lo ve chiang khawp a, mahse, ka zai peih ve fû roh a, zaipawlah pawh contralto part hi chu ka sak turah an ngai tawp tawh. A hahdam bawk a. Kan khuaah hian UPC leh Presbyterian chauh kan awm a, khaw inlungrual tak kan ni ve chuan ka hria, khaw lian lem lo tak kan ni bawk a, Secondary pawh kha kan khaw thenawmah a nia kan kal, High School thleng chiah kan khuaah a awm miau a, kan khaw thenawma Higher school pawh private tho a ni nain zirtirtu an tha tlang angreng a, kan khua aṭangin 1km vel a ni bawk a, kan lâng mai zel, thianho chuan a hahthlak vak loh. Tihian result kan nghak ve ta ran chu a nia. Eng tak ang i maw ?

Vanlalhmangaihi ka ni a, Tei tia koh ka ni thung. Kan khua hi Chhawrpial niin Mizoram hmar lam khaw chengker ve angreng tak a ni a. In 200 kan tling ang em aw ka hre chiah lo,. Ka nute hi khaw thenawm Chawnpui khaw chhuak an ni a, ka puin Chhawrpialah hian pem a rawt tlat a niawm e, tihian an khawsa zui ta zel a nih hi. Zêp thu a chêng lo, ka nu hi ka nu, min hringtu ni lovin ka nuteii a ni a, ka nu chhang chiah a ni. Sâwn ka ni satliah lo, falak ka ni ! Ka nu hi a tleirâwl chhuah phat atangin Aizawlah mi inah hlawh neiin a awm a, a han nula chhuak chho kha khawpui nun a zo lo deuh nge a pelhe ve nasa a niawm e, tichuan, kei hi min pai ta a, a pa ber puh tur pawh hre lo khawpin a ṭâwng ve a nih chu ! Ka pu rilru na leh thinrim lutuk chuan a tuithlar ta hial a, chutih nak alaiin ka nu chuan damdawi a lo vawrh ve niawm tak a ni, man a la tawk zui a ! Raipuar ul chungin jail-ah a lut ta a ni. Kei min hrin a lo hun takah chuan tihtakzeta ka nuteii hi ngenin lehkha a thawn a, keimah chu min enkawl turin a ngen ta râwih mai a ni. Ka nu nu ka pi leh ka nuteii te chuan an lainat em em a, tichuan, min hrin dawnah Aizawlah kalin min hrin zan la la chuan ka nuteii chuan min pawm ta a ni. Hetihlai hian ka nuteii pawn tuna ka û Mama hi a pawm tawh a, an fatir a sûn ve hlauh mai a, fanu awt ta bawk si chu kei ka lo piang chu a lawm ve viau a niawm e. A pasal remtihna thlapin fa atan chuan min la ta a ni. Kum 2 ka nih laiin ka pu a boral tawh bawk a tiin ka nu chu kan khuaah a rawn zin ve zawk a niawm e, chubak chu vawikhatmah min hmu tawh lo. Pasal fanau a nei tawh tih erawh an hre ve, kei pawn a hmel hmu lo leh hre lo na nâ na chu han ngaih leh thlakhlelhna ka nei lem lo. Kum 11 ka nih kumin ka nuteii pasal Pa Rama chu zawngṭah kung atanga tlain a boral a, pa ang tak taka ka ngaih a ni bawk a, kei pawn ka tuar na ve hle. Ka nuteii chuan fa a neih belh lo bawk a, Mama leh kei chu min chawi seilian a ni ta mai. Ka putea ten inpui an nghak a, ka nu te hi unau pathum chiah an ni hrim hrim a, tuna ka nu hi an naupangber a ni. Mama chu zirna lamah tui hek lo, pawl 10 a fail chuan a bang zui ta daih a, ram lam hnathawh a taima a, huan puitling a nei tawh a, kan khawsak a ziaawm phah hle. Kum 3 liamta  khan nupui nei vein an lo puklâwk sa bawk nen, an nautein kum 1 a tling awrh tihin nau a pai zui leh ta bawk a, kan naute a luhlul luat vanga Sibuta tia kan koh mai thin chu ka enkawl deuh bik a ni ta ringawt, ngainat pawh min ngaina. Khang zawng kha kan chhungkaw chanchin chu a ni. Thenkhat hian i nu i chhun min ti thin a, ka nute unau hi an hâng chhe lem lo va, keipawh ka ngo ve puak naa, ka hmaifang erawh a chuti falua bik lo. Ka sam hi ka nuin tan a phal ngai loh vangin ka kawng a hawlh pha fô mai. Ka pianpui ni maw a kawi sa a, han tihkir kawi vel kha a ngai ve lem lo va, thiante hian an awt thei hle. Ka nuin min duat ve bawk nen, ka duhnaah chuan ka sualthiam ve thei viau. Mi runluih te hi ka hrat zêk a, chutihrualin ka mawlin ka â em em a, thil sawi phawng phawng chi ka nia, ka nu min zilhna ber pawh a ni. Ngaihzawng hi ka la nei miah lo bawk, ka ngaihsak lo ti tawp mai ang, bemtu ka nei lo pawh a ni bik lo, ka thian kawm nghal zel a, min ngaizawng rei peih lo. Bakah ka nu hian college zir hma chu bialpa neih a phal lo ve tlat bawk nen, single life hi nuam ka ti tho mai. 

Result chhuah pawh a lo hnai zel a, lungphu a rang ṭan ta khawp mai. Rilru a hah lo thei si lo, pass ta ila, kan khaw chhuahsan a ngai si, fail ila a zahthlak bakah ka beihnawn peih ka ring chiah bawk si lo. Ka û te nupa lah chuan, “I ni a pass chuan kan vawk hi kan talh ang” an ti sek mai a, ka nui ṭha vak duh ngai lo. Vawk hi ka nu hian vulh loh a duh ngai lo, a khua a har tlat zel, kan khawihpui em em lo bawk. 

Pu Chhuana thlahrang paw’n sawi zui a hlawh zual zel a, a thih aṭanga thla a liam paw’n inlar a bansan thei lo. Amah Pu Chhuana pa tar tawh tak mangangin kan pastor leh Kohhran upa te ngenin ṭawngṭaina an neihsak ta hial a, a pa Pu Chhunthanga chuan aw khur der der thâm chil chel hian, “Chhuana, sawi duh i nei a nih chuan mang lamah lo inlar ta che, i pa ka la dam ve a, eng pawh nise i duh angin thil ka ti em em ang” a ti an ti. An ṭawngṭai aṭang khan thawm leh thlâ chu a reh deuh nge, sawi a awm leh ta mai lo deuh a, Bakah kan khuaah Middle school zirtirtu nula hmeltha deuh mai a rawn awm thar a, chu chuan boruak kal lai a vaw dai ve deuh bawk a ni. 

“Naktukah result a chhuak dawn,kei chu ramah kal daih mai ka duh.” Mami’n a dawr kal pahin a rawn ti, “Nia, kal daih ila” ka lo ti ve ringawt. Kan monu U Sawmi’n, “Ringawt a che u, a dawihzepthlak lutuk, in pass ang, Mam, i lo leng dawn nia” a lo ti a, a nui vur vur bawk. U Sawmi nen hian laizawn ang chiaha in en kan ni a, kei aia a upatna a tam hran lo bawk. Tukṭhuan pawh ka ei mumal lo, mi kap rûn mai si a. Ka chhungte an nui an nui mai. Dar 12-ah tihchhuah tur a ni naa, website-ah kan lut sek , eng han hmuh tur phei chu a awm chuang lo. Chhana paw’n status-ah, “Thakhur a reh thei lo” a rawn ti ngei, ani te chu a pass sa. Hriat loh karin dar 12 chu a lo ri ve ta reng mai. Kut khur chungin kan lut a, ka nu kawmthlang huana a kal lai a ni hlauh, U sawmi lah nau a mutpui daih bawk. Ka inzawng ngat ngat a, awii karei! Ka pass, ka pass ve nih chu! Lalpa ka va lawm tak. 1st div.-ah lehnghal, ka phu loh malsawmna ka chang a ni e. Ka rilruin lâwmthu ka sawi nghal mawlh mawlh mai. Ka rik deuh hlut vangin U Sawmi pawh a rawn tho a, Sibuta erawh khaw nge a awm ka hre lo. Kan pahnih chuan kan rak chul a,. Ka û huan kal pawh ka call nghal a, phur lutukin ka pass thu ka hrilh a, ani pawh a lâwm ve kher mai. Mami nen kan inbe nghal, ani pawh 2nd div. Ah a pass a, Chhana pawh 1st-ah. Ka lâwm rualin hmabak tur ka ngaihtuah nghal ruai a, ka mangang leh ṭan tawh. Mahse, phili vak hun a ni rih lo. Ka nu lo haw paw’n a rukin a mittui a hru zauh zauh mai, keini ang khua angah chuan a lawmawm ve duh êm asin. Khaw thenawmah nuamsa lem lo takin nitin school kan kal ve bawk nen,. “A rang lamin Admission pawh kan lak a ṭha ang. Seat chan a har si” a ti charh charh a. 

“Nu, ih maw, Mami te nen kan sawiho a, hmelhriat vak loh ina awm ai chuan, Chhana te nen in luahho ve mai ila kan tia. Chhungte pawh kan nei reng reng em ni?” Inthlahrung ru deuh hian ka ti a. 

A thaw hak a, eng emaw ngaihtuah hmel a pu, mahse, pangngai leh vatin, “Ka hre lo le, i ú hian a remti meuh dawn mawni le, nula te in ni ve si, khawpui nun la tem ngai bawk si lo. Chhungte chu nei ve e, intlawhpawh a har ém a,.” A ti niah niah a. 

Zanriah ei laiin ka chungchang bawk chu kan sawi leh a, Mama chuan, “A thu thu ni mai, ngaihtuahawmin awm lo thung se la, eng pawhnise, admission chu lak phawt a ngai hrim hrim alawm.” A ti a. Kei chuan Political Science ka tui a, core ka tum deuh. Mami chuan Mizo, Chhana tak hian a la sawi chiang lo. PUC te chu kan han beisei naa, beisei a sang vak lo, mahse, College hi chu a ṭha thawkhat vek tho a, min lo admit duhna apiang kha lawm taka ka luhna tur a ni mai. 

Chawlhni chawhnuah keini Mami, Chhana te chhungkaw thawhkhawmin Kohhran pum huamin vawksa sawhchiar kan pir ta a, a hran hrana pass lawm ai chuan a fuh zawk. Kar tharah Aizawl kan kal dawn a, Mama’n kan pathumin min hruai dawn a ni.Mama hi zir sang lo mah se; a vengvat bakah Aizawl a zin ṭhang a, Chhana te phei chuan chhungte an nei bawk si lo nen, kan kutah a innghat ve tawp a ni. Mama chuan kan inthlahrun hlawmzia hriain, a ṭhianpa, Chawnpui khua, pathlawi amaha in luah ina innghah mai a ti ta a, kan thaw huai mai. Kan châm rei dawn lo bawk a. 

Aizawl kan thleng a, kan thlen inpa U Enga lah chu hna thilah Sairângah a kal a ngai a, kan awm awma awm turin min kalsan daih. Mahni in ang maiin kan awm thei a, a zia hle a ni. PUC chu online-in an entrance an lo pe vek tawh a, kan chang lo. J Thankima college-ah kan inadmit ta a, rilru pawh a phur ṭan ta khawp mai. Haw hma niin kan bazar ve leh zuai zuai a, pawisa kan nei vak lo nen, eng em em phei chu kan lei lo. Mizoram khawpui ber Aizawl nge nge chu a mi chengte pawh an hmelṭhain chhe ve tak tak pawh an tam tho mai. Chhana leh Mami ten in luah vel kha an sawi reng avangin Mama hoin in luah tur kan dap pah reng bawk a. U Ênga a ṭangkai hle, vanneihthlak takin a awmna veng Zemabâwkah in luah tur chu min biaksak thei ta hlauh mai lehnghal a. Kan va en nghal a, bungrua pawh a lo awm sa nual mai, luah man erawh khawpui a ni bawk a, cheng 4000 lai a ni a, mi pathumin kan thawhkhawm dawn tho a, a awm theih naw naw ang chu maw. Nuam kan ti chho ṭan ta khawp mai. 

Kan khua pawh kan thleng phei leh ta phawt a, Thla thar veleh Aizawlah kan phei dawn tawh nen, kan khua chu ka thlahlel thar viau mai. In kan luah tur chu ka nu chuan min ngaihtuah viau naa, Mama’n , “Mi ina inthlahrung reng renga awm chuan lehkha an zir ṭha thei lo vang. Kuminah han luah phawt se kan en chho dawn nia. “ A tih avangin a ngaih a ngam ve leh ta deuh a. U Sawmi lahin, “Sibuta nu ber i kalbo daih dawn chuan, engtin nge maw i fapa hi kan han enkawl tak ang le..?” A ti fiamthu reng mai. Sibuta hi chu ka enkawl nasa ve bawk êm a, ka vahpa ai mahin ka fapa anga en changte pawh ka nei ve fô mai. Kum 1 pawh a tlin hmain ka bulah a mu tawh kha a nia, ka ngai ngawt ang le. Inrinni chhun hi chu nula ve nafam chu in tifelin ka buai ve hle, ka insu nual bawk. Hetia thil tih pah hian youtube-ah Jeronimo crime story ka ngaithla pah thin a, hnathawhte hi a nuam bikin ka hre thin. Ka lo ngaithla tui deuh nge ni, ring deuh taka ka nuin, “Tei, Lalte” a tih chuan ka phu zawk a. “Eih” tih pahin ka en chho hâ a, “Koh i va hre thei lo ve, tleuh zo vat la, i U Sâwmi’n lo zar chhuak mai rawh se, Chhuana pa Pu Chhuna kha a boral, va lang ve vat rawh” a ti ta mai a ! 

“Awii, ngati nge?” Ka ti nghek ringawt. Hmanni lawka a fapa a boral a, tunah pu Chhuna a ni leh a, a mak ve deuh ka ti a ni. “A natna ber pawh an hre lo, a tukṭhuan ei kham tluzâl kha an kaitho zo lo ringawt a niawm e” a ti charh charh a. “I va kal ve dawn lo mi?” Ka tih chuan, “Kal dawn e, ka va insiam ang e.” Tih pahin pindanah a lut ta zuk a. Kei pawh ka tleuh zo ta thuai a, U Sawmi kutah ka dah ta mai. Mami leh Seni te an rawn thleng ve chiah bawk a, Pu Chhuna te in lam chu kan pan ve ta a. 

An lo awm nual tawh mai, kan han che ve sang sang a, khawpuia khawsa te chuan keini pawl 12 pass ve chauh, tleirawl tia sawi theih tur lek te Mitthi ina kan han chetla chu mak an ti maithei, mahse, kan khua Thingtlang leh khawtê angah chuan pawl 11 kan zir aṭang tawhin thlan laihna lamah thingpui kan lum tawh, hetia in vel han singsak hi chu intih nulat vang em em pawh a ni hran lo,. Pu Chhuna fanu te pahnih bakah thenawm pitar ho an ṭap laih laih a, Nu Thangi erawh thawmhnaw vel singsain a buai rih. Pu Chhuna te hi an nu a boral tawh a, tihian a hoin Pa Chhuana nupui fanaute nen an khawsa kha a ni a, a fanu te pawh an thenawm lawkah an khawsa ve a ni. Tui taka muhil chiah chiah hmel a pu, pa ṭha tak, zaidam leh a upat viau tawh hnu pawha inkhawm ṭhulh duh ngai lo, tu leh fate kilkawi thiam tak a ni a, ka nu avang hian kei pawh min duhsak thin hle. Ka lainat khawp mai. Chutia han muthlum tawp mai chu mak viau angin lang mah se; tunlai angah chuan ṭhalai phei chu mu hlum sawi tur an tam tawhzia kan hria ang a, a thihdan chungchang chu kan ngaihven lutuk lo. A kum a upat tawh bakah Bp sang te a nei ve bawk nen, thil awm thei a ni ve tlat. Chawhma dar 10 hnu lama thi a nih vangin lumen tur a ni a, keini pawh kan insingsak fel hnuah kan haw ta rih. 

U Sawmi nen rawng kan bawl dun a, Mama nen an inngaihzawn dan vel a sawi sur sur a, kan nui kur kur mai. Chutah, “Nang pawh hi bialpa i lo nei ru ve reng tih ka hria nia aw” a ti ta thut mai. Ka ka hâu mai a. “Hmm, inzêp vel suh, ka hre vek, Vengsang tlangval kha” tih pahin mit min siai khum zauh, mi run lutuk chuan ka lei ka chhuah khum hrep ringawt. Vengsang tlangval a tih chu, pawl 10 ka zir lai aṭanga min ngaizawngtu, U Zawma a ni a. Aizawlah hun rei tak a awm hnuin a rawn haw a, min hmu tai a niang chu maw. Min ngaizawng ta em em mai a, ka number te engtin tin emaw a lo nei niawm tak a ni, min rawn be reng mai a, ka chhang thiam ngai bawk si lo. Amah chu mipa hmelchhia pawh a ni hran lo, a figure pawh a dik fû mai, mahse, ngaihzawng lam kha ka ngaihtuah lo ve êm a, ka zahzumna lam tak a lo ni nge ni, ka ṭhianten star an neih sup sup lai paw’n tu amah ka ngaihven ngai eih lo. Ka awm ang ang hian ka awm mawl ve tawp ringawt a, U Zawma pawh a beidawng ta a niang, a reh chho ta a. Mahse, kumin kum chanve aṭang khan a rawn lang chho leh ṭan tlat mai a, ka chhan ṭhat peih loh paw’n a reh duh si lo a, ngaiah ka nei deuh tawp. U Sawmi’n a hriatna chhan pawh Sibuta’n ka phone a khawih ṭhin sia, a lo hmu niawm tak a ni. Ka phone hi ka lock ngai bawk si lo. A ho êm mai. 

“Aizawl tlangval ngei pasalah ka nei dawn kei chu” ka tih lai mekin Sibuta a rawn tlan lut a, “Anî, ek ka cheh” a rawn ti ! Ka thaw hawk ringawt. Kum 4 a la pum lo deuh a, ṭawng hi a thiam chak bakah amah hi mi harhvâng leh ninhlei a ni bawk a, a hriselna pawh a ṭha thawkhat viau mai. “Ngati nge i cheh ringawt a” tih pahin bathroom-ah ka kai lut a, “Ih, sep-a te nen tengtere kan ei vak a, chuan ka cheh ringawt a” a ti mial mial a, ani a tengtere ei chuan a kua a lo zût chu niin, “Inbual nghal law law mai rawh aw” tiin tuilum ka va laksak nghal a. Ka bual lai chuan, “Bawihpui, Aizawlah ka awm daih dawn sia, min ngai ang em?” Ka ti a. 

En pawh min en lem lo chuan, “Apa pawn i nî bulah i awm ve dawn alawm a ti vek” a ti awlsam êt a. Mama’n dâwt a lo hrilh chu a chi vak lohin ka hria. 

Zanriah kan ei kham fel hlawt tihin Pu Hlira a rawn lut leh chhut chhut a, tuibur pawh a ngaitêin a hmuam leh tawh. “Pu Chhuna chu ka ui mang e aw. Dam lohna a neih awm pawh kan hre mang si lo, khawpuiah chuan awm se kei ka pormostem tir khawp ang” a ti vei hluk hluk a. Pormostem a ti chu ka lo nui huk,. Ka nu chuan, “Nia mawle, bakah hmanni lawkah Chhuana a boral tawh nen, Thangi te nufa saw engtin tak awm zel ang maw?” A lo ti ve mawlh mawlh a. 

“Chhuana thih dan kha chhui chiang se ka ti ngawt mai, kei eng emaw tak a nih rinna hi ka la nei reng nia” Pu Hlira bawk chuan a ti leh chuar chuar a, ka phone a rik avangin ka ngaihsak zui ta lo. Mami’n, “Dar 9 velah kal ila, kan tlaivar dawn chuan” a rawn ti lâng lâng a. Ka lo Amen leh thlap. Ka thawmhnaw hak tur vel thlangin pindanah ka awm a, U Zawma pawn min lo text leh tawh kha, “Zanin chu tlaivar ve ila” tiin. Ka reply lem hlei lo va. Mak ka intih châng a tam mai, mipa ka ngaihsak tehchiam lo hi, romantic movie te, Love story te hi ka en ngai lo ti ila ṭhianten an han tih laklawh changa han bihpui ve zawk chang chu ka nei, Crime lam hian ka lung a lên ber mai. Sibuta ka ti mu tê tê a, ka thiante pawh an rawn thleng ta hlawm. Berhpuia chuan a tshirt chu a hnim leh vut vut thin a, Seni’n, “Ti nge i inhnim reng a?” A ti ta nge nge a, “Ka kawr hi ar ek pachal rim a nam” a ti ta mai ! Kan nui ṭhaw hlawm a, ding hluaiin, “Ka va inthlak leh lawk, anu hian kan ar in bulah a pho leh a ni ngei ngei ang, min lo nghak r’u” tih leh chhuah a rual nghal. Tluanga chuan, “Eng nge kan ei ang le?” A ti leh ngei, a dân ve a nia, ei leh in lama kan û a ni. A sa pawh a ṭha rêng a, chak pawh a chak. Mitthi lumen zan hi chuan arsa sawhchiar an sem tlangpui zel a, mahse, arsa ka ei ve loh avang hian eitur ka inpai thin. Tlaivar chuan ril a lo ṭâm duh ve bawk nen, Mami chuan, “Awii, kei chu a mak ka ti, pu Chhuana thih kha thla khat em pawh a la tling si lo a, hetia han inzui ringawt chu, Pu Chhuana thlahrang hian a rawn that a niang a” a ti leh ta phawng mai. Kan tang nghal hrû mai. Chhana chuan, “I â siah, thlahrangin tumah an tina thei lo, kan sir chuan, ‘Thlahrang hi an awm tak tak lo, ramhuai te hi thlahrang angin an rawn inlar mai mai alawm’ a tia, ka awih angreng,.” A lo ti ve vut a. Seni’n, “Mitthi lumen dawn chuan khatiang lam sawi kha khap a ni” a lo ti hmak bawk. Berhpuia a rawn thleng ta bawk a, Mitthi in lam chu kan pan ta a. An lo tam tawh angreng, lumen zan chuan inṭhut pawlh an phal tho bawk a, kan ṭhu ho ta vek mai. Zai pawh a nuam chho viau e. 

Zing dar 5:30-ah kan bâng a, ka mit a thial ûrh mai. Ka taksa a chak vak lo nge ni ka lu a hai bakah nidanga ka tlaivar ang lo takin ka zawi ngawih ngawih mai a, haw vata mut ka châk tawh kher mai. In ka thlen chuan ka nu pawh a lo insiam zo deuh chiah a, “I mut hmain tuilum in rawh aw” tiin min chhuahsan ta a. Tuilum ka in zawhah ka inthlak sawk sawk a, ka mu ta hlûn, Sibuta pawh a la mutui ngang mai. 

Tukverh thlanglam, ka khum nena inep chiah chu a ri rak a, a rawn inhawng riai riai mai. Kezungpui tiche luiin ka melh lui ngat ngat a, maimizialin ka awm tih ka chiang, ka harh thei si lo leh ka hlau thlabar lutuk bawk si chu tawrh a har zet mai. Au chhuah ka tum a, ka thei der si lo. Tukverh parda leh chhuat inkar lang thei chinah chuan mipa ke, a khup aṭanga hnuai lam zawng hi a rawn lang ta mai ! Ka insangmar a, ka thaw te chu a tâwp mai dawn hian ka hria, chu ke lah chu a che hrut lehnghal a, amah tak erawh parda phênah chuan a ding dum rûn mai si. Chutah parda chu muangchang hian a inhlim riai riai a, ka â mai dawn. A hma zawnga ka tana thawm bengchheng ni thin Sibuta ṭap thawm ka hriat chuan maimizial chuan min kiansan ta hlauh mai le. Ka khur der der a, Sibuta lah chu a ṭap uar fu lehnghal, mut la chhuak angreng tak, muhil ngam tawh si lo hian zawi zetin ka che a, ka va kuah ta a, a harh miah lo, a mumangah a ṭap ang a, a ṭap chhuak a ni ngei ang. Mahse, hlauhawm lakah min chhanhim tlat a ni. A chalah chuan fawp zauhin khum bula tui ka chhawp chu ka in lui ta nghek a, tukverh chu ka zuk melh hram, a lo inkhar ṭhap a, khua a êng vek tawh tih ka hmu thei ta bawk nen,. Rilrua ṭawngtai chungin ka chhing leh ta riai riai a..

To be cont.