HMEITHAI (1)

HMEITHAI.. (1)

Ziaktu : Toni Râltê

A perfume rim nge a cream inhnawih rim chuan ka hnar a rawn verh zak mai. He rim hi ka lo hre tawh ṭhin tlat alawm, ni e, Zuali rim nen a inang chiah. Teivet chuan, engvanga Rinzuali hming pawh chu hrechhuak ziah nge maw ka nih le? Hriatchhiah fo tlak a ni tawh lo, mahse, ka lo hrechhuak leh thin. Zak leh mualpho, tlawm theihtawpa min tlawmtu hmeichhia kha ka nun aṭanga paihbo daih tumin hun ka hmang rei ta hle mai ka ti. Min tihnat dan a ril uchuak êm vang a niang e hetiang taka ka hriatrengna pindan a luah rei ni ka ti ta. 

“Vung vung zel a? Eng nge i lo ngaihtuah leh a?” Ka nî chuan ka benga rawn pawh pahin a ti nang nang a. Ka phu zuk mai. Nui luiin, “Ka ngaihtuah lo “ ka’n ti ngawt a, nuihza tih hriat zeta nuih awr awr pahin, “I ngaihtuah pawh ka ti hran hleinem, amah bawk maw i lo thinlai leh vung vung tawh, ninawm” tiin a ner sak a. Rinzuali rim ang rim rawn nam veng vengtu lam chu ka hawi thei ta chauh. 

A vun a nung sârh mai a, ngo hluak ni si loin a êng ka ti mai, a vun a mam hle bawk. A chal arh phak tilang chiang zual turin a sam dum hlap chu a laiah tak bari ngil zetin a ṭhen phak a, a mitmeng chu a lian kel kawl hle, chu chuan a tilang zahawm ruih thei nia. A hnar ngul pawh a ziaawm viau e, hnar chakaiêk an nih lem loh chuan tribal ang atan chuan a hmuh mawi theih zel mai. A kareh a zau lek lek a, a hmui a chhah mawi tawk nen, a kareh leh a mitmeng zawng zawng nen chu hmeichhia chu a lang sexy riau! Ka sawi thiam chiah lo,.blazer suit sakhi rawngin a inthuam a, 5’3 emaw 5’4 ft emaw vel a nih ka ring. A awmbawr chu a lian lem lo naa a mawng bawr erawh a vâwng lah mai. Mawnglem a ha ve a ni maithei. Tunlai hmeichhe ṭhenkhat hi chuan mawnglem te bra puar te hi an ha fur hlawm tawh a, an landan ang ngawt hi an lo ni thin bik lo. Ka lo en ngun tih hai hauh lo ka nî chuan, “Nang aiin  a upa fee” ka beng bulah a rawn ti ru sap a, ka melh kâwk ringawt. 

“Lanpui, kan va inhmu khât ve” ka nî chuan tih zawm zatin chu hmeichhe kut chu a va vawnsak a, innel tih hriat zet hian an innuih tawn sak bawk. “Nia, kan buai dun êm alawm, i zin leh emaw ka ti zawk a” Lanpui tia a koh chuan a ti a, a aw chu a no vak lo! A chang han tih teh tlawng tur erawh a ni si lo. “Nimin piahah ka rawn haw ve chiah, chuan, eng nge tunlai in hna in tluang zel em?” Ka nî chuan a ti leh a, hmel hlim tak hian, “A ngai ti ila a hma aiin boruak a zangkhai” a ti sar sar a. A ha var rual zet mai chu hmuh a nuam hle. Tuibur leh sahdah, kuhva tih angreng chu a hmawmin a hmuam ngun lutuk lovang. Kei lo ding tlawn ve reng chu min rawn nghawk zeuhin ka nî polite-i chuan, “Ka vahpa a nih hi, vawiin chu ka kut ka tina deuh a, min rawn thlah a nih hi, Tetea a nih hi, Tebawih, hei ka ṭhiannu Lanpuii aw, i û dawn nia” a ti deuh kher a, ka melh zuk ringawt. Lanpuii chuan min lo nuih sang a, mizo hmeichhiaah amah aia hmelṭha hi an tam ang, mahse, ka hmuh tirh phat leh a rim ka hriat aṭang ringawt khan keimahah tlak nat riauna a nei tlat a ni, ka hrethiam chiah bik lo. 

Vanlalliana nih ve nâk alaiin Tete tia koh ka ni daih ! Tete tih hi a hmeichhe hming bik riaua ka hriat avangin ka rawlthar chhuah chuan ka duh lo viau a, mahse, kei lo Tetea an lo tam nasa tih ka hriat takah chuan ka thlak duh ta lo. Bakah ka tette aṭanga chhung leh khat, ṭhenawm khawvengte min koh duatna kha a ni ve miau a. Ka nîin ngen taktêa min ngen vang leh thil min leisak a tiam avangin vawiin hian an ṭhianho chaw eikhawm-na hmunah ka kalpui a ni. Kalpui ti ila ka thlah zuai ang a, an hawn dawnah ka lam leh ang tih rilru pu kha ka nia ,an ṭhianho hi mi 10  dawn an ni a, an senior ve hlawm tawh angreng. Ka ni hi Seni a ni a, a phur ber leh hawiharh ber pawl a niawm e, tunah pawh a dak leh zat zat tawh. “Ni, in hawn dawnah min lo be mai rawh aw, John-a ka va tlawh lawk ang e” tiin kalsan mai ka tum a, “Zu te kha i va in leh ang e aw, ka û ka hrilh a ni mai.” Ka beng bulah a rawn ti ru sur sur a, ka ner nawk ringawt, mi hi a veng ve thei ropui sia. Kawngka bulah chuan Lanpuii a tih, ka mit latu ngei mai khan a nihliap a lo sam niap niap a, kan mit leh mit a intawn fuh êm vang nimaw zahzelah ka nuih hui ringawt, ani pawh chu a lo khi ve sak, a nui mawi kher mai. Inbe ta lem chuang lo chuan ka chhuak ta a. 

John-a te in ka thlen chuan an nulain chhuat a lo nawt mek a, John-a room lam ka pan nghal. Zial heh tih takah a lo khu leh luai luai tawh, “Nizan i rawn tel ve lo chu i lâwm zawk ang, kan inṭâm chhuah a, ka kham lo rap” a lo ti nghal sawt sawt a. “Ti nge? A vâng mi?” Ka ti satliah a. 

“Hmelchhe duty ho vangin tuman min pe ngam tawh lo alawm, lu a na hma khawp mai.” A ti lung lung a. “A va ho ve” ka ti ringawt. Tun hnaiah asenchi a vâng thar a, Amawii hi chu a rim hi tihluih harsa kan tih ve êm vang hian kan hnar ve deuh a, a tawpkhawkah bak kan la ngai meuh lo. Asenchi lah a to ve fang mai a, zantin in arâlah chuan neihin a tlin meuh thin lo. Ni e, zu hi kar khatah vawi 2 hi chu ka in ngei ngei ti mai ang, mihring dan ve rengah ka ngai a niang, sual teh vakah ka ngai lem lo. Chhungte pawn min ṭha en ve mai mai tawhin ka hria, a ngawlvei ka ni lem lo bawkin ka hria a, nge ngawlvei angin min lo ngai ru viau thei bawk. Mahni inpawm ngam hi chu a harsa ve thin si a, kum 28-na ka hmang ve mek tawh nain rilru erawh a la puitling tawk lo hle a ni. Pathian zarah leh ka pa zarah damdawi dawr ka nghak ve thin a, lehkhazir lam hi ka chemkalna lam a ni vak lo a niang, ka graduate hmain zirna ka chawlhsan daih. Sumdawng mi chu ka ni lo hauh lo nangin ka pa hian zirna lama ka misa lohzia a hria a niang chu, nikhua kan hriat theih ata kan dawr kumhlun damdawi zawrhna lian ve tawk tak chu tihlen belh zelin ka kutah a dah tawp tih theih a ni, kum 5 dawn chu ka kut zâlah a han tla ve ta a, a tira ka bo leh ka buai ang em em kha chuan ka buai tawh lem lo. Lehlamah ka nî hi kan bula khawsa niin nurse a lo ni kher nen, medical lamah a rawn tlak a, kei tak pawh rilrua a luh lai chuan inzir ka peih ve fû roh a, damdawi dawr nghak satliah ang tawp kha chu ka ni bik lo. Unau zinga a naupang ber leh ka nu sawi dan takah lian ber leh â ber han nih takah chuan ka hming hnaisailo hi kan inchhungah a ri zing bik ngang mai, hauh bur ka ni ringawt. Mipa awmchhun ka ni tawh bawk nen, kan inah chuan hmeichhe hna anga kan ngaih pawh ka khawih chang a tam. Kan upa ber mipa hian nupui fanau neiin in hrang a chang ve tawh a, A chhang chiah hian pasal neiin Aizawl lamah an khawsa thung a, Ka û chiah erawh pasal nei ve zuaiin kum 1 hnuah a fanu nen an rawn let leh a, tichuan, ka pa farnu ka nî Seni, ka nu leh pate bakah ka pi tar ve tawh takte  nen kan chengho a. Lunglei Bazar vengah kan khawsa a, Chanmari-ah ka dawr chu a awm thung. Khawsak harsa lutuk kan ni hran lo va, mite anga nei lê lû erawh kan ni lem lo thung. Ka û pasal neite kha an khawsak a harsat ve deuh avangin ral aṭangin kan pui ve fo bawk. U Mama te pawh an harsa tho mai, in hrang chang mah se; kan in hnuai maia an awm avangin engkimah kan kep a tih theih, kan pickup a khalh a, chu chu an eizawnna a ni deuh mai , fa pahnih an nei tawh bawk.  Chutiang vel chu kan ni. Ka pa hi inpui nghak a nih vang erawh chuan mikhual neuh neuh leh chhungkhat rawn chengkual ta deuh reng kan nei ve nuk tho, kei chuan tam hi nuam ka tia, han ni deuh hulh hulh ila a khawharthlak loh deuh. Ka û chiah nuthlawi kha private school-ah a inhlawh ve nen, ka nu nise Lecturer a nih vangin zanriah hi kan ei hma ngai lo. Ka ni chu Tar enkawlna lamah a thawk a, ani phei chu night duty a nei deuh reng bawk nen, ka pa erawh a hna a pension hnuin Hauruang lama a huanah a feh tlut tlut mai a, nuam a ti thin teh e. Mite ngaih chuan puitling ṭhiau, khawsak nuam tak kan nih a rinawm ngei ang, mahse, sawi leh sawi hnu chhungkaw dang kan kep vang leh chhungkaw mamawhte avangin kan va sang ta lua lo. 

Johna te hi Ramtharah an khawsa a, vawiin chu dawr pawh ka khar, kan dawr bul chiah damdawi dawr nei ve tho Pu Ruata nupui a boral vang a nia, intlawh tawna inpur tawn reng chutia chhiat an tawh laia lo inhawn huau bik kha nuam ka ti lo, chutihrualin an nu ruang hi phai aṭanga rawn thawn haw a nih avangin a lo la thleng lo bawk a, ka ni hruai ngai tho nen, ka la tamtâl vel mai mai rih a ni. 

“Zuk la lawk la, a half chu, ka lo show ang” tiin ka phone ka hmet a, a phur ngang mai. “Yess, nang nge nge,. Nau” a ti hluai. Lawngtlai khua kan ṭhian Rpa hian Nau tih hi a hrat êm vang hian Bawiha kan intih loh chuan Nau ti hian kan inko ta deuh vek mai. An kawmthlang deuh maiah an zawrh avangin a zuk kal ta nul nul a, zial zuk pahin ka phone ka lo en mai mai thung. Kha nu kha ka mitthlaah a lo lang leh zuk ṭhin, a mak mang e aw. Kei aia a upat turzia chu ka nî te nen inkawmho an nih aṭangin a lang nghal ruak a, kei aia upa la ngaizawng ngai lo leh melh pawh melh ngai lo hian engvanga hrechhuak leh thin nge maw ka nih le. Lungleiah ani aia hmeltha leh tleirawl tituai an tam tehlul nen,. Ninawm a. Rinzuali ka han mawhpuh leh ut ut thin. Ngaihzawng hi pali lai chu ka nei ve tawh, a hmasa ber kha chu nei lo ang vel ka nia, a dangho pawh kalpah ngaihzawng ang deuh an nia, Zuali erawh a dang hlak. Kum 5 kan inzui ve hman kha a nia, ka nun a kaihhruai hman em em bakah engkim nulat tlangvalna thlengin inpawh takin kan tidunin nupa kan nih lohna chu kan inkutsuih lohna kha a ni deuh mai. Ka dawr atanga hnaitê-ah Cosmetic dawr neiin a lun phian zel a,amah biak a nuamin a zangkhai a, a thilphal em em bawk. A hmel phei chu ṭha vur han tih tur chu a ni lo naa a vun a nalh hle thung. Ka ni hian a dawr fo a, ka dawrah hian a rawn dah mai zel a, chuta ṭanga inhre chho chu kan nia, âaa, thil thleng a tam hman, ka serious chhoh tak viau hnuah phei kha chuan ka nupui a nih loh reng ka ring ngai lo, kum 30 te ka han ni ve phawt ang a tiin ngaihngam takin hun ka hmang kha a nia, hmeichhe dang kha chu han ngaihven chu sawi loh ka tan chuan ṭhian leh farnu ang bak an ni thei tawh lo. 

“Duhkimi tih takah hian duh loh tak tak pawh hi a nei lo.” Johna ṭawng bul bul avang chuan ka ngaihtuahna aṭangin ka harh zawk, inthingharh vatin, “Eng a? “ Ka lo ti hû a. Ka bula rawn thut pahin ,”Duhkimi mawle, a lo awm ve a,’ no khat tal min khilai ve teh’ a ti sek a, rum chu ka ui sia, local no khat ka leisak ringawt alawm, he nu hi chu a..zah hi a hre bawk si lo” a ti tûn tûn a. Duhkimi chu Johna te monu nau a nia, a hming ang deuh hian vuak luhai tih loh chu engpawh ruih theih chu duh ve thei zel kha a ni miau a, mak lamah pawh a kal hran lo. Kei ngei pawh hian ka pek chang a tam, min nêl ve angreng bawk sia.

Zu chu a thli nghal ker ker a, zing leh chhuna zu in hi ka hreh thin, ka mamawh viau emaw laklawh viau emaw a nih loh chuan ka hnar thei. Vawiin erawh eng ka hria chu ni maw hrehna leh tîmna ka nei lem lo. Ka han thawkkhat piap a, pum a sa thla rawih rawih mai, cigaratte hi zu ka in chuan ka luak a tichhuak zel a, Johna pa zozial ka va zawng ruk ruk, Johna’n an fridge-ami anhnah bai a rawn chawi lut bawk a, a tih ve theih mai ang chu. Ṭawng a nuam ṭan a, pahnih chauh e ti lo chuan ṭawng kan inchuh leh sek tawh, hei hi a nawm lai ber a ni mai awm mang e a. “Ee..Nau, enteh, Lucy chu maw ka la ngai thin alawm, mahse, a nu hi ka ei thlawt lo, min han duh lo ve khanglang a” tiin a meng rum leh nghal ûl a, ani pawh a bialnu chhungte lamin an iai tlat avangin tihian a thên kual vel mai mai a ni, han kal hrang mah se an inkawp leh nge nge zel a, an inzuina pawh rei tawh tak a ni. “Duh tlak hian awm ve la, zu te hi in tlem la, dik tak chuan i han fel dawn chauh a, enthlak hi i dâwl leh thin lo. Lucy pawh a khawngaihthlak” ka han ti ve ngial a, John-a hi Mathematics thiam lutuk a ni a, tuition a pe thin. Chu chu eizawn nan a hmang deuh ber, mahse, a hlawk phian tho. Kan chhungkua nen kan khawsak chu a inang deuh reng,.”Tun tum chu Lucy pawh a ngawi rei tawh khawp mai, a kal hrang ve tak tak dawn a niang” a ti vung vung a. Zu chu a lem leh pup pup bawk. Kei chuan no khat chhah deuh bak ka in pui ta lo, ka ni lam leh a ngai bawk nen. Ani kainam tawh lungpuam si chuan Lucy a call leh ta nge nge a, thlang lam bathlarah a va be ta daih a, kei pawh phone ka khawih mai mai, ka lo chhing sek a niang, ka nî-in min lo call a, “Lo kal tawh la, hei kan haw dawn hnai tawh” a rawn ti a, phur lo zetin ka tho a, John-a pawh a khumah a lo muhil bawrh bawrh mai, inngaihsak lo ve tak chu kan ni. Kaitho ta lem lo chuan ka chhuahsan a, ka ni te awmna ka va thlen chuan dar 5 a pel tawh, ka lo muhil rei phian a nih hmel, mut tichhuak tawk lekin ka in khanglang a, ka lu lah chu a rawn na zui,. Tlem chu peg sek a ngai dawn a nih hi. Lanpuii chu ka han zawng ru deuh thuak thuak a, ka hmu ta hlek lo. A haw tawh a nih hmel, ka ni nen chuan kan inphur haw leh ta vâwk vâwk a. Ka ṭawng vak duh lo, ka rim a hre leh dawn sia. Ninawm. A hnathawhna hmun Old Age Home, Pukpui lamah min tlangpui leh a, a hmun hi a nuamin tar hote awmna atan chuan duhthusam a ni ka ti ve, a hmunhma lah a fai si, nurse pahnih leh doctor pakhatin an vil a, hnathawk hi an tam riauin ka hria. A tir kha chuan he home din hi ṭul ti lo kha an tam ve khawp a, mahse, Kohhran lamin an support takah chuan kan thle leh ta dual a, tihian a hlawhtlinna chu kan hmu chho ta mawlh mawlh chu a nia. Pitar putar mahni in lama tu leh faten an ngaihsak hman tawh tak tak loh, khawhar ve tho si te tan chuan paradise a ni hawt e, inkawm hlim bakah infiamna / game tih luklak a awm ve thluah a, tunah hian ka ni sawi dan chuan zan riak hi mi 43 an awm a, lânga kal hi mi 50 dawn an awm bawk, Mizoramin tar leh upa kan lo ngah hle mai, heng mite hi rangkachak ang maia hlû an ni tih ṭhangtharte chuan kan hrethiam lo âwm e. Ka pi pawh lângin a kal a, ka nî rualin a kal mai thin. Zan êm han riahtir kha ka nu leh paten an remti meuh lo a niawm e. Lut ve loin kawtah zial ka lo zu a, ka hawi vual vual laiin, “I ni i rawn hruai leh a ni maw?” Ring vak lo hian a rawn ti a, Lanpuii kha a lo ni. Mak ka ti deuh, he lai hmuna ka hmu teh daih chu, a nui sâng a, a inthuam dan ngaia a la awm danah inah a la haw bik lo a nih hmel. “Nia, a nih hi, eng nge i tih ve zawk?” Ka ti a, ka aw lah chu a lawi rûtin ka hria,. “Zanin ka duty a nia” a ti mai a. 

“Ee! I thawk ve ni maw? Nurse kha pahnih chauh emaw ka tia” ka ti zuau a, ka ni leh Nu Mami bak nurse an awm ka hre lo a, Lanpuii hi nurse tur riakah ka lo ngai a ni. “Nurse ka ni ve hleinem, attendant alawm ka nih,.” A tih chuan ka lo bu nghut ringawt. Ka lai hû kher chu ka inngei ru lek lek, mahni lo maha pa intih ruk ve nâk alaiin..ka ni a rawn lang zui ta bawk a, “Anih ka chhuksan ang che u, Pu Siama kha min lo hrilhsak mai rawh aw. Lei ngai kha” ka ni chuan a ti mawlh mawlh a, Lanpuii pawh chuan, “Umm, nia kei pawh ka va intifai ve ang e” tiin min luhsan ta a, ka enzui vung vung chu ka ni lehpekin, “A va hmuhnawm awm ve “ a rawn ti leh hlak, nui hukin scooter lam ka pan daih. 

Mahse, tlan pah chuan ka hriat duh tur ang chin chu ka hre ta tho.  Lanpuii kha kum 2 Home-ah a thawk tawh a, mi tlawmngai leh tar leh upate pawn an ngainat leh an thlakhlelh em em a ni, nurse puitu an nih bakah warden awm loh changin admit ngai angte an lo admit ve a, tin, an vil reng bakah infiamna lam te pawh an tihpui fo a, lehkhabu chhiarsak te, bualfai leh body massage thlengin an thawk a ni. An hah vang a niang ka ni te nen an hlawh inthlauhna pawh a sang hran lo, hlawh tam tak an phu ka ti ve tlat, keinin kan nin dawn nen, hetiang hmuna thawk tur chuan zaidam, mi hriatthiamna, dawhtheihna neih a ngai khawp ang, a hmasa berah chuan mi piangthar lo tan chuan tawngpawng thawh ve ngawt chi-ah ka ngai chiah lo. 

“I melh dan kha a danglam riauin ka hria, i star chiang” ka niin a tih chuan ka ṭhen suk a, “A danglam ka ti, ka sawi thiam lo, nuthlawi nge nangmah anga nula upa” ka tih chu a run deuh nge ni ka ban a rawn sik vâwt a, “Nuthlawi ti ila hmeithai pawh a tih theih ang, chutiang chu. “ A ti a, ka duhkhawp lo hle, “Eng nge a awmzia?” Ka ti vat a. 

“A fapa nen an hmeithai a, a pasal a boral tawh, aa..mipa lam hi a ngaihsak vak si lo va, hmeithai tih hi a inhmeh zawkin ka hria” a ti niah niah a. Ni e, nuthlawi leh hmeithai hi sawi dan hrang hrang hi a awm ve a, keia lo ngaihdan chuan pasal ṭhen hi nuthlawi ka ti mai a, mahse, kan thenawm lawkah pawh a pasal nena inthen a fapa ṭulpui ta ṭhak a awm a, “Keini hmeithai chuan” tih ṭawngkam hi a hmang thin a, nuthlawi nih ai chuan hmeithai nih a duh zawk ni hmiang ka ti mai. Pasal sûna fate hmeithaipui an awm leh bawk a, sawi hran tum viau pawn ngaihpawlh a awl ve tho mai. La ṭhalai vek vawk, pasal sûn, fa pahnih khat pawm te pawh nuthlawi kan ti tho sia, mahse, hmanlai aṭanga pawm dan tlanglawn chu pasal dang nei tawh lem lova fate ṭulpui hi hmeithai chu an ni ti ila a dik ber awm e. He lai tak hi chu a chhiartu te ngaihdanah innghat ta mai se la..

“Nuthlawi pawh ti ila a inhmeh tho alawm, a la upat vak hmel si loh” ka ti a. “Nia, mahse, a fapa 

nen tihian an awm hrang a, tumah a belbul lem bawk si lo nen, a chhelin a khawngaihthlak ve a nia aw, kei aiin a naupang naa puitlin kawngah ka tluk lo lutuk” a ti bawrh bawrh a, ka ni aia a naupan chuan kum 40 chu a la tling lo tihna a ni phawt ang a, ka ni hi kum 39 a ni a, mahse, tupawn kum 40 pel tawh hmuhin an hmu, amah pawn pawi a tih hmel lem loh. 

“Eng nge a chhel viauna chu, a pasal a sûn tawh maw?” Ka ti a, ka hre chak tulh tulh mai. Mahse, in kan thleng dawn, ka va ngei tak. “Nakinah ka hrilh ang che, mahse, nulat tlangvalna lam ang chuan en duh hran suh, mipa a mamawh lo” a ti ta daih a, ka zak deuh. Ka en dan a dang tih a hriat vang a ni reng sia. 

Chaw ei hmain in hnuaiah ka chhuk a, kan in hnuai chiah hi ka u ten an luah ka tih tawh kha, a hnuai berah hian Bunghmun khua he lama hnathawk thian dun an khawsa ve a, an khua ami local ṭha pangngai tak hi an kawl ve deuh reng vangin ka in sak ve thin, ka tan an ui ngai lo naa leisak chang ka ngah zawk. Vanneih asiamin lu na chhawkna khawp chu an lo kawl hlauh mai a, ka in hnuah zanriah chu tui ti takin ka ei ve tak kha. Zanah hian ka chhuak ngai meuh lo, Ṭkp inkhawm zan leh sunday zing leh zanah bak ka inkhawm meuh lo. Chu pawh inkhawm loh chang ka ngah mai, nula rim tih vel kan uar tawh lo bawk a, room-ah hian ka tawm deuh tawp zel. Johna a rawn lan erawh chuan chhuahpui ngei ngei a ngai thung. Zanin pawh ka chhuak peih chiah lo,. 

“Ka kham thlawt lo, ka mut bo vek alawm, hei nu Peki’n a bungraw load man min bonus hlauh a, ka rawn phei dawn nge i rawn phei dawn” Johna leh bawk chu. Hnar a har ve tho bawk si,. “In hnuaiah ti ila, lo phei rawh” ka ti a, in hnuai tlangvalte nen kan inkawmho vek zel tho a, bengchheng deuh mah ila a hriat vak loh bawk nen, a remchang phian zel. Ka inkhalh phei peih tawh thlawt lo a ni. Dar 8 bawr velah chuan in hnuaiah kan titi leh mam mam tawh, Kan in hnuai luahtu te hi Peka leh Hriata te an nia, kan inrual khat viau ang, dawra hnathawk ve ve an ni. Tlangval an la ni bawk a, lungkham tehchiam an nei bik lem lo niin ka hria. 

“Lucy a zinbo dawn” a zial zuk vâp thinthlak pah chuan John chuan a ti a, “Khawiah” ka lo ti vat. “A sawi duh lo, Mizoram chhungah chuan a ni lo tih chauh a sawi” rilru hah hmel fe hian a ti a, ka chek hluk ringawt. Hriata chuan, “Ru daih la ni mai lawm” a lo ti nghut a. 

“Amah hian duh hek lo, inruka bulṭan chu ka duh lo a ti ve tlat a, palai ka tir ngam teuh si lo” a ti bui bui mai. A bul chu amah zel hi a nia ,insiamthata Lucy chhungte rilru hneh hi a tum thlawt lo ve alawm, hetah hi chuan ka dem ve tlat. Fel pangngai nise duh lohna chhan tur ka hre tlat lo a ni. Peka chuan, “A harsat viau chuan kawng dang a awm hleinem, inṭhen in duh loh miau te chuan, mi te pawh an inru ve tho, an inṭhen leh kher vek lo” a lo ti mual mual a, ani hi ṭawng tam lo mah se, a thusawi a dik fuk duk duh viau. “A zin hmaa rûk a ngai a nih chu” Johna chuan a lo ti ve vut a, zu a han in leh nghal khawlh khawlh. A in dan hi a tui hmel bik thei a nia aw. Kei chu ka ngawih reng vang chuan min rawn melh run a, “Ngaihdan te sawi ve ta che, a zin bo chuan kan tâwp mai ang ka ring.” A ti pawr hlur a, ani pawr hi chu engah teh vak ka ngai lo. “Ngaihdan ka nei lem lo, mipa i nia, i thu thu alawm. Mahse, kei chu ni ila neih ka duh takzet chuan a chhungte rilru hneh nan pawh mihring taka pangngai taka nun ka tum ang, i ṭhen thei chuang si lo, ani lah nula fel leh nungchang ṭha tâwp a ni sia, insiamrem ve mai la, a nih loh chuan pa takin ṭhen mai rawh.” Ka lo ti duah a. Dik tak chuan Lucy hi ka duhpui si, Lucy rilru a tihahin a tina zing si hi ka ṭhianpa mah nise ka huatpui lek lek thin. A zu rui hi mite ang a nih loh chang a tam si, a mualpho zau zawng hian a che leh khut zel a, Lucy hian a rilru hahna te ka bula rawn thlen ve a ching thin si a, ka lo buai ve tawp zel. Mipa leh mipa han inzilhhau kha a nawm loh bakah kei lah engmah ka ni bik bawk si lo. Mahse, ka sawi ang khan ka hmeichhe duh leh hmangaih, nupui atan hiala ka duh tan chuan ka inthunun thei viauin ka ring, ka tum ngei bawk ang. 

“Hmm, zanin hi ka zu in hnuhnun ber ni rawh se” tiin a bu nghut nghut a, kan lo nuih ringawt, hetiang thu hi a vawikhat sawina ni hek lo le. 

Ka nuin min lo call hlawl mai a, “I pi hi a chau deuh tlat, han chhohpui lawk mai ang u,. I pa lah an la meeting si” a rawn ti lâng lâng a. Ka pi hian min duat êm vang leh ka pi neihchhun a nih tawh avangin ka ngaipawimawh lo thei lo. Thil awmzia ka sawi chuan anni pawh chuan min zui ve an tum nghal a, kan chho zui ta nghal. Ka pi chu a thawhah a zual a ni tih hriat takin a thaw kâwk kâwk a, a khat tawkin thei leh thei lo hian a rawn khuh leh bawrh bawrh thin bawk. Ka nu leh ka ni te nen Christian Hospital Serkawn lam kan panpui ta a, ṭhianten hnungah min rawn zui bawk. An lo admit leh ta phawt a, tihian ni hnih thum hnuah kan chhuak leh thei mai ang, a nih fo dan a ni a. In lamah nebulizer  chu kawl tho mah ila, ka nu leh ka ni  hi chiâi hma chi an ni a, an buai vek zel, chuvang chuan damdawi in hi a khat tawkin kan pan leh nge nge thin. Ka niin a riahpui dawn a, serious tak a ni lo bawk a, kan awm rei lem lo, mahse, inah ka haw tlang ta nghal a, Johna paw’n Lucy nen an dinhmun min lo hrilh leh dawn a ni. A ru ngam tak tak paw’n ka ring lo e a, lehlamah Lucy hi bial zaipawl member a nih bakah an unit ṬKP-ah Committee member a ni bawk a, KNP zirtirtu a la ni cheu ! A nihna te avang pawn inruk ringawt hi chu pumpelh tum âwm tak pawh a ni ve. Hetiang nula fel leh hmelṭhain ka ṭhianpa a lo hmangaih ve hi chu a lawmawm ngawt mai. 

Ka mumang buai nuaih kara Lanpuii lo lang tel ve ringawt chu ngaihtuah zui ru nuah nauhin ha ka nâwt phuan suah suah a. Ka vei chu a ni deuh lo maw le aw,.mahse, mi kap run hran lo. Rinzuali nen kan inṭhenna pawh kum 1 a liam tawh a, ngaihzawng neih leh hi chu a hun tawh tho mai. Ka ngaihsak lo laklawh a, hetia ngaihzawng vanga buaina nei lova ṭhianhoa tal mai mai hi a lo nuam phian tho sia. 

“I phei hmain i nî te chaw han pe lawk rawh aw” ka nu chuan a ti a. “Mami’n pe mai se” ka lo tih chuan, ka û chuan, “Vawiin chu ka hman dawn lo, kan naupang nu a boral a, pangpar lei kual te ka ngaih dawn bakah naupangho ka kilkawi a ngai dawn si, ka tlai thei lo alawm, Bawihteii pawh i lo thlah a ngai dawn” a lo ti zung zung a. Dik tak chuan Serkawn hi nuam ka ti vak lo, damdawi inah khian hmuh peih vak loh ka neih vang a nia. Mahse, a duty êm lovang chu maw , nizan kha chuan ka hmu lo phawt a. Ka tunu chu ka thlah phawt a, kan tlai titih deuh tawh,. Bawihteii hi an inneih hmaa piang tawh a ni bawk a, kan duatin a pangchang reng bawk. “Bye aw bawihte” tiin ka ban ka vai zauh a. A nui sen sen mai, a hmel hi a ṭha reuh bawk si. Ka ni te chaw ka va pe leh a, ka hmanhmawh riau chu ka dawr hawn hma loh ka hlauh vangah an ngaih ka beisei, Hospital ka chhuahsan hnu chuan thawk ka la huai huai mai, ni e, ka hmuh peih loh deuh kha ka hmu lo niin ka hria, ka thawveng sawt e. Ka pi pawh a lo ṭha tawh angreng a, mahse, zanin chu an riak leh ang. Ka kal hmain ka ni chuan, “Vawiin ka chawlh a ngai dawn sia, Pa Siama dawrah khan hei hi lo dah la, Lanpuii’n a lo lam ang ti mai rawh. Ka lo mangnghilh ṭêp alawm” tiin lehkhathem hi min pe a, ka pi chu a mutthilh vangin ka melh zauh a, ka chhuahsan ta nghal a. Pa Siama variety store-ah chuan lut kawiin lehkha them chu ka pe a, “Ka ni thiannuin a lo lam dawn “ ka ti ringawt. “Ee..Lanpuii maw, aw le” tiin lehkha chu a bih zui nghal a. He hmeichhe hming lamrik a nih apiang hian engtin emaw ka awm tlat hian ka hre thin. A mak e. Ka ngaihbel pawh a ni mahna le. 

Dawr ka thlen chuan ka tlai viau emaw ka tih laiin thenawm dawr pawh a lo la inkhar ṭhap. Tala ka khawih ruk ruk laiin thenawm dawr nghak Mapuii’n min lo call a, “Vawiin chu rawn lan i tum ta lo mi?” A rawn ti, ka bangbo deuh a, “Mawla, i theihnghilh mi a? Pa Ruata nupui vui ni a nih hi..” a rawn ti ta! Kei hi ka va mawl tak. “Ehe! Ka lo theihnghilh daih. Lawk, ka inthlak lawk ang a min lo nghak ta che,ka rawn lam ang che” ka ti ta chul a. Kan dawr chhehvel chu a reh ka ti reng a. Ka va ho roh tak êm. Inthiamlo ru deuhin chak zetin ka inkhalh let leh ta a. 

Johna reh vung vung chu ka ngaihtuah rilru deuh, mitthi vuinaa kan la awm avangin phone hman a la rem chiah si lo, ani hi a la tho lo nge Lucy chu a ru tak tak zawk? Vui zawhah Pa Ruata chu Mapuii nen kan va râl ve a, an nu hi a natna a rei ve tawh bawk a, a lo sun lawk te pawh a niang a hmel hmuh pawh a hrehawm em em loh e. Mahse, upat tawh lama han insûn hi chu a tuartu tan a na khawpin ka ring, ka pi khawhar dan leh ka pu a ngaihdan a ṭang reng hian ka hrethiam ve rei ruai mai. Damdawi mamawh zual leh keini tih loh damdawi dawr dangin an kawl ve si loh avangin dawr pawh dar 2 velah ka hawng leh a, Johna a la reh tluang zel. Customer an kiam deuh hnuah ka call ta nge nge a, a switch off tlat nia! He pa hi eng nge maw a hriat ni. Dar 4 velah ka inkhar a, Johna te in lam panin ka inkhalh phei leh ta nge nge a, Nu Rengi leh an nula an lo awm a, “Khaw nge bawiha chu?” Tîm deuh hleka ka tih chuan, “Chanchin engmah i la hre na nge?” Mak tih hmel deuh hian a lo ti hâw a. An inru ta nge nge a ni maw ti rilru chungin, “Hre nang? Eng nge a?” Ka ti a, ka phurna chu ka la thup hram hram. 

 

A chek hlak a, ngui deuh hian, “Tunah chuan police lock-upah a awm mêk, pawi a khawih lehpek alawm. “ A ti a, ka rin loh leh beisei loh lutuk thil a nih avangin ka nghing dawt thei. Ṭhianpa hi a rui thin ngei a, mahse, Police station êm chu a la thleng ngai lo. “Eng maw? Ngati nge?” Ka awki pawh a ring viau. “Lucy nen tlan dun an lo tum ve nge, Lucy chhungten an umzui a, an fanu rukbo tumah an puh a niawm e, an mantir ta mai a ni” a ti ṭiau a, a lungchhiat hmel kher mai.

“In va hmu lo em ni? Ti nge engmah min rawn hrilh loh a?” Ka ti hlur a, ka lawm lo lek lek. “Aa..i hriat tawh ka rin bakah kan buai nuaih sia, khatiang vel kha ka ngaihtuah hman lo a ni ber. I pa Rema a va kal a, hei a lo la haw lo” a ti chuai raih a. 

“Ka va kal ve teh ang” tia chhuah leh nghal mai ka tum lai takin kawngka chu rawn inhawngin Pa Rema leh Johna te chu an rawn inzui lut a. Ka ding chawt. 

“Nau, eng nge a awmzia?” Ka lo ti vat. 

A khi suk a, a mitko an plasterna chu tuai zauhin, “A ho khawp mai, bawiha” a ti zawi raih a. 

Nu Rengi’n an pa chanchin a lo zawt vat bawk. “Nasa taka ngaihdam kan dil vang leh amah Lucy ngeiin thudik a lo sawi ve vangin kan mualpho zau ta lo hlauh a nih hi, an case an withdraw a, a hranpaa thupha zu chawi erawh a ngai tho ang.” A ti dam dup a. 

Johna erawh chuan a pindan lamah min kai phei nul nul a, khumah thu dunin, “An khawih che e lo?” Ka tih chuan za vak lo hian a nui leh a, “A na lo, a ho lutuk. Mahse, thianpa, ka damchhung chuan Lucy hi tuman an nei lovang.” A ti nghut nghut a. 

A ngaihna hre mang lo va ka melh kul chu min rawn melh leh zauhin, “A hmangaihna dik leh thuk tak hian kei mipa thinlung sak tak hi a tizawp vek tawh. Tete, ka fel dawn, mihring tak pawhin Lucy pasal tlak ni turin fel ka tum dawn, chu chu ka chiang. Hmangaihna avang chuan ka ti thei dawn, ka thei..” a ti nghet ta charh charh a. Ka lawm êm vangin ka lo nui ve hawk mai. Ṭhianpa Johna hmela tumruhna chu hmuh hmaih a harsa kher mai. 

Thil thlen dan kimchang erawh ka hre thuai ang chu..