Hmingduhawma 6

HMINGDUHAWMA (6)

Ziaktu : Toni Râlte

Ka hamhaih leh chiâi lutuk chu Mami chuan min rawn dinchilh vat a, “I hrilh em ni? Engtin nge ka kal tih a hriat?” Ka lo ti nghek, a mak êm alawm. “Hrilh nang, a biak pawh kan inbe lo” a ti vat a, mahse, a phone hum lai melh vutin, “Ngaw rawh, lawk” tiin a phone chu hmet mawlh mawlhin a chek tlat tlat a, inthiam loh hmel deuha min enin, “Awii, ka lo ngaihtuah miah lo, ih, kan thlalakna kha status-ah ka hmang a. A view a” a ti ṭial rian a. Ka thaw a rang nasa mai, vin hrep ka châk viau naa awmzia a awm tawh chuang si lo, hmm, Hmingduhawma reng reng pawh, eng nge aman min kalpui ve mai loh. Ka kal ve châk a ni mai ka ti rilru ta ringawt a, Mami lah a inthiam lo nasa, Sangtea pawh a rawn kal vat a, thil awmzia kan hrilhfiah hnu chuan, “I ngaih hi a sam thei lutuk a, nang pawh hi” tiin Mami chu a melh a, “Aa a ho lutuk, a thinrim rei lovang, engmah ka hrilh lo kha a lâwm lo a nih kha. A âwm ve tho mai” ka lo ti zung zung a, ka zangkhai leh thei ṭêp tawh, U Fela te lah an la sawi tui dawn chauh niin a lang. Heti taka an nawi chu ka beisei miah bik lo asin le. Denisa’n min lo call a, “Ka rawn tlan chhuak dawn chiah e. In pa hi chu a thu ve chiang alawm..” tiin a rawn nui huk huk a, ka ṭhen sak ringawt, ka nuih pawh a za ve lo. Tiang chuan Denisa chu kan lo nghak titih ta ringawt. Denisa lo thlen hma ringawt pawn vawi 3 min rawn call hman, u Fela te an la intibuai zui! Hetiang hian an che nawi dawn tih hria ila chuan ka kal miah lovang mawle. Amah u Fela ber hi a nawi tlat, a ṭhiante chuan an khap hram hram zawk, u Mahuni phei chu a die deuh titih, Chhana’n a kai harh lui hram hram zel a, a zia lo hle mai. Vawiin zet chu an lo pai hnem nge ni sa hian a charge zawk ka hre lo. Nidang an ang tlat lo, ka lo faka an bula ngaihngam taka ka awm thin tehlul nen, u Fela pawh chu ka ngei hlur tawh. Hetiang hian a rui ngai lo asin le. A rawn tlan chak bawk a niang, Denisa pawh a rawn thleng ve hram e, u Fela te bulah, “Ka hawnsan mai dawn che u, naktukah test ka nei sia, lehkhazir ka ngai a. “ Ka ti thuphung a, dar 5 a ri lek lek tawh. Hetiang an nih reng chuan kan thim dawn tih ka chiang. Denisa chuan ka thiante an tel ve tih a hriat vang ni maw car a rawn keng bawk a, u Mahuni pawh chuan, “Hawn ngei ngei ka ngai kei pawh, Buang, Fela hi lo buaipui mai r’u aw, bawihteii piin min lo call leh ṭêp ang” a ti a, nichinah khan, ‘Ka luak harh dawn’ tiin hmun fianrialah a va inkawm luak a, a harh tha tawh viau mai. Ani hi chu sawi tawh ang khan a hunah chuan a inthunun thei zel mai. U Fela lah chuan, “Min phatsan dawn maw? Vanlalhmangaih, misualnu, i hre viau ang aw. “ A ti lung lung a, Lawma leh Sangtea an nui vur vur mai, Chhana erawh a ngawi rûn a, a lâwm vak lo nge ni, “A va â mai mai tak. “ A ti sup mai. Thil dang sawi zui tawh loin Denisa carah u Mahuni nen kan thu lut a, kan tlan zui ta vang vang mai. 

“In haw tawh em?” A rawn ti a, “Aw kan chhuak deuh chiah” pangngai takin ka ti a. 

“Ngaih a ngam ta e, i chin zui loh hram beisei ang” ti dam thlup mah se; a aw-ah chuan hlauhawm a tel tlat hian ka hria, min vau miah lo, mahse, ka tihnawn leh ka ring chiah tawh lo. Chuti khawpa khaw dang daih atang pawha min lo ngaihtuah leh ngaihven chu ka làwm a ni. Ka ngaihlu sawt bawk. In kan thleng a, Denis pawh zanriah ei a hun ruai tawh avangin a let leh nghal, lawmthu ka hrilh ngial a, “U te thu ka zawm lo ngam lo alawm, tak taka Duhawma chu a strict a nia, nang pawn hrethiam rawh. “ A ti a. Ka lo bu nghat mai. 

Zan inkhawm kan tum lo bawk a, chaw pawh kan ei tlai viau. Chhana’n, “Dik tak chuan u Fela motorah i chuang sia, haw kha ka duhna a rei tawh, an bula khatianga chuantir ringawt che kha chu rilru a nuam dawn bawk si lo va. A hun takah inpa a rawn che ta hlauh a.” A ti chuar chuar a. Mami pawn, “U Fela chu a mak ka ti ém mai, a lo ngaizawng ve che a nih pawn sawina hun a tam, i lo duh lo a nih pawn khatianga ruih vak vak ringawt. Ṭhing tlat” a ti hmuar hmuar a. Ka sawi ve vak peih lo. 

Dar 9 velah u Fela te chu an lo haw chauh, a rawn chhuk ta êm lo va, ka thaw huai mai. Mut dawnah Duhawma’n, “Amah Fela ngawr ngawr kha ka hua a ni lo, a endan che ka hriat avangin ka veng che a nih kha, misual a ni lo, mahse, remchang hmu ta se, a harhfim loh miau chuan i ngaihtuahawm a ni. Ka rin loh vang che a ni lo va, i nat ka remti lo zawk a ni. I hrethiam tiraw?” A ti nghut nghut a, “Nia, tiang khan a awm ka ring lo va” ka ti sap a. “Umn, ni sa in do nasa bawk sia, muthilh tum rawh. Thawhlehniah lo hawn ka tum ang. Ka nu case ka buaipui chho dawn a, min support tlat ka beisei a nia” a ti dam dup a. “Tehreng mai” ka lo ti ve vat. Kan inmangtha zui ta a. 

Ka sawi hmaih loh tur chu Reieka kan awm lai khan ka nu nen kan inbe zuai a, ngaihzawng chungchang a rawn sawi rih lo, “Reiekah u Fela te nen kan leng ve a, kan kal ve chak sia” ka ti tlang mai a, dawt hrilh khan a hnuah hrechhuak leh ta se a thinrim zawk ang. Kan chhuak khàt bawk a, “A tha alawm, len harh ve te kha a tha. Zanah ka rawn be tha leh ang che” a ti zung zung a.  Ka dah ta kha a nia. Ka ngaihzawng chungchang a la rawn sawi leh miah lo thung. 

Class kal hi a chang chuan a ninawm ngawih ngawih, taksa nawmsam loh phei chuan, bakah thawmhnaw ber hi nitin a thar ha thei an awm laiin kar khatah kan hak ngai hi vawi khat tal hak leh ngei ngei kan ngai thin, Cindy te lahin mondaya kan hak, nilai vela kan hak leh chu an lo hre chat thin a, tiêl rawngkai lek leka mi ṭawngkhum an thiam ropui si. Ka ning, mahse, neih miau loh chuan tihngaihna awm hek lo le, anni aia thiam tum mai tur. Duhawma pawh a sawi ang khan Thawhlehni-ah a rawn haw ta a, zanah erawh an thlen tlai deuh vangin a rawn kal lo. Mahse, dar 10 velah min rawn call a, ka mu tur ka intihfai lai vel a niawm e. 

“Naktukah inhmu lawk ang hmiang. Test i nei dawn em?” A rawn ti a, chawhnu-ah ka nei tih ka sawi chuan a chek hluk a, “Aw le, ka nghak thei mai ang, naktuk zanah ka lo kal mai ang. Lo hlauthawng lo la aw. Engkim a ṭha vek e” a rawn ti sûrh sûrh a, chutia a sawi avang chuan ka ngaih a ṭha lo letling zawk. A sawi dan kha chuan a nu thih dan case kha thar thawh leh a tum kha a nia, chutih laiin kan pahnih inkara eng emaw chinfel tur a lo awm ve bawk nen, a rilru a buai ve deuh a nih ka ring. 

U Fela kha niminah Sihphirah bawk an zin leh daih a, kan la inbe leh miah lo, kan han awmho hi chuan min ngaihzawn âwm ka hre lo, ka lo phek en ve deuh vang pawh a niang. Mahse, a mipatpui bakah ṭhiannu Mami ngei paw’n, “A melh dan che leh a biak dan che hi chu a dang bik chiang alawm” a ti thin kha a nia. Min lo ngaizawng ru ve deuh a nih chuan nuam ka ti vak lo, an in kan luah bawk nen, mahse, ka thiamloh a awm ka hre hran lo thung. Min bem pawh nise ka chhan ka ring lo. U ang maia ka en, ka thian ni bawk kha a ni miau a. Nilai zingkar tuilum ka in laiin ka nuin a lo call teh tlat a, ka tho hma vak ngai lo tih a hriat avang hian zingkarah chuan min be ngai lo tluk a ni. 

“Teh tlat che chuan” ka ti ta rêng a, “Nia, a pawimawh angreng a, englo a nia. I nu, nangmah hringtu che khan hmuh ve che a duh a.. min rawn bia a” tîm hmel deuh hian a rawn ti ta daih a! Mak ka ti viau. Aizawla kan awm hma leh awm hnu pawh hian ka nu chungchang hi a sawi ngai lo hrim hrim, Aizawlah a khawsa tih ka hre ve a, chu zawng chu a ni. Kum 16 zet ani pawn min hmu tawh lo kha a nia, tun ataka min hmuh a duh chuan chhan ṭha tak a neih ka ring. “Engvangin maw?” Ka ti sap a. 

“Aa..a hriselna lam a ṭha vak lo va, a damlai ngeia hmuh leh hram che a duh a niang. I hreh em?” A rawn ti a, ka ngawih vang vang hnuah, “Ka hre lo, hmu pawh ni ila sawi tur ka hre awm lo, ka danglam phah pawh ka ring chuang lo “ ka ti duah a, zep loh chuan ka lungawi loh vanga chutia sawi duah chu ka ni. Sawi leh sawi hnu min pai laia a dinhmunte ka han hriat kha chuan ka khawngaih ve lutuk, keimah vangin a pa, ka pu ngeiin a tuithlâr bawk a, mahse, tisual mah se; min paih tum bik lo va min pai tlang hrim hrimnaah kha chuan ka fak ve,. Mahse, ka pian hlim hlawt aṭangin ka nuteii fa ang ka ni ta a, ka nu min hringtu hnute far khat pawh hne loin tun dinhmun hi ka thleng ve ta chu a nia, Aizawla kan awm dawna awmna tur buaia kan buai lai te khan ani kha Aizawlah a awm ve tih ka hrechang lo hrim hrim, amah pawh hian Aizawlah ka awm dawn tih a hre kher lovang. Ka nuin a hrilh te a nih ngawt loh chuan. Chuvang chuan tun ataka va hmuh leh kha ṭulin ka hre lem lo, a thi emaw a dam emaw ka thengthâwngah a thawk lem lo e. 

“I thu thu a ni mai, mahse, nangmah hringtu a ni tih erawh hrereng la aw” a rawn ti hram hram a. 

“Ka hria alawm, a thuhrimin in lo inbe reng thin ni maw? Engtin nge a number te i neih theih zawk a..” ka ti mawlh mawlh a. 

“Be thin lo, engtin nge ka no hi a neih ka hre lo, min rawn be pawp tawp alawm. “ Ka nu chuan a ti a. Dâwt a sawi tlata hriatna ka nei, mahse, ka aawi zawm duh tawh lo. “Aw, nia khaw nge an awm reng reng a?” Ka lo ti ta a. “Khatlaah  a nia. “ A ti ringawt a. “Chiang deuh hlekin i hre lo mi?” Ka ti a. 

“Ngaw rawh, nakinah Sawmi hi whatsapp-ah ka rawn dahtir ang” a ti sawk sawk a. A dah zui daih. Ka nu thin hi chu aw. Ka tuilum in lai pawh a lo dai duk tawh alawm le. Ngaihtuahna a châwl lo hle mai, ka nu diktak chu hmuh ve hrim hrim ka châk rualin keimah ringawt chuan ka hreh deuh, Mami tal hruai ka duh. Ka nu thlalak hi an nulat lai bak ka hmu lo, ka nu nen an inkhawm tur an thlalak a ni a, ka nu aiin a sangin a hmel pawh a ṭha zawk. Mahse, tunah chuan khatiang hmel kha a put ka ring tawh lo, ka ngaihruat thiam hek lo. Chaw ei laiin ka sawi ta mial mial a, “Nia, i nu hi a awm ve tih chu ka hria, mahse, nangman engmah i sawi ngai si lo va, han sawi chhuah ka hreh thin a. Chutianga inhmuh a duhte chuan hmuh kha a tha alawm. Nakina i inchhir loh nan,.” Mami chuan a ti siam siam a. 

“Dik chiah, eng mi pawh nise hringtunu te hi chu an danglam ve alawm. Kei pawh Nuteii min chawm seilen deuh ni mah ila; ka nu hi chu ka nu a ni tho tho” Chhana chuan a lo ti ve boh boh a. Kei pawn va hmuh ve hrim hrim chu ka tum rilru ta a, mahse, vawiinah chuan ka thei lo phawt. A lo la thi êm bik nang. Rilru lam chàwl viau lo mah se; ka zir nasa bawk a, test pawh ka tiṭha thawkhat viau e. Ka lâwm ve hle. Kan class-ah hian a thiam pawl ka ni ve deuh zel a, Cindy te ho hmuhsitna tur ka pumpelh ve ka ti mai a, anni aiin han thiam lo lehzel phei ila chuan min ṭawngkhum nasa dawn êm mai. Vawiin pawh canteen-ah an rawn chawl ve teh mial a, ka hriat ngei turin, “Laljenny’n min rawn call nghal alawm, nizan a thlen rual rual khan. Eng nge min lo hawn ang aw..” Cindy chuan a ti lâng lâng a. Lehlam hawiin ka khi sak ringawt. “Zanah va lam ila Jenny kan pahin. “ Hlimi’n support zet hian a lo ti ve a, chutia midangin an hriatthiam ve si loh hmanga min insawitheih khum vel chuan ka nuih a tiza zawk hial. An rak rakin lo rak mai mai teh se a. A naupangchhia êm mai. Mahse, “Cindy chu eng nge i hawn bik a? A va intithei ve” tiin ka va text tho,. A hnu fêah, “Dawr ka chhuahsan fel chiah,. Eng nge ka hawn ang a?” A rawn ti zawk mah a. 

“I hawn angin a sawi sia,.” Ka tih chuan,”A dan ve alawm,. Kan vengah phei chuan ka bialnu emaw an ti fô..awmtir ve mai mai rawh. “ A rawn ti duh lek. 

Zanah chuan a sawi tawh angin a rawn kal ta ngei a. A zin rei loh nen a cher deuhin ka hria. “Min ngai lutuk a, i cher vek a ni maw?” Ka lo ti ve chu a lâwm viau a niang, “Ve ngei che chuan, i va zak lo sâwt reuh tak” tiin min piai zauh. Mami chu in chungah Icon enin a lêng a, Chhana erawh Lawma te inah a riak phei dawn a ni, anni pahnih hi an inkawmngeih khawp a, bakah games an tuichilh bawk nen, Lawma pawh a rawn riak zeuh zeuh. 

Thingpui ka lum a, a sen hâng kan in dun a. “Ka ngaih tawhzia che hi..” a tih chuan ka lo khi sak a, “Kei pawn” ka ti. Thu thlum deuh deuh hi kan sawi ve ngai lo va, ṭul pawh ka ti lo, ka thiam lo bawk. Ka hmangaih che tih phei hi chuan a rikin a la ri lo hrim hrim. No ka sil laiin ka nu call ka dawng leh, ka la vat a. “I nu chu i va hmu ta lo mi? Engmah i rawn sawi bawk si lo” a ti hlak hlak a. Thil eng emaw a ti pah a niang, a ri deuh sawk sawk a. “Vawiin chu ka hman lo alawm, test kan nei sia. A hmanhmawhthlak viau mi?” Ka ti a. “Aw. Hmanhmawhthlak em em chuang lo ve,.chuan, i bialpa nen in la inthlah lo a ni maw? A dik em?” A rawn ti leh ta, Duhawma a thut ve kur avangin ka hamhaih deuh. Ka kal kiang hlek a, “Aw..ngati nge ka thlah kher a ngaih a? Eng nge a that lohna?” Ka ti ve hmak a, Duhawma erawh a phone a khawih ruk ruk. “Keiin tha ka ti lo a nih chuan a tha lo a ni mai, nakin zela i nawmsakna tur ka ngaihtuah zawk vang a nih hi,. “ A ti sak sak a, “Tu nge amah pawh i hre reng reng em ni a?” Ka ti ve ta ngat a.

A thaw hawk ri chu ka hre pha, “Hria e, ka hriat vang alawm kalsan tura ka tih che. I nakin hun ka ngaihtuah vangin..” a ti zawi raih a. “Ka hrethiam lo, chuan nakinah ka lo bia ang che. Ka buai rih lawk” ka ti a, ka dah nghal. Hmingduhawma a awm ve run si a, thil awmzia hrilh tho mah ila a chungchang thu a awm laia han sawi bawl bawl kha nuam ka ti lo. A bulah ka va thu ve leh a, “I nu chuan kan chungchang bawk em ni a rawn sawi?” A ti ta chiah a, ka chil ka lem khawlh. Ka heh petin ka ngawi leh vang vang a, “Ni chiah lo, ka nu chungchang zawk a nia” ka ti ta ngawt a. 

“Ka hriat ve a ṭul loh chuan sawi kher a ngai lo aw..” tiin ka kut a rawn vuan a. 

Duhawma hian ka ṭobul engmah a la hre lo, nakinah midang ka aṭangin hre chhuak ta se; engtin nge a ngaih ang? Nu pari te pawh hian ka nihna diktak an hriat tawh vang zawka inthiarfihlim tura min ngen an ni zawk mai lo maw? Ka rilru a buai ve ta nak mai. Duhawma chu engkim hrilh vek zawk ta ila ka thawl huai ka beisei. 

“Ih maw, englo a nia. Tuna Chhawrpiala ka nu hi ka nu dik tak, min hringtu a ni lo va. Chuan, kei hi falak ka ni bawk a, chung vel chu a nia. Ih, tunah hian ka nu diktak zawk hi a damlo a, min hmuh a duh a niawm e. Kei phei chuan ka la hmu lo hrim hrim, ani chuan kum 2 ka nih lai velin min rawn hmu tawh a niang. “ Ka ti ta mawlh mawlh a. A ngaithla uluk kher mai. Sawi belh tur vak ka hre tawh lo. Chutah ngaihsam hmel fe hian, “I pa chu i hre ta chuang lo mi?” A ti ta daih a, ka ngei lek lek a ni. “Hre ta chuang lo..ka hnam hming pawh ka dah ngai loh hi” ka ti a. 

“A pawi hleinem,. I nu chuan buaina a tawk nasa viauin ka ring. Va hmu la a pawina a awm hleinem. “ A ti ta nge nge a. 

“Nia, hmuh chu ka tum alawm. “ Ka ti ve mai a. 

“Ka lo kalpui dawn che mi? Mahni chuan i hreh ka ring deuh” a tih chuan rang zet hian, “A ngai lo. Mami ka kalpui mai ang” ka lo ti vat, a nui hawk a, “Hmm, i nu hriat i hlau chiang, naupangchhia i nih tawh loh hi, Vanlal” a ti a. “Chulam pawh a ni kher lo” ka ti ringawt. Zep nak emaw ka nu chuan pasal fanau a nei ve tawh ni khan an sawi a, eng ang chhungkua nge an nih ka hriat miau loh avangin Hmingduhawma ber kher nena va hmuh chu ka duh lo a ni. Dinhmun pangngai leh zahawm, chhungkaw felfai tak an nih loh phei chuan min hmusit ang tih ka hlau, min pai lai pawha ruihhlo a zawrh avanga jail-tâng kha a ni miau a, a piangthar te a nih loh chuan a lo la zuar zel thei ve tlat. Chutiang hmuna ka bialpa, a ruka ka zah leh ka chhuan ve em em va luhpui chu ka hreh a ni ber e. 

“A address te i hre chiang maw? Tunah damdawi inah a awm tihna nge?” Thutak deuh zawk hian a ti leh a. 

“Aw..u Sawmi’n a address chu min rawn thawn tawh. Khatla south-ah an awm a,. Zawn hmuh a harsat ka ring lo. A number hi dil bawk ila” ka ti a. Nia, a number hi ka nu hian min pek a tum lo nge mawni dawn ni, dil loh chuan a buaithlak. 

“Tunlaiah mi kan chikim tawh a, i nu anga inchhâl , i nu ni miah si lote pawh a lo ni ve thei a nia aw. Fimkhur la” min ngaihtuah hmel deuh hian a ti a. Ka lo bu nghat, “Nu Pari ten sawi an nei leh tawh em?” Ka ti ta thung a. 

“Ka bulah chuan engmah a sawi ngai lo, ka pa nen zawk kan sawi dun a, Judy neih ka tum loh thu ka hrilh a, ka chungchang chu a lo ngaihtuah ve tawh mai ang chu. A ro khawm vel hi ka lungkham tehchiam hleinem” a ti nghet churh a. “Nih thil dang daih, i nu kha engtin chiah nge a boral?” Ka tih chuan a hmel a danglam dâwrh mai, mahse, lehlam a hawi nghal vat a, a inthunun leh vat mai. 

“Kum 6 chauh ka la nia, mahse, chiang takin ka la mitthla thei, ka school bang hi kan driver hian min rawn hruai mai zel a, chumini pawh chuan min rawn hruai a, in kan thlen chuan a lo reh duk mai a, kan awmpui, ka nu tih loha min buaipuitu ber pawh a lo awm lo. Ka nu ka ko vak vak a, a eih theih si loh avangin an pindanah ka lut ta a, tah chuan ka nu chu khum mawng lam chhuatah hian nikhaw hre loin a lo mu reng a, kaihthawh tumin ka sawi vak vak, a che eih lo. Ka mangang lutuk chu thenawmte in hnai berah ka tlan lut a, tichuan, an buaipui zui ta a ni. Ka pa pawh a rawn haw nghal a, damdawi inah kan tlanpui nghal a, mahse, kan tlai tawh. Ka nu chu heart attack vanga thi niin doctor te chuan an sawi a, mahse, ka nu pa, ka pu khan a awih thei thlawt lo va, a ruang chu an postmortem ta a ni. Chutah chuan a kawchhungah tûr chi khat an hmu ta rêng a, khatiang tûr kha mizoramah lei tur a awm lo va, a chaha chah ngai chi a nia. Police lam ten an han chhui ngial a, kan awmpui nula pawh an ko zing khawp mai. Mahse, ani chu kei pawn ka ringhlel thei lo, ka nu nen unau ang chiaha inhmangaiha induhsak an nia, kei te kha fa pawh nei se kei aiin a duat  chuang lo vang tih tur khawp a ni. Khamini khan ka nu a hawn hma avangin mamawh lam turin ka nu zawkin a tir chhuak kha a nia,. Ka pa pawh thu an zawt nasa, ka pa pawh ka ringhlel chuang lo..rinhlelh tur an hre si lo va, evidence a awm thei bawk si lo nen tihian ka nu case chu a zuihral tawp mai a ni. Rev. Chanchinmawia case a zuzî ang deuh khan..” a ti ta dap dap a. A ṭawng rei bawk a, tui a in khawlh khawlh mai. 

Ngaihtuah zui vung vungin, “Chuan, unau i nei lo mi?” Ka lo ti daih. Kum 6 a nihin a nu a thi a, nau pawh a nei si lo lai chu mak ka lo ti ve mai mai. “Kum 3 ka nih laiin ka nu chhul a cancer a, kan hriatchhuah hma avangin an paihsak a, insawiselna a nei zui tawh lo. Chhul tel lo chuan fa neih ngaihna a awm si lo va” min rawn melh chung hian a ti a. 

“Kei chu in awmpuinu bak ka ring thei lo, eirawngbawltu a ni ngei ang a, i nu ei turah tûr chu a phul a ni mai. Midang cheng ve an awm si loh chuan” ka ti hmanhmawh a. 

“Nia, hetia han ngaih mai pawn a rinhlelhawm ber chu a nia lawm. Mahse, a ṭang na lutuk, finfiahna tel lo chuan an man ngawt thei si lo a. “ A ti ve mai a, “Chuan i nu thih hnuah a la awm ve zel ami?” Ka tih chuan, “Awm lo ve. Kum khat leh a chanve vel chu a la awm a, tuna ka pa nupui hi a rawn lut ta bawk nen, an inngeih vak lo a niang, min chhuahsan a, a hnua ka hriat leh dan chuan pasalte neiin fa pawh a nei ve tawh a niawm e. Aizawlah hian an awm lo a niang, min la hriat ve reng chu ka ring, mahse, min be pawp ngam lo emaw thei lo emaw a niang.” A ti duah a. 

“I pa chuan nupui a va nei leh hma em em” ka inrin hmain ka lo ti nghek a, ka inthiamlo leh deuh si, ka sawi zo vek tawh bawk sia. Za lo zeta nuiin, “Nia, Nu Pari sawn Jenny hi a lo pai hman tawh a,.” A ti sup a. Hriat zel ka châk a, ka zawt hreh deuh bawk si. “Nih chuan an inngaizawng tawh nih chu” ka ti ta ngawt a. 

“A ni maithei, Nu Pari hi kan dawr bul lawka dawr nghak ve thin a nia, an lo innêl zui ta a niang. Ka nu kha Lecturer a nih bakah Kohhran leh khawtlangah nihna neuh neuh a ngah ve sia, a buai si ka pa kha a kawm hlim hman lutuk lo a ni maithei.” A tih lehzel takah chuan, “Haw miah lo la, ih, kei chu nu Pari leh i pa chu ka va’n ringhlel” ka ti ta mai a! A nia lawm crime ka ngaithla nasa si a, an pahnih chu ka tinzàwn sa deuh tawp mai a ni. 

“Mahse, ka nu thih hma lawka inhre chauh an ni sia. Kei pawn a tirte chuan ka phak ang tawkin ka chhui ve nasa alawm. Ka pa khan ka nu boral kha a tuar em em a, zu te pawh a in phah hial a, thla 1 tawp damdawi inah a awm nghe nghe. A han zia chho a, a khua a har si, nu Pari khan thiam takin a lo hnem thin a niang. Hei ka buaipui chho leh dawn alawm, thudik chu a lo lang vat mai ang.” Tiin ka sam a rawn chul a. Ka rilruin ‘Nia, hre vat teh’ ka lo ti. 

Mami a rawn haw tak avangin leh engkim a hriat ve tawh tho avangin kan pahnih inkar vel chu kan sawi zui a, “I pa hian Judy pate pawisa a puk te hi a ni lo maw? Chutianga lo inremsiam vel” Mami’n a ti ve phawng mai, a pawi lo zawk, tianga inpawh deuha sawi mai hi a tha.  

“Puk lovang, a tirah an pahniha he sumdawnna hi kalpui an nia, nakin zela inthlawp tawn zel turin..nia, vawiin thlengin chhungkhat ang kan la ni reng alawm. An inremsiamna kha chu ka awm loh hlana an siam a nih hmel. “ Duhawma chuan a ti mai a,. Kan ṭawng ve hmain, “An lo siam miah lo thei bawk. Agreement  lehkha ka la hmu ve si lo va “ a ti leh zuk a. “Keimah min duh loh vangin chhuanlam an siam aniang” ka lo ti hmanhmawh. “An duh che a ngai lo, ka duh che chuan a tawk” a ti bung nghut a, Mami a lo ehem tuar. Kan han nui leh rih. 

Zanin chu thil kan sawi nasa bawk a, kan inkar pawh a hnaiin kan inpawhna a thuk sawtin ka hre ve. Mutnaah pawh Mami nen kan sawizui leh chiam kha. Engpawhnise ka nu chu va hmu ve phawt ila, Duhawma pawh tibuai lutuk rih lo ila a tha, a nu case lamah insawrbing se ka duhpui. Kei pawh ka laichin tu emaw hi lo tualthi ta se ka chhui chhuah hma loh chuan ka bansan theih ka ring lo. Hmingduhawma chanchin hriat loh ka la ngah em em a, ka hriat chhunte khan a dang leh a aia kimchang zawk hriat châkna min neihtir ka ti mai, ka lo ngaihtuah leh vung vung thin. Mami’n chawhma lamah test a neih avangin chawhnu lamah ka nu chu hmuh kan tithlu a, nakin zelah kan hriat pawlh loh nan, ka nu min hringtu hi, ka nuteii tiin ka sawi tawh mai ang. Ka nu Remruati hi min hringtu zawk ni lo mah se; ka nu tiin ka sawi mai ang. A chhan chu ka pianhlim aṭanga min chawiliantu a ni miau a. Helhhawlh ang hian ka awm ka ti mai, ka zung sek ringawt. Canteenah kan inhnawhpuar tê tê a, hmun dangah chuan a to thei sia, keini lah ei kan duh ve ropui sia maw. Chhana paw’n kan rei takin tih thuhlaah hawn hma a tum ve kha, Desi rawn zin tum lah kha a u damloh vangin a ṭhulh rih a, a rawn kal ve thei ṭep ang chu maw. 

Tichuan le, ‘Lalhmingthanga, Khatla south, H/No 217’ tih inziak U Sawmi min lo thawn chu en nawn lehin Khatla lam kan pan ta vâwk vâwk a.Hmingthanga chu  a pasal hming a ni a, eng mi tak ni ang maw.  Amah ka nu number ka save dan pawh , ‘Nu Hruaii’ tih a ni. He khawvel êng hmu thei tura min hringchhuaktu, ka pa ber puh tur hre lo chung pawha, min pai ve hram hramtu ka nu chu ka haw hran lo va, ka thlahlel em em hran lo bawk. A nun hriatthiamsak turin ka la upa tawk loin tawnhriat ka la nei tam lo bawk nen, jail-a min chawilian lo va ka nu kuta min lo hlan vang erawh chuan lawmthu hrilh ka bain ka hria. Mami pawn min fuih ve char char a, “Demna chhan tur a awm lo a nia, a duh chuan a titla daih thei che, mahse, huaisen takin i pute tuithlar pawh huamin a pai tlang che a, eng chhungkua pawh lo nise hnualsuat reng reng suh. Khawngaih zawk rawh” tiin. Ka nuin min lo call leh hram, “Hei kan kal mek e” ka ti a. 

“A that chu, Tei, i nu a nih kha aw, min lo biak dawn nia, kei pawn ka hmu ve châk lutuk tih hi lo hrilh ngei ngei ang che. “ A rawn ti luam a. 

Aizawl veng khat ringawt pawh hi a zau nasa mai sia aw..keini kan awmna veng pawh la chiang em em lo hi kan va bangbo tak, a house no azawng khan kan zâwng ta a. Mi kan zawt pah zel bawk. Darkar chanve dâwn ke ngata kan vah kual hnuah kan duh tak chu kan hmu fuh ta e. Kan hmu ti ila min kawhhmuh a ni zawk, Dawr pakhatah ka nu pasal hming sawiin kan zawt a, “Hmingthanga pahnih an awm a, tu zawk nge niang aw” a tih vung vung laiin, “A nupui chu Pi Hruaitluangi a nia “ ka lo ti vat. Hrechhuak ta niawm tak hian, “Aw..aw ka hria, sawlai step saw thui vak lo in zawh ang a, building lian vak lo a lo awm ang a, khami hnuai kha a ni mai. Building hmasa ber hnuai aw. “ Fiah deuh hian a ti a, lawmthu hrilhin step lam chu kan pan ta nghal a. 

A sawi ang khan Building chu a len vak loh bakah a hlui ve lek lek tawh tih hriat takin a rawngte chu a khawk  ter tuar tawh a. A hnuai lam chu pan nghalin kawngka lu chungah  Lalhmingthanga tih chu a lo intar vâ mai. Mami chuan min rawn melh zauh a, kawngka chu a kik zui nghal. Mipa aw ki sâng lam lek lek hian, “Lo lut rawh u” a rawn ti lauh lauh a. Kan lut ta. 

Luh chiahin choka a ni nghal a, an choka cabinet pawh a pangngai viau e, tin, a fai viau bawk. Choka leh sitting room chu bang chanvein a daidang a. Min lo chhawntu niawm tak khan, “Lo leng rawh u, eng nge in duh le?” Hawihhawm takin a lo ti sauh sauh a. Tarmit a vuah a, pa cher lam niin a ngo vuah mai. A hmel pawh a chhe lem lo. Tin, a hmel a nelawm hle bawk. Ṭi ru deuhin thutthlengah chuan kan thu a, an sitting room chu a pui ve khup mai. Pangpar pawh an khawi nalh narawh e. Midang tumah kan hmu ve lo thung. Ṭawng mai nachang ka hriat loh avangin Mami zawk chuan, “Pu Hmingthanga te in a ni tiraw?” A ti sap a. “Aw ni e, keimah hi ka nia, eng nge in duh tak?” Ti varin kan piahah chuan thuthmun a rem ve nghal a. “Aa..englo a nia, hei ka thiannu hian a nu a rawn hmu dawn a, Tei a nia ka thiannu hi” a ti leh zat a, ka hming a sawi rik takah chuan harh thutin, “A..aw nia, ka nu chu Hruaitluangi a nia, min hmuh a duh thu a sawi a, kan rawn kal a ni e.” Ka lo ti bah nawk nawk.

A tarmit vuah ṭhat pahin, “A ni maw? Kan lo beisei reng tawh che u alawm, in nih kha ka ring rengah. Lawk aw, kan nu chu ka’n ko ang e, a inbual zo deuh chiah a” tiin pindan pakhatah chuan a lut ta a. “An khawsak chu a harsat vak hmel loh hi” Mami chuan a ti sar sar a, “Nia, bakah an ṭawp vak lo a nih hmel..” ka lo ti. A chhan chu an in chhung bungrua vel chu a faiin enkawl ngun tih a hriat tlat,. Kei ka ngaihdan chuan in chhung bungrua hi a manto leh to loh lam ai mahin kan enkawl dan hian a tilang zahawmin a tihlûin a tihlû lo ni mai hian ka hria. Kan in chu a chhia emaw a ṭha emaw pawh nise fai se, thianghlim se a nuam a ni mai. Ka han belh leh hram duh chu, hmeichhia a bikin nula te hi mi hian min lo chîk ru viau thin, mipa ât hmel deuh anga kan ngaihte pawh hian nula an rim hian an in chhung awmdan hi an lo en chik viau zel. Kan khuaa nei nung pawla sawi ve thinte pawh in lian leh ṭha pui mai an sa a, in chhung bungrua pawh a toin khawpuia hman atan pawha zahpuiawmlo tak tak hlir an nei. Fanu nula thalai pahnih an awm a, mahse, an in ṭawpzia hi sawi a tam thin hle. An patea a boral tuma an in vel an chinfelnaah pawh an bathroom leh mut pindan thlenga a ṭawpzia an hrilhfak hial a ni. Chuvang ni maw, an hmelthata Kohhranah pawh an inhman tehlul nen rimtu an nei ngai lo, a û zawk phei chu pasal neih hun ve deuh tawh a nia, an thatchhiat vangin an iai a nih ka ring ringawt, an rilru te chu a chhiat pawh a chhe hran lo. Mak tak a ni.  Gas changkang taka chaw mal leh dailuah farna hnuhma awm phung te, carpet mawi leh manto bâl khak em em mai te, khum chuar leh siamfel loh tih hriat lutuk angte hi tunlai khawvel changkang zelah chuan a ṭhing uluk lutuk tawh. Incheina manto pui pui inbelin Biak in kan pan a, kan kalsan tak kan in chhung a bawlhhlawh chuan mi ten min awtin min ît chuang lo. Tin, Ringtu inti si taima si lo hi mak ka ti em em bawk. Ka sawi duah chuan in lo ning leh dawn..(..haha..)

Pu Hminga chu a rawn let leh vat a, a hnungah nu vantlang tak, towel-a a lu tuam chung hian a rawn kal ve a, ka nu nen pawh an inang viau e. Ka huphurh ang aiin ka zâm lo ta daih, ka rilruin ka ṭawngṭai nasa bawk a, Pathianin min awmpui a ni ngei ang. A ding dat a, min rawn melh ta chat mai. A nui sâng a, a kut rawn phar chhuakin, “Tei, chibai le” a ti zâng vah a. Dingin ka lo vuan ve vat,. Mami nen pawh an inchibai ve a, ka nuteii (Hruaii) chu ka nu aiin a ngo hlek maithei, mahse, a cher zawk thung ang. A damloh lai a nih vangte pawh a ni mahna. “Min rawn tlawh chu ka lâwm hle mai, khawi vengah maw in awm?” A ti chho ṭan a, thu pangngai tak tak bak kan sawi lem lo. Mami nu hming te kan han sawi chuan, “Ka û te nen an inkawm thin a, nau angin min en a, min duat thin khawp asin. Tunah hei ka fanu nen in lo inkawm leh ta a. “.tiin a nui sâng reng a, a hmel hmuh a nuamin min uap runtu ang kha a awm lem lo. An pa chuan thingpui tui deuh a lum a, kan in laiin an fanu tleirawl sam tawi, pian nalh zet hi a rawn lut zan zan a, “Mate, hei i û te an rawn leng a nih hi, Tei, hei i nau Muanawmi a nia, Mate kan ti mai. A nau pawh a rawn haw ve ṭêp ang.” Nuteii chuan a ti siam siam a, Mateii nen chuan inchibaiin a pa a chhun zawkin ka hria, “Lo leng ziah r’u aw. Û neih ve ka châk thei lutuk a.” A ti niah niah a, hei hi ka nau chu a ni si a. A fel reuh em em lehnghal, a tira ka huphurhna te kha lakbo ang diak an ni, ka lo ngaihtuah ruk dan chuan ka nuteii fate an suala an chimawm viau chuan vawikhat hmuhna hi a tawpna a ni ngjal ang ka lo ti vel kha a nia. Mahse, ka beisei phak bak a ni e. Mateii chhang chiah Mapuia pawh kan haw hmain a rawn haw ve a, ani hian tlai lamah computer class a kal a niawm e. Mateii hian reitak tb vanga harsatna a neih avangin school a kal zawm thei lo va, tunah Open atangin class xii exam a tum ve mek a. Mapuia erawh class IX zir mekin school banah computer class a kal leh thin a lo ni. Pa ber pu Hminga chu 4th grade niin an eikhawp ngawr ngawr a thawk chhuak ve a, mahse, nuteii hian sumdawnna lam khawih vein chu zawk chu khawl ve zelin harsa lutuk loin an khawsa ve thei a lo ni. An chhungkaw an inpawh hmelin an hlim hmel ka tia, ka lâwmpui em em bawk. Kan chhungkua ang mai an ni. 

Kan hawn dawn chuan, “Sundayah chuan kan lo beisei ang che u aw. Chhana pawh chu lo hruai ngei ngei ang che u, U Rii fapa te chu kan nau ang tho alawm. “ Tiin chaw ei turin min sawm nawn leh thlap, hnial chi niin ka hre lo. Pu Hminga lah a felin a zau si,. Mami nen pawh thildang kan sawi hman meuh lo,”Awii, i nu chu ka lawmpui, a vanglaiin kan khuaah a mualphoin a hmingchhia a, tunah te chuan kha tumah a awt bik tawp nang. Nu fel tak a nih bakah a pasal kha pa ṭha tâwp ang kha niin ka hre ve” Mami chuan a ti mawlh mawlh a, ka ngaihdan chiah a ni. 

Kawngpui kan pawh hma hlekin nu Pari leh pa pakhat kan tawk hlawl mai. Min hmuh chuan mak a ti ve deuh nge ni, “Ehe! Tei te tehdaih chu, khaw nge in kal a?” Boruak kan nei tih hriat miah loh hian a ti lâng lâng a. 

“Mi kan tlawh lawk a. Nangni zawk?” Ka lo ti pangngai ve mai a.

“Hei Zorama hi ka nau a nia, ka va tlawh lawk dawn..” a ti a, Zorama a tih chuan lukhum hmathlawk a khum a, la upa lutuk chu niin ka hre lo. “A nih chu” ka ti ringawt. Bus nan hman loh kan hlauh avangin kan kalsan ta thuai a. “Awii nu Pari incontrol theihzia kha, in inbiak dan kha a hrechang tawh miah lo mawle” Mami’n a ti hlak hlak a, ka nui ringawt. 

Call ka dawng a, amah a lo ni. “In va kal ta mi? I nu bulah chuan” a rawn ti a. 

“Aw hei kan haw leh mek” ka tih chuan, “I nu Pari pawh a tlân a..” a rawn ti..