Hmeithai 10

HMEITHAI..(10)

Ziaktu : Toni Râltê

“Eng nge i lo tih dawn?” Ka ti chang fak a. A mit chu a sen deuh rûm a, a sam lah a hnawk nuaih bawk. Kekawr dum loose lam a ha a, a tlu nge mawni a paw deuh thuk lehnghal, a top hak chu a bra lang theiin a ṭet bawk si ! Eng emaw tak chu a tawk a nih hmel. Kimteii pawn a ngaihna hre lo zetin min lo en ve reng a, thei leh thei lo hian Rinzuali chuan, “Tete, zanin chauh chu min riahtir ve mai teh u. Ka haw ngam tawh lo, nih loh pawn min va thlah mai teh. Khawngaihin” a ti nawk nawk a. Dining chair-ah a ṭhu nghal hnawk bawk. Kimteii lam va hawi pahin, “Tu nge hei hi? Nupui te i lo nei e lo? Hei hi maw hmana ka bialnu i lo tih ve sek kha” a la ti zui ! Hetiang taka ṭâwng hian Rinzuali hi a la awm ngai lo asin mawle. Kimteii chuan ner sakin, “Tu nge i nih zawk a? I rui em em lehnghal. “ A lo ti ve hmak a. Tunah zing dar 2 a pel tawh a, scooter-ah kan inphur hleithei pawhin ka ring lo, chutihrual chuan ka nu te an awm lo tih a hriat vang nge chuti taka min rawn zuam chu mak ka ti ru viau tho, “Ka nute chu awm se i lo kal ngam awm tawp si lo” ka ti zauh a. “Aw..i û damlohnaah an kal tih ka hre ve alawm ahh..Mahse, he nu hi a awm ve tih ka hre miah lo.” Tiin Kimteii chu a va melh leh zauh a, ‘He nu’ han intih nulh hi chu a tu ate tan pawh a lawmawm loh ve bawk a niang, “He nu ka ni ziah lo, Aw..a nupui ka nih hi, i lo riak thei lovang. Ka remti lo” Kimteii chuan a ti ta hlawk hlawk mai. Kei ka lo hamhaih deuh, “Awi awi, min thik khanglang duh suh. Inpa hi maw ka ṭhianpa a nih hi, ka zun a chhuak lutuk, ka cheh dawn” tih leh bathroom-a tlan luh a rual nghal a. A zun hlanin Kimteii bulah ka ex a nih thu leh a tan pawn lam a him loh ka rin vangin zanin chauh chu mikhual room-ah mu rih mai se ka duh thu ka sawi mawlh mawlh a. A lungawi vak lo sa nen, “Ka nu ten an hriat vaih chuan aw, bakah U Lanpuii pawn a lo hria ang e” a ti nang nang a. 

“Nangin i sawi loh chuan tuman an hre lovang. Aa, a nun a pelh laklawh ve a nih hi, hrethiam tawp mai ang” ka ti ta ringawt a. Zuali pawh a rawn chhuak a, “Mikhual roomah sawn va mu rawh. Bengchheng siam miah suh ang che. “ Ka ti a, engvanga chutianga awm nge a nih tih vel ka zawt buai peih tawh lo, a dika dik chuan kan chhungkaw boruak nen Rinzuali chu ka thêngthâwngah a thawk tawh tehchiam lo a ni ber. “Aw le, ka lawm e. Ka chau takzet a ni” a ti ve thliam a. Kimteii chuan, “Kha i kekawrte kha a bal sia, inthlakna ka rawn lak ang che. “ La tûm bâr chung hian a ti a, a fel reuh tho mai. Kekawr leh tawnzau a va laksak a, “Tui hi ka inchhawp dawn aw,.” Tih leh Fridge-a hawng a, bottle a rek chhuak nghal. 

“Tikhan va mu hmiah rawh, ka chau a, keini pawh muthilh kan duh a nia” ka ti leh sup a. Thuawih takin mikhual pindan chu a pan a. “Thil te hi a bo ang e “ Kimteii chuan a ti leh hram a, “Chutiang mi a ni lo. A rawn harhfim hunah a zak viau ang. Va mu rawh. Kei pawh ka mu dawn” tiin ka pindan lam ka pansan ta a. Rinzuali mai mai chu aw, min rawn tiharh leh vek alawm le. Darkar chanve dawn ka mut men kar hnuah ka chau tawngkhawng nge ni ka lo muhil ve ta a niang. Ka harh leh chuan a lo êng uar tawh mai. Dar 8 a lo pel tawh. Ka va chhuah phei chuan Bawihteii paw’n chaw a lo ei mêk a, Kimteii’n hmun a lo phiat mek bawk. “A la tho na nge? Kan mikhual chu” nui huk chung hian ka ti a. “Umm, va kaitho rawh” a lo ti a. “Aa..tisawn mu rih rawh se” ka ti ringawt. Ka nu nen kan inbia a, vawiin lamah in lama rawn hawnpui leh hawnpui loh chungchang an sawiho dawn a niawm e. Ka inthiar zawhah Bawihteii ka han thlah a, “Apute, nizanah anu ka mumangah ka hmu asin. An lo haw dawn tawh em?” A ti reuh a, Bawihteii hi hmeichhe naupang e ti lo hian a ṭawng tlem reuh khawp a, han nawrh tih vel pawh hi a nei ngai meuh lo. Heti khawpa kan duat chung pawh hian kan duat sual hleithei lo a ni ber. 

“Lo haw ṭêp tawh ang, engtin nge anu chu i lo hmuh?” Ka ti vat a. 

“Ih, sundayah kan lo inkhawm a, chuan Âma bulah hian lam ka ngen a, min lo lampui a, a nuam lutuk” a ti niah niah a, aww..chutiang hunte chu i tawng thei ngai tawh dawn si lo va, ka lainat lutuk chu ka hnuk a ulh ṭeuh mai. 

In ka thlen thlak leh chuan Zuali pawh a lo inthiar mek a, Kimteii pawh a la tûm lian viau. Zuali rawn chhuak chu, “Chaw i ei nghal dawn em?” Ka lo ti a. Chuti taka a laka ka han ṭha ta duam vel chu keimah ngei pawh ka inhrethiam lo lek lek, huat vak theih pawh a ni bik lo. Min tihnatna te kha ka tuar zo vek tawh a, eng he hu-ah ka ngai tlat tawh lo a ni. Lainat lamah a kal tawh zawk. A nun a tichhe nasa lutuk hi, keimah vang ni kher lo mah se; khang hun zawng zawng lo inzui ve tawh kan nihna laiah ka puihna a rawn dil chuan lo hnuchhawn daih kha kei chuan harsa ka ti tlat. 

“Ei lovang, in nu hi a tûm lian êm mai” tiin Kimteii a va melh zuk a. Kimteii ṭawng hmain, “Kan nu a ni hleinem, kan nau a nih hi, kan buai sia, min rawn chhawmdawl a nih hi, a tirah in indawngsawng fuh lo em a nih kha, a fel teh mai a nia” ka lo ti sawk sawk a. 

“Ka ring reng ahh. I bialnu kha chu nang aiin a upa sia, an hmel pawh a inang lo ka lo ti rêng a, nia, nizan kha chu ka tihpalh, ka rui em a ni” a ti mawlh mawlh a. 

“Chaw chu ei ve nghal la, ka dawr kal pahin ka thlah nghal dawn che nia” ka lo ti puat. 

“I nau hian a phal te chuan” inthlahrung anga lang si, inthlahrung hmel pu si lo hian a ti leh mai a, a va nghal tak. Kimteii tan pawh a ngeiawm ve dawn hian ka hria. 

“Chaw i heh loh hmel em mai, i ei ve thei ang” a lo ti ve hmak a. Kan boruak vel chu a nuihzatthlak angreng. A ṭhing rim a nam bawk nen, Zuali chu inbual turin ka ti a, a intleuh zawk hnuah chaw chu kan ei tlâng ta nge nge a. “Nizan thil thleng vel min zawt dawn lo em ni?” A ti leh hmiah mai. “Ka hriat ve kher a ṭul hleinem” ka lo ti si, “Nakinah kan pahniha kan awm hunah ka hrilh ang che. Tlema tlemah ka thi lo chauh alawm.” A ti leh kher a, kimteii huat tawk a tling der. An inbakkaih takngial dawna ka hriat avangin ka ding vut a, “Pangngai teh u, Rinzual, nang pawh Kimteii hi zah der ve rawh, Kimte, nang pawh rui lo hai lo zawk i nih kha. Ka insiam ang a, kan kal nghal dawn nia” ka ti a. An ngawi dun thei hram. Lanpuii pawh Mampuia te school- a thlen tawh thu leh zirtirtu erawh a la hmuh loh thu a rawn sawi a, Zuali vel chu nakinah hrilh tho ka tum, midang kâ emaw amah Rinzuali kâ atanga a hriat vaih chuan thil a pawi thei dawn tih ka hre ve tlat. 

Dawr kan thleng a, Mimi a lo awm vâng tawh. Rinzuali nen kan inphur chu mak a lo ti nasa mai a, Zuali lah dawrah a rawn lut ve zel bawk si. Dawr atang hi chuan an in a hla tawh lo bawk a, a kal ve tawh mai ang chu. “Tete, i fel ta sa sa, auto fare cheng 50 tal min lo pe mai teh a, kea han kal nulh nulh chu a nuam lo ve e”. A ti a. Îhe lovin ka pe nghal. Kan inphurh chhung khan zana thil thleng sawi a tum ngial a, “Nakinah i sawi zawk dawn nia, a bengchheng sia, ka hre hleithei lo” ka ti tlat a, nia, ka hre châk lo a ni. Mimi nen pawh chuan an inbe lem lo. Keiin thil dang ka ngaihsak ta daih bawk nen, “Ka kal a nia” ti zukin a chhuak ta nghal a. 

“Engtin nge?” Mimi chuan a ti hak a, a lungawi loh hmel lek lek, ka hrethiam, Rinzuali nen kan inthen chhan a hre ve vek si a. 

“Kan inhmu fuh a, chuvang nih kha, ho lutuk.” Ka tihsan ta daih, Mami chungchang kan sawi zui ta bawk nen, Rinzuali chu rilruah a awm leh ta lo. Chhun thingpui kan in laiin Lanpuii’n min lo text a, “Nizanah mikhual i va nei cute awm ve” tih chu! A msg chu ka melh vak ringawt, engtin nge a hriat theih? Rinzuali’n a va sawi lehpek em mawni le. “Engtin nge i hriat?” Ka va ti a, “Ka hre ve tawp” a ti mai bawk si. “A ho em mai, ka ṭanpui angah ngai rawh. I haw tawh em?” Ka va ti ta daih a, “Hey, in ka thleng chiah, hmaichhanah Mampuia chungchang chu kan sawi dawn nia. “ A rawn ti ve mai a, Zuali hi chu ka rilru a hriatchian vang nge a thik buai duh lo pawh ka hre lo. Mahse, Rinzuali hi hrilh hriat hrim hrim chu ka duh, Lanpuii a va biak teivet hi ṭul ka ti lo. 

Ka nu nen kan inbe leh a, naktukah Mami chu an rawn phur phei dawn ta a nih âwm chu, Phai lam beisei viau mah se; doctor te ber an beidawng tlat si a. Sawi leh sawi hnu cancer rau rauah Thin cancer hi chu a rang ve êm a, a tir têa hriatchhuah a nih loh chuan enkawl hi a harsa bawk a ni. Tin, ka nu chuan, “Amah Mami pawn ina rawn hawn a duh thu a sawi chamchi a, Bawihteii hmu leh lo va kal mai a hlau a ni ber, a ngenin min ngen zawk. Mahse, rilru hi chu a na a ni, fanute thi mai tur han en tawp mai chu, kei zawng ka vui a ni, Pathianah chungah pawh hian” a ti hmiah mai. Ka nu rilru tur hi ka va hriatthiampui phak lo maithei, mahse, a na dawn tih ka hria. Kan pian ve hmain Mama û chiah hi kum 2 vel a nihin a lo boral tawh a, chutah pawh chuan ka ni sawi danin a ât phah lek lek a niawm e. Tunah a fanu puitling tawh, kehthei dawma a dawm ngei mai chu natna chimawm takin a diriam mek chu a ni si a, intih pachan a har duh khawp ang le. 

Bawihteii hi zinga a kal tur ka thlah a, tlai lam erawh two wheeler taxi kan hmansa mai zel a, kan thenawm tlangval Hmuaka hi a fel bawk a, vawiin ka haw pawh a service tawh lo nge ni a rawn peng lut ve a. Bawihteii’n lehkha a lo zir malh malh a, Kimteii erawh a lo inbual mek thung. “U Tete, Mami chanchin te ka lo hre ve a, a pawi hi ka ti lutuk a ni. Bawihteii ka lainat khawp mai” a ti ve mawlh mawlh a, Bawihteii hi tupawh mai hian Bawihte an ti vek mai, a hmingpum hria hi an tam vak lo maithei a ni. “Ni e, tihtheih kan nei bawk si lo a nih hi.” Ka ti hnawk a. “Enteh, kan rawn inphurh thlak laiin, “Apate, Ama hi a thi dawn a mi? Mi pawh an thih dawnin damdawi inah an awm thin sia’ a ti reuh a, ka hnuk a ulh alawm, chhan dan tur ka hre lo lutuk a.” Hmuaka chuan a ti leh mial mial a, “Naktukah rawn haw chu an tum a, ni e, Bawihteii hian rilru a kap ve êm bawk a ni. “ Ka ti ringawt. Kimteii inthlak zo nen chuan an inkawm ta rih a,kei pawh ka inbual zui nghal. 

“I ex chu i va thlah thei maw? “ Chaw ei laiin Kimteii chuan a ti sep a. “Umm dawr atangin a haw ve ta a nih kha. “ Ka ti hul hak. Mami te an lo haw dawn bawk sia tiin, “Naktuk chu ka chawl mai ang. “ A ti a. Ka ngaihbel nge ni Kimteii pawh hi a cher deuhin ka hria, kan chhungkaw boruak hi a rit ve bawk êm a ni. Zanah an school boruak vel ka hriat duh bakah ina awm ringawt pawh ninawm ka tih vangin Lanpuii te in ka pan leh a, Sailova pawh a lo la awm, kan inbe hlut a, “I bialnu chu rawn lenpui ve la, kan hmu ve chak alawm” ka ti luam a, “Bialnu em em pawh a la ni lo, a awmdan saw ka hrethiam lo. Keimah zawk hi karlehah hawn phei ka rilruk ve tawh a” a ti a. “Cham ve reng se ka duh nen, ka nî te an buai deuh a niang, an rawn chah a, a rualin keini pawh kan va phei ve lawk dawn mawni kan lo tia, chhungkaw inhmuh khawm a châkawm sia” Lanpuii pawn a lo ti vat a. A tha khawp tak ang, tunah chuan a pate lamah belh tur mumal tak a nei ve tawh a, vanlaia tla ang a ni ta bik lo. A putea te lam nen inzawm tho mah se; awmna hmun a lo inhlat nen an intlawh pawh lutuk thei bik lo va, va zin mah se; pawi ka ti lo hle. Sailova nula rim tur a chhuah hnuah kan pahnihin Mampuia chungchang chu kan sawi dun ta a. 

“A thian kawm ve ber Sammy leh Valtea te chuan, an sawi ṭha ngam chiah lo nain an class ami te pathum hian ani a ke lama buaina nei, han kal bâi leh deuh thin chu an lo nuihzatin an lo fiam thin a niawm e. Mampuia te tlar hnung chiaha thu Didini an tih khan, ‘Ih, a lehkhabu pawh an pawh thlersak a, nang kebai mai mai’ an tia .’ a ti reuh a. Chung velte chu an class teacher bulah ka sawi a, a lo ngaihven tur thu a sawi kha maw. “..a ti malh malh a. Mampuia hi a ke zawm fuh mah se, boruak a han vawh deuh chang hian ruhseh ang hian nâ a rawn ti a, a kal dan pawh a dang hlek thin. Amah hi naupang inkiltawih mi leh nunnem deuh ang kha a lo ni bawk nen, zuam a lo awl deuh te pawh a niang. “An zirtirtuin a lo ngaihven chuan engkim a tha leh vek mai ang, a thlen leh chuan min hrilh vat la, chung naupangho chu ka lo zilh hlak dawn nia” Mampuia pa niawm tak chuan ka han ti vei thluam a. Ka hreh miah lo tak tak. Khawthlang ramho ang maia school leh college vela in-bully vel hi ka ngai thei thak lo, Mizo zingah pawh a lo hluar ve ta hle a nih dawn hi, Hmanni lawkah pawh khawi khua nge ka hre chiang chiah lo, an thiannu, a pahrawnin a pawngsual vanga a virginity hloh ta kha ama thiante ni ngeia lang ten msg hmangin an bully chiam mai a ! An msg kha a viral ta si, mi tam tak rilru a tinain a tithinrim a nih kha. Kei ka lo hmu tlai deuh a, ka va thinrim tak, an la naupang a tia chhuanlam siamsak chi a ni lo, khang mi, midang diriamtu te ho kha an chhungkaw background a chhuanawm viauin ka ring lo. Zilh loh fa tih a chiang reng. 

“Nizan chu i mutui thei maw?” A ti thut a, mi tihamhaih lek lek alawm le. “Tui ve mai e,.” Ka ti a. “A rawn kaitho leh lo che maw” a ti kher a, “A chatthla ngjal a niang, zingah pawh ka thawh khalh, tak taka amah bawkin em ni rawn hrilh leh che a, a va indah hniam peih tak” ka ti nang nang a. Chek hlakin, “A number ka neih hi a hmang tawh lo a niang, min hrilhtu chu i nau duat Kimteii mawle” a tih chuan mak ka ti deuh, ka hrilh sa vek kha a ni sia, a va ṭawng thei reuh tak. “Mahse, amah Rinzuali kha a lo ngei ve lutuk a, chuvanga min rawn hrilh a nia, a hek duh vang che a ni lo a nia” a tih zawm zat a. “Rinzuali chu lehlamah a khawngaihthlakawm ka tia sin” ka ti hman chauh, “Khawngaihthlakawm a awm lo, khawngaihthlak ti ve mai rawh. Nia, ti nge tihian a nun tlat le” a lo ti vat a. “Hmm, keini aia upa fe pawn khawngaihthlakawm an ti ve tho, ninawm ahh” ka ti hmuk a. Ka nin tak tak vang a ni lo tih chu a hriat tho ka ring. “Khang ho pawh kha hrilh hriat zel tur, dik anga lang, dik si lo kan hman nasat tawh vang a nia inhnialna pawh a nasat thin. A dik awm renga a dik lo zawk hman tlat zel, tleivar, lainatthlak, ka kal paih lo tih vel, awii a tam si, Gen Z ho hian an hmang dik lo lui ni ten ka hre thin, han hrilh ila min la haw zawk mah a..” a ti ta hlut a, a ha hawlh zawng tak a nih awm hi. 

Ka hawnsan dawna ka fawh vawng vawng laiin Sailova a rawn lang thut mai a! Kan lai dun ve khawp mai. Mahse, ani mi â lo ta chuan, “Ee..chhunzawm r’u, mut hmaa han inkiss vawng vawng hi a hrisel an tia nia aw” a ti ta a. Kan zahna pawh a rawn tikiang ta duak, “Chuti chu lehlam hawi la, ka’n fâwp leh lawk” ka ti a, Lanpuii a ṭeu hlar mai. Nui bâwk bâwkin kan inmangṭha ta a. Kimteii chuan a hmai a lo phih zo vel chiah a, kan bula a awm atang hian Mami leh ka ni ten an uar bawk a, skincare lam hi a uar ve khawp tawh mai. “Eng nge Lanpuii chu nizan vel kha i va hrilh kher a” ka ti hlur a. 

“Ka ngei alawm, i bialnu hlui thawr thawr kha” a ti duh lek. Lanpuii ber a thinrim chuang lo va, a pawi chuang lo ve. “Ka nute bulah chuan sawi chi miah loh aw” ka ti thung. Johna hnen atangin Lucy pawh a dam that chhoh ve zel thu ka hria a, a lawmawm e. “La rai lo se chuan ka la pawm thei maithei” a rawn tih pawh chuan mipa takin ka hrethiam tho mai, mipain tihtakzeta kan hmangaih tawh hi chu awlsam taka thlah hi a harsat chu thuhran, mipa intipa ve tawk tak pawh kan tlawm hreh lo fo, chutihrualin a tawpkhawk, a bikin mipat hmeichhiatna vanga buaina erawh chuan kan mipatna rilru a fan chhuak a, thinlungin la hmangaihin la ngai mah se; kan chapo vena hian tlawm a phal lo bur ka ti mai. Mipa kan inang vek lo thung a. Engpawhnise, Johna tan chuan Lucy chu pawm leh chi ziazang a ni tawh lo. 

Mami te pawh tluang takin an rawn thleng a, kalkawngah harsatna em em an tawk lo hlauh bawk. A hmel a dâng deuh leh a cher deuh tih lohah chuan a chhe em em lo. Bawihteii kan hrilh lâwk duh lo va, a school bang a nu a han hmu chiah chu a rak chul a, a pawm chuk chuk mai. Mami pawh hnukulh tih hriat zetin a chhing vang vang. Kimteii’n Mama te chhung pawh rawng a bawl kep vek a, zanriah pawh an ei ve nghal a. Dam lo rawn haw e ti lo chuan kan hlim tlâng viau mai. Kei pawh ka leng chhuak ta lo mai. 

Mami te rawn hawn atangin inleng kan nei kal ve ta reng a, ka nu college kal a ngai thin si, ka pa pawn huan lam a tlawh tam thei meuh lo. Ka ni pawh a hna lamah a bur tho a ngai si a, Kimteii lah chawhnu lamah a rawn haw thei chauh bawk nen, inleng thingpui lo lumsak luklak velah a buaithlak deuh thin a, mahse, Mami hi intiharh lui vein amah ngeiin a lumsak chang a tam a, U Lawmi a hlu hle bawk. Lanpuii pawn a rawn tlawh ve tawh a, ka nu mimei ka veng viau naa, nu fing fel tih takah tha takin a lo bia a, Mami nen pawh an titi nasa mai. Kei pawh Mimi a rintlak tho avangin ka pa huan lam ka tlawh zeuh zeuh a, dik tak chuan dawra awm nilên ai chuan huana han teivah leh hlawhfa han vil te, han thawh ve bawrh bawrh khan ka rilru a hlim a, ka taksa pawn a ngeih daih zawk. Mahse, tette aṭanga ram hna thawk ṭhang lo ta chu ka zeihawi vak lo a, hei hi chu min dem em em ka ring lem lo. Kan hlawhfa thenkhat, keimah ang rual vel tur, an landan erawh kei aia upa daih tur si te, rim taka loh theih loh vanga an han thawk ṭauh ṭauh mai ka hmuh te hian vannei ka inti thin. Tihian, nitin thlansa phulkai leh kâwla ni chhuak chhiara thawh hah ngai lovin nu leh pate zarah nuamsain kan awm ve thei a, lawm hliah hliah tur hi kan ni. Hauruang lamah pawh hmelhriat ka nei ve fur tawh a, an felin an polite em em a, mikhual chungah an tha ka ti khawp mai. 

Mami a la that deuh laiin amahin a châk ngang bawk a, chhungkaw picnic ang deuhin kan huanah hian ka patea te chhungkua nen, Mama te bakah Johna leh Mimi te nen chaw kan zu eikhawm a, a nuam kan ti hlawm ngang mai. Ka pa pawh a huan chuan a tilungawi ve hle ni tur a ni, a hawiher a zâng hle. A thlang luiah tui kan zu thehkang leh a, kaikuang tlem kan man. “Khitah khuan ka zu intleuh lawk teh ang, ka ni chuap mai, U Mimi, lo kal ve rawh” Kimteii chuan a ti lâng lâng a. Mimi paw’n rang takin a zui ve mai bawk. Tui han chenna tham a awm hran lo va, naupangho tan erawh a nuam tham viau,. An ri chel chul mai. Kimteii te intleng tura an kal chu Mimi zawk rawn let leh vatin, “Tete, Lal John, Kimteii rulin a chuk” a rawn ti tuar tuar mai. Rang fahranin Johna nen chuan kan tlan chho nghal a, Kimteii chu thei leh thei lo hian a rawn bawkvak titih a, a thlaphan hmel hle. “Khaw maw, khawilaiah nge a chuk” tih pahin ka thutchilh a, a kheimit chung bawr lai chu kawkin, “Tah hian” tiin a ṭap par a. Ka pawm kang lawp a, thlam lamah ka chhohpui ta a, naupangho pawh chu Johna leh Mimi ten an au khawm a, an rawn chhawm chho nghal bawk. Ka nute chuan thlabar hmel takin Kimteii ka pawm chho chu min lo thlir thap a, ka pa leh Mama te rawn chhuk vein an zawn chho ta a, a rit ve nulh roh sia, ka thaw hluam hluam mai. A chuktu rul chu eng rul tak ni ang maw? Mimi sawi hmang kha chuan khuavang rul a nih duh hmel ka tia, rul lam hi ka hre thui lo hle, Pu Van Detail-a report pek bakah rul mantunu nau chaw bâwm lian deuh kha ka en zeuh zeuh tih loh chu a hranin ka ngaihven lem lo. Patea a bengvar khawp mai, kan huan sira changel kung chu va kitin a tui chu Kimteii a intir ta zung zung a, ka pain rul chukna hmuamhma chu a zai kak bakah a chawn puar laiah an ṭawn khalh bawk. Kimteii chu a thaw a hah deuh tih a lang, kan thut muttir a, a ke hnuailam chu a duk rûih mai. Ka pain Hauruanga a hmelhriat tha tak a call nghal a,Sub-centre-ah Anti venom injection an lo kawl hlauh mai ! Khaw thenkhatah chuan PHC-ah takngial pawh Anti venom hi an kawl khât a nia, a lawmawm tak tak a ni. Kei leh Johna’n Kimteii chu kan tlanpui ta vang vang a, a hla lo bawk a, hmanhmawh takin an lo jection a, changel tui kan in tir kha a lo tha bawk nen, an jection atanga kar lovah Kimteii pawh a rawn harh chhoin a thaw hah pawh a reh ta tial tial a, a ke erawh a la rap ngam lo. Vanduaina tawk mah ila, zanriah chu hlim takin kan huanah chuan kan ei ta hlawm a, Johna nen phei chuan kan dul kan zut kan zut mai. Boruak a nuam si, Mami hmel hmuh pawh a nuam takzet. Thlam luhka hmawr atang chuan huan chu a thlir kual a, mitmeng de sawr sawr chung hian, “Ka thlir leh hmuh hnuhnun berna hun a nih tawh ka ring. Vawiin chu nuam ka ti khawp mai. Ka hah a dam sawng sawng mai” a ti sep sep a, ka nu a lo tuidul leh hman, nurse senior tih takah ka ni chuan, “Mai mai a! I han dam chho ang a, schoola thawk tawh loin nitin i pa nen in zu feh ziah tawh ang. Hauruang tlangval bialpa i han nei ang a e, nuam hi i ti dawn lutuk” a lo ti zung zung a. Patea fanu upa ber Saiteii pawh chuan, “Dik chiah, kei chu school kal hi ka ning, papuia tel lo pawn kan kal ziah dawn nia, chaw ei tur ringawt pawn” a lo ti ve zat a. Mami pawh a nui ve hawk hawk mai. Tlai dar 6 rik hma deuhin huan chu kan chhuahsan a, Kimteii pawh a titi leh thei tawh a, ngaih a ngam viau, mahse, a tukah ka nu chuan incheck up turin a hrilh tho, a ngai ve bawk a ni. 

Huan kan kal aṭanga ni 4na vel atangin Mami chu a bet chho ṭan ta a. Kimteii pawh kha a incheck up a, a tha e chu an tia, a ke erawh duh angin a la rap tha ngam meuh lo. Chu chuan in chhungkhur a chetna turah pawh a chet ṭhattir hleithei lo va, a inthlahrun phah, Mami a han zual nen, Mimi pawh dawr aiin kan inah a chetla tam ta a, ka nu pawh a thawhpui te an fel a, a rawn haw hma tlangpui. Tun hnaiah zirlaiho test runpui an neih lai a ni sia, chawlh a la la hleithei lo a ni. Lanpuii te pawh Sailova ruala zin an tum avangin an kal dawn zanah ka va lang ve hram a, kan boruak avangin ka kal khât a, min hrethiam em em tho. “Zan 3 vel kan va châm ve ang a, rei zin thei pawh kan ni lo, Mampuia hi a zirlai a bahlah ka hlau sia” a ti siam siam a. Ka hmu khât deuh nen, ka ngai tawh bawk a, ka kuah run reng mai. “Nia, cham rei a ngai lo, ka ngai dawn si che a” ka ti sup a. “Lo inenkawl tha rawh aw, nang ber hi i chak that a pawimawh a nia, in chhungkaw tan” tiin min melh ralh a. Ka fawp thut, tun ṭum chu kan duhthawh dun hle, Mateii leh Mampuia te pindan lamah an awm daih si. Ṭhutthlengah chuan ka bawh thlu a, min kuah ve chial mai. Kan thaw pawh a rang dun ta viau, a mitmeng pawh a ni ve riai mai a, min zinsan dawn vang hian min thlahlel zual ve a nih ka ring. A tawp thlenpui ka tum hran lo naa, pindan lehlamah a fapa te awm lo se pindanah ka luhpui duh mai ka ring. Mateii’n, “U, thingpui in ang u, ka lo lum ang, ka in chak” a rawn ti ta lauh lauh a, kan thu tha sawk sawk. Aw lâwi deuh hian, “Aw, va lum rawh, in ang u” a ti a. Ka lo nui hawk ringawt. Dar 9 a pel deuh chiah tihin ka nuin min lo call a, “Lo haw vat rawh, i u hi a chau zual a nia. “ A rawn ti hlawk hlawk a, ka ding nghal uaih, Lanpuii pawn hrethiam takin, “I rawn kal hram a, a lawmawm, va haw vat rawh. Chanchin ka lo ngaichâng ang. “ A ti ve mawlh mawlh a. Kawngka ka pel fel tihin, “Ka hmangaih che” a ti sep a, ka hawi let rang ngei mai, ka lawm bawk si, lai deuh reuh bawk si chu ka nuihzatthlak ngawt ang. A bianga fawp zauhin, “Kei pawn ka hmangaih che” ka ti a, kan invailiam ta a. 

In ka thlen chuan mi tam vak lo an lo awm a, ka nu mitmeng râng chu ka hai mawlh lo, inleng an awm ve si avangin min hau hreh si. Mami bulah ka va thu a, ka nu sawi ang em em chuan a lo awm hran lo, nachhawknain a lo chhawk tawh bawk a, a hrisel that laia khabawr a neih vanga a phun hlak hlak thinte, a biang puar a sawisel thin te kha a ngaihawm letling ta. Tunah chuan a biang a ki vân tawh a, khabawr chu sawk loh a khabe te chu a zumin a heh a ro a, a duk deuh bawk. A mitkhur te chu a thuk dûk tawh a, a ban puam chum buang thinte kha ka hmer zawh tham lekin a tê tawh. Ka va khawngaih tak e aw. Bawihteii pawn a nu chu a dam lo tih a hrethiam ve vek tawh a, mahse, naupanga thuchang la dam leh vat turin a ngai thung. Ṭawngṭaipuina kan dawng nasa a, hei vangte hi a niang, Mami pawh cancer thi mai tur mah nise, hmuh a nuamin mi lo kantu te pawh lo biak ve a tum hram hram zel a, biak rei chi erawh a ni lo thung. U Lawmi leh ka nî hian an vil chawt a, ka nu chu a ṭap dawn zel a, a bulhnaia awmah an duh lo. Kimteii leh Mimi ten inleng lo kilkawi bakah thingpui an lo lum a, Saiteii te unau pawh a hman hman chhun lamah an rawn phei ve reng bawk. Chhungkhat laina te hi chu in hrang chan tawh hnu chuan han inngaihsak chiam hleihtheih a ni tawh thin lo va, mahse, chhiat ṭhata kan han inpui liam liam hi a hluin hei bak inngaihsak dan a awm lo, tupawh mahni buai buaiin kan buai ve tawh a, inphut vak chi ni pawn ka hre lo. 

Inleng han han ṭin zo ta maw tihah, “I unaute pawh an rawn lang ṭiam ṭiam hlawm a, khaw nge khaw nge an ti reng hlawm a, tun ang boruakah len chhuah reng te hi a zah pawh i zak lo’m ni? Hetah kan buai em em a, i pa nise a hritlâng âwmnâ vangin a chechâng peih meuh lo va, nang ber i chhuah nulh zel khan a mawi lo. Nuthlawi ringawt ngaih pawimawh mai. A khamawm lutuk.” Ka nu chuan a ti ta hlawih hlawih mai. Mimi bak mi hrang an awm lo va, mimi chu kan en mi hrang lo bawk nen, a sawi hreh lo khawp mai. 

“Tun hnaia ka len vawikhatna, an zin dawn a, ka va thlah a nih kha” ka ti hul hak a. Ka lungawi vak bik lo. Rilru ipik ve tho nen, Lanpuii nihna a sawi kai teivet hi ka kham ve tho, ani ai chuan nuthlawi a ni tih hi ka chiang. 

“Zin vang vang rawh se, a ko peng reng che a, in chhung i uap hman lo. Rawn haw tawh lo se, tikhan inṭha then u la a tha mai. “ Ka nu chuan a la ti ta fo a, ka ni chuan ka tawng hmain, “Em em a che, rilru hah lai laiin, insum deuh teh “ a ti ve ta hlak a. Ka nî hi nula senior a nih vanga u te nupui a zah loh vang ni loin ka nu nen hian an inhrawn rei tawh êm a, unau pianghmun ang mai hian an inen tawh zawk vang a ni. “Nang lah hian lo ṭan ziah suh, Lanpuii hi mo atan ka duh lo, Then ang che. A tawk” ka nu chuan min rawn melh pahin a ti ta hmak mai le. 

“Ka ṭhen lo vang. Hetiang zawng chuan min nawrlui suh, Nu..” tih leh pindan pan ka rual a, inhnial ka peih lo. Mahse, ka thinlung a na ve zawk, ka nu min hringtu ngeiin ka bialnu, ka duh leh hmangaih chu then turin min ti ta si a, Mami hetiang a nih hma khan a sawi zauh zauh nain ṭhen tur êm kha chuan min la ti ngai lo. Zanin chu a inthup thei tawh ngang lo a niang e. Mahse, ngaihtuah loh luih ka tum tlat, Mami vanga rilru hah tawh sa hi tihhah belh ka duh rih lo. Dik tak chuan Mami a beh tak hnuah hian min tir a nih ngawt loh chuan ka chhuak lo tluk a ni. Zanin ataka ka nu a han thinrim viau kha ka lâwm viau bik lo tlat. 

A tukah Mimi nen pawh kan sawi dun ta chiah a, “Nu Saii pawh Mami vangin a rilru a hah si, nang ber i awm loh vang khan a sosang ve thut a ni mai. Engahmah ngai suh. “ A ti ve siam siam a, “Chutiang chu nise ka duh khawp mai” ka ti ringawt. Lanpuii te pawh Thenzawla an chawlh laiin kan inbe zuai a, ka nu ânhla te kha hre ta se hrehawm a ti dawn mang e.  

Zanah Johna leh Ngaihi te pawh an rawn leng ve a, Johna hi chu a rawn lang reng a, Ngaihi erawh a vawikhat rawn kalna a niawm e. Mahse, nula fing fel tih takah a tlangnel thiamin ka nu te nen pawh an inkawm nghal bawrh bawrh mai. Kimteii a nawmsam chiah loh vangin thingpuite a lum a, a fel tak tak a ni. Thingpui in lai takin, “Lanpuii te lah an lo zin daih a, lo kal ve se ṭha tur” tiin Ngaihi chuan min rawn melh zauh a, ka nu ka en nghal vat, a hmel a danglam lo. A fing ka tih tawh kha. “Nia, va zin thawveng ve rawh se” ka ti ringawt. Ka nîin thu dang daih a rawn sawi a, ka thaw huai mai. An haw hnuah, “Johna bialnu chu a fel hmel reuh kha, kawm a nuam si, bakah nula hnahkhat te a la ni bawk a. “ Ka nu chuan a ti leh kher a, ngawi rengin ka phone ka khawih a, “Kimteii leh Mimi te bakah Saiteii te unau kan tibuai hle a ni. I U Lawmi lah hritlang khawsik a lo nei ve leh bawk si,.” A han ti leh hluai a. Ka la ngawi reng, ka ṭawng châk lo a ni ber mai.

“Nuthlawi lungfingi chu i be leh ta mi? “ a rawn ti leh, a ṭawng duh mah mah a ni. “ I mak ve hle mai, nu pangngai tak i ni emaw ka lo tia. “ Ka ti ve ta ngat a, ka ding hluai, “Ṭhu rawh, zaninah thutlukna siam ang che. In tan inṭhen hi a ṭha ber, i û heti hi a ni a, nupui i nei dawn a nih chuan Bawihteii hmangaiha enkawl thei tur an ngai, ani fa pahnih nei ang a nia, kan khawsa ho thei lovang. Ka thusawi hi ngaihtuah chiang ang che.” A ti ta khalh khalh a. Ka pa pawh a ngawi hmuk mai, ka nu thutlukna chu a pawmpui a ni mahna, ka thlavâng hauhtu ber ka ni lah Mami pindanah a awm daih si. Pindan pan ka tum laiin, “Vanlal, i hria maw? Luhlul chhuah eih suh ang che “ a rawn ti leh hram a, kawngka chu ka khar na mah mah maithei. Sawi tur ka hre lo va, sawi loh tur pawh ka hre chuang lo. Tun dinhmunah rih chuan ka nu hi ka tan a demawm em em a ni, Lanpuii a iai chhan ber chu nuthlawi a nih vang a ni ber ang chu, lehlamah Mateii leh Mampuia an awm si a,ka nu hian ka hmalam hun a thlir hian chung vel chuan a tilungngai ni berin ka hria. Aa, ka hah, ka chau. Lanpuii biak tha pawh a tho lo, amah pawh hi a reh riau, msg a hnutchhiah bawk si lo. 

“I va reh ve” tiin ka va text hmasa ta nge nge a. 

20 mins hnu velah, “Eng thutlukna pawh siam la, ka dem ngai lo vang che. “ Tih thu hi min rawn thawn ringawt !