Hmingduhawma 9

HMINGDUHAWMA (9)

Ziaktu : Toni Râlte

“Mangpui an tih ang hi ka mang ve a” hre ve reng reng se ka duh vangin ka va text a, ka nui ruh ruh mai. Class kal dawnah min lo call a, “Keimah nen a ni em?” A rawn ti. 

“Ni mai mai lo” ka tih chuan, “Hett, min kawp a ni maw? Mumangah pawh min hmu duh lo va” a rawn ti vel. 

Ka ṭawng leh hmain, “E chuan, vawiin chu ka biak hman loh ang aw. Dawr bungrua chinfel ngai a awm nual a” a ti sa a. “Aw le pu ber” ka tih hnuah ṭha takin kan inthlah ta a. Zirtawpni hi chuan kan thaw hi a veng em em ringawt zel, damtea awm chuan kan haw ve thei ṭêp tawh e. Ka nu chu lo zin se ka duh em em chhan pawh hawn hmaa bazarpui ka duh a ni,.a hranin kan bazar leh thei dawn der si lo. Papuii paw’n haw a chak thu a sawi a sawi ve mai, a bialpain inneih a sawi thut thut tawh thu te a sawi a, “Kan la naupang em mai, graduate ve phawt ang” ka ti bur ringawt, pasal neih lam hi ka la ngaihtuah ngai lo reng reng, châkna ka nei lo bawk nen, eizawnna ngel nghet ve deuh hlek neih phawt ka duh. Ka zirna senso zawng zawng min tumsaka tun thlenga min ngaihtuahtu ka chhungte vur let ve phawt hi ka duh a ni. Duhawma hi ka pasal tur pawh a ni kherin ka ring lo. Ni lo ta se, keimah ni lo tu emaw nei ta se, ka thîk ve ngawt ang. Tunah chuan thik tur hian a khawsa duh lo êm a, Cindy bak han thik tur em em pawh ka la hre lo. 

 Kan class bang Mami nen footpath-a kan chho dun ral ral chu vai pakhat, mistiri niawm tak hian mi rawn nêk pahin ka hnutê hi a dek zauh mai pek a! A tihpalh a ni lo tih ka chiang. Ka ding chawt a, pawt letin ka beng ta ṭhuai mai. “Ka pi, keima ngaidam rawh” a ti ta chul a “I zak em? Engvangin nge ka âwm bawr i rawn deh a, i va ngam zawk ve. “ Ka ti tuar a. Mi kal velte bakah a ep dawr nghakte pawh an rawn hawi ṭhup mai. Kan bul maia ding ve nu thau liang luang hian, “Engah nge i ben ngawt a? I pawi eng nge a sawi a?” A rawn ti thawr thawr a, “Ani hi min nêk lo pawn a kal thei, min nêk bakah ka hnute a rawn khawih a nih kha. “ Ka ti ve ta hmak a. Vaipa pawh chu a ding khup zûl a, chu nu chuan mi melh râwm râwm chung hian, “I va inla reuh ve, nangman i zir khawp a ni mai alawm, mi pangngai ni la chutiang chuan a awm lovang” a ti a nih chu! Ka ngei lutuk chuan a samkir buk chhupa keh dah âwrh âwrh ka châk kher mai, kei aiin a upa daih bawk si. “Ka pi, i va â ve, i fanu chunga thleng nise i enliam dawn tihna ni maw? Mizo pawh ni hlei lo, vai lehnghal a thlavangte khatianga i hauh le? Ka thiannu hian eng nge a zir lohna? Nang kha in en teh, nutling pui si i va inchei leplerh ve..” Mami zawk chuan a ti pherh ta erh a. Kei chu sawi leh sawi hnu ṭawngkam ka thiam ve lo ka tih kha. Chu nutling chhur pui tawh chu ka melh kul ringawt. Pa valai hmel pangngai tak hian, “Inbengdai rawh u, a zahthlak. Nang pa pawh kha tun hnuah kan hmeichhia te hi i kut hmawr pawn dek eih tawh suh ang che. I hria em? Nangni ho hi in tam mah mah tawh. Ka pi, nang pawh duhtawk rawh. Khatianga hnamdang thlavang lo hauh kha a tul lo” a rawn ti ta nghut nghut a. Kan ngawi tlang ta chauh. Vaipa pawh meikhupin a kal zui ta nul nul mai. He issue hi chu sawi fe tham a tling ang chu. Mahse, hmun a heh deuh dawn, tikhan ngaihdan lo siam ve mai rawh u, tu ngaihdan mah kan inthlaksak hleithei chuang lo. 

In kan thlen paw’n kan phun zui char char, Chhana chuan, “In bulhnaiah mizo tlangval an awm na nge? Engtin nge an enliam theih zawk a?” A lo ti ve chhut chhut a, a lo thinrim ve viau mai. “I beng kha ka lawmzia chu a” Mami’n a ti leh thin. Kei pawh ka inchhir lo nasa..

“Karlehah ka nu lo zin a tum a” zanriah ei laiin ka ti a. “Yes, vawksa kan leitir ang” Chhana’n a lo ti nulh. 

“Desi pawh kha a lo zin dawn ta lo mi?” Mami’n a tih chuan “Ka hre lo, buaina neuh neuh an nei ve reng a, a buaithlak lutuk.” A ti nuah nuah a. 

“I ngaihsak lo em alawm, games i khelhsan reng zel a” ka lo ti hmanhmawh. 

“Hmm, time pass nan mai mai alawm games chu..ka be ve reng e aw” a ti ve nasa. Kan haw tep tawh tho a, a ngaih a tha deuh a nih ka ring. Ni e, hawn ve tawh a chakawm khawp mai, thiante nen nuih leh vak vak pawh a thlakhlelhawm alawm mawle.

Zanah nu Pari chu call ka tum a, a tlang thei tlat lo. Msg ka hnutchhiah ta hram a, “Hmuh che ka duh” tiin. Eng ang takin min rawn chhang ang maw. Duhawma rawn lut chuan, “Mami, in pain pawnah a nghak che” a rawn ti lut a, Mami a tum nghal vuau mai. “Eng atan” a ti hmak a, “A hmu duh che niang chu” a ti ve mai a. “Rawn lut se ni mai lawm” Mami’n a ti leh hmak. Anni pahnih hi an reh rei ka ring lem lo, kan inhnaih ve avang hian Sanga pawh kan in hrik ang maia rawn tâp ve reng a ni bawk nen, inhmuh zin na nâ na chuan inthlakhlelhna pawh a lo nasa a niang, inhmu loin an awm rei thei lo. Chu chu kan hriatpui thlap. 

Sawi ang ngeiin mami chu a awm hle hle thei lo, chhuah duh tho si, hreh bawk si ang hian a awm a, a tei a tei ringawt. Duhawma chuan hrethiam niawm takin, “Hawh u, in haw tep tawh sia, ride ve mai mai ang u “ a ti hlawl mai a. Chhana erawh Lawma nen an project an enfel dun dawn a, a inpawm chhuak tawh. Ka ṭawng hma hmain Mami chuan, “Nia, tihtur em em kan nei hleinem, leng ve ang u” a rawn ti. A phur leh viau tawh. Mami leh Sanga te inhmuhna remchang atana hman rilruk ruin ka insiam a,  Sanga ka call bawk. “Lo lut rawh, hei kan ride dawn a, lo kal ve la. “ Ka ti a. “Inah ka chho leh lawk a, ka rawn chhuk ang” a rawn ti. Mami chuan ka bia tih a hre kher lovang. Rei insiam ngai pawh a ni hran lo va, kan chhuak ta dial a, Duhawma car bulah Sanga chu a lo awm ran tawh, a lai vel chuan ka nuih a tiza hle naa, ka insum tlat. Mami lah Sanga a hmuh rualin a’n tûm ṭha leh vel a, a ruk tak chuan a lawm reng sia. Hehe. Anni pahnih back seat-ah kei front-ah , Kan kalna tur lam pawh ka hre chuang lo. 

Tachhip khaw thlen hma  daiah kawng zau laiah dingin a bul maia waiting shed-ah chuan kan thu dal a, Duhawma chuan min rawn kaiin, “Lo kal teh, thil ka entir ang che” a ti sup a. A motor kalpelin kawng kawiah kan kal liam a, thla a êng viau mai. Zanah ka chhuah vak ngai loh avang leh hetiang lai vel hi ka la kal ngai loh vangin boruak te chu a thiang bik riau hian ka hria. “Chance kan pe tihna mi?” Ka ti hû a. 

“Keimahni zawk hian chance kan nei zawk a ni lo maw?” A ti nghut a. Nu Pari msg ka thawn thu te bakah ka nu pawh karleh Thawhṭana a rawn kal tur thu ka hrilh malh malh a. Awmdun ve pawn romantic deuha thil han sawi dun hi a awm thei lo, kan buaina hi chinfel a la ni lo miau a. Ani pawn, “I nu chu rawn thleng phawt se, ka hmu ve duh bawk sia,Thawhlehni emaw Nilaiah emaw Shillong-a ka zin lawk a ngai dawn a. Ka rei lovang. “ A ti a. Ka ngaihtuahna chu thup seng loin, “I nu case kaihhnawih bawk em ni?” Ka lo ti vat. A thaw hawk a, “Ni e,.ka luhchilh law law tawh a, a tawp thlen ngei ka duh” a ti nghet churh a. Ka lo pawmpui hle. 

“A nih kan pahnih inkarah hian hnawk a awm leh ang em? Nu Pari chu ka hmuh nge hmuh loh tha i tih zawk?” Ka ti a, ka inla puitling vel tawp. 

“Lo hmu rih lo mah la pawi ka ti chiah lo, tin, i nuteii pawh i nu lo thlen hma chu va hmu tawh rih lo la ka duh bawk. I mimal nun chu ni mah se; ngenna ka siam a nih chu.” A ti mawlh mawlh a. “Ka lakah hian eng emaw zep chu i la nei a ni lo maw? Engkim kan hriatchhuah vek tawh avang hian kei chuan hlauhthawnna ka nei hleinem” ka ti ve a.

“Hlauhthawnna tur chu awm tawh chuang lo ve. Mahse, ka zin ka lo haw hunah i nute pahnih surprise ka duh alawm. Khami hmaa va inlan sek kha chuan a tih hlut loh phah ka hlau” a ti duah a, a awmzia ka hrethiam em em lo. 

“Te, Vanlal, khaw nge in awm?” Infawh tui lai laiin Mami’n a rawn ti lâng lâng a. Kan inthlah thei ta hram , muangchangin a car lam chu kan pan ta a. Anni pawh an lo inngeih tawh khawp mai, kha kha a ni mai dawn reng asin, ka lawmpui e. Duhawma sawi ang khan awm rih chu ka tum phawt ang a, thil harsa em em pawh a ni hran lo bawk. Nu Pari khan msg chu a seen a, mahse, min reply lo, ka va zâi leh ta lem lo bawk a. 

“Ka nu rualin lo zin ve mai la,. A remchang ber alawm” ka ti bawrh bawrh a, Lalseni nen kan inbia a ni. In ka tifel zo tawh a, thutthlengah ka mu der der. “Nu Remi pawn min sawi hmuh a, mahse, ka nu hian kan pahniha rawn zina chhung leh khatte tlawh chhuah ve a ti deuh tlat a, man eitu turte an ni ve bawk nen..” a ti nuah nuah a. Ka hrethiam tho, Seni pate lama an chhungte hi an awm ve thleh thluah a, man eitira Seni mamawh tur han inleitir te kha an duh ve a nih ka ring thiam mai. 

U Fela’n wai wai chhum tur a rawn keng lut ṭûn a, nizanah kan len hlan khan ani pawh a rawn haw a niawm e. A hmai ṭawk deuh lek lek tawh chu melhin, “Zu i va in nasa awm ve a” ka ti ringawt. Za vak lova nuiin, “Tihtur dang awm hek lo,.” A ti mai a.

“Nupuite hi nei ve tawh rawh, Nu Zari pawh a khawngaihthlak alawm. In chhung enkawltu pawh in neih loh khi” ngamtlak takin ka ti hlak hlak a,. Mami lah chuan, “ A savabu hual nang ber i rem tawh si lo va, zu inah a tlak ringawt a nih kha. A â tak tak a ni” a lo la ti zui! Nuam lo a tih ka hlauh avangin Mami chu ka mitmei dawn thin, min en tha duh der bawk si lo. Kan thil chhum ei hmain u Fela chuan a va lem leh hram kha, a zu no tur bik hi kan dah hransak tawp tawh. 

Sunday zan chuan a tuk maia ka nu a lo zin dawn vangin ka helhhawlh hle, kan in luaha innghat loin ka nuteii te inah innghah a tum a, ka ṭeu hlar mai. Mami te pawn an lo phal lo nasa, “Aw, rei ka cham thei dawn lo va, ka awm chhung tala ka enkawl ve lohin. Ani pawn min thlahlel ve ang chu” ti sasawi mah se; kan remti bau lo. “Kan class kal hlanin i va leng ziah dawn nia” ka ti sam êt a, “Taxi hmanna ringawt pawh a senso a tam dawn asin” a tih lahin ,”Ka bialpain a va hruai zel mai ang che, nih loh pawn Mami bialpa a awm alawm” ka ti zel mai si. A chek hlak a, “I va nasa reuh tak” a ti hlur mai. Ka nui ringawt thung. Duhawma bulah pawh ka sawi a, a phur ve hle niin ka hria, ka nu pawhin then tur ang zawngin tawngkam a nei tawh ngai lo bawk nen. Ka nuteii zawk paw’n, “Engah nge kan bula a thlen chu in phal loh tlat a? Kha zawng zawng kan inhmu tawh lo va, ka ngai ve alawm” a rawn ti ngial a, “Aa..nitin a rawn kan dawn tho che lawm” ka lo ti. Nuam chu ka ti chiah lo, min hringtu aia min enkawltu ka thlahlel zawk chu, mahse khawvel hian min dem ka ring bik lo, enkawltu kut nge nge chu a kuah pawh a dam bik nge nge e. Keimah ang hi in lo awm ve a nih chuan in hrethiam ngeiin ka ring tlat. 

“Shillongah chuan eng ber nge i zuk tih dawn?” Ka ti a. 

“Ka hre lo” a tih chuan ka melh kâwk, “I â mi? Sawi tha rawh, thil hi sawipui tlakah min ngai ve lo a nih hi..” ka ti hluai a, ka kut vuanin a hmer a, “Tak taka ka nu thattu diktak ka zu zawng dawn mawle” thutak deuh hian a ti ta a. Ka phawk lutuk, “Ehe! Tak tak a mi? I nu thattu i hre tawh a maw? Tu nge? In awmpuinu kha tiraw?” Zawhna ka ngah lutuk chu buaithlak a ti ve ngawt ang. “Chiâi lo la, hahdam phawt rawh, Savate” a ti dam thluam a. 

Ka chhungril chu a za nge a so hulh hulh hian ka hria, a rukin a nu thihna a lo chhui ve ngat ngat tawh a, tunah a tawp a thleng ve mai tur chu ka lawmpui a ni. “I beisei loh thil a thleng maithei. Ka nu thattu chu kan awmpuinu kha a ni lo. “ A ti ta tlat mai! 

“A nih chuan tu nge?” Phawk hra hian ka melh a. Nui sukin, “Kei pawn chu chu alawm ka hriat duh. Mahse, kan hre chhuak vat dawn. “ A ti thawp sup a. Dawnsawn dan ka thiam chiah lo. Aa..a hunah chuan ka hrethiam ve mahna le. Ka zawt peih tawh rih lo. 

Thingpui kan in laiin ka nuin min rawn call a, ani pawh a helhhawlh ve a niang ka ti mai. “Aw nu..” ka tih rual rualin, “I fapa motorin a su a, hei khaw thenawm kan panpui dawn” a rawn tih chuan ka leng dâwrh ni mai hian ka hria, “Maw? Sibuta maw? Ngati nge? Engtin nge a awm?” Ka ti chul a. 

“Nikhua a hre lo va, Aizawl lam pawh kan rawn kalpui a ngai maithei. “ A aw khurh hlawk hlawk danah ka nu chu a hlauthawng tih a chiang, ka nu mi chiâi mai mai ngai lo a phili buai chinah chuan buaina a nep ngai lo. “Nu, a tha tak tak maw?” Ka ti ṭial rian a. 

“Ka beisei, lo ṭawngṭai rawh” tiin a hmet tawp ta daih. Ka hmelhmai vang leh ka ṭawngdan atang khan an hrethiam ni tur a ni, Mami chuan min rawn kuah vat a, “Sibuta em ni?” A tih chuan ka lo bu nghat ringawt. Duhawma chuan a bulah min thuttirin nghet takin ka kut a hum a, ka hnung chu a chul hauh hauh bawk. “Motorin a su a” ka ti thei hram. Ka baw hawk a ni ber, ka ṭap ta ringawt mai. “Khatin hlauthawng lutuk mah ta che, a hmuna a thih loh chuan a dam dawn a niang, Pathianin a tidam em em ang” a ti dap dap a. Mami leh Sanga bakah Chhana ten min hnem reng bawk. Mahse, hlauhthawnna hlirin ka khat a ni ber, Mami chuan a nu a call a, chanchin kimchang hriat nan a ti a ni. An inbiak zawhah, “Sibuta sutu motor chu eco van a niawm e, a tlanchhe nghal daih a, an hamhaih avangin a motor no. Pawh an lo chhinchhiah hman lo a nih chu. Inkhawm bang an thianhoa an haw lam kha a rawn su thal tawp a ni ber mai.,.tunah khaw thenawm PHC-ah an kalpui mek a, a buaipuitute sawi danin a lu atang chuan thisen a chhuak a, chuan a ban veilam kha a tliak bawk a niawm e, a lu-a a hliam vang khan nikhua a hre lo a niang ka nu chuan a tia, a bak a taksah hliam dang chu an hmu lo a niang..” Mami chuan a ti zung zung a. “Naupang chu khuavangin a veng an tih thin kha, a tha leh em em ang” tiin Duhawma chuan min thlamuan ve leh a. Ka thlamuan viau pawh chu ka hre chuang lo. Tunlai hian kan khuaah crusade neiin an hlim em em a, naupangho pawh an phurin lamtual an mawi reng e an tia, kan Sibuta pawh a lam dan te min rawn hrilh thin kha a nia, chuta an inkhawm bang lam chu a su ta a nih chu. “A chil lo chu a vannei letling phian mai” Sanga’n a lo tih chuan Mami’n a nghawk zauh. Mahse, a sawi kha a dik reng, chil zui ta phei se chuan a per vek ngei ang. Zan dang aiin Duhawma pawh a leng rei..haw tura ka tih sek takah chuan min ngaihtuah hmel takin a haw ve ta hram a ni.

Ka muhil thei lo va, chanchin ka ngaichang bawk nen. Dar 10 pelh tawhah ka nu chuan min rawn call ta a, hlauthawng ru takin ka la..”Bawiha chu a tha e aw, zai pawh a ngai dawn lo e. A lu a asutna khan a lu a lo tihai ve deuh a, thi a lo chhuak nasa bawk nen, hmunpui lam pawh pan a ngai dawn lo e. Ngaihtha deuh khan lo awm rawh” a rawn ti nem diai a. 

“A sutu chu kan khaw mi leh sa chu a ni lo tiraw?” Ka ti vat a, Sibuta ngaihtuahawm a ni ta lo chuan rilru a tifim ṭan, “Ni lo, kan khuaah eco van nei an awm hleinem. Lo hmutute sawi dan chuan driver chiah a chuang an tia, Chawnpui lam panin a tlan kha a nia, Chawnpui lam khawtlang hruaitute an va be pawp nghal a, an lo châng niawm tak a ni. Mahse, tun thlengin an khua a la lut lo. A mak khawp mai” a rawn ti a. 

“Ramhnuaiah a peng bo a niang chu, an khua leh kan khuate chu darkar khat tlan pawh a ni hleinem” ka ti hluk hluk a. “A tum reng vanga su tih hriat lutuk. “ Ka ti leh hluai..”Ni bik lo vang, a tlan chak lutuk an tia, a rui a niang, Kan sibuta lah harh fâl ve bawk si kha a thiante aiin kawngpui a thleng hmasa ang a, a su ta mai a niang. Khalam kha chu i û ten an ngaihtuah mai ang. Lungmuang deuh khan mutthilh tum rawh. Rawn zin pawh a theih rih dawn ta lo a nih hi.. in kal leh dawn hunah hruai pah che uin ka zin ve mai ang, Thawhlehni-ah i bazarna tur pawisa chu ka lo thawntir dawn nia” a rawn ti leh zung zung a. Ka va hnual tak êm aw. Ka lo hisâp nasat tawh nen chuan. 

Thinthiin ka muhil ta lo. Mahse, engmah a thleng lo a, ka lawm ngei mai. A tuk class kal pawh ka phur lo kher mai. Thil kan beisei tawh, kan ruahman felsa vek tawh ṭhulh leh thut ang hian min tihnualin ka mood a chhiat phah vek thin. U Fela tihdan takah, zu in chak tawh siin lei tumin kan zawng kual a, chutah chuan an nei tiin kan pan ṭâwk ṭawk a, an lo neih leh si loh hian khawvel hi a thim mup zel, eng tih mah a nuam thei tawh lo, kan beidawng ngaiwh ngawih mai a ni a tih ang deuh kha a ni mai e. Mahse, thiante hmaizah vangin awm pangngaiin ka awm lui hram hram thung. 

Nuteii pawn min rawn be ve a, “Ka u-in min rawn hrilh a, a zia lo tak tak a ni. Kan inhmu ve thei dawn e tia ka lo hlim tehlul nen. Han dam deuh ila i pa Hminga nen hian kan khuaah chuan kan zin maithei zawk a ni. “ A rawn ti luam a. 

“Ni ngawt mai, a sutu lah an man ta bawk si lo” ka ti sap a. 

“Nachang an lo hre lo kha a pawi em mai,. Mizo a nih pawh ka ring lo e a. “ A ti ve hlar a. 

“Kan khuaah chuan lo zin ngei ngei r’u, Mateii te pawh rawn hruai ula, Mas te pawh in rawn hmang ang chu.” Ka ti leh daih a, a hlimawm zawnga thil kalpui hram hram ka duh a ni. 

A nui hak a, “Nia a chakawm, mahse maw, Tei, zep loh chuan ka pian leh murna ni mah se; ka thang mawi lo em mai a, ka zak a ni ber. Nangni ang rual ho chuan min hre kher lo vang a, mahse, ka ú te leh ka rualpuiho te khan min la hai dawn si lo, ka nunhlui an sawi leh ang a, in chhungkua ka tizak nawn mai mai dawnin ka hria a, hei hi ka hrehna ber,. Zina kan in te kha tlawh leh ka chàk lutuk..” a rawn ti dap dap a, ka khawngaih zawk hle mai. Ni e, khawpuiah hi chuan mi nundan, nunhlui leh an thiltih mekte pawh insawisak hman lo khawpin kan buai vek tawh a, Kan khuaa hmeichhe zu rui an sawi vul chúk kha hetah chuan enliam, ngaih khata ngaih kha a ni mai. “A enjoy ve nih saw” tih mai khan a zo der a, Thingtlangah chuan a ni ve tawh thin lo. Eng ang pawn lo felin lo ṭha tawh mah se; “Hmanah khan a lo chuti khati ve nasa tawh alawm, a fa pawh a pa puh tur hre lo khawpa che bawnra ve kha a nia, tunah khawpuia awm tak vang maia that thut thu awm suh,.” Tihte kha an ṭawng duhdan a ni leh dawn a, ka chiang. Khawpuiah pawh hetiang mi kamtam hi chu an awm nawk naa, Thingtlangah chuan pakhat chauh pawh awm se, a sawi chhuah rualin khua a khat nghal ang tih theih a ni. A chhan chu mihring kan tlem zawk miau a, bakah hmeichhe rui chu kan hmu mak ! KS ang hiala ngaite pawh an la awm. Buaithlak lutuk. Chuvang chuan Nuteii rilru pawh chu ka hrethiam viau mai. 

A khat tawkin u Sawmi emaw ka nu emaw ka be reng a, Sibuta pawh a lo harh tawh a, a hliamin khawsik a siam ve deuh bawk nen, thawh erawh a la tho harh peih lo. Duhawma bulah, “Ka nu a rawn zin thei dawn ta si lo va,zin hma zawk la, lo haw leh vat zawk la..” ka ti a. “Nia, ka lo hrilh hmasa ber ang che” a ti a. Sibuta chetsual atang phei chuan a bula awm hi ka thlehlel zual, min hnem hûrh lo mah se; min dawhtheihna te chu a hlu zual bik. Ka naupanchhiatna ang angin min dawm peih a, ka thlamuanpui takzet a ni.   

Ka bula a thut lai rengin call a dawng a, la call tu chu ka va melh zauh a, Zuia (SP) tih hi a lo nia, rang zeta pick upin a ding hluai a. Tukverh thlanglam bula dingin a va be ta a. Ka bengkhawn ru viau tho. Ani chuan sawi ve vak a nei lo. “Aw le, ka lo endik dawn nia.ka lawm e aw” tiin a dah nghal. 

Thil dang a sawi zui daih, police call a dawng a nih chuan a nu chungchang bak a nih ka ring vak lo. Nilainiah zin a tum thu a sawi a, ka lo huphurh lawk deuh, hnem ka mamawh lai tak a lo ni ve bawk nen. “Naktuk zanah kan inah rawn leng ve la, min insiampui ang a” a tih chuan ka hmui ka tipawrh ringawt. Ka duh dawn lo nasa tih a chian vang ni maw a sawi zui tawh lem lo. 

Papuii leh kan hnunga ṭhu Lucy leh Zami te nen tiffin kan ei ho lai chuan Cindy te an rawn lut a, “Nasa leh ang chu “ Lucy chuan a ti sap, kan boruak kha an hre vek tawh bawk nen, khamini atang khan mi ten min hre fur tawh a, Cindy te thiandun nungchang an lo ei loh hlawm em vangin min ṭan phah fur bawk. A lawmawm leh lawmawm loh pawh ka hrethiam lo e a. Cindy chu a rawn kal hnai a, “Tikhan vitamins a hranin in ei leh mai tihni mi?” Khi sâwng chung hian a ti a. 

Ka ei lai ka ei mial mial thung. Tumah chuan kan chhan loh vang ni maw? “Hlim, rawn en ve mah teh, kan ui chaw ai pawn an ei hi a chhe zawk mawle” tiin a nui uar uar a, hnamdang movie kan en fo a, school leh college vela mi an bully thin dan te kan hmu ve vek, mizote pawn a chhe lai kan lo la ve ta hle mai. Mi bully chu chindan thar, Changkanna anga ngai, larna hmanrua atan an hmang ve ṭan dawn a nih hmel. Min bully tur khawpin Cindy te hi an sanna ka hre lo va, chuvang chuan ka ngai haw duh lo lui thin, chutak chuan an thin a tirim zual thin ni hian ka hria.

Zami chuan, “In ui te pawh vitamins in pe ve lehzel tihna ni maw?” A ti ta zauh a. “Nangni inenkawlna senso let khan kan uite kan enkawlna hi a sang fe ang. Ui pawh in tluk lo tihna nih chu..” tiin a nui leh nghek nghek a, Hlimi lah za em em si lo, za tak anga nui luiin a rak ve vak vak ringawt. Chaw ei laia bengchhen hian ka thil ei a titui lo thin. Ka ning ta deuh a, “Cindy, i pa hian kum khatah nuai engzat nge a eiruk ve thin?” Ka va ti ta a. A nui tawp chawt, 

“Zawngi, eng maw i sawi a? Ka pa hian a eiru ngai lo aw” a ti ram hmak a. Ngaihnep hmel zeta ner khum sakin, “Ni teh se,.” Ka tih khum leh sak. Ka thil ei lai ka ei zawm nghal. A la na ngang a niang e, “Hmelchhenu, ka pa hmingte i lamrik ngam le?” Tiin min rawn hnaih nghal ruak a. “I pa hming ka hre reng reng lo e a” ka lo ti si, Lucy te an lo nui hak. A run tawk a tling viau ngei ang, kut thawh leh chu a ngam chiah tawh lo nge a âng hmuar hmuar a, kan ei zawhah intifai turin kan chhuak leh ta dial si, a hrilhhai teh ang chu. Ka nuin pawisa a lo thawn a, ka rin aiin a tam. Christmas bazarna tur a ni bawk a, ka indaih thei mai ang chu maw. Sibuta pawh a harh ve zel a, a ban ruh tliak kha an zawmsak nghal a, indim rih erawh a la ngai dawn a ni. A sutu chanchin erawh hriat zui tur a awm ta lo, hma han lak vak dan a awm bawk si lo, khami zan khan Chawnpui lamin an chân chhuah zawh loh vangin a tukah kan khaw thalai ten an zawng sasawi a, an hmu zo tawh lo. Chawnpui khaw thlen hma khan khawi emaw laiah a ding ang a, zan rei, zing lam a ni mah zawk ang chutiang hun velah chuan kan khaw lamah lo let lehin a rawn tlan tlang ang a, mi zawng zawng an mut reh lai a ni bawk nen, awlsamtêin a tlanbo zui a nih ka ring. Chu chu midangte rindan pawh a ni. 

Papuii’n a cousin damdawi ina awm kan puiah min sawm er teh a, kan ban hma tho avangin ka kalpui ve ta a. A cousin pawh a lo ṭha angreng viau, anî fanu a lo nia, Papuii nen an zia a inang hle. “Ka va zung lawk” tiin ka chhuak a. Corridor ka zawh phei lai chuan ka awmna ep lama cabin pakhat atang chuan Duhawma hi a rawn chhuak a, Awii kei hi! Buaina ka ngah ve nen, a pi dam loh thu kha ka hrechhuak leh chiah. Ka hriatchhuah rualin Civil Hospitalah a pi a awm lo tih ka hre chhuak leh nghal zat bawk, a va inkawkalh tak. Ani chuan min hmu ve lo a niang, step a zawh thla zawi zawi a, eng room emaw berah hian a lut zui ta a. Ka bulah engmah a sawi loh avangin mak ka ti deuh, thil pawimawh dam lohna thil ang te phei chu a sawi ve ziah sia. Ka zun a chhuah tawh em vangin ka ngaihtuah zui hleithei lo. Ka â lutuk chu ka inngei hlur, a ngaihhlut em em a pi dam lo chanchin ka lo zawt ngai reng reng lo chu ka inthiam thei thlawt lo. Ka zun lai lai chuan ka text a, “Tak a! Ka hrechhuak thut, i pi kha eng nge a an tak zel” ka va ti hluai a. 

Tlaia in ka thlen hnuah min replyna ka hmu chauh, “A zia tawh a, a chhuak tawh. “ A rawn ti. Ka lakah a lawm vak lo ang em le. Min ngaihtuah tehlul nen, ka buaina chauh ka lo hmu lian ve bawk a tin ni. Dar 8 velah daih a rawn thleng a, “Ka insiam a, ka tlai ta deuh a ni” a ti mai a. Zingah a motora kal a tum kha a nia. Chawlh lai chu nise bazar pahin ka zui ve daih ang mawle. Damdawi ina ka hmuh thu pawh ka sawi ta lem lo, ka hrechang leh tawh lo a ni ber, bakah a nu case a khawih lai a nia, damdawi ina kal te kha a ngai pawh a ni thei. Va inrawlh ve sek kha ka duh lo. A zin dawn tih an hriat vang ni maw Sangtea pawh zan dang aiin a haw hma a, Mami leh Chhana ten min mutsan hmak bawk. “Ninganiah intihfel ka tum ang a, ka hman chuan zanah ka rawn haw nghal ang. Rei ka awm peih lo.” A ti a. “Min ngai ang em?” Ka ti ve ngei. Zak chung chungin a nia ka sawi ve ni. 

“Ngai dawn lutuk che. Mahse, ka biak hman lutuk lo maithei. Nang min ngai ang em?” A tih chuan, “Aw” ka ti ringawt. 

A nui a, “Teh tawp zel hian. “ A ti nghut a. 

“I nuteii emaw Pari’n emaw an lo be leh tawh che em?” A ti ta daih a, “Be miah lo,” ka tih chuan ngaihthat hmel fe hian a nui hawk a. Hnai taka min rawn enin kan infawp leh ta vawng vawng mai. 

“Min hmangaihin i inhria em?” A ti sup a. 

Makti taka melh chho hàin, “,Ti nge min zawh?” Ka lo ti let hu thung. 

“Ka hmangaih chein ka hria” tiin a lungphu zawnah ka kut chu a dah a, a phu rang deuhin ka hria. “Hmangaihna hi ka hrethiam lo a” ka ti ringawt. Kan tleirawl chhuahtirh khan, ‘Ka hmangaih lo chu ka hmangaih che ka ti ve lovang’ ka lo ti deuh thlap thlap tawh a, chhawmnun ka tum zel vang ni pawn ka hre chuang lo. 

“Ti nge min ngaihzawn? Kei aia tha i hmu teuh sia” ka ti leh ta. Hei hi ka zawhna tawp hleithei lo a la ni ta reng mai. 

“I hre duh tak tak em ni?” A ti dam dup a. 

Ka lo bu nghat. “Aw le, i nu Pari in lo buaipui ṭum kha i la hria em? Kha kha kan inhmuh hmasak berna ve ve a nia, ka lo ûksàk tehchiam lo che a , hmeichhia hi ka ngaihven lem lo hrim hrim bawk nen. Chuan, Muanpuia’n Chhana a sut ṭum khan kan inhmu leh ta a, mak deuh maiin min tiphur tlat, i mize mak deuh, ti phawng phawngte, i ze ngeng ngalh te khan min hip tlat a. Bakah khatihlai khan kan chhungkaw boruak a nuam lo lutuk a, intihthawvena boruak thar han hip ve kha ka châk bawk nen, tiang khan thiam lo deuhin ka kawm zui ta che a nih kha..” a ti sup sup a. 

“I zei sia, bialnu i ngah tawh ngawt ang” ka lo ti leh thâwr a. 

“Pahnih chu nang tih loh ka nei ve tawh. A ho chutiang” a ti a. 

“Judy leh Cindy te maw” ka lo ti uang a.

“Anni pahnih hming hi chu ka ex girlfriend-ah chhiar tur a awm ngai lovang” a ti nghut mai. Ka lawm tawk a lo tling ve em em zui. 

“A nih thil dang daih,nu Pari leh i pate an inneih hnu khan an bulah i awm ve zel mi?” Ka ti leh a. Ka hre châk miau sia. 

“Awm lo ve, nuhrawn ka neih takah kha chuan ka nute in leh kan inah ka awm kawp a ni deuh mai, ka nuteii sawn fa angin min lo enkawl ve tho nen. Mahse, ka pu (a nu pa)in, ‘Hetianga tlan tauhna neih reng hi an ṭha mawh an tia, chuvang chuan duhthlang la, i awmna tur diktakah awm rawh. “Min tia. ka la naupang hle naa, Nu Pari’n ka nu ai a awha engkim ama thu anga a awmtir tur kha ka ngaingam tlat lo va. Bakah ka pute bulah chuan awm ringawt mah ila, nakin hun zel ngaihtuahin ka buai ve a ni. Ka pi hian a rukin, “Bawihte, i pa bulah awm rawh. I puitlin hunah i pa aiawhin sumdawnna kawng i la zawh ang a, retheiin i awm lovang, chu chu i nu duhdan pawh a ni ngei ang. Kan bulah awm lo mah la, kan hmangaih chein kan tuamhlawm reng dawn che. Kan in hi i in ang tho a ni dawn. Mahse, i hmalam hun a tan i pa thu saw awih la, Pari pawh i nu ang chiahin ngai la, i naute pawh en hrang suh. Tichuan, Pathian pawhin mal a sawm em em ang che. Keini chuan kan hawisan dawn reng reng lo che” a ti a. Kha khan min hneh ka ti mai. Tin, ka pa hi tun thlengin ka tan demawmin a la awm ngai lo, min duatin min hmangaih a, ka naute aia ka pawimawh zawkzia te hi a la lantir reng thin. Chuvang chuan ka pa chu ka hawisan thei lo a, a bula awm ka thlang ta a ni. Tichuan, Hostela awm ka dil a, class XII thleng kha hostelah ka seilian a ni ber e. Nu Pari te tan hnawksak nih ka duh loh bakah ka nu ang taka ka en theih hlawl loh vangin discipline hnuaia seilen kha ka tan a that zawk ka ring a, College pawh Shillongah ka kal. “ A ti ta dap dap a. 

Ngaihnawm ka ti kher mai. Tunah chuan ka hriat chak em em pakhat ka hre ta phawt mai. “I naute sawn an zah ve tho che em? Nu hran in ni tih an hria em?” Ka ti leh hram a, ka â roh sia, kei hi..

“Hre ve e,. Mahse, U ber ka nihnaah min zah thiam viau chuan ka hria, Jenny saw a khirh ve deuh a, mahse, min hlau. Muanpuia phei chu a duat pawh ka duat alawm. “ A ti a. Ka hmu hmeltha hliah hliah mai. 

“A nih zu ngawlvei dam leh ka ni i ti sia, engtik laiin nge zu chu i lo in ve reng reng a?” Ka tih chuan a khi sak a, “Aw ka graduate hnuah management lam ka zir leh a, ka nun a loose ve ṭan a, Shillongah khan ka lo in ve zauh zauh tawh nen, ka nu thih dan vel chhui that ka rilruk lai nen a lo innang bawk sia, ka rilru hah leh na kha ka in ta tluk tluk mai a ni. A ho khawp mai.” A ti a. 

“Nakinah i in leh vak ang e aw” ka tih chuan, “Ka in leh i hlauh chuan min nei mai rawh.” A ti hmiah mai. Ka chhang ngam tawh der lo. Dar 11 rik dawnah a haw ve ta chauh. 

“U Dawma zin chu eng emaw tak ka lo chah lo va aw” Mami’n a tih chuan, “Tikhan chah mai la” ka lo ti vut. Kei pawn engmah ka chah lo. Zinga a chhuah dawnin min rawn wish a, ka replyna erawh a la seen lo, a la tlan laklawh a niang. Class lak lai te chuan Hmingduhawma hmel ringawt ka mitthlain ka hmu, ka ngai ve tak tak a nih dawn hi. Ngaih a phu ve alawm. Banah keimahin ka haw chho hnak hnak a, vaipa ka benna bawr vel ka thlen laiin ka nuteii’n min lo call a, “I va reh ve, i dam maw?” A rawn ti ve ngial a. “Nangni alawm reh, aw ka tha alawm. “ Ka ti a. 

“Nia, kan buai ve deuh a, naktuk class in kal ang tiraw?” A rawn tih chuan, “Aw ngati nge” ka ti vat a. 

“Aa..eng ni lo ve, i haw hmain min rawn tlawh tawh lovang tih ka hlau deuh a. “ A ti a, “Tlawh dawn e a, Sibuta pawh a tha ve tawh a, ka nu pawh haw hma te chuan a rawn kal leh hman maithei asin” ka ti luam a. 

“Nia, lo zin ve thei hram se a nuam ngawt ang. “ A tih laiin, “Awii Tei, in bang chiah law?” Kan khaw mi U Zonuni lo ni rengin..ka nuteii chuan, “Nakinah kan inbe tha dawn nia” tiin a dah zui ta daih. U Zonuni nen chuan kan inbe ta luam a. Ani pawh bazar pahin a rawn zin a lo nia, “I hman tho, lo peng ve rawh” tiin ka kai lui a, a tihtur a pawimawh em em chuang lo bawk nen, min zui ve ta mai. 

In kan thleng a, a phul hlut mai, a dan ve reng a nia. U Zonuni hi nula senior, vengva leh kohhran khawtlangah pawh hmingtha tak mai a ni a, tupawn kan nel a, kan zah bawk. Thingpui ka lumsak lai chuan, “Enteh, Tei, i nu diktak i hrechhuak tawh an tia, in inhmu tawh mi? U Hruaii chu ka hmu ve châk ee, kan tetlaia miin ‘I len hunah eng nge nih i tum? Tia min zawhte khan, “U Hruaii ang nih ka tum” ka ti ziah thin a. A hmelthat  leh a inchei thiam vang khan kan ngaisang thei lutuk, ani pawn min la hre ve reng ang, ka hmu châk. Khawi vengah nge an awm?” A ti surh surh a. 

“Ka la lenpui ang che, i la châm dawn chuan, ani pawn a hmu ve chak ngawt ang che..” ka lo ti a. 

Mami te an rawn lut a, kan ri ta hlut nen ka nu chungchang chu kan sawi zui ta rih lo..