HMINGDUHAWMA (4)

HMINGDUHAWMA..(4)

Ziaktu : Toni Râltê

Kan khua Chhawrpial lam chu an buaiin an thu pawh a saisa ta deuh nuaih a nih hmel, Khawtlang hruaitu lam te paw’n min rawn be pawp ta nge nge a, keiin ka hmuh dan engkim ka lo sawi thlap si, dâwt ka sawi lo bawk a, a chiang tawkah an ngai a niang e, mi bo zawn pawh an chawlhsan ve ta hmak a. Nu Thangi chhungte lam pawh an zak hle a niawm e. An khaw pa bo tel ve kha, Hruaia an ti mai a, khi lam aṭanga rawn tla thla, thingzai ṭhin a niawm a, chhungkhat anga a neih a thingzaina thinte inah khawsa vein, a bo dawn khan a chhungte bulah, “Ka nu a ṭha vak lo a, ka han haw ang a, ka lo let leh ta lo a nih pawhin min lo ngaihtuah suh u” a lo ti a niawm a, a hlawh pawh a hmain a lo khawn diam tawh a. Sawi hmaih hauh loh tur chu Pu Chhuana te thing pawh a zaisak ve hman nghe nghe a, a zaisak lai chuan a remchang zawk e tiin Pu Chhuana te inah hian chawlhni dawnah rawn hawin a cheng ve thin a niawm e. Chulai vel chuan nu Thangi nen an inkarah thil a lo piang a ni ngei ang. Pu Chhuana pa Pu Chhuna khan a damlai ngeia in sak ve a duh vanga thing pawh zaitir kha an ni a, mahse, an pafain in thar luah chu sawi loh, an inpui pawh luahlumtu awm mang loin tihian a awm ta ringawt chu a ni a, sawi a tamin zeldin thu lo bâwl phuan tawk lah bo lo. Pu Chhuana thih dan bakah a thla a hrân danah khan tuna nu Thangi leh a tlangvalpa hi an inrawlh a ni mai awm mang e tihte a ni nawk mai. Thil ni thei tak pawh a ni e, tichuan, pu Chhuana unaute lam lungawi lo chuan nu Thangi lakah thubuai an thehlut ta hmiah mai. Eng tak ang zel ang maw..

Muanpuia te chesual pawh kha rin aiin an serious a, amah Muanpuia phei chuan nikhua engmah a hre lo, a ṭhianpa pakhat zawk chu a thluakah thisen a tling a, a spinal chord a sawh chhe bawk a niawm e. Pakhat erawh a ban ruh a tliak tih loh hliam liantham a nei lo hlauh. Rui chung hian motor an khalh ṭhin a, a pawi em em a ni. An motor pawh a chhe viau a niang. Duhawma leh Nu Pari hmai zah vangin Mami nen kan va kan ve a, sawi tur a vâng angreng. Duhawma erawh a awm lo a, Nu Pari leh an nula pakhat zawkte kha an lo awm. “A zia lo êm mai, mahse, Nu Par, lungngai lutuk suh u, a damkhawchhuak em em ang” Mami’n a ti ve ngial a, kei erawh ka hul hlauh. A mit khap fak fakin, “Ni e, ka fapa hi ka chân thei lo, ka phal lo” a ti zawi raih a, nu tan chuan fate nikhaw hre lo va mu reng hmuh chu a hrehawm ve ngawtin ka ring. Ka sawi hmaih daih, Nu Pari te nena kan thlalak ho kha ka nu ka thawn a, mahse, “Ka hriat hnu chu a ang, mahse, khaw nge ka hriat ka hrechhuak thei tawh lo” a rawn ti a, nu Pari lahin a intihre ṭha si, a nuam lo lek lek zawk. Sunday chawhnuah Muanpuia thianpa kha ICU-a an dah vang leh amah Muanpuia pawh a ngaihtuahawm zual avangin Mami nen bawk kan va kan ve leh a, An chhungkua an lo kim ṭhap mai. Dar 4 bawr velah Muanpuia ṭhianpa chu a chatthla ta nge nge a, a nu a khawngaihthlak khawp mai. A ṭah hla chham erawh nu Pari te tan a lawmawm vak loh, “Ṭhian kawm fimkhur rawh ka ti ka ti che a ni lawm ni? I nunna hial i chân phah a nih hi” tih lam vel a ni. Ka lo ip deuh, Nu Pari mitmeng pawh a tur khai mai. Hmingduhawma erawh phone a hmang deuh reng a, a pawimawh a niang chu maw. Dar 5 velah Mami nen chuan hawn kan tum a, “Ka lo thlah ang che u” Duhawma chuan a ti vut a, Jenny’n , “Mama, thlah lo mai rawh, ka nute thla a phân êm hi” a lo tih avangin, “Ni e, taxi kan la mai ang,.” Ka lo ti vat. “Ka rei lovang” tiin a kal nul nul si, inthlahrung ru deuhin Mami nen chuan kan zui ve ta hlawk hlawk a, kan tlan lai chuan a phone a rawn ri leh a, a hmet hlum nghal hmak. A nelawm loh riau avangin Mami nen pawh kan ṭawng ngam lo, eng emaw lungawi lohna a nei a niang, a mitmeng pawh a dul hnuk mai a, biak a châkawm tlat loh. Kan chhuk dawn chuan, “Chaw eitui u” a ti sup a. A tlan let leh nghal. Mami’n, “Vawiin chu a zia a dang tawp, nu Pari nen an inhnial vang kha mawni le” a ti nang nang a. “An inhnial maw? Engtik khan?” Ka lo ti vat a. “Ka inthiar lai khan an inhnial thawm ka hria alawm, ‘Nangmah vang a nih hi, ka pa hi engkim ka hrilh thei ṭêp tawh’ kha a tia, nu Pari khan, ‘Tiang khan min puh hlek suh aw. Eng finfiahna mah i nei lo e’ a tia. Midang an rawn luh ve vang nge an tawp zui ta daih a, ka inthiar zo ka va chhuah chuan Nu Pari chiah a lo awm tawh a, ani pawh a hmel a dur khup mai. Mahse, nu fing tih takah a inthunun leh vat a, min lo be sawk sawk alawm” a ti ta a. Engvang tak ni ang maw..

“Muanpuia hi an duat sual ve deuh ang a, chung vel chu a hau a niang” ka ti ringawt. “Ni maithei, Nu Pari hian a duat hmel bik êm alawm. Mahse, finfiahna tih vel kha eng nge a awmzia ni ang le” a ti niah niah a. 

“A ho êm mai, kan buaina tur pawh a awm ve loh chu” tiin kawngka ka hawng a, Chhana ka ko nghal. A lo inbual mek a, a rawn chhuah chuan, “Nu Thangi te an man kha in hre tawh em?” A ti mawlh mawlh. Phone kan lo bih lem lo nen, kan lo hre ve miah lo. “Engtin nge an man” kan ti rual ṭhawt a. “Whatsapp-ah en mai r’u.” A ti liam puat, thlak pawh inthlak lo chuan phone kan bih zui nghal a. Nu Thangi leh Hruaia te chu an thlenna hotelah an va man a niawm e. Tlanbo tum niawm takin an thawmhnaw leh bungrua vel pawh an lo khung fel thlap a, an va nangching hman hram a nih hmel. Thu zawhfiah vel engmah a la awm hran lo a, rinhlelh thila man mai chauh kha an la ni bawk nen. Ka nu ka call ta nghal a. 

“Kan transformer chhe rei lutuk hi ka phone pawh a low zel a, Hei i ni te inah ka va charge a, ka haw chiah” a ti nghal zung zung a, “Nu Thangi te vel kha” ka tih chuan, “Nia, an man an tih kha, I Pa Chhuana thih dan velah khan an ringhlel si a, an dawp ve phawt ang chu. Thangi chu mak ka ti êm mai, rin harsa ka la ti” a ti mial mial a, ni e, a thiannu ve liau liau kha a ni a, rinhlelh chu a harsa ve ngawt ang. “Chuan, nu Thangi chhungte lam hian engmah an sawi ve lo mi?” Ka tih chuan, “Sawi ngam tur pawh ni hek lo le, a pa phei chu a zak viau a niawm e. An khawngaihthlak letling, a fate pawh rawn lak an tum a, mahse, i pa Chhuana û ten an remti bik lo a. Tisawn a ni Hmuni sawn a buaipui rih dawn a niang” a ti a. 

Ka ṭawng leh hmain, “Naktukah leipuiah ka va feh ang a, chawhmeh pawh ka rawn thawn leh ang, e chuan, i u-in nimbu a sawr leh ṭan a, khalamah khan a hralh to theih zawk ang a..lo zawt kual chhin teh aw” a ti leh zung zung a, U Sawmi aw hian, “Nu, vawk khu a chhuak leh daih tawh, U Puia lah a awm si lo” a rawn ti lang lâng a, ka nu chuan a dah nghal daih. Engmah pawh ka sawi ve leh hman lo, a tih ve dan reng hi a nia. Keini pawh rawng kan bawl zui a, nu Thangi te bak sawi tur kan hre meuh lo. 

“Muanpuia chu a ṭha zel em?” Duhawma ka text hmasak berna a niawm e. 5 mins hnu velah, “ Ve teh mial chuan, aw a ṭha e” a rawn ti a. Biak zui lehna tur ka hre si lo a, facebookah ka lut daih. A lawm rual lek ni mah ila Instagram tih vel hi ka lut ngai meuh lo, whatsapp leh facebook hi ka luh chhawk sek ringawt, zan lamah youtube a ni leh mai a, mi lar te hi ka hriat ve chuan an lo lar viau tawh zel, ka bengvar lohna lam tak a ni. Seni nen kan intext pah bawk a, a bialpain inrukpuia a sawm chhen thu vel a rawn sawi a, ka nui ka nui ringawt, “Nei mai la, i duh êm kha” ka tih chuan, “A û nuthlawi saw hrawn a hrehawm hmel, a lal sia an ti zel a, ka huphurh” a rawn ti a. A bialpa hi khaw ṭhenawm daih a nih avangin ka hrechiang em em lo, “Buana hmaa kherh te chu, huphurh sa ringawt lo la, bakah inruk kher a ngai mi? Biak in hawnga inneih kha a ṭha ve alawm” ka va ti a. 

“Nia, kei pawh inruk kher chu ka tia, amah hian a hautak mai mai, inruk hian i chhungte pawn an remti mai ang a ti zel a” a rawn ti a. 

Hmingduhawma hnen aṭangin, “Reh daih mah ta che” tih ka dawn avangin , “Sawi tur a vâng e” tiin ka va reply leh zuk. Seni pawh tihtur dang a nei leh nge ni a reh zui leh ta daih. Duhawma chuan, “Naktuk zanah ka rawn kal ang, lo awm rawh aw” a rawn ti leh tawp a, “Eng nge i lo tih dawn?” Ka tih chu a seen a, min reply leh tawh chuang lo. He pa hi a, a duh duh hi a rawn sawi a, mahse, hetia a zeuh zeuha inbiak hi a nawm dan a dangdai, amahah hian min hîp riautu a awm ka tih tawh kha. Zan dang aiin ka muhil hma. Thil danglam em em tawng lem loin a tuk chu ka hmang liam a, Papuii leh Apuia te nen kan inzui deuh chawt mai, Apuia hian a chang chuan min bialnu chei deuhin ka hre thin, mahse, ka hre lo der tawp, han dawnsawn vak dan ka hre lo a ni. 

Zanriah kan ei laiin ka nuin min rawn call a, “Ei khamah ka lo call ang che” ka tih chuan, “I nu Thangi te kha an inpuang tawh” a rawn ti teh ngawt a, “Awii a ni maw? Mahse, ka ei laklawh lutuk, ka kham ṭêp” tiin ka dah a, chaw chu ka ei thuai thuai, Mami leh Chhana pawh an helhhawlh chiang, zanin zet chu chaw kan va ei rei lo tak..ei khamah kan insengfel leh sawk sawk a, hman vêk vawka thuthar ngaihthlak chu kan duh ber a ni. Ṭawng pawh kan ṭawng lem lo, kan che mawp mawp mai. Kan zo fel ta maw tihah ka nu chu ka call ta a, speaker ka on vei thlap bawk. 

“Nu, tikhan han sawi char char teh, an inpuan dan tak chu” ka ti nghal thâwr a, Sibuta bengchheng lutuk chu a kalsan ve a niang, thawm a zawi ta deuh. “Aw an inpuang vek, i pa Chhuana pawh kha anmahni tihhlum alawm lo ni le, a eiturah tûr an lo pawlhsak a, kha a taksa hmawr lamte pawh a duk vek kha maw. Chuan, i pu Chhuna kha chu lukhamin Thangi’n a up hlum a nihawm chu, Hruaia nen an intekrek lai a lo phâwk pek a, ani pu Chhuna lahin, “Zaninah chhungkua ka ko khawm ang a, engkim ka puangchhuak ang “ a lo ti thawt thawt a, anni hlauthawng khan remruat dunin ti khan a chhun mu kha an that ta ringawt mai a ni. Rapthlak ka ti lutuk, Kha thingzaipa nen khan an thing a zaisak laia chawlhni hmanga an ina a chenkual chhung khan an lo inngaizawng hman a, an kal thui ta zel a, tiang hi an thleng ta a nih hi..” a rawn ti ta dap dap a. Kan rin ruk vek mah nise; thil tak tak a ni tih han hriat meuh chuan min ṭhawng lo thei lo, nu Thangi kan lo hrechiang ve bawk si, nu fel leh hawihhawm tak, nu lênglâm lo, mi pawi pawh sawi ngai lo kha a ni miau a. Pa Chhuana a uiresan chu thuhran a nunna hial an laksak bakah putar nunna thlengin an zuah lo bawk. Uirenain a hrinchhuah leh a nghawng vek thil a ni a, a rapthlakin a tenawm tel bawk. 

“Chuan, an tâng ngei ang a tiraw?” Ka ti hram a. “Tân loh ten, Thangi pa phei chuan a tuithlar hmak thu an sawi kha, an zak ve ngawt ang, an khawngaihthlak zawk. “ A ti hlaih hlaih a, a thiannu mah nise; a chetdan chuan a ril a rem lem lo tih a lang reng, “Pa Chhuana thawm vel in la hre ngai em?” Ka tih chuan, “Ka hre chiah lo, tunah chuan engkim an hrechhuak tawh a, thlamuangin a chawl ve tawh ang chu..” a ti charh charh a. Pa Chhuana te pafa chu an lainatawm ka ti khawp mai, phatsan a nih ahnu hmanah nunna an chân phah lehzel a, an fate an la tê si, nu leh pa tel loin an seilian dawn chu a ni sia. Pathianin an chungah zah a ngai hram ang chu maw. 

Ka nuin a dah hmain Hmingduhawma a rawn lut hlawl, Mami’n a lo dawngsawng vat a, ka nu lah chuan, “Nimbu tui chu i lo zawt kual deuh em? A tam angreng sia, hralh vat vat loh chuan” a rawn ti lâng lâng a.

“La zawt chiah lo, tihdan a awm mai ang” ka ti ringawt. Kar tawp lama inthawn turin kan inbe fel ta a,kan dah ta rih. Duhawma chuan min lo en kar mai a, ka lai lek lek. Ka tihngaihna hre lo chuan, “Eng nge?” Ka’n ti ngawt a! A khi suk duh chauh. Mami leh Chhana thil inla hrethiam lutuk chuan mi run lek lek, an inmelh zuk zuk a, ka hrethiam ve vek si. “Zanlai rilṭama ei tur ka han lei lawk” tih leh Mami chhuah a rual a, Chhana lahin, “Note copy tur ka ngah lutuk..” tiin roomah min luhsan deuh hmak bawk. Hmingduhawma lah a ṭhu rûn a, a ṭawng mai si lo, sawi tur ka ngaihtuah char char. “Lo ṭhu hnai teh” ka ṭawng hmain a rawn ti thum dût a, melh hrawkin, “Ka peih kher lo” ka ti a. 

Amah zawk chu rawn ṭhu hnaiin min si deuhthaw, ka lo îp châwih mai. “Tihian lehkha i zir dawn loh apiangah ka rawn kal ziah tawh ang. “ A tih chuan, “Ngati nge?” Ka lo ti vat. 

“Aw ven i ngai” a ti hmuk chu mak ti deuhin ka en a, “Engvangin ?” Ka ti chiam ringawt. 

“Ka ta i nih reng theih nan” thûk zeta min melh chungin a ni a sawi ni. Ka tha a khur nia mawle, awii, engtin emawni hian ka awm, ka bing mup mup ka ti dawn nge ka ni deuh hûih ka ti zawk dawn. “I â nih chu” ka inrin hmain ka ti hliai a, “Â tawh chu a nih hi” a lo ti ve hmuk bawk. “I rui mi a.” Ka ti pawr hlar a, lungawi ru si, lungawi lo tho si ang hian ka awm. “Rui hmel ka pu em ni? Ti nge maw i hriatthiam har êm êm le? Hmeichhia ka ngaihven awmchhun i nih hi. Chu chu hrereng rawh” a ti ve ta duah a. Hmm, tihian min bem tihna nge? A bialnu angin min treat deuh tawp zawk? Ka bangbo a ni, tawnhriat ka neih loh hrehawm ka tih vena awmchhun a la niawm e. “Chuan engtin?” Ka ṭawng zawi lutuk ringawt. Ka aw lah chu a khur deuhin ka hria. 

“Ka nei dawn che. I graduate zawhah” a ti hmiah mai le..”Hei, i â tak tak a nih hi, inngaihzawn pawh kan inngaizawng lo” ka tih laiin Mami a rawn lut thut si, a rawn khi lut ṭhâw lehnghal a, ka melh rum ngang mai. Zâm eih lo hian Hmingduhawma chuan ka kut a rawn chelh a, hum vang vang chungin, “Mami, ani hi lo veng ngun hle rawh aw, mi thikthu chhe deuh mai ka nia,ka hmuh phakah a awm reng thei si lo” a ti dam thlup a,. Mami chuan uar zeta a lu bu nghauh nghauhin, “Awii, lutuk, in inhmeh tawp. “ A ti a, a nuihza insum chuan mi run leh tawh. He nu hian ka zei lohzia leh mipa ka ngaihsak lohzia a hrechiang a, ka awmdan tur a hrethiam vek dawn, chuvanga nuihza a nih hi. Ka va chum awk dawn mawni le. 

Mami rooma a luh hnuah pawh ka kut chu a la hum reng a, “Lehkha zir tawh rawh, ka va haw ang e. “ A ti sup a. Ka va melh chuan ka mitah tak a lo melh a, ka zâm deuh naa intihuai luiin, “Ka rilru pawh i hre lo va, ti nge hetia min tih ringawt a” ka ti ve ta a. 

A ngawih vang vang hnuah chiang taka min rawn enin, “A nih, min duh lo em ni?” A ti zawi sup a. Ka heh ka liak zauh a, chhan dan tur ka ngaihtuah vang vang mai. He pa hi ka duh ni chuan ka hria, mipa dang bula ka awmin ka danglam ngai lo, a bulah chiah ka danglam thin. Vawikhatna atan chuan thil pawi tak a ni dawn em ni? Amah melh let ve kal chung chuan, “Aih” ka ti ve ta sap a. Ka kut chu a hum nghet sawt a, “Ka lawm e. Ka tina miah lovang che” a ti a. Hmingduhawma bialnu ka lo ni ta. A haw dawnin kawngka bulah kan ding det a, ka hmui a rawn nûl zauh, kei chu ka awm ve tawp a ni mai, a vawikhat nan mipain min fâwp ve a nih chu! Ka msg dawn hmasak ber pawh, “Tumah i la fawp miah lo tak tak a nih kha” tih a ni ta chiah a, ka nui tawp. Zahtheih loh chhuahin, “Min la zirtir ang chu” ka ti ve ringawt, a phur mah mah ang tih erawh ka hlau deuh.

Nu Thangi te pahnih pawh central jail lamah an inphur thla ta a niang, engmah kan hre zui ta lo. An fate erawh an khawngaihthlak a ni. Nu Thangi te aṭang hian thlarau vakvai kan tih ang, an damlaia an tih hman loh emaw tihtur pawimawh lutuk an neih vanga thih hnua rawn inlar leh hi an awm ka ring tak tak,. An chanchin chu a darh lo thei ta lo va, social media lamah pawh an sawi hut hut mai, keini Chhawrpial khua leh tui ho erawh kan rak ve vak lo, a ṭul berin kan hre lo a niang e. Hmingduhawma bulah erawh ka sawi tur hre lo lutukin ka sawi ve hram, “Uirena hi chuan nghawng a nei thui teh asin” a tih ve thlup kha. A sawi ang tak tak khan a thikthu a chhia, Mahse, a tihlan dan a fing ka ti mai,. Pawl 9 kan zir laia Mami bialpa, Lunglei lam ami daih kha ka hrechhuak, Mami kha hmun dang atanga rawn thunun vek a tum a, ani Mami lahin a hlau ropui si, a nun kha a zalên lo ka ti mai, a tawpah a ning ve tawngkhawng tawh kha a thlawn ta hlawl rêng a, khatiang mipa ang kha Hmingduhawma chu a ni ve leh hauh si lo, phone incheck sak tih vel lam chu a ti lo va, FB leh IG lamah ka chet nat loh êm vang te pawh a niang. Mahse, lunch break apiangin 3 mins tal min video call ngei ngei, tu nge ka bulah awm a hre duh. Apuia chungchang pawh ka hrilh lo thei ta lo a, a thik pawn ka hre lo. Mahse, a fâla ka hmuh a hlau, kha chu a hlau tur pawh a ni. U Fela hi rawn leng fo lo se a duh bawk, “A endan che hi a danglam, mipa ka nih angin ka man mai” a ti hmiah mai a, keiin ka hrethiam der si lo. Keimaha ina ka awm te hi a remti vak lo,Chhana haw zuai laiin Mami’n a nuteii damlo a riahpui a ngai tlat mai pek a, kei aiin Duhawma a phili zawk, keimaha in ka nghak tur kha a duh lo bur mai, lo riah êm chu a hreh bakah keiin ka remti bik si lo, “Ṭhu tlaivar mai ang” te a ti thul, mahse, vanneih asiamin chumi zanah tak chuan U Fela leh a patea te Sihphira an kal a ngai ta hlauh a, zan an riah dawn vangin ngaihngam takin min hawnsan thei hram, khatiang vel kha kan nia maw, mahse, ka hrechiang telh telh a, a sawmna ka lo pawmsak hi ka inchhir lo telh telh, min duat a, min hrethiam a, min zahpui lo bawk. Hmeichhia tan hian min zahpui miah lotu mipa lo hlutzia hi ka ti ta alawm, Nu Pari te chhungkua pawn an hre vek tawh, eng em em chu an sawi lo, Jenny erawh chuan sawi a nei mahna, ka va hre ve tawh lem lo va. Ka nute bulah erawh ka la sawi lo, Mama hi a strict ve angreng sia, kei ngaihzawng nei ngai lova thuchang ka zak deuh tlat a nih chu, an hriat hun hunah hre ve mai teh se a. 

Duhawma awm laiin Nu Remi Seni nuin min lo call a, “I ṭhiannu hi nizanah a lo haw tawh lo, kan be tlang thei bawk si lo, in bulah sawi te a nei em?” A rawn ti. 

“Awii chutiang sawi a neih âwm ka hre miah lo, zantirah kha chuan kan intext zuai a, ti nge mawni le?” Ka lo ti vat a, rindan erawh ka nei sa, inruk an duh thu kha a sawi a sawi sia, an inru a nih ka ring. “A mak êm mai, a thianpa kha a number te i nei lo maw?” A rawn ti a, anni pawn an tlan dun chu an ring ve tho a nih hmel, “Nei lo reng reng, lo biak kan lo tum ve chhin ang aw” ka ti ta ringawt a. 

Mami ka hrilh ve nghal, “An inru a nih chu, ngaw rawh, u Duati ka’n bia ang e” tiin khaw thenawma a cousin a call nghal, Seni te chu an lo tlan dun ngei a, a bialpa Vena nî, hmeithai inah an lo inru ve ngei a nih awm chu,. Lalseni mai mai chu aw. Nu Remi pawh chu ka hrilh ta mai, chanchin an hriat vat loh chuan an chiâi ve thei si a,. Chutia kan buai vel lai chuan Duhawma pawh a lo ṭhu ngawi reng a, kan buai zawhah chuan, “Inru ve ila” a ti thut, Chhana a lo la nui puak zui..”I zak lo” ka ti hlar a, “Chhana, nghah rei a la ngai dawn sia, ka ru mai dawn aw” tiin Chhana a va en a, “Nangmah zawk hi lo lut ve law law rawh” Chhana chuan a lo ti ve. 

A hnua kan pahniha kan awmdun hnuah thutak deuhin, “Ka nu khan Biak in hawng ngeia nupui nei turin min fuih ṭhin a, ka duhthusam pawh a ni, hun fâl kan nei ve ta fo a, infawh aia thui ka kal ngai loh chhan pawh ka nu thuchah vang a nia, nangman i duh dawn lo tih ka hre bawk. I hrethiam tiraw?” A ti dap dap a. A sawi dik chiah, chance hi kan nei ve zeuh zeuh a, mahse, inkiss paha ka hnutê a khawih tih loh chu engmah a ti ngai lo. Tin, tumlui pawh nise ka duh lo bur,. Mahse, hriatthiam loh ka neih avangin, “ Ka nu khan te i tih, Nu Pari saw i nu a ni lo mi?” Ka ti ta hû a. A khi suk a, sikret a ṭan leh tê tê hnuah, “I hre tawh turah ka lo ngai a, ni lo e, ka pa nupui a nih saw” tih pahin a mengzîm sawt a, a hmel a rum thut bawk. Ka hrilhhai lek lek a ni. “Ka hre ve chiah, a van mak, i nu maw ka ti char char a, a nih Muanpuia te nu a ni em?” Ka ti a, mawl min ti viau ang em aw. 

“Aw Jenny leh Muanpuia hi ka pa nena an fa “ a ti chhum hmuk, a inthunun zo lo lek leka ka hriat avangin, “ E taka! Nang english thiamah hei hi min lo lehsak teh” tiin kan zirlai ami ka hriatthiam chiah lo, a thla ka lak chu ka entir ta daih a, rum nghutin, “Ka thiam bik lo” a ti naa a chhiar ta tho a, ṭawngkam a thiam bik lo nen, kan va inhrilhfiah rei tak. Zaizir nen a bei a, ka nuih a za zawk. Ni e, zêp nâk emaw tunlai khawvelah chuan Thingtlang leh khawpui lam zirna hi a inang thei lo, english medium chhuak leh mizo medium chhuak chu kan class a san ang zelin kan inthlauhna a langsar tawh thin. Kan khua angah chuan a thiam leh vengva pawla ngaih ni mah ila, College level-ah chuan kan hawi â deuh hû hû chang a tam, bakah sap ṭawnga ṭawng tam lo ta na nâ nâ chu kan zum dûk mai a, ṭawng hi kan hreh ngawih ngawih mai a ni. Mahse, thiam si lo, thiam anga lan ṭâlh hi ka tih ngai loh a nia, hre si lo hria anga lan te, mi ka zawt hreh lem lo. Ka zawha te hi an puitling thei bawk a, min nuihzata min hmuhsit phah ka hre chuang lo, Hmingduhawma hi ka zawt nasa thei,.dawhthei tak hian min hrilh ve leh mual mual zel. Amah pawn a ti, “Mi hi i tibuai thei reuh si, bialpa ang pawh hian min en lo, best friend angin min treat “ a ti thin, “A nuam daih zawk, mi bula inlak bialpa/ bialnu lutuk te hi ka zah zawng tak” ka ti mai zel a, a ruk tak chuan nuam a ti reng sia, ka hre ve vek. 

Mahse, nu Pari a nu tak tak a ni lo kha mak ka ti zui ta reng a, muthmunah pawh ka ngaihtuah vung vung mai,. A dp-a a hman hi a nu chu a ni ngei ang le. A la dam ang em le? Mimal nun inzawh vak vak lah hi ka inthlahrung ve bawk si,. Ninga nî tlai a ni a, inbual pahin ka zai rât rât a, Hmingduhawma te inah zanriah kan ei leh dawn a ni, a chhan chu Pu Sanga piancham a ni miau a, a fapa ka bialpa ni bawk Duhawma’n kan pathumin chaw eiah min sawm a ni. Thla nawi lam, kan dâk vanglai a ni bawk a, sa kan ei khât si, kan hnial lem lo. Nu Pari’n min lo sawm ve bawk nen,. Mami’n bathroom kawngka a rawn sawi chhen mai, “Ka ek a chhuak ultra pro max tawh a nia, hmanhmawh teh” a ti et et a, a hmai a sen leh vek ang chu. Kei lah khaw khat nula damrei inbual chen zet inbual thin ka ni bawk si, “Ka cheh takngial dawn a nia, a rawn lawr tawhin ka hria” a ti thul, ka intleuh zuai zuai a, ka chhuak ta nge nge a. Min melh no lo khawp mai. Inchei hi ka thiam lo khawp a, hak nuam ka tih apiang ka hi ka ha chhuak mai zel, mahse, bialpa ka han neih ve takah chuan tlemin ka inuluk ve deuh, sawi leh sawi hnu kan khawsak a harsa si a, mite incheina ang chu ka phak chuang lo. Mami hi a inchei thiam angreng a, thawmhnaw inmatch leh match lo te hi ka zawt fo zel. Ka hmai ka chei ve thuak thuak hnuah Mami a inchei ve leh a, Chhana erawh a awlsam khawp mai. 

Pu Sanga chuan a unaute ho pawh a lo sawm ve vek a, ka rin aiin mi an lo tam,. “Hetiang hian an tam dawn tih chu hria ila ka kal miah lovang” tiin Duhawma bulah ka phun hlak a, “Ka hmelhriattir duh che alawm, an mo tur i la ni sia” a tih chuan ka melh no vak lo. Hetiang lam sawi hian ka lai tlat zel, ka sawi thiam lo e a. Nu Pari pawh a nalh kher mai, a nui sâng reng bawk, min hmuh chuan min lo be hlut a, mahse, midang ngaihsak an ngaih avangin keini chu kan inthiarfihlim ta thuai a, an in thlang lam bathlar zau hek hawkah chuan chhuakin dawhkan pakhat chu kan kil ve laih a. Rei kan thut hmain Duhawma chuan amah ang rual tur vel mipa hmelṭha tak, hleitling tawk tak chu a hui zauh a, nui var var chungin a rawn phei a, “Bro, hei ka savatê chu aw. “ Tiin min kawk zauh a, Mami ka sik nawk nawk, a ti teh thut a, ka awmdan ka theihnghilh vek. “Te, hei hi Denis a nih hi, ka patea fapa,ani bak hi thinlung taka kawm ka nei lo a nia” tiin min rawn melh a, ka awmdan buai vek a hmuh chuan, “Hahdam rawh, engkim a ṭha a nia” a ti dam thlup a. Denis chuan a kut rawn pharchhuakin, “Hello, i hming hi ka hre zing si, ka hmu thei che chu ka lawm hle mai, Hmingduhawma te ang lungtum anga sak thinlungte i lo ruksak ve thei a, i bon viau a ni..” nui sâng chung hian a ti mawlh mawlh a, awii! Hmingduhawma mai mai chu aw..ka lo vuan ve vat a, “Awii, a zahthlak e” ka ti lâwi rât ringawt. Mami te nen pawh chuan inchibai zuiin kan bulah a rawn ṭhu zui ve ta daih a, a ṭawng duhin a nelawm a, sawi tur a hre bawk si, Duhawma ngawt ai chuan a kawm tlak deuh e..han ti ve khanglang ila ka ṭawng ve vak chuang lo. Kan hmuipuipu ber Mami nen an titi nasa,. 

Hunserh hman lai chuan Jenny leh a bialpa niawm takte hi an rawn inkai lut ve dawt dawt a, zep loh chuan mi mâwl ber tan pawh an harhfim lo tih a lang chiang hle. Pate pianchama bialpa nen han ruih chu aw, a nu leh pa tan a zahthlak ang chu. Nu Pari meng tal tap pawh chu ka hmu reng, ka khawngaih angreng hle. Duhawma erawh chuan a ngaihven paw’n ka hre lo. Nu hrang an nih vang te pawh a ni mahna. Hunserh hman zawhah chuan chaw ei lam pawh kan tintuah ṭan ta a, Duhawma chuan a nî leh a patea te pawh min hmelhriattir a, Denisa farnu Kimi chu kan inrual vel maithei, kawm a nawm bakah kan mizia a inang ka ti mai, kei pawh a bulah chuan eng eng emaw ka sawi ve ṭeuh mai. A nî fate zinga Aizawla awmchhun chu Duhawma ai pawn a upa maithei, nupui fanau a nei tawh bawk a, kan inbe vak lo. Chaw pawh puar takin kan ei e, Chhana pekin, “Tluanga chu awm ve se, a dul hmul a khât lehpek ang chu aw” a ti a, Mami nen hrethiam zetin kan lo nui hawk ringawt. Duhawma bulah hian sawi ve tur ka hriat loh aleiah ka thiante chanchin hi ka sawi thin a, Nu Thangi te pawh kha a hriat tawh tho avangin a kimchangin ka hrilh ve, ka ṭawngtheih leh kamtam vang pawh a ni hran lo, titi tur a vâng thin sia, ani a ṭawngtam lutuk bik lo nen, Nu Thangi te chungchang chu thinrim deuhin ka sawi a, “Fate pa han thah ringawt chu, awii, a rapthlak ka ti, a ngam zawk e” ka ti hlaih hlaih a, “I ngam loh tur a ti ngam a ni maw?” Nui suk hian a ti a, “Ngam lo rapthlak” ka tih chiam chuan min rawn kuah a, “Chutiang tih ve ngai lo turin min hmangaih tlat ang che.” A ti ta a. Chhan ngaihna ka hre leh ta lo. Khatiang vel kha kan nia maw..mahse, ka nun hi a hlim ve em em tawp, Thingtlang nula, khawpuia lehkhazir, hmeltha em em lo, thiam nei vak bawk si lo bialpa atan chuan Hmingduhawma hi a tê lo viau a ni, chu chuan inrintawkna min neihtir ve tlat. Kei aia ṭha hi a hmu nasa dawn lutuk tih ka hria, mak hi ka ti fó thin, engvanga kei ber kher min thlang tlat hi..

Chaw ei kham aṭanga reivakloah kan haw phei ve ta a, han awm reng kha an puitling hlawm bakah test kan neih dawn vangin lehkhazir a ngai tlat. Duhawma pawn a hriat avangin inah pawh a rawn peng kawi ta lo mai. Ka zirna lamah hi chuan min tibuai lo khawp mai. Dar 11 dawn test tur ka zir hnuah ka duhtawk ta a, Seni nen kan inbe zuai.” Naktukah hian min lo hruai dawn a, chuan, palai an rawn tir ang. Kan inneih dawn chuan ṭhian tur i nih kha aw..” a rawn ti zurh zurh a, “A thuhrimin pasal neih i châk hmel huam huam ee , la nula dial dial ila a ṭha a nia” ka tih chuan, “Kan faten in fate an vel an vêl dawn tihna a ni mai..” tiin a nui ar ar mai, a rilru hi a hah ve ngai vak lo ti mai ang, a thawveng reng thei hi a chang chuan ngeiawm deuh thin mah se; kan thianho boruak chawk hlimtu ber a ni lawi a, pasal a neih daih chuan kan kawng zawh a lo hrang ve tawh ang a, a ngaihawm viau ang le. 

Hun a kal ve zel a, Duhawma nen pawh buaina kan nei ngai lem lo, Apuia pawh ṭha takin bialpa ka neih thu ka hrilh a, a pawmzam thiam viau mai. Mi puitling tak a ni. Papuii leh Duhawma pawh an i hre ve tawh a, “I nei chhe lo e, nang hi i lo zei ru riau a niang” a ti leh thin, ka nui put put ringawt zel. Ka zei lohzia hi mipaho hian hria se fiamthu thawh nan min hmang duh hial ang. Ka nu te lah chuan nimbu tui chu an lo thawn nual mai a, Mami leh Papuii bakah Duhawma ten min zawrhpui liam liam a, kar lovah kan tiral ve ta mai, Duhawma phei chu a ṭhiante a bel nual a, an lo fiam nasa thin viau a niang, “ I sumdawnna i thlak dawn mi? Tun aṭangin i thaibawih nghal ringawt a ni maw?” Ti ten, “Te, thaibawih ka duh miah lo nia aw” naupang chhia taka a tih chuan ka nuih a za, a inhmeh lo lutuk chu..inneih pawh kan innei kher nang. 

Tuesday chu 2nd period-ah  class ka neih avangin ka kal tlai hlek a, kan class ami tho Hlimi leh Cindy te nen kan thleng rual deuhthaw a, anni hi kan class-ah chuan fashion-a sang fal leh tlema inla ve deuh ti mai ang, chutiang chu an nia. Kan inbiak pawh ka la hre lo,. “Hmangaih, U Duhawma te nen khan in inhria mi?” Hlimi zawk chuan a rawn ti thut a. Hmangaih tia min koh vang bakah min biak ngai loh avangin ka lo hamhaih deuh, “Ka biak che chu” ring lenglawng hian a ti leh ṭhat a. Ka phu zuk lehnghal, “Aa..hria e,.” Ka ti ve mai a. Cindy chuan a mit ko a san zauh a, “Engtin nge in lo inhriat ve a?” A ti a. “Kan inhre ve tawp” ka ti ve hmak. Chutiang lehzel an hriat a ṭulna ka hre lo. 

“Lal Jenny’n a sawi kha, Muanpuia accident vel vang khan..aw..an thianpa hi Muanpuia’n a sut kha, khata ṭang vel khan a niang. “ Hlimi chuan a rawn ti ve leh a. Ngawi renga kal kian ka tum lai chuan, “Hey, Pa Sanga birthdayah te khan ti nge in kal ve ringawt a, in thianpa accident chu hman ṭangkai in tum chiang, thingtlangho lah hi a..” Cindy chuan a ti leh hlang hlang a. Ka nui tawp..a buaina siam châk thlak e..chhang loin ka kalsan ta zawk a, inhauh ka thiam vak lo, insual a ni mai. Tunah chuan ka period tur ka tai a na lutuk a, insual ka peih rih lo. 

Class lak laiin Papuii’n, “Niminah Police station-ah ka nuteii ka kalpui a, U Duhawma khan eng nge a tih ve a? “ A tih sur sur chuan, “Ka hre nang, a kal ve tihna mi?” Ka ti hû mai. 

“Aw..a lo awm ve a, Inspector a niin ka hria, chupa nen chuan an inbe char char” a ti a, chutiang lam engmah Duhawma’n min hrilh lo. Dawrah a awm turah ka ngai, thil dang a buaipui ve pawh a ni thei, chung zawng zawng ka hriat ve vek ṭul ka ti lo, ka hriat tura a duh chu min hrilh mai turah ka ngai. 

Mahse, tlaiah a thuphungin, “Eng nge niminah Police stationah i tih a?” Tiin ka text a. Ka rilru a kap pawh a ni lo, ka zawt lumlâm ve mai mai. 

“Case thar thawh leh duh ka nei a, chuvang mawle. “ A rawn tih chuan tlemtêin mak ka ti ve deuh, “Eng case, tu case maw?” Ka tih chuan, “Ele..ka nu mawle, ka nu kha thah a ni miau a..” a rawn ti ta. Ka meng kâwk a, “Tuin nge that?” Ka va ti leh vat a, ka type laite chuan ka kut a khurin ka hria. Minute 2 hnu velah, “Hetiang thu pawimawh hi chu hmaichhanah aw. Savatê” a rawn ti ta daih a. Mi mah hriat châk tawh nak alaiin. Hmm, a mak hle mai. Eng emaw thil hi chu a buaipui ru thin niin ka hre thin rêng a. Nu Pari call ka dawng a, “Hello” ka tih zawh rual chuan, “Tei, naktuk chhun chawlhah inhmu lawk ang hmiang, in college chhak Abby Restaurant-ah khan aw. A pawimawh. Ka lo beisei ang che.” A rawn ti tliang ral a, phone a hmet hlum nghal daih. 

“Eng tak chu ni ang maw” tiin ka phun ri sap a..