Hmangaihsangzuala 2

HMANGAIHSANGZUALA (2) 

Ziaktu : Toni Râlte

Ka rilru a kal thui lutuk a, office kan thlen lai pawh ka hre lo. Ela’n, “Tei, hei, vung vung zel che hian, eng nge i ngaihtuah ?” Tiin ka hmai bulah a kut a rawn lek a, ka hawi hû hû ringawt. A nui hawk a, kei pawh harhchhuak thutin ka chhuk vat a, office lam pan chuan ka pen ta hlawk hlawk a. Boss roomah lut nghalin kan report hmuh theih ang ang chu kan han chhawpchhuak a, tlai dar 5 a pel hlek tawh a, hna a tam loh hi chuan dar 4 aia hmaa hawn châng te pawh kan nei ṭhin. Vawiin erawh kan buai deuh a ni e. Boss chuan a han bih thuak thuak a, min rawn en hlawmin, “In thawk ṭha hle mai, tikhan haw mai r’u, naktuk lamah in chhunzawm dawn nia” a ti a, a khi var var mai. Chhuah kan tum mek laiin, “Taka! Friday tlai ka fapa birthday a nih kha aw, programme dang lo nei suh u” a ti zui leh hram a, kan chhuahsan zui nghal. Ka scooty ka start laiin Ela a rawn kal a, “Fimkhur rawh aw, e chuan, Valpuia chu engtin nge ni dawn?” Tiin a kiai suk a, hmui tipawrhin ka melh rum nghal ringawt. “Mawh, sawi la, a hre châk tawh a nia” a ti lehzel a, “Va’n ninawm tak, ka mipa duhzawng a ni lo, bakah bialpa nei thei ka ni lo, ka nei hman lo, ka buai..” ka ti hmawk hmawk a, a nui vur vur ringawt. A dik alawm Ela cousin Valpuia hian thla khat liamta aṭang khan min lo duh ve ngei a, Ela bulah a lo sawi ve nasa, ka number pawh a lo dil a, mahse, pek ka phal loh avangin a pe rih lo. Amah pawh ka hmu tawh tho naa ka duhthu a sam lo, kei ve mai mai, ani sawrkar zêm zen ngatin min duh ve a nia. Ka lo la hnawl ve khanglang. Mahse, tupawn duhzawng kan nei vek miau alawm le. Ela paw’n min hriatthiam tho ka beisei. Inngaihzawnna lamah hian ka thleng sang lo viau mai a, college ka kal laia ka bialpa Msa tih loh kha tumah ka la date leh ta lo. Ani nen khan kum 2 leh thla 4 vel kan inzui ve a, a duh pawh ka duh hman viau. Mahse, a nun a thlahdah ta riau a, zu han in zeuh zeuh a ching kha chu ka la hmu mawi lui thei hram hram a, a rukin damdawi a lo ti ve hlauh pek a ! Apa hi strict lutuk tak mai a ni bawk nen, Centre-ah a dah ta hmiah a, college pawh a zo ve ta lo a nih kha. Centre-ah vawi hnih ka kan ve hman a, kha chen lo inzui kan ni a, a chan chhiat lai bera han thlauhthlak kha nuam ka ti lo a ni. Mahse, a awmna centre-a thawk ve tho nen an lo inkawp tih ka hrechhuak ta sia, ka rehsan ta vang vang a ni. Tun hnuah hian vawi 2 chu kan inhmu tawh a, hmelhriat satliah angin kan inbe ta vel mai mai a, a kawpnu nen khan innei zuiin fa pawh pahnih an nei tawh, a nun a siamṭha a, ka lawmpui em em zawk. A sarhu lai khan ka tuar ve viau naa a rei a, khuarei hi a lo awm ve tak tak a niang. Tihian ka hnaah ka buai chho ve ta bawk nen, mipa lam han ngaihven thei pawh ka ni ta lo. Ka hlim tho a, a pawina ka hre lo. 

Zanriah ei hun a pel tawh naa min lo la nghak a, ka inthlak sawk sawk a, zanriah chu kan ei ta nghal. Kimteii pawh Spa’n chawhnu lam khan a rawn ko naa, a lo haw duh rih bik lo. Ka pain Spa pawh a lo titipui a niawm a, danglam a awm turah ngai ang. “U, hla zir i tum em?” Mapuia’n a tih chuan, “Dawn lo, ziah tur ka nei a, naktuk tlaia chhuak tur” ka lo ti a. 

Ka pain, “Office-ah a ziah theih loh em ni? Hla i zir khât riau a nia. “ A lo ti boh a. 

“Thei dawn lo, vawiin pawh office-ah kan awm hman hleinem, naktuk pawh kan vah chhuah leh a ngai dawn a..” Bekang sa fry hmawm zauh pah chuan ka ti a. 

“In hna hi a buaithlak a nih hi maw..eng lam hawi nge i column-ah chuan rawn chhuak leh dawn?” Kimteii chuan a ti a. 

“Tun hnai issue hi a nih hmel, jail tâng vel hi, mahse, ka la khaikhawm thiam lo. Rilru sen ve fê a ngai dawn a ni.” Phur vak lo hian ka lo ti a. Ni e, Boss khan khalam hawi ziak tur khan min phût si a, ka rilru ka la sêng thiam meuh lo. Ka inbual pah te chuan thuziah dan tur ka ngaihtuah nasa mai a, thuziah lam hi tui viau e ti lo chuan a chânga han bo hû hi ka ching thin a, eng ang paw’n tum lui ngial mah ila; tihngaihna a awm map loh châng a awm. Zanin erawh hrâtlâk a ngai dawn tlat. Ka sam ka chhem ro leh tê tê a, Laptop hmaah duhdah deuha ṭhuin ka han chhing vang vang a. 

Jail tâng tlan chhuakte kaihhnawih nisiin ka vei rûk em em, Jail leh Home te, Centre tea leng lo khawp Zoramin kan hring chhuak hi tu mawhphurhna nge ti lam hawi zawngin ka ziak ta a. Ka duh aiin ka ziak tui leh ta roh sia! Ka word limit a pel duai, proof reading neih pahin ka paih ṭhen ta nual a. Ka duhthusam ang taka ka ziah avangin ka lawm rilru hle. Dar 10 a pel tawh a, ka hnungzâng a kham ut ut mai. Muthmuna ka phone ka han bih chuan ka ner nawk, “Hello, keimah Valpuia, ka number hi lo save ve la” tih thu a ni. Ka save sak ta tho mai. Ka be zui peih chuang lo,  sual chu  ka inti ve reng. Mahse, ka tui lohna lamah chuan ka bengngawng thiam a, ka mit pawh tidel thiam tak ka ni. 

Ka mumang lah chu a’n mak khawp a, Duhawma nen khan kan lo innei a, an inah khan kan lo khawsa a, a pa lah khan min lo duh lo em em zui! Hmm, a hmel pawh ka la hmu tawp si lo va, thlalakah bak. Ka nuin maian a lo hîk mawlh mawlh a, Kimteii erawh a inthiar a ni maithei, Mapuia hi chu zingah a chhuak nghal zel a, chaw hi ka pain dawr kal pahin a kensak mai zel. Ka hmai phih zo ka nu ka puih laiin patliang pahnih an rawn lut a, ka hmuh tawh hnu chu an ni,. Ka nuin a lo chiau au thuai a, ka pa pawh a lo lang zui nghal. Kimteii ko tura lo kal an lo nia, an rawn puithu khep khep khawp mai. Kimteii tan pawh haw loh chu a nuam chiah lovang. Ka pa te nen an inkawm a, “Ni e, kan fate hi an la puitling tawk lo va, a rawn tlan ve ta mai pawh ka lo kamkhat nghe nghe a, tunlai naupang hi zawng an chhel tawh lo lutuk a, in lo hrethiam hram hram a niang chu. Keini lam paw’n inṭhen hlente chu kan duh reng reng hleinem, Bawihi, va insiam rawh, hei i pa Hminga te pawh an zahawm alawm” ka pa chuan a ti chuar chuar a,. Kimteii erawh a tûm bâr mai, ka lo khawngaih ru viau. Ka nuin, “Aw..tukṭhuan te ei law law phawt se la, chuti tut tut te chu a, keiman ka va hawnpui mai dawn alawm, Pu Hming, chutiang chuan i ti mai ang u aw..” a lo ti var a. Remhria ka lo ti hle, pasal hi nei ve ila, tlan ta ila haw leh ta bawk ila hawn zan boruak vel ka ngaihtuah hian ka zak tlat zel. Ka lai dawn lutuk hian ka hria a ni. Pu Hminga te pawh chuan, “Ni e, ṭha in tih ang ang kha a ni mai e, a lo haw dawn phawt te chuan a hun thu hla kha kan rawn ngaipawimawh ber hleinem.” Tiin min ṭinsan ta a. Kimteii chuan, “Ka pa hi chu a..eng nge chhel lo te kha min tih ngawt a? Ka chhel vanga hei chen awm thei ka nih hi” a ti tân tân a. Ka pa erawh a ngawi rûn ringawt. 

Chaw ei laiin, “Tei, eng nge tâng lam chanchinte chu le? Engmah boruak thar hi a la awm lo a ni maw?” Ka pa chuan a ti a. 

“Awm lo chu a nih hi, Police lamin an thup a nih ngawt loh chuan eng emaw boruak chu hre tawh tur chu kan ni.” Ka ti a. Ka nu chuan, “Fimkhur ang che, i report pe lai te kha an lo hmuh ve phei chuan an rawn target chat thei che a nia.” A ti ngial a, nizan lamah nimina jail warden kan kawmna kha pek chhuah a ni a. Duhawma pa leh Hmangaihsangzuala chhungte thusawi erawh kan la khekkhâl rih a ni. 

Antui a hâwp ri hruih a, ka pa chuan, “Tu nge kha’h? Bawngkawn ami kha, a pa boral tawh kha” tiin min zawt leh a, “Aw, Hmangaihsangzuala niin ka hria, kan va kal alawm, a nu a khawngaihthlak angreng khawp mai.” Ka ti a. 

“A pa boral dan te a sawi lo maw?” A lo ti daih a, mak ka ti deuh. “Sawi lem lo, a rilru nat thu vel a sawi a..” tiin namnul liam ka tum a. Mahse, ka rin aiin ka pa chuan a ngaihven tlat, “Eng case nge kha a tan chhan kha? E..aw Pocso a ni tak. A zia lo khawp mai. A victim tleirawl pa te nen khan kan tlangval lai chuan kan inkawm nasa thin alawm, chuvang a nia ka han ngaihven deuh ni..” a ti ta luam a. 

“Kei chu he dân hi ka ngei, mipa ho ka khawngaih, tleirawl kum tling lo pawh hi za tak tak, pawisak nei lo an tam tawh ropui sia..” Kimteii chuan a ti hmarh hmarh a. Ka pawmpui rualin kan siamṭhat theih a ni si lo va,. He dân hi chu HIV nen hian inânna a nei ka ti mai. Kan hrereng a, kan fimkhur loh chuan a rah kan seng thin ang hian..Mahse, mipa ho tan chuan ka khaikhinna khi a âwm âng lo ve thei tho mai. Sex hi a hluar tawh si a, pakhatin a tuma a beih a beih chuan pakhat zawk lahin a lo hnar seng bik lo thei lo va, man chhuah an han nih takah chuan hmingchhiat dâlah a hmeichhe lam ten ṭan an la ni maiin a lang. Mahse, Mizo rilruah chuan an hmingṭhat ai mahin an mawng an hlimna a tam zawk maithei. Amaherawhchu, naupang tak tak, naute la tih mai theihte chunga hleilenna, pawngsualna erawh hremna atan erawh chuan he dân hi nêp ka la ti zawk. Kan tleirâwl laia kan kawmthlangte nautê kum 3 leh thla 5 awrh chauh, a patea ngei maiin a lo khawih bawrhbân ka hmuh aṭang khan hetiang tih ching mi piangsualho hi chu khaihlum theihte hi ni se ka duh lek lek, ka duh rum mah mah in lo ti maithei, mahse, a tuartu tan a rapthlak turzia ngaihtuah hian a na êm a ni. 

Office ka thlen chuan Ela a lo la thleng lo ve khiah a, Masangi’n min lo nuih var varin, “Nimin i che ṭha hle mai a” a lo ti a. “Awihawm loh” tiin ka thuziah print out tur chu ka pe nghal a. Boss roomah ka tlang nghal bawk, kar lovah Ela pawh a rawn thleng ve a. Boss chuan thupuifun fahran hian, “Vawiin chu in kal kual deuh zar zar dawn a nih hmel, Kei Police station lamah ka kal a ngai dawn a..Ela leh nang..” a tih laiin a phone a rawn ri a. 

“Hello, aw..Pu Ding, a ni maw? Aw..a va tihzia ve, aw le aw le..ka hrethiam e.” Ti zung zungin a phone chu a dah a. 

A tarmit fim zet phêna a mitmengah chuan phurna ka va hmu thei.

“Misual zinga pahnih kha Kelsih ramah hmuh an ni a, mahse, an man hman lo a nih chu..” a ti ta a. Thawk kan lo la hawk a. “Chuan, tu te nge tih an hrechiang hman lo va, mi thlama eitur an va dap lai an hmu a nih awm chu,. Mahse, keini lam chu kan ngawi rih ang. “ A ti nghet charh a. Sawi ve tur pawh ka hre lo e a. 

Kan hna thawk leh turin kan inkhalh chhuak leh ta poh a. Mahse, vawiin chu kan vanduai nî a ni tlat, tuman min hmu duh lo ! Bakah kawm tlak an ni meuh hlawm lo, an veng hruaitute’n an lo humhalh ti mai ang, an lo dang chêp angreng bawk si a, kan inrawlh buai duh ta lo. Salem venga ka ṭhiannu Ngaihzuali te inah kan chawl zuai a. Thingpui te min lo lum a, kan hah a dam huai huai mai. Chanchin Boss va hrilh ka tum lai takin a call ka dawng a, ka la vat. 

“Tunah Hmangaihsangzuala te in, Bawngkawn-ah lo kal vat r’u” a rawn ti a, a ṭawngkam hmanhmawh zet avang chuan kan che sawk sawk hlawm a. Eng thil nge maw thleng chu le? Ka phone ka’n en nâk chuan, Ramhlun North ṭhalai rualin an veng tleirâwl pawngsuala puh Hmangaihsangzuala te in chu suasama tihchhiat an lo tum mek a nih chu ! An va timak bawk ve mawle aw. Kan va thlen phei meuh chuan mipui an tam lutuk, kan badge chuan min chhan hram hram a ni ber e. Boss pawh Police ho lamah a lo awm ve a, Police tam vak lo hian an lo dang ve laih laih naa an veng hneh lo hle. Buaithlak deuh bawk chu, Bawngkawn khawtlâng hruaitu te leh police ten ṭhelh mih tum viau mah se; Bawngkawn ṭhalai, amah Hmangaihsangzuala lo ngainaa lo ṭan ru vetu ho kha an lo inphum ru ve ṭeuh si a, chungho chuan ṭhelh tum anga lang siin an lo nêk na ve deuh bawk nen, an buai nuaih nuaih a ni ber e. Pi Sawmi te in hmalam tukverh darthlalang pawh a keh nual tawh, tlangval tha za rual, thisen lum an ni hlawm tawh si a, keini tan pawh han cover-a chet han lak vak ngam chi a ni tlat lo. Boss paw’n fimkhur turin min chah nasa, Dave chuan a theih ang angin a han cover a, keiin rem leh rem loin ka lo report ve leh zauh bawk, Ela erawh lang lo lamah a lo va spy bawk a. Kan hna ṭheuh chu ṭhahnemngai takin kan thawk ve mawp mawp a ni mai e. 

Police lam an rawn thlen belh ta bawk a, Ramhlun lam khawtlang hruaitu te’n bân rawn pharin Bawngkawn lamin an lo thlawp bawk nen, a tawpa tawpah an inṭintir thei ta hram. Khati taka mipui pungkhawm kan tam hman kha mak tak a ni. Tâng tlan chhuahna chuan nghawng a nei lian chho ṭan ta khawp mai. Pi Sawmi a khawngaihthlak a ni. A ṭap zawih zawih mai a, a nuṭate an rawn thlen ve tak hnuah tlemin a zia ta deuh zawk a. A fapa naupang zawk tal kha awm thei se a ṭha tur, ka lainat tak tak a ni. 

Chau hnêpin office kan thleng a, eng em em va tiin va ṭhelh ve lo mah ila, a boruak khan min tichau hluah hluah a ni ber e. Boss paw’n, “Naktukah kan review mai dawn nia, kan chau tlang a nih hi, haw phawt mai ang u..” tiin staff te pawh kan lo inbuatsaih sap sap a. 

In ka thlen meuh chuan thutthlengah ka tlu zangthal der der mai. Ka nu chuan boruak vel kha a lo hmuh leh hriat ve vangin min hrethiam takin, “Han intifai la, chaw ei ka lo siam ang,. Zanin chu hahdam rawh” a lo ti var a. Ka pa erawh dawr bungrua a lo thlen avangin Mapuia nen an lo haw tlai dawn a, ka nu chuan a lo nghak thung dawn a, keimah chauhin zanriah ka ei dawn tihna a nih chu. Ka inbual lai te chuan ngaihtuahna mumal pawh ka nei thei lo. Ka tha te chu a khur der der mai, ṭhalai rual sahâwk leh thaza rualte khan khatiang khan min han chingphul ve ta se..awii..chaw pawh ka eitui meuh lo. Ka ei kham dawn mek tihin ka pa te pawh an lo thleng ve chiah a, “Tei, vawiin boruak kha a va rapthlak ve,.” Min ngaihtuah hmel tak hian a rawn ti lut a, “Ka chau vek” ka lo ti sep a. 

“Khatiangah khan tel ve ka châk, kei chu” Mapuia’n a lo ti leh tawh, Mawla hi. Ka nuin, “Tikhan, han chawl hahdam rawh, thleng seng vel chu ka kutah dah mai rawh” tiin min rawn en a, ka nu hi chu aw, ka tan hian a va hlu ṭhin tak. Ka room ka pan dawn lai takin ka nau bawk chuan, “U, i article kha U Lawma’n a fak nasa mai, a star vang che pawh ni loin, kei chuan ka chhiarchhuak peih lo” a lo ti bûi bûi a. Ka melh kâwk a, ka lei ka chhuahkhum a, ka pindan lam ka pansan ta daih. Han chawlh hahdam vak dan pawh chu ka hre chuang lo. Kan tunlai boruak zet chu, social media a eng pawh han lut ila jail tâng tlan chhuakte chungchang hlir, Youtuber ṭhenkhat lahin content ka hmu ṭha khawp mai ti niawm fahranin ninawm khawpin hlin chat tur leh belhchian dawl awm si loin thu an veivir chiam chiam a, thudik hrula zeldin thu lo tlangaupui chiam lah bo lo. Facebook-ah lah, “Chutah chuan an hmu..chuti khati” tiin mite rilru an ti chiâi bawk a. Ka hne,. Whatsapp lah hi ka khawih ṭha mang bâr lo. Mut lah chu a chhuak mawh viau lehnghal a. Valpuia lah hi msg hi a lo hnutchhiah ve hman ziah,. Ka thiannu ve ber Bawihi’n, “Enteh, vawiin ka chhun mumangah i lo thi a, i thla hi a lo hrang nasa mai a, jail tâng tlan chhuakte kha i lo tihṭhaih a, an vaiin an hlauh vang chein police kutah an lo inpe leh vek mawle” a rawn tih chuan a riin ka nui hawk. A mak awm mang e aw. 

Jail tâng tlan chhuakte tlan chhuah aṭangin ni 5 a liam ta. Tuman an sulhnu leh an riruang âwm pawh Kelsih rama an hmuh bak hmu an la awm lo va, an chhung leh kuate rawn biaa rawn dîkdâk an awm hek lo, an reh tlawk tlawk mai a ni. Ka rindan chuan Aizawl district-ah hi chuan an awm ka ring tawh lo hul hual, Lunglei lam emaw Siaha lam daih emaw an pan tawh ka ring. Chuvang chu ni maw a tira mipui kan ralṭit ang khan a tu amah chu kan ralṭi tawh lo va, a hmaa kan awmdan ngai ang khan kan awm tawh a ni ber. Chutihrualin keini lam erawh chuan a rukin kan ngaihven ve zel a, hma han lak vak dan erawh a vâng fû mai. Thil thleng lian tham a la awm rih lem lo bawk. 

“Zanin chu hla zir ve ang aw, i lang khat riau, min lo sawm phei la. “ Bawihi msg chu, “Yesii, ke in aw, a hnai tho” tiin ka va reply a, kan Biak in hi kan in aṭangin a hla lem lo bawk a, scooty hawl chhuah zen hi ka ning thin. Zanriah kan ei laiin ka nuin, “Kha..Kimteii te pawh nau han nei fel se, in hrang chan te pawh an rilruk tak kha, inpui luah tur anga ngaih ni mahse, an tan in hrang chân kha a fuh daih zawk, Paa, kan in hnuai chu siam vat tum ila, tih em em tur pawh a tam tawh loh khu” a ti zung zung a. Ka pa pawh chuan, “Nia mawle, Lalrina te an pawt phar nasa lutuk hi alawm, ka lo hrilh leh ang, anni hian hna an thiam bakah an che rang a, an peih thuai mai ang “ a lo ti ve chuar chuar a. Mapuia nen erawh kan ngawi reng. Ka nu ka puih leh sawk sawk hnuah hla zir tur chuan ka insiam a, top dum bantluan hain puan sakhi rawng ka bih a, flat dum ka inthawlh leh thawk a, a zo der. Sling bag akin Bawihi call ka dawn hma ngeia thlen hman tum chuan ka chhuak ta a, ani hi rilru hmanhmawh chi a nia, nghah hi a thei hlawl lo. Zanin kan hla zir chu boruak a nuamin kan nui dar dar reng mai. Zai pawh a nuam e, Kan zai hun tur a hnaih tawh deuh avangin kan bang tlai angreng a. Kan ban chuan ka nau ka melh kual deuh a, Zorini bulah a lo tâp deuh chawt tih ka va hmuh chuan ka khi sak mai, Hmeichhe lam a ngaihven ve ṭan dawn a nih hmel. Zorini hian a star-na a rei tawh bawk a,. A thlah dawna ka rin vangin Bawihi leh Zuala te nen kan inchhawm phei a, Bawihi te in thlen hmain Zuala chu an lo call a, “Ka let leh lawk a ngai, sawiho ngai thil a awm an rawn tih leh chu..” tiin a let nul nul a, Bawihi nen chuan kan phei a, a reh dûk tawh. Dar 10 a pel thuak tawh tlat a tin ni. Bawihi te in aṭang hian kan in hi kawi hnih vel la kal a ngai a, mahse, ramhnuai a ni lem lo bawk a, ka hlau hran lo. Zan dangah hna avanga kan ban tlai paw’n ka kal fô, mahse, ke tak hi chuan vawi 2 vel bak ka la kal lo. Bawihi chuan, “Tetea ka kai tho ang a, kan va thlah lawk dawn che mi?” A ti a. A hla tawh chuang si lo va, mi muhil kaihthawh nan chuan holam ka ti ve deuh bawk nen, “A ngai lo, ka hlau hleinem,” ka ti a. Kan veng lamah hian keini chhungkua chiah hi tuna kan lawina kohhrana lawi kan ni a, Biak in hnaih tho mah nise, eng emaw hnatlân leh hla zir nikhua vel hian Bawihi a awm loh phei chuan ka mal riau thin nghe nghe. “Tak tak maw? I hlau lo maw?” Min ngaihtuah hmel deuh hian a ti a. 

“Eng nge maw hlauh tur le..Lalzahawm, va mu rawh, muttui..” tiin na lo tein an in bulah chuan ka nawr a, “A nih muttui le, i thlen hunah min lo hrilh la” a ti hram a, hetianga thian min ngaihtuahtu neih hi a nuam ve hrim hrim. Bawihi nen hian ka nu leh ka pa inneih tirh phat aṭangin kan inkawm tawh a, kan inrual chiah nain kei aiin a puitling zawk fo, kan hna avangte hian min ngaihtuah thu hi a sawi a sawi ve thin. Inkawm chawta inzui reng ni lo mah ila, kal chhuahna tur eng emaw awm hlekah erawh a tak leh a mei ang mai kan ni thin. 

Kawi khat ka pel a, thui lotêah kawi dang a awm leh ang a, a piah lawk chu kan in a ni mai. Street light a awm bakah kawng ân in te chuan veranda light an chhi vek a, hlauhawm a awm lo hrim hrim, Mi veivak erawh an awm lem lo. Kal muang chi ka ni lem lo a, ka pen phei deuh hlawk hlawk mai. Kawi hnuhnung zawk ka kal mek lai chuan veilam side drain bula motor chhe tawh an hunna atang chuan eng thil emaw hi a rawn dawk chhuak zawk mai a, ka phu nasa kher mai, ka hamhaih hmain ka hmui chu kutphah hlai zet hian a rawn hup phui ta hmiah mai le! Hnunglam atangin ka nghawngah a rawn kuah bet bawk. Motor chhia an hunna phênah chuan min luhpui a, ka beng bulah zawitê hian, “Ngawi la , awm hle hle rawh” a rawn ti sup a. A chak êm avangin chet thawh vakin awmzia a nei dawn lo tih ka hriat avangin a tih ang ang chuan ka awm a, ka rilru erawh tihfîm hram hram ka tum thung. Kan in pawh ka mitsir chuan a va hmu pha reng tawh. Chutia ngawi renga 1 minute vel kan awm hnu chuan Mapuia bike ri ka hre ta a, ka tal thut a, mahse, chhetê pawhin min chelhtu chu a nghing lo. Mapuia chuan min tlanpelin kan in kawtah chuan a tlan lut ta a. Ka va melh ṭâwk ṭâwk a, ani lah chuan engmah a hre ve der si lo. Mapuia a lut tawh ang tih awm velah chuan kan bulah hian bike a rawn ding ta a. Ka lo lawm hman tehreng nen, a khalhtu chu a chhuk a, chabi chu min mantu kutah chuan a hlan ta daih mai. Helmet a khum avangin a hmel ka hmu ve thei lo. “Mike, ka lawm e, ka hrereng ang” ka hnunglam aṭang chuan a ti thûm leh dût a. Mike a tih chu a bu nghut a, a helmet chu phelhin bike seat-ah chuan a dah a, mask a la vuah tho nia! An va fimkhur tak. Hmalamah min nawr a, heti chung hian ka hmui a la hup reng, min kuah lohna lam zawk a kut chuan helmet chu a la a, a khum a ni ngei a, hetia a inpuahchah chhung hian Mike a tih khan kan in a lo thleng der tawh. Bike dah tur ringawtin a rawn kal tihna a niang chu maw..helmet a khum hnuah khawi aṭanga a rawn lek chhuah nge ka hre lo, chemte tle var mai, sei lutuk lo hi ka nghawngah a chuktuah a, “Bengchheng i siam chuan i hrâwk hi ka zai hreh dawn lo a, thu i awih chuan, naktukah i inah i haw leh thei ang.” A ti vawt raih a. A âwka chhuak hrim hrim chu a hlauhawm êm vang leh Jail tâng tlan chhuak a nih ngei ka rin avangin a thu awih mai loh chu kawng dang awmin ka hre lo. Bike-ah chuan min hlâng hmasa a, min zo nelh nelh khawp mai. Amah pawh chu a rawn chuang ve ta nghal a, idea ka nei thut, a rawn thut rual chuan rang lutukin bike atang chuan ka zuang thla a, “Min pui..” tia ka âu tur chu ka bek a ri no chhawk, arsi a rawn de tuarh a, a thim zui ta hmuk mai. Engtin zel nge min sawngbâwl tih ka hrethiam ta lo. 

Ka harh chuan ka hawi â ruai mai. Ka awmna chu ramhnuai a ni miau alawm. Thing lian tak tak karah mau te pawh ka hmu tel, ka mit ka khap fak fak a, thawh chhuah mai ka tum chu ka taksa kham leh na ut ut vang chuan ka ṭhulh leh ta ringawt. Ka mu hlawm leh ta reng a. Thawm a rawn awm a, ka han men leh chuan palian zet mai hian min lo chhuk en rûn a, ka hlau kher mai. Ka che hrut a, a rawn ṭhu a, ka nghawngah rawn kuahin min kai tho ta a. “Tui hi in rawh” tiin mau thei hian tui chu min tulh ta a. Ka tui a lo hal hle tawh a niang, ka in khawlh khawlh mai. Ka harh ta deuh a, nizana min hnekna ka bek chu a rawn na leh zawk zawk thin. A vûn hial ka ring, mipa ve si khatiang khawpa naa hmeichhia te kut han thlak..ka thinrim et et mai.

“Tu nge i nih?” Ka ti chang rât a. Amah pawh ka en chuang lo. 

“Min en rawh, min hre lo a maw?” A tih chuan hreh zetin a lam chu ka hawi ta a. Ni e, he pa hi ka hmuh tawh hnu a ni, ka hria ..”Tâng tlan chhuak zing ami kha maw?” Ka ti sep a. A lo bu nghut thung. 

‘Eng nge i duh? Ti nge hetia min ruk bo ngawt a?” Ka awki chu a ring mah mah. Mahse, kan awmna chu ramhnuai a nih vang nge engmah chu venthâwn nei awm pawhin a lang lo. 

“Chhan ṭha tak a awm angah ngai rawh. “ A ti hmuk a. 

“Ti nge kei kher? I jail tân chhan nu kha ru bo zawk ta che” ka ti leh hlak hlak a. 

“Rukbo theih nise ka ti em em ang, ka rubo dawn tih an hriat vangin englai pawhin an veng alawm” a ti leh tawp a. 

“Nang hian min pui dawn a ni.” A tih zawm leh chuan awih loh hmel zeta amah melh chungin ka ner nâng a, “Tang tlan chhuak pui tur khawpin ka mawl lo.” Ka ti fiak ṭhak. A nui huk a, min ngaihnep hmel zet hian, “I finna tlemtê tal khan min pui dawn alawm “ a ti duh lek. 

Reivakloah, “Hawh le, kan ṭhiante awmna lam pan ang le..” a ti a. Min pawt ding nghal bawk, puan ka la bih tlat avang chuan ramhnuaia han kal vel chu a harsa riau a, a dawhtheihnain a tlin ta lo nge ka puan bih lai chu a phih lawk a, kekawrbul chhingtê nen chuan ka ding teu mai. Ka taksa hnuailam melh miah lo hian, “Kal rawh” a ti sup a, kawng dang awm se ka ti ngawih ngawih. E! Tak a! Ka phone kha..ka bag chu ka dap vat a, a lo thaw hawk chu ka hrereng, “Ka kawl vek tawh , zawng buai duh suh, thu i awih chuan i chhungkua i hmu leh vat ang.” A ti leh a,. Titau chungin ka kal a, ka ṭah a chhuak hle bawk. Kei ber kher Jail tâng tlan chhuak te chuan min lo target chu a nia! Engtin nge hla zirin ka chhuak tihte kha an lo hriat le..aa..an thu thu anga ka awm chuan ka him hram ka beisei,. Kawng chu a mumal lo hle a, kawng han sialna hnuhma engmah awm lo va han kal chu tluk a awl bawk a, ka tlu ka tlu mai. 2kms vel zet kan kal chauh hnêp hnuah ngaw dur thim lek lekah hian kan lut a, thui vak lovah an bûk niawm tak thlam aia lian hlek tur, lei ringa sak chu kan thleng ta a. Chutah chuan kan mi zawn mek te chu an lo kim ṭhap mai le! Boss khan hria se a va hlim dawn tak, mahse, tunah chuan an arpa chan lai a ni miau si a..ka chhung ten min ngaihtuah tawh turzia ka ngaihtuah a, ka lung a no tlat. A bag ah lai chu chhuatah a theh thla a, Duhawma khan a lo hawng vat a, eitur leh thawmhnaw tlem azawng a lo nia. Zirliana leh Mawizuala te erawh kil khatah an thu reng a, eitur chu ngaihsak âwm pawn an awm lo. Tlanmawia chuan kei chu min rawn enin, “Lo ṭhu rawh” laih hmel zet hian a ti a, a patê lo naa a sawngnawi ru hle, damdawi ti hrep tawh, nghei mek a ni bawk a, a la suffer fo ang tih ka hrethiam nghal mai. Duhawma erawh a naupang ber tih takah a che pawh a zangkhai angreng viau. 

Ka puan chu ka bih leh vat a, ka kekawrbul a chhin deuh avang leh ka bula awmte chu mi hlauhawm tia zoramin a hriat mek te an ni tlat a, thinthia awm ngamna chi a ni tlat lo. An thlam ti tawh mai ang, an bûk te pawh ti ila a dik thei tho, a lian angreng a, a bang chu dap leh eng hnah hnah emaw hian an ping ve a, a chung erawh dî niin ka hria. A chhuat phahah dap an hmang bawk a, ni 5 chhung leka chutiang an ti hman chu ka awih lo, tu te emaw thlam ram tawh an cheibâwl ṭha leh a nih ka ring. Ṭhuthmun ka han remfel hnu chuan min hruaitu ber chu a rawn ṭawng chhuak leh ta a. 

“Kei hi Hmangaihsangzuala ka ni a, i hriat angin jail tâng tlan chhuak kan ni. Tunah hian kan aiawhin Zoram mipuite i hmachhawn dawn a ni” a ti thûm chhak a. A hmela tumruhna lo lang chhuak chu hmuh hmaih chi rual a ni lo. 

“Engmah tih theih ka nei lo.” Ka ti hul hmak a. 

“I nei ngei tur a ni.” A ti fiah leh kâk a. 

Zirliana chuan, “Tual kha kan that miah lo asin. Amah leh amah a invit palh a nih kha” a lo ti chuai raih a. Mawizuala pawh chuan, “Sual chu kan insual ngei alawm, mahse, kan lo kamnam ve tawh nen, chemte kha a rawn phawrh ta mai a, kan inhnaihchilh tawh si, engtin nge amah kha a invih theih kan hre bik lo..” a lo ti khur ve hlak hlak bawk. An judge ka ni mang si lo. 

“Convict pawh in la ni lo va, court thu chhuak ngaichâng reng ta che u, engvangin nge in tlan chhuah?” Ka ti ve khar khar a,. Ka zâm duh tawh bik lo. 

“A remchâng êm a ni.”.Duhawma zawk chuan a lo ti daih a. Anni hi chuan thiamthu sawi tur an vân khawp ang. Damdawi kha an hnen aṭanga mansak an ni miau si a. Ka ngawi rân a, An hmel chu ka melh kual dan dan a, Tlanmawia chu sawi tawh ang khan a dang bûl mai a, a heh a liak sek bawk, a mitmeng pawh a phakar hmel. Duhawma erawh hmel pha dai hi a pu a, hlauthawng reng ang hian a awm, mipa hmelchhia tia sawi tur a ni hauh lo thung. Zirliana thung chu hmulphurh chhe chi kan tih ang, hâng ve lam, meng kawr mai, patê khin khen hi a ni a, Mawizuala erawh a palian fû roh tih a ṭhut pawh chuan a hriat theih, thahrui ngah hmel tak, pawisak nei vak lo hmel a pu a. Hmangaihsangzuala hi a danglam lawtlak thung. A hmuihmul chu tlem a ṭo a, a lang tham meuh lo, khabe hmul erawh a zuah ṭhang tih a hriat a, a mitmeng chu Mizo mitmeng ang lo takin a hring duk lam a pâwl lek lek a, a meng fiah hle bawk. Hmai tung lam niin a khabe kual pawh a lian lam a ni. Nula thenkhat chuan hmu se tâng tlan chhuak a ni tih ngaihtuah lêk loin an hum duh maithei a ni. Mahse, ani ber hi ka tan chuan a hlauhawm, pawngsual case vanga man a ni miau si a. 

“Enteh, nula, e..aw i hming kha Laldinkimi a ni tak e. Ka hria che alawm, report pawh i pe thiamin i thuziah pawh ka chhiar fô ṭhin. Mahse, tun dinhmunah chuan kan mi tâng i ni rih. “ A thusawi dan hi a ti hmuk hmuk zel mai, a nelawm loh. Engah nge maw kei pawh chuan tâng tlan chhuakte chu nêl ka’n tum ngawt mai le..ka inthing harh vat a. 

“In duh chu eng nge a? Haw vat ka duh a nia, ka bo tih an hriat chuan nangmahni bak an rawn bitum dawn lo che u a nia..” tiin ka han tlan khalh ve ngial a. 

“Kan hria,. Engpawhnise, kan case kha i lo zir chiang vek tawh em?” Hmangaihsangzuala bawk chuan min melh kul chung chuan a han ti leh a, “Aw” tih chauhin ka chhang. Chutihlai tak chuan ka phone min laksak kha a switch on a, va lak ka tum chuan a lo phal lo nasa. Beidawngin ka thu hnawk ringawt. 

“Hetah hian i aw i record ang a, i boss hnenah kan thawn ang. A nin Police kutah a dah thung ang, a chiang em?” A ti nghut nghut a. Kidnapp ni mah ila, min phuarin kutthak hnawih nan min hmang ve chuang lo bawk a, an thu awih phawt chu ṭha maiin ka hria. 

Tichuan, ka aw chu min record tir ta a. 

“An kutah ka awm mek a, engtinmah min ti lo ve. Anni hian thil phût an nei ve a, an case ṭheuh kha vawi khat tal ennawn leh nise tih an duh a ni. Tlanmawia leh Duhawma bik erawh chuan an tân hun chhung pawh tawisak tur emaw bail-a chhuah phalsak turin an ngiat thung. Midang ho erawh chuan an case kha fair tak leh thamna sum chevel thlen theih lohna hmuna ennawn leh an phût a ni. Tin, chumi chhung chuan an chhungkua tirâlkhêl leh tithlabâr zawnga mipui ten chet la lo turin an duh bawk. “ Tih thu ringawt chu a ni ka sawi ni. Boss ka thawn hnuah ka phone chu min pe a, “I chhungte bia la, i ṭhat thu leh mangang lo turin hrilh rawh” a ti ram hmuk a. Kalsawn deuh ka tum chuan min lo dinchilh hmak bawk. Melh râwm râwmin ka pa number ka hmet chhuak a, ka nu chu a chiâi leh dawn tih ka hriat vang a ni. 

“Tei, khaw nge i awm?” Hlauhthawn hmel fahran hian a rawn ti nghal a. 

“Pa, ka ṭha a nia, naktukah chuan ka lo haw thei turah ngai ang. Ka nu kha lo hnem la, engkim a ṭha vek aw. Tâng tlan chhuakte khan an thuchah puangchhuak turin min duh a, min la lawk a nih hi, engtinmah min ti lo a nia. Chuan, min lo zawng suh u..i hrethiam tiraw?” Ka ti nghal mawlh mawlh a. Zirliana chuan ṭawng thei min tih hmel ngang mai. 

“Aw..awii, i tha takzet a maw? Khawtlang kan inpunkhawm mêk tawh asin, mahse, i sawi ang chuan ka lo ti ang e..khaw nge in awm reng reng?” A rawn ti a. 

“Ka hre bik lo, Aizawl khaw chhungah chuan a ni lo” ka tih lai chuan Hmangaihsangzuala mitmeng chu a thîp sawt a, “Ka hre lo takzet, ka dah phawt ang aw. Ka lo haw vat ang , ka ṭha a nia.” Ka ti leh hmawk hmawk a, ka phone chu min chhuhsak leh nghal. Ka sana ka en chuan dar 12 a ri ṭêp tawh a, ka ril pawh a ṭâm takzet tawh. Nizanah min ru bo a, tihian ramhnuaiah kan awm leh daih a, engmah ka hrethiam lo. Ka rilṭamzia hrethiam niawm takin theitui leh biscuit hi min rawn pe a, zah pawh sawi loin ka lo ei hmuar hmuar mai. Tlem chuan ka harh ta deuh e. 

“Tihian engtikah nge min hruai hawn in tum?” Tih bik pawh nei loin ka ti ngawt a. 

“U Sangzuala khan a dah kir leh ang che. Zanah..” Duhawma chuan a lo ti var a. Sangzuala erawh a ngawi rûn reng a, eng emaw ngaihtuah hmel a pu. Ka chauh riau avang leh ka puar tawh si vang ni maw ka hriat loh karin ka lo muthlu daih a nih chu! Misual ho karah ngaihngam leh thinthi diaiin ka muthlu thei chu ka inzahpui lek lek zawk, fimkhur lohthlak lutuk. Ka harh chuan a lo tlai tawh viau a, dar 4 a ri lek lek tawh. 

“Thil ei leh la, kan kal ang.” Sangzuala chuan a lo ti sup a, ka ril chu a ṭam em em tawh lo. “Ka ril a ṭam tawh lo” ka ti a, “Kan kalna a thui tham dawn a nia” a ti duh lek a. Tui ti vak lo chungin theitui leh chhangthawp chu ka ei ve leh ta mai bawk a. Ani chu ain hnawhpuar tawh a niang chu maw..

“Lo fimkhur u la aw..” tiin kan kal dawn chuan a ṭhiante chu a chah zui mawlh mawlh a. Tichuan, kan kal hrep tawhna kawng chheng chhe zetah chuan kan inchhawm leh ta hnek hnek mai. Lehlamah kan hna avang hian ramhnuai hi chu kan kal fó a, a chang chuan nuam ka ti phian zawk thin. Mahse, tun ṭum chu kawng a mumal lo êm mai a, ka tlu reng mai chu ka ning tawh a ni. Ngawi renga kal dun mawp mawp chu ka ning tawngkhawng ta bawk nen,. “Khaw nge bike kha?” Ka han ti tâwng a. 

“Kawngah” a ti sup ringawt. 

“Kawng aṭang chuan engtin nge khalai ka harhna hmunah khan kan kal a?” Á deuh hian ka ti leh a. Nin hmel lek lek hian, “Ka pua che” a ti leh hmuk. Biak zui zel chi ni paw’n ka hre lo. Ngaw chhung a nih vang nge a thim chu a ni ruai tawh. Ngaw chhung kan la pelh fel hma chuan vawi leh khatah silai puak ri dawt kan hre ta mai..kan ding chawt ve ve a, silai a puak leh dawt, awrâwl ṭê deuh ruai ruai chu kan ralkhat hriat a, rang lutuka min rawn kuahin kawng chhaka thing lianpui zung thlâr lian pui phênah chuan min ṭhutpui ta a. 

“Hetah hian lo awm ang che. Ka va en lawk ang e” a tih chuan rang lutukin a kawrah ka lo pawt, “Aih, ka awm ngam lo, ka lo kal ve dawn” ka ti ṭiau a. 

“I lo awm a ngai, ka ṭhian ten buaina an tawk a ni ngei ang, ka va thlithlai a ngai” a ti a. 

“Ka awm ngam hleinem, bakah tihtheih i nei chuang lo” ka ti tlat si. 

“Tihtheih ka nei ngei ang,.” A tih mêk lai chuan kan lam pana rawn ri phei nawk nawk kan hre ta mai. Rang lutukin ka hmui a rawn hup a, min khuap rûn bawk, a thim tawh avangin an rawn kal hnai a nih ngawt loh chuan min hmuh a rinawm loh. “Khawiah nge in ṭhiante chu? Sawi vat r’u..” mizo ṭawng pai lek lek hian pakhat hian a ti lâwng lâwng a. Ka meng phâwk viau. Ka bul ami thaw pawh chu a rang viau mai. Tlanmawia chuan dâwih aw deuh hian, “Kan hre lo takzet, tunah chuan khua an thleng tawh ang.” A ti a. Ka khawngaih tak tak a ni. Ka beng bulah, “Nangmah chhan chhuah tumtu che an ni lo. I hria tiraw?” A rawn ti thawp sup a. Zawi muangin ka hmui a hupna kut chu a la thla a, ka thaw huai mai. 

Pakhat hian vin leh pai zet hian, “Nangman engmah sawi dawn loh chuan that ve ang che, nula kha keimanin duh, khaw nge awm? Sawi vat raw” a ti ṭêng chhuai a. Ka lungphu chu rang tak a ni. Ka rak chhuah mai loh nan ka hmui chu ka hup a, ka bul ami chuan a sawi dik zet mai, anni hi Mizoram police an ni awzawng lo. Tunhnai lawka Unau tia kan lo mikhual, raltlân mi ṭha tam tak zinga suahsual rawngbawl Burma rama chho duh si lo ho, Mizo thingtlâng khaw ṭhenkhata huangtau chhuaha nunau tithlabârtu te kha an ni ngeiin ka hria. Sawrkarin a hmet mit tawh emaw tiin kan ngaih a lo ṭha tawh a, an hnampui, Mizoram chhunga la chambang mek te paw’n a ruka an zahpui leh an huat rûk em em te ngei khan keimah ngei hi min rawn zawng a nih chu ! Engtin nge ka bo tih an hriat a? Engtin nge Tâng tlan chhuak ten min kawl tih an hriat theih le? Ekhai! Thil hi a lo rilin a lo thûk riau a ni lo maw aw..

Sangzuala chetsawn tum chu ka chelhbet vat a, “Kal suh” ka ti ṭiau a, “Ka ṭhiante ka chhan a ngai” a ti sup a. 

“Silai an neih kha” ka ti a. 

Anni ho pawh chu an kal kiang a, kan kal lehzelna tur lamah chuan Tâng dangte chu an chhawm ta zel a, an tam lo, pali vel lek niin ka hria, mahse, hmanrua an nei tlat a,. An kal liam ta maw tihah, “An kim lo, kir ang” tih leh min kaih a rual, ka puan bih khan thingchawr lai a lo bât tlat chu niin, min han pawh nat takah chuan a thler hawk a, ka petek nawk chuan amah chu ka va su zawk a, ka bawh nghal ruak bawk, kan tlukna lai lah chu a lo zawl em em si lo, ani inring bawk si lo nen, kan lum dun ta a, mahse, min chelh bet tlat a, kan lum thui lem lo bawk. Ka puan kha a inphelh daih avangin kekawrbul nen bawk chuan ka ding leh ta teu a. Ngawi rengin ka puan chu a han la a,. “Kal ang” tiin a kut a rawn pharchhuak a, ṭah chhuak lutukin ka lo ban ve ringawt. Bûk kan va thlen chuan..Karei! Zirliana kha bang ngheng hian a lo ṭhu a, a lu chu a hêk ni mai hian ka hria..”Ṭhianpa, ka tihpalh..” tiin ka puan khan a hmai chu a va khuh a. Min rawn enin a thaw hawk a, tapa mei alh teng teng bak êng dang a awm lo. 

“Ka bula i awm rih a ngai” a ti vawt raih a.