Hmeithai 11

HMEITHAI (11)

Ziaktu : Toni Râltê 

“Eng nge a awmzia?” Ka va ti vat a. Msg ringawt chu tiin ka call zui ta nghal a. “In thleng tluang maw? I chau em?” Ka han ti phawt a. An tluan thu bakah, “Hei, ka ni te pawh an fel khawp mai, min lo lawm thiam ve lutuk a, Mampuia te pawh an tha e” a rawn ti a. Mi kap rûn avangin, “Eng nge i msg kha a awmzia?” Ka ti ta tâwng a, a ngawih dat hnuah, “Keimah vanga chhungkua in buai ka duh lo a ni. I hrethiam, sawi vak tur a awm em ni?” A rawn ti hê haw a. Ka chil ka lem khawlh. “Kan buai hleinem, engvanga chu chu rawn sawi nge i nih reng reng a?” Ka ti zawi sup a. Ka ngaih a tha thei tawh lo. 

“Ka rawn haw hunah kan sawi tha zawk dawn nia. Phone atang chuan thil a buai zawk” a ti ta tlat a. “Aih, sawi phawt rawh” ka ti ve tlat si, “Ih, Kimteii’n i nu ânhla te min rawn hrilh alawm, i nu kha huatna leh demna ka nei lo a nia, a rilru kha ka hrethiam, fapa ka nei ve tho a, i nu khan i hmalam hun bakah in chhungkaw hmalam hun a thlir vang a nih kha.” A ti ve ta mawlh mawlh a. Ka sa ta phat mai, “Lalnunkimi pawh chuan engvanga lo sawi ve ziah nge maw a nih le. Ṭawng thei lutuk” ka ti hluk hluk a. 

“Aw, keimah min khawngaih vang zawk a niang, a tan engmah sawi a rem ve si lo va. Hau miah suh. Chuan, thutlukna engpawh siam rawh, ka dem lovang che. “ A rawn ti nghet charh a. Ka thaw hawk, “Eng thutlukna mah siam tur ka nei lo, ka hmangaih che a, ka nei dawn che. Lo haw vat la, kan innei ang” ka ti ta hmiah mai a, chuti rum ruma han ṭawng chu ka duh lo viau naa, ka insum hman tawh lo a ni. 

“Leh ta rum rum a, umm, nia, kan awm rei dawn lo, Mami leh i chhungte kha lo uap tha hle la a tha mai aw. “ A rawn ti zangkhai vah a. Kan dah ta rih. Chhuat ka melh vung vung a, ka rilru a buai nuaih mai. Ka nu hi nu fing tak e ti lo hian thil a duh rum em em thin a, ka pa hian a hlau miah lo nain eng emaw chang chuan ka nu duhdana chhungkua kan kal zawk chang a tam, mahse, lehlamah kan tisual ngai lo thung. Tunhnaiah engvanga hetiang taka Lanpuii then tura min nawr nge a nih ang? Mami dam lohnain a hrinchhuah te pawh a ni ve thei, chuvang chuan ka dawhtheih hram hram hi a ngai zawk a ni. 

Mahse, Kimteii chu ka chhuahchhal ta tho a, “Khatiang ka nu ânhla thlenga lo va hrilh a ngai em ni? Inrawlh hun hi hriat a tha” ka ti ram hmuk a, a inthiam loh hmel kher mai. “Nia, ka tihpalh, ka nu kha a thinrim bawk sia, amah U Lanpuii a va biak phah ang tih ka hlau a, ka va hrilh ta mai a nih kha. “ A ti niah niah a,. “Chhungkaw titina chu hmun dangah chhuak tawh suh se” ka ti hmak a, ka kalsan nghal. Ka nu lah hian a lova luat hian a fak a, nia, a fel ka hria, mahse, tih leh lêmah chuan a tan leh an chhungkaw tan hian kan hlu ve êm bawk a ni. Thla tin a chhungte pawisa kan thawn a, ani Kimteii lahin thil thar a nei kal reng a, in chhung hna leh ei rawngbawl te hi chu a mawhphurhnaah ka ngai, va fak luam pawh ṭul ka ti ber lo. Mipa pawh hian rilru tet deuh chang kan lo nei ve tho a nih dawn hi. 

Mami dinhmun pawh a hniam ta zel a, khum pawh a thawhsan thei ta lo, a zun leh ek thiarsak vek a ngai a, ka nî pawh khawi hmunah pawh pawhpen theih a ni ta lo. Ka nu paw’n a rukin a sûn nasa tawh bawk a niang, test an zo a, chawlh a la a, Mami chu a awm ta chawt a. Bawihteii pawh a zirnaah a tlakhniam phah lo thei lo. Ka pain a ngaihtuah deuh avangin kan in piah lawk ami U Mali bulah tuition a kaltir ta a, a hun tam zawk erawh a nu bulah a hmang ve. Zaia farnu, Aizawla inbengbel ta khan Mami ei theih tur bakah Bawihteii thil tur te a rawn thawn thin a, hmeichhe tha tak a ni. Zaia te nupa erawh an reh vang vang mai, lo lang lo mah se pawi kan ti lem lo bawk. Bawihteii hian a pa hi a hrechiang lo hrim hrim a, a tet lai phei chuan keimah hi Apa tiin min ko thin. Lanpuii nen pawh kan inbe reng a, ka nu chungchang kan sawi vak lo. 

“Mateii hi an bula khawsa ve turin min dil nasa mai a, lehkha a zir peih loh pawn dawr kan siamsak ang a, fanu kan nei si lo an tia. Amah Mateii chuan a hreh deuh tih ka hria, a thu thu a ni mai ka tia. Lehlamah keiin pasal ka neih hun tur te a han ngaihtuah ve a, a inthlahrung bawk si, a tana tha ber tur pawh kan la hre hleithei lo a nih hi.” A rawn tih chuan, “I awm loh hlanin tuin nge Mampuia lo enkawl ang” ka ti khauh a. Dik tak chuan Mateii hi ka farnu tak tak angin ka en titih tawh a, a awm loh chuan ka ngai viau ngei ang.

“Nia chungte pawh chu kan sawi ho vek alawm, aa..amah hian a duh ka ring chiah lo. Lo haw hma kan tum nen, karlehah Sailova û a rawn haw ve dawn a, chu chu nghak turin min duh sia, buaithlak e, ka chhungkaw neihchhun ang an ni ve tawh bawk si.” A ti nuah nuah a. 

“Mampuia zirna a sukuk dawn loh te chuan cham rih u la” ka ti a, “Hei a tihzia tawp, Online class an kalpui a, regular-a class kal ang ve tho a ni. “ A rawn tih takah chuan ka thaw huai mai. 

Inrinni zan a ni a, inkhawm bang ho pawh an rawn peng kawi hlawm a, ka û Aizawla awm te pawh vawiinah an lo thleng ve chiah a, kan ni ve deuh nuaih mai. Mama te inah naupangho erawh kan awmtir a,. Pi Sangi, BKHP President hlun chuan, “Zanin Mami tana ka han tawngtai kha a mak khawp mai, ‘Lalpan a duh a ni’ tih ringawt hi ka rilruah zuk lang a mawle. Masaii te tan pawh dawnsawn a nuam lo maithei a, mahse, kei chu Mami hi Pathian angchhunga natna awm tawh lohna hmuna kan kaltir tawh mai hi a hun tawhin ka hria. A nâ hi a na si a, a thlarau nun lah a ngaihtuahawm si lo. Kei zawng ka lo sûn rei tawh a, tunah chuan ka dam titih tawh zawk asin.” A ti mual mual a, amah hi nu lian deuh, ṭawng muang deuh a ni a, kan veng bakah kan kohhranah hian fel ti lo hi an awm pawn ka hre lo. A dam dap mai a, ruihhlo ngai te hi a khawi khawm a, an inah chaw a eitir chang a tam mai. Mami hi a han thlawi tak hnuah Pathian leh Kohhran tana theihtawpa ke pen ve ta kha a ni bawk a, tunah pawh hian committee member a ni hrim hrim a, Nu Sangi fanu Lily nen inbest friend an lo ni bawk nen, chutianga kan bula han sawi ngam tur pawh a ni ve reng reng a ni. Ka pa pawh chuan, “I sawi dikin ka hria, fate an nia, keini chu an la thawk ṭêk ṭêk ringawt pawh kan la thlahlel a, amaherawhchu, chunglam kohna hi a nasa tawhin ka hria,. “ A lo ti ve chuar chuar a. 

An titi nak nak laiin ka nî chuan aw lâwi deuh hian, “Ka û, rawn phei lawk teh u” a rawn ti a. Ka nu leh pate nen kan va phei nghal. Kimteii erawh Bawihteii hruai turin ka niin a tir nghal a. Mami chu fiah deuh hian a lo meng a! A thaw erawh a hah deuh niin a lang. 

“Nu, pa, min kaltir tawh mai rawh u. Ka pi leh pute pawn min nghak reng tawh. “ A ti tham ṭiak a. A aw chu a hriat theih chang chang a ni. Bawihteii rawn thleng chu lo melh vatin a nui sak a. “Ka duatte, ka neihchhun, keimah ka awm tawh loh hnuah pawh a pi leh a pute, a putea te thu hi lo awih la, lehkha tha takin lo zir bawk la aw. Ka hrilh fo thin che kha, Kei chu Isua hnenah ka kal tawh dawn a, Ama hi i hmuh leh duh chuan Isua hi lo ring tlat rawh aw. I hrethiam em? Bawihte..” tiin thei leh thei lo hian a fanu hmai chu a chul a, naupang fing leh thil chik mi tak Bawihteii chuan engkim a hrethiam tih ka hria, “Ma, Ama, min kalsan suh.” Tiin a va kuah a. Ka pa meuh paw’n a mittui a hru nawk nawk mai, ka nu chu a ri ta hawk a, “Mambawih, i natna hi a na êm a ni tiraw? Ka va khawngaih tak che êm..” tiin a ṭap khur ngawt ngawt. Mami chuan, “Ka fanu hi lo thlahthlam suh u aw. Ka hmangaih vek che u..Pa, kei chu Pathianin min duh tawh a ni..” tiin mittui tling khat vek chung hian ka pa a rawn melh a, kei min rawn melh leh a, midang pawh a melh kual dan dan a, ka nuin a chal a dawm a, ka niin a bân a chelh bawk. A fanu Bawihteii melh leh hramin a chhing ta diar diar a, thih a sual lo, muang takin a kal ta. Ni e, ka farnu chu he khawvelah a awm ta lo. 

In chhung chu ṭap riin a khat nghal a. A hma lamin kan in chu thalai lam ten an lo singsa deuh vek tawh a, han tihfel ngai vak a awm tawh lo. Inrinni zan dar 9:32-ah ka û chuan khawvel a chhuahsan a nih chu. Mak ve deuh chu chhunah khan nachhawknain a chhawk laiin inbual a rawt tlat a niawm e. Ka pain bathroomah a pawm lut a, ka nu leh ka ni ten an bual fai vek a, hetiang tur tihte hi a inhre lawk deuh em mawni tih a awl rum rum mai. A damlaia a kawr duh leh ngainat ber, Bawihteii nen puanthân inang an ṭhui a sen duk an haktir a, puanchei an bihtir bawk. Johna nen ka pindanah kan awm a, ka chiâi deuh nge ni mipui huhâng ka zo lo zawk, ka pik chûk mai a, awm hran rih kha ka duh tlat. Johna zawkin Lanpuii pawh a va hrilh a niawm e. Phone pawh ka khawih hleithei meuh lo. Ka ṭap lo va, ka mittui erawh a tla nasa. Mami nen hi chuan in puia awm dun tih takah kan inunau bik em a tin ni.  

Ṭhalai tlaivar pawh kan phu lohin an tam khawp mai. A tukah rilru a fim chho ṭan a, Mama a patling khawp mai, engkimah ka pa ai a awh thei a, kei chu an tirhkah ka ni deuh ber. Mami chu ui takin kan vuiliam ta a, thlan thlengin ka zui a, tunah chuan a natna te a dam tawh ang a, hlim takin Pathian nen an leng dun tawh ang chu. Vui zawhah chuan ka muhil ta bawrh bawrh a, ka harh chuan phone ka en nghal a. “Nizan khan rawn phei nghal kan tum a, mahse, Mampuia, kawthalo leh luakin a bei chiam a, vui tal rawn nan hram duhin kei pawh ka tlaivar a, mahse, Mampuia hian ziaawm lam a pan thei si lo va, tunah chuan damdawi inah kan awm, min admit a.” Tih thu Lanpuii hnen atangin ka dawng a. Phone ka khawih hman meuh loh avangin kan inbe mang lo kha a nia, ani pawn min hriatthiam tho ka ring. Mampuia chutianga a lo awm ve lehzel chu pawi ka ti hle. “A va pawi ve, ka inbual harh ang a, ka rawn bia ang che” tiin ka reply a. 

Johna’n engkimah min ṭawiawm a, ṭhian nih a tling khawp mai. Ka inbual takah chuan ka zang ta huai a, Hriata te luah thin in hnuaiah eirawng kan zu bawlpui ve a, mi kan lâwm loh tehlul nen, mizo thalai tlawmngai tak tak hi an lo va tam tak êm, thla an timuang takzet a ni. 

Lanpuii nen pawh kan inbia a, “Tunah chuan an jection a, a muhil rih, eng emaw ei sual a nei a niang tih dawnin doctor ten engmah an sawi bawk si lo, a harh chuan a luak nghal dawn zel a, drip an khai a, a chau reuh si, a pawi tak tak a ni” a rawn ti a. “Sailova u chu engtikah nge a rawn hawn dawn?” Ka lo ti daih, ka hmuh phakah awm se ka duh vang a ni, Lunglei damdawi in ai chuan Aizawl lam chu a tha zawk dawn tih hre tho mah ila, saw lai hmelhriat loh kara dam loh kha ka khawngaih a ni. “Naktuk emaw a tuklehah a niang. Mampuia hi a zia deuha motor a chuan peih dawn chuan rawn haw mai ka duh “ a ti ve a, kan rilru a inan hmel khawp mai. “Nangmah kha inenkawltha la aw, eng emaw tlang hrileng pawh a ni thei. Thil tuiril lam kha a tam thei ang ber pe phawt rawh” ka han ti ve ngial a. A hriatsa vek a ni. Mami vuinaa mipui tamzia, ngaipawimawhtu an tamzia te ka hrilh ve a, “A fel êm alawm, a thih ropui kha ka ring hrim hrim. Vuina hun takngial pawh ka hmang thei lo erawh hrehawm ka ti takzet a ni” a rawn tih chuan,”Kan hrethiam che lawm, i fapa kha a pawimawh rih” ka ti a. Kan dah ta rih phawt. 

Zanriah pawh ka rin aiin ka ei tui phian. Ka nu erawh a la ei hleithei lo va, ka niin drip a khaisak , ka pa erawh a mizia hrim hrim a dam ruih ka tih kha, a intipachang thei khawp mai. Zan lam kan khawhar hnem tura rawn kal ṭhalai bakah nu leh pa thenkhat te pawh an ṭhahnem leh hle, zai a nuam viau bawk. Ka nîin lawmthu sawina a nei ve bawk a, a tir phat atanga an inenkawl dan te sawi vein, “Ka vahnu a nih piah lamah ka ṭhian leh unau a ni tel bawk a, kan inkarah thuruk a awm ngai lo. A cancer tih a hriat hlim khan ka û chhuah lawk hlan hian, ‘Ni, ka chhul emaw ka hnute emaw te chu cancer se ka hrethiam, ti nge ka thin kher kher a lo cancer le. Hmana kan thiannu fel leh Pathian ṭih tak mai pawh a thin a sâwng a, chhan theih kha a ni ta lo va, khate khan mi tam zawk, amah hrechiang em emtu te pawh khan, ‘Zu emaw beer emaw a in ru nasa a niang, hetianga thin ro leh sawng tê ringawt chu, a zun a thlum pawh a ni bwk si lo’ te an tia. Kei pawh ka hlauthawng, khatiang khan kan kohhran thalaia ka memberpui ten min sawi ve ta se..Pathian remruat dan hi a mak tiraw? Tiin ṭap ṭeuh chung hian min hrilh keuh keuh a, kei chuan an sawi loh dan tur leh an tawrhpuizia te ka sawi ta zung zung a. Ni e, khawvelah kan la cheng a, pian hun kan nei angin thih hun pawh kan nei tur a ni. Kan thih dan turah duhthlang thei kan ni lo tlat a, zuk leh hmuam ti ngai miah lo, ruihhlo ti ngai reng reng lo te pawh he natna ngeiawm tak cancer hian a kal kân bik lo. ZMC atanga kan rawng tur kan insiam laiin, ‘Kan ṬKP secretary emaw, Evangelical lam emaw hi hrilh ka duh, ṭawngṭai subject siamsaah hian, ‘Mizorama cancer vei an lo tlem zel theih nan’ tih hi..’ a ti a. Kan naui ngenna hnuhnung hi kan hruaitu lam te pawh khan min lo ngaihvensak thei u la kan lawm ngawt ang. “ Tih thu a sawi tel chuan hna a thawk rang khawp mai. Thalai programme-a ṭawngṭai rualna kan neih dawn chuan ka û thuchah hnuhnung kha khêl loin telh a ni ta ziah rêng a. An ngaihpawimawhna hi kan chhungkaw tan pawh a hlu khawp mai. 

“Tete, Mateii a bo!” Lanpuii thlabarzia chu a aw khurh nasat dan atang chuan a chiang khawp mai. Thlan nghah nî a nih vangin keini pawh thlan lamah kan kal a, chawhma dar 11 bawr vel a ni. “Eng a?! Engtin?” Ka ti tuar a, Johna pawn min rawn en nasa ngang mai. 

“Aw..a bo, nizanah kei chu Mampuia ka riahpui a, zingah chaw min rawn pe turin ka tia, mahse, Sailova te zing thoin an va kaitho tur kha a lo awm lo ! An call-in a phone a off tlat bawk sia. Kan bulah a rawn phei a niang tiin min rawn bia a, a rawn kal bawk si lo. “ A ti mawl mawlh a. 

Ka kalsawn deuh a, “Niminah chuan dar engzatah nge a hawn?” Ka ti a, “Dar 3 bawr vel a niang, ka ni nen an haw rual a, tlaiah pawh rawng a la bâwl. Dar 8 bawr velah ka lu a nâ tiin a mu an tia. “ A rawn ti a, tunah chuan a aw pawh a pangngai deuh tawh. “A va mak awm ve aw, hmelhriat a neih ka ring chiah si lo. Chuan, engtia hmalak nge in tum?” Ka tih chuan, “Sailova chuan police hrilh mai a duh tawh a, ka ni te chuan ngaihchân an duh deuh a niang, Sailova u kha vawiinah a rawn thleng dawn bawk sia” a ti niah niah a. 

“A va buaithlak em aw, nia, thian a lo chhar ve hman ang a, a chhuak laklawh te pawh a ni ve thei tho asin. Mahse, ngaih chu a tha zân lo. Dar 3 vel thleng ngaichang u la, chanchin engmah in la hriat loh chuan FIR thehlut mai rawh u.” Ka ti duah a. Tunlaiah mi kan sualin pawisak kan nei tawh si lo va, Mateii chu ka ngaihtuah khawp mai. Lungleia bo te chu nise thuhran, Aizawlah hmelhriat hnaivai a neih a rinawm si loh. “E chuan, i sawi ang deuh khan amah chu a kal chhuak ngei a nin a rinawm, ka ni pasal a tho hma ber a, kawngkapui a lo inkalh lo a tia. Khaw nge a kal ang le. Call tlang theih tal se” a ti vawng vawng a. Chhui chian deuh chu a ngai dawn a nih hmel. Mampuia pawn ziaawm lam a pan ve hlek thu leh hetiang boruak an neih tak si-ah chuan chhuah mai a duh thu te a rawn sawi a, doctor kha chuan an la remti chiah lo naa, an dinhmun te hrilh hriat chuan a remtih mai a beisei a niawm e. 

Johna pawn Mateii chanchin a’n hria chu pawi a ti hle tih a lang. “Bialpa a lo nei ve deuh em mawni dawn le” te a han ti ringawt thin. Nia, tleirawl an ni ve tawh a, bialpa nei pawh nise a mak hran lo, “Bro, kei chu ka ring ta tlat, Lunglei a awm lai atang khan Aizawl lamah biak a nei ve thin ang a, an zin remchan takah chuan remchangah an hmang dun ta mai a niang a, a phone a off kher hi a buaithlak a nih hi.” A ti nuah nuah a, Johna nge nge, kei ai chuan a lu bur hi a hmang thiam thin e. Chutiang teh hrep kan nih vang chuan rilruah Mateii hlir a awm a, inah pawh ka ṭawng tlem phah hle. Ka ni pawn Mampuia damloh vel kha a lo hre tawh a, a sawi ve niah niah mai. Mateii bo thu erawh Lanpuii hian a la hrilh chiah lo a nih hmel. Kei pawn ka ni chu ka hrilh thawt thawt duh lem lo. 

Dar 4 velah kan inbe leh a, police an pun thu a rawn sawi ta a, Sailova u pawh a rawn thlen tawh thu te,a fel thu te a rawn sawi luam a. Doctor remtihna thlapa damdawi in pawh an chhuahsan dawn thu a rawn sawi chuan ka thaw huai thei, mahse, rilru lehlamah Mateii hlir a lang si. Mateii kha la naupang viau mah se; mi â tak a ni bik lo va, Lungleiah pawh khan a kal chhuah dawn chuan a û hi a hrilh lo ngai lo, tin, a dawih em em a, mipa hi a hnaih ngai lo tihtheih a ni, amah hi a inla hrang thiam, bialpa nei ang vela kan han fiamte khan a ṭeu hlar zel a, saw leh ram chena zanah lehnghal mipa a chhuahpui hi rin a harsa hle a ni. Police lamin an chhui tawh mai ang chu, a phone tal awm thei se chuan kawng a awlsam deuh tur. Awmhmunah ka lo ṭang ve ṭun mai. Lumen zan hi kan branch YMA inkaihhruainaah chuan inlenpui zan 1naah an chhiar nghal a, zanin hi zan tâwpna a nih tawh chu. Thalai pawh kan inah kan leng lo lam a ni. Zai a nuam em em a, Ka u Teii leh U Lawmi te lâm pawn boruak a chawi hle. Ka pain lawmthu a sawi a, a tawi fel khawp mai. Thingtlang khaw thenkhatah hi chuan an la ching maithei a, khawhar in riak hi khawpui lamah chuan kan ti meuh tawh lo. YMA lamin khawhar chhungte min râwn hmasa tlangpui a, keini pawh kan ni ve deh duah bawk a, in riak neih loh mai kha pawi kan ti lutuk lo. Kei erawh Johna’n min riahpui tho a, Mama te chhungkua bakah U Teii te chhungkua nen, kan la ni ve nei nuai a, a lawmawm lamah ngai ang. Kimteii nute pawh vawiin lamah an haw a, an khua a hlat nen, an rawn ti ṭha khawp mai. 

In leng an ṭin fel hnu tak tak chuan dar 10 a pel vah tawh a, a khat tawkin Lanpuii nen kan intext kha a nia, engmah chanchinthar an la hre lo a ni. Khawtlang han pun dawn se, mikhual an nihna piahlamah Sailova te lah Aizawla an awmna a la rei si lo, an inthlahrung deuh niawm tak a ni. Mahse, mizo hi chu mizo nge nge kan nia, Sailova pain thenawm khawvengte a lo hrilh thuphung ve a, khawtlang hruaitu te lo hrilh chhawng ve lehin naktuk aṭanga zawn an tum niawm tak a ni. Mateii thlalak lan fiahna deuh kha an print a, hmu ngai lo tan pawh a hriat theih mai ang chu. Police lam pawh an che rang hle a, Mateii riahna pindan pawh an lepse hneh viau a niawm e, Lanpuii sawi dan chuan khami a bo zan khan khumah a mu lo hrim hrim a ni nih hmel, khum inthleh felfai danah, a charger a awm a, a thawmhnaw pawh engmah bo a awm lo. Mak tak a ni. Sailova te chhungkua chuan zan lamah thawm engmah an hriat loh thu vel an sawi a, bakah an mikhual room leh Sailova nu leh pate room hi in hnuaiah awmin, chu pawh inepin a awm a, thawm a hriat vak theih loh hmel. Lanpuii a inthiam thei lo, “Zanin chu hrehawm mah se, ka riak ve mai ang, in awm loh chuan ka zak, bakah ka awm thiam lo vang” tiin Lanpuii te bula riah ve a lo dil a, mahse, cabin-ah an awm si lo va, riahna vel a buaithlak an tih bakah Lanpuii chuan a khawngaih vangin hawa a tuka rawn thlak turin a thlem thlu thei hram kha a nia, “Lo riahtir ve mai ila, tiang hi a tawk lo tur” a ti a ti mai. Sailova te ho han ringhlel ngawt dawn se, a chungah an tha ropui si, fanu atan te an dil deuh deuh kha a nia. Sailova nu phei chuan damdawi in atanga an haw lamah pheikhawk leh purfume manto tak a leisak hial a niawm e. Chutiang taka an duat lakah chuan pawi an khawih a rinawm chiah si loh, bakah Lanpuii te nen an inhmu chhuak thar ve chauh a, a nau anga a en a duat em em chungah pawi an khawih ngam a rinawm loh. An in atanga bo a nih vangin hrehawm an ti hle nghe nghe a, Sailova u Muana an tih pawh chu zin chau e ti loin a buai vut vut viau a niang. 

Ka pain chawhma chhung tal dawr va hawng tura min tih avangin ka hawng a, Mimi erawh kan in lamah a la tâp rih. Home lamah ka nî pawh an mamawhna a nasat tawh em vangin a kal ve tawh a, a chawlh lak hun a zo tawh bawk nen. Mi kan buai tawh a, thih nî leh a tuk bak hi thenawm hnai te an nih ngawt loh chuan kan inlenpui lutuk tawh lo. Thih chamah hian kan pung ve leh hret a ni mai. Tumah indem thei kan ni lo, khawvel changkang zelah eizawnna vang ten kan buai tawh em a tin ni. 

Chanchin ka va zawt a, “Hei thalai ho chuan an zawng mek a, Police lam paw’n an buaipui reng. Keini chu kan awm tawp, Mampuia lah chuan a lam reng a, a hrehawm khawp mai “ a rawn ti a. Bei a dawng ru hle mai. Pasal um te chu lo ni tak tak se aw, mahse, ka thinlung hian a ring thei tlat si lo. 

“Lo haw lam pawh sawi theih a ni lo a nih hi, engtia awm zel tur nge pawh ka hre tawh lo.” A ti chuai raih a, kei lah mi hnem thiam ta lo chu ka ngawi run ringawt. An lo va zin ta kher kher kha a pawi a ni e. Dar 4 velah dawr pawh ka khar ta daih a, in ka thleng chu ka chungchang an lo sawi em mawni tehreng ni, chechâng lo hian min lo en ṭhap mai a, min tilai lek lek dawn alawm le. 

“Min lo rêl a ni maw?” Zahzela ka tih chuan, an inthlahdul sawt hian ka hria. U Tei chuan, “Tebawih, thil kan lo sawi a, thil ṭha deuh “ a lo ti vat a. An awmdan chu ka ngaih a tha lo lek lek, “Nia, a tha tawp” U Lawmi chuan a lo ti ve bawk. Mama leh ka pa an awm lova, patea nupui bakah ka nu û Nupuii te an ni mai. “Eng chu” ka ti hû a. 

“Nakinah zanah” ka nu chuan a lo vat a. Roomah ka luhsan ta daih. Kimteii a rawn lut a, ani pawh Mami vang nge a zia a zâwi, “Zaninah ka insu dawn a, thawmhnaw bâl lo dah chhuak la” a ti a. Ka lo bu nghut , khatia kan inchhal tak hnu atang khan kan infiamin kan inbe bawrh bawrh ta mang lo, Mami boralin a nang zui ta bawk nen, engkim a la tha vek ang chu maw. 

“U Lanpuii te engtik nge an lo haw dawn?” A ti leh sep a. “Ka hre bik lo le, an lo haw ve tep ang” ka ti ringawt. An buaina hi ka ni takngial pawn a la hriat loh avangin keima thua lo tlangzarh ve ngawt kha ka duh lo a ni. Mahse, ka nî rawn haw chuan thil awmzia a lo hre tawh a niang, a rawn sawi hlut a, Lanpuii a khawngaihzia te, aa..engkim a ni mai. Ka nute pawh an phâwk hrâ mai. “Awii, a va pawi ve aw, tunlaiah ruang chhar te hi a tam sia, a ruang an chhar ve ringawt ang tih a va hlauhawm ve.” U Lawmi chuan a lo ti var a. Ka nu chuan, “Tunlai thangtharho hi kum 15 an nih dek dek tawh chuan, an thak ve har tawh a, pasal a um te pawh a ni ve maithei asin, mipa hi an nêl tawh khawp a .” A ti leh kher a, a ṭawng duhdan hi ka mil hlawl lo tunlai chu. 

“Chutiang mi a ni lo. Mipa a hlau” ka inrin hmain ka lo ti vut. Midang chu an ngawi mai, “Bialpa te farnu thi chhawnga an awm lai pawha zinsan thei kha an nia, Aizawl te chu mihring an tam ang bawkin sualna pawh a tam alawm, va zin chawng chawng loh mai tur a nia “ a ti leh hlak hlak a. 

“A nih tak chu, i rilru kha a..” tih leh bathrooma luhsan ka rual a, mahni lo maha rilru hah ve nak alaia khatiang thu lem har deuh deuh sawi ziah mai. A Lanpuii dem tum thlak lutuk. Ka nu nen kan boruak hi a la sosang zel maithei a ni. Kei lah ka pa anga mi tum tlang ve tak, atchilh chu atchilh rumrut, awlsam taka bansan hni hne chi ka ni bik der si lo. 

A tuk a rawn ni a, Bawihteii ka han thlah a, a nu thih atang khan a tawng tlem a, a pi nen an inkuah tam bawk. Mahse, hetia engkim hrethiama a awm hi ka duh zawk, a tan khuarei hi a thlen hun a la awm dawn tho tho. Pathianin a vengin a awmpui tlat ang chu. Dawrah bawk ka kal leh a, Mimi pawh a kal ve tawh. Mateii chungchang hlir kan sawi. Lanpuii hnen atangin thuthar anga lang chu kan hre ve leh a, “A bo zan dar 12-1 inkar velah khan Sailova te kawmthlang kâwn zau laiah khan amah niawm tak leh mipa pahnih inzui an hmu niawm tak a ni, mahse, a hmutu te hi addict an nih vangin police lam hian an bengkhawn vak lo a niang, bolero-ah an chuang tih zawng an hria. A motor number an hre bawk si lo, mahse, Mateii a nih rin lohna lian tak ka la nei tho, mipa bulah lehnghal, khatiang zan rei tawhah a chhuah ngam hi ka ring hlawl lo” a rawn ti a. 

“Rilru a va hah duh ve le aw, a phone a off tlat chhan hi hriat a châkawm, a tibo emaw an ru bo ang a, an laksak a nihte ka ring rum rum” ka ti a. 

“Kei pawh chu chu ka rindan. Nichin deuh khan ka ni te nupa pawh police lamin an rawn ko leh a, ka tan pawh hian a nuam lo, anmahni ringhlelah min ngai ang tih ka hlau. “ A ti a. “Aa..koh ve deuh sek chu an ngai ang, hmu hnuhnungbertu an ni sia” ka ti a. “Mampuia te zirtirtu te pawh chanchin ka hrilh a, an hrethiam khawp mai. Mahse, online class pawh a kal hleithei lo, Mateii a ngai lutuk hi” a rawn tih chuan ka rilru a tina zual. Mateii khan a duat ve êm bawk a ni. Sailova nen pawh kan inbia a, a mangan thu leh hrehawm a tihzia te, a inthiam lohzia te a sawi ve luam mai, “Ka lo hruai phei ta kher kher kha ka rilru a nuam thei lo.” Tiin. 

Vawiin chu rin ai takin kan inhralh tha e. Loh theih loh vangte pawh a niang e, Mateii bo thu chuan social media a luah chho ṭan a, “Pasal a um a ni mai lawm. Ngaihtuah vak suh u..” ti vela holam taka ngai comment a tam leh hle mai. Chhiar pawh ka chhiar peih lo. 

Kan inah rawng kan bâwl tawh a, vawiinah u Tei pasal leh an fate an haw phei tawh a, ani erawh Mami thih cham thleng a awm ve rih dawn a ni. Zanriah ei kham inleng rawn lan hmain ṭawngṭaina kan nei a, ka nuin a hmang. 

A thusawi tawp lamah min rawn enin, “Tebawiha pawh i pa thachhang dawltu i ni tawh a, rilru puitlin i mamawh ka tih fo kha, i hmalam hun thlir la, nupui pasal chungchangah te hian tihsual tawh chuan siam that a harsa tawh thin. Thil thui tak ngaihtuah la, i nu leh pa te hi chu kan ngaihtuahawm ber loh, Bawihteii ber hi ngaihpawimawhah nei la, tin, hei Kimteii kan hria ang a, a hlutzia te, awm lo se kan buai dan tur te pawh kan hria ang, ani pawh an chhungkaw dinhmun kan hre vek a, ani pawh hi i ngaihtuah tel tur tho a ni, i pain thu a lo tiam tawh a, nangin i chhunzawm zel a tha ang. “ A ti charh charh a. Ka tan han huat tur em em a awm lem lo, mahse, a hma lama kan lo inbakkaih tawh avangin a mi den dan a dang deuh tho mai. Ṭawngṭai zawhah ka inbual a, ka eng emaw ti chauh, ka chhungril khua hi a sik deuh tlat. Thiante an rawn leng lem lo bawk a, ka mu ta hlun mai. Ka lo chhing sek a niang, U Tei’n min rawn kai tho a, ka chal a rawn dek chu a chek hlak, “I pang a va lum ve, i nuamsam lo a nih ka ring reng a. Nachhawkna ei rawh aw” tih leh chhuah a rual a, ka nu nen an rawn lut leh vat. “Ngati nge i khua a sik a? Sawi ta che” ka nu chuan a ti a, min ngaihtuah tih ka hria, mahse, tlangval kan ni ve a, zuau lutuk kha ka hreh ve deuh. Nachhawkna chu ka dawlh pawp a, ka khumah an la thut miau avangin ka ṭhu mu a. 

“Tebawih, kan lo sawi ho a, kum thar lamah chuan saw lamah dawr hi hawn belh ila te kan lo tia, he lam chu ka pa bakah Mimi hi a rinawmin a rintlak bawk a, an lo enkawl thei mai ang a, nang Aizawlah dawr lian law law hawng la kan tia, a hlawk pawh a hlawk dawn a. “ Ka u chuan a ti malh malh a. 

Ka lo thaw hawk ringawt. Ka nu pawh chuan, “Ni e, Kei ka pension hunah ka pension hlawh hi chang tur in awm dawn si lo. Kei leh i pa kan boral chuan dawr chiah hi kan eizawnna a ni tawh mai dawn sia, ngaihtuahna siam ran a ngai a nih hi.” a lo ti ve a, an sawi hi a dik lo pawh ka ti lo, mahse, tun tut tuta han rel chuk chuk chi-ah ka ngai lo. Kum thar pawh a la hla tho sia. “Nia, a dik alawm, kan tum dawn nia, mahse, ka tel loin he lamah in awm thei ang maw?” Nui titih hian ka ti a. Ka nu chuan, “Awm ve thei naw naw mai ang, Mama te an awm tho a, Kimteii a awm bawk a,.” A ti ve thliam a. “Nia, kan sawi tha dawn nia, ka pa berin a tih te chuan hnial chi pawh a nih loh chu.” Inti mitak deuh hian ka ti luam a. “Eng nge i thiannu nau bo vel chu, chanchinthar a awm em?” Ka u chuan a ti a. “Awm rih lo. A buaithlak khawp mai” ka ti zawi sup a. 

Mama fanuin a pi a rawn koh takah chuan an chhuak zui ta a,. Nachhawknain min chhawk hnu chuan ka mut chhuak a reh leh roh si, Lanpuii va biak chhen lah ka inthlahrung deuh si. Movie te ka en ta vel mai mai a. Dar 9 velah Johna’n min rawn call a, Ngaihi nen an intih thiam loh thu a rawn sawi ! “Aa..i patea fanu Lalsaii kha zuk thik tlat peka mawle. A hahthlak a nia” tiin a nui kur kur a. 

“A va tiho ve mawle, Saiteii’n hria se a nuih a za ngawt ang. Tiang hun lai kha a awm ve lawm nau, tha ve leh mai ang” ka lo ti puat a. “Nia, ka engto hran lo. E taka! Lucy pawh a tha ve tawh lutuk, rai a inhmeh reuh a nih khu. Hmanni a nu nen kan intawk thut a, min lo be hmasa chul mai. Hehe” a ti leh zung zung a. 

“Makpa ṭha deuh tur an chân a ni ringawt alawm. Mi â-in an ât man an tel seng lo an tih kha,.” Ka ti a. Mateii chungchangah bawk kan lut leh,. Keini ina kan lo zeldin chiam chiam khan awmzia vak a nei si lo, rilru a hah a nih hi maw. 

Ka phone nghawr dat dat vang chuan ka phu zuk a, va ban vatin mit siai chungin ka bih a, Lanpuii a lo ni. Zing dar 6 leh a chanve a la ri lo deuh hlek. 

Ṭah aw ṭiau hian, “Te, Mateii ruang an hmu!” A rawn ti ta a..! Ka mur sung sung thei. Ka ṭhu chhuak hlawl a, “Engtin ?khawiah?” Ka ti tuar..