Hmangaihsangzuala last

HMANGAIHSANGZUALA (Last)

Ziaktu : Toni Râlte

(Emergency-a zin thut ka ngaih avangin ka titâwp rih aw. Season 2 a awm ang)

Duhawma te chu an dâwp ta ngei a, keini paw’n kan va hmu ve. Rei pawh an dâwp hmain Mawizuala zet zawt khan, “ZCP camp-ah a khawsa, an camp chu Sumsuih ramah a awm, ka hruai thei ang che u” a lo ti a. Sawrkar lam beng pawh thleng vatin a tuk la lain Sumsuih ram chu police eng emaw zat leh Mawizuala te chuan an zu fang ta a. An camp chu rauhsan tih hriat takin an zu hmu ta si, bungrua engmah a awm tawh lo, thlam ram tawh ang mai a ni. An lo insawn chhuak hman chu ka lawm rilru viau thung. Mahse, Mawizuala bawkin, “Dinkimi leh ZCP te kha an inbe pawp ngei ang, anin an insawnna a hriat ka ring, an inzawm alawm” a lo ti pek a nih chu! Ka va haw tak. Tichuan kei pawh Police custody-ah ka thu ta ran mai. Boss -in min thlamuan a, kei pawn hlauhthawnna ka nei hran lo. 

“Tumah an hming ka hre lo, an sawi lo miau a, an camp chu Mawizuala hriat tho kha a ni ka hriat, an insawnna lehzel chu ka hre lo.” Ka ti tlat a, ka hre bik miau lo a ni..ka phone an check vek a, engmah an hmu si lo, Mawitea nen kan inbiakna call log leh min rawn vautu number kha ka lo delete hman vek tawh a, rinhlelh tur reng reng an hmu lo. Min kawl reng thei lo bawk a, min sezâwl chhuah leh ta tawp. Hetih lai mek hian Daisy te lamin sawrkar an nawr na tawlh tawlh bawk a, Hmangaihsangzuala chu ZCP a zawm tak vanga hlau ang hialin an chhuah a ni mai. Man ngam lo angin an sawi a nih ber chu. 

“Kha maw? I inrawlh lohna turah i inrawlh teivet a, Police kutah i awm ran mai kha” ka pain a tih chuan mi run ngang mai. 

“Eng ah chuan nge ka inrawlh a? I va hriatchian hmel ve” ka ti ve ta ngat a. 

“Rukbo i niha i lo hawn aṭang khan he case hi i ngaihven ru char char tih ka hria, Daisy pa te mitmei ven pawh a na zozai tawh e, bansan hmak rawh.” A tih leh chuan, “Chu! Min lo enthla thin a ni maw?” Ka ti ve leh ngat a. Ka nuin, “Laldinkim, khatiang kha pa te chhan dan tur em ni?” A lo ti nghek a. Ner nawk chungin ka pindan ka pansan daih. 

Ka pa nen chuan kan boruak a rit telh telh mai. Ka nu chuan a hriatthiam ka hlau bawk si, ka pa inrawlh ve dan ka hre châk bawk si a. Malsawmpeka nen pawh kan inhmu zeuh zeuh, ka pa pawh a lo ngaihven tur thu a sawi a, Daisy pa Pu Chungnunga pawh a hnaih sâwt khawp mai le. Pi Sawmi ka va tlawh leh chuan, “I pain min rawn tlawh a, Bawiha case la tu min zawt a, mahse, ka hrilh duh lo” a ti a. A fing ka ti ru hle. 

“Hmanlai in pa damlai huna kan chhuikir leh a ngai dawn a, nang pawn Malsawmpeka bulah zêp engmah nei suh, i fapa chhan nan chuan” ka ti mawlh mawlh a. 

A bu ve nghat nghat mai. “Kan pa diary pawh a bo a bâng awm loin ka pe vek tawh e, Kan pa khan tihsual a lo nei a nih pawhin ani vanga ka fapain a tawrh hi ka remti lo hulhual” a ti nghat nghat a. 

“Sangzuala sumdawnna chu engtin nge a la kal zel.” Ka tih chuan, “Robina’n a khawih zui a, kei chuan ka ngaihven vak lo. A ṭha turah ngai ang” a ti mai a. 

“A nau pawh chu a la rawn haw dawn lo em ni?” Ka ti leh a. 

“Karleh lamah rawn haw chu a tum e, ani pawn ṭangkaina a nei ngei ang.” A ti a. Ka lo bu nghat mai. 

“E chuan maw, ka lo sawi theihnghilh ṭêp, nizanah Lawmi’n min rawn be hlawl mai a. “Nu Siamte, hrehawm ka ti lutuk, Daisy pawh a â lo chauh tawh, in case hi an khawih nawn dawn tih ka lo hria a, eng pawh thleng se, kei chuan engmah ka hriatpui ve lo a nia aw” a rawn tia. Mak ka ti angreng lutuk a.” Pi Siami chuan a ti leh mawlh mawlh a, “Case an khawih nawn dawn tih an hriat tawh chuan engtin emaw tak hma an la ngei ang. “ Ka lo ti var a. “Nia, an hlauthawng ni berin ka hria. “ A lo ti ve a. 

Malsawmpeka nen kan inhmu leh, an inah a ni tawh a. A nupui Thansangzuali pawh fa pahnih nei tawh tih a hriat miah loh. Ka beisei loh deuhin Amanda te nupa pawh an lo kal ve tlat, ka chibai chuan ka kut a vuan nghet kher mai. A hmel aṭang ringawt paw’n mi mawl chu a ni miah lo alawm. A mitmeng aṭang reng chuan engpawh chu a hmu fiah bik hliah hliah ni hian a lang a, Samsona erawh ka rindan chiahin a ni hû mai a, a ât hmel beng buang, an kum a lo tam ve tawh naa, an inenkawl uluk tih a hriat, an la nalh zeih zawih êm mai. Sitting roomah chuan kan ṭhu bial laih a, Sangzuala pa, pu Rongura diary chu Malsawmpeka chuan a lo bih thuak thuak tawh a, pawimawh tur lai pawh a chhinchhiah tawh. Kei pawn ka pa ka rinhlelh dan te chu ka sawi ve a, “I pa chuan diary a ziak ve ngai em?” Amanda chuan a lo ti khauh. A ziah ngai ka hriat loh thu ka lo sawi a. 

“A phone hack sak a ngai a nih chu, Pu Chungnunga hi a fimkhur thiam êm mai a, i pa zawk aṭanga kan chhui a ngai ang. Sangte, i chet a ngai a nih chu..” tiin a monu chu a melh zauh a, “Kan che ang a ni mai lawm, mahse, msg vel chu ensak a har maithei..” Thansangzuali chuan a lo ti var a. “A call log en pawh a ṭha tho. “ Sama chuan a lo ti ve a. Min lo vautu number ka chhinchhiah kha ka hrilh ve bawk a, hei chu chhui chhuah a harsa dawn lo. 

Thingpui kan in laiin Boss-in min lo call a, “Hmangaihsangzuala nu kha a awmna chin an hre lo a nih chu, tunah office-ah i rawn kal thei em?” A rawn ti ta. Nimin lawkah pawh kan inhmu reng si a, “Aw ka lo kal ang.” Ka ti vat a. Thil awmzia Malsawmpeka te ka hrilh ve chuan a chek hluk a, “Ka rin dan vel a ni, Pu Chunga te hian an duh puitlin nan engmah an ti hreh dawn lo a nih hi. Mahse, an ru bo rei ngam lo vang. Anmahni bak kawh tur an awm lo miau a.” A lo ti charh charh a. Kei pawh office-lam panin ka inkhalh chhuak ta nghal a, anni lam chuan Police station an pan ang. Office ka va thlen chuan chhuak turin an lo inpeih at tawh,. Kei pawh ka hmanrua la khawmin ka zui chhuak ve nghal. Bawngkawn lam kan pan zui a, Pi Siami te inah chuan an pa unau te lo awmin YMA hruaitu pawh an lo awm nual mai. Sangzuala patea chu kan bekbawr nghal a. 

“Zingkar bazara a chhuak kha a rawn haw lo tawp, hei an nula hi a nawmsam loh deuh vanga bazar a nia, a rawn haw theih loh takah chuan a call a, a phone a switch off bawk si. Keimah min lo be ta ringawt a, ka va kal nghal a, tlai lam thleng pawn a chin kan hre ta si lo, ka û te ka pun ve leh ta a, a kalna awm kan han biak pawn a kal loh thu an lo sawi zel bawk si. An boruak heti hi a ni nen, kan mangangin Police kan pun ta tawp mai a ni. “ A ti chuar chuar a. Hmangaihsangzuala’n hre ve ta se a va mangang dawn tak. Ti nge maw he boruak hian nghawng a neih len viau ni. Eng thil chiah nge a phênah inphum ru ta ang le? 

A bazar kalna hmun te pawh fan chhuah vek niin a hmelhriat inzuar te pawn an hmuh thu chu an lo sawi ve tak naa, “An in lam panin a haw ngei alawm.” An lo ti vek bawk si. An boruak avangin Pu Chungnunga te pawh rinhlelh thu hlaah an ko ve a, mahse, lo ru bo pawh nise an sawi duh a rinawm loh. “Hetianga boruak kan neih lai ten engtin nge kan rukbo ngam ang? Rinhlelh hmasak ber kan ni dawn asin. Chutiang khawpa mawl chu kan ni bik lo.” Tih thu zawng a sawi. Mahse, anmahni bak an nih ka ring lo,. 

In ka thleng chu ka chau viau mai. Ka teivâk nasa ve bawk nen. Ka pa leh Mapuia te rawn hawn hnuah zanriah kan ei a, Pi Siami bo thu vel chu Mapuia’n a sawi ve luam a. Ka pa chuan, “A fapa nen an inhmu ru a niang chu, tuin nge rubo ngawt ang?” A lo ti leh bul bul tawh. Ti nge Hmangaihsangzuala hi a rin chhiat em em mai le, inlaichinna kan nei tih te phei chu hria se min vaw hlum duh hial ang mawle. 

Ka ngawi tlat thung. Ka nu zawkin, “Tei, nang reporter i ni bawk a, chanchin i hre deuh lo maw? “ A lo ti a. 

“Hre bik lo, Police lamin an zawng hmu vat turah ngai ang” ka ti a. Chaw ka bâr zui mawlh mawlh. Ka pa bawk chuan, “Vawiin lamah mi hmuh i nei em ni? Amanda fapa te in bulah i scooty ka hmu tlat” a tih chuan ka antui hâwp lai ka hâk lo chauh. 

“Umm, a nupui kha boss te nen an inkawmngeih ve a, an thil tur ka va dahsak lawk a nih kha..” hniak phawi eih lo chuan ka ti a, ka îp nasa hle thung. 

A awih meuh lo tih a hmel landan aṭang chuan ka hre thei. Thudang ka sawi zui ta daih a, engtin nge maw Malsawmpeka te in pawh chu a lo hriat le? Ani hian min zui ru a ni thei ang em? Fimkhur a va ngai dawn tak. 

Mawitea nen kan inbia a, Camp-an sawn lo va, an bungrua erawh an lo thukru a lo nia, Sangzuala chu ramhnuaia an hnutchhiah thu a sawi. Kawng dang an nei miau si lo va. Ka khawngaih êm mai. “I hmuh leh veleh a nu bo thu lo hrilh rawh aw” ka tih chuan pawi a lo ti ve kher mai. “Karleh lamah daih camp sa turin ramhnuai kan pan leh ang, lo hmuh ngei ka tum dawn nia.” A ti ve a. 

Mike nen kan inbe bawk, “Ramhnuaiah hian zuk zawn tawp mai ka duh tawh. A nu bo thu hre phei se chuan a duh rum tawh viau maithei, a nih nih nih a duh tawh ang, chu chu a case a fel hma chuan ka thunun a ngai. “ A rawn ti a, ka ngaihdan chiah a ni. A nu bo thu a hriat lek phei chuan tih loh loh a tih duh ka ring tawh. Pi Siami hi kan hmuh phawt a ngai a ni. Bawngkawn khawtlâng bakah an veng thenawm tlawmngai ten a zawn beihpui an thlak a, ni 1 chu a liam ta phawt. Police lam pawh an thawkrip hle. Pu Chungnunga te pawh enthlak an ni a, anni lam erawh fimkhur thiam tak an ni. 

Mike chu a sawi ang tak tak khan ramhnuaiah Sangzuala zawng turin a chhuak ta rup mai le. Ka pa hian min enthla lo tih chu chiang ila ka zui ve duh hial ang. A zuk hmuh chuan thuchah pawh ka nei nual mai. A chhungte pawn an hriatpui vek a, an phalna thlapin a kal a ni. An chhungkua hi Sangzuala’n a lo pui nasa tawh a, anni lam hi chu a lamah an ṭang tlat a ni. Pi Siami bo aṭanga ni 2-naah chuan Pu Zuala, Sangzuala patea chuan lehkhathawn a dawng ta hlawl mai le. Pi Siami an kuta a awm thu leh Hmangaihsangzuala, Police kuta a inpek hma loh chuan an kawl reng tur thu bakah a nunna thleng pawhin a tawrh theih tur thu an rawn hrilh ta, Rang takin Police a pan nghal a. Lehkhathawn chu envelope uka tuam thlap niin Pu Zuala office dawhkanah a lo let reng mai a, peon a han zawh chuan, Mipa naupang pakhatin a rawn keng” a ti mai a, mipa naupang lah chu a hmel vel a lo en chîk bawk si lo. Tihngaihna a vâng viau mai. 

Nu pakhat pawisawi miah lo nunna a derthawn avangin sawrkar lam paw’n ZCP te lam be pawpin, Sangzuala chu hruai haw turin an ngen leh ta rup mai. ZCP lamin, a awmna chin an hriat bik loh thu sawi mah se; a case tharthawh leh a nih avangin an inbe pawp ngei ang tih an ring thiam ve tlat bawk si. Engkim chu a buai a ni ber e. Tichuan, Pi Siami avang chauhin ZCP te paw’n Sangzuala chu an zawng dawn ta. Ka lo hriat ve dan chuan, Sangzuala chu inpe rih mai se la, a case an ennawn leh tho dawn avangin nghak rih mai se, a nu nunna a derthawn ai chuan an ti a ni. Engkim hi a khawlhkham zo leh ta vek mai. Pu Zuala chuan ni 2 hnuah bawk Lehkhathawn dawng lehin, “Ni 2 hun pek in ni e. Police leh Sawrkar an chet loh chuan, pawisawi lo nunna hi chhahin a awm ang” tih a ni. Chu lehkhathawn erawh chu zinga an thawhin an kawngka bulah a lo awm thung. Hmanhmawh takin cctv footage an en ta nghal a, lehkhathawn dahtu chuan lukhum hmathlâwk khumin mask a vuah bawk. Tshirt dum hain kekawr dum a ha bawk. Tu nge a nih hriat chu har tak a ni. Pu Zuala te in hi kawngpui ân mai a ni a, lehkhathawn a dah zawhah Zemabâwk lam a pan tih zawng chu an hriat theih a ni. Pi Sawmi chu an tina ang em le, rilru a tibuai, Amanda ten a rukin an zawng tho a, Police lam chuan an hriatpui lo maithei. Hma sâwn se ka va ti tak. 

“Pi Sawmi bo pawh chu an va hmu har ve mawle, ruang chhar te hi a tam tawh si a, kei a dam pawh ka ring tawh lo, a lainatawm em mai..” ka nu chuan a ti mawlh mawlh a. Ka pa lah hi a..”A fapa kha inpek ve mai tur a nia, a nu nunnain a tawrh ai te chuan” a lo tih leh tawh kha. 

“Tunah a tlan chhe mek a, a nu bo thu pawh a hre ngawt bik nang.” Ka lo ti zauh a, “I hrilh hre tawh ang chu ka lo tia” min elsen rawngkai lek lek hian a ti a. Ka melh no vak lo, “Engtin nge ka hrilh hriat theih ang a, a awmna pawh ka hre reng reng lo.” Ka lo ti ve hmak. Ka pa hi enthlak hna nasa zawka ka thawh a ngaiin ka hria, pawisawi lo chunga chet a la a nih vaih chuan ka pahrawn mah nise dim ka tum hauh lo. Ka office kal tur chu dawrah ka peng kawi a, ka pa erawh a lo la thleng lo, a piah restaurant-ah thingpui in pahin ka lo châng ran mai. Rei vak loah a rawn lang ta ngei a, scooty pawh a rawn notice ka hlauh vangin Ela khalh thleng puiah ka sawm a, “A pawimawh” ka tih tlat avangin a hnial bik lo. Ka pa chu dawrah reilotê a awm a, a chhuak leh ta vut mai. Amah hmu pha tawk velin ka um ta a, a scooty number ka hrechiang bawk a, a dang tam mah  se; ka bo chuang lo. A tlan zel a, ka rinhlelh ang chiahin Ramhlun lam a pan ta. Phurna mak tak hian min tuam a ni ber e. Ramhlun north kan thleng a, Daisy te in kawtah a ding ta chat mai le. Daisy te in hi kawngchhak lamah awmin step thui vak lo zawh a ngai a, kei ka ding a, mask vuahin helmet pawh ka phelh duh lo, sunglass ka vuah run bawk a, min en ngun hle a nih loh chuan min hriat ka ring bik lo. Daisy te inah chuan a lut ta. Engtin zel nge ka tih ang aw tih ka ngaihtuah rauh rauh a, hmanhmawh taka restaurant hnai ber  awmna lam pan lehin Pizza ka order a, ka tuamtir bawk. Delivery angin an inah khian ka luh a ngai tlat a ni. Ka pian leh incheina vel aṭanga min hriat ka hlauh êm vangin Dawr pakhata an 2nd hand zawrh, kamiz ṭial rek ruk, lian angreng fe chu ka lei ta ngawt a, cheng 400 man lai chu a la ni zui, a nalh loh loh nen. Mahse, duhthlan tur dang ka nei tlat lo. Tichuan, ṭawphnawk deuh tak chuan Daisy te in lam chu ka pan leh ta. An in leh lo pawh a ṭhain harsa zawk zawk an ni lo tih a lang. An house number bih zauh pahin doorbell chu ka hmet chiau ta vang vang a. Nula sam tawi, hmel dâng deuh hian min lo hawn a, “Hei in thil chah ka rawn dah a.” Tiin pizza chu ka lek vâ a, hawihai deuhin, “Pi, thil in chah mi? Hei an rawn dah a.” A ti lauh lauh a. Ka lo hawi kual nasa, ka pa leh an pa ber ka hmu lo, pindan chhungrilah an inbia a ni mahna le. Nu ber niawm tak nu lian zeh zuah hian, “Eng nge a? Engmah kan va chah lo ve.” Tiin a rawn kal phei ve a, Chutih lai tak chuan Daisy ni ngei tur hi bathroom aṭangin a rawn chhuak ve mek bawk. “Pizza a nia, in rawn order a” ka lo ti a. Nu chu a meng nur deuh a, “Kei chuan ka chah lo, Bawihi, i chah em ni?” Tiin Daisy lam a hawi a. 

“Aih, engmah ka chah lo” a lo ti si. “Daisy te in a ni lo em ni?” Hrilhhai hmel deuh hian ka ti a, “Ni e, amah hi Daisy chu a nia, a va mak ve, in hriatsual a ni lo maw?” Nu bawk chuan a lo ti leh. Min rinhlelh hmel ang chuan a awm lo. Kei chuan ka phone chu phawrhin Ela ka call ta ngawt a, “Pizza hi Daisy te chah a ni lo’m ni? Hei kan order lo an ti bawk sia” ka va tih chuan a rawn bo nasa mai, “Eng nge a awmzia? Eki” a rawn ti hlut a. “Aw Ramhlun North, kawng chhakah” ka ti leh phei chu, “I â mawni le” a rawn ti hû hû a. “Ehe! Ramhlun south zawk maw, North i ti maw ka tia. Aw le, sorry” tiin ka dah ta daih a. A lâwm lo teh ang chu. 

“Ka pi, ka tihsual a nih kha, Ramhlun south zawk an lo nia, khu lai dawrah khuan Daisy te in awmna ka zawt a, in in min lo kawhhmuh ve mai a, ka tihpalh lutuk” tiin ka nui hawk a. Anni pawh chuan, “A nih chu a, a thuhrimin engzatman nge, order ve te pawh kan duh maithei a, khawi dawr nge ni reng reng?” Nu bawk chuan ti lehin, “Ruat Ruat Restaurant a nia, in order duh chuan in duh hunah tak kan rawn pe zel ang che u, ka number in la thei ang. Keiman ka sem kual thin a.” Ka ti ta var a. Daisy chuan, “Nia, kan chhuak peih vak si lo chutia in lo dah zel theih chuan kan la duh ang, i number chu ka lo save ang” a tih chuan, ka jio number zawk, official-a ka hman loh, Boss leh Ela te bakin an hriat loh chu ka pe ta a. Kan inpek laiin ka pa te an rawn lang ta thut, mahse, ka inthunun hram hram a, Pu Chunga chuan, “Eng nge a?” An nu melh chunga a tih chuan an nu chuan a lo sawi ve mai a. Min ringhlel ang chuan a awm lem lo, ka pa lam hawiin, “I kal ang maw? Nia, chanchin kan inhrilh zel dawn nia, i number thar pawh chuan min rawn be vat la aw” nelawm tak hian a ti zui a. Ka pain sim card dang a nei tih a chiang, a phone kha Thansangzuali khan a hack ta lo em mawni dawn ni,. Hack mah se; hmuh chhuah an neih vak ka ring lo. Ka pa chu a chhuak zui a, kei pawh ka kal ve nghal. Ka pa tlan liam hnuah office lam panin ka tlan zui ve ta nghal a. 

“Eng nge i rawn sawi awmzia kha? Min ti bo hû alawm.” Ela’n a tih chuan, “Ka rawn bâwl zuai che nih kha, hei vawiin chu pizza ka show sak ang che.” Tiin pizza chu ka pe a, a khi var var mai, ani hi chu zawhna ngah lo chi, thil namnul ve thei tak a ni a, a tihchi phian mai. Boss pawh eng emaw thuhlaah engkim ka hrilh tawh rih lo, hriat chu a châk, mahse, palh a awm thei tlat. 

Chawhnu dar 4 a ri hnai tawh a, ka thil ziah pawh ka peih fel ṭêp, ka phone ri ral ral chu, “Timing lo thei” ti rilru chungin ka melh zauh a, Mawitea a ni tih ka hriat chuan ka la ta vat. “Sangzuala chu kan hmu e, Police venhimna hnuaiah vawiin la la hian Jail-ah an hruai thla ang” a rawn ti ta mai! Ka kâng zawk a ni ber e, ZCP nge nge hma an la chak thin mang e. 

“A nu chanchin a hriatin engtin nge a awm?” Ka ti vat a, bathroomah ka lut bawk. “A thianpa a lo awm ve a, a lo hrilh vek tawh a, lo haw an tum mek zawk a niawm e. A nu chu a ngaihtuah hle, i chanchin pawh min zawt” a rawn ti luam a. 

“A inpe tih mipuiah an tlangzarh lovang tiraw?” Ka tih chuan, “Aw, Police lamin an remti lo, nangni pawh an rawn be pawp thuai che uin ka ring” a ti leh a. 

“Amah a tha em? A dam tha em?” Ka ti leh zung zung a, “Aw, a thinrim kan beng dai ti ila, a rilru a hrehawm tih chu a lang” a ti a. Ka va khawngaih tak. 

Boss pawh Police lamin chanchin hrilhin engmah thuchhuah nei lo turin an rawn ngen nghal a, Ramhlun lam an vengthawng a ni maithei. Mahse, a nu ru botute hi man an ni ve dawn em le? Pawisawilo an kidnap miau si a. Man an nih ve leh si loh chuan Police lam ka dem khawp ang. 

Thilmak tak a thleng leh ta tlat mai, a insum thei ngang lo nge a fimkhur lo zawk, ka pa chuan zanriah ei lai bawkin, “Kha Hmangaihsangzuala pawh a inpe an tih kha, a nu pawh an hmu kir leh ang chu. Pi Siami pawh a lainatawm, a fapa sualna vanga a tuar ve zel hi..” a ti ta roh a. “A ni maw? Engtin nge i hriat?” Ka ti chiam a, inhrechhuak niawm takin a meng tâl deuh a, mahse, “An sawi alawm, dawrah. “ A ti ta ringawt. “Keini takngial pawn kan hre si lo va, hre hmasa tur ber pawl kan ni si, a mak hle mai. “ Ka ti zuah zuah a. Ka pa ka ṭawng el ve pah deuh bawk. 

“Hrilh kher che u an ba lo a ni mai lawm. “ A lo ti khauh a, “Police nen kan thawk ho reng thin tih i hria alawm, boss tal an hrilh ang, Police kamtam deuh an awm a nih hmel.” Ka ti leh ngat a. Ka nu a meng râng tawh ngang mai. 

“A ho, chutiang i buaina tur a nih loh chu, Pi Siami an hmu kir ang a, a tawk reng alawm, Sangzuala pawh jail-a a luh leh chuan mipui kan him deuh ang chu.” A ti leh kher a, ka ngei tawh takzet a ni. “Buaina tur ni ve e, Pi Siami bo chungchangah chanchinthar kan ngaihven ve reng a, engpawhnise, Pi Siami rubotute pawh an man thuai ang chu maw. Mi an kidnap miau sia” ka ti ve leh nghat nghat a. Ka pa chu a sat hmel tawh viau, “Eng nge an man ngawt ang? A fapa misual an man leh phah a, an lawm viau zawk ang chu.” A ti hluai a. 

“Pawisawi lo rukbo hi dân kalh a ni a, hrem tur an ni tlat, eng ang pawn Sangzuala chuan lo tisual pawh nise, A nu rukbo kha case a tling, FIR an thehlut tawh a, a zuzi thei lo, ZCP an pun mai ang chu.” Ka tih lai mekin ka nuin, “A tawk, in inhnial pafa reng mai. Chaw ei lai laiin, heng boruak hi reh tawh se ka ti em mai, ka ning lutuk.” A tih tak hlak hlakah chuan kan sawizui ta lo. Ka pa ṭawngsual erawh chuan min tilâwm, Daisy chhungte ngeiin Pi Siami chungah kut an lek tih a lang viau tlat a, ṭawng sual chu a inti ve ram ram ang chu aw..

Malsawmpek ka be nghal a. Ka pain Sangzuala inpek thu a lo hriat dan ka sawi chuan, “Aw Anmahni ngei tihna a nih chu, mi nawlpuiin an hriat loh laia a lo hre bik chu” a ti a, “Nangmah kha fimkhur rawh aw, a tawp kan hnaih tawh a nia” a rawn ti leh. 

Sangzuala chu inpe ngawt mah se; engtin nge a ru botu ten an lo hriat ang tih ka ngaihtuah thut a, Pu Chunga te chu an hrilh hre ngei dawn a, chuti a niha Pi Siami him dama an rawn chhuah leh chuan Pu Chunga te rukbo a ni tih a chiang dawn si a, he lai tak hi a khawlhkham mang e. Mahse, Boss-in min rawn biak chuan ka fiah ta deuh. Pu Zuala kha a offfice-a a phone-ah rawn biain, “Zanin dar 8-ah Pi Siami a zalên ang, in tihtur dik tak in ti a, a ṭha e. Tikhan kan inrem ni rawh se” an rawn ti a niawm e, Pu Zuala chuan Boss a lo hrilh a nih chu. Chuvang chuan zaninah Pi Siami te inah kan va phei a ngai dawn a ni. Ka insiam mawlh mawlh a, Rilruah Sangzuala a châm a, ka kan huna ka sawi tur te ka ngaihtuah chiam mai. Ka chhuah tur thu ka nu ka hrilh chuan, “Mi bo chungchang vang em ni?” A lo ti var a, ka bu nghat ringawt. Ka pa erawh a ṭhu ngawi rûn a, en pawh min en lo. Boss leh Ela te nen Bawngkawn lam kan pan leh ta duan duan a, sana ka bih sek bawk. Pu Zuala te bakah khawtlâng hruaitu te an lo awm ṭiai a, tupawh mai chu kan helhhawlh niin ka hria. An nula khan thingpui a lum rak rak a, a pi bo ta chu hrehawm a ti ve hle a niang, a damloh phah deuh lehnghakl. Dar 8 minute 5-in a la ri lo deuh ang tihah Pi Siami chu amah chauhin a rawn lut ta chat mai le. Lungchhe lutuk hmel a pu a, a pawr fap bawk. A han thu hahdam tê tê a, Keini lamin kan kawm ta a ni. 

“Rukbo i nih dan min hrilh thei ang em?” Tiin bul ka han ṭan phawt a. 

A mittui hruk zauh pahin, “Khatia ka bazar kal haw lam kha kan in pêng ka thleng dawn tihin Call ka dawng a, ‘Zemabâwk daiah lo kal rawh, i fapain a hmu duh che, fimkhur takin lo kal ang che. “ An rawn ti a, a aw atang chuan a la upa vak loin ka hria. Chutia ka hmuh chak ngawih ngawih ka fapa hmuh chu ka phur nasa mai a, taxi ka lo phar vat a, Zemabâwk pelin kawi hnih thum kan thlen chuan kawngsir-ah car dum an lo park a, mipa pahnih mask vuah an lo ding bawk, min hmuh chuan an bu nghut a, taxi atang chuan ka chhuk ta a, “Khaw nge ka fapa chu?” Ka ti hman âwrh ang, Car-ah chuan a nawrin min nawr lut ta , ka kâ an hup nghal bawk a, khatah khan damdawi eng emaw an pawlh nge ni, kar lovah nikhua ka hre lo zui ta a, ka harh leh chuan pindan thim rek ruk, zau vak loah ka lo awm a, chhuatah pher phahah ka lo mu a ni. Tukverh pawh a awm lo, kidnap ka ni tih ka inhrethiam nghal a, ka phone pawh ka lo kawl tawh lo. Chutia mangang leh thlabâr taka ka awm lai chuan mi pakhat hi a rawn lut ta a, mask a vuah leh tho, eitur tui lo deuh hi min pe a, “Pii, i fapa inpek hma chu hetah hian i tâng dawn, kawhmawl bâwl lo la, nâ i tuar lo a ni mai. Tuman an rawn zawng hmu dawn lo che.” A ti a, a aw aṭang chuan min lo call tu kha niin ka hria. 

“Eng nge tihsual ka neih a? Min rubo tur khawpin. Tu te nge in nih?” Ka ti tuar tuar a, “I awrâwl zawng zawng pawn au mah la, i au thawm tuman an hre dawn lo, thu awih la i him a ni mai” a tih hnuah min kalsan leh ta a, min rukbo chhung khan eitur chu min pe ve a, chu pindanah chuan bathroom te taktê a awm bawk a, zana sin tur puan min chhawpsak bawk. Tichuan, min chhuah hun tur ka nghak ta ngawt ngawt a ni, tlanchhuah chu ka tum ve tho naa, pawnlamah kawngka an kalh tlat si, lei hnuai pindanah ka tâng niin ka hria.” A ti dap dap a. 

“Rinhlelh i nei reng reng em?” Ka tih chuan, “Ka fapa inpek nana kei min rukbo chuan Daisy pa, chungnunga te bak an nih ka ring hlawl lo” duhthawh zet hian a ti a.

“Kut an thlak lem lo che em ni?” Ka ti leh a. 

“Aih, chuan kha pa chaw min rawn pe tu bak kha midang an rawn lut ngai miah lo.” A ti a. 

“I fapa a inpe tih i hriat khan engtin chiah nge i awm?” Ka tih chuan a hnuk a ulh deuh nge a ngawi vang vang a, “Pawi ka ti, inpe lo se, a dikna chanvo hmu se ka duh a, kei chu tâng reng mah ila pawi ka ti lo, ka fapa hian rorelna dik a hmuh dawn phawt chuan ka nunna pawh hi ka hlan phal” a ti a. Kei pawh ka hnuk a ulh deuh, nu te hmangaihna thukzia a tichiang viauin ka hria. 

“I fapa a inpek takah hian nangmah rubotu te chungah hmalakna neih i rilruk em?” Tiin ka zawt leh a. 

“E! Tehreng mai, kan sawrkar bakah Police lam hian min ngaihthah lul suh se, min rubo tur khan dikna an nei lo” a ti tân tân a, ka lo ṭan ru hle. 

“A nih leh a tawp nan, engtin nge pindan thim atang chuan an hruai chhuah che” ka ti a. 

“Pakhata kha a rawn lut leh a, ka zalen tur thu rawn sawiin a hma ang chiah khan romolin ka hmui a rawn hup leh a , damdawi chak tak a ni, ka nuhil zui ta a. Chumi chhung chuan min hruai chhuak a niang. Ka harh chuan Car-ah ka lo ṭhu fel der tawh a. Kan Hospital piah deuhah dingin chhuak turin min tia, ka chhuak a, kan in ka rawn pan ta nghal a ni. An motor number chhinchhiah tuma ka en chuan number plate an lo la thla daih a, Tihngaihna ka hre lo a ni” a ti chuai raih a. Keini lam chuan kan duhtawk viau. Amah a la chau ve bawk nen, chimbuai lutuk kan inthlahrung a, kan hawnsan ta phawt a ni. 

Ka pa a lo la meng a, “Pi Siami chu a pang a dam maw? Amah rutute a hria em?” A tih chuan, “A chau deuh tih loh chu a tha e. Amah rubotu te chu rinhlelh a nei” ka ti liam puat a. A ngaihven tih ka hre kar sia aw. 

“Tu te nge a rinhlelh a” a ti vat. “Ele, Pu Chungnunga te mawle..anni lo rinhlelh tur awm hek lo.” Ka lo ti hmak a. 

“Ka ring lo, an tâlâwk thei tih hrereng chungin an rubo lovang, an boruak neih lai a nia, chutianga atthlak deuha che tur khawpin Chunga a â lo.” A ti duah a. 

“Nia, ka hrethiam lo le nakinah a rawn lang mai ang” tiin ka pindan ka pansan ta a. 

A tukah Hmangaihsangzuala kan turin chawhnuah ka chhuak ta a. Pi Siami’n min ngen angin ka va lam zuai a, kan inphur thla ta boh boh mai. A bo laia a rilru hah thinzia leh a fapa chu a inpe tak tak ang tih a hlauh thu te a sawi siam siam mai. Chungnunga te a huatzia leh an fin chalâkzia te, an pa diary pakhat a chhiarna lama a hmuh, “Chunga ka lo kawp ta hi inchhir lek lek chang ka nei thin. A fin hi ka chelh hlawl si lo va”.tih thu te chu a sawi bawrh bawrh a ,”Amanda te an han che ang a, hun an duh rei lovang, lungngai suh “ ka ti ve a. 

Jail kan thleng a, a tawpa tawpah chuan Sangzuala nen kan inhmachhawn leh ta nge nge e. A nu chuan, “Inpek loh tur a nia, kei chu ka ngaihtuahawm loh asin, i chhuak leh lawk thei dawn si lo, trial chhung a rei leh dawn a nia aw. “ A ti malh malh a, “Ka nu i ni a, ka tihtur dik tak ka ti, Amanda te kutah case a tla tawh a, ka lungngai lo ve. Mi dik chuan a tawpah hnehna a chang tho vang, ka nau nen lo inenkawltha ula a tawk mai.” Sangzuala chuan a ti sup sup a. Kei chu min rawn melh rulhin, “5kg chuan i la rih belh ta chuang lo a ni maw?” A ti a. A nui deuh bawk, “A ho, ka thau duh lo. A hrehawm em? An mitmei reng tawh dawn che sia” ka ti ve a. 

“Hrehawm nang, Duhawma kha ka bulah a tâp chawt a, in lo kal leh hunah a inthlakna tur lo kensak ve teh u, an khawsak a harsa sia. “ A ti bul bul a. A thawmhnaw leh eitur kan kensak nual a, ani chu a ngaihtuahawm loh. Inkan rei an phal si lo, ka duh ang pawh ka sawi thei lo, bakah a nu a awm ve run a, mimal nun chu ka sawi ngam lo. Amah zawk chuan kan kalsan dawnin, “Nu, i monu tur kha lo duat hle rawh aw.” A ti zui hlak a, ka va melh rum tak, ka zak tlat alawm, a nu lah chuan nui hawkin, “Lutuk, ka tan a hlu teh mai a nia.” A lo ti var a. Min tilai vek alawm le. Kan hawn kawngah pawh min fiam bawrh bawrh a, kan inpawh phah viauin ka hria. 

Tlaia ka haw in ka thlen rual rualin ka pa chuan meng sen rûm chung hian, “Engvangin nge kha mihring kha i zuk kan a, in inkarah eng nge awm a?” A lo ti khur khur a. Ka hamhaih ve deuh, “Engtin nge i hriat?” Ka ti sap a. 

“I kalna chin chu ka hre zel ang, ven ngai hek che. Ani kha i tan eng nge a nih? “ A ti leh tûn tûn a. 

“Pi Siami’n min sawm nasa sia, ka zuk kalpui a nih kha. Bakah eng nge ka zuk hmuh chu a pawi viauna ka hre lo e” ka tih chuan ka nuin, “Jail tâng ngaihven a ṭul lo, i zak lo’m ni? Zah pawh, mi te reu reu hian an hria ang e.” A lo ti hlak hlak a, ka nu pawn chutianga min ṭawngkhum tak zelah chuan ka rilru a na ve deuh. “Daisy hurherh vanga ani pawisawi loin a tuar  hi kei chuan pawi ka tihpui, ka khawngaih bawk. Mahse, a dikna chanvo hmuhsak a ni ṭêp tawh e.” Ka ti ve nghat a. Ka pa chuan min ben a chak hmel kher mai. Ka tihtauh vangin an rualin chaw pawh ka ei duh lo. Ka pindanah ka tawm char char, ka pa khan min enthlatu tur a ruai tihna em ni ang? A nih chuan Amanda te ho pawh hmuh vak a rem tawh lo, Sangzuala chungchâng ka hriat ringin min target ve thei tlat. Mut pawh ka mutui hrep lo ve. 

Office-a ka awm laiin ka jio-ah call ka dawng ta tlat, Daisy a ni ngei ang tih ka ringhlel lo. Ka la vat a, “Englo a nia, burger lam in siam ve em le? Hamburger ka duh a,.” A rawn ti niah niah a. 

“Thei tehreng mai, lo nghak lawk rawh aw. Kan han siam ang e.” Ka ti phur sârh a,. A ranga rangin kan office bul restaurant-ah chuan Hamburger chu ka va order ta a, anni hian an siam tui khawp mai. Kar lovah min pack sak ta a, Ramhlun ka pan ta chat mai. Ka pa hian min enthlatu tur a rawih leh si chuan aw. Ka hlauthawng deuh thut naa, tihngaihna awm tawh hek lo. Daisy te in ka thleng thuai a, amah ngeiin min lo dawngsawng a, “Ka lo zung lawk thei ang em?” Ka tih chuan toilet lam chu a kawk zauh a, ka lut nghal. Ka chhuah leh chuan Pu Chunga nen kan inhmachhawn ran mai. Mahse, engmah a sawi lo, kei lah ka ngawi bawk, lawmthu ka hrilh leh hnuah ka chhuahsan zui ta a. Office ka thlen hnua scooty ka park laiin ka pa scooty hian min rawn pel fua mai, Ka pa scooter hi ka khalhsak ve fo vangin ka hai hlawl lo, Mapuia ka call a, “Ka pa dawrah a awm em? Ka call tlang thei lo a.” Ka ti vat a. 

“Awm lo, khaw nge a kal pawh ka hre lo” a rawn ti ta chiah a. Ka rum nghat mai. Min tlankhalh ve ta chiah e. Mahse, tihsual ka nei lo a, ka hlauthawng tur a ni lo. Ka pa hi aw, a va hnawk tak. Ka pahrawn chu ni lose ka dâwp tawh ngei ang, pahrawn a nihna vang hian ka ngam chiah lo a ni. Tihtur a awm lo bawk a, facebook-ah ka lut ve zuk a, Group pakhata post chuan ka mit a la zar mai. Hmangaihsangzuala thlalak post-in caption-ah, “Kum tling lo pawngsual ho hi chu an sazu tansak mai se,. He pa phei hi chuan Zoram a chawk buai hneh si” tih an dah a. Comment ka chhiar nghal, Sangzuala ṭantu an awm nual mai. Pakhat phei chuan duhthawh zet hian, “A victim hrechiangtu tan chuan nuih a za zawk, he pa hi kei chuan ka ṭan tlat, nakinah thudik chu a rawn lang mai ang. A ṭan nat danah a dik zawk ka ring” tih thuin a comment a, Daisy hrechiangtu a nih chu,. A lo thak ve viau a nih hmel, Thil thlen zana sex a hmanpui kha Sangzuala a nih loh chuan tu emaw tak chu a ni ngei ang a, tunah hian hrehawm a ti ve ang em le? Thudik puang ngam se a dik thlup mai tur, mahse, a puan ngam ka ring lo, Daisy kha kum a tlin miau loh avangin ani pawn a tuar ve thei tlat si a. Boss a rawn chhuak a, “Rangvamualah kal a ngai, tualthahna a thleng leh tawh.” A rawn ti, kan thu hriat ṭhan a ni bawk a, min ṭhâwng vak tawh lo. Hmanhmawh takin RV chu kan pan ta a, Boss chuan, “Zurui insual buai karah pakhat kha vih a ni a, a thihpui ta a nih hmel, a zia lo khawp mai.” A ti suam suam a, kuhva a hmawm leh hmek tawh, kuhva hi a heh ve sia e. 

Kan zu thlen thlak chuan Police lamin an lo enfiah mek a, keini erawh an phalnain crime scene-ah chuan min luhtir ve a. Ruang chu an lo khuh tawh a, thisen a luang zûih mai. Amah vittu nia an rinhlelh pawh an lo handcuff tawh a, a ṭang nasa ngang mai. Thil thlen dan hre ber tur rui lo hai lo, an intihbuaina piah lawka khawsa chu kan kawm ta a. An buaina bul a hre chiah bik lo a, an inphek sual deuh tawp a nih hmel, tuna pawikhawihtua puh mek hian kan kawm mekte inah rawn tlan lutin eng sawi set set loin an chemte a va chuh a, a tlan chhuak leh nghal a niawm e. Tichuan, thihna chu a thleng zui ta mai a nih hmel e. Mitthi hming hi Lalnunmawia a ni bawk. 

Ina ka haw chuan ka pa a lo awm lo va, zawhna dengkhawng zet zet min zawt leh awm si a, ka va peih lo sa tak, rin ang ngein a rawn luh rualin, “Laldinkim, ti nge maw thu hi i awih loh viau le? Engvangin nge vawiinah Daisy te inah khan i kal? An tir che em ni?” A ti nghut nghut a. 

“Eitur ka va pe a nih kha, delivery hna ka thawk pah a,.” Ka tih chuan awih loh hmel lutuk hian, “Ka awih hlawl lo, i va thlithlai a nih kha, tu nge tir che sawi rawh, i sawi loh chuan ka beng hreh miah lo che a nia.” A ti khur khur a. Ka nu pawh mangang deuhin kil khatah a lo ding. 

Ka pa mita melh kar chungin, “Aw, i hre dik, ka va spy a nih kha, tuman min tir lo, keima thuin an case hi ka chhui ve mai mai. “Ka ti chang fak fak a. 

“I himna tur ka duh vanga enthla thin che ka nih hi, he thil hi ngaihven ve tawh suh, i buai lohna turah i buai a nih kha. Tun hnuah vawikhat pawh hetiang thil a awm leh a nih chuan in atangin i chhuak ang.” A ti riap mai le..ka nu chuan, “Tei, i pa thu hi awih hram rawh, inhnamhnawih ve suh. “ A lo ti ṭâwk ṭâwk a, pindanah ka chhohsan ta daih. Chuti taka Chungnunga ten ka pa thluak an lo su hneh chu rapthlak ka ti. Ka ṭah a chhuak,. 

Zan dar 11 a pel tawh a, ka let sek mai. Ka phone a rawn nghawr dat dat a, Malsawmpeka a ni. “Hello” ka ti ṭiau a. 

“Hmangaihsangzuala’n tâng ho lakah beih a tâwk a, a dulah vih a ni, damdawi in an rawn panpui mek e.” A rawn tih chuan ka khur dawt dawt mai. “Tu te nge ni ?” Ka ti chul a, “Vawiina RV-a mi vithlumtua an man khan a vit,.” A rawn tih chuan kha pa hmel kha ka mitthlaah a rawn lang thei. 

“Hlauthawng suh, a thi lovang. Thu lawmawm ka nei a, Daisy serha mipa chi lo thehthang botu Doctor ka hre tawh, Pu Chungnunga nupui û a ni nghe nghe..” a rawn tih chuan tlemin min muan deuh. 

“Chuti chu a zalen hnai tihna em ni?” Ka ti thuai a, “A dam veleh court hearing kan nei ang. Magistrate pawh kha tham a nih ngei bakah an chhungkhat a ni a, Pu Ruata account-ah cheng nuai 3 deposit a ni bawk. Rin aiin anni hi an hraw riau a, a zung nen lam kan phawrh hunah erawh an nasa lo viau ang. Mahse, heng zawng zawng thlen chhan hi i pa leh Daisy pa bakah Sangzuala pa te vang a ni e. Ngaihngama an awm theih nan Pi Siami bulah a case thehluh withdraw turin ka ti a, amah rubotu te chu nakinah hailan a ni dawn tho, police zingah an lamṭang an inphûm nual bawk e. “ A rawn ti dap dap a. 

“Engkim hailan ni tawh se ka va ti tak” ka tih chuan, “Naktukah ka rualin Sangzuala chu i lo hmu ve dawn nia, ka zuk tlawh ṭumin a ngaih thu che a sawi nasa em mai.” Tiin a rawn nui hawk hawk a. 

Thawven khat chuan a veng ta deuh e, he boruak lo inmun chhoh dan hi ka hre chak tawh ber mai. 

A tukah Police venna hnuaia damdawi in khuma mu mêk Hmangaihsangzuala chu kan va hmu ta a, a dâng bâi mai a, thisen a hloh hnem viau a niang, min hmuh chuan a lo nui hram hram a, a bulah thuin a kut ka vuan chawt. “Naute lian, ka thihsan phal lo che. Lungngai miah suh aw” a lo ti zawk mah a, “A na viau em?” Ka tih chuan, “Na ve e, mahse, ka nu leh nang ka mitthla lui ngat ngat a, ka damkhawchhuak a nih hi.” A ti sup a. Malsawmpeka a lo nui vur vur mai. 

Sangzuala darah na lotêa ben pahin, “A hmawr kan bâwk ṭêp tawh aw” a ti nghut a, Hmangaihsangzuala mitmeng nung sar leh a nui hmel chu hmuhnawm ti zetin ka lo thlir a. 

Engkim bulṭanna leh tawpna chu Season 2-ah aw.