Hmeithai 5

HMEITHAI..(5)

Ziaktu : Toni Râlte

Fa pakhat a nei tawh a, an nu hlui hian pasal dang nei leh tawhin a fa chu aman a awmpui tihna a nih chu. Kan khawvelah chuan kan hlim dun ve em em zel a, kei ka lo free bawk nen, zep thu a cheng lo kohhran leh khawtlangah ka inhawlh lawr lova, ka eizawnna vangte pawh a niang, chu chuan ka nun pawh a dah zalen ka ti mai. Malsawma pawh chu a rawn riak zeuh zeuh thin. Kum chanve dawn kan inzui hnuah inneih a duh ta a, mahse, Lungleia rawn awm leh hi ka hreh deuh si, ani lah mipa awmchhun a nih avangin an in a chhuahsan thei bik si lo. Kan han inhnial leh bap bap thin. Inneih ve ngei chu kan duh si. Tichuan, hmeichhia zawk ka nih bakah vanlaia tla ang mai ka nihna chente pawh a awm avangin, chhungkua ka mamawh a, Keimah chauh chuan ka zahawm tur ang pawn ka zahawm tawk lo tih hriain Lunglei lama awm tur chuan thutlukna ka siam ve ta a. Ka putea te inah thla khat vel ka khawsa a, palai te rawn tirin man leh mualte pawh kan sawi fel ta a, a chhungte lamin min iai thu an sawi lo bawk a, ngaihngam takin ka awm ve tawp mai a ni. Mi hriat em em loh, hotêin kan inkutsuih ve a, an chhungkua hi a nu leh pa bakah a farnute pahnih leh a fanu te chu an ni mai a. A fanu pawh kum 5 mi a ni ve tawh a, hmangaih thei turin theihtawp ka chhuah ve bawk. Malsawma pa hi police a ni a, a nu erawh house wife a ni. A farnute chu kei aiin an upa ve ve a, a û zawk phei chu U Makimi ai khan a nau hlek chauh ang, Post office-ah a thawk ve a, a nau zawk erawhin engmah a thawk bik lo. Khawsak pangngai tak chu an ni a, an in leh lo pawh a rualpawl tawk a ni. Mo dinhmuna ka la din ngai loh avangin leh he lam kawnga thurawn min pea min zilh tur ber ka nu a boral tawh avangin a tirah chuan awmdan thiam harsa ka ti thin hle. Ka inthlahrung a, kan pa a awm loh phei chuan hrehawm ka ti ngawih ngawih zel. Malsawma û nula senior U Sangi leh ka pate hi chu ka chungah an thain sawiselna tur ka hre lo. Malsawma chhang chiah Biaki leh ka nute hi eng emaw chang hian mei nei deuha ṭawng an hrat bakah âipui leh âitê an nei ka ti mai, a changin min be ṭha huam a, chutiang hunah chuan min mamawhna eng emaw tak an nei a ni tlangpui. Chutiang lovah chuan an tûm bûr reng a, biak hi an huphurhawm hle thin. Kei ka ṭawng tam em em bik si lo va, kan inbe ngai mang lo. Mi tihlawm ka thiam vak lote pawh a niang. Tihtur ka ti mawp mawp a, ka sumdawnna kha kan pain ka chhunzawm leh theih thu a sawi naa, kan han inneih takah chuan sawi rik a awm leh ta miah lo. Phai lama zin leh veivah kual reng a ngaih avangin buaithlak an ti te pawh a niang e. Ka mamawh engkim hi chu keima pawisa vek ka hmang a, ka mo chhung khan ka pa leh u Sangi te’n kawr leh bra min lei ve a, chubak thil thar min leisak ka hre miah lo. Keiman ka mamawh leina khawp ka neih ve tho vangin ka phut lem lo bawk. Malsawma fanu Cteii chu ka ngaina chho ve zel a, duat rawn a nihna a lang ve thin. Nuhrawn ka nih avangin midang vengthawng reng rengin ka enkawl a ni ber, ka dawih ve bawk sia, hauh pawh ka hau ngam ngai lo. A piin a pawm tlei a nih avang hian nu ang pawn min en lem lo va, a pa nupui ka ni tih erawh a hre ve, vawikhatmah nu tiin min ko lo thung. Malsawma bulah pawh ka sawi a, min ko ve se ka duh thu vel, Cteii chu min ko turin a hrilh ngei, mahse, ka nuin, “Nu tak tak ni lo na nâ na chu koh a harsa ve ang chu.. tiang khan nawr suh u” a lo ti daih a., ka duat leh hmangaih tur ang pawn ka pawh hleithei bik ta lo a ni. Nau ka chhiat leh a, ka rilru a na viau nghe nghe. Malsawma’n min hnem mawlh mawlh thin. 

A tawi zawngin kum khat kan inneih hnuah Malsawma mizia chu a dang ṭan ta a,. Zu rim a rawn nam ta zeuh zeuh a, Aizawla a riah zante hian biak theih loh chang ka nei ta zauh zauh bawk. A chhan ka hrethiam si lo. Sawi leh sawi hnu inngaihzawnna nei miah loin pa Muana kha ka nei a, Malsawma hi ka ngaihzawng hmasa ber a ni, chuvang chuan ka zei lo a, ka pasal chu ka tilawm thiam lo a niang., min thlahlel lo ta riauin ka hria a, han inbunruahna tur thian em em ka nei bawk si lo. Nau tal pai ila tiin ka ṭawngṭai ve nasa thin. Ka sawi leh duh chu Malsawma te chhungkua hian Kohhran an bel lutuk lo, sunday zingah an inkhawm ṭawk a, u Sangi hi YMA velah chuan a inhmang a, kohhran tak chu a bel lutuk bik lo. Chutiang a nih avang chuan kei pawn Kohhran ka bel tam lova, chhung inkhawm kan nei ngai bawk si lo, ṭawngṭai pawh ka thiam lo ti mai ang, mi chuan hria se min nuihzat ru ngawt ang. Kan pa nen kan inkar a zau tual tual a, ka mangang chuan Lateii pasal Thara kha chanchin hrilhin ka va zawt ta tawp a. Chutah chuan, “Hrilh che hi ka hreh lutuk. Mahse, i la hre dawn tho sia, ih englo, Mala hian bialnu a nei a, nuthlawi hausa deuh mai a nia. Pawisa te hi a pe reng zel, hei vang hian Mala pawn a thlah hleithei tawh lo a niang.” A rawn ti ta mai a! Ka mang vek. Ka rin loh lutuk thil a nih avangin ka dawngsawng thiam lo. Ka tâwt lutuk chuan ka nute chu ka hrilh ve a, min hnem tura ka beisei tehlul nen, “Mipa te chu an dan alawm, driver ngat phei chuan tumah an biak chhiat a thiang si lova, in pa hi hneh tum hmasa la, nau te hi pai vat la, a lerh lo mai ang” tiin min chhang a ni. Nâ ka tiin ka thinrim bawk. U Sangi erawh chuan Malsawma chu a zilh a, ani Malsawma lah chuan, “Lanpuii nen kan inneih hma daih tawhin kan inngaizawng tawh. Kan inṭhen rilru nat laiin Lanpuii nen kan intawng a, tihian kan innei ta sia, ani Jenny rilru nâ lutukin min ṭah khum reng a, ka inthiamlo ve bawk nen, chutiangin kan va inkawp tawh lo, thian angin alawm kan inen tawh,.sum leh paiah min ṭanpui thei a, ka tan biak chhiat a nuam hleinem.” A ti a. Mahse, Thara khan dawt a sawi ka ring lo, an inngaizawng ngei ang tih ka ring. Bialnu hluite ina riah reng thu a awm lo, bakah nupui a nei tawh tih hrilhin insum se, a hmeichhia hian a biak luih reng ngam ka ring lo. 

Nuthlawi lungfing tih takah Jenny chuan Malsawma chhungte thleng chuan ral aṭangin a rawn tilawm thiam khawp a, cosmetic-a sumdawng a ni bawk a, eng eng emaw manto deuh deuhte hi a rawn thawn fo mai, chuvang ni maw Biaki leh ka nu phei chuan an fak kur dup thin. Jenny chu amaha in leh lo nei thlap, a fate pahnih nena khawsa an ni a, a hmel pawh a tha. A pasal boral ta pension a lak bakah a sumdawnna chu a hlawkpui hle a, tun hnuah khati taka a lo hausa kha No. 4 a lo zuar ru ve reng a lo nia, hausa lo chi ziazang a lo ni lo. Kei lah ka sum neihsa te ka hman kal ve reng avangin a phai chak em em a, in chhungkhur mamawh eng ilo vel lah ka nu ten min chahtir reng a, Cteii mamawh hi a nu i awm alawm tiin min leitir zel bawk a, a nu ang tak taka min en turin an hrilh duh chuang si lo. Ka fahrah leh ka zik bulhzia te , tlan tauhna tur ka nei lo tih an hriat avangin ka laka ṭhat chhuah kha ṭul an ti lem lo a niang,.Malsawma lahin a hlawh ka nu a pe vek zel bawk sia, kei chu ka pawimawh nep tial tial a, Malsawma lah titipui theihin a awm ngai si lo. Ka va mangang ru thin tak. 

Chutiang chuan nun hlim lo leh khawhar reng rengin hun ka hmang a, kan ṭhenwm khawvengte hi ka tlawhpawh ngai loh tehlul nen, kan ina ka tlaktlum lohzia leh Biaki leh ka nu ka chunga an ṭhat vak lohzia te chu an lo hre ve vek a niang, han chhuahvah nikhuate hian min lo sawipui tawk hi an awm ve thin a, min lainat thu leh ka nu chu Cteii nu, an mo hmasa nen pawh an inngeih loh vanga inṭhen an nih thute thlengin min hrilh thin. Tin, ṭhenawmte bula min rêl dan vel te ka han hre ve leh fo thin bawk a,ka fahrah thu leh chhungte tak tak ka neih loh thute thlengin an lo sawi duh a, ka na ve deuh thin. Ka sawipui ve vak lo naa zep nak emaw kan bula an han sawi sek chuan eng emaw han sawipui ve zauhte a lo awm lo thei lova, khang te kha Biaki’n a lo hre leh thin si, Kan pa awm laite hian min chhal vak vak zel a, ka lo sawi ve miau avangin ka chhang duh ngai lem lo. “Jenny hi chu a dinhmunin a zir bawk bakah chhungkaw pangngai tak atanga seilian tih hi a hriat thin, Cteii te thleng hian a rawn ngaihsak a, kan mo ni zawk awm tak a ni” tihte hi an ṭawng duh dan a nia, ka vanduai asiamin ka thlavâng hauhtu ber u Sangi lah Tlabung lamah an transfer daih a, ka pa lah inah a awm tlem si, ka mal tawrh ta ngat ngat mai a ni. Zan khat chu ka tuar thei ta ngang lova, kan pa phone laksakin a biak mek lai Jenny bulah chuan, “Malsawma hi nupui nei lai a ni tih i hre vek a, thian angin in lo inkawm pawh a ni thei, mahse, tun chinah chuan lo kawm tawh lo la ka duh hle mai, kan nupa kar thlengin a buai phah si a. Hmeichhia ve tho i nia, min hriatthiampui ka ring” ka ti ta hmiah mai a. Jenny chuan phone a dah hmak bawk. Kan pa chu a sa ta hle mai a, a vawikhat nan kut min thlak nghe nghe, ka nu leh Biaki te lahin , ‘Thikthu chhe lutuk, pasalte thian thlenga lo thliar ching, zaktheilo’ tiin min ânkhum hlawih hlawih a, ka ngawi reng thung. Malsawma’n a bialnu thlavâng hauha kut min thlak kha ka la na ber, zanah pawh ka muhil lo. Chumi hnu kar khatna velah Jenny nen chuan phaiah sumdawnna thil vel buaipuiin an zin ta a. Hetihlai hian nuamsam lo deuh reng a, khawsik bakah luhai te ka nei reng a, inentir lah a sawia sawi rik ngam chi a ni si lo, ka pawisa khawl ve der der lah a zo titih tawh si. Ka tuar ringawt tawp mai a ni . An zin dun tih ka hriat takah chuan ka nâ chuan a tawpkhawk a thleng ka ti mai, Malsawma chu biain, “Ka phalna leh remtihna tel miah lovin hmeichhia i zinpui a, kei ka damṭhat loh lai a ni tih pawh i hria, i kal lui duh a. A tâwp thleng ngam lo turah hian min ngai a niang e, tunah chuan ka rilru ka siamfel tawh. Ka rinna che i tichhe vek tawh a, kan hlim tawh dawn chuang lo, nang pawn duh i thlang fel taah ka ngai bawk che. I lo haw hma hian ka lo inthiarfihlim ang e. Min rawn ngaihven duh suh” tiin. 

“Ngaih loh lamah i ngai a nih kha. Mipa dang motor hman ai chuan tiin min hmang ve mai a ni..chutia i ngaih luih dawn chuan i awmdan tur chu i thu thu alawm” a rawn ti ve ta bawk a, “Aw. Lo chhuak rawh” ti dawt lo mah se; ka chhuah chu pawi a ti lo tih a lang. Bakah ka sawi ang khan hmangaihna kawngah tawnhriat ka la nei lova, ka dawngsawng thiam ve lo. Ka pasalte chhungin min ṭanin an fapa chu hauin zilh ve nise anmahni avang pawn ka inphah hniam thei mahna. Mahse. Chutiang a hnekin keimah zawk chu thiam lo leh dik lo zawkah min puh ngar ngar a, ka hausak ve loh avangin an tan chuan awmpui satliah ang mai ka lo ni bawk nen, ka tetlai aṭanga chhungkaw nuam leh innghahna tlak la nei ngai reng reng lo ka nih avangin ka tuar a zuau deuh te pawh a ni mahna. Mahse, khang ka nun hmasa lama ka lo paltlang tawhte khan Malsawma ka kalsan hnuah pawh min tichhel hle thung. A lo hawn huna bungraw la tur chuan ka mamawh tlemtê nen in chu ka chhuahsan a, putea te bak belh tur nei ta lo chu ka tlu lut ve leh ta rawih a. Mahse, an mangan ber laia puitu ka nih vang bakah Lateii hi a rilru a tluang êm a, min lo dawngsawng ṭhain a nuam ta khawp mai. An khawsak a la harsa ve deuh tih mai loh chu. piteii pawh keimah vanga damkhawchhuak ve leh thei a nihzia a theihnghilh bik lo a niang, ka chungah a ṭha duam duam tawh khawp mai. Mahse. Chutia chhungte bul pawh nise an chawmhlawm nih ngawt chu ka duh bik lo va, ka pawisa la hum ve hram hram hmang khan sumdawnna bulṭan leh ka rilruk ta a ni. 

Malsawma pawh a rawn haw ta a, min rawn hruai a tum lova, ka duh dawn lo tih a hria te pawh a niang. A lo haw takah chuan bungrua kan va la ta a, min lo dang lem lo bawk. Inhau bung bungin kan awm lova, a mualphothlak dan a zia viau e. Kei chuan an chhungkaw lakah ka kut ka sil fel ta. Ka pasal, ka hmangaih hmasa berin min phatsanna chu nâ ka ti lo bik lo, zanah te hian thinthia ka muthilh hi a tlem viau zel, ka ṭah tlaivar chang pawh a awm thin. Ka ngai a, a chang chuan min lo hruai se la, Aizawlah kan pahnih chiahin awmdun leh ila tihte ka la suangtuah ve fô, mahse, ani chuan rawn lan chu sawi loh min be ngai tawh lo, kei pawn ka be lui duh bik lo. Sawi leh sawi hnu naupanlai aṭanga hrehawm leh rethei, tihduhdahna hnuaia seilian chho ka ni bawk a, ka chhel hle, a chanchin pawh ka ngaihven zui lo naa Thara te nen motor khalhho an nih avangin ka hre leh zauh thin. Jenny chu a luhkhung deuh titih a niawm e, Lunglei leh Aizawl a kartawn a nih ber chu. Hlim mawlh teh se ka ti mai. 

Kan inthen fel hnu lawk kar hnihna velah ka khawsik leh luhai, luakchhuak ta fo mai chu Lateii’n ,”Nau i pai a ni lo maw?” A tih fo takah chuan ka intest ve ta a, ka lo pai tak tak! A pa nen kan inṭhen hman tawh si. Chutia engmah hrilh lova awm chu dikin ka hre lova, Malsawma chu ka nau pai thu ka hrilh ve ta a. “A va lawmawm ve” te chu a ti ve, mahse, ka hrilh zanah la la min rawn biain, “Ka fa a ni thei lo, tunah chuan min then i duh chhan kha a chiang ta chiah, i lo uire thin vang a lo nih kha,. I lo tenawm hle mai” a rawn ti ta zêk a! Mak ka tiin ka rin loh lutuk thil a nih avangin sawi tur pawh ka hre lo. Lateii ten a nu leh a farnuin an fuih khawlo a niang an tih bak rin tur ka hre lo, uire turin mipa han kawm leh han biak ka nei lova, ka mo chhung khan thenawmah tlangval an awm leh awm loh pawh ka hre chiang hman lo a nia. Uire puha min han puh chu han thinrimpui chiam dan pawh ka hre lo, ka uire lohzia ka chian em vang te pawh a niang. Chutianga ka fa lo piang tur laka kut a rawn sil hmak takah chuan keia luhlul laklawh ve ta chuan ka um e lui duh ta bik lova, thil tam tak ka ngaihtuah ve, tuna ka dinhmun angah hian ka ding reng bik dawn lo, chuvang chuan an duh loha an pawm loh phawt a hnu ka fa chu keima ta chauh nihtir ka duh ta em em zawk a, min rawn chuh ang tih ka hlau ta hial zawk a ni. Biaki leh ka nute tawngkam pawh hre leh zauh thin mah ila ka thengthâwngah a thawk pha tawh lo. Pathian zarah tluang takin ka pai ve zel a, pasal uapna hnuaia nau han pai ve chu châk chang ka ngah ve mai, mahse, ka chantawka lungawi tlat turin ka infuih vat thin a, Pathian hi ka bêl tam lo em em chungin min lo hmangaihzia hi tun hnuah ka chiang tawlh tawlh mai. 

Mampuia chu zai chhuahin ka nei ta a, ka rai puar luah hnuah pawh 2nd hand bale hawng vein ka phar buai thin. Lo inkhawl lawk kha ka duh ve si a ni. Mampuia a leikan deuh hunah mahni kea dina in hrang luah pawh ka tum ve ran a, ka sum thawhchhuah tam zawk chu in chhungkhurah ka thehlut zel a, khawsak a tihziaawm phah ve hle nen, Putea te chhungkua chuan hnawksak min ti bik lo niin ka hria. An dawr pawh ka belh hnu chuan a muk ve ta deuh bawk a, Aizawl lama ka hmelhriat dawr lian neite bungrua ka chahsak theih vang a ni pakhat, rate tlawm zawk na nâ na chu mite pawn an pan duh lo thei lova, dawr pawh a changtlung sawt viau. Mampuia ka neih zan chu zai ka nih vangin ka hre mumal lo, Lateii’n min riahpui a, ka fapa hmel ka han hmuh fiah takah chuan ka mittui ka dang zo lo. Ni e, a pa siar a pa siar a ni ringawt. Amah Malsawma ngei pawn rawn hmu se, inang a inti ve tho ang. Mahse, ka rilru a tâwp laklawh tawh a, chanchin engmah ka hrilh duh lo. An tan chuan uire kha ka ni miau si a! 

Mampuia’n thla 3 hmel a hmu ve tihin Malsawma chu a thian thenkhat ten ka fapain a chhunzia an lo hrilh thin niawm tak a ni. Sumo driver hi Thara avangin ka hre ve ta nual a, kan inah an lo leng lut ve deuh reng bawk nen, chuvanga Malsawma bula chutianga sawi pawh chu an nih hmel. Tichuan, ani fapa awt reng renga kha chen lo awm ve ta chuan Mampuia chu a rawn en ve ta a ni. Ka lo dawngsawng ṭha hran lo, Lateii zawkin a hrilhhai dâlah a lo besâwm ve hlauh a, ka fapa hmel a han hmuh chiah chuan a mitmeng a danglam nghal vek. Ni e, a fapa ngei a ni tih a pawm thlap niin ka hria. “Min va hrilh har ve” a ti lawi rût a, nui chungin. “Uire fapa a nih kha, i fapa a ni hleinem” ka lo ti hmiah, chu chuan a tihnatzia ka hmu thei, pawi ka ti lo. Ka mangan leh ka thlabar chhung zawng khan ka bula awm chu sawi loh min ngaihven ngai eih lo. 

“Ka chhungte ka lo sawipui ang, ka fapa hi pa tel lova a seilen ka phal lo” a tih leh lek phei chuan ka sa nghal phat mai. “A sawi pawh i zak lo hi ka tia, ka fapa hi i fapa a ni ve lo, i duh lo a ni lawm ni? Awlsam taka ka rilru hneh chu inring suh, nang nen hian inneih ka duh tawh lo. Ka tum tawh lo bur” ka ti ta hmak a. Ka mitmeng a en a, ka thutakzia a hria a niang. Engmah a sawi zui ngam tawh lo. Lateii te pawn min khap bik hek lo. 

Mahse, Malsawma chu a beidawng mai duh lo, a rawn kal fova, Mampuia chu a rawn kal chhan a nih avangin ka lo chu ê kha e ngai hran lo, a pawm te pawh a pawm ve tak kha. Zep nâk emaw tette aṭangin pa hmangaihna dawng lo, hre lo ka nih avangin ka fapa tal chuan pa hmangaihna dawng ve se tih chu ka duh a, thinrimin rilru na viau mah se; Malsawma’n Mampuia a rawn ngaihsak chu pawi ka ti phal bik lo a ni. Chutiang a nih vang erawh chuan ka nei leh dawn tihna erawh a ni lo. Phone aṭang hian Jenny a kalsan tawh thu leh inneih leh a duh thu a rawn sawi fo a, ka lo ûksak ngai lo, “Kan ina rawn let i hreh paw’n kan in hmunah tho hian in ka sa ve ang a, kan luah dawn nia” te pawh a ti. Chu chuan tlem chuan ka rilru a kaipeng ve deuh, ka hmangaihna te kha a la bo vek loh avang leh Mampuia’n pa a mamawh a vangin ka nem hman ṭêp a ni. Mahse, Malsawma nute ṭawngkam ka hre leh ta a, ka fapa chu an tupaa an pawm lohzia leh Malsawma pawh ka thlem nasat vanga hneh ta angah min lo sawi a, tin, an in chhunga uire lakluh an duh tawh loh thu te, Malsawma nen kan innei leh a nih chuan amah Malsawma ngei pawh an tuithlar tur thute thlenga an sawi tak avangin ka rilru ka thlak leh ta a. Malsawma bulah pawh chiang takin ka hrilh, “Ka fapa pa i nihna hi a bo dawn lova, mahse, nupaah chuan kan insiam thei tawh lovang. Nupui ṭha tak nei la, chhungkua din rawh” ka ti. Ka rilru thlak ka harsatzia a hriat avangin min nawrlui chiam ngam lo. Bakah sawi leh sawi hnu a sihhnipna lai man fuh tawh Jenny chuan a zar ve sek bawk si, an inzui leh ta nge nge a. Nâ pawh ka ti tawh lo e a. 

Mampuia’n kum khat hmel a hmuh hnu lawkah ka lo tum ruk angin in hrang ka chang ve ta rup mai. Loan ka puk a, Aizawla ka lo sumdawnpui tawhte puihna nen sumdawnna bul ka ṭan leh ta a, ka loan puk rulh ngai nen, in luah man nen ka hah ve thin hle. Ka indang chuk chuk chhan pakhat chu Lateii laizawn hi a pasal nen inṭhenin a rawn let leh a, kan chhangchhiat tak êm vang leh ani Ruati chu a inthlahrung hle tih ka hriat avangin keimah a khual chan chang ber chu ka inthiarfihlim ta a ni. Nau pawm chungin damkhawchhuah ka tum a ni ta ber mai, Mampuia hi a tlei hlauh a, min chawk buai em em lo. Zanah erawh a khawharthlak thin. Malsawma nen kan inbe lutuk lo naa Mampuia a rawn kan ve fo a, thil te pawh a leisak ve fo mai. Ka rethei rih bawk nen, a tih ang ang chu ka lo pawm ve hmiah hmiah mai. A lakah beisei ka nei tawh lem lo bawk a, eng emaw ti chuan ka zalenin ka thawveng phian zawk mai. Ani pawn min neih chu a tum ngam ta bik lo a niang e. Hun a kal ve zel a, Pathian zarah ka sumdawnna pawh a tluangin han chet chhiat chang nei thin mah ila, chhe vek khawpin ka awm ngai bik lo. Mipa ka ngaihsak lova, pawisa kha ka thupui ber a ni tawp mai. Ka pa chhungte lam pawh han zawn chhuah duh teh mah ila ka dinhmunin a zir si lo, ka rilruah erawh an awm ve fo mai. Lehlamah anni lam pawn chuti taka min ngaihthah thei chu mak ka ti ve tho. 

Ka hriat miah loh leh beisei pawh ka beisei lohin Malsawma chuan 

a puin in hmun a lo rochun ve chu Mampuia hmingin a lo dah vek mai a lo nia! Chu chu a thih hnuah ka hre chauh bawk. Mampuia pawh kum 2 a tling ve tawh a, Chutihlai chuan Malsawma leh Jenny te chu inneih pangngaiin an innei ve tawh a niawm e. Mahse, zu leh sa nena neihsa chen ham ham takah chuan an neihsain daih loh chin a nei lo thei ta lova, Jenny lah mahnia lo awm hrang ṭhang leh che nuam ve tak a lo ni bawk nen, Malsawma te ina awm chu peih tawh loin Aizawlah a let leh ta daih a, Malsawma pa lah a sroke avangin chhungkaw enkawl hleithei loin a bawksawp ta si, An fapa neihchhun Malsawma mawhphurhna chu a sang chhoin Jenny lahin an in chhuahsana a bula awm turin a lo nawr ve chhen bawk nen. Ka bulah rawn tlan tau dawn se mitmei ṭha ka hmuh duh der si lo, Mampuia lah a fapa a nih ang pawhin a duatin a duhsak hleithei si lo. A rilru chawl lo leh hah chu a niang, Zu bakah damdawi te hial a lo tih phah ta a. Ka hriat tirh chuan ka khawngaih ve hle, tihtheih erawh ka nei si lo. U Sangi chu an chhungkaw khaidingtu a ni ta ringawt mai a ni. Vanneihthlak takin amah duh em emtu tlangval fel takin a luhkhung hlauh a, Anni nupa avang chuan chhungkua angin an la kal thei hram a ni ber e. Cteii pawh kha a nu bulah a awm ta nge nge a, dinhmun hi a lo inthlak thei chiang khawp mai. Malsawma chuan sumo pawh khalh thei tawh loin a changin Jenny bulah, a changin Lunglei lamah, chutiang reng reng chuan a nun a hmang kual ta ringawt mai a ni. Khatia a inawhhlum dawn zanah khan an chhungkua an inhau buai nasa a niawm e, a nu leh Biaki chu a nun tichhetuah te a mawhpuh a, anni lah an ṭawngkam a lo hriam ve bawk si,. Ani rui lungpuam kha inngaihtuah buaiin a mawhphurhna tam takte, a pawimawhna te ngaihtuah kualin a rilru a buai zo a, a inkhai ta ringawt mai a nih ka ring ber. A pindan kawngka a kalh reng avanga u Sangi te ngaihṭhaloin an va hawn luih chuan inawkhlumin an va hmu ta mai a ni. A chhan fak tuman an sawi thei bik lo. Kei hi a thih chhanah chuan min rawn puh ngam ta êm lo a niang, engmah sawi thawm ka hre lo. A ruang pawh ka va kil lo, Lateii ka ṭah awh a, Mampuia erawh a va kalpui ve hram. Malsawma erawh ka khawngaih takzet a ni. 

Tichuan, vanneihthlak takin Home-ah khian u Makimi kha a dintirh atanga thawk tawh a nih vangin ani puihna zarah tihian ka thawk ve thei ta a, interview min neihpuitu te zingah a tel bawk nen, ka dinhmun engkim hre vek a ni a, Pathian bel em em lo mah ila mi nun ṭha ve pangngai, ruihhloa buai lo ka ni bawk a, a thawhpuite rilru hminin dil ve tam tak zingah min la ve ta hlau mai a ni. Ka sawi tawh ang khan U Makimi chu Mampuia ka vei laia min viltu ber a nih bakah ka neih hnuah pawh min ngaihsaktu ber a ni a, ta ṭang khan û angin ka nei ve ta chawt kha a nia,. Mampuia pawh hi a duat teh mai a nia. Tihian Pathian hruainain tun hun hi ka thleng ve ta a, Home-a ka thawh tirh chuan ka fapa hi ka hruai tel ve mai zel a, khilamah an lo duat ve bawk nen. Mahse, school kal theite a nih ve takah chuan remchang takin Mateii a lo awm ta bawk a, tihian lungmuang takin ka chhuahsan thei ta a ni. Mateii hi Pathian min pek ka ti lo thei lo., nakinah a ṭul chuan a chanchin ka la hrilh dawn che nia, kan dinhmun hian inanna lai tam tak a nei a ni. Ka sawi hmaih loh tur chu Malsawma’n Mampuia hminga in hmun a lo dah kha a thih hnuah ka hre chiah ka tih kha,. Mak ka ti em em a, a in hmun lah chu a ṭhain a hulum si,. Biaki te nufa bawkin ka dahtirah ngaiin min la rawn tâwng reng a nih hi, Ngaihzawng emaw pasal emaw ka neih chuan Mampuia min laksakah min vau vel thul, an duhdan chuan Mampuia hi awmpuia a in hmun hi neihsak an duh tih ka hria, ka ît em em lo naa kha zanwg zawng min lo tihhrehawmna te avang khan in hmun pawh hi ka pe duh bik der lo. Bakah mi in luah reng loin in te ka la sa thei a nih chuan in hmun ka la mamawh dawn tih ka hre ve bawk nen, hralh pawh ka hralh phal rih lo. Chu in hmun avang chuan a nia a pite lam hian min rawn ngaihven ruk reng ni.. an khawngaihthlak letling..” tiin..

Lanpuii chuan a sawi thui bawk a, a dang a ro a niang, tui a in khawlh khawlh a, “A va ngaihnawm ve” ka lo ti ringawt. Nui hakin, “A ngaihawm loh thung” a lo ti a. Kan ṭawng leh hmain chaw ei an siam peih tawh thu an rawn sawi lauh lauh a, Thlam lam panin kan inzui phei ta hnak hnak a.

Ka bialnu chanchin kimchang ka han hre ta chu ka thawl hawk ti mai ang, dâwt min hrilh ka ring lo bawk a,. A thih tawh miau avangin Malsawma pawh han thîk vak dan a awm lo. La dam pawh nise ka thik duh kher lovang. 

Damdawi laa ka zin leh dawn avangin ka leng rei deuh a, kan awmdun hian kan titi nasa thei, thu hotê pawh ani nen chuan sawi a nuam a, ka nuihpui duh bik fô. Han insik chet cheta infawh leh ringawt zel hi chu a ninawm,.a tleirawl hna deuh te ka ti ve khanglang a, Lanpuii nen erawh kan inmuah khât a, kan in fawh chhun kha a hlu bik ka ti. A thikthu a chhe lo chu a ni lo naa thik awm leh awm lo a thliar thiam ka ti mai, thil hotê avangin kan inhnial ngai mang lo. Keimah zawk hi ka thikthu a chhiat êm vang hian buaina chawk chhuaktu ka ni ziah. A dawhthei a, ka thinrim tak tak tih a hriat erawh chuan a ngawih loh paw’n a tihsual ni lem lovah pawh tihpalh tih sawi a hreh ngai lo. Ani chuan hlauhthawn pakhat chiah a nei, kan lut thûk zel ang a, ka chhungten min dodal ang tih hi. Chuvang chuan a inveng ru deuh em ni aw tih chang ka ngah mai, “I rilru tak tak min pe lo” tih chang pawh ka nei thin. A nui mai zel a, “Engkim hi risk a nia, ka inveng lâwk a nih hi, ka rinawm a, a tawk rih mai lo’m ni?” A ti thin a, chhan leh ngaihna vak ka hre si lo. 

Chumi zan ka leng haw chu an lo mu vek tawh ang chu tih nak alaiin ka pi leh bawihteii tih loh chu an lo la meng ṭhap mai. Mak ka tiin ka hamhaih deuh. “Tebawih, lo ṭhu lawk teh, thil sawipui che kan duh a nia” ka nu chuan a lo ti var a. Ngaihṭha vak lo chuan ka ṭhu ve mai a, ka pa chuan a aw thian kharhin, “I bialnu nen hian in kal thui tawh em?” A ti ta a. Ka thaw hawk ringawt. Ka nuin min rawn melh tak kâwkah chuan, “Kal thui tih chu eng nge a awmzia? Sex kan la hmang lo” ka ti tâwng a. An sawi awmzia chu ka hrethiam lutuk lo a ni maithei. 

Ka nu chuan, “In kum inthlauhzia i hria a, fa a la nei thei dawn em ni?” A ti sap a. “A thi a la hul lohte chuan a nei thei ang chu” ka ti hul hak a.

“Mahse, a fa neihna a rei tawh si a, hetiangho hian nau an pai leh lawk thei lo asin. Pai lo hlen ta pawh an tam mai” a ti leh zel a, “Chu chu ti nge min sawipui!” Ka ti nghut a, ka thinrim hran lo.

“Amah ngau ngau hi chu kan duh loin kan iai a ni hran lo. A fel pawh kan ti reng. Mahse, han ngaihtuah teh, inneih te hial lo puitlin dawn ta u la, kan bulah a khawsa duh ang em? A fapa vang hian lak hran che hi a hnial lo mai ang em? Hetah in pui nghaktu tur i ni tawh a, i nî leh Mami te nufa pawh i uapna hnuaia la khawsa zel tur an ni, chulai kara ani fa bik nei bawk si chu a rawn lawi duh ang em? Mami’n fanu a nei bawk, aniin fapa, nangmahniin fa in han neih veleh phei chuan eng emaw neuh neuh hi hetiangah hian a tam duh bik riau a, sawi neuh neuh, thil inmung hi a awm duh thin. Chhungkua kan mualpho phah mai ang em tihte thlengin ngaihtuah la, kan bula awma inngeih taka kan chenho theih dawn chuan engmah sawiselna kan nei lo. Amaha tal ṭhang tawh, chhungkuaa thuneihna lekkawh tawh a ni a, mi ina mo anga awm chu a lo hreh viau thei, fabik a nei bawk si. Chutiang velte chu in lo sawi dun te pawh a ṭhain ka hria. “ A ti dap dap a. A thusawiah khan huat tur a awm hran lo. 

Mahse, “Chu! In duh lo tihna a nih ber chu” ka ti ṭâlh a. 

Ka ni chuan, “Kan duh lo a ni lo, i nu sawi awmzia kha ngaihtuah ta che. Lanpuii phei chu ka thiannu a nia, kei phei chuan sawiselna tur ka hre lo, mahse, sawi tawh angin chhungkaw mualpho theihna hi hotê anga kan ngaih atangin a inṭan thin” a lo ti ban chhalh a. 

“Aa..a hreh lovang, mi pangngai a nih saw. Ka dinhmun a hre sa ve vek alawm le” ka ti deuh tûn tûn a, “Ni e, lo sawi dun ve hrim hrim u la a ṭha. Hei i pa nen chuan kum upa lam kan ni ve tawh a, zan khat mit chhin tawk thut thei kan ni, chutih hunah chuan i pawimawh ber dawn a nia, i unau, i nî leh i tute huikhawmtu i nih a ngai dawn a nia” ka nu chuan a ti mawlh mawlh a. Ni ngawt tak mai, ka pawimawh ang hu hian ka puitling si lo. Hei hi chu keipawn ngunthluk zawka ka ngaihtuah a ngai a ni. Lanpuii kalsan tumna erawh ka nei lo mai ni loin neih vat vat ka duhna chu a pung zual sauh zawk a. 

Ka zin hlanin Mimi’n dawr a lo enkawl a, tun hnaiah Johna lungleng khawhar nen an inkawm nasa a, inngaizawng daih se ka ti ru hle. Zan 2 chiah riah ka tum avangin ka zin tukah ka bungraw lak tur ang ang chu ka tifel zung zung a, Hetia han zina zalen deuh chang hi chuan thlemna hnar mai a harsa ve thin bawk nen, Thianpa Bena ten chaw eikhawm an rawt leh tlat a, ka zin ve lai an chuh miau avangin ka sawi nawi ngam lo. Ka intihfel zawhah kan chaw eikhawmna tur lam chu ka pan zui ta nghal a. An lo kim ṭhap tawh. Ka rin ruk ang ngeiin zu pawh a tel leh ngei e, kan thli sen leh dawn chiang. An hre chuang lovang tih rilru puin ka han in leh ta poh a, ka in lohna a rei ve tawh nen, ka zo lo lek lek a ni e. 

Chaw pawh ka ei mumal lo. Puar zawng ka puar tho mai. A tuka haw leh mai tur ka nih avangin rei tak awm khawmuan ka tum hran lo, motor ka keng tho nain zingkara chhuah tho chu ka tum a ni. Lanpuii bulah chaw kan ei khawm tur thu kha chu ka hrilh a, zu in lo turin min chah ve tak naa ka hnar leh thei si lo, chuvang chuan ka be duh rih lo, ka ṭawng dan aṭangin a hrethiam dawn si a. Ka phone a rik sek avangin bathroomah ka va bia a, ka number hriat ngai a ni lo. “Tete, keimah Zuali.., Aizawlah i awm tih ka hria, enteh, ka mamawh lutuk che, khawngaihin min lo hruai teh” a rawn ti teh ngawt a! Rinzuali teh daih chu!

“Eng nge awmzia? Khaw nge i awm?” Ka ti bah nak. 

“Falkland-ah, CC home stay-ah ka awm a, ka thiannu birthday kan lawm a,ka chahthlak hlanin, an rui hlawm lutukin buaina an lo siam a, Home stay neitu ten an hnawtchhuak a, ka harh chuan tumah an lo awm tawh si lo. Home stay neitu te bula ka sawi pawn an awih duh si lova, pawnah ka awm reng ringawt, motor hman tur a awm bawk si lo. “ A rawn ti ṭiau a, hman angte kha chu nise a ranga rangin ka tlan chhuak nghal ang. 

“Aizawlah ka awm tih engtin nge i hriat?” Ka ti ta daih a, a rum nghat mai. “Vawiinah ka hmu che alawm, zarkawt pheiah” a rawn ti a. 

“Khawngaihin min lo hruai mai teh, a zahthlak bawk si. Mawh” a rawn ti leh mawlh mawlh a, Ka bialnu hlui mah nise, chutia hmeichhia lehnghal rui bawk si awmtir ringawt chu thil tihchi-ah ka ngaih loh avangin, “Aw le, ka lo kal ang” tiin ka dah a. Ka ngaih lah a han sam khawp a,. Min lo tina tawhtu Rinzuali hruai tur chuan ka tlan chhuak ta poh a!