ZOCHAMPUII 1

October 03, 2024

ZOCHAMPUII 1

ZOCHAMPUII ..(1)

Toni Râlte

“Mama, Bawiha, Rinmuanawm, tho vat rawh..dar 9 a ri dawn” a nuin a rawn tih leh hlak hlakah chuan mit nuai chawt chawt chungin a ṭhu chhuak a, sana a han en chuan a rin ang ngeiin dar 8 a lo pel awrh chauh, a nu tih ve dan rêng kha a nia, mak pawh a ti tawh lo. Peih loh hmel zetin a tho ṭuah ṭuah a, a tûm bûr bawk. A va inphihfai a, an kawmthlangpa, zial heh zet mai chu a rawn leng lut leh a, a tuktin tihdan a ni ve a. A titi leh suam suam a, “Kha kan zirtirtu thar tur kha a va no ser sawr ve le, Muanawm, i hmu ve tawh em?” A ti a. Zial a ṭan leh nghal hmak bawk.

“La hmu nang, pahnih a ni lawm ni an rawn dah dawn” Muanawma chuan a ti ve mai a.

“Pakhat kha chu mipa, nupui fanau nei an tiin ka hria, engpawhnise, kan khaw High School pawh a tihtlâk ve deuh tawh ang chu maw..result reng kan nei chhe thei êm mai..” a ti leh chuar chuar a. Muanawma erawh roomah a lut daih thung.

An khua hi khawchhak lama awm niin Bûngpui khua a ni a, Champhai lama an pem pheuh pheuh avangin tunah chuan in 280 bawr vel chauh an ni tawh a. Muanawma pu hi Bungpui lal thlahte zinga lal hnuhnungber a ni a, kum 103 miin a boral nghe nghe a ni. Muanawma pa hi Pu Lianngura niin, anu erawh Siammawii a ni thung. Unau hi pathum an ni a, vanduaithlak takin kum 2 liamtaah khan Muanawma ú chiah Rinpuia chu an hnatlannaah savawm nen inbeiin, a boral tawh a, Kohhran hnatlanga kal a nih avangin ‘martar’ sawngbâwlin an vuiliam nghe nghe a niawm e. Chumi û an upa ber Saitluangi erawh an khua angah chuan a senior pawl a ni ve ta a, nula fel leh mawngzâng tak, Kohhran leh khawtlanga mi zahkai chin a ni thung. Muanawma hi a piang tlai deuh a, tunah kum 22 chauh a la hmang naa Thingtlangah chuan tlangval thaza rual tia sawi theih a ni tawh thung.

“Mama, i pu Chhinga te inah hei hi han dah lawk mai teh, i pa lah hi a haihawt roh sia, a pawimawh si” tiin envelope- uk hi Pi Siami chuan a pe a, “Thawh veleh ṭangin min tir nghal a” ti hluk hluk chung chuan a kal ta tho a. A pa te chu zingkar sumo-in Aizawl lam panin an zin a, lehkha pawimawh a theihnghilh leh hram a nih hmel,. Pu Chhinga te hi chaw ei kham lama zin ve tur an ni bawk a, a han thawn dawn a nih awm chu. Pu Ngura hi VCP a ni a, term 3 a VCP-na a ni. Pa ṭha leh dam duam mai, bengvar leh pa rawntlak tak a ni a, khawtlang tana ṭhahnem ngai em em leh a mawhphurhna hlen zo tak mi a ni. Chuvang a nia a tlak theih reng reng loh ni. Muanawma haw lam chu a ṭhianpa Kima te inah a peng kawi a, “Vawiin chu nghakuai chu chiah ang aw “ a ti lut lung lung a.

Kima pawh a lo la phak angreng viau, “Changpat chah tur lo zawng ve rawh aw, ka la hmu tlem angreng.” A lo ti vei hluk a. Kima nuin thingpui a rawn pe nghal var a, Kima te hi a nu hova awm mah nise; mi chuankaina ber, ‘Rûn mawi’ an tih fiamthu ve thin kha a nia. Pa uap loh mah nise; nu ber Pathian ṭih mi a nih bakah Kima te unau hi an nungchang a ṭhain ṭhenrual kawm an thiam bawk a, inleng hi an nei deuh reng mai.

“Ka lo zawng dawn nia, kal tlai lutuk lo ang aw..” Muanawma chuan a ti a, thingpui in zawk zawkin a chhuak zui nghal. An in thlen hma pêngah chuan an YMA president Pu Zuia leh mikhual pahnih hi an lo ding deuh dat a. “Awma, i pa a awm ang tiraw?” Pu Zuia chuan a lo ti a.

“Awm lo, tukinah Aizawlah a zin a..” a lu buk lam lek lek hui pah chuan a ti a. Pu Zuia chuan, “A ni dawn tak, thil buaipui tur an nei tak e. Aa..kal tho ang u, i nu a awm tho alawm, hei kan zirtirtu tharte an nih hi, Hei hi Pu Biaka, chuan kan nula hi Champuii a nih hi..Kan VCP fapa Muanawma a nih hi..inhmelhriat rawh u..” a ti zung zung a. An lu an inbuk khum zauh ringawt. Pu Biaka chu pa bêm lam, dul pawh kiar lek lek, hang lam deuh a ni a, a fel hmel viau mai. Zopuii chu Muanawma pawn a zakzeh phak mai ang a tih theih tur, tê fel àt, kim ve biai si a ni roh a. A vun chu amah tilangsar bertu a ni awm e, a nungin a no suah mai a, a hmaitlang hrim hrim erawh chuti tehluaa han fak hluakna tur a awm hran bik lo. Thingtlangho hnathawh tam zawk erawh a thawk tam lovang tih erawh a hriat mai. An inzui ta ṭhâm ṭhâm a. Muanawma te in hi an thlahtute lal laia an in hmunah khan an la sak chhunzawm zel a, kawng aṭangin a va penhleh ve hlek a, a fal deuh nalh a nih ber chu, Nikum mai khan an sa thar a ni bawk a, an khuaah chuan a hmuh tlakin a ṭha ber awm e. Sap ho style-a sak a ni ve nghe nghe. Pi Siami hi Primary Headmistress a ni bawk a, loan a puk bakah Pu Ngura hi pa rilru nei ve tak a ni bawk nen, a taima bawk a, hmarcha hmun leh sawhthing hmun a siamna aṭang pawn a nuai tel a lalut ve reng bawk a, an khawsak hi a harsa em em hran lo. An chhungkua an tam lo bawk a.

Pi Siami chu chuan nu vengva tih takah a lo be sâwm thiam hle, Muanawma erawh a zak ve deuh nge ni a roomah a lut leh ta daih. A mizia hi a dangdai ve a, an ṭhianzahoa an awm chuan an hmuipuipu a nih chang a awm fô, mahse, a nel lohte bulah erawh chengkawl ang mai a nih chang a awm bawk. Thau tih dawna chhal theih chiah si loh cher lutuk si lo a ni a, a pa a chhun bawk a, 6 ft chu a tling ve, tunlai ṭhalai hi chu khawpui pawh thingtlang pawh an lianin an ṭhang duang tawh a, a mak em em hran lo.Hmelṭha vût tih theih si loh hian, mi híp theihna riau hi a nei ve a, tleirawl leh nuthlawi lamah a tla na ru ve zék, a ‘Man’ e an tih ve fô ṭhin kha a ni a, bakah an khawsak a lo zia ve deuh bawk nen. Zirna lamah chuan tunah hian IGNOU-ah M.A (Pol.sc) a zir mêk a, University-a han kaltir kha an duh viau nain an khaw lama awma lui kal leh ramvah a thlang zawk miau si a,. A û Saii hian an khaw káwnah puanṭhuina dawr lian vak lo nei vein ama tawkah a inchawm thei ve viau mai. Pu Zuia te thingpui in lai chuan Muanawma chu changpat zawng turin a chhuak a, an kawmthlangah a chhuk nghal. Pa ber a awm lo bawk a, Pu Biaka te pawh an awm rei lem lo. Muanawma te pawn tukṭhuan an ei kham a, luia kal tur chuan a insiam nghal mawlh mawlh. Nghavawk hi a nawlpui chuan ei mi-ah ngai chiah lo mah se; BP sang tan te, Zunthlum nei tante hian a ṭhat avangin ṭhenkhat chuan hralh sumah an chantir ve fó mai. Pi Siami hi a BP a san ve avang hian Muanawma hi chuan a hralh ngai meuh lo, lui kala ram han vah hrim hrim kha nuam a ti ve a ni deuh mai. Kima leh an ṭhianpa tho Lawma te nen Khuai lui an pan ta ṭhâm ṭham a.

Lawma ta pek chuan, “Enteh u, miss thar kha sil loh paw’n a ei tlak ngei ngei ang.” A ti ta roh a. Kima chuan, “Ka la hmu chiang ve miah lo, khaw nge a innghah reng reng a?” A lo ti a.

“Pu Muantuibura te inah mawle, an inchhung ve deuh a niang. Mahse, in a luah dawn an tiin ka hria, Pi Duhi saw hrawn a nuam vak lo vang..” a ti zui nawk nawk a. An khaw dawrkai lian Pu Muana te chhungkaw zia an hriat tawh avangin an sawi zui lem lo. Muanawma chuan, “A hmelṭha pawh ka ti vak lo. Mahse, a vun kha chu a nalh zet mai..” a lo ti ve nghut a.

“Rinmuan, bém rawh, ê..! A ṭha dawn lutuk, i single rei tawhzia hi..Ka tihpui ang che. “ Lawma chuan a ti leh lúng lúng a. Za lo zetin Muanawma a nui suk ringawt. Kima pawh chuan Lawma chu support zetin, “A ṭha, zanin aṭangin kan rim ang. “ A lo ti ve hlut bawk a.

“In ho e a..ka duh lo. A mikhual nula lawmthlak ém mai” Muanawma chuan a lo ti náng nâng a. An ngaihpawimawh hmel fahran loh. Lui an thleng thla a, nghakuai pawh chu an han siamfel sap sap a, tumbu khawrh pah an duh bawk nen, an muangchâng vak lo. Chawhnu thlangherah an duhtawk ta a, thei khat leh a chanve vel âwm zet chu an man awm e, Kima lênin nghapum tlem azawng an man bawk a, chu erawh chawfák huna hmeh atan an chhum a. Tumbu tlem azawng an khawrh leh hnuah hawn zai an rel ve ta a.

Champuii chu sawi tawh ang khan, Pu Muanzova, tuibur a heh êm vanga Muantuibura tia an kohte inah a innghat rih kha a ni a. Pu Muana te nen hian hla ve tawh takin an inchhungkhat ve a ni awm e. Champuii hi Lunglei Rahsiveng aṭanga rawn thawk a ni a, M.A (English) a zawh hnuah kum 3 zet zawt chu phaiah call centre-ah thawkin a thang bo vang vang a, Zirtirtu an la dawn tih hriain a rawn haw a, a dil ve ta râwih a, tihian a la kal ngai reng reng lohna khua Búngpuiah a thawk dawn ta chu a nia,. Bungpuiah hian High School thleng chiah a awm a, an result hi a ṭha tehchiam ngai lo a ni. Chuvangin Champuii leh Pu Biaka rawn thawk tur pawh hi beiseina sang tak nen an lo thlir ve kha a nia, zirtirtu an indaih ve deuh tawh ang a hma an sawn ve ém ang chu. Pu Ngura hmalakna zar te pawh a ni awm e, ani hian zirna a ngaisang bawk a, an khuaa zirtirtu dah a nih theih nan hian nasa takin theihtawp a chhuah nghe nghe a ni.

Champuii hi nula lian lem lo tak ni mah se; rin aiin a upa vei reuh a, kum 27 lai a ni tawh. Mi chuan an awih mang lo hial ang,. A nu hian kum 16 a nih laiin a boralsan tawh a, a pa hova khawsain an unau pali niin ani hi a naupangber dawttu a ni a. A nu thih aṭanga kum 3-naah a pa khawhar lungleng lutuk chu khawngaihin a û te leh a pa lama an chhungte bakah a nu chhungte pawn nupui an zawnsak ta tawp a, pasal sún tawh, a fanuin pasal a neih tawh avanga amah chauha khawsa Pi Hmuni nen sawiremsakin an innei ta a. Pathian zarah nupa induh leh inhmangaih tak ni chhoin Champuii te unau pawn sélna tur an hre miah lo. An nu dinhmun luah tak tak thei lo mah se; nu ang takin an en a, an inpawh hle a ni. Champuii pa Pu Renga hian Lunglei bazar vengah Hardware dawr lian tak a nei a, chu chu an eizawnna a ni deuh mai. Champuii te ûpa berin pasal nei tawhin, a ü chiah pawn nikum mai khan nupui a nei ve bawk. An naupangber erawh chuan phaiah designing a zir ve mêk thung. Bungpui khua chu a tum angin a hmu chiah lo, Thingtlâng chengver ve deuh tak, tui pawh váng riau tur leh ro deuh rip repa hmuh a tum rilru a, mahse, a rin leh beisei aiin a lo nuamin a boruak a zo viau mai. Tui phei chu an hnianghnar hle. A thlen in Pu Muana nen chuan an inkawm deuh ber a, nu ber Pi Duhi erawh sawi leh sawi hnu, a hmel en reng reng pawn ti rím rêm, meng zek zek chi, a awka erawh nem duai si ang kha a ni a, a nel tak tak thei lo. Pu Muana fate lah chu an zakzum nge an ngawng ve hrim hrim, han biak lumlâm vak an tum bawk si lo. An fapa tlangval senior ve tawh lam chuan a be ve zeuh zeuh a, mahse, tlema ṭham ṭhen kan tih ang chi kha a ni roh a, an fanu nula chu ani ai chuan a nau hlek maithei, dawrah a awm deuh chawt a, an la inbe tuitam hman lo te pawh a niang e.

Bungpuiah hian Kohhran pahnih chauh a awm a, Presbyterian leh UPC,. Champuii chu Baptist mi leh sa ni mah se; A thlenna te Kohhran PCI-ah a lawi ve mai a ngai dawn a ni. Pawi a ti hran lo. A zirna avangin mahni in lumah a awm tam lo a, MA a zawh hnuah lah phaiah hnathawkin a liam zui leh mai bawk nen, mahnia khawsa ṭhang, independent ve tak mai a ni a, nuam pawh a ti ber nghe nghe. Chuvang chuan in luah hran vat chu a duhdan a ni, mi han hrawn hi a thiam lutuk tlat lo. Pu Zuia bulah khan in ruak lo zawnsak turin a ngen tawh bawk a, a indang ve vat mai ang chu maw. Sawi tawh angin nula lian lo tak mah nise; a rilru erawh a lian riau a, an unauah pawh a luhlul ber a ni ṭhin. A nu fanu duat bík kha a ni ve ṭhin a, a boral phei kha chuan tuar tak a ni, nuhrawn an neih pawh khan ani hi chu a hel deuh a, mahse, an inhrawn tam lo ém mai a, an inhrawn awmchhunah a nuhrawn chu a sualna a hre lem lo bawk nen, a pa hlimna a nih chuan tia pawm zui ta kha a nia. A nunah hian SER lian tak leh sulhnu hriatreng tawh tur thil thleng a awm tawh a, chu chuan amah hi a ngainatawm tur ang pawn a ngainatawmtir hleithei ṭhin lo fó. Ni e, college kha PUC-ah kalin a college kal chhung zawngin bialpa nghet a nei a, an ṭhiante pawn an inneih loh reng an ring lo. An han graduate a, master degree zawh ve law law an duh avangin an zir leh kha a nia. Mahse, lo inkawp rei tawh na nâ na chu an lo insúm reng thei lo nge ni, 2nd semester an zir laiin Champuii chu a ruak lo ta tlat mai le! A bialpa Joela chuan awlsam takin, “Kan innei dawn nia..” a ti mai a. Chu chuan a thlamuan deuh. A rai thu a pa ten an hriat chuan an rilru na viau mah se; an inneih dawn chuan tiin an insúm a. Joela ten palai an tir ta mai si lo mangang chu a pate chuan sawihoin sâwn man chu an ṭhing ta a ni. Joela pa te chuan eng dang sawi lovin sâwn man chu îhe loin an lo pe ve mai bawk a ! Chu chuan Champuii bakah a chhungte rilru a tina hle..Joela pawh a chhuahchhal nasa a, chuta Joela chhanna chu a damchhunga a hriatreng tawh tur a ni maithei, “Nupui ka la nei ngam lo, bakah ka pa te hian an remti rih lo a ni. I rai tih hria an la tam lo bawk a, titla mai rawh..” tih thu chu. Kha chen a lo zuia a lo kawp khan a chan chhiat ber laiin a phatsan chu a ni ta. Chu chu an pahnih thawnthu tawpna a ni ta ringawt mai. Champuii mi rilru nghet leh lian ve tak chuan tlawm taka amah nei tura Joela ngen chu a tum reng reng lo,. Tin, a duhthlanna ngeia a pai a fa chu tihtlak a tum hauh lo bawk. “Ka paitlang ang, ka enkawl thei em em ang, mite pawh an rai ve fó a, ka ti ve thei em em ang.” Tiin a infuih ve a. A chhungte chuan a zirna bansana haw turin an chah ṭhin, a duh bik ṭhak lo. Thla 2 chhung chu nau pai chungin class a kal ve ta ngat ngat a, amah a lian lo mi tih takah tu khaw khain rinhlelh nachang an hre lo bawk a, a la inthup ve thei zel.

Mahse, chunglam remruat nge setana remruat zawk tih hriat loh a nau paiin thla 3 hmel a hmu ve ṭêp tihah chuan an hostel bathroom a panna lamah stepah a tawlh thlu palh ta hlauh mai le..a insawh na angreng viau lehnghal a, Damdawiinah ni 3 chhung a awm nghe nghe. A vanneih asiamin an upa ber Aizawla a awm lai a ni hlauh a, anin a awmpui thei ta a, a insawhna lamah a nau pai pawh a chhiat phah ta hial a ! Chu thu a hria chu a ṭap zawih zawih mai. Ei leh in bakah thildangah pawh nauté avangin a lo insüm ve ṭâng ṭâng kha a nia, engmahlo mai a ni ta si. A ù erawh chuan Joela te a huat luatah, “Pathian remruat a niang, tikhan nula i ni leh ang a, amah aia ṭha i la nei dawn alawm..” tiin a fuih thung. Kar khat zet chawlh a lak hnuah class pawh kal zawmin nunphung pangngai neih leh tumin theihtawp a chhuah chho ta a ni. Joela lah chuan, “I titla ta nge nge a ni maw?” Ti ten a rawn ti él ta ṭhin a, a block ta hmak mai.

Chu chu Champuii hringnun thawnthu-a a thim lai ber a ni awm e. A nun chhoh zel dan erawh a remchangah kan la thailang zel ang chu..

Chawlhni tuk a ni a, Muanawma pawh inkhawm nì a ni bawk nen, a tho hma ve mial a. Pa ber erawh Aizawlah a la cham thung. Tukṭhuan an kil laiin pi Siami chuan, “Kan zirtirtu tharte pawh kha chaw eia la sawm ve an ngai a ni, i pa lo haw phawt se” a ti mawlh mawlh a. Muanawma ta pek chuan, “A ho e a, ngatan kher..?” A lo ti hluk.

“Aw..i pa vcp a nia, thil mawihnai te pawh a ni ve alawm, an fel hmel bawk si,. In luah tur te kha an zawng takin ka hria, i patea te in hnuai kha a la ruak a ni lawm ni?” A ti duah a.

“Ruak leh tawh lo, Pi Fawni ten an luah” a ú chuan a lo ti var a. Pi Siami chuan, “Khai aw! Pi Fâwni te ber kher han luahtir chu aw..zu an zawrh vanga an khua aṭanga an hnawhchhuah kha an ni lawm ni? I patea te chuan an hre lo mawni le..” pi Siami chuan a ti hlut a.

“Zuar ang hmiang, a thuhrimin zu an zawrh vanga khua aṭanga hnawhchhuah kher kher..a overthlak, NGO lian ber nih vanga an thuneihna an hmang sual ṭhin hi chu a YMA zia lo ve e..” Thutak zetin Muanawma chuan a lo ti a, an ngawi zui ta daih. Muanawma hi a rilrua awm sawi chhuak phawng phawng mi a ni lem lo va, khunkhân taka a ngaihtuah hnua a sawi chhuahte erawh ngaihtuahzui ngai a tling ve viau zel a ni. In khawm tura a insiam mawlh mawlh laiin Lawma a rawn faifuk lut rût rût a, “Hmeichhe insiam ang mai, i rei thei lutuk..” a ti zui zat bawk. A chhang lem hlei lo va.

Biak in an thlen chuan an lo khat hmur tawh a, tlar hnung berah chuan an inhnawh ve chawt chawt a, sawi leh sawi hnu an khuaah kohhran pahnih chiah an awm bawk a, Presbyterian an tam zawk bawk nen, chawlh ni tukah hi chuan inkhawm an ṭha thei viau zel. Muanawma erawh zan lamah a meng rei deuh nen, a muthlu lâwp lâwp a, inkhawm bana thingpui an in lai chuan Miss thar Champuii leh Pu Muana te ṭhenawm nula Zari te chu an piah lawkah an ding dun a, Kima chuan, “Ti em ema han ngo theih mai chu le’h ! An thlahtute-ah sap an awm a niang” a ti sur sur a. Lawma pawh chuan, “Bawiha, miin an chet khalh hma chea kan chet a ngai a nia aw..” tiin Muanawma chu a nghawk pah zauh a.

“In ninawm, ka duhzawng a ni lo. “ A lo tihsan hmuk bawk si.

Kima chuan hawi zuk zuk pahin zawi sup hian, “Bâng tawh rawh, ṭap tawh suh..” a rawn ti a. Muanawma’n a melh rum ngang mai. Ni e, Kan Rinmuanawma pawh hian Champuii ang thoin nunhlui hriatreng tur a lo nei ve tawh reng alawm mawle..kum naupangtê mah nise; khawvela lo piang tam zawkte tawn ang Hmangaihna avanga natna ngei mai chu..mahse, he a natnaah hi chuan amah leh a ngaihzawng thiamloh engmah a awm lo thung, kha mihring, a suangtuahna luah fôtu leh hmalam pan tura nawrkal fô ṭhintu ngei bak kha chu thiam lohna nei an awm miah lo.

Kum 19 a nih kum hian a vawikhat nan ngaihzawng a nei a, An khaw middle school-a rawn thawk thar Pu Biakmawia fanu neihchhun, Senteii a ni. An rawn awm aṭanga thla 2na velah an inbe pawp ṭan a, College kal tura Aizawla a liam thlak hma chiah zanah an rilru ve ve puangchhuakin rinawm intiam dunin an inthlah liam a nih kha. A tu ve ve mah ngaihzawng la nei ngai lo tih takah an la na dun ngâng ngâng hle mai a, Muanawma chu a nu pa, a pute inah a khawsa a, an khawsak a harsa lo bawk a, a hrehawm hran lo, a tana khawharthlak leh buaina ni zawk chu a bialnu thar Seni nen an inhmu thei lo chu a ni mai awm e. Mahse, zing, chhun, zanah an inbe âwl lo va, an rinawm tlut mai a ni ber. Kum chanve chawlh hmanga a hawn zante chuan a vawikhat nan fianrial hun an nei ve ngei a, fawh pawh an infawp ngam lo ! Chutiang khawpa rilru thianghlim dun chu an ni. Seni chu a mitah chuan a aia hmelṭha leh duhawm an awm thei lo va, a nungchang zawi leh a mizia nu zêm maite chuan a hîp ngawih ngawih a ni ber e. Thingtlang na nâ na chu kar lovah an inngaizawng tih an hre ta fur a, mahse, dodalna an tawk hauh lo. Pu Biaka leh Pu Ngura te hi an rawn awm aṭanga inṭhianṭha zui ta em em an lo ni bawk nen, an fate pahnih han inkawp pawh chu an lawm zawk mah emaw tih mai tur hi a ni a. Seni chu a hriselna lam avangin zirna a chhunzawm tawh lo va, Muanawma’n hna a hmuh veleh innei turin thu an thlung ru ve ran kha a nia. Hun a lo kal a, kum tawp chawlh pawh hlim leh thianghlim takin an hmang ho a, mipat hmeichhiatna hman dun rih loh chu an thuvawn a ni bur mai,. In fawh erawh zawng an uar dun ve tân tân thei viau.

A tawi zawngin sawi ta ila, a kum leha Muanawma zirna chhunzawm tura a kal leh hnu thla 5-naah chuan, an tan vanpui a chim ta ti ila, a aia lungchhiatthlaka sawi dan tur a vàng viau awm e. Seni leh a ṭhiannu Lateii te Champhai han zin chuan vanduaina a keng tel ta tlat mai. Lateii u pasal nei tur an thlah kha a ni a, Ni 3 vel cham tura kal an ni. A ni 2-na inneih zanah chuan Lateii ṭhian, Champhai lam ami te bakah khaw dang aṭanga lo kal mikhualte nen chuan Champhai chu an fang kual ve a, nuam pawh an ti ve hle, Champhai khaw daia hmun pakhat, reh leh fianrial ve deuh tak, nuam tak si-ah chuan zaite play-in party tenau an huaihawt ve a. Hmeichhe dang pawh an awm ve nual,. Beer bakah zu pangngai te pawh an leklam fû a niawm e. Seni erawh chutiang ri hut hut chu nuam a tih ve tehchiam loh avangin a kal hrang deuh a, heta a kal hran hian Muanawma nen an inbe nghe nghe, Muanawma paw’n, “Haw hma rawt la, Lateii pawh ka lo be dawn nia, mipa bulah awm miah suh aw..” tiin a chah ve thlap. Mahse, Lateii chu a bialpa nen an lo kal hrang ve daih a lo nia, chutia inthlahrung leh zâm ru angreng taka a awm hran lai chuan a la hmuh leh hriat ngai loh mipa lian lam, lu buk angreng tak hian a rawn fiam kual a, intihnelawm a tum hle chungin Seni chuan a lo be ṭha duh vak lo. “Kha engmah i in ve si lo, i chhawl a hal ang..” tia coke a pek pawh chu a lo hnar fithla ṭhak a ni. An piah lawkah lah an thawm a ring em em a, an sahâwk a ni ber e. “Lateii ka va ko ang e..” tia kal a tum chu pen khat a pen hman âwrh ang tihin chupa chuan a hmuiah romol rawn hmehbelin a ka a rawn hup ta châwih mai le..! A hiar hum hum chu a hre hman ṭâwk,. A khawhmuh a fiah lo tial tial a, a zawi telh telh bawk. A hnuah phei chuan a zal ta hnawk a, engmah a hre ta lo. A harh leh meuh chuan a hmaa a awmna piah hleka car chhungah a lo mu reng mai. A han inbeng kang a, a rak ṭhawt..saruak ngalngatin a lo awm a nih chu mawle ! Hlauhlawp leh thlabar takin a kap chu a khawih a, a ner sak sak mai, a nat bakah a kuta thisen tlem lo kai a hmuh rual chuan a chhungril na leh kehchhia chuan nikhua a hriattir thei ta lo a, a tlu leh ta hnawk mai.

“Sen, hei, lalsen, harh teh, i harh em?” Tia kotu a ṭhiannu Lateii aw chu a hre ruai ruai a, a meng diar diar a, thawmhnaw chu a lo inbel tawh. A hma lawka thil thleng kha a mumang emaw a ti hman hial a ! Mahse, a thawh kan zawnga a kap rawn na zawk zawk chuan thil thleng tak tak a nihzia a rawn pholang ta si! A muttui chu a dir zung zung a, Lateii chuan a ngaihna hre lo zet hian, “Sen, ti nge i ṭah a? Ka zawng nasa che lawm, ti nge? Zu te i lo in ve reng reng..haw tawh ang u. A tlai tawh lutuk” a ti zung zung a. Engtinmah a chhang lo. Tuin nge a thawmhnaw te kha haktir ta ang le? Lateii te bulah chuan engmah a sawi ngam si lo. Lateii bialpa motorah an insawn a, anmahni tawk zawnga rawn inpal phei nawk nawk a hmuh chuan a îp châwih mai. Kha pa ngei kha a ni. Thawh lawka va zuan thluk tawp a duh laiin, Lateii bialpa chuan, “Kha, Sawma, i haw ve tawh dawn mi?” A lo ti vut a. Sawma tia a koh chuan Seni rawn melh zawkin a nui sûng bawk a, rapthlak a ti takzet. “Haw ve tawh ang e, naktukah hawn thlak ka ngai sia. Zanin chu a nuam ngei mai, damlai par kan tlan hem hem mai mawle..” a ti lung lung a, Seni chu a insehruh nasa kher mai. Lateii ten an hrethiam ang tih hlauin a insûm hram hram a, nakinah a chanchin zawh ngei a tum, Tin, police hnena report a tum chiang bal bawk.

Tichuan, a tuk lamah Lateii te chu a zawt chiang ta a, Sawmtluanga niin, Ramhlun south, Aizawl-ah an awm a niawm e. Lateii bialpa Vena cousin a nih bakah a lo zin lai tak a nih avangin inneih lawmnaah pawh khan a tel ve nghal niawm tak a ni. Chutitaka Seni’n a ngaihven ta chu Lateii te chuan mak an ti deuh a, “Nizan khan kan titi ve nasa a, hming pawh kan inhrilh si lo a..” tiin a phat mawi a, thil thleng an hriat miau loh avangin sawi chhuah vek kher chu ṭul a ti rih lo a ni. Tlai lama an khaw lama haw tur an nih avangin tukṭhuan eikham veleh Police station hnai bera report ziak lut tura kal a rilruk a, mahse, a inthlak lai takin call a dawng a, number lawng ringawt a ni. A han pickup nâk chuan kha mihurpa lek kha lo niin..”Video ka rawn thawn ang che, police koh i tum a nih vaih chuan, zoram khawvelin video hi an thlir ang” tiin a rawn vau ta chher chher mai. Video chu a rawn thawn ngei a, motor chhunga an chetla lai ngei mai chu,. A thawmhnaw a phelhsak lai te chuan engmah a hre lo, a zawi vek a, a landan chuan ruih lutuk vanga che thei lo hi a ang ber mai. Chu video chu miin an en pawn rui angah ngaiin pawngsual a ni tih an hrethiam kher lo maithei a ni. Khumah a ṭhu hnawk a, ṭah pawh a ṭap thei lo, a lungphu te chu tâwp mai dawnin a hria a, au vak vak a châk, a rem si lo. Tihtur ber pawh a hrethiam ta lo. Zoram mipuiten a thil tawn an hmuh ai chuan tiin ngawihbopui a tum ta a. Sawma erawh be lehin video chu delete turin a ngen a, Seni hi kum 19 chauh a la ni a, huaisenna a la neih loh bakah mi derthawng leh thlaphang hma em em a ni si, A bialpa Muanawma a han ngaihtuah a, a mangang takzet a ni. “Kan inneih hma loh chuan mu dun lovang aw” tia kut inelhsak meuha an thutiamte chuan a ṭahtir ta zawih zawih a. Mang ruaiin tlai lamah an khua chu a thleng thla ve leh ta a.

Kha hun aṭang khan Seni mizia chu nasa taka danglamin, A chhungte ngei pawn mak an ti ṭan ta. A inkiltawihin a inla hrang tlat a, hlauthawng reng rengin hun a hmang a ni ber mai,. Ṭhenrual a kawm ta mang lo va, Muanawma ngei pawh a be tlem ta telh telh a, a tawpah phei chuan inṭhen a rawt ta hial mai. Muanawma lah inla pa chi tak a lo nih bakah Seni chuan bialpa dang a nei nia ngaiin a lo pawm ve hmak bawk a ! Mahse, an inhriatpui tawn si lohin natna kha an va tuar nasa dun si êm..Seni pa Pu Biaka mangang tawpkhawk chuan a fanu neihchhun chu engkim hrilh turin a ngen ta tawp mai. Hringtupa ngei mai bulah chuan inpuan a lo harsa em em lo te pawh a niang e, Seni chuan engkim chu a sawi ta vek a, an chhungkaw boruak sosanzia chu aw..Pu Biaka chu rang taka Aizawl kalin a fanu pawngsualtu chunga hremna lek a nih ngei theih nan hma a la ta a. Sawmtluanga, Police ten an lak zan la la chuan kha video tenawm zet khan Zoram khawvel a suartluan nghal nia mawle! He thil tenawm phênah hian tu emaw chu a la awm chêu niin a ngaih theih ta hial mai. Ngaihtuahna tlem deuhte chuan chu video an hmuh rual chuan, rin ang ngeiin, “Hetiang hmeichhe zu rui te chuan a phutawk a hmu alawm..ti nge mipa bulah a ruih..” tih angreng, “Call girl ṭâwng tak a nih hi” tihte chu an comment duh dan a ni ta pang mai. Muanawma pawn a lo hmu ve ta ngei mai. Mahse, mak tak maiin ani zawng hmangaihtu leh hmangaih a lo nihna khan rilru fîm zawk puttirin an inṭhen chhan chu hei ngei hi a ni tih a hrethiam ta chat mai a, a ranga rangin an khaw lamah a haw ta nghal. Video a viral aṭanga ni 2-hnua haw a ni a, a lo hmuh ve lawk loh vang a ni. Mahse, an khuaah chuan eng thilin nge lo hmuak ta..a hmangaih, nupuia neih a duh ngawih ngawih Lalrinawmi (Senteii) chuan Zoram mipui tam zawkte rêlthang chu phur zo loin leh a hmangaih Muanawma tana tling zoa a inhriat tawh loh vangin ama nunna ngei chu a lo chhat ta si. An khaw thlen nan 3 kms vel chiah a awm tawh ang tihin Driver chuan call a dawng a, a nupui niin, Seni inawhhlum thu chu a rawn sawi ta a nih kha..Passenger dangte chuan Muanawma an melh hrek hrek a, ani erawh a kun char char thung, ṭah hawm hawm a châk a, a mipatnain a thunun hram a ni ber e. Zawhna tam tak a inzawt a, a chhang thei si lo. A khawvel chu a tawpin a zo taah a ngai nghet hmiah mai.

Seni lehkha hnutchhiah pawh tun thlengin a la kawl a, lumen zanah chuan awmngaihna a hre thlawt lo va, Kima leh Lawma te mangang chuan zu inpuiin a chahthlak thleng rawkin an tulh tawp mai a ni. Mu leh mal nei loin kar hnih tal tawp chu hun a hmang a ni ber e. Tuman an hnem zo lo a, hnem pawh a duh hek lo. Thih ve mai duha thutlukna a siam vel mek laiin thu thar duhawm lo zet a la hre zui..kha misual, mi tenawm Sawmtluanga kha finfiahna a awm lo tiin thiam loh an chantir ta lo. Chu thil zet chuan natna leh beidawnna kha huatna leh phuba lak duhnain a rawn luahlan a, damchhan la nei ve angah inngaiin thihna chu ṭhianah a thlang rih ta lo, a tihtur a hlen hunah a hmangaih Seni kianga awm turin he khawvel hi a chhuahsan ve tawh ang chu.

Seni thih aṭanga kum 1 leh a chanve dawn chu mi â ang maia khawsain, suahsualna kawng pawh a zawh ve nasa hman e. Hmeichhia erawh a kawp ngai hauh lo thung, Seni aiawh tur hmeichhia a mamawh lo va, tuman a ai an awh a phal hek lo. Insual a hrat a, zu pawh a in nasa, damdawi erawh a ti rei hman lo hlauh thung. Hmabak neia a inhriatna chuan a thunun ve tlat a, lehlam zawng tak chuan a ṭha angreng ti tawh mai ang. Tichuan, College a zawh hnuin tihian IGNOU-ah MA a zir zawm leh ta a ni. Master degree a neih veleh eizawnna kawng dap vein a rilru mawlhtu leh helhkam lian ber, PHUBA lakna kawng chu zawh a tum nghet bur mai a ni.

Zari bulah Champuii chuan, “In luah tur chu i lo melh ve deuh em? Kei chu insawn vat ka duh e..” a ti sar sar a.

Zari chuan, “Ni Dari kha ka bia a, an in hnuai kha i tan chuan a tawk tiu teu dawn lutuk a, mahse, hnawmhnawk vel an la dah sia, tihfel nan ni 3 vel an la duh ang.” A lo ti a. Chutihlai tak chuan Muanawma te chuan an rawn kal pel a, “Rinmuan, Hei, hnapa, i patea te in kha a ruak tawh lo mi?” Zari chuan a lo ti lâng lâng a.

“Aw..” a lo ti teh tawp. Zari chuan a dar a san âk a, Muanawma zia hre tawh a nia, a chhanna chhumbung zet chu makti awm pawn a lang lo. Champuii erawh chuan mak a ti deuh. Muanawma chu amah aiin a naupang tih a hre nghal, tin, a mipa ngainat loh zawng tak a ni bawk tih nen.

Zan lamah chuan, Lawma leh Kima an rawn lang hma leh hle, Pi Siami’n, “Inkhawm in tum na nge a?” A lo tih chuan, “Kan ṭhutna in chung zawn a pawp a..” Lawma chuan a lo ti duh lek a ! A nui pût pût bawk. Pi Siami pawh chuan, “Lallawmawma te ho lah hi a..inkhawm in thlahthlam lutuk. “ A lo ti hlak hlak a. Muanawma pindanah an la lut daih zui..

Tukverhah a lo dak vung vung a, a laptop chu a lo in on vû bawk, a wallpaperah chuan Seni nen an selfie-na, leileta an kal ṭuma an lak dun ngei mai kha a lo lang kulh mai a, Kima chuan a khup thawk,. “Insiam rawh, leng ang.” Tiin a darah a va hmer a.

Mit sen râm chunga rawn hawiletin, “Ka peih lo.” A lo ti hmuk. (To be cont..)

Note : A hma anga zantin dah tur ang kha chuan ka la fit lo deuh a, mahse, regular hram chu ka tum ang. Ka lawm e.