Hmangaihsangzuala 4

HMANGAIHSANGZUALA.. (4)

Ziaktu : Toni Râlte

“I hre lo, engkim hi nangmah vang a nih hi..” ka ti hlawk hlawk a. Thlâm lian berah chuan ka luhsan daih. Ka lung hi a awi hlawl lo a ni, tunah ka him lo an ti bawk si, Naktuk han nghah leh pawh chu ka phur chhetê lo. He mihringpa hian min ru bo lo se chuan tunah him dam takin office-ah ka ṭhu der der awm si a. Tunah tak hian min zawng ang em le? Zirliana ruang kha an hawn tel nghal dawn bawk a niawm a, a nupui fanaute tan chuan a va na dawn tak êm..ani chu “Ruang chhar” angin an thantir mai ang chu maw. Tukverhah dak vauh vauhin ka hnukulh ṭeuh chu ka insûm ve ṭang ṭang a, ka nu leh pate mangan dan tur ka ngaihtuah ringawt pawn ka thinlung a na a ni. Boss leh Ela te ho pawh an buai khawp ang le. 

“Tei, lungngai lutuk mah ta che, hotupa a rawn thleng ang a, him dam têin i haw em em ang. “ Pa Hmaa chuan a ti seuh seuh a. “Nia, ka beisei khawp mai” ka lo ti ve a. Ni chu a rei ka ti ngei mai, Sangzuala te chuan thing an ek a, a zei lo lutuk chu a rukin ka nuih tet te mai. Eirawng kan bawl hma viau mai, Pa Tlana chuan, “Siamtea chu ka lainat mang e aw, a huaisen ber pawl a nia sin le aw..” a ti vawng vawng a. 

“A chhungten na an ti viau ang, engtin nge an va zualko ang le?” Ka lo ti ve vat a. 

“Chhungte sawi tur a nei hleinem, a pa a boral tawh a, a nu hian pasal neiin chhim lamah sawn an khawsa daih a, amahin an in puiah a khawsa alawm, ZCP mi leh sa a ni tih an khaw hoin an hria a, mak an ti vak lovang” Pa Tlana chuan a ti mawlh mawlh a. A va baihvai ve aw, a lainatawm rualin chhungte a nei lo chu lehlam tak chuan an pâwl tan pawh a remchang riauin a lang. 

“A nih Pa Tlan, tun hnaiah pâwl anga hmalakna in nei em? “ Ka ti a, ka inthlahrung ve deuh naa ka hre châk miau si a. 

“Nei e, nikum lama nula ruang chhar, police lamin an bawhzui tâk loh te, tuna kan minister pakhatin sum tam tak a tihchingpen vel te leh sawi leh sawi hnu a kan CM leh central insuihzawm dan te pawh a nia. Ramhnuai lama kan chettlat chhan tak hi chu kan pâwl hming hawha sum lo khawn thin an awm vangin kan inhmu khawm a nih hi, naktuk lamah emaw a tuk leh velah chuan kan haw ve leh tawh ang..” a ti ta duah a. Ni e, tualthihna nia lang case chinfel si loh hi an khawih nual tawh a, an pu ber thluak bakah a mâkpa Amanda fapa Malsawmpeka thluak hi an hmang ṭangkai khawp mai. Amanda tak pawh hi a lang apauin an pâwl mi leh sa angin inchhal lo mah se; a rukin a puih ka ring tlat a ni. Kum 2 liam taa hmeichhe naupang kum 3 mi lek pawngsual vanga a thihna pawh kha Amanda hian a ma thuin a chhui ngat a, a chhui chhuak ta reng bawk kha a nia. 

“A nih leh han inzawt ta zel ila, a pawng a puiin tumah hi in that lo tiraw?” Tlawn titih hian ka ti leh a, a nui hawk hawk mai. “Tumah kan that ngai lo, amaherawhchu, a vau chu kan invau thin. Kan vau deuh hnu pawha Zoram mipui zah lo taka la che ngam te chu an nunna êm laksak loin tihnat a mual mual te chu kan nei ve alawm.” A ti ta a. Ni e, he pâwl hi kum 3 lai a ding tawh a, mi an thah âwm hi ka la hre tlat lo. Eiru ho phei chuan an hlau khawp a, warning an pek tawh chuan han tilui ngam an awm mang bar lo, hei hian Zofateah rah duhawm a chhuah tlat a, mipui nawlpui pawn a rukin kan thlawp tlat a ni. 

“Ka haw chuan kan inhmu leh kher tawh awm si lo va, in ngaihawm ngawt ang” ka han ti hluai a. 

“Ekhai! La inhmu leh e a, dam hi han hauh phawt mai ila maw” a ti a, ni e, Pathian zara kan dam te a nih zel chuan inhmuh hun pawh a rawn her chhuak ve leh maithei asin. 

Zanriah chu kan ei hma angreng a, Siamtea chanchin ngawt an sawi hlawm a, an ngui nghiai hlawm mai. Zualko Mawitea kha a inhrosa nasa mai a, “Ka hmuh hun chuan an va châk dawn lo tak” a ti deuh sek mai. Khang lo kaptu te umzuitu mi pali te kha an la rawn kir lo va, an inum thui hle a nih a rinawm. Ramhnuaia chetla ṭhang ta na nâ na chu an ngaihtuahawm lo turah ngai ang. Zanriah eikhamah chuan sunhlu kan ei a, ka thei duh ber a ni bawk a, ka ei thei a ti deuh nge, Sangzuala chuan, “I tlan a nge ..i ei hnem lutuk” a ti a ti mai. “Min inthiarpui i peih loh vang a nih chu” ka lo ti hlar a, a khi suk duh chauh. Ani pawh hi han ngei ru viau mah ila, rorelna dik hmu hram se ka ti khawp mai. A sawi hmangah khan Daisy vang ngawr ngawr lam ai mahin thil dang a phênah a awm ni khan a lang a, eng thil tak ni ang maw..

“E taka! I pa kha ka pain a hria asin” ka tih chuan min melh vut a, “I pa chu tu nge?” A ti a. Ka sawi chuan, a chhing vang vang a, “A hming chu ka hre tawh chiang mai, hmu ila chuan ka hria ang” a ti a. 

“Chuan, Daisy pa te nen pawh a tlangval laiin an inkawm ve thin bawk.” Ka ti lehzel a, “Tak tak em ni? Ka pa leh Daisy pa te pawh hi an inkawm thin alawm, Daisy cousin Lawmi pa te nen..” a ti duah a. 

“Ka pa ka lo zawt chiang ang, i pa leh Daisy pate an inhmelhriat chuan ti nge i chungah chhe deuha an chet le?” Ka ti vang vang a, “Chutak chu alawm chhui chhuah ngai chu” a ti nghut a. Mak ka ti riau, “Englo, phuba lakna angte hi a ni lo maw?i pa chunga phuba lakna ang kha..” ka ti hlawl a, a meng rum sawt mai. 

“Maithei, mahse, ka pa chuan an lakah eng nge a tih ang le..i haw veleh ka nu kha kawm tum teh,.” A ti a, a ngenngâwl angreng hle. Ni e, detective chu ka ni miah lo naa he thil hi ka ngaihven thar ta riau mai. 

Zan dar 8 bawr velah mi pali te kha an rawn haw ta a, Duhawma te ho chu an rawn hruai ta ngei bawk. Sangzuala te nen an han inhmu leh chu mak an tiin an hlim khawp mai. Zirliana thi erawh pawi an tiin hrehawm an tih thu an sawi ve nak nak mai. ZCP mi leh sa te chungah an làwm rualin jail lama thawn leh an tum tih an hriat chuan an hnual rawih mai. Mahse, Hmangaihsangzuala khan thiam takin an aiawha a din tur thu leh a case a fel veleh bail dan a ngaihtuahsak tur thu a lo hrilh a, Duhawma te tak chuan an pawm deuh mai a, Mawizuala erawh a la hmin lo hle tih a lang , a thianpa a lo thi ve lehzel bawk nen. Anmahni mantu Raltlan ho kha an tlanchhiat avangin an man hman ta lo va, a hranpaa zawn beihpui thlak an tum ta a niawm e. Kan han insingsa nak nak a, kan mut meuh chuan dar 10 a ri thuak tawh. Zan hmasa lama ka mut that loh vang nge ka muhil hma ve ta khawp mai, zun chhuak pawn min tiharh tawh lo. Zingah pawh haw tawh tur hisàpin ka tho a, ka phur súrh súrh viau. Eirawng kan bàwl laiin Pu Mapuia leh mi pathum an rawn thleng ve leh a, Siamtea vuinaa awm chu duh viau mah se; Hotupa a lo kal dawn bakah tàng tlanchhuakte chungchang rél a ngaih avangin an rawn let lo thei lo a niawm e. Chaw pawh kan ei hma a, Duhawma chuan, “Ka pa te nen in lo inkawm a ni maw? Ka pi kha a ṭha ang tiraw?” Tiin min rawn bekbawr a, “Aw a ṭha alawm, engtin nge kan inkawm tih i hriat theih?” Ka lo ti vat a. 

“Khuaah kan lut hman a, tah chuan raltlân ho inkulhnaah kan lut a, tv-ah in inkawmna kha an lo pe chhuak a” a ti ta a. 

“Ti nge raltlan ho khan keimah kha min zawn le? An sawi em?” Ka tih chuan, “Sawrkar kar nan tho hman che an tum niin ka hria, an mi leh sate zalen taka an tuallim ve theih nan” a tih chuan ka sa zak mai. Mai mai chuan a, ti nge hmanruaah min hman reng bik le? Bungrua pawh ka ni lo, mihring hlutna nei ve tho ka ni tlat. Ka hnuk te lam lam a ulh. Ka chaw ei pawh a tui lo e a. 

Chaw eikham aṭangin ka insiam ṭan tawh, an rawn thleng lawk thei bawk si lo. Ka phur thak ka ti mai, ka helhhawlh nasa mai a, ka za ruai a ni ber mai. Sangzuala chuan min ei loh hmel kher mai, ka runluih ve deuh bawk nen, a tawpa tawpah kan nghah mek te chu an rawn thleng ta. Ephraime chu a takah ka hmu ve ta chu a nia, a palian kher mai. A zahawm khup bawk si, a upa ve deuh tawh naa a la infit hmel zek zek khawp mai. Min melh vung vung a, ka lo zâm ru deuh. “Ka rual chuan i haw ang maw?” A ti thum chhak a. “Aw” ka ti chhuak chang chang. A bak min be leh tawh lo. Tâng tlanchhuak te chu Sangzuala tih loh an hruai haw nghal dawn bawk a, mahse, Ephraime leh mi pawimawh zual ho an ṭhutkhawm chhungin Mawizuala rilru hel chu a lo lang chhuak ta nge nge a niawm e, a thiante chu engtin chiah nge a lo hmin ni..a rukin an lo tlan chhuak daih mai a, kan hriat chhuah meuh chuan an thleng hla tawh viauin a rinawm. Kan buai ve deuh nuai nuai bawk nen, chawhmeh zawngin thenkhat an kal chhuak bawk nen, Sangzuala chuan pawi a tih hmel viau mai. Ephraime te erawh chuan, “Zawn a ngai lo, an tawn tawn tawng mai teh se, kan nulai hi kan hruai haw ang a, kan mi leh sa pali kan lakir thei dawn bawk a, a tawk rih viau” an ti hmiah mai. An ngaihsak zui vak duh lo. Ephraime leh Sangzuala chu an inkawm fâl leh tê tê a, “Naktukah camp kan chhuahsan dawn a, nangmaha chettlat i ngai dawn a, i inhuam ang maw?” An tih chuan, “Tehreng mai, rorelna dik lo vanga jail-a luh leh ai chuan keimaha zalen taka chettlat ka thlang zawk..” a ti mauh mai si a, “Silai pakhat hi i kawl ve dawn nia, i duh phawt chuan camp-ah hian i cheng thei a nia, rei kan rial lovang, kan rawn lang leh vat ang” an ti ve bawk a, ka lo khawngaih ru ve viau, mahse, ka haw ang a, hma ka lakpui theihna a awm a nih chuan theihtawp ka chhuahpui ve ang chu. Ka haw hian a tan pawh ka ṭangkai thei zawk ang. Chawhnu dar 3 velah hawn zai chu kan rêl ta a. Ka kal dawn meuh chuan Sangzuala chu ka bulah rawn kalin, “Ka nu chu i va hmu ngei ang tih min tiam rawh” a ti sup a. “Ka tiam a che” ka ti hap a. 

“Kha i phone hi” tiin ka phone chu min pe let a, “Chanchin inhrilh theih a ni dawn si lo va, engtin nge niang?” Ka tih chuan, “Mike number ka pe ang che. I lo be dawn nia” tiin mei hawl a va la a, lehkha bâl zetah hian Mike number chu a ziak ta zung zung a. “Inenkawl ṭha rawh aw” a tih chuan engtin emaw hian min hneh riau, “Nang pawh” ka lo ti ve vat a. Kan inthlah liam ta. 

Kein thui fê kan kal leh a, a hmaa Sangzuala nen kan kal lohna lamah kan kal a, dar 4 pelh hlekah kawng pangngai kan pawh ta hlawl mai. Bolero hlui tawh lamah kan chuang ta dial a, thui pawh kan tlan hmain Sangzuala bike kha kan hmu ta a, tuman an lo la chu a ni phawt a, mike hrilh vat a ngai dawn a nih hi. Kawngpui pangngai kan pawh tawh hnu chuan hah pawh a dam ta deuh, mi pali chauh kan chuang a, kan ṭawng tam lo hlawm khawp mai. Aizawl kan luh dawn chuan Ephraime chuan, “Nula, kan camp awmna i hria a, mahse, engmah i sawi loh a ṭha ang.” A ti nghut a, ka lo bu nghat ringawt. Ka ril a ṭam viau mai. Kan in kawt thleng min thlah thlap a, ina ka lut tur chu engtin emaw hian ka awm a, Bathlarah hian ka pa bakah mi eng emaw zat an lo ṭhu khawm laih mai. Min hmuh rual chuan mak ti leh hamhaih si hian min lo en hru hru hlawm a, ka pa nen chuan kan inkuah vat, ka nu a ko chul a, ka nu pawh rawn chhuak vein a lang tar hlein ka hria. Ka khawngaih takzet a ni. Police lam aṭangin ZCP ten min zawn hmuh thu leh min hruai hawn tur thu an lo hre tawh naa an lo ringngam chiah lo a lo nia, a taka min han hmu ta chu mak an ti viau. Ka nu phei chu a ṭap hlawp hlawp mai a, Kimteii lah bang lo. Lungngaihna in kha hlimna inah chantir a ni ta a, ka hun tawn zawng zawng erawh ka sawi vek thei lo. ZCP chungah an lawm em em a, Sawrkarin inremna a lo neihpui vangin sawrkar pawh an fak viau nghe nghe. 

Boss te pawh an rawn lang ta vat a,. Min interview a ni ringawt, midang an awm ve ṭiai si avangin duh ang pawn ka chhang tha thei lo. “Office-ah sawi dun zawk ang” ka ti ta ringawt a, a hrethiam a niang chu maw, a buk ve nghut kha. Ela nen pawh kan inkuah chial reng mai, min ngaihtuahzia leh tâng tlan chhuak ho chanchin a zirbelh nasat thu te a sawi luam a, a tawp lamah, “I la him maw? Hei, i la virgin em?” Zawi deuh hian a ti a, ka lo melh rum ngang mai. “Min pawngsualna hun pawh an nei bik lo” ka tih chuan za lutuk hian a nui a, ka pa te pawh an lo nui ve kur kur mai. Mizoramah chuan ka hming chu lar tak a ni, rukbo hnua him dam taka haw leh thei ka nih mai bakah tâng tlan chhuak te chauh lo ZCP te nen pawha inhmachhawn ka ni miau a, interview neihpui min tum pawh an kat nuk mai. A vai phei chuan ka chhang lo, Youtuber ho lah bang lo. Ka indaih lo kher mai. Min kawm pawn sawi tur chin ka thliar ve thlap a, an tana pawi thei tur ang ka zep lem lo, raltlan hoin min lambun thu erawh ka zep a, zirliana an thah thu thlengin. Chu chuan mizo mipuiah danglamna a thlen chiang khawp mai. Hmangaihsangzuala case bik pawh ka sawi lang tel ve a, Daisy chhung leh khat te ngaihdan a ni vak lo tih te pawh ka hria, ka pawisa duh bik lo. Tin, Mike kha ka be ta bawk a, Shillongah a lo awm daih a, a rawn hawn vat tur thu a sawi bawk. Remchàng ka hmuh veleh Sangzuala nu pawh ka va kawm a, A bike pawh Mike khan a nau a lo va laktir tawh a, Sangzuala nu chuan, “Ka va han hmu ve chàk tak ém, nula, ka fapa a nih vang ni loin ka fapa hi a dik ngei ang tih ka ring tlat a ni. Hei, nangmah an rukbo atang che khan Daisy chhungte lam hian min do nasa zual a, min vau nitin bawk. Awmngaihna tak pawh ka hre tawh lo, ka hna pawh chawlh ka la ringawt a, tihian ka tawm tlawk tlawk mai a ni. “ a ti khur hlak hlak a, ka lainat ngawt mai. 

“A nih ka pi, thu tlem ka zawt duh che a. In pa kha Daisy pa te nen pawh an tlangval laia lo inkawm thin an nih thu Sangzuala hnen atangin ka lo hria a, chutia inkawm ve thin si hetianga i fapa chunga dik lo taka thil an han ti duh hi mak ka tia, eng emaw felhlel a awmin ka hria, in pa te nen khan inhmuh thiam lohna te an lo nei tawh a ni thei ang em?” Ka ti ta tawl a. Hei hi a pawimawh lutuk tlat a ni. 

A aw a thian kharh a, “Ni e, mak ka ti réng asin. Daisy pa te nen hian an sumdawng ho thin a, chutianga inhmuh thiam lohna an neih awm ka hre miah lo. Veng kar te a lo hla tawh a, kan intlawhpawh ta vak lo a. “ A ti niah niah a. 

“Ka pa pawn in pa kha a hre ve asin, Daisy pa pawh a hria, ka pa chu Rinmuana a nia” ka tih chuan mak tih hmel deuh hian min en a, “Awii, Rinmuana fanu maw i nih? A lo va mak ngai ve” a ti hluai a. “Aa

.ka pahrawn a nia, ka pa hi a boral ve tawh tho a, ka pa diktak ang chiahin min hmangaih a ni” ka ti nghet charh a. Ka pa hi chu ka chhuang ve ém asin. A chek hlak a, “I pa te, kan pa te chuan sumdawnna an lo kalpui ho reng tawh alawm, Daisy pa te nen. I pa hi chu kan pa boral hnuah dawr siamin tisawn whole sale dawr a nei ta a, Daisy pa tak hi a la sumdawng em ka hre lo.” A ti a. 

“Eng sumdawnna nge? Sawi a rem em?” Ka lo ti vat. Nuam ti chiah lo hmel a pu a, mahse, “Aa a dik a dik chuan an sumdawnna kha tlangaupui chi a ni chiah lo va, rangkachak leh lunghlu an tawlh ve thin a, kan pa pawh bansan turin ka ti fó a, nakinah mualpho hunte a la awm thei tiin,.ani pawh khan bansan a tum ta a, vawikhat chiah ka tawlh ang a, ka bang ang a tih mek laiin an zinna lamah chesualin ka pawh chhàwn loin a boral ta kha a nia. Sangzuala te phei chuan a sumdawnna kha an hre kher lovang. “ A ti mawlh mawlh a. 

Ka pa pawh chung sumdawnna avang chuan a ni maw a lo inlak milen tak tih ka ngaihtuah, mahse, a bansan tawh a, ka vei zui vak duh lo. “Daisy pa chuan hliam a tuar ve tho em?” Ka ti leh a, dilchhut min ti ngawtin ka ring, mahse, tanpui ka duh vang a nia, a hrethiam ve a niang. “Tuar ve tho e, mahse, a na em em lo. Ama khalh a ni nghe nghe a, motor kha. “ A tih chuan ngaihtuahna mak deuh min neihtir tlat. Mahse, ka sawi duh lem lo. “A nih ka pi, thil dang daih, Daisy serhah khan mipa chi kha hmuh a ni a, kha kha Sangzuala chi a ni ngei em tih pawh an la finfiah ta chuang lo a ni maw?” Ka tih chuan a lu a thing nar nar a, “Teh suh e, tikhan Pu Ruata bumna thangah kan awk ta sia, court lam lahin an convict nghal hmak bawk nen, boruak engmah a awm zui ta lo a ni.” A ti a. 

“Daisy cousin Lawmi i tihte khan Sangzuala hi an ṭan bik chuang lo tihna nge? An innêl viau khan i sawi sia” ka tih leh chuan, “Ṭan teh nang, a âng nasa sa an nia, kei te hi min zah lo reng reng, amah Lawmi tak chuan min hmuh hian hrehawm chu a tih ve hmel a, a chhungte erawh chuan ka kawng kal mai mai pawh min ṭawng el thin, chuvang a nia chhuah pawh hi ka duh vak loh.” A ti siam siam a, ka khawngaih ngei mai. 

Zanriah kan ei laiin ka pa chu, “Pa, Sangzuala pa te nen khan in lo sumdawng ho thin a ni maw?” Ka ti thut a, a meng bial kàwk chu ka hmu lo der tawp. “Umm, a rei tawh e” a ti ta ngawt a, ka hrethiam reng, zawh vak ka duh lo tho nain, “Daisy pa leh Sangzuala pa khan inhmuh thiam lohna an lo nei deuh a ni lo maw?” Ka ti leh a. Ka nu chuan mak a lo ti deuh tih ka hrereng. “Ka hre ve hauh lo mai, ka bansan hnu khan kan inkawp zui ta vak lo a. Ngati nge chu chu min zawh? Hmangaihsangzuala te bulah i tàp rei deuh a, thil tisual lo turah i ngai ta deuh em ni?” A ti ta nghat a. Mi run ta deuh, “Ngai pawh ni loin a dik ngei ka ring tlat a ni, bakah a case hi detective thiam takin a khawih dawn a, chhui chhuah tur a mual mual a awm ka ring” ka ti ve ta ngat a. 

“Tu detective maw? Court lamin thiam loh an chantir vek tawh a, tihtheih a nei awm lo ém mai, bakah tâng tlan chhuak, most wanted a la ni zui a” a ti hluai a. A thinrim deuhin ka hria, ka nu pawn mitmeiin min lo khap titih tawh, “Magistrate kha Daisy chhungte a nia, an tham pawh a ni thei, bakah Daisy serha mipa chi kha Sangzuala chi ngei tih an finfiah hleinem, tin, Sangzuala ukil kha an tham bawk a, khatiang thutlukna atthlak tak kha an siamtir bawk. An tenawm êm mai, chhui chhuak vat teh se..” ka ti leh ṭâng ṭâng a, ka nu chuan, “A ho lutuk, tâng tlanchhuak chungchang lo khel vak a ngai lo. Bakah rubotu che an nia, nangmah vanga khawtlang bakah Zoram pum buaizia te hi ngaihtuah la, khatiang ṭan tlak loh lutuk kha a hming pawh sawi ri tawh suh.” A lo ti chiam a. Ka ngawi ta daih, sawi zui zel chu ka châk reng, mahse, boruak ka ti alh dawn tih ka hria a, ka ngawihsan ta zawk a ni. 

Malsawmpeka pawh a kàl thlak a ngai kha a nia, mahse, Sangzuala boruak alh mek avang chuan a kàl thlak hun pawh an pawt sei leh ta deuh a, chutianga serious em em a la ni lo bawk nen, kei pawn va hmuh ngei ka duh. Boss nen pawh thil tam tak kan sawi dun thin a, ani pawn Sangzuala case bik chu a ngaihven ve ta hle, ZCP ho camp awmna ka hria tih a hriat avangin an camp tlawh a chàkzia leh tlawhpui turin min sawm fo a, ka duh der mai si lo. Min ring tawk a, min hruai haw bawk a, an tan hnawksak nih loh ka duh. Boss pawn a hrethiam ve tho mai. ZCP lam an che na leh ṭan ta, Raltlan kawhmawh bâwl ho chu manin Police kutah an hlan ta hmak hmak mai, Zoram pawh a ralmuang chho ta deuh e. Hetih rual hian tâng tlan chhuak zawn hna chu neih kal reng a la ni tho a, Duhawma te tak kha Thenzawlah hmuh an ni a, mahse, man hman lohin ramhnuaiah an tawlh bo leh ta daih a, Thenzawl khawtlang lamin zawn runpui an nei ve mek bawk. Sangzuala erawh a reh vung vung mai. Ka muthilh theih loh zana a ban lianpui ka dul chunga a lo dah lai te, ka khup nâa hnah a bel te leh a theh ang tawka min care vena te kha ka hrechhuak fo mai. Tunah te hian ramhnuaiah amahin a awm rek rek awm si a, a khua a har ve thin ngawt ang. ZCP camp kha a luah zui ka ring deuh bawk. Mipa a ni a, a ngaihtuahawm miah lo nain amah zawngtu te pumpelh reng renga hun a hmang tur chu ka khawngaih deuh. 

Vawiin hian Malsawmpeka nen kan inhmu dawn a, amah zawkin min rawn be pawp a, boss pawh ka hrilh tawh. Office ka kal dawn lo a ni. Kan inhmuhna tur hmun ka va thlen chuan a lo thu rân tawh a, nelawm takin min lo nuih var var mai, a hmeltha a, mahse,a cher , a kàl vang a nih ka ring deuh. Coffee kan in dun a, Sangzuala chungchanga a hriat tur tul ang ang kan inhrilh a, a nu pawh a lo va kawm tawh a niawm e. Han sawi belh vak tur ka hre tawh lo, amah pawn Sangzuala chu a dik zawk ngeiin a ring a, chuvanga a case pawh hi la a ni tih a sawi nghe nghe. Daisy chhungte hmuh a rem dawn loh avangin a khirh deuh dawn niin a lang. Pu Ruata pawh a enthlak tawh thu a sawi a, a che rang ka ti khawp mai. Sangzuala pa boral lai hun atanga bul a ṭan tur thu a sawi chuan ka lo pawmpui hle, eng emaw dik lo hi chu a awm a ni. 

Mi kâ atangin Daisy kha khatia boruak a neih atang khan a chhuak vâk ta meuh lo a niawm a, school pawh a bâng ta daih a nih hmel. Sangzuala kha a lo star tak tak a nih phei chuan hrehawm a ti ve ngawt ang le. Mahse, Daisy hi hmanrua mai a nih rinna ka nei lian hle tho, a pa hian an nunhluia eng emaw vangin a fanu hi a hmatheh lovang tih a sawi theih loh. Rilru a chawl mawlh lo a ni e. Hnaah ka kal leh ṭan tawh a, Tâng tlan chhuak lam erawh kan ngaihven ta vak lo. Ṭhiak khuaah a pasalin a vuak hlum hmeichhe lainatawm tak avangin kan va zin a, an YMA hruaitu te an lo fel khawp mai. A pasal hi zu rui thin niin a nupui pawisa a dil a, anin a lo phal bik si lo kha a vaw hlum ta ringawt a niawm e. A rapthlak thin khawp mai. Zoramah pawh tualthahna te hi a mikhual ta lo, case zuzi lah a tam, Christian ram inti ve si-ah chuan kan ropui lo teh e. Ṭhiak aṭanga kan haw chu rei pawh kan tlan hmain kan motor chu a chhe ta ringawt mai. Boss motor hi a hlui ve tawh bawk a, Ela leh Dave-a ten an han en ve ngial a, a ngaihna an hre vak lo. Boss lahin motor chinchang a lo hre lo nasa si,.Motor veivak lah chu an tlem angreng si a, kan tângkhang ta reng ringawt, dar 4 a pel tawh tihin pickup a rawn tlan ta hlauh a, mizo tak leh tlawmngai takin kan motor chhiatna bawr vel chu min ensak ta a, mechanic a lo ni bawk a, a tihzia kher mai. Kar lovah motor pawh a nung leh thei ta hlauh a, Pickup chhunga chuang chu a rawn chhuk ve a, ka hmuh chuan ka meng phâwk khawp mai. Siamtea thih thu rawn sawitu Mawitea kha a lo ni reng mai le. Ani pawn min lo la hre khawp mai a, Aizawlah bungrua la tura kal an nih thu a sawi luam a, tlema din falpui deuhin, “Camp i tlawh leh tawh em?”ka ti sap a. A bu nghut a, “Nimin piah khan kan zuk kal zawk a, bungraw thenkhat dahin, ani pawh a lo ṭha e,.” Tiin ka zawh tel loh chu min hrilh a, a nui deuh bawk. 

“Chuan, engtikah nge in tlawh leh ang?” Ka tih chuan, “Kartawpah a niang” a ti sup a. “Ka kal ve duh” ka tih chuan min melh zawk a, “Ngati nge?” A tih chuan, “Amah kha ka hmuh lawk a ngai, zawh tur ka nei a” ka ti a, a bu ve nghut mai. “Pu Mapuia te ka lo hrilh dawn nia.” A ti a, kan inpeih ta bawk a, kal zai kan rel leh ta a. Mawitea chu ka thiannu nau a nih thu ka sawi tak ngawt kha. 

In ka thlen chuan ka inbual sawk sawk a, chaw ka ei hnuah vawiin lam kan kalna report chu ka chhu zui ta mawlh mawlh a. Dar 11 a ri ṭêp tihin ka tui inchhawp a lo zawh tawh avangin ka zuk la a, verandaah chuan ka pa hian tu emaw hi phone-in a lo be mawlh mawlh mai. Eng ka hria chu ni maw, ka ngaithla châk ta tlat a nih chu. Ka va pan hnai ta hriau hriau a, kawngka chu zimtêin ka hawng a, ka pa chuan muk zet hian, “Tu nge an rawih dawn ka hre lo, ka zawt hreh tawh sia, min rinhlelh ka hlau bawk nen, tunah pawh hian a chhui thui tawh riauin ka ring” a ti mawlh mawlh a, lehlam ami ṭawng erawh hriat phak a ni lo. “Ni e, ka lo ngaihven leh dawn nia, Pi Siami pawh ka lo va tlawh ang e. Ngaihṭhain lo awm rawh” a ti leh a, ka kalsawn ta vat. Tunah khan ka chungchâng an sawi bakah Pi Siami chu Hmangaihsangzuala nu a ni tih ka hria, detective an rawih kha tu nge tih an la hre lo a, mahse, an ngaihven danah he thil hian zung a kaih thuk hle ang tih ka ring thiam ta bawk. Ka pa ngei pawh he buainaah hian a inhnamhnawih ve a, Daisy pa te nen an thawk ho tih pawh a lang. Pa leh fa kan indo dawn a nih hmel ta riau. Ka pa chu intatlut lo se ka duh ngawih ngawih asin mawle. An sumdawnna thil kaihhnawih vek a nih pawh ka ring thiam ta. Rilru chawl loin ka mu a, muthilh a har khawp mai. Ka pa lakah pawh fimkhur a ngai dawn ta chu a nia, Sangzuala dikna chanvo hailan a nih chuan ka pa ngei pawh a kangkai dawn si,. Inrawlh ve loh law law te chu ka duh rum rum naa, ka ti laklawh tawh a, Sangzuala bulah ka pui ang ka tih ka lo tiam tawh bawk si, engpawhnise, kar tawpa kan inhmu thei a nih chuan heng zawng zawng hi ka sawipui a ngai dawn a ni. 

Tukṭhuan ei laiin ka pa chuan, “Tei, Daisy te case vel chu tuin maw chhui dawn a?” A ti ta chiah a, ka va hrilh awm bik lo tak ti rilru chungin, “Ka hre bik lo, a hming an thup tlat a” ka ti a. A lungawi loh hmel viau. Ka pawisa duh tawh bik lo. Daisy te lama a ṭang tlat hi ka ngei hrim hrim. Zirtawpni a rawn thleng ta a, zan khat riah ka tum avangin ka chhungte bulah chuan, “Ka thiannu Hluteii Lunglei ami a rawn zin a, min ngai ve bawk nen, zanin chu a bulah ka riak ang.” Ka ti a. Ka nu chuan, “I bo leh ang e aw” a lo ti zauh a, a fiamthu tho nain min la ngaihtuah hle tih ka hre thei. “Ka bo duh tawh lo” ka ti a, ka nui bawk. Ka pa erawh chuan engmah a sawi ve lem lo. Mawitea nen inbiain Ngaizêlah min lo nghah tur thu a rawn sawi a, Boss bulah, “Hna a tam lo bawk a, vawiin leh naktuk ka chawl dawn, ka zin lawk dawn” ka ti a, a lo remti ve mai bawk. Ka helhawlh deuh nge ni ka zun lah chu a chhuak sek mai a. Ngaizêl ka va thlen chuan Mawitea bakah mi pali hian min lo nghak ran a, Sumsuih lam pan chuan kan tlan chhuak ta vâwk vâwk mai. “Pu Mapuia te chuan eng nge an sawi?” Ka tih chuan, “A remti ve mai, a case an khawih ve bawk sia, i pawimawh tih a hria a niang” a ti mai a. Ka lâwm rilru hle. A hmaa kan kalnaah khan kal lehin kei pawn sneakers ka bun tawh bawk a, kal a harsa ta em em lo. Hlat erawh hla ka la ti em em. An camp kan va thlen chuan Sangzuala’n thing a lo ek mek a, min hmuh chuan mak a tih hmel hle. A hamhaih ve deuh a niang, a lai ve hû mai. A tawpa tawpah, “Eng nge i lo tih dawn?” A ti ta sup a. Ramhnuaiah a che tla a ni bawk a, a taksa pawh a lo sek phiar ṭung tawh mai, nisa a tuar ṭhang tih hriat takin a hma ai khan a lo hâng ta bawk. “Ka rawn hmu dawn che” ka ti a. 

“I inenkawl tha lo ni maw? I cher tlat” a tih chuan, “Hnaah kan bur leh ngar ngar a, ka thau thei lo a nih hi” ka lo ti mai a. Thing a eh zawh chuan bûk tè berah lutin kan ngawi dun vang vang a. “A hrehawm em?” Ka ti sap a. 

“Hrehawm loh e, a khawharthlak tih mai loh chu” a ti a. Ka kal chhan chu ka sawi ṭan ta a, ka pa te thleng chuan ka sawi a, “I pa sumdawnna kha i hre ve reng reng em?” Ka tih chuan, “Hria e, kha vang khan ka pa lakah ka hel tlat thin reng a ni, ka nu erawh chuan ka hria tih a hre lovang.” A ti a. 

“A thih danah khan rinhlelhawm a awmin i hre lo em ni?” Ka tih leh chuan, “Shimla-a ka zin lai a nia, a ruang ka nang hman ṭâwk a, rinhlelhna ang kha ka nei lem lo. Mahse, chutia i sawi takah chuan Daisy pa a rinhlelhawm khawp mai” a ti a. Malsawmpeka hmalak dante pawh ka hrilh a, “A rawn kal alawm, kar hmasa khan. Hma pawh a sawn viau kha.” A ti a. 

“Engpawhnise, ka pa pawh ka lo mitmei ve deuh ang a, remchang hmasa berah rawn kal leh ka tum ang” ka ti a. 

“I himna tur chiah ngaihtuah rawh, i pain a enthla dawn che a, heta i rawn kal fo chuan man chhuah kan ni zawk ang. Mawitea number i nei tawh a, thuchah tur chu ka lo hrilh zel mai ang.” A ti duah a, min ngaihtuah tih ka hria, amah zawk hi a ngaihtuahawm a ni. 

“Chaw i ei tha em?” Ka ti a, min melh vung vung chungin, “Ei tha e, chawhmeh pawh ka nei tha thin” a ti a. 

“Zan ka riak dawn asin” ka ti leh a, “E! Ka lo mikhual ang che. Zanriah tur sakhi rêp ka la nei alawm ” a tih chuan, “yes, a va tui dawn tak” ka lo ti hliai. Kan innuih a, kan inpawh ta lutuk chu a mak, a nuam bawk. A lo nelawm ve ta deuh bawk nen. Dar 3 velah eirawng kan bâwl dun a, midang ho erawh chawhmeh zawngin an chhuak thung. “Eirawngbawl i thiam awm vak si lo va, i ei tui awm lo” ka tih chuan a nui huk a, “Ka thiamzia i hre dawn alawm, bawlhhlo hi a tam lo êm zawk a, inah pawh ka nu aiin ka bâwl tam zawk” a ti duah a. 

Sakhi sarêp chu a chhum hluah a, anthur a thlak tawp a, nakina al thak leh tur a ni. Ramsa lam hi ka ei vak ngai lo va, sakhi leh saza tih vel erawh ka ei duh ve viau. Hmarcha ka râwt chu a chip mawh si, ka han sawh na deuh chu ka mitah tak a per ta a, a thip ngei mai, ka ṭe ṭhawt a, a buhfai sil lai chu dah vatin min rawn buaipui a, “Lo kal teh” tia min kaiin tui hmunah min kalpui a, ka meng ngam lo. Tui chu a rawn far a, “Meng lui rawh” a ti a, ka meng lui chu ka mit ka khap nasa mai. “Lawkin” tiin a tshirt hak lai chuan ka mit chu a rawn khuh a, a chhem ta vak mai. A zia ve sawt tak tak. Chutia hnai set sawta kan han din dun takah chuan inhîptawnna kan nei a ni tehchêk ang chu, kan infâwp ringawt mawle. Dimtêin min fâwp a, ka lo chhan let ve chuan a duhthawh sawt, mahse, thawm kan hriat avangin kan inṭhen ta phawk a, ka lai ru ngei mai. Engvanga lo fâwp let ve ngawt nge maw ka nih le. Ka zak rilru hle, ani pawh eng rilru nge maw a put ni. Hmarcha chu aman a râwt zui ta daih a, dal ka lo chhum thung. Ramchhuak ho pawh an rawn hlawhtling ti ila ramar leh vahrit an rawn hawn a, zing lama ei ah an ti thung. Chaw kan ei lai te chuan Sangzuala lam chu ka hawi ngam lo reng reng, ka zah thar tlat, easy min ti awm tih ringawt ka ngaihtuah a, ka chaw ei pawh a tui meuh lo. Ani erawh a pangngai thlup vek a, a ṭawng ve bawrh bawrh mai. 

Ka mu tur ka hmai phiha cream vel ka inhnawih laiin ka bulah a rawn kal a, “Ka bulah mu ang che” a ti tâwng mai. 

“Ngati” ka lo ti satliah a, “I him nan” a ti duh lek. Tumah ka laka rilru chhia leh tenawm pu an awm ka ring lo naa, ani mipa ta na nâ na chuan mipa rilru a lo hrethiam ni tur a ni. Min keipui sa hauh ve tlat. Ka hnial hran lo. Ka muhil leh thei ta lo, mut ṭhan lohnaah ka mu a ni bawk a, ka tal leh sek a, min rawn kuah leh takah chuan ka îp zawk mai, amah hnungchhawn zawngin ka mu a, min rawn hnaih mah mah tih ka hre thei. Ka tâl ngam tawh bawk si lo. Ka sam chu a rawn hnim vang vang a, ka lo chhing tawp. 

“Lo hawi teh” a ti zawi sup a. “Aih” ka lo ti hmuk. 

“Ka tina dawn lo che” a ti leh a, “Ka zak alawm” ka tih chuan a nui hawk a, amah zawk chuan min kuai letin a lamah min pawt hnai bawk. “I haw hnu aṭang khan ka rilruah i thi ngai miah lo. Ka ruak vek..” a ti a. 

“An harh ang e” ka lo ti daih. 

“Min ngaihven rawh, kan tan inlaichinna neih rem rih lo mah se; ka zalen hunah chuan ka rawn zawng chhuak ang che” a ti nghet charh a. 

Sawi ve tur pawh ka hre lo. Dik tak chuan kei pawn ka theihnghilh miah lo, mahse, criminal a ni a, ka hna nen a inrem mawlh lo. “Ka ngai ngawt ang che. Naktukah i haw leh dawn sia” a tih leh chuan ka insum thei ta bik lo a, “Kei pawn, lo inenkawltha rawh aw” ka ti a, huaisen ka inti hle. Min rawn fâwp leh a, ka dawh mawl tawp bik lo. Thim zingah kan uar dun tân tân khawp mai. Chuti maia kan han inzawm ta chu mak ka ti a, mak ka la ti fô ang. Infawh aia thui a kal miah lo bawk a, ka lâwm hle. 

Zingah a thawh dawnin ka chalah a rawn fawp zauh a, “La muhil rawh” tiin a tho ta a. Nuam ka ti veng veng mai. Ka hawnsan leh daih dawn a, ka ngai ngawt ang le. Msa bak ngaihzawng la nei ngai lo ka ni a, zei pawh ka zei lo, Mahse, Hmangaihsangzuala, Zoram mipuite zawn mek, criminal hian min hîp tlat si a, ka thiam loh pawh a ni bik lo. A zalen hunah hun ṭha a her chhuak êm ang chu maw..

Tukṭhuan ei khamah muangmarin kan insiam a, kan haw dawn ta. Chokaah chuan midang hmuh lohin kan va infawp leh zuai, kan va inthlahlel ve tak. Kan naupangchhia bawk si. Ka kut a chelh ran a, inthlah harsa kan ti ve ngang mai. Mawitea chuan a hrethiam deuh niin ka hria, a nui tut tut a, mahse, hria pawh nise pawi ka ti vak lo. An ringhlel sa vek tawh tho. 

“Kan inhmuh leh hunah chuan 5kg talin lo rih belh ang che” tih chu min thlahna a ni. 

Hawn lam chu ka nguai a, ka kal pawh ka kal hne hne mai. Ni a sa bawk nen, ka chau viau, ka nuin min lo call a, “Tlaiah ka rawn haw ang, hei kan la buai deuh a” ka ti ta ringawt. 

A tawpa tawpah Aizawl pawh kan lut ve leh ta, Sikulpuikâwnah ka chhuk a, taxi lain in lam ka pan zui nghal. Ka pawr viauin ka ring. In ka thlena ka pindan ka lut fel chiah tihin call ka dawng a, number hlang a ni. “I thiltih mek hi bansan ang che. I chhungkua venhim i duh a nih chuan, Hmangaihsangzuala case i ngaihven hi bansan ang che. Enthlak i ni tih hre bawk rawh” a rawn ti nghal buan buan mai. Ka ṭawng ve hmain a la off daih zui. “Khanglang a” ka ti sep a, inbual turin bathroomah ka lut nghal daih. Zanriah ei laiin ka pa bawk chuan, “ZCP te camp kha khawi ramah nge a awm? “ A ti leh ta bawl mai, tunlai chu biak pawh kan inbe tam lo. A zia a dang vek tlat a. 

“Ka sawi duh lo, min chhanchhuaktu an nia, ka zêp tlat dawn” ka ti ve hmiah a, min melh no lo teh e. “ZCP-ah hian inpek ve ka châk e, U, tihdan i hre lo maw?” Mapuia’n a tih chuan rang lutukin, “A tul mai mai lo. Mawl leh lutuk” ka pain a lo ti zêk mai. Mapuia pawh a ngawi hmak mai. Kan pahrawn a nih piahlamah min chawmtu a ni a, kan nawr na ngam ngai lo. Mahse, chhungrila kan indona hian lan chhuah hun a la nei dawn khawp mai. 

Hla ka zir a, kan ban hma deuhin Boss-in min lo call a, “Tâng tlanchhuak pathum an zawng hmu tawh e” a rawn ti. Duhawma te an nih ngei ka ring. Sangzuala dinhmun a derthawng dawn ta, Duhawma te khan ZCP camp awmna kha an hre ve kur si, an sawi chhuah ngei ka ring bawk. Hmanhmawh takin Mawitea ka be nghal a, Chanchin chu a lo hre tawh a, “Sangzuala awmna an zawt ngei dawn a, an sawi chhuah ka ring” ka tih chuan, “Chuvang chuan rang taka insawn turin hei zaninah kan kal leh rum rum dawn e. Keini pawh kan him bik lo” a rawn tih chuan ka thaw huai mai. An innangching lo hram turah ngai ang. 

In ka thlen chuan ka nuin min lo hrilh var a, “Ka hre tawh alawm” ka tih chuan, “Hmangaihsangzuala pawh an hmuh har dawn loh chu, a thianten a awmna an sawi ngei dawn si a” ka pain a lo ti a. 

“Nia” tih bak sawi tur ka hre lo. Ka pa chu an pindanah a lut zuk a, tu emaw a be leh dawn a niang. Ka nu chuan, “Tunlai i pa awmdan hi mak ka ti riau, Sangzuala an ti mi, kha kha a ngaihven bawk si, a chhuak deuh reng bawk nen” a ti a, engkim hrilh ka châk, mahse, hre rih lo se a tha. 

“A hmelhriat fapa a nia, chuvang a niang” ka ti ta ringawt a. 

Call ka dawng leh ta, a hma ami tho kha a ni. “Hmangaihsangzuala pawh man a ni thuai ang, i hrethiam em?” A rawn ti a. A aw atang chuan patling a ni ngei mai. “An man lovang” ka ti ve ngat a, ka nu makti hmel ka hmuh rualin phone chu ka dah daih.