Hmeithai 13

HMEITHAI (13)

Ziaktu : Toni Râltê

“Awii, ninawm e, kan current hi” Kimteii chuan a ti hluai a, phone kan hmet eng far mai. Mahse, vanneih asiamin a lo eng leh ta vat a, “Ruah a sur dawn a niang, ruah do ngam lo electric kan nei a. “ Kimteii chuan a ti leh a, Zoram power supply intodelh lohzia hi chu aw..Kan ram hruaitute hian ngaihpawimawh berah nei se chuan tiang em em hi kan ni lo mahna. Thingtlang te hi an khawngaihthlak ve lehchhawng,. Sawi duah lo mai ang. Mu chungin phone kan khawih hlawm a, Johna erawh chaw ei kham lama a peg zuk avangin a mut a chhuak ṭan a niang, pasaltha thawnthu a play a, lehlam hawiin a mu ngât mai. “U Tete, U Lanpuii nau chu engmah chanchin thar a la awm lo mi?.” Kimteii chuan a rawn ti a, “Umm, awm lo a nih hi” ka ti ringawt a, “An pawngsual lo tiraw?” A ti leh hâ a, “Umm” ka ti leh ringawt. “I va ṭawng ṭha peih lo tak, hmm, min be peih lo nih kha, i la thinrim reng mi? Ka thil sawi avang khan” a ti hlak hlak a. Ka nui hawk, “Ka chau, ka sil..mu rawh, nang pawh.” Ka ti a, ka thin a rim tawh lo va, mahse, tunah tak chuan ka chau ve deuh tak tak. Mutchhuakin min rawn zem chho bawk nen, phone pawh ka dah ta daih a. 

“U Tete, U Tete, hei..” tia ka lua sawi nawk nawk avang chuan ka harh hlawl a, Light dul ruih karah chuan Kimteii chu ka han hmu a. Thlabar hmel angreng tak hian min lo melh kar mai,. “Eng nge a..” phak chual hian ka ti a. “I rum nasa lutuk a, ka hlauthawng alawm, U Johna lah hi a chatthla nge ni a hnar bur bur a, nang chu i rum dan kha a ngaihthatawm loh tawp” a ti mawlh mawlh a. Hmm, ka lo rum chhuak a nih dawn chu, ka mumang kha ka ngaihtuah let a. Thisen kai hnuanga Lanpuii let reng kaihthawh tuma ka beih fat fat laiin ka hnunglam atangin tu emaw hian min rawn rek thut mai a! Thawk a sak ṭalh mai, ka che thei si lo ka mangang lutuk kha ka lo rum chhuak a nih ngei dawn chu. 

Tui ka in khawlh khawlh a, “Mangchhia ka man vang a niang. Va mu tawh rawh, a hlauhawm loh.” Ka ti a, zung turin ka tho nghal, mahse, ka thawh thut vang nge ka luhai chu ka petek deuh a, Kimteii’n min lo chelh ve chiah bawk nen, rem lo zet hian ka mutnaah chuan kan tlu dun ta a. Hnai deuhah kan inmelh ta ran mai, Johna lah a hnar tluk tluk a, 3sec vel kha chu ka hamhaih deuh. Kimteii hnute kha ka zu nêk deuh bawk nen, a lungphu ranzia kha ka hre thei. Ka tho vat a, “Ka lu a hai ringawt mawle” ka ti nuah nuah. Ka zung a, ka harh ta deuh. Kimteii pawh a mutnaah chuan a lo mu zar tawh a. “U Tete,.” A lo ti fân raih a, “Umm” tih pahin ka va melh zauh,. A mitmeng leh hmelhmaiah khan sawifiah thiam si loh thil ka hmu, sawi duh nei si, sawi hreh si hmel a pu a, chhungrilah a sawi duh leh tumte chu ka va hrethiam ru deuh bawk si. A ṭha dawn lo tawp ti rilru chungin ka mu vat a, “Muthilh tum rawh, zingah min lo kaitho hma dawn nia” tiin lehlam ka hawi ta a. Mahse, ka muhil ta lawk lo. Kimteii min endan ka hrethiam tawh a, Lanpuii bula a lo kamtam viau thinte kha a chhan ka hre tawh,. Kan zu ruih tuma ka khuma a mut ve tak ngawt atang khan a inṭan a nih ka ring. Keiin eng he hu-ah ka lo ngai si lo. Hetiang zawnga min en reng dawn a nih chuan in khatah kan khawsa ho sia, fimkhur a ngai viau dawnin ka hria. Mipa ka nih piahlamah a dik adik chuan Rinzuali nen kan inthen aṭangin sex ka hmang leh tawh miah lo va, mihring nih chhung chuan châkna te pawh a awm lo thei lo. Taksa a fit ṭhat ngat phei chuan,. Khatiangah khan ka bula khawsaa ka laka tlawm hreh miah lo hmeichhe lakah hian ka inveng reng thei ang em? Ka inrintawk loh vang ni loin ‘palh’ hi a awm ve thei, chu chu mihring nihphung pawh a ni. Chutiang a thlen loh nan eng emaw chu ka tih ngei a la ngai dawnin ka hria. Mut pawh a tui nek lo ve. 

Buanga te chu an Kohhran Hall-a invuan tur an ni a, zingkar aṭangin fatu ho puiin kan buai ve nak nak a, hmelhriat leh ṭhian pawh kan nei ve ta. An felin biak an nuam em em hlawm a, fiamthu an duh bawk si. Nula lam kan la hmu tam lo va, kan hmuh chhunho hi chu han melh taih tur an la vâng,.lal Johna erawh chuan han biak zin leh koh zin deuh a nei leh ta thuai. “A va rinawm lo tak’ in lo ti rilru ang e, mipa hi kan mak ve a, khatia nula bula kan va tlangnela kan fiam leh chhaih zuk zuk avang khan inngaihzawn kan duh e tihna a ni kher lo, mipa hlanga awm tawp ai chuan a aw sin chi an lo tel ve hian mipa chu kan phuisui a, nuam kan ti ve a ni mai. Kan ngaihzawn duh tak takte hi chu maw zah pawh kan sawi bik lo, kan ngaihven dan a thuk bik thin. Eng le khaw le..Hei hi ka pawm, Hmeichhiate hi chu mipa tel lo paw’n an hlimin an awm thei mai,fate hmeithaipui pawh an tam. An chhel vang ni bawk mah se; Pathianin a siam dan a nihna chen a awm. Mipate erawh hmeichhe tel lo hian kan kim lo va, kan awm thei tak tak lo, a chhan chu hmeichhiate hi mipa tana siam leh din an ni miau a tin ni. Hetia ka sawi vang hian hmeichhia ka va ngainepin k va dah hniam tihna erawh a ni lo a nia, a nihna takah chuan mipate hian hmeichhia kan mamawh êm êm a, hei hi Hmeichhe hlutna a ni. 

Dar 1 -a invuan tur an nia, kan inbual zawhah kan insiam nak nak hlawm a. Lanpuii nen zinga kan inbiak bak kan la inbe leh lo, dawr lamah bungraw remfel a la ngaih avangin a buai a, kei buai bawk. Ngaih a tha a, a tawk viau tho mai. “Zakim, nakinah Tluangi number kha min pe rawh aw, a kawm tlak riau.” Johna chuan a ti ham ham a. Kimteii chuan, “I ninawm, i lerh em mai. Tluangi te chuan bialpa nghet a nei reng alawm.” A lo ti hlak hlak a. 

“A ho em mai, pasal an neih hma chuan sava thlawklai ang alawm an nih, ka perh thla thiang “ a ti lung lung, “U Ngaihi i nei sa reng,. I zak lo” Kimteii’n a tih lah chuan, “Kan inṭhen angreng alawm. Chuvang a nia ka han hâwkdak deuh” a ti leh mai a, an inṭhen tak tak ni chiah si loin Ngaihi a la lungawi vak loh vangin inbe tho si, inbe tui si lo ang khan an awm a, chu chu a rawn chhuanlam ta hmak a nih hi. “U Tetea hi entawn rawh, ani te chuan tumah a melh ve loh hi..U Lanpuii tan chauh a inserh thianghlim a..tiraw, u tete” Kimteii’n a tih chuan ka aw ka lo thian vak ringawt. A ṭawng chuan mei tawitê a neiin ka hria. “A dik chiah, kei chu nupui hual nei tawh ka nia, midang melh kual thei ka ni tawh lo. Vanlalnunpuii hi e ka duh hleuh hleuh êm..” ka han ti phar phar a, Kimteii ner ru sak chu ka va hmu ru reng. Khatiang deuh bawl bawla ka ṭawng kha a ngaihna chin a awm ve ka tia. Min beisei lo law law se a tan pawh a tha zawk,. 

Inkhawm kan tam phian mai, an Hall a tê chhe lo a nia kan khat vek mai. Tluang takin an innei ti tawh mai ang, Buanga nupui chu a chhe vak lo, mahse, a lian ka ti ! Hmeichhe lianpui hian kei min hîp ve der lo! Model te an nih ngawt loh chuan. Bakah mizo mipa hi thangthar sang deuh deuh awm mah se, a tam zawk hi kan lian falua lo. Inkhawm banah mo hruai programme a nia, kan kal ve lo. “Chaw ei huaina chu a ngai a ni” Johna chuan a ti a ti mai a, keiin ka uksâk vak lo. Mahse, zu tha pangngai tak a awm chuan no khat vel in chu ka pawiti lo,. Thlem ka samzia hi aw. Kimteii a va bekbawr sur sur lai pawh ka hmu reng. An inhrawk leh dat dat thin. Chaw ei hma deuh chuan mi mitmei zauh a, keiin ka lo man rang ve si, kan inzui chhuak ta nge nge a, Buanga’n ṭhiana a hman Hlima te nen chuan in hnuaiah kan lut thla ta a. Kimteii mutna thingrem phên atang khan Rum um khat a rawn phawrh ta luau mai, Johna mitmeng pawh a de sût mai alawm. Kei erawh in tam loh hram ka duh, ka chhunzawm leh reng ang tih ka hlau a ni. Kan in laiin Kimteii a rawn chhuk a, “Hei, in rui ang e aw, chi thak loh a nia. Chaw an dawh ṭan tawh, hmanhmawh r’u” a rawn ti vei hlak hlak a. A pheikhawk a thlak a, a chho ve leh mai. “Engtik maw hawn in tum?” Hlima chuan a ti a, sunday cham ve law lawa monday lama hawn kan tum thu ka sawi chuan, “A ṭhat chu, nula ka rimpui ang che u, kan zirtirtu thar saw a keu riau a nia. Aizawl lam a ni lehnghal “ a ti sur sur a. Chutah kei chu min han thlek ang hê hâwin, “Nang chu kan Lalkimi hian a hauh deuh bur che sia, min hau palh ang..” tiin a khi leh vur vur a, Johna pawh ka hmaizah lek lek alawm le. Kimteii chuan a bialpa angin min lo chhuah titih deuh em mawni dawn le aw. A zia lo ngawt ang. Mahse, Hlima bulah chuan eng ka sawi chuang lo. Chaw te chu kan han dawh ve a, tam pawh kan ei lo,. Ka in lohna a rei tawh sia, ka ni lûk mai. Johna paw’n, “Kha i biangte kha a sen ṭâwn mai, kaw ruah laiin i peg ve khanglang a” min la tizui. Ka melh rum ngang mai. 

“Kimteii hian a hope che ka tih ka tih kha, zanin chu ka muthlu der ang, risk teh, i keuh theih ka ring tlat..” a ti leh su su a. “Mawla le” ka lo ti hluk. “Ka sawi dawn chuang hleinem, i nghei rei ve tawh e, Rinzuali aṭang khan i nghei tawh. I mu puak dur ṭhin hian ka ring a ni” a la ti bul bul zui! A ṭawng hre phak an awm lo hlauh,. “I ninawm, khatiang sawi tawh lo teh. Chance min pekte kha i tum a nge aw, ka duh miah lo nia” tlema ka kainam ve tawh vangin ka ti thur thur a, a nuih a za ngang mai. Kan inhrechiang dun bawk a, sex chungchang thlengin kan inhriatsak a ni ber e. Mipui zi nuai nuai kara awm ka peih loh vangin in hnuaiah ka chhuk leh daih. He lam hi an rawn chingphul lo va, a zia riau. Johna erawh nula bulah a thu leh tawh a, tikhan awm vel mai mai teh se. 

Lanpuii nen kan inbiak chuan, “Ka beidawng tawh, an man dawn lo a niang. Mateii hi ka mumangah te hian lo inlar se ka ti ee..” a ti vawng vawng a, ka ṭawng dan aṭangin ka in tih a hriat hlau tak chungin, “Police tan pawh hnuchhui a har ve khawp ang, hnuhma vel a awm bawk si lo, a phone tal awm se a tihdan a awm tur a nia, kei chu pawngsual an tum ang a, ani ṭang ve nasa si kha an that ta mai a nih ka ring. “ Ka ti a. “Nia, mi pakhat thiltih chu a nih ka ring lo, mahse, Te, mak ka tih lai ber chu in a chhuahsan kha a ni. Kha kha ka la ring thei lo. Sailova te hi ka chhungte mah nise a chang chuan ka ringhlel a ni. “ A ti ta hmiah a, ka sawi ngam chiah loh a rawn sawi ta. “Zep loh chuan kei pawn ka ringhlel asin. Mahse, a ruang an hmuhna daih daih kha khati kha a ni bawk sia. “ Ka ti a. 

“An va dah te pawh a ni thei. Mahse, lo that ta se, an thah chhan tur awm ang ka ngaihtuah thiam bawk si lo. Rilru a chawl thei lo. Dawr ngaihtuah ngai bawk nen,. “ A ti chuai raih a, kan zinna vel pawh min zawt vak lo, nizan lamah kan inhrilh tawh tho bawk a. Buaina tur dang hi a tam ve êm a ni. 

“U Tete, sawtah park-ah leng thawveng ang u kan tia, i motorin kal ang u. Phone kha be reng suh..” Kimteii chuan rawn luh pahin a ti lâng lâng a, ka melh kawk ringawt. “Nakinah i be dawn nia, khi kan nghak che..” a ti leh a, Lanpuii chuan, “Va leng harh ve rawh, zu erawh in lo la aw. Kei pawh ka’n inbual ang e” a rawn ti dam thlap a. Kimteii awm lai chuan, “Aw le, ka lo be leh vat ang che. Ka hmangaih che.” Ka ti ngat a, kan dah ta rih. 

“Val lunglênga hi a” kan chhoh lai chuan Kimteii chuan a ti nghat a. “A ngaihawm ve êm alawm” ka ti leh hmiah. Johna bakah Hlima te nen, Kimteii thiante pahnih nen ka motorah kan inhnawh a, park lam pan chuan kan inkhalh phei ta a. A lo nuam reuh phian mai. Thla a eng bawk sia. Car tape ring deuhin ka play a, hmeichhe hoin thla an lak lai chuan keinin kan lo thli leh ker ker, chaw ka ei tam lo bawk a, in a harsa hran lo. Hlima chuan, “Zanin na nâ na chu rui hnâp ang aw,. Hetiang hun hi a khât si,.” A ti vei hluam hluam a, he pa pui roh hi a bula awm a nuam phian. “In hnuaiah rawn riak ve daih la” ka ti a, “Ka tum sa alawm, motheri’n min ṭim leh hrep dawn a, ka peih lo. “ A ti hluk hluk a. Johna chuan, “A tu ber saw nge in nu?” A ti thut a, a nui huk a, “A tu amah saw an ni lo, keite chu fa ka nei tawh alawm, kohhran vangin kan inrem thei lo a nih hi. A buaithlak a nia, midang neihsan dawnin a ni chiah si lo, a ruka inhmuh a ngai..zanin pawh an veng leh tlat ang chu” a ti bul bul a. Hetiang buaina hi kan zoramah hian a va mikhual lo tak. Ka thinrim ṭhin, Kohhran vanga inhmangaih ngawih ngawih kan han pawt ṭhente, an fate nu leh pa kar lova kan seilentir te hi kalsualna ze diktak niin ka hria. Aa, helam chu ka sawi thui duh lo,. Thenkhat rilru kan lo hliam palh ang e. 

Kimteii te pawn min rawn pawh ve tawh a , zu chu hmu lo mah se; kan mitmeng leh hawiher velah an man thiam ve ni hmiang ka ti..engmah chu an sawi chuang lo va. Hlima leh Johna kai phur lah chuan, ‘A melsa melsanu’ tia zaipuiin an lam hah hah mai a, awmhmunah ka lo ṭhen ka lo ṭhen ringawt. Tluangi leh Rsi te pawh an lam ve auh auh a, anni hi an harhfim chiah bik lo niin ka hria. Kimteii erawh chu ka epah a thu hlân a, phone a hmet zeuh zeuh. “Kan khua chu nuam i ti vak na nge?” A rawn ti leh daih a, “Nuam e, nuam ka ti lutuk. Cham rei dawn ila chu lui kal te ka châk” ka ti duah a. Chutia ka han tih chuan a tingampa ta deuh nge ni, “Ka thianten an star che nia aw..” a ti har har a,” Hmm, awihawm loh. “ Ka ti nghut, “Tak tak alawm, ka bulah pawh an sawi nasa,.mahse, i single si lo va” a ti sar sar a. “Nia, single si lo va, buaithlak” ka lo ti. Lanpuii call ka dawn avangin, “Lawk” tih leh kalsawn ka rual a. 

“Te, rawn tihbuai che chu ka hreh viau naa, kha, Mateii bo zana amah niawm tak an hmuh thu ka sawi kha i hria ang a, khang velah khan khalaia cctv neiho footage an enna lamah Mateii chu a nih hmel ! A hmel a lang lo naa, a thawmhnaw leh pianhmangah amah ngei niin Police te chuan an hria a, mipa pahnihte kha chu an la hre thei rih lo. Tlem chuan hma kan sawn deuh e. Chu chu i hriat chak ka ring a, khawiahmah an la tlangzarh lo va, nang pawn i lo zêp rih dawn nia. Expert lam ten footage kha an lepse dawn a, Sailova te in bul hnai cvtv vel check an tum a, mahse, cvtv nei te ber kha an zin rih tlat a, an la en thei rih lo. An in leh Sailova te in inkarah in pahnih chiah a awm a, chu chu an en theih chuan a chian deuh ka ring.” A rawn ti ta mawlh mawlh a, ka thaw hawk. “Engvangin nge a tirah khan an lo en loh le? Tun ataka han en leh hnuhnawh chu.. “ ka ti vin hluk a. Kawn zau laia dawr pakhat cctv footage kha chu an en tawh tih ka hre tho a, a ruang hmuh sarhu lai khan, mahse, kha tah khan engmah an hmu lo. Kha vang khan a dangho an en ta lo a nih ka ring,. “Ni ngawt mai, addict ho sawi a nih vang te khan an palzam deuh ringawt a,. Sailova te in bul ami chu en thei se ka ti takzet a ni. Kha in kal tlang lo kha chuan kâwnzau kha tuman an thleng thei lo va. “ A rawn ti a, a aw atanga phurna rawn awm chuan kei pawh min tiphur deuh. “Zana chhuak anga an ngaih si chuan a tir khan en vat tur a nia. Tunah an zin leh daih bawk si. “ Vuivai titih hian ka ti leh hmuk a, “Mateii bo ni tlaiah khan inentir turin phaiah an kal alawm,. An pa ber kha hrawk cancer a nia,. Police lam pawn an lo mangnghilh ve a niang” a ti thliam a. Thawhṭan tlaiah an zin tihna a nih chu. Ka lo lem sek vang khan ka thin a ram deuh bawk a ni, ka inbengdai ta hram a. “Umm, nia, beisei tur chu a la awm alawm, beidawng lo phawt ang” ka ti a. Thil dang kan sawi leh zuai hnuah an bengchheng nen, kan titawp ta rih. Hawn ka rawt a, ka ning deuh tih an hrethiam ve a niang. Kan haw ta poh a.  

Ka chau riau, ka mu ngjal daih. Johna leh Hlima te chuan an in belh leh, ka peih tawh ngang lo, ka luak te a chhuak. Hlima a laiah a mu a, Kimteii pawh thingrem seiah a mu leh. Zing dar 2 a la ri lo hlek tihin penṭawng tuihal lutuk chu ka harh a, tui a va tui tehlul..ka va zung nghal a, ka mu leh tur chiah chu, “U Tete, ka pang hi lo dek teh, a lum tiraw? Ka awm a nuam thlawt lo. “ Kimteii chuan a rawn ti sap a, ka phu zawk nghe nghe. A chal ka va dek a, a lo lum deuh, “Damdawi ei la, in che chau sia, chuvang a niang” ka ti a. Ka kal leh tur chu ka banah rawn chelhin, “Ti nge hrethiam reng si hian hrethiam lo anga awm i tum tlat a? Mawh? Ti nge min pehhel zel?” A ti ta mai. Ka hamhaih vek, Johna leh Hlima hnar bur bur bak thawm dang hriat tur a awm lo. Insangphekin, “Engmah ka hre lo, hriat ka duh lo bawk “ ka ti hul hak a. 

“A hrehawm asin,. Ka awmdan hi. Min khawngaih ve lo mi?” A ti ṭiau a, ani pui hi a kai chiang lutuk, harhfimin heng thu hi a sawi ngam dawn lo. “I rui a nih kha, muhil rawh” ka ti leh a. “Ka ruih loh chuan ka sawi ngam hleinem. Ti nge min duh ve loh?” A ti leh ta, heiham..”Ti nge ka duh ringawt ang che. Ka nau alawm i nih” ka ti ve zel,. A thangah hian ka âwk tur a ni lo. 

“A nih i fa tal min paitir rawh.” A tih chuan ka meng phâwk teh e, ka zuamawm viau nge min atchilh zawk..? Ka thaw hak a, “Kimte, insum teh. I harhfim hunah i zak viau ang. Mahse, engmah ka hre lo va, engmah a thleng lo aw. Muttui phawt.” Tiin ka mutna lam ka pansan ta a, zep nak emaw pa lo min ti ru ngawt ang tihte chu ka ngaihtuah ve tho, mahse, Lanpuii laka ka rinawm êm vang pawh ni hran loin Kimteii lakah hian ka hel a ni ber, a bulṭan danin a zir lo te pawh a niang e. Amah hmelchhia a ni lo va, a itawm tawk lekin a ria chum bat reuh bawk si,. Mipa mit aṭang chuan duhtawka han chetpui chu a châkawm ve alawm. Mahse, tunah chuan ka inthunun a ngai. Tunah Lanpuii rinawm takin leh Mateii vanga rilru na leh buai chungin mal takin a awm mek a, chulai kara lo phatsan ringawt pawh kha ka mihrinna hian thiam loh min chantir nghal. Bakah Kimteii chu chetsualpui ta ila, nakin zelah buaina ka tawk dawn tih ka hai lo. Ka rin aiin Kimteii hi a duhna lamah a huai tlat ! Hei hian buaina lian zawkah min hnuk lut thei. 

“Hei, tho ve tawh rawh. Em em ana” Johna chuan a ti lûng lûng a, ka mal a rawn tlawh thuak thuak bawk. Ngawi rengin ka tho ve mai a, ka rit bur mai, ka lo in ta kher kher a aw. In chung lamah kan han inphihfai a, eirawng kan bawlpui zui ve nghal. Kimteii ka la hmu miah lo,. Ka lo zawng rilru ve deuh ringawt em mawni. Tukṭhuan kan ei kham zawhah tihfel ngai vel kan tihpui leh a, Hlima’n, “Kan huanah i va kal ang u, thei in hawn tur va la ang u. Buanga te leipuiah kan kal nghal ang a. “ A tih avangin phur takin kan insiam a, an monu pawh a fel thar thar ngei mai. Kimteii nu Nu Mawii hi hna a thawh nasat vangin a kum phu lohin a lang tar a, a felin hrehawm kan tih a hlau ngang mai. Kimteii nau tleirawl Spi kan hruai ve dawn bawk a, Kimteii erawh chaw pawh a rawn ei lo. A nuin, “Nimin aṭang khan ka nuamsam lo a ti reng mai a, ani pui hi rannung sehte hi a lo ni ve a ni maithei” a ti luam a. In chungah a lo mu chho daih tawh a, kan feh dawn thleng pawn a rawn tho lo. A pawi pawh ka ti hran lo e a. Hlima te inah pawh kan peng a, an lo fel khawp mai, a nu erawh ka nu ang deuha fate laka strict ve tak a ni ang tih a ṭawngdan aṭang chuan ka hrethiam nghal. Hlima rin ai daihin ramhnuaia han chettlat vel chu kan lo zeihawi ve sia, a sawi hlut reng mai. Nimbu, kawiâm bakah tengtere tih vel kan lo nual a, an huan a zauin a fai si, an la hlawkpui khawpin ka ring, kuhva an ching nasa ve hle bawk. Hawn lamah Kimteii te leipui, kawng bul maiah chuan kan lut thla leh a, maian, behlawi , ṭampui tih vel..aaa a tam mai kan la leh nual a, min duhsakna chu a lawmawm takzet a ni. In kan thlen chuan ka chau deuh, zan lamah kan lo in ve luklak sia, mahse, thlan a chhuak a, a tha hrim hrim. 

Lanpuii nen pawh kan inbia a, tunah chuan Mateii case-ah chuan Sailova te thenawm zin hawng an nghak a ni ber mai. Thawhṭan lamah an fapa a rawn haw dawn e an tih kha maw. Kan chawhmeh leh thei hawn tur chu fridge-ah min dahsak thlap a,. Eirawng pawh bawlpui tawh loin kan inbual a, ka rawl deuh nen, ka mu zen zen mai. “Kimteii kha a nawm loh vang khan rawn phei a hreh phah ang e, rawn hawnpui ngei ang che u, he lamah incheck up rawh se,.” Ka nuin a rawn ti a, amah Kimteii zawk a lo inthlahrung niawm tak a ni. Hlima pawh a inbual zawhah a rawn lang leh ta heu a, Johna a phur nghal sûrh mai. Kei pawn rawl damdawi chu ka mamawh tho e. In hnuaiah chimbuaitu awm ta lo chu kan han thli leh ker ker a, Nu Mawii hian a hria ang tih erawh a hlauhawm tawp. Zanah Hlima hoin Tluangi, Johna kawm deuh bik kha kan va rim a, Tluangi û nula senior ve tawh lam a lo awm bawk a, a ṭawng duh sia, kan titi tui ta hrep, an fel bawk a, duh aiin kan leng rei. “U Tete, lo haw tawh r’u, Tluangi kha a chhungte an strict a nia.” Kimteii msg ka hmuh chuan ka nui ringawt. Chutiang teh vaka an fanu an hauh âwm pawn ka hre lo,.mahse, hawn ka rawt a, Hlima’n a bialnute in min kawhhmuh pah a. “Ka fanu hi ka nute pawn an duat ve sia, mahse, reilotê han lak pawh an phal lo. An awm loh lai remchang kan chuh thin. Ka pa thin a thawh chang hi chuan, ‘Mai maia min la mamawhtu tur zawkin hetia min tham loh viau le, Lalhlimawm, then vang vang rawh, eng mi pawh nupuiah nei mai rawh, kan pawm vek. “ A ti khur khur thin a, mahse, ka zep lo, Kan nu hi ka hmangaih ve êm a, amah pawn min hmangaih. A dinhmun a khirh ve êm a, a û mipa hian Lawngtlaiah nuthlawi a luhkhung a, a nau nula lah Singapore-ah a awm ve bawk si. Tisawn amah sawn in chhungkhur a buaipui lo thei si lo va, A nu leh pate pawh hian Kohhran an chhuanlam ve pakhat a, a nihna takah chuan pasal neia a chhuah hi an phal lo ni berin ka hria. Mahse, kan tum rûk dan chuan bawihteii hi han leikang deuh se, inruk leha hmun danga awm bo rih daih kan rilruk a ni. Ka fa hial pai ngama mualpho leh tlâng sawi pawh keimah avanga hreh lotu hi phatsan ka duh lo. In pui ka luah dawn chuang lo va, chuvang chuan Lunglei lamah te pawh kan rawn awm daih maithei a ni.” A ti charh charh a,a tha ka tihpui khawp mai. Kan pathum chuan hmangaihna kawngah hriatreng tawh tur tawrhna kan lo hmachhawn vek tawh bawk a, kan thu a inhmuin titi pawh a rual khawp mai. Kimteii pawh a lo la mu lo va, a lo harh tha tawh viau. Mut hmain kan han inkawm ve leh hlawm a, An mo thar Zuali ve tho chuan, “Lalhlim, miss Mapuii chu i rimpui si na nge? “ A tih chuan, “Aa..thianpa Johna hian Tluangi te in lam a nger tlat sia, penpui theih pawh a ni lo. Tetea lahin Lunglei lamah a hung fel sa tawh sia. “ Tiin a nui ruh ruh a. Kimteii chu a tho tharh a, “Vanlal Johna pawh hi a lerh si, Tluangi nen ka sawi bam vek ang” a ti a. 

Nu Mawii chuan thutak deuh hlekin, “Tetea te rawn zin chu min rawn tiphuisui hle mai, i nute lahin senso eng emaw zat min rawn tumsak leh bawk si, Pathian thatzia hi aw. I pa leh Buanga pa inthianthatna hi a hlu ngawt mai” a ti sap sap a. 

“Aa..kan tih ve tur alawm, saw lamah Kimteii a hlu ve tho alawm, a tel lo chuan kan awm hleithei tawh lo a nih ber hi” ka ti ve luam a. Johna ṭawng nuam tawh si chuan, “ a dik a dik, nu Mawi, Zakimi hi Lungleiah pasal neihtir rawh u, a bialpa tur tha deuh ka hualsak diam tawh a nia aw” a lo ti phur phur a. Kimteii’n rum deuha melh chungin, “I zak lo aw, bialpa ka neih peih leuh. Pasal nei loin fa pakhat emaw te chu kan la nei ve ang chu..” a lo ti! Nu mawii’n, “I zâm si lova, nang lah hi i ri ang phawng phawng a” a lo ti hlak hlak. 

Sunday a ni bawk a, inkhawm kan duh ve si avangin zingkarah tuikhurah kan zu inbual..tui an hnianghnar lutuk loh vangin kan inthlahrung ve deuh a ni. Kan tukṭhuan ei tur, kan kil vek tawh hnuah Nu Mawii û a ṭawngṭai pek a, a lo hlimsang deuh nge ni a reia rei mangtara a han ṭawngṭai ta mai a! Kan Amen meuh chuan chawhmeh a dai duk hman. Ka hriat phak chauhin Johna’n, “Rilṭam a reh hman alawm le, a chhungte tan a va manganthlak dawn tak” a ti sup a. Ka nui vur vur ringawt. Mihring hi kan inang lo khawp a, kei ka sual ve hrim hrim nge ni ka thil chîk vang zawk, Kan inkhawm a, thawhlâwm hlan tura an mi sawm ten thawhlawm hlan tha ta mai lova thildang an han chham duahte hi ṭul ka ti fahran lo, chaw ei dawna chham chi leh chi loh te a awm ve, an ṭawngṭai a, ‘Lalpa’ tih sawi chhên te hi an sawi zat ka lo chhiarsak chang a awm. Ka sualna lam a niang,. Mipui aiawha ṭawngṭai ten , ‘Isua hmingin KA rawn dil e’ an tihte hi Lanpuii aṭangin ka ngaimawh riau, ani mizo ṭawng duhtui tih takah. Aa sawi duah lo mai ang, ril a ṭam, chaw ei nghek phawt ang. 

An khuaah hian UPC leh Baptist bakah Presbyterian an awm a. Hlima ho bawkin mipa thutna tlar hnung berah kan ṭhu ṭhâm a, an kohhran inrelbawl dan pawh a felfai hmel viau mai, thunawi an ngah lo va, tiang hi a tha kan ti thalaite chuan. An hla hriltu erawh a aw a sin deuh hlek a, music a ring bawk si, hriat a har angreng. Sermon pawh a tawi fel viau,. Banah chuan kan han tawi khawmuang deuh a, SS kal chu kan tum lem lo. Hlima’n nula ho chu an hming a sawi zut zut a, “Miss Mapuii chu Presbyterian a nia, Aizawl lam saw chu The Bap ho hi kan tam vak lo a nih hi .” A ti zuah zuah a, “Miss Mapuii hi in ti reng mai a, a hmeltha viau mawni le. John, kan nu a tluk i ring em?” Ka’n ti kher a, “Kum lamah chuan tluk ang” ngeiawm fe hian a lo ti a, kan han nui leh rih. 

 

Chawhnu fellowship pawh Johna leh Hlima te chu an kal a, ka phur tehchiam loh vangin inah ka mu zâl ta mai mai. Lanpuii ten Mateii thlan an tlawh a, kan inbe deuh reng mai. “Fellowship te chu kal ve tur che alawm,. A nuam ve a” a rawn ti a, “Aa, ka be chak zawk che lawm” ka tih chuan a nui hak a, “Kimteii a fellowship loh vang zawk a ni lo maw?” A rawn ti ! Ka meng phar deuh a, In hnuaia ka awm daih avangin Kimteii kal leh kal loh ka hre lo hrim hrim. “A kal lo mi? In hnuaiah ka awm daih alawm. “ Ka ti vut a, “Ka ti mai mai a nih kha.. tikhan mu zâl rawh, Lateii ten chaw an rawn ei dawn a, kei pawh kan inbâwl ṭan ang e” a ti a. Nidang aiin a ṭawng danah helhkam eng emaw a nei ni hian ka hria, Mateii chungchang a nih ka ring ta mai. Kimteii chuan a fellowship loh thu a lo va sawi leh hram em mawni le, thil engkim hi a va report ziah em ni aw. He nau hi engtin emaw la tih a ngai a ni. Ka lo muhil zuai a, ka mumangah Mami leh Mateii te ka lo hmu nia ! Kan thlang luitê-ah khan tuiin an lo intheh nasa mai a, an lo nui bâwk bâwk mai, zu pawh tuma ka zu pan tur chu ka ke ka chhep sual a, ka tawlh ta puat a, ka harh nghal zawk. Dar 3 a lo pel tawh a, ka mumang ngaihtuah zui vung vung chungin ka tho a, in chunga chhoh ka tum a ni. “Rawn kaihthawh che ka lo tum chiah a, mut i va duh ve” Kimteii chuan a rawn ti lut lâng lâng a.

“Nia, ka thau dawn a niang” ka ti ringawt. Tunah tak hian a rui lo va, kei ka rui lo bawk. Keimah zawk chu ka zâm letling zawk ten ka hria,. “U Tete, nizan hmasa kha..ih, tihpalh” a ti sep a. Sawi tur ka haihchham. “Beer kan in a, ka lo rui ve deuh a nih kha. Chhunah khan ka bialpa hlui ka hmu ve bawk nen, ka lungleng kual vel a nih kha.” A ti ta zung zung a. 

“A ho em mai, engmah ka hre lo ka tih kha” ka ti a. 

“U Lanpuii hrilh suh aw. Ka zak dawn em mai “ a tih chuan, “Engvangin nge ka hrilh ringawt ang. Sawi tawh suh, khatiang lam, hawh chho ang” ka ti a. 

“Mahse, maw..ih, .” A tih lai mekin, “Thlaraubo pa chu i la mu law?” Johna’n a rawn ti lut lung lung. Kimteii nen tlawnga kan lo awm a hmuh chuan a lai deuh nge, “Ehh, in va thupuifun âwm vel ve..ka tibuai che u em?” A ti kual a, “In va bang hma ve. A nuam bawk maw?” Ka lo ti daih. 

A inthlak a, Kimteii pawh a sawi tur sawi hman loin, ‘Lo chho r’u aw, thei kan bawl dawn nia’ tiin a chho ta a. 

“Nang hi, i ti tak tak lo tiraw?” Johna’n a tih chuan, “Mawla” ka lo ti hlur.. “Tak taka Nau, Kimteii hi hrilhfiah chu a la ngai ang, a awmdan hi kei takngial pawn ka hai lo. Tiang chu a chi loh” a ti a. 

“Ka hria lawm, a la reh ve mai ang, a la naupan vang a nih hi” ka ti ta ngawt a. 

Ser kan bawl a, ka mamawh a niang ka ei ṭeuh mai. Buanga leh Zuali te chu Zuali te in lamah chaw an ei phei ve dawn a, Zuali hi kan Rinzuali nen pawh an inang lek lek, a hminga han koh mai hi ka inthlahrung lek lek zel. An kal hnuah, “U Zuali kha Lalrinzuali ve tho a nih kha aw. Thil kan hrechhuak em aw?” Kimteii’n awmze nei zet hian a ti lang lâng a. Nu Mawii a hawihai angreng, “I ho teh tuh” ka ti ringawt. Hlima a rawn lan leh takah chuan Johna nen an inmitmei leh zuk zuk tawh, kei erawh a tuka haw tur kan nih vangin ka hnar rih a ngai, “Miss Mapuii an ti sek bawk a, va hmu ve lawk ila’ Johna’n a tih chuan, “Va kal r’u, duh leh motorin va kal u la, eirawng ka lo bawlpui ang” ka lo ti vat a, zanah ka sawi lâwk tawh vangin an hrethiam ve mai. “Motora kal a ngai lo, Apu Hranga te inah kal lawk a ngai a, U Tetea hian min kalpui se ka lo tia, a hla ve si, tikhan va kal mai r’u “ Kimtei chuan a lo ti vat a, Johna nen kan inmelh zuk ringawt.Chance zawn dan pawh a thiam reuh hi a..

 An chhuah hnu lawkah, “U Tete, va kal lawk ang, veng tawpah an awm a, khaw fan pah a ni mai. Nu, kan va kal lawk ang e aw..” tiin bag khai a va la a, ka zui ve mai. Inbe lem loin kan tlan zel a, a sawi ang tak tak khan veng hmawrah an lo awm a, an in a fâl deuh bawk. “Engtia i pu nge?” Ka tih chuan, “Api leh anu nu te hi unau an nia, mahse, a pu Hranga hian min duat zawk.” A ti a. Kan va luh chuan pitar tawh lam hian vaimim char a lo nuai mial mial a, a piah lawkah putar tihah an nu aia lang naupang zawkin baibing a lo kheh mial mial bawk. “Pu, in butter ka lo lo dawn. Kha, hei anuin kensak rawh a tia” tiin a pi zawk chu a bag khai a pe a. “Aw..puan leh kawr mawi a ni maw? Engah nge maw chawhmeh te chu min rawn suah duh ni. “ A lo ti hlut a, a pi leh pute chu ka hmu tawh tak e, inneih ni leh nimin thleng khan saw lamah chaw an rawn ei alawm. “Va lo rawh u, mahse, a tê deuh kha chu la zuah u la” Pu Hranga chuan a ti a. Midang ka hmu miah lo. A hnuah Kimteii’n , “Nupui pasal an nei hlawm tawh a, an te ber hi Siahaah School-ah a thawk ve a, tisawn an nupain an awm ve tawp, an faten pawisa an thawn ve reng a, an khawsa thei reuh lutuk” a ti a. An inthihsan hunah an inngai ve ngawt ang le. Thei butter kan tih, Avocado chu a rah nasa mai a, “Ka pa ten an duh dawn êm asin, Lungleiah an zuar to sia,. “ A ti sauh sauh a. Thing lâwn lam ka misa thak si lo, amah chu a lâwn ṭawi ṭawi a, a lo ta zung zung mai. “I va lawn thei ve, Kimhnap,. I rawn tla ang e aw” ka ti a. 

“Ka til thênna lam a nia” a rawn ti. “Til pawh i neih loh tawp kha” ka lo ti a, tuna kan awmdanah hi chuan inkawmngeih, chhungrila engmah pai lo kan ang. A pu te ei tur chu a dah hran sak a, a pute huan chu a nuamin boruak a dai ruih mai a, an in hmun a zawlin a zau si, ka awt reuh tak tak a ni. “Ṭhu lawk ang, ka hah” a han ti a. Theihai kung nghengin kan thu dun a, kan ngawih vang vang hnuah, “U Lanpuii nen hian inthen ta u la, ka tan chance a awm ang em?” A ti ta phawng mai. Ka chhing sawk a, ti nge he nu hian danglam a tum miah loh le. A huaisenna hi lehlamah chuan a fakawm ka ti..a zak lo ka ti tawh lo, a duhna lama a zak lo thei hi tluk loh rim a nam tawh zawk. 

“Kan inthen lovang” ka ti bung nghut a. Ka thinrim miah lo. “Hmalam hun kan hre hleinem,. Thingtlang nula ka nih vang em ni?” A han ti leh a, “Ni lo ve,thian ang te, u leh nau anga ka en tawh te hi ngaihzawng angin ka en thiam tawh lo. I hrethiam em?” Ka ti a, a ruh langa sawi a ngai ve ta deuh a ni. 

A aw a thian kharh a, a ding hluai bawk. “Kan la hria ang chu. Engpawh thleng se i tan ka awm reng a nia. Haw tawh ang” tiin a kal zui nghal hmak. A mak reuh ee..