Hmangaihsangzuala 3

HMANGAIHSANGZUALA (3)

Ziaktu : Toni Râlte

“A teuh lo” ka lo ti hlar a, thinrimna hlir hian ka khat a ni ber e. 

“A ṭul tlat, kawng dang kan nei lo.” A ti chhum hmuk a. He pa bul, ramhnuaiah lehnghal hian ka khawsa ang maw? “Phone kha min pe la, Boss ka bia ang a,min rawn hruai thei ang, nang chu i duh leh i biru mai dawn nia, engmah ka sawi lovang.” Ka ti leh hlak hlak a, khua a vawt lo naa kan thil tawn vang teh hrep chuan ka chhungril a khur der der mai. Ka phone a ah lai chu a phawrh a, “Battery a low a nih hi” tiin a lek vut vut a, ka lo laksak thuai a, awii! A lo law tak tak. Nizan ka chhuah dawn khan 42% chiah kha a ni reng a, vawiinah te khan engtin nge maw a la low loh zawk ni. Tih ber tur hre loin ka hawi ka hawi ringawt a, ka ṭah a chhuak bawk. 

“Kawng chin min hrilh la, keimahin ka haw mai ang.” Ka han ti ngawt a, ka ngam tak tak pawh ka ring chuang lo. “Kha mite khan lo hmu ta che se la..” a ti a. Ni e, khang mi râwva ho khan min nangching a nih teh chuan ka nasa lo ngawt ang le. “Engkim hi nangmah vang a ni. Min rukbo kher kha a ngai lo asin. Engkim i tichhe ta vek a nih hi” tiin ka ṭhu hnawk a, ka ṭap ta hliam hliam mai. Ka lo in up rei tawh bawk nen, hmeichhe rilru no lo chhuak bawk si nen chuan chhuak em em hian ka ṭap ta ruah ruah a, min rawn hnaih vat, a hmui bula a kutzungchal dahin, “Ṭap zawi deuh rawh, kan thawm an hriat chuan an rawn kir leh dawn a nia” a ti sup sup a. “Nangmah vang vek a nih hi..hei tunah pawh i thiapa thih chhan pawh hi nangmah vang” ṭap chung chuan ka lo ti zuah zuah a, a ding thut, chutah ngun êm êma a beng a chhit avang chuan ka ṭap pawh chu ka bâng ve nghal a, min rawn kai tho vat a, “Kal ang” tih leh an bûk aṭanga min chhuahpui a rual a, a hmaa kan kal lohna lam kawngah kal lehin thla êng bak rin tur dang nei ta lo chu ka tlu khet khet reng a, kekawrbul mai haa ka awm tawh avangin ka malte bawr vel chu a thip sep sep tawh. Tui luang ri ker ker ka hre ta, ka tuihalzia ka hrechhuak chiah. Lui kawr lian vak lo hi kan pawh a. Tui chu kan in ta khawlh khawlh a, chu chuan min tiharh ta deuh. Bûk pawh kan hlat ta hlein ka hria, thawm dang pawh kan hre tawh lo. Lui kawr chu zawh dun lehin reivak loah lung pher hlai fahran mai hi a lo inkham ruah mai a. “Hetah hian khua kan nghak tlaivar ang, tichuan, khaw ên hunah ruahmanna kan siam dawn nia” a ti ta a, chawlh hahdam ka châk tawh bawk a, ka hnial lo hle. 

Chu lung pher hlai takah chuan ka mu kawm chel a, a vawt vak lo chu lawmawm tak a ni. Ka puan tal kha lo keng ila tha tur, a thianpa khuh nan a hmang daih si. Van lamah arsi an pe tuarh a, ka thlir reng a, ani pawh ka sirah a zangthal zawng thoin a mu ve a, a muhil lo tih ka hria. “Pawi i khawih lo tak tak em ni!” Zawitê hian ka ti a. Mut a chhuak lo va, ngawih reng chu ka ning a ni. 

“Aw” a ti teh tawp a. 

“I nu nen kan inkawm asin..” ka tih chuan, “Ka hria alawm” a ti duh lek a! “I hria maw? Engtin?” Amah va melh pah chuan ka ti hliai a. 

“Mike khan a sawi a” a ti a. “Ani kha tu nge? Ka sawi awmzia chu i thian em ni?” Ka ti leh zat a, ka dilchhut viau chu a lawm vak lo nge a rum nghut a. “Zawhna i va ngah tak, aw ka thian a nih kha” a ti hluk a. Ner khum sâwngin, “Min ru bo a, ka zawhna chu i chhang ve mai tur a ni, a nih loh chuan..” ka tih mek laiin a rawn saisir thut a, “A nih loh chuan eng nge?” A ti thum dût a, ka zâm leh ta deuh si, “Engmah” ka ti ta ringawt a. “Ka tel lo chuan, i in i thleng thei dawn lo, chuvang chuan kawhmawh bawl tum suh” a ti thum bul bul a. Thim zingah ka ner vak ringawt. Mak deuh chu a tan chhan ka hre ve reng nachungin ka hlau hran lo reng reng, amah hian min tihnat tum âwmin a awm lo bawk nen, raltlan ho lakah ka thlamuanpui ru riau bawk si,. 

“Mahse, min ru bo kher lo hian, khawi lai hmun fianrialah emaw in thuchah duh kha min sawitir thei tho si a.” Ka ti leh hram a, ramhnuaia min hruai kher kher hian mi run êm a ni. 

“Tihtheih kan nei ve tih kan entir a ngai alawm. Tunah pawh hian nangmah vangin an buai ru viau tawh ang a, a kawtâwpa kan ṭan tawhzia hrethiamin reilotê chhung pawh zalenna boruak min hiptir ve thei..” a ti duah a, a sawi awmzia chu ka ngaihtuah zui nghal rauh rauh mai. A sawi dikna chen a awm ve tho, khawpuiah chuan hmun fianrial a awm that loh bakah kei khan tanpuitu ka au lovang tih hriat lawk a ni bik lo va, tuman ka aurâwl an hriat phak lohna hmun atanga an thuchah min sawitir leh anmahni ngeiin an ngenna an sawi chhuah theih kha an tan chuan a pawimawh ve bawk lah tak a ni. 

“Ka hnek che avang khan ka tihpalh, kawng dang ka nei lo a” a ti leh sup a, ka bek ka tuai vat, a lo na tawh mang lo. Han hmeh deuh erawh chuan nâ chu a la chambâng tho a. “Ti nge i ukil hnenah khan khatiang thutlukna atthlak kha i siam?” Ka lo ti leh daih a, ka interview hi a ni ringawt mai, ka chin dan ṭhan a nih tawh miau avangin sim a harsa ve êm a ni. A rum nghut a, “Ka thluak khan hna thawk thei hek lo, ka nu leh ka nau ka ngaihtuah a, ka sumdawnna ka ngaihtuah a ngai bawk. Kha tân inah khan rei tak awm thei ka ni tlat lo alawm..” a ti nghut a. 

“Chuan, an sawi ang kha lo ni ta tak tak se, nangmah puh chhetu hmeichhia chu neih mai pawh i hnial lo tihna em ni?” Ka ti leh ta zel a, nghal chu min ti ve ngawt ang ka ring. Ka hre chak tlat si a ni. 

“Aw ka nei mai ang chu. Mahse, a thleng lo va, hei tun dinhmun hi kan thleng ta chu a nia..” a ti sup a, thil eng emaw ngaihtuah nei niawm takin van lam chu a thlir leh voh voh mai. Lehlam zawng tak chuan ka khawngaih angreng, Tlan chhuak ringawt mah se; a nun a zalen chuang lo va, a nu leh a nau a hmu thei chuang bawk si lo. 

“Nih Mike i tih i thianpa nen khan engtin nge in inbiak pawh?” Ka ti leh hram chu a ning ngang tawh a niang, “Nangtê hi thil zawng zawng hriat tum suh, a ṭul a nih chuan ka hrilh mai ang che. Muthilh tum rawh. Naktukah kan kal hla dawn a nia” a ti hmuk a, ka dîkdâk ngam ta lo. Ka chhing ta vang vang a, ka hriat loh karin ka lo muhil ve mai bawk a. 

Sava chiar nak nak thawm ka hriat rual chuan ka meng kâwk a, a tirah chuan ka roomah, ka khumah ngei ka mu emaw ka ti hman, mahse, van dum pawl thiang kâk mai ka han hmuh takah chuan ka dinhmun ka hrechhuak zawm nghal. Ka bul ami chu ka en vat a, min hnungchhawn zawnga muin a la muhil tui hle. Tihharh hlau takin ka tho ṭhem ṭhem a, kan mutna bul lawka tui lo luang chu ka zu in khawlh khawlh a, khua an en takah chuan kan awmna pawh chu a fiah ta kuar mai, lui kawr lian vak lo, a tawn tawna hrui hlîng leh thing lian vak lo din sungna hmunah kan lo awm a lo ni. Khawi lai hmun tak ni ang maw? Aizawl district a la ni pha ang em le? Ka bangbo khawp mai. Ani pawh chu a rawn zi ve ṭual ṭual a,. A jail tan kawr a ha tawh lo va, Mike khan engtin tin emaw thawmhnaw a laksak a nih ka ring. Kamiz a dum leh a vara ṭial ban tlawn a ha a, a hnuaiah tshirt dum plain, jogger pants dum, a body mil zet hi a ha bawk a, sneakers dum a bun bawk. Ka lo en reng vang nge ni, “Eng nge dik lo a awm em ni?” Tiin amah leh amah chu a inen a, “Aih” ka lo ti vat. Tui chu in vein a hmai te chu a han tuai ve nawk nawk a,.”i ril a ṭâm em?” A tih chuan ka bu nghat. 

A ruckshack chu a han hawng a, theitui tlem leh biscuit bawk kha a rawn phawrh leh, a lo inralring ve ṭat a nih dawn hi. Kan ei dun ta a, ṭâm chu a hnem ve thei mai e,. “Tihian, min hruai haw thei tawh ang tiraw?” Ka ti a. 

“Ka hre lo, kan tum ang chu..” a ti ringawt. 

Kan ngawih vang vang hnuah, “Ka ṭhiante kha zalen hlauh se aw” a rawn ti chhuak hawk a, ni e, Duhawma te ho kha raltlan kutah an awm tlat a, chu chuan a rilru a kap tih ka hria. “Tihian kawr hi zawh thla zel ila, lui lian zawk a fin ngei ang a, ta ṭang chuan i haw leh theihna tur kawng chu a rawn awm mai ang.” A tih chu ka ringhlel ngei mai, ani hian ramhnuai chinchang engmah a hriat ka ring lo. Mahse, tun dinhmunah chuan mahnia che tla chi ka ni tlat si lo. A sawi ang chuan kawr chu kan zawh thla ta ngat ngat a, a chhengchhe si, tiang min sahsak ta hlauh a, tlem chuan a zia ta deuh. Mahse, lung khawkrawk zet hmun kan kal laiin ka flat hnuai a lo mâm ve tawh nen, lung danga ka va pakai tur chu ka tawlh ta a, ka khup tak hi ka va sawh a, ka rak ṭhawt. A na lutuk, ka ṭhen tlawk tlawk mai. “Khaw maw” tiin ka khup chu a rawn tuai a, a lo pilh hrut chu niin , eng hnah nge pawh ka hre lo a nuai sawm a, a bel ta a, a thîpzia chu aw..ka mittui a parawl kiang alawm le. “Fimkhur la” a tihte chu ka thinur hlur mai. Ka kal bai ta uih uih a, kal châk a har khawp mai. Chawhnu lamah phei chuan ka ṭâmchhawl titih ta a, ka ṭhu hnawk a, “Ka thei tawh lo” ka ti thâm ṭiak a, ka thaw hlawi hlawi bawk. Mau theiin tui a va dawh a, min intir a, chaw a ni ka mamawh chaw..

“Lo awm lawk rawh, eitur eng emaw ka’n vâi ang e” tiin kawr kam lehlamah chuan a perkai ta daih a, auh pawh ka au zui peih lo. Ka nun hman dan teh hrep chu aw, ka duhdan a va ni lo tak. He mihringpa vang vek hi alawm, a hma a sial luatah kei leh ka chhungte thlengin kan tawrh phah ta chu a nih hi, kan awm zel dan tur lah ka hrethiam tawh hek lo. Boss khan police chu a hrilh ang a, mahse, kei ka haw si loh chuan engtin nge hma a lak chuan bik ang? Kei kha haw thei ta ni ila an aiawhin ka ding thei ang a, Ekhai! Ka hrethiam ta. Ka chau lutuk aṭang chuan ka harh kâwk kâwk ni maiin ka hria, ka lo va mawl tak. Engtin nge hei chen reporter ka lo la nih theih zawk chu le..heng ho hian awlsam taka min hawntir an tum reng reng lo niin ka hre ta tlat, ni e, awmzia a awm miah lo. Haw ta ringawt ila eng nge ka tihtheih chuan ang? Sangzuala tum dan chuan min rukboa a theih chen chen min kawla sawrkar kar nana min hman hi a tum a ni. Sawrkarin a case en nawn an remtih hunah chauh min kaltir a tum ngei ang. 

“Mi mâwlnu, i va han nikhua lo tak” tia keimah leh keimah ka inhauh rilruk mawlh mawlh lai chuan, “I zia deuh em?” A rawn ti dût a. Ka phu zawk mai. Ka tûm bâr a, “Zia lo” ka ti hmak. 

Theirah eng eng emaw hi a rawn keng a, an tui hmel phian, theipui pawh a tel ve a, a tam lo thung. “A la hmin tlem lutuk a” tiin amah chuan a va sil nawk nawk a, a thei lawh ho chu kan ei ta a, ka ngaihtuahna kha ka sawichhuak duh ang em aw tiin ka inngaihtuah rauh rauh mai. Mahse, sawi pawh ni ila engmah a sawngsawhlawtna a awm tawh chuang lo. He pa lak aṭang hian engtin emaw a hla thei ang bera ka tal chhuah a ngai, remchâng ka melh rân tawh ang. 

Tlem chuan kan zia ta deuh bawk a, kan kal leh ta a, bai auh auh chung chuan, “Min hruai hawn hi i tum tak tak lo tiraw?” Ka ti ta nge nge a. A ding chawt a, mahse, a kal leh vut , min chhang duh lo reng reng. Tui luang ri chu a ring telh telh ni hian ka hria a, lui lian zawk kan hnaih a nih ka ring. Ka beisei ang ngeiin rei kan kal hmain lui pangngai kan pawh ta hlawl mai le..ka lawm lutuk chu ka nâ pawh ka hrechang tawh lo, lui leh kawr infinna lai chu ka va dai pûrh pûrh a, “Hei hi eng lui nge?” Ka han ti ngawt a. 

“Ka hre lo” tih chhanna ka dawng, ka ring renga, a hriat bik kha a rinawm loh. “A nih kan awmna hi Aizawl district a la ni em?” Ka ti leh hram a. 

“Ni lo” a ti leh hmuk. Ṭawng sei hi a va hlau tak e aw. Kan han insil thlan dai a, ka kekawr bul tung chu hrehawm ka ti tih a hrethiam ve a niang, a bag chu a zen ruk ruk a, pyjama sei angreng tak hi a rawn phawrh a, “Kha ha rawh” a ti a, duhthlang thei dinhmunah ka ding lo bawk nen, ka lo ha sawk sawk a, a chuang hnem kher mai. Ka thlep ta a, a zia ta deuh e. Flat nen luia kal hi in la hriat ka ring chiah lo, kei chu ka kal tlat, ka flat hi a naupang vak tawh lo lehnghal a, min peih lohsan ṭêp tawhin ka ring. Chawhnu dar 3 a pel hlek a, ril erawh a la ṭâm lutuk lo. A hawi vual vual hnuah, “Lui mawng lam hi kan zawh leh ang” a ti a. “Chuan, engtin?” Ka lo ti vat a. Min melh vak ringawt. A hmel hi chu a ṭha lo pawh a ni lo, a nelawm loh lulai êm a ni. Daisy pawh khan engtin nge maw a lo star em em theih ni? A nu thusawi kha a dik a nih chuan. Kha thil kha sawipui ka châk ru viau a, mahse, ka hreh tawh, chhanna ka dawng chhumbung thei si. Darkar chanve pawh kan la kal lovang tihin ṭawng ri kan hre ta, rang takin min rawn kai a, lui kam pik hmunah chuan min luhpui a, hrui hnawk zet zet hnuaiah kan tawm rân a, “I hmui hup kher a ngai lo turah ka ngai a nia” a ti sup a. Ṭawng ri chu a lo hnai zel a, ka rin loh deuhin mipa pahnih sipai uniform hlui tawh lam inbel hi an ni a, silai an pu bawk. “Sakhi chek ai chuan saza chek a ni ka ei châk ni” pakhat chuan a ti bul bul a, ramsa pel tur em mawni le..an hmel lah chu a fai ang vawr lehnghal a. Sangzuala pawh chuan a en ngun kher mai. Min pel ṭêp tihin Sangzuala zawk chuan a aw thian kharhin, “Ṭhiante u..” tiin a ding chhuak ta mai a. Ka lo hamhaih vek. Anni pawh an silai chêng an kau nghal rap a, kan lam an rawn hawi nghal bawk. Sangzuala chuan a bân pharin, “Hmelma kan ni lo, kawng kan bo a ni. Min pui thei ang em?” A ti ta a. An pahnih chuan an melh dun ngawt ngawt a, a thusawi chu awih tur nge awih loh tur tih an hrethiam lo niin a lang. Sangzuala bawk chuan, “Ka hria che u alawm, Zoram Chhantu Pawl in ni tih hi” a ti leh a. Kei ka lo meng bial pawp pawp, ZCP maw? Eheu! Hetiang anga hnaiah hian ZPC mi leh sa ka hmu chu a ni si a, camera ka nei der si lo, Boss chuan hria se a va ui dawn tak êm.  Heng mite kawm châk leh veh reng renga hun kan hman lai te kha a rawn lang uarh uarh mai. Chutah pakhat chu harh chhuak zawk niawm tak hian, “A ni maw? Tu te nge in nih le? Engtia kawng bo nge in nih?” A ti ta a, silai erawh an la la thla chuang lo. 

“Thawnthu sei tak a ni” Sangzuala chuan a ti sup a. 

“In tlan dun em ni?” Pakhat zawk chuan nui chung hian a ti a , “Aw chutiang deuh chu” Sangzuala’n a tih chuan ka va melh vak a, min melh ve duh der lo. 

“In awmna hmunah min hruai theih chuan ka lawm viau ang, ka thiante pathum raltlân hoin tunah hian an kawl mek a, hmanrua engmah ka neih loh vangin chhan ngaihna ka hre lo a ni. In hriat tur chu keini hi tâng tlanchhuak kan ni, ka sawi awmzia chu he nula hi chu a ni lo, keimah hi..” a ti nawk nawk a, a duhnaah chuan a lo ṭawng thui thei khawp mai. Kei chuan sawi ve tur reng reng ka hre lo. An ṭhiandun chuan an inmelh ralh a, hlauthawng ru deuhin ka lo melh ve ngar mai. An silai chu dah thla ta nge ngein, “Sa châng tura kal kan nia , mahse, kan bûk a hla lem lo bawk a, kan hruai phawt ang che u. Tiru” tiin hma an hruai zui ta nghal a. Tunah chuan muan khatin ka muang ta deuh phawt, ZCP te kutah ka awm tawh dawn a, sawrkar lakah him dawn lo mah ila, Raltlân ho chuan min hnaih ngam ka ring ta lo. 

A hla lo kha an ti naa ka tan chuan a hla tho mai. Dar 4 leh a chanve a ri lek lek tihin lui aṭang chuan kawng chhakah kan peng a, thui vak lo kan zawh hnuin thlâm tiat vel tur pathum hi a a lo ding ta ṭhap a. Hetah hian maw Zoram Chhantu Pâwl ho chu an lo khawsaka heta ṭang hian a ni maw Zorama mi hnawksakho te an lo phil ṭhin..an hotupa ber kha tu nge khah? Aw..Ephraime Zothanpuia a niin ka hria,. Mahse, ani chu hetah a awm ka ring chiah lo. Bûk kan thlen chuan bûk lo nghaktu te thawm pawh a dai ta duk a. Min melh hruk hruk mai. Chutah min hruaitute chuan kan chanchin leh dinhmun vel chu an han sawi a, an tana kan hlauhawm loh thu leh an puihna ngena anmahni kan zawn thu an belh hlak, kha kha chu Sangzuala khan a sawi tel hran miah lo, Kilkhata râwlthar tihtheih mai tur chuan, “Râltlan ho leh bawk maw..kal ila ni mai lawm..” a lo ti nang nang a. 

Kan han ṭhu fel a, tui in tur te min rawn laksak a. An hotu ve deuh te ka ti mai, chu mite chu an rawn kal a, “Kei hi Mapuia ka nia, helaia incharge latu, kan hotupa erawh Aizawlah a awm a. In chanchin kan hriat tur ṭul han sawi teh u le” a ti a. A ṭawngkam chu ngaihthlak a nuamin a nem hle. Ka rilruin Drose-i unaupa kha a ni ngei ang maw ka lo ti a. Ka chiang tawh hlawm lo. Hman deuha an rawn lar vak khan anni hming hi a rawn lar zual deuh a, Chuan, Tluanga, Hmeichhe vanduai tak Zochhingpuii pasal kha a bul ami chu a ni ngei bawkin ka ring. 

“Hmangaihsangzuala ka ni a, ka thiam loh leh tihsual ni miah lo vah eng thil emaw avangin hrem ka ni a, ka thian palite nen jail aṭangin kan rawn tlan chhuak a, Sumsuih ram chhungah kan inkulh a, hei nula hi tunlaia reporter lar berte zing ami Dinkimi a ni a, amah hmanga sawrkar leh Police nawr kan duh avangin kan ru a, dah let leh tuma ka hawnpui laiin raltlan hoin an rawn zawng ve leh ta si a, kan thianpa an that a, pathum an man bawk a, khawiah nge an kalpui ka hre lo. Hmanrua engmah ka neih miau loh avangin kawr kan rawn zawh thla char char a, tiang hi kan thleng ta a nih hi..” Sangzuala chuan a ti dap dap a. A tawi fel khawp mai. Tluanga zawk chu a bu nghut nghut a. Min rawn en bawk. Mipa rual ni mah se, hlauhna ka nei lo, an chetdan hi a tir phat atanga ka lo support ruk, kan report danah pawh a hêk lo zawng hlira puansak thin kha ka ni bawk a. Anni hi chuan pawngsualna te, pawngpaw tualthahna te , eirukna te an do a. Kan ram tlu chhe mek khalh dinga nawrkal hram hramtu an ni a, a nihna takah chuan keini ai fê hian an thawh hlawk a ni. Taka! Sangzuala khan Sumsuih ram kha a tia, an bûk awmna kha Sumsuih daih a lo nih chu a! Aa..engmah ka ngaihtuah thiam tawh lo ve. 

Mapuia chuan, “Aw le, a ṭha e, in chanchin kha kan lo hre ve a, a nihna takah chuan kan hmuh hun hun che ua mana sawrkar hnena hlan tur che u kan ni. A chhan chu kan pâwl kalphung in hria, pawisawi lo thah te, ruihhlo tawlh te, pawngsualte hi kan pâwl dân kalh tlat a ni. I ṭhiante zawng tur pawh chuan kan nau te kan tir ang, pawi an khawih miau a, an awmna tur hmunah an awm a ngai, tin, nang pawh jail lama i liam thlak theihna tur ruahmanna kan siam a ngai dawn a nih chu..” a ti ta mai a ! Hmangaihsangzuala chu zâm map lo hian a ding khawng lah a, Mapuia chu va pan hnaiin a pistol ken mêkna kut chu lain pistol chu a âwmah a chuktuah a, a mitah tak melh chungin, “Nang leh i naute hian jail chhunga min thawn luh chu in thei a ni maithei, mahse, rorelna dik lo do ngam lo tiin ka thlarau chuan a hrereng tawh ang che u. “ A ti hul hak a, ka lo insangmar ṭeuh ringawt. Mapuia nen chuan an intiat bawk a, an inmelh dun ngar ngar mai, “Rorelna dik hmu lo va dâwihzep taka ka intukluh leh ai chuan he lai hmuna thih hi ka duh zawk, hmet puak rawh.” Hmangaihsangzuala chuan a ti leh a. Mapuia erawh a chechâng lo. Boruak chu a reh duk a, kan thlir ṭhup a ni ber e. Ka hlauhthawn luatah hmeichhia mah ni ila tiin, “Lo ngawi teh u, lawkin, ṭha deuhin sawi ang u. Khawngaihin” ka ti khur dat a. Min rawn en leh ṭhup tak si-ah chuan ka zâm leh roh si, ka heh chu ka liak ringawt a. Mahse, eng emaw chu ka tih a ngai a ni. Anni pahnih hi thawk dun se Zoramin hmel thar pawh a hmu zawk lo’ng maw? Mi naran lo ve ve an ni bawk a. Mapuia zawk chuan, a kut lasawnin, “Ephraime ka lo sawipui ang e” a ti ta a, ka thaw hawk mai. 

Tlema a hotu lawk zual deuhte nge ni dawn ni, kan piaha in tê pakhatah chuan mi 7 vel an lut ta diak a. An rawn chhuah hma chu kan lo ṭhu ve ngawt ngawt ringawt. Rei erawh nghah an ngai lem lo, an rawn chhuah chuan nelawm takin Tluanga khan, “Kan zingah in duh chen chen in awm ve thei ang. Amaherawhchu, kan pâwl mi leh sa erawh in ni thei rih lo..in ṭhiante zawngin zanin hian mi 10 vel kan chhuak dawn a, tunah hian bûk nghak hi kan vaiin mi 18 kan ni a, mi 8 te nen bûk in lo nghak dawn a ni “ a rawn ti ta a. Kan thaw huai mai. Anmahni Pu Tluanga te awmna thlâmah min hruai a, ka sawi thiam dan berin hmanlai zawlbûk-ah khan lut ila chutiang deuh chu a ni e. “Puanthuah hi kan ṭhian dang ten an ken darh hlawm avangin kan ngah fahran lo va, a awm ang ang in hmang ve mai dawn nia, kan hmuh phaka in awm reng a ngai dawn a. Chuan saw lai saw inbualna, saw lai saw choka” tiin min kawhhmuh zung zung a. Ka chungah hian eng nge maw thleng ta mai le, mumang ramah pawh ka la man ngai loh thil chuan tihian min deng zui mawlh mawlh mai chu a ni si a ! Mak hi ka ti êm a ni. Ramhnuaiah , chutah pawh Mizoram sawrkar laka helte bulah lehnghal, ka bulah tâng tlan chhuak a awm rûn reng bawk. Hei hi ka tâwpna tur a ni mai lo’ng maw tih te thlengin ka ngaihtuah. Mahse, inngaihtuah vak vak khan awmzia neia ka hriat loh vangin intifai turin ka lut bo ta daih a. 

Inthlakna ber mai chu a ni..ka thawmhnaw hak lai lah chu thlan rim a nam nasa tawh a, kekawr lah ka sawi tawh ang kha a nia,. Pheikhawk mawlh hi a ni. Vanneih asiamin pu Tluanga bawk khan, “Hei kan naua kawr hi i ha tawk teuh ber ang, ani a tê ber a. “ Tiin tshirt uk, deh nuam deuh mai hi min pe a, ka lawm tak tak a ni. “Chuan kha hei hi Zoi chapal a nih hi, hmanna a awm tawh chuang lo va, i bun thei ang” tiin hmeichhe silipar simple tak, ke kar rawlh dum hi min pe bawk a, ka thawl ṭêp naa a nuam tawk viau, lawm tak ka ni. Zoi chungchang a sawi lai khan a hnuk a ulh em tih ka lo en chik lo chu mâwl ka inti hle. Eng nge maw keia pawh chu aw..tuna ka hun tawn mek hi mumang emaw ka la ti chêu em mawni dawn ni, ka lo zeldin hman teivet ziah. Story writer ang hrimin..heiham.. “Chokaah ka va pui ve ang e” tiin ka phei ta a. 

Sangzuala erawh Mapuia leh Tluanga bakah a hming ka hriat loh hmel bumro deuhte nen khan an ṭhu bial laih a, thu pawimawh tak an sawi dawn a ni mahna. Anni hian ani pawh hi an pui thei maithei asin. Chokaah chuan ka pa aia la nau hlek tur pahnihte hian zanriah tur an lo buatsaih mek a, “Ka lo pui ve ang che u” intih nelawm tum tak hian ka han ti a. 

“Mikhualte chu kan duat thin asin, lo awm mai mai rawh” an ti tak nain, purunsen ka lo chan der tawh. Pa Tlana leh Pa Hmaa te an ni a, nupui sûn ve ve tawh niin, Pa Tlana hi a nupui sûn hnu lawkah a faten ama in ngei atanga an hnawhchhuah vanga he pâwl hi zawm a lo nia. Pa Hmaa erawh ama in leh lo, a in hmun chu a û-ten rawn chuhpuiin hmelhriat an neih that bakah sum leh pai hmangin an chhuhsak ta si a, Ephraime a belh hnuah he pâwlah hian a intâtlut ve ta nghal a ni. Tunah hian a in hmun chu laklet leh tumin hma an la mek tih thu a sawi suam suam a, chutianga min ring nghal mai chu ka lawmin, kei pawh ka ngaih a ngam nghal huai huai mai. Anni ho hi ramhnuaiah an chetla reng lo va, a chang chuan thla 3 dawn khaw chhunga an awm chang te pawh a awm, hotute lam atanga kohna an dawn rualin an camp hi an pan leh mai thin a niawm e. Chu chu an pawl kalphung a ni. Camp hi hmun hrang hrangah an nei a, zoram hi an suartluan titih tawh a, an pawlah hian mi engzat chiah nge awm an hre bik lo va, Zoram khaw hmun hrang hrang atangin thalai eng emaw zatin an zawm a, koh an nih hunah ramhnuaiah an inhmu khawm mai thin niawm tak a ni. Anni hi chu an lo upat ve deuh tawh avangin tihian eng emaw thila ramhnuaia an khawsak a ngaih hunah rawngbawlsak tura koh an ni tawp a, a bak thil dang an ti ve vak lo. Tu pawn pa anga an en thute sawiin nuam an tiin he pawl an zawm hi an inchhir loh thu an sawi an sawi mai. 

Zanriah atan chuan maipawl an kang hluah a, dal an hâng chhum bawk a. Mipa rual an ni bawk a, an chaw lak a tha tho turah ngai ang. “Tei, Sawrkar hian min do viau nain a ruk chuan min hlau asin. Kan mi leh sa hi Department-tinah hian an inphum ru ve vek tawh sia” Pa Hmaa chuan a ti sur sur a, hei chu a dik ka ring. Sawrkar hnathawk zingah pawh dikna duh, pute hlauh vanga bân phar ngam lo tam tak an awm a, an hna thlengin a tawrh theih avangin meikhup a ngai ve thin si. A bik takin Police Department lamah hian he pâwl hian hma an lak nasat ka ring, Pa Tlana sawi danin ka rindan pawh chu a dik ta chiah. A hotu sang leh a lu berte hi sawrkar atangin an kut an phuarsak fo si a, hei hian buaina lian zawk a thlen thin chu a nih si hi maw..

An zanriah ei dan pawh a awlsam ngang mai, changel hnah phahah an ei mai a, an hautak lo khawp mai. Sangzuala te pawh an inkawm zo ta a niang, ani pawh a lo va intifai a nih hmel, a thawmhnaw a thlak tawh a. “Chaw i ei tawh em?” A rawn ti a. Ka lu ka lo thing ringawt. 

“Ei ang” tiin min rawn kai a, “Pa Hmaa te rual hian ka ei ve mai ang” ka lo tih chuan na zeta min melhin a kalsawn ta a. Keini chuan alluminium thlengah chaw chu kan ei a, ka rin aiin ka ei tam daih. Ka nu chuan ka awmdan hi han hmu se chuan aw..a ṭap lo chauh ang chu. Zanriah ei khamah kan tifel char char a, Pa Hmaa te pawh ka puih vang chuan an lawm thiam ve khawp mai. Sangzuala thiante zawng tur mi 10 chu an inbuatsaih nghal mawlh mawlh a, an phur hmel viau mai. “Silai an nei a nia aw” ka piah maia insiam mek bulah chuan ka va ti ve thâwr a, a lo nui huk, “Kan nei ve tho alawm” a lo ti duh lek. Pa Tlana khan a sawi tak e, “Raltlan suahsual rawngbawl bik ho hi keini pawn kan do tlat a, khaw chhunga kan awm laia an rawn hrân vaih chuan kan hotute kan hrilh vat a, an rawn hmetmit vat zel. Hei pawh sawrkar thiam loh a nia, a vulh liantu an ni miau a..” a ti a nih kha. Zoram hi chuan kan duh loh loh hi kan kan la tawng baw chho zel dawn niin a lang. Mi 10 lai an han kal takah chuan a reh nghal duak mai a, thlâm lian berah chuan kan awm khawm ve a, hmeichhe awmchhun ka nih avangin ka inkiltawih ka ti dawn nge ka zia a zawi,.ka ṭawng tam lo khawp mai. 

Pu Mapuia chuan, “Dinkim, lo thu hnai lawk teh, thil sawi ho lawk ang u” a rawn ti a. Dinkim tia min koh ngai loh avangin ka na deuh zawk, mahse, ani daih chuan engtin nge miin min koh a hriat tehlul ang ni? ka va thu hnai a. 

“Tunah hian nangmah zawn beihpui an thlak ṭan dawn mêk tih i hre miah lovang tiraw!” A tih chuan ka bu nghat a. 

A khi suk a, “I haw hun tura i sawiah i haw loh bakah i biak tlang theih tawh loh avangin i chhungte mangangin FIR an thehlut a ni. Hei chu an tih âwm reng a nia. Tin, sawrkarin tunah hian tâng tlanchhuak zawnpui tur leh nang chhan chhuak tur chein thawhpui atan min rawn sawm bawk asin” a ti leh a. 

“Chuan” ka lo ti ringawt. 

“Mahse, ngiat kan nei a, min tihhlawhtlinsak loh chuan kan thawhpui dawn lo.” A ti chhum hmak a. Eng nge tunhnaiah an ngiat tih ka lo ngaihtuah laiin, “Kan mi leh sa an kawl mêk te an zalen dawn chuan nang chu kan nau te’n an hruai haw thei ang che, tun dinhmunah chuan i pawimawh khawp mai. “ Nelawm deuh zawk hian a ti a. Ni dawn tak e, thla 2 liam ta khan ZCP mi leh sa 4 lai chu an man tak alawm, kan mizopui te leh Chakma ho intualvuakna thlengah ZCP an va inrawlh a, chakma mi pahnih hliam na takin an awm a. A hnu lawkah chakma thenkhat ten lo hêkin an mi leh sa pali lai chu Mizoram Police ten an man a nih chu ! An tan chuan a thanatthlak khawp ang le. Police tak pawh khan man an hreh hle tih a hmutu ten an sawi nghe nghe, sawi leh sawi hnu, hotute aṭanga thupek chu an zawm lo thei si lo a nih hmel. Chung an mi mante leh kei emaw tâng ho emaw chu inthleng an tum a nih hmel. Bungrua te pawh ka nih duh hmel hi ka tia..

“A nih tâng ho chu in thawnkir leh dawn em ?” Ka ti a. 

“Ani tih loh chu” tiin Sangzuala a kawk zauh a. “Eng nge ani bik chu?” Ka ti kher chu ngei hmel lutukin Sangzuala chuan min rawn melh, ka ngaipawimawh duh lo ve tlat. “ Ekhai! Nangni hi in rawn kal dun thui nen, in lo inngeih vak lo a ni maw?” Tiin ka zawhna pawh chhang lo chuan a nui ta hawk hawk a. Ka nuih a za ve lo, a thiante aia a zalenna chhan tur bik ka hre ve tlat lo. Dar 8 a pelh chuan mut an tintuah ta mai a, kei chu khaw nge ka mut ve dawn ka hre si lo, ka ṭhu reng a, “Lo kal ta che” Sangzuala chuan a rawn ti hluk a, bang kil lamah puan a lo phah diam tawh a, kan mutna erawh a inzawm loin a phah ve hram hram kha maw. 

Kan mut fel hnu chuan, “Ka case kha Malsawmpeka’n a khawih dawn” a ti sup a, ka zawt tawp si lo va. 

“A tha lawm,.” Ka ti ringawt. 

“A khawih chhung chu ramhnuaiah ka awm a ngai” a ti leh a, engvanga min hrilh kher nge maw a nih..”Nia, awm rawh, i haw thei hleinem” ka ti a. A hmel han lan chiah se an bawr nghal luai luai dawn tlat a,. “I haw thei a nih chuan ka nu hnenah thuchah ka duh aw” a ti dam thluam a, amah a ang lo tawp. Ka va en a, ani erawh a lo zangthal thung , “Mike kha i chah thei reng lo mi?” Ka ti hram a. 

“Thei tawh lo. Ani pawh ka venthawn vangin hmun dangah awm turin ka hrilh tawh” a ti a, a dawhthei ve phian mai. “Aw le, ka haw theih chuan min chah dawn nia. “ Ka ti sep a. 

“Ka lawm e..” ka lo nui hawk ringawt, ani erawh a nui ve hauh lo, a thutak lutuk chu nuam pawh ka ti lo, ka saisir a, ka maimichhing ta daih a. Ka piah lawka mu chu Pa Hmaa nge Pa Tlana zawk ni, a hnar ring khawp mai a, ka muhil thei ve si lo chu ka tal sek mai, Sangzuala pawh chu a muhil nge ni..ka awmdan chu a nuam lo takzet, ka sahal ka ti mai. Ka lungphute chu a rawn rang leh thut thin a, ka zun a chhuak sek bawk si, a hmaa ka zun lai kha chuan meng kha an la awm a, ka hlau lem lo. Tunah chuan dar 1 a pel tawh a, tupawh mai chu an muhil tawhin ka hria, ka zun lah chu a chhuak nasa si, ka han îp chiam a, a chhuak tulh tulh lehnghal. Muhil tal ila a zia tur. Ka thu chhuak ta hlawl a,  thli lah chu a thaw vûk vûk mai a,in chung di te chu a ri leh sung sung thin.  Khaw ên lai chuan ramhnuai chu nêl viau thin mah ila, zanah chuan ka pawngpaw ngam lo nasa, nizanah khan engtin nge lungpher chungah khan ka muthilh theih zawk le? Ka chauh lutuk vang kha a ni maithei, zaninah mipa pakaw hual vel hnuaiah ka ṭi leh dûk lâwi si! Zun chu ka cheh takngial dawna ka hriat avangin ka tho ṭhem ṭhem a, pawn lama thing thliin a chhem rik ṭhûau ṭhûau chu ka bengah a ring nasa mai a, a thim bawk si. Ka chhuak ngam ta tlat lo. Tu emaw tal harh se ka va ti tak. Chutia thim hnuaia ka ip ngar ngar lai chuan, “Kal rawh, ka va zunpui ang che.” Ka bul ami chuan a rawn ti sup a, ka rak chhuak lo chauh, ka phu nasa lutuk. Mahse, ka lawmna chu nasa elkhen a ni thung, kan inzui chhuak ta a, choka leh kan riahna inkar âwl laiah chuan ka zung hmiah, ka kal hla ngam tawh hleinem. Ani pawh a zung vein ka hria. 

Kan luh hma chuan, “Thli hi a van thaw nasa em em” ka ti a. 

“Sâr thli a niang” a la tizui!

“Mawla” ka ti hap a. A khi suk duh chauh. Kan inchhawm lut leh ta poh a. Kan han mut leh chuan, “Muhil rih suh, ka muthilh nghak rawh” ka ti teh tlat a! A eng ka hria chu ni maw? “Ngati maw?” A ti a, “Ka hlau” ka ti ta nge nge a, “Keimah hi min hlau la, hlauh tur dang i nei lo a ni mai” a tih chuan, “Hmela” ka ti khar khar a. 

Rawn inlet thawkin ka dul chungah a kut a rawn nghat ta mai, phâwk lutuk hian ka meng a, “La sawn vat rawh” ka lo ti, ka ṭawng ring ngam bawk si lo. 

“Tikhan i him, tupawh lo kal se, an tina lovang che, muhil rawh” a ti sup sup a. A kut chu a tiche chuang lo a dah ve tawp, mahse, dul zawna kut an dah hian ka thaw tha thei thin lo va, ka dul aia chhak hlekah ka dah sawnsak a, muangtê chuan ka chhin ve tak kha maw. A kut ringawt kha ka thlamuanpui ve em em a nih chu. 

A hmeichhia ber ka tho tlai ta ber a, ka harh chuan an lo thoin an lo nung hrâ vek tawh. Zak ru deuhin ka tho a, ka hmai ka va phih a, “Pa Hma, min kaihthawh ve tur che u lawm, a zahthlak ee” ka ti nang nang a. 

“I ṭhianpa khan a phal lo alawm, a mu tlem lutuk a tia” a lo tih chuan mak ka ti angreng hle.  Han inphihfai mah ila, engmah hmai hnawih tur pawh a awm mang si lo, a hrehawm ka ti tawh takzet a ni. Mahse, Tluanga pui khan, “Dini, kha hei kan neih ve chhun” tiin body lotion bur lian deuh, a inziak pawh tla vek tawh hi min pe a, ka lawm tho mai. Ka lo inhnawih ta vat a, hnawih loh ai chuan a tha zawk tho tho e. Rammu ho ti tawh mai ang, Duhawma te ho zawngtu te kha an la rawn lêt leh lo va, eng tak han ang ang maw..Tukthuan chu kan ei har lem lo, kei chuan ka ei hleithei meuh lo. Bungbêl vel kan sil laiin mi pakhat hi thaw hlawp hlawp hian a rawn tlan a, Pa Hmaa chuan, “Eheu! Mawite, eng nge thil awmzia?” A lo ti thuai a. Chu tlangval chu a thaw hluam hluam a, a thlabâr hmel viau bawk. Midang pawh an lo tlan khawm ṭuk ṭuk mai. Ṭawng pawh a ṭawng thei lawk lo, “U Siamtea..U Siamtea..” tiin a khuh bawrh bawrh a, tui an lo pe ta vat. Pu Mapuia te pawh an rawn thleng phei tawh a, “Mawite, eng nge ni ta?” A ti dam thluam a. 

“Pa Mapui, U siamtea a thi!” A ti ta mai a! Pu Mapuia leh Pu Tluangtea chu an rum nghut nghut mai. Kei pawh ngawi rengin bel sil pahin an thukhawchâng ka lo ngaichâng ve ran a. Ka tha a lo khur ve der der mai. “Tu kut tuarin nge?” Pangngai deuhin Pu Tluanga chuan a lo ti vat a. 

“Ka hre lo, râltlân an niin ka hria..ralkhat aṭangin min rawn kap a. Kan mi zawnte pawh kan hmu lo, ka rawn tlan hmasa a, tunah an rawn zawn hawng mêk” a ti a, a thaw hlawi hlawi mai. Rapthlak ka ti. An mi leh sa hi engzat tak hloh tawh ang maw? Thi pangngai anga kan ngaih te hi thenkhat chu an mi leh sa te hi an nih fó ka ring. Engtin tak sawngbawl ang maw? Mapuia leh Tluanga te chuan ro an rel ta zung zung a, mi panga te chu ruang hmuak tur chuan an kal zui nghal a, “Tu tuin nge zui dawn?” Pa Tlana chuan a lo ti vut a. 

A kut a sil zui rak rak bawk. “Hmun nghak hi mi panga awm se a tawk ang, Sangzuala hi kan ring thei tawh ang chu..a ni lo’m ni?” Tiin Tluanga chuan Sangzuala chu a melh a. Hmangaihsangzuala chuan, “Tehreng mai, min ring thei ang” a lo ti var a. 

Tluanga chuan min rawn melh zawk a, remchangah ka lo hman loh chuan tiin tlawm leh zah pawh ka dâwn zo tawh lo. “Pu Tluang, khawngaihin min hruai haw ve nghal mai teh u. Engmah ka sawi lo vang” ka lo ti sawk sawk a. 

Boruak chu a reh duk mai. Ka sawi chu ka inchhir hman ṭêp a ni. Mahse, ka haw ve châk tawh êm a ni. 

“Kan ngaihtuah ang chu.” Pu Tluanga chuan a ti ringawt a. Beiseina pawh a sang vak thei chuang lo. Kar lovah ruang pawh chu a rawn thleng chawpchilh a, a thin bâwr velah tak silaia kah a ni a, vawikhat kahna a thihpui nghal a nih hmel. Mi pali erawh chuan chung rawn kaptute chu an umzui a, tichuan, an hnazawn ṭheuhah an che sang sang mai. Kei lah tih ber tur hre loin ka lo ding khawng ve reng a, Pu Mapuia te leh mi pawimawh deuhte chuan eng emaw an sawi khawm a niang, an lut bo leh diak a, thenkhatin ruang zawnna tur hlâng an lo siam mawlh mawlh bawk. Ruang hlau rual chu ka ni tawh miah lo nain mitthi hrim hrim hi ka nêl ngai lo, mitthi bulhnaih vela report pek a ngaih paw’n Ela zelin a ti thin, min hrethiam thin khawp mai. 

“Engtin nge ka awm dawn? Ka haw ve duh a nia” Sangzuala bulah chuan ka ti a. Mi pawh en lo hian, “Nang chu ka mi tâng alawm i nih, ka phalna tel lo chuan khawiah mah i kal thei lo.” A ti ta mai. 

“I va han zaklo tak, i duh ka tihsak tawh che, min hrêng ngawt thei tawh lo. Ka haw dawn a ni ringawt mai.” Ka ti sak sak a. Ka ṭawng pawh chu a ring deuh nge an lo hawi deuh hû hû hlawm a. 

“Tak taka an remtih chuan i haw thei ang,. Ka nu erawh i va hmu tur a ni.” Tiin min kai hrang deuh a. Kan han din dun chuan kan insan hleih angreng hle. 

“Ka dam ṭha tih i lo hrilh ang a. ZCP ka zawm thu leh tumah lo ring lo turin i ti bawk ang a. Amanda fapain ka case a khawih tur thu i hrilh bakah ka sumdawnna kha Robina lo chhunzawmtir turin min lo hrilhsak dawn nia. “ A ti ta mawlh mawlh a, ka rilru chuan ka vawng rauh rauh a. 

“I case an chhui zuina kawngah tihtheih ka neih chuan ka lo pui ve dawn nia.” Ka inrin hmain ka ti a. A dik adik chuan min rubotu mah ni se; ka chungah a sual lo a, sual a hnehin min venghim a, a phak ang tawkin min care ve niin ka hria a, puih ve pawh a phû ka ti a ni. A dinhmun hi a laklawh êm mai a, kawng dang a nei rih bik lo a ni. 

“Mahse, sawrkar chuan min zawn beihpui an thlak ngawrh sauh ang. I haw tawh dawn si a..” a ti nghut a,. “Mahse, hei i him rih alawm. “ Ka tih chuan, “Keimah vanga anni hi dinhmun hlauhawma dah ka duh hauh lo, keimaha ka chettlat hun pawh a la awm maithei” a ti leh a. 

“Amanda fapa chu ring phawt la, ani chuan hun pawh a duh rei kher dawn em ni?” Pangngai deuhin ka ti ve a, “Beisei ang. Mahse, anni khan Daisy vang ringawtin jail ka tan hi an duh niin ka hre lo. Chu tak chu a nia chhuichhuah harsa tur chu” a tih chuan a ngaihna hre lo zet hian ka lo melh a. A khi suk ringawt. Pu Mapuia te pawh an rawn lang ta a. Ruahmanna an siam ta zung zung a, anni pahnih pawh chuan ruang an zui ve dawn a, engtin chiah nge khua an thlenpui hunah an sawi dawn tih erawh ka hre lo. Ramhnuaiah tu emaw ten an lo kap tia an report a nih chuan buaina zakhua a thleng zawk awm si a, chu zawng ka buaina tur a ni lo ve. 

Pu Mapuia zawk chuan, “Dini, i hriatthiam kan ngai tlat. Ani hi Chamring khua daih a ni si a, an khuaah kan tlang nghal dawn tlat. Naktukah hian Hotupa a rawn kal dawn a, a rualin i haw zawk mai dawn em ni ang? I him zawk bawk ang. Tin, tunah chuan kan bulah chuan i him lo.” A ti leh ta tlat mai. Ka hnual rawih rawih, ka ṭah te lam a chhuak. Ṭah êm chu ka hreh ve bawk si,. 

An kal tur chu mittui parawl kiangin ka thlir liam a, ka bula ding chuan, “Lungngai suh, him dam takin i la haw em em ang. “ A ti thawp sup a.