Hmeithai 4

HMEITHAI (4)

Ziaktu : Toni Râlte

U Makimi chu ka ni te ai pawha la upa ve lehchhawng a nia, senior nurse niin kumin kumtir lam khan a hnutê a cancer tih an hrechhuak a, phai lamte pawh an pan ve, mahse, a lo ṭai darh nasa tawh lutuk a, hei a thihpui chu a ni ta reng mai. Mi fel tak, kohhran leh khawtlangah pawh mite zah kai a ni. Uitu leh sûntu a ngah ngawt ang. Mut hma ka tum ve nen zep loh chuan ka chau ve a ni, ka rawl ṭhûm bawk si. In hnuai tlangvalte nen kan va lang ve ta poh a, ka tlaivar peih ang em aw tia ka inngaihtuah rauh rauh laiin ka beisei loh tawpin Lanpuii leh ka ni bakah hmeichhe pakhat hi an rawn lut a, ruang chu an va kil ve ta mai. Ka nî hi chu mak ka ti hran lo, u Makimi khan nau ang tak takin a en a, khawi kipah an inzui thin. Lanpuii lo tel ve chu mak ka ti deuh, mahse, a lo tel ve chuan boruak mûk lutuk pawh a rawn tizâng huaiin ka hria, nuam ka ti deuh sawt. Mawng a kham hma ve bawk nen, zial zuin kan chhuak a, ṭhalai pawh kan tam kher mai. A thih hian kum 48 a ni a, nula senior a ni satliah lo, a naute fa pahnih hi a enkawl seilen tihtheih an ni, engkimah a tuamhlawm vek mai a ni. Hetiang nula senior miin fiam chikah an neih tam zawkte hi chu chhungkaw tana innghahna, ṭangkai leh a tel lova chhungkua pawh buai hat thei khawpa mi pawimawh an ni fur âwm e. Pasal neih pawh duh mah se; chhungten an uibeh tur hi an kuh ṭûn a nia, chuvang chuan nula senior ho hi pasal hmu zo lo tia fiam fo chi an ni lo, sum thawk chhuak thei chin ngat phei hi chuan pasal hi hmu lutuk mah se; an nei duh hauh lo ve thei. 

“A la hma deuh tho sia, a sial ka la kawl asin, va peg zuai ang u, kei chu ka lu a na deuh” Peka’n a tih chuan kan tang hrû mai. Hriata pawh chuan, “I va zep thei ve leh, kal ang u” a ti nulh a. Kan kal chu a ni nghal mai. Zu hi i leklam êm mai min ti maithei, mahse, a dik miau si a, ni e, kan leklam thawkhat a nih ber hi. Muangmarin kan han dawm leh ta a, pum a sa thla raih raih mai,. “Tlaivar in tum hrim hrim em?” Ka tih chuan, “Ka hre lo, a thawh dan azir a ni mai” Peka chuan a ti a. Kei pawh chutiang deuh chu, dawr hawn a ngai dawn bawk si. Kan va let leh chuan ka ni te pawn an ṭhutna an lo sawn tawh a, min rawn hmuh chuan a khi sak ringawt, Lanpuii erawh hnuailam a bih tlat. Tlar hnung lamah kan ṭhu bawk a, phone ka hmet ru mual mual, “I hmel hmuh ka lo inring lo a” tiin Lanpuii chu ka va text a, a en pawh ka ring hran lo, hetiang huna phone khawih mual mual duh tur chi a ni ve lo. Kei pawh nuam ka tih chiah loh avangin ka dah leh ta daih a. Kan thil in kha a la thawk bawk a, zai pawh kan zai pawr viau mai. Thingpui an rawn sem a, sawhchiar pawh kan eitui ta phian. Ka ni te chu zunram thiar turin an chhuak a nih hmel, chhuah ka rawt ve ta vat a, thingpui in lai te a ni bawk a, a pawi hran lo. Zun in piah lawkah an lo ding a, Lanpuii pawh chuan min lo hmu ve, a khi sak a. “I va fel ve” ka ṭawng hmain a lo la ti zui. “Nang pawh” ka ti a, a ṭawng leh hmain ka nî chuan, “Tebawih, Lanpuii hi va thlah lawk ta che, ani chu tlaivar ve thei a ni si lo va, mahni chauha haw chu a chi loh.” A lo ti ta var mai le, ka ni duhtak chu ka va hmu hmeltha reuh e. 

“Aw le, tunah mi?” Thuawih hmel fe hian ka ti a. “Luh leha chhuah leh pawh a zahthlak, tuna hawn mai pawh ka pawiti hran lo. “ Lanpuii chuan a lo ti a. Hriata leh Peka te chu ka hrilh a, a hma lawka zu kan inho khan ka sawi thuak tawh bawk a, an lo hrethiam khawp mai, “Golden chance” an lo ti vel. Thim zingah ka ṭhen ṭhâw ringawt. 

Lanpuii nen chuan ke in an veng lam kan pan ta a, kan veng aṭangin hla hek lo. Bakah lirthei ka keng lo hrim hrim bawk nen, a remchangin a romantic daih zawk. Veivak an khât pharh tawh. Boruak a vawt lem lo naa a nuam tawk viau mai. Mahse, ka eng emaw ti zâm roh a, sawi mai tur pawh ka haihchham tlat. 

Amah zawk chuan, “Tlaivar i tum em ni?” A ti sap a. A zâm ve deuh em mawni ka ti. “Ka hre lo, dawr hawn a ngai dawn a, ka tlaivar lo maithei” ka ti a. 

“U Makimi chu ka ui ngawt mai” a ti leh sep a, “I lo lang ve kha mak ka ti deuh a ,in lo inhria ni maw?” Ka ti hluai a. 

“Hre tehreng e, Mampuia ka vei laia min buaipuitu ber hi a nia lawm, pasal ka neih hmain kan inhre tawh,. Chuan, Home-a ka thawh theih nan pawh min pui nasa lutuk, ka û angah ka ngai” a ti ve duah a, a rilru tak takin a ui ve tih a lang. “Naktuk hna chawlh ka dil a, mahse, tlawhtu kan neih dawn vangin min phalsak si lo va, han tlaivar pawh ka duh tehlul nen, ka inthiam lo tak tak a ni. Mahse, vui hun chu rawn nan hman hram ka tum ang” a ti leh mawlh mawlh a, an in peng kan lo thleng der tawh. A va han rei lo tak. “Thingpui te lo in la..” a ti zet a, “E! I in ngai lo tak. “ Tiin a nui sak a. 

“Ka lo len leh hunah chuan ka in tawh ang” ka lo ti ve nghut a. Fiah deuha min melhin, “I lo len hmasak zan ang chiah khan a dai chi rim tel loin i rawn leng leh ang chu tiraw?” A ti fiah ta kak mai. Ka hamhaih chu sawi tur ber pawh ka hre lo. “A..ih, nia, zanin chu min hrethiam rawh, ka chau ve lutuk a” ka ti ta nuaih a. Eng nge maw a hriatthiamna chu ka han dil ve ringawt ni.

“Thu i awih tawh dawn alawm tiraw..hehe, chuan, muttui phawt, tlaivar nuam bawk” tiin a kal a. Ka inrin hmain a banah ka va chelh, ka ti tak tak engtin nge khatianga rang khan ka chet theih ka hre lo. Ani pawh a ding chawt a. Min rawn en bawk. 

Ka huaisenna zawng zawng sawmkhawmin, “Ka duh che. I hria..chu chu ka hrilh duh che a. Chuan, muttui le.” Tiin ka thlah a, min chhan dan hre ngam tawh lo chuan ka kal zui vang vang. Ka chetdan ṭhing lutuk chu ka ngaihtuah let a, miin min hmu lo bawk a tiin kawng bula sintex chu ka han chhir zawt pek a! Ka ke a na lutuk. Bai auh auh chuan mitthi in lam pawh pan ta lo chuan kan in lam ka pan ta daih a. Hriata te chu msg-in ka haw thu ka hrilh ta mai. Lanpuii erawh ka be ngam tawh rih lo, ka msg kha a la seen miah lo. Ka chau bawk nen, ka hriat loh karin ka lo muhil ve ta a niang, ka harh chuan dar 7 a lo pel tawh. 

Ka phone ka han en chuan, “Harhfimin aw” tih ringawt hi a rawn thawn. Ka khi sak a, min hnar lo, mahse, ruihhlo ti mi a duh lo tih ka chiang ve tawp, zaninah ka leng ngei tur a ni. Dawr nghah pawh a va nuam si êm. Mimi a mawng a zâng bawk a, ka che ve mang lo. Kan inrem fel tawh bawk si. Whole sale leh retail-a kan pek chhuah avang hian kan sum hrâwm pawh a na ve deuh, damdawi zawrh hi eizawnna tlak tak chu a ni vein ka hria, amaherawhchu, haihawt te, hriatsual leh hriatpawlh a ngaithei lo, mahni tawkah inzir ve reng a ngai. Damdawi chhuak thar a awm ve reng bawk nen, a tira ka tui loh tehreng nen, tunah chuan ka inringtawk chho viau tawh. Feedback ṭha tak ka dawn phei chuan ka phur mah mah zel. Ka pa hi ngawi reng e ti lo chuan thil hi a lo ngaihtuah thui riau a nih dawn hi, zirna lamah ka hnufum tih a hria a, tihian a loan hmangin eizawnna min hawnsak a, loan pawh rul zo vek tawhin ka dawr hlawkna hi chu ka account-ah a lut deuh vek tawh a, ka nu hlawh leh ka pa pension hlawh hi kan ei bêlah kan hmang, sawi leh sawi hnu ka û hmeichhia Ateii te chhungkua leh Mama te chhungkua kan peizawn chung hian kan buai lutuk bik rih lo. Loh theih loh tâwpah lo chuan ka account-a sum hi kan hmang ngai mang lo a tihtheih awm e. Chhun thingpui kan in laiin John-a a rawn lang hlawl, thingpui kan chah kep nghal a. Helhkam lian tak a nei tih a lang, Mimi a awm ve avangin a sawi hreh niin ka hria. Remchang takin Mimi tirhna tur a lo awm hlauh a, a chhuak fel ta maw tihah, “Bawiha, ka rilru a hah, a na bawk. Lucy leh Zuia te chu an lo inngaizawng tak tak alawm” a ti ta mai. Lucy khan ka bulah chuan Zuia chu a duh ve loh thu leh a chhungte avanga a biak that ve mai mai thu kha a sawi sia. Ka lo ngaihṭha ve ringawt kha a nia. “I chiang a maw?” Ka ti a. 

“Chiang chuan ka inhria, a chhan chu Diki bawkin,’Beisei zui tawh lo mai rawh. Zuia hian a zar hneh bawk sia, an inzui nghet tawh. Aizawlah pawh karlehah an zin dun dawn’ a rawn ti alawm. Khatianga chiang chu a awm thei dawn mi? Lucy lah ka call a la duh ngai miah lo, msg chuan, ‘Call chuan inbiak ngam a ni lo’ a rawn ti tho a. Mahse., msg pawn kan inbe rei thei tawh lo, chhuanlam a siam nghal zel a. Min be châk thlawt lo ni berin ka hria.” A ti mawlh mawlh a, a thaw hawk mai. 

“A va mak dawn ve, mahse, Nau, amah Lucy ka ngei aṭangin hriat phawt tum ila, a chhungte mitmei a ven vangin a be tha satliah ve pawh a ni thei” ka la ti hram a. Ka ṭhianpa tan chuan beiseina ka la neihpui ve ṭâng ṭâng a nih ber chu. 

“Nih call rawh” a ti nghut a. Thuawih takin ka call ve mai bawk. A lo la ve mial a, “Kan dam tlang em?” Ka han ti tê tê a. “Dam ve hram hram, nang zawk?” A rawn tih chuan ka dam thu hrilhin, “Khaw nge i awm? Inah i awm em?” ka ti a, “Tunah chuan in hnuaiah ka leng mai mai. Ngati nge?” A rawn tih chuan tifuh inti takin, “Ṭhianpa hian a be duh che a” tih leh Johna chu phone pek ka rual nghal. 

Johna chuan, “Inbe lawk ang. A rei lovang” a han ti nghal a. Speaker a on nghal bawk. Lucy chuan phur loh hmel deuh hian, “Aw eng nge” a ti deuh hmak a. Ka biak tirha a aw a zangkhai nen.

“Thudik ka hre duh. Zuia nen in inngaizawng em? Ka lo nghak dawn che em? Chu chauh chu sawi la, ka duhtawk ang” Johna chuan pa takin a ti hmiah mai. 

A reh duk a, a rei lo thung. A aw thian kharh kharhin, “Min hrethiam rawh. Kan tan kawng a ping êm mai. Min lo nghak tawh lo mai rawh. “ Lucy chuan a rawn ti ta a, Johna a chhing sawk mai. “Aw le, Zuia lakah min phatsan ta tih ka hrethiam e. “ Johna hmel chu a khawngaihthlak takzet a ni. 

“Ani chuan ruihtheihthil a ti ve ngai lova. Bakah eizawnna ṭha tak a nei. Min dem bik suh” Lucy chuan a rawn ti. 

“Ka dem che leh dem loh che chu ka thu a ni. In hlim dun ka beisei. A nih phawt le..” Johna chuan phone chu a off nghal hmak mai. Ṭhianpa ṭawngkam vel chu kei pa ka lo tia, han chelhzuia han nawrbuai vel a awm lo, thudik a zawt a, chhan a ni a, a pawm ta mai niin ka hria, hei hi midangte pawn kan zir tur ṭha tak a ni. Mi kan va hmangaih em em ten keini aia thlan zawk an neih chuan va ânkhuma va tihlunglen kual vel hi a ṭul ber lo, an rilru siamfelin thutlukna an siam tawh a, kan chelh hlen thei tak tak chuang lo tih hi pawm hmak tur. Min hnawl tak avang erawh chuan anmahni aia dinhmun ṭha zawka awm turin theihtawp chhuah ve tum tur.. 

“A zia lo hle mai. Nau” ka ti ringawt a. Za lo zetin a nui hak, “Ka harh chhuak tlai deuh a tin ni. Zu ka buaipui rei lutuk a,a rilru a hel tawh a nih kha. Thiana, kan tuhrah vek alawm kan seng tiraw? Chuvang chuan ka tuhrah chu ka seng ve mai ang chu. Mipa kan nia lawm le..” a ti charh charh a. A darah beng thakin, “Pa takin le. Ka thil tawn ai chuan a zahthlak nep deuh alawm” ka ti hram,. “A dik, nang pawn i paltlang thei alawm le,. Chuvang chuan, nunthar bulṭan nan i show ngei a ngai” a tih chuan ka nui hawk ringawt. Mipa kan nihna hi a lang leh ṭhin. Mipa fel leh dik, piangthar te chuan he thil hi hmachhawn ta se, “Ekhai! Thianpa, ṭawngṭai ang aw” an intihpui ka ring. Keini lem ve thei maiho hi chuan, kan hlima kan lungngaih paw’n , “In ila” kan ti daih zel. Hei zawng hrethiam in awm ka ring tlat. “Chhunzawm tawh lo la..” ka ti a. A bu nghut ringawt. Pawisa phawrhin, “Kha,i va kal mai loh chuan” ka ti a, phur zet chuan a va kal leh tak nul nul kha. 

Zanriah ei laiin ka nuin, “Tebawih, tunhnaiah hian zu rim hi i nam thar thar reng mai a, ngati nge i lo in leh thin le aw. Bansan a hun tawh em mai, i dawr te hi ngaihtuah la, zah pawh a zahthlak” a ti ta hlak hlak mai. Zep loh chuan ka zu in hi ka inthlahrung ve thin êm a, an hriat hlau chung chunga ka tih thin bakah buaina siam zawngin ka khawsa ngai lo bawk nen, min haider ve deuh thin tih ka hria. Zanin chu a insum thei tawh lo a niang. Ka pa pawh chuan, “Ni e, puitlin lam hi pan ve tawh rawh, i thian leh i rualpuite chuan Kohhran an bel a, Biak inah hmuh tur an awm reng a, entawn rawh” a lo ti ve chhut chhut a. 

Ka chhang lo. Mami’n min rawn nuih deuh a, ka melh rum vak ringawt, ka nî a awm lo hlauh a, a zia viau e. Khawhar in kal a ngaih tak si avangin Lanpuii ina len pawh ka ṭhulh a ngai dawn a nih hi.. a vawikhat nan ka call ve ta hmiah a, “Khawhar inah kal ila” ka va ti. 

“Zanin chu Mampuia lehkha zirpui a ngai a, naktuk zanah aw” a rawn ti dam thlap a. Aw le tiin ka dah leh daih, awmdun lo mah ila zu rim ka nam avangin phone atang ringawt pawn ka inthlahrung mawle. A zahawm a ni he nu hi. 

A tuk zanah chuan harhfim kâkin ka leng leh ta. Mampuia pawh ka be ve luam a, min la nêl chiah lo nen, kei lahin ka besâwm thiam bawk si lo. Mateii nen room lamah an awm leh ta daih a, kan free hle. 

“Ka rilru i hre tawh a, i rilru min hrilh ve tawh la.” Ka ti ta râwih a. Ka melh zeuh bak chu chhuatlam ka melh run ringawt. A ngawi veng veng a, rei ka lo ti hman teh e. “I niin ka chanchin a hrilh lo che em ni?” A ti ta daih a. “A ṭhen chauh min hrilh” ka lo ti nghut a. 

“Eng thleng” a ti ta zel, “Ih, i pasal neih hma vel chiah” ka ti nuah nuah. “A pawimawh lai i la hre lo a nih chu mawle” a ti sap a. “Min hrilh zawm mai la, hun a nei lo thei lutuk a, ka ni chu” naupangchhia takin ka ti a. 

“Pasal pahnih nei tawh ka nih hi.” A tih chuan makti zetin ka melh a, a mitmengah chuan inthlahrunna ka hmu thei, chu chu ka lakah hman a ngai lo tih ka hrilh châk, mahse, “Engkim ka hre duh, i chungchanga ka hriat tur ang ang chu.” Inla patling takin ka ti ta zawk a. 

“Sawi vak tlak pawh a awm lo. Ka dinhmun chhiat êm vangin pasal atan putar ka nei a, a faten min hnawhchhuah hnuah pathlawi ka um leh a, chu chu a ni deuh mai.” A ti hmawk hmawk a, a sawi dan chu thinrim rilru nâ inbunruak te pawh a ang e a. 

“Chung chu ka tan a pawimawh ber hleinem,. I nunhlui an nia, ka rilru a danglam phah lo” ka ti nghet charh a. Ka rilru tak tak a ni ka sawi ni. 

“Mampuia pa chhungte hi an rawn hrâng zeuh zeuh asin. “ Min hrilh chiah pawh ni hian a lang lo. “I la vengthawng tihna mi?” Ka ti hû a. 

“A teuh lo, Mampuia hian a pa chhungte an ni tih an hriat ka hlau zawk” a ti leh lawi si, a awmzia ka hrethiam lo e a.

“Engpawhchu nise, min duh ve em? I rilru min hrilh la, thildang chu kan la ngaihtuah ang chu” ka ti ta thâwr a. Min rawn melh kiau a, kei aia upa daih a nih hi rin a har zawk. A hmelṭha lutuk tlat. “I danglam alawm, midang ai chuan. “ A ti sep a, lai deuhin a nui bawk. Chu a ṭawngkam tawitê avang chuan ka hlim a ni, a kut ka vawnsak a, ka ṭawng hmain, “Mahse, ka fapa leh kei hian ruihhlo ti mi kan ngaina lo” a ti leh a. Hmm, hei chu ka rindan a ni sa, mak ka ti lo. “Ka hrethiam e, ka tum ang. Ka lawm e” ka ti a. Ka fâwp zui hmiah bawk. Zanin hi ka mumang chu a ni si lo. Rinzuali aiawhtu ka lalut ta a, ka duhthusam hmeichhia a ni bawk. Kan hmalam hun chu ka kutah a innghat thui zawkin ka hria, mipa zawk ka nih bakah tlangval ka ni, ani chu fa nei tawh, hmeithai, amah tal hrang thei a ni a, kei erawh nu leh pa, unaute nena la khawsa ka ni. Ka chhungte rilru hneh turin keimah aia pawimawh an awm lo tih pawh ka chiang,. Ka theihtawp ka chhuah ang. 

Lucy nen an inṭhen aṭanga kar khat chhung zet chu Johna pawh khap hleihtheih lohin a rui a, a chhuak ngai lo va, a roomah zu chu a tlan tawp mai a ni. Tuition pawh a pe chhunzawm lo chiang kher mai. Mahse, kan hau duh rih lo, tawp chin a nei dawn tih ka hria, a tuar ang, a rûm kâwk kawk ang, mahse, hliam chuan hnâi a la ang a, dam ni a awm leh ngei ang. Ka thianpa hian a thihpui dawn lo. Dawr aṭangin ka va kan zeuh zeuh a, han lempui chang pawh a awm lo thei lo. Lanpuii ka vengthawng viau nain thianpa ten kan bula an thlit kerh kerh chuan enliam ve mai a lo harsa thin. Chutiang chuan hun a kal ve zel a, Lanpuii nen pawh hunbi neiin kan inbe ziah a, Thawhṭan, Nilai leh Zirtawp zan leh sunday zanah ka leng thin. Kohhran pawh a hma ai chuan ka bel ve ta deuh a, min nawrtu leh min fuih rengtu hi a chak êm a, a tirah amah avangin ka pen a, a rei a, Pathian vangin nuam ka ti chho ve ta zel mai. Mahse, sawi leh sawi hnu han petek chang erawh ka la nei fó. Ka zêp lem lo, Johna pawh zawi zawiin a rawn fim chho a, a kulcho kha a tawrh deuh vangin damdawi inah ni 3 kan han dah a, zan khat ka han riahpui nghe nghe. A rawn dam chho a, rilru pawh insiam chhoin kan fuih nasa bawk a, a hna ngai thawk chho lehin mi duhsak a hlawh chho ve leh ta mai a. Ka lawmpui tak tak a ni. Lucy te erawh an chanchin ka hre tam lo, kum tawp lamah inneih an tum niawma sawi te a awm a, Thianpa ber a dam tawh chuan pawi tihna ka nei hran lo ve.

Lanpuii chanchin kimchang ka hriat zawh hman tak loh khan kap chang min la nei thin, amah ka zawt hreh si, ka ni lahin, “Ama kâ atang ngeiin hre zawk rawh” a ti bur tawh si a, ka hriat ve a ṭulna awm miah lo mah se; mihring kan ni miau a, ka hre chak ve a ni mai. Putar nei duh hial khawpa dinhmun khirha a dingte chu ka lainat rualin tunlaiah chutiang taka inrahbehna in chhung a la awm chu mak ka ti hle bawk. Mampuia pa chhung te hi Rahsivengah an awm tih chu ka hria a, tu te nge tih phei zawng ka hre lo. Han len luh fo takah chuan Mampuia pawn min nel chho ve ta hle a, a lawm zawng han kensak zauh te ka lo ching ve bawk nen. “Pa Tete” min ti phawt a, “Pate” tiin min ko zui leh ta a ni. Mateii pawh kan inngaina tawh hle, ani pawh hian chanchin ngaihnawm tak a nei ve, mahse, sawi vek kher a ṭul hran lo, ama pualin a hranin kan la sawi turah ngai ang. 

Ka lo tiam tawh angin kan huanah kan kal leh dawn ta. Johna leh in hnuai tlangvalte bakah Mimi leh Lanpuii te chhungkua kan ni deuh mai. Hetih lai hian ka niin min chhaih a hrat avangin Lanpuii nen kan chungchang chu ka chhungte pawn an hre thawi tawh a, engmah an sawi lem lo. Bawihteii kan hruai tel bawk a, Mampuia nen an inkawmngeih nghal mai bawk nen, a nuam viau mai. Tui kan thehkang leh a, Lanpuii leh Mimi’n ṭhahnem an lo ngai nasa,. Mateii erawh a naute a lo vil thung. 

Sangha leh kaikuang chu kan siam nghal a, Lanpuii’n arsa a kang a, vawksa rêp kan chhum bawk. Mimi hian vawksa a allergy a, bakah naupangten an lo ei lutuk lo nen, chuvang a nia arsa kan ken tel ni, kei phei chuan ka ei ngai lo tluk a ni. Thlam piah lawk thing hlim hnuai zawl zau laiah pher phahin Lanpuii nen chuan kan mu duai a. Thlifim a rawn thaw heuh heuh bawk nen, rilru a thlamuang a, a nuam a ni tawp mai. 

“Ka lawm e aw” a ti sap a, “Ngati maw?” Ka lo ti hû. 

“Zu i in lova” tiin min rawn melh sawr sawr a, make up inbel lo hian a ṭha zawkin ka hre thin. “Ka in châk deuh tho, mahse. I awm ve sia” ka rilru diktak a ni. Hetiang nikhuaah hi chuan han tih ve mai hi a chakawm ve bawk êm a ni. “Chuvangin ka lâwm, engmah ka ni lo chunga min zah ve avang hian” a ti leh a. A biangah piaiin, “I thu êm alawm, aw lalber” ka ti a, kan nui dun. 

“Ih, nizanah Mampuia nî hian min lo bia a., nang nen kan chanchin a lo hre leh chat tawh. Hrilhtu hi a nei a niang ka ti tawp. “ a ti hnual raih a. 

“Eng nge a sawi a?” Ka ti vat. 

“Ngaihzawng i neia pasala i neih chuan Mampuia hi kan la ang, engmah i sawi buai thei lovang’ min tia, ‘In duh duh chu ti r’u, ka theihtawp ka chhuah ang’ tiin ka chhang ta mai. “ A ti a. 

“A ṭhat chu. A thuhrimin ngati nge ti hian i indang tawh a, an la rawn ngaihven reng che a, Mampui pa a boral tawh bawk si” ka ti hluai a, he lai tak hi a nia ka hriatthiam chiah loh chu ni. 

“Chu chu lawm.. i hriat ve hi a hun tawhin ka hria. Hun kan ngah em?” a tih chuan, sana ka bih zauh a, chawhnu dar 2 a pel âwrh chauh. Dar 4 leh dar 5 inkara chaw ei kan tum chauh bawk a, “A la hma lutuk” ka lo ti vat. 

“Ka pi leh pute boral hnua ka dinhmun kha chu zep ngaihna awm lo khawpa chhia a ni, ka pahrawn ina ka awm laia ka hrehawmna nen a inang reng. Rual ka pâwl ngai lova., putea lah zu in mi a nih avangin ruihsual chang a nei a, ka chungah a ṭuan fo bawk si, Piteii lahin min huphurh a, a fate nena kan inkawm pawh a phal lo, a fanu ka kawm rualpui ber lah kha Aizawlah piteii u te inah a va awm daih bawk si. A tawi zawngin chutiang taka ka dinhmun chhia chu kan thenawmte hian min khawngaihin Aizawl lamah mi ina awmna tur min lo zawnsak a lo nia, duhthlang thei dinhmunah ka din loh bakah chhuah kha pawi ka ti tawh lo,. Ṭawngkam ṭha leh inzilhna dawng ngai lo, pangngai taka biak ni ngai lo ta chu ka nungchang leh tawngkam pawh a mawi lo sâwt hle a. Tleirawl luhlul lai a lo ni bawk nen, min duhsaktu te chuan ka nun a chhiat phah vek ang tih hlauin an hmelhriatte ina awmpui hna thawh tur min lo hmuhsak ta a ni. Putea ka hrilh chuan ani zu rui harhfim mang lo chuan a lo phal ta mial a, piteii erawh chuan a lo phal hauh lo. A chhan chu in chhungkhur chet, engkim zawng zawng ka tih vek a nih avangin ka ai a awh a ngai tawh dawn a, a peih lo ni berin ka hria. Mahse, ka kal lui ta hmiah a. Tichuan, Mi awmpui hna chu thawkin ka awmna te an fel bakah an khawsa thei a, ka inchhir lo khawp mai. Hun a kal zel a, ka awmna pa ber, kum 60 pel tawh Pu Muana hi a nupui sûn tawh, khawhar lungleng thei em em a ni a, a fapate chhungkua bakah a fanu te nena khawsa an ni, Pa Muana nen chuan in nghak ber kan ni bawk a, kan inngainain kei pawn pa ang maiin ka en thin. Ani pawn min duatin thil thar te hi min leisak reng thin. Chutia ani khawhar hnema ka lo awm ve ta chu rilru dang a lo pu chho ta a, ka dinhmun engkim, ka baihvaizia te a hre ve vek bawk nen, nupui atan min sawm ta ringawt mai a ni. A tir chuan ka ten em em a, ka zak bawk si, pa hausa tak a nih avangin in leh lo bakah dawr a nei nual a, chung hmangte chuan min thlem thin. Kei chuan ka hnar char char zel,. Mahse, harsatnain min rawn nuai leh ta a, ka nu, min hringtu kha ka pahrawn chuan hnawtchhuakin ani ka nu lah chhul cancer a lo la ni zui a! Kei a fanu hi min rawn hrilh lo thei bik si lo,. Ka nu chu ka neihchhun a nih tawh miau avangin ka khawngaih em em a, enkawl dam ila kan nufain awmdun ve reng tawh ila tih ka ngaihtuah ta a, tichuan, Pa Muana bulah sawiin ka nu min enkawlsak chuan ka neih tur thu ka hriilh ta a ni. Rang takin ka nu chu Aizawlah kan chah phei a, Pa Muana sumin kan enkawl chho ta ngat ngat a, khatiang taka ka tana inhuam leh ka chunga ṭha em em reng Pa Muana chu kei pawhin ka lo ngaina ve ta tial tial a, tichuan, a in pakhatah ka nute nen chenghoin innei ang chuan kan awm ve ta tawp mai a ni. Hetia kan awm chhan hi chu khatia ka nu enkawlna senso a tumsak vek tih a faten an hriat khan an lâwm lo khawp a, keimah vangin nasa takin an innghirngho phah ta a ni. Ani lahin nupuia min neih a tum thute a la sawi ta deuh deuh si, kei chu an pa sum ka duh vanga neih pawiti lo hmuhin min hmu ta a, a awm ka tihpui ve tho, mahse, kei chuan ka nu nen thlamuang taka kan awm dun theih kha ka duh ber a, Pa Muana a lo tel ve khan ka thla a muang zual a ni mai. Chutiang teh nuaih kan nih avang chuan in hrangah kan khawsa ho ta a ni. 

Thla 2 awrh kan chenho hnuin ka nu chu a boral ta a. Mahse, a damchhung reilotê ka bula a hman theih avang khan ka lâwm tawk,. A natna kha a lo nasa tawh em a, chhan theih a ni tawh lo a tin ni. A nunna pawhsei nana a sum leh pai sengtu ka pasal chungah pawh chuan ka lawm hle. Ka nu boral hnuah pawh nupa ni ve nafam chu kan cheng dun ve zel a, nau ka chhiat hnuah ka pai zawm leh ta lo. Fa kha a awt ve em em a, kei pawn pakhat tal hrinsak ka duh lutuk. Mahse, ka pai thei tawh tlat lo a ni. Kum 3 leh a chanve dâwn kan awmdun a, lung lam ṭha lo a nih avang hian han buai zeuh chang kan nei fo mai. Sawi leh sawi hnu sum leh paiah a buai lem lo bawk a, phaiah te in check upin a zarah ka zinna tur pawha ka ngaih loh hmun nuam tak takah te min zinpui thin. A fate hian an rawn ngaihven ngai lova, a tupa hian a rawn be zauh zauh thung. Hunpui hmang tura hlim taka kan inpuahchah laiin a inbual tur bathroom-a a lut chu a ri ta rum rum mai a, kawngka a kalh hman tawh si, ka mangang kher mai a, thenawmte ka ko ta chul mai, kawngka chu tichhiain kan va luh chuan a lo tlu hlawm reng tawh a. A lung nâ a chhuak leh a lo ni. Rang takin damdawi in kan panpui a, mahse, kan han thlen meuh chuan a lo chatthla fel der tawh a lo nia! Ka chan chu rapthlak tak a ni. 

A fate chuan an pa ruang chu rawn la hmakin an in puiah an vui a, kei chu va lang ve mah ila, thla tak ngial pawh min laktir duh lo. Biak ka hlawh lo va, hmelhriat loh ang mai ka ni. A thlan nghah nî pawn nilêngin ka va awm ve a, tuman kam khat pawn min be lo. Mahse, ka pasal a nia, ka nu hnenah khan ka man a hlan ve thlap bawk, chuvang chuan ka pasal hun tawp chu ka hmanpui ang ka ti ve tlat a ni. Tichuan, ka pasal boral aṭanga ni 3ni-ah kan inah chuan a fate chu rawn kalin chhuak turin min rawn ti ta a ni. A damlai khan kan pa chuan a rosum chungchang ziah fel a duh thu a sawi a sawi thin a, kei chuan ka inthlahrun avangin ka sawipui duh ngai lo. Bakah amah pawh hian tiang taka kan han innei rei ve ta chu a fate pawn hrethiamin min la pawm theih mai kha a beisei a, in puiah ama hova kan chenho theih kha a ring thin. Kei pawn chu chu ka duh ber kha a nia. Mahse, rin lâwk loh thil a thleng ta si. Ka hmingin tuna kan chenna in hi dah a tum thu leh a rang thei ang bera ukil a hmuh tur thu chu a thianpa a lo hrilh ngei a, mahse, a tum chhungin tiang kha a thleng ta si. Kei chuan chan engmah ka nei ta lo. A damlaiin ka tan leh ka nu tan a theihna zawng zawng a lo hlan tawh a, ka tan chuan a tawk viau a ni. E! Chuan ka sawi hmaih chu, a hminga graduate ve kha ka châk êm avangin IGNOU-ah BA (Education) ka exam leh a, ka pass ve mial bawk. A zarah graduate ka ni ve thei a, ka result chhuah ni te khan kan hlim ve asin aw. Miin putar an han ti tak naa, ram hnathawk lo, exercise ngaipawimawh tak a nih vangin putar a ni lo, kan kum a inthlau em a, an hmu tar mai a ni. Tichuan, ka in ni lo na nâ na chu ka chhuahsan lo thei ta lova, ka pasal fate rapthlak an tihzia chu thenawm ho pawn min hrilh liam liam mai. Min khawngaih a, an inah thla khat dawn chu ka awm hman a ni. Mahse, chutia mi ina thawhchhuah pawh nei lova awm reng chu a zahthlak ve sia,keimahin ka indang ve ta chawm mai a ni. In leh lo nei lo mah ila ka pasal khan ka account-ah cheng nuai 5 dawn chu min thunsak hman a, chu chu bulṭan nan hman ka tum rilru ve a ni. 

Mahse, maw, Vanlal, beisei ang hian a awm theih loh, a mak lutuk. Ka lakah sualin ṭha lo viau mah se; ka putea te chanchin ka han hriat chuan ka lainat ta em em a, lehlamah hrehawm viau mah se, kutdawh êmin min siam bik lova, ka hrawk an chawmin mutna min pe a, khang kha ka ngaihtuah lo thei bik lo. Putea chu a zu ngawlvei vangin a hna atanga ban a ni a, Piteii lah a stroke avangin hna thawk thei a ni si lo, an fanu te nupain an awmpui ta ringawt a, an makpa chuan Aizawl - Lunglei sumo a khalh ve a, chu chu an sum hnar a ni ringawt mai. . An in chhung bungrua lah an pawisa batna ten an thiar chhuak deuh vek tawh a, an kawrawk a ni ringawt mai. Tichuan, ka cheng nuai khat leh sing nga chu ṭanpui nan pe vein piteii inentir nana hmang turin ka hrilh a, putea pawh zu a nghei tawh naa a taksa a chak tawh loh em vangin hna a thawk thei lutuk tawh lo nen, pawisa la bang chuan eichawp dawr an siam ve ta a. An fanu Lateii,ka tetlaia ka thian neih ve chhun lawm lutuk khan min ṭah khum hial a ni. An bulah erawh ka cheng ta lo.. sumdawn lam ka tui viau lo nain hmalakna tur dang ka hriat loh avangin ka sumdawng chho ve ta a,. Bangkok lamah te zinin, China lamah hmelhriatte siamin bungrua ka chah ve ṭan a. Dawrah a hlawmin ka pe chhuak leh thin. Dawr luah man a to avangin keimah chuan ka luah ngam rih lo a ni. Chutianga kum khat dawn ka han sumdawn takah chuan ka tui chho ve zel a, nuam pawh ka tiin hlawkna pawh ka tel tam ve ta telh telh mai. Lunglei lamah bungrua thawn phei a ngaih fo avang hian Lateii pasal hi ka thawn mai thin a, Thara aṭang hian a nia Mampuia pa nen pawh kan inhriat tak ni. Min lo ralkhat star ve nasa a niang, Thara hian min hrilh thin a, kei phei chuan ka phek en vek avangin ka hre lawk lo lehnghal. 

Mampuia pa, Malsawma hi ka ngaihzawng hmasa ber a ni. A dawtah nang..” ti dap dapin min rawn melh vawng vawng a, ka lo ngaithla tui lutuk nge sawi mai tur pawh ka haihchham a lawm le. 

“Aa..ih, sawi zawm phawt teh” ka lo ti vut a,. A laklawha tawp hi ka duh lo, ka awm a tinuam lo. 

“Keimaha awm ka nih vang leh sumdawng ka nih avang hian min zuamtu pawh an awm ve fo mai, mahse, a mak lutuk, duhzawngtê hi ka neih bakah pasal nei tawh ka nihna te, ka dinhmun zawng zawng ka hriatchianna khan min bawhbet hneh lutuk a, kei aia dinhmun sang leh ka phu loh mipa te chu ka enliam daih zawk zel, ka nihna an hrechiang ang a, min hmusitin a hma anga dinhmun chhiaah khan ka awm leh ang tih hlauhnain ka khat a ni ber. Bakah mipa ngaihsak chi ka ni lo ve hrim hrim bawk a, Chutia Malsawma’n min lo duh tih ka hriat pawh chuan eng teh ualah ka ngai lo. Sum tam tak thawhchhuaha mahnia in leh lo din vein ka nu lung ka phun ang a, ka pate chhunglam ka zawng chhuak ang tih vel daih a ni ka lungkham thin ni. Mahse, Malsawma nen hmaichhana kan han inhmachhawn takah chuan ka danglam ta vek mai, hmelṭha ka ti a, pa hi ka ti em em bawk. Ka sawi thiam lo, amahah khan ka bei nghal thlawrh a ni ber e. Chutianga inhîp tawn ta chu kan inngaizawng chu a ni ta mai.. Ka nihna leh dinhmun a hre vek a, min hnualsuat lo, anmahni sumo a khalh a, ani pawh pathlawi ve tho a ni..”