Hmingduhawma 5

HMINGDUHAWMA (5)

Ziaktu : Toni Râlte

Nu Pari’n inhmuh a duhna chuan min kap tlat mai a, Mami leh Chhana te erawh la hrilh loh ṭhain ka hria, Duhawma nen kan inlaichinna vangte hi a ni thei ang em aw. Ka helhhawlh ka ti dawn nge ka zâm ka ti dawn, ka phi sek a ni ber mai. Mahse, ka inthunun hram hram a ni ber e, Duhawma lah chu engtizia nge mawni a reh hmak mai a, call hmasak ka hreh er teh bawk si, va call ringawt ila sawi em em tur ka hre dawn bawk si lo. Ka nu nen kan inbe zuai a, “Seni te an inneih dawn chuan in rawn haw ve ang chu” a ti a, exam laia an inneih loh hram ka beisei. U Sawmi’n, “Aizawl tlangval ngei mai makpaah kan duh a nia aw” a tih lâng lângah chuan ka khi sak a, ka nu hriat lai hian ngaihzawng lam hi ka sawi ri ngai lo, ka ngam lo pawh a ni lo, ka zak. Ka nu chuan, “Bialpa lam kha ngaihtuah reng reng suh aw, lehkha zir ringawt kha ngaihtuah rawh “ a rawn ti, ngaihzawng ka nei tih hria se a sa teh ang chu aw. Mahse, Mama leh u Sawmi te ka biak thiam chuan, amah Hmingduhawma misual a lo ni lo bawk nen, a rilru a nem ve mai chu ka ring deuh. 

Class lak laite chuan nu Pari nen kan inhmuh hun tur ringawt chuan ka rilru a luah a, Papuii lah ka hrilh duh rih si lo. “Te, vawiin hi i zia a dang riau, eng emaw ngaihtuah veng veng hmel i pu, i ṭawng tlem bawk si” a ti ta chiah a, “Aa..ka nuamsam chiah lo va, e taka! Lunch break-ah kan khua ami te lo kalin ka thil tur an rawn keng a, ka han la lawk dawn, Apuia te nen lo châwl mai r’u aw” ka ti duah a. “Kalpui i ngai lo maw?” A ti hâ a. 

“Ngai lo ang, ka rei lovang” ka ti satliah a. Tichuan, chhun chawlh lai chuan tîm ru deuhin Abigail Restaurant lam chu ka pan ta a, kan college aṭangin a hla lem lo. Nu Pari call ka dawng a, ka kal mek thu ka hrilh chuan a awm tawh thu a rawn sawi a, ka thaw hawk ringawt. Ka va luh chuan thlang lam kilah hian a lo ṭhu ran a, a nalh leh hle, fa pahnih nei tawh hmel pawh hi a pu lo ka ti mai, amah hi a invawng peih viau a nih ka ring. Min lo nuih sak takah chuan ka awm nawm loh rukna te chu a kiang duak mai. Amah hmachhawn zawng chuan ṭhuthmun ka rem ve nghal a. Coffee a lam nghal zat, “I duh duh kha chah rawh, ka pe ang” a ti zui zat a. Menu ka han en a, ka ril chu a ṭâm naa thil engmah ka ei châk lo a ni ber, “Ka ril a la ṭam lo” tiin menu chu ka khup leh daih a.  Engmah a sawi lo. Coffee a rawn thleng a, a la sat deuh avangin kan nghak dai a, sawi mai tur ka hriat loh vangin ka ngaichâng deuh tawp. A tawpa tawpah chuan a aw thian kharhin, “Tei, hmuh ka duh chhan che chu thil hi ṭha zaia sawipui che ka duh vang a nia. Hmingduhawma nena in chungchang hi a nia, ngaih loh lama i ngaih loh hram kan beisei.” a han ti phawt a, ka rinlâwksa mah nise; mak ka tiin min la ṭhâwng tho mai. Engvang tak ni ang maw? Ka kut ka humruh nasa viau. “Hmm, sawi la” ka ti sap a. Zahzelah coffee chu ka in a, ka lei a kang ṭêp a ni. Nu Pari pawh ṭhu ṭha sauhin, “Englo a nia, Duhawma hi zep thu a chêng lo, ka hrin a ni lo va, U Sanga nupui hmasa fa a nia, a nu hi a boral tawh a, a pa hian kawng engkima a rin leh a sumdawnna pawh chhunzawm tura a beisei a ni a. Chuvang chuan, a hmakhua a ngaihtuah a, nakin zela Duhawma pawhin a sumdawnna a kalpui zel theih nan tiin a sumdawnpui tho,a ṭhianpa ni bawk Pu Lura nen ruahmanna siamin engkima inpuibawma intuamhlawm zel turin inremna an siam a, Pu Lura fanu leh Duhawma hi nupaa insiamin kan chhungkaw hnih inlaichinna nghet tak nei turin thutlukna an lo siam tawh a. Hei hi chu nang pawn i hrethiam ang, tunlaiah chuan thil thar a ni lo, Aizawla mi lianho hian hetiang agreement hi chu an lo siam fur mai. Chu chu a nia, tihian tunah Mama nen tiang hian inzawmna in lo nei si a, a pa phei chuan a la hre lo. A hriat hma ngeiin nangmah zawk ka rawn sawipui che a nih hi, Duhawma chu a nu diktak ka nih loh avang hian ka tan sawi a nuam bik lo va, nang chu ka fanu ang thoa ka en che i nia, i hriatthiam ngei pawh ka ring. Ka beisei bawk. “ A ti ta charh charh a. Awmdan tur hriat a va har tak e aw. 

“Nia..” ka ti zawi sep a. Eng nge sawi tura min duh ka hria, mahse, chutia awlsam taka sawi ringawt theih a ni bik miah lo a nia aw. Bialpa la nei ngai lo tih takah Hmingduhawma hi ka duh ve bur tawh si a, aman engmah a sawi hmasa bawk si lo, han ṭhen deuh tawp chu a uiawm ka ti a ni ber. 

“I tan pawh a hrehawm ang tih ka ring. Mahse, chhungkhat ang kan ni tawh a, min hnial lo hram la ka lawm ngawt ang. I zirna senso leh i mamawh dang pawh tum vek kan inhuam a nia. “ A tih chuan ka na zawk mai. Suma lei mai mai theih tur khawpa hlu lo ka ni lo ve tlat. Falak ni mah ila mihring ka ni, hlutna ka nei a, zahawmna pawh ka nei e. 

“Nu Par, sum ang zawng kha chuan min dawr lo teh” ka ti chang ve ta hmak a. A hmel danglam zawk chu ka hmu hman. Nui lui tih hriat tak hian, “Aa..ka han sawi mai mai a nih kha, in chhungkaw dinhmun ka hre lo naa, zirlai mai i la ni a, thawhchhuah ngaihna a awm bik lo nen, mamawh te in lo nei ve lo thei lo va. Kha chu min hrethiam rawh. A nih chuan, eng nge i rilru ni ta?” A ti siam siam a. A nelawm leh hle tawh mai. 

“Ka hre lo, chutia awlsam taka rilru siamfel chi ka ni ve lo va, inngaihtuah phawt ka duh” ka ti ve ta ta a. A bu nghat, “Nia, ka rindan a ni sa a, Duhawma erawh hrilh hre lo mah la a pawi lo zawk ang” a tih chuan ka sa leh phat. “Engvangin nge ka hrilh loh ang? Chhan awm loin ka kalsan ringawt ang maw? Chutianga mi lêlo ka ni lo ve” din hluai pahin ka ti ve ta ngat a, a rethei zawk kan nih vanga an thu thua min dah theihna tur a awm bik lo. Ka mimal nun a la ni lehnghal. Hetiang lamah chuan mihring chapona zia hi a rawn lang ve tlat zel nia, mihring kan nih angin induhtawkna kan nei ve thiang tlat alawm le. 

“Insum rawh, thinrim lova ṭha zaia indawr hi ka duhdan a ni” Nu Pari chuan aw nêm tak hian a ti leh thliam a, mahse, keia lâwm lo laklawh tawh chu chutimaia han lungawi leh chi ziazang ka ni lo, ka bialpa hmasa ber, kei pawhin ka duh ve em em ṭhen tura han intih tawp chu maw, lungawina chi ziazang ni nghal lo chuan. 

“Ka kal khawp ang, ka tlai dawn. A nih phawt le” tiin ka buk khum zauh a, ka kal ta nal nal, coffee man ka pe lo tih ka hre chhuak leh si, cheng 20 tlang ka ah chu phawrhin kan dawhkanah va dah lehin ka chhuahsan ta. Ka insangmar nasa lutuk chu ka hah vek thei, thawk ka la vang vang a, muangchangin college lam chu ka pan leh ta a. Chawhnu 1st period zawhah ka haw ta daih, “Ka nuamsam lo” tiin chhuanlam ka siam ringawt, nia, ka nuamsam chiah lo tak tak a ni. In ka thlen chuan thlak pawh inthlak lovin ka mu thlawp a, ka chau riauin ka hria,. Eng thutlukna nge ka siam ang tih ngaihtuahin ka chhing vang vang a, eng pawhnise Duhawma hrilh hriat phawt chi niin ka hria, a lo hre vek tawh maithei bawk. A dik adik chuan ka phu lo ve bawk alawm, khawsak dinhmun thuhla chu thuhran, hmel leh zeiziaah pawh. “I indah hniam a nih kha” te pawh in ti maithei. Ka naupan lai chuan rual ka awtin insitna ka nei ngai lo, ka han tleirawl chhuak a, nikhua hre chhoin ka pian dan leh ka ṭobul ka han hre chho a, sâwn mai pawh ni lo, falak ka nihna te, hringtunu enkawl ka ni ve lote chuan chhungrilah min kher ngut ngut fô ! Ṭhianṭha ka nei, ka hria, ka tana an hlutzia te pawh. Ka chanchin pawh an hre vek, min kawm serh phah chuang lo. Mahse, keimahah hian khawhar rukna, nun ruak hi a châmbâng reng thin. Tuma bulah erawh ka sawi ngai lo va, keimahin ka vawng tawp mai a ni. Tihian pangngai takin nun chu ka hmang ve zel tak naa, mipa ka ngaihsak ngai miah loh chhante pawh kha keimaha ser chambang reng vang hi a ni pakhat, ka pian leh murna, ka ṭobul hi hria se min iai tura ngaihna ka nei thin a tin ni. Hmingduhawma erawhin keimahah ṭêk a rawn siam a, ka hnar phal ta lo rêng a, ka vawn tak chhan pawh ka phu loh êm vanga min phên tura ka duh vang a ni zawk mah. Ani nen kan inzui chuan miten ka sulhnu an chhui pawhin amah vang hian min hmuhsit loh ka beisei a ni. Tunah ka lungpui chu lakbo an tum mek chu a ni si a. Kei mi hmangchâng hre lo lutuk hian rilru ka siamfel hleithei lo a ni ber. Thiante bulah sawi ta ila, min khawngaih emaw min vuipui emaw a niang a, keimaha induhtawkna la châm ve der der chuan chutianga mi khawngaih dawn chu tlawmah a la ve tlat bawk si a. Mami tal ka râwn hmasak phawt a ngai ang. 

Chaw ei lai chuan Chhana’n Desi nen an ṭhat leh thu leh Desi chu a nuin a lo ṭawngkhum vel thin avanga lo inthiarfihlim a ni tihte a sawi a, “Desi pawn ka nu mizia a hrereng sia, engahmah ngaih loh ve tur a nia, engmah pawh sawi loin a reh tawp ringawt a, ka lungawi vak lo” a tih chuan ka inrin hmain, “I va â tak, A bialpa nuin a ṭawngkhum fak tawh chuan a induhtawkna te a vang pawn kalsan che a tum kha a ngai alawm, fate inlaichinna vela lo inrawlh sek hi ṭul pawh ka ti lo,  Desi lah misual a ni bawk si lo. I nu thiam loh alawm” ka lo ti hmawk hmawk a. Mami nen chuan chutianga ka ṭawng ve hluai chu mak an tih hmel hle. Ka inthiam lo leh deuh a, nuih tlawn titih hian, “Aa a nia lawm, ka sawi dik” ka’n ti ringawt a. Chhana chuan, “Nia, a dik reng, ka nu hi chu a nasa ve êm a ni. A zahthlak ngawt mai, mahse, Desi paw’n ngaih khatah a ngai tawh ang chu. Karlehah lo zin a tum a, hetah lo thleng se pawi in ti em?” A tih zawm zat a. “Kan inah lo khaw nge a thlen chuang ang a. Lo thleng ngei ngei rawh se “ Mami chuan a lo ti var a, ka lo bu ve nghat nghat bawk. 

Ka nuin a lo call a, “Thil pawimawh sawipui che ka duh a” a tih chuan hlauhthawnnain ka khat nghal. Bathroomah ka lut ta vat a, mak min ti êm lovang chu maw. “Umm, sawi la” ka ti khur dat a. 

“Bialpa i lo nei ve a niawm a, ka remti rih lo tih i hria a ni lawm ni? “ A rawn ti hlak hlak a. A rawn tih dan teh tawp chuan min ṭhâwng lutuk. 

“Tu nge sawi?” Ka ti hawk a. 

“A sawitu hriat a ngai lo, ka hre ve tawp a ni mai. Bialpa neih ka la remti rih lo, ka thu i awih thin kha, college i zawh hunah i duhtawkin bialpa chu i la nei dawn nia” a ti hlawk hlawk a, ani leh ni lo angin a âng ve nasa, ka nu hi âng vak chi a ni lo va, mahse, a hauh hi nâ ka ti tho zel. “Bialpa ka nei reng reng lo” dâwt ka sawi ta ringawt, a chek hlak a, “I nei alawm mawle aw, ka hre vek. Ka thusawi kha hrereng ang che, i u chu ka la hrilh lovang. A hriat hmain ṭhen vat rawh” a ti leh mawlh mawlh a, inleng an nei nge ni a dah nghal daih. Hrilhhai deuhin phone ka bih vung vung,. Vawiinah nu Pari nen ngaihzawng chungchangah kan inhmu a, tunah ka nuin bialpa ka neih thu a hria a maw? Thilmak tak a ni. Mahse, ngaihtuah vak dan erawh ka hre lo, Nu Pari kha ka nu khan hre lo angin ka bulah a sawi a, mahse, an lo inhre ru tho te hi a ni lo maw? An lo incontact te hi a ni thei ang em? Hmm, ka ngaihtuah thiam neih nuaih lo e a. Kan thianho bakin bialpa ka neih thu an hre lo, Seni lahin a sawi chhuah ka ring si lo. Mipaho lah an ṭawng thei lo tlâng ropui si,. Aa, hunin a la hril ve mai ang chu maw. Hmeichhia tih takah thil zêp hi a harsa bawk a niang, Ka va chhuah chuan Mami leh Chhana te bulah chuan nu Pari nen kan inhmuh dan vel chu ka sawi ta vek a, an ngaithla uluk vei phian. Ka sawi zawh chuan Mami chu a chek hluk a, “Englo, an duh loh vang che pawh ni loin a pate inremsiamna vang vel a nih chu, chungte chu U Duhawma paw’n sawi ve tur a nia, hetia tun ataka inṭhen leh hnuhnawhte chu a.” A ti hlak hlak a. Ni e, Hmingduhawma hian a hresa vek ang, ti nge engmah a sawi loh le. Min chhaih kual vel mai mai zawk a niang a,.a titak ve roh phian bawk sia. Tawnhriat la nei ta lo chu ka mawl ropui si,.”Nia, amah hi ka hrilh ve tho dawn mawni le ka tia” ka ti ban chhalh a, Chhana chuan, “I hrilh loh ten, ngawi renga i bansan chuan a chhan hriat a tum ngei ngei ang.” A lo ti khauh a. 

“Nia, hrilh rawh, mahse, phone-ah ni lo, hmaichhanah” Mami pawh chuan a lo ti ve a. Tlemin ka thawl deuh, ka thianten min hriatpui ta bawk a, mahse, ka nu min biak dan khan min la kap run tho mai. Ka mu fel deuh chiah tihin Duhawma chuan min lo call ta a, a reh rei bawk a tiin vawikhatna chu ka’n la duh lo vel a, ka â sia a. A rawn call nawnnaah chuan ka la ta nge nge a, “I muhil chuang si lo va, eng nge la ve nghal mai ta che” a rawn ti dût dût a.  

“Ka ṭawngṭai lai a nia” ka tih chuan, a nui huk ringawt. A awih tehchiam lo a nih hmel. “Min va ngai lo ve. Ka reh chuan i reh ve tawp zel a.” A ti a. “I buai a niang chu ka ti” ka lo ti sam êt a. “Umm buai angreng, naktuk chu chawhnu class kal lo mai la. “ A ti teh thut a, “Ngati” ka tih chuan, “Naktuk tuklehah Champhaiah zin ka tum sia, naktuk zanah meeting pawimawh deuh ka nei bawk si nen, naktuk bak ka zin hmain hun kan nei lo a” a ti zung zung a. Kei lahin sawi tur pawimawh ka lo nei ve bawk nen, “Nia, ka lo tum dawn nia” ka ti ta a. “Ka lawm e aw. Savatê” a ti sup chuan mi hneh nghal vawng vawng mai. Ka ṭhen chuan ka ngai ngawt ang. 

Hmingduhawma hi kohhran leh khawtlangah a kul ataia inhmang chu a ni lo naa, a mawi tawk chuan a inhmang ve tho mai. Kan inzui hnuah zu rim a nam ka la hre lo va, ruih hrim hrim nei hmel puin ka la hmu ngai hek lo. Fel ve tawp, mahse, va piangthar ta lua ang ni si lo hi a ni berin ka hria, ka sawithiam chiah lo. Eng pawl pawlah emaw chuan committee member te chu a lo ni ve mahna, ka va hriatpui si se lo. Kei aiin upa viau mah se; ka û lo. A hmingin ka la ko lo hrim hrim, ka mâwl biak tawp zel, koh dawn hian ka lai ṭût zel a, amah pawh hian a hrethiam nge midang zinga kan awm chang chuan ka mitmei hi a vêng ti ila ka biak duh leh duh loh a ngaichâng ka ti mai, ka koh ngai miau lohin amah ka biak dawn chuan a mitah ka melh thin tih a hrethiam tawh a, min melh zing viau zel. Min ngaihsak dan hi a teh huam ngai lo va, ka duhdan chiah a ni. Inngaihzawnnaa HÛAM a tel tawh chuan ten lamah a kal tlat zel. 

Papuii a rawn kal lo va, a ho riau. Cindy te min melh dan hi ka duh vak lo, min tihbuai châk hmel deuh hian min melh ka ti mai, ka chesual lai chang rân ang hian ,Duhawma ka lo hmelhriat ve kha an duh lo viau nge mawni dawn ni. Jenny thiante an ni tih a chiang tawh a, an mizia pawh a inang tlang viau e. Chawhma last period kan kal laiin a rawn text a, “In college piaha 2nd hand dawr kawtah khan ka lo nghak che aw. “ A rawn ti. Ngaiah hian ka nei thei dawn lo a nih hi, ka zâm titih leh tawh. Kan inhmuh zin ve tawh nen ka lai leh zâm thin hian reh tiknî a nei dawn lo a niang e. Ban veleh tawi khawmuang loin ka chhuak nal nal a, Cindy te pawh ka hnungah an rawn nui phei leh har har tawh. Duhawma min lo nghahna dawr opposite-a Restaurant lian vak lo-ah hian Cindy te hi an châwl thin a, an siam tui tho nain a to ka tia, kan chawl ve ngai meuh lo. Duhawma chuan car ni loin bike zawk a lo keng chu niin, vawikhatmah a bike-ah ka la chuang lo. Bike hrim hrim hi vawi 3 vel bak ka chuan pawh ka la hre lo e a. “U Duhawma teh daih chu, eng nge i tih a?” Hlimi aw hian a rawn ti lâng lâng a, Kei chu Duhawma bul ka thleng titih tawh. 

“Hei, Tei hi ka nghak a” a ti ve mai a. Cindy ner sak chu ka hmu hman. “Laljenny khan a zin dawn kha a ti che sia..” inti hre zet hian Cindy chuan a ti a, a sam khawih pahin a meng kal ralh ralh bawk. Hetia ṭawng paha meng zek zek thinte hi rin harsa ka ti tlat, ka sawi thiam lo, mi mit lak tum tih hriat lutuka midang an han melh kual zeuh zeuhte hi an phakar hmel ka ti tlat zel. Ka rilru a chhia a niang. “Naktukah zawk. Kal ang aw” tiin min rawn melh zauh a, ka lo bu nghat. A bike tinungin ka lawn vei tharh a, Cindy te pawh lut mai loin an tawi khawmuang vel, a ho em mai a. Kan tlanchhuak ta a, ka bye bye ṭêp a ni. Hehe..

“Cindy khan a ngaizawng chein ka hria” ka ti leh ta nge nge a, rilrua awm hi ka sawi chhuak leh phawng thin. 

“Ni maithei” a ti ve ringawt. Denis-a te restaurant-ah thil kan ei phawt a, ka puar hle, zingah khan kan vawiin hun hman tur ka helhhawlh atalângin chaw ka ei puar meuh lo nen. Ka inthlahrung peih vel lo. Denisa erawh office dawrin a lo chhuak daih a, kan awm khawtlai ta lo. Min tlan chhuahpui leh tawp a, “Khaw nge kan kal dawn?” Ka tih chuan, “Kan huanah” a ti mai si. Tanhril lamah tlanin kawng a tha bawk a, kan tlan rei lem lo, MZU thlen hma kawng peng dinglamah tlan lut lehin thui kan tlan lo, gate rinawm hmel fe a lo awm ran a, tichuan, an huan kan thleng chu a ni mai. Kuhva leh ser a tam angreng, thei chi hrang hrang pawh a tam mai. A dai ruih mai a, thlam te fel ren râwn, a bul maia tui khuah zau lutuk lo te chu a romantic ve riau ! Hmm, ka ngaihtuahna mai mai chu. Thlamah chuan lutin a lo changtlung reuh viau mai a, mak ka ti hran lo. Tukverh te kan hawn dar vek hnuah khum lian vak loah chuan kan ṭhu dun ta ran a. Ka zâm em em reng hi ka inngei lek lek zel. 

“Ka zin hlanin lo lerh miah suh ang che” ka biang a rawn nul thuak a. 

“Englo, ih, sawi tur ka nei a” ka lo ti bah nak. 

“Hmm ka ngaithla” tiin min rawn melh a. Ka heh ka liak zauh a, sawi ṭan dan tur ka ngaihtuah leh tê tê a. 

“Nu Pari nen niminah khan kan inhmu a, thil a sawi ṭeuh a” ka ti a, ka chil ka lem khawlh. 

“Chuan” dawhthei zetin a rawn ti a, “Ṭhen tur chein min ngen a” ngam leh ngam lova melh chungin ka ti sep a. A hmel a danglam eih lo chu mak ka ti ru hle. 

“Min ṭhen dawn tihna mi?” A ti ta daih a. 

“Ka hre lo,. Ka..ih.. a sawi dan chuan nupui hual i nei tawh a, keimah ..ih, keimah hi ka hnawksak a. Chuan, englo, ka tibuai dawn che niin ka hria a.” Ka ti ta nawk nawk a, runluih leh deusawh rawngkai ni miah lo hian a nui hawk a, “I va â tak, nupui hual nei ila ka savatê ka nihtir dawn che em ni?” A ti dam thlup a. 

“I hrereng sia, min hrilh ve tur che a nia. A zahthlak asin.” Titau lek lek hian ka ti a. 

“Ni e, ka hria alawm, mahse, Judy bulah pawh ngaihzawng ka neih thu leh amah neih ka tum loh thu ka hrilh tawh alawm, ka pa pawh ka hrilh tawh.” A ti nghet charh a. Judy..hmm, a hming hi ka hre tawh chiang. “Mahse, i hmalam hun ngaihtuah la” ka ti ve ngial a. 

“Judy ka neih kher ngai loin keimah hian intodelha ka pa mamawh loh ka tum rêng alawm. Min support dawn em?” A ti ta a. Ka va melh zawk, min lo en kiau a, a mitmeng dai dakah chuan min ngenna ka hmu ve thei tlat nia. He pa hian a tider thei dawn em ni? Min chhaih kual vel mai mai lovang tih hi rin ka duh takzet a ni. 

“Chuan, inthen lo ta ila i tan a pawi dawn lo tihna mi?i pa ten min haw dawn asin” ka ti hram a. 

“Ka venghim dawn che alawm, inthen avangin thil engkim a fel phah dawn hleinem, min then mah la, Judy ka neih phah dawn chuang lo” luhlul zeta a tih takah chuan ka thaw huai mai. 

“Nia, i thu thu. Ka nu paw’n nizanah then tur chein min rawn ti a, engtin nge bialpa ka nei tih a hriat theih le ka ti” bangbo fe hian ka ti a, phâwk angreng tak hian, “A ni maw? I nu chuan ka hming a sawi em?” A ti vut a, a ngaihven hmel riauin ka hria. “Sawi chuang lo e, mahse, a lo hre ve daih kha a mak êm a. “ Ka ti niah niah. “A mak lo” tiin eng emaw ngaihtuah tih hriat zet hian pawn lam a thlir ta vung vung a, mak a ti ve a niang ka ti ringawt. Awmze nei miah loin a khi leh sak a, min rawn kuahin, “Sawi tawh lovang, ka zin chhung zawnga ka fawh ai che ka’n fawp phawt teh ang che.” Tiin min rawn fawp zui hmiah, kei pawn lo hnar ka tum hran lo, kan inkuah nghet kher mai, khumah chuan min nawr mu a, ka thinphu a rang teh e. “Hlauthawng suh, ka tina dawn lo che” ti tham ṭuakin a hma aia duhthawh leh uarin min fawp leh a, inkiss hi chu a uar ve bawk a, ka thiam ve tawh lutuk. Inthunun tum tih hriat tak hian a tho hluai a, tui a va in khawlh khawlh ringawt. Hmel phelh phang leh mitmeng vai deuh riaia min melh chungin, “A tawpna hi ka rin ang ni loin ka beiseina angin khardun ila ka duh” tiin min kuah bet thlawp a. Ka sam a chul heuh heuh mai. A chetdan leh a ṭawngkam te chuan makna riau a nei, a chhan sawi fak tur awm si lo hian ngaihṭhat lohna ka nei tlat. “I mak riau” ka ti ta ngei rêng a. “Ka ngaih vang che a niang.” A ti ve ringawt. Miin ka hriat atana an duh chin min hrilh bak zawhna neih hi ka tih ngai loh thil a nih avangin ka ngawi zui ve ta daih a. 

“I nu leh ka nuhrawnte hi an lo inhre tak tak em mawni le tiraw? Mahse, i nu khan a hriat loh hmel sia” a ti nuah nuah a. 

“Nia, chu chu lawm, nu Pari lah hian a hriat hmel ropui sia maw” ka lo ti ve a. 

“Aa..ngaihtuah vak tawh lovang, kan inkar chiah ngaihtuah ang. Hawh, hetia insika infawh sek ai chuan huan hi ka fanpui ang che” a ti hluai a, ka phur zawng tak a lo ni bawk a, thlam chu chhuahsanin huan chu kan fang kual ta a, “In thei rah vel hi in hralh ngai em? Kuhva te hi” ka ti a, “umm, hralh ang. Ka buaipui ve vak lo va, ka ni pasalin a buaipui deuh a” a ti a, “Ram hnathawh pawh i thiam awm si lo, he lamah chuan min tluk lo sa” ka ti ve ngial a, min lâwm tih hriat zeta min chhuk nuih var var chungin, “I van cute tak” a ti zauh a. A nuam ve chem chem. Hawnna tur a hla ve angreng sia, haw lam kan tintuah ta a, min fawp uluk rei viau mai. “Cindy kha i duh zawk lo mi? Kan tlan lai chuan ka ti a, “Sawi sek lo teh, a mizia a ṭhing si” a ti hluk a, a sawi dan chuan ka nuih a za lutuk. A ei vak bik lo a nih hmel. Ka chhuk dawn chuan “Kan inkara hnawk a awm chuan keiman ka chingfel ang. Engmah lo lungkham suh “ a ti nghet churh a. Ka ringtawkin ka thla a muang khawp mai. Ka nu chu namnul theih mai ka beisei deuh. U Sawmi bulah engkim ka sawi bawk ang a, aniin ka nu mar a dek thiam alawm. Engkim a ṭha vek mai ang chu maw. 

Inrinniah chuan nu Zari te in ka tihfaisak zuai zuai a, Mami erawh a nî te tlawhin a chhuak ve a, Chhana lah a thiante nen khawiah nge an len ka hre lo e a. Ka tih zawhah inah ka chhuk a, U Fela’n min rawn zui lut vein, “Zo chhang i kang thiam em?” A ti a, “Thiam ang, hmehsa mi?” Ka lo ti var. “Aw, ka ei chak thut a, kang rawh, ei ang” tiin thutthlengah chuan a tlu zâl a, chhang chu ka beng phek thiam ve mai, keia inren lutuk pek chuan, “U Fel, têl kan ngah lo a nia, in tel han la rawh” ka ti hram, “Aw..i kawm ve sia maw.” Tiin a tho nulh a, a bur chawpin a rawn keng thla leh, keini tan chuan tel pack khat pawh a hlu alawm le. Chhang kang pah chuan kan titi mai mai a, a hnu deuhah , “Kha pa Duhawma nen khan in ni ve tak tak a ni maw?” A ti ta thut a. Engahmah ngai lo niawm takin, “Ni ve tak tak e, ti nge?” Ka lo ti. 

A ṭhu hluai a, “Bialnu a nei maw ka tia, fimkhur rawh aw, a chhaih kual vel mai mai thei che a nia, an fing ropui si” a ti chuar chuar a. “A ho e, ka chhaih ve anga ni mai lawm “ ka lo tihsan. “Hmm, inla ngaihsam suh. I over,.” A ti hmuk ringawt. Ka nuih a za ru hle. Duhawma’n a rawn call mial a, chhunah hi chuan a buai thin avangin kan inbe ngai meuh lo. “Yes’ zangkhai vah hian ka ti a. 

“Eng nge kan tih mek a?” Inla thupui fahran hian a rawn ti dût dût a, “Zo chhang ka kang a. “ Ka ti satliah. 

“Tu nen” a rawn tih chuan nuam ti vak lo hian, “U Fela’n a rawn keng a, hei kan ei thei tep” ka ti a, u Fela hi a ring lo ropui sia, ka inthlahrung deuh. A rum nghut a, “Eng nge ka sawi thin kha..thu i va awih lo ve” a ti a. 

“Chutiang a ni lo” ka ti zawi sap a, “Midang an awm em?” A tih chuan a thinrim ka hlau ve bawk si chu, “Umm, awm vek e” ka ti ta ringawt. Dâwt ka sawi hian ka awm a nuam lo em em ziah. A thaw huai nge ni, “Umm, a ṭhat chu, Zokhawtharah kan kal dawn a,. Ka dah aw. Lo ṭha ang che” a ti a, a dah zui nghal. “A lo kal dawn mi?” U Fela chuan a ti a, ka lu thingin, “A zin daih alawm” ka tih chuan lawm hmel deuh hian, “Chuti chu naktukah reiêkah kal ve ang u, picnic ang type khan, in pa a awm chuan a veng run zel che sia, i free lai hian kal ve ang u. “ A ti ta hluai a. Reiek chu keipawn kal ka châk ve thei rap, Aizawla kan awm hnu hian class kal leh bazar vel bak hmun dangah kan chhuak ngai meuh lo, kan class kan picnic ṭum lahin Chhana damloh lai kha a ni sia, ka kal tawh si lo. Han intihharh leh hawi thawven hrim hrim chu a châkawm ka tia. “Inkhawm loin maw?” Ka ti leh tê tê a, “Inkhawm ṭhulh mai loh chuan kan awm rei hman nang.” A ti tlat bawk si, “Mami te lo haw phawt se aw” ka ti ta a. Chhang chu ei dunin ka kang tui ve phian mai. 

Mami te an lo hawn chuan u Fela sawi vel chu ka hrilh a, an lo châk ngang mai, Chhana pawh chuan, “Lawma ka’n sawm ve ang e” a ti vut mai. Mami paw’n a bialpa thar, amah startu Sangtea a call ve nghal bawk. Huizz, keimah ber ka riang leh daih dawn tihna. U Fela hian bialnu a nei ang em aw, engmah hi a sawi ngai lem lo va. Inkhawm ṭhulh ṭhakin kan kal dawn chu a nia, ka nu chuan hria se a lâwm tehchiam lo khawp ang. Mahse, chhuah harh hi kan mamawh ve si, hun awl kan nei khât bawk nen, a remchang ti tawh mai ang. Duhawma nen kan inbe zuai a, “Zanin chu chinfel tur ka nei nual a, min lo mutsan mai ta che. Ka mu har deuh ang” a tih avangin dar 9 velah ka mu ta thân a. Ka nu pawn min ka rawn be lo,. Ka ṭawngṭai laiin call ka dawng a, ka duh ang pawh ka chham ṭha hman lo. Nu Pari a lo nia! Ka la hreh riau tawh, mahse, a rawn call nawn leh tak avangin ka pick up ta nge nge a, “I mu tawh em ni? “ A rawn ti a, ka mut chiah thu ka hrilh. 

“I lo inngaihtuah tawh em le? Eng nge i thutlukna ni ta?” A rawn ti nem diai a. Chunglam melh chungin, “Aw,. Kan inṭhen lo. “ Ka ti mawl tawp. 

“Ngati nge? “ A tih chuan ka ngaihbel nge a lungawi vak loin ka hria. 

“Aman inṭhen a duh lo va, chuan, ka tan ṭhen a harsa ve bawk sia “ ka ti ta ringawt. A thaw hawk chu ka hre pha, “I hrilh a maw?” A ti chang ta fak mai le. 

Ka zâm duh bik lo va, “Aw ka hrilh mai loh te chuan, ṭhen ringawt ila a chhan hriat a tum dawn tho a, a hrechhuak dawn tho tho” ka ti ve ta mawlh mawlh a. Mami pawh chuan mi rawn bengkhawn deuh, ka va buk khum ringawt. 

“Aw le, a rang lama inneih kan buatsaih a ngai dawn a nih chu, a duh emaw duh lo emaw inremsiamna anga kan kal loh chuan a pa sumdawnna hi a tlu chhia a ni mai. “ Min hrilh pawh ni chiah si lo hian a ti tân tân a. Ka dah daih. Nghal chu min ti ve maithei a ni. Mahse, nu ngainatawm tak ni mah se; Duhawma nen kan inkarah hêm thlak a tum miau avangin ka zah loh vang pawh ni hran lova ka pal luih ve deuh a ngai tlat a ni. Ka rilru ka siamfel tawh a, Hmingduhawma zawk a inthiarfihlim lo a nih chuan ka kalbo bik lovang. Mami ka hrilh ve a, “U Duhawma thu thu a ni mai, mahse, amah chu tunah han hrilh kher rih suh, a buai hmel sia” a ti a, nia, hrilh kher ka tum rih lo. 

Inkhawm dar a ri chuah chuah a, keini erawh kan thawmhnaw hak tur kan dah chhuak sap sap. U Fela leh a thianpa bakah u Fela te thenawm nuthlawi nui ring thei deuh u Mahuni te bakah keiniho kan ni mai. U Mahuni hi a bula awm a nuamin a frank ropui si, kan nuihpui reng zel, a buai em avang hian duh anga tam kan inkawm thei lo zawk a. Mami bialpa Sanga pawh a rawn thleng tawh, Lawma leh Chhana te chu an inphur dawn a, u Fela motorah kei leh u Mahuni leh a thiante kan chuang ang a, Mami leh a bialpa an inphur bawk ang. Hmingduhawma ka hrilh lo va, a phal dawn lo tih ka hriatsa vang a nia. Hre lo law law se a ṭha zawk, Mami leh Chhana te pawh hrilh miah lo turin ka intiamtir sa thlap. Tichuan, inkhawm turte Biak inah an lut fel ta maw tihah kan inphur chhuak ta hlawm a. Front seat-ah ka ṭhu vâng a, u Fela thiante hi u Zuala leh uBuanga te an nia, ka û rualte mah nise; u Fela avangin kan in hi lenluh nan tak an hman ve thin avangin kan innel sa vek tawh a, an phawkin a changa han lem ve hlak thei kha an ni ve a, mahse, zahpuiawm leh buaipui ngai khawpa rui chhia an ni ngai lo. U Mahuni pawh hian a khiat ve leh zauh thin, mahse, ani pawh a zahawmna hloh khawp leh mualpho khawpin a in ngai lo thung. Tunlaiah chuan enjoyment vek a ni tawh, khawpuiah phei chuan thilmak a ni lem lo. Veng hrang hrang kan tlan pelhte chu kimchang takin min hrilh deuh thlap thlap hlawm a, u Buanga te chuan an peg sek tawh niin ka hria. 

Ni a sa deuh tih loh chu a nuam ve khawp mai, thla kan la sek ringawt, Kan eitur kente chu phawrhin kan ṭhu bial laih a, Mami nen kan siambâwl a, u Mahuni pawh a meng phi ve chhâ tawh a, a ṭawng leh bawrh bawrh tawh, u Zuala chuan sehchilh deuh nak hian, “Laltei hi chu ka ngei ve thlawt che, Ṭhianpain a lo hual ve em em che a, midang i lo inruktir daih a.” A ti chhar chhar a. 

U Fela pawh a kai ve tho vangin a zak lem lo a niang, “A â ngawt mai, min chân ropui a nia aw..bawiha..” a lo ti ve nawk nawk a. U Mahuni’n , “Chutiang a ho, ngaihzawng tih vel a ho. Kei hi nia aw..ka nghei rei tawh a nia..zu ka in avang hian e ka easy kher lo a nia. Hmelho..” a lo ti ve sûrh sûrh a, U Buanga lah mi ṭawng muang tih takah, “Lawk, ka lo sawi ve lawk..ih maw bro, zep miah lo chuan kei chu ka rui thin maw, mahse e, zu in ngai lo, mitthi lumennaa tel ngai lo, thlan lai ngai lo, gym-a kal thin sek deuh deuh, rui ve ngai miah lo ka hre ṭeuh, anni ho hian min hmusit ve khanglang suh se..maw..” tiin kut zaizir nen a rawn bei uar lutuk. Mami nen kan nui kan nui ringawt. Chhana te erawh kan piah lawka tleirawl rualkhatho chuan cameraman-ah an lo hmang nge mawni, an buai zak zak viau mai. 

U Buanga thusawi kha ngaihtuah chian chuan a dikna chen a awm ve thei ang. Khawvel a changkang chho zel a, mihring pawh a ṭha zawng leh ṭha lo zawng pawn kan ṭhang ve zel a, a bikin khawpuiah phei chuan tlawmngaihna hi a chuai ṭan deuh em aw tihtheih a ni. Kan khuaah khan vawikhat chu mitthi kan neih ṭumin in riak tur tlangval zawngin YMA OB tlangval leh patir ho kha an phe suau suau mai a. Pu Hlira kan thenawmpa ta pek khan, “Nangmahni kha riak ta mai che u, thalai in la nih vek kha, keini pawh fa pahnih pathum kan neih thlengin kan la riak.. hruaituin bulṭan hmasa ula, memberte chuan an zui mai ang che u” tiin a lo zilhhau hlak mai a. An nui tawi tak hlawm mai asin. Ruihhloa fihlim, Kohhrana active taka inhmang, chhiat ṭhat nikhuaa langsar china buai thiam, a hahthlak china an hmel hmuh tur awm ngai si lo hi sawi tur an awm nual zel, ruihhlo ti, zu rui thle bâwk bâwk, thlan khur lut taima, lang lo china tlawmngaihna la vawng nung ve fan hi an tam em em bawk. Hetianga ka sawi avang hian ruihhlo tih hi a ṭha ka ti lo a nia, ruihhloa fihlim, tlawmngai, Kristian nundan vawng ṭha te aia ngaihsanawm erawh an awm hauh lovang. 

 Thian dangte an la nawi rih êm vangin haw lam pawh kan la tintuah hleithei lo, kan rui ve bawk si lo va, mahse, a nuam ve tho mai. Mami’n ka phone-a a inselfie lai chuan Hmingduhawma’n a lo call a. “Kha, inpa” tiin min rawn pe nghal. 

“Engvangin nge min hrilh miah lova khalai daih daiha kal nge i nih a?” A aw chu a khur deuhin ka hria, a pawr miah lova, a nem dan a hlauhawm thung si. 

“Ih..englo..” ka tih laiin, “Haw nghal rawh u” a rawn ti leh hmiah. 

“An la rui a” tim dai hian ka ti a. “Vanlalhmangaih, ka lâwm lo hle a ni. Fela kha phone pe rawh” a ti chhum hmuk a, ka pe lo ngam teuh lo, u Fela chuan nawi zet hian a lo chhang a, “Naupangho kha hawpui tawh rawh. A tlai tawh. “ Hmingduhawma chuan a rawn ti ta. U Fela pawh a meng deuh kâwk,. Mahse, a rui a la reh si lo. “I thu lo” a tih chuan ka lo chhing sawk. Nuam lo ka va ti tak. Phone chu ka bengah hmehbelin, “A rui rih sia, kan haw tep ang” ka ti thuai thuai a. Ka tlawn titih a ni ber e.

“Denisa’n a rawn hruai ang che. Lo nghak rawh.” Ti vawt ruihin a dah zui ta a.