Hmeithai 2

HMEITHAI.. (2)

Ziaktu : Toni Râlte

Ṭhianpa Johna chuan Lucy chu rûk a lo tum ngei a, amah Lucy pawh hrilhin an inah a zu kal nghal a niawm e, Lucy chuan a hreh viau naa kawng dang neiin a inhre bik tawh lo nge ni, a chhungte mut tawh hnu nia a hriatah va thoin pawna amah lo nghaktu Johna nen chuan Johna te in lam pawh pan ngam rih lovin Johna nuteii te in lam an pan a, mahse, an vanduai asiamin Lucy te ṭhenawm nula rim tlangval chu Lucy û te nen inhmelhriat ṭha tak an lo ni si, chupa leng rei haw tur lah chuan a lo hmu hman chu niin, Lucy û chu a call ta nghal a, a rang arangin an va umzui ta a ni. Kawng lakah an innagching a, Lucy û leh a cousin te’n Johna chu an lo khawih hlak a nih hmel, Lucy pawn huaisen takin tlan dun an tum thu sawi sateh mah se; pa ber chuan a mualphothlak tiin a aia mualphona zawk turin FIR a thehlut ta ringawt mai a, Lucy rukbo tum anga puhin ka ṭhianpa chu an man ta a ni. Mahse, an fanu ngeiin thudik a sawi fak fak hnuah leh Johna chhungte lamin ngaihdam an dil nasat êm vangin an inrem thei ta hlauh mai a ni. Kut hial an thlak erawh Johna unaute leh keini a thiante ngei lung a awi hleithei lo va, mahse. Amah Johna berin nakin zela Lucy nen an inkar a ṭhat zui loh a hlauh vangin min khap dai ta hram hram zawk a ni. Ni e, ka ṭhianpa hian Lucy hi a lo hmangaih takzet a nih hi. Innei ngei se ka duh hle mai. Chutihrualin Lucy chhungten Johna an duh lo tlat hi chhan ṭha tak dang, kan hriat ve loh hi a awm em mawni aw tih chang ka ngah mai, kan pian hma thil thleng te hi a lo ni reng thei ang em aw.. chu zawng hunin a la rawn hril ang chu. 

Ka pi pawh a chhuah theih dawn avangin kei a tlawngawl ber chu ka han kal leh ta poh a, ka pa lah hi huan lam ringawt a atchilh a, ram hna lam hi ka tui ve tehchiam lo nain ṭhiante nena lui han kalho vel erawh ka peih fu thung a. Damdawi in ka thlen chuan ka pi pawh a lo harh ṭha viau mai. Tihfel ngai neuh neuh a awm avangin ka han vei leh thuak thuak a, nghah ve a ngaih avangin hmelhriat lohte nen kan nghak ṭhap a. A thawhpui te nen an rawn kal tlang a, min rawn hmu, kei pawn chiang takin ka hmu ve. Ka hmuh châk loh ber ka han hmu chu ka lâwm tehchiam lo, ani pawh chu a meng no tehchiam lo khawp mai. Ni e, he nurse hi midang tan chuan tidamtu kut neitu a ni mahna, ka tan erawh tinatu a ni a, a hmel hi ka ten, ka haw bawk. Mipain hmeichhia lo huat ve chiam kha tlawmah ka la lek lek thin a, mahse, a mi elsenna leh diriamna te, a zahtheih lohna te avang khan lo ten ve hi a phû ka ti tho mai. A dik alawm, he hmeichhia, nurse Famkimi hi ka bialnu ka nupui tur ang hiala ka lo suangtuah tawh ,Zuali bialnu a ni tlat ! Hmm, ni e, khawvel hi chu a tenawm tawh êm alawm. Mipa leh mipa inngaihzawnna khawvel, hmeichhia leh hmeichhe in ît tawnna khawvelah kan cheng miau si a, mahse, ka chunga thleng ve turah ka lo ngai ngai lo va, a tirah phei kha chuan ka ringhlel phal lo kha a nia. Ka nuihte kha a za zawk mah a ! A tak tak a lo ni. 

He thil thlen hun lai hian ka nu pa ka pu hi cancer vangin rei tak a bet tawh a. Kei kan chhungkaw zinga a tlawngawl ber leh zuanzang ber tur chu tiin ka nu ten Aizawlah ka pu va buaipuia chhungte va tizangkhai ve turin min tir a, ka dawr pawh ka pain a lo nghak rih dawn a ni. Ka pu chu dam si lo, thi si loin rei tak a bawksawp a, a tawrh kha a na hle nain mi chhel tak a ni,. Thla khat dawn ka va châm ta nghe nghe a, lehlamah nuteii leh putea te hoin min lo thlahlel ve tumhrang nen, ṭhian ka lo nei nual bawk si a, damlo buaipui e ti loin nuam ka ti ve ta phian a. Hetihlai hian Zuali nen pawh kan inbe reng tho a, mahse, call hi a ning thin a, keiin msg type ka peih vak lo thung. “Kan rinawm chuan a tawk, kan in hrechiang tawh tho” tih kha kan thupui a ni bawk a, ngaihṭhat lohna chhetêmah ka nei ngai lo. Mahse, vawikhat chu Johna hian, “Nau, in nu hi a hirha ve sâwt riauin ka hria, drinks lam pawh a lo ti ve thei phian a”..a rawn ti roh a ! Ka awih lo ngang mai, beer hi chu a in ve zeuh zeuh a, zu pangngai phei chu keiman ka in paw’n thinrim hmak hmak zel kha a ni si. Engmah pawh a bulah chuan ka sawi hran lo, ka haw ve ṭêp tawh bawk a tiin. Tichuan, ka haw phei ta a, ka thlen zanah va len nghal tumin an in ka pan a, ka hrilh lâwk vek si kha ani a lo chhuak daih chu niin, a nu chuan, ‘A ṭhiannu damlo serious deuh a awm a, an han kan dawn a nih kha..” a lo ti sam êt a. Min hrilh miah lova a kal ta mai chu mak ka ti ta deuh, ka call a, a chhang thei lo. Msg ni se a seen hek lo. Ka thlen zan chuan kan inbe tluan lo ta parh a nih chu ! Zingah lungawi lo zetin ka tho a, ka miscall leh msg zozai a hmu tawh chung pawha engmah a la rawn sawi lo chêu chuan ka thin a tirim zual a, chumini chuan dawr a hawng hek lo. Chawhnu lamah a nu hian min lo call ta a, “Bawihi hian a kalna a hrilh mial lo che maw? Call leh msg a chhang duh si lo” a rawn ti ta. Kan inruk chu a ring vak lo a nih hmel, kei pawn ka biak theih loh thu ka sawi ve a, a ngaihna kan hre lo dun viau. Chutah Zuali nu bawk chuan, “A thiannu Famkimi kha i hre ve em? Kha mite inah khan a riak em mawni le, chuan a phone a tibo a ni maithei” a ti leh a, Famkimi chu ka hria a, ka hrechiang lo, Zuali dawrah hian a khât tawkin a rawn kal ve zeuh ṭhin, inkawmngeih tak ang chuan an lang ngai lo naa inbe ngai lo chu an ni lo tih a lang. “Be chhin la, a thiannu chu” ka ti ringawt a. 

Tlai lamah Zuali nu chu ka call ta a, chanchin ka zawh chuan, “Aw ka lo hrilh theihnghilh daih che alawm, aw Famkimi bulah chuan a awm a, a phone pawh a tibo lo, kan buai lutuk a ti ringawt a, a rawn haw ṭêp ang” a rawn tih chuan ka sa leh ta zak mai. Engvangin nge ka call a lak duh loh? Chanchin eng emaw tal pawh msg talin engvangin nge min hrilh loh? Min ngaipawimawh lo lutuk chuan ka thin a tirim hluah hluah. Ka ngawi ve ta hmak a, Ka thiante bulah erawh engmah ka sawi lo. 

Zanah pawh a reh tluang zel. Ka mut tawh hnu dar 11 bawr velah number hriat loh aṭangin msg ka dawng a, “Rinzuali hi lo biain lo tibuai tawh suh, ka ta a nih hi. A ta pawh ka ni..” tih tê mai hi. Number chu ka save nghal a, a dp erawh ka hmu thei lo. Zuali va call nghal mai ka duh rum rum a, mahse, ka insum leh ta zawk. Amah Zuali ngeiin min rawn biak hmasak loh chuan thu leh hla va neih kha a mipa hna lo riaua ka hriat vang a ni. Mut erawh a tui mawh viau. Ni 2 zet dawr a khar tak hnu a ni 3-naah a rawn lang ve leh ta hlawl a, a cher deuhin ka hria. Amah zawk chu ka dawrah a rawn kal a, a nui lui tih ka hria, min be châk hmel pawh a pu hran lo, kei lah ka lo intinelawm duh bik hauh si lo. “I la thinrim mi?” A ti satliah a, “Aw” ka ti mai a. A ngawi leh daih, call a dawng a, “Aw, chawhnu lamah aw, dawr hi ka hawn ve zuai rih loh chuan..” tiin a dah zui a, min rawn melhin, “Nakinah i hrethiam mai ang. Nih phawt” tiin a kal a, ka au zui lo. 

Chumi zanah chuan a nia thil rapthlak leh tenawm tak ka hriatchhuaha ka hmuhchhuah tak ni. “Bro, i hmuh ve ngei ka duh sia, pa takin aw” tiin Johna’n video min rawn thawn a, ka’n en mai chu ka beisei loh tawp thil ka hmu ta a ni. Ka bialnu Rinzuali leh Famkimi te infâwp ngawr ngawr lai bakah hnutê an inkhawihsak lai video a ni a, an harhfim lo tih erawh a lang, hlim hmel em em hian an lam dun zui a, a khat tawkin an infâwp leh thin bawk. Ka en zo ta lo mai. Ka sa pup pup a, ka awm tawp mai a ni. Eng ber nge ka ngaihtuah pawh ka hre lo, ka buai nuaih ringawt mai a ni. Tlema rilru a rawn harhfim deuh hnu chuan Johna chu callin video chu khawi aṭanga a neih nge ka zawt a, “Ka thianpa Lawma min pek mawle, Zuali thiannu kha an veng nula a nia, nurse a ni nghe nghe a niawm e, i zin hlana Helipad-a concert awm zana thil thleng a nih hmel,.” A rawn ti ta kalh kalh a. Famkimi chu a la hre ve lo a niang. A sawi chu a dik hmel, thawm kha a tamin veivak pawh an awm nuk mai, mahse, an zak der si lo. Rui pawh nise chutia han awm kher chu aw..hmeichhe dang pawh an rui ve fô, khatianga mizo society rilrem loh zawng taka tenawm taka chet kher kha eng nge a ṭulna ni ang aw..”Ṭhianpa, a zahthlak hle mai, sawi tur pawh ka hre lo” ka ti ta ringawt a. 

“Ka hrethiam che. Engpawhnise, Zuali pawh bia la, sawi dun u la..” a rawn tih chuan ka ner sawk mai. Ka hreh a ni. Mahse, sawi fel hrim hrim chu a ngaiin ka hria. A tukah Zuali chuan dawr a rawn hawn loh vangin an in lamah ka kal ta hmiah a, a nuin kawngka min lo hawn, min hmuh chuan a hmel a pha dai hian ka hria, a fanu awmdan avang te pawh a niang e. Inthlahrung hmelte pawh a pu alawm le. “Mateii chu a zin alawm, nimin tlaiah khan a thiannu nen khan Shillongah kan zin dawn tiin a insiam sawk sawk a, an kal ta daih alawm. Famkimi patea dinhmun a ṭha vak lo an tia, ka hrechiang bik lo” a ti niah niah a. Tah zet chuan ka chiang ngam ta ti mai ang, ka chhungril chuan pawm loh a duh, chhuanlam ka la dapsak hram hram naa, ka mihrinna chuan, ‘A tawk, i chiang tawh, pawm rawh, a phatsan che tih hi’ a rawn ti ni hian ka hria. Dawrah pawh lêt tawh loin ka haw nghal vang vang, ka zahna nge nasa zawk ang ka natna kha aw..ni e, ka nâ a, ka zak a, ka thinrim bawk. Lalrinzuali, ka bialnu , chhungte leh ṭhenrualte paw’n innei tura an ngaih vek tawh khan a hmeichhiatpui lakah min phatsan a nih chu! Mipa tan chuan a tlawmthlak vawng vawng a ni e,. Mite chuan min hmusita min nuihzat turin ka ngai a, min melh hrek hrek turah te ka ngai a, kar khat dawn ka chhuak lo, ka chhungte paw’n mak an tiin Zuali erawh a chhe zawngin an sawi ngai hauh lo. Ka nu phei chuan, “Amah kha a nu zêm lo nen, a pianṭoin a zir ru ve reng thei pawh a ni thei, chutiang a nihte phei chuan keini lo sawisela lo hmuhsit ngawt chi pawh a ni lo. In inṭhen a ngai tih pawm la, hun i la ngah alawm, Pathian hnaih nan hman tum rawh. Nupa êm in la ni lo zawk a, a vanneihthlak letling zawk alawm” a ti thên a, a sawi anga awlsamin engmah ka paltlang thei si lo lai chu a ni min tihah thintu chu. Hotêah te ka thinur hlur a, ka pi lahin thuchiang hriat châkin min zawt ve chhên a, ka ning hman lek lek a ni. Mahse, ka piin thil nihna diktak a hriat zan chuan ka lu chunga kut nghatin min ṭawngṭai a, Zuali tan pawh a dilsak thlap. Khata ṭang khan ka ngaihbel nge mawni ka chak chho leh ta deuh a, ka lo ngaihdan ang khan tumah chuan min lo hmusitin min lo nuihzat hran lo, kan rilru hrisel leh hrisel loh hian midangte min thlir dan tura kan ngaih ang hi a hril thui khawp mai.

“Hlim ang che u. “ Tih thu ka hnutchhiah a. An lo haw hnuah, “Harhfimin ka awm ngai lo va, kan video a lo viral bawk nen, ka zak ve bawk si kha ka rui char char a, ka zinbo daih a nih kha. Chutianga inlaichinna kan nei lo” a rawn ti! Ka nui ringawt. 

“Ka thusawi hi awih rawh, nangmah berin min hriatthiam loh te chuan tuin nge min hrethiam ang a? I mak em mai, midang i duh a, kal hranna tur chhuanlam i dap mai mai a nih kha” te a rawn ti thul,. A chang leh, “Kimi chuan nang aiin min duat zawk, a zei bawk si, bakah rai a hlauhawm ve loh” te a rawn ti bawk. A enga mah ka reply ngai lem hlei lo va. 

Ni khat dawra ka awm laiin Famkimi nen an rawn lang hlawl mai a, A dawr kha Zuali chhang chiah hian a nghak tawh a ni. A thuhrimin Famkimi chu nurse ve si a hman hi ka tia. An rawn kai deuh phâwt a, pangngai takin ka lo hmachhawn thei tawh. 

“Tete, test kit kan duh” Famkimi chuan a ti a, a nui har har bawk, a eng chuan nge maw a nuih tiza ni. Pregnancy test kit chu ka pe a, “Oh! He thil hi chu kan mamawh ve lo tiraw babe” tiin Zuali chuan Kimi kawngah chuan a va kuah hnâp a, min rawn runluih kual vel mai mai tih ka hriat avangin ka thinrim duh miah lo va, nui ve sukin, “Mamawh lo tak ang.. energy drinks lam chu kan kawl chiah lo” ka ti a, customer dang an awm lo erawh ka lawm hle. Famkimi chuan min rawn en hâwin, “Bialpa nei ve mai rawh..” a ti leh a, ka nui hawk hawk, “Ka zak e a..aih, ka duh lo, ka duh miah lo aw” tiin tuai ṭawngin ka ṭawng hlang hlang a, ka ing euh kual vel chuan a run ta deuh nge ni Zuali mitmeng ling hlar chu ka va hmu thei, ka thin lah a rim duh der si lo. A nuam letling phian, “Mipa ve si, hmeichhe laka bialnu han hloh chu, pa lo theih ngei mai” Famkimi chuan min tihthinrim tum tak hian a ti leh kher a, tuai ṭawng bawk hian, “Awii, lalṭhian, pa lo viau mah ila maw ka anpui ît tur khawp chuan ka piangsual ve lo a nia aw, hrethiam em..hahaa” tiin ka nui lui nghek nghek a, an pahnih chuan ka awmdan mak tak avang chuan an hrilhhai a, an thinrim ru hle tawh tih ka hre thei. Customer an rawn kal a, an mamawh ka lo pek lai chuan, “Tuai ai pawn i nep zawk, hmeichhiain i bialnu an chhuhsak thei che nia” Famkimi bawk chuan a ti leh. Kan customer lah chuan phone a hmet mual mual a, a lo ngaihven eih si lo, a va nuam tak e aw. 

“Kal ang, hetiang mi anglo ka dawr peih lo.” A ti nghat a, Zuali chuan rum zeta min rawn melhin, “Tuaia, min lo tibuai tawh suh aw” a ti khanglang a, “I msg ka reply ngai loh che avang khan sorry, hmeichhe diktak chauh ka be thin aw. Ṭhiannu, e..chuan, tu sazu zawk nge sei zawk che u” ka tih leh ngat takah chuan Zuali chu kut min thlak duh tur khawp hian a ling ṭha duh khawp mai, “Aa..ka hre chak tak tak lo aw, ka chaw ei a tui loh phah ang. Sazu nei dangdainu” tiin ka ph call lo kal chu ka laksak ta daih a, Famkimi’n a lo pawh avangin Zuali pawh chuan min kalsan ve thei ta hram. Kha bak kha kan inhmu ta vak lo, han inhmu zuai thin mah ila kan inbe ngai lem lo, hmelhriat loh angin kan inpêl a, amah Zuali phei chu a zak deuh thinin ka hria, ni e, zak tur pawh a nia lawm. Kei a tisual ve miahlotu pawh ka zak ngawih ngawih alawm le. A chhungte pawh an zak hle tihte ka hre ve zel a, a pa phei chuan a vaw hrep a niawm e, mahse, a luhlul ve ngâng ngang bawk nen, an enliam ta tawp a niang, an la inzui reng em tih lah ka hre hek lo. Kum hial a lo liam ta a, hriatchhuah chang chu awm thin mah se; ka hrereng tawh lo va, amah vangin ka na tawh ngai hek lo. Hmangaihna pawh hi a lo dai ve thei takzet a nih dawn hi..

Zanah ka nî damdawi ken theihnghilh pe turin Johna nen motorin Tar enkawlna in lam kan pan a, “A half lek la lawk ila, tlan nawm nan” a ti sur sur a. “A mak, i nghei tawh dawn emaw ka tia” ka lo ti hluk a. Lucy kha neih a tum nasa sia, khatiang thil a tawn tawh hnuah pawh zu chu thlah a la tum lo em mawni le. “Chutiangin vawi leh khatah a thlah ngawt theih hleinem, tihian ka inreduce hlek hlek dawn alawm.” A lo ti pawr hlur zawk zamah a! Heiham, a half chu kan la leh ta nge nge a, ka ni hi a strict êm vangin a rim thup nan elaichi kan lei kawi zuai a,. Car-a ka lut leh tur chiah chu, “Vanlallian” a rawn ti fak mai a, ka aw hriat tawh hnu a ni, amah hmu lo paw’n a âw atang ringawt pawn Rinzuali a ni tih ka hai lo. “Eih” ka ti vut a, ka sir lam atangin a rawn lang nghal zat. “I dam maw?” A ti a, a ruih hmel vak loh, a piahah a scooty a ding bawk. “Aw dam e, nang zawk?” Ka tih chuan, “Umm, dam e, khaw nge in kal dawn a” a ti leh a. Ka sawi a, “Nih chu, kan monu nau ICU-ah a awm a, kan kal ve dawn a nih hi” ka zawh pawh ni hran lo chuan a ti a, A bialnu hmuhna chance a ni leh mai alawm ka lo ti rilru a, “kan kal phawt ang, in damlo pawh chu lo ṭha rawh se” tiin ka luhsan a, kan tlan zui nghal. Side glass atang chuan min rawn thlir zui vawng vawng chu ka hmu thei, Johna lah chuan, “An inṭhen tawhin ka hria” a lo ti a. 

“A ho em mai, sawi thui suh” tiin tape ka play ta daih. Rilru tihthar buai leh hi ka duh lo va, ka tum lo bawk. Engtikah mah kan inzawmin inlaichinna kan nei leh thei tawh dawn chuang lo. Lo inhambuai leh vel kha ka peih tawh loh bakah ka induhtawkna hian a tlin lo. 

“E tak a! Tar enkawlnaah hian hmeichhe danglam deuh a thawk ve asin” ka ti thut a, “Tu chu maw?” A ti ve bui bui. “Nuthlawi hmeithai a nia. A chhe lo” ka ti liam puat a, “Nuthlawi hmeithai chu a va dangdai tak ve” a ti ve mai a, kan thil sawi dun chuan kan nuih a tiza leh deuh nge ni kan han nui leh nghek nghek phawt a, kan thlen chawpchilh avangin kan sawi zawm ta lo. Ka nî chu ka call a, “Lo lut ve mai r’u, kan la laklawh, waiting roomah khan lo awm mai r’u” a rawn ti a. Security bulah kan sawi a, kan lo nghak ta a ni. A thianghlimin a fai hle mai, a boruak pawh a nuam tawk viau e. 

“Lawk aw, lo chelh rawh, tikhan, Tea, Tebawih..vatin” ka nî aw chu thlabarna hian a khat, kan ding zawk a, ka nî chu a rawn tlan lut nghal bawk, thlaphan hmel zet hian, “Motorin tiraw in lo kal, tunah damdawi inah kan chhuk nghal a ngai” a ti hlawk hlawk a, kan lo hamhaih ve deuh a, mahse, tu emaw an rawn zawn chhuah chuan kan che ve ta vat a. Putar kum 90 pel tawh a ni ngei ang, a zawi nguai mai a, motor lam chu kan panpui ta vat a, “Tikhan tlan nghal mai ang, Dina leh Lanpuii te nen kan kal mai ang, John, nang ka scooty saw va khalh mai rawh aw” ka ni chuan a ti leh sawk sawk a, kan che reng reng chu a rang vet vet ngei mai. Damdawi in lam chu a chak thei ang berin ka panpui ta a, putar bulah ka ni  leh Dina a tih mipa sa ṭha lamte kha an ṭhu a, ka bulah Lanpuii a ṭhu bawk. Mahse, phone a hmang deuh char char a ni mai. Putara chhungte a bia niin ka hria,. “Ti nge ambulance te kha in kawlin ka hre sia” ka tih chuan, “Nia, vawiinah khawthlang lam aṭanga home-a rawn awm tur hruaiin kan motor dang kawlte nen an chhuk vek a, kan doctor lah a puzawn a boral a, Aizawlah a phei daih si, eng êm kan ti lovang kan ti kha a nia, chhun lamah kha chuan a ṭha reng asin mawle.” Lanpuii chuan a ti mawlh mawlh a, Pu Sailova chu oxygen an hîptir reng a, ka nî chuan a khat tawkin a ko reng bawk. Ka tlan chak bawk a, kan thleng hma khawp mai. Emergency ward-ah an nawr lut nghal a, doctor te kutah a awm tawh a, thaw a veng ta hawk e. Ka pi vang hian thih leh dam karah kan awm fô tawh a, ngaia neih erawh a theih bik miah lo. Thihna meuh hi chu a satliah lo bawk a ni. An han indah luh fel hnu lawkah Pu Sailova chhungte pawh an rawn thleng a, a fapa leh a tunu niawm tak, tleirawl an ni. Ka ni leh Lanpuii te chuan pa zawk chu an kal hranpui a, an thil sawi chu ka va hre ve phak tawh lo. Dina khan, “Hawh, mei va zu lawk ang hmiang” a ti a, kan chhuak chiah chu Johna rawn luh tum nen kan intawk chiah. Waiting shed-ah zial kan va zu ta hlat hlat a, veivak an awm ve reng mai. “A hmain a na thin mi? “ Ka ti satliah a. 

Dina chuan, “Nat zeuh chu a nei thin, a nasa ngai lo va, zanin kha chu kan inchhan hman dawn lo emaw ka ti hman alawm, a lung nâ hi a nia a harsatna ber..thawhah a lo vei zui bawk nen” a ti mawlh mawlh a. 

Titi dang sawi kan la ṭhut reng laiin ka nîin min lo call a, “Khaw nge in awm daih? Lo kal r’u, hei a boral a nia” a rawn ti ta mai. Hmanhmawh zetin kan lut ta nghal a, Pu Sailova fapa khan phone hmangin tu te emaw a lo be kual mek a, a tunutê khan vin deuh hian, “Hetiang a thlen tawh hnuah pawh tiang hi i la nia, i rapthlak em mai,.” A ti hlak hlak, tu tak bia ang maw. Ruang an siksak zawh chuan ka nî chuan, “ Home lama kan kir leh a ngai dawn sia, Lanpui, Feli a awm tho bawk a, Dina nen in va tlawmngai mai dawn mawni le. Kei tal khita ka awm loh chuan..” a ti charh charh a, Lanpuii chuan, “Nia, A pawi hleinem, ka va zui ve ang e, a lainatawm khawp mai, pu Sailova chu” a ti ve mai a. Ka ni chuan min rawn enin, “Tete, Johna nen va kalpui mai r’u aw, va tlaivar ve kher pawh a ngai lo, naktukah kan director te nen a kokim zawkin kan kal dawn tho.. “ a ti leh mawlh mawlh a, hnial thei dinhmunah kan ding lo, bakah tihtur em em kan nei lem lo bawk nen, Lanpuii bula awm chu ka hreh loh zawng tak a lo ni bawk sia, Johna pawh chuan hnialna a nei lem lo ve. Pu Sailova ruang chu a fapa te pafa bakah an chhungkhat mi pali nga ten an zui ve, mak ka ti ru deuh, han ṭap bawrh bawrh pawh an awm lem lo, a tunu erawh chuan a mittui a hru fap fap mai. Inah kan peng zuai a, Lanpuii te in lamah kan peng kawi leh bawk, Venglaiah an awm a, a in luah chu a lian hran lo, mahse, a felfai thlap mai. Tleirawl leh Lanpuii fapa niawm takte chuan lehkha an lo zir mek a,”Maa, i lo va haw har ve” naupangtê chuan a lo ti var a. Kum 10 vel a ni maithei, a sam chu a kir chiat a, a mitmeng chu a nu chiah chiah, mipa naupang hmelṭha leh duhawm tak a ni phawt mai. Kan lut huk chu mak a ti ve deuh nge ni min en hrek hrek a, “Nia, damlo kan buaipui a, i û hi ka call tlang thei lo va, chuan maw Mampui, ka chhuah leh lawk a ngai, ka rawn haw har lovang.” A ti zung zung a. “Lo ṭhu lawk r’u, ka’n inthlak lawk ang e” tiin min rawn melh zauh a, pindanah a lut nghal bawk. Pindan aṭang chuan, “Mate, ti nge ka call tlang theih loh che” a rawn ti lâng lang a, tleirawltê khan, “Signal a chhe leh daih alawm, dar 4 vel aṭang khan a bo daih” a ti nang nang a. Keiniho chu zum deuhin min rawn melh ve hlawm bawk. A fanu tho em mawni dawn le, mahse, ka ni khan fapa a neih thu bak a sawi si lo va. A fapa awmtu a nih te ka ring ta deuh. A sawi ang khan rei a rial hran lo, puan dum plain rawn bihin a kawr erawh a hak ngai top hring duk tho kha a rawn ha a, flat dum a bun bawk,. “Mate, i nau hi dar 9-ah lo mutpui rawh aw, ka aw in hria a nih loh chuan tumah kawngka lo hawnsak suh u. Mampui, ṭha takin lehkha lo zir la aw,.” Tiin a fapa chalah chuan a fawp zauh a, a fapa chu naupang fel tak a ni ngei ang, han ngen emaw a chhuah chhan zawh pawh a tum chuang lo, thuawih deuhin a bu nghat ringawt. Lehlamah an hna avang hian zanah pawh a chhuah zeuh zeuh a ngaih ka ring a, ngaiah an nei ve tawh a ni maithei. 

Kan kal leh hnuah Dina chuan, “Lanpui, kha tleirawl kha i nau nge in awmpui zawk” a ti a. Dina pawh hian a lo la hrechiang vak bik lo a nih dawn hi. “Ka nau a ni mai, Mampuia hi ka awmpui hman lutuk si lo va, tihian ka awm loh hlanin in a lo nghak a. Mampuia lahin a lo ngaina ve bawk nen, a tihzia tak tak a nia” Lanpuii chuan a ti ve mawlh mawlh a, biakna vak tur ka hre si lo, biak ve hram ka duh bawk si, ka ngaihtuah nasa mai. Johna lah chuan, “E..englo, u Lanpui ka ti mai ang che aw, in pa nen in inṭhenna a rei tawh em?” A ti leh ta phawng mai, a chanchin kha ka hrilh thuak tawh sia, chulai tak chu ka lo hrilh chiang lo em mawni le. 

Lanpuii chu a nui hak a, “Kum 9 chu a ni ve tawh.” A ti sap a. Ka lo insum hman lo, “A boralsan che emaw ka lo tia” ka’n ti ngawt a! Johna nen chuan mawl min ti dun ngawt ang le. Mahse, ṭha deuh hian, “Aw ni e, a boral tawh alawm.” A ti leh sep a, sawi thuipui chi-ah ka ngaih tawh loh laiin kan Johna pek chuan, “A va zia lo ve, engtia boral nge?” A lo ti leh pek. 

“Aa..a inawkhlum a” a lo ti nghat. Johna chu ka va melh a, min en duh der si lo, sawi zawm tawh lo se ka duh takzet, ṭawng a tum lai takin, “Kan thleng dawn hnai a ni maw, mi an pung tlat” ka ti ta vat a. Johna a ngawi thei ta hram. Lanpuii chanchin hriatchian ka châkna erawh a nasa tulh tulh mai. Ka ni hi chiang deuha la sawitir a ngai a ni. He hmeichhia hi a danglam tlat, a landan maiah chuan zahawm tak ang paw’n a lang lo, a bula awm chiah hian engtin emaw min uap ka ti mai, huhâng a nei lian reuh tlat. Pu Sailova te in kan thleng a, ruang pawh reivaklo kan kil ve . A fanu te niawm tak pahnih chu an han ṭap bawrh bawrh a, midang an hul viau thung, an pa chu an sûn vak lo em mawni dawn ni. Damdawi ina pafa chiah lo lan aṭang khan an ngaihsak lutuk lo nia hriatna ka nei, hei hi a nia tar enkawlna in a lo awm hlutna em em chu, an in chhunga ngaihhlut hlawh tawh lo, hnawksak mai ni tawhte inawmtleina hmun kha a ni ve miau a, kha ringawt pawh kha an tan chu hun rangkachak a ni ve thei tlat. 

Ṭhutna kan sawn hnuah chuan ṭhalai lam pawh an rawn pung tam zel a, zai pawh rin ai takin a nuam. “Ka lu a nâ, ka mamawh” Johna chuan a rawn ti sur sur, hmalam melh chung chuan, “Chutiang sawi rih suh, a hun rih lo” ka lo ti. Zep loh chuan kei pawh ka lu a na ṭan a, zu hnathawh reh ṭan mek chuan min tizawi bawk si, boruak lah a uap churh bawk nen, luakte a chhuak ut ut dawn mai. Dina leh Lanpuii te erawh an zai tui hmel hle, Dina hi Chanmari-ah an awm a, ka hmuh vawikhatna chu a ni lo. Tlangval fel tak tih a landanah pawh a hriat hle. 

“Dar engzat thleng nge kan ṭhut dawn?” Johna bawk a ni. Dar 12 a la ri lo hlek a, hawn mai ka duh tawh keipawn. Bakah hmelhriat pawh an ni ve lem lo bawk a, a pawi vakna ka hre hran lo a ni. Dina bulah, “Kan haw tawh mai dawn mi le?” Ka ti ta a, a kil bera ṭhu Lanpuii a be râwn ve leh tê tê a, ani pawn a fapa a ngaihtuah bawk nen, hawn mai chu pawi a lo ti bik lo va, thingpui sem hmain kan haw ta hlawm a ni. Johna lah chuan, “Ka lo riak mai ang, thlah phawt ila, kan lam leh mai dawn nia” a ti a, ka lo hnial hran lo. Dina chu kan drop hmasa ber a, Pu Sailova te nen veng khat mah nise; an lawina kohhran a inang lo va, an inhre lutuk lo. Tichuan, Lanpuii chu kan va thlah leh ta a, sawi tur kan hre lo dun si, amah lah a ngawi reng bawk si, a chhuk dawn chuan nui sângin, “In fel hle mai, keimahni vangin in menrei phah a,. Muttui u aw” a ti a. A va nui mawi reuh tak e aw. Ka lo melh vung vung a niang, Johna chuan, “Aa..i fel daih zawk, hei, ṭawng nachang pawh i hriattir leh loh hi, i hrethiam em? Tak taka muttui le..kan lo la leng dawn a nia aw. Phal lo mah la” a ti zuah zuah a. Mi rawn nghawk avangin ka phu uih bawk, “Nia, ih, aw, muttui u “ ka ti bah nuaih a. Lanpuii nuih chu a zat hmel hle. Engmah sawi tawh lo chuan an in panna stepah chuan a chhuk ta chhat chhat a. Keini pawh a chanve kan va lam belh leh hram, an mutui lai kan kaihthawh avangin an lâwm  lo viau lehnghal. A âwm ve tho mai. Motorah chuan kan in dun kerh kerh a, “Zing zu a ni mai tikhan, zing zu in zawng zawngah kan in zîng ber ang” a ti nuah nuah a. Ka nui huk ringawt, a sawi dik lo hran miah lo. Kan nuam ta deuh bawk a, kan tang leh hru tawh. “Hawh, zuk kal leh mai mai zawk ang, chicks hmuh pawh a khat alawm. “ A tih tlat avang leh mut bopui daih ka ui ve tho vangin Pu Sailova te inah khan kan zu kal ve leh ta ngawt a! Lanpuii te khan hria se mak an ti ngawt ang. Zing dar 4 velah kan rilṭam tawh bawk si, dawr an inhawng tawh bawk si lo chu kan haw ta nge nge a, thawm dim zetin chaw ṭhing kan khel dun ngar ngar mai. 

A tukah pawh dawr ka hawng peih ta lo. Kan zan hun dan an hriat avangin min khak lem lo. Johna phei hnuah ka intifai a, weekend-ah lo chuan zu in ka duh tawh lo, a hrehawm thin em mai. Bakah pawisa a hek. Ka nî a lo hawn lai chuan cup noodles ka lo ei a, “In haw hma hma nen, ti nge i va tho tlai awm ve. Dawr pawh hawng thei lo khawp khawpin” a ti hlak hlak a, Ka ni hi chuan min vin hrep pawh nise kan chhungkua hi chuan ngaiah kan nei tawh. Tuman kan ngai haw lo. “Kan kal nawn leh a” ka ti duh lek a, a chek hlak, thingpui insiam pahin, “In rim aṭang khan in kal nawn kha ka ring reng a ni. Zahthlak lutuk,.” A ti leh a. A lo hre leh vek a nih chu, ninawm a. 

“A ho em mai, mi tih loh dan pawh a ni hleinem” ka ti satliah a,. “Dina leh Lanpuii an zahawm alawm, an fim dawn ropui si” a tih takah chuan ka inthlahrung ve deuh, mahse, remchangah lain, “Taka, Nî, Lanpuii pasal kha a inawkhlum a ni maw?” Ka lo ti vut a. Min melh hrawkin, “Ngatan nge i tih” a ti duh chauh. Ka va ngei tak e aw. 

“Ka hre ve chak mai mai. Nizanah a sawi zuai a, kan zawt zui ngam tawh lo va” ka ti ṭha ve mai a. 

“Umm, a inawkhlum alawm. Mahse, an inṭhen hnuah daih a nia..” a ti sam et a. 

“I mumal lo e, sawi chiang deuh teh. Ka hrechiang chak a nia” ka ti pawr hlur tawh. “Awii awii Vanlallian, Lalnunpuii hi i star chiang, i nî rual a nih saw” a ti hliai a. “Sawi vat mai teh” ka tih chuan, “Hmm, tak taka an inṭhen hnu, an fapa pian hnu lawkah a inawkhlum alawm, Lanpuii nunkawng saw a bumboh teh mai a nia, thawnthu ngaihnawm tak a tling ang. Mahse, a chhel êm a, tiang dinhmun hi a thleng thei a, a fapa lah tihian a ṭulpui hmak thei bawk a, a ngaihsanawm asin aw” a ti duah a. 

Dawhthei vak lo hian, “Chutiang lam vak ka hre châk lo, eng nunkawng bumboh nge tih lam ka hre chak alawm” ka lo ti a. Ka beng a rawn pawt a, ka ner nawk. “I hriatchian kha a duh vak lo maithei a nia, a chanchin hi midang hriat a duh vak lo, chuvang chuan i hriatchinah i lungawi theih loh chuan amah ngei zawt mai rawh. Bakah ka hre thui vak bik lo, amah hian a sawi ngai bawk si lova. “ A ti ta mawlh mawlh a. Hei chu a dik ang, hria pawh nise a hrilhtu phalna tel lo chuan ka nî hian a sawi vek duh dawn lo, a mizia a ni tlat lo. 

Duhkhawp lo teh mah ila ka zawh belh ngam tawh chiah lo. “Dik tak chuan, ka belchiang châk, kei aiin upa mah se; ka sawi thiam lo. Amah hi a danglam” ka ti ta ngawt a. Ka nî bulah hi chuan engmah kan zep si se ngai lo, Zuali pawh kha a chinchhuaka engkim hretu a nia, min zilha min fuihtu ber pawh a ni. “In kum inthlauhna avang pawn pehhel che a tum ka ring” a ti zawi sap a. 

“Ka tum ve phawt ang chu” ka lo ti. 

“Amah hnaih tumtu ka hriatchian deuh pahnih chu an hlawhchham tawh a.. nia, a luck ve alawm, mi hîp theihna riau hi a nei a” a ti sar sar a, “Home aṭanga inhria in ni nge a hmain in inhre tawh” ka tih chuan, “Amah hi chuan a hmain min lo hre tawh, kei chuan Home aṭangin.. kan inkawmngeih nghal bawk” a ti a. Ka û te an rawn haw avangin Bawihteii lâwmin a kalsawn ta daih. Ngawi rengin ka ṭhu a, Lanpuii hmel tak ngâk leh a mitmeng fiah kâk te kha ka mitthlaah a lo lang a, ka tum tiruhin, “Midang chu an lo hlawhchham tawh a, a hlawhtling awmchhun nih ka duh” ka rilru chuan a ti mawlh mawlh a. Chona phurawm tak a nih rualin tawngpawng zuam ngawt chi a ni hauh lovang tih erawh ka hre ve thiam..Chuan, a hmasa berah U Lanpui tia ka koh ṭut chuan a dik lo nghal, Johna ang lo takin, ‘Lanpui’ ka ti ngam tur a ni. Thinlung hliam vanga mahnia tlei tawka inhria leh midang mamawh lo anga inngai thin khan khawvel thara zuanluh ka châk ta thut chu a nia,. Hei hi chunglamin ka kawng zawh tura a ruahman pawh a ni thei asin. Mahse, kum inthlauhna bawk chuan min tibuai riau,. Ni e, ka ngaihtuah thui mah mah a ni. Kum te chu number mai mai alawm le..