HMINGDUHAWMA (3)

HMINGDUHAWMA..(3)

Ziaktu : Toni Râlte

Chhana paw’n dam lam a pan chho ve zel a. Zakdawh tiang hmangin a tei ve thei tawh a, Nu Hmingi chu kan la chelh tlat, min uap hian kan phuisui riau a, bakah a bula awm a nuam si, a eirawngbawl a tui thei bawk si. U Puii kha chu Chhana chhuah tukah a haw a, Nu Hmingi hnena envelope an pek chhungah khan cheng singkhat an lo dah a, Nu Rii’n U puii chu rawn hawn vek turin a ti tak naa, Nu Hmingi’n 5000 a hawntir, a bak hi chu kan mamawh lam nan leh chawhmeh lei nan a ti ve tlat. Chute chu a ui ni tur a ni, “Chhana zarah in hmeh tui deuh dawn a ni maw? Tei te pawh an thau mum kâng mai ang” tihte chu Nu Rii ṭawng duhdan a ni. Kan chhang let buai peih vel lo. Chhana chu class a kal lo rei tawh nen, a thiante an felin an ṭangkai khawp mai. A pawimawh leh zir nasat ngai ang chu an rawn hrilh thlap zel a, ani a inzir peih bawk a, class kal regular ṭhenkhat ai chuan a thiam daih zawk maithei a ni. 

Zanriah kan ei kham hmun ka tihfel laiin Nu Hmingi chuan kuhva ṭhial paha zo zial ngei mai zuk hlat hlat pahin, “Bawiha, Desi nen in inbe tawh ngai na nge?” A ti thut mai a. Chhana a lai hle tih a lang. “Be lo” a ti tawi tak a.

“Ti nge?” Mami’n a lo ti vat, “Min duh tawh lo a niang, a reh tawp” a ti mai si. A damdawi in awm lai kha chuan an inbe ve zauh zauh thin kha a nia, ka lo chîk lem lo va, Chhana mize zâwi leh ngui deuh bur reng te chu a dam lohna vangah ka lo ngai ringawt a, Desi vang pawh a lo ni ve thei tho mai. 

“Amah aia ṭha kan zawng dawn nia” Mami’n a tih leh chuan a ner sak a, “Ngaihzawng tih vel hi ka buaipui peih tawh lo e a” a ti hmuk mai. Chutia a sawi takah chuan Papuii’n a sawi ve sek, Apuia khan min rawn be ve zeuh zeuh tih ka lo sawi theihnghilh daih,. College-ah pawh kan inhmu ve leh zauh thin, mahse, a hranpain kan la inkawm lem lo. Ka ṭhat bik loh tehlul nen ka mipa duhzawng a ni lo nge, bialpa ka neih peih loh vang zawk, ka phur hran lo a. Min biak paw’n a rul tawkin ka chhang mai a, a bak sawi belh vak tur ka hre lo, ani pawn min bem em em hran lo, Zing tin leh zantin min wish a, a taima angreng viau. Papuii lah hian ni se min duh hmel si, ka va chuti tehchiam si lo. Ani hi chuan an vengah bialpa nghet deuh a nei a, amah aia upa ve deuh, pathlawi fa pakhat nei a ni nghe nghe. Kum 2 lai an inzui ve tawh a nih awm chu,. Mami paw’n startu a nei a, an inbe ngawrh viau mai. Mami hi chuan bialpa a lo nei ve tawh thin a, kei anga tlaw em em chu a ni bik lovang. Seni hi kan pathum zingah chuan a zeihawi ber a, luck pawh a luck. 

Sunday chawhnu inkhawm hi chu kan peih tehchiam lo bawk a, noodles kan chhum a, U Fela a lo chhuk ve bawk. Kan rik laih laih laiin “In awm em?” Tih leh kawngka kik an rawn rual a, Nu Hmingi’n a lo chhawn vat. Kawngka chu rawn inhawngin ka rin loh lutukin Hmingduhawma leh ka la hmuh ngai loh amah ang rual vel tur tlangval hi an lo ni reng mai. Phâwk deuhin ka lo melh reng ringawt, “Lo leng rawh u, teh hlawl che u chuan, in va fel ve” Nu Hmingi chuan a lo ti siam siam a. “Nia, inah ka la rawn kan si lo va, a ṭha zel maw?” Tiin Chhana a melh zauh a, Chhana zawk chuan zangkhai takin, “Ka ṭha tawh lutuk, engtin nge kan in i hriat zawk? Ka chhuah ni khan i rawn kal ve si lo a” a lo ti sawk sawk a. 

“Hriat a har hleinem,. “ Tih chauh a sawi. A thianpa chu Dika niin a ṭawng duh viau, U Fela nen pawh an inkawm thei nghal mai. Eitur kan siam tih an hmuh chuan an inthlahrung nge ni, “Tak taka khi laiah khian kan rawn kal a, a remchang êm a tiin kan rawn kawi lut lawk a nih hi, kan chhuak leh nghal mai ang, kalna tur kan la nei a” Duhawma chuan a ti duah a, ka hriat aṭanga a ṭawng sei ve ber ṭum a la niang. Kei chuan sawi tur ka hre lem lo, chelh mah se; an kal ta tho a, Nu Hmingi’n a va thlah thlap. 

“Kha pa kha hmuh tawhna ka nei a ni, hriat tawhna” U Fela’n a tih chuan, “Aw, damdawi inah a rawn kal ve fo kha” ka lo ti hmanhmawh a. 

“Aih, khami hma khan engtin emaw ka hre tawh tlat, driver nih chuan mi kan hmu nasa lutuk a, ka hre mai thei tawh lo” a ti vang vang a. A ngaihtuah zui a ni ngei ang, chunglam a melh vung vung mai.

“Ti daih ila, an pa ber hian eng nge a thawh ang le? An hausak hmel sia” Mami chuan noodles suah chhuah pah chuan a lo ti ve a. Kei pawn ka hre châk ve reng. Nu Hmingi chuan, “In la hre na nge? Sumdawng milian alawm a nih, dawr pawh pali lai an nei, eng dawr dawr nge ka hre tawh lo” a ti puat a. Aizawl sumdawng te hi chu an sum hrâwm a na bawk a, an hausa phian zel.

“Aw..aw ka hre ta, ka hre leh si, Duhawma an tih kha maw, nikum hmasa nge nikum ka chiang ta lo, Hlimen park-a kan kal ṭumin an insual tawh alawm, an buai nasa, a insualpuipa khan chemte a chuh bawk si, kan ṭhelh nasa asin aw, amah kha chuan min hre kher lovang” U Fela chuan a rawn ti ta lung lung a. Kan lo melh ṭhap ringawt, amah bawk chuan, “In rin aiin a insual a thiam phian ang aw, a khingpui lah kha rui mâwl kan tih ang chi chapo bawk si ang kha a nia, a sek ṭung ringawt a, a hneh teuh lo” a ti leh suam suam a. Tunlai chhana lo la insual bur bur te chu a. Ṭhing ka tih zawng tak a ni. Mahse, chhan ṭha tak a awm pawh a ni ve thei tho mai.

A tuk maia Nu Hmingi a haw tawh dawn avangin zanah pawh kan inkhawm ta lo, inthlahna angreng kan nei a, kan hlim vei phian. Nu Hmingi chu kan ngai hle ang le. Zingah sumo kan lo chânpui a, kan invai liam ta. Chhana chu ngaihtuah viau mah ila, class kal a ngai si, amahin a lo awm ve thei mai ang chu maw..a kal thei sawlh sawlh tawh bawk a, ani pawn class kal a châk tawhzia a sawi a sawi mai. Class banah ka nu ten chawhmeh leh eng ilo min lo thawn avangin sumo counter lam panin ka peng kawi leh a, Chhana kan ngaihtuah avangin Mami erawh a haw thung. Bungrua ka lak zawh chuan bus ka nghak ta ran a. Aizawl nawm riauna chu tumah hi hmelchhia leh ṭhing ber a nih theih loh ka ti mai, kan chikim tlâng a, kei pawh ka incheina te chu changkang teh ual lo mah se; ka zakin ka kimki duh lem lo, ka hawi vual vual lai chuan, “Ka va thlah ang che” ka bula rawn din pah chuan a ti thum chhak a. Min tiphù alawm le. Hmingduhawma lek lo niin, he pa chetdan hi a mak thei e. Mi melh run bawk si, ka biang sa hat hat chu ka hre thei. 

“Aih, bus a lo thleng tep ang” ka ti tham ṭiak a. Ti nge maw ka aw te chu a thâm ve ringawt ni. “Kal ang” tih leh kalsawn a rual nghal, a tlai ve tawh tho si, inringzo lo zet hian ka zui ve ta ringawt a, kan la innêl em em bawk si lo, Chhana vanga kan laka ṭhat a chhuah ringawt pawh hian misual tak a ni lovang tih min rintir thei nia..misual tak hmel a pu lo miau bawk si. Back seat-a ṭhut ka tum chuan, “A hmaah” a rawn ti nghut a. Ngawi rengin front seat-ah chuan ka ṭhu ve ta thân a. 

Hmalam a bih ngur a, kei pawn melh loh hram ka tum, traffic lah hi jam reng mai sia maw, Aizawl hi chu a nuam lo ka ti pawh a ni lo, lirthei tam lutuk leh kawngpui tê bawk si hian a tinuam lo fó thin, ke-a kal mai zel hi ka duh fô zel, hah deuh mah ila, hmanhmawh phei chuan thinrim tûk a awl thei si. 

“Chhana chu a ṭha zel em?” A ti a, “Aw” ka ti. Sawi zawm tur dang min zawt miau hleinem.

“College lam te a nuam em?” A ti ve leh zel a, “Nuam ve tho” a hma ai chuan ka chhang sei ve ta hrat e. Traffic jam vanga kan din laiin kan piah lawka bullet bike khalhtu chuan rawn thlêk deuh hû hûin “Awma, hman zanah kan lo beisei reng che a, ngawi rengin i rawn lang lo va. “ Nêl tih hriat zet hian a ti lung lung a. “Nia, ka hna a laklawh deuh a” a va ti ve a, “Friday kha ṭhulh chi a nih loh kha aw, beih pui a tum viau a nih hmel, Judy khan..chuvang chuan i rawn lan ngei a ngai” chu pa bawk chuan a rawn ti leh a, “Ka phur lo” tih chauhin a chhang, kan tlan zui leh ta daih a. Min biak loh chuan biak dan tur ka hre ngang lo a ni. Hmeichhia azawnga mipa lâwm lo ber leh mipa bula awmdan danglam ngai hauh lo kha ka buai ve deuh nge, ka khawr tlat a, in thlen vat vat ka châkin ka zâm titih ringawt. He pa hian huhâng a nei phian em mawni zawk ni. 

Kan in peng kan thleng dawn tih chuan a indap ruk ruk a, “Khaw maw i phone, ka phone hi ka tibo em mawni le” a rawn ti a. Ka lo pe ve mai. A number chu a dial a niang, min pe leh vatin, “Roomah ka kalsan tak e.” A ti leh hnuhnawh a, ka en reng ringawt. Ka chhuk dawn chuan, “Ka lawm e aw” ka ti ve hram a, “I lâwm loh hmel daih zawk” a la tizui. Melh râw chungin ka chhuksan ta daih a, a ṭawngkam teh hmuk thin hi chhan let dan tur a vâng thei êm a ni. Mami bula ka sawi chuan, “Einch, eng emaw a awm a ni lo maw?” Nui chungin a ti har har a. 

“Ka hre bik nang, eng nge awm ang?” Ka tih tak hû-ah chuan Chhana pawh a rawn nui hawk mai. Note ka copy laiin call ka dawng a, “Hello” ka tih chuan, “Ka number hi lo save rawh” a rawn ti teh ngawt a! “Engtin?” Ka tih chuan, “Keimah,i thianpa leh in i luahpui Chhana, motora sutu Muanpuia û Hmingduhawma” a rawn tih duah chuan ka khi sak ringawt. 

“Teh duah a” ka ti sap a, “Ṭawng hnem ka zir a” a rawn ti ngei. Amah a ang lo zawk e a. “Aw le, ka lo save ang” ka ti ve mai a.

“I neih châk deuh kha tikhan awlsam deuhin i nei tihna, ka lawmpui a che” a tih chuan ka âng phuau ringawt, harh chhuak thutin, “I zak lo” ka’n ti ringawt a. “Zak lem lo, thudik sawi te a zahthlak hleinem” a ti sam êt a. “Awii, i va nasa” ka ti leh hliai, phone aṭang na nâ na chuan ka huai ve deuh a nih dawn hi. 

“Ka dah a nia, lehkha kha zir ṭha ang che” a ti leh daih. Hmm, rilru a rawn tikânghlâng tingtang, hmela hi. Mami bulah erawh ka sawi duh rih lo, min chhaih leh vak palh ang. A number chu a hmingpumin ka save ta hmak a, a dp-ah chuan nu hmelṭha tak, sam bu chhah leh dum ṭha tak nei, ngo zet mai hi a hmang a, ka en nawn zing hle, a nu tih dawnin Pi Pari fapa a ni bawk si, a nuteii emaw an chhungkhat vel a nih ka ring ringawt. 

Apuia pawh kan inah a rawn leng ve tawh a, Chhana nen chuan an inkawm thei phian lehnghal, min ngaizawng ang deuha a awm chuan ka nui hmel a hmu khât a ni mai, ṭhian nih hi ka duhtawk viau a ni. Ka rilru chu hrechiang a inti ve thawkhat a niang, chutiang lam rawngkai chuan min be tawh ngai lo. Mahse, min ngaipawimawh tih erawh a la lantir hram hram zel a, chu erawh ka ngaihluin kei pawn puih a ngaihnaah chuan puih zel ka duh. Kan khaw lam paw’n chanchinthar an nei ve zauh zauh, Nu Thangi te khan in pui chu an nufain an la luah chhunzawm zel a,pu Chhuna boral aṭang khan Pu Chhuana thawm pawh an hre nasa zual a niawm e, a mak ka ti viau naa, ka ngaihtuah zui peih vak lo. He lam lamah chuan a rawn hrân peih ka ring lo a ni. Nu Thangi nen hian fa pathum an nei kha a nia, an te ber paw’n pawl 2 a zir ve tawh. Chutia hmeithai ta chu mi ten khawngaihin Nu Thangi pawh inhlawhna a hmu thei viau a niawm a, a lawmpuiawm e. Tin, zirtirtu thar rawn awm, hmelṭha deuh kha a rai a nih âwm chu! Kan khaw tlangvalte fa erawh a ni lo. Sibuta nen kan invideo call deuh reng a, kan kal dawn khan a thawh hmain kan kal ta daih kha a nia, min ngên nasa dawn si a, kan kaitho duh lo a ni. Ka han awm ta lo chu a sual a chhuah ta fô reng a, a luhlul roh si, a la naupan bawk si avangin han hrem chiam emaw kha a rem chiah bawk si lo, Mama rilru hi a tihah ve thin hle a niang, kan inbiak apiangin a sawi ve ziah. Kei tak hian ka ngai, “Anî, lo haw tawh rawh, ka ngai tawh che” a tih ṭuau hi chuan phone ka hmet hlum daih zel. 

“Naktuk zanah hruai chhuah lawk che ka duh a, a rem ka beisei” Hmingduhawma msg chu ka melh vang vang a, ka ner sak. “Lehkha zir ka ngai” ka va ti hmak a, enga mah ahmain ka lungawi lo ve ringawt, chutia duh hun huna hruai chhuah theih anga min ngai chu. “Ka ngen che a nih chu” a rawn ti leh hram a. 

“Ka hman lo” ka va ti leh hmak. Khawi hmunah nge min hruai chhuah a tum ka ngaihven peih lo, min hmuh a duh chuan kan inah a rawn kal thei alawm. A reh ta hmak a, ka be zui bik lo. A tuka ka class kal chu ka awm a nuam lo, ka sawi thiam lo, ka lu te a hai a, ka luakte a chhuak nghulh mai. Zanah kha chuan ka mu ṭha rengin ka hre sia, ka pum nawm loh vangin ka va inthiar a, ka kua a lo ṭha lo chu niin, ka inthiar zawhah chuan ka luak zui ta bawk, chu chuan min tichau zual ni berin ka hria, haw mai ka rilruk ta a. Mami chu thil awmzia ka hrilh hram, min lo ngaihtuah bawk si chu a lo chhuak ve daih a, “Kei pawh pawimawh vak a awm tawh lo, haw rual mai ang” a ti thên a, ka hnial duh lem lo, ṭawng pawh ka ṭawng ṭha peih lo. Taxi kan la a, “Eisual i nei a ni lo maw?” Min tih takah chuan, zingkara chengkawl ṭhing ka ei kha ka hrechhuak nghal, kan chhuang lum tho nain kha bak puh tur ka hre lo. “A ni maithei” tih pahin ka uak leh a, luah êm chu ka luak ta lo. In kan thlen chuan ka mu zawi hnawk, Chhana nen chuan avil min eitir a, damdawi ina va kal mai an sawi naa, ka sum neih tlemzia ka hriat kar avangin, “Ka ṭha mai ang” ka ti a. Tuilum chiâl te min intir thul, ka luak leh zel si, Nu Zari”n ORS a rawn keng hlauh a, ka in ta a, luak tho mah ila chambâng a awm ve tho ang chu. Ka tlân reng bawk si nen, ek chhuah tur em em pawh nei chuang loin ka pum a rawn na zel si a, tuiril hlirin ka luak kal reng bawk si, Pathian zarah dam loh hi ka nei khât ve a, khawsik phei chu ka neih lohna chin pawh ka hre tawh lo, chutianga na ngai ta lo chu ni hmiang, ka kawṭhalo leh luak chuan min tichau em em mai a, men pawh ka meng hleithei lo a ni ber e. Mami te chu an mangang tih ka hrereng, mahse, damdawi ina kan kal chuan min lo admit te ka hlau a, ka chhungten min ngaihtuah dawn bawk si, tawrh dam theih mai a nih ka ring. Zanriah pawh ka ei peih ta lo, ors ka in tluk tluk reng ringawt. Bual pawh ka la inbual lo.

Mami’n , “Lo lut rawh u” a tih ri chu ka mang hriat rei ruai, “Ehe! Teh hlawl chuan” a tih leh hluai ri nen, tu nge lo kal tih pawh ka ngaihven peih lo. Muthilh leh tuma ka chhin diar diar laiin Hmingduhawma aw ngei mai hian, “Birthday lawmnaa kal turin ka lo sawm dawn “ a tih ri chuan min tiharh chiang hle. “A dam lo a” Mami chuan a ti phawt a, “Eng a? Ngati nge?” Duhawma chuan a ti hluai a. Mak a ti tih a aw aṭangin a lang reng. Mami chuan ka awmdan velte chu a sawi mial mial a, a chek hluk chu ka hre thei. Hetiang chung chuan min rawn hmu lo se ka duh khawp mai. “A va zia lo ve aw, damdawi inah kalpui a ngai a nih chu” a ti nghet churh a, Mami’n ka duh loh thu velte chu a sawi niah niah, “Duh loh ringawt chi a nih loh chu. Va insiam rawh, va kalpui ang” a ti nghut nghut mai. Mami pawh pindanah chuan rawn lut nghalin an thusawi ka hre thei vek tih a hrethiam a ni ngei ang, “Insiam rawh, kha tunah pawh i tla dûk tawh a nia” a ti a. “Aih” ka ti ngar si, “I â êm mai, an admit kher dawn che pawh ni hlei lo, damdawi te an chawh che ang a, i zia vat zawk dawn alawm” a ti sawk sawk a. Min rawn kaitho titih, ka lo melh rum ngang mai, khi sûng hian, “Golden chance a nih hi, ṭhing viau zel suh” a ti sur sur zui a, ka va han peih lo tak. Chhana pawh a rawn bai lut a, “Insiam vak pawh a ngai lo vang, an admit che chu ka ring chiah lo, inentir tluk a awm lo” a lo ti ve a, an insupport vel lutuk chu ka ngei riau a ni. Ka pyjama hak lai chu thlakin, ka sam ka ṭawn a, mawza bun lehin ka inpeih chu a ni mai. Kan va chhuah chuan Hmingduhawma chu a lo ṭhu rûn a, ka melh lo lui tlat thung. Min rawn din chilh rûnin, “I va cher ve” a ti kher chuan mi rûn tawp, rum deuha melhin, “I chhia” ka’n ti ngawt pek a! A chhe tak tak tawp si lo. “Kal ang” a ti hmuk a, Chhana erawh chuan in a lo nghak dawn thung. 

Casualty-ah kan lut a, hnathawkte an fel thar thar khawp mai, ka ei leh in min zawt a, ka bp pawh a lo hniam deuh a lo nia. Luak danna-in min jection a, kawṭhalo damdawi min chawh bawk. Keimah ka harh deuh tho avangin min admit ta lo, ka lawm ngei mai. Hmingduhawma’n damdawi lei a tum luih tlat avangin kan dang zo lo, a lei lai chuan Mami’n, “Nula kawṭhalo han nih tawp mai chu” tiin ka beng bulah a rawn nui puak huk. Za lo fe hian ka lo nui ve hui ringawt. A va nghal tak, lehlamah chuan a nuam vak lo, natna dangte chu nise thuhran, kawṭhalo ber kher chu, chutah mipa anga ka la en ve awmchhun bulah lehnghal, mahse, zah vanga dam thei ka ni chuang si lo va, ka zak duh bik lo ve tlat. 

In kan thlen chuan Chhana pawh a lo la meng a, Kei chu inthiar turin toiletah ka lut nghal rawk rawk, zah sawi hleihtheih pawh a ni lo. Ka va chhuah chuan ka lai ve deuh, Duhawma lah chu a ṭhu ve reng bawk si, a hnu lawkah a phone a rawn ri a, “Zanin chu min hrethiam mai r’u, buaina ka tawk a.” Tih zawng a sawi a, a dah nghal hmiah. A sawi duh chin hi a tawi thei ê. Mami chuan thingpui a lum a, “Kei chu a sen hâng aw” a ti thawp sup a, “Kawṭhalonu, i nawm loh chuan va mu leh daih rawh, kei pawh thingpui ka in zo ang a, ka haw ang” tiin min rawn melh rulh a. Ka lei ka lo chhuahkhum nghek ringawt. “I tiduhdah êm mai a” Mami chuan nui chungin a lo ti ve a. Chhana chuan thutak angreng tak hian, “Ti nge zanin hi i lo kal thut a? Tei i rawn rim dawn mi?” A lo ti khauh a. A mitmeng danglam zauh chu ka hmu ve hman tlat. A nui hawk a, “Rim angreng, rim chiah lo “ a ti a, eng ang chhanna nge maw ni ngai ni. 

A sawi ang khan thingpui a in zawh chuan a ding nulh a, “Lo dam rawh, a nih u aw” tiin chhan pawh chhan hman lohin a chhuak nul nul. Mami nen pawh kan nui tawp. Engpawhnise, a lo kal kha a lawmawmin kan tan a ṭangkai hrim hrim a, a hlu khawp mai. Misual tak chu a ni lo alawm. Ka damdawi ei bakah min jection vang nge ka beisei aiin ka mu ṭha, vawi 2 muthilh tak tak hmaa ka tlân tih loh chu ka tho tawh lo. Inrinni zingah hi chuan kan bazar dawn te a nih loh chuan kan mu rei thin a, vawiin pawh bazar loh ni a ni bawk a, kan mu rei tlang hle. Kei phei chu ka chau ve deuh nen, min phût dawn chuang lo bawk a, dar 9 rik dawnah ka tho. Ka tho nuam ta viau mai a, mahse, chengkawl chu ka ei lo rei deuh tawhin ka ring, Hmanah kan tet laiin lui kan kalnaah chakawk ka ei sual tawh bawk a, Tluanga leh Berhpuia ten min inpuak chhawk zak zak mai, khata ṭang khan chakawk hi tun thlengin ka ei leh ta lo, ka huat phah hlau a ni ber. Ka zia tawh bawk a, darthlalang te ka nawt a, Kan in luahna te pawh hian an in kan luah hi an lawm ve viauin ka hria, kan tihhnawk loh chu thuhran, in leng kan nei vak ngai lo bawk nen, bengchheng chi vak kan ni lo bawk a, kan hnawksak lo ve hlein ka hria. Chawhmeh pawh min suah zing ngang mai. An fanu neihchhun hi phaiah an dah ve a, U Fela leh a nau tlangval bakah Ratu lama an nau lehkhazir an awmpui bawk a, nu Zari a dawr lamah a buai thei bawk nen, an inte ti ka tihfelsak ve fó mai. Tikhan duhsakna kawng zawngah min duhsak let ve a, chhungkhat ang mai kan ni. 

Zai pah rât rât chunga darthlalang ka nawh mawlh mawlh lai chuan ka phone a rawn ri a, ka nu a ni. “Enteh, i nu Thangi kha a bo daih! “ A rawn ti teh ngawt a ! Ka phâwk teh e. “Ehe! A va mak, ngati nge? Engtik aṭangin” ka lo ti hû a. “Nimin aṭangin a awmna chin an hre tawh lo, a fate an la naupang si, an vanduai êm mai,.” A tih chuan, “Engtin nge a bo dan vel” ka lo ti vat a. 

“A leipui kal a rawn haw lo tawp, an va zawng nasa, an hmu bawk si lo, hei vawiin lamah pawh an zawng leh a, ni 7 chhung an zawng ang. A thuhrimin chanchinthar groupah te khan i hmu ve lo mawni le..” a rawn ti hlak hlak a. Nizan lamah phone ka khawih peih loh bakah vawiinah pawh whatsapp lam ka la bih mumal lo hrim hrim, “Chuan, a fate tuin nge awmpui” ka tih chuan, “An ni Vani’n a awmpui a, a buaithlak a nih hi, an chhungkaw vanduai kum a nih ber mai hi a,.” Pawi tih hmel fe hian a rawn ti a. 

“An khaw lamah te hian a haw te a ni lo maw?” Ka ti a. Nu Thangi hi Chawnpui khua a ni, “Haw lo, a chhungte pawh an mangang ve tho. “ A tih laiin Sibuta ṭap thawm ka hre zui, “Aw ka dah rih dawn, i fapa a rawn ṭap lut tlat” tiin ka nu chuan a dah ta sawk sawk a. Kan Sibuta chu tuin nge maw lo vêl leh ni. A inlak huai tehlul nen. Mami te bulah Nu Thangi bo thu vel chu ka sawi a, mak an ti ve hle. Chhana ta pek chuan, “Nizanah ka hre tawh, ka sawi theihnghilh daih a nih kha” a ti roh a. A va â tak he pa hi. Whatsapp-a ka luh chuan, “Kawṭhalonu, i kua a ṭha tawh em?” Tih thu ka dawng. Min lo thawntu chu sawi pawh ngaiin ka hre lo, “Ṭha tawh” tih ringawtin ka chhang a, tlai lamah daih min rawn reply, “Naktukah kan inah chaw in lo ei dawn a nih chu, ka pa ten an sawm dawn che u “ a rawn ti teh daih a, hmm, chaw ei chhuah hi ka châk vak lo asin mawle, lo hnar erawh a nuam dawn si lo. A sawi ang chiah khan Nu Pari khan Chhana a rawn be ta a, naktuk tlai lamah an ina chaw ei tur chuan min rawn sawm ta hlawm, Chhana pawh chuan a châk vak loh hmel viau, mahse, han inhnar kha nuam hek lo le. Hmingduhawma te in hmuh ve hrim hrim pawh a châkawm ti tawh mai ang.

Chawhma inkhawm banah kan inbual a, min rawn lam hun kan nghak ta ran mai. Duhawma bawkin min rawn hruai, “Ti nge min sawm kher a?” Ka tih chuan, “Ka hre nang, thupha chawi nan a niang” a ti ve ringawt. Anni hi Ramhlun North-ah an khawsa a, an in chu a lian kher mai. Mahse, a simplein a western ruih mai. Nu Pari chuan nui sâng chungin min lo chhawn a, an in chhung pawh a pui e, ka sawi ve duah thiam lo. Duhawma pa sumdawng milian a nia, a mak lem lo. Muanpuia pawh a lo awm ve khar a, Chhana lakah chuan a inthlahrun hmel deuhin ka hria, ani pawh hi a hmelchhe lo mawle. Jenny erawh eng emaw thilah a chhuak rih a niawm e, awmpui pawh nula pahnih an awm. Pa ber Pu Sanga chu a hma ai khan ka hmu cher deuh, nu Pari nen an kum inthlauhna hi ka hre châk mai mai,. Nu Pari chu a titi siam siam a, Mami’n a lo zawm ve leh zauh bawk kei chu sawi tur em em ka nei lo. Chutah, “Taka..Tei, i nu bulah chuan min lo sawi ta em? Min hria em?” A rawn tih chuan ka lo ngaihtuah zui hman, mahse, hrechhuak leh vatin, “E..aw zawt e, mahse, Pari tih awm hmelhriat ka neih ka hre lo a ti tlat “ ka ti a. Nu Pari chu a nui a, “Hmm, min hre duh tawh lo a niang, tak taka inhmuh lohna a rei ve ta bawk a, a àwm ve tho mai. “ A ti a. Hmingduhawma chu inbual turin a kalsawn a, Jenny pawh a rawn thleng ve chiah, “Awi, saw lai kualah khan Bolero nen kan insu teuh lutuk a, ka thin a la phú” a ti a, a àwm a dawm vawng vawng mai.” Fimkhur hi a tha a nia, an tlan chak thei si” Nu Pari chuan a ti a. 

“Scooter hi chu ka ning tawh, a den bik, car min lei ula a tha ang” Jenny chuan a ti ham ham a, a nuih tlawn deuh bawk. Pu Sanga chuan, “Ee..hna ṭha deuh i neih hunah nangmah ngeiin i la lei ve ang chu” nui chung hian a lo ti a. Mami chuan Jenny chu a melh leh run run thin a, ka lo ip deuh thin, a ei vak loh zawngte lakah hian a inthunun thiam meuh thin lo. Dar 5:40 velah chuan, an nula ten chaw ei an peih tawh thu rawn sawiin choka lamah chuan kan inzui lut ta dial a, chawhmeh lah chu an han duhthawh khawp a, kan ei seng vek dawn lo chiang sa. Pu Sanga chuan ṭawngṭaina a nei a, “Kan fapa vangin Chhana pawh rei tak class i kal thei lo va, a pawi kan tiin, nakin zelah pawh tihian chhungkhat kan ni zui zel turah ngai ila, Tei leh Mami te pawn mamawh in neih chuan engmah rawn sawi hreh lo tur, hei kan in hnuai ber khu a ruak ṭêp tawh lehnghal a, in rawn luah duh phei chuan kan inhnaihin kan inngaihsak sawt thei ang a, a tihzia viau ang. “ A ti sûrh sûrh a, a ṭawng hmang thiam zawk Mami chuan a lo chhang ve zel a, kei leh Chhana erawh chuan chaw kan ei mial mial, arsa ka ei lo tih a hre lo nge nu Pari lah chuan ar thial chu ka thlengah a rawn suak zui, nui chungin, “Arsa ka ei lo va” tiin a thlengah ka va dahsak a. Jenny chuan ner titih hian, “Sa ei lohte hi changkanna emaw ti hi kan awm ve a nia” a lo ti leh kher. “Arsa tih loh chu ka ei thei deuh vek, rul sa pawh “ ka ti ve ta ngat a, “Awii! Rul sa ber kher, chakma thlah i ni hial lo maw?” A tih chuan, “Ni maithei a ni” tiin tham loh hmel fe hian ka lo nuih let sâng. Ka pa ka hre lo va, chakma a lo ni thut thei ve tlat, rul sa hi rannung seh vanga ka damloh laiin a rêp ka ei tawh a, a tui lohna em em pawh ka hre lo. Saphai sa phei chu sa thiang tak niin ka hria. Arsa erawh ka tilui thei lo a ni ve mai. 

“Uisa in ei vek tiraw? Fridayah in inah eikhawm ang u, ka zin hmain” Duhawma’n a lo ti khauh a. Chhana chuan kan ṭawng hmain, “Khaw nge i zin dawn?” A lo ti vat. 

“Delhi-ah kal lawk a ngai a,. Ka ṭhiante pahnih nen kan lo kal ang a, engkim kan rawn keng sa ang,.” Duhawma chuan zaidawh tak hian a ti ve mai a. “A nawm dawn chu,.inthlahna ang a ni mai lawm” Chhana pawh chuan a ti ve ta thluam a. 

Ka kham tur chu nu Pari’n, “Awii i va ei tlem bawk ve mawle, i puar meuh maw?” A ti chul a, “Puar mah mah, ka ei dan pangngai aiin ka ei tam “ ka lo ti var a. “I nu lah chuan min hre duh tawh bawk si lo. Tak taka ka thlalak hi nakinah la thawn chhin la a tha ang. “ A ti leh hluai a, “Tehreng mai” ka ti liam puat ringawt. Eikhamah pawh engmah tih an phal si lo, a nuam lo zawk e a. Kan han titi leh liam liam hlawm a, Hmingduhawma erawh kalna tur pawimawh a nei a niang, a chhuah dawn chuan, “Ka nauin a lo thlah mai dawn che u nia aw. Pawimawh ka nei sia.” Tiin min rawn melh zauh a, eng emaw ka hriat ni ka lo hnual ve ringawt. A ho em mai a. Keini pawh dar 7 rik hma deuhin haw turin kan intintuah a, Muanpuia chuan inthlahrun hmel tak hian, “Englo, ih, ka thianpa ka va lam zuai ang aw, ka rei lovang” a tih avangin kan ṭhu leh rih a. Nu Pari chuan, “Hawh u, thla chu la ang u, paa, kha nang lo hmet teh” tiin a phone chu pu Sanga a pe a. Kan pali chuan kan la ta a, “Chhana ka lo thawn ang a, in lo inthawn chhawng ve mai dawn nia” a ti a. Kan ê aw liam ve mai. Muanpuia te pawh an rawn thleng a, kan haw phei ve ta a ni. 

Tumah chuan ṭawng zai kan rel lem lo,. Kan chhuk dawnah Chhana zawk chuan, “Rawn peng ve ula” a ti khawmawi a, Muanpuia chuan, “Hei ka thianpa û hi damdawi inah a awm a, kan kal duh sia, nidangah aw” a ti ve thluam a, kan inthlah liam ta a ni. In kan thlen chuan kan puar bawk a niang, kan inthiar chhawk sap sap mai. 

Zan dar 10 a ri lek lek tawh tihin, “In thleng tluang maw?” Duhawma hnen aṭangin ka dawng a. “Aw” tih chauhin ka chhang. “Nih chu muttui le” a rawn ti a. Ka seen ringawt. 

Monday nilêngin ka lu a nâ a, ka mood pawh a dik thei lo. Nachhawkna ei hi ka hreh bawk si, last period ka off ta ringawt. Taxi a vân bakah damdawi lei ka tum a vangin kein ka kal a, ka nu nen kan inbe zuai a, ka phone dah zo ka hawi chhuak chu min tawk zawnga mi pahnih lo kal thlate avang chuan ka ding chawt mai. Anni chuan min hmu ve rih lo nge an ṭawng tui laklawh, ni e, Hmeichhia zawk chu Nu Thangi a ni chiang lutuk. Mak ka ti lutuk chuan ka melh ngawt ngawt ringawt. A bo an ti kha a nia, vawiinah pawh an zawng reng si a. He lai daih daiha mipa nena an awmdun hmuh chu a mak ve êm a ni. Min rawn hnaih ta hle tihah chuan ani pawn min rawn hmu ta, a ding dat a, mahse, nelawm taka nui chung hian, “Tei, teh hlawl chuan, i dam em?” A ti a, a mitmengah chuan eng emaw a awm tih ka hai bik lo, inthunun a tum hle bawk. Chutiangte avang chuan kei pawn, “Dam e, nangni zawk? Liantea te an dam em?” Tiin engmah hre lo niawm takin ka chhang a. 

“Aw dam e, mahse, a pa leh a pu hi an ngai ve khawp a, chuan, khawi vengah nge in awm” tiin mi kawngkal kan dîp loh nan kawng sirah kan kal deuh a, a kalpui pa erawh a hawi vual vual ringawt. “A ni ve ang chu, Zemabâwkah kan awm a, i lo zinna a rei tawh em?” Ka tih chuan a mitmeng a buai nak mai. “Inrinni khan ka rawn kal a,.” A ti a, a kalpuipa chu a melh zeuh, “Chuan, engtik nge hawn i tum? Khawi vengah nge i thlen? Kan inah te lo innghah tur alawm” ka ti zung zung a. Thaw deuh hawkin, “Nilaini velah ka haw ang, chhungkaw pawipang ka rawn lam a, ka û te inah ka innghat a. “ A tih lai mekin mipa khan, “Kan tlai ang e” a lo ti zauh a, “A nih Tei, kan kal phawt ang, i nu bulah kan inhmuh vel hi sawi kher suh aw, naupangho ka hruai ve si lo a, a thinrim palh ang” tiin a nui a, chhan hman lohin an kal zui nghal. Ka enzui vawng vawng mai, ngaihṭhat lohna lian tak ka nei ve tlat, mi bo tiin an zawng luai luai a, mangangin khawtlang a siam a, chulai kara Aizawla mipa nena lo awm ringawt chu ngaih tihṭhatna chi a ni mawlh lo. Ka lu na pawh ka theihnghilh lek lek alawm le. 

In ka thlen chuan hmeichhia tih takah Chhana ka hrilh nghal bawrh bawrh a, mak a ti ve ngang mai. Mipa na nâ na chuan thil a man chak bawk a niang, “An tlanbo a nih chiah chu, mipa hmel chu i chhinchhiah em?” A ti ta hlawl mai a. Ka chhing vang vang a, “Umm, hmu ila ka la hre thei, cher lam, khabe hmul tlem a nei a, a lu a buk bawk a, a sang vak lo. Kuhva a heh hmel hle bawk” ka ti niah niah a, “Ber kher chuan” a ti sup duh chauh. Mami lo hawn hnuah pawh Nu Thangi te bak sawi tur kan hre rih lo. Mahse, ka nu bulah bak sawi rih lovang u kan tih tlat avangin ka nu bulah chuan ka sawi ta a, a awih lo khawp mai a, mahse, dâwt hrilh ringawtna chhan tur ka nei lo tih a hrethiam a niang, “Chhuana û ka lo hrilh hria ang e. A mak hle mai” a ti ve ta nge nge a. Zawn chhuah leh duh ta ila, Aizawl khawpui zau lutukah hian zawn chhuah chu an harsa tawh maithei, tlandun an nih tak tak phei chuan keimah vang khan an bibo daih thei bawk si. Nu Thangi chu a tizia lo hle mai. A fate an la tet tehlul nen.

“Vawiin lam kan va reh ve, ka rawn kal dawn. “ Duhawma msg chu.

“Aw le” ka va ti ve mai a. Test tur kan nei lem lo bawk a, lehkhazir lam chu rilruin a engto rih lem lo. 

Kar lovah a rawn thleng a, a tlangnel ve tawh hle,eitur eng emaw a rawn keng nual a, Mami a lo lawm tumhrang. “Ngati nge i zin dawn?” Mawlmang deuh hian ka ti a.

“Kan dawr bungrua vel chungchàng a nia” a ti ringawt. A pa sumdawnna hi amah hian a enkawl zui ta deuh a ni maithei, inbiain inhmu ve zeuh zeuh mah ila, eizawnna chungchang vel ka hre thui vak lo. 

Ka nu call ka dawn vangin pindanah ka lut zuai a, “Kan lo rindan ang chiah a ni e. I nu Thangi te khua ami mi pakhat pawh i nu Thangi bo atang khan a lo awm lo ve daih alawm, mahse, thu kan la tipunlun duh rih lo va, fimkhur takin khawtlàng hruaituten hma an la dawn e aw, nangni pawn engmah lo sawi darh rih suh u” a rawn ti a, “Awii, nu Thangi mai mai chu a, ka ngei e” ka han ti leh chiam pek a. 

“Chiam chiam a che, ka dah rih a nia, i fapa a harh” tiin a dah nghal daih. Sibuta ṭap ri kha ka hre deuh reng a ni. Ka va chhuah leh chuan eitur kha an lo siam mek a, Duhawma chuan, “In khua hi a hming ka hre ngai lo emaw ka tia, hriat tawhna ka nei thânin ka hria, a dangdai vang a niang” a lo ti mek a, Mami chuan, “A lar lo naa, khua zawng zawngah a nuam ber mai” a ti lar lar a, Chhana pawh a kiai ve suk mai. Rei a ṭhut hmain call a dawng a, a buai thei bawk sia maw. “E..aw , ka lo kal nghal” a ti vut a, “Lalmuanpuia te an accident leh a nih chu! Ka kal a ngai” tiin a ding a, “Khawiah? Engtin nge an awm?” Mami chuan a lo ti var, “Sairanga kal tum kha an nia, tunah an rawn phur chho mek, an la dam” a ti nghut a, chelh zui chi a nih loh avangin chanchin inhrilh tura inchahin kan invai liam ta a.