Hmingduhawma 10

HMINGDUHAWMA (10)

Ziaktu : Toni Râlte

U Zonuni chu chaw ei turin kan sawm ngial na a, a vawikhat rawn lennaa chaw ei nghal ngawt chu a hreh ve nge ni, mawihnai takin a hnar a. Bawngkawn chhim vengah a thleng a, inbe zui zel tura inthlahin kan invailiam ta a ni. A chanchin sawi nak nak pahin rawng kan bawl a. Chhana ta pek chuan “U Zonuni hi an sawi dan chuan maw, nuthlawi virgin an tia” a ti zuk a. Mami nen , “Eng a?!” Kan ti rual ṭhawt mai. 

“In la hre miah na nge?” Mak tih hmel deuh hian a la ti zui. “Sawi mai mai teh” ka lo ti vat a. 

“Ih, englo, Patea sawi a nia, U Zonuni hi a tleirawl lai atang tawha hmelthaa sawi hat a ni tawh , a han nulat  chhuah phei chuan a hmelthat bakah a nungchang a mawi si, inleng pawh a ngah thei viau a niang. Chuan, kan bialtu pastor nau fel deuh hian a hèl ve a, chupa chu tlangval fel leh hmel pawh chhe lo tak, a û te bula chawlh hmanga rawn zin a niawm e. U Zonuni pawn a lo iai bik lo hle a, an chhungkua an lo harsa ve bawk nen, Chu pa lah hna nei lai niin khawpuia khawsa an ni bawk a. A chhungte pawn an duhpui ve viau,. Tichuan, an sawi rem ta a, man hlan ni  pawh an tiropui lutuk an ti, khaw nâwtin ruai an ṭheh mup mup a niawm e. Mipa lam an hausa bawk a, u Zonuni chhungte lam pawh an lawm ve hle. Tichuan, Aizawlah innei turin an chho ta a, an inneih ni pawn khatih lai huna zoram milar te pawh an fuankhawm an ti ve lawm, kan va hre pha ve tawh chuang lo va. A pasalte lam kha an neihnun bakah mi hriat hlawh tak an lo nia, mi ṭha chhungkua an tih ang kha maw. An innei ta a, inneih zan chu kan bialtu pastor, mopa û khan an hunlaia hotel changkang bera an sawi room a booksak thlap an tia, an intifai zo mu tura hotel an panna kawngah motor dang nen insuin, mopa chu ka pawh chhawn lohin a boral ta a ni. Inneih thutiam an chham vek tawh a, nupa nun an la hmang lo mai chauh a nia, chuvang chuan u Zonuni chu nuthlawi virgin an tih phah ta a ni..” a ti ta mial mial a. Chutiang sawi awm vel kan lo hre ngai lo chu a mak hran lo. A chhan chu u Zonuni hi sawi tawh angin nula senior, pasal nei lo tura kan ngaih tawp tawh kha a nia, a nun erawh a zahawmin a invawng em em a, eichawp dawr nghak vein vantlang dawr tih hial khawpa lûn a nia, tupawn an nelin an ngamtlak a, mahse, tupawh an dik lohnaah a zilhhau ngam. U Zonuni chunga lungawi lohna thu chhakchhuak hi kan la hre ngai miah lo, chutiang mihring chu a nih tlat avangin a hun kal tawha a vanduaina chu tuman puanzarsak an châk lo a nih a rinawm. Chutiang taka a lo vanduai chu ka khawngaih hle. Keini ho pawh hian nu Zonun tiin ko ta ila a mak lem lo naa kan u laklawh tawh a, bakah nula a la nih miau avang khan han nu daih kha kan inthiam lo ve deuh bawk a ni. 

Duhawma a awm bawk si lo, tui lo zetin ka zirlaibu ka bih ve a, rilruah eng vak mah a lang thei chuang lo. Mami leh Sanga te chu zawi tê tê hian an ṭawng a, an inzilh leh a ni maithei. Ka phone ka phawrh leh ta nge nge a, facebook ka luh chuan Ruang chhar thu ka’n hmu nghal pang a! Aw kan tunlai khawvelah chuan ruang chhar pawh hi a mak tawh lo, ngaiah te hian kan nei titih tawh ni maiin ka hria, Tualthahna lah a hluarin mu hlum, kaihthawh zawh loh lah an tam tawh bawk si. Thenkhat tlema rau chang sang inti deuh te’n khawvel tawp a hnaih tawh thu entir nan an lo hmang ve sek bawk nen,. Ni e, kan khawvel hi chu a tawp ve ṭêp tawh maithei. Kan ram chhung chauh ni lo khawvel ramdang han thlir pawh hian. Chu Ruang chhar pawh chu hmeichhia a ni a, a chhiat tawh deuh avangin a thihna a rei ve deuh tawh a ni maithei. Tu emaw fanu duatlai emaw tu emaw nupui niin tu emaw nu pawh a ni thei. Ka hlauh ber chu tuma dawm hlum loha thih a ni, ka chhungte thihna atan pawh ka duh hek lo. Duhawma’n min lo call ta a, ka la rang ngei mai. “Ka va ngai che ve” a rawn ti nghal thâwr a. 

“Kei pawn” ka lo ti ve vat. “Lehkha i zir em?” A tih chuan ka zir ve nel nual thu ka hrilh a, “Naktukah ka mi hmuh tum ka va hmu ang a, a rang thei ang bera lo haw ka tum ang. Sibuta a tha zel em?” A rawn ti zangkhai vah a. A ṭhat tawh thu leh naktuk lama an haw theih tur thu ka sawi chuan, “Chuti i nu pawh a lo la zin hman dawn chu, zin turin ngen rawh” a ti a. Mak ka ti deuh, “Ngati nge? A duh kher pawn ka ring lo” ka ti ringawt a, “Ka hmu ve châk alawm bakah i nuteii hriselna a tha si lo va, nakina a inchhir loh nan hmu se ka duhpui mawle” a tih chuan a dik viau mai ka ti rilru a.

“Ka pa nen kan inbe zo chiah a, vawiin chawhnu lam khan ka pa private room a kâng a, lehkhabu a kang chhe nual hman a niawm e, a ui khawp mai. “ A rawn tih chuan ka beng a verh angreng hle, “Ehe! Engtin nge a kan theih a?” Ka ti hû a. 

“Electric lam a chiangkuang lo a niang, an siam tha vek tawh a nih hmel, ka nu album pawh a lo kang chhe hman nual a, ka rilru a na deuh. “ A ti zawi raih a, “Nih chu mawle, a van pawi tak. Mahse, tihtheih a awm tawh si lo va. “ Ka ti ringawt. Ka nuteii nen kan inbiak tawh leh tawh loh min zawhna chu kan la inbiak loh thuin ka chhang a. “Chaw pawh ka la ei lo, ka zuk ei ve lawk ang e. “ Tiin a dah zui ta rih. Kei pawh lehkhazir rilruah a lut thei si lo va, ka mu ta ringawt. 

“Vanlalhmangaih” ti tu aw lo chhuahna lam nia ka hriat chu ka melh nghal a, tumah ka hmu lo. Mahse, ka bengah chuan a fiah em em lawi si. Ka hawi kual vak vak a, chutah kan pindan kawngkhar chu rawn inhawng riai riain hlimthla hi a lo lang a. Kan in luahah hian mutna pindan pahnih awmin, thlang lam pindan tê zawk chu Chhana’n a luah a, pindan pakhatah Mami nen khum hran ve veah kan mu a ni. Bungrua kan ngah lo bawk a, kan leng nuam tawk viau. Hlimthla chu a rawn hnai zel a, a tir chuan Mami emaw ka ti hman  a, mahse, Ka piah lawka mu mek Mami chu a hnâr  bawrh bawrh si. Ka mumang a ni lehpek ngei ang. Mahse, ka harh tho niin ka hre si, maimizial chu niin ka hre bawk si lo. Hlimthla chu a rawn hnai zel a, amah tak erawh hmuh tur a awm lo, ka hlau lutuk chu au chhuah ka tum a, ka thei ta lo, tah chuan maimizialin ka awm tih ka hrethiam chiah. Ka ke zungpui chu tihchêt ka tum ta ngar ngar a, a harsa viau. Chu hlimthla chu sitting room light kan chhit ên phak chinah chuan a tawp ta a. Ka melh lo thei si lo,. “Vanlalhmangaih, thlarau rethei tak hi chawlh hahdamtir tawh rawh” nichin maia min kotu aw ngei mai khan a rawn ti leh tliang leh ta ral mai le. A aw chu a fiah fel kher mai. Chu bak thudang engmah sawi ta lo chuan a ding ta reng a, ka mangang lutuk chu ka rilrua ṭawngṭai chungin ka ke chu ka leng âwrh âwrh a, ka harh ta. Ka rak ṭhawtin ka hria, mahse, ka thiante chu an harh pawn ka hre lo. Hlimthla lah chu hmuh tur a awm tawh hek lo. Zawi nguai hian tui ka ban vat a, ka in ta nghek ringawt. Ka lungphu a su dup dup mai a, ka hlau takzet a ni. Ka mut hmaa ruang chhar vel kha ka mangphan ta em ni ang le. A aw lah kha sawifiah tur awm lo khawpin a fiahfaiin a chiang ropui mai si. 

Zahzelah ka phone ka hmet eng a, zing lam dar 2 a lo ri ṭep tawh a lo ni. Muthilh leh vat ka hlauh avangin eng eng emaw ka en kual a, a tawpah ka hriat loh karin ka lo muhil a, hlauhawm lam chu ka man chhunzawm ta lo hlauh. 

Ni zawng zawngah Thawhlehni leh ningani hi ka ning ber thin, a rei bik hian ka hria. Phur fahran loin ka insiam a, ka nu nen kan inbe zuai, kan khaw lama hruai haw turin pu Liana te motor nen khaw thenawm an pan mek a ni. Rem leh rem lo chuan, “Nu, karleh a la awm tho a, lo zin tho la..” ka tih chuan, “Ka hre lo le, i û te ngaihdan dan a ni mai. “ A ti ve mai a. Ka nu tel lo va an buai lutuk chu ka ring tawh lo, a lo zin theih beiseiin ka mood chu ka tiṭha lui hram hram a. Break laiin Papuii chapal kaihna a chah vangin super glue nen char tumin kan bei a, ka kut ka char tel ta roh si, kan nui vak vak mai. A tawpa tawpah kan tithei hram. Hlimi’n, “Khatiang siam ngaite class kal nana lo hman, paih daih rawh” a rawn ti hram a, “I ka kha ka char phui palh ang e “

 Nui chunga ka tih chuan a tum hmak, min chhan leh hmain call ka dawng ta sia, ka kalsawn ta daih. Nuteii a lo nia, ani hi ka va be hmasa lutuk lo va, ka inthiam chiah lo, eng nge a an tihte pawh zawh ve a that nen, ka â ka tih tawh kha.

“Ka u nen kan inbia a, rawn zin hman hram te kha a tum leh a, a theih chuan a tihzia dawn em mai..” a ti luam a. “Nia, kan haw a la hun rih chuang lo bawk a, e taka! U Zonuni nen kan inhmu a, nimin khan..i hria ang tiraw? U Zonuni, kan khaw nula senior ber a ni tawh, a hmu ve châk lutuk che a. “ Ka ti ta hluai a, kan khaw mi leh sate han hmuh chu a châk ve hle turah ka ngai. Mahse, ka beisei loh deuhin, “Zonuni maw? Ka va hre mai lo” a ti ta a. 

“In tleirawl lai pawn nangmah ang nih a chakzia thute a sawi nasa thin alawm, hmu la chuan i hria ang mawle..” ka ti sar sar a, “Nia hre maithei, ka dam that tak loh atang hian mi hming te hi ka lo theihnghilh leh daih thin a. E chuan! Engtin nge kan inhmu tawh tih a hriat theih? I hrilh em ni?” A rawn ti a, a awkiah chuan a lungawi vak lo em mawni le tih tur awki dang a inphum ru tlat. 

“Hrilh nang, engtin nge a hriat pawh ka hre lo, ka nute hian an lo sawi ve te pawh a niang chu..chuan, i lo ngaihdan ang em em kha chuan kan khuaah i mualpho hran lo a nia, tupawn an hmu ve châk chein ka ring. Naktuk tlaiah hian in veng lamah kalna tur a nei tho a, ka rawn kalpui pah dawn nia” ka ti zung zung a, dar a rawn rik tak avangin kan dah ta rih. 

Kan class bang, kawngkama chawhmeh eng ilo an lo pho chu Mami nen kan en dun a, kan hriselna kan ngaihpawimawh viau vang pawh ni em em loin thlai lam hi kan ei nasa, in hrethiam mai ang chu maw. Kan inlei zo kan kal leh tur chu min kotu an awm avangin ka hawi let thuai a. Nu Pari leh nula pakhat ka la hmuh lo, hmelṭha leh pian nalh zet mai hi an lo ding ran mai. “Eng nge ni ta?” Va kal hnai hran lo chuan ka ti a. 

“Hei ani nen hian inhmelhriat ula ka tia, Judy a nih hi, ka monu hual” a ti deuh kher a, nui lui ve sakin ka kut ka phar chhuak a, “A ni maw? Tei ka nia” tiin Judy chu ka en a. Ka kut chu ner nâng chung hian a melh zauh a, min chibai tak mai loh avanga dahthla lehin, “Tikhan a zo em? Kan hmanhmawh deuh a, kan kal mai ang” ka ti a. 

“I va chaltlai reuh tak,. “ Nu Pari chuan a ti hlak a. “Ih maw, naui, i lo hriat ve mai mai a tan, Duhawma hi lo beisei ve tawh suh ang che. Ka ta a nih hi, i phutawk hre rawh aw. Tin, Duhawma hian a duh tak tak che emaw ti suh, hmanrua i nih hi..nakinah i la hrethiam mai ang. “ Judy chuan min tham loh hmel fe hian a ti hlang hlang a. Ka zâm duh lo lui tlat thung. “A hmanrua mai chu a va duatin a va ngaihtuah si ve a..a mak hle mai” ka ti hriam hraih a. 

“A nuhrawn runluih nan hian hmeichhe dang pawh a lo duat fô tawh alawm..i hrethiam em?” Tiin a nui har har a, a hmel chu a ṭha, mahse, a sual a nih hi. 

“A ni mahna, kei chuan ka ringtawk thung alawm. “ Ti leh sakin ka hnungchhawn a, kan kal zui hmiah. Awmze nei lova inrunluiha inṭawng elsen vel hi ka peih lo, ka ning. Mami pawn engkim a hriat ve vek avangin, “Mi hi an zakthei lo thin e, Judy pawh kha a chhiat loh nen a â ka ti mai. U Dawma tan pawh a zahthlak alawm le” a ti niah niah a. 

“A mimal nuna inrawlh ve sek a tum thin vang a niang nu Pari pawh ka nu tia a koh duh loh ni..” ka lo ti ve a, ka bula a sawi pawn i nu Pari a tih deuh kher zel kha. Nuhrawn zawng zawng hi an sual vek lo va, langsar taka fel duam si, chhungril lama fahrawnte îtsik tlat te pawh an awm, thenawm khawvengten an fak rawn em em te pawh hi ro thu hlaah chuan khua an hmu hleithei thin lo. Ka nu hian min hrilh fo thin, “Pasal chhia tha te pawh i la nei ve ang, fa hmasa nei tawh chu a hnuah a buaithlakna a awm thin, chuvang chuan tlangval hnahkhat hi zawng hmasa phawt rawh” tiin. Nuthlawi / pathlawi a va hnualsuat lam ni loin karah hrin hran fanau an lo awm tawh chuan hnawk a tam thin a, thatnaa hneh theih miah loh fahrawn pawh an tam, chutiang chiah chuan nuhrawn pahrawn an ni tih inhre hlur, pawisawilo naupangte chunga rilru dik pu hleithei miah lo pawh an awm. Khawvel a la ni miau a! An dinhmuna kan din ve phawt loh chuan tumah va dem ngawt chi pawh a ni chuang lo, chuvang tak chuan khatiang dinhmuna ding lo tura lo invenlâwk thiam a pawimawh ta a ni. Hmingduhawma te nufa pawh demawmna insawisak tawn dawn ta se an nei ve vein a rinawm,. Duhawma pawh hi a ngeng ve si, nu Pari tan pawh mil a har ve tho hian ka ring. Mahse, pa ber thu hmu lova a fahrawn mimal nuna lo inrawlh ve chhên tur khawpin thuneihna a nei lo ka ti ve tlat, a inrawlh chhan lah sum leh pai vang bak a nih a rinawm si loh, hei hi chu a dik lo a ni. 

Duhawma erawh a reh ta vang vang, a hmanrua chu ka lo ni tak tak ang em tih erawh rilruah a awm ve deuh. Mahse, keimahah hian thlamuanna, amah rinngamna hi a awm tlat a, ka hrethiam lo, han rinhlelh luih tum pawn a harsa lam a ni. Chhana leh a nu inbe zo pawh a rawn tûm lian viau mai. Mami nen kan inmelh ralh ralh a, kan zawt hreh bawk si. Amah zawk chuan, “Ka nu hi chu ka ngei thin e, Desi kawng kal a lo ko peng a, “Nangni ang hnamdang hi chu kan thlahteah an awm ve kan phal lo, Chhana pawn Aizawlah bialnu tha deuh a nei tawh” a lo tih khum leh vel a niang, Desi thiannuin min lo hrilh a, ka nu chu ka va chhuahchhal a, kan inhau hrep mai. “ A ti hluk hluk a. Pi Rii hi chu aw, a buaithlak a ni. 

“Desi chu a rilru a na em? “ Ka lo ti vat, “Nat ve lohin, min be duh tawh lo, min block daih alawm” lunghnur zet hian a ti a. 

Ka khawngaih hnûp hnùp ngei mai. “Kan haw tep alawm, haw veleh hmaichhanah Desi chu i duh takzet a nih chuan i nu aiawhin ngaihdam dil la, ani pawn a hrethiam mai ang, i nu mizia hre lo pawh a ni lo va” Mami chuan a lo ti a. 

“A thuhrimin Desi te chu mizo angin ka ngai, an pu te pu lehchhawng feee atanga mizorama lo awm tawh an nia, amah Desi tak phei hi chuan an ṭawng pawh a thiam mang hleinem. Nia, haw phawt ila a dik mai ang. Ka bialnu hmasa ber a nia, inthen tur anga ka ngaihtuah ringawt pawn hrehawm ka ti, amah ka khawngaih bawk si.” A ti nghut nghut a. Ni e, a vawikhatna hi chu kan lo la na tlang ṭheuh a nih awm hi a, Duhawma ka hrechhuak lo thei lo. 

“Hello” ka ti vak vak a, ka aw a hre tha thei si lo,. A hnu deuhah a fiah ta deuh, “I chhuak em ni? A va clear lo ve” Duhawma chuan a rawn ti thum dût a. Ka chhuah loh thu ka sawi chuan, “Zanin la laa rawn haw ka tum nen, ka pi damdawi min rawn chah leh chawpchilh sia, gauhati-ah zuk lak a ngai a, ka rawn haw thei ta lo. Naktuk zing tawkah ka rawn haw mai ang” a ti zung zung a. 

“I thil buaipui chu a fel thei maw?” Ka tih chuan, “Umm, a fel thawkhat chuan ka hria. “ A ti a.

Nu Pari leh Judy te nena kan inhmuh thu ka hrilh chuan a rum nghut a, “Judy chu a va intithangtlawm duh zawk ve, i nu Pari hi chuan a ngaisang ve ngawt mai che tiraw?” Tiin a nui huah huah a, “A hmelthat em kha, duh ta che” ka ti leh hram. “A nungchang a chhia, ka duh lo. “ a ti hmuk. Ka nuih a za deuh. “Hei gauhati-ah chuan ka kal dawn mek a, i duh leh lo muhil mai rawh, Mizoram house-ah Lunglei lam thiante tlawh ve zuai ka duh a,. Zu ka in dawn lo aw” a ti deuh thlap a. “Ka awih lo” ka ti tak nain ka ringhlel tur a ni lo tiin rilru ka siam thung a. Nizan ka mumang kha hrilh ka tum nen, thil dang kan sawi kai ta daih sia, ka lo hrechang leh tawh lo. Zanin chu rilru pe deuhin lehkha pawh ka zir ve thei deuh e. A sawi ang khan a rei deuh dawn avangin ka mut a lo chhuak ve deuh nen, ka mutsan ta a. Mumang bo ṭhak khawpin ka muhil ve ta e. 

 Zingkarah u Zonuni’n min call a, “Lalte, vawiin chu i nu tlawh pah chuan khatla chu min va kalpui rawh aw, thil tui deuh ka treat ang che” a rawn ti zurh zurh a, “Yes boss” ka lo ti var. Mami pawh sawm ve kan duh tehlul nen, an department-in chawhnu lamah museum an tlawh dawn a, attendance an la dawn si, a kal ve thei ta lo, Chhana hi chu veivah peih chi a ni lo va, sawm lo mah ila a vui lem lo. Zirtawpni a ni bawk a, ka thawh rualin, “Morning savte, lam ang ka lo let e” tih ka hmuh vang pawh ni loin ka phur hle ringawt, friday hi chu a nuam ve alawm maw. Papuii a rawn kal lo, nimin tlaiah a nu a rawn phei a, vawiinah amah Papuii ha an entir dawn a ni. Kei pawh chawhma bak ka kal dawn lo bawk. Tiffin pawh ka pai lo va,. Lunch break-ah chuan phur takin college chu ka chhuahsan ta a. Kan in lo lam kawngah kalin khua a vawh ve deuh ṭan avangin kawngkam dawra 2nd hand kawrlum te chu kal pahin ka melh pah vel mai mai, thawmhnaw lei hi ka thiam loh em vang a nia ka nu pawh rawn zin se, amah nen bazar ka duh em em ni. Main road ka pawh hma deuhin step thui vak lo zawh a ngai a, step ka pen kai dawn lai mekin ka bulah car pawl hi a rawn ding dawt mai. “Bawihi, min lo hrethiam lawk mai ” pa pakhat, pangngai hmel tak hian driver seat atangin a rawn ti lauh lauh a. 

“Aw, eng nge ni ta?” Ka ti ve vat a. A phone chu khawih mual mualin ka hmai bulah a rawn lek va a “ He pa hi helai hnaiah hian i hmu ngai mial em?” A ti a. En chian tuma ka han kun hniam deuh lai chuan ka beisei loh tawpin ka hnung lam atang chuan rawmawl hian ka hmui an rawn hup thut mai. Kan awmna bul chu tuikhur thlang lawk a ni a, mi veivak an tam ngai lo naa tuikhurah chuan insu tawk hi an awm ve deuh reng thin. Nichin step ka zawh hma pawh khan ka chhak tuikhurah chuan naupang 3 vel chu ka hmu reng, ka hmuia an rawn hupna vang chu nge ni ka zawi ta rawih rawih a, ka khaw hmuh pawh a thim zo ta vek mai le. 

Ka lu rawn na fek fek chuan min kai harh a, ka meng lui hram hram. Ka han men pawh chuan eng vak ka hmu chuang lo, a thim mup ringawt. A tirah chuan ka hamhaih a, ka awmdan chu ka hrethiam lo. Ka rilru a fim chho tial tial a, thawh mai ka tum chu ka rum kawk, ka zawi lutuk a, ka chakna zawng zawng chu lakbo ang mai a ni. A thim rapthlak bawk si,.thei leh thei loin ka mutna bul vel chu ka han dap a, chhuat vawt thlur niin ka hria, cement a ni ngei ang, a chan danah. Phuar ka ni lo va, ka tlanchhuah theih an ring lo a niang. Ka lu lah chu a na tluk tluk bawk si. Mahse, heta awm tur hi ka ni lo tiin ka han insangmar a, “Min pui r’u” ka ti ṭiau a, ka aw chu a chhâng ṭiak mai, tu khaw khain an hre pha lo tawp ang. Engvanga hetia min kidnapp ringawt nge maw an nih le? Eng pawi nge ka sawi a, ka tih ni..a ngaihna ka hre lo reng reng. Ka harh thut, ka phone ka dap a, ka lo ak tawh lo, ka bag pawh ka dap hmu zo lo. Chhetê talin ka awmna chu eng ve se tih dan dan a awm mai tur. Chau zetin ka mu leh thlawrh a, ka rilru a mang vek. Mumal takin thil ka ngaihtuah hleithei lo. 

Ka lo muhil leh hlek nge ni, kawngka inhawng thawm niawm tak hian min tiharh a, ka hawi phawk hrâ mai. Ka hma zawn atang chuan êng hi a rawn zâm lut ta reih a, a rawn êng lian telh telh, ka lo melh reng a. A tawpa tawpah chuan pindan chu a rawn êng ta pup mai, ka mit vai nasa lutuk chu ka khap sek sek a,  chuta ka han hawi chhuah leh chuan ka rin loh leh beisei loh tawp thil ka hmu ta a ni. 

“I lo harh tawh maw? Ka nau” a ti sap a. Maktia la melh rengin, “Nang maw nute, eng nge a awmzia?” Ka ti ta a. 

Pindan kila chair chu va lain uluk deuh hian a han ṭhu tê tê a, a hmelah chuan dam lohna leh hrisel lohna hmuh tur a awm lo. “Min beisei lo tih chu ka hria alawm, mahse, hei hi ka tih a ngai tlat si a.” A ti zawi raih a, a hmaa nelawm tak thin kha nelawmna reng a nei tawh lo. “Eng nge a awmzia? Eng thil nge i tih hi?” Ka ti tuar a, mahse, ka ka aw chu a ring thei chuang lo. 

“Hahdam rawh, he thil hi tih ka duh bik lo a nia. Ti lo thei lo dinhmunah min dah a nih hi” a ti a. Ka bo lutuk chu ka â mai dawn, ka rilru pawh a hah rih lo, ka sawi thiam lo, engkim chu mumang ang riakah ka ngai. 

Ka ngawi tlawk tlawk a, ka ngaihtuahna tlemzia hria niawm takin, “Ngaihtuah hah vak duh suh, engmah i ngaihtuah chhuak chuang lovang, nakinah i la hrethiam mai ang. “ A ti leh a, ka la chhang duh chuang lo. Ka titau nge mawni, chutianga rukbo ka han ni ringawt chu awm ngaihna ka hre lo a ni ber e. Ka ngawi ta daih chuan a tihrilhhai ve deuh nge ni, “Tlan chhuah tumna rilru te kha i lo nei hlauh ang e, kan phalna tel lo chuan i lo chhuak dawn lo tih hre sa hmak ang che” a ti leh a. A zat vang ni hauh loin ka nui hawk a.

“Ka lakah hian eng nge in duh? “ Ka ti ta nge nge a. 

“Hmingduhawma rilru hneh a ni mai.” A tih chuan ka phawk hrà mai. Teh daih chuan! “Engtia rilru hnehin maw?” Ka ti sap a. Inthunun hram hram ka tum. “A nu thattu zawng tawh lo turin” a tih takah chuan thil awmdan ka rinzawn thei ta. Ka lo ngaihtuah ngai miah lo, mahse, tuna ka ngaihtuah mek hi a tak tak a ni  ka tihna erawh a ni chuang lo, ka rinthu mai chauh a ni. 

“Ka thunun theih a ni em ni?” Ka ti hrawk a. 

“I theih loh paw’n kawng dang kan dap ang a, chu chu min tihsak ang” nui sâwng chung hian a ti a. 

“Lo lâwm viau suh, min rawn zawng hmu em em ang, heta tanga min chhuahtir chuan engmah ka sawi lovang. A ṭha em?”ka chiâina bo tial tial chu ka lâwm kher mai. Ka movie en duh zawng ka sawi tawh ang khan hetiang dinhmun khirh taka ka din pawh hian ka rilru tihfim hram hram ka tum tur a ni ka ti ve tlat. U Zonuni nen inhmua Khatla lama kal tur kan ni kha a nia, kan inhmuh hmain rukbo ka ni a, u Zonuni mangangin min call ngei dawn, ka reh hmak dawn si, Mami te ho a be leh ang a..umm tunah chuan Chhawrpial lam pawh an buai chho ṭan maithei. Pasal a um ti dawn se ka bialpa a zin lai a ni bawk si. Tin, kan khaw mi leh sa te chuan pasal ka um hi an rin ka ring lo bur, ka mizia an hre hnehsawh êm mai. Duhawma’n a hre tawh ang em? Tunah hian dar engzat nge ka hre si lo, pawnlam engmah hmuh theih lohna hmun, lei hnuai niawm takah ka awm a, ka phone leh ka sana bun lai min laksak bawk si. Chhun nge a nih zan pawh ka thliar hrang thiam lo. 

“I ril a ṭâm em?” A ti ta daih a. Min khawngaihna te a nei ve deuh em mawni. “Ṭam e” ka ti tawp, a ṭam tlat a tin ni, U Zonuni’n min treat dawn e tiin lunch pawh ei lo khan college ka chhuahsan kha a nia. Ka rilṭam em em danah hun a kal nual tawh a nih hmel. 

A chhuak ta daih a, eitur min laksak dawn a ni ngei ang. Ka ngaihtuah let ngial a, min man lai khan kawngkal âwm ka hmu miah lo va, ka kalna kha sawi tawh angin veng mawng deuh, lun vak lo kha a nia, kan in lam kawng atanga kala taxi lak leh chuan ka chawi tam dawn avangin a short cut deuha tia kha lam kawnga kal kha ka nia, tuikhura lo awm naupangte khan min rawn hmuh ngei erawh ka ring. Mahse, police te pawn min zawng ta se, kha lam kawngah khan ka kal tih ka thiante tumah ka hrilh miah lo. Naupangte khan an chhungte bulah an lo sawi hram beisei tawp mai ang. “Lalpa, he lai hmun atang hian min hruai chhuak rawh’ ka ti sap a. Min rubotu hi ka nuteii a nih miau vang nge thih hlauhna chuan ka khat hauh lo, ka nunna êm chu a lak ngam ka ring lo a ni. Ka nu Chhawrpial amiin a hriat huna a mangan dan tur hi, a hre daih tawh zawk maithei a ni. Reivakloah thleng kum hian eitur a rawn keng a, ka bulah rawn dahin, atta kan a lo nia, thingpui pawh flask lian vak lo a rawn ken ami chu a thli nghal a, zah pawh ka dawn zo tawh lo, ka ei nghal buan buan mai. Min en reng ringawt. Ka in eipuar zawhah, “Tikhan lo muhil leh phawt rawh” tiin chhuah leh mai a tum a. 

“Khawngaihin light kha chu ti êng teh u. Thimah ka muhil thei lo” pangngai taka ka tih chuan a bu nghat a, light chu a off ta lo. A reh leh ta ṭhiap mai. Ka awmna chu 10 ft bial vel a ni maithei, ka mutnaah chuan pher an phah a, a sir bang kilah chuan bangla blanket kan tih ang kha a lo awm ve ran bawk, a vawh deuh suk avangin ka sin ta vat a. Chair pakhat bang bungrua a awm lo. Room ruak tak a ni. Ka zun te chhuak ta se, khawiah nge ka zun ang, ka ek te pawh a la chhuak dawn si. Ka tho vat a, kawngka chu ka chum dawt dawt a, “Ka zun a chhuak a nia. Ka zung duh” ka ti tuar tuar bawk. 1minute hnu velah an rawn hawng a, car khalhtupa ngei kha a ni. Nui sawng chungin, “Lo chhuak rawh” a ti sup a. Ka chhuak vat, bang chhah hmel zet ka hmachhawn run ringawt. Zaizir hian ka hnung lama kawngka zimtê chu min kawhhmuh zauh a, ka’n hawn chuan comode chu a lo awm ve, ka zung ta a, tui lah chu a la haw tê em em zui. Ka chhuah pah chuan ka han hawi chiam dawn a, awmzia a awm lo reng reng. Inthiarna ep, ka mutna pindan kawngka piah lawkah khan kawngkhar a awm leh a, tlan chhuak tur chuan chu chu ka paltlang a ngai ang. A khirh hmel riau. “I mutna pindan kawngka hi kalh loin ka kalsan ang a, inthiar i duh hunah i inthiar thei ang. Saw kawngkhar saw chu hawn tum buai suh, chatuan pawhin i thei lovang” a ti hmuk hmuk mai. A kawngkhar sawi rinawmzia min hmuhtir tum niawm takin chu kawngkhar chu hawngin min kalsan zui ta nghal a. Ka umzui vat, mahse,a nghet churh mai a, ka tha neih zawng zawnga ka han nem paw’n a che eih lo. Bang leh bang inkarah chuan hah zetin ka ding khawng ta reng a, hetah hian engtianga rei nge min dah ang aw. An thiltum ka hriatchian theih nan an thu awih anga lan a ngai tih ka hria, min bum thiam bawk a, nuteii chu ka bum thiamzia ka entir ve hlak tur a ni tiin ka infuih char char. 

Ka ṭawngṭai nasa bawk a, ka muhil thei ve mai. Mahse, zun chhuakin min kaiharh ve leh a, ka va zun chuan thawm ka hre ta. In chung lam atanga lo ri chhuak a ni, ka mutna pindan atang kha chuan thawm engmah ka hre thei lo, a rehin a reh tlawk tlawk a nih kha. Mahse, inthiarna pindan atang chuan hla taka thawm ri angin in chung lam thawm chu ka hre thei. Ka awmna chu lei hnuai a nih tak tak ka ring. Ka nuteii te in hnuai chu a nih ka ring si lo, mi in an luah ve tho kha a nia,. Khawi lai tak ni ang maw. Ka au chiam mai dawn em ni aw ka tih rauh rauh laiin hnuai lam rawn pan thawm niawm tak ka hre ta thut a, rang lutuka lutin muhil niawm tak chuan ka thaw ta sâk sâk a. Sawi tawh ang khan ka mutna chu sound proof a niang, engmah ka hre leh thei tawh lo. Mahse, reivakloah zawitea kawngka inhawng thawm chu ka hre ta a. 

“A thlamuan hmel hle mai maw. An zawng hmu thei turah a ngai a ni ngei ang. Engpawhnise, amah avangin hun tlem kan la nei thei dawn tho a, kan inchingfel hman turah ngai ang. “ Ka aw hriat ṭhan êm êm hian a ti sur sur a, ka meng hman ṭêp a ni. Mahse, ka insum tluan thei hram e. Rei rial loin an chhuak leh ta daih a. Ka muhil zui tawh lo. 

Ka hun hman dan a kip a kawia sawi vek chuan hun a heh dawn, eitur min rawn pek leh chuan car driver khan min rawn pe a, “Ka pu, vawiin hi eng ni nge? Zing nge tlai nge? Zan..” ka lo ti ta chawt a. A nui huk a, a la puak zui. “I hre dawn lo tak maw? Vawiin hi sunday a nia, tukthuan ei hun lai vel niawm tak a ni” a sana bih zauh chuan a ti a. A chetdan vel a ngeiawm em avang chuan ka be zui peih lo. Ka taksa a melh kual vel ka hmuh phei chuan ka ten lutuk, hei hi ka lo ngaihtuah tel miah lo va, hlauhthawnna ka nei thar ta tlat. Pawngsualna hi ka hua a, ka haw lutuk tlat. Tunah hian chhantu tur nei miah loin an kutah ka awm chu a nia, min pawngsual tum ta se, ka hneh ang em? Ka tiril a khur der der thei nia. Kal vat se ka duh avangin eitur pawh chu ei zo loin, “Ka duhtawk” ka ti a, blanket chuan intuam thânin bang nghengin ka thu ta daih. Ani pawh chu a chhuak zui ve ta mai. “Lalpa, min venghim hram teh” ka ti sep a, tawngtaite hi ka lo thlahdah lutuk thin a, tunah a hlutzia leh tawngtaina bak engmah ralthuam ka neih lohzia ka hre ta chu a nia. Ni e, tunah hian ka hmabak engmah ka hre lo. Tlanchhuah tum dawn ila ka nunnain a tawrh phah thei, thih chu ka la duh bik miah lo. Ka rilru chu a hah ṭan ta hle mai, tumah lah chuan min rawn be leh mai tawh si lo. Zirtawp tlaiah ka bo a, Duhawma pawh a haw tawh tih a chiang, Police lam an chet tawh ka ring bawk. 

Ka lo chhing sek a, kawngka inhawng thawmin min tiharh a. Ka thu chhuak nghal. 

Lehkha phek leh pen hi a rawn thehthla a, lehkha dang khawl chhut hi a rawn dah tel bawk. “Kha he thu hi kha lehkhaah khan copy rawh” a ti ram hmak a. Ka melh râwm rawm ringawt. “Inla ngeng vak duh suh, tumah chhantu tur che an awm lo,. Tanpuitu auin i dang thler khawp pawn au mah la; tuman an hre thei chuang lo che. Duhthlan tur i nei lo” a ti nghat nghat a. 

“Ti duh lo ta ila” ka ti ve ngat. 

“I thih loh pawn thih châkin ka siam ang che.” Intih hlauhawm tum tak hian a ti a. Ka lo nui hak. “Ka thih avanga in tihsual rah in hmuh dawn phawt chuan ka thi hreh hleinem. “ ka ti hul hak a, lehkha pakhat zawk chu la kangin ka chhiar a, ka ner nawk mai. 

“Chuan, thih ka thlang zawk e.” Tiin chu lehkha chu ka pawt thler ta hmiah a. Mahse, ka biang a thip zawk, ka ka sam chu a rawn kek nghal nawk nawk bawk. 

“Zawngsen, i ti dawn khawp mai. Pathian pawn a ṭanpui thei lovang che. I hria em? Ka thawhrimna zawng zawng hi nangmah vanga chân ai chuan duh leh kan thi dun anga a ni mai alawm. Hrep tak che hian..” tia inhrosa khur khurin ka chal chuan bang a tauh ta nghek a, arsi a leng chuaiin ka hria. 

Thisen rawn luang chu ka khawih a, han melh chho ṭâwk ṭâwkin ka nui lui leh hram..

“Tunah hian thi dun ang hmiang..nu Par,.” Ka ti dam thlap a.