HMINGDUHAWMA (2)

HMINGDUHAWMA..(2)

Ziaktu : Toni Râlte

Khawhar in lamah ka nu pawh a tâl tam hle. Nu Thangi lahin a lo thlahlel ve bawk nen, an awm zel dan tur te a lo sawipui ve thin a, lehlamah Pu Chhuana unaute hi an fel hlawm a, an en hrang lo turah ka ngai. Keini pawh Aizawl phei a hun hnai tawh bawk a, mamawh te kan lam khawm chho ṭan a, Chhana chhungte an khirh leh riau, a khawsa thei ber ni siin insenso an hlau ni berin ka hria, Mami nen phei chuan kan ngei lek lek tawh. Mahse, engmah kan sawi duh lem lo. Kan phei hma zanah ṭhian dangte nen inthlahna kan nei ve lêt lêt a, kan inngai hlawm viau ang. 

“Aizawl in han thleng ang a, thla hnih khatah chuan keini chu min hrechang tawh lovang” Seni’n a tih pawh chu a rilru ka zu hriatthiampui reng, mihringte hi inhmu tam leh inbe tam na nâ na chu inngainatna pawh a zualin inpawhna a ṭha bik thin. Mahse, kei ngaihdan nghet tlat ka neih ve chu mi tu emaw engmah ni lo aṭanga hlawhtlinna emaw rahbi thar emaw a kai vea a ṭhiante thlauhthla emaw engmah a nih loh lai pawha lo duhsaktu te hawisan daih hi ka ngaisang lo turu lutuk a, anmahni ang nih hi ka hlauh ber a ni. Rapper lar tak Vincy Chhangte paw’n ,”Pianthar tak avanga ṭhian hluite thlah ai chuan..” tiin Pathian lama pawh hnaih a duh zawkzia a lo tlangaupui tawh kha. Khatiang deuh kha a ni. 

Tluanga ten ar an ngah bawk a, an ar a rawn thawh thlap a. Seni te vawk chaw chhumna hmang ṭangkaiin kan hem hmin ve a, Berhpuia fiamthu thawh kan nuihpui leh uar uar mai. Keini thianho hi chu mi pawh hian ngaiah min nei a, a tak leh a mei anga inzui ṭhap ṭhap zel kan ni bawk nen, tuman chutia kan han awmkhawm pawh chu mak an ti lem lo. 

“Te, Aizawl tlangval ngei han date ve rawh aw” Tluanga’n a tih chuan ka lei ka chhuah zuk a. Berhpuia pekin, “Awii, ani hian khawia bialpa mah a hmu zo lovang e, han kiss ve ta se a âng phuau te kha a ni awm sia, zeiloliani a nih hi” tiin mi rawn melh a, Mami’n, “In hre lo nih kha, kan in luahna tur tlangval khan a melh no teh mai a nia aw” a lo ti zauh a. 

“A ni maw? Engtikah?” Ka lo ti hû mai. Beidawn hmel zeta min melhin, “Kan va en ṭum khan a melh char char che kha, awii, ka ning, be ṭha ang che. In luah man min free zeuh zeuh thei maithei asin” a la ti zui. “Awm teh, chutiang ka peih lo” ka lo ti hlar a. Chhana ngawichawi riau chu va melh zauhin, “Lalchhanhim, nang hi i lunglêng chiang, Desi i ngai ni maw? Ti nge Desi hi kan sawm ve loh a?” Ka ti ta hluai a. Pu Chhuna kan lumen zan khan chance kan pe ve ngei kha a nia, an lo inngaizawng ta nge nge a niang, engmah chiang tak chuan a la sawi lem lo thung. 

“Chulam a ni lo, kan khua hi ka ngai dawn em a” a ti ringawt. Desi chu va sawm tâng e kan ti lem hlei lo va, kan phul phulin kan phûl ve vak ringawt. Dar 11 pelhah kan haw ta sang sang a. Hmabak ko rûnin muthmun ka rem ta. 

Aizawlah thla khat dawn kan han khawsak takah chuan nunphung leh zeizia pawh kan hre chho ve zel a, Eirawngbâwl hi ka nu hian min rin har avangin ka misa lutuk lo va, in chhung vawnfai kawngah erawh kan khuaah pawh mi fak ka hlawh ve thin kha a nia. Mami leh Chhana ten rawng an bâwl tlangpui a, keiin tihfai leh remfel ngai ka thawk thung. Ṭhian nisa, inpawh sa kan ni bawk a, harsatna kan nei lem lo. Hmelhriat pawh kan nei ve nual tawh a, Ka nu ten min chah nasa bawk a, tin, Biak in kan lo hnaih ve bawk nen, Chawlhni zing leh zanah chuan kan inkhawm ve ziah a, Kohhran member te an felin min lâwm thiam a, Ṭhalai lamah pawh hmelhriat kan nei nual tawh. Tin, Mami ten min dem fiam thin, kan in luahna te fapa kha U Fela a ni a, tlangval pangngai tak niin anmahni taxi khalhin a service ve thin a, ruihhlo pawh a ti lem loin ka hria, a hmel pawh a chhe lem lo, a rawn leng ve zauh zauh thin a, thianṭha ang bakin kan inbe ngai lo. Mami te khan an sawi uar ve mai mai a ni. A nuam chho viau e. College lamah erawh kan department a inang lo hlawm nen, kan inzui lutuk lo va, kei pawn thian thar chharin a hming chu Papuii a ni. Kan thu dun bawk a, ani pawh Lunglei Zobawk khua niin ani nen hian kan zia a inang riau a, kan inkawmngeih hma viau nghe nghe. A patea te inah a awm a, kan inah pawh a lo leng ve tawh. 

Inrinni zing bazarah Mami nen kan inzui dat dat a, chawhmeh kan en kual mek a ni. Hawn lam kan hnaih tawh a, Zikhlum kan buktir laiin nu pakhat lian lam, samkir, la upat hmel vak loh hian min rawn su chawrh mai a, ka pai nawk mai. “Ka tihpalh” a ti hman ṭâwk tihin a lu chu a dawm a, a pai ta nawk nawk mai, chawhmeh te chu a tibaw nuaih mai a, a dik lo tih hriain ka va vuan ta vat a. “Ka pi, i ṭha em?” Tiin ka han kuah ding deuh a, mi dang pawh an rawn hnai ve nghal tuau tuau mai. Thawk la hawkin a awm chu a dawm vang vang a, chutah a lu dawm lehin, “Ka luhai a zual leh pek a nih hi, ka BP a che leh a ni ngei ang” a ti thâm ṭiak a. Step rem laiah chuan ka ṭhuttir a, tui ka intir ta ringawt.A luhai zualpui a reh ta deuh tihah chuan, “Ka lâwm hle mai, ka tho nuam lo ka ti rêng a,. “ A ti a. 

“Awm hahdam phawt rawh. “ Ka lo ti vat a, “Ka zia tawh e, Mama a lo thleng ṭêp ang. Sa a lei lawk a, va kal tawh rawh u, in fel lutuk e” tiin a nui sâng a. A hmelthain a vun pawh a dik kher mai. Khawpui nu nge nge. Ka nu nen an inrual vel maithei a ni. Kan chawhmeh lei bag-a kan khung laiin, “Hetah law i lo awm daih, i lei zo tawh em?” Mipa aw hian a rawn ti a. En pawh ka lo en lem lo, “Ka lu a hai leh a, hei Mami te hian min buaipui a, ka zia tawh. Haw tawh mai ang, tlaiah Engi kan tir mai dawn nia” tiin nu chuan a lo chhang var a. Mama a tih ngei kha a nih ka ring, ka han melh ve zauh a, 6 ft a nih loh paw’n 5’10 emaw tal a nih ka ring, a sang riau. A lu buk lam lek lek chu a hnawk niaih a, a hmel pawh chiangkuangin ka melh ta chuang lo. 

“A nih kan kal ang e aw, ka lawm lutuk a nia” nu bawk chuan a rawn ti leh a, Mami nen chuan nui chunga chhang let vein min kalsan ta a. “Awii, a chhiat lohzia kha” Mami’n a ti ta hlut mai. 

“Nia, a vun kha a dik tawp, khawpuiah chuan nu pawh kan tluk lo a nih hi” ka ti sap a. 

“Mawli, kha nu kha ka sawi lo, kha pa kha lawm ka sawi a. I hmu ve lo mi?” A ti nghek, ka phu zuk nghe nghe. “Vak vak a che, hmu ve tho e, a hmel pawh ka hrechiang hleinem” ka ti ta ringawt a, a chek hlak mai. Mipa ka ngaihven lohzia a hrechiang tawh bawk a, mak a ti lem lovang. 

Class lai laiin Mami call ka dawng a, ka la lo phawt, a rawn tih nawn leh avangin a pawimawh a nih ka ring a, zawitêin , “Class kan kal laklawh” ka ti a. “Motorin Chhana a su, lo chhuak mai rawh” a rawn tih chuan ka meng phâwk hle. Ka ding chhuak hluai a, Sir Ramdina chuan mi rawn thlek nghal bawk, “Sir, ka unaupa motorin a su a, ka kal a ngai” ka ti ta râwih a. Midangho pawh an lo phâwk ve hle. 

“Aw le, khawi lai hmunah nge, kalpui i ngai em?” A ti zung zung a, “Ngai lo ve sir, ka thiannuin a awmpui a, ka lawm e.” Tiin ka inkhung mawlh mawlh a, Papuii pawh chuan min zui ve ta mai, Sir-in a phal tho. Mami chu ka call leh ta nghal a, Bethesda Hospital an thlen ṭêp thu a rawn sawi chuan taxi-in kan tlan zui ve ta nghal a. Thinphu a rang duh hle, Mami lah chiâi hma chi a nih vang nge a aw te kha a khur nasa si a, Chhana chu a serious riau em mawni dawn le. Mama ka call a, ka hrilh ve ta nghal. Chhana chhungte chu Mami’n a biak tawh tho ka ring. Whatsapp-ah kan thianho groupah ka post bawk a, a hran hrana va call chu ka hman rih lo. Damdawi in kan thleng a, casualty-ah an lo en rih mek a, Mami chu a mit a sen râm mai, “Engtin tak nge a awm?” Ka tih chuan, “Nikhua a hre lo tawp a, thisen a chhuak nasa bawk si, awii kei chu ka hlauthawng em mai” tiin a inhnit faih a. Hnem vak dan ka hre bik si lo, Chhana chhungte pawh an lo kal nghal dawn a niawm e. 

“Tuin nge su reng reng a?” Ka tih chuan, kan piah lawka mipa pali ding khawm laih lam chu melh zauhin, “Saw, tshirt grey ha sawn a khalh a, an tlan chak a niang, an rui deuh bawkin ka hria” a ti sep a. Ka va en ve thuai a, an la naupan hmel hle, kum erawh an tling tawhin ka ring, an mitmeng aṭang chuan harhfim chu an ang chiah lo. Nurse pakhat hian min rawn hui zauh a, kan va lut ve nghal, zai a ngaih tur thu leh thisen a hloh hnem deuh avangin thisen pek a ngaih thu an sawi bawk a, mang a ang duh hle mai. Emergency ward-a an nawr luh dawn lai chuan Chhana sutu te lamah chuan ka va phei ta hmiah a. “Enteh u, thisen pek a ngai dawn a, in blood group eng nge ?” Ka ti ta thâwr mai. Ka veilam ami chuan, “Kei chu ka HB a hniam a, hmanniah pawh ka patea pawh ka pe thei lo” a ti nghal pang. An blood group an han sawi diat diat takah chuan a tu amah chuan an lo mil hlek lo lehnghal a, ka manganzia an hmu thiam ve ni tur a ni, “Ṭhiannu, media lamah kan lo zawng ve ang, thiante pawh kan lo be kual ang a” an ti ve ta hram a. Police an rawn thlen tak avangin ka kal kiang ta rih. Police rawn thlen hnu lawkah hmannia nu pakhat bazara luhai leh a pasal niawm tak bakah an fapa te kha an rawn lang ve a, Chhana sutu te leh police te bulah chuan va kalin mak ti angreng takin kan lo thlir reng. Chhana chu blood bank ami thisen an pe thei rih a, mahse, a daih kher lo maithei. Rilru chiâi taka kan awm laiin police te chuan thu min zawt ve leh a, Chhana chanchin bakah a chhungte lo kal mek thu kan hrilh a, “Hei rui chunga motor an khalh hrim hrim avang paw’n kan lak phawt chu a ngai dawn a, Victim chhungte rawn thlen hunah inbia se la, ruahmanna chu kan la siam dawn nia. “ An ti a, ni e, kei leh Mami chuan thutlukna kan lo siam ve ngawt thei lo hrim hrim. Chhana dinhmun a tha bawk si lo. An tih tihin ti teh se. 

Kan kal leh hmain Kha nu leh a pasal niawm takte chuan min rawn dinchilhin, “Awii! Hmannia min ṭanpuitu te kha in ni chiang mai. A va mak ve aw. Sawi tur mai pawh ka hre lo. Kan fapain in pawi a lo khawih si a, Ṭhiana, he mi te hi lawm ka luhai laia min puitu ka tih te kha” tiin an pa chu a melh zauh a. 

Inhmelhriatna te nei thar lehin nu ber kha Thanpari a ni a, a pasal chu amah aiin a û ve deuh hle tih a lang, Pu Rosanga niin, Chhana sutu kha an fapa naupang ber a ni a, Muanpuia a ni. An upa ber chu bazara a nu rawn hruaitu kha niin a hming chu Hmingduhawma a ni. Muanpuia chu a nu nen an inang viau a, A û erawh a pa lamah a kal nge pawh ka hrethiam lo e a, Mami’na star bawk a tiin ka lo en chîk ve deuh a, a sam buk lam kha a la ngai reng a, a hnar ngul chu gorkhali ho hnar ngûl ang mai hian a invuah rem thlup mai, a vun a nungin ngo lam a pâwl a, a hmui chu a pan hlung lo naa a chhah hran lo, a mitmeng chu ka sawi thiam dan berin a dai raih ka ti mai, a mitmeng a lian vak lo naa a melh chuan huhâng a nei fû maithei a ni. Tin, a sang viau ka tih tawh kha, hei ai hian thau leh hlek phei se chuan mizo zingah a palian pawl tak a niawm e. Pu Sanga chuan, “A in luahpui a thiante maw in nih? In fel hle mai, kan thiam loh liau liau chu ni mah se; khawngaihin a chhungte lam pawh min lo sawisak ve u la, thubuai anga kaltir loh dan hram min zawnpui u la kan duh hle mai. An inenkawlna senso chu kan kut tur liau liau a ni sa a, kan fapa hi a la naupang ve si a, a hmalam hun ngaihtuah a na lo thei bik si lo, inrem dan kawng awm se kan duh hle mai.” A ti charh charh a. 

Kei aiin Mami’n ṭawngkam a thiam zawk bawk a, hawihhawm takin a lo chhang let ve a, Muanpuia erawh police lamin an hruai tawh. Tichuan, Chhana chhungte chu kan lo nghak a, Pi Pari te chhungkua pawh chuan an lo nghak lo thei lo. Chhana chu rin ang ngeiin blood bank-a thisenin a daih lo nge thisen petu tur zawnsak a ngai ta nge nge a, a blood group hi B+ a ni si, a vâng phian reuh a, Mami nen kan buai em em laiin Pi Pari chuan, “Duhawma hian a pe thei ang, ani hi B+ alawm a nih, a pa pawh hi a ni tho naa ani erawh upa lam a ni si a, an remtih ka ring lo. “ A rawn ti ta hlauh a, mahse, thisen chu kan zawng zui tho a, Mizo nih hi a nuam thin a nia, pe thei lo mah se; min rawn hnem tho tho a, an thiante ve lehchhawng an lo hrilh darh bawk a, kan hmu em em ang ka ring. Chhana nu Pi Rii nen kan inbia a, kawng lakah motor chhiain a dan thu kan la hre zui! A va han buaithlak tak. 

U Fela leh Nu Zari te pawh an rawn lang ve ta a, college lama kan thiante pawh an rawn lang ve sap sap mai. An fel hlawm tak tak a ni. Khua a thim dawn takah chuan Pi Pari te chuan, “Tei, hei kan pa farnu fa te man inhlan zan a ni si a, kan lan ve a ngai si, kan haw phawt mai loh chuan, naktuk lamah kan lo lang leh zawk mai ang aw. Min hrethiam hram mai teh u” a ti mawlh mawlh a. “E! Tehreng mai, va haw rawh u, hei thisen pe tur pawh an awm remchang zel alawm” ka lo ti ve luam a. Hmingduhawma khan a pe zo tawh a, an ngaichâng ta rih a, zai ngam a ni ang em tih vel. Pu Sanga chuan, “Mama hian min va thlah se, ani chu mamawh lam turin a rawn kal leh dawn nia,. Lo tir dawr dawr mai rawh u” a ti a, Cheng 2000 hi min rawn hmehbelin , “Hei hi in mamawh zualpui lam khawm nan lo hmang phawt u la aw. A dang chu kan la ngaihtuah zel ang” a ti chuar chuar a, “A ngai lo ka pu, kan la kawl ve alawm. “ Ka ti chiam naa min hmehbel lui tlat si. Tihngaihna tak pawh ka hre lo e a. Hmingduhawma erawh vawikhatmah a ṭawng lo, a lo ding ve run ringawt. 

Thiante ho pawn min hawnsan ta sap sap hlawm a, Chhana thiante Dina leh Lawma te erawh chu an haw duh tlat lo, kei aiin nachâng a hre bawk a, Mami chuan eitur a zuk order a, kan ril a ṭam ve tawh hlawm nen, tiang chuan kan ineipuar ta hlawm a, Nu Zari te nufa pawn min hawnsan a, U Fela pawn lo kal leh a tum kha maw. Ani a awm hi chuan thla a muang ruih alawm. Nu Rii te pawh an rawn tlang thei tawh a , Chhana pawh OT-ah an nawr lut ta e. A lu kha a thi nasa si a, a thluak lam a khawih pawi ang tih kan hlau khawp mai. Zan dar 8 velah Nu Rii te an rawn thleng a, Chhana û U Puii leh an nupa bakah Chhana nuteii te an ni. Nu Rii lah nu over tih takah a’n ṭap nghal pur ringawt a, “Khaw nge ka fapa sutu chu? Ka fapa pawisawi lo lo tinatu chu ka hmu duh a ni” a ti nghek nghek a, Mami nen kan lo îp ru deuh, damdawi in a ni bawk nen, inthlahrun a na duh viau. An pa chuan a khap dai thei ta hram a. U Puii pawh a ang hlak hlak tho, an nufa hi chu an nasa ve bawk a, tiang a nih chuan an inngaihdam ka ring ta vak lo khawp mai. Inngaidamin inrem thei se, Chhana pawh lo ṭha chhuak se a dik a ni mai, a chhe ber thlenga innawr hi chu a hnuah nghawng a nei duh viau, thihna êm a la thleng lo bawk a, senso an tum vek dawn tho chuan ngaidam mai se te ka lo tia, mahse, a tuartu kan ni ve bawk si lo a, kan sawi theih a awm lem lo. 

Chhana an zai zawh hun chu kan nghak ta ṭhap a, U Fela lo thlen hnu reivak loah Hmingduhawma an tih mai pawh kha nula pakhat nen an rawn kal ve leh a, Mami chuan tîm dai hian Hmingduhawma leh Nu Rii te chu a inhmelhriattir ve a, Hmingduhawma pawh chuan, nula chu melh zauhin, “An hi ka nau a nia, Muanpuia û chiah a ni” a ti a, Nu Rii lah insum lehpek hman lo, “Ka fapa hi in chhungkua avanga a thih teh chuan aw, in nasa lo viau ang, in nau chu in zilhhau ngai lo mi? Eng ang chhungkua nge in nih a? Khaw nge in nu leh pate reng reng pawh” a ti leh ta tâwn tawn a. A tirah Mami nen thil awmzia kan hrilh reng sia, a va ngeiawm tak. Duhawma chuan hniam ruih hian a nu leh pate hman loh thu chu a hrilh ta a. “Kan fapa nunna aia pawimawh eng nge awm a? Mi hausa in nih vang hian in duh duha in tihtheih emaw min ti em ni? “ A ti leh ta phiar phiar mai. Mami nen kan insik ru ngar ngar ringawt. Duhawma nau Jenny chuan a dawhthei ta bik lo nge ni, “Ka pi, ka nu leh pate an rawn lan avang khan in fapa chu a dam phah dawn tihna mi? Chuan, i nasa mah mah,.” A ti ve ta zêk a. U Puii a rawn ling ve leh ta, “Khatin ka nu chhang reng reng suh, naupang tê tê si, i va zakthei lo ve. In nau vanga kan buaizia hi in hria em?” A rawn ti. Duhawma chuan, “Ka pi, inbengdai teh u, in senso engkim kan tumsak dawn che u alawm,.” A lo ti ve boh a. 

“Chu! In hausakna chu in va chhuang ve, hmm, a nih nunna in pe thei em? Mawh? In pawisa khan nunna in lei thei em?” U Puii’n a tih pâng pâng lai chuan nurse pakhat rawn kalin, “In thawm dim rawh u, dam lo tam tak an awm hi,. “ A rawn ti ta ṭhak a. An ngawi zui ta deuh. A tawpa tawpah chuan Chhana pawh an zai zo ve ta a, Doctor hmel aṭang chuan an zai hlawhtling tih a lang thei, Chhana pa Pu Zaua nen an inbia a, Chhana pawh rawn nawrchhuakin Surgical ward lamah an nawr lut ta a ni. Pi Rii nau, Nu Hmingi hi chu a û ang lo takin a hawihhawm a, unau mize inang lo tak an ni, Chhana buaipuitu a thiante bakah U Fela leh Duhawma te unau chu lawmthu a hrilh mawlh mawlh a, a zâm a ṭhain a mawng a zâng bawk nen, Mami nen phei chuan han chet ve vak dan tur kan bangbo khawp a, kan lai huih mai. Chhana chu a ke ruh tliak bakah a luruh khi hlek bak hliam nâ lutuk a nei lo a, thisen a hloh hnem êm avang khan a lo chau êm a tin ni. Mahse, inenkawl rei chu a ngai ve deuh dawn niin a lang. Nu Rii te chu an bengchhen bakah manners an hre lutuk lo nen, Nu Hmingi chuan thiam takin mu hahdam turin a hrilh a, kan in luahah an thlen mai a ngai dawn lehnghal a, zep thu a chêng lo ka phur tehchiam lo khawp mai. Ka hrawn peih lo a ni ber mai. Duhawma khan inla puitling takin, “In riahna a chêp deuh chuan kan in pawh a awm alawm, in hnuai phei chu a ruak reng a..pawi in tih lohte chuan” a ti ve zuk a. Mahse, Nu Rii a ṭeu leh hlar tawh. Sawm zui chi niin a hre lo a niang, a ngawi zui ta hmiah a. Jenny erawh a tûm bâr reng a, ka hrethiam tho mai. Nu Hmingi chuan kei leh Mami pawh haw turin min ti tak naa, kan hnial ve tlat, zan laiah eng emaw te an tawk palh thei. Thinthiin kan muhil dawn chuang lo va, chumi zan chu tlaivar ve mai kan rilruk a ni. U Fela hoin Nu Rii te chu kan in luah lamah an phei thei ta hram a, Duhawma te pawh a tuk lama rawn lang leh tura insawiin an haw zui ve ta bawk. Dina leh Lawma te pawh kan tilui nasa bawk a, tlawmngai viau mah se; kan hawtir thei ta hram e. 

Kan pathuma kan han awm takah chuan Nu Hmingi chuan a û a ngei rukzia leh a zahzia te a sawi ve mawlh mawlh a, “Kei ka tlawngawl tho bawk a, Chhantea hi chu ka fapa anga ka enkawl a ni zawk mah bawk nen, ka û chu hawtir daih ila a tha ang, a buaithlak, bakah hei an zai hlawhtling bawk a, a senso an tum vek dawn tho chuan kei chu inrem mai ka duh” a tih chu kan lo ṭawmpui hle. Nu Hmingi hi a vanduai a, pasal neiin fa pakhat an nei tihin an inṭhen a, a fanu nen an khawsa zui ta a, a fanu  kum khat vel a nihin Chhana a piang a,a pian hlim hian Nu Rii chu a santên nasat êm vangin nau pawh a khawih hleithei si lo, tichuan, Nu Hmingi hian a hnute tuiin a châwm ta tawp mai a ni. Tun thleng hian an unau rau rauah pawh Chhana hi chu a duatin a la bik hle a, Chhana paw’n a nu aiin a ngaina zawk emaw tihtur hial a ni. 

A tukah chuan class pawh kan kal ta lo, ka chau viau mai. In kan thleng a, Mami nen kan mu nghal thlawp, Nu Rii te ho an va phei ve thung a, Pi Pari te nupa nen an inbe ngei ang a, eng thutlukna tak va siam ang maw. Nu Rii hi rapthlak viau mah se; Chhana pa Pa Zaua hi pa dam thluam mai, rilru pawh ṭha tak mai a ni a, an nu a hlau viaute a nih loh chuan an inrem thei maithei bawk. Chawhnu lamah Nu Hmingi a rawn haw ve a, ani phei chu a chau ngawt ang. Ka inbual a, ka nu nen kan inbe zuai, Thiante ho pawn Chhana chu an ngaihtuah ve hle, kan inbe reng reng hlawm a, Nu Hmingi chuan, “Ka hlauh ang ngeiin ka û a hel leh a, inrem kha a duh lo kual vel a, case anga an kaltir chuan senso an tum dawn si lo va, U Zaua ka fuih ru ngat ngat bawk a, an inrem ta hram a nih kha, an nupa pawh an inhau deuh nghe nghe, ka u hi chu a â êm a ni. Tun lai phei chu an khawsak a harsat lai a ni lehnghal a, mahse, an inngaidam thei a, a ṭha tho e” a ti mial mial a. Thawk khat chu a veng deuh e, Thingtlanga che nuam deuh pawh khawpuiah chuan eng ruai an ni hleithei lo va, damdawi ina awm ngat phei chuan, private phei chu buaithlak si, Chhana pawh a ṭha chho ve zel ang chu maw. Eirawng kan bâwl laiin Nu Rii leh an pa an rawn hawng a, “I Pa Zaua dêk dûk hian ngaihdam a rawt tlat a, kei chu khatiang rui chunga motor khalha mi pawisawi hlei lo su ringawttu kha chu tâng daih se ka duh a nia” a ti tân tân a. Pa Zaua erawh a ngawi hmuk, lehlamah Nu Rii ngaihdan hi a dik reng, kum tling lo te, rui chunga motor khalh ringawtte hi hremna a nêp mah mah zel a, chetsualna pawh a thlen tam phah châwk,. Keini tan eng lo sawi vena khua ni hek lo, thil dang kan sawipui ta daih a. Tlaiah U Puii chaw pek a ngaih dawn avangin chaw kan chhum hma a, Pa Zaua chuan, “Hei, in in luahah kan rawn innghat ringawt si a, kan tibuai hle mai che u, harsatna in neih chuan sawi hreh suh u aw, chawhmeh leina te kha pe rawh” tiin an nu a melh a. A inthlahrung tih a hriat hle, “A ho lutuk.” Mami chuan a ti a. Nu Rii lehpek chuan, “Aa, an pahnih chauhin an luah hleinem, Bawiha pawh a tel ve tho alawm, chutia inthlahrunna vak tur a awm lo, chawhmeh leina tur thlengin khami te kha dil vek tur,. An hausa alawm” a lo ti leh hlaih hlaih a, Nu Hmingi’n, “Naktukah nangni nupa chu haw u la, kei leh Puii’n kan lo awmpui ang, Tei leh Mami te pawh class kal tawh rawh u. “ A lo ti vat a, a û chu awm ve reng tur chuan a duh lo tih a lang reng. “Puii leh a pa haw rawh se, la bazar te ka duh alawm, ngati nge pawisa kha kan lo dil lâwk loh le..tlem azawngte chu, bazar nan ka’n hmang hmiah tur a nia” a ti sauh sauh mai a, nasa ka va ti tak. Nu Hmingi pawn a ngei ngang a niang, “I zak lo e a, nanga bazarna tur kha an ba reng reng lo, Bawiha inenkawlna tur bak engmah dil a ngai lo” a lo ti hmak mai. 

Mami nen Chhana va hmuh pahin U Puii chaw tur chu kan va pe a, kan ṭhu deuh chiah tihin Pi Pari leh Duhawma an rawn lang ve zat. Tiffin an rawn khai bawk, nui sâng chungin, “Hei chaw kan rawn kensak che u a, engzat nge in nih dawn kan hre si lo a, kan rawn keng risk tawp” tiin a tiffin khai chu a nghat a. Mami chuan, “Keini pahnih chuan kan ei dawn lo, hei U Puii hi chaw kan pe a” a lo ti var a. Hmingduhawma chu ka hma zawn takah a ṭhu a, mi rawn melh ngur mai, mak ka ti deuh a, mahse, a hawisawn leh thuai, ka thaw huai mai. “Aw..ti nge maw in lo ken buai duh ni, hengte hi kan tih vek tur alawm, naktuk aṭang chuan lo intibuai duh tawh suh u, kan rawn kensak zel ang. “ Pi Pari chuan a ti leh siam siam a, nu fel tak niin ka hria, a hmel hmuh a nuam bawk si. U Puii chu a inthlahrung ve deuh nge mawni, “Aa, chaw em em te chu hei kan nau ten an rawn dah thei alawm, lo ti tawh suh u, a lawmawm viau nain” a ti ve ta mial a. Chhana chu melh daihin, “A la harh lo em ni?” Duhawma chuan a ti nghut a. A hmel en ai hian a aw a thûm ka ti mai, tunlai mipa ṭhenkhat angin a ni ve hlâwi lo. “Harh e, an chiu mu leh tawh zawk a nih kha..” U Puii pawh chuan a lo ti var a. Rei awm theih a nih loh avangin kan pali chuan kan chhuak ho a, pi Pari te chaw zawk chu a ei dawn a nih hmel, kan inkhaichhuak leh daih keini chu. Gate bulah chuan, “Chhawrpial khuaah chuan Pi Remruati in hria em? Nu valai lam a nia” pi Pari chuan a ti sap a. Mami’n min rawn kheuh zeuh, “Aa..ih, ka nu hi Remruati chu a ni ngei mai a, mahse, amah lo Remruati dang chu an awm ve tho” ka ti bah nak a. Pi Pari meng phâwk deuh chu ka hmu hman, a inthup leh thuai a, “A ni maw? I nu chu a lo ni maithei, ka hmelhriat ve chhun a nia, ka hming hi lo hrilh la, min hriat chuan ka hriat kha a ni tihna a ni mai. “ A ti nui sâng a, ka lo bu nghat thung. Ka nu nen an lo inhre teh daih a nih chuan mak ka ti viau ang. Ka nu khan chhung leh khat kan neih thu chu a sawi ngei mai a, mahse, kan inchhunna a hla ve tawh hlawm a, kan inhre ta vak lo a nih hmel. Ka nu min hringtu ngei pawh Aizawlah ngei hian a awm ni khan an sawi kha mawle! Zawn chhuah tumna ka nei ngai lo va, a hmel ka hre hek lo, ka nu thlalak kan kawl miau lo va,. Pasal fanaute a neih tawh phei chuan va tihbuai kha ka duh lo bur..ka nu paw’n khalam hawiin engmah a sawi ngai lo. 

“Awii, an fel e tiraw? Duhawma erawh a ṭawng mawh ve a ni” an kal kian hnu chuan Mami chuan a ti halh a. “Nia, an fel tak tak a ni. Mahse, Pu sanga hi engtin nge Pi Pari hian a duh le ka ti, a upat tawh hmel si a” ka ti hluai a, Mami chuan chek hlakin, “Gold digger te pawh a lo ni ve thei, an khawsak a harsat loh hmel sia, Pu Sanga hi a hausa a niang” a ti thên a, Chhana chungchang kan sawi zui ta daih a. In kan thleng a, thil awmzia kan han sawi chuan, hlauh ang ngeiin, Nu Rii chuan, “Hmm, an hausakzia min show khum an tum a ni maw? Ka ngaisang teuh lo” a ti hmuar hmuar a, Pa Zaua ngaihdan a ni ta lo nge ni, “Rilian, ngawi mai mai teh i ninawm teh sek êm mai, mi an inthiam lo a, thupha chawi nan an rawn ti hram hram a, i rilru hi a chhe lutuk.” A ti ta khauh khauh a. Nu Hmingi’n a lo tuihnih ve bawk nen, Nu Rii pawh a âng zui ngam ta lo. 

Chhana damdawi in awmna pawh kar khat a ni ve ta, Nu Rii te chu an haw tawh a, U Puii leh Nu Hmingi ten an inriahpui chhâwk a, Mami nen riahpui kan tum ve lahin an remti bik si lo, a inthlahrunawm letling zawk. Pi Pari te an fel leh hle, Cabin an book-sak a, cabin- nge nge chu a nuamin a zalên bawk a, U Puii leh Nu Hmingi te pawh an rawn haw ngai meuh lo. Kei nin class banah kan tlawh ziah bawk a, Pi Pari te chhung lamin an tlawh kal reng bawk. An i sêng nasa viau maithei a ni. Muanpuia erawh vawikhatmah a rawn lang ve lo, a âwm ve tho mai. Chhana pawn hma a sawn tawh viau a, amah mi tumruh chi a ni bawk a, a ke ruh tliak kha hun la duh tur deuh a ni mai a, ani phei chuan chhuaha in lama inenkawl a duh thu a sawi a sawi tawh. Doctorin a la phal meuh si lo. Duhawma pawh kan hmu zeuh zeuh, mahse, kan inbe ngai lem lo, Jenny zawk kha chu kan inbe ve zauh zauh a, Mami lah hi mi ei loh tina chi a ni ve a, “A inla reuh, a hnuaia hnathawh hrehawm tur chi” a ti ve ziah, kei chuan ka hrethiam vak lo. Mami zawng Literature lama tui a ni bawk a, mi nungchang leh zeizia hi a man rang thin teh a nia. Ka sawi hmaih loh tur chu pi Pari sawi ang khan ka nu bulah pi Pari a hriat leh hriat loh ka zawt a, “Hre miah lo, ka hmelhriatah Pari tih hmingpu an awm ka hre lo” a ti mauh mai si, Pi Pari pawh ka hrilh zui duh ta lem lo, ani pawh a rawn lang khât angreng a, Duhawma emaw an awmpui nula a niang chu ka ti mai a, chu leh Jenny te an rawn inlan chhâwk tlangpui. A buai te pawh an buai ve a niang e. 

“Hey, Te, startu che ka hria a nia aw” Papuii msg chu khi vur vurin ka chhiar a, Aizawla ka awm aṭangin startu ka neih vawikhatna a niawm e a. “Tu?” Ka va ti hû a. 

“Geography department a mi a nia, Chhana pawh khan a hria ang, ee..amah pawn Chhana kha a lo kan ve tawh” pehhel deuh hian a rawn ti a. “A hming sawi ta che”.ka va ti. 

“Apuia a nia, i hria em? A fel bakah a chhe hran lo aw, ni r’u, ka cousin te nen an inkawm thin a, i number min dil a, ka pe dawn em?” A rawn ti ta duah a. Apuia ka ti sap a, ka hre mai thei lo. Mi hi ka phêk en vek mai si a. “Min lo be ta se, engtin nge ka tih ang a, bakah amah pawh ka hre lo” ka tih chuan, emoji nui lai lem rawn dahin, “Ka hrilh zel ang che” a ti ve ngei,.

“Phone ena khîk vur vur hi a trending chak hle a nih hi” ka phu zawk mai. Ka phone chu ka hmet thim vat a, ka hawi chhuak nghal. Hmingduhawma chuan melh pawh min melh hran loin kan ep chiaha building chu a thlir vung vung a. “Eng nge” ka ti let hû ringawt. 

“Vawiin tlai chu in veng lamah ka kal dawn a, ka thlah ang che u” a ti daih a. “Mami nen maw?” Ka ti leh hû a, mawl min ti ngawt ang. 

“Aw,” tiin a sana a bih zauh a, “5 minutes hnuah, tah sawn ka kal lawk dawn” tiin kan piah lawka cabin lam chu a pan ta a. Kha zawng chhung khan kan inbe ngai eih lo, amah hi biak a huphurhawm, a nui khât si, aaa..a nui lai hi ka hmuh âwm pawh ka la hre lo e a. Cabin-a ka va luh chuan Mami zawk chuan Duhawma’n min thlah tur thu chu a lo sawi a, ka bu nghat ringawt. U Puii pawh hawn a sawi ve tawh a, kan ui vak lo. Nu Hmingi chu khaw lam ngaihtuah vak tur a awm lem lo bawk a, a fanu lah singapore-ah a awm daih a, amah chauh a ni tho nen, ani chu châm ve reng se kan duh daih zawk. 

Mami nen back seat-ah kan ṭhu dun rân a. Duhawma a ngawi hmuk si, kan ṭawng ngam lo a ni ber ang chu. Kan veng kan thleng a, kan in pêngah chuan, “Tah khan” ka ti zauh a, a ding ve mai. “Kan lawm e aw” Mami chuan a ti a, polite thar ta thut ang hian, “I lo la leng ve ang chu” a ti zui hram, “Nia, lo la lêng ang” tiin min rawn melh zauh a, a tlan zui nghal. “He pa hi a zia hi a mak e” Mami’n a ti zui nang nang a. Ka ngawi reng thung, min rawn melh zauh khan engtin emaw ka awm, ka sawi thiam lo e a. 

Chhana’n damdawi in a chhuahsan ni chuan keini pawn class kan kal lo va, Pi Pari te nupa leh Jenny te pawh an rawn lang, tu emaw hmuh ka beisei nge ni ka lo hawi leh vung vung zel. Kan in luah zau lem lo takah chuan kan chêp mah mah a ni, Thingpui te kan lum ve a, Nu Zari te an lo chhuk bawk nen, kan bengchheng ve hle. Nu Hmingi chuan nui chung hian, “A sutu ber lah chu ka hmu ve ta mang si lo va, hmuh hrim hrimte pawh a châkawm alawm le” a ti a, huat tura sawi a ni lo tih kan hrethiam tlâng tura ka ngaih laiin Jenny ber chuan, “In hmuh kher kha ṭul kan ti vak lo a, amah a lo nuamsam lo bawk nen” a ti ta khauh mai, a mitmeng chu a thîp râm mai lehnghal a, “Aw..a hmu ve chak a ni mai a, chutianga huat tur pawn a sawi loh kha” ka inrin hmain ka ti chang ve ta fak a. Nu Hmingi hrilhhai hmel kha hmuh hrehawm ka ti a ni. Pu Sanga chuan, “A dik chiah, kal ve tura kan tih paw’n, ka zak a ti zel roh a, han intihluih theih pawh a ni lo,.” Boruak hmeh daih tum tak hian a ti a. U Fela’n kan boruak hrethiamin fiamthu a thawh ta daih zawk a, tlema tlemah kan inbakkaih lo chauh a ni e. 

An chhuah dawnah Pi Pari chuan nu Hmingi kutah envelope a hmehbel chawt chawt a, “Kan rawn kan zen zen thei tawh dawn si lo va, hei hi in mamawh lam nan aw” a ti sep a, Nu Hmingi ṭang er teh mah se; an pe lui tlat si. 

An motor dahna thleng Nu Hmingi nen kan va thlah a, Pu Sanga phone chu ri ral ralin, “Hello” a tih zawh hnu lamah chuan a chal a chuar nâng a, “Aw le, ka lo bia ang” a ti nghut a. Phone chu dahin zawitê hian, “Kan Hmingduhawma takzet hi chu aw..” a ti sup a, Pi Pari mitmeng lo buai deuh nak chu ka va hmu thuak..Hmingduhawma chungah chuan eng nge thleng ang aw?!