Hmingduhawma LAST

HMINGDUHAWMA (LAST)

Ziaktu : Toni Râlte

“Engtin nge i hriat?” Ka ti zawi raih a. 

Ngunthluk zeta min melhin, “Jail a chhuahsan atanga kum 3-naah khan thah a ni” a dam thlup a. “Maw? Thah a?! Eng nge a awmzia?” Ka ti sek sek a. 

“Ka sawi ngai lovin hei hi lo chhiar la, engkim i hrethiam mai ang” tiin a bag aṭang chuan lehkha inthuah deuh ṭûn zial hlawm chu min pe a, bangbo takin amah chu ka lo en ringawt. “Ka pa lûng ṭha lo a chhuak leh a, ka buaipui a ngai sia, mahse, kan ṭha aw. Ka kal phawt ang. Ka lo bia ang che” a sana bih paha ti zung zungin, min chhuahsan ta. Mamawh lam tura ka nu a chhuah lai a nia, Mami leh Chhana te chu kan khaw lamah tukin zingah khan an haw tawh, keini pawh naktuk tuk lehah kan haw ve ang chu. Lehkha zial chu zawi muangin ka phelh a. Duhawma thu min hrilh khan min ṭhawng rih êm mai a, ka rilru a chawl ka ti mai, ka chhaw hûih mai a, chu lehkha pawh chu ka chhiar châk loh phah hial thei. Mahse, chutah chuan min hringtu ka nu chungchang ziah a ni si. Ka hriat ngei a ngai a ni. Thaw hawkin ka melh vang vang a, he thu hi a inziak khat dal a. A tawpa a ziak tu hming chu Lalchhanhimi a ni. Tu tak ni ang maw..

“Jail ka luh hmasak ber chhan chu ruk ka rûk vang a ni. Ka awmna te nu ber rangkachak thi bakah bank-a an dah luh tur cheng singhnih ka ru a, min man chian êm avangin ka tan han phat ngaihna awm hek lo, min man ta a, Central jailah min dah lut ta a ni. Kei hi fahrah ina seilian ka ni a, ka nu leh pa ka hre lo, fahrah in atanga hla lo takah tu emawin min chharin Hnuchham inah chuan min dah ta a ni. Ka chenpui keimah ang rual chu ka unaute an ni mai a, chuta thawkte chu ka nu leh pa te an ni vek mai. Kum 18 ka nih thlengin Home-ah chuan ka awm a, khawvel dang boruak hîp ka duhna hneh zo loin ka thiante pahnih nen kan tlan chhuak ta a. Min rawn zawng zui lem lo. Home-ah khan pawl 8 thleng lehkha chu ka zir ve a, ka thiam theih loh em avangin ka bansan kha a nia. Ka thiante nen zalenna boruak kan han hip ta chu dangdai kan ti viau. Mahse, pawisa nei lo, chhungte nei bawk si lo chu kan buai ta thuai a, kan vakvai chu a ni ta der mai. Chutia mangang taka kan awm lai chuan kan home rawn tlawh ve fo thin pitar fel deuh mai hian min rawn hmu fuh ta hlauhin an inah min hruai haw ta hlawm a. Mahse, mak deuhin mi hausa a lo ni hauh lo, bazara nepnawi zuara ṭhu ve mai a lo nia, kan awmnaah khan a fanu a lo thawh ve vanga a fanu kan paha keiniho pawh min rawn tlawh thin a lo ni. Mahse, pitar fel leh Pathian ṭih mi a ni tih erawh ka chiang khawp mai. Chutia a khawsak a chuti teh lua tak si lohah chuan kan tihautak mai mai dawna hriain hnathawh tur kan dap ve ta a, amah kan pi bawk chuan mim dappui leh a, nitina mi ina hnathawh tur min hmuhsak ta hlawm a ni.. taimak a ngaih bakah tlawmna nun neih a ngai hle. Nau awm lam hi ka tih chi a ni vak lo a, chuvang chuan in chhungkhur sekrek khawih leh rawngbawl a ni mai. Mi hausaho inah erawh tih neuh neuh tur a lo tam nasa mai a, kan hah thei ve fû. Pitari in luah hnuai ber chu kan thian thum chuan kan luah ve ta a, kan pi chuan a phal lo viau nain tihhautak kan hreh ve a ni. A fanu bulah kan awmna erawh sawi miah lo turin kan hrilh thung. Kha hmuna let leh kha kan hreh em a ni. 

Home kan chhuahsan atangin kum khat pawh a lo liam ve ta reng mai. Keini pawh kan la khawsa tlang zel a, kan hlawh pawh kan khawl ve bek bek, kei pawn tum mumal tak ka nei ve a, ka pawisa khawl a tlin tam ve hunah keimaha in luah ka tum ve a ni, tichuan, mumal taka ka nu leh pate zawn chhuah ka rilruk a. A chhan pawh phuba lak ka duh vang a ni. Min enkawl peih lova bawlhhlawh paiha min paihtu te chu tu te nge an nih ka hre ve duh tlat. Chu thil ka lungkhamna chuan ka chhungrilah bu a khuar ngheh tawh em avangin khawngaihna leh lainatna te hi ka tlachham bik ni hian ka hre thin. Tichuan, ka sawi tawh ang khan hausak ve chaka pawisak nei ta lo chu tikhan ruk ka ru ta a, tan inah ka luh phah ta a ni. 

Jail-a ka luha ka hriat hmasak ber chu Parmawii hi a ni. Kei aiin a upa a, mahse, hmeichhe hmeltha tak a ni thung. Drugs hmanga sumdawnna avanga man a ni a, zu pawh a tel nia sawi a ni. Ani nen chuan kan inkawmngeih chho ta viau a, kei aia a upat bakah a fingin thil a man chak em em a, kar lovah tâng dang zingah pawh a tlangtla thuai a, senior te a be thiamin a tilawm zung zung a, keipawn ka nawmsak phah ve hle. Ani hi kei aiin a chhuak hmasa a, a chhuah dawnah a address min pe a, zawng chhuak ngei turin min ti bawk. Bail-tu nei ve ta lo chu kei chu kum 2 tling lo deuh ka tâng a. Ka tân chhung zawng khan kantu ka nei lo. Ka in luahpuite takngial pawn min rawn kan lo kha ka rilru a na viau nghe nghe. Ka chhuaha in ka va thlen chuan ka thin tirim zualtu ka va tawng leh a, anni chuan an lo chhuahsan daih tawh chu niin ka thawmhnaw leh bungrua pawh engmah an lo hnutchhiah lo. Ka pi lah kha kum khat ka tân hnuah khan thawhah vangin a lo boral tawh a lo nia! Tichuan, a ngaitê bawkin ka vakvai leh ta. Khatihlai khan bank ac pawh ka la nei lo va, ka pawisa neih ang ang ka khawl ve te pawh kha ka khawlbawmah ka dah mai thin kha a nia, chung ka pawisa khawlte pawh chu ka thiante chuan an lo la bo vek a ni. Neih engmah nei ta lo chu ka chhuah zan chuan kan in luahna thinte khawngaih dilin an inah ka riak ve ta tawp a, jail tâng chhuak ka nih miau avangin min ngaina tehchiam lo va, an bulhnaia khawsa turin min duh lo tih an mitmei atangin ka hrethiam ve si. Tichuan, Pari ka hrechhuak ta a, a address min pek kha ka lo la kawl ve ran a lo nia, ka zawng ta tawp mai a ni. Dâwt min lo hrilh bik lo va, veng tlabirh ve takah in mal din, lian vak lo hi a lo luah a lo nia. Min lo la hre chat mai chu ka lawm kher mai. Tichuan, a bulah chuan ka khawsa ve ta a, engkim min hrilh chiang sa vek bawk. Amaha in luah ni mah se; keimah anga vakvai leh chanhai, kalna tur nei lo an rawn lumlut fo a, an eizawnna tur a lo dapsak thin a ni. Chu eizawnna chu engdang ni loin mahni inzawrh ks kan tih ang kha a ni ber. Tin, amah Pari ber chuan zu bakah damdawi a zuar bawk. Amah chuan a kawl ngai lo va, agent a nei thluah mai. Thla khat lek a bula ka chen chhung pawn vawi 4 a zin chhuak hman, a sumdawnna leh eizawnna chu a hlawk ang tih ka ring, mahse, keini ang thawh ve chi a ni vak lo, amah angin kan fingin kan fimkhur ve thiam lovang. Nula thalai, la upa em em si lo chutianga mahnia khawsaa sumdawnna turu tak a han khawih mai chu mak ka ti ru thin hle. A mimal nun engmah a sawi ngai si lo, ka zawt ngam hek lo. Kei chuan mahni inzawrh êm chu ka hreh avangin a hmaa ka thawh thin mi ina va thawh ang kha ka thawk chho leh a, ka hlawh atangin zaa sawmhnih Pari hnenah ka chhung lut thin. Mahni inzuar te ai chuan ka hlawh tlem fê a, mahse, anni ai chuan ka la inhmu sang ve khanglang. Ka chanchin engkim Jailah khan ka hrilh vek tawh a, pawisak vak ka nei lo tih pawh a hria, ka nu leh pate bakah min phatsantu ka thiante pawh min zawnpui intiamin phuba ka lak chu min duhsak hle.

A hnena kum chanve zet ka khawsak takah leh a chenpui nghet anga min neih ve tak hnuah chuan midang amah kal tlanga eizawng thinte ai chuan kan inpawh ta hle a. Ani pawn nau ang thawthangin min en tawh, kei lahin u tak tak angin. Tichuan, Pari chanchin pawh chu ka hre chho ve ta a. Nu leh pa a la nei ti ila a pa hi a pahrawn a ni thung. A nu laka a hêl ve avang hian sual kawng a zawh hma ve hle a, thingpui dawr siamin a ngaihtuahawm lo viau a, nahse, ani pawh duhâm chho zelin tuna a eizawnna hi a rukin a khawih chho ta a, inthup reng sen ni hek lo, khawtlangin an hre ta thuai a, warning te an inpek tak hial avangin a pahrawn zak leh thinrim chuan a hnawtchhuak ta a ni. Mahse, ama pa diktak te hi an khawsak a harsa bik chuang lo va, a bel ve leh ta chawt a, mahse, a pain nupui a neih ve tho avangin chengho hleithei bik loin amahin a indang ta hmiah a, a sumdawnna pawh a khawih chhunzawm ta zel a, mi inzirsang tak ni lo mah se; pianpui finna a nei tha a, a eizawnnaah a chiang bawk nen, a ngaihtuahawm lo chho ta hle. Mahse, tikhan man a tawk ve ta hlauh mai a, jailah kan inhmelhriat phah ta a nih kha. Kan dinhmun a inan deuh reuh avang chuan kan inngainatna leh duhsakna pawh a thuk bik ka ti lo thei lo. Chutianga hun kan hman ve zel hnu chuan a hmaa a dawra thawk thin tleirâwltê mai, hmel pawh chhe lo tak mai hian a rawn zawng chhuak ve leh ta a, chu tleirawl chu Lalhruaitluangi a ni. Ani pawh a awmna ten an hnawtchhuak a lo nia, Thingtlang khua atanga lo kal a nih bakah sum thawkchhuak tura khawpui rawn awm ve a nih avangin reithei taka kir leh a hreh ve si,. Tichuan, Pari chuan awmna tur a dapsak ta a. Mahni inzawrh kha Hruaii pawh chuan thih hrehin a hreh ve tlat,. Pa hausa tak inah awmna tur a hmuhsak ta a, Hruaii chu a thawk zui ta a, Pari’n agent atan a hman ruk avangin a hlawh chu a pumbilh thung. Mi ina awm chungin Pari sumdawnnaah a pui ve thung bawk a. Tuman an ringhlel lem lo. Kei pawh ka inkhawl tam ve zel a, jail tan leh erawh ka tum tawh lo. Ka nu leh pa te chu zawn ngaihna a vâng em a, ka beidawng titih tawh. Mahse, sawi hmaih hauh loh tur chu ka thiante pahnih kha ka zawng chhuak thei tih hi, vawikhat zana kan leng chhuak, Restaurant-a kan chawlh laiin pakhati zawk khan eitur a rawn sem a, ka lo la hai lo nasa si, ka ding phat a, ani pawn min lo hre chat, hlauthawng hmel a pu bawk. Mi zawng zawng awm laiin ka cha chhuah ta phiar phiar a, sawi tur engmah a hre lo. Ka beng bawk. Kut min thlak let ngam lo bawk. Pakhat zawk awmna ka zawt a, pasal neiin a pasalte khua Thingtlangah an awm tawh thu a sawi ta a, ka tan hmuh ngaihna a awm ta rih lo a ni. Tikhan rilru chu a dam thawkhat deuh, kei aia dinhmun hniam zawka a awm hrim hrim pawh kha ka lawm tawk viau e. 

Hun a kal ve zel a, Pari pawh a inchhek hausa ta hle, nula hausa a ni ta ringawt mai. Mahse, ani pawh hian duhâm chin a nei hleithei lo, man a tawk leh ta a, mahse, min ngenna angin leh ka tana a hlut em vangin a tân ai jail ka tansak, ka tang rei lo thung amah Pari’n min rawn bail nghal mai. Tiang chuan man a tawh chuan ka tansak ta zel a, ka eizawn vena mi ina hnathawh pawh ka bansan ta hial a, Pari chuan engkimah min chhawm dawlin a sumdawnnaah chuan share ka nei ve ta hial bawk nen, a lo awlsam bawk a, lawm takin ka pawm ve mai. 

Man a nih tak zeuh zeuhah chuan fimkhur a hun tih hriain a sumdawn thup nan Restaurant a hawng leh ta rup mai. Amah a fing felin a hmelchhe lo bawk nen a lun ta phian a. Chutia a sumdawnna bansan anga a han lan takah chuan a nute pawn an rawn hnimhnai leh ṭan a, sum hi chuan thil a tithei khawp a niang e. A pahrawn nen pawh an inrem zui ta phian a, a lawmawm ti tawh mai ang. Heng hun lai hian kei erawh kan sumdawnna vangin ka zin a ngai ta fo a, Pari ai ka awh a ngai a nih ber chu, tu khawkha ngaihven em em ka ni lo bawk a, kan tluang zui ta hle. A tawi zawngin sawi ila, Pari chuan ngaihzawng a neih ka hre ngai miah lo. Mahse, dawr a hawn hnuah mi pakhat chu a vei ve ta tlat mai, buaithlak takin mi pawmlai, mi pasal a ni tlat. Chu pa chu kan dawr bul lawka dawr lian zet nei, Aizawlpa sumdawng hausa tia hriat lar pu Sangzuala a ni. A nupui pawh lecturer niin fapa pakhat an nei tawh, mak deuhin pu Sanga te awmpui chu Pari bula rawn tlulut Hruaii kha a lo ni reng mai! Chutiang a nih vang chuan Pari chuan fing takin rem a lo ruat ru reng mai a lo nia,. Ni khat chu Pu Sanga te nupa an awm loh laiin an inah a va leng a, Hruaii chu a damdawi sem darhsaktu a nih tho vangin a va leng pawh chu thilmak a ni hran lo. Damdawi pawh chu an inhlan nghal a, Thingpui an in laiin Hruaii pi chu a rawn haw ta thut mai, nidang aia a haw hma avangin Hruaii pawn mak a tih bakah inleng a lo nei chu a pi thinur a hlau viau, mahse, a pi chu mi fel tak niin engmah a sawi lo. Thingpui siamsak turin Hruaii chu a hrilh a, thingpui a in laiin Pari pawh chu a chhuak zui ve ta a ni. A hnua Pari sawi danin Hruaii thingpui siam laiah chuan Hruaii hmuh loh laiin tur chi khat chu a phul zauh a , chu chu Pu Sanga nupui thih chhan kha a ni. Tupawn Hruaii kha an ringhlel a, amah pawn hrehawm a ti takzet. 

Tichuan, Pu Sanga nupui sun lungleng leh khawhar chu Pari chuan thiam takin a lo hnem thin a, an lo inhnem duhâm mah mah nge ni a fa hial a pai ta a nih kha. Mahse, hei hi Pari’n pu Sanga a duh leh atchilh vang nge Pari pahrawn farnu pasal leh pu Sanga te hi sumdawng dun, thiantha tak leh pu Sanga pawh a kâl lo pe hial tawh a nih vang tih kan hre lo. Tun hnuah pu Sanga fapa leh Pari nî fanu inneihtir an duh em em danah hian ruahmanna an lo nei sa diam em tih chu keia hriat phak a ni lo. Pari leh a pahrawn inrem hnu khan a pahrawn pawh suma buai ru ve tak, hmingchhiat hlauh vanga a langsar taka sumdawnna bawlhhlawh khawih ngam lo a ni tih Pari hian a hre tawh a, a pahrawn farnu fanu leh a pasal fabik te an inneih theih chuan aman sum leh dawr zawng zawng a chalai theih a inring a nih hmel, ni e, Pari hian pawisa a addict a, duhtawk chin a nei thei tlat lo a tin ni. Tunah hian in pathum, mi nazawng neih phak loh tur hi a psal hriatpui miah lohin a nei ther der tawh. Tin, resort lar tak pakhat hi tu emaw hming hawhin neitu nihna a nei bawk. A pasal hian engmah hnutchhiah lo mah se; a rethei tawh lovang, mahse, chu chu a duhtawk thei lo va, a tawpah a chhiatpui ta a nih hi. 

Pu Sanga nen an inneih hnu lawkah Hruaii pawh a kâ a an a hlauh avangin in atangin a chhuahtir a, mahse, a ka hup zui zel a duh vang nimaw a restaurant-ah khan a thawk zui ve ta a. A tira a in luah, veng tlabirhah khan Hruaii nen kan khawsa dun ta a ni. Pari chuan a khawvel thian ti tawh mai ang, a ks chhawr te, no.4 supply tu te zawng zawng nena an inkar a titawp vek a, nu fel leh zahawm nihna hlawhchhuah tumin lem a chang ta ngar ngar a ni. Hruaii chu kei aiin naupang zawk mah se, a felin a taima a, sum tam tak hlawh chhuaha in leh lo neih vea Thingtlanga a chhungte nen chenho chu a tum ve ber a ni.Chuvang chuan a rukin damdawi chu kan la zuar zui zel reng a, zu pawh kan khawih tel tho avangin leh Pari anga kan fimkhur thiam ve loh avangin kan in chu a lum ta em em a, zu rui ṭâwng zet zet te nen kan innek ta nulh nulh reng mai. Hetihlai hian Pari restaurant kha a nu ten an neihsak tak avangin kei leh Hruaii pawh chu kan thawk tawh lo, Zu leh damdawi zawrh chu kan eizawnna awmchhun a ni ta mai. chuvang chuan fimkhur sen a har ve bawk a ni. Chutia zu leh sa hmuna tâp reng ta na nâ na chu keini pawn lem chin kan lo nei ta fo a, a ruih lah a lo hrehawm em em bawk si lo, Hruaii nen chuan harhfim lai kan nei ta meuh lo. Chutih nak alaiin damdawi min supply tu te an lo man avangin kan chatlak a, kan tlachhe chho tan ta. Zu lah kan lo in ve zel avangin zawrh tur mumal kan nei lo ta thuai a, ngaih a samin kan thatchhe bawk si. Mipat hmeichhiatna lamah pawh fihlim reng a lo har ta bawk nen, Zu in tur rawn keng thei te nen chuan kan fianrial ta zauh zauh a. In kha Pari hminga awm a la nih si avangin Pari ngei pawn kan awmdan chu duh loin chhuak turin min rawn ti ta bawk. Awlsam taka sum lakluh chu awlsam takin a chhuak leh mai thin tih hi a lo dik khawp mai, kan sum khawl ve sa te pawh chu thil ho mai maiah kan khawharal ta zel a, in erawh kan la chhuahsan duh bik lo, dik tak chuan Pari thuruk ka hriat ve kar avangin min hlauhna chin a nei ve tlat. Chutianga mipa hrang hrang mutpui ta chu Hruaii a rai ta mauh mai. Kan mangang dun nasa mai a, mahse, tihtlak chu a duh bau lo mai bawk si. A chhungten an hre lo thei lo va, a pain râl atangin a rawn tuithlar ta bawk. Chutia nau a pai tak hialah chuan inngaihtuah harhin zu pawh a in tlem ta tial tial a, nunphung pangngai taka khawsak a tum chho ta a ni. Vawi tam ka zawt thin a, a naute pa chu mahse, a thih thlengin a nau pai chu tu fa nge tih a sawi ta lo kha a nia. 

Eizawnna tur dang awm hlawl hek lo, no.4 lo zuar ve tawh ta chu hmelhriat neuh neuh a lo nei bawk a, bulṭan thar lehin a zuar chho leh ta a, kei erawh ka la rui deuh reng. A tawi zawngin Hruaii chuan man a tawk  ta tlat mai. Naupai lai ni mah se; danin thiam a chantir thei chuang si lo. Jail-ah a tâng ve ta a. A nau neih dawn khan a u leh a nu an rawn zin a, naute chu a û kutah a hlan ta a ni. Kha naute hming kha Hruaii’n chau tak chungin a sa a, Vanlalhmangaihi tiin. 

Jail-ah a lut leh ta a, mahse, ka khawngaih êm vangin Pari hnenah bail turin ka ngensak a, a tan harsa hek lo, a zuk bail ve ta hlauh mai a. Tichuan, a ngaitêin kan pahnih bawkin hun kan hmang leh ta a ni. Kei chuan pasal angreng neiin kan inah chuan a rawn awm ve mai a, Hruaii pawn eizawnna dang dapin mi dawr a nghahsak ve ta a. Keini nupa erawh chuan zu kan zuar zui ta zel a, zu erawh ka in vak tawh lo. Hun a liam ve zel a, Hruaii pawh kan nupa bula khawsak ve reng chu nuam ti loin in hrang a luah ve ta a, mipa erawh a ngaihsak meuh lo. Ka bulah chuan, “Tuna ka thawh chhuahte hi ka fanu ta tur vek an ni, ka enkawl seilen lohin a thanglian a, a tana ka tih ve theih tawk a nih hi..” a ti a, tihtakzetin a fanu hi a hmangaih ve a ni. A dinhmunin a zir loh em avangin a awmpui thei lo a ni mai. 

Zan khat chu Pari hian min rawn biain Hruaii nena min hmuh a duh thu a sawi ta a, thil pawimawh tak a nih thu te nen, tichuan, a motorin min rawn hruai thlap, sumdawnna lam thil bawk a nih ka rin avangin mak ka ti hran lo. Hruaii pawh a hnathawhna hmun atanga a la haw loh avangin kan lam nghal a. Aizawl daiah tlan zelin mi hming hawha ama resort-ah khan kan kal ta a, chu chuan chu lai hmun chu a ta a ni tih kan la hre lo. Tumah an awm ve lo, a reh thiap mai a ni. Room pakhatah min luhpuiin zu changkang tak a rawn phawrh a, “In ngaihawm em a, reunion neih ka châk deuh a. “ A ti a. A nelawm em em bawk. Zu chu kan in ho ta a, “He lai hmun hi ka ta a nih hi in duh hun hunah in zuk awm hahdam thei ang, ka hming sawi u la..” a ti vei luam bawk. 

Chumi hnu lawkah Hruaii bulah chuan, “Tuna ka pasal nupui i pi ni thin kha i thah thu sawiin inpe la, i mamawh leh engkim, i duh duh ka pe ang che. Jailah pawh i awm rei hek lovang, nangmah ngei i inpek chuan tuman an ringhlel lovang che. “ Tiin inremsiamna neihpui a tum ta mai a. Hruaii ngaihdan a lo ni awzawng si lo. “Nangmah hi a bultumtu i ni tih ka hre daih tawh, ka pi thingpuiah khan ka hmuh loh hlanin tur i telh a, a thih phah a nih kha. Kha i thuruk ka puangzar lo pawh kha lawm hle rawh. Min lo tanpui tawh thin avang khan i duh duha min tih kual tum suh, in atangin min chhuahtir tawh a, a bak beisei tawh suh.” A ti ve ta hmiah a. Pari chuan, “Fiahna i nei chuang lo, tunah hian i pi chhungte lam khan case thar thawh an tum leh mek a, nangmah hi a nia an rawn target hmasak ber tur..chuvang chuan inpe la, i fanu nen engkimah ka tuamhlawm ang che u” a tih leh pawn Hruaii chuan a duh lo bur mai si. Zu chu kan in kan in bawk nen, kan rui tawh angreng a, kei chuan sawi ve tur em em ka nei hran lo, mahse, Pari han finzia chu..Hruaii bulah, “Nang hi chu Chhani ang i ni ve lo, thiante pawh phatsana thlim duh i nia, ni e, Chhani bialpa nen sex in hman dan te kha hre lo emaw min ti suh, Chhani’n a hriatchhuah in hlauh vangin a nih kha in atang pawn i chhuah” a ti ta mai. Ka thinrimna chawh chhuah a tum a, a hlawhtling ta baek, keia rui lungpuam thinrimna zawng ta chu Hruaii chungah ka ṭuan ta, kan ṭawngkam pawh a mawi lo takzet, kan ri ta nuaih nuaih a. Hruaii chu a ṭang nasa, ka bialpa pawh bia zawt turin min ti, Pari’n min on zel si, kan insual ta a. Hruaii hi insual thiam tak mai a ni reuh a, jail-ah pawh an lo tibuai ve ngawt a, a sawisa hrep hlawm ta si, a tân chhung khan an hlau viau a niawm e. Kei zu rui tawh bawk si chuan ka hneh ta mang hlek lo a, min bawhbet ta ran mai, Pari chuan min rawn pui ta a, ka rilru fim lo mah se; Hruaii kha ka rek miah lo, Pari khan a ni rek zawk ni, ka ruih em avang khan chiang takin engkim ka hmu lo mai mai zawk a, a hnua Pari’n min kaihthawh chuan Hruaii chu a lo thi reng tawh. Ka rui pawh ka harh ta kâwk mai. Pari lah chuan, “,Chhani, engtin nge ni dawn, Hruaii i that ringawt alawm.. “ a lo ti. “Ka that lo reng reng” ka ti sasawi a, “I rek nasa lutuk a,  i kut rawn laksak che ka tum a, i chak em a ni. A pawi lutuk engtin nge niang aw..” a ti ta mawlh mawlh a. Kei chu ka nghilh dup mai, engmah ka ngaihtuah thei tawh lo. 

Mahse, Ruahmanna fel tak neisa veka min ko khawmtu Pari kha a hnuah a che buai eih lo. “Tihdan ka hria, Hruaii thawmhnaw saw va ha la, i thawmhnaw kha ani hi haktir ang. Chuan a hmai leh a taksa lang thei vel hi acid-in kan theh ang a, a hmel an hre lo mai ang.” A ti sawk sawk a, a sawi ang chuan ka ti ve ta mawlh mawlh, “Zu kha in belh rawh, i buai a nih kha” a ti a, ka in belh leh ta zel a, a hnuah phei chuan engmah ka hre zui tawh lo. 

Ka harh leh chuan kha lai hmunah tho khan ka lo awm a. Pari remruat ang angin ka awm ta a ni ber e. Hruaii kha dawr lian taka thawk a ni a,  uniform an nei thlap, ina a hawn hman tawh loh vangin a uniform ha chung khan min rawn zui kha a nia. Khatia a thih takah kha chuan a uniform atangin tu ruang nge tih an hriat thuai dawn vangin leh keini a kalpuite chuan rinhlelh kan kai dawn avangin Pari khan ka thawmhnaw nen inthlak thleng turin min ti a nih kha. Tichuan, Hruaii hmai leh a taksa lanh thei chinah chuan acid thehin Hruaii a ni tih a hriat theih ta loh, a nihna takah chuan Ruang chu keimah angin a sawngbawl a ni ber. Ruang chu phur chhuakin mi hmuh theih turin a va hnutchhiah ta a ni. Ruang thawmhnaw hak leh a purse-ah keimah vek a lan avangin mitthi chu Lalchhanhimi a ni ta a. Ka pasal angreng pawh kha ruang endiktirin ka ruang ngei a nih thu a lo sawi ve mai bawk si. Ka pasal chuan khami zana ka chhuahpuite sawiin Pari leh Hruaii te hming a lam ta a. Chutah tak chuan Pari fin ka chelh ta lo a ni. Pari chuan police te bulah, “Hruaii in luahah kan inhmu khawm a, zu te pawh kan in. Kei chu pasal fanau nei ka nih avangin ka haw hma a, Chhani kha chuan a riah nghal tur thu a sawi “ a lo ti sam ét a. Hruaii ruang kha an veng thlanmual chhakah hmuh a ni a, chutiang a nih chuan keima ruang anga an ngaih si avangin Hruaii zawk chu an ringhlel lo thei ta lo. Hruaii in an han dap a, a lo hnawk deuh nuaih a,  amah Hruaii ber lah a thih tawh si avangin hmuh tur awm hek lo. Mitthi tawh chu tualthattu angin an zawng zui ta a ni. Pari hian duhthlan tur min siamsak lo, min tanpui anga lang siin Hruaii lemchang turin min hnuk lut a ni ber e. Hruaii nen khan kan intiat viau a, kan sam a sei ve ve bawk, kan hmel erawh a inang lo. Mahse, kei vanlaia tla, chhungte tihtur nei lo kha tuman ka hmel an chhinchhiaha min chhui ruk a ring lo a ni teh chék ang chu, Hruaii anga awm tur chuan min hneh a ni ber. Mahse, chutianga ka tih aiah chuan thla tin pawisa ka dawngin a in lei sa pakhat chu min pe bawk dawn a ni. Ka pasal angreng pawh kha kei ber ka awm tak si loah chuan chhuahtirin a in chu a hralh zui ta hmiah bawk. Tichuan, ka chet tlat ngai lohna hmun Khatlaah chuan ka inbengbel leh ta a. Pari hian ka thluak a su vek a ni ber mai, a thu awih loh hi ka hlau a ni tawp mai, ni e, “Ka thu anga i awm loh chuan engkim hretu leh puitu che ka ni tih hrereng rawh” tiin min vau a, kei rilru chiâi reng, chhungrila hlauhthawnna kawl reng chuan ka do let ngam lo a ni ber e. Hruaii kha ka thah tak tak a nih te pawh a hnuah chuan ka ring ta hial a ni. Hun a kal a, Hruaii thih atanga kum 2-naah pasal ka nei ve ta a, mi pangngai tak a ni. Mahse, keinah dik tak ni lo, Hruaii anga lemchang kha ka la ni reng a, Ka hming diktak pawh ka theihnghilh ta zauh zauh. 

Chhani thattu Hruaii chu hmuh tur awm hek lo, a case pawh a zuzi chho ta a, Chhani kha vua leh vang nei lo a ni bawk nen, tu khaw khain a thattu chu an hre châk lo a niang. Mahse, Hruaii erawh la dam reng anga ngaih a nih miau avangin a thisen zawmpui a chhungten an rawn ngaihven tak avangin lemchanna hautak tak chu ka bei chho ta tlauh tlauh mai a ni. Hruaii fanu a rawn lan tak atang khan buaina chuan zual lam a pan ta a, Pari lah a fahrawn hlauin a chiâi chho ve ta bawk. Hmingduhawma khan a nu thihna kha a thar thawh leh ta tlat si a. Chuta karah a bialnu chu Hruaii fanu a lo ni chhap nen. Vawi tam kan sawi duna kan rel dun hnuah tiang khan Vanlali chu kan ru bo a, aman kan thiltih tumte chu a sawi vek tawh kha. Rawn chhanchhuak ta lo se, khami zan khan a nunna kan laksak ngei ang. Mahse, Hruaii thlarau khan a fanu a venghim a niang e, tihian a tawpah chuan kan sualna chuan min rawn um phain kan sual man chu kan hmachhawn a ngai ve ta a ni e. Heng ka thil sawite hi a kim lo viau ang tih ka ring. Mahse, ka ngaihtuahna hi a chawmawlh zo taeh a, Pari thluak suksak hrep tawh ka ni bawk nen, sawi hmaih leh hriatthiam harsa lai chu rilru fim takin bung khatna atang khan lo ngaihtuah mai teh u, in remkhawm fuh ngei ngei ang tih ka ring tlat a ni. Hei erawh ka sawi hram duh e. Hruaii kha ka that lo..” 

Ka chhiar chhung zawngin ka insangmar nge ni ka han chhiar zo chu ka hah vek thei. Ka thaw hawk a, ka khur der der..”Tei, Tei..” ka nu aw ka hriat rual chuan ka phawk hru a. Kawngka ka lo kalh chu niin ka va hawnsak thuai a, a hawi kual a, “Ehe! Eirawng pawh i la bawl na nge? Hei khua a thim ruai tawh asin” a ti hlak hlak a. 

“Nu” ka ti mawl tawp. Ka hmel a dik lo tih a hmu thiam ta a niang, “Eng nge thleng a?” Nem deuh hian a ti a. 

Dawhkana lehkha inchap darh chu kawkin, “I chhiar ve a ngai” ka ti sap a. Min en vang vangin, “Ka chhiar tawh alawm” a ti zawi raih a. 

“I inpeih huna i chhiar atan tiin ka hrilh duh lo che a nih kha” a ti leh a. Ka chhing sawk. 

“Chuan” ka ti ringawt. Eng zawhna ber nge ka zawh pawh ka hre chuang lo. Mahse, ka nu chuan a lo hrethiam nge ni, “Pari bik chung chu a rip khawp ang. Chhanhimi erawh ka hre lo le..” a ti a. 

Chumi zan chuan Duhawma pawh a rawn kal lo, a pa kha a serious viau em mawni le , mahse, min rawn call a, “Ka pa chu a ngaihtuahawm loh aw, Zanin chu tihbuai i duh loh ringin ka rawn kal ta lo. Ka naute an chiâi si a, ka awmpui “ a rawn ti dam thlup a. Ka pawm hle. Ni e, chimbuai ka duh lo, engmah ka sawi peih lo, ka mu chawrh chawrh ringawt. Ka nu, min hringtu chu kan khawmi te sawi dan ang em ema mi hurherh leh nasa a lo ni bik lo. Ka pa diktak pawh kha a hrereng ang mahse, rem lohna ril tak avangin a sawi chhuak duh lo a ni mai. Tikhan tlang rel pawh dawn zo lo leh ka pu tuithlar hial pawn a dan zawh lohin kei chu min pai tlang a, keimah vangin rim takin a thawk a, a ngaih em em a chhungte leh a khua pawh hmua tlawh thei loin hun harsa leh khirh tak a paltlang a nih kha. Parmawii vertherna leh duhâmna vangin a fam ta..na ka ti. Vawikhat tal hmuha kuah ka châk asin. Vawi khat chauh tal, “Nu, ka hmangaih che” tih thu pawh hrilh ka duh ve asin. Vanlaia tla ang maia vakvai leh rilru rethei reng renga khawsa ka nu khan thih hnu piah ramah a pa, ka pu nen khan an han inhmachhawn ngei ang a..eng thu tak sawi dun ang maw..a fanu, a thisenin harsatna a tawh laia hawisana nunkawng bumboh zawhtirtu ka pu kha ka hmu ve hman lo a, hmuh pawh ka châk hek lo. Khatiang putar khan dam reng kha a phu lo a niang, a nun pawh a tawi rêng bawk e. Ka tâl tlaivar ta thak mai. 

A tukah phur lo zetin ka nu nen Duhawma te nen kan bazar a, ka nu vekin a en kual a ni ber. Ka ninzia leh ka thaw ipikzia hretu Duhawma chuan an inah min hruai haw ta tawp a. Muanpuia leh a pa an lo awm. Pu Sanga chuan, “Graduate kher nghah pawh a ngai em ni? Buaina zakhua in tawh leh hmain innei vat rawh u. Hruaii thlarau pawh a chawl hahdam thei ngei ang” a lo ti dap dap a. Ka nui ringawt. Duhawma nen kan inkarah buaina a awm ta lo. Mahse, ka thawveng sawt chuang lo. Buaina erawh ka cho tawh rih mawlh lo e. 

Zana Duhawma a rawn len chuan, “Chhawrpial khua ka nih vang tiraw min kawp” ka ti chawt mai a. Ka nu erawh in chungah a leng a. 

“A tirah chuan aw..mahse, tunah chuan ka nupui hual i ni, nu hruai fanu i nih vanga i la puh hram duh a nih pawn pawi ka ti lo” a ti duah a. 

“Ka tawrh zawh ngang loh chuan ka rawn zin ve dawn a nia aw” a ti sup a. “Ka lo beisei ang che” ka tih chuan a hrilhhai letling. Ka nu a rawn haw chuan, “Pi, nakkum lam ka lo tinzawn ve ringawt a nia, min tibeidawng miah suh” a lo ti a nih chu! Awii , ka va zak tak. Ka nu lah chu a la nui sang zui, “I enkawl thei ang maw?” A ti a. 

“A ṭha ber ka tihsak zel ang.” A lo ti zangkhai vah. 

“Kei chuan hnialna ka nei hran lo mahse, a la naupang lulai ee” ka nu chuan a ti vang vang a. 

“Aa..ka sawi zel chuan ka phur mah mah dawn, nakkum atan khek ang” a ti nghut a. Ka nu pawh a nuih a za. 

Ka nu mut hnu lawkah a tho ve ta thurh a, “Thawh hma in ngai sia, chuan, savaté, tluang deuhin kal rawh u aw. Ka hmangaih che a nia” tiin min melh vawng vawng a, “Kei pawn ka hmangaih che.” Ka ti ve thei ta. A khi suk a, a va hmelṭha tak..Kan inmangṭha ta. 

 Khami zan khan , Vawi engzat nge kan infawh zozai pawh ka hre ta lo e a..hehhe..

A TAWP TA.