Hmeithai 12

HMEITHAI (12)

Ziaktu : Toni Râlte

“Tachhip daiah a ruang an chhar..a rapthlak ka ti lutuk, Te, tiang êm hi chu ka ring lo asin” tiin a rawn ṭap hawk a, a intipachang thei bik lo a ni ngei ang, ni e, kei pawh min ṭhâwng lutuk, ka la awih hleithei lo hial. “Tu ten nge a ruang hmu?” Rinhlelhnaa la khat chung hian ka ti a. 

“Tachhîp khaw mi te an nia, tlangval pahnih an zing exer la kha pakhat zung tura kawngsir va pan khan a va hmu ta mai a niawm e. A mak daih daih tiraw? “ A rawn ti hlawp hlawp a. Mateii chu ka va lainat reuh tak êm. “Chuan, police- ten a ruang chu an la tawh em? Mateii ngei a ni tih engtin nge in hriat?” Ka han ti leh zung zung a. 

“Aw police an call nghal a, zing dar 5 vel a nia, police lamin lain Sailova nen Mateii a nih leh nih loh finfiah turin min rawn ko a, a ruang chu a lo chhe ve deuh tawh naa, a hmelhmai bakah a thawmhnaw hak atang khan Mateii ngei a ni tih ka chiang a ni. Tunah hian postmortem turin an buatsaih mek” tlema felfai deuh hian a rawn ti a. Thawm ri nak nak a awm rih nen, “Nakinah kan awm zel dan tur ka rawn hrilh ang che. Khalama kan lak phei a ngaih hmel sia, kan in vel pawh nangin ruahmanna i lo siam mai loh chuan. Ka rawn be leh vat ang che, hei kan han sawiho lawk ang e” a ti sawk sawk a. Kan dah zui ta rih. Rilru nuam lo leh hrehawm deuhin ka va chhuak a, ka nu chuan ka hmelhmai aṭangin a lo hrethiam nghal nge ni, “I tho fuh vak na nge?” A ti var a. Engmah zep si se a ngai hran lo bawk a, Mateii chungchang chu ka sawi ta vek a, an chek tlak tlak mai. Patling tih takah ka pa chuan, “Chuti chu, a ruang he lama lak phei a ngai dawn si a, Tebawih, nang pawh dawr hawng lovin an in lamah lo va uap deuh la a va ṭha âwm ve. “ A ti charh charh a. Lanpuii te in luah neitute hi Electric vengah daih an awm a, Lanpuii chuan a hrilh tawh tho chu ka ring a, Mampuia damloh lai aṭang khan an in chabi spare hi min kawltir tawh a, ka la kawl ta zel a nih hi. “Chawhma tal te chu va inhawng rawh se, an ni lam pawn he ta vui an ti lo ve thei a, chutia ruang a chhiat tawh phei chuan.” Ka nu chuan a lo ti a. 

“Nia, postmortem nen, a la rei ve ang, amah Lanpuii’n chanchin min rawn hrilh leh phawt se la..” ka lo ti ve a, a engah hmaa an in lo singsak pawh kha mi hrang kan lo ni rih bawk nen, nuam ka ti chiah lo a ni. Rilruah thil dang a lut hleithei lo bawk nen, ka ṭawng tlem kher mai. 

Lanpuii ka ngaichâng bawk a, ka la insiam duh lo. Beisei ang ngeiin min rawn call a,. “An la zo fel lo va, Ka nî te hi chuan ruang a chhe tawh nen, khalama rawn pheipui loin he lamah vawiinah vui nghal ni se, thlan pawh ram ruak kan lei mai ang te an tia, ka rilru a buai, kha lama rawn pheipui ka duh ve tho si. He tah hmelhriat loh zinga han vui leh phum ngawt kha chu amah pawh hian a hreh vein ka ring. Engtin nge niang? “ A rawn ti mawlh mawlh a. Amah aiin naupang mah ila, hetiang thil serious -ah chuan mipa ka nih ang hian min rawn ve tlat zel, hei tak hi a nia Lanpuii tizahawm zualtu chu.

Kei pawn a rilru hrethiam takin, “He lam i hrilh hre tawh hrim hrim em?” Ka han ti tê tê a, a hrilh tawh thu a rawn sawi chuan, “Engpawhnise, postmortem zo se, rawn pheipui nghal u la, he lamah YMA leh Kohhran lam pawh an inrâwn ang a, vui hun te pawh an titlai thei alawm, thlan an lo lai lâwk ang a,.lumen em em kha chu a rem ta lo a nih paw’n vui chhung a rei hleinem, he lamah Kohhranah pawh a theih ang tawkin a inhmang ve a, thiante pawh a nei ve a, thlahte pawh an duh ve ang chu.” Ka ti ta duah a. Ka rilru dik tak ni miau hek. Mateii tan ngat phei chuan Sailova te hi a engmah an ni tlat lo, Lanpuii avanga chhungkhat anga inzawm chauh an nia, a luahlum tawh sa in a awm ve reng a, helamah chhiatni fund pawh pe vekin, Kohhranah a hming ziah luh a ni bawk. Saw lai an va zinna hmuna vui leh phum kha ka remti hleithei chiah lo a ni. Tin, Lanpuii nufa pawh rawn haw tawh se ka duh, ka hlauthawng vek tawh. 

“Nia, chu chu kei pawh ka rilru a nia, kan YMA secy leh Kohhran chairman te kha ka be ve ve tawh a, ka thutlukna kha an ngaichâng ve a, a nih chuan i sawi ang chuan ka va hrilh ang e aw. Chuan, Helicopter-in rawn phei kan tum mai ang, lumen a nih loh rau rau chuan reilotê tal pawh in-a a ruang nghah kha ka duhthusam a nia” a rawn ti a. Kan dah leh ta rih, ka pate bulah pawh ka sawi nghal a, hetiang a nih dawn chuan tiin rem kan ruat zung zung a, Lanpuii in lamah Mama leh ka pa te bakah ka nî te nen kan va phei ve a, a in neitute a be fel vek tawh a, an lo awm der tawh. An in a lian lem lo a, han singsak vak dan kha an lo hre chiah lo va. Ṭhenawm hnai leh a hre hmasa apiangte an rawn lang nghal zut zut a, a theih ang angin in pawh chu kan singsa ta a, Lanpuii in luahna te bakah an in chhehvel ami te hi chuan kan inngaizawng tih an hre vek bawk a, la innei lo mah ila, engkimah chuan min râwn titih a, a nawm loh rualin mawhphurhna a ni bawk a, engtin tin emaw chuan kan insawi kaw ve zel mai e. A rawn sawi ang khan postmortem an zo a, A ni te veng YMA lamin kuang an lo siamsak thlap a, hunserh reivak lo te an hman leh tê tê hnuin an rawn inphur phei ta a. Keini lam pawh a thei thei hmuak turin kan insingsa a, hetianga chhiat an han tawh chiah hian Lanpuii baihvai leh a chhungkaw mi leh sa tak tak in lo nghaka in lengte lo huikhawm tur mumal a nei lo hian min tina zual. Lateii te chhungkua an rawn phei thei ta hlauh a, Lateii ber chuan nu chan a rawn chang ta hlauh zawk a,. Nu leh pa bakah chhungkaw hlutzia ka hriatfiah phah hle. Lanpuii zawng vanlaia tla ang kha a ni miau a, tunah a pa lama a chhungte nen an inhmu chhuak chauh a, tihian a nau em em, thisen inzawm ni lo chunga a hmangaih tak tak Mateii’n a kalsan leh ta si. Tunah chuan a fapa bak neih a nei lo a ni ber, kei nen lo innei hman ila chuan a zia tak te pawh a la awm tur. 

Mateii thih dan chuan Zoram a deng chhuak nghal bawk a, a bo satliah a ni tawh lo va, tualthi a nih ngei a rinawm ta si. Chu chuan mi rilru a hneh te pawh a niang e, Lunglei veng hrang hrang atangin thalai tlawmngai tak tak paw’n an rawn ṭawiawm tha hle, a thlan lai pawh an tam viau a niang, sawi hat a tling a ni. Ruang a rawn thleng a, Kohhran lama a rawngbawlpui, a thian tleirawlho an ṭap nasa hle, a thih dan a runthlak bawk a, mi lainat a hlawh takzet a ni. Lanpuii erawh a ṭapin a sûn nasa tawh te pawh a niang, puitling takin engkim a ruahman zung zung a, thu a han sawite pawh a fiah fai hle. Tlai lam dar 4 velah kan inphum fel thei hram a, thlanmual lama zuitu pawh an ṭhahnem phian mai. 

Kei leh Johna bakah Lateii pasal te nen pa chan kan chang ho a, Sailova te chhungkua erawhin Lanpuii an ṭawiawm a ngai a, Lanpuii ni pawh a felin kei pawh min be bawrh bawrh, a hmel pawh a ṭha hle. Chutiang chuan Mateii thih sarhu lai chu kei pawh inah pawh ka awm tam lutuk thei lo va, ka chhungte pawn eng vak an sawi lo, ka nu lakah ka inthlahrung deuh tih a ni mai. Ani pawh ka pain a khap rih nge ka tana hriat nuam lo tur a sawi lem lo. Mami thihcham erawh inah ka awm a, Lanpuii pawh in leng awm tam loh lai chuhin a rawn lang ve hram, ka nu hnenah râlna pawh a hlan thlap. “In chhiat tawhah pawh kan rawn lang ve hleithei si lo va, Tebawiha hi kan ring ta deuh a ni ber mai. “ Ka nu chuan a lo ti luam a, “Seni leh Tetea an rawn lang thei a, a lawmawm lutuk, keimah zawk hi Mami vuinaah pawh ka rawn tel ve thei ta si lo va, pawi ka ti lutuk. “ Lanpuii chuan a ti ve bawk a. Tiang chuan chhungril lama inhal ru tho si, pawnlama mite hmuha mawihnai taka inbe siin an inkawm a, kei awmhmunah ka lo hah ṭûn thung. ka nu rilru ka hria a, Lanpuii’n a hre bawk. Lanpui’n ka nu rilru a hre tawh tih ka nuin a la hre lo maithei zawk a, chu chuan boruak alh hluai tur pawh a tikiang deuh a ni maithei. 

Zaia a rawn lang ve hlawl mai a! Ka pa meuh paw’n mak a ti deuh a niang, a lo melh hû hû mai. Ka nu chuan a lo be ve vat a, ani pawn mak chu a ti a ni. A chhan chu Mami nen an inṭhen hnu aṭang khan Zaia hi kan hmu ngai lo mai pawh ni lovin a fanu pawh hi a rawn ngaihven ngai eih lo a tin ni. “A thih ni khan rawn kal ka tum a, mahse, ka fapa a damlo leh ta sia, nimin khan damdawi in atangin kan chhuak ve chiah a ni. Mami chu a pawi khawp mai.” A ti ve luam a, zu a la in a niang, a hmelhmaiah a lang deuh. Mahse, a in nasa lutuk lo thung ang. “Khaw nge in awm tak? “ Ka nu chuan a ti ta phawng a. Nia, a nu boral hnu aṭang khan , Lunglei khawpui a zau loh tehlul nen kan inhmuh ngai loh bakah chanchin kan inhre lo êm a ni. 

“Nia, Thenzâwlah kan phei ta daih alawm, khawsak pawh a ziaawm zawk kan tia. “ Inthlahrun hmel lek lek hian a ti a, a hawi kual vel danah a fanu a zawng ru tih ka hria, Bawihteii erawh Mama te in lamah a chhuk rih thung a. “In inpui kha tuin nge luah ta? In dawr te?” Ka nu lah hi a dilchhut si, a â tak tak a ni. Zaia tan sawi a nuam bik nang. A aw a thian kharh a, “Âa, kan tiral ta mai a nih kha, kan unauin kan insem hlawm a, dawr kha chu ka nau kutah kan han dah ren rawn a, mahse, ka nau a boral leh ta bawk nen, kan hralh leh a, chumi hmang chuan Thenzawlah chuan bul ka ṭan ve a, insakna bungrua tho a nia. Mahse, rin aiin kan hlâwk vak lo nen, kan nu khan mipa dang min umsan leh ta bawk sia, ka fate pahnih nen kan khawsa ve naw naw a, nikum mai khan nupui ka nei ve leh a, hei tunah rih chuan a fel khawp a, kan dinhmun pawh rin ai takin a zia chho ve zel e.” A ti ta mawlh mawlh a. A lo ni maw? Zaia pawh a kawng a lo tluang bik lo hle mai. Ka pa chuan, “A lo nih ve bawk chu mawle, a zia lo hle mai. “ A lo ti a. Sawi tur a vâng ve bawk a ni. Bawihteii an zu ko a, ka û leh ka nu ten thiam takin a pa a nih thu an han hrilh phawt a, Bawihteii’n nikhua a hriat hnua a pa a vawikhat hmuhna a ni. Zaia pawh a ni tho ang chu,. An hamhaih dun hle nain, a pa zawk na na na chuan, “Bawihte, i dam em? Lo kal teh” tiin a kutah a va chelhsak a, Bawihteii lah a fing fel chi a ni bawk a, “Aw dam e, apa, in dam zawk em?” A ti ta reuh a, kan lo thaw huai mai. Tiang chuan Zaia te pafa chu an inkawm thei ta viau a, chaw eiah kan sâwm nghal a, chhungkhat te nen kan ei tlâng ta hlawm a, Zaia pawn kan lo dawnsawn danah vuina tur a hriat ka ring bik lo. 

Mateii postmortem result kha in hriat châk a rinawm. A dul veilama vihna chu a thih chhan ber a ni a, a hliam a thuk hle. Chumai bakah a lu-ah vawitam chhutna hnuhmâ a awm bawk a, a lu ruh a keh chiang hle. A hmaiah hliam a nei nual bawk a, hnek leh hamna hnuhma a ni awm e. Pawngsual erawh a ni lo ! A serh erawh sawisak a ni a, a thih tawh hnua suasam a nih hmel. Hetiang thil titu hi a nunrâwn piah lamah mihringpui zahna nei lo, rilru lama chian lohna nei a ni hial maithei a ni. Police lamin nasa takin an chhui a, Sailova te pawh biaka koh reng an ngaih vangin Mateii thihcham pawh nghak thleng loin an haw phei tawh a ni. Lanpuii pawh an rawn be khât tawk reng a, Mampuia vangin a phei thei tawh si lo. Bakah ka remti chiah tawh lo. Ka hlauthawng a ni ber e. Social media lamah pawh Mateii râwng taka thattu chhui chhuak ngei tura police nawrna a nasa viau, A thih sarhu laia chhungkaw aiawha thu a sawi khan Lanpuii hian a nau tak tak angin a sawi mai zel a, “Zeldin thu a tam mai mai, bakah buaina dang a awm palh ang” ka bulah chuan a ti mai a. 

Zan khat chu mi an rem tawh bawk a, hun thawl kan nei khât ta bawk nen, ka leng rei ve ta deuh a, Mampuia pawh a muhil tawh. Han inkuaha han infawh vâwng vâwngte chu duhthawh a awl viau. mahse, khalam kha ka rilruah a lut tak tak thei lo, engin nge min mawlh pawh ka hre lo, Mateii nen an intawn chhoh dan hriat ka châk ta tlat a, nidangah pawh ka zawt ngai lo kha a nia, ka hre chak ngang a niang, ka zawt ta râwih a. 

A chil a lem khalh a, chhuat lam thlir vang vangin, “Mi vanduai tak kha a ni ve a, keimah ang bawka fahrah, baihvai kha a nia” a han ti phawt a, a heh a peh fan fan danah a lung a chhe deuh niin ka hria, a samah ka chul a, “Sawi a harsat viau chuan ka nawrlui lo che nia” ka han ti leh hnuhnawh a. Min rawn melh zawkin, “Harsa lo ve, ka ngaiin ka khawngaih êm a, chuvang a nih kha” a ti khur dat a. 

A kut ṭang elh neuh neuh chungin tihian Mateii nen an inchhar chhoh dan chu a sawi ta a. 

“Home-a ka thawh hma, ka indan tawh hnu si, keima tawka ka buai em em lai kha a nia, Ka sumdawnpui thin ka thian pakhat hian thawmhnaw lam ringawt lo deuh, chawhmeh eng ilo vel te hi thawmhnaw kawl tho si hian ti ve ang hmiang a tih avangin Tlabung lamah chawhmeh khar turin kan kal a. Mampuia hi midang kuta ka dah hreh vangin buai viau dawn mah ila tiin ka hruai ve nghe nghe. Kawngte a tha tawh tho bawk a, lehlan tum kha kan nia, ka thiani chuan a hmelhriatte a lo be sa tho nen. Tlabung kan thlen chuan amah khan a buaipui ta deuh vek a, kei chinchâng hre vak lo ta chu ka lo hawi ve mai mai a ni ber. Ril a ṭam tawh vangin thingpui in-in kan inhnawhpuar a, “Saw lai lawkah sawn ka thian hlui te an awm a, ka va tlawh lawk ang e, ka rei lovang” tiin Thiani chuan min kalsan a. Mampuia a muhil rih a, darkar khat hnuah pawh Thiani chu a rawn lang thei ta reng reng si lo, ka call tlang thei der bawk si lo, hawn a hun tawh si, mahse, kan hawna tur sumo driver pawh kha ama hmelhriat sa a nia, chuvangin a inkalpuitir aniang tiin ka inhnem a, dar 4 a ri dawn ta, ka mangang ṭan ta deuh. Kan thil eina dawra thawk tleirâwltê chuan ka hmel danglam chu hrethiamin thil awmzia min zawt ta reuh a, kan chanchin ka han sawi chuan kan sumo hawnna tur hming min zawt a, ka han sawi nâk chuan, ‘E! Ka u, an haw daih tawh. Ih, zu tam deuh an phur thin a, duty awm loh lai an châng thin, dar 2 velah khan an haw tawh alawm.” A ti ta a nih chu! Ka han awih lo ngawt dawn a, a dawr neitunu chuan dâwt a nih loh thu leh an dawr piah mai kawng peng aṭang chuan duty pumpelh nan an hawn thin thu a sawi bawk si, mak hi ka ti lutuk a, ka thianuin chutianga min phatsan mai chu awih harsa ka ti takzet. 

Sumo driver number chu an lo nei hlauh a, ka call ta nghal a. “Hei, Hauruang kan thleng ṭêp tawh, i thiannu hi a chatthla daih a! Engtia tih chi nge ka hre lo. Nangte chu a riak dawn a ti che sia” a la rawn ti zui! Mak ka va han ti tak. Ka thiani chu zu han lem ve thei mai a nia, a chatthla a ti pawh chu ka ringhlel lo, mahse, awlsam lutuka chutiang a han ti thei chu mak ka ti tâwp thei lo. Bakah zu a lo phur ru tih ka hre hauh lo bawk, kan chawhmeh leh bungraw eng emaw kan lak zawng zawng an phur bawk si. Hawna tur motor dang a la awm tak mialin tiin ka han châng a, a vâng nasa mai si. 

Hotel han riahna mai tur a awm leh awm loh ka zawt a,, zan khat na na na chu dawr neitunu chuan min mikhual theih tur thu a sawi ta hlauh mai. Ka va lâwm tak. Mampuia a rawn harh a, ka buaipui lai takin nupa niawm tak, ruih hmel deuhte hi dawrah chuan an rawn lut ve a, nu zawk chuan tleirawltê bulah khan, “Khawi pawisa” a ti vin tuarh a, tleirawl khan, “Hlawh min la pe lo va” a ti dêk dêk a, pa zawk chuan a chhip sama ṭhâm pahin, “Dawhehnu, rawn la vat rawh, nimina i hlawh pawh min la pe lo” a ti pawr hlur a. Dawra chawl ve dang an awm lo hlauh, dawr nghaktu kha rawn kalin, “Kha kha, vawiin a hlawh ka la pe lo a nih kha. Chhuak vat r’u..” tiin pawisa a pe a, nu zawk chuan tleirawl chu en lehin, “Eirawng lo bawl peih vek ang che. I naute pawh kha lo bual fai la,. I hria maw?” Tiin an inzui chhuak ta a. Mak ka lo ti ru viau, ka pahrawnin min tihduhdah lai hun ka hrechhuak uar uar mai. Tleirâwlte mittui parawl kiang chu kalsan thei ngang lovin, “Mami, i nu leh pate em ni?” Ka ti ta tawp a, chairah thu hnawkin, “Aw.. Ih, ka u, an sual thei lutuk a.” Tiin a hmai a hup a, a ṭap titih. Dawr nghaktu kha rawn ṭawng chhuak vein, chu tleirawl chanchin chu a sawi ta a. “A nu fabik kha a nia, kum 4 vel a nihin a pa hi lung an hâlnaah lungin a delh hlum a, chuan, a nu khan tuna a rawn kalpui kha pasal atan a nei leh a, a pasal kha misual, zu ngawlvei, thatchhe bawk si, kutram bawk si a nia. A hmain a nu khan zu pawh a in ngai bik lo, mahse, an pa khan a tikhaw lo vek tawh a nih kha, tikhan a changin zu an zuar a, mahse, an in duh tlat avangin an hlep tur pawh an in zo zel si. Hna an thawk peih bawk si lo, tihian, ani hi school pawh kaltir mumal thei loin a rem remah hna an thawhtir a, a hlawh pawh zu in nan an tlak ral zel a,. A lainatawm a nia, keipawn ka khawngaih êm vang hian kan inah vawi 2 chu ka awmtir tawh. Mahse, an rawn la chhuak leh zel a, a nu a hringtu ngei phalna tel lo chuan ka kawl ngawt thei bik si lo. Kan khawsak a lo nuam em em bik si lo va, tihian ka dawrah hian a rawn inhlawh ve a, mahse, kha i hmuh ang khan a hlawh pawh kartawpa inpek chu sawi loh nitin deuhthaw an rawn lam ziah a, ngaiah kan nei deuh tawh a nih hi. Tihngaihna tak pawh kan hre tawh lo, kut an thlaka an sawisak vangin police lamah pawh kan zualko tawh, mahse, a pahrawn û kha police a lo ni ve sia, a hum zel bawk si..” tiin. 

Chu tleirâwltê chu amah Mateii hi a ni. Kan inhmuh tirh te chuan tleirawl dang bil bel, cher zawr ve tak a nia, a mitmeng pawh a dulin a hlim lo tih kha a hriat ngawih ngawih. Chutia a chanchin ka han hre ta chu ka dinhmun nen a inan êm vangin lainatnain ka khat a, puih ngei ka duh ta tlat a ni. Tichuan, han inngaihtuah em em pawh nei loin rem ka ruat ta zung zung a, a chhungten an duh hun huna an hruai leh zung zung theih lohna hmuna hruai bo daih chu a tan tha ber turah ka ngai. Dawr neitu Pi Rini te nen ro kan rêl ta hmiah a, pi Rini lahin a lo khawngaih ve eltiang bawk si. Mateii paw’n kal bo daih chu a lo duh lutuk a, amah maiin tihdan a lo hre bik lo a, tin, kum a la tlin loh vangin Ram danga inhlawh tur pawn a la theih loh bawk nen. Tihian zanin chu an inah riak se, a bungraw neih ang angte a rukin siam fel vek se, zingkarah dawra a kal a ngaih tho avangin an ringhlel dawn lo va, tichuan, zing sumo-ah ka bula awm turin ka hruai daih dawn a ni. Mateii chu ka bula awm a hreh paw’n Aizawl lam emaw Lungleia milian deuhte bula awmtir dan ka dappui mai ang ka ti a, Pi Rini paw’n ṭha min tihpui hle. “Mate, chawl tur vak an awm tawh chuang lo, vawiin chu inkhar hma mai ang, nang pawh han haw la,i tihtur ang ang han ti fel vek la, rinhlelh tur khan awm miah suh” Tiin a fuih sauh sauh a. Dawr chu kharin Pi Rini te in lamah keini pawh kan phei ta a. Mateii khawngaihthlakzia leh a fel reuhzia te hlir a sawi a,an chhungkua pawh an pangngaiin an pa pawh a fel duam duam khawp mai. Kei erawh ka helhhawlh deuh nge ni ka mu ṭha vak lo, Ka thiani te lah an reh vang vang si a, lehlamah bungraw lak nan khan ka pawisa ka hmang tam vak lo va, ka hman chhun chhun erawh min pek let ngei erawh a ngai dawn a ni. Kan sawi ang khan Mateii pawh rambo polythene- a a neih ang ang rawn fun ṭâtin a rawn kal zîng ngang mai. Pi Rini dawr kawtah sumo chuan min rawn lam a, Tlabung chu kan chhuahsan ta a ni. Mateii chuan, “Lehkha ka hnutchhiah a, ka tlanbo daih thu ka sawi hmiah” a ti a. Pawi ka ti lem lo, an rawn zawng ang a, kan buai vak ang em tih erawh ka ngaihtuah ve tho, mahse, ka thiltihah chuan inchhir ka tum bik hauh lo. Ka dinhmun hrehawm tak anga dintir kha ka khawngaih êm a tin ni. 

Mateii chuan hmun danga awm a duh ta tlat lo va, “I bula awm ka duh, inhlawhna te ka zawng ve ang a, Mampuia ka awm ve thei bawk ang a, midang bulah chuan min awmtir lo hram rawh” tiin min ngen ngawih ngawih a. Kei pawn midang bula han awmtir chu ka tum vak lo, ka phar buai ve thei si a, in lama Mampuia lo enkawl tur ringawt pawh ka thlahlel a ni. Tiang chuan kan bulah a khawsa ve ta kha a nia, a che felin eirawngbawl a thiam reuh bawk si, tikhan Home lamah hna ka hmu zui ta bawk nen, tikhan in an lo nghak a, ka tan chuan hlu tak a ni. Ka thiani pawh khan ka pawisa min pe leh vek a, ngaihdam min dil nasa ngang mai, inhrethiam takin kan inthlah a, kan sumdawng zui ta lo thung. Mateii nu leh pate pawh an lo buai ve tho a niang, A lehkha hnutchhiah kha chu engah teh vak an ngai lo va, Mi bo anga chhuahin an lo inzawng kual nasa, police te hial an pun a. Mahse, Pi Rini khan huaisen chhuahin, “A hma pawn in atanga chhuaha hmun danga kal hi a tum fo alawm, ka hriatpuina ngeiin a tlanbo, dan pawh ka tum, mahse, ka hmuh loh karin motor a lo phar aniang, a lo relhru daih a, zawng buai duh lo mai rawh u. Hmun dangah hahdam deuh zawka inhlawhna tur a hmu tawh ang,.” A lo ti ve hmiah a, a nu leh pate tan chuan an sum bâwm ber a nih avangin a thinrimthlak viau maithei a, mahse, an tuhrah an seng a ni mai. Tunlaiah nuhrawn, pahrawn an sual vak tawh lo nen, a nu kha ka dem zual khawp mai. Aa..ka nunhlui min hriatchhuahtirtu a nih vang hian ka sawi tam duh ngai lo. Fahrah dinhmuna dingte bakin thinlung takin min hriatthiampui ngai dawn chuang lo. Mateii kha ka tan a hlu a, ka hmangaih a, ka laizâwn ang te, ka fanu ang ten ka en ka ti mai, a hmun ruak hi a zau dawn khawp mai. “ Tiin. A dang a ro deuh a niang, tui a in a, kei chu ka ngawi reng, Mateii ka lainat lehzual. Han nula chhoin pasal tha takte nei ve se, a tunhma hun hrehawm takte theihnghilhin tihte ka ngaihtuah a, ani pawisawilo lutuk nunna laksak duh mihring hi rek chhuak vat se, ka kut ngeia sawisak hi ka châk a ni. Mahse, Mizoram-ah hian case zuzi hi a tam ta viau mai, hetiang lam ngaihtuah chuan, Rev. Chanchinmawia te, Zonuam naute case te, Lunglei nula Zualbawihi case leh Mamit naupang chungchang te kha rilruah hian a rawn lang thar uai uai thin. Lusun chhungte tan hian a va na dawn tak êm aw,. A tu hi nge dem tur ber pawh ka hre zozai tawh lo ve. Lehlamah hmanni maia Mualṭhuam tleirâwl Dindini tualthihna case pawh an chhui chhuak thei chu a nia, zoram mipuiten kan ngaihven bawk a, kan Police chhuanvawrte paw’n ṭan an la sauh sauh turah ngai ang. Mipui hian kan thlâwp ṭhat a ngai viau, Journalist huaisen tak kan mamawh bawk niin a lang. Pu Vana bak hi rintlak sawi fak tur an vâng hle a ni. 

In lamah pawh ka nu vangin boruak a nuam lo deuh thin, keimah ngawt hi mi kher ka ti mai. Kei lahin luhlul ka chhuah ve tlat si. Rilru a chawl lo a ni ber e, ka nî erawh ka tan a la ding zel a, ka lâwm thin. Sawi hmaih loh tur chu Rinzuali kha a chhungte lam pawh an mangang ve ta a niang, Chhawmdawlna in Meltê-ah an han dah ta nge nge a niawm e, Johna min hrilh a nia, a tan a ṭha turah ka ngai. A khawngaihthlak, a nun kha a ning ve tih a lang reng si, ruihhlo hian natna a chhâwk lo va, a tibelhchhah sauh zawk si. Kei pawh zu ka in lohna a rei ta viau, ka va fel leh pianthar vang pawh ni loin ka û thih boruak nen, in châkna ka nei hran lo bawk a, ka nghei thei rih hi ka lâwm viau. Chhungte bulah pawh hmai a uang ve deuh e. 

Mampuia pawh an zirtirtu ten an lo ngaihven tha bawk a niang, school pawh ṭha takin a kal ve thei ta a, Mateii awm ta lo erawh chuan an chhungkaw nun a tibuai ta deuh,. Lanpuii chuan a hna aṭanga chawlh mai te a han rilruk thut thut thin a, mahse, pawisa mamawh a na ve tho si. Awmpui han la ringawt dawn se, Mateii anga rintlak leh rinawm an nih loh a hlauhawm si. Rilru buai taka a inngaihtuah fê hnuah, a hna chu bansana sumdawnna lam bawk hawi a tum ta a ni. A pasal ka la nih miau loh avangin ka tan an khawsak dan tur lo sawi ve zuah zuah chi a ni si lo,. Mampuia tal hi han lian tawhin a school kal hruai ngai ni tawh lo se chu a tihdan a awm tur. A la nau ve deuh si. “Ka fapa hi ka uap a ngai.” Tiin rilru tlang takin a hna chu ui tak chung siin a chawlhsan ta a. Bulṭanna tur sum tlem azawng chu a la kawl ve a, an in chhak lawk kawngpui ân-ah dawr chu a hawng ve ta rup mai, a vanneihna em em chu a dawr luah hi a thenawmte ta a nia, luah man pawh midang aiin an tihtlawmsak a, pheikhawk dawr aṭangin bul a ṭan chho a,. Aizawl lama a thian hlui a sumdawnpui te zarah midang aiin a zuar tlawm thei a, chu chuan kawngro a la su viau ang. Hetia a dawr vel a buaipui chhung hi chuan kan inhmu tam thei lo, kei lah dawr lama ṭhahnemngaih hunlai a ni bawk si. Kan inngaihsak hman meuh lo. Mateii case pawh a la kal reng a, chanchin tharlam a la awm hleithei lo, thla a tling dawn ta hial chu a nia! A mak khawp mai. Nge a mak lo zawk ka hrethiam tawh bik lo. A thattu hi a fimkhur hle a nih a rinawm. Ka rilru kam bertu leh ka ngaihtuah zui fo erawh Sailova te in aṭanga a chhuak ringawt kha a ni. Engtin tak thlem chhuak ang maw? Nge in aṭang khan a chhuak lo zawk? He lai tak hian a ni ka rilru tibuai thin ni. 

“Tebawih, naktuk tuk leha Kimteii û te an inkutsuih ve dawn a, naktuk chawhnuah in pahnihin in va kal ve ang a, sunday te pawh va hmanpui ve law law u la, Thawhṭanah in lo haw ang a, he lam atangin midangin kan ṭâwiawm thei si lo va. I tan pawh boruak thar hip pah a ni mai.” Zanriah ei laiin ka nu chuan a ti malh malh a. Teh thut chuan a! “In va sawi har ve” ka ti ringawt a. “Amah Kimteii lawm a lo inthlahrung a, a â tak tak a ni. “ Ka nu pawh chuan a ti ve mai a. 

“U Tete, i hreh chuan sumo pawh a awm tho a nia. “ Kimteii chuan a lo ti a, ka pain, “Motor kan kawl ve reng a, sumo tih vel a ngai lo, va kal rawh u. Zin khawthawn te hi kan mamawh a nia,. Huan lam ngaihtuah lo ila chuan kei pawh kal ka duh a nia “ a lo ti ve chhut chhut a. “Johna ka sawm ve ang, a châk ngawt ang” ka lo ti vut. Ka nu chu a ang zuau a, mahse, a ngawi leh daih. Kimteii u te hi kumtir lam khan an inru ve tawh a, mahse, eng eng emaw thil a vangin an inneih hun tur hi an bei hla angreng a, dan hnihna tur a nia, ka pa te paw’n an pui ve leh viauin ka ring. Tun laiah dantê / dan hnihna kan tih pawh hi kan rual awh vang nge kan intihhmuh ka hre lo, pui taka tih ve zel hi kan tum fur tawh a. Ruaiṭheh ngei ngei tur emaw ti tlat te kan la awm, tlin lo chung chung hi chuan tih hautak loh ngamte pawh hi kan intihhmuh a hun ta viau. Inneih ropui viau hi inneih hlenna hriltu a ni der si lo. Biak in hawng / dan puitling ngeia inneihna phei hi chu tihropui chawp pawh hi a ngai hran lo, a ropui sa. Chutihrualin inneih hmain an chesual tawh tih kan hriat ruk kar te’n Biak in hawnga inneih an han tum ve thin hi chuan a tihoin a tilem riauin ka hre thin. Puk lâwk emaw inruk emaw loh chuan Dan puitling hi kan tin ru fur ringawt a, chunglam hi kan bum thei dawn der si lo. Mahse, mi nundana duhthu lo sam ve vak kha awmzia a awm lo, Pathianin an chungah ro a la rêl mai ang chu. 

Johna ka hrilh chuan a phur kher mai, ani a tel ve chuan ka tan pawh a nuam sawt dawn. Kei hi mize zâwi chi ka nih bakah ka ṭawng tam si lo va, khualkhuaah phei chuan ṭhian han siam vel hi ka zeihawi lo si, ka va maltlat vual vual ang tih ka hlau ve deuh a ni. Lanpuii ka hrilh chuan, “Va hâwkdâk vak lo la, kei aia ṭha an awm paw’n kei aia hmangaihtu che an ni dawn lo a nia.” A rawn ti fiamthu hlut a, a inrintawkna hian a tilang duhawm zual thin teh e. Kimteii pawh a phur surh surh viau, A tukah dawr pawh ka hawng ta lo law law a, Lal mimi lah office dawr a ngai ve bawk nen, rawn zin ve a châk ngang mai. Kan chhuah hma deuhin ka nuin envelope min pe a, “Kha hei hi Kimteii nu kha i pe dawn nia. Fel takin va awm ang che, zu te kha i va in leh reu reu ang e, kan chhungkaw hmel lanna tur i nih hi aw, va pui ve bawrh bawrh la, awm phung pangngai takin va awm ang che.” A ti mawlh mawlh a. Ka chhang lem lo. Johna-a kan lam phei a, “Zakim, zin chhung leka awm tinuam tur i thian chhe lo deuh hlek te min lo hual lâwk sak em?” A ti thur thur a. “Awii, i lerh ve e, u Ngaihi ka hrilh mai tur a nia.” Kimteii’n a lo ti hlak. Kawng a tha tawh bawk a, Ṭawipui south-ah kan inhnawh puar zuai a, muangmarin kan tlan leh nghal. Tlai dar 4 rik hma deuhin Kimteii te khua chu kan lut a, an khua a lian vak lo naa, an khaw thleng a rem reuh riau, a boruak pawh a nuam viau e. Kimteii te in chu a laili lamah a awm a, an in leh lo ho pawh a inang tlang viau hlawm,. Lo neia eizawng an tam ber a, Kimteii te pawh an khawsak a pangngai a ni mai ang chu. An in erawh a hlui ve deuh tawh a, tuna nupui nei tur hi an upa ber niin a lo fel thar thar hle. Kimteii chhang chiah tleirawlin kan bungrua te chu a lo dah fel zung zung a. An thenawm lawkah Kimteii te upa ber pasal nei tawhte hi an awm bawk a, an fate pawh an lo awm,. Mo neitu tur an ni bawk a, inleng pawh an lo nei ve thluah. 

Zanriah pawh kan ei tlai angreng a, kan Johna lah chuan a lo pai ru a niawm e, chaw ei hmain peg khat a va lem zuk a, kei erawh ka hnar thei hram. Ka hnar tluan thei ang em aw..zanah pawh kan chhuak lem lo, hmelhriat la neih bawk si loh chuan a chakawm rih loh. A tuka an talh tur vawk lah chu tualah an thlung ruau mai a, Kimteii te hi hlui deuh tawh mah se, a hnuai an siam ve a, chutah chuan kan riak dawn a ni. Tihtur awm ta vak lo bawk si chu in hnuaiah chuan Johna nen kan tlu zâl ta daih a, chimbuaitu vak nei ta lo chu, a va peg leh thin. Ka la hnar lui hram hram. Dar 10 a la ri lo deuh tihin Kimteii a rawn chhuk a, rizai a rawn pawm tel bawk. Tak a! Ka nu pawisa min thawn Kimteii nu ka pek khan a lawm thiam hle a, engzat chiah nge ka hre lo naa, Kimteii u Buanga bula, “Ruai min rawn buatsaihsak a ni ringawt alawm. An va ṭha chhungkua tak êm” a tih ri ka hre thawi a, ka lo lâwm ve em em ringawt. Ka pate nge nge.

“U John, kan khuaah ka mikhual rei tawh lutuk a, zanin chu in bulah ka mut a ngai, mutna ka chang ve tawh lo” a rawn ti a. Kan mutna piah deuha thingrem sei atang chuan awngphah tur la chhuakin thingremah chuan a phah a, “Kan inkarah hian rawn mu ve mai rawh. Tilreh kan nih hi..” Johna chuan a ti lung lung. Kei chu Lanpuii nen kan intext mek a, ka ṭawng hman rih lo. 

“Pi Khumi thlahrâng a rawn inlar vaih chuan ka rawn inthawlh nghal a ni mai.” Kimteii chuan a ti bal bal a. Current a rawn thim zui bawk, in chung lam an ê dual mai.