Hmeithai 6

HMEITHAI (6)

Ziaktu : Toni Râlte

Home stay chhak ka thlen chuan Zuali chu ka call a, “Hei a chhakah ka awm a, lo chho rawh” ka ti hmuk a. “Aw le, ka lo kal nghal” phur hmel zet hian a rawn ti a, ka ner nâwng ringawt. Ka bialnu hlui a nih vang hrim hrim pawn ka phur ve thei thlawt lo a ni e. Hmeichhia a nih piahlamah Lunglei lam a nih vang liau liaua va hruai ka ni tih ka inhrilh rilru mawlh mawlh mai. Motorah a rawn thu lut a, en pawh en lo chuan, “Khawi vengah nge i thlen?” Ka ti puat a. Ka tlan nghal bawk, “I va hmanhmawh ve, ka la haw duh rih lo, leng kual ang” tih pahin ka steering vawn lai chu a rawn dek zauh a, “Ka hman lo, haw hma ka ngai a, naktukah ka haw tawh dawn sia. Sawi vat rawh” ka lo ti leh hmuk. A zuam tura awm ka tum lo bur, he nu hian na theihtawpin min lo tina tawh a, zahna nen khawvel min hmachhawntir tawh a nih kha. Chu chu ka hrereng tur a ni. 

“Naa, hmuk hmuk a che. I rilru chu ka hrethiam alawm, min la haw reng a mi a? A ho lutuk, inhuatzui hi a ṭhing. Leng ang, bakah ka lu a nâ” a ti phar phar a. Ka va melh ta kâwk. Ka hmuh lohna a lo rei ve leh ta deuh nen a cher deuh kuam a, a hmel a dâng bâi bawk. A rui tih a ṭawng dan leh a mitmeng phelh phat aṭang chuan a hriat hliah hliah mai. Hmana Rinzuali kha ânna pakhatmah a nei tawh lo, mihringte hi kan lo va danglam chak tak e aw. 

“I ruih tawh em kha, sawi vat teh, ka leng kual hman lo tak tak. Thawh hma ka ngai a” awki hniam deuh zawk hian ka ti a. “Saw lai a zau laiah sawn ding lawk rawh. A nih chuan” a ti sap a. A mizia ka hriat tawh avangin thuawih rih phawt mai chu tha ka tia, ka ding ta nge nge a. A bag aṭang chuan stag rawn phawrhin a zatve aia tam mah hi a lo la awm a, dispo cup thlengin a intodelh thlap. “Tui chu i kawl ang tiraw? Ka lem lawk ang a, kan haw dawn nia” a ti sar sar a. Hmanah kha chuan a bula zu rim ka nam ringawt pawn min be duh lo hmak zel kha a nia, Rinzual leh ! I lo va danglam ta ve aw. Ngawi rengin tui chu ka pe a, “Ka thlit kep che aw. In dun ve hrim hrim ang, a vawikhatna leh a tawp nan” a ti leh ham ham a. Ka insangmar ṭeuh tawh. Mahse, ka in châk ve deuh tho, ka rui a reh tawh lam a ni bawk nen. Ka hnial lem lo. 

No 2 ve ve kan in a, “A bak kha chu hawn rawh, ka duh tawh lo” ka ti a. 

“Ka hawn ngam teuh lo, in zo vek law law ang, hei a tlem tawh” tiin a thli leh hram a. Ka duh tawh lo, ruih ka hlau. “In zo rawh nangmah khan. Kei chu ka duhtawk” ka ti a. 

“Bialnu i nei tawh tiraw?” A ti ta daih a. “Umm” tih chauhin ka chhang. Za lo zet hian a nui hak a, a rilru te chu a na ve deuh nge mawni, a nat tak tak pawh ka ring chuang lo, a ruih lungpuam vang bak a ni lovang. “Tu nge?” A ti leh a, “I hre lovang” ka lo ti. A hriat ve kher kha a ṭulna ka hre hran lo a ni. 

“A mak tiraw? Awlsam takin i move on thei a, min lo hmangaih ngai miah lo tihna a ni thei mai ang em?” Tiin hmalam a melh vang vang a. “I in zo em? Kal ang aw” ka lo ti daih thung. “I mak ! Vanlallian, zawhna ka zawh che chu, min pehhel suh. “ A ti hlar a, motor start-in, “Zawhna awmze nei lo lutuk kha chhan kher ka ba lo. “ Ka ti nghut. Ka thinrim hran lo a, mahse, hetiang zawhna tih vel hi ka nin zawng tak a ni. Ka hmangaih thin lutuk tih hretu chu amah tho a nia, hetianga ruih vanga min tih kual vel a tum hi ka ngaithei lo, ni e, tunah chuan amah ka hmangaihna te kha a dai tawh, an bo vek kher lo pawh a ni maithei, mahse, inlaichinna kan nei thei tawh dawn chuang lo tih ka chiang a, insawi lunglen kual vel kha ṭulin ka hre tlat lo. 

“I bialnu chu i hmangaih em? Kei aiin i hmangaih em? Mawh?” A aw chu a fiak ṭhak mai a, ani hi chu a ni hrim hrim, a rukin thil a sawi ve thiam lo, a awki hi a ring ve thin reng reng a, a awkâ a nem ngai lo bawk. “Aw hmangaih tehreng mai” ka ti a, hmalam ka melh run bawk. “Nia, i hmangaih ang, hmangaih rawh” a ti nghat a. Ka chhang tawh lo, ka nuih a za deuh. Famkimi vel han zawh ve chu châk ru viau mah ila ṭul hlei lovah kan inhnial hrep ang tih ka hlau a, ka mood lo nasa si, ka peih kual vel lo. 

“Khawiah maw i thlen?” Kan ngawih fê hnuah ka ti ta a. “Chhinga vengah” a ti ringawt. Ngawi rengin ka tlan mawp mawp a, a dawhthei leh ta lo nge ni, “Te, chu nu chu kei aiin a hmeltha em? Eng mi nge a nih? Khawi venga awm nge?” Hmm, zawhna hlir a ni leh tawh. A ṭawng nawm hunlai a thleng chho a ni bawk a, “Aw nang aiin a hmeltha zawk, chuan hmeichhe pangngai tak a nia, Lunglei khua tho a ni” ka ti ve ta chhut chhut a. Ka chhan dan chuan a tithinrim ta chiah a, “Kei aiin a hmangaih che em?” A ti leh kher, chu zawhna chu zawt fuh a inti leh chiah lo nge ni, “Ka sawi awmzia chu a duat ve che em?” A ti niah niah a. 

“Zawhna i ngah em mai, a ho lutuk, i nun buaipui la, keiin ka nun. Hmanlai thil kha chu theihnghilh rawh” ka ti ta nge nge a. 

“Kei chuan ka thei ve lo, englaimahin ka theihnghilh ngai lo che. Dik tak chuan ka damchhunga ka tihsual lian ber chu nang ka kalsan che kha a ni” thaw hawk hian a ti a, ani pui roh hi a tuidul zawng hian a rui ang a, a ṭap chiam ang tih ka hlau deuh. Zu rui ṭap thlem a sâwt lo ropui si. 

“Sawi tawh suh, eng nge Aizawlah i tih reng reng a? I zinna a rei tawh em?” Tiin thudang sawipui ka tum a. Ka hlauh ang ngeiin, “Enteh, Tete, ka ngai ngawih ngawih zel che. Ti nge Famkimi bum khan ka lo awm le? Ka vanduai tiraw? Tihian nunphung pangngai pawh zawh thei tawh loin chhungril hrehawm reng rengin hun ka hmang a, a pawi êm mai. “ Tiin a ṭap ta hliam hliam mai. Ka ding a, “Pangngai teh, ṭah kha a hun lo. “ Ka ti a, “Nang chuan chhetê mahin min ngaihtuah tawh lova, ka rilru hi i hrethiam si lo” tiin a hma aia uarin a ṭap leh. Ka chek hluk ringawt. Ka kut a rawn vuan a, “Tete, ka la hmangaih reng che asin. Bulṭan leh ang, chance min pe leh rawh, khawngaihin” a tih lai mekin ka phone a rawn ri ta a,. Amah Lanpuii ngei a ni. Rang zetin Zuali kut chu ka dah thla a, “Aw” tiin phone chu ka la nghal. 

“I va reh ve” a rawn ti a. A aw ka hriat rual chuan ka inthiam lo ve ringawt lehnghal. “Nia, hei ka thiannu ka thlah lawk a, i haw tawh mi?” Zangkhai thei ang ber hian ka ti a. 

“Aw ka inbual zo chiah. Naktukah chuan mi i lo hawn ang?” A rawn ti a. 

“Aw ka tumdan chu alawm. Ka rawn zing chhuah ang ka tia” ka tih lai mekin Rinzuali lah chuan, “Te, ka duat, ka hmangaih che” tiin mi rawn bawh titih zui. Rang lutukin ka nam let a, motor atang chuan ka chhuak nghal. 

“Tu nge? I thiannu chu mi?” Lanpuii chuan a rawn ti ta chiah a. “Aw, a rui a, lo hrethiam rawh aw” ka ti ta ringawt a. 

“A nih kha, thlah haw phawt la, min lo call mai dawn nia, Mampuia hi a zirlai ka’n enpui zuai ang e” a ti sam êt a. Mak ka tiin nuam lo ka ti letling, “I thinrim lo tiraw?” Ka ti ta ngawt a, “Rimna tur a awm em ni? A ruih hmel sia, i thlah haw vat kha a tha zawkin ka hria. Nih ka dah a nia” tiin a dah zui ta a. Ka thaw huai mai. Hmeichhe dang chu nise an ṭêk khawpin ka ring. Hei hi alawm Lanpuii danglamna chu. Nakin zela buaina a la awm loh nan tiin Zuali nen kan chungchang kha ka hrilh ve tawh a, ka kir tawh dawn lo tih a chian êm vang zawk nge ni Zuali hming chu lamrik a ni zui tawh ngai lo. Hmeichhe dang han thik turin ka awm ngai lo bawk nen, ani lakah pawh thik tur ka hre bik lo bawk. Ka sawi thiam dan berin rei tak inngaizawng, ngaihtha tawh ang hian kan awm, kan inhau ngai lova, kalna tur leh tihtur eng emaw inhrilha inbiak bak phone pawn kan inbe ngai mang lo. Tleirawl te anga han inbiak kur nguaina hun kan nei lo ve ve bawk nen, bakah kan inrim thei reng bawk nen,. Mahse, tuna ka bula awm hi Zuali a ni tih hre ta se tlemin a danglam ang em tih ka hre lo. Min zawh loh chuan hrilh kher pawh ka tum chuang lo. Motora ka va luh leh chuan thlem ngai loin Rinzuali pawh a lo bang tawh a, mit sen râm hian min lo en a, a lâwm lo tih a lang reng mai. A ho êm mai. 

“Kal tawh ang aw, haw la, mu la a tha. Kei pawh ka mut a chhuak” ka ti mawlh mawlh a. A ngawi reng, motor ka tinung a, ka tlan zui nghal. Chhinga veng lam ka pan nghal a, ngawih reng chu harsa a ti leh ta deuh nge ni, “I duh hle a ni maw?” A rawn ti leh hlawl a. 

“I hriat ang kha a ni mai. “ Ka ti ringawt. 

“Chance min pek chu i tum tawh lo a ni maw?” A ti leh hram a, chiang kek kawka hrilhfiah a ngaiin ka hria. “Zuali, i hriat atana ka duh chu, nang leh kei chu engtikahmah a rem tawh dawn lo. Tuna ka bialnu nen kan inṭhen emaw ṭhen lo emaw i hnenah hian rawn kir ka tum tawh lo. Nang pawn min hrethiam ang che. “ Ka ti ta khawl khawl a,. A ngawi reng mai. Ka tina a nih pawhin kawng dang ka nei lo ni mai teh se, a chhan chu beiseina lem pek kual kha ka mizia a ni lo. A tan pawh a ṭha hek lo. “Khawi lai velah nge in awm?” Ka ti leh a, “Saw laiah sawn peng rawh” a ti sep a, a mizia a cool sawt hle mai. Ṭah vak vak ai chuan a zia zawk. A sawi ang chuan ka peng a, step bulah min dintir a, “Khulai lawk khu a nia, ka lawm e aw. Mangtha le” tiin a chhuk a, “Mangtha le, inenkawltha ang che” ka ti a, stepa a chhuk thla chhat chhat chu ka thlir zuai hnuah ka inher a, ka tlan haw ve ta nghal a. 

 Ka intihfai zawhah Lanpuii ka be ta a. Ani pawh a lo mu ve chiah a, Mampuia pawh a mu fel tawh e. “Amah kha tiraw? Rinzuali kha” a rawn tih chuan ka nghing deuh,. A hriat ka rin loh nen, mahse, a â lova, Zuali rawn ṭawng dan khan a zir bawk nen, a ngaihruat thiam a ni ngei ang. 

“Aw nih kha, min rawn ṭah awh sia, a rui bawk nen, ka thlah ta mai a nih kha” inthiam lo ru deuh hian ka ti a. 

“A pawi lo, ka thinrim hleinem. Tunlaiah mi kan sual tawh sia, hmeichhia khatianga awmtir ngawt chi a ni hleinem” a rawn tih chuan ka thaw ta huai a. 

Lanpuii nen kan inngaihzawnna pawn thla 3 hmel a hmu ve ta. Kan ngheh dun êm vang hian rei tak inngaizawng tawh ang mai kan ni. Harsatna em em chu kan la tawk lo ti ila, Zuali khan engtin tin emaw amah a rawn hrechhuak a, a lova be thin a! A va tiho tak e aw. Mahse, Lanpuii a puitling êm a, huatah la loin a enliam thei mai zel a, Rinzuali lah lo nghal ve bawk, kan inzui laia ka duat dan vel, thil ka leisak zawng zawngte, khatiang vel kha a lo va hrilh vel thin a, ka tan a inthlahrunawm letling thin. Zuali chu khak hial ka duh tawh, mahse, Lanpuii’n, “A inchhir rih a, va tihnat belh a ngai lo. Tisawn a tuar zo ve mai ang, ka nghin loh phawt te chuan a pawi hleinem..” tiin min khap dai hram hram zel a, ka duhna a pung tulh tulh thung. 

Thianpa Johna pawh rilru thar a han pu chho ta bawk a, Kei ai mahin a puitling chho ka ti mai. Nu Rengi nen phei chuan a rukin, “Lucy nen hian an lo inṭhen har a nih hi mawle” kan ti thin. Amaherawhchu, a puitling han ti ila han lem zuk chang erawh a nei ve tho a, a hma ang khan a chhunzawm zut tawh ngai lo thung. Tawk chin a hre tawh a, tin, Kohhran te bel chhoin amah a hmelchhe lo va, hmeichheho pa tih chi mizia a lo nei ve bawk nen, an veng ami tho tleirawl Amuani nen an inbe chho ṭan a. Mahse,”Nau, hmeichhe dangah hi chuan ka tui thei rih thlawt lo. Phurna ka nei lo, tihnat ai chuan ka tia thudik ka hrilh ta mai. A la naupang sia, a khawngaihthlak” a ti a, a tawpsan leh daih. A ṭha mai tiang kha, kan mihringpuite hi infiamna hmanrua an ni lo va, kan nawm amâka kan chhaih kual tur an ni lo. Tupawn hlutna leh zahawmna kan nei vek, chu chu inhmuh lensak hi a tha. Inngaizawng zingah pawh ṭhen phal si lo, hmangaih tak tak chuang si lova inchelh reng hi hun khawhralna a nih bakah na taka inhliamna a ni. Kan duh leh hmangaih tan chuan rinawm mai ila, rinawmsak thei lo tura kan ngaihte nun erawh chhaih buai lo law law ngam bawk ila,.chutihrualin ka sawi tawh ang khan min hmangaih ve thei miah lotu ten min hmangaih ve theih loh avang hian dem ngawt lo bawk ila, duhthlanna nei an ni tih pawmsak thiam bawk ila, nun chu a nuam chho ve mai. Beiseina dik leh dik lo te pawh hi a awm ve a nia. 

“Scooty lak ve ka tum deuh a,eng emaw changa han veivah duh hian a buaithlak ve lutuk a” Lanpuii chuan a ti a. 

“La ve rawh, a ṭha reng alawm, i khalh thiam ang maw?” Nui chung hian ka ti a. 

Home kal nan hian motor service a awm a, zing leh tlaiah tikhan a kalin a haw ve mai zel kha a nia, engmah chawi a ngai lo bawk. Mahse, tunlaiah chuan lirthei kawl ve îk loh chuan eng emaw thilah hian a buaithlak ve thin bawk a ni. “Khalh thiam ve mai ang. Ka tih zawk chu 2nd hand to lutuk lo te hi i lo hre mial zawk lo maw ka tia” a ti a, ka lo zawnsak tur thu ka hrilh chuan a nui sen sen mai. Hetia a nui sen sen leh a nui var var thin hi nia hmuh nuam ka tih em em zel ni. Thingpui a lum hlanin ka kapkarah Mampuia a rawn thu leh chat, min nêl ve tawh lutuk hi keimah zawk hian nuam ka ti, a nuam veng veng ka ti mai. Nuthlawi zûna uai chu an fate hmangaih tel an ngai an tih fo hi ka hrethiam chiah. Hmangaih loh pawh tum ila a theih loh, amah Mampuia hi hmangaih loh theih loh hian a khawsa thiam reuh bawk si. Mateii nen pawh kan infiam nui hawr hawr thei tawh. An thenawm tlangval hian a ngaizawng a, ka chhaih thin a, a duh lo ve thei si, kan inchhaih thinrim leh nge nge zel. Mahse, ka awm loh hlek chuan min lo ngai ve thei lutuk. 

“A û nen in inneih hunah khaw nge ka awm ve ang le?” A tih ṭum chuan ka hamhaih hman. “Ele! I rawn lawi tel ve ang chu” ka ti ta ringawt a. Lâwm tih hriat zet hian, “Tak tak aw, hlen chil chial,.” A la ti ta deuh deuh. A û-in a chhawm tel ve loh kha a hlau ngang ni tur a ni, Lanpuii bulah pawh a lo sawi tawh. Ni e, ani pawh vanlaia tla a ni miau a, a tan chuan Lanpuii hi û a ni satliah lo, nu leh pa a ni kawp. A hmalam hun thlengin Lanpuii kutah hian a innghat tawp mai a ni. A chanchin kimchang erawh Lanpuii’n ṭul a tih hunah chuan min la hrilh mai ang chu maw. 

Scooty chu Johna cousin ta, la thar tha tak mai ka hmuhsak ta a, a inlei fel ve ta. Ni khat bak khalh kan inzirtir lo, a thiam a ni nghal mai. “I lerh phah ang tih ka hlau deuh” ka ti fiamthu a, “Nia, tlangval ka phur ziah ang” a la ti zui. 

Zan khat ka pi a hniam leh thut mai a, tun ṭum chu a dan a dang ka ti mai. Damdawi ina kan chhohpui lai paw’n nikhua a hre mumal tawh lo. Ka nî leh ka nu phei chu an ṭap pur tawh, ka pa lah a thianpa râl-in a zin daih bawk si. Kei mipa awmchhun chu ka intipachang hram hram a ni e. U Mama a rawn lan ve hnuah erawh ka thaw huai mai. Ka pi chu ICU-ah an nawr lut ta chûk chûk a, tun ṭum chu a ngaih em em ka pu bulah a kal ve dawn ta a nih ka ring. Ka pa pawh a zan azanin a rawn tlan haw nghal a, Lanpuii pawh a rawn tlan chho ve. Kan inah hian vawikhatmah a la rawn leng lo va, a buai chu thuhran, a hreh ve deuh bawk nen ka tilui ngam bik lo. Chutihrualin Home lamah ka pi nen chuan an inhre tha em em a, a duat pawh an induat, chuvangin a rawn ngaipawimawh viau ang. Tiang chuan kan kokim ta viau. Rin ang ngeiin ka pi duhtak chuan zing dar 4 pelh hlekah chatuan ram min pansan ta a. A thih hian kum 93 a ni, ka pu kha a ngai thin êm a, vanramah an inhmu ngei ang ka ring. Ka pi thih sarhu chhung zawng zawngah ka thiante bakah Lanpuii te an felin engkimah min chhawk zangkhai hneh ngang mai. Lansarh leh fak duh vang ni hauh loin Lanpuii pawh chet ngaihna engkimah a che reng a, a tlawmngaiin ka chhungte mit pawh a tlung hlein ka hria. Lehlamah ka bialnu a nih piahlamah ka nî thiannu a lo ni ve bawk nen..Ka bialnu a ni tih chu kan vengho pawn an hre ta fur mai, pawi ka ti lem lo. 

Ka pi thih aṭanga kar 2na velah ka pa thianpa thi ta fanu kha kan in atanga puanthui zir turin a rawn awm ve leh ta a. Ka pi boral tawh mah se, chhungkua kan kim a ni leh mai. Kimteii a ni a, pawl 12 a pass zawh tak loh avangin a kal zawm ta lo va,. An khawsak a lo harsa ve bawk nen, chuta chhapah a pa a boral leh bawk si. A pa khan a boral dawnah ka pa hnenah a nupui fanaute lo chhawmdawl hram hram turin a lo ngen ve a, naupan tet atanga lo inthian tawh an ni bawk a, ka pa pawn tlanchhiat a tum bik lo. An awmna khua a chengker si nen, Kimteii chuan zirna a chhunzawm thei lo ta law law bawk a, thiam thil eng emaw tal neiin eizawn nana hman theih nei se tiin a tuina lam tak puanthui zir turin ka pa chuan a chah ta ngawt mai a ni. Vanneih asiamin kan in atanga hla lo têah Ni Puii puanthui zirna a awm nghal a, a bulah a training ve thei dawn a, amah a mawng a zângin a che peih reuh sia, dar 10-1 thleng bak an training lo bawk nen, in nghaktu kan nei a ni nghal mai a, ka nu phei chu a lâwm fâl hle. Tupawh kan eizawnna avangin kan buai tlang theuh si a, tlai banah a haw hmasa sain rawng kan bawl chawp sun sun zel kha a nia. Tunah chuan Kimteii kutah eirawngbawl chu a awm ta vek a. A zia khawp mai. “U Tete” tiin min ko mai zel a, ka nu leh pa te pawh ka nu ka pa a ti ve mai bawk a. Kimteii lo awm chu tupawn kan zangkhai phah ti mai ang, chuvang chuan a duat pawh kan duat ve khawp mai. 

Zanriah kan ei laiin Mama nupui U Sawmi a rawn lut a, a thinrim hmel khawp mai. “Pa, kei chu ka chhuak dawn, ka peih tawh lo. Bawihteii te pawh ka hruai dawn” a rawn ti nghal bawrh bawrh mai. An nupa hi ka pi thih hma aṭang khan an intithiam lo ve deuh fo mai a, a chhan pawh kan û thiam loh liau liau a ni, ani driver ta chu hmun hrang hrang an lo tlan nasa nen bialnu deuh reuh a lo nei ve niawm tak a ni. Chu chu u Sawmi’n a lo hre ve si, an tualthu a chhe ta fo mai. Ka nute pawn Mama chu an hau ve nasa, ani pawn, “Chutiangin bialnu anga sawi tur pawh a ni lo, kan chawlhna thin hotel neitu a nia, kan inbe ṭha ve satliah mai alawm” a ti mai a. Mahse, chu nu chu a huangtau ve deuh nge amah kan û- zir loh zawk ni an inbe zut mai si a, an nu tan enliam leh pal liam ringawt chu a har ve deuh ta a niang e. 

Ka nu chuan, “Ekhai! Ni lul lo ve. Kal lovang, duh leh amah khu chhuak rawh se” tiin a kham tharh a. Ka pa pawh chuan muang churh hian, “Sawmte, in tualthu a chhe leh deuh a ni maw?” A lo ti a. U Sawmi chuan, “Inbiakna chhuanlam tur an hre reng khu ka ning tawh. Thil eng eng emaw an inchah kual a, Hruaii pawh ka be tawh reng sia, a la rawn be zâwrh zâwrh reng a, ka ning lutuk tawh. A duh thlang rawh se” a ti hmarh hmarh a. Kan chhungkua vua leh vângah hetianga nupa nih tawh hnua ngaihzawng inneihsan tih vel hi kan la ching ngai lova, ka hriat theih chinah..chuvang chuan ka dawngsawng thiam ve vak lo. Mama ka dem rualin a hmeichhia pawh ka dem tho. 

Ka nî-in Mama chu a zu ko chho a, ro an rêl ta a. An zilh rawn liam liam a, ani lah a ngawi kur ringawt. Ka pa chuan, “Nupa inṭhen hi rem kan ti lo va, nupui thlak te kha i lo rilruk ang e, Sawmteii thena ani neih i tum a nih chuan ka fapa i ni thei tawh lovang. Tin, ka in leh loah hmeichhe dang i rawn hruai lut thei hek lovang. Tunah hian i rilru siam fel la, Hruaii i thlang zawk a nih chuan i chhuak nghal thei ang. Sawmteii te nufa i thlanga inrem taka awm i duh erawh chuan pickup khalh tawh lo hian i eizawnna tur dang kan ngaihtuah ang. Puitling leh rilru fim takin inngaihtuah rawh” a ti ta charh charh a. 

Ka pa hi fate haua zilh chiam chiam chi a ni lo a, a ṭawng chhuah ve chhunah erawh tupawn kan hlauin kan zah vek. A thu hi thutawp a ni miau a. Mama pawh a ngawih vang vang hnuah a aw thian kharhin, “Nupui thlak tumna rilru hi ka la pu chhin ngai lo hrim hrim, ka fate nu bak hi nupui neih ka tum lo. Sawmteii pawn min ngaihdam theih chuan ka lawm viau ang. Kei chuan inrem taka awm hi ka duh ber a ni. “ A ti ta a. U Sawmi erawh a ngawi ran a, han lungawi viauna tur a la ni bik lo bawk nen. Ka pa bawk chuan, “A nih chuan a ṭha a nih chu. I number kha thlak la, Sawmteii pawn a ngaidam turah che ka ngai, vawikhat han petek te hi chu thil thleng ve thei a ni, mahse, inzir nan hman tur, vawikhatmah pelhein i nupui rilru hi tina tawh hlek suh ang che. “ A ti a. Mama pawh chuan, “Ni e, ka number pawh ka thlak nghal ang. Engmah thiamthu sawi tur ka nei lo, ka dik lo, ka thiam lo a ni e. “ A ti a. Hetiang tur hi a ni ka lo ti rilru ve, mahni nihna leh tihsual pawm ngamna tluka thinlung huaisen hi a awm lovang. Mama pawn a tihsual nawn leh ka ring tawh lo. Ka nu hoin an chhuk thla ta hlawm a, an inrem zel ka beisei. Khawvelah kan la cheng miau si a, Kawppui nei thenkhatin kei chu kawppui ka nei tawh a, keimaha innghat chhungkua ka neih tawh hi ti duh loin nawmchenna lam an um a, ngaihzawng han neih mai an pawisa lo thin. Nula emaw nuthlawi thenkhat lahin, mi pawmlai a ni si a, hnar har viau mah se; keimah vangin tute emaw nun a chhe vek thei ti duh miah loin an nawmsakna tur kawng an lo zawng a, mi pawmlai ngaihzawn an lo hreh lo ve tumhrang bawk si. Ka nî sawi dan hi a tawk tiu teu viau, “Pathian ringtu mi piangthar chu a uire lovang. Mi piangthar chuan mi pawmlai a ngaizawng lovang. Mi piangthar chu a rinawm a ni” a tih hi ka ngaihdan a ni mai e. Damchhung nuna ka mi ngaihsan ber te chu mi rinawm te hi an nia,. Rinawm lohsan ka nih pawh khan ka na hle rêng a nih kha. Rinawm taka engpawh ti thin mi chu a tirah hniam mah se; van khian chawisan hun a nei thin. 

“Te, Malsawma chhungte an rawn leng dawn a, zanin chu lo kal lo mai rawh aw” Lanpuii msg a ni. Mak ka ti viau mai. “Ngati nge a?” Ka va ti a. 

“In hmun chungchang vel kha a niang, an khawsak a harsa chho sia, engtin emaw insawirem an duh a nih hmel. U Sangi’n min rawn bia a, amah vang chauhin ka lo dawngsawng ang” a rawn ti duah a. A buaithlak thin mang e. An monu an duh loh, an tihduhdah em em puihna kha tunah chuan an mamawh ve ta a nih hmel, hei hi alawm nun chu, a inlumlet kual vel mai mai a ni. “Aw le, chanchin min lo hrilh ve la, a rem chuan” ka ti a. “Tehreng mai” a rawn ti. 

Johna’n rawn phei a tum tho bawk a pawi ka ti lutuk hran lo. In hnuaiah kan chhuk leh ta daih a, Hriata a haw avangin Peka pawh a khua a har aniang, kan zu leng chu a lawm ve hmel hle. “Ti maw Hriata chu a haw a?” Johna’n a tih chuan, “Nûl vah a ngai a ti nih kha, an nei zau leh ngawt ang” a ti a. Min rawn melh zawkin, “Zanin chu i va leng lo teh tlat ve” a ti a. 

“Len loh zeuh zeuhte hi a ngai, min hne palh ang” ka lo ti a, “Dik ve reng mai. A fel ka ti khawp mai, a puitling” a lo ti ve a. Johna lah chuan, “A siṭik deuh tih lohah chuan a fel reng mai, a hmel pawh a tha. Khaw maw thianpa a sial chu” a lo ti zuah zuah. Peka chuan, “Ka kawl lo, mahse, khutah u Chhuana’n a kawl a, i duh hun hunah rawn la rawh a tia,. Kan zu kal lawk dawn mi?” A lo ti a. 

“Zu bawk maw” ka lo ti sup ringawt. “I in ve leh dawn tho, kal ang” tiin Peka chu a melh zauh a. Min chhuahsan nghal hmak. An va ho tak. Mahse, ka leng lo ta sa sa, bakah ka in lohna a rei ve leh riau tawh, zu ṭha pangngai hi chu a pawina em em ka hre lo. 

A sial tha bawk a, no khatah ka kai deuh der, ka in khât tawh ka tih kha. Johna hi chu a dose hi a sang em em reng mai a ni. Ṭawng kan inchuh ṭan, “Enteh, Tete, kei chu in nu hi a fel a hmel pawh ṭha ka ti. Mahse, a û ve hret chu ka ti a ni. Nî Seni te nen an inrual khat deuh reng a nia. Nu Saii te khian neih an phal ang maw?” Peka chuan a ti nuah nuah a. Johna chuan, “Ruk hmiah tur, duh lo mah se..” a lo ti ve bul bul bawk. 

“Kan innei kher dawn tihna pawh a ni hleinem,. In ho” ka lo ti ve nghut a. “Bro, neih duh loh tur chu ngaihzawn loh tur..kan neih duh miah loh turte hi sex hmanpui theih an nih chuan kan zûnah kan han uaitir a, an nun kan tichhia aw. Pawi lutuk. Pawi tawp a ni mai.” Johna chuan a ti sehchilh nawk nawk a, a sawi dik leh khut thin. Ka thiana hi chu. 

“ A dik. Chuvang chuan Lanpuii pawh ka khawih chhe phal lo..maw, khawih chhe dawn lo reng reng” ka lo ti bah ve nawk nawk a. Peka chuan, “A ho ee, an duh phawt te chuan bawhbeh hmiah hmiah tur. Ho tukk” lo tiin a zu sial chu an thli leh kerh kerh a, kan han in leh phawt hlawm a, Peka chawhmeh, Kimteii suah pelh rah kan chu kan hmawm zauh zauh bawk. “Tak taka ka chhungte mitmei hi chu ka veng ve reng. Ka rilru hi a hah ru ve thei lutuk, mahse, Pathian thu thu a nia” ka ti mual mual a. 

“Pa Rina hi chu a khirh vak ka ring lo va, Ni Saii ber hian a pawm loh ka hlauhpui che. Ni Seni chu a thiannu a nia, engmah a sawi buai ka ring lem lo” Peka bawk chuan a ti a, a lo vei ve deuh a ni maithei. Ni e, a veiawm ve bawk a ni. Hmanni lawkah mizo movie Nula Senior tih kha an release bawk nen, ngaihtuahna a tikalthui angreng a, Lanpuii lah nula senior a ni lo, nuthlawi fa pawm tawh a ni lehnghal. Hman zana a chungchang sawia kan titi bak kha chu engmah ka chhungte hian min sawipui leh tawh lo va, ka pi thih sarhu laia a rawn lan ve pawn ka nu nen kha chuan an inkawm thei fu khan ka hria a, an â lo ve ve bawk a, ka nu pawn pawm lo rilru mah se; a lang apau chuan a be chhe dawn lo hrim hrim. Aa..ka ngaihtuah thui duh lo. 

“A ho lutuk, in inneih theih loh pawn i la naupang, a dang kan zawng leh mai ang. Rinzuali, lesbian tih vel ai chuan Lanpuii chu chungnung tak a ni tho tho. Nau, ngaihtuah lungrun vak suh, kei pawh kum tawp lama ral ngai tur tho ka nih hi” Johna chuan a ti lung lung a. Lucy chungchang kan khel leh ta daih a. 

Ka harh ruala ka phone ka en chuan, “Morning, nizan khan an haw tlai angreng sia, ka rawn be ta lo mai che a nih kha, zaninah kan sawi dun mai dawn nia. Ni hman nuam aw” Lanpuii hnen atanga ka dawn a ni. Nia, nizan khan kei pawn va biak ka tum ta lo a, ni lo, ka rui ta lutuk a, ka tawng dan leh ka msg type dan atangin ka thiltih a hre dawn sia, ka mutsan ta ringawt kha a nia. Muttui ti erawh chuan ka thlah. Nizan thil thleng vel chu ka hre châk viau, tuna zawh chi erawh a ni lo tih ka hria. Dawrah ka buai nileng ve ta bawk nen, Mimi pawh mawng a hung hman meuh lo, bungrua a lo thlen thut vang a nia. Tlaiah pawh ka haw tlai angreng. “I inbual phawt dawn nge chaw ei ka siam dawn?” Kimteii’n a lo ti var a. Chaw ei a hun tawh êm bawk a ni. 

“Lo siam rawh, ka intleuh zuai ang, ka rei dawn lo” ka ti vut a. Nizan vang nge vawiin kan buai vang ni ka zawi nguai lehnghal. “Tebawih, nizanah khan i va rui em em ve, khatiang khan vawikhatmah awm tawh suh aw. I in tawh lo emaw tia kan lo lawm hman nen” ka nu chuan dawhkan ka kil rual rualin a lo ti nghal a. 

“Lal Johna a rawn lan tawh hi chuan an in ngei ngei, ani pawh hi hauh deuh a ngai a ni” Ka ni chuan a lo ti ve hlak hlak bawk. “Thiante mawhpuh loh tur, min tulh lui hleinem” ka lo ti hluk a. Nia, fate sualnaa thiante mawhpuh ching nu leh pate hi ka ngaithei der lo,. Duhthlanna kan nei vek a, tuman kan kaah min tulh lui lo. “Ka mawhpuh lo, in pahniha in awmdun tawh chuan zu in chiah in ngaihtuah alawm, ani pawh nau ang thoa ka en a nia ka hau ngam “ ka ni chuan a ti leh hram a, a sawi dik ve tho. Johna nen kan awmdun tawh hi chuan kan khua hi a har tlat zel, zu khawhar ka ti mai. A tawpah kan dawm dun leh nge nge thin. 

Chaw chu ka ei mial mial a, min zilh mial mial bawk. Ka pa erawh a ṭawng ve lem lo. Chaw eikhama ka insiam laiin ka ni bawk chu a rawn lut a, “Len i tum em ni? Lanpuii nen hian in kal thui dawn hian ka hre tlat, ka û mitmei hi ka veng ru deuh a nia” a ti a. Ka thaw hawk ringawt. “I lo haw hma deuh khan a sawi deuh a, ‘An hun hi an inkhawhralsak tawn mai maiin ka hria, hetah te chuan a rawn mo duh dawn teuh si lo’ a tia, chuvang chuan i nu rilru hrereng chung hian nang pawh inngaihtuah ṭan deuh rawh. “ A ti leh mawlh mawlh a. 

“Ka nu chuan a pawm thei lo tihna mi?” Ka tih chuan, “Chutiang pawh a sawi hran lo, mahse., Lanpuii hi heta a rawn lawi duh a ring si lo va, nang lah chhuak thei i ni si lo va” a ti chuai raih a. 

“A rawn lawi duh ang. Eng nge a duh loh ngawt ang?” Ka ti hluk. A engamah a hmain ka lungawi lo ve ringawt. “Fapa a nei tawh tih hria la, kei pawh Lanpuii ang hi ni ta ila, pasalte ina fa te nena lawi luh chu ka duhin ka ring lo” a tih chuan, “Ani chuan a duh ang. A duh loh pawn kawng dang a awm mai ang” tiin ka sam ka huih thuak thuak a. “Kha tak kha lawm le aw kan ngaihtuahna che” a ti vin hlar mai. A ngaihna tak pawh ka hrethiam tawh lo e a. “Ka kal phawt dawn, kan sawi tha dawn nia. Nizan ka leng tawh si lo va, ka hmanhmawh” tiin ka nuih tlawn a, engmah a sawi hmain ka chhuahsan zui nghal daih. 

Mampuia chocolate ka leisak chu pein Mateii pawh a duh em em Mama chu ka pe a, “Au Tete, mifelpa” a ti ve ham ham mai. Lanpuii erawh thutak deuh hian a thu a, zan dang a ang lo riauin ka hria, ka sawi thiam lo, a mûk ka ti mai. A bula ka thut rual rual chuan, “Mate, Mampuia nen roomah va inzirpui lawk ta che u” a ti ta chat a, Îhe loin Mateii leh Mampuia pawn room lam an pan nghal. 

A ngawih vang vang hnuah, “Nizanah zu i in leh a ni maw?” A ti sap a. Makti zetin ka melh kâwk, “Tu nge hrilh che?” Ka ti hû a. 

A nui hak a, “Min hrilhtu a pawimawh lo. Engvangin nge i in leh reng reng a,.” A ti a, a nelawm hauh lo. “Ka in mai mai” ka ti ta ringawt a. 

Chiang zeta min melhin, “In tawh suh. I hria em?” A ti chang fak a, ka nu ang mai niin ka hria. 

Ka chil lem khawlhin, “Ka tiam thei lo che a, mahse, ka tum ang” ka ti a. 

A tawng leh hmain, “Nizan chanchin ka hre duh, ka hriat ve a rem chuan” ka tih zawm zat a. 

Mi rawn melh kâwkin, “Phakar ve siah. Topic dang rawlh hun i hre si” a ti hlak a, ka lo nuih tlawn tawp. 

A aw a thian kharh a, “Ih, in hmun chu ka pe ta mai” a ti zawi sep a.