Hmingduhawma 8

HMINGDUHAWMA (8)

Ziaktu : Toni Râlte 

Makti deuha melh kâwkin, “Engtin maw? Eng maw i sawi kha?” Ka ti nghek a. Ani pawh a sawi loh tur a sawi emaw tih mai tur hian a hawisawn vat a, zahzelah a phone a phawrh ringawt, ka hrethiam ve vek si. “Mawh, eng nge i sawi kha a awmzia?” Ka ti ta sek sek a. “Nakinah i la hre mai ang” a tih chuan, “Ka nu ang mai, hetia in tih zel le. Ka ning, kei hian eng nge hriat ve loh ka neih a?” Ka ti chiam chiam a, ka tum bûr mai. Ka kut a rawn vuan a, “Dawhthei ve hlek teh” a ti sup a. Ka titau laklawh tawh. “Sawi mai a harsa mi? Ka nu chuan engvangin nge ka nu diktak chu a venhim a ngaih a? Chuan, eng inzawmna nge in neih hlawm a? Engmah hi ka hrethiam lo, ka â mai dawn. “ Ka ti nghat nghat a. 

Call a dawng a, “Aw” a ti bung nghut a. A ngaihthlak vang vang hnuah, “Aw le, ka rawn haw ang” a ti a. Ka melh no lo khawp mai. “Ka pa a nia, min biak a duh a.” Tiin min rawn en a, a mitmeng chu a tîm deuhin ka hria. “Aw haw rawh” ka ti hmak. Thlah pawh ka thlah lo. Ani pawn min thlem leh î a tum chuang lo a niang, bakah a pawimawh hmel sia, eng emaw tak a ni ngei ang le. An chhungkaw chungchang buaina pawh a ni thei, keia lo buai ve chiam a ngai lo ve. Lehkhazir mood-ah ka awm thei tawh si lo va, ka mu daih. Mut lah chu a chhuak der bawk si lo, Duhawma lah a reh hmuk bawk si, ka va be hmasa duh teuh bawk si lo. Mami te bula sawi êm chu ka nu te a kankai thil a nih avangin ka hreh si. Eng emaw thil inphûm chu a awm alawm, Duhawma hian Chhawrpiala ka nu hi a hria mawni le. Âaa..min ti â takngial dawn, crime ka ngaihthlak nasat nen engmah chu ka chhui dawn thiam lo. Ka tlaw lutuk chu ka inngei rum rum mai. Engtin tin emaw ka muhil ve thei ta hram a, ka mumang lah chu a ṭha vak lo,. Chhawrpiala ka nu leipuiah Seni leh Berhpuia te nen kan lo feh a, thlam namthlaka kan thut laiin vau aṭang hian nu Pari leh ka nu Chhawrpial zawk hi an rawn lang hlawl mai a, favah hriam hmel zet nen min rawn panin min thah duh hmel an pu ni maiin kan hria, kan hlau lutuk chu kan tlanchhe ta a, ka hmaa tlan Lalseni tlu thlawrh chu kaihthawh tumin ka zuk kun a, chutihlai tak chuan ka hnung atangin min rawn nem dâwrh mai a, ka tlu hnawk mai. Tichuan, ka harh zui nghal, dar 6 a lo ri lek lek tawh a, muhil leh thei tawh hek lo le, ka tho ta ringawt. Tui ka lum laite chuan eng dang mah ka ngaihtuah thei lo. Ka mumang leh nizan kan boruak ringawt chuan ka rilru a luah mai. Zing lamah hi chuan chaw kan ei tlem thei nasa, pawisa a uiawm bawk nen, Papuii nen tiffin pai tawh ang kan tia, ka pai a. Cindy ten min hmusit leh ang chu aw, a ho sih sah êm mai. Duhawma hnen atangin dar 7:30-ah morning wish ka dawng a, ka seen ringawt. Ka phur thlawt lo a ni ber. In kan chhuahsan hma deuhin min lo call ta nge nge a, ka la lo thei lo. “Kan tho nuam vak na nge? “ A rawn ti surh surh te chu ka ngei hlur tawh. 

“Eng nge i duh?” Ka ti mawl tawp a. 

“Nangmah ka duh che. Thinrim chunga class kal a ṭha lo a nia” a rawn ti a. 

“Ka thinrim lo” ka ti hlar chu a nui hawk riin a zui nghal. Ka ner nâwng ringawt. “Ka tihpalh. Chuan, zaninah ka thawi dam vek ang che.” A rawn ti thluam a, ka e aw liam ringawt. 

Vawiin chu Cindy ten min ṭawngkhum vak lo, an zia a zawi riau, Hlimi erawh a inla thawveng lui ka ti mai, mahse, nidang a pha bik lo. Mami nen kan haw rual a, kan in pengah chuan ka beisei loh tawpin ka nuteii (Hruaii) leh Pa Hminga te an lo ding reng mai. Mak ka ti nasa, ka nuteii lah chu a dam that hmel viau lehnghal a. “Awii, eng nge in tih?” Ka ti hlut mai. 

Nui sâng hian, “In in luah kan rawn hmuhpui ve dawn che u, a pawi em?” Pa Hmuna zawk chuan a ti a. 

“Teuh lo, lo kal r’u, a hla tawh lo” ka ti sawk sawk a. Kan kal ho ta a. “Engtin nge kan in te in hriat zawk?” Mami chuan a ti a, “Ka û kan va zawt a, he lai lawkah hian kan pa hmelhriatte an lo awm ve bawk nen, in in luahna pa kha an lo hre lutuk a” ka nuteii chuan a ti a. 

Thingpui te kan lum a, “Kan veng a inhlat sia, in lenpawh a har dawn em mai, kan veng lamah rawn insawn daih r’u, “ nuteii chuan a ti mawlh mawlh a. Duhawma pa pa Sanga’n an in hnuai ber min sawi hmuh kha ka hrechhuak zawk, tunah chuan thil tih chi pawh a ni tawh lo, Nu Pari hrawn a hautak palh ang. Ani hi a reh ta riau mai,.engtizia nge mawni dawn ni. 

An awm laiin Duhawma call ka dawng ta tlat mai, pindanah ka luhpui a, “Ka lo peng zuai ang, zana i ei tur ka rawn dah zuai ang. “ A ti sawk sawk a, a dah zui daih si, ka nuteii te an awm tih pawh ka sawi hman lo. Aa.., an inhmuh vena chance a ni mai. Buaithlak. Kar lovah kawngka chu kik lem loin a rawn hawng a, a rawn lut ta. “Ehe! Inlêng in nei elo?” A ti hluai a, ka nuteii ding zawk chu a va melh zauh bawk. “Nia, ka nuteii te an nih hi.. “ ka lo ti vat a. Ka nuteii hmelhmaiah danglamna nasa tak ka hmuh avangin ka en tawn chhen ringawt. “Hey,nute, ka thianpa a nih hi, Duhawma, Hmingduhawma a nia. “ Nuam ti vak lo hian ka ti ban chhalh a. Harh thut niawm tak hian nuteii chuan, “E aw, ka hmuh hnu a ang lutuk a, ka lo hamhaih deuh alawm. “ A ti nawk nawk a. Duhawma pawh a ngawi rûn ringawt. Boruak chu a nuam lo takzet, Pa Hminga pawh chuan a hrethiam ve a niang, “Kan va haw tawh ang e, hei rawngbawl pawh a hun dawn” tiin a sana a bih zauh a. Nuteii pawh a che sawk sawk mai,. Chelh hman pawh an ni lo. 

“Ti nge? Eng nge a awmzia? Ka nu nen khan in inhria mi?” Duhawma ding reng chu ka melh a. A phu zuk mai. 

“A..aw hria e. Ka hria alawm. “ A ti nghut a. A eitur ken chu dawhkanah a dah nghal, ka tui tih em em black bean noodles pawh  bur 3 a rawn keng. Eng eng nge ka hre chiah lo. Hetiang hian zanah ka rilṭam thin tih a hriat vang hian eitur min leisak ve ziah. A hausa tho a, ka inthlahrung buai peih vel lo e a. 

“Engtin nge i hriat a? Ani pawh khan a hria chein ka hria. “ Ka ti a. A sana bih zauhin, “Kal leh nghal mai ka tum, kan vaipa a rawn thleng tawh a, inbiak lawk kan ngai sia, Vanlal..hawnah ka rawn bia ang che.” Tiin a chhuak nul nul, min tihrilhhai viau a ni. Mahse, ka thinrim lem lo, ngaihthat loh riauna erawh ka nei deuh. Ka nuteii nen an inhmachhawn dan kha, eng emaw a awm tlat. Engkim hi ka hriat a ngai a ni. Mami paw’n, “I nu leh U Dawma kha an va inhriat tawh hmel ka ti, hei ka sawi thiam dan chuan inhmu lo rei tawh inhmu thut ang hi ka chan, i hrethiam em?” A ti malh malh a, ka lo bu nghat nghat ringawt. 

Sangtea nen an inbiak zui tak avangin kei pawh pindanah lutin ka nu ka call ta nghal a. 

“Nu, Ka bialpa hi engtin nge i hriat? Dik takin han sawi teh” ka ti nghal thâwr mai. A thaw hap a, “engchu i hria ni maw? Teh hluai zel che hian.” A rawn ti kual a, “Sawi vat mai rawh, eng emaw ka lakah hian in thup a ni. Min hrilh vek rawh” ka ti nghek a, ka awm hle hle thei lo. “I nu Pari khan min rawn hrilh mawle. “ A ti zawi sep a. Ka chhing sawk mai. “Nu Pari kha ka hre ngai lo i ti sia, dawt vek a ni maw min lo hrilh a? Engvang nge?” Ka ti leh tuar a, ka awmdan chu ka sawi thiam chiah lo. Ka za vek ni maiin ka hria. A aw a thian kharh a, “Nia, dawt ka sawi khan chhan tha tak a nei alawm. Zanah kan sawi dawn nia,i u a rawn haw” tih leh phone dah a rual a. Ka la duhkhawp lo nasa asin le. Mahse, ka u hriat ve a duh ka rin loh avangin ka nawrlui duh rih lo. Mami te bulah chuan pangngai taka awm ka tum lui hram hram, a hah pawh ka hah. Chhana chuan min chîk deuh nge, “I nuamsam lo mi? I cool riau” min ti a. “Ka pum hi a nuam lo riai riai reng a,.” Ka ti ta ringawt. Zan hun a ni ka nghahhelh ni, mahse, kan in a zim sia, duh angin thil kan sawi thei dawn lo tih ka hriat avangin, chhuahna tur chhuanlam ka dap ru reng a, a vâng ropui si. Tihngaihna awm hek lo le, Sangtea rawn luh hnu lawkah ka nawmsam loh chhuanlamin ka mu ta daih a, Vanneihthlak takin Chhana pawh Lawma te inah a leng phei ta hlauh mai. Dar 7 leh a chanve velah ka nu chu ka call leh ta a, Duhawma chu a la reh rih, a pawi lo daih zawk. 

“Lo phili sek lo la, phone atanga sawi chi pawh a ni lo” ka nu chuan a tidam diai a. 

“Ka hre duh a ni mai, ka hriat hma loh chuan ka awm hle hle thei dawn lo.” Ka ti tlat mai si, ni e, zep ṭît ṭêt neih hi ka ning alawm, thurûk ngah deuhte bula awm pawh hi ka thiam hlawl lo. 

“Aw. Anih leh eng ber maw i hriat duh chu?” A ti ta nge nge a. 

“Ka hriat ve loh thil, ka laka inzep ruk tlat hi ka hre vek duh” ka ti hap a. 

“Aw..Pari nen khan kan inhria alawm, mahse, khatia min rawn zawh lai khan ka hrechhuak thei tawh lo tak tak, tin, a thlalak ka hmuh pawh khan ka hriat hnu chu ang ka tia, ka hriat dan ka hre chhuak thei tawh lo. A chhan chu i nu jail a tan hma daih khan, Aizawla kan zin ṭumin i nu hian  Pari  chu min hmelhriattir alawm, ka hmuh hmasak berna a nia, kha bak ka hmu zui leh tawh lo a tin ni. Pari kha i nu thawhna dawr neitute fanu a nia, a fel teh asin, chutihlai chuan..” a ti ta a. Thawk pawh thaw ṭha ngam lo lekin ka lo ngaithla a, mak ka ti tulh tulh. “Chu! Ka nu leh Nu Pari te chu an inhria a maw?” Ka ti nghek a, Mami te hriat ka hlau leh si, ka hmui ka hup hnuhnawh ringawt. 

“Hria e, Jail atanga a chhuah hnu, nangmah a rawn tlawh ṭum che pawn, ‘U Pari’n eizawnna chu min ngaihtuahsak dawn’ te a tia..Mahse, tikhan a chanchin kan hre lo zui vang vang a, pasal a neihin min rawn hrilh hre ve a, phone te kan la leklam lo nen, mahse, kum 2 liamta velah khan i nu nen chuan kan inbepawp leh thei ta a ni. Engtin tin emaw kan khaw mi te hnenah ka number hi a lo nei a niawm e. I hriat miah lohin kan inbe pawp ve reng reng thin alawm. I rilru ka hriat loh avangin Aizawl in awm dawn pawn ka sawi duh ta lo a nih kha, amah i nu ngei pawn i huat a rin vang leh a pasal leh fate rilru tur a ngaihtuah avangin inhriattir rih loh che kha a duh a..” a ti a, a khuh zui bawrh bawrh. Ka han nghak leh tê tê a,. Tunah chuan ngaihthlak bak tihtheih ka nei rih lo.

“Mahse, Pari’n min rawn be ta hlawl mai a, Nang leh a fahrawn inngaihzawn thu kha a rawn sawi ta a. ‘I fanu hi a inthiarfihlim lo a nih chuan, Hruaii tunhma nun zawng zawng hi a pasal leh fate bulah ka sawi ang a, ka fahrawn leh kan pa pawh ka hrilh ang. Chhungkaw zahawm tak an nih vang leh thlahtute lam an chhui thin avangin Tei hi mo atan an duh dawn lo. Tin, Hruaii pawh an pain a then bawk ang. Tichuan, a awmdan tur chu i hrethiam mai ang’ tiin min rawn vau a. A tirte chuan ka thinrim nâk alai a..mahse, i nu dinhmun ka han ngaihtuah a, tunah pasal fanaute nen hlim takin a khawsa ve tawh si, tichuan, i nu ka be leh a, thil awmzia ka hrilh chuan a hlauthawng ta em em a, Pari sawi anga Duhawma leh nang chu inṭhentir turin min ngen ta a. Ka nau a nia, dinhmun chhe taka a din leh ka hlauh êm vangin tiang khan ka rawn ti mai a ni e. Engvangin nge Pari chuan a mo atan a duh loh che erawh ka hre bik lo.” A ti charh charh a. 

Ni e, engvang nge ni ang? Ka retheih vang em ni ang? Nge falak ka nih vang? Engmah ka hre lo. “Ka nu leh nu Pari chu thian an ni emaw ka tia” ka ti lawi rût a. 

“Pari kha mi vervek tak a nih ka ring, khatia pasal hausa a neih atang khan i nu chu hmelhriat loh ang hmakin alawm a en chhoh tak, i nu pawh a lawm lo teh asin. Mahse, sawi leh sawi hnu i nu nunhlui leh chetdan, jail a tan dan zawng zawng hre vektu a nia, a do lêt ngam lo a ni ber. “ A ti a. Ka thin a rim hlur mai. Nu Pari chetdan chalâk tak chuan ka nu min khawngaihtir. 

“Nu Pari te dawra a thawh laiin mi jail-ah khan a tân?” Ka ti a. 

“Ka hre chiah lo, a thawk lo a niang, damdawi an mansak danah eizawnna a nei lo a nih hmel,.” a ti ve mai a. “Jail atan hnua min rawn tlawh atang chuan in va inbe lo rei awm em em ve, nangni pawn zawn chhuah tumna in nei lo mi?” ka ti deuh hmuk a. 

“Nia, phone kan kawl ve si lo va, biak pawh ngaihna a vâng em a ni. Bakah a jail tan hmain i puin a lo tuithlar tawh nen..” a ti ringawt. Ka nu vahvaih dan tur vel ka ngaihtuah chuan ka khawngaih thar kher mai. Nu Pari pawh ka hua,. Engtin emaw tak ka la thungrul ve ang. 

“A nih leh nu, ka nu kha mi inah a awm in ti sia,nu Pari te dawrah a thawk bawk sia, eng nge a awmzia?” Ka ti ta daih a, “Aw a tirah te chuan mi inah a awm alawm, a awmna te an tha vak lo kha Pari te hi an thenawma awm an nia, zan laiah a awmna ten a hnawhchhuah avangin Pari pate hian lo khawngaihin an inah an awmtir a, awmpui dang an neih tho vangin tikhan an dawrah an thawhtir a niawm e. Nakinah hetiang hi chu i nu i la zawt zawk dawn nia. Ka hre thui ve lo. Hei i pa Vuana nu kha a boral a nih awm chu, ka va lang ve lawk ang e. “ A ti duah a, a dah zui daih. Rilru a tibuai hrep mai a. Chunglam ka melh vung vung a, ka phone ka hum nghet hle tih ka hre thei. 

A rang thei ang berin nuteii kha va hmuha va kawmchian a ngai a ni. Nu Pari, ka nu leh nuteii te hian inzawmna an nei vek a, mahse, ka hriat chhuah tur ber erawh Duhawma nen inṭhen tura min duhna chhan hi a ni. A dik a dik chuan ka nute hi chuan min duhpuia min lawmpui zawk tur niin ka hria. Engvanga Duhawma chu do nge an nih hriat vat ka ngai, chu chu ka nuteiin min chhan theih loh paw’n Nu Pari’n chhanna min pe thei ngei ang. 

Dar 10 velah Duhawma’n a rawn call zuk a, ka lak lawk loh vangin ka muhil tawh emaw a ti a niang , a dah leh daih a. Ka call back duh ta lem lo, hmaichhana engkim sawi erawh ka châk tawh takzet. Zinga ka phone ka en chuan, “Savate, muttui suk suk aw. Kan laklawh rei deuh a, sorry. Zing thawh nuam” tih chu ka chhiar nui vur vur. Zingkar mood on nan chuan a tawk viau mai. Nizan lama ka boruak hîp a rih tehlul nen, vawiin erawh ka zangkhai viau a, ka insiam lai te chuan ka zai rât rat mai. “I va nuam leh tawh awm ve, nizan lamah dawng thlum deuh ni maw?” Chhana chuan nui ruh ruh chungin a ti a, “Chutiang chuan ngai mai r’u,. Tak taka ka tho nuam angreng a” ka ti a. Mami’n kan tihdan thîkin tiffin a pai ve leh ta, sum save nan a pawimawh ve tlat,. Kan haw ve ṭep tawh bawk nen. Taka lal Seni te kha kan haw hunah law law inkutsuih turin an inrem ta kha a nia, kan inbe reng tho naa boruak dangin min chimbuai nasat deuh avangin ka ngaihsak tha vak hman lo. Kan haw hmain a thuam chhawm tur vel lei pahin a rawn zin dawn tho a, ṭhianah ka ṭan ve ngei a ngai dawn a ni. Mami leh Seni te hi an nute unau an nih vangin ṭhiana a ṭan dawn loh avangin Mami chu a vui dawn lo bawk. Thianho groupah theme neih ve te pawh kan rêl kha. Lawi âr ruk kha chu ngei ngei kan tia, hmeichhe lamin lawi âr an ru ngai em tih erawh kan hre law. 

“Vawiin chu presentation kan nei dawn a, inbiakna hun ka nei vak dawn lo a, zanah ka rawn kal ang. A tha tiraw?” Duhawma msg chu nui var var chungin, “I thu vek alawm, boss” tiin ka va chhang a. Chutianga ka tih ngai loh vang chuan mak a ti deuh maithei a ni. Ni e, phurna mak tak ka nei tlat a nih chu. A mak tak tak a ni. Kei pawn ka hrethiam bik lo. 

Cindy te hi an chimawm ngam tawh lo nge an peih tawh lo zawk, an zia hi thlak an tum ve te pawh a niang. Min tibuai ngai ta vak lo,. Chawhnuah thawt lawk awm hauh loin ka nuteii te veng Khatla lam panin kan tlan ta vâwk vâwk mai. Ni e, ani hi ka hmuh ngei ngei a ngai. Ka hrilh lâwk chuan chhuanlam a siam ka hlau a ni. A fanu ka nih takzet chuan sawi lawk lova ka va kal pawh a thinrim ka ring bik lo. Ka kal tih tumah midang ka hrilh lo bawk. Kawngka chu ka kik karh karh a, reivak loah a kalhna ri takin a rawn hawng ta a, amah ka nu Hruaii ngei a ni. A meng phâwk hle, zawhna mitmeng hian min melh a, “Rawn hmuh lawk che ka duh a. “ Tiin ka lo nui sâng a. A sawmna pawh nghak zo loin ka lut zui hmiah. Midang tumah an lo awm lo va, hei hi ka duhdan chiah a ni. Ṭhu rawh min tih hmain ka ṭhu chawt a, ka hmazawnah thuthmun a rem a. Boruak chu a rit ngawih ngawih a ni ber e. 

A insum thei ta lo nge, “Eng nge i duh tak?” A ti ta nge nge a. Kei pawh ka lo inpuahchah ang kha ka ni bik hlek lo. Sawi ṭan dan tur ka ngaihtuah leh ruai tawh. Ka aw thian kharhin, “Engkim ka hre tawh, Nu Pari nen in inhria tih te, a vau dan che te, engkim ka hria a ni “ ka ti chat chat a, ka aw chu rin aiin a fiah. A nui hak a, ka va melh kâwk, chutah chuan a ni ka nu mitmenga ka hmuh chu nu Pari mitmenga ka hmuh vervekna bawk kha a ni. Nu Pari hian a thluak a su hneh hle tawh emaw a hlau hle emaw a ni thei. Ka zâm tur a ni lo tiin ka infuih sauh sauh a. 

“Chuan, engtin?” A tih chuan ka bangbo deuh a. “Nu Pari’n Duhawma nei lo tura min duh chhan diktak hi ka hre duh. “ Ka ti thâm chhal a. “Ka hre bik lo” a ti teh tawp. “I hre ngei ang, engkim i hriatpui a ni lawm ni? A bul aṭanga a tawp thlengin” ka lo ti ve vat. “Hre teh nang, Pari hian engkim zawng zawng min hrilh bik hleinem..” a ti ban chhalh a, “A nih chuan zawhna dang ka nei tho alawm. Ka pa hi tu nge a nih ka hre duh a ni.” A mit taka melh chung chuan ka ti a. A chhing sawk mai, “Min pai hma khan eng ang nun chiah nge i hman ka hre duh bawk. Jail atanga i chhuah hnuah khan engvangin nge min hnuchhawn leh? Ka pu pawh a dam tawh lo va, ti nge ka nu ni siin i kal bo leh?” Ka ti ta zawt zawt a. Hrehawm tih hmel deuh hian min en a, “Engkim kha ka thiam loh a ni e, chu chu hria la a tawk mai” a ti bah nawk mawk a. A kun tlat bawk. “Tunah chuan i tan hlauh tur a awm hleinem, Duhawma bulah pawh ka ṭobul engkim ka hrilh tawh. Nu Pari hi i tan a hlauhawm loh, i hun kal tawh chu hun kal tawh a nia, engmah tihtheih i nei hek lo. Chuvang chuan rilru thar nen engkim hi hmachhawn tawh rawh. “ Ka ti mawlh mawlh a. A ding hluai ringawt, mahse, a thu leh vat a. “Duhawma nen in inkar lam chu sawi theih ka nei lo. Mahse, Pari hi hnaih suh, mi hlauhawm a nih hi. “ Sawi zawm duh nei niawm takin a ang leh zuau a, a sawi ta lem chuang lo. “Pari hian i lakah eng nge a tih? Nute, i chanchin hi a bul atanga hriat vek ka duh a ni. Khawngaihin,. Kei chuan huatna che ka nei lo, min piantir duh ve avang khan ka lâwm zawk asin” hnukulh lek lek hian ka ti a. 

A ngawih vang vang hnuah, “Duhawma chuan a nu case kha a chhui thar leh em ni?”, a ti ta daih a. “Aw mahse, khalam chu engmah ka hriatpui ve lo.” Ka ti sap  a. “A nih Duhawma khan min hria em? “ A ti leh a, an inhmuh dan boruak vel ka ngaihtuah let a , “Aw hria e” ka ti sep. 

“Tak tak maw? Chuan engmah a la sawi lo em ni?” A ti leh hliai, “Sawi lo. Sawi tur eng nge a neih? Min han hrilh teh” ka lo ti nghat a.

“Engtin nge a sawi tur ka hriatpui bik ang. Thingpui ka’n lum ang e” tiin a tho nalh a, thingpui chu a va lum ta daih a..

Ka lungawi loh chhan hre chuang si lo hian ka lungawi lo ve ringawt. Mahse, ka sawi thiam chiah si lo. Ka nu lak atanga ka chhanna dawn te chu ka duhkhawp lo a ni ber ang chu, mahse, han zawh luih vak dan ka hre bawk si lo. Hetia ka va pan ta rawih hi a lawm vak lo tih erawh ka hre thei. Ka pawisa duh bik lo a ni. Thingpui a rawn chawi phei a, kan in dun a. “Nu Pari nen chuan in inbe leh tawh em?” Ka tih chuan, “Be lem lo. “ A ti ringawt a, “Ka hrechhuak tawh che tih a hria em?” Ka ti lehzel a. “Hria ang. “ A ti duh chauh. “Eng thil sual lian tham tak nge maw i lo khawih tawh le? Engvanga hlau em em nge i nih a?” Ka inrin hmain ka ti tuar. Ani pawh a phu zawk mai. “Engkim i hriat tawh chuan ka hlau hran hleinem..” dam dap hian a ti a. Ka thinurna sosang ta hluai pawh a kiam duak thei. “Duhawma leh kei kan inzui hnu lawkah nangin min hmuh i duh a, ka nuin Duhawma then turin min ti bawk. Heng zawng zawng hi Nu Pari’n a vau vang che a nia, Duhawma nen hian lo intawng ta lo ila nang chuan min hmuh pawh i tum dawn miah lo tihna a nia. Tin, nu Pari chuan Duhawma ka neih a hlau em em a, nang thlengin a hnuktel ve che a, chu lai tak chu a chhan hriat ka duh a ni. Nang hian eng thil nge i lo tiha pawi engzat nge i lo khawih tih hi? Tin, Duhawma ka neih vang hian eng nge chân tur a neih? I rinthu talin min chhang rawh” ka ti zui leh ta mawlh mawlh a. Ka lungphu pawh a rang at at ngei mai.

No chu dawhkanah a dah tê tê a, min rawn melh zawkin chhuat lam a bih leh daih. “Pari chuan a vahnu nei se a duh ber alawm. A nuṭapa fanu..a chhan chu pu Sanga rosum leh pai, in leh lo engkim saw Duhawma neih a hlau a, a vahnu a neih chuan a duh angin thil a kaltir thei dawn a ni mahna. Chu chu ka chiang lo va, inthentir a duhna chhan che u nia ka rin a ni. Chuan, i hriat angin ka hun kal tawh chu sawi nawn fo tlak pawh a ni lo, tuna ka pasal hian ka tunhma nun engmah a hre lo. A hriat ka hlau em em bawk,. Mahse, nakinah engtin emaw a la hriat tho tho ka rin vang leh Pari ka nin ve tawh em vangin keimah zawkin kan pa chu engkim ka hrilh ta vek a, ka beisei aia a lo pawm thiam avangin tikhan hmuh che ka duh ta hial a nih kha. Khang thil vel Pari’n a hriat tak avang khan chaw in lo ei zan pawh khan min rawn ankhum leh hrep a, ka awmdan pawh a dik loh reng kha. Mahse, ka lakah tihtheih a nei tawh chuang lo. Duhawma i then leh then loh chu engmah sawi theih ka nei lo,.” A ti ta dap dap a. 

“ Chuan, i chanchin ka hriat loh zawng zawng te kha min hrilh la ka duh, nakinah mi kâ atanga hriat ka duh lo. “ Ka ti leh a. A ner nawk chu ka hmu reng. “Hriat kha a ṭulna a awm tawh hleinem. I hriat avag khan hrehawm i ti sauh zawk ang. “ A ti tlat si. Engtikah emaw chuan ka la dawp chhuak em em ang. Ka hre ve châk a lawm, chu chu a pawina ka hre lo. Ṭawng tuma ka an zuau laiin Mapuia school bang a rawn haw ta hlawl mai a, ka ṭawng tur pawh ka ṭhulh leh ta mai. “In va bang hma ve , vawiin chu” Nuteii chuan a ti sawk sawk a, keimah zawk min rawn en daihin, “I lo leng a law? “ Tiin min nuih var var a. “Nia, i nu hi a dam tha si lo va, ka lo kan a” ka ti ve mai a. Pindanah a lut zui nghal. Kei pawh eng han sawina khua kaw tawh hek lo le, ka haw ve ta a. 

An in kan zawn ṭuma min kawhhmuhtute dawrah khan ka peng a, nu fel tak a ni ngei ang, min lo la hria a. Nepnawi te chu ka dawr ve a, “Hmanni khan in zuk inhmu thei maw? In bei kha a dawn hmel tawh lutuk a” tiin a nui hawk hawk a. “ Hmu thei hram e, a ni lo lamah kan zawng rei lutuk a” ka ti ve mai a. “I haw dawn mi? Khawiah nge in awm?” A ti khawmawi ve leh a, ka sawi chuan, “Tikhan lo nghak rawh, ka bungraw tlem rawn dah pahin kan nau a rawn thang mek alawm, i hmang nghal daih dawn nia, kawngpui han chhuah chhoh ai chuan” a ti suam suam a. Kawngpui pawh nan step thui zet zawh a ngaih avangin kei pawn ka hnial lem lo. Kuhva te chu min ṭheh a, ka ei vak lo naa ka sawi ta lem lo. Nu tawng duh ve tak chu niin ka hria, “Pu Hminga te chu an dam tha maw? An nu khu a hrisel lo riauin ka hria a, hmanni pawh khan chhul cancer te kha an tiin ka hria” tîm ru deuh tho si hian a ti a. Pu Hminga zawk kan zawng ni turah a ngai a ni ngei ang, a thusawi chuan min ṭhawng lutuk tih hria se nuam a ti lo ngawt ang. Intipangngai hram hramin, “A ni maw? A va zia lo ve, kan zuk kal lai kha chuan a tha viau khan ka hria a. Mahse, nia dam tha pangngai hmel chu a pu chiah loin ka hria” ka ti ve a. 

“Heta an rawn awmna hi a la rei lo va, nikum kum tawp lam khan niin ka hria, mahse, Pu Hminga hi a fel khawp a, Kohhranah a inhmang si, an nu tak hi chu a zin deuh reng mai hian ka hria, in rawn zawn hma kar pawh khan mi pahnihin an rawn zawng tawh” a ti leh mawlh mawlh a, ka rilruah nu Pari a rawn lang nghal. Kei aia hmuh hmasaka vau kha a tum ngei dawn tlat. 

“Pu Hminga maw an rawn zawn ve” ka ti satliah a, ka bengkhawn ru em em thung. “Umm, mahse, Pu Hminga kha zingah an hna thil vanga a zin tur kan dawrah hian a rawn peng a, an nu a awm tho ang tiin ka lo kawhhmuh ta tho a. “ a ti ve mai a. A nau sawi kha a rawn thleng ta a, parcel eng eng emaw an hlan thlak hnuah kan tlan zui ve ta nghal a. Ka rilruah engmah a awm rih lo. 

Mami te pawh an lo bang tawh a, engmah min zawt hran lo. Sangtea nen an inhauh thu a sawi char char, Sanga hian zu in hi a ching ve leh zuk zel a, chu chu Mami hian a duh hlawl lo a ni. Duh chi pawh ni nghal lo chuan,. “Bakah a zu in chu thuhran, eizawnna kawng lam hi a hawi lo lutuk a, kan innei dawn emaw dawn lo emaw puitlin lam zawh ve se ka duh. Hetiang renga a awm chuan a ngaihna a awm lo” a ti tân tân a. An inngaihzawnna a la rei loh ngaihtuahin an inhre thuk a, Sangtea te hian ei chawp dawr neiin kan in chhak lawkah an awm a, an dawr atang vela inhre chho, inngaizawng ta kha an nia. An hausa le lû lo naa a vantlang tawk vel an niawm e. Sanga hian zirna a chawlhsan tawh a, a nu hman loh changa dawr a nghak hi a ni ve mai a, Mami lah rilru puitling chi hmalam hun thlenga lungkham mi a nih avangin khitianga awm tawrh chu a ngaithiam lo a niang. Hnem vak dan ka hre lo e a. 

Ka inbual laia ka rilrua awm chu, nu Pari hmuh a ni. Ani pawn a duh hunah min hmuh a duh thu a sawi ve tho a, ka sawi ngam loh bikna ka hre lo. Hmu ila, ka nu lo vau tawh lo tur te, engkim ka hriat vek tawh thu te leh Duhawma nen kan inkara inrawlh tawh lo turtea tih ka duh, nasa ka inti ru hle, mahse, ka nu thleng thlenga a fahrawn nen kan inzui tak vang maia nghawng tha lo a neihtir hi ka rilrem hlawl lo a ni. Ka thiam loh lah a awm hek lo, ka nu thiam loh pawh a ni hek lo. Tupawn nunhlui kan nei vek, kan sawi chhuahsak avang hian hlawkna kan neih phah lo, nu Pari pawh tunah chuan a buai ru ve tawh viau ang, engkim kan hre vek tawh si a, kawng dang vak a nei tawh lo. 

Duhawma nen insi rialin kan thu dun a, a eitur rawn ken te chu eiin thu ho mai mai kan sawi. Sangtea leh Mami an intihthinrim rih avangin Sanga pawh a rawn leng lo, Mami lah kan bula awm ve reng a peih lo a niang, a mu ta daih a. An intext leh hrep tho ang. Chhana pawh a chhuak lo, pindanah a awm thung a. 

“Vawiin chu ka nu ka va kawm a. “ Tiin bul ka tan a, ka chungchang a hriat vek tawh tho vangin ka sawi tîm lem lo. Ani pawn ka thusawi chu ngun takin a lo ngaithla a, zawhna pawh a nei hran lo. Ka sawi zawh chuan, “Judy pa leh nu Pari te hi chu unau dik tak chu an ni lo, 1st cousin chu an nia. Ka nu thih hma daih, kei pawhin nikhua ka hriat hmain ka pa hi kal pek ngaiin a awm a, Judy pa sawn a kal a pe alawm. Ta ṭang khan kan inpawhna leh chhungkhatna a tha zual a, sumdawnna lamah an kal dun ta zel bawk a, an cousin lahin ka nu ai a rawn awh ta bawk nen, ka pa pawn chuvang chuan Judy nei turin min ngen a. Inremsiamna tih vel chu engmah a awm lo, a awm kha ka ring lo bur bawk a, ka pa chuan min hriatchian avangin min nawr na ngam lo, Apain ka pa kâl a pek vang maiin Judy neih hi ka ba lo bawk. I nu rindan chu a dik ang, rosum a duh luatah a thu thua a dah theih tur hmeichhia chu nei turin min duh a ni mai..” a ti nghut nghut a. Ka lo pawmpui hle. 

“A nih i nu case kha engtin nge ni zel ta?” Ka tih chuan a chal a chuar nang a, “A khirh lai ber ka thlengin ka hria. Tu emaw zawn ka nei a, ka la hmu fuh thei lo a nih hi.” A ti a. 

“In awmpui kha maw?” Ka tih chuan a bu nghat a. “A hmel i la hre thei mi?” Ka ti leh a, “Hre thei e, a hmel a thlak te a nih loh chuan ka la hre thei” a ti ban chhalh a. 

“A nih ka nu nen khan engtin nge in inhriat?” Ka ti ta a. Nizanah khan min pehhelna ngawt a zawng kha a nia, tunah chuan min chhan ngei a ngai tawh ang. A aw a thian kharh a, “I nu Pari hmu turin kan inah a rawn kal tawh alawm. Vawi khat mai pawh ni lo, vawi tam tak. “ A tih chuan mak ka ti lutuk lo. “Tunhnaiah maw” ka ti leh kher a, dawhtheih loh hmel fahran hian, “Aih, a rei tawh mai, a hmel kha a la paih vak lo a, ka la hre thei. Chuan, tun hnaiah chuan amah i nu Pari zawkin an inah a va hmu” a ti ta a. Chu erawh mak ka ti deuh. Mahse, ngaihtuah chhuak leh vatin, “Umm, ka hrethiam, vau turin a va hmu a nih dawn chu.” Ka ti a, a bu ve nghut ringawt. 

Dar 9 rik hma deuhin call a dawng a, a hmel a ngui nghal vek, hlauthawng takin ka lo en reng a. Phone a dah hnuah, “Ka pi kha a thawhah vangin damdawi in an panpui leh a nih chu, ka han lan ve loh chuan..” tiin a ding uaih a. “Khawi hospitalah nge?” Ka lo ti vat. “Ebenezar-ah, ka kal ang aw. I hman remchan hunah lo va kan ve la” ngenngawl deuh hian a ti a, “Tehreng mai, a ṭha leh vat turah ngai ang” tiin ka lo hnem ve sasawi a. Ka hmuia rawn chuks zauhin a chhuak zui ta nghal. 

Ha ka nawh suah suah laiin Mami a rawn tho a, “Lalnunsanga ka ngeizia hi chu aw, ka titau e tih chhuanlamin zu a lo in leh hram a nih awm chu. Lalvena’n min hrilh leh vek sia, ka va haw tak” a ti hlak hlak a. 

Ka kam ka ṭhuah leh te te hnuah, “Nang pawn tha deuhin hrilh la, i hau nghal hlawk hlawk zel a, a la naupang ve tho nen,. “ Ka ti ve ngial a, “Thinrim chhuanlama zu in hian thatna pakhatmah a nei lo” a ti ngal ngal mai. Chhana pawh chuan rawn zun pahin, “In inbe lo thei chuang si lo, inhau ve sek lo teh u. In ninawm” a ti ve hluk hluk. Dik chiah mai. 

Khuma ka mut tawh hnuah ka nu nen kan inbe zuai a, nuteii ka va hmuh dan vel ka hrilh nel nual a, “A pawi loh chu, tikhan engmah zep leh î awm lo khan a hahdamthlak zawk. “ A ti ve mai a, “Lo zin chu i la tum em? An in chhak dawr nghaktuin a chhul cancer thu velte a sawi a nia aw” ka ti leh pawp a, lo thluaithlum ve awm ka ti rilru nain ka thiam lo. 

“Nia, chuvang chuan rawn hmuh hrim hrim chu ka duh. Ka inthiam thei dawn lo” a ti sap a. A laizawn neihchhun a ni a, a rilruah a thih ka ring lo. 

Zanin ka mumang erawh a mak dangdai ngei mai. A sawi pawh ka zak zawk..Fb-a zawhna an post pakhat ka chhiar kha ka mangphan a nih ka ring. Englo a nia..”Mumanga tu emaw nena lo mu dun ang taka awm hi eng nge a awmzia?” Tih a nia. Comment thenkhatah chuan an uang thuang viau a, mahse, a tam zawk chuan, “Mangpui a nih kha” an rawn tia. 

Chutiang Mangpui niawm tak chu ka mang ve a nih chu! Mahse, kan mu dun hman lo,. Tin, mipa chu tu nge a nih ka hre lo, hmuh pawh ka la hmu ngai hek lo. Chhungrilah ka zak ru chem chem mai..hehe..