Hmeithai 9

HMEITHAI (9)

Ziaktu : Toni Râlte

Ka hawi let a, makti deuhin Kimteii chu ka melh a, “Eng nge i sawi awmzia?” Ka ti hul hak a. Nui hawk hawkin, “Ai ! Ka tihder a! I hrilhhai hmel kha a hmuhnawm tawp” a tih chuan ka thêp nghal suai suai nia ! Ani hian nuṭa ang ni lo, mipa ena min en ka hlau a ni ber, in khatah kan chengho si a, bakah nizanah tiang khan ka khumah a mu bawk si, min mawlh ve tlat a tin ni, a chhip sama tuai thuak pahin, “I chhe reuh e a, ka kal a nia, bye “ tiin ka chhuahsan ta a. Dawr chu Mimi’n a lo hawng tawh a, chabi hi a kawl ve tho a, ka tlai dawn hi chuan a lo hawng ve mai zel. “A ṭhing rim i nam” tih pahin a ner nâng a, “Nam ve bawk ang chu” ka lo ti ringawt. Lanpuii nen kan inbe zuai a, ka û chanchin te min zawt leh zat bawk, Aizawl lam kal a ngaih maitheih thu ka hrilh chuan a chek hlak a, “Ka khawngaih êm mai, a natna tal hi hrechhuak se aw” a ti vawng vawng a, kei pawn chu chu ka duh rualin ka hlauthawng a ni. Vawiin chu inrinni a nih vang nge customer kan nei vak lo, thingpui kan in laiin Johna a rawn kal a, tunhnaiah kan inhmu khât deuh a, ka lâwm hle. 

“Ka rilṭam rap, lal mimi, min va chahsak ve teh, rice artui chhipchhuan leh sachek aw” a ti nghal lûng lûng a. Mimi pawn a mizia a hriatsa tawh avangin a biaksak ve nghal. “Eng nge Mami chu a an zel le? Tunlai chu putea te rawn zin nen ka chhuak tam thei lo lutuk a, office dawrpui neuh neuh a ngai nen, naktuk chawhnuah ka han kan ang ka lo tia” a ti a, ka ṭhianpa a nih bawk bakah ka û pawh hian nau angin a enin zilh a ngaih hunah pawh a zilh ngam ve kha a nia, a ngaipawimawh ve ang. “A la ngai reng, ngaih hi chu a ṭha vak tawh lo” ka ti a, ṭhianṭha ber a ni bawk a, ka rilru tak tak sawi kha ka thawl hawk zawk. A ngawih vang vang hnuah, “I ni ve tho maw? Ka sawi hreh a, ka hmuh hnuhnun bera a hmel kha a pangngai lo ka ti kei pawh, mahse, bawiha, i pawimawh a nia, i nu leh pate hnem thei tura ṭan i lak a ngai aw” a ti ve ngial a, ka bu nghut ringawt. He lam hi chu sawi sei vak ka duh loh vangin Ngaihi chanchinte ka zawt a, “Ani pawh bial zaipawlah a tel sia, hla an zir ngawrh deuh a, kan inhmu khât angreng” a ti nuah nuah mai. “Bial zaipawl member bialpa i ni pha ve hi e lâwm ngawih ngawih rawh, LalJohn” Mimi chuan a ti ta zêk a, ka lo nui hawk hawk, Johna lah duai lo, “Ve che, Michhe Mimi, kei hi min phû lo zawk aw, tleirawl star rawn ka nih hi” a ti ve hluk hluk. A eitur order a rawn thleng a, a ṭâm tawh tak tak a niang, a hap buan buan mai. 

“Zanin chu rawn riak phei la, ka nu a awm dawn lo” ka tih chuan a nui huk a, ka nu hian a hau peih lutuk a a ning thin. An inchhang ngar ngar zel a, an inngam dun si, mahse, ka nu hauhbur ni mah se, a rawn lan khat deuh chuan Johna hming lam ngun bertu chu amah ka nu tho a ni lawi a, “Kan rapper a awm dawn loh chuan ka lo inngaihtuah ang, sawtah DC office-ah putea lehkha pawimawh ka va lamsak ang a, duh leh Kimteii khan chaw min lo chhum kep nghal se, vawiin tlai chu putea ka’n show tir keuh ang e” a ti leh ta hluam hluam a, hmm, insum a har leh dawn mang e. Rin loh lutukin Lucy a rawn lang ve hlawl mai pek a ! Johna lo awm ve bawk si chu an pahnih chuan an lai dun hle tih loh rual a ni lo. Mimi nen kan insignal zauh a, lehlam hawiin ka khi ṭhaw ringawt. Chutah insum ru deuh hian ,” Lucy teh hlawl chu, inhmuh a va khât ve, lo ṭhu rawh” ka lo ti vat a. 

Kimki lek lek hian, “Â, ṭhut em em pawh ka tum lo, damdawi ka rawn zawng kual, hei hi in kawl em?” Tih pahin lehkha min pe a, a dul pawh a lo puar ve âk tawh, amah sa pan chi a nih vangin a la lang over lo zawk. Johna erawh a ngawi hmuk mai a, an boruak tur chu ka hrethiam reng mai. 

A damdawi duh chu kan lo la kawl hlauh a, ka pe ta nghal a, “La chawl ve rih la, hei hranghlui te pawh an awm hi” ka ti ta zauh a, Johna a meng rum ngang mai. Za vak lo va nui chungin, “Ngaw rawh, kalna tur ka la nei a, bakah hranghluite hi an tùm lian êm mai” tih pahin Johna a melh ta zauh a, “Awihawm kher loh e, tak taka inenkawlṭha rawh aw,.” Johna chuan a lo ti vut a. Chutia pangngai deuha an han inbe thei chu ka lawm hle, naupangchhia taka inhuatzuia inelsen kual vel hi chu a ho ru riau, Lucy pawh beisei theih tur chi a ni tawh lo va, Johna lahin ṭang dang a bel ve tawh bawk. Ṭhianṭha pangngai ni zui se a ṭha mai. 

Lucy a chhuak chiah tihin, “Ka va khawngaih tak” Johna chuan a ti ta a, “Ni ngawt mai” ka lo ti ringawt. “Zuia hi ka hnek chak a ni, mipa nep lutuk” a ti hluk hluk a, “Lucy chhungte chu an inchhir ve ram ram tawh ang chu” Mimi pawh chuan a lo ti ve a, an fanu nun an tihchhiatsak a ni ringawt, fa pai kha nun chhiatna a ni ka tihna ni loin pa tel loin naute a enkawl dawn a, nuthlawi dinhmunah dingin amah hmangaihtu a chân bawk a, Lucy hi a lainatawm a ni. 

Zanriah ei hmain ka roomah Johna nen kan lem dun leh zuai a, ka pa a lo haw tawh avangin a hriat kan hlau hle. Tichuan, puar êl euhin zanriah chu kan ei ta a, Bawihteii erawh a nute bulah a riak ve dawn a, ka nu a awm tho bawk a, a ngaihtuahawm loh ang chu. Ka nî erawh a night leh dawn a ni. Chaw eikhamah Lanpuii te inah kan kal zuai a, Sailova leh Johna an inkawmngeih nghal hle, keini pahnih erawh a hrang deuhin kan inkawm thung a, Mami a khawngaih thu bawk a sawi leh thin. Kan chhuah hmain ka lem tawh lo bawk a, ka in tih a hre lo nge a haider, engmah a sawi lem lo. Kimteii’n min lo call a, “Lo haw tawh mai r’u, keimahin ka awm sia, a nuam lo, ka pa te an meeting leh daih sia” a rawn ti nghar nghar a. 

“Aw le, i dawih ve sia maw” ka ti a. “U Hriatpuii kha ka hlau alawm” a rawn ti ! A âwm ve tho mai. An sawi hrâng ve deuh bawk nen,. Phone ka dah hnuah Lanpuii chuan, “Kimteii hi in tan chuan a hlu ngawt mai, tun dinhmunah phei chuan tiraw?” Tiin chiang zet hian min melh a, ka eng emaw ti nawm loh phah, “Nia, in lama che tur an awm si lo va, a ṭangkai lutuk” ka ti ve mai a. “Innei daih u la” a tih chuan ka melh kâwk a, “Va han chhe tak” ka ti ringawt, a nui a, “Tak taka va haw r’u, a khawngaihthlak, a khuahar ang” a ti a, a nuih dan chu ka duh lo. Mahse, ka sawi chhuak thiam si lo, eng emaw thup nei nuihin a nui ka ti mai, ka inngaihbel kual vel vek pawh a ni maithei. Inrinni zan a ni bawk nen, Lanpuii te pawn mut hma an duh ve bawk a, Hawn zai chu kan rel ta a. Kimteii chuan tv on chung bawkin phone a lo khawih leh malh malh tawh. “Kim thawveng, zanah i bulah ka rawn mu dawn nia aw, ka sual dawn che” Johna chuan a ti thur thur a, “I chhia nih mai chu, i chak loh hmel nen nen a” a lo la ti zui. Ka pa lo haw hmain kan lem leh zuai a, ka pa nghah pahin mut nan a la hma deuh bawk nen tv te chu kan en ta mai mai, Kimteii chuan, “U Tete, spicy ka ei chak e, min leisak ve teh” a ti a, kei spicy noodles hi ka ei ngam ṭhak lo, ka pa lohna lam tak a ni. Pawisa ka pe a, a han lei a, a siam nghal rak rak, ka pa pawh a rawn haw ve chhur chhur a, “Ekhai! Johna, in mitmeng a va dik lo leh tawh ve, nangni thian dun hi a eng chu in hria ni maw? Ti nge helam kawng ngawt hi in zawh mai le aw?” A tih chuan hnar a lian duh teh e, ka pa meuhin min khak chu a nia, Johna meuh pawh a meng hniam ruih mai. “Pa, chutiang a ni lo, ka rawl lutuk a, rawl damdawi tlem ka peg mai mai alawm, Bawiha phei chuan a ti ve lo” a ti ta nuah nuah a, ka pa chuan a awih lo tih a lang reng, engmah erawh a sawi tawh lem lo va, mu turin an pindanah a lut nghal daih. Keini pawh kan mu zui ve nghal mai, mahse, kan harh tulh tulh lawi a, kan titi leh bul bul, “Bawiha, Kimteii melh dan che hi ka ngaihbel nge, eng emaw a awmin ka hria, ka sawi thiam lo” a tih chuan ka phâwklêk deuh titih, mahse, “Aa, nangpui hi i ngaihtuah hnuai thei lutuk, ani te chu ka farnu ang alawm, bialpa pawh a nei ve reng” ka ti ta ngawt a, zep nâk emaw kei pawn ngaihṭhat lohna chu ka nei ve tho, mahse, he thil hi thleng lul suh se. Ka duh lo bur a ni mai. 

Sunday zing a nih vangin Johna pawh chaw ei loin a haw phei a, sunday zing na nâ na chu inkhawm kan ṭhulh duh bîk ṭhak lo maw. Kei pawh ka inbual phur phur a, tukṭhuan ei hmain ka nute chaw kan han pe leh zuai a, Bawihteii kan hruai thla nghal bawk. Kan awm rei hman si lo, ka û chu nitin mai hian a hniam zel ni mai hian ka hria a, han hnem vak dan ka hre si lo, ka nuin gate thleng min rawn thlah a, “Sanday school banah in vaiin in lo chho ang a, ro kan rel ang, Mama te pawh” a ti zauh a, Mami awm zel dan tur rel a han ngai ta chuan lung a tichhia. Ṭum danga ka inkhawm ka pha lo kher mai, ka rilruah ka û hlir a awm a, Bawihteii ka va en ṭhin, a ṭhiante bulah hlim takin a nui ve har har si a, engmah a la hrethiam tak tak si lo. Ka lainat takzet a ni. 

Sunday School banah chuan Mama te chhungkua nen, keini chhung nen damdawi in chu kan pan leh ta a, Cabin-a an awm avangin tam deuh mah ila a zia tak a awm. Naupangho erawh corridor velah an lo infiam a, puitlingho chu kan han ṭhu khawm a, Mami erawh kan duh ang takin a muhil rih thung. Ka nu chuan, “Naktuk maia phei pui hi kei ka duh tawh, chawhnu lamah kal ila, ZMC-ah lut nghal mai ila,. Hmunpui kan pan vat loh chuan hlauhthawnna hian ka khat tawh. Doctor te paw’n pawi an ti lo bawk a” a ti mawlh mawlh a. Ka pa chu a melh kar bawk. Ka pa chuan a chil lem khawlhin, “Ni e, kan chet ran chu a ngai a nih hi, kan hawn hmain Doctor Zorema pawh ka va hmu ve hrim hrim ang e, lehkha pawimawh tihfel turte pawh a awm dawn a, chutiang chuan ruahman ila, Kimteii’n Bawihteii in a lo nghahpui thei mai ang a, duh leh Tebawiha chu rawn let leh nghal mai se a pawi lem lo, Mama te lah in buai ve rih sia” a ti charh charh a,. Kei chu ka lo ngawi reng thung. Chutiang chuan ro kan rêl ta a, a rang lama pheipui chu a ngai ngei ang le. Doctor ten min refer ta bawk a, Lanpuii pawh chanchin ka hrilh ve nghal. Pawi a tih thu te a sawi ve luam mai. 

Zanah ka nute pawh an insiam a, ka nîin Mami chu a riahpui thung. Bawihteii ber hi ni a lainatawm, ka nuin a hrilhfiah ngial a, “Ka kal ve duh” a ti tlat si, a ṭap par mai a. Ka pa phei chuan hruai ve mai a duh ut ut tawh, mahse, amah ngaihtuah ngai nen, a nu buaipui nen, bakah an exam a hnai tawh si a, ka nuin a remti ta lo. Vanneihthlak takin ka nîin chawlh a la thei ta hlauh a, chutiang a nih takah chuan, ka pa chu kal ve rih lo mai se kan ti leh ta zawk a, ka pa a awm chuan Bawihteii pawh a ngaihtuahawm loh deuh ang. Ka nî nurse a ni bawk a, a zia khawp mai. Zingkarah kan chhuak a,Haulawng kan pel awrh tihin Mami chuan a thinhnûn hnuai veilam chu nâ a rawn ti nasa mai a, kan han ding leh ren rawn a, ka nîin nachhawknain a chiu a, a sang bawk a, a chhawk rang khawp mai. Thenzawlah chaw kan ei a, Mami chuan rin loh deuhin a ei ve ṭeuh mai, ka nu lawm lutuk chu a ṭap lo chauh. Amah Mami tak pawh a lâwm tih a hria,. Chutiang chuan harsatna em em tawk tawh lovin Aizawl pawh kan lut a, ZMC -ah kan inkuah lut nghal. Ka nîin he ta thawk a thiannu a lo biaksa tawh vangin cabin min lo la zuahsak thei hram a, a lawmawm tak tak. Damlo na nâ na chu a chau bawk a niang, Mami pawh a muhil zui deuh mai. Vawiin lamah chuan eng vak han tihtheih a awm lo bawk a, ka nu nen chuan ka û te in lamah kan pheisan ta rih a, ka u pawh chuan a laizawnnu chu a ngaihtuah ve khawp mai. Ani hi pasal a nei vannei a, dam duam mai bakah makpa fel tak mai a nia. An khawsak a sang lo naa, chhungkua an hlim chuan a tawk mai. 

Lanpuii pawh ka bia a, “Dam takin rawn haw rawh u aw” a rawn dam diai mai. Ani pawh a û Sailova a la awm a, a ngaihtuahawm loh. “Kei phei chu naktukah ka rawn haw ka ring, dawr ngaihtuah ve tho a ngai sia” ka ti a, nia, heta awm ṭeuh ringawt pawh khan awmzia a nei vak lo a ni. Zanah Kimteii’n min lo text a, “Kawr mawi min lo hawn rawh aw” a rawn ti ngei, “Ka lei ve thiam lo, hmeichhe kawr “ ka han ti ngial a, “U Lanpuii pawh i leisak tawh ang chu. lo lei la ni mai” a rawn ti. Johna thusawi kha ka hrechhuak rauh rauh mai. Ka nu pawn, “Naktukah chawhnu lamah haw phei mai rawh. A buaithlak, Kimteii ringawt rin pawh” a ti a, pawi ka ti hran lo. A tukah Lanpuii te nufa thil tur leh Kimteii’n min chah ngun bawk nen, bawihteii nen an kawr tur ka leisak ve a , ka pain huan samna khawl blade min chah ka lei bawk. Tiang chuan ZMC lama an mamawh tur nen bawr angreng takin kan inphur phei a, ka u te nupa an rawn kal ve bawk. Nizan lamah an lo mu ṭha vak lo va, a luak deuh reng a niawm e , a khawsik reh thei bawk si lo nen a chau leh hle mai. Ka kalsan dawn chuan, “Tea, baiwhteii kha lo ngaihtuah rawh aw. Kimteii a buai ve thin sia,. Min lo biak dawn nia “ zawitê hian a ti niah niah a. “Lo ngaihtuah suh, a fel alawm bawihteii te chu,. Nang pawh i ṭha vat vat mai ang” tiin a samah ka chul zauh a, ka chhuahsan ta a. Ka rilruin ka ṭawngṭai ve nasa mai. Hlauh vang niloin rilru kal ding lutuk tur vengtuah chuanpui nei thei ila aw. Thenzawlah thingpui ka in a, thim hmaa thlen ka duh bawk nen, ka kal zui lehnghal. Chaw ei turin min lo la nghak a, ka thil hawnte chu ka han phawrh a, an lawm thiam ve viau. Lanpuii te thil tur ka dah hran lai chuan, “A sial bik ang chu aw” Kimteii chuan awmze nei deuh hian a lo ti a. “Sial kher lo, chaw ei chu lo siam u la” tiin pindanah ka luhsan ta a. Ka chau hran lo e. Ka inbual lai laiin Johna’n a rawn call a, “Ka inbual laklawh asin” ka ti hlur a. Thlabar aw deuh hian, “Lucy intihhlum a tum a, tunah damdawi inah a awm mek” a rawn ti. Aww..buaina bawk maw. A dah leh nghal daih a, ka inbual zawhah ka call ṭha a, “Damdawi a lo bar vak a, a mar pawh an hmu mang tawh lo, mahse, engtin tin emaw an chhan hman hram a niawm e, ka khawngaih khawp mai” a rawn ti hluam hluam a, a dinhmun a khirh ve êm a ni. “Naktuk lamah kan ve a va ṭha ve” ka tih chuan, “Nia, kan tum dawn nia” a ti a. 

Zanin chu Lanpuii ka rim phawt a ngai. Ka thil leisakte nen ka phei a, an lawm thiam ve hle. Sailova erawh a leng chhuak ve a niawm e, “Nuam a ti ve phian a, a lawmawm, châm ve reng se ka ti khawp mai. “ A ti luam a. “Bialnu te nei se la, nuam a ti lehzual ang” ka lo ti a. LalMimi hi ka tihpui dawn mawni, an inmil dawn riauin ka hre tlat. Ka leng rei lem lo, rilruah ka farnu a riak ve tlat bawk nen, khawilai mah hi nuam pawh ka ti meuh lo e a. A tukah chawhma lamah Johna nen Lucy kan tur chuan kan thawk chhuak ve leh ta poh a, vanneihthlak deuhin a nau chiah a lo awm hlauh, a nu emaw a pa emaw an awm chuan a nuam vak lo ve a. Lucy pawh chau tih hriat tak hian a lo meng dava riai mai. A dâng em em bawk. Peih leh peih loin a rawn nui ve hram hram a, Johna phei chu a melh ṭha ngam meuh lo a ni e. “Thil atthlak deuh ti tawh miah suh, i nau pai hi ngaihtuah ta che” ka’n ti ve ngial a, “Nia” a ti chuai raih. Hetiang teh hrepa awmtirtu Zuia hi kei pawn ka hnek châk a ni. A tluan ka ring miah lo bawk. Johna paw’n kan hawnsan dawnah, “Lo dam ṭha vat rawh aw, thil a thim zawngin ngaihtuah lo la” a ti ve luam,. Lucy hi chu a tan chuan hmeichhe danglam a ni ve reng tawh dawn a nih hi. 

Ka nî nen kan inbia a, Mami chu a test result te an han lam khawm a, ka hlauh ang ngeiin Thin cancer a lo ni ! A va pawi tak êm. Hlauthawng ru viau mah ila, a tak ngeia min han den takah chuan a nâ tih hian a sawi fiah zo awm lo ve. Amah phei chu an la hrilh ngam lo. Engvang nge mawni aw, zu lam chi hrim hrim a in ngai lo va, zuk leh hmuamah hian tuibur hi a hmuam ve zeuh zeuh a, kuhva pawh a ei ve zeuh, mi tam zawk ngaihdanah chuan thin lam ṭha lo hi chu zu in nasaah te, zunthlum veiah te hian a tam duh bik tih kha a nia. Mami vanduaizia hi aw, Thin cancer phei hi chu cancer rau rauah a rang bik lehnghal a, ka nî sawi hmangin a thin zatve dawn chu cancerin a ei chhe tawh a niawm e, Lungleiah khan khatianga rinhlelhna kha an nei lo nge, test kha an ti mai si lo. A rawn nat chhoh dan kha a mak ve bawk a. Heiham, nilengin ka awm a nuam ta lo. Lanpuii pawh ka hrilh ve a, a chek tlak tlak mai. Johna leh Mimi phei chu an mittui a parawl kuang thei,. Tlaiah pawh kan inkhar hma ta ngawt a, ina luh ka huphurh ngawih ngawih, ka pa rilru nat turzia hi. Kan zanriah ei pawh nidang a ang ta lo, sawi mai tur kan hre lo va, bakah Bawihteii hriat laia sawi rik kan duh si lo. Ka pa pawh ka ngaihbel nge ni a tar sawt hian ka hria. 

“I û hetiang dinhmunah a ding ta mai si chu a nia! Tebawih, rilru puitling tak i put a ngai a nia aw” Bawihteii kham hnu chuan a ti sup a. Ka bu nghut ringawt. Bawihteii rooma a luh nghal vangin Kimteii chuan, “Pa, phai lam panpui chi a la ni lo em ni le? A pawi dawn lutuk..U Mami chu ka va khawngaih tak” tiin a insût hraih a. Ka pa pawh chuan, “Naktukah ka va phei ve phawt ang a, thil awmzia chu a hriat zel mai ang” a ti a. Pa ṭawng tlem tih takah naktuka Aizawla a phei tur thu tunah a sawi chiah a nia. Zanah pawh ka leng chhuak lo, ka mood thlawt lo a ni ber, Johna a rawn riak dawn hlauh a, ṭhian ṭha nih a tlin khawp mai. Kimteii’n ka pa thawmhnaw a siamsak malh malh a, Baiwhteii erawhin lehkha a zir, engmah a la hre der si lo, a hmel ka hmuh hian ka tâwt up up a ni ber e. Mama te an nupain an rawn chho a, U Lawmi insum thei lo, bathroomah a va ṭap leh rih. Mama pawh chuan, “Pa, nangmah chauha phei chu i khua a har lutuk a, Tea’n helam lo uap se, kei pawh ka zu insiam zung zung ang a, kan pahnihin kan phei dawn nia, dawr lam chu Buata kutah lo awm mai se” a ti ta zung zung a. Ka pa pawn pawi a ti vak bik lo a niang. Lehlamah pa ber thachhang dawltu a ni bawk a, kei ai chuan rorel leh eng ilo pawh a thiam zawk ngei ang. 

Zu in lampang reng reng a lang tawh lo, Johna pawh a fim kar a, zu lampang a sawi lang lo hrim hrim bawk. “Phai lam panpui chi a nih tawh loh rau rau chuan, kei chu in lamah inenkawl u la ka ti khawp mai. Ni Seni a awm tho a, amah pawn a duh zawk ka ring asin” a ti nuah nuah a, ka rilru chiah a ni, thin cancer chu a rang si, vawikhatmah a hmel hmu lo va min kalsan mai ka hlau, tin, a thih dawn darkarah a fanu bulah awm thei hram se ka duh takzet bawk. 

Ka’n sawi tel hram duh chu, Mami leh a Bawihteii pa chungchang hi hriat te pawh in châk ka ring deuh. College a kal laiin kan rin loh lutukin an tlan dun ve ringawt a, a graduate lek lek tawh avangin ka pa te chuan, “Graduate ve law law se la, chumi hnu lamah kan insawirem dawn nia” tiin palaite an thlah a. Anni pawn an lo hnial bik lem lo. An pa Zaia te hi Lunglei Venglaia khawsa niin, In sakna bungraw dawr lian angreng tak an nei a, a pa pa a pu atanga an rochun zel a niawm e, chu chu an eizawnna niin, a pa hian contract a hmu ve leh zauh ṭhin bawk. An khawsak a nuam a, Zaia hi an upa ber dawttu a nia, a û hmeichhia chuan pasal a nei tawh a. A naute pahnih mipa leh hmeichhia leh a nu leh pate nen an khawsa mek a ni. Mami pawn tha takin BA chu a pass ve ta a, nau thla 1 mi a lo pai hman tawh nen, ka pate tan pawh ui beh ngawt thu awm hek lo, an innei ve ta chuk chuk a. Ka û pawh mo ni ve tain kan in pawh a reh ruih mai. Mak deuh chu mo te chunga sual chhuah leh hrawn hrehawm hi pasala nu leh farnu te an nih fô laiin Mami tan erawh Zaia pa , Pu Khama leh Zaia te naupang ber Zuala te chu an khirhin hrawn an hahthlak ta viau ni tur a ni, kan inah hian a rawn kal khât nen, a rawn kal ve chhunah a sawi ta ziah a. Ka nî lah nula phanchang tih takah a lo lungni lo nasa, a relpui hrep chang a awm ve thin. Chutiang hunah pawh ka nu leh pate chuan, “I nei tawh a, amah Zaia ber i laka a sual loh te chuan vui mah ta che. Nakinah in hrangte pawh in la chang ve ang a, hrehawm tawrh hmasak phawt te pawh hi a ngai ve a nia “ an tihsak daih zel. A naupai a han lian chho a, thla 6 a pai chinah phei chuan a dul a lian si, a inzo lo êm êm a, Zaia lah dawr nghak nitin a ni si, a nu hian an in bul maiah eichawp dawr a siam ve bawk nen, in chhungah chet ve reng a ngai si, a chet fel loh deuhin pa ber zu ruiin a ânkhum hrep a, an te ber lah an lo duat sual ve nge ni, a u nupui rai puar chu zah a hnekin a tir kat a tir kat thin a niawm e. Zaia chhang chiah nula kha chu a felin Mami pawn a nu nen hian a sawisel ngai lem lo, mahse, Phaiah eng emaw training turin a kal zui leh ta daih si nen. Nu ber lah Mami chungah sual lo mah se; a thlavâng hauh chu sawi loh, ṭîk pawh a ti ngam lo va, a pasal chu sakei hlauhin a hlau a ni ber e. A pasal pawn a hmusitin a be nawmnah thei reng bawk a. Zaia nu hi a ke ruh tliak an zawm fuh loh vangin a kal bai bawk nen, “Kebainu” ti ngat ten an pa chuan zu ko thin a! 

Pa ber a ni tih a inhriat em em bakah a thawhchhuah a hre hlur bawk a, Mami sawi hmangin vawikhat a zu rui âng kha Zaia pawn a dawhthei ta bik lo a niang, “I zu ruih apiang lah hian, ‘Ka chawm, ka hrai in ni’ i ti teivet a, hetia sawi chhuak leh fo tur si chuan engvangin nge nupui fanau te i lo neih duh zawk, tunah hian i thawhchhuah hi kan ei mang tawh lo, zu manah a kal zel tawh. “ A lo ti ve fak a niawm e. Chu chu huain a pa leh a nau chuan Zaia chu an lo sual rawn titih a niawm e. In hrang chan a sawi ve lahin a nu zawkin a phal bik si lo, Zaia a awm loh chuan a nu tan a hrehawm ve dawn bawk si, chutiang vel chu an chhungkaw dinhmun a nih awm chu. 

Mami pawh kan fuih nasa bawk a, a chhel sâwt viau, Bawihteii hi a vei rei khawp mai a, ka nu leh ka ni ten an buaipui vek, an pa chiah a rawn lang ve hram. Bawihteii chu an zai chhuak ta nge nge a, a neih atanga thla 3 vel kha chu kan inah a khawsa rih a ni. Buaipuitu dang nei hek lo, Zaia pawh a rawn riak mai zel a. Tichuan, Bawihteii’n kum khat leh thla 3 hmel a hmu tihin Zaia pa chu internal bleeding vangin a boral a. Nu ber pawn a tuar vak pawn ka hre lo, a tirethei bawk êm a ni. Zaia nau pawh khan damdawi zuar nuthlawi a luhkhung titih a, inah a awm ngai ta mang lo. Mami tan pawh a thawventhlak angreng phian mai. Mahse, vanduaina chuan a lo kalpel hleithei lo a niang, Bawihteii chhang tur thla 2 vel a pai laiin a pasal, mi ṭha tak emaw kan tih Zaia chuan ngaihzawng neiin chu a ngaihzawng lakah chuan sâwn a thlak ta tlat mai. Mak deuh chu a bialnu chu Zaia nuteii fanu, an ina awm, college zirlai niin, mihring hi kan lo mak mang e aw. Mami tan chuan tawrh a har ve bawk a niang e, thudik a hriat zan la lain Bawihteii nen an rawn haw a, a tukah pawh an rawn dîkdâk ta si lo nen, a tuk lehah bungrua an va la ta nghal chuk chuk a ni. Zaia pawh a inthiam lo, a zakin hrehawm a ti hle tih an sawi. Mahse, a bialnu khan a lo zêm hneh tawhin in khatah an chengho bawk si. Mami lah Bawihteii buaipui nen, raino bawk nen a duhkhawp a tling ta lo te pawh a niang e. Vanduai asiamin an inthen atanga kar 2naah Mami chu kan in chunga a puanpho a rawn chhuk leh lamah a tawlh thlu ta hlau mai a, a insawh na viau a niang, thi a put nasa ta mai a. Damdawi inah kan tlan chhohpui vat nain a nau pai kha a lo chhiat hman tawh a lo ni. A tlukna vang kha chu ni tho mah se; a dik adik chuan a rilru na kha thil a ei mumal lo em em a, chaw a ei ngai lo tihtheih a ni. Kha kha naupai tan chuan a lo tha lo nasa si a, Zaia te lam pawh kan hriattir ve tho a, a hnuah a bialnu a fa pai mek khan, “An inthen a, a fa pawh a titla” a lo ti kual a niawm e. Mami rilru na sa tawh, thinur lutuk kha kan hriat lohin a lo va kal a, an in chhungah a lo va kek hrep a niawm e. Zaia nu zawkin min rawn hrilh a, kan va tlan ta vat a, kan ṭhelh thei hram. Zaia nuteii te lamin FIR thehluh an sawi a, Zaia nuin a remti bau lo. “In zahpuiawmzia pawh mahni lo maha hrehawm tihpui tawh nâk alaiin engvangin nge khatiang dawt tea a puh ni, a chantawk a hmu a nih kha. Ka nau fanu a nih vang pawh ni loin mi pasal luahlan hreh lo hi ka ina awm atan pawh ka duh lo. A rang thei ang berin in dang rawh se” a lo ti hmiah mai a! Nu rilru dik leh hrisel tak niin ka hria. Thla tam a liam hmain nat lawkna em em pawh awm loin Zaia nu chu a boral ta mai a! Heart attack an tia..mahse, an veng chhung mi thenkhat chuan a thih danah rinhlelhawm a awm an ti tlat ! Police hnena report a awm miau loh avangin hmalak ngaihna awm hek lo. Tichuan, Zaia te nupa chuan in pui chu an luah zui ta a ni. Mami pawh a chunga thil thlengte pawm thiam chho ve zelin a rilru lak pen nan ka patea te schoolah a thawk ve ta bawk a. Bawihteii lah kan chhungkaw hlimna a lo ni bawk si. 

Zaia te erawh an dawr pawh an enkawl hleithei ta lo va, rin loh takin zu in a ching chho ve a, a farnu lah kha Zaia te nupa lakah thinrimin Aizawlah hnathawkin a awm a, zin pawh a lo zin ngai meuh lo a niawm e. Pa ber zu rui ta reng chu tuk zan ṭha pawh an nei hleithei lo va, a nupuia nu, Zaia nuteii mangangin a rawn awmpui thul te an tia, kan ngaihven vak loh pawh hian Mami bula rawn sawi duh tawk hi an awm ve zel nen. Nun hi a inthlak a inthlak ve a, chuvang chuan tumah hi na tawpkhawk te, beidawng lutuka insiam loh hram a tha. Kan damlai la la hian kan phutawk hremna hi kan dawng ve thin rêng a nia. Mami erawh mipa lam a ngaihsak zui ta reng reng lo va, pawi pawh kan ti hran lo. 

Hetiang hi a hringnun liam tawha thil thleng chu a ni a, tunah thihna kut vawtin a chelh mek chu a ni si a. A fanu avang chauh tal pawh hian a la dam hram hram hi a ngai asin mawle. Kimteii leh Bawihteii ka uap an ngai si, Ka pa lah engtik thleng nge a va châm dawn sawi theih a ni lo va. Ka ni nen kan inbiak chuan, “Amah pawh kan hrilh ta tawp a, mahse, Tea, ka rin loh lutukin Mami hian a dawngsawng thiam a, ‘a rukin ka lo inring deuh tawh alawm. ‘ a tia, Bawihteii a ngaihtuah vang erawh chuan a nâ tih hai rual a ni lo. “ A rawn ti a, a insut leh hraih thin. Ka ni phei hi chuan a tuar thiam lo viau ang, a vahnu, a thian, khawi kipa a inzuitir theih kha a nia. An pahnih inkarah hian ka nu leh pate hriat ve chi si loh thurûk hi a kuh ṭun maithei. 

“Chuan, engtin nge in lama inenkawl te chu in sawi leh em?” Ka tih chuan, “Doctor te pawn an hrethiam viau a, i nu hi lawm, phai lam a la beisei ṭâng ṭâng a, ka hrethiam tho a, mahse, kan inphur hlum emaw phaiah a tu amah awm mumal loin kan inliamtir mai ang tih te hi ka hlau a,. Amah Mami hi han be râwn ve ila, a thutlukna azir te pawh a niang chu.” A rawn ti a. 

“Ni e, Bawihteii pawh a hmu châk dawn asin” ka ti thâm ṭuak a. Lanpuii nen kan chungchang min zawt ta daih a, boruak dangin min chim nen, Lanpuii nen pawh kan la inkawm mumal thei lo a nih hi. 

Zanah ka va leng a, Mampuia a lo ṭap fuih fuih chu niin, “Ngati nge” ka ti hû a. “Thu a awih lo va ka hrem a nih kha” A nu chuan a lo ti hmak a. 

“Ngati nge Mampui, thu i awih lo em ni?” Ka tih chuan, a bu nghut nghut roh a, ka nuih a za deuh hle. “School ka kal duh tawh lo a ti ziah a, tunkar chhung khan zing tin kan innawr a ni ringawt. A chhan ka zawh lahin, ‘Ka peih lo alawm’ a ti ringawt a. Ka hrem a nih kha.” A nu chuan a ti leh hlak hlak a. 

“Mampui, school i kal that a ngai alawm, a nih loh chuan i fail dawn asin,.” Tiin a lu-ah ka chul zauh a. Mateii nen pindana an inluhpui hnuah, “School nuam a tih loh chhan hriat a ngai a nih chu, an zirtirtu bakah a thian kawm ve thinte kawm la, chuti ringawta school kal hreh ngawt thu a awm lo.” ka ti a. 

“ Chu chu kei pawh ka rilru a nia, naktukah keimah ngeiin hruai pahin ka zawt chiang ang ka lo tia”.a tih chuan ka finkhalh ta chuang lo tih ka hre thei. 

“Khaw nge Sailova” ka tih chuan, a nui sak a. “Bialnu thar deuh reuh a nei ve a, a va rim a niang. Electric veng a mi a tia,. Engtia lo inhre ve nge maw an nih dawn ni..” a ti a. “Lal Mimi nen ka tihpui ang ka lo tia sin mawle..” ka ti nuah nuah a. 

“Awii, Mimi te chu bialpa nei chi pawh a ni mi? Amah hi a pa thûng sia,.mipa lam a ngaihsak loh hmel em mai” a ti hluai a. A sawi dik reng, kan Mimi ve hian bialpa a neih awm ka la hre lo reng reng tak alawm. Mami chungchang pawh sawi loin thil dang kan sawi a, ka rilru hrehawm leh ipik pawh a kiang deuh huaiin ka hria. Sailova rawn haw ka nghak pah deuh a nia, a rei ta phian sia, Kimteii te ka ngaihtuah ve bawk nen, ka hawsan ta a. 

Ka muhil thei lo ka inleh sek laiin ka phone a rawn ri phut a, ka hlauthawng titih hman alawm le. Zing dar 2 a ri lek lek tawh si a ! Ka rin loh lutukin Rinzuali a lo ni daih mai. Kan inbiak lohna a rei tak êm avangin a number ka lo la save tih pawh ka hre lo hial tawh kha a nia. Lak loh ka tum zet a, chutiang hun tawhah chuan a pawimawh a niang tiin ka la ta nge nge a, “Te, in in chhak waiting shed-ah khan ka awm, khawngaihin min lo hruai teh, ka haw ngam tawh lo. Please” a rawn ti leh ta. Ka ner nawk mai. 

“Inah ka awm lo” tiin phone ka dah hmak. A rawn call leh pawn ka ûksak duh ta lo va, mi mah rilru haha mangan nak alaiin, he nu hi a â tawh a ni ngei ang. 20 minutes hnu velah kan door bell chu a rawn ri ta tlang tlang mai. Thawm kan neih lawk si loh vang nge kawngka chu a rawn chum leh dawt dawt a, ka insehruh nasa tawh mai. Pindan ka chhuak chiah tihin Kimteii pawh a rawn chhuak ve zat a, a hlauhthawn hmel kher mai. “Tu nge le” a ti khur dat a. “Ka’n hawng ang e” tiin kawngka chu ka va hawnsak a, ka rin ang ngeiin Rinzuali, ka bialnu hlui chu kawisawi zet hian a lo ding ran mai..!