Hmeithai 8

HMEITHAI (8)

Ziaktu : Toni Râlte

Hun a kal ve bek bek a, Lanpuii nen pawh kan inkar a ṭha zel rih. Ṭhianpa Johna’n bialnu thar a neih lawmin friday tlaiah Lanpuii inah chaw kan ei khawm dawn a, chhunah lei ngai ang ang kan lei lâwk vek a, Lanpuii a rawn ban har thin vangin keini lam erawh rawngbawl a ngai nen keipawn dawr ka khar hma a, Johna bialnu thar chu Lunglawn ami Ngaihi a nia, an inrual khat viauin ka ring, a hmel a that bakah kawm a nuamin a bula awm a nuam. Kan inpawh nghal em em mai a, Lucy kha a fel lo ve tihna ni loin eng emaw chang khan a thutak run thin a, an ina han len changte khan a mood fuh loh châng chuan nuam lo thei tak a ni, Ngaihi erawh kan inkawmna a la rei lem lo bawk a, tunah rih chuan a hlim theiin a nuih lah a nui ring, Johna nen hian hmanah daih an inhre tawh a, mahse, ngaihzawng nghet nei ve ve ta chu helam hawi zawngin an inbe ngai lem lo va. Hetia an han single dun takah chuan inbe chho thar lehin tihian an inkawp rem chho ta phian a, Johna hmel pawh hmuh a nuamin a phur sûrh zel a, ka lawmpui takzet a ni. 

Inah ka haw phawt a, inbual tê têin Kimteii bulah chaw ka ei chhuah tur thu ka sawi a,. “Ehh! In dine out dawn ni maw? Nakinah min la dine out pui ve teh aw, ka châk ve a nia” a ti ham ham a. “Tehreng, thu hi han awih phawt mai la maw” tiin a biangah ka piai zauh a. Farnu anga ka en avang leh a mizia hi a lawmawm reuh riau avang hian kei pawn ka ngaina ve tawh hle. Mami nen tak pawh hian an inngaina. Ka chhuah hma deuhin ka nuin min rawn call a, a thiannu fapa ICU-a an nawrluh thu leh va lang ve turin min rawn hrilh a, ka hman loh thu ka sawi chuan a ṭêk ngang mai. “Chaw eikhawm tih vel a ṭul em ni? Kei hna avangin ka lang thei lo va, ka thianthaber a ni ve a, min beisei ve viau asin le. I mak êm mai” a ti zêk a. “Aa, nu, kan lo tum ve laklawh tawh sia, ṭhulh leh kha a nuam hleinem, a thih tak leh ka va kal ve mai dawn alawm” ka ti ta ngawt a. 

“Tun aṭang hian Lanpuii thu thuin i awm ringawt tawh a nih hi. “ A ti hlak a, a dah nghal daih. Va kal ve ringawt ila tihtheih ka nei dawn pawh ni hlei lo, ka ngaihtuah zui vak peih lo e a. Ka nu hi chu a caring mah mah zel a, a thiante leh chhungte lakah hian a soft thei si, amah leh amah a intihrehawm a ni ringawt. Tunlaiah mi kan buai vek tawh a, eng emaw deuhte a nih loh chuan kan tana hun pe turin midang hi beisei sang vak lo ila kan hahdam a ni mai. 

Mampuia leh Mateii te chu room lamah lehkha an inzirtir a, Mateii hi chuan kei tih loh hi a la nel lutuk lo ve deuh a, Ngaihi a rawn tel ve bawk nen, nuam a tih chiah loh ka rin vang a nia room-a awm daih tura ka tih chhan pawh. Vawksa kan chhum tawrh a, Ngaihi’n bai thak a siam mawlh mawlh bawk. Johna’n inla patling fe hian arsa a kang sar sar a, chutia han tih hluai pawh kan tum hran lo. Lanpuii leh Ngaihi hi inpawh se, engkimah kan thianho hi lungrual ila tih kan duh vang a nia Johna nen pawh he thil hi kan rawt ni. Ngaihi inthiar lawk hlanin, “Lem sek a va châkawm tak, ka va kal lawk dawn mi le” a rawn ti sur sur a, ka sawi reng kha, chaw eikhawm tih luklak nikhua chuan zu hi kan leklam lo thei thin lo. “Ngaihi’n a phal mi?” Ka ti a, “Min hrethiam ve mai ang, hetiangah te chuan” a ti si. Lanpuii ka hmachhawn ngam ang em kei hian..”Kan nu rawn hawn hmain va kal la, mahse, a inah chuan ti lo ang. Min hau ang, motorah kan in dawn nia” ka ti a, “Tun tum chu keiman ka’n show ve tawh ang e. “ Tiin a nui vur vur. 

Ngaihi rawn chhuak bulah chuan, “Bawihi, ka nu thil min chah ka va lamsak lawk ang e aw, ka rei lovang” a’n ti zân a. Ngaihi pawh chuan a awih ve mai a niang chu maw. Johna chhuah hnu chuan salad tur chan pahin kan titi mawlh mawlh a. Lucy chungchang pawh kei aiin a lo hre leh daih tawh, mak ka ti nasa..”Tisawn sâwn a pawm dawn chu a ni ta mai sia, ka lainat zawk. Zuia an tih reng reng pawh kha a tenawm êm mai, Johna nen an that laiin tikhawp khan a zarbuai vel a, nei leh duh tawp si lo. Hetiang mipa hi lawm nep ka tiha ka ngaihnep em em “ a ti hlaih hlaih a. Ni e, Lucy chuan nau a pai tlang a, a sawi tawh ang khan Zuia’n a thlahthlam leh si! Lucy chhungte zawk hi an inchhir ve tawh ang em aw, khati khawpa hmangaihtu ka thianpa an hnualsuat a, an pawt ṭhen a, an duh em em Zuia lahin a thlauhthla leh hmak bawk si,. Hmeichhe rilru takin an chawh ngawt mai. Amah Lucy tak erawh han dema sawisel tlak pawh a ni lo, a khawngaihthlak em em zawk, thianpa fa te chu pai se an han inneih dawn vai vai nen. 

“Johna hi chu kaihhruai nuam deuh mai hi a nia, thu a awih thei a, a tha zawngin nang pawn kaihruai rawh. “ Ka ti ve luam a. “Awii a inlak pa ve nak alaia, a thikthu lah a tichhe ve roh bawk si. Mahse. Nia a rilru hi a chhe lo a, rilru puitling tak a neih phei chuan pasal ṭha tak tur a ni mawle” a ti ve siam siam a. Nia, sawi leh sawi hnu mipa hi chu kan rilru hi a puitling mawh ve bawk a ni. Hmeichhia chu fa pahnih khat an neih phei hi chuan puitlin kawngah mipa hian kan phak lo hle tawh thin. Johna pawh rin ai takin a rawn haw leh hma, a hmel hlim surh danah a va hlawhtling tih ka hre mai. 

Engtin tin nge Ngaihi chu a va bekbawr ka hre chiah lo, “Kal ang, in nu rawn haw hmain” a ti leh ut ut tawh. Kei pawh ka tho nulh a, ka motor hunna lam kan pan nghal hlawk hlawk, Lanpuii rawn haw mek bawk nen, hmanhmawh deuhin peg thum ve ve chu kan va peg kha..rum a ni bawk a, a thawk nghal rum rum mai a, a zia zawk. Lanpuii a rawn thlen meuh chuan chaw ei kan lo peih fel titih tawh. Sa chan a ni tawh mai. Kan hmanhmawh lo tlang bawk a, ani pawh a inbual ve leh te te a, a inbual chhungin kan va peg leh hram. Ka mitmeng a phen leh sui tawh ang chu. Rin ang chiahin Lanpuii pawn a hai lo chiang kher mai, mahse, thinrim angin a awm duh hauh lo va, Ngaihi nen chuan innel takin an titi mial mial. Mampuia leh Mateii ten an ei hmasa a, an ei khamah roomah games an khel leh nghal daih. A kawp tê têa tuma chimbuai loha kan han awm chu a nuamin kan zalên halh mai a, Johna kai tawh lah a ṭawng leh lung lung tawh. Keini pahnih hian chaw pawh kan ei tha thei ngut ang e maw. 

“I va in tam awm ve” Ngaihi te hriat phak si loh hian a ti sap a. 

“Umm, i lo haw hman kan hlau sia” ka ti ringawt. 

“Zanin chu ka hrethiam ang che. Ka thin pawh a rim lo a nia. “ A tih chuan ka thaw huai mai. A hunah hi chuan rilru zau tak a pu thei lawi a, a chang lahin a khirhin a khauh fang bawk si. He nu hi ka nupui nihtir ka duh takzet. Dar 7 rik dawn aruaiah kan ei ve ta chauh a, rin ai tak chuan kan ei thei e. Dar 9 velah Johna te pawh an inthlah haw ta a, tun tum kan chaw eikhawm chuan boruak tha a her chhuahpui ngei ka beisei. Ka nuin min lo call a, a thiannu fapa a boral thu a rawn sawi ta, ka lo hrechang leh tawh miah lo chu ka inthlahrung deuh. “Aw ka lo haw nghal” ka ti hul hak a, a thiannu hi Kikawnah an awm a, Nu Malawm kan ti mai zel a, a fapa tuna thi tak hi phaiah a awm char char a, a unau dangte aiin kan inhre pawh ve lem lo. Mahse, ka nuin a ngaipawimawh êm a, haw lohna chi a ni lo. Lanpuii pawn a hrethiam khawp mai. 

“Chu chen chen chaw eikhawm pawn len a ngai em ni? Tlaiah ka sawi lâwk vek tawh a, i nu Malawmi pawn i va lan ve chuan a thlamuanpui ve dawn tehlul che nen, nuthlawi leh nuthlawi ringawt buaipui reng ringawt mai..” a ti tân tân a. Lanpuii a hmer tel sek chu ṭul lo ka va ti tak, nidangah tiang hian a sawi ngai si lo va. 

“Ka va kal ang e” ka ti ringawt a. Ka nu chu a insiam nghal a, tlaivar em lo pawn va lan ve a tum a nih hmel, ka nî erawh a duty a, Kimteii chuan, “Nu, ka lo kal ve ang, tihtur ka nei chuang lo. “ A lo ti a. 

“Nia i peih chuan a pawi lo, Tebawiha nen in tlaivar ve ang a, kei erawh dar 1 velah ka haw ang” ka nu chuan a ti a, Kimteii pawh a insiam ve nghal. Motora kan luh hnuah, “I rim te lah chu aw..mi zinga awm tlak pawh i nih loh kha, ti nge i lo in leh thin a? Lanpuii pawn a phal reng reng ami?” A ti leh hlaih hlaih a. 

“A rukin lawm ka in, ka in tam lo” ka ti ringawt. Digene ka zuk la leh a, mum 5 ka hmawm a, ka ṭhial bup bup, digene hian thil rim hi a that ve thei a, ka rim na lutuk tur pawh a tihziaawm ka beisei a ni. Ka nu chuan ruang a kil nghal a, Kimteii pawh ka bulah a thu ve, hmelhriat an awm nual mai, veng inhnaihtê kan ni bawk a, mi hi kan inhre ve ṭhûm zel. Ka nu chu dar 1 bawr velah ka va thlah leh a, tlaivar ngei ngei tura min tih miau avangin ka let leh. Kimteii chuan thian em em a neih loh vangin ka thutpui leh a, thingpui in zawha zun zunga kan chhuak zawk tih loh chu kan ṭhu tluan parh mai. Fapa thuawih tak chu ka ni ve chiang alawm…hehe. Mahse, ka lu a nat bakah ka râwl ṭhûm,. Kan haw dawnah Nu Malawmi chu ka va hrilh ve zuai a, mit sen râm hian, “In va fel unau tak e aw. Tebawih..chhun lamah pawh rawn lan leh tum r’u aw. Thlalak te pawh a ngai ang” a ti dam diai a, ka E Aw liam ringawt. Ka chau a. Ka mut a chhuak ngawih ngawih bawk. 

“U Tete, an fapa kha in inrual vel hmel ka ti, a uiawm hle mai” Kimteii chuan a ti sep a. 

“Rual vel ang, nia, uiawm khawp mai. Lirthei khalh hi fimkhur a ngai reng asin, a hun lovah kan thihpui nasa tawh lutuk” ka ti vei luam a, a bike khalh chak lutuk chesual kha a nia, kawng a tha tawh nen thalai thisen lum tan chuan han tlan chak te pawh hi a nuam ve bawk a ni. In kan thleng a, thlak pawh ka inthlak lo, khumah ka bawk thlawp. Mumang bo thak khawpin ka muhil..

Dar 10 pelhah ka nuin min rawn kaitho a, “Kal ve i tum lo em ni? Thlalak te a ngai dawn a nia” a rawn ti. Phak zetin, “Ka pa nen va kal u la a tawk reng alawm, ka chau lutuk, dawr pawh ka hawng dawn lo, ka mu nileng dawn” ka lo ti ve hmuk. Ka pa nen an kal chuan a tawk ka ti rih, zan lamah va lang leh ila a tha mai. Ka nu pawh chuan min tilui ta bik lo. Ka muhil leh thei mai tawh si lo va, ka tho va, ka luak a chhuak ut ut mai. Ka in hnem ve bawk êm a ni. Lanpuii msg ka chhang a, call pawn ka be peih rih lo. Ka awm a nuam thlawt lo. Kimteii’n in a lo tifel vel mek a, “I training dawn lo mi?” Ka tih chuan, “Pi te leh nu Malawmi pasalte kha an lo in chhung a, vawiin chu kan off “ a ti a. Chaw ei turin min ti zui zat bawk. Eng ang pawhin zu hi in thin mah ila chaw thlah loh hram hi ka duh thin, chaw thlah hi chuan kulcho a chawh tlat zel a, Johna pawh hi chaw thlah a hrat vang a nia a chauhpui zel thin ni. Mahse, vawiin chu ka va han ei châk lo tak. Bar hnih khat ka bar a, anṭam a lo tlak hlauh a, a tui ka hawp ṭeuh ringawt. A thawk tha ve tho ang chu maw. “Enteh, u Tete, U Hriatpuii kha a thla a hrâng an ti” Kimteii chuan a ti phawng mai a, ka lo hawihai angreng. “An ti ve mai mai a nih chu” ka ti nghut a. “Tak tak alawm, niminah pawh U Peka’n zan laiah a ruang in hmuhnaah khan amah ang deuh thu reng a hmuh thu a sawi, kei chu ka hlau e, ka râp “ a ti leh mawlh mawlh a. “Ka râp ti suh. Mi râp ti rawh. Peka te chu la zawh ve tur nih chu, tunlai chu kan inhmu khât lutuk a” ka ti ve duah a, nui har har hian, “Mizo ṭawng i intithiam e a” a ti a, “Ka thiam alawm, tak taka kan nu hian min correct ziah a, ka thiam phah vek” ka tih chuan, “Hmm, i chhuang ve sia maw..” a ti a, eng emaw sawi leh tumin a ang zuau a, a ṭhulh leh daih. Ka intifai a, dawr ka hawng lo laklawh si, tihtur a vâng leh ta riau mai a, phone ka khawih peih bawk si lo. Muthilh leh hram tumin ka han mu ren rawn a, pindan lehlama Kimteii phone be lâng lâng chu ka ngaithla pah, thawm hi a rin deuh chuan a hriat ve thin a. “Umm, kum tawpah lo chuan ka lo haw thei lo alawm, ka thiam ve tawh lutuk,.umm, awii a, a zahthlak, nia theihtawp ka chhuah dawn ka tih kha, tunlaiah nawmsak duh chuan tuman engmah an pawisa hleinem, min dem bik lovang. Chuvang chuan e, ka chhuah dawn lo hrim hrim” ..tih te a ni nawk mai. Bialpa ve deuh a nei a nih hmel, tumah hian an rawn rim ngai lem lo va, tunlaiah inrim hi kan uar vak lo bawk nen, amah a hmelchhe lo va, a hlim theiin a taima bawk a, pasal tha tak hmu se ka tihpui khawp mai. Ka hriat loh karin ka lo muhil leh ta daih a..

Ka biang a rawn chûl a, ka hmuiah a tawp chat, ka beng bulah a rawn thaw lum ham ham bawk. “Ka pasal tur i nih hi..ka pasal tur” a ti sep sep a. Ka nu ṭawng riin mumang ram ata min rawn kaiharh hlawl, ka pindanah chuan keimahin ka lo awm lo, Kimteii chuan ka bal bawm a lo hai mek a, ka harh tih hriaa min rawn melh zawkin, “Eih, hetah ka awm, thawmhnaw bal ka lawr lawk “ a ti lâng lâng a. Ka mumang kha ka ngaihtuah zui a, tu nge a nih ka hre hauh lo. A tak tak te pawh a ang ka tia, ka ngaihtuahna bawlhhlawh zet avang chuan ner sakin, “Ka muthilh laiin min pawngsual i tum chiang” ka ti bai bâi a. Hlauhthawn hmel lek leka min rawn melh zak zakin, “I zak lo, chutiang sawi suh.” A ti deuh hmak. Ka nui hawk hawk a, ani pawh a nui ve leh mai. Ka nu pawh a va ṭap leh a niang, a mit a sen râm mai. 

Zanah ka ni nen kan kal a, Lanpuii pawh ka rim ta lo. Kan nghet tho a, inrim reng pawh chetsual a hlauhawm. Malsawma chhungte lamin an bawhbuai ta vak lo bawk a, a nun pawh a hlim chho ve leh deuh, mahse, Mampuia sutu motor kha chuan a la mawlh a niang, a sawi leh zauh thin. Hriatchhuah a ni lo hlen mai tur hi keipawn mak ka tiin pawm thiam harsa ka ti ve tho, tih vak dan ka hre bik si lo. Pathianin hun a tihah chuan a rawn pholang mai ang chu maw. Mampuia damdawi in awm lai khan Lateii leh a putea te nen kha chuan kan inhmelhriat tawh a, han inhmuh zui awm tawh hek lo, Lanpuiin lenpui min la tum a, a chhungte neih ve chhun nena inpawh hi kei pawn ka duhdan a ni. A pa te lam pawh a ngaihven ru ve reng tih ka hria, amah a buai ve êm a, a tum angin hma a sawn thei bik lo a nih hmel. 

Zan khat ka leng haw ka nu a lo la meng a, “I va mu har ve” tih paha ka pindan pan ka tum chu, “Tebawih, Lanpuii hi then rawh. “ A ti ringawt mai, mak ka ti nasa mai a, “Eng a? Engvangin maw?” Ka ti hû. 

Mi rawn melh ralhin, “A nunhlui i hre vek tawh em?” A ti sap a. “Ka hriat tur ṭul ang ang chu hriain ka inhria” ka ti kual a. 

“Nakina kan mualpho loh zawk nan thlah thei la ka duh a ni, amah ngau ngau hi tun dinhmunah chuan a tha lo pawh ka ti lo, mahse, nunhlui hian min vaw let fo thin, chuvang chuan in kal thui tak tak hma hian thlah tum ang che. “ A ti ta hmiah hmiah mai. 

“Nu, eng nge i hriat a?” Ka ti tuar a, ka râwl pawh a ring deuh. 

“Naktukah i pa te nen kan sawiho dawn nia, tunah chuan mu phawt rawh, kei pawh ka’n mu ang e” tih leh thawh a rual a. 

“A ngai lo, tunah sawi rawh, khatianga zep leh kual vel kha ka ning” ka ti nghet ve churh si. Chiang taka min enin, “Sum duh vanga putar nei duh chu hmeichhe tha tak a ni thei dawn em ni?” A ti ta a. Ka thawl hawk zawk mai, ka hriat ve loh thil a hria ang a, chuvang chuan Lanpuii a hnawl taah ka lo ngai hman a, ka hre vek si. 

“Ka hre vek, i hriat chin a tlem zawk a nih chu, nu, buai suh. I fapa hian thil tha leh tha lo chu ka thliar thiam ve tawh alawm. Lanpuii hi ka hmangaih a, neih ngei pawh ka tum” ka ti ta hmiah mai. Ka nu ka zah loh vang pawh a ni lo. Ka tumruh ve êm a ni. A lu thing nar narin an pindanah a lut ta daih a. Kei pawh ka lut zui ve zat bawk. Mahse, ka muhil hleithei lo, ka nu thusawi leh mitmeng khan min kap tlat, Lanpuii chu a mo atan a iai tih a chiang tlat a tin ni, nakinah buaina a la awm dawnin ka hria, Lanpuii’n ka nu rilru hi hre ngat phei se chuan amah a inthlahrunna lamah min thlah duh zawk ngeiin ka ring. Ka nu rilru hi ka hneh a ngai a ni, ka rilru a châwl meuh lo. 

Khata ṭang khan ka nu chuan mei nei fê fêa ṭawng a ching ta zauh zauh a, chhan vak dan ka hre si lo. “Mo neih ve lêma nuthlawi neih ngawt pawh chu” han tih te, “Fa pahnih nei ang a ni bawk sia, inthlahrun pawh a inthlahrung dawn lo em ni?” Tih te, âaa a tam mai. Ka nî paw’n vawikhat chu, “Ka u, a hma kha chuan i iai lo viau khan ka hre sia, i fak vei dup zel sia, ti nge tun hnaiah hian i danglam riau a?” A ti tawh nghe nghe. “A chanchin engkim ka la hriat hma thil chu sawi suh, nunhlui hian nghawng a nei ṭhin” tiin ka nu chuan a chhang a, ka nî chuan a chhang zui tawh lem lo. Ka nu chuan min tihnual a, ka rilru a tinuam lo ṭhin. Mahse, Lanpuii nen kan inkar erawh a nghet tulh tulh thung, nupa kan nih lohna chu sex kan la hmang lo chu a ni mai. A in chu ka in ang maiah ka ngai tawh a, Mampuia leh Mateii te pawn an chhungkaw mi leh sa ang hialin min ngai tawh. A sum hmanna tur engkim min hrilh hriaiin min râwn a, amah aiin naupang zawk mah ila, mipa ka nihna a hmu thiam a, min zahthiamin a hunah chuan û zawk a nih angin min zilhhau fô bawk. Ka hmangaih tulh tulh a, ka nu lah a khirh telh telh bawk si. Kan dinhmun chu a buaithlak chho ta hle mai. 

Hetia boruak a sosan rûk viau lai hian vanduainain kan chhungkaw chungah thla a rawn zâr ṭan ve mêk bawk a, engkim hian ipikna a thlen a ni ber mai. Rei deuh tawh tak aṭang khan ka nau Mami hian a hriselna dinhmunah insawiselna neuh neuh a nei ṭhin a, a incheck up zeuh zeuh naa, damdawi an chawh ringawt tawp zel a, dam hlenpui nan a hmang ngai lem hlei lo va. Amah hi a chhel ve reuh a, a fanu vang pawh hian chhel a ngai ve rêng bawk a, mahse, ni 3 chhung zet chu a bet ta hmiah mai. Ka nu pawh a mangang ta viau mai a, Christian Hospital Serkawnah kan in-admit ta nge nge a, ka nî-in a awmpui a, Bawihteii pawh Kimteii kutah a awm ta chawt mai. Mami chu test hrang hrangte an han nei a, a natna an hre mai thei si lo, Doctor te pawh an mangang viau mai. Kan chhungkua a nghawng lo thei lo va, U Lawmi leh ka nî-in Mami chu an inriahpui chhâwk a, kan monu hi khatia Mama nen an han intih thiam loh hnu, Mama’n thutiam neia a bialnu ve deuh reuh a thlah hmak aṭang khan kan inpawh lehzual a, Mama ai mahin Mami pawh chu a ngaihtuah zawk emaw tih mai tur a ni. An fate an lian ve tawh a, chutia ngaihtuah ngai lutuk an lo ni tawh lo bawk nen, ka nî lah hnaah a kal a ngai si, U Lawmi’n min buaipui khawp mai. Ka nu leh pate pawh an mangang ṭan ta..kei ngei pawn ka farnu dinhmun ka han en chuan ngaihṭhat loh rukna lian tak ka nei tawh a, tuman sawi chhuak lem lo mah ila chhuggrilah min kap ṭûn hlawm niin ka hria. Kimteii hi awm lo ta se kan buai zual dan tur hi, in lam chu a kutah kan dah pumhlum tawp a ni ber mai, ka nu a hna aṭanga a rawn ban rualin Mami kan turin a chho nghal a, ka pa lah huan lamah a ṭul bakah a hun awlah Mami bula hun hman a lo duh ve bawk si, kei hi ka ṭangkai nep ta ber maiin ka hria, dawr ka nghak a, banah Kimteii ka pui ve lâwp lâwp a, Lanpuii nen pawh kan inbiak tlem phah angreng. Ani pawn engmah a hai lo va, Mami pawh a kan zeuh zeuh, nu ber a nih ve tho avangin a hun awl neih ve tlemtê chu a fapa tan hman a duh ve tho bawk si, kan hetih vang hian zu pawh a rukin ka in leh ta zauh zauh mai. Tlemin han ruih lai chuan thaw ipik a kiang ve deuh a, kha ringawt pawh kha ka thlahlel a ni ber e. Peka te khan Aizawl lamah hnathawh tur ṭha zawk an hmuh tak avangin kan in hnuai kha a ruak ta a,. A khawharthlak zual ṭhin, ka lenluh vena ber an ni si. Zirtawp zan a ni a, ka nuin, “Naktuk inrinni a ni bawk a, ka han riahpui ve ang e. “ Tiin keiman ka han hruai a, ka nî erawh hnaah a kal a, ka pa chu a kawng a tihnat deuh vangin a tluzâl a. Mama te chhungkua pawh U Lawmi patea te ina an chaw ei an la rawn haw lo. Ka nu ka thlah zo chu Lanpuii rim turin ka inkhalh chhuak zui nghal a, ka va luh chuan ka beisei loh deuhin ka la hmuh ngai loh mipa pakhat hi a lo ṭhu ve khar mai. 

Taksa inphut mawi tawk tak, kei ai chuan a û hlek maithei, hmaifang chhe lem lo tak a ni a. Mak ka ti tih ka mitmeng aṭanga lo man thiam Lanpuii chuan, “ Te, i rawn kal dawn tho tiin ka hrilh duh lo che a, enteh, hei hi ka nî fapa a nih hi, Sailova a nia, mahse, a zaithiam lo” tiin a lo nui sâng a, a rukin ka lo insangmar hman tawh kha a nia, ka thaw huai mai. “Sailo, hei hi ka sawi kha, Tetea chu a nih hi” tiin keini pawh chu kan inchibai ta lâwp lâwp a. “Chuan, Manipur aṭangin i rawn zin tihna em ni?” Ka han ti ve ngial a. Chutia a pa chhungten an rawn ngaihvena an rawn zawng chhuak chu ka lawmpui takzet a ni. 

“Ni deuh tho ti ila, Aizawlah thla hmasa lawk khan kan rawn pem a, putea thu min chah angin ka theih ang angin tihian ka rawn zawng chhuak ve a nih hi..” tiin a nui sâng a. A nelawm khawp mai. Vanduaithlak takin Lanpuii pa chu nikum may thla khan a lo boral tawh hi a lo nia ! A tupa Sailova hnenah a thih hmain a fanu Lanpuii te nufa hi lo zawn chhuahsak hram turin a lo ngen a niawm e. Sailova pa hna avanga Aizawla an rawn pem takah chuan a remchang e tiin Lanpuii chanchin an ngaihven chho ta a, Lanpuii nu thih thu pawh an lo hre ve tawh a, ta ṭang chuan engtin tin emaw an rawn hre pawp chho ve zel a nih awm chu. Pathian hian kawng a hawng ve zel chu a nih hi. Lanpuii hmel hmuh pawh a nuam kher mai, chhungte tia han sawi mai tur a haihchham em em tawh laia chutia a nî te lamin an rawn hre pawp chu a tan a lawmawm dawn êm asin, a putea te chu la awm tho mah se; a nu chhungte lam an nia. Tunah chuan a mal em em tawh bik lovang chu. Sailova chu a ṭawng duh bawk a, kan titi mawlh mawlh, a bula awm chu a eng emaw ti nawm riau roh a, mizo ṭawng a pai lek lek zel te chu kan han nuihpui leh rih thul, la châm ve rih tur ten kan inchah ve maw. 

In ka thlen chuan Kimteii a lo la meng a! Tv on siin en chuang si loin phone a lo khawih mawlh mawlh mai. Dar 10 a ri thuak tawh a, “I va meng rei ve “ ka ti puat a. 

“Ka lo nghak che, i leng rei si” a ti sap a. Nidanga min nghak ngai hlei lo, mak ka ti deuh a, “Ti nge? “ Ka ti hû a. “Ka veng che” min melh ralh chung hian a ti leh mai a, ka khi suk. “Hmm, i nuin min veng turin a hrilh che ni maw?” Ka ti a. 

“Ti chuang lo e, tak taka ..lawk” tih leh a rooma luh a rual a, a rawn chhuak leh thuai. Royal stag hi a rawn hum vei ṭat a, “Hei hi i duh ka ring a, ih, vawiin khan ka ṭhiante an lo kal a, um khat an in zo a, hei hi an in thei tawh si lo va, nei mai rawh min tia, ka in ve duh si lo va. Hetah an in lo a nia aw, in hnuaiah ka in tir daih, ka nute hrilh kher suh” min tlawn titih hian a ti ta sar sar a, ka nuih a za rilru khawp mai. “Ka awih lo, i in ve ang nang pawn” ka’n ti a, “A teuh lo aw, i zak em?” Tiin a ṭeu hlar mai. Kan boruak teh hrep vangin ka in ru zeuh zeuh ka tih tawh kha, chulai kara stag han hmuh chu lawmawm duh tak a ni. Ka laksak a, ka khi vur vur mai. “Tak taka ka van lâwm, i nute hrilh miah suh, hrethiam em?” Ka ti ve thung a, bu nghat ringawt. Ka roomah ka luhpui sauh sauh a, ka pa chu a muhil daih tawhin ka ring. Bawihteii chu Kimteii’n a mutpui mai zel a, ani pawh a mu tui tawh viau ang. Ka thli ta kerh kerh a, rilruin Johna awm ve se ka ti vel ta mai mai, in pui an awm loh hi chuan a nuam ka ti em em chuang lo, mahse, ka mutui ve deuh ang chu maw. Peg hnihna ka thlit mêk laiin Kimteii a rawn lut leh hlawl, “U Tete, enteh, ka period tur inṭham hi a hrehawm tawp a, no khat ka lo in ve mai.” A ti ta reuh a. Ka melh vung vung mai, “A va buaithlak e aw” ka ti sup a. Ka thlit lai chu tui ka pawlhsak hnuah ka pe ta a, hnar hup chungin a thawk khat piap mai. Fridge a va hawng rawp rawp a, eng emaw a va ei a nih hmel, in ṭhang tak chu a ni lo tih a chiang. A rawn lut leh a, “Ka muhil thei rih chuang lo, tian inkawm rih ang” tiin ka khumah a ṭhu sauh sauh a. Kei pawn pawi ka ti lem lo, Lanpuii nen kan inmangṭha tawh a, phone pawh ka khawih peih rih chuang lo. Whisky te chu in hria ang a, a nem si a, pan tê têin ka thli ta reng mai a, Kimteii pawn no hnih a in ve leh. Kan pahnihin um khat chu kan quit ta ṭhak mai. Zingah kan hai ber bur ngawt ang le..a thawk muang ropui si. Kan titi tui laklawh nen, dar 1 tlangah pawh, “Kei chu maw U Tete, ka vanduai alawm, ka bialpa awmchhunin sâwn min thlaksan a, ta ṭang khan ngaihzawng hi ka la lâp vek tawh” a la ti ham ham mai. Kei pawn Lanpuii nen kan chanchin te ka sawi ve luam bawk a, a chang leh min rawn kuah thuak thuak chungin, “U Lanpuii hi a vannei e, nang a tawng bik che a,. “ Te a ti thul. Kan ri bual bual ta reng mai, engtiklaiin nge ka mutthilh tak ka hre miah lo, ka phone nghawr dar dar thawmah ka harh a, phone lak tuma lukham hnuai ka han zen tur chu ka phu chiang lutuk, ka sirah chuan Kimteii a lo mu ve reng chu niin ! A muttui hmel em em lehnghal, thu chhuak vutin ka sawi nghal nawk nawk, “Hei, Kimte, Kimte, tho rawh, tho teh” ka ti chul a. A rum ṭiah ṭiah a, chiang mang lo hian a rawn meng a, chutah meng zau kâwkin, “Ehe!” Tin leh rawn thawh a rual ve nghal. Engmah pawh sawi ta lo chuan ka pindan chu a chhuahsan ta nghal a. Ka indap vat, ka thaw huai mai. Engmah a thleng lo tih ka hriatna avang chuan..heiham, kan zu rui chuan nghawng pawi tak a va nei teuh ve le..! Thil ṭha tak hi chu a ni lo chiang alawm. Phone chu ka’n en a, ka nu miscall a lo awm vâng mai. Dar 7 a lo pel tawh a lo nia ! Ka pa chu a tho daih tawh ang a, ka khumah Kimteii a mu ve tih a hria ang em? Ka rilru a rawn hah nghal tup tup mai, ka lu lah chu sawi ang chiah khan a la haiin a la rit bûr zui a! A va nuam lo chiang tak. Muangchangin ka va chhuak phei ve a, ka nu chu ka call back pah bawk. “Ti nge phone in va la thei lo ve, Kimteii pawn a la thei lo. Dawra i kal hmain ka inthlakna tur min rawn kensak rawh, zanin pawh ka riahpui law law ang, i pa rawn thlah pahin i rawn keng dawn nia, Kimteii khan ka thawmhnaw vel chu lo tifel mai rawh se, Bawihteii kha bualfai hma se, rawn hruai ve nghal u la” a rawn ti lâng lâng a. Kimteii chuan chaw chhum a lo siam mêk a, a hmel a pha dai mai, kei atak pawh ka lai deuh hûih mai a, eng êm thleng lo mah se; mi hrang kan nih miau avangin a nuam zân lo a ni. Zahzelah, “Khaw nge Bawihteii” ka ti ta ngawt a. 

“Ka hre lo, ka pa nen an leng a niang” a ti lâwi rât a. Ka nu thu min chah chu ka hrilh a, bathroomah ka lut zui nghal daih. Ka va chhuah leh chuan, “Ka pa te chu khaw nge an kal le?” Ka ti leh a, “An bazar aniang, nizan khan a sawi a, bawihteii pawh a hruai ve a niang” a ti mai a. “I khumah i mu lo tih a hre ngei awm sia” ka lo ti vat. 

“Chu chu lawm, engtin nge niang?” Lainatawm zet hian a ti ṭial rian a. 

“Englo, a zawh che chuan, kan khaw lama ka ṭhiante haw tur ka thlah ve duh sia, U Tetea hi kawngka ka kalhtir leh a nih kha, tunlaiah rukruk a tam sia i ti mai dawn nia” ka ti ta hmiah mai, la kai deuh chhû chung pawn thluak chu a la ṭha tho mai ka ti. 

“Umm a ni mai” a ti ve ta ringawt a. 

Ka pate chu dar 8 pelhah an lo haw a, eirawng a lo bawl peih vek tawh. Chaw ei lai chuan amah Kimteii zawk chuan, “Pa, ka lo haw khan kawngka kha a lo inkalh tawh si lo va, ka hlauthawng hman alawm, i va tho hma awm ve, ka thiante haw tur thlah ka duh sia, dar 5 vel khan ka chhuak a, U Tetea hi kawngka kalh leh turin ka kaitho ringawt alawm..tunlaiah rukrukna a tam sia ka tia” a ti ta zaih zaih a. Ka lo îp nasa, hawi pawh ka hawi chhuak ngam lo, “E..i sawi si lo va, khaw nge maw Kimteii chu le, kawngka a la inkalh bawk sia ka lo ti rilru a, Bawihteii kha amahin a lo mu sia. “ Ka pa chuan a ti ta chuar chuar a, ka thaw ngam ve ta ṭâwk. “Nia, mut tawh hnuah min rawn hrilh chauh sia, ka nute pawh engmah ka thawn hman lo, ka ngei tak tak a ni” Kimteii chuan a ti vei ngial a, mi rawn melh zawk chu ka duh vak lo hle. Kei aiin a thluak a ṭha zawk a nih hi a. 

Ka pa leh Bawihteii te chu ka han thlah a, Mami hmel dang bai mai chu ka melh vawng vawng, a rihna tlahniam chak lutuk te chu ka lainat takzet, Doctor te lahin a natna ber an hre thei si lo, ka nu chuan vawiin lama doctor a biak tur thu leh hmunpui lama an refer a rin thu te a sawi luam a, ka pa chuan ngawi rengin ka farnu venflon an vuahna bul vel chu a chul hauh hauh ringawt. Bawihteii pawn a nu chu a ngai tawh bawk a niang, “Maa, engtik nge i lo hawn ang? “ A lo ti ve chul a. Ka lungchhe thut, ka rui a la reh famkim lo bawk nen, Mami chuan nui lui tih hriat tak hian, “Ka lo haw ṭêp tawh, bawihte, zanin chu riak ve rawh aw” a lo ti a. Cabin-ah a awm tho avangin riak ve mah se; a pawi em em lo. Mahse, naktuk sunday a ni sia, a buaithlak maithei. Dawra kal tur ka la ni bawk si, ka haw thla leh nghal a. Ka insiam zo ka chhuak tur chu, “U Tete, nizan kha tihpalh aw. Ka lo rui ve lutuk a” Kimteii chuan a ti a. Nui chungin, “A ho lutuk, engmah a thleng lo angah ngai rawh, ka farnu i nia lawm” tiin ka piai zeuh a. 

“Mahse, i farnu nih ka duh hleinem..” a tih chuan ka ding chawt mai.