Hmingduhawma 11

HMINGDUHAWMA (11)

Ziaktu : Toni Ràlte

A khi sawng a, nu hmeltha tak mitmeng chu vertherna hlirin a khat a ni ber e. Mahse, ani hian min mamawh tlat, chuvang chuan ka zàm dawn bik lo a ni tawp mai. An duh ang ka tihsak loh chhung chuan ka nunna an la zuah dawn tih ka hria. Kha lehkhaa thu inchhu lut kha in hriat chak ka ring. 

“Ka nu, ka nu diktak leh min hringtu hian min mamawh ve tawh si a, tin, ka bialpa Hmingduhawma nu thattu ngei a nih avang leh Duhawma’n a nu thattu a chhui thar leh avangin man a la tawk ngei dawn si a. Chuvang chuan Duhawma kan tlan chhiatsan dawn a ni. Ka nu nen nunthar dina bulṭan ṭha leh turin hmun dangah, ram dangah kan kal dawn a ni. Dinhmun khirh taka ka nu leh kei min dintirtu chu Hmingduhawma a ni a, chuvang chuan a hmuh phak lohah kan kal bo ang. Min lo ngaihtuah lo la, engtikah emaw kan la inhmu leh ngei ang tih ka beisei. Ka nu hian dinhmun chhe taka a ding chung pawhin min pai tlang a, khawvel êng min hmuhtir ve a, chuvang chuan min mamawh laia tlanchhiat chu ka thei ta lo a ni e. Duhawma bulah pawh he thu hi min lo hrilhsak mai dawn nia aw. “ Tih thu a ni. Khawl chhuta thawn chu rinhlelh an hlauh vangin an ngam lo a nih ka ring, ka kutziak ngei hrechiangtu ka nuin a hmuh chuan rinhlelhna a neih zui an ring lo a ni ngei ang, a chhan chu tunah hian ka nu chauh an hmachhawn lo va, a nu thattu hriat chhuah nana thi leh thau pawlha bei mektu ka bialpa Duhawma an hmachhawn tel tlat a tin ni. 

“I kutziak tel lo hian kan thawn anga a ni mai alawm. “ Pari chuan a ti nghat a. “Ka nu chuan a ring ve thei hauh lovang” ka ti hmiah. 

Ṭawng leh tuma a an zuau laiin, “Ka nu hian Duhawma nu chu a that a maw?” Ka ti sap a. He thil hian ka rilru a mawlh thin reng a ni. “Aw” a ti mawl tawp ringawt, mahse, chiang taka ka en avangin a mitmengah chuan zâmna a lo lang zawk mai, ka hai hauh lo.. 

“A nih chuan Duhawma te awmpui kha ka nu hi maw lo ni a?” Ka ti leh ngat a, “Aw ni chiang e” tiin a nui hak. 

“Chuan, in lo thawk dun a, Duhawma nu thih hnuah Pu Sanga i nei a, Pu Sanga i neih theih nan ka nu hmang ṭangkaiin a nu chu in that ta a. A dik em?” Ka ti sak sak a. 

“Thil i hre thei hle mai. Duhawma hrilh che chu a ni lo phawt mai a tiraw, hehe, engpawh nise, i hriat tam lutuk chuan i buai mai mai ang. Kan duh ang ti la, tichuan, keini pawn i nunna kan zuah ang. “ A ti hmuar hmuar a. 

“Ram danga kalbo turin maw? “ Ka lo ti nghek a, thil awihawm loh lutuk a nih hi. “Ram danga awm i hreh viau a nih pawn kawng dang a la awm thei ang. Nangmah hringtuin tual a thah miau avang leh a mi thaha chu i bialpa nu a lo nih si avangin i bialpa leh hringtu che inkarah duhthlanna i siam a ngai dawn a. Chhawrpiala i nu erawh a rilru hneh a harsa lovang.” A ti zung zung a. Duh ai chuan thil a ngai awlsam deuh a ni, a uitê, duh duha a kaih kual theih emaw min ti a niang e. “Tuna i duh ber chu Duhawma hian a nu thattu chhui chhuak lo se tih a ni a, mahse, i thil sawi dan kalhmangah a nu thattu chu ka nu hi a ni tih a hre tawh a va nih hmel si ve. Shillong-a a zin chhan pawh kha i hre ngei ang chu tiraw? “ Ka han ti kual ve ngial a. A rilru tihbuai ve hrim hrim ka duh a ni ber. “Chu! Shillong tlangah te a lo zuk zin a ni maw? Kei chu a pa nupui mai ka nia, ka hriatpui ve hleinem. A dik a dik chuan i hre châk bawk a, ni e, Duhawma hian a nu thattu chu i nu tih a hre tawh maithei, ka chiang ngam lo. “A tih chuan, “Chutah chuan engvanga lo hlauthawng ve viau nge i nih? Min rubo tur khawp khawpin” ka ti ta chat a. A mitmeng a buai nak mai. Mahse, inthunun tum zet hian,”Kei chuan tualthah chungchangah kut ka sil, ka duh chu i hriat kha, Duhawma kalsan la, Judy nen an innei ang, chu chu ka lungkham ber a ni.” A ti a. 

“Kalsan mah ila Judy chu a nei chuang lo vang, i fahrawn rilru hi i hrechiang lo em mai “ ka ti puat a. Ka chal thi kha car driver-in lapua min rawn pekin ka hru fai a, a rawn thi leh ser ser avangin ka hru nawn leh châwt châwt a. Nâ phei chu a awm tawh lo, ka rilru erawh a nâ, remchang ka hmuh rual rualin he mihring Pari hi thisen ka chhuah ve dawn tihah ka chiang viau. Tunah chuan tihtheih ka nei rih tlat lo. 

A sana a bih zauh a. “Ka kalsan phawt ang che. Ngun deuhin lo ngaithla la, lo inngaihtuah ang che. Tunah hian Chhawrpiala i chhungte an buai viau tawh a, i bialpa ka fahrawn Duhawma pawh che buai tak a ni. Duhawma kalsana Chhawrpiala i nu nena in nufa reng nge i thlan dawna nangmah hringtunu ngei a damchhunga jail tantir theitu Duhawma nena inneiha Chhawrpiala i nu ngei pawh hmuh tawh loh a ni e. I hrechiang em? Rilru fim tak khan aw. Naui” ti charh charhin a ding a. A thusawite chu ka ngaihthlak uluk êm avangin ka chiang thawkhat viau. Mahse, “Chhawrpiala ka nu chungah eng thil emaw thlentir in tum em ni? Duhawma ka thlan chuan..” zaidawh lui hram hram hian ka ti a. 

“Sibuta anga motor sut thawi thuak ang mai mai kha chu a ni tawh lovang.” A tih chuan ka tho hluai, Driver khan min rawn nem thu leh nghal a, ka fiah ta kuar chu ka melh ngai melhin ka ngawi ta tlawk tlawk mai. Nu Pari pawh chuan engmah sawi zui loin min chhuahsan ve mai. Keimahin pindan ruak takah chuan ka mal leh ta ngawih ngawih mai. 

Mahse, rilru fim taka ka inngaihtuah ve chu a ngai tak tak ta tih ka hai lo, he mite hian an ti mai maiin an kalpah mai mai bik lo tihah chiang phawt ang. Thil hi a bultê aṭangin ka ngaihtuah a ngai tlat. Buaina erawh ka nei ta thuai a. Sibuta kha nu Pari te suttir a ni tih ama ka atang ngeiin ka hria a, engvang nge ni ta ang? Ka nu lo zin tum hun lai tak a ni a, lo zin theih loh phahin a tupa a buaipui ta kha a nia. Ka nu chu nu Hruaii ka nuteii hian a hmu hreh nge nu Pari hian a hmu duh lo ni zawk ang? Chhawrpial khua kan nih thu nu Pari’n a hriat atanga min ngaihven thar tak thut hunlaite ka ngaihtuah lêt a, ka nu hming pawh a la hre thei a, kan thlalak pawh thawn turin min hrilh kha a nih kha, mahse, ka nu khan hre lo angin a insawi a, a hnua ka bula a rawn insawifiahna kha awihsak rih phawt ila. Nu Pari chuan engvangin nge ka nu chu hmuh a hreh ve ringawt ang? He lai hi buaina a ni ve thei tlat. Tichuan, Duhawma nen kan inzui chho ta a, inthentir tumin theihtawp a chhuah a, ka nu leh nuteii te ngei pawn an thurualpui a nih kha. Engtin nge nu Pari chuan ka nute pahnih thluak chu a suksak a, an rilru a hneh theih? Duhawma thusawi, “I nu diktak venhim a duh vang a ni” a tih kha a dik a nih chuan, Chhawrpiala ka nu hian Duhawma nu thattu hi nu Hruaii a ni tih a lo hre sa vek tawh tihna a ni ngei ang. Chu chu lo dik angah pawm ila, ka nu pawn engkim min hrilh mai loh chhan kha a nau, rei tak a hmuh tawh loh venhim a duh vangah ngaihsak bawk ila, ka dem lem lo bawk. Mahse, ka ngaihtuahna tibuai em emtu chu Duhawma hian a nu thattu chu ka nuteii a ni tih a hriat reng si chuan, engvanga la mantir lo nge a nih? Ka bula sawi a hreh a nih pawhin rei tak chhung a beihna te kha engvanga la thupbo rih tlat nge a nih ang tih hi. 

Sawi chhuakin mantir se, kei leh ani inkar buai tur hi a duh lo a niang ti dawn ila a nu ai chuan ka pawimawh zawk ka ring lo. Mantir lo pawh nise; a nu thattu fanu nen inlaichinna neih hi a duh lo hul hual ang. Eng emaw inthup chu a la awm a ni. Bang nghengin ka thu a,ka hmazawn bang an hnawih var vû chu melhin thluak na vek khawpin ka han chhût leh ta ngat ngat a. 

Kei hi engvang berin nge min rukbo tak ang aw? Lehkhaa thu inziak ka copy theih nan ringawt maw? Ka ring lo. Kha lehkha kha thawn chhuak pawh ni ila ka nu chhawrpial hian ka kutziak ngei pawh ni se, a ring dawn lo bur, tin, he buaina chungchang hi a lo hriat ruk vek tawh phei chuan a hnena khatiang lehkha thawn kha a ṭulna a awm miah lo. Ka nuteii leh Nu Pari te thiltih a ni tih a hre dawn tho tho. Chuti a nih chuan engvanga min ziahtir tum hram nge an nih? Ele! Duhawma bula ka nuin ka lehkha kha a hmuhtir theih nan..hmm, a dik chho dawn e. Tichuan, lehkhaa inziak ang khan kei leh nuteii te chu khawi hmun emawah kan kalbo ang a, boruak a daih hunah te chuan kan let leh mahna. Tichuan, Duhawma pawh a beidawng ang a, kei pawh min hua ang a, min bansan ang. Naa, ka ngaihtuahna chu a nawi telh telh hian ka hre mai, a laimu hi ka la thleng pha lo nia hriatna ka nei. Duhawma zin hlan khera min rubo te hian chhan a nei ang em? Kha lai kawng kha zawh ta lo ila min rubo tho ang em? Ka zawh dawn tih an hriat lawk chu ka ring bik si lo, college atang khan min vil ru reng tawh tihna a ni thei mai ang em? ..

Chair bula tui min dahsak chu banin ka han in khawlh khawlh a, ka harh sawtin ka hria. Mahse, thil ka ngaihtuah nasat poh leh ka buai zawk nia ka hriat avangin hahdam taka mut veng veng ka tum rilru ta a. Hunin ka nunah awmzia a neih rih miau loh avangin ka rilṭam hun chu chaw ei hun, ka mutchhuah hun chu mut hun a ni deuh tawp mai. Engtia rei nge min hren beh ang aw. 

Darkar engzah chiah nge ka muthilh ka hre lo. Kawngka hawng thawmin min tiharh leh ta a, chumi ṭum chuan Nuteii leh nu Pari te an ni. Eitur an rawn keng leh a, artui kan thar leh chaw tlem bakah dal hâng an rawn keng a, ril a ṭam tawh chuan a ei theih mai zel e. Ka ei nghal mawlh mawlh a, hmuhnawm tih hmel zet hian an pahnih chuan min melh reng ringawt, ka ngaipawimawh duh lem lo. Ka ei zawh meuh chuan ka puar ta pang mai. Chaw hi a pangngai pawn ka ei tam lutuk lo a, ka thau lo reng bawk. “Eiturte min la pe phal law law a nih chuan toothbrush leh hmaiphihna bakah towel ka mamawh hle mai.” Ka ti zuah zuah a, zâm lo min ti dawn tih hre tho mah ila ka mamawh ve êm a tin ni. 

“He lai hmuh hi kan chhuahsan ṭêp” nu Pari chuan a ti a. Lo melh phawk hrain, “Ngati maw” ka lo ti vat. 

“In kalbo tawh dawn. Lehkhathawn ai chuan i ṭawngkam ngei hria se an pawm zawk ang. Chuvang chuan i nu emaw Duhawma emaw i biak kan phalsak dawn che a, duh i thlang thei ang. Mahse, sawi tura kan duh chin chauh i sawi tur a ni. Tichuan, ram dangah thawnbo i ni ang a, i nu leh midang an him thung ang. “ Nu Pari bawk chuan a ti leh charh charh a. Nuteii erawh a  bawp khawkherhin thlamuan hmel zetin a ṭhu ngawi reng. 

“Eng nge ka sawi tur chu?” Awlsam zeta ka lo tih chuan an pahnih hmelah chuan mak tihna ka hmu nghal,. “I chiang a maw?” Nuteii chuan a ti ngial a. Mak a ti tih a thup seng lo a ni ber, a hma lawka inla ngeng tlat, thisen chhuah hial ngai khawpa luhlul kha tunah ka hnipin ka nem leh ta lutuk a, an hamhaih a nih hi. 

“Chiang e, mahse, khawi hmunah nge min dah in tum tih erawh hriat ve ka duh. Chuan, engkim ka inenkawl zelna tur senso in tum dawn a nih loh erawh chuan in duh ang chu ka tihsak thei lovang che u. “ Inringtawk zet hian ka ti a. An inmelh zawk ringawt. Min la ringngam chiah lo a ni maithei. “Senso chu kan tum vek dawn. Thailand emaw Malaysia emawa i awm a ngai dawn, i duh zawk zawk i thlang thei ang. “ a ti a. “Ani hi a rawn kal ve dawn lo em ni? Amah nen a ni lawm ni tlanbo tura min duh” tiin Nuteii chu ka melh a. 

“Ruahmanna kan thlak alawm. A awmzia chu Duhawma kan chet khalh dawn tihna.. kei chu tlanbo ve ka ngai lo. “ Nuteii chuan a ti a. “A nih a hnu kei pawh engvangin nge ka tlanbo a ngaih ang? Tihsual ka nei hleinem” ka ti chang fak a.

“Tlanbo i ngaih nachhan tur maw? I chhungkua leh i bialpa te him dama an awm nan leh keini min tihbuai zui tawh loh nan..” nu Pari chuan a ti a. “Ka kalbo loh chuan eng maw thleng ang?” Cho hmel fe hian ka ti ve leh ngat. Anni hi mi mâwl tak chu an ni miah lo, ruamhmanna pakhat a tlawlh paw’n ruahmanna dang an nei thei zel a, a hma aṭangin an lo inbuatsaih tawh tih a chiang. 

“Sibuta atang khan ngaihtuah mai rawh, naupang dang zawng zawng awm laiin engvangin nge sibuta kha sut a nih bik? Zemabâwk-a Pi Zari te in hnuaia college zirlai pahnihte bakah Chhawrpial khuaa a fanu bo vanga mangang em em pi Remruati te hi kan mi leh sa ten midang tam tak karah pawh an hai ring suh. “ Tithei intih hmel zet hian a ti leh sak sak a. Ka chhungril chu rumin mangang ru viau mah se; a langah chuan ka zâm duh bik lo. 

“Ka nu chuan Aizawl a rawn thleng tawhin ka ring. “ Ka ti sap a. 

An pahnih chuan nui dunin, “Thleng tawh chiang e. Mahse, kan hmel a la hmu lo. A chhan chu tihtur pakhat kan la nei a..” nuteii chuan a ti a. Ka ngawi reng ringawt. Dawhtheih loh hmel zet hian nu Pari chuan, “Aw le, engpawhnise kha hei hi lo byheart la, i nu leh Duhawma bula i sawi tur a nih hi. Darkar khat hnuah kan rawn kal leh ang a, engkim kan tifel ang. “ A ti a. A ding hluai. 

Lehkha chu lain ngawi rengin ka chhiar a, ka ner sawk mai. Kal ta mai lo chuan nuteii zawk chuan, “Duhawma hian a duh tak tak che emaw tiin inngaihlu suh, Chhawrpial khua i nih vang chauha hnaih che a nih hi. Chutah pawh a nu thattu fanu i nih vangin..” a ti sak sak a. Ka han melh kâwk, “Nang ang nula naran, hmeltha lem si lo, hausa chuang bawk si lo hi Duhawma chuan a enliam mai mai ang che. Mahse, Chhawrpial khaw nu, a nu damlaia amah enkawltu kha vawiin thlenga a la chhui avangin Chhawrpial nula sihhnip tak chu a hmanrua ni turin a hnuktel ve che a nih hi. Buaithlak takin chu nu a mi zawn mêk chu nangmah hringtu hi a lo ni ta si a.. a buaithlak ta nek mai. “ Nu Pari’n a tih zuah zuah lai chuan harh chhuak thutin “Chuti a nih chuan engvanga ka nu hi mantir lo nge a nih si a? Kan ina in inhmuh ṭum kha i la hria em? Khami tum khan an awmpui thin, a nu thattu nia an rinhlelh an hmuh zui tak loh kha i ni tih a hre miah si lo va, ani chuan a nuhrawn thiannu angin a ngai zawk che, kha a mi zawn kha i ni hauh lo. “ Ka tih chuan an mitmeng a danglam ta deuh, phur lutuk hian nuteii chu kawkin, “A awmzia chu nang hi ka nu i ni lo, ka nu anga lemchang tura nu Pari rawih i ni tihna” ka ti ta chiam a. Karei! He thil hi alawm buaina bul leh a hmawrbawkna tur chu..ka ngaihtuah vak vak lai khan engvanga ngaihtuah chhuak zo lo nge maw ka lo nih le. Duhawma’n ka nu leh nu Pari inhriat thu leh ka nu a hmuh tawh thu a sawi kha chuan an awmpui leh ka nu chu mi thuhmun an ni tih ka ngaihtuah pha lo atin ni. Tin, an awmpui kha Chhawrpial khua a ni tih ka hre tlat lo bawk, ka nu min hrilh dan pawh a ni hek lo. 

“Nang hi..” tih leh nu Pari’n min rawn hnaihchilh nghal a, hmai thal hâ hian, “Eng nge? In thuruk chu ka hailang ta nge nge e. Kei min rubo lehzel hian in buaina chinfel aiin a tipunlun zawk dawn, in va chawh dawn tak..” ka ti leh nghek, tunah tak hi chuan phurna hlirin ka khat a ni ber,. “Chutiang sawi ngam tur i ni hauh lo, kan mi tâng, kan hren lai i nih hi, duh chuan i nunna hi kan la thei..” a ti fiak ṭhak a. 

“La rawh, mahse, buaina chu in pumpelh phah dawn chuang hauh lo. Ka nu anga lemchang hian Ka nu diktak hmuh a nih hunah rorelna a la hmachhawn dawn, chutah chuan nang hi hnuhtel i ni lo thei lo” ka ti sak sak a. Mahse, an nui ! Tiel leh deusawh rawngkaiin min nuih mawle..a awmzia ka bo ta deuh. “I nu diktak maw? Hei i nu diktak alawm ani hi..midang hmuh chhuah tur an awm hleinem..” elsen zet hian nu Pari chuan a ti leh a, “A nih chuan a nu thattu hmel a hai thei a maw? I fahrawn, i hlauh ruk em em, a ro chanai laksak vek i tum Hmingduhawma khan a nu thattu, amah enkawltu kha a hai a maw?” Tiin za lem lo tak hian ka nuihsawh ve ta chiam a. An thinrim hmel chu hmuhnawm tak a ni. Min pawhsawm vek duh hial hmel an pu, mahse, an ti mai rih lovang. Chu chu ka chhungrilah hriatna ka nei ve tlat, an thurúk, an buaina lak atanga talchhuahtir thei chabi kawltu ka ni tlat. 

“Ka nu rawn zin in hlauh chhan pawh nang hi a nau Hruaitluangi i ni lo tih a rawn hriat chat dawn vang a ni. Chuvanga Sibuta chungah pawh kut lek in ni. U Zonuni, an tetlai atanga ngaisang em emtu che kha a hming pawh i lo hre tawh lo vel a tiraw? Ka nu, hehe, a hmel phei chu i hriat dawn loh lutuk vang leh u Zonuni’n ka nu diktak i ni lo tih a hriat dawn avangin, min rubo ta chúk chúk a, keimah hmangin in buaina chinfel in tum ta a. Pi Pari’n rosum a duh a, nangin i sahimna. Chung zawng zawng phénah chuan thil dang a la awm ta chéu, chu chu ka nu diktak hi in hria. A chungah eng nge in tih? Chu chu hriatchhuah a nih loh nan in pahniha tangrualin hetiang hian in che ta a nih hi..a dik tiraw? Chuan, khaw nge ka nu chu a awm le?” Ti fak fakin an pahnih chuan ka melh tawn ta sek a. 

Nuteii hmai chu a dang deuh sawtin ka hria, nu Pari erawh a mitmeng a sen ràm a, min tina duh hmel a pu a ni. An ṭawng mai loh avangin, “Ka nu awmna min hrilh a nih chuan, in buaina hi ka chinfelpui ang che u.” Dam deuh zawk hian ka ti a. Ka rilru tak tak pawh a ni, mahse, ka nu chu lo hmuchhuak ta pawh ni ila buaina chuan min la kiansan dawn chuang lo, Duhawma nu thattu a nih si chuan..

“A thi tawh” nu Pari aw chu ka bengah chuan ring tak a ni. Ka tawlh hnung hrat a, dawt a sawi beiseiin ka va en a, a mitmengah dâwt ka hmu lo. Ka chil lem khawlhin, “A ni lo, a thi lo’ ka ti sap a. 

“A thi tawh,.” A ti leh tawp a. Vin zet hian, “A nih chuan engvangin nge ka nu anga lem chan a ngaih a? Engvangin nge kan chhungkua min bum?” Ka ti tuar tuar a. Ka ṭap thawthâng a ni ber e.

“A chhan chu i nu thianthaber ka nih angin i nu khan a thih dawnin nakinah a chhungten an rawn zawna a fanuin hmuh a duh hunah kei hi a aiawha lo hmachhawn tur chein min intiamtir a ni.” Nuteii chuan a rawn ti zawi sap a. Ka thu hnawk... 

“I rilru a nain a buai tih kan hria, kan nawr na rih lovang che. Mahse, i insawi tawh angin i nu chungchang kan hrilh tawh che a, kan duh ang min tihsak ve ang.” Nu Pari chuan a ti a, a aw pawh a dam angreng viau. 

“Nuteii khan buaina chinfel tur a nei ve em ni?” Tih pahin chiang zetin ka han melh dun a,. Ka meng zim sawt bawk. Tunah tak hi chuan ka rilru hi fim chikimin a fim tlat. “Aw.. i nu anga insawiin nang leh i chhungte a bum a, case a tling alawm chu ringawt pawh chu..” nu Pari zawk chuan a lo tihsak zung zung a. 

“A nih chu..” ka ti tawi tak ringawt. Ngaihṭhat vak loh hmelpu, hmel pha dai hian min chhuahsan ta a. Tunah chuan min thah nachhan tur an nei ṭha tawh hle mai. Min thlah zalen chu an ngam dawn teuh lo mai, an thurûk ka hre fai ta leuh si a, ka nu chu a thih tak tak erawh ka la ring thei chuang lo. Ka hmuh chhuah an hlau ang a, thi angin an sawi a nih ka ring emaw ka nu hmang ṭangkaiin eng emaw thil tum an nei leh a niang. Tunah chuan ka nu diktak zawng chhuak tur pawn ka damkhawchhuah ngei ngei a ngai. An rilru a buaiin ruahmanna thar an siam chawp leh chûk chûkin ka ring a, chuvang chuan hun tlem ka la neiin ka hria, tlanchhuah ka tum dawn a ni. 

“Lalpa, i awm tih ka ring a, khawngaihin he lai hmun atanga ka chhuah theihna kawng sial thei turin finna min pe rawh. Hmanrua tur min kawhhmuh hram rawh” tiin ka thinlung zawng zawngin Pathian ka au ve a ni. Min ngaithla ngei ang tih pawh ka ring a, a chhanna erawh ka hriatthiam a ngai dawn a ni. Keini Kristiante hi chuan kan nat tawpkhawk te, kan lungngaih leh lâwm lai ber, beidawn tawpkhawkah pawh auh tur leh belh tur Pathian kan la nei tal a, ringlo mi kan tihte pawn hetiang hun khirh an hmachhawn chuan an pathian an ko ve tho, innghahna tur leh a tawpkhawka lum luhna tur hi kan la nei a, chu chuan thlamuanna min la pe ve hram hram thin. Pathian awm ring lo Atheist kan tih te hi chuan chhelna bak innghahna tur an nei miah lo mawle, chuvang chuan kan la vannei ka ti lo thei lo. 

Ka mut a chhuak lo va, ka ril a ṭam hek lo. Ka mut chawrh chawrh chuan ka ngaihtuahna ka seng leh vak vak dawn tih hriain pindan zau lo takah chuan ka vei tuak sek a, exer ka la a ni ber, inbual fai hiar erawh ka châk takzet. Ka inthiar pahin ka taksa lang thei chu ka tihuh a, ka nuai pah bawk. Chu chuan min tiharh lehzual a,. Kawngkhar pawn zawk chu a rawn inhawng a, driver leh amah ang tiat tho mipa hi an rawn lut a, gamchha-min rawn kensak hlauh mai. Dar engzat nge ka zawh chuan, “Zan dar 8 a la ri lo” a ti sup a. Driver ang lo takin a mitmengah min khawih chak hmel ka hmu ve lo bawk a, ka hlau hran lo. 

Inthiarna pindanah khan a va lut a, pipe chu a va khawng keuh keuh, tui haw muang lutuk kha a va siamtha a nih ka ring. Driver khan tui in tur ka mutna lamah a va dah bawk a, a chhuak tur chuan min melh hrukin, “I nuamsa viau lo maithei a ni” a ti a. Ka lo bangbo angreng. A mitmeng verther zet lah chu ka mitthlaah a cham reng lehnghal a. Tlan chhuah dan tur ka ngaihtuah lui ngial a, min dahna teh hrep chu a dangdai êm a, kawng a ping hlein ka hria. Ka tlaivar deuhthaw a ni e. Tumah an rawn lang leh tawh der si lo, ka hrilhhai letling phian mai. Ka lo chhing ve hlek a niang, ri deuh sawk thawmin min tiharh a, ka mut a la chhuak ngei mai. 

“Le, intiharh rawh le..” nu Pari aw chu ka rin aiin a zangkhai, nizan lamah ruahmanna fel tak an siam leh tawh a nih ka ring. Peih lo zetin ka thu chhuak a, ka ham bâi bâi mai. “Pawnlam chanchin i hre duh em? “ A ti leh a, ka lo bu nghat. An mi tâng ni mah ila tihduhdah leh sawisak ka la tuar lo va, a zia phian. 

“Nangmah zawn beihpui an thlak tawh mawle..mahse, vanduaithlak takin an hmu dawn si lo che a..” tiin a nui sak a. 

“Nih chuan eng maw ka tih dawn?” Ka ti liam puat a, min elsen kual velna ka ngaithla peih rih lo. 

“I nu number ka dial ang a, i sawi tur chin kha i sawi ang. “ Inringtawk zet hian a ti a, ka lo nui hawk. “Ka tih ring duh suh” ka ti chang fak a. 

“Chiah maw” tia nui tet tetin a phone chu a hmet malh malh a, tu emaw a call zui nghal. Nuteii (Hruaii, a nu lemchang kha) a rawn lut ve mek bawk. Nu Pari chuan speaker a on a, mipa hian a rawn chhang a, “I awmna hmun turah i awm tawh em?” Nu Pari chuan a ti a. 

“Aw awm e, hei ka hmu pha reng e” a rawn ti a. 

“I silai i check tawh maw? “ A ti leh kher, “Engkim a tha vek e” a rawn ti a. “I silai kha lek la,.kap rawh ka tih rualin an monu, Sibuta nu kha i kap nghal dawn nia” nu Pari chuan a ti ta a. Ka che zawk mai, mahse, zan lama mipa lo lut ve khan min rawn chelhbet hneh ngang mai. “Aw le, hei ka hmu pha reng e..” mipa chuan a rawn ti leh a. An dah ta. “Tikhan i hrethiam em? Tunah hian Chhawrpialah i vahpa te unau leh in monu vilin kan mi leh sa an awm mek a ni. Tin, i nu enthlak hna thawk an awm bawk” a ti zuah zuah a. 

Thinrim lutukin ka melh a, ka khur titih, chu pa lah chu a chak phian a. “Min tihlum zawk mai rawh, nang mi tenawm thlah zalen ai chuan thih ka thlang zawk” ka ti tuar tuar a. Ka biang a thip zawk. “Khatiang thil tenawm leh dâwt muhlum hmanga zoram mipui bum ai chuan thi ila ka tan a ropui zawk. Mi tenawmho, chu chu in hria em? “ Ka ti leh chiam chiam a. 

Ka sam chu rawn kek lehin ka dulah a rawn tlawh nghek bawk, ka tlu thlawrh a, mipa khan min thlah zui bawk. Pari chuan min rawn bawh bet a, ka sam chu kek nawk nawkin, “Hmeli, buaina i nih hi buaina. Ka thiltum i tihchhiat hi ka phal lo ka tih tawh kha, i ti dawn khawp e. I la nuamsa deuh a nih dawn hi. “ A ti tâwn tâwn a. Ka tal vak vak a, a hmai te pawh chu ka ham nawk nawk mai, a duh ang chuan min sawisa hleithei bik lo. Ka han chet ve tak tak chuan nuteii chuan min rawn ṭhelh ta a, “Thu i awih loh zel chuan i na zual zel ang.” A ti a, “Nang mi bumhmang kha lo rak ve suh. “ Ka lo ti ṭhawt. 

“Phuar hlawm rawh” tiin nu Pari khan mipa kha thu a pe a, hruizen fei hmel zet nena min phuarbeh a tum chuan ka tal ve zel si, a ti hleithei bik lo. A dawhthei ta ngang lo nge ka bekah min hnek ta chawrh mai a, ka zal der. Ka kut leh ke phuarin chairah chuan min thuttir a, ka bek chu a na zawk zawk mai. 

“Mi nghaisak te chu ka thiam zawng tak alawm. “ Nu Pari chuan min kal hual vel chung hian a ti a, “ka lawm e” tiin ka ṭhen lui sak. 

“Taksa mai ni lo, rilru thlenga na tlawk tlawk leh rum vawng vawng tura mi siam te hi ka talent ve a nia, thih i châk bawk a, i thih hmain ka thurûk engkim hi hria la, phuba lâk chaka dam duhin ka ke i la fawp ngawih ngawih dawn a ni. “ A ti leh charh charh a. 

Ka ngawi tlat. Min thah mai loh danah ka dam hi an tan a la ṭul tih ka hria, chu chuan hun tlem ka la nei tih min hriattir nghal bawk. A phone a ri ral ral a, lehlam ṭawng ka hre pha lo, “Theihtawp kan chhuah ve zel a nia, kan hmu leh em em ang. Hruaii lah biak theih ni bawk si lo, kei tak hi a nia mangang tawh chu ni..” a ti vei hluak hluak a, harh chhuak thutin, “Min pui r’u” ka ti tuarh a, nu Pari chu a petek zawk mai, mipa khan ka hmui a rawn hup nghal. 

“Tuna min lo betu kha i nu a nih kha..i au ri a hre pha lo hlauh kha thil lawmawm tak a ni.” A ti leh sur sur a, hmeltha nunrawngi a nih ngei hi. Hmingduhawma ro chan ai a duh vang lam ai mahin thildang thuruk dang hi a la kawl a ni. Chu chu ka hre ngei tur a ni. Engti zawng pawhin. 

“Nakinah i taksa leh thinlung nghaisa turin a rawn thawk leh ang. Tunah chuan i bialpa bula thiam taka lem ka chan leh a ngai rih tlat. A nih aw..” tiin ka khabe a rawn tuai zauh a, rum elkhena lo melh bak tihtheih ka nei rih lo. Tunah chuan ka mal leh ta, ka insangphek tlat tur a ni tiin ka infuih a, ka nu ka ngai ngawih ngawih, hetiang hian min rawn hmu se a thidang thei hialin ka ring. Nikhua ka hriat theih ata a kuthmawr pawn kut min la thlak lo. Mama pawn a thinrim fê pawhin ka hming pumin min ko lawlh a, chu chauh pawh chu ka ṭahpui thin, chutiang khawpa an dimdawih leh keh thei dawma an dawm ve kha ka ni a, misual kuta hetia ka han awm ta mai hi nâ an ti ngawt ang le. 

Ka kut chu ka han tiche dawn a, a phuar nghet mah mah a ni, tal chhuak thei pawh ni ila kawngkapui ber kha ka hawng thei chuang lovang. Code an hmangin ka hre tlat, ka tan hawn ve chi rual niin a lang lo. Ka rilru a insual buai nuaih nuaih ṭan, an duh ang khan ka nute chu be ta mai ila tih ka ngaihtuah lahin an tan ka ṭangkai zui tawh dawn loh avangin min thah lohna chhan tur a awm dawn si lo, ka thi dawn rau rau a nih chuan misualte zalen nana thih ai chuan an buaina thlentirtu ni tura thih ka duh zawk hrim hrim. Thih thu ka ngaihtuah lai chuan ka ṭim sung sung mai. Kan khaw nula U manuni thih ṭuma mak kan tihzia leh min ṭhâwnzia kha aw, nula ṭhalai, vanglai hmang mek, nat lawkna em em pawh nei lova a han thi ringawt khan kan khua kha a nghawr nghing takzet a ni. Mi an thi fo a, ka ngaihtuah zui ngai lem lo, ka la thi ve dawn tih hi ka ngaihtuah phak ngai meuh lo. Mahse, tunah thih hlauhawmah ka awm mek a, thi ta ila, ka thlarau khaw nge a kal ang? Chu mawlh chuan a ni min tihlaua min tikhur chu. Piangthar ang chuan ka inhre ve, Campingah lutin ka inhlan ve thlap, inkhawm hunah leh ṭhalai activities-ah chuan ka lang ve zat zat, zuk leh hmuam, ruihhlo ka ti lo bawk. Mi pawi ka sawi hmasak em em pawh ka hre lo, mahse, ka thlamuang chuang hauh lo. Ka chiang thei tlat lo a nih chu! Thih thlamuanna neih hi a lo awlsam lo hle dawn a nih hi. 

“Lalpa, eng pawh tawk ila, ka thlarau chhanhim hram ang che” ka ti sep a, chutiang ṭawngkam te chu engtin nge ka chhamchhuah theih ka hre lo, a tawpkhawkah chuan rilru a lo chak deuh a niang e. 

Kawngka chu a ri rek a, driver kha a rawn lut, pindan a up bawk a, a zu in rim chu a nam nghal hak mai. Ka hmaah kawisawi zet hian a ding a, gate vengtuah an dah a nih hmel. 

“An thu awih mai la, phuarbehin i awm lo mai tur, i fing lo a nih hi..” a ti nawk nawk a. 

Ka ngawi reng.

“I ril a tam em? Eitur ka pe ang che aw..” a ti hniam leh suk a, ka kun chhal chu min rawn kuai dak deuh awrh bawk. “I hmeltê hi chu a chhe hran lo mawle, i mawngbawr pawh a lian thawkhat e, vawiin chu tumah an rawn kal dawn lo bawk a, inpuitawn ang hmiang” a ti ham ham a, a zu rim chuan ka luak a tichhuak lutuk, mahse, insum ka ngai. Sir lama thle deuh hian, “An lo kal tawh dawn lo maw?” Ka ti a. “Dawn nang, an haw daih, chuvang chuan kan pahnih chauhin free tawkin nuam kan chen thei..huh..” tiin a nui huah huah a, ten hle mah ila he pa hi a ṭangkai thei maithei. Hei ai hian la rui se a tha zawk hlei hlei ang. 

“Lo kal ta thut si se, an hrem dawn che sin” ka ti leh hram a. 

“A teuh lo, ka va thlah vek alawm. “ A ti leh a. Insangmarin, “Nih chuan i thu thu lawm..mahse, min phelh phawt la” ka ti a. 

“Lawk..lawk, kawngkhar ka lock phawt ang, a tha em?” Tia pai nawk nawkin kawngkapui zawk kha a va pan a. A rawn lut leh thuai, min phelh pah chuan, “I ril chu a ṭam em? “ A ti leh su su a. “Dar engzat nge?” Ka lo ti daih thung. 

Sana a bun loh avangin a kekawr ipte ami a phone chu a hmet eng a, “Dar 11 a pel chauh a ni. Hun kan ngah, nileng hun kan nei” a ti chhar chhar a.

“Ka ril chu a ṭam a, chuan zu in tur ka duh ve bawk” ka ti fiah kâk a. 

“Aw..tehreng, zu lamah buai a ngai lo, ka ngah alawm. Ngaw rawh, eitur chu ka han la ang e. “ Tiin a pai chhuak leh nawk nawk, mahse, vanduaithlak lutukin min phuartu pa kha a rawn lut ve ta tlat mai le. 

 Driver pawh a ding chut a, “E..eng nge “ a ti deuh nawk nawk. 

“Engvangin nge i phelh?” A ti thum dût a. 

“Inthiar ka duh a” ka lo ti vat.

Uluk zeta min melh rulhin, “Va inthiar rawh, nang pawh kha han mu hahdam rawh. Ka lo veng ang” tiin driver kha a va melh a.

Ka ruahmanna rawn tichhetu chu thinrim zetin ka melh kâwk ringawt..