Hmeithai 3

HMEITHAI..(3)

Ziaktu : Toni Râlte

Lalnunpuii in ka hre tawh a, mahse, ka va leng ngawt ngam si lo lai hi a ni. Pa lo han inti ru dawn mah ila, mipa nazawng, chupawh a aia nau fêin han rim vel chu a lo lungawi chiah lo thei, a langa mawi chuan min be ṭha reng a, mahse, khangte chu mi pangngai nihna a ni ve mai bawk si. Hriatchian lah chu ka chak tulh tulh lehnghal a! Johna pawh a drinks nasa leh deuh nge ni, a ngoh chho a, kulchoin a zui nghal zat bawk. Drip te ka va khaisak ang lawp lawp a, Lucy lah chu a û nen Goa lamah an zin daih si, Lucy chhungte lam hi chuan inrem hi an la tum lem lo niawm tak a ni, amah Lucy kha chuan, “Rinawm la, i nun siamṭha la, hneh hun kan la nei em em ang, nangman i zir ve phawt a ngai. Min neih i duh tak tak chuan, Pathian bel la, amah nen theih loh a awm lo, kan paltlang em em ang “ tiin thu a chah ve thlap, a zinsan vangin a han rui zual deuh a, tihian a kulcho te a han zia chho ang a, a thlah ve hret hret chuan ka ring. A eizawnna lamah pawh insawrbing deuh se ka duhpui khawp mai. Ka ṭhianṭhaber a ni a, hmasawn zawngin ke pen se tih hi ka duhpui takzet a ni. Lanpuii chanchin ka sawipui ngai miah lo thung, a rilru a la fim rih lo êm mai a, midang lo sawi rik ve kha ka tibuai mai mai ang tih ka hlau a ni. 

Ka nî chu han tlawn sateh mah ila, ka hriat tura a duh chin bak engmah a sawi duh si lo, tihtakzeta ka dil vangin Lanpuii number erawh min pe ve hram, “I va biak paw’n bâwl te kha i tum ang e, va insawi nghal ang che.” A ti sa a, mi bâwl kual vel hi ka mizia a ni lo hrim hrim a, a thiam pawh ka thiam lo. Call tawp chu ka hreh avangin whatsapp lamah ka be ta a, “Hello, keimah Tetea ka nia. I dam em?” Ka va ti ta thâwr a. A seen har ngei mai. A buai ve bawk te pawh a niang e, ka ni sawi danin a dinhmunin a zir loh avangin hotute lamin an ngaihhnathiam a, zan lamah chuan a duty ngai lo, chhun lamah erawh a buai nilêng a ni deuh mai. Chuvang a nia zanah ka va text ni. A seen hnu lawkah, “Ka dam alawm, i dam zawk maw?” A rawn ti teh mial a. Ka phur hûrh mai. “Lo len ka tum asin” ka va ti ta thâwr a, mahse, ka zâm leh thut, a seen hman tawh bawk si. “Engtikah maw?” A rawn ti. 

“I hman hun hunah a ni mai” ka ti a. 

“Zan lam hi chu ka chau viau zel a, ngati nge lo len i duh a?” A ti ta, hmeichhe dang chu ni se, a va inla deuh ve, ka ti tawh ngei ang. Mahse, amah a ni tlat, “Nia, i chau thei ngawt ang, aa, lo len ve satliah ang kha, ih, ka kawm châk che a” ka ti ta ringawt a. Mi pangngai a nia, a hrethiam tho dawn tih ka hria, mawihnai taka hnar ka ni mai ang em tih chuan mi kap ve rûn a, “Kawm ka nuam lo lutuk, kan titi duhzawng a inang lovang” a ti a. Ka ner sak, hmm, min hnarna a nih ka ringhlel lo. “Kan la inkawm tak tak hleinem, phal lo mah la ka lo la leng tho vang” zah theih loh chhuahin ka ti ta hmiah a. Min reply tawh hauh lo. Ka zak ru viau nain ka intipaukhauh lui ve tlat thung, hei chen ka tlangval ve tawh a, ka duhzawng hmeichhia chu ka duh a ni tih ka hrilh hmiah thei zel a, ani a nih vanga ka hrilh ngam lohna chhan tur a awm lo tih chu ka thupui a ni. Mahse, hmanhmawh khu ruai chi erawh ka ni lem lo. Damdawi la turin ka zin a, ni 3 lai ka thangbo ve, hemi chhung pawh hian Lanpuii nen kan inbe ngai hauh lo, a status erawh ka view sak ziah thung a, ka like sak deuh ziah bawk. Status tur thlawt hi ka hre ve vak thin si lo va, kan haw niin, “Hello, 02” tih ringawt hi ka status ve a, Lanpuii chuan a lo like ve zuk nia! Chu ringawt pawh chuan ka mood a tinuam veng veng thei mawle. He nu hian eng emaw tak a kawl chiang a ni. 

Zanah Johna a rawn phei a, a tuition pekna tura a material ka hawnsak a rawn lam bakah thil min hrilh tur a lo nei leh hman tawh. Ṭhianpa hi chu a buai ve thei a nia. Mahse, ka rin aiin a lo serious a, “Lucy nuteii te thawhpui hi tihpui an tum a, keini aia upa, puitling tawh, hna nghet nei leh felfai tak a nia, an khawsak a ṭha bawk. Lucy pawh hian a be ṭha ṭan tawhin ka hria, keiin theihtawp chhuaha bulṭan ka tum laiin tihian mipa dang an rawn tlazep leh sia, eng nge ka tih dawn pawh ka hre lo. “ A ti mawlh mawlh a. “Lucy chuan aw a pawh ve i tihna mi?” Ka lo ti vat.

“Ka bulah chuan a pha nasa a, mahse, Diki bulah chuan chu pa Zuia an tih chu fel a tihzia leh pasal tlak a nihzia te a lo sawi thin a niang, bakah kei chu engtikahmah a chhungten min pawm theih loh tur thu leh a beidawn thu te a lo sawi bawk a. Ṭhianpa, Lucy chhungte leh ka chhungte hian tunhmain inhmelmâkna an lo nei tawh em mawni aw ka ti hial thin, hetiang em ema min han duh lo mai hi..tihah chuan chhut rawh, Lucy hi kan veng nula fel chu a ni, mahse, kan inzui hmaa a ngaihzawng te pawh kha kei aia ṭha bik leh han fel em em an awm bik lo. Ti em em hian an dodal ka hre lo, kei hi kei ka nih vang nge heti taka min dodal hi ka hrethiam thei lo. Hman zanah pawh ka nu ka zawt tawp alawm, ani pawn a ngaihna a hre bik si lo..” a ti charh charh a. Kei pawn hei hi chu ka lo ngaihtuah ruk ve fô kha a ni. 

“Nia, mahse, kha chu nakinah a rawn lang chhuak mai ang. Tunah chuan Lucy rilru beidawng tawh si hian Zuia chu a chhang ve mai ang tih a hlauhawm a nih chu. Khawi vengah nge an awm reng reng?” Ka tih chuan, “Aizawl khua chu a nia, mahse, thla hmasa lawk khan he lamah an rawn sawn a, Lunglawnah in a luah a niawm e. Lucy te inah pawh vawi 2 lai chaw a ei tawh,. Laldiki hian min khawngaih ve sia, min hrilh ve leh vek zel. Lucy chu ka la ringhlel phal miah lo nain i sawi ang khan a beidawng si hian a lo duh ve ringawt ang tih ka hlau a ni.” A ti chuar chuar a.

“Amah Lucy hi ka lo be ve chhin ang a, ti nge a pa ten an rem theih miah loh chhan che u hi hriat ka lo tum ang. Nang pawh khatiang i rilru hah vang khan zu in tawh rih lo la aw. Insum hun lai tak a nih hi, elpui i nei lehnghal.” Ka ti ve ngial a. A bu nghut nghut mai. 

Johna hawn hnu lawkah ka mu nghal ta daih a. “I lo haw tluang maw?” Ka rin loh leh beisei hauh loh Lanpuii hnen aṭanga ka msg dawn a ni. Ka nuam chem chem thei mawle. Hetiang laihna, phurna leh chiâina te hi tleirawl chauhin an lo nei bik lo. “Tluang ve hram e, i lo dam maw?” Ka ti vat a. “Dam ve hram hram e” a rawn tih chuan, “Naktuk zanah dam chuan ka lo leng ang. Phal lo mah la” ka va ti ta phawng a, “Teh tawp chuan” tih chiahin min chhang. Ka pi damdawi ka siamsak leh avangin ka reply ta lo va, ka mut leh meuh chuan  tlai ta duai nen, ka leng dawn tho tiin ka chhang duh ta lo va. Mumangah erawh Lucy leh Diki ka hmu teh daih ! Ka mangphan a ni chiang mai. 

Dawr pawh ka hawng chho leh ṭan ta a, damdawi kan nei chikim leh tawh bawk nen, kan lun leh mep mep tawh viau. Hnathawk hi pakhat ka ruai ve a, nula vengva zet mai, nuih heh tak a ni a. Mahse, tun hnaitê khan chhungkaw harsatna avangin an khaw lamah a haw lawk a, a rawn let leh ta bawk nen, ka âwl leh ta phian mai. Lucy pawh Johna ka tiam tawh angin ka bia a, “Nakinah a chin chhuakin ka la hrilh ang che. Tunah rih chuan ka û te in sawn tur ka pui a, ka buai rih lutuk, hun thawl a awm veleh kan inbe dawn nia” a ti thliam a, kan dah ta rih. Lucy hian Zuia chu inlaichinna neihpuiin Johna kalsan ta se ka dem ang nge dem lovang tih ka la ngaihtuah thiam chiah lo, Chutihrualin Johna aia ṭha chu a hmu paeh a ni thei, Johna anga hmangaihtu erawh a tawng awlsamin ka ring bik lo. A hmate kha chuan Lucy thu hi a awih mah mah thin a, kan fiam fo thin kha a nia, tunah dodalna a nasat tak hnuah hian a rilru hah leh buai bawk si chu zu- chu inbunruah nan a hmang ta thin a, hei hi Johna nun tiṭhuanawptu chu a ni berin ka hria. Engpawhnise, chunglamin a ruat a nih chuan engkim a ṭha vek mai ang chu maw. 

Ka helhhawlh deuh bawk nen chaw pawh ka ei ṭha meuh lo. Ka pi chuan, “Tebawih, i va ei tlem ve” a lo ti chat rêng a, “Chhunah thil ka ei tam deuh a” ka ti ringawt. Ka nuthlawi rim tum hian ka zanriah ei thlengin nghawng a nei chu a nia. Johna sawm chu duh viau mah ila, keimah chauha hmachhawn ka duh rih. Bakah Johna chuan len huaina a ngen leh tlat ka hlau a ni, kam nama va len kha a chi dawn loh nasa,. Ka intuai uluk vei fû a, ka ni leh ka û te hian skincare an ngaipawimawh bawk a, kei pawh hi min lo leisak nawlh zel, ka hmang ṭha peih lo zawk a, tunlaiah chuan glow sar sar hi a pawimawh tlat. Pindan aṭanga ka chhuak chu ka niin, “Khaw nge i kal dawn?” Awmze nei deuh hian a lo ti a. “Ka chhuak lawk dawn” ka ti lawi rût,. “Khawiah ka tia lawm” a la ti hram a, melh kâwkin, “Venglaiah” ka ti sup a. A nui hak ringawt, engmah a sawi zawm lo chu ka lâwm ru viau. Ka nu leh pate nen hian inpawh tho mah ila ngaihzawng chungchang vela min fiam hian ka la lâi hû zel a, naupang ber ni ta chu ka la zakzum rei deuh a ni mahna le. Tichuan, venglai lam panin ka inkhalh chhuak ta a, ka hrilh lawk tawh lem lo a, a lo awm hram ang chu maw. 

Kawngka chu tleirawltê khan a lo hawng a. Mateii a ti mai kha a nia, a hming pawh ka la hre lo. “Ka û chu a inthlak lawk a, lo ṭhu rawh” a lo ti var reuh a, fel ka ti. Pindan aṭang chuan, “Lo ṭhu lawk rawh, ka hman ṭêp “ a rawn ti lâng lâng a. A in chhung chu ka lo belchiang ṭha leh mai mai, a lian lo ka tih tawh kha, chuvang nge ni a khat ve âm a, furniture manto tak a nei lo naa a faiin an hnûm hlarh mai. Choka lam erawh ka va hmu chiang thei lo. “I lo leng tak tak e lo?” A sam la huh hlap chu khuih dalh dalhin ka bulah a rawn ṭhu a, a fapa hi ka hmu miah lo, a muhil em mawni. A rim chu a fresh ngei mai. “Lo leng suh i ti hleinem” ka lo ti ve nghut. Hawi kualin, “Khaw nge i fapa hi” ka ti a, “Hei ṭhenawmte nau piancham an lâwm a,.Mate, hei hi Seni vahpa a nih hi aw. “ Tiin Mateii chu a melh a, Mateii chuan min rawn melh zawk ringawt. “Chuan, vawiinah dawr i hawng em?” a ti leh nghal zat a. “Umm, i hnaah i kal anga tiraw?” Ka ti satliah a. 

“Umm” tiin a bu nghat a. Sawi leh mai tur a vâng hle mai. Ka sawi tur hre lo chuan, “Pu Sailova kha a khawngaihthlak e tiraw?” Ka’n ti ngawt a. A nuih a za deuhin ka hria, “Nia khawngaihthlak, keini pawn kan râl tawh a, lehlamah chuan a tuar rei ve tawh a, tikhan a tan a hahdamthlak zawk ang” a ti malh malh a. 

“Nia, bakah a chhungte kha damdawi inah te khan an rawn kal tlem ka ti,. “ Ka ti hluai a, ka lo vei ru deuh em mawni dawn ni. Hmeichhe sawi zawk awm tak a ni. “An chhungkua saw an buaithlak ve a, a vanduai ve a nih hi..” a ti nem diai a. Tshirt var thawl hek hawk a ha a, hmuh a nuam takzet. Sawi tur ringawt ngaihtuaha ka ngawih leh vang vang hnuah ka phone a rawn ri ta, ka beisei loh lutukin Rinzuali a lo ni. Ka ring quit tir a, “La ta che, a pawimawh thei a” Lanpuii chuan a lo ti a. “Aih, a pawimawh lo” ka ti ringawt. Nia, a pawimawh ka ring lo, a rui phurin min rawn call a nih ka ring. 

“Thingpui ka’n lum ang e aw” tiin a ding a, Mateii kha chu nichin deuh khan pindanah a lut  a,. “Ngai lo, ka in vak lo va, ka lengrei dawn lo” ka lo ti vut a, “Hmm, leng rei suh pawh ka ti hleinem che” a ti a. “I ti i rilruin” ka inrin hmain ka lo ti a, min rawn melh haw mai, ka lo melh ve chiah sia, ka hmu hmelṭha zual ta em em mai. 

“I va sual e” a ti sep a, a ngai haw bik lo tih hrethiam tur khawpin hmeichhe mitmei ka lo zir ve tawh alawm le. Ngampat sual erawh ka hlau hle thung. “Eng nge ka sualna” ka tih chuan, “I rilru ang kha midang puttir i tum” a ti ta a. A sawi dik lo hran lo. “Ka tum kher lo, lenrei i phal loh takin ka ti mai mai alawm. Bakah a zan khatna a nia, len rei te chu ka tum bik teuh lo” ka ti duah a. 

“I inthlahrung a nih kha, ka hau lovang che” a nuihza insûm hmel pawh chu a ṭha. Hmm..

“I nau saw in inchhung tak tak em?” Ka ti ta daih a. Mi rawn melh zawk, a mitmeng pawh a thutak deuh. “Ni angah ngai mai ang. Tak taka amah hi a fahrah ve a, vanlaia tla kan tih ang kha a nia, kei lahin ka lo mamawh nen, tihian lawmman pawh inpe em em loin min awmpui a nih hi. Ka lawm teh mai a nia” a ti siam siam a. Khatiang vel kha a nih ka ring reng a, “Nia, ka ring deuh a, a zahzum hmel sia, a khawngaihthlak reuh. Lehkha a zir tawh lo em ni?” Ka ti leh a, ka dilchhut kual vel chu ṭul lo hi ka han ti hnuhnawh khawp a, ka sawi tawh si. Zawhna ngah lutuk nih hi ka duh ngai lo a nia. Ka danglam a nih ber hi a. 

“A pangngaia zir leh hi a duh tawh si lo va, Open-ah class x a zir ve mek. Matric te han pass ve se, singapore lamah te hian kal ve se ka tihpui deuh, ka mamawh vang ringawta a eizawn vena tur lo tihsukuk kha ka duh lo, ka rethei ve bawk sia” a ti leh mawlh mawlh a, chutiang chen chen ka bula a sawi duh chu ka lawm viau, a rilru a lo kap ru ve deuh a ni maithei a ni. 

“Thingpui chu i duh lo tak tak maw? Kei chu ka in dawn, a hang” tih leh thawh a rual a, ka ngaina lo miau si a, ka inpui ta lo mai. Choka lamah a va rek rek a, a fapa a rawn haw ve chiah bawk. Min han hmu thut chu a ding chawt a, min melh run run mai. Intihnelawm tum tak hian, “I lo haw tawh maw? Birthday lawm chu a nuam em?” Ka lo ti ve a. Naupang chhawnchhaih hi ka thiam lo tehchai lutuk a, ka û te ho fa pawh duat ve hlawm viau mah ila ka chhawnchhaih thiam loh êm vang hian min ngainat tur ang pawn min ngaina thei lo. Thil inleisak tawp hi ka tihlan thiam dan a ni mai a, inzir ka ngai dawn tlatin ka hria. Hehe..

“Umm, nuam, Maa..” tiin a nu a ko nghal chul a, Lanpuii pawh a rawn lang vat, “Ehe! I lo haw tawh law. A nuam em? “ Tiin a fapa sam chu a chulsak zauh a, “Umm, cake kha a tui lutuk a, ka lo hawn ve dawn che a, U puitean min eisak daih a” vui hmuipu tih hriat tak hian a ti nuah nuah a. 

“Ka puar rih lutuk tunah chuan, e chuan, hei a pa Tetea a nih hi aw. Anu Seni nau kha a nia. “ A nu chuan a ti siam siam a, Mampuia chuan min rawn melh leh zauh a, min la nel chiah lo chu a ni. Mateii a rawn chhuak a, “Mampui, lo kal teh, lo en ve teh hei” tiin pindanah a kai lut ta daih a, a zeihawi riau mai. Hmm, a la ṭangkai ang mateii hi..

Mahse, rei tak len ka duh lo,. Thingpui hang a in zawh chuan ka ding a, “Ka va haw phawt ang e. “ Ka ti a. Rawn ding ve nghalin, “Lenrei chu i hlau hle mai maw..” a ti a. Kawngka lam panin kan inzui nghal. 

“Muttui aw” tiin kan inthlah a. Ka hlim veng veng thei nia. Ka muthilh hmain, “Muttui nawn leh aw” tiin ka va text leh hram. “Muttui nawn le” a rawn ti ve. Kan inbiak dan hi a romantic hran lo, mahse, thu thlum leh un pui pui hmanga han inchhai vel hi ka zah zawng tak a nia, ka thiam ve hek lo. Tui deuh chuan ka muthilh tak kha maw..

Ka pa huan zuk hmuhpui pahin leh picnic type-a feh kan rel thlu a, kan phur tlang ngei mai. Lanpuii nen kan inbe zeuh zeuh a, ka len aṭang khan ni 3 a liam leh tawh, ka leng leh rih ta lo, khawhar ina kal ka ngaih vang a nih bakah birh tlut tlut kha ka duh rih lo. Whatsapp lamah kan inbe tho ka ti deuh a, beiseina min siamsak nge ka insiamchawp ka hrethiam chiah lo, kei aiin a upa a, fa a nei tawh bawk a, nun hi kei ai ngawt chuan a zai zauin tawnhriat a ngah tawh tih a lang. Chuvang chuan fimkhur taka ka chet ve a ngaiin ka hria,. Ka rilru ka la hrilh chiah lo nain ani ang mi pangngai chuan rindan a nei thiam vek tawh dawn a, min la biak chhiat lem loh vang chuan beiseina ka nei a ni deuh mai. Ka rilru ka hrilh dawt loh avang erawh chuan atan min han hnar nghal ngawt kha a remchang lo ve thei bawk. Ka la inla value a nih ber mai chu. Huana feh tur chuan Johna leh in hnuai tlangvalte bakah ka dawra thawk Mimi te ka sawm ve a, an lo phur phian mai. Lanpuii pawh ka sawm thuphung ve naa a hman dawn lo tih ka hre sa vek a, ka sawmna a hnar pawh chuan nâ ka ti hran lo. Home-a thawk awmchilhte hian weekend-ah chuan an lo kep mai zel a, holiday-ah erawh an chawl ve thei chuang lo a ni. Zing tawkah ka pi ka han dah chho a, ani chu huana feh ve chi ni hek lo le. Tichuan, tukṭhuante kan bar zawk zawk a,  kan huan lam pan chuan kan inzui chhuak ta hlawm a. Johna leh Mimi an inphur a. Kei erawh motor ka khalh thung. Kawng a nuam tawh bawk a, Hauruang pawh kan thleng hma viau, Hauruang leh Pachang inkarah kan huan chu a awm a, tui a tam hi chuan a nuam mai zel. Huan thlengin motor a lut thei tawh bawk nen..ka pa hian kuhva, nimbu bakah khanghu te a ching ve a. A karah thei chi hrang hrang a awm nuk bawk. Thlai hmun zau vak lo a nei bawk a, tui an dawng ṭha bawk nen an duah ve hluah mai. Thlam kan sak ṭuma ka feh bak kha ka kal leh ta miah lo va, ka rin aiin a lo puitling tawh. Thlam pawh zau hek hawk leh ṭha pangngai ve tak a ni. Thawk khat lai khan nupa rekin luah an dil a, huan enkawl pah turin, ka pa pawn a luahtir ve mai a, mahse, nau an pai tak avangin Lunglei lamah an rawn insawn ta a. Tihian nitin deuhthaw ka pa a feh tho a, enkawltu an awm ta rih lo a ni. Thlai hmun te chu kan han tifai thuak thuak a, ka nu leh paten kuhva hmun vel chu an lo fang thung. Hlawhfa a rawih reng avangin tihfai tur vak pawh a awm lo. Theihai te chu loin Mimi’n a bawl a, kan va eitui hlawm tak. Hmeichhehoin eirawng an bâwl hlanin kan huan thlang luitêah chuan mipahoin tui kan lo thehkang ve a, a hathlak riau mai. Tlem azawng chu kan man ve nial kha,. Woofer kan keng bawk a, kan ri ve dup dup mai. In lama engmah ti lem lova ni vui liam leh ngawt ai chuan a zia deuh, naupangho lahin nuam an ti nasa si. Puitling tan erawh han chen tham khawpa tui thuk a awm lo va, kan huh ve phung tho. Chaw la ei hma siin keini ṭhian pali te chu kal hrang nalhin kan va peg sek hlawm a. A rim kan nam erawh kan hlau tlang viau, ka pa hi pa ṭawng tlem tak, zahawm ru deuh mai hi a ni a, ka thiante pawh hian an zah ve hle. Kei phei chu a bulhnaiah ka awm duh lo hrim hrim. Ka nî erawh hnar fing tih takah a hrethiam tih ka hria, engmah a sawi lem lo bawk a, kan namnul ve mai bawk. Chaw kan han ei ta a, kan sangha leh kaikuang man te kha ka nuin a lo bai thak bawk nen, vawksa ai mahin a luck-in ka hria. Kei pawh ka ei hnem ve kher mai. Hriata leh Mama te an final a, kaihthawh an ngai hial, ka u Mama nen hian inang min ti fô thin a, tunah erawh ani motor khalh, thlan tla lutuk lo, eitui tho bawk si chu a thau ve tawh a, a dulte a tikiar ta bawk nen, inang min ti vak tawh lo. Kei aiin a hâng zawk bawk. Zial zuk pahin phone ka hmet a, Lanpuii ka text, “Vawiin chu lo kal ve la nuam i ti ngawt ang” tiin. 

“A chakawm, mahse, ka hun neih dan i hria alawm” a rawn ti a. 

“Nakinah i hman theih veleh kan la kal leh dawn nia” ka’n ti ve ngial a, ka bialnu chei ringawt em mawni..

“Tehreng mai, ka u” a rawn tih chuan ka nui huk. Ka lo be tui lutuk atalângin ka bula khi sawng ka nî chu ka lo hrechang tawh lo, ka phone chu lo melh vein a lo nui vur vur a, ka va hmet thim chiang tak. “Eng nge a ho e, a va sweet ṭan ve a” awmze nei deuha a mitko san euh pah chuan a ti a. 

“I zak lo” ka han ti ngawt. 

“I zak lo fe, Vanlal, i nî rualte i chhai ngam a” a ti a, a ṭawng ring lutuk lo nain ka lo îp tho mai.

“A chhe lo tho alawm” ka tih chuan, “Fimkhur rawh aw, bakah nangni mi phunglung lutuk tan chuan ka thiannu hi ka phal lo a nia, nakina i la tihnat mai mai tur atan chuan a uiawm” a ti hmarh hmarh a. 

“Ka tina dawn bawk lo, bakah kan la inngaizawng lo hrim hrim alawm le, nge min dem nghal ngawt a” ka ti hlur a. 

“Aa..a haw bik lo che tih a lang reng alawm. Ka ngaihbel nge mawni ka bulah te hian a lai ṭût zel hian ka hre tawh. “ A ti deuh deuh, ka lâwm ru viau mai. 

“Enteh, nî, a chanchin tlangpui chu sawi tawh teh, nakinah ṭawng sual te pawh a hlauhawm alawm” tlawn titih hian ka ti a. 

A hmui tisawiin ral lehlam tlâng chu a melh vang vang a. “Sawi dawn chuan a tam, mahse, a vanduai tawh tih hi hria la, ngaihzawng lam kher ni loah pawh a nunkawng hi a chhukchho bik a ni tawp a ni mai. I hrethiam em?” Tih pahin min rawn melh a. 

“Chhungkaw lamah pawh a vanduai i tihna mi?” Ka lo ti vat. “Umm, a vanduai vang a nia hetiang dinhmun hial a thlen tak ni” muk deuh hian a ti a. “Sawi teh” ṭhut hnaih pah chuan ka ti sawt sawt a. 

Min melh no vak lo, ka rim vang zawk a niang, local hi chu a rim a tur ve êm a tin ni. Kan monu U Sawmi’n thingpui hâng a rawn sem a, kei tih loh chuan an in vek. Ka ni pawh chuan a lo la vat a, midangho hriat phak loh tura zawi deuh hlek hian, Lanpuii hringnun a hriat theih chinte chu min hrilh ta a.

“A pa hi a boral hma a, chuan a nuin pasal nei lehin a pahrawn chu a tirah chuan a sual lem lo. Mahse, fa an han neih tak hnuah a zia a dang ṭan a, ama fa bik te nen a enhrang chho ti mai ang. Chulai karah a pahrawn nu hi an chenpui ve bawk sia, pitar rilru ṭha vak lo a lo ni ve nen, Lanpuii hi a enhran bakah hmusit deuh deuhte hian a be thin. Lanpuii pa chhungte lam hi a patea hna avangin Manipur lamah an khawsa daih a, a nu chhungte chu an awm tho a, a putea te chhungkua leh a pi leh pute an la awm. A nuteii te ho erawh an awmna a hla hlawm a, amah Lanpuii pawh hian a hrechiang lutuk lo. Pawl 10 chu harsa takin a pass ve a, lehkhazirna hun thawl pawh a nei meuh thin lo, an tirhkah ber a ni bawk nen, a nu lah chhangchhenu a ni ṭha leh bawk si. A ṭangkaina leh hlutna te chu an hre ṭha duh der lo lehnghal a, a naute pathum saw chuan zah hle tur an ni, mahse, pi ber leh pa ber te endanin zir hek lo, anni pawn an zah loh bakah chhiahhlawh ang maiin an en ti mai ang. A nu lahin thawhchhuah a neih miau loh avangin a thlavâng a hauh ṭha ngam bawk si lo. Mahse, a chhel êm a, a tuar ve thei mai. Zirna chhunzawm duh hle mah se; a pahrawnin a remti tawh si lo, pawisa kan nei lo a ti hmak bawk si. A pa hian sawrkar hna thawk ve mah se; a naute zirna zawng zanwg nen, ani Lanpuii pawh chuan a pawm thiam ve mai a ni. Mahse, sawi tawh ang khan inah a dinhmun a chepin an tiduhdah em em a, kum 2 dawn thil thar te hi a nei ngai lo tihtheih a ni. Chu chu an an awmna Farm venga ka ṭhiannu nu, an thenawm lawk ami hian a sawi a, a dinhmun kha a harsat em vangin veng chhung mi te pawn an khawngaih thei lutuk an ti, neinung deuhin thawmhnaw an va pek te hian an chhuah rualin a naute an pek daih loh leh a pa chuan a sah chhiatsak thin a niawm e. A pahrawn kha a nun a chhe hrim hrim, a ân pawh a chhia, thih ṭha paw’n a thi ta lo reng a. A stroke a, thi si lo, dam si loin rei tak a awm a, a faten an ngaihsak vak si lo, tiang khan rilru harh tho siin a thih dawn a ruaiah hrehawm takin a awm e an ti, tupawn a damlaia a fahrawn laka a sualna khan a umzui a niang an ti hmiah mai asin. Chu chu lawm midangte chunga nun chhiat lutuk leh rilru na lutuka siam hi a pawi lutuk, keimahni bawkin kan tuhrah kan seng leh sia maw..ching ve miah suh ang che..” a han ti dap dap a, min han zilh leh kawkalh chu aw, ka ngaihthlak tui nen chuan.

“Ka hria ka hria, chuan engtin zel” ka tih lai laiin ka pain, “Le..kan hahdam deuh tawh chuan muangmarin hawn lam hnaih ang aw.” A rawn ti a. Ka nî chu a nui sâwng mai, ka va run tak. 

Lanpuii chanchin tlem ka hriatchin ngaihtuah zui rauh rauh chungin ngawi rengin motor ka khalh a, “Tea, Tete” ka nuin a rawn tih hlar takah chuan ka phu uih. “Nge, eng nge a?” Ka ti bah nuaih a. 

“Eng nge maw i ngaihtuah le. Dawr bulah ding lawk rawh, Bawihtei’n motor a rui dawn tlat” a ti hlak hlak a. Ka nu hi chu zahau tih takah a awka chhuak hi a nem vak ngai lo, a ni deuh hluk hluk zel. A rilru erawh a chhe lem hlei law. Mami’n thil thur a va leisak a, Bawihteii chu a uak ve bârh bârh mai,. In kan thlen meuh chuan ka chau ka zawi. Ka inbual vat vat a, ka pi ka han hruai lehnghal a ngaih avangin ka hmanhmawh viau, Lanpuii haw hma ngeia han thlen hman ka duh vang a nia. Chak zeta inkhalh chhoin ka thleng rang viau. 

Amah Lanpuii ngeiin ka pi chu a rawn kai chhuak a, “I la haw thei lo mi? Lo haw ve nghal mai la” ka ti a. Inngaizawng kan ang riau, a nuam ve alawm le..hehe. 

“Lawk aw, Tlana saw ka va be lawk ang e, ban hun chu a ni tawh reng mai.” Tiin a let leh a, a bag nen a rawn chhuah leh takah chuan ka lo khi vur vur mai. Ka pi nen back seatah an thu dun a, ka pi lah chuan ka rilru hre hauh lo hian, “Puii,pasal hi nei leh rawh, i la naupan bakah hetia fa pakhat ṭulpui ringawt tur chuan i pamhmai êm mai, kan pasitawr nen khuan innei ula in inhmeh dawn em mai” a ti barh barh a. Tuna min bialtu hi tlangval senior ve tawh lam, fel leh phungthlu zet mai a nia, ka pi hian a ngaisang ngang a niang, in chhungah pawh a sawi leh zauh thin. Lanpuii chuan, “Awii, Pasitawr te chu kan phu lo em mai, lal api, min nei duh an vâng tawh alawm. Kan upa tawh sia” a ti luam a.

“Upa te hi in inti hma lutuk, kum 50 dawnah pawh an la innei alawm, ka la damlai ngei hian Senbawihi nen hian pasal nei ve rawh u, hetia len tlang ngawt zawng keini anga in tar ve hunah kawppui neih loh hrehawmzia te, khawharthlakzia te in la hria ang a, in inchhir palh ang. Kei pawh ka tu leh fate an fel êm zawk a, heti chung pawh hian Tebawiha pu ngai khan ka la ṭap ka la ṭap fo thin asin. Na tawrh te, lusun te hi kawppui te nen chuan a zangkhai asin, kan inchhawk zangkhai ve thei a. Senbawihi pawh hi pasal lam reng reng a ngaihtuah si lo, ka mang hi a ti ang thin a nia, nakinah kei ka han awm lo ang a, nuta te belh reng thu awm hek lo, nang pawh hian lo hrilh ve teh. Nei ngei ngei rawh se.” A ti chuar chuar a. A sawi dik ka ti, chuan ka pi chu ka khawngaih thar ngei mai, kan hriat hauh loin a khua a lo va har ru dawn thin tak êm. Ni e, ka ngaihtuah ve fô mai, ṭhenkhat chuan upat tawh lamah nupui pasal nei lehte hi an sêl chiam zel a, an nun chhungril kha an va hmu thiam tawh si lo. An leplerh leh nawmsak duh vangah an ngaihsak a, zahthlakah te an ngai a. Kan la mawlzia a lang ka ti mai. Kum a upat poh leh nghenchhan tur kan mamawhna a zual tih hi hriat ve tur, kan nu kan pa, kan pi leh pute chu kan hmangaih viau a ni thei, mahse, dam loh buaipui ngai, zun leh ek thiarsak an ngaih hunte pawh thil awm thei a ni, khatiang hunah kha chuan kan thenawm pa sawi ang deuhin kawppui te nge nge an ti ve thin. Enkawl inhuam viau mah ila, an tan khan a lo nuam loin inthlahrunna an nei ve thei,.chuvang chuan mizote pawh hian tar leh upate kan endan leh ngaihdan hi kan thlak ve hret hret a, nupui pasal chungchangah pawh an duhthlanna hi zahsak ila a ṭha ber mai. An damchhung a rei dawn si lova. 

“Lal Seni chu ka sawipui fo alawm, a ngaihtuah loh zawng hi chu e, tihluih vak theih loh. “ Beidawn hmel zet hian Lanpuii chuan a ti a. 

Kei chu ka ngawi reng ringawt. Inah ka pi ka drop phawt a, ka va thlah leh ta a, “Lo len nghal i tum em?” A tih chuan ka lai deuh, “Ka chau deuh a, bakah nang pawh i chau ang. Zan dangah aw” ka ti a. 

“Ni mai zel e, vawiin chu a nuam bawk maw? Ka châk ve tak tak a ni, ramhnuaia chaw ei hrim hrim hi ka chak” a ti sar sar a. A nawm thu leh ka la hruai tur thu ka sawi chuan, “I inla puitling vel e. “ Tiin a nui hak a. Lai zet hian, “Mahni tawkah kan puitling ve bawk alawm” ka lo ti. An in kan thleng ta mai sia, “Nih aw, muttui” a tih chuan, “La muttui lovang. Mut dawnah kha chu” ka ti nghut a. A nui ringawt. Eng emaw hi chu kan inkarah a awm ve tawh tih chiang takin ka hria, ka ti huam lo va, chuvangin danglam min ti ve a ni mahna. A chanchin ka la ngaihthlak zawh loh kha hre leh vek law law ila, tichuan a dinhmun azirin chet lak dan ka thiam deuh ang chu. Ka ni hi ka sawitir leh thei ang em aw..

Ka ni chuan a sam a chhemro mek a, Mami leh Bawihteii inpaw ûr chuan ka nuih an tiza deuh, Bawihteii a lian tawh sia. “A motor rui kha a PCh vel a nih hi” a ti mai a. Ka pa chuan a tihdan ngaitêin ngawi rengin cowboy film a en leh a, ka nu erawh chuan a phone a khawih mual mual mai. Mut nan a la hma bawk a, ka ni roomah ka tâp chawt, a hrethiam rang viau, “Nang pa hi i ti ve tak tak em mawni le..i â heih hûih siah” a ti hlak hlak a. 

“Nge ka at ringawtna? Ka duhzawng tak a ni ve tlat sia lawm. “ Ka ti bul bul.

“Aw..aa..i hrethiam lo ê, in kum avang pawn a hnar thei che, lo lut thuk ta la, ka u te hian engtin nge an ngaih ang?” A ti hlaih hlaih a, ka nuten an hriat phak loh hram ka beisei. “Au vak kher suh, khatiang problem a tling lo. Ka hriat bak kha min hrilh la a tawk” ka ti a. 

“Min ngei ngawt ang, hetiang ka hrilh vel che hi” a ti nghat a,. “A ngei lovang che, min duh ve deuhin ka hria” ka ti a. 

“Nuthlawi lungfing a nia, a be chhe lovang che, ka vahpa i lo ni bawk nen, mahse, khatiang avang khan beisei sang lutuk suh. I nat ka hlau ve tho, tin, amah pawh a inhambuai ka hlauhpui tho” a ti leh zung zung a, “Aw, zo vat la, sawi teh” ka lo ti hmuk thung. Dawhthei tak hi chu ka ni lo ve chiang alawm. 

A khumah kan ṭhu dun a, a kekawr ṭet a ṭhui pah mial mial bawk. 

“A pahrawn khan a hnawtchhuak a, chupawh a lehkhazirpui a kawmngeih ve deuh boralnaa a kal ve vangin,. Chu chu hnawhchhuahna chhuanlamah a hmang a ni ber, tichuan, a nu chhungte a pan lo thei ta lo va,. A pute hi chu Sethlunah daih an awm ta a,.ke ngatin a thleng phei a ni. A putea te nupa bakah an fate pali leh a pi leh pute an ni mai a, a putea fanu upa ber nen chuan an inrual thuak bawk. Tichuan, an bulah a khawsa chho ve ta a, an khawsak a harsa ve nen, rora te a chhu a, a changin mi in te a tifai bawk a. Lehkha a thiam theih avangin zir zawm leh a châk em em, a putea bulah a sawi a, a hranpaa zir leh chu a hautak vangin Openah admission an laksak ve a, class xii chu a exam ve leh ta a ni. A tawi zawngin class xii a pass hnu lawkah a pi leh pute chu inhnaihtêin an boral a, an damlai kha chuan an zarah a piteii pawh a chungah a ṭha ve a nia, an han awm loh takah chuan a zia tak tak a chhuah ta a, mi chuang a lo ni leh ta a ni. Chuan, a rawn nula chho a..” a tih mawlh mawlh laiin ka nu a rawn lut a, “Sen, Makimi chu a boral ta nge nge a nih chu. Tebawih, nang pawh va insiam rawh” a rawn ti zung zung a. Heiham, kan sawi zo thei dawn lo a nih hi a..