Hmingduhawma 12

HMINGDUHAWMA (12)

Ziaktu : Toni Râlte

Driver chu a pai chhuak nawk nawk a, a phun zui nuah nuah bawk. Chân ropui a inti ve deuh maithei a ni. Ka va zung a, ka tûm bur mai. Ka va luh leh chuan min phuar leh a tum a, “Ka tlan chhuak dawn pawh ni hlei lo, ti hian min awmtir ve mai mai rawh” ka ti hlak hlak a. He pa pui hi a mak lutuk, ka hlau vak miah lo, ka sawi thiam lo, amahah hian thil sual tih châkna hmel ka hmu lo a niang,.min hnek ngei tak naa ka tâl nasat vang kha a nia. Pherah chuan thuin bang ka ngheng a, chairah a thu ve thung. Driver kha a rawn let leh a, “I ril chu a ṭam viau em? Eitur chu ka han la ang aw” a rawn ti lung lung a. 

“Eitur a awm lo” (a hming ka hriat miau loh avangin Lungtuma ti mai ang aw)Lungtuma chuan a ti hmuk a. Lungtuma ka han tih kher chhan chu a ngen hmel bakah a ṭawng tlem hmel si, rawih a nihnaah a chiang a, hlawh petu tan rinawm takin a thawk tawp mai a, tin, midang khawngaihna a nei vak lo bawkin ka ring, chuvang chuan lungtuma tih chu a inhmeh ka ti ta riau a niang e. 

“Englo, mami khan in tur a duh ve a..” driver chuan tîm deuh hian a ti leh a, “Han mu harh rawh. “ A lo ti hmuk. Ka lo chhing sawk ringawt mai. He pa hi namnul chi a ni dawn hauh lo mai. Vawiinah nu Pari ten min rawn tlawh loh hmel a, ruahmanna dang an neih hma ngeia he lai hmun hi ka chhuahsan a ngai a ni. Engtin nge ka tih ang aw. Ngawi rengin kan ṭhu dun tlawk tlawk mai a, a khat tawkin a phone chu a bih leh zauh thin. A phone saw ruksak thei ila chuan kawng a kua ang mawle..ka inngaihtuahna lamah ka lu a na vek tawh. 

Ka tuar thei ta ngang lo va. “Tual i that tawh em?” Ka ti ta ngawt a. En pawh min en lo hian, “That lo” a ti hmuk. 

“Chuti chu engvangin nge heng misualte tan hian i thawh a?” Ka ti a,ngawih dun reng ai chuan a khawharhthlak loh deuh zawk ang chu. 

“I hriat ve a ṭulna a awm lo ve” a ti leh hmak nia. Ka va ngei tak. 

“A nih engvanga min ru bo nge an nih tih tal chu i hria ang tiraw?” Ka ti leh hram a. 

“Ngawi rengin i awm thei lo em ni? Phuar leh i duh zawk em?” A ti ta daih a,. Intingampa luiin, “Nangni ang pawisa vanga engkim ti duh ho vang hian alawm kan ram hi a him tawh loh em em, pawisawilo ruboa hrêntir tur khawpin i rethei a ni maw? I va nep ve, hna dik leh rinawm te thawk zawk ta che. “ Ka ti ta êrh a, ka zawhna a chhan duh loh pawn a thin tal tihrim ka duh, chance ka hmu mial maithei asin.

A ding hluai a, “Ka chungchang engmah hriat i nei lo. I ka kha chip hmak rawh” a ti khur khur a, ka thusawi khan a thin chu a tirim ve pha chiang. “I chungchang ka hriat loh ang bawkin ka chungchang i hre bik lo, ka nu diktak hre lovin ka seilian a, tunah ka nu anga lemchangin min ru bo leh a, a tawpna tur i hria em? Kei hi damin ka chhuak dawn lo, ka thi a nih chuan i tel ve ang, rorelna i la hmachhawn ngei ang. Misual leh mi tenawm i thurualpui hi i la inchhir ve ang” ka ti hlaih hlaih a, ka insawi thinrim hle tawh. “Hmeli leh” tih leh min pawh din rualin ka kut chu a hnungkhirh zui a, a kut lianpui chuan ka ban pahnih chu a hmer kawp, a hmer nghet kher lehnghal, ka hnunglam atang chuan, “Ni e, i chungchang chu ka hre lo, hriat pawh ka duh hek lo. Ka damkhawchhuah nan leh ka nu vang chauha he hna hi thawk ka ni. “ A ti khur dawt dawt a, engvanga thinrim em em nge a nih ka hrethiam lo. 

Chairah na zetin min nam ṭhu a, “I tal vaih chuan i ban ruh a tliak ang” a ti chher chher mai. Chet pawh tum ila ka ke ka leng vak te a nih loh chuan chet ngaihna a awm lo hrim hrim, min phuar leh ta, ka ke a phuar lai chuan, “I tihtheih chu a va tlem ve, nang aia chak lo leh thahrui nei lo zawk hmeichhe pawisawilo phuar beh maw? Mipa pawh i ni lo a nih hi” ka ti phiar phiar a, inhauh ka thiam ngai lo kha a nia, min rukbo atang khan ka ṭawng theiin ka ṭawng chaltlai thei ta khawp mai, awmna hmun leh dinhmun azir a lo nih dawn hi,. Keimah ngei pawn zep loh chuan ṭawng thei ka inti. Mahse, duhthâlin chet la thei ila chuan nu Pari kut pawh kha ka tuar bik hauh lovang le. Ṭawngkam hmanga ka beihlet an ngai miau si a ni. 

“I duhtawkin rak rawh, ka ngaipawimawh lo ve. I duh leh thi la, ka tan engmah a ni lo.” A tih chuan rapthlak ti zetin ka han melh chho a, a lo inthunun zawk nge a mitmengah thinrimna ka hmu tawh lo, a buai nuaih ni mai hian ka hria. “Ka khua a har a, titipui tur ka duh a ni. Ka chhungte ka ngai a, a bik takin ka nu.,a malchunga ṭah ka chák takzet..” ka ti tham ṭiak a, ka hnuk a ulh nghal. Ka mittui chu a parawl kiang a. Min hnungchhawn zawngin a ding a, eng nge a ngaihtuah ve ang aw. 

“Kei pawn ka nu nun chhan nan he thil hi ka ti a ni” zaidam hmel tak hian a ti ve ta sup a. 

“Ka nu chuan mangang takin min zawng mêk ang, tunah pawh hian a ṭap maithei. I nu vanga kei a fanu min phuarbeh avang hian..” ka ti sap a. Ka rilruin ka ṭawngṭai mawlh mawlh. Pathian puihna tel lo chuan he pa rilru hi ka hneh dawn lo tih ka chiang. 

“Ka mawhphurhna ka hlen a nih hi..” tiin pher chungah khan a va thu ve ta vûng a. 

“I nu chuan dam lohna a nei nge? “ Ka ti a. A ngawih vang vang hnuah, “Kal (kidney)pek ngaiin a awm mêk a ni. Kei hian ka pe thei tlat si lo. Kei chauh a neihchhun ka ni a, ka nu kâl hlawhchhuah nan heng thil hi ka ti a nih hi. “ A ti ve ta sup sup a. Ka rindan a ni, he pa hi misual tak niin a lang tlat lo. 

“Engzat nge i hlawh dawn?” Ka tih chuan ka inchhir nghal. A lawm dawn lo hian ka hria a ni. “Ka hre lo, ka nu kâl pe theitu tur min hmuhsak thei dawn a, tun hi ka vawikhatna a ni a, a tawpna pawh a ni nghal ang. “ A ti ve mai a. 

“I nu chu tunah tuin nge enkawl a?” Ka ti leh a, “Heng mite hian nurse min rawihsak a, inah kan enkawl rih” a ti nghut a. 

“Ih maw, kei hi min thah ngei ka ring a, an tan ṭangkaina ka nei tawhin ka hre lo, ka thih chuan buaina dang in hmachhawn dawn a nia. Chu chu i thlentir lo thei, min pui la, i nu chu ka pe thei a nih chuan keimah ngeiin ka kâl hi ka pe ang. Keiin ka theih loh pawn ka û-in a thei ang.” Ka ti ta sawk sawk a, beiseina lian tak ka nei chu a tha nge tha lo ka hrethiam lo. 

“Ka pui che a nih chuan heng mite hian min zuah i ring bik em ni?” A ti ta khauh a. 

“Hmingduhawma’n a pui thei ang che. Pari fahrawn hi a nia, ka bialpa a ni bawk. Ka ti tak tak, min pui a nih chuan ka phatsan miah lovang che.” Ka ti ta ngawih ngawih a, hetiang reng renga ka mihringpui laka ngenngawl taka ka tlawm hi ka la hre ngai lo.

“Min ring tawk a, min chhawr a, rinawm hi ka tihtur a ni “ a ti leh ta tlat mai. Ni e, chutimai chuan a rilru hi ka hneh dawn lo, a nu hmanga a mar ka deh thiam a ngai a ni. Ka va han ngaihtuah nasa tak êm..

“Ni e, i ngaihdan chu a dik tho mai. Mahse, ka sawi tawh ang khan damin chhuak ta lo ila ka chhungte bakah ka bialpa ten anni hi an rinhlelhsa tawh avangin an chhui zui ngei dawn a, tunah pawh hian an enthla mek tawhin ka ring. I hriat ve loh thil tam tak a inphum a ni, an chhui chhuah hunah an mi leh sate zawng zanwg pawh an khawm tel vek ang a, nang pawh an hmaih lovang che. Chutah chuan i nu, nangmah mamawh em emtu chu jail i tansan thei ang maw? Amah vanga he thil i tih hi a chhiatna tur zawk a ni maithei a nia”ka han ti leh ṭâng ṭâng a. 

Nui hawkin, “Khatin min thlem suh. Ka tawlh lovang, thil thleng thei zawng zawng chu nang aiin ka hre zawk, kei chuan ka nu damna chauh ka duh a ni mai.” A ti ta hlur a, ka beidawng ta hle mai. 

Ka rilruin, “Lalpa, min pui dawn lo em ni?” Ka ti mawlh mawlh a, tun bak hi chance ka neih ka ring tawh lo. Ṭawng tuma ka an zuau laiin Driver kha zai rût rût chungin a rawn lut leh ta hlawl mai. Ani hian min chhan chhuak thei maithei asin. Zu ûm a rawn keng lut bawk. “Eng nge i rawn tih leh dawn?” Lungtuma’n a ti vin ṭhak a. 

“Mahni chauha awm chu a nuam lo, titipui tur ka duh alawm. Aw..aa..hahdam rawh hei sap hoin relax an tih hi, inrelax rawh. Bawiha..” tiin chhuatah chuan a thu sawp nuaih a. A han in belh leh a ni ngei ang. 

“Min lo intir ve teh u, engmah hre lo khawpa chahthlak ka duh” ka lo ti vat a, Lungtuma makti hmel chu ka hmu lo der tlat. “Dik chiah, engah nge i lo phuar leh a, a tlanchhuak dawn lo chatuan..tlanchhuah ngaihna a awm lo. He lai hmun hi maw, hremhmun a nih hi..haha, khawi maw Mami,..” tih leh thei leh thei lova min phuarna chu phelh a tum a, a pai leh khut khut thin. Lungtuma chu a rawn tho ta vut a, “Zu chu i in ve duh a maw? “ A ti tak rûn a. 

“Duh e, awmze nei lo va inngaihtuah vak vak hi ka ning tawh. “ Ka lo ti hmak. “Ka tan a hahdamthlak dawn a nih chu, hmeichhe tawng thei lutuk nena zan thleng awmdun a ngai lovang a..chatthla hmak ang che.” A ti sawk sawk a, min phelh pah bawk. Hetiang hi a vawikhat tihna a ni tih a sawi kha ka awih khawp mai, a chhan chu a fimkhur viau nain a fimkhur tawk lo ka ti mai, nge ka tlanchhuah a rin loh lutuk vang zawk. 

Drivera lah chuan zu chu a lo thli ve, a tibaw nual mai. “Kha le, quit pawp rawh” tiin a keng khur dur dur, ka vawikhatna tur a ni a, a rim ringawt pawh chuan ka luak a tichhuak tawh, mahse, hei hi ka tih ngei a ngai si, Lungtuma lahin min lo melh kur bawk. 

Ka hnar hupin ka’n thawkkhat piap mai a! Ka hrawk chu a phiat ni mai hian ka hria, ka pum a lo ruak bawk nen, a sa thla ham ham mai. “Tui pawlh loh lehnghalin..khai aw!” Lungtuma chuan a lo ti sup, ka ngaipawimawh lo. Sunhlu ro tawh lam hi driver chuan min pein, “Sehhmeh’ a ti zuk a, a khi sûng bawk. 

“Thli leh rawh. In zo vek ang” ka ti ham ham a, in ngai lo tih takah ka kawchhung a han thlen takah chuan ka zâng ta huih mai a, ka rilru fim ka hmang thei lo palh ang tih erawh ka hlau hle. Zu chu ka vawi hnih ta der mai. Ṭawng pawh a nuam chho ṭan viau mai a, rilru kil khatah erawh harhfim turin ka infuih hram hram. Driver chuan, “Bawihi, hmanni kha chu min hrethiam ve rawh aw. Ka hna a ni miau sia. “ A ti sehchilh nawk nawk a, Lungtuma chu in ve turin a nawr nasa, a duh bau si lo. “Kan awmdan hi rawn hmu se an sa khawp ang, pu Ram, han mu harh rawh, tlai lamah i hruai an ngai dawn a nia. Khatianga an hmuh che chuan i chan a chhe viau ang” a ti dût dût a. 

“Ka lu ka tihuh ang a, tha vek mai ang” a ti lung lung. Kan awmna hmun chu ka zawt châk hle naa, min hrilh duh dawn chuanga ka hriat loh avangin ka zawt buai peih lo. Zu chu ka in belh leh a, no 3 lai ka in takah chuan ka zawi ru viau tawh a, ka meng dava ṭan. Tiang chuan a dik dawn lo tawp mai, ka insanmar a ngai, ka la rui ngai si lo va, ka che buai vek ang tih ka hlau, “Ka va zung teh ang”, ka ti bah nak a, ka ke lah chu a phet ṭan. Ka pai deuh nawk nawk mai, “Fimkhur rawh” Lungtuma chuan a ti hluk a. Ka ngaih lah chu a’n sam teh puat khawp a, engkim chu a zâng huih tawh ni maiin ka hria. Ka va zung a, thaw hawkin, “Intiharh rawh, Vanlal” ka inti sap a. Ka va luh leh chuan pu Rama chu a lo tlu sawp niah tawh a, zu bur lah chu a la chelh ve ṭâng ṭang. “Va mu rawh, nang pawh” ti supin pher lam  chu a melh zauh a, “Umm” ka ti mai a. A phone a ri ta ral ral a, “Lo in belh tawh suh ang che” tia min melh hrâwkin pawn lamah a chhuak ta a, hei bak baka golden chance..rang lutukin pu Rama kekawr ipte chu ka zen a, a phone ka phawrh ta nghal, ka beisei ang chiahin a phone chu a lock lo hlauh. Ka nu chu a chiâi dawn avangin Hmingduhawma number chu ka hmet chhuak ta mawlh mawlh a, a ring thei lo. Ka va mangangin ka va hmanhmawh tak êm. Chutih nak alaiin Lungtuma khan kawngka a rawn hawng zui ta mai si,. Hnungchhawn vatin phone chu ka kekawr kawng hmalamah ka zep ta zauh a, pherah chuan bang lam hawiin ka mu saisir nghal bawk. Pu Rama chu kaihthawh tumin a sawi nawk nawk a, a ko pah bawk, kei lah chatthla niawm takin ka thaw sâk sak a. Ngaihtha takin awm se ka duh ber a ni. “Hahthlak ve aw..” tiin pu Rama chu a mut thattir a, ka lam pana a rawn pen chuan ka lo insangmar nasa mai, phone ka pai ruk chu ka kutin ka hliah ṭâwk ṭawk bawk. Muhil angah min ngai nge ni, thawm a nei zui lo. A reh tak duk avangin ka arpui mit men a, pu Rama nen chauh kan lo awm. Kawngka erawh a inkhar lo thung, mei a zu a nih ka ring. Kawngka lam mitsir pah rengin phone chu ka phawrh leh ta zâl zâl a, ka dial leh ta, tun ṭum zawng a ring ta e. 

“Hello” Hmingduhawma aw ka hriat chuan ka hnuk a ulh thei. Ka ngaihzia ka hrechhuak a ni ber mai. “Keimah, ka la dam a nia. Nu Pari leh nuteii ten min rubo, ka awmna ka hre lo” ṭawng rin ngam a ni si lo.” Eng maw? Hello hello” a rawn tih chuan ka hlauthawng bawk si chuan ka hmet hlum a, a rawn call back ka hlauh avangin phone chu ka silent nghal. Msg thawn zawk ila a fuh ka ring. Mahse, Lungtuma thawm ka hre leh ta tlat. Harh hlawl ang hian ka thu chhuak a, “ka zung dawn” ka ti sehchilh leh nak. Phone chu ka bra karah ka dah tawh a. “I va zung zing ve” a ti hmuk a, ngaipawimawh lo niawm takin ka pai chhuak leh ta. Ka zun pah chuan, Duhawma msg tur chu ka type ta a ni. 

“Keimah Tei, ka la dam, tuna ka ph hman hi rawn call suh, min man chhuak ang. Ka awmna ka hre lo, lei hnuai pindan sound proof -ah, nu pari leh nuteii te a bul tumtu an ni. Min thah an tum, nuteii hi ka nu diktak a ni lo.” Tih ka thawn chhuak. Msg en nachâng hre hram se aw. Phone engtin tin emaw min mansak vaih chuan ka chhe vek dawn tih hriaiin pu Rama thlauh niawm takin zun in bula bawlhhlawm ruhna bulah chuan ka hnutchhiah ta a. Ka luhsan leh ta. Pu Rama lah a hnâr kuk kuk tawh mai si,. Zu ruih chu a nawm riau avangin leh ka tihtur ka tih tawh tho avangin pu Rama ken lai chu ka thli leh ta ker ker mai, “Mi tâng i ni tih i inhre lo niin ka hria. Hetiang avang hian hremna ka hmachhawn thei tih i hria em? Min va palzût ve” Lungtuma’n a tih khur khur chuan, “I mi tâng hian engmah ngaihtuah loh ka châk alawm. Ka la dam ve chhung reilotê chu ka chungah zahngaihna lantir ve la mawle” ka ti ham ham a. A rilru chhungril a sual lo tih ka chian tawh em avangin ka palzâm ve thawkhat tih ka hai lo. Rui viau mah ila pu Rama anga hmeichhe ena min en tur chi a ni lo bawk a, ruih chhum hmawk ka duh tlat. Tlan chhuah tum dawn ila ani hi a awm ve reng chuan pialtlepa liluh tum ang maia khirh leh thil theih loh tawp a ni dawn tih ka hria, chuvang chuan min chhanchhuaktu tur lo nghah tawp mai loh chu tihtheih ka nei lo a ni. 

Umm, ka rui ta hle mai. Pindan a up bawk si, a thawk na ngang mai a, ka che hleithei lo a ni ber e. Heta ṭang hian hmeichhe chatthla emaw rui hi mipa tan mutpui a lo awlsam dawn hlein ka hria. A hma chuan ngaihdan nghet ka nei thin, Mi a duh lo chung chu an pawngsual thei lovang tih hi, ka dinhmun leh nihdan aṭangin mawlmang zetin ka lo teh ve a nih chu! pawngsual chungchanga kan ngaihdan hi tun thlengin a la mak khawp mai. A tuartu zawk mawhpuh tum lui ngar ngar, a thawmhnaw inbel vanga ngai te, a lo rui ve a nih phei chuan pawngsual phu hliah hliah anga ngaite zuk awm a! ka sawi tam lo mai ang e, mahse, kan rilru pawh a changkang chho ve zel a, khitiang ngaihdan la nei tlat khi chu zaah 10 pawh an tling tawh lo maithei, mi thiam leh vengva tak tak an tam tawh bawk a. 

Engtia rei nge ka muthilh ka hre lo, ka dangro huam huam avang chuan ka harh hlawl mai. Tui ka zawng ruai a, ka’n in mai chu u Fela’n, “Penṭawng tuihal dangchar laia tui han in khawlh khawlh hi chu hremhmuna kan awm laiin ruahpui vanawn rawn sur se , chutiang anga nuam chu a ni” a tih kha ka hrechhuak uai uai mai. U Fela te pawh keimah vangin an mang a ang ve ngei ang le.  Mami phei chu a ṭap a ṭapin ka ring a ni. 

Lungtuma ka hmu mai lo. Pu Rama pawh a la mu a. Zawi zeta thoin pawn lam chu ka va bih thuak a, tumah ka hmu lo. Ehe le! Vawikhat na reng reng chu saw kawngkapui saw hawn tum chhin ila mawle tia insangphekin ka pan ta chhat chhat mai. Ka nam a, a nghet churh, ka pawt leh vak a, a nghing deuh lawih a, a inhawng chuang lo. Mahse, beiseina ka nei. Ka pawh leh ngar ngar lai chuan rawn pen thla thawm ka hriat avangin ka let leh vat a, dust plate bula pu Rama phone ka dah pawh lo la awm ranin ka la zauh a, pu Rama kekawr ipteah ka khung leh ta vat. A chhan chu ani pui hi a rawn harh chuan a phone a dap ang a, a tibo tih an hriat chuan min ringhlel dawn tih ka hai bik lo. Bang lam hawi bawkin ka mu leh ta hmak. 

“Pu Ram, hey, pu Ram, intiharh rawh le. I kal a hun” tiin pu Rama chu a sawi nawk nawk a, a rum ṭuah ṭuah ringawt. Chek hlukin a chhuak leh zuk a, toilet-a bucket-ami tui va khai lutin pu Rama chu a leih ta mai. Pu Rama pawh a rak nawk nawk mai,. “Tho rawh, i kal a ngai” Lungtuma chuan a ti a,.”Ka va mu nasa ve. “ Pu Rama chuan a ti bai bai a. Kei pawh harh hlawl niawm takin ka tho ve a, pu Rama chuan “ Ka lu a na lutuk” tiin zu chu a thli leh nghal, Lungtuma pawn a khap bik lo. 

“Nang pawh ka phuar che a ngai” tiin min rawn en a. Ka ngawi reng ringawt. Duhawma khan ka msg kha a hmu tawh a nih chuan nu Pari te an enthlak ka beisei a, ka tan chhuahna kawng a inhawn ngei ka ring tlat a ni. Mahse, ka la rui chhû mai a, ka luak te a chhuak, ka ril a ṭam hle bawk. Pu Rama chhuah hnuah min phuar betin chair-ah ka thu leh ta. Thuawih taka lo nghah tlawk tlawk bak tihtheih ka nei lo. “Kawngka saw hawn i tum em ni?” Nuihzat hmel deuh hian a ti a. “Aw” ka ti hmiah. 

“Code a awm saw i hmu lo em ni?” A ti leh a, min ngainep riau hian ka hria, “Hmu lo” ka ti leh hmak. 

“He lai hmun hi a him viau a nih dawn hi. Min thlah zalen danah.” A ti leh a, eng nge maw a hriat ni, “Khawpui chhung a ni na nge?” Ka ti sap a, “Chu zawng hre lo la a tha zawk” a ti leh hmuk, he pa hi mi mawl tak chu a ni lo mawle. 

“Tichuan, misual pahnihte kha an rawn kal leh dawn tihna ni maw..eng nge min tihtir leh dawn?” Ka ti a, ka uak zui tuar tuar, ka zu in rim chu ka ti hleithei lo a ni e. “Ka hre lo, eng nge an tihtir dawn che tih chu” a ti mai a. Ni e, ani hian engmah a hre lovang. Hre mah se min hrilh lo vang. A phone a rawn ri leh a, “Aw, a rawn chhuak tawh e” a ti a. A ngawih det hnuah, “A rui deuh tih loh chu engkim a tha” a ti leh a, “Aw le. “ Tiin a dah zui nghal. 

Hun chu eng chen chiah nge kal ka hre lo. Ka lo muthlu leh lâwp lâwp thin bawk nen. Thawm ri nawk nawk leh tlan khup khup niawm tak hi ka hria a, ka harh hleithei si lo, “Khawiah nge midang? Khaw nge?” Tih ri niawm takte chu ka ralkhat hriat rei ruai. Reivakloah min rawn phelh sawt sawttu awmin ka hria a, thei leh thei lo va hawi chhuakin ka beisei loh tawpin Hmingduhawma ka hmu ta. Ka mumang emaw ka ti hman a, mahse, “Savate, Vanlal, i tha em? Keimah ka ni” A ti mawlh mawlh a. Mi pakhat hian ka chhip atang chuan tuiin min rawn leih huh ta thut mai, ka ding vat a, mahse, ka harh ta. A jacket phelhin ka lu chu a rawn tuam vat a, min kuahin, “Kal vat ang” tiin min chhuahpui ta nghal, ka harh ka han ti tak naa ka la ni chuai mai. Midangte chu ka phek en vek a, an buai nuaih ni maiin ka hria. Kawngkapui chu a lo inhawng sa reng tawh a, step zawh chhoin kawngka pakhat a lo awm leh a, an han hawn chuan ramhnuaiah kan chhuak ta. Ramhnuai ti ila hnim leh phul ka hmuh vang a nia, ka lo rindan kha chuan khawpui chhung tu emaw building hnuaiah ka awm emaw ka tia. A mak hle mai. Motorah min hlang lutin harh deuh si, harh chiang si loa ka awm chung chuan min tlanpui ta vawn vawn tih ka hre thei. “An hrai rui tihna em ni ang?” Mi pakhatin a tih chuan, “Ka hre lo, mu harh lawk rawh se. Pu Zara te chu i be leh tawh em?” Duhawma aw chuan a ti a. 

“Ka’n bia ang e” a tih ri ka hria, ka muhil zui leh daih. Chuti taka ka zu in a thawk na chu a mak hle a ni. Ka harh chuan khumah ka lo mu tawh a, ka hmuh hmasak ber chu ka nu a ni. Thlaphan hmel taka min lo entu chu melhin, “Nu” ka ti sap a. “Lalpa, ka va lawm tak êm. Bawihte, i him tawh a nia aw” tiin ka kut chu a fawp mawlh mawlh a. Mami leh Chhana, u Fela te pawh ka hmu. Ka hawi kual chuan ka mutna chu damdawi in niin ka hria, zu ruih vanga damdawi ina han awm tawp mai chu! Thawh ka tum chuan ka lu a hai muai muai mai. “Mu rih rawh, i tha tep ang” u Fela’n a lo ti vat a, min ngaihtuah hmel ve hle. A hnua ka hriat leh danin ka zu in vang chauh ni loin damdawi chi khat ka thisenah an lo hmu tel a lo nia, chu chu che thei lo tura min tizeng vek thei a lo ni. Chu chu Lungtuama inpuan danin thupek a hmuh angin min  ka chahthlak lai khan min lo jection a lo nia, ka hre miah lo tihna a nih chu. Chutianga an tih chhan chu khalai hmun atanga thawm nei lo leh awlsam taka min hruai chhuah theih nan a lo ni. 

Rukbo ka nih thu leh him dama chhanchhuah ka nih thu chuan Zoram khawvel a fan chhuak a, kei erawh kha damdawi kha zu nen a thawh kawp avangin a thawk chak lutuk a, enkawl ka la ngaih avangin damdawi inah ka la awm. Duhawma’n min ngaihtuah takzet. A hun awl zawng zawng chu ka bulah a hmang a ni hawt e. Tlema ka ziaawm tak hnu leh ka rilru pawhin fim lam a pan tak hnuah chuan zawhna ka ngah ta kher mai. 

“Engtin nge ka awmna hmun kha in hriat? “ Tih chu ka zawhna hmasa ber a ni.

“Msg i rawn thawn khan a chhanhim che a ni. Kha number msg i rawn thawnna kha ka lo save tlat a, pu Rama kha a hmaa kan driver rawih thin niin dawr bungrua a lo tihchingpen avangin kan ban a, ka hmu zui tawh lo. A phone atanga i msg ka dawn tak si-ah chuan kawng chu a kaw zui ve ta mai. Ka bia a, ka biak chhungin a awmna location kan chhui thei ta a, Police nen kan va nangching mai, a harsa lo, a lo rui angreng bawk nen..” a ti mawlh mawlh a. 

“Chuan nu Pari te an man ang tiraw?”, ka hriat châk em em pahnihna a ni. “Aw, mahse, engmah an la sawi duh lo, an la pha ngat ngat. Mahse, rei an ngawi tawh lovang” a ti nghut nghut a. Zawhna ka ngah si, mahse, “Engkim hriat nghal vek tum rih suh, i rilru a la inpeih tawk lo” doctorin a tih avangin ka insúm hram hram a ni. Ka nu pawh ka bo atang khan enkawl ngai khawpa a buai avangin chawl hahdam turin an t a, kei ber hmuh ka ni ta bawk a, a hahdam ve tawh êm ang chu. Lungtuma pawh a tum loh leh beisei loh lamah kaihpen a ni ta chu a nia. A pawi a ni, a inchhir ve tawh maithei. Sual hian hnehna a chang hlen thei si lo va. 

Damdawi in aṭangin ka chhuak ta a. Min ngaihtuaha min lawmpuitute an rawn lang ve reng mai. Lawmin thlamuang viau tawh mah ila, rilru mawlhtu ka la nei rûn a, ka nu diktak chu a la dam ang em? Tih hi. Ka nu leh Duhawma bul bakah police te bulah min rukbo chhunga thil thleng zawng zawng ka sawi tawh a, hma an la ve zel ang chu maw. 

Kan khaw lama hawn a hun tawh si, Duhawma chuan, “Haw lo mai rawh, ka venhim phakah awm la ka duh” ti mah se; kan khua Chhawrpial lamin ka lung a lên ve tawh êm mai a, haw lo thei lo niin ka inhria. Ka nu pawh a tha tawh viau e. Ka bo nî khan u Zonuni chuan min lo call nasa ngang mai a, switch off a intih zel avangin a thinte a rim hlur tawh a niawm e. Tichuan, amahin khatlaah chuan a va kal a, ka nu pawh chu a va zawng ta chuang lo. Zanah Mami’n a va bia a, chhuak dun emaw min tih vangin leh min biak theih loh vanga a mangangin a va call a lo ni. Ani U Zonuni chuan thil awmzia lo hrilhin an buai chho ta a, ka nu pawn Mami te chu a lo be tho a niawm e. Mami’n Duhawma a lo be bawk, tiang chuan tu khaw kha hriat lohin keimah vangin ka bo zan chu an lo buai deuh nuaih tawh a. A tuk atang khan chhung leh khatte inhrilh kualin Duhawma’n chauh pawh sawi loin police a lo pun bawk. A tir phat atangin nu Pari te a rinhlelh vangin a nuhrawn chu a lo mitmei ru reng tawh a, mahse, an fimkhur ve êm avangin eng a ang hleithei lo. Chhawrpial lam an mangang bawk. Kan khaw lamah chuan min zawn vak ngaihna awm hek lo, mahse, chanchin an ngaichâng reng a, ka thianteho phei chu min zawng tura Aizawl rawn kal an tum nghe nghe a, chutiang khawp chuan min ngaihtuah a ni. Ka lâwm takzet. 

Hmingduhawma leh ka nu pawh keimah vangin ka tel lova an inhmachhawn a ngai ta nge nge a, Duhawma hian kan hriat lohin thil tam tak a lo chhui ve fê tawh a, pari a rinhlelh rukna a reh thei lo bawk a, tichuan, ka nu nen ṭangrualin Nu Pari bulah ka nu chuan ka nuteii hmuh a duh thu a sawi ta a. Ka bo tih an hriat hma atang khan nuteii chu an lo be thei tawh lo hrim hrim a lo nia. Tichuan, nu Pari kar chhuah nan nuteii hmuh chu an tum tihna a nih chu. Chutah tak chuan ruahmanna an lo nei sa diam a ni ngei ang. Nu Pari chuan, “Kei pawn ka be tlang thei lo hi lawm ka mangan tawh, Tei bona nen hian ka ngaihtha tawh lo lutuk asin. Ka try zing tawh, an inah pawh ka va kal tawh, mahse, an lo awm lo a, an inneitu te lah an awm bawk si lo, tihngaihna ka hre bik lo. “ A lo ti deuh thlap a. Duhawma nen ka nu chu Khatlaah va kal ve leh ngatin nu Pari sawi ang khan an in chu pawnlamah a lo inkalh thap mai. An in luahna te lah thu han zawh dawn lahin an awm bik bawk si lo, mahse, ka nute rinhlelh tizual lo tur tawk velin chumi zan chuan number dang daihin nuteii chuan ka nu a rawn bia a niawm e. “Chanchin ka lo hria a, ka mangang lutuk, ni 3 kalta khan Doctor min refer angin gauhati-ah kan chhuk a, niminah min zai nghal a, ka phone ka tibo lehzel nen, eng nge chanchin?” A rawn ti ta zawk hlauh mai. Duhawma hrilh ang zelin ka nu chuan a bia a, an pa Pu Hminga nena an inbiak leh takzelah chuan nuteii thusawi chu a dik mai awm mang e tiin ani chu an ngaihven zui ta lo a niawm e. Zemabawk khawtlangin min zawn beihpui an thlak a, veng thenawmte pawn tlawmngaih an chhuah nual hlawm, kan phu loh malsawmna a ni chiang mai. Duhawma meuh pawn enthla reng mah se: nu Pari chu rinhlelhawmin a awm duh miah lo, a vawikhatna a ni lo a niang tih mai tur a ni. Mahse, he ka bona hi a nu thihna nen inkungkaihna nei tlatin a hria a, tichuan, ka nu nen khunkhan taka sawidunin ka lo rindan ang chiah khan, ka nu chuan Duhawma nu thattu chu min hringtunu a nih thu leh chutiang a nih avanga Duhawma nena kan inkar titawp tura min hrilh a nih thu pawh a lo hrilh ta ngei a, hei hi chu Duhawma tan thil thar a ni lo. Mahse, ka buaina ang tho kha an buaina a ni ta. Duhawma chuan ka nu nia inchhal chu a nu damlaia an awmpui, chhawrpial khua kha a ni lo tih hriat tawh thu leh chuvanga a ruka buaipui chho a nih thu te chu ka nu a lo hrilh ta vek a, Engtin nge nuteii thlalak chu a neih tih ka hre lo, ka nu a han hmuhtir ve chuan ka nu chuan a nau, keima nu Hruaitluangi kha a ni lo tih a vawikhat hmuhnaah a chiang ta hle, tichuan, tha thlah hauh loin an pahnih chuan kawng an dap ve reng a, Police te pawh an thawhpui tha hle. Hmasawnna em em awm lo anga a lan laiin Duhawma chuan nu Pari nunhlui leh sulhnu a lo chhuina lamah Pari chu drugs dealer a lo ni thin tih leh jail pawh vawi 2 lai a lut tawh tihte nen lam a hrechhuak ta a, a pa nen an inneih tirh khan a la naupan êm vangin khatiang si sê kha a lo ngaihven bik lo nen, chutiang mi a lo nih takah chuan ka nu te nen pawh thawkhoin ka nu pawn jail a tan phah a nih kha. Ka nu jail atan lai khan Jenny hi a piang tawh a, jail aṭanga ka nu a lo chhuah hnu, kum 2 ka nih laia kan khuaa min rawn hmuh ṭum bak kha tuman kan khaw mi leh saten an hmu zui ta lo a ni. Pasal a neih dawnah ka nu a rawn hrilh hre ve a, chuan, tun hnuah kei Aizawla ka awma nu Pari te nen kan inhriat hnuah ka nu a be leh a, mahse, khatih laia ka nu diktak anga va be thintu kha tuna ka nu lemchang hi a ni tawh ngeiin a rinawm. Heng thil hi chu anmahni nu Pari leh nuteii ten an la sawi ang chu, engkim hretu awmchhun an ni tlat. Duhawma nu kha ka nu khan a that tak tak em tih pawh chiang taka sawi theih a ni tlat lo. A chhan chu Duhawma sawi dan takah, thah ringawtna chhan tur a nei lo, an awmpui mah nise; Duhawma nu kha hna thilah nitina chhuak a nih vangin a nu ai mahin Duhawma kha a khawih tamin a enkawl tam zawk tihtheih a ni, Duhawma nu paw’n nau angin a en a, pu Sanga pawn a duat ve hle. Chutiang taka duata hmangaihtu ka nu chuan engvangin nge a awmna nu chu a thah ang? A lo that ta a nih pawhin a phênah âwm a awm ngei ang le. Nu ber thih hnu pawn a chhuak mai lo va, nu Pari leh pu Sanga inneih hnu lawkah a chhuak ta kha a nia, he laia mak deuh mai chu, Pari nen khan inhre lo an lo ni miah lo, Duhawma te ina a awm hma khan Pari te dawrah kum chanve dâwn a thawk a, an inhre lo thei lo. Tin, Duhawma te in a chhuahsan hnuah khan a reh zui ta hmak a, mahse, Jail a tan khan tudang ni loin Pari bawk hian a bail chhuak a niawm e. Chu chu Duhawma’n a chhui chhuah theih chin zawng a ni. A bak chanchin dang chu ṭhenkhat ten an la sawi êm ang chu maw. 

Ka nu anga lemchang mai maiin a nunna thâp meuh leh a pasal fanaute hriatpui thlapa nu Pari hnung a zui hian chhan ṭha tak a nei ngei bawk ang. Chu thurûk chu puanzar a ni ang em? Ka nu min hringtu nen chuan kan intawng leh ang em? Khawiah nge tunah te hian a awm ang le? 

“Savate, thu lawmawm leh thu lawmawm loh hrilh tur che ka nei a, eng zawk nge i hriat duh?” Duhawma mitmeng chu a tak rân mai a. Min tihlauthawng alawm le.

“Lawmawm loh chu a sawi loh theih loh mi?” Ka ti sep a. Ka ngaihtuahna buai lutuk vang hian thu dengkhawng dawnsawn hi ka hlau a ni ber. 

“I hriat ngei a ngai sia” a ti sup a. “Sawi la” tiin ka melh ralh a. Ka kut chu vuanin, “I nu leh min enkawltu kha khawvelah a awm tawh lo a ni.” A ti dam thlup a. Ani hi chuan dâwt min hrilh lovang tih ka chiang.. ka kut chu a hum nghet kher mai..kei erawh za lo takin ka nui ta tawp a.