Hmeithai 7

HMEITHAI (7)

Ziaktu : Toni Râlte

“Ngati maw? Engvangin?” Ka ti vut a. Mak ka ti ve deuh a ni, chutimaia awlsama a pe ringawt mai chu. A hmui a tisawi a, chunglam melh leh zauhin, “Ih, Biaki kha a chhul a cancer a, inenkawlna tur engmah an nei lo alawm” a ti ta a. Biaki, a laka sual ber mai chu a cancer a maw? Ka rilru tê tê chuan KARMA tih hi a rawn lang nghal. Mahse, ka sawi chhuak duh lem lo. “A va zia lo ve aw, chuan chutia inpek mai theih tihna em ni?” Ka han ti leh a. 

“Vawiinah khan ukil ka hmu a, kan inziak fel ta mai. Ka rilru chu a buai ve lutuk. Mahse, Malsawma kha an fapa, an unaupa a nia, a awm tawh bawk si lo. Mampuia erawh ka bulah a la awm a, Pathian zara ka la dam ve ṭêk ṭêk chhung chuan a rethei dawn chuang lo. Tin, in hmun leh lo ram vanga min rawn be sek leh min vau ve chhên hi ka kham tawh reng reng a, tikhan kut ka sil tawh a, engmah ka lakah leh an tupa lakah sawi tur an nei tawh lo tihna a ni mai. “ A ti charh charh a. Nia, kan inzui tawh hnuah pawh vauna hi a dawng reng a, mênah hian kan thlak mai zel zawk a, a tan pawh a ninawm ve ang.

“An rawn dil tawp che nge? Engtin nge an rawn sawi reng reng?” Ka ti leh hram a, mihring mizia hi mak ka ti fo thin, thenkhat zaktheilo em em, inthlahrunna chhetê pawh nei lote mizia hi mak ka ti lehzual a, chutiang mizia chu an pu nia ka hriat vangin ka dilchhut ve deuh mai mai.

“Dil chiah pawh a ni lo, in i la sa thei chuang lo bawk a, hralhna tur kan hria a, hralh la, i hralhna hmun thuma thena hmun khat chu min puktir ta che ti ang zawngin an rawn sawi. A awmzia takah chuan min pe ve mai ta che an tihna niah ka ngai. Biaki cancer thu an sawi tel kher bawk nen, u Sangi ka hmaizah êm a, amah eizawngtu ber a ni tawh bawk si., ka khawngaih ve bawk sia, tikhan ka pe ta tawp mai” a ti mawlh mawlh a. Lehlamah hralh ta se nuai eng emaw zat man chu a ni dawn chiang sa, han inpek tawp chu ka lo uipui ve deuh. Mahse, chutiang lam chu ka sawipui duh lo. 

“An lawm em?” Ka tih chuan, “U Sangi chu a mittui a tla hial alawm. Biaki te erawh ka hmu ve lo va, engtin nge an ngaih ang ka hre lo” a ti thliam a. A phone a rawn rik avangin ka sawi tum pawh ka sawi ta lo. Thingpui lum pahin phone chu a va bia a, kei pawh whatsapp group velah ka lo lut kual mai mai. A rawn let leh chuan, “U Sangi nih kha, a vaia chan vek chu an inthiam thei ngang lo a nih hmel. A zatve zatvein kan insem dawn a nih chu, amah U Sangi rawt a nih ka ring, a nu te chuan an remtih pawh ka ring chiah lo. Ka lo pawmsak ta mai..” a ti zangkhai vah a, “A tha reng alawm. Chân vek ai chuan” ka lo tihpui ve. 

Thingpui in ngai hlei lo kha kan inzui tak hnu hian amah vangin ka in ka in ve ta mai, a hâng phei chu dawrah pawh ka in ka in tawh. Mimi hian mak a ti thei. Ni e, kan bula awmte azira insiamrem ve zelte pawh hi a thatna chin a awm ve a nia. Ka haw dawn chuan, “Zu in tawh lo hram rawh aw. “ A ti leh a, sim hmak theih ka inrin loh avangin ka tiam thei si lo, mahse, “Nia, in tawh loh ka tum ang. Tuin nge hrilh che chu sawi tawh teh” ka ti leh ngat a. “A ho mai mai, tikhan i chanchin a chhia ṭha ka hre thei a, a ṭha zawk. “ A ti tlat si. Ka nî a nih chu ka ring chiah si lo, ka nu emaw Mami emaw an nih ka ring ta ringawt..a nih loh pawn kan Johna hi a ni maithei, ani pui hi a rui sual ang a, a va tlangzarh ringawt em mawni dawn ni. Peka chuan Lanpuii number a nei lo tih ka chiang. 

Nu pakhat, berh ve hmel tak hi a rawn lang hlawl mai a, Mimi’n a lo dawngsawng vat, kei erawh BP check-na lo thleng thar pakhat chu a chiankuan loh avangin ka check vel mek a, “Ih, englo, Aids damdawi in nei em?” A rawn ti tâwng mai a ! Kei pawh ka hawi phâwk nasa. Mimi hamhaih pawh chuan, “Aa! Ka pi chu” a ti ringawt. Ani lah midangin an hriat ve hlau niawm tak hian, “A ruk deuhin min lo pe teh, aids damdawi bur 3” a la ti zel zui. Ka pi tê chu aw, a bozia ka hriat chuan a lawmawm lamah ka ngai hial mai. “Hetah chuan kan kawl lo va, khitah damdawi inah khian ictc -ah lam a ngai alawm ka pi” Mimi chuan a lo ti thei ta a. “Chutiang ka hre ve hleinem, khawi lai nge chu chu le. Min chah a, min lo lamsak la, an lo pe mai ang che min tia..” tiin lehkha them zawr angreng zet hi a rawn lek chhuak a, customer dang an rawn kal avangin Mimi bulah, “Keiman ka lo buaipui ang, sawngho saw va ngaihven rawh” ka ti zauh a. Ka pi bulah chuan, “Ka pi, hetah chuan kan kawl lo va, lo lut phawt la, ka han laksak lawk mai ang che. “ Ka ti ta ringawt a, a chahtu te reng reng pawh chu an va fimkhur lo ve aw ka ti rilru nuah nuah. Ictc-a thawk kan thian chu ka call a, thil awmzia ka sawi chuan, “Ka chhuak thei rih si lo va, i lo laksak lawk mai dawn em mawni le?” A rawn ti a, a hnai tho bawk nen, ka hreh hran lo. Ka pi lehkha them rawn ken chu lain ka chho ta a. An lo tam lem lo a, he lai hnaia han kal hi a nawm chiah loh chang a awm ve a, eng emaw hmuha min hmuh hû tum hi an awm ve thin. Kan thiana chuan hming vel chu chhinchhiahin damdawi chu min pe ta a, “Hetianga inchah inthawn hi kan remti lo asin mawle. Amaherawhchu, an awmna hmun a kilkhawr ve êm a, an tan rawn kal a buaithlak avang hian kan thawn mai zel a, kan lo be dawn nia, hetianga midang chah chu kan remti lo. Keimahni min rawn be pawp thei reng alawm. “ A ti mawlh mawlh a. Thu tam sawi tawh loin kei pawh ka chhuk ve ta nghal a. Ka pi bulah chuan, “Ka pi, ti nge nangmah an chah che a, an lo kal hman lo em ni?” Ka tih chuan, “Aw, ramah an riak tawh dawn sia, ka u fate nupa an nia, ka hriatpui vek a, a pawi an ti lo a niang, damdawi nghei kha an hlau sia” a tih chuan ka thaw huai mai. Mahse. Chiang taka a lakna tur hmunhma vel an hrilh lo leh thawktute an contact hmasa lo chu an fimkhur lo ka lo ti ve deuh. Lehkhain ka funsak leh thlap a, cheng 500 tlang rawn phawrhin, “Kha, hei hian a daih em?” A tih chuan, “A man a ngai hleinem ka pi.. tikhan a thlawnin an dawng vek alawm. Ṭha deuhin lo ei rawh se aw,.” Ka ti a. Mak a tih hmelin a lâwm hmel hle, “A man a ngai emaw ka lo tia, ka lo inchhut buai nasa hman asin, ka chawhmeh khartu ten min la pe si lo va” a ti a. A rilru mawlmang leh ṭha tak avang chuan ka lo nui ve ringawt. Chutihrualin thildang ka ngaihtuah kual a, anni Thingtlang kilkhawr ve tak ami te pawn ART lak an ngaihpawimawhzia ka hriatin helai khawpui leh thil awlsamna zawka khawsa si ten an ngaihpawimawh tawk lohzia te, midang kaina chance an ngahzia thlengin ka ngaihtuah a, mihring ṭheuh ṭheuh, natna nei ṭheuh ṭheuh kan rilrua a tlak nat dan a inang lo hle mai ka ti rilru neuh neuh. Ka piin a rawn laksakte hi chuan midang tan hnawksak nih an hlau viauin ka ring tlat. Kan vanduai emaw kan tuhrah kan seng emaw pawh ni se, natna kan vei ta rau rau a nih pawhin midang tana malsawmna kan nih theihna langsar tak chu midang kai ve lo tura mahni kan fimkhur ve hi a pawimawh hle a ni ka ti ta. 

“Lal Tete,.heiham” Lal Mimi chuan kawng dawm meuhin min lo thlir reng a, ka pi khan ama damdawi tur eng eng emaw a lam leh hnuah min chhuahsan kha a nia, kei ka ngaihtuahna ka lo kawm tui lutuk a, Mimi min biakna pawh ka lo hrechang tawh lo a lo ni. “Eng nge?” Ka ti hû a. 

“Eitur ka chah dawn. Eng nge i duh dawn? Vawi 3 ka ko tawh che”dawhtheih loh hmel zet hian a ti a. Ka eitur duhzawng ka sawi a, call a hmang nghal. 

Dar 3 a pel hlek tihin Lanpuii call ka dawng a, mak ka ti deuh, tun ang hunah kan inbe ngai si lo. Thaw hlawp hlawp hian, “Mampuia motorin a su,” a rawn ti ta mai ! Ka ding zawt, “Eng a? Khawihah?” Ka ti tuar a. Mimi pawn min rawn ngaihven nghal tih ka hre thei. “An school bang haw lam kha, chuan ka lo tlan thla mek, Civil-ah khan an rawn phur phei a, an rawn thleng phei tep ang, lo ngaihven ta che” a ti ṭiau a, a ṭap titih, “Aw. Tehreng mai, ka kal nghal” tih leh chhuah ka rual a, “Mimi, ka chho lawk, nakinah chanchin chu” ka ti hram. Damdawi in tual ka thleng fel awrh tihin an rawn thleng chawpchilh ve nghal a, Mateii’n min hmu chu a muang nghal suai suai hian ka hre ve, Mampuia chu a zawi ngiai a, mipa pakhat sa ṭha lam hian a rawn pawm chhuak a, casualty-ah a tlan luhpui nghal, nurse ho pawh an phe nghal vat vat mai. Chu pa chu Mampuia te zirtirtu a lo nia, a lu-atanga thisen lo chhuak chu an buaipui phawt a, a malpui ruh chu a tliak niin ka hria,. Duty te chuan emergency ward lamah an nawr lut ta nghal a. Mateii lah ka ban vuanin a ding khur hlak hlak mai. An zirtirtu chu Sir Puia niin a fel khawp mai. Kar lovah Lanpuii pawh a rawn thleng ta a, Mampuia chu a rang thei ang bera zai a ngaih tur thu an sawi a, Sir Puia nen chuan kan lo rêl ve zung zung mai. Lanpuii chu hmeichhe inringtawk leh nghet tak ni thin mah se; a fapa neihchhunin tawhsual a han tawh meuh chuan a hamhaih ve tlat, a mumal hleithei lo va, chuvang chuan keini mipa pahnih chuan ro kan rêl mai a ngai a ni. 

A tawi zawngin Mampuia chu OT-ah an nawr lut a, amah lah chu a biak theih der si loh. Mimi pawh chanchin ka hrilh hnuah dawr kharin a rawn chho ve a, Johna a rawn thleng phei ta bawk. Ka nute pawh thil awmzia ka hrilh a, “A va zia lo tak êm, a theih chen chen kha lo buaipui rawh. Chanchin min rawn hrilh leh la” a rawn ti thliam a. An zai chhung chuan Mateii chuan thil thlen dan vel chu a sawi ta a. 

“Kan in peng kan phei tur kawngpui kan kan dawn khan ka phone a lo rik avangin ka la a, Mampuia erawh a lo va kal hman a, ka au vak a, mahse, nidangah pawh amahin kawngpui a kan fo a, engtin a awm ngai lo. Mahse, khatia amaha a kan kha chak deuhin car kha a rawn tlan a, a su thlu tawp a, dawr vel ami te pawh an au tuar mai. Mahse, a tlan tlang daih a, kei phei chu ka hamhaih lutuk a, tih ber tur pawh ka hre lo. Sir Puia hi dawra a awm lai tak a lo ni hlauh a, amah vek hian a rawn buaipui ta a ni. “ Tiin. Sir Puia lah dawra a awm lai taka thil thleng a nih avangin a sutu car chu eng car nge a niha a motor number eng nge tih vel a lo chhinchhiah hman si sê tawh si lo, midang lahin an lo ngaihven hman tawh lo nen, tu tak ni ang maw? A tlan tlang daih danah sut luih te hi a ni thei mai ang em? Rilru a buai hle a ni. 

Lanpuii chuan ka kut a hmer ngawt ngawt a, a mittui tling pam chu a khap let sak sak bawk. Intihpachan tum teh mah se; a ti hleithei lo chu a ni e. Sir Puia pawh a ṭhu ve ta reng a, a tlawmngai khawp mai. Lanpuii pawn tlema a ziaawm deuh hnuah lawmthu a fah mawlh mawlh mai, Mateii mawlh chu a ni, a inthiam lo lutuk chu a ṭap reng ringawt mai a, Lanpuii nen kan hnem pawhin, “Ka phone rik vang vek a ni, amah khan kawng kantir lo tur ka nia sin le “ a ti leh thin. Amah vang a ni lo tiin kan hrilh chamchi a, bathroomah te a va ṭap, a va ṭawngṭai thul. A khawngaihthlak zawk. Rin aiin an khawih rei a, khua a thim ṭan ta si, Mimi chu haw turin ka ti a, a duh bik ṭhak lo. Sir Puia erawh chuan, inthlahrun hmel tak hian, “Awm ve chu duh viau mah ila., zaninah YMA committee meeting kan nei dawn tlat mai a, secretary ber ka ni si a, ka hawnsan mai loh che u chuan, chanchin erawh ka lo ngaichâng reng ang” a ti a. Kha zawng zawng a buaipui vek a, a lawmawm tawh lutuk. Lanpuiin a motor dahna thleng a zuk thlah kha. Ka nu pawn min rawn call leh a, an la zai zawh loh thu ka sawi chuan, “Hei, i nî pawh a rawn phei dawn e, chaw a bar zawk zawk ang a, a rawn phei nghal ang” a rawn ti a. Ka nî a rawn tel ve theih dawn chuan thla a muang sawt ang chu. Dar 7 rik dawn ṭêpah Mampuia chu an zai zo ta a. Ka nî leh Dina te pawh an rawn thleng ve chiah. Ward-ah kan nawr lut a, a ke dinglam chu an cher khawng tlat a, a lu an tuam var lûk bawk. Doctor chuan, “Mangang lutuk lo u la, a lu kha a sawh nat deuh avangin a thluak lamin hna a thawk muang deuh maithei a, a malpui ruh tliak kha chu ngaihtuahawm a ni tawh lo ve. A bak hliam dang a nei lo hlauh a, engpawhnise, vanduai rau rauah a vannei zawk e. “ A ti charh charh a. Motor khan a su chiang an ti êm mai a, a chil zui bawk nen, a chil vang a nia a mal ruh pawh a chhiat ni. A taksa dang a chil zui lo kha a vanneihthlak zawk ti tawh mai ang. A sutu kha a inthiam lo ve ang em aw? Police kutah dah tawh ang khalam kha chu. 

“Cabin ka book mai dawn, ward pangngaiah chuan a buaithlak, a thaw ipikthlak em mai. “ Lanpuii chuan a ti a, kha chu a thu thu a ni. Cabin a lo la ruak hlauh a, kan insawn leh ta a, kan awm ve ta diah bawk a, an zai hlawhtling bawk nen, a tir ang em em kha chuan kan chiâi tawh lo ve. Ril pawh a ṭâm ta râih mai. 

An hotute lamin hriatthiamna zau tak an nei bawk a, Lanpuii pawn chawlh la vein a fapa chu a awmpui a, Mateii nen an riahpui chawt mai a ni. Ka tan pawh lehlamah a remchanna chu ka dawr leh damdawi in a inhnaih a, dawrah ka thu hman meuh lo a ni e, Mimi a fel bawk a, a kutah ka dah deuh tawp mai. Mampuia pawh rawn harh chho ve tawhin a meng â riai erawh a la reh fel hleithei lo va, a ṭawng duh miah lo bawk. Mahse.,Doctor ten an sawi sa vek bawk a, chuti lutukin kan hlauthawng lem lo. Damdawi ina thawk, min hmelhriat ve lem lote chuan a pa tur riakah min ngai vek tawh a, ka insawifiah peih vel lo, Ka fapa ni lo mah se, ka bialnu fapa a ni miau a, ka ngaihtuahna a luah khat hneh em em a ni. Heti tak hian Mampuia hi ka lo ngaina tawh ang tih ka ngaihtuah pha ngai lo. Johna leh Mimi te pawn min fiam sek a, ka nui liam vel mai mai tawh, Cabin-ah eirawng an inbawl nghal vek nen, an in lam ngaihven turin an inhaw chhâwk zeuh zeuh a, a remchang phian zel mai. Tin, Mampuia nî, U Sangi te nupa pawn an rawn kan ve a, ka lo awm ve lai tak a ni a, kan inchibai ve tak kha. Lanpuii’n tlang takin a bialpa ka nih thu a sawi lai chuan nuam ka lo ti veng veng mawle. Tin, an in hmun hralhna zat leh zata insem tur pawh kha a mamawh lai takin Lanpuii pawn a dawng fel thei ta a, nuai 10-in an hralh kha a nia. Nuai 5 a chang ve a nih chu,. Mampuia sutu kha police ten an la zawng ve zel a, mahse. Sawi leh sawi hnu, tuman lo chhinchhiah nachâng hre hek lo, Alto 800 dum a ni tih zawng chu an hriat a ni mai. Lungleiah chutiang car nei chu an kat ve nuk dawn tih a chiang reng, tin, Lunglei lam mi an ni kher lo thei bawk. A tlan tlang danah khan kei chuan rinhlelhna ka nei tlat a, ka rinzawn thiam bawk si lo. Lanpuii’n hmelma a neih âwm ka hre lo va, a hmelma te ber tur Biaki te nen lah an inrem titih tawh bawk si, amah Lanpuii pawn rinzawn ngaihna a hre bik ngang lo. A putea fanu te nupain an rawn kan ṭumin, “Lanpui, i pahrawn fate thiltih te hi a ni thei ang em le? Mahse, car an nei bawk si lo, mahse, ka sawi duh mai mai nachhan chu thla hmasa lawk khan an milai khan i address min rawn zawt a, chung vel chu ka ngaihtuah a, ka ringhlel deuh mai mai..”Lateii chuan a ti a. A pahrawn te chhungkaw lam hi kan sawi dun ngai loh em vang leh amah pawh hian ngaihven tâng e a tih lem loh avangin kan l hrechang tawh miah lo va, Lateii’n a’n sawi takah chuan rinhlelh tur zawn zawn takah chuan ngaihbel mai a awl duh phian. Mahse, Lanpuii chuan, “Zuala chu a ni lovang., min rawn zawng chhuak alawm, pawisa min rawn dil a,.anni lam chu ka ring lo.” A ti ta tlat a. A nufate ve tho an nia, a unaute an nih miau avangin a tan pawh rinhlelh an harsa ang. Ka bulah erawh a tu amah an chungchang a sawi ngai lo, ka zawt ngai lo bawk. 

“Aa..tu pawh chu ni se, nakinah chuan a rawn lang chhuak tho tho ang, Pathian kutah dah tawp mai ang u. “ Lanpuii bawk chuan a ti a, chubak inhnemna kan nei chuang lo a ni e. Mahse, Mampuia kha a taksa hmun dangah khan chil ta se, a thi ngei ang, chilhlum hial pawh pawisalotu chuan a thi lo tih hriain kawng dang a rawn dap leh duh mai ang em? Zu ruih vang ringawta tlan chak satliah a nih hi rin a harsa a ni. Ni e, hunin a la hril ang chu. 

“Tebawih, dawrah pawh i awm mumal lo hle tih te ka lo hria a, a zia lo lam deuh chu a ni, innei êm pawh in la ni lova, hetiang tur a ni lo. A zah pawh a zahthlak” ka nuin a ti malh malh a. Ni e, a sawi dik reng mai,. “Kan inhnaih tho sia, a remchang êm a, dawrah mimi a rintlak tho bawk nen” ka ti ringawt a. 

“Ka duh ai chuan i buaipui deuh mah mah a ni. Tun aṭangin i thaibawih nghal der a nia. “ Nui chungin a ti tak naa a mitmeng chu a thutak tlat si. 

“Awihawm loh, ka awm khan a thla a muang ve alawm, nia, ka lo kal tlem deuh tawh dawn nia.” Ka ti a, ka nî chuan, “An chhuah ve theih ṭêp tawh kha,. A hunlai alawm tiang chu” tiin ka thlavâng a lo hauh ve a. 

Zanriah ei a hun dawn tawh a, kei pawh ka inbual fai var tawh. Lanpuii nen kan inbe zuai a, ka nî sawi ang khan naktuk emaw a tuk leh emaw velah chuan chhuah theih mai an inbeisei ve tawh a, in lama inenkawl theih a ni ve tawh bawk nen, amah Mampuia pawh la ṭawng ṭha duh lo mah se, a mitmeng te a rawn fim chho tawh a, ṭawng tak hi chu a nuin a biak hi chuan tawitê hian a chhang ve a, a bak thildang erawh a la sawi lem lo. A ke lam pawh in lama enkawl chi a ni tawh a, a bai hlen lo tura ngaih a ni, a la naupang bawk a. Zirna erawh a chawlhsan rei ta deuh a, ṭanlak a ngai nasa viau ang. In chunga puanpho han seng Kimteii rawn lut chuan, “Pa, kawmthlang isikut zâmna hnuaiah khuan mihring mu ang deuh ka hmu a nia” a rawn ti a. Kan phâwk hra hlawm mai. Ka pa chuan, “Tea, tirawh, i zuk en teh ang” tiin min rawn en a. Khua a la thim fel chiah lo, unau hmelhai kan tih âwm hun vel a niawm e. Ka pa nen chuan inzui chhuakin in hnuai lam kan pan nghal a, kan in hi sawi tawh ang khan kan awmna hnuai chiahah Mama te an awm a, a hnuai berah Peka te an khawsa bawk a. Peka te in luah aṭang chuan kawmthlang huan, zau lem lo tak, ka nuin thlai eng ilo a chin vena hmun chu a pawh theih a, isikut a zâmtir hluah mai a, thil dang dang pawh a awm ve nual. Kimteii sawi ang ngei khan Isikut zamna hnuai, langsar angreng tak si-ah hian hmeichhe pakhat hi a lo let reng mai le! Ka pa chuan va thutchilh vatin a sawi nawk nawk a, Lalpa leh, Lalhriatpuii a ni tlat mai. Hriati hi kan in aṭanga chhiara in palinaa a in hnuai ber luahtu te an ni. Ṭawng mawi lo ni lo se damdawi ti ve thin a ni a, a nu hova khawsa niin a nu hian kan veng High school-ah a pasal ai lutin peon hna a thawk mek a, chu chu an eizawnna a ni mai. Hriati hian pasal neiin fa pahnih an neih hnuah a fate nen an rawn let leh a, a nau mipa, college zirlai leh a nu û a putea te nen an khawsa mêk a ni. Zep thu a cheng lo an pa nen an inthen chhan pawh nupa paa damdawi khawih ta chu a zawrh te pawh an zuar ta hial a, an man ta si, an pa jail tan hlanin ani damdawi leh zu nen nuam a lo chen a, a vanduai asiamin a uire ta hial a. An pa chhungte lamin an lo hre ve ta si, an pa jail atanga a rawn chhuah ni la lain an hnawtchhuak zui ta a ni. An sawi danin hetia Hriati’n damdawi a khawih ve ta mai hi a pa boral a tuar lutuk kha zu inah a tlak a, zu aṭangin damdawiah, tichuan, chu salah chuan a tâng zui ta zel niawm tak a ni. Lehlam zawng tak chuan a lainatawm takzet, amah ngau ngau hi chu hmeichhe ze zawi leh inthlahrung tak, mi pawisawi lo tak mai hi a nia, hetia a lo let leh hnuah pawh veng chhung tana hnawksak leh hmai tibâl zawngin a khawsak kan hre ngai lo. Engti tiha kan huana rawn tlu lut ta ngawt nge maw a nih dawn ni. Ka pa nen chuan tihharh tumin theihtawp kan chhuah a, mahse, ka pain zawitê hian, “Tebawih, eng kan ang dawn tlat lo, a mar ka hmu tawh lo. Midang kan pun a ngai” a ti ta a. Hriatpuii chu a thi ringawt a nih chu! Ti nge thu thin ṭhawng leh lungphu tirang thei hi ka tawn ka tawn ni. Rang takin khawtlang hruaitute kan pun a, Hriati nu te hnenah midang an lo va zualko bawk. Kan ni ta nuaih nuaih a, a manganthlak ngawt mai. 

A ruang erawh postmortem turin an phur liam ta rih a, keini chhungkua pawh chhungkuaa zanriah kil thei pawn kan khawsa ta lo, lut chhuak apui an tam si a, kei phei chu chaw ei loin Hriati te inah ka va phei ve nghal daih a, ruang kan hmuh dan vel chu ka pain report a lo pe mai ang chu maw. Kan huanah ber kher a lo awm kha a nuam vak lo kan tan chuan,. Mahse, veng chhung mi thenkhat te chuan an hrethiam thoin ka ring, kan huan hi kan hung lem lo va, thlang lam atang hian a luh chhoh theih a, ani hmun fianrial deuh nia a hriat panin damdawi a ti ang a, a od zui ta a nih a rinawm. Kan inah phei chuan vawi 2 khat bak a la rawn lut pawn ka hre lo. Ka nî hian syringe a pek thin bakah lapua te pek a ching a, a bakah chuan a rawn lawr ngai lo. Keini pawh an inah kan leng lut ngai hran lo, a nu erawh Kohhrana inhmang tak, nu fel tak a nih avangin ka nute nen pawh an inpawh tha hle tho mai. Chutianga khawtlang kan buai mup mup lai chuan youtuber thenkhat content tur duh ngawih ngawihho lah chuan ka pa leh kei chu min rawn kawm teh an tum a, ka ning a nia aw. Ka pa pawn, “A pawimawh chin chu police leh kan khawtlang hruaitute ka lo hrilh tawh kha, anni lam va be pawp mai teh u. Ka buai rih em mai..” a lo ti hmiah. Kei phei chuan ka chhang buai peih tawh lo, a chekhnawk nazawng kan lo dawnsawn zel chuan hun kan paih tam lutuk dawn. 

Lanpuii te pawh ka ngaihsak thei meuh lo, thenawm hnai an ni sia, a che buai pawlah ka ṭang lo thei si lo. Zan dar 9 velah zanriah ka ei hman chauh. Ka ei tui tawh nek lo ve a. Tlaivar ve ngei a ngaih dawn avangin ka inbual harh leh a, Kimteii’n, “U Tete, i rualin ka kal mai ang, kalpui tur pawh ka nei lo. “ A ti a, thian em em hi a la nei lem lo va. A puanthui zirpuite hi veng dang an ni deuh vek bawk nen. Ka nî lah Home lamah a duty a ngai si. Dar 10 bawr velah kan phei dun ta a, Peka te awm ve se ka ti hle. Ruang pawh a rawn thleng tawh a, an in a zau lo bawk nen, kan leng lo lam a ni. Amah sarthî a ni bawk sia, hawkdâk vang hrim hrima rawn langte pawh an awm mahna le. A ṭha vek tho mai. An in chhak kawngpuiah pawh an tlim hmur mai. Zai pawh a nuam lo hran lo. Thingpui in zawh tawh lamah chuan ka sawhchiar ei nge mawni dawn ni ka pum a rawn nuam lo chho ta riau mai a, insanmar hram ka tum paw’n pum lamin ro a rêl tlat. Kimteii bulah chuan ka sawi a, ani lah chuan, “Ka lo haw ve rih mai ang, keimahin ka thu zak alawm” a ti si, kan inzui haw leh ta poh a. In kan luh rual rualin toiletah ka tlan lut nghal rawk rawk, kua a khawh par par mai. Ka thawl ta huai a, ka zâng hawkin ka hria. Ka va chhuah chuan Kimteii chuan min lo nuih tet tet a, “Eng nge?” Ka ti hlur ringawt. 

“Ek chhuak tawk han ek hi chu a nuam ve thlawt alawm tiraw ka u” tiin a nui kiah kiah a, ka khi suk duh chauh. Dar 2 a ri dawn hnai tawh a, “Mu tawh mai rawh nang chu, ka va phei leh ang e, kei ka tlaivar tho chuan a tawk reng alawm. “ Ka ti a, a lo hreh bik lem lo a niang. Ka chhuahsan ta a. Zing dar 6 pelhah ka haw a, ka mu nghal thlawp. Ka harh leh meuh chuan dar 9 a lo pel vah tawh a, min lo kaitho duh bik lo a niang. 

Thlan laih zawhah ka mu leh zuai a,ka harh ta deuh. Lanpuii te pawh naktukah an chhuak thei dawn a nih hmel. Hriatpuii chungchang pawh kan sawi zui ta em em lo, a fate erawh an khawngaihthlak dawn a ni. Eng ang pawn ruiin han che nawi ve viau thin mah se; a ril arah a fate hi a thlahthlam ngai lo ve tlat a, a fate pawn an ngai viau reng a ni. Hmeichhia theuh theuh hi an lo inang lo khawp mai. Mami thiannu hi fa pahnih nei nuthlawi ve tho a ni a, a fa naupang zawk kum khat a tling awrh tihin an inthen a, a fate chu a pa bulah dahin ani chu phaiah hnathawkin a chhuk hmak mai. Ralkhat atangin a rawn chawm azeng pawh a ni si lo, a rawn haw chang pawn a va kan ngai chuang lo, a fate pawn an ngai lem lo a niang, biak pawh an inbe ngai lo. Pasal dang neiin tunah chuan Siaha lamah a awm daih tawh. Mi tha pangngai, ruihhloa buai pawh ni si loin ti taka a fate a ngaihsak loh laiin tuna kan mitthi Hriati erawhin a theihna zawn zawnah a fate chu a ngaihsak ve em em thung lawi a, khatiang vel kha kan ni. Mahse, tupawh hi kan dinhmun azir hian kan danglam ve bawk a, tumah kan inhriatpui tak tak lo bawk nen, mi va dem ngawt tur pawh a ni chuang lo. 

Zanah kan veng lama ka thian ve ber Mpa nen kan kal dun a, zai a nuam em em mai chu mak ka ti zawk. A damlaia ruihhloa talbuai mah nise tupawi mah sawi ngai lo a nihna te, a phak ang tawka a aia dinhmun chhe zawk khawngaiha tuamhlawm ve tlat thin a nihna te kha Pathianin a chawimawi a ni mahna. Ban pawh kan bang tlai angreng. Mut dawnah Lanpuii nen kan inbe zuai a, “I chau awm sia, muhil tawh rawh, naktuk chu lo kal ve rawh aw. “ A ti a. Kan inmangtha zui nghal. 

Tihfel ngai te kan han tifel zung zung a, dar 12 rik hma deuhin Damdawi in chu kan chhuahsan thei ta a. Motor ka ken loh avangin taxi an hmang phei a, ka zui phei ve ta lo mai. Mampuia hmel hmuh pawh a nuam tawh hle. Rilru zangkhai takin kei pawn dawr ka nghak thei ta. Ka inkhar ṭêp tihin Lucy a rawn lut hlawl mai a, kan inhmuh lohna a rei ve tawh angreng, ka hmu cher riau lehnghal a. Mimi erawh a nau a lo zin avangin hmuak turin a kal tawh a. 

“I dam maw? “ Lucy chuan a ti sap a. 

“Ka dam alawm, teh hlawl che chuan, inhmuh a khât hle mai a, lo ṭhu rawh” ka lo ti sawk sawk a. 

A ṭhu a, “I tluang zel a maw? Dawr lamte hi” a ti leh a, “Tluang a ni mai e, nang helamah i awm reng nge?” Ka han ti khawmawi a, “Umm, awm ti ila, Aizawl lamah ka awm tam zawk. Nimin piah khan ka rawn haw phei leh, I thianpa hi a dam maw?” A ti zawi raih a. Hmana Lucy, phur ve thei deuh, hlim thei deuh kha a ang ta lo khawp mai. “Aw a dam ve kha a, a buai ve thei lutuk a, ani pawh” ka ti luam a. 

“Nia, kan inbiak lohna a rei tawh sia, a chanchin ka hre vak lo va. “ A ti niah niah a, “Nangni eng nge in chanchin zel? Ha kan lo tat hriam tawh asin” ka ti fiamthu a. Lucy hmel chu a ngui nghal rawih hian ka hria, ka ngaihbel te pawh a ni mahna le. “I la hre na nge?” A ti lawi rât a. “Eng chu?” Ka lo ti hû ringawt. A chil a lem khawlh a, hreh hmel zet hian, “Nau ka pai alawm..thla 3 a ni ve tawh” a ti ban chhalh a. Ka rilruah Johna nen an inzui laia Johna’n ‘A zahawm em mai, ka khawih chhe phal lo’ a tih thinte kha ka hrechhuak uai uai mai. 

“A ni maw? A va lawmawm ve, chuan, engtikah nge in inneih dawn?” Ka ti hluai a. A hmel a hlim loh êm vang erawh chuan ka zawhna chu thil ṭul lo tak a ni mai ang em aw, ka ti leh hnuhnawh. Mahse, ka sawi zo tawh si, bakah han sawi mai tur kha ka haihchham ve êm a ni. 

“Aa, kan inneih theih pawh ka ring chiah lo. U Zuia hi ka rin a lo ang lo lutuk a” a ti dat a, ka ngawih reng vangin, “Englo a nia, ka rai tih a hriat aṭang khan min hlat daih a, sawn man pawh kan inpe tawh. Min neih tum nise sawn man min pe tawp nang, chutiang vel chu a ni e ka tun dinhmun chu..” a ti ta mawlh mawlh a. Chu kher chuan min ṭhâwng ve deuh, Zuia an tih khan a zar hneh viau ang khan an sawi sia, tun ataka chutianga han phatsan leh chu mak ka tiin ka hrethiam thei hauh lo mai. 

“A va timak ve a, a va nep ve” ka inrin hmain ka ti ta hlawl a, ka insum hman lo chu pawi pawh ka ti ta lo mai. Nep ka ti êm a tin ni. “Nep khawp mai, Ka tuhrah ka seng a nih hi, min hmangaihtu ka tina a, bumin ka awm a, tihian a tawpah ka vanduai leh sia. Ka chawh ngawt mai tiraw?” Tiin a kun ta ngawih ngawih a. Rei tak ka thianpa bialnu lo ni ve tawh a nihna leh kei nen pawh inkawm ve fo kan nih avangin Lucy chu ka khawngaih ta em em a, hnem dan erawh ka hre hauh si lo. Johna’n hre ve ta se engtin nge a dawnsawn ang aw..

“Khatiang zawng khan ngaihtuah suh. Lucy, tupawn vanduaina chu kan tawk vek thei alawm, i thiam loh a awm lo hrim hrim. Nang chu i chak tawk alawm, hrisel takin nau i pai ang a, ṭha takin i hring ang chu mawle, naute hmel a hmuhte chuan Zuia rilru pawh a dang ve deuh maithei asin. Lungngai lutuk suh” ka ti ve ta mawlh mawlh a. 

“Johna chuan min hmusit ngawt ang,.ti nge khatiang taka min hmangaihtu kha ka lo kalsan le, a pawi a ni tiraw? Ka chhungte vang vek a ni” a ti leh ṭiau a, hei hi chu a dikna chen a awm. Lucy chhungte hi ka dem ve tlat, Johna’n khati khawp khan a duh ngawih ngawih a, rem ve mai se tiang thil teh hrep hi a thleng lovang mawle. 

“A hmusit teuh lo che. A khawngaih ve viau ang che. “ Ka tih mek laiin a phone a rawn ri a, “Tete, ka kal phawt ang. Nidangah kan inkawm leh dawn nia, ka lo kal chhan pawh ka sawi hman ta lo, naktukah emaw rawn kal ka tum leh ang, hei min lo call leh tawh. “ Tiin phone chu a benga chuktuahin a chhuak nghal daih. Auh zui hman pawh a ni lo. Hrilhhai takin ka thlir liam ta ringawt a. Khawvel inlumlet dan hi chu a va buaithlak thin tak êm. 

Zanah khawhar in kal a ngai si. “Banah ka lo kal tho ang, lo la meng rawh aw” Lanpuii bulah ka ti a, kan bang har leh ta phian si, ka bang châk chu ka za et et tawh mai. Thin a rim ṭûn thei alawm le. Kan ban fel meuh chuan dar 9:30 a pel tawh. Hetiang huna va len leh kha chu thil tihchi ni pawn a lang tawh si lo. Ka call a, ani pawn, “Hun a la tam dawn alawm, bakah ka chau ve deuh bawk sia,mu zawk mai ila” a rawn ti a, ka ngaiin ka kuah vawng vawng chak tawh asin le aw. Mut pawh ka mu tui hrep lo ve a. 

Ka zan zung ka va thawh chuan Kimteii zung tur a rawn chhuak ve chiah a, kekawrbul chhing tei tawi tak leh kawr bah a ha a, hmeichhe enin ka lo en ngai lem lo va, rin aiin a lo nalh ve zêk reuh mai. Mi rawn kal pelh pah chuan, “Min hisap kher lo la aw..” a ti sap a. Ka meng phâwk teh e. He nu tereuh hi..a eng a hria chu ni maw..!