Hmingduhawma 7

HMINGDUHAWMA (7)

Ziaktu : Toni Râlte

“A tlân a? Ngati nge?” Ka ti hluai a, za vak lova nuiin, “Ka hre vek bik lo, ka pa nen an inkar thil vang a nih hmel. Zanin chu test in zo tawh bawk a, in pathumin Falkland-ah Denisa birthday lawm ang u aw. Ka rawn hruai ang che u. Dar 7 hmain lo inpeih ula, ka dah rih a nia” a ti zung zung a. Teh ngawt zel hian aw. Mami bula ka sawi chuan, “Awii, nutling tawh a ni sia, han tlan chu a inhmeh lo e” a ti niah niah a. Birthday party vel ka sawi chuan a phur leh hle, Mami hi huau huau lâwm ve chi, mahse, over taka sahâwk chi erawh a ni lem lo thung. Ṭhiante nena han lam luih luihte hi nuam a tia, amah aiin Lalseni a phur fâl zawk ziah thung. Chhana chuan eirawng a lo bâwl fel diam tawh a, ani pui hi pasal tlak a ni, in chhung chet pawh a peih roh lutuk. Mahse, u Sawmi hian a sawi ve ziah a, awihawm ka tih ve deuh chu, “Mipa ngaihsam leh che felfai lem lo, han hnawk deuh niaih ho hi hrawn an nuam zawk, ânkhum pawh an dâwl zawk, chutiang ni lo mipa che deuh thlip thlep ho chu an chîmlîm a, hrawn an nuam vak lo, sawisel tur an hre duh bik. “ A ti thin. Ngaihtuah chet chet chuan a dik duh hmel angreng, mahse, mihring azir a ni mai. Duhawma hi an inah engang mizia nge a neih thin ang aw..

Chhana chuan Lawma sawm a duh si, a inthlahrung bawk si chu Duhawma ka va dilsak leh tê tê a, “Mami pawh khan a bialpa nui bâl deuh kha sawm ve rawh se” a rawn ti deuh kher a, Lalmami a tûm vei bâr mai. Sanga hi a nuih a zat laklawha a han nui tak tak hi chu mizoin a nui bâl kan tih tak tak ang chiah hian a nui thin a, a nui hi kan lo nuih lehchhawng thin, huat chi a ni hran lo bawk a, bakah amah hi fel tawp chi, kaihhruai nuam deuh mai a nia, Duhawma nen pawh an kum inrual ni lo mah se; an inkawm nêl thei nghal mai. Mami pawh chuan a va sawm ta var a, Ever ready a ni bawk a, mahse, bike lo keng suh kan ti tlat. Chhana leh Lawma te inphur se, keini pathum chu Duhawma motorah a ni mai. 

Inchei dan tur ka hre lo ngang mai. “Awii, Te, birthday party-ah kan kal dawn a, gift pawh kan pe ve dawn lo mi?” Mami’n a rawn tih hlut takah chuan, ka harh zawk. “Awii, ni dawn tak. Engmah keng lova kal mawl ve tawp chu,. A mak e, Hmingduhawma pawh chhunah te khan sawi awm” tiin ka phun hlak hlak a. Chhana chuan, “Dawr inhawng a la awm ang. Kan lei mai dawn nia.” A lo ti ta hlauh. Kar lovah Hmingduhawma pawh a rawn thleng ta a, ka lo chhuahchhal nghal, “Chhunah te khan sawi tur a nia, present tur pawh engmah kan lei hman hleinem, dawr inhawng a la awm em?” Ka ti bawrh bawrh. 

“Insum insum, khatiang ka hriat vangin kan zavaia pek turin gift ka lei vek tawh. Kan aiawhin nangman i hlan hnâp dawn nia” a ti a. Mami lah chuan, “Remhrepa..” a lo ti chiam, ka thawl huai naa, “Keima puala pek te pawh ka duh ve maithei sin” ka ti sap a, a nui tha duh vak lo. Kan inpeih ta bawk a, kan chhuak ta dial a. 

“U Dawm, van sangah tih kha play teh, boruak nawmzia hi” Mami’n a ti har har a, he nu hi hla thar leh lar te hi a hre hmasa fâl nalh zel, kei hla ka ngaihthlak ve thin hi chu, “Ṭhing tawh e” a ti thei deuh zel. Bzi tochhawng hla ka ngaithla ve zeuh zeuh a, mipa zai phei chu Jonathan Lianhna leh Zorema te bak ka ngaithla meuh lo. Ka va gospel em em chuang lo. “A thuhrimin Denisa chuan min sawm tel ve mi?” Ka han ti leh rih a. “Ka kutah a dah, i duh duh zat rawn hruai rawh a tia” a ti nghut a. Hmalam a bih ran bawk. Denisa te hi a nu leh pa hna nei ve ve an ni bawk a, an neinung hle. Sum lamah chuan an phâng khât viauin ka ring. Tuna kan party-na tur hi chu Denisa nu û te restaurant a nia,. A changkang ngang mai. Zaithiam lar an lo sawm tel ve nual bawk a, kan phuisui ngei mai. Ka incheina chu ka sit lek lek hial, an nalh hlawm mai sia maw,. Mahse, a tu amah chuan min care tehchiam lo a niang, awm chu a nuam zui ve ta mai. Zaithiam Lalsangliana, Rsa, Mawimawia te bakah Siampuii te ho an rawn che hit ngang mai. Denisa te hian sum an seng tam awm mang e aw, anni ho hlawh ringawt pawh hi a tam dawn ropui si. Boruak pawh a nuamin ei leh in tur lah duhthusam,. Mahse, Cindy te rawn lan hnu chuan boruak a dang ta deuh, an kai deuh chiai tih a hriat a. Mahse, midang awm ve te pawh an kai chhâ deuh vek tho,. Min hmu ang tih hlau ru deuhin ka hawisawn zeuh zeuh naa Hlimi’n min rawn hmu ta hlauh mai, Cindy leh Jenny a kheuh zeuh chu ka hmu reng. Mami ka kheuh ve zeuh tho. Zâm lo zet hian an rawn kal phei a, Duhawma erawh Denisa nen an kal hran lai a ni. Ka hmaah tak Cindy chu a rawn ding a, hmai thal haa min enin, “Eng nge in rawn tih ve a? Sawm in ni ve mi?” A ti sak sak mai a. Ka zâm duh bik lo. Eng nge maw ka han zâm tehlul ang le..

“Denisa sawm kan nia,. Buaina i nei mi?” Cho zet chuan ka ti ve ta ngat a. 

Hlimi’n, “Awii UDenisa hi Denisa a ti nia, a chal tawh awm rem rem, ka rindan vel a ni” a lo ti a, a nui lui vak vak bawk. Kan nui ve duh der si lo, “U Denisa te nen in inhre ve ngawt ami a? Ka û te nen in inhriat ve vang khan lo intitlangnel vak suh..Mikhual akara thingtlang khua lehnghal..” Jenny chuan a ti hlang hlang a, a hmui pan leh a ṭawng hlang hlang hi a inhmeh riau. 

“Hre ve deuh reuh e,amah zawt ula, buaina in nei a nih chuan “ ka lo ti ve leh hmak. “Hetiang event-a inchei dan tur pawh i hre hi hê lo ni maw? Ah! Sorry, i nei phak dawn lo tak” a hmui hup zauh hian Cindy chuan a ti leh a. Mami’n a lo la na ve ngang a niang, “In thawmhnaw ang kha chu nei pawh ni ila kan ha duh chuang lovang,.” A lo ti hmak a. Kei lahin ngeiawm tawk lek hian, “A nalhna in pholang tawk lo, in inhmeh lo nasa sia” ka lo ti. An la na ngang ngang teh e, Jenny phei chu a meng ling hlar tawh. An mawipui lo ve lulai êm a ni. Model te chuan ha se an mawipui ang, an feng chhing si, an chawn a tawi bakah a sek ṭung mai a, Hlimi phei chu a dul a kiarin a mawng a zuih ang ṭâwt a, Cindy lah a hnute chang a lian a, a awm aṭangin a pian chu a intiat thla vek bawk. Jenny chu a zia ber zawk. Ani pawh eng teh ual a ni lo. 

“Khatianga min ṭawngkhum ngam tur kha i ni em mawni le aw..ve mai mai che hian” Cindy chuan ti hlakin, Chutihlai tak chuan Siampuiii Ralte a rawn kal phei a, “Thla lakpui ve ang” Mami’n a tih avang chuan kalsawn mai ka tum a, Hlimi chuan a ke a rawn dawh zauh a, ka lo hmu mai lo nen, ka pal ta a. An duh dan ang ngeiin ka tlu bawkkhup ta thlawrh a, vanduai asiamin a bul dawhkan khuhna chu ka ham tel avangin dawhkana an hun eitur leh in tur thenkhat chu a tla keh ta chhuai a. 

“Ṭhing ve leh,. Kawng en ta hi hê che. Thingtlangnu” Cindy aw chu a ring ṭha bawk a, kan lam chu an rawn hawi thup tawh mai. Inbeng fai mawlh mawlh chungin ka ding a, “Insual ila” ka ti ta thawr mai, Ka mizia hrechiangtu Mami’n min rawn chelh vat. Hlimi chuan, “A ve khanglang a che..” tih leh min ben tumin a rawn phar chhuak a, a kut ka lo mansak chat, kei aiin a thau naa ka hlau chhetê lo. Tleirawl laia insual hrat tia lar hat kha ka ni tlat. Mi ka hauh ṭah aiin ka velh ṭah an tam zawk, ka sawi tawh kha, ka hau thiam lo. Ka ṭawngkam thiamnain a daih ve lo. 

A kut chu ka dahthlaksak a, ka la che duh chuang lo. Ka sir atangin Cindy chuan min rawn kek ta chawt chawt a, Hlimi’n a rawn pui ve vat, “Aw le” tiin ka insangphek a, anni high heels bun, tluk hlau leh an kawr chhiat hlau reng reng chu khawih let an har lo nasa, Cindy awmbawr chu ka ṭham nawk a, a ṭhi fual zeta a awrh chu a chat hmawk, a kapah ka pet zui ta ṭawk a, Hlimi chu ka nam dawrh a, a petek nawk nawk, tluk chu a tlu êm lo. Midangho chuan min rawn ṭhelh rang êm a, duh angin ka che hman lo. Thisen a lum ṭan dawn chiah asin mawle. 

“Zawngi, hmeli, i va han zaktheilo ve a. I va han châk dawn lo tak..” Cindy chu a rak hlut a. Ka sam ka lo tuai mam khum hmak. “I ṭha em? “ Duhawma ka bulah a lo ding run tawh. Jenny chuan, “Mam, kha nu kha a zaktheilo khawp mai, party boruak a tikhawlo vek. Khatiang hmelhriat neih kha i zak lo mi?” A lo ti hlaih hlaih a. 

Duhawma chuan min kai a, “Hawh, tu emaw hmelhriattir tur che ka nei a nia” tiin min kai hrang daih. Mi pakhat aw lian deuh hian, “Le..lam i thai ṭan tawh ang aw. Zalên leh hlim tlang takin aw niang. “ A rawn ti luah luah a, kut beng riin a zui nghal zat. Kei erawh Duhawma min hruaina lamah ka zui det det zel a, Restaurant chhuahsanin cottage niawm tak kawngka chu a hawng a, tumah an awm lo. Mak ka ti deuh. “Tu nge min hmuhtir tur chu?” Ka ti hû a. 

A khi suk a, “Tumah,. Hetia ri hut hut hriat lohna hmuna nangmah nen chauha awm ka duh a, tin, bengdaih i ngai bawk. I la lum vet vet” tiin ka biang a rawn chul a. Ka hmui ka tipawrh vak ringawt. 

“Palliam mai mai rawh ka tih kha, khin tham an ni lo. “ A ti leh a.

“Ka khing duh alawm, bul an rawn ṭan hmasa a nih kha. Ka inkhawih tui dawn chauh a, min rawn thelh hlawm a, ka ngei tak tak a ni” ka ti hlak hlak a. A nui hawk hawk, “Savatê thinrim hi a duhawm hmîn hmên reuh lutuk” a la tizui..”ninawm, tiang khan ti ziah suh, ka zak zel a nia” ka ti a. A nuih a za tulh tulh ni berin ka hria. 

Khumah chuan kan ṭhu dun a, a fawhte pawh kan infâwp ve e. “Zu i in ve ni maw?” Ka ti hluai a. “No khat ka in ve a” a ti satliah. 

“In tawh suh” ka lo ti vat. “Ka in tawh ngai lo, mahse, zanin kha chu thiante ngaih tihthat nan ka lem ve mai mai” a ti a. “A hmain i in thin mi?” Ka lo ti leh hê háw a. Min chhuk melh run hian, “Zu ngawlvei dam leh ka nih hi” a tih chuan awih harsa ka va ti tak.

“I taksaah zu sulhnu vel a va awm si lo” ka ti a, “Ka inenkawltha alawm. Nakinah kha lam kha chu sawi ang, vawiin i nu nen in inhmuh dan report ka ngaithla duh” tiin a thu mu a, a mah ngheng turin min pawt mu ve nghal zat bawk. 

Kei pawh chuan thuawih takin ka nu kan va hmuh dan chu kimchang takin ka sawi ta mawlh mawlh a, “Thla te in la dun lo mi?” A tih chuan, “Awii a nachang kan lo hre miah lo” ka ti hluai a. “Sunday tlaiah chaw kan ei dawn alawm, nakinah chuan ka la hruai ve ang che, inhre ve hrim hrim r’u” ka ti sar sar a. “Lutuk tlat.. “ tiin min kuah hlu hlu a. Denisa call a dawn avangin kan chhuak leh ta a, boruak tihdaih a duh vanga min hruaichhuak daih a ni tih ka hrethiam ve mai. Ka thlavâng a hauh pûng pûng lo naa, a farnu Jenny leh a thiante a ngaihpawimawh lohzia leh anni aia a tana ka pawimawh zia a pholang khan min tilawm tawh hrim hrim e. Cake an zai tawh dawn a lo nia. Denisa bialnu Mimi’n cake chu a lo order sak vek a, a mawi uchuak hle. Cake an inbarh lai chuan kut kan lo beng tliar tliar a, “Nichin khan rawn chhan che ka tum a, U Dawma khan a hruai ta daih che sia” Denisa nau Kimi chuan ka bula rawn din pahin a ti sar sar a, ka lo hmu miah lo va, ani nen hi chuan kan inkawm thei fû mai. Midang an cousin dangte chu hmun danga an awm nual bakah ka kawm rual loh an ni deuh fur a, kan inhre em em lo. “Nia a zia lo tak tak a ni, i û pawh a lawm lo ngawt ang, thupha min lo chawisak rawh aw” ka lo ti ve vat a. “A lâwm lo lovang, Jenny te thianho hi a mil bik hleinem, nun over lutuk hi an nei a, ka ning a nia” a ti hlaih hlaih a, a tira kan buaina hre pha chinte kha chuan ka thiamloh vek a nih lohzia an hriat ve tho ka rin avangin insawithiama inphatmar vel ka tum buai peih lo. Party lah chu an la uar dawn chauh a nih hmel a, an zaithiam sawmte an rim khawp ang, an sawm deuh reng mai si a. Zai thiam ve hi ka châk thei lutuk, mahse, ka chemkalna a ni lo tih ka pawm hmui hmak. Ka aw hi a ṭhing riau a, a per hlei mai bawk si. Phone sas uar laiin kan la nau êm a, khatih laite khan lo hmang ve tawh ni ila chuan a tam zawk chuan ka aw avang pawn min hnawl ka ring. Chutiang vel chu a ni e. 

Dar 11 a ri dawn hnai tawh a, Cindy te pawh an la lam uar hle, zai leh lâm lam chikat ta na nâ na chu kil khatah ka ṭhu ngawi reng a, Duhawma lah chuan betu a pui a ngah si, “Tumah min inhmelhriattir suh aw. Ka peih lo” ka tih sa avangin tumah a rawn kalpui lem lo. Nuih der vel te, sawi tur dap chawp rengte kha ka ning alawm. Mami leh Sanga te pawh ka piah lawkah uar ve fù hian an su nghawng nghawng mai a, Lawma pawh a zuang zak zak mai. Hawn lam ka rilruah a awm tawh, mipui ri nuaih nuaih hian ka lung a tizîng hma em em a, a tirah han sahâwk ve deuh mah ila a rei a, ka ningin ka hne leh vat zel. Ka rualpawl lohna a nia, intihluih vak theih pawh a ni lo. 

Duhawma rawn phei ka hmuh rual rual chuan, “Haw ka duh” ka lo ti nghal ngawt a. Sana a bih zauh a, “Hmm, naupang mut chu a hun ve tawh reng mai. Hawn mai pawh a pawi lo “ tiin a hawi kual a, Mami te pawh inkai rialin an rawn phei a. 

“Kan haw tawh mai dawn mi le? Naktuk class kal a la ngai sia” Mami chuan a ti lâng lâng a, ka lo tuihnih vat. Tichuan, Denisa va hmu ve lehin lawmpuina kan hlan sap sap a, a bialnu Mimi chuan min lo en duh ngawhg mai. Kimi pawh a bialpa niawm tak nen an la lam tui hle. Ka va mangtha duh ta lem lo. Duhawma car-a ka lut tur chiah chu Cindy hian, “U Duhawm, va thlah vat la, lo let leh vat rawh” a rawn lârh lârh a, chhan tum lova luh mai a tum ka va hmuh chuan , “Chhang ta che” ka va ti hlar a. Khi suk chung hian, “Lo enjoy r’u, kan leng dawn a,. Bye u” tiin a kut a vai zauh a, a lut nghal. Ka va hawi let ve leh hram a, ka runluih châk ngang a niang, uar fê hian ka bân ka vai a, ka luhsan ta hmak. An sa lehpek ang chu aw. Ho e, nuam ve lawm le. 

Mami paw’n Cindy te nasa a tihzia a sawi leh hrep, in kan thleng a, “I va kal leh dawn mi?” Ka ti a. “Mut hahdam ka chak zawk, naktukah Lengpuiah kal a ngai bawk sia,. Ka mut dawnah ka lo call ang” tiin ka chalah a fawp zauh a, a tlan chhuak zui nghal. Sangtea pawh a haw tlang a, hmai pawh ka phih peih tawh lo. Ka eng emaw ti chauh riau ringawt. “Awii kei chu Jenny zawk hi ka chum awk châk, inla ve sia, amah vang hrim hrim pawh hian U Duhawma hi then miah suh” Mami chuan a ti char char a, ka nui ka nui ringawt. Duhawma nena inlaichinna kan lo nei ve ringawt hi mak ka la ti fó nia! Khawvel dang daiha awm ve ve ang hian ka inchan thin. Mahse, inânnna kan neih teuh ber chu kan nu diktak nen nen kan chengho lo ve ve hi a niawm e. Ani chu a nu a boral tawh a, chu pawh thah ngei niin a lang, ka nu erawh la damin pasal fanau nen hlim takin an khawsa a, a lawmawm. Duhawma erawh a nu thattu hre châk reng rengin hun a hmang thin a niawm sia. Nu Pari hi chuan a tihduhdah ngam ka ring chiah lo va, Jenny te unau pawn an zah lo ngam hauh lo bawk ang. A sawi ang ngei khan a mu tur chuan min lo video call ta ngei a,party-naah a kal leh nge kal leh lo rawn tihchian a duh ni hmiang ka tia, a kal leh ta lo tih ka hria erawh ka lâwmna a ni. 

A tuk class kan kal chu Cindy te an rawn lang lo, nizan lamah an nawi ve deuh nen, an rit lûk dawn sia a peihawm loh ve ang. Ruihtheihthil hi kan khuaah a hluar ve lem lo bawk a, sahdah hi pawl 7 ka zir kumin ka hmuam ru ve tawh a, ka helh nasa mai, ka sim daih. Meizial erawh thianhoa kan awmkhawm chang hian mipaho zuk lai han pak ve hluah hi ka ching thin. Zu angah ka inngai lo a niang. Kan khuaah zu zuar an awm lo va, a in duhte chuan an in tur an thlawr mai zel,. Damdawi ruih theih phei chu ti an awm pawh ka hre lo, khawpuia han awm bo  vang vangte pawn an han ching lem lo a nih hmel e. Amaherawhchu, ngaihdan nghet deuh mai ka nei ve a, Ruihhlo ti pawh nise mihring an nihna angin zahawmna an nei ve vek a, inzah lo leh inhmuhsit lutuk ang hi ka haw bur. Tin, ruihhloa fihlim, Rilru kha tlat, thîkna, îtsîkna leh duhâmna te, rinawm lo, ba ngaihsak miah lo angte hi ruihhlo ti te nen an danglamna ka hre lo, ruihhlo ngawlvei te vanram lut lo tura kan ngaih ang chiah hian anni ho pawh hian vanram an luh ka ring chuang lo, leiah an lang zahawmin an felfai a ni thei, rorelna kan hmachhawn hunah erawh lei lama ropui leh lansarhna hian min chhanhim dawn lo. Vanlalsailova hlaah pawh ‘Thinlung a thlir zawk thin’ tih kan hmuh kha..pianthar hi a harsa lo, lazai palchah ang lek alawm te hi kan tia..kei zawng harsa ka ti ee. 

Sunday zingah min bialtu Upain Pathian ram a rawn khawn pahin ṭawngṭaina a nei thlap a, a thlamuanthlak thin e. Tukin chu vawksa kan hmeh ve tlat ! Zep thu a cheng lo, kan hmeh khât angreng, sangha kan lei tlangpui zel a, keini tan chuan a tlawm tlawm kha a tui a ni mai. Chaw pawh kan ei rei viau mai. A manhla thin e. Inkhawm bana kan han tawi khawmuang chu KṬP hruaitu thenkhat ten, “Ti nge? Tun hnai hi kan va hmu khât che u ve, in haw mi?” Min lo ti sap sap a, “Haw lo ve, test kan nei kal ve reng a, kan han inkhung ve deuh mawle” Mami’n a lo ti var a, keini ang kan lan leh lan loh an lo hre chat thei chu an fakawm ka tiin hruaitu tur diktak an nih hi ka ti rilru a, member kan tam tawh a, a naran keini angte chu min hriat reng pawh ka lo ring vak lo a ni. Chawhnu inkhawm erawh lungrual takin kan ṭhulh leh ta phawt a. Ka nuteii ( ka nu min hringtu kha aw) te ina chaw kan ei dawn vangin bual pawh kan inbual hma hlawm a. Ka inbual zo ka inthlak laiin u Fela ṭawng ri ka hria, “In chhuak dawn mi?” A ti a. 

Mami’n a lo chhang vat. 

“Ti nge hmanni khan min hawnsan kher a? In sual ve e” a ti lung lung a. Awmhmunah ka lo nui. A ngai haw lo tih ka hriat takah chuan ka awm a nuam sawt. “Hawnsan loh chi ni hek lo che u,. Nang pawh ti nge i va reh ve, i awm ngai lo mi?” Mami’n a lo ti leh a, sunday hmasa atang khan kar tluanin kan hmu lo rêng a, an inah hian kan lut zen bik lo bawk nen, bakah sawi tawh ang khan test kan neih kal reng vangin kan chhuak vâk lutuk lo. 

“Sihphirah ka han riak char char alawm, isikut ka rawn hawn nual khi, rawn la ve r’u,.naktukah pawh chhoh leh a ngai maithei, patea in sak khi vilpui loh chuan a ngaihna a awm lo. “ A ti mawlh mawlh a. Ka va chhuak ve chu min lo melh chat, “He nu lah hi sual lutuk mai. “ A’n ti nghal ngawt a! “Hmm, i sual fe aw” ka ti ringawt. 

“Tak taka hmanni kha chu a zia lo tak tak a ni. Zing atang khan ka nawr a, khaw lum leh ni sa nen, ka incontrol thei lo a nih kha. E chuan, ka lem lawk dawn nia. “ Tiin no a va la zuk a, a kekawr kawng atangin a senchi half a phawrh a, a thli zui nghal. An in kan luah a, kan tan han sawisel leh khap kha a nuam vak lo. Bakah a tih fo dan a nia, buaina a siam ngai chuang lo va, keinin kan lo inpui ve pawh a ni hran lo bawk a, kan enliam ve mai. 

A tlak pup a, “Khawiah maw in kal dawn?” A lu thing nur nur chung hian a ti a, kan chawhmeh bawma sawhthing ro tawh lam chu a va thel mual mual bawk. “Hei, Tei nuteii te inah chaw kan ei dawn” Mami’n a tih chuan ka lawm hle. Ka ṭobul hi a nazawngin hre kilh kelh lo se ka duh zawk. “Nuteii i neihte chuan i va sawi har si ve” a ti ta roh a. 

“Aa..hmun dangah an awm char char a, hmanni lawkah an rawn awm ve chauh alawm” ka lo ti vat a, dâwt ka sawi thiam ber a la ni ngei ang. A awih ve a niang chu, engmah min zawt zui lo. 

Duhawma pawn ka nu te ina chaw kan ei tur thu a hre tawh a, “Va thlah che u ka duh tehlul nen, Lengpuiah chuan ka zu kal lawk a ngai sia. Nidangah aw” a rawn ti vei thluam. Lo kal rih lo mah se pawi ka ti lem lo. U Fela chu a remchang bawk a tiin, “u Fel, min va hruai zawk la, hawn lam chu kan lo inngaihtuah mai ang” ka ti a. 

“In pa a awm lo mi!” A ti deuh kher..”A hman lo va” ka ti ve mai a. “Tak taka ka û te nupain Central jail kal nan an hmang daih alawm, kan makpa nau hi a tâng ve a, an zu kan a. Kei pawn ka pa scooter a nih hi hman ka dil char char” a ti ta a. Mahse, hmelhriat a ngah tho bawk a, a thiante min biaksak ta hlauh. 

Nuteii te in kan va thlen chuan an lo kim thap a. Mateii chuan salad a lo siam mek a, Mapuia erawhin vawksa a lo chan mek thung. Nuteii chu a nawmsam loh hmel riau hian ka hria, eng emaw kaptu nei niawm tak hian a thaw leh hawk thin a. Chu chuan kan boruak pawh chu a uap deuh. Pa Hminga erawh a ṭawng leh suam suam a, “Nakinah ka nu te pawh i la hmu ve ang chu, i pi ve tur tho alawm a nih. “ Te chu a la ti tak deuh deuh a, a fanu ang tak takin min ngai a, ka lâwm a ni. Nuteii chuan call a dawng a, pindanah a va be ta daih. A rawn chhuak leh chu a hmel a dur khap mai a, kei chuan ka chîk êm a, Mami te chuan an hriat ka ring chiah lo. Taka..ka sawi hmaih pakhat chu an in kan zawn hrep ni khan ka nuin a number min rawn pekah khan ka call nasa, a switch off tlat vang a nia khatia rei iak kan zawn buai ni. Ka call nawn leh ta lo reng reng a, a number min pek hi a dik lo pawh a ni maithei.,”Hmanni khan ka lo call nasa a, i off tlat sia” ka ti thuphung a, “A ni maw? Ka phone hi ka switch off khat asin, a dik lo a ni lo maw?” A ti a, a hmelhmai landan chu thup tum tih hriat takin a nui lui hram hram bawk. Ka han sawi chuan, “E! Khate chu top up ka neih loh vangin mi phone ka hmang a, ka û bulah pawh ka number pangngai zawk ka sawi reng sia, a hre leh pek lo em mawni le. “ A ti niah niah a, “Tunah i number chu lo sawi la, ka lo save ṭha ang” ka tih avangin a sawi a, a hmaa a number anga ka nuin min pek pawh kha ka delete ta chuang lo. Zanriah ei hmain Pa Hminga’n ṭawngṭaina a nei a, a phak ang tawkin Pavalaiah a inhmang ve viau a niawm a. Committee member te pawh a ni ve, nuteii erawh sumdawng tih takah a inhmang hman lutuk lo a niang,. 

Eirawngbâwl pawh an thiam hle. Mi ina chaw ka eia ka ei tui ber ṭum a niawm e. Mateii lah a titi siam siam reng a, “Nakinah i hman veleh lo la leng la, a riahte pawh i lo la riak ang chu” ka ti a. Chhana paw’n Mapuia chu a kawm thiam viau. Engkim chu a ṭha vek mai, ka nu awmdan tih loh chu. Vei a nei a ni ani hian. Keimah vang nge thildang vang zawk ni ang aw? 

Dar 7 bawr velah hawn lam kan hnaih ta a, an nupain kawng thleng min rawn thlah a, kan invai liam ta phawt. “I nu kha a nuamsam vak lo mawni le. A awmdan kha” Chhana’n a ti ta chiah a, a lo chîk ve tho a nih hmel. “Nia” ka ti ringawt. Kan sawizui tawh lo. 

“I nu te chu an lo ṭha em?” Ka bula thut pahin a ti a, “Umm, mahse, a nawmsam loh hmel..chuan, Nu Pari chuan eng nge a sawi?” Ka lo ti. A khaw tlân kha nizanah a haw a niawm a, a tlan rei kha ka ring lo reng a ni. A nui huk a, “Ka bulah te eng nge a sawi vak ang?” A ti hû a. 

“Aa..a thinrim hmel em? “ Ka ti ṭâlh. 

“Ka hre vak lo, ka chîk lo va. “ A ti ringawt, ka zawt zui peih tawh lo e a. Thingpui ka lum laiin nuteii hnen atangin call ka dawng a, “Hello” ka ti vat a. 

“In thleng tawh maw? Vawiin kha ka ṭhat loh a chhuak leh deuh a, duh ang pawn ka lo dawngsawng thei lo che u a” a rawn ti ṭiah ṭiah a, a mu a ni ngei ang. 

“A ho lutuk. Kan chaw ei pawh kan puar lutuk, lo ṭha rawh,.” Ka han ti ngawt a. Eng natna nge a neih ka hre chiah lo, ka nu lahin a sawi lem si lo va. “Ni e, naktukah hian ka incheckup leh dawn mawni ka tia, i pa hian min kalpui thei êm ang chu” a ti leh a, “Civil-ah nge, private-ah” ka ti vat, kan inhriatchhuah tawh hnua an theih ang tawka min duhsaktute an nia, ka hman phawt chuan buaipui ka hreh bik lo a ni. “Dr. Muanpuia hi ka pan thin a, a clinic-ah ka kal leh mai ang ka ti. “ A tih chuan, “Kei pawh ka hman maithei asin, dar engzatah nge?” Ka ti a, “Dar 2 aṭangin a ṭhu thin a, class i kal a ngai ang chu, kan pa a awm alawm. A ngai lo” a ti thliam a. “Test runpui kan zo tawh a, kan la zir tha em em hleinem, ka hman phawt chuan ka rawn kal dawn nia, ka lo bia ang che.” Ka ti ta a. Kan inpawhna a tha sauhin ka hria. Ka lâwm ve em em mai. Nge mawle ka nu a ni miau a. 

Duhawma bulah pawh ka sawi ve a, “I tan chance a ni mai, college-ah min lo lam la, han buaipui ila, Muanpuia clinic pawh ka hre ve hleinem” ka ti surh surh a. “Aw le pi ber. Mahse, i nu bulah, ‘Ka bialpa a nia’ i tih dawn loh chuan ka duh lo” a ti tlat a, “Aw ka ti ang, ka ti lutuk ang” uar fea ka tih chuan kan nui dun hawk hawk. 

“Hey, lo ding teh, hman zan khan i intithei hle mai maw? I nihna diktak hi hrilhfiah i ngai a nih hi..Zokhawnu” Cindy chuan min rawn pawt her lawih mai. Papuii pawh ka bulah a awm ve. Mak a tih hmel ngang mai. Mi dang kal mek leh thu ve hote pawh an rawn hawi thup ni maiin ka hria. 

“Eng nge i duh leh tak?” Ka ti zâng vah a. 

Ka inrin hmain ka hmaiah a rawn beng a, a thip ve det. Ka ben let ve a inring tih ka hriat avangin ka che duh mai lo. “Keimahah hian buaina i nei em ni? Sawi rawh le” ka ti chang leh fak a. 

“Aw..nei e, ka bialpa hi lo zarbuai ve tawh suh. I phutawk hre rawh, u Duhawma te angte lo ngaihzawn ngam reng reng, Thingtlang khaw pilril atanga rawn zir ve mai mai i nih hi, i dinhmun leh a dinhmun chu lei leh van aw. “ A ti hlawih hlawih a, tu emawin a lo on-hrep a niang, a thinrim dan em em hi. 

“Hmingduhawma em ni i sawi? Ahh..ka zarbuai ngai loin ka bialpa a ni sa reng alawm. Chu chu i pawm a ngai, ani tan chuan hnawksak leh ninawm i ni. “ Ka ti ve ta sak sak a. Min ben leh a tum chu lo thle zauhin a khabeah dâwmin ka hnek ta bur mai. A dak awrh a, a petek chu Hlimi’n a lo chelh vat. Thinrim aiin ṭah chhuak hmel a pu, “I duh duha kut min thlak thei i ni lo ve. Buaina ka duh lo,.min tibuai zui tawh suh. Kei thingtlang nula hi insualah phei chuan min hneh dawn lo a nia. Hrereng rawh” tiin ka bag ak ṭhain ka kal nal nal, Hlimi zawk a rawn ṭawng zawt zawt a, ka ngaihven lo lui tlat, midang an rawn lan nual avangin nuam ka ti bik lo a ni. Papuii lah chuan fiamthuin, “Nang hi a rukin i lo pa reng lo maw? Tunlaiah transgender an tam sia. “ A ti deuh reng, break lai pawn Apuia nen min fiam kal reng, ka nui ve ringawt zel. Apuia paw’n, “Anni ho hi chu khing duh suh, class xii kha kan kalho tawh a, hmeichhe tam zawkin an ngei rawn thin. Amah hi pangngai takin awm se a chhe lo reng mawle, a â thit thet reuh lutuk a “ a ti ve nuah nuah mai. 

“Ka nuteii inentirpui ka ngai sia, chawhnu 1st ka kal ang a, ka haw dawn a nia” Papuii bulah ka ti sa a. A e aw liam ve mai. Hmingduhawma min lo nghahna lam panin ka chho hlawk hlawk a, ka nu nen nizan mut dawna kan inbiak khan ka kalpui tur thu ka hrilh a, a lawm ve hlein ka hria. Ka bialpa chungchang erawh a sawi lo, ka nu pawh hi a mumal lo, a duh hun hunah ṭhen rawh a rawn ti ngawt zel a, a hnuah a sawi zui leh chuang si lo. Engvanga then tura min duh nge a nih ka zawh chiam paw’n, “Nakinah i la hre mai ang” tih chhanna bak ka dawng ngai lo. Ka zawt buai duh ta lo a ni. 

Nuteii chu ka call a, “Inah ka la awm, i pa ka la nghak a” a rawn tih chuan, “Hrilh leh mai rawh, kan rawn lam ang che. “ Ka ti a. “Tu nen maw?” A tih chuan, “Ka thianpa nen, lehkha i la tawh hrim hrim em?” Ka ti a. “Umm, 6na ka nia, lawk aw. Hei call ka dawng, ka lo call leh ang che” tiin a dah daih. 

Khatla lam chu kan pan ta tho a, reivakloah min rawn call lehin, “Hei kan in luahna te hi an kal ve dawn tho a, an rualin ka kal ta mai, i pa pawh office atangin a rawn tlang ang, lo kal lo mai rawh u. “ A rawn ti ta a. 

Sawi vak tur ka hre lo. Kalpui a duh vak lo a nih ka ring ringawt. Duhawma bula ka sawi chuan, “Kan leng daih mai dawn mi?” A ti ta thên a. “I thu thu” ka ti ta ringawt. Class ka kal tawh lo ta sa sa, eirawngbawl a la hun bawk si lo. Vawiin chu ka rin loh lam daihah min kalpui. Venghluiah a nu nu, a pi kan va hmu a nih chu. A lo upa ve tawh hle mai a, mahse, pitar hmeltha tak a ni. An inpui hi a nu nuṭa naupang zawk leh an naupangber Duhawma nuteii a nih chu, pasal sûn tawh ten an luah a. A lian ṭha hem hawm bawk a, Duhawma te in ai khan a pui daih zawk. A putea erawh a lo awm lo va, a piteii leh a nuteii ten min lo welcome a, A nuteii chu Duhawma nen pawh an inang viau mai. An felin min be siam siam reng a. A putea te hian fa pathum an nei a, a nuteii erawh fa pakhat neiin Shillongah zirna avangin a awm thung. A pi chuan chiang kêk kâwk hian min en a, ka zâm lek lek, “Aw..a Tuaimam, i va hmeltha keu kuau ve aw. Ka tupain duh taka a thlan chu a chhe thei lo hrim hrim.. “ a tih chuan ka nui vur vur a, ka lawm a, ka zak bawk si. “Kan inneih thleng i dam a ngai a nia aw..pi” Duhawma’n a tih chuan ka lo ip deuh. 

Duhawma nuteii chu Nu Ngur tiin ka ko ve mai a, an album te min entir a, Duhawma nu chu a lo hmeltha kher mai. A vanglaia a luckzia te an sawi a, kan hlim ta phian. Kan hawn dawnah a nuteii nen an inbe fâl zuai a, a nu chungchang an sawi a nih ka ring, a buaipui chho ṭan sia. Hma a sawn zel em tih pawh ka zawt ngai lem lo va, a hunah chuan min hrilh ve mai ang chu maw. 

Kan in lam kan pan a, tlan chhung a rei thin, jam vang hian. A rawn peng kawi tawh lo va, kei pawn khawsak ka rel ṭan. Sawi leh sawi hnu eirawngbawl hi ka inringtawk viau lo nen, Dâl ka kang tawrh a, a bak chu an lo haw hunah a ni tawh mai. Anni pawn min phut ngai hran lo. 

“I va kalpui ta lo em ni?” Ka nu a ni. Thil awmzia ka sawi chuan, “Aa..aw a pawi loh chu, a inthlahrung ve a niang” a ti niah niah a. 

“Nu, eng nge a natna ber ni reng reng a?” Ka tih chuan, “ A chhul lam nge mawni dawn ni, ka hrechiang bik lo. “ A ti ve ringawt. Ka ṭawng leh hmain, “I bialpa chu i thlah thei ngang lo a ni maw? Nangni hi tih loh lohte hi in lo ti tawh zawk a ni lo maw?” A rawn ti..ka ner vak ringawt. 

“Chutin a thlah mai theih hleinem, bakah ka tana a that lohna i sawi duh bawk si lo va. “ Ka ti ve tlat. A thusawi hnuhnung lam phei kha chu chhan enah pawh ka en lo. 

“I luhlul ve ngar ngar hle mai. Thla tawp lamah ka rawn zin maithei, i nu rawn hmu ve pahin” a rawn ti leh daih a, “Awii, lo zin rawh. Ngei ngei aw, sibuta lo hruai la” ka ti chung a. “Chutiang ka hman lo, cham pawh ka cham rei thei lovang. Ka dah rih a nia” tiin a dah nghal. Tih tak zeta Duhawma thlah tura min la nawr lo nia ka hriat avang hian ka nu pawh hi ka namnul ve deuh a ni, hmaichhana min hauh teh chuan aw..ka tan pawh a harsa ve maithei. Aa..engpawhnise, a lo zin tur chu ka lawm hrim hrim e. 

Zanah Duhawma ka hrilh ve a, “Ka pi tur chuan min beng nghal ṭhuai mai ang ah..min chhan rawh aw” a ti fiamthu a, “Ti nge a duh loh ringawt che le, chuan engtin nge nangmah hi a hriat teh daih che..hei hi ka hrethiam thlawt lo..” ka rilru kap ru rengtu chu ka sawi chhuak ta rawih a. 

Fiah takin min rawn melh a, thutak zet hian, “I nu diktak puih a duh vang mawle..” a ti zawi raih a..