lalsangliana last

AW..! LALSANGLIAN..(7)

Ziaktu : Toni Râlte

Sangliana chu rang zetin a tho nghal thuai a, phâwk zet hian Melody chu a melh bawk. “He..hetah eng nge i tih?” A ti a. A aw pawh a zawi hran lo. Pindan lehlama mu a ṭhiante pawh chuan an hre pha maithei a ni. Melody chu muangchang hian a rawn tho ve a, kekawrbul fahran, a mal tawp dawn dawn lang thei khawpa chhing a ha a, lace dum, a bra hmuh theih vek khawpa pan kawr themlem zet a ha bawk. Sangliana chu a rawn pan a, ani lah a tawlh hnung ve zel si. Hmeichhia a hlau a ni lo, a thil tawn mek chu mak a tiin a hamhaih êm a tin ni. “Taite, min haw suh aw. Ka tihpalh, ka duh êm che a ni.” Melody chuan a ti ta a. 

“Mahse, engtin nge hetah i awm theih?” A ti khur dat a. Melody hmeltha a lo tihna te kha an bo duak mai, a hmusit hran miah lo nain a boruak hap chu sang a ti lo thei lo a ni ber. 

“Nia, i muthilh tawh hnuah ka rawn lut a, zan khat chauh tal i bula mut ka duh a ni. “ Melody chuan a ti leh a,. “Chutiang tur a ni lo. Va haw rawh, thil tih chi a ni lo” Sangliana aw chu a chang hle. Mipa zaidam tak a ni thin a, a thil tawn teh thut hian a ṭhawng ve hle tih a lang. 

“Min duh ve mai thei lo em ni? A nih loh pawhin ka hriatreng tur thil min hnutchhiah tal rawh.” Ngenngâwl tak hian a ti a. 

“Melody, bialnu ka nei a, a tan ka rinawm dawn, ka phatsan dawn lo. “ a lo ti nghet charh a. Melody erawh a zâm phah eih lo nge ni, a rawn melh kal mai a, “Min duh ve turin ka nawrlui hleinem che, hriatreng tur thil min hnutchhiah rawh ka ti mai a ni” a ti leh sap a. A kawr bahna chu nam liamin bra nen chauh chuan a ding ta teu mai le. Sangliana mang chu a ang ṭan ta, “Min hrethiam ang che. Chutiang ka ti ve thei lo. Ṭha takin nung rawh, khawngaihin, .” A ti thâm ṭuak a. A kekawrbul phelh tuma a vawn lai tak chuan va pan hnaiin, a kut chu a chelhsak a, a sawi nawk nawk mai. “Duhtawk rawh. Inha fel la, ka va thlah ang che. “ Tiin chhuata a kawr chu a chhar a, “Khaw nge i thawmhnaw pangngai “ a ti zui zat bawk. Melody chuan chuti taka mipa inthunun thei chu a la hmachhawn ngai reng reng lo va, a zahin a duhna leh ngaihsanna chu a pung zual sauh mai. Mahse, a chhungrila ṭhatna leh pawisawi lohna la chambang chuan rawn chhem harhin a awmdan teh hrep chu a inzahpui ve ta hle a, pindan kil lam chhuara a thawmhnaw dahte chu lain a inha sawk sawk a, “Thlah ka ngai lo, ka lawm e. Zanina thil thleng hi hetah hian tawp rawh se , ka tihpalh aw. I bialnu chu a vanneihzia i lo hrilh dawn nia..” tia nui sakin pindan chu thawm dim takin a chhuahsan ta a. 

Sangliana chu a mu thlawp, chunglam melhin a inngaihtuah vung vung mai. Mipa a ni a, mi tilreh a ni bik hauh lo mai. Mahse, hei chen lo hruaia he dinhmun hlu tak petu Pathian a zah a, a nu leh pate zilhna leh fuihna te a hrereng lo thei lo bawk, tin, a tana rinawm taka lo awma lo nghak ve mektu Ngurtinsangi a theihnghilh hauh lo bawk. A chhing vang vang a, “Lalpa, min tichak zel rawh aw” a ti sup a. 

“E..lo leng rawh,.” Tiin Malsawma lo lut mek chu a lo nuih var var a, “Vawiin i incheck up chu eng nge chanchin ni ta?” Tiin a bulah chuan thuthmun a rem ve nghal a. 

“Ka ṭha tawh viau, Doctor te pawn mak an tia, Pathian vang liau liau a ni. “ Nguri chuan a lo ti siam siam a,. Pi Dingi erawh thenawmte damlo kanin a chhuak a.

“A lawmawm nasat chu,. I hmel pawh a rawn tha chho leh tawh alawm, kha..” Malsawma chuan a ti luam a. Nguri pawh a hlim sârh mai. 

“Chuan, Taitea te chu engtik nge an lo hawn dawn?” A ti nghal zat a, “Naktuk tuk lehah a niang. “ A ti ringawt, sawi nuam a ti vak lo. “A nun hi a zahawm reuh ngawt mai” Malsawma chuan a ti sup a, Sangliana sawi chhe zawngin ṭawngka a cheh duh hauh lo. Mipa â lo tak zawng a ni chiang e. 

A tuk zing Sangliana ten breakfast an ei lai chuan, Mawimawia chuan, “Nizan khan i ṭawng bul bulin ka hria, ka harh chiang lo zawk nge ni? Phun bul bul thawm ka hre tlat” artui hmawm zauh pah chuan a ti a. Sangliana chuan nizan lama thil thleng kha sawi a tum zet naa, Melody an hmuh dan a danglam phah a hlauh avangin a ngawi leh ta zawk a. Engmah hre lo awmin a awm ve leh hmiah, an ringhlel zui lem lo. Hostel lama a thiante an phei pawn chhuanlam a zawng a, a va phei duh ta miah lo. An châm chhung zawngin Melody nen chuan an inhmu leh ta lo bawk, chu chu an pahnih tan pawh a ṭha zawk reng reng e. Mizoram lam an rawn chuangkai leh ta a, a zin chau vak lo bawk a, Zanah Nguri a va rim zuai a, rei erawh a leng lo. A thil hawnsak te chu a pe ve a, Nguri pawh a beisei ai daihin a lo harh tawhin a lo ṭha tawh a, Dawrah erawh thla thar aṭang law lawin a kal dawn a ni. An hrethiam thei zel a, an lawm nufa viau mai. 

Champhai lamah zin leh a ngai dawn a, an zaithiamna a zarah Mizoram hmun hrang hrang an fang kual thei a, vannei an inti khawp mai. “Champhaiah chuan lo kal ve mai ta che, ka thiante pawn an bialnu hruai an tum asin” tiin a sawm ve ngial a, “Incheck up a hun leh hnai tawh sia, bakah ka dam a la chiang lo nen, hun dangah ni zawk rawh se..” Nguri chuan a ti a, zin chu a châk ve reng, mahse, a dinhmunin a la zir lo ve êm a ni. 

A tawi zawngin sawi tawh mai ang,. Hun a kal ve zel a, Nguri pawn a hna a zawm tawh a, amahah insawiselna em em a nei tawh lo. Sangliana pawh a fans te lamin a indanna tur bungrua an tuaksak a niawm a, Tar hâwkdâk inti, senior ho group lam phei chuan an thawh hlawk hle nghe nghe. A tan heng mite hi an hlu takzet. Kum a tawp dawn tawh a, Christmas pawh an hnaih ta viau, kum thar aṭang law lawa in hrang chan pawh chu a tintuah ru ve a, Nguri chiah a la hrilh thung. Tunah rih chuan zaia sawmna a la dawng kal reng a, ama mimal buaina pawh a la chingfel hleithei rih lo. Nguri û Mama leh a fate pahnih pawh Aizawl lamah rawn inbengbel vein Nguri te an fin loh theih loh avangin an awmna chu a chêp ta deuh a, an in luah aia lian deuh zawk an luah ve leh tawh a ni. Chutia naupang awm ta bawk chu Pi Dingi khawhar pawh an hnem hle nghe nghe a, Ruati te khan bungrua an la rum rum si a, Mama lahin lo dan a tum eih bawk si lo,. A ruahman tawh angin an in chu midang luahtirin a fate nen tihian Aizawlah an khawsa ve ta hmiah a, Ruati inchhir leh lungleng chuan a fate chhuanlama rawn biak a ching a, “Ka rilru ka lamlet leh palh ang, hremhmunah ka awm duh tawh lo” tiin mama chuan a number a thlak ta hmiah a. Ruati pawh a reh ta rih, mahse, engtikah emaw a la rawn zawnchhuah tho chu an ring. Chutitaka Mama han luhlul leh ta si chu mak pawh an ti viau a, mahse,, “Thudik kha ka hai ngai lo, Ruati khan lemchan a thiam ém a, ka fate hi fahraha siam ka hlau bawk nen, ka rilru kha a hneh zel a, ka tih duh loh pui pui min tihtirin ka thluak kha a su hneh lutuk a, ka chak lohna lai a hre si,. Mahse, ka nun a hlim ngai lo, nasa takin ka inngaihtuah chho a, hetiang nupa hlim lo, sum leh pai thlahlel reng reng kara naupang seilentir ai chuan inṭhen mai ṭha zawkin ka hre ta a, Ruati lahin ka thu a hnial hreh ngai si lo, min hlau tawh lo lutuk te chu ka thiam loh vang a ni tih ka hai lo va, siamṭhat ka tum ve nasa, mahse, a nun a sim duh miau loh avang leh a chhungte lam lamin ka neih rosum eisak phêt min tum tak zelah chuan ka rilru ka siamfel ta mai a ni. Tihian, kan pafa hian kan ṭha zawk. “ Tiin an nupa inkar chu a sawi nghe nghe a ni. 

December thla an chuangkai a, Sangliana pawh an khua leh Aizawl a kartawn deuh reng a,. Nguri nen chuan inhmu zen lo mah se; an rilru erawh a nghet dun a, an tan hun thawl leh remchang a la awm em em ang tih an beiseina chuan an rilru pawh a thunun hneh viau mai. Mi dawhthei ve ve an ni bawk a, thikthu vanga inhauh pawh an nei khât khawp mai. Nupui pasala insiam tur erawh chuan an kum a la naupang ve a, hun an la ti rih chiah lo. Sangliana paw’n a rilruin tum mumal tak a nei a, kumte lo thar se, IGNOU aṭang emaw MZU aṭang emaw tala MA zir leh a tum rilru ve a, a zirna senso chu amah pawhin a intum ve vek thei tawh dawn a, hna chhetê tal a neih loh chuan chhungkaw din chu a huphurh ve deuh bawk a ni. 

“Christmas chu in khuaah i hmang awm sia tiraw?” Nguri’n a tih chuan, a bu nghut a. “Chhungkaw kima hman hram hi ka pa duhdan a nia. “ A ti a. Nguri pawn a pawmpui hle. 

“Kumthar tal chu hetah hmang la, ka khua a har dawn e” Nguri chuan a ti ve ngial a, ni e, an awmna vengah hian thian tia han sawi em em tur a nei mang lo va, an awmna a la rei lo bawk nen. A thian a thawhpuite lah an veng a hla ve bawk si,. Hunpui angah hi chuan mahni tlawnga han hman hi a khawharthlak dan a zual bik a, Sangliana chu a thlahlel ve bawk a ni. 

“Nia, ka pain rem a tih chuan rawn hman chu ka duhthusam alawm” Sangliana paw’n a lo ti ve a. Tun lai tak hi Cteii leh tleirawl kha an reh ta deuh a, Modeli erawh a la ngai reng,. Sangliana pawn ngaiah a nei deuh tawh a, a be liam ve mai mai tawh. A ní te ina a rawn kalchilh ṭum erawh kha chuan a lungawi vak lo. Boruak a rawn ngam sârh sârh viau a, a nî fate chu thalai ve tho an nia, a vengthawng em em hran lo. Anî leh a pa Zâma te mawlh kha an mitmei a veng a ni ber, Nguri takngial pawh a la hruai lut lo a nia. A rawn biak dan leh tlangnel danah a bialnu angah an ngai dawn hian a hria a, khami ṭum kha chuan polite harsa a ti ve khawp mai. Mahse, a haw hnuah a hrilhfiah ta tho a, aní pawh chuan “I hmeichhe duhzawng a ni lo tih ka hrethiam nghal vek alawm..” a lo ti thliam a, a thaw huai mawle. 

Tunah chuan a thian, icon top ten chinte chuan Nguri pawh an hmelhriat ve vek tawh a, an zinga phawk ber Petera lah chuan, “A tir khan patil emaw ka ti hman ṭêp a ! A nu hnâp lo ve bawk nen, mahse, Bro, tiang hi an ṭha, rit chawi an chak a, i icon hnu hian i rihna a pung chak sia..” a ti vei luam a, Sangliana’n a melh no lo teh e. Nguri chu an han belhchian hnuah erawh an nêlin, a zirna ngaihtuahin a bright an ti a, a eisiam lah tui an ti em em bawk. Mahse, an thianpa bialnu neih thu erawh midang bulah an zep ve tlat thung, engkimah an inhrethiam tawn thin hi an fakawmna a ni. 

Christmas pawh a hnai ta, Ni 23-a haw chho tawh tur a nih avangin bazar ve ngei an duh si, Zaithiam rawn lar thar em em Zothana te nen an pathum chuan an bazar ve ta a. Intihlar vak an duh loh vangin an kal lawr vak lo. Nguri chuan a lo khawl ruk ve ṭáng ṭang hmang chuan Sangliana chu Christmas present atan Jacket manto zet leh sana simple leh changkang tak si a leisak a, mahse, a la pe duh rih lo. A hawn dawnah chauh pek a tum a ni. Sangliana paw’n eng emaw chu a leisak ve chiang e. Thil intihsaka inleisak hi a manto leh to loh lam aiin a petu rilru hi a pawimawhin a langsar zawk fó ! Thilpek te hi ngaihsakna leh duhsakna tak takin a zui si loh chuan hlutna a nei tampui lo. Sum hi hmangaihna lantirna a ni lo va, Hmangaihna hi suma lei theih a ni hek lo. Mahse, thilpek tel lo hian hmangaihna lantir hi a theih loh tawp chu a ni lo va, a serh zinga a mei ang maia tel ve zel erawh a ni chiang khawp mai. 

Tichuan, Sangliana pawh an khaw lama Christmas hmang turin a liam leh ta. A hawn dawn zanin a leng a, an thil inleisakte chu inpe tawnin, Zan rei tak thleng an meng dun a, An inhmuh loh rei ve deuh dawn avangin an inthlahlel kher mai. “Tumah hmanpui a ngai lo, Ar kang rual pawh i ni tawh lo. I vahte nen hian hmangho u la a tawk reng aw” tih chu Sangliana’n vawi 3 a sawi hman nia! A bialnu hi a hauh ve nasa ngang mai. 

“Kâwn chei vel ka enpui ve ang..” a tih pawh chuan, “I û te nen kal ho ula,. Zu rui tu te emaw te tawng ula, tuin nge chhan ang che u” a ti zel si. Nguri pawn tihngaihna tak a hre tawh bik lo. 

“Nang pawh zaikhawm char char ang che” a han ti ve ngawt a. 

“Tehreng, ka lam nasa viau ang” a lo ti hmak zui. A ṭha vek zel e aw..Lalsanglian..

Chutiang chuan Christmas vuakvêt chu hlim takin an hmang ve mai bawk a, Nguri pawh a vahte avangin khawhar lo takin a awm ve thei a, Lalrini leh Sawmi te an rawn leng phei zauh zauh bawk nen, Malsawma pawh rawn kal zuk chang a nei, a hma ang khan a zar em em tawh lo a ni mai a, fel thu-ah chuan a la ngai reng mai. Sangliana pawh a lo sawi tawh ang ngeiin inkhawm leh zaikhawmna lamah a hmel hmuh tur a awm ve reng a, Pathian faka lam te chu nuam a ti bawk a, a lam a lam mai. A lam lai video te chu a la viral zui a! Miten an ngaihsan belhchhah lehzual ngei mai. Ruaiṭheh ní-ah IG lamah a live a, Nguri chuan a lo en ve ngei bawk. Comment tam takah karah, “U Taite, min lo bye bye ve” a va ti vel a, Sangliana’n a lo hre ve kur si, a nuih a za hle a ni. “Nguri, bye bye” te chu a tih ve bawk kha maw. Mas leh kumthar inkarah Serchhip leh Thenzâwlah a zai leh hram a, khaw hla deuh erawh zin hman a ni rih lo ve bawk a. 

Dina hi ṭawng phawng phawng chi a ni ve bawk nen, vawikhat an awmkhawm ṭumin, “Laltai, sum hi i khawl hnem riau tawh lo maw? Vawikhat concert-ah a tlem nerah sing 8 te i hlawh a nia, Lammual leh kolasib leh Lunglei velah te phei kha chuan nuai khat aia tam kha an pe ngei dawn che a. Nang hi i hausa viau tawh ang a, “a ti leh lung lung a. 

“Awihawm loh e, hmanna tur a awm ve zel alawm le. Hausa lo nasa” a lo ti duh lek a. Nguri’n sana a leisak kha a la bun ve ngar ngar a, a sana a thlêk apiangin Nguri hmel a hmu tel thinin a hria. 

Amuana chuan, “Zai hi zir ve mai ka duh,. Taia ai thlawt chuan ka zei zawk dawn bawk sia. “ A lo ti ve a , an nui ho dar dar mai. Ruaiṭheh tlai khan Rotea leh Pêm tleirâwl Biteii te leng dun, inphur kha an lo hmu ve vek nen, Rotea rawn lut chu awmze nei zet zet hian an lo fiam a. “Tlemin saw ai sawn khal deuh se, a hmel saw chu a zia reng. Rote, i thlang sual lovang, a nungchang nise a zawiawi reuh si. “ Buanga chuan a lo ti zûrh zûrh a. Rotea lai ve bawk si chuan, “In ṭawng thei si ka ning,. Kalna apiangah min chhaih a, mi pawn bialnu an nei ve tho, nge kei chu min chhaih reng bik a..” a ti hlur a. 

“Laltaia nau i nih vang a niang” Dina’n a lo ti khauh. “Ani pawh U Nguri nen an ni ve tho em mai” Rotea chuan a ti ta ringawt a. A chauhthubarawh a chhe ṭan hle a ni. 

Dina sawi ang deuh khan Sangliana hian tunhnaiah ringawt pawh sum chu lalut hnem hem hem tak a ni ve a, mahse, nakina a zirna tur bakah in hrangte a chan dawn chuan mamawh a la ngah dawn a, chhungte tibuai lova mahnia engkim tih vek a duh a, ruahmanna pawh felfai tak a siam a ni. Ruihhlo leh zuk hmuam ti lo ta na nâ na chu hmanna tur a vâng riau, a inkhawl tam thei ngawt ang le..

Kumhlui thlah zan, ni 31 december chu an thleng ta a, Parteii te in lamah zanlai inkhawm hmain ar an kang ve a ni. An hlim dar dar viau. Dina pawh Serchhipa a star kha a va hruai ve ngei a, Sangliana leh Buanga’n ar an puah a, Dina hlim nui vún vún chu an sawi dun a, an nui hak hak mai. A bialnu hi a duh ve hleuh hleuh ém a ni. Nguri nen ar an puah zawhah an inbe zuai a, “Hei kàwn chei en an ngen ve tlat a, Thenawm nula te nen kan en ve dawn” a rawn ti a. 

“Mipa an tel em?” A va ti chat. 

“Tel lo tel lo, a ninawm” a ti hlak a. 

“An tel ka hlau alawm” a ti ṭâlh. “An tel lo, hlauthawng suh, ka duat” a rawn ti ve ngei. Han inkoh duat vel hi an nei ngai mang lo va, Nguri phei chuan a koh duat ve vawikhatna a ni hial ang. Sangliana pawh a lai hû mai. Tiang chuan zanlai inkhawm hma deuhin an ar kan chu thingpui sial tawk nen an ei ta liam liam a, Dina erawh an ei zawh veleh a bialnu a thlah leh a ngaih avangin an chhuak zui nghal. Midang zawng chu inkhawm turin Biak in lam an pan ta a. An hmang ṭha thawkhat viau e. Hunpui hi mizote hian a ṭha lo zawnga hriatreng tawh tur hian kan hmang fô mai a, hei hi chu a felhlel deuh a ni e. Thil ṭha lo leh buaithlak tak bawk chu kan sumdawngte hi an ni,. Vai ho te chu an hunpui a thlen ve dawn chuan an thil zawrh engkim a man an tihniam vek a, mizo te thlengin kan dawr luai luai zel a ni ngai a, Mizo te erawh theihtawpin kan tito a, thingtlang aṭanga bazar, neihthinglungkhawng takmeuha an fate thil thar tur tuak vete an khawngaihthlak fâl thin. Hei hi chu inenfiah deuh chu kan ngai a ni. Thil thar neih hi tupawn kan châk a, thenkhat phei chuan kum tawp an nghahhlelh chhan te a ni ve hial thin. Ringtu intite ram hi a chhe mêk zel chu a nih hi maw..

Nguri te pawh an fang rei hran lo, tlai lutuka haw kha naupang an hruai bawk nen, an thenawm nula Nunui nen hian inkawm nasa lo mah se; inkhawm leh khawhar in kal tih luklak velah chuan an kal rual thei ve zel a, a tihzia phian mai. 

Kum a lo thar ta,. Eng tak rawn herchhuahpui ang maw? A ṭha lam a nih beisei phawt ang. January thla laihawl vel atangin Sangliana chuan in luah tur a melh ve ṭan ta a, Nguri te veng a nih loh rau rau paw’n an veng hnaih deuhah a zawng hram hram a. Nguri pawn a lo melh kualsak ve nasa. Vanneihthlak takin Nguri te veng thenawm lawkah in hnuai te fel rên râwn, mahnia awmna atana nuam tawk lek, felfai leh bungraw awmsa pawh tha tak tak awmna an hmu ta hlauh mai. A vanneihthlak lehzelna chu a chung chu office atana hman a ni a, a in neitute chu a piah lawkah an khawsa a,. Uaptu leh viltu a nei run dawn lo va, Sangliana tan pawh a nun a zalên ve deuh ang a, a nuam daih zawk ang. An han intifel a,. A fans te’n a in dan hun atana an lo tuaksak ve ṭâng ṭâng bungraw thenkhat chu a rawn thleng ta zut zut mai. Sangliana lawm bawk si chu a hnukte a ulh ve hial mai. Chutitaka duhsaka a tana inphalte chu a tan mi hlu an ni a, tihbeidawna tihnat loh hram a duh em em a ni. Nanui leh a ní te’n an rawn tihfelsak bawk a, Nguri pawh a hun awlah a va kal ve zeuh zeuh. A in luah neitu te hi an fate hmun dangah zirna avanga an awm bo vek avangin an nupa bakah an awmpui nula pahnih te nen an khawsa tlawng a, pa tha leh nu tha tak an nih hmel bawk. January thla tawp lamah chuan a luah lut thei ta a. A luah luh tlaiah a thian Bâwktlâng ami te bakah a icon contestant pui te leh a chhung leh khat te nen chaw an eikhawm ve laih laih a. Nguri pawh eirawngbawlin Nanui nen an buai dun hle. Eisiam a thiam bawk a, an fak tliar tliar mai. Ani pawn nuam a ti ve khawp mai. Thenkhat ten chaw an la ei lai mekin Modeli leh a thiannu te an rawn lut ve hlawl mai le. Boruak chu engtin emaw a awm nghal dûk mawle. 

Zâm vak lo tih hriat zet hian, “Min sawm lo mah la, kan rawn kal ve tawp. Hei kha la rawh, ka indan vena che a nih kha..” tiin parcel lian angreng tak hi a pe nghal a. Sangliana pawh chuan, “Tumah a hrana han sawm ka nei lo, lo thu r’u, in va fel ve. Chaw in ei nghal zawk dawn nge?” A lo ti ve sawk sawk a,. “Chaw ei em em pawh kan tum lo. In kham lo palh ang” Modeli chuan a lo ti a. 

“Ekhai! Chaw in ei loh ten le..” tiin A û chu a mitmei zauh a, Nanui chuan, “Lo kal r’u hei a dawh theih nghal aw” a lo ti ve var a. Modeli thilpek chu a han hawn chuan, bel set man tlawm lo tak mai hi a lo ni a. “Khai a! A man a to awm si a, a zia lo êm mai. A lawmawm bawk si” tiin Sangliana chuan lawmthu a hrilh mawlh mawlh a. “I phu alawm. “ A lo ti ve mai bawk. Nguri pawn modeli chu a lo hre daih tawh a, thik enah a en lem lo. Sangliana rilru a hrechiang tawh bawk a. 

Chawte an eikham fel hnu chuan an han tifel leh zung zung a, midang zawng chu sitting room lian lo takah chuan an inhnawhkhawm ve a, an titi nak nak mai. Sangliana bulah Modeli chuan thuthmun rem chatin, “Ka rawn leng zing viau ang. “ A la ti sap zui. 

A nui ringawt. Chhan dan tur hre hek lo le. 

Nguri chu a nu a nawmsam meuh loh avangin hawn hma a duh deuh a, Sangliana chu a va text keuh a, Sangliana pawh a tho vut mai. “I chau awm, i che nasa sia” a ti a. 

“Chau lo ve, inbual ka chak tawh zawk. Min thlah lo mai rawh, duh leh Amuana kha lo tir mai la,.” A lo ti a. Sangliana pawn hnial chi niin a hre lo. Hun thawl an la nei chho chauh dawn bawk a, a ngaih a ngam rih. Amuana chuan Nguri chu a va thlah ta a. “Ngur, kha nu kha i lo thik ang e aw” a ti ve ngial a. Nguri nuih a za deuh , “Taia hian nangmah bak a duh lo a nia, ka chiang. “ A la ti tak deuh deuh. 

“Ka thik lo, ka hre vek alawm, khanu te chu” a ti ve a. 

Tiang chuan Sangliana chu a han parawl chho ve ta chu a nia, zaia sawmna a hmu kal reng a, music video lam pawh a han tintuah chho ṭan a,. Nguri hian a fuih thin, “Nangmah hian originality neih tum la, i signature hmanga lar tum tlat rawh. Mi hla cover ringawt loin hla phuah te tum la, solfa i thiam, a thlûk engkim i siam thiam vek, mizo ṭanwg nise i thiam lutuk bawk. I tithei tih hi hrereng rawh..” tiin. Chung thu te chuan chona a pe lo thei lo va, hla pawh pathum lai chu a phuah ve tawh , a la tlangzarh lo mai mai a ni. Tin, IGNOU lamah admission lak a rilruk bawk a, MA tal pass hram a duh,. A pangngaia a zir dawn chuan zin chhuah châng an ngah thin si a, a tan a buaithlak a ring deuh a ni. 

Nu Maram tia a koh mai, amah duata duhsak em emtu pangpar dawr lian tak nei te inah chaw a ei dawn a, an fate phaia awm an lo haw vangin chaw eiah an lo sawm ve a lo ni. Phur takin dar 4 velah a chhuak a, a va thlen chuan Marami pawh chuan a lo welcome tha viau,. Sitting room felfai thlapah luhpuiin râwlthar pakhat hian phone a lo hmet mial mial a, “Hei hi kan fa naupang ber Joseph a nih hi. Bawiha, hei Taitea chu chibai rawh le, i hmuh châk em kha” a ti nghal mawlh mawlh a. Joe pawh chuan nui var var chungin a lo chibai var a, “Guitar perh min zirtir ve rawh aw” a ti a. An innêl nghal hle. Pindan pakhat aṭangin an unau zinga upa ber Sangliana aia û hlek tur hi a rawn chhuak ve zat a, ani hi Danny a ni thung, ani pawh a polite khawp mai. Pi Marami te hian an fate hi phaiah an dah vek a, tunah chuan an zirna pawh a u te lam pahnih chuan an zo ve hnai tawh a, Mizoram lamah pawh an awm ve thei deuh tawh ang chu. 

“Khaw nge maw Bawihi hi le..a la inbual em mawni le. “ A nuin a tih mek laiin in chung atang chuan awmhmun thawmhnaw nen nula pakhat hi a rawn pen thla chhat chhat a, a sam huh hniang chu a a rawn khuih thla dalh dalh bawk. Sangliana nen an han inhmu chiah chu an mengphâwk dun hle.

“Melody” Sangliana chuan a ti thei hram. Melody pawh chuan, “Taite, hetah engtin?” A ti hâ a. Pi Marami chuan mak tih hmel zetin, “In inhria law?” A lo ti a. 

Melody zawk chuan, “Bangalore-ah khan kan hostel neitu Pu Jimmy te inah alawm an rawn thlen..Taitea i sawm dawn tih i sawi si lo va” tiin a nu chu a en a. 

“Nia, ka surprise duh che u mawle, a zai in ngaithla nasa sia, mak in ti dawn êm a..” Pi Marami chuan a lo ti ve a. 

Sangliana chuan, “Khawvel hi a lo zim a nih hi. Melody te nen pawh kan inhmu leh ta alawm” Sangliana chuan a lo ti ve a. A nui sâng bawk. A rilru erawh a buai ru hle. Melody nen an sulhnu te kha a ngaihtuahkir lo thei si lo va, Melody zawk chuan nuam lo a tiin a inkiltawih phah ang tih a hlau zawk. Tiang chuan rilrua helhkam nei ṭûn chungin chawhlui chu an kil ho ta a. Melody nen erawh an inbe tuitam lo khawp mai. Zanriah eikhamah erawh Joe chuan a ngen angin balcony-ah guitar perh an inzirtir a, reivakloah Melody chuan theitui kengin a rawn zawm ve a, “Helamah i awm tawh dawn em ni?” Sangliana’n a tih chuan, “Ka hre lo, awm kher pawh ka ring lo. Vai ram nuam ka ti tawh zawk” a lo ti deuh hmak a. Hmalam a bih ngar bawk. 

“ Nia, awm tamna hi chu a nuam alawm” a ti ve mai a. Joe chu a thiante an rawn kal avangin a kalsawn lawk a, “Thil thleng kha theihnghilh rawh aw. Hrehawm ka la ti reng” Melody chuan a ti ta a. 

“Hrereng lo zawk la, kei chuan engahmah ka ngai tawh lo. Ka hmuh che khan ka hrechhuak a ni mai. “ Sangliana chuan a ti a. 

“Bialpa ka nei ve tawh a. “ A lo ti daih. 

“A va tha ve. “ A lo ti ve mai bawk, Joe a rawn lan leh tak avangin an sawi zawm tawh lo. 

Nguri te ina a len ṭumin, “Ih maw, ka savings leh ka nu savings aṭang hian dawr hawn ve ka rilruk deuh a, a tirah lian lo mah se, zawi zawia tih len belh hret hret turin, eng nge i ngaihdan?” Nguri chuan a ti a. 

“A ṭha reng alawm, loan te puk zawk la, savings ami hman ṭeuh chu a uiawm alawm,. “ Sangliana chuan a ti a. “Nia, kan manager phirpui hi Bank-ah chuan a thawk a, min tihpui dan te hi a hre maithei a ni. Mahni puala sumdawnna bulṭan ve hi ka châk ber a nia” Nguri pawh chuan a lo ti ve leh thliam a. Tiang chuan hma an sawn dun hret hret a, Sangliana paw’n renchem takin a sum chu a hmang a, an larna leh hmingthanna te’n damchhung a daih dawn bik lo tih hriain rilru nei takin ruahmanna a siam ve a ni. Zin neuh neuh a la neih kal reng avangin a in luah pawh a luahlum hman meuh lo va, Nguri hian chabi spare a kawl ve a, a zin rei deuh chang chuan a hman remchan laiin a va tihfaisak ve thin bawk. Sangliana chhungte lam pawh rawn zin zeuh zeuh châng an nei a, amah a awm loh paw’n a in chu an luah mai zel a, a remchang phian zel. 

Rsa te khua Tuidama an zin haw chu hritlâng âwmna a kai ta tlat mai a, a chhungrilah a khua a sik er er reng bawk nen,. A âwm ve tawh bawk a ni, an fit zawk ngawt alawm. Ni 2 chhung chu chhuah pawh chhuak peih loin a mu ta reng a, zai phei chu a aw a phui titih avangin tihluih chi a ni lo. Nguri chuan a ngaihtuah viau nain a dawr luah tur velah a che buai ve bawk nen, a duh ang paw’n a ngaihsak ṭha thei lutuk lo va. Loan kha awlsam takin a puk ve thei ta mai a! Sawipuitu leh sawisaktute hlut thinzia hi chu..Khatla kâwn-ah a lun lai takah dawr lian lutuk lo luah tur chu a hmu ta mial bawk nen,. Remchang a ti hle. Hetianga ama puala sumdawnna a han ṭan ve tur chu a suangtuahna luah rengtu kha a lo ni bawk a, mumangte pawh a ang rum rumin a hria. 

“Ka buai lai leh i nawmsam loh a lo innang hi chu pawi ka va ti tak..damdawi kha ei tha rawh aw. Naktukah soup sa ver vawr ka rawn kensak ang che. “ Tia Nguri’n a text-na chu nui chungin a chhiar a, a phaktawk leh a theih ang tawk chuan a ngaihsak tih a hria. Tlangvala pumpa, han awmpui hluah chu a duh bik lem lo bawk. A reh deuh avangin a fans te pawn an rawn ngaihtuah viau, “Tunlai chu ka chau ve deuh a, ka han awm hahdam ve lawk ang e” tiin thu a hnutchhiah a,. Inthlahrung thei dinhmunah pawh a ding rih lo a ni e. A nuin a rawn ngaihtuah viau a, “Ka tha tawh reng, ka aw a la fit lo deuh tih mai a ni e. Min lo ngaihtuah lutuk suh u” a han ti ve ngial a. Chhungte rilru tihhrehawm hi a thil hlauh ber pawl a ni bawk nen. 

 A tuka Nguri soup rawn kensak chu tui ti takin a hâwp bawrh bawrh a, a harh hawkin a inhre nghe nghe. “Vawiinah bungrua a lo thleng dawn a, ka buai deuh maithei aw, eng emaw a thlen chuan min lo call mai dawn nia” Tiin Nguri chuan a thlah thlap a. “Kei pawh vawiin chu ka aw hi ka’n clear chho ṭan ang e ka tia..ka ṭha tawh reng aw” a lo ti ve a. A thawmhnaw suk ngai leh tihfel ngai ang chu Nguri hian zingkarah te a va tihsak mai zel a,. A in chung hi office a nih miau avangin hmutu an awm ngai lem lo bawk a, a tihzia phian mai. 

Nguri te bungraw lo thleng tur chu vanduai asiamin an rawn kalna kawngah motor lian a chhiat avangin an tangkhang ta hlauh mai a,. An siam zo har angreng si, Motor tâng dang pawh an tam mai. Nguri chu a lo inrâlrin nen a thinrim hlur mai. Chutia chuminia a lo thlen theih loh rau rau chuan tiin buhhawp a chhum a, soup siam lehin Sangliana va pek a tum ta a. Sangliana in a va thlen chuan a lo inkalh lo va, a muthilh takin tiin dim takin a hawng a, a lo reh duk mai. A pindan lam pan chuan a pen phei hnalh hnalh a, kawngka a hawng chiah chu a ding khawng reng mai ! 

Sangliana chu khumah lo muin khum sir, a bul maiah chuan Modeli ngei mai kha lo ṭhuin Sangliana chal chu a lo dawm vang vang a, Sangliana erawh a maimichhing thung. Modeli’n Nguri chu a rawn melh thuak a, chutah kun hniamin Sangliana hmuiah chuan a zuk fâwp ta mai a! Nguri chuan a kut a lo humruh ngawt ngawt ringawt, Sangliana chu rawn mengin a thu chhuak nghal vut a, Kawngka bula Nguri ding reng chu a va hmu zui nghal bawk. Modeli lah chuan, “Hahdam rawh, i chauh kha” tiin a lo kuah titih a. A kut chu paihthlaksak vatin Nguri lam pan chuan a kal ta nghal a, Nguri lah chhuah mai tumin a inher bawk. “Ngur, lawkin, ding teh. “ Tiin a bân a va chelhsak a,. “Engmah a thleng lo. I hmuh ang kha a ni lo.” A ti nghal bawk. 

Nguri chu a ngawi ta reng a. Modeli hi thik enah pawh a en ngai lo, mahse, vawiina a awm lai leh hmuh lai renga a chet duhdan vel chu a tei thei ta der lo mai. Chuta chhapah Modeli chu rawn kal hnai vein, “Lo leng rawh i tia, tikhan min awmsan leh daih dawn a maw? Ka eitur rawn kensak che saw ei phawt la, ka haw dawn nia” a rawn ti hlang hlang a. 

“Lo leng turin ka sawm che a maw? Kei hian maw?” Sangliana mitmengah maktihna lo lang chu a der a ni mawlh lo. 

“Sawm lo em ni? Hawh, ei rawh, keipawh ka ril a ṭam. Hei hi tu nge? I in luah zana fatu kha a ni lawm ni?” En hniam tih hriat reng reng hian Nguri chu a ke ler aṭanga a chhip thleng chuan a melh kual a, Nguri lahin a mitah tak a lo melh ve kal bawk. 

Sangliana chuan Nguri kut chu nghet taka humin, “Fatu a ni satliah hleinem, ka bialnu ka nupui ni tur a nih hi. A hming chu Nguri..” Modeli hmaah chuan inringtawk zet hian a ti ta a. Modeli chuan makti hmel a pu hauh lo, a lo hre daih tawh zawk a ni maithei. Chuvanga Nguri runluih nana ngeiawm tak taka che a nih a rinawm. 

“I mit a va lo hniam em em ve, Taite..” Modeli chuan chek hlak chungin a ti a. 

“Min chhuahsan la a tha ang..khawngaihin” Sangliana chuan a ti chang fak a. Phung pawh a thlu peih tawh bik lo a ni maithei. Modeli chuan a bungrua chu senghawiin zak hmel pawh a pu lem lo, a chhuah dawn erawh chuan, “I fans te tan thu bengverh tak ka post dawn si a, an kiansan duak che a nih pawhin hei he nu hi i nei tho alawm tiraw?” Ngeiawm zeta nui chung hian a ti a. 

Sangliana pawh nui vein, “Ka lawm e, ka puanzar kher ngai lo va min lo tihsak dawn chuan..” a ti ve ngat. Modeli chu tûm hmakin a chhuak tau ta nghawng nghawng a. 

“A sawi duh tak tak ngei ang le..” Nguri chuan a ti sap a. 

“A tha daih zawk, inthup leh inzêp reng renga hun hman hi ka ning tawh. Min huat phah an awm a nih leh ka tuar mai ang. I tan chuan..tin, pawm thiam hun an la nei tho tho ang. “ A ti bung nghut a. Mipa nge nge hi zawng an tum hi a tlang ve thin bawk a ni. 

“Kha buhhawp leh soup hi ei rawh. Bungrua a rawn thleng leh si lo va, chuvang a nia ka rawn kal” tiin a thil kensak te chu a hmaah a chhawpsak a. Tui ti takin a lo ei leh bawrh bawrh mai. 

“Nupa kan ang ee..” Sangliana chuan a ti thut a, Nguri lah chuan, “A ho chutiang” a lo tihsan daih. 

Modeli khan a tum ang ngeiin sangliana single loh thu leh Nguri pic te chu pho chhuakin Sangliana bialnu neih chu an chai leh ta luai luai mai a. A fans thenkhat a zaithiamna aia a hmelmawina dah hmasa zawktu te chu an rilru a nain an thikthu an rawn lantir chho a, a lakah an han tâu ang lawp lawp a. Mahse, a zaithiamna dahsangtu an tam zawk daih, chung mite chuan a thlavâng an hauhsak bakah a hnung an la zui kal reng a, lawmpuina thu an la thawn chamchi bawk. Mihring ve tho a ni a, ngaihzawngte chu a nei ve bawk ang chu, over taka public-a inkawp pawh ni hlei lo. Mi zawng zawng a tihlawm theih miau si loh a..

“Hello, tun kar friday kha ka dawr hawnna party siam zan a nih tawh kha, i hla thar chu i lo zir nasa tawh em?” Nguri chuan a rawn ti ral ral a.

“Zir chiang e, a chhan awm lova i duh em em, ‘Hmangaih Hmangaih’ phei chu a lam dan tur step thlengin ka bel lutuk tawh mah mah. “ A rawn ti a. Nguri pawh a khi var var mai. 

“U Malsawma pawh ka sawm ve asin..” a tih chuan, “Min tiphuisui sawt dawn a nih chu.. Kan rawn ri huk ang. “ Sangliana chuan a ti zâng vah a.

Ngurtinsangi dawr, “Zo Sehhmeh” tia a hming an phuah hawn zan chuan Youth Icon Top ten te avang chauh pawha kal an thahnem kher mai. A dawrah phei chuan an len loh lutuk avangin a hawnna programme an hman zawhah party-na tur liau liau atana an book, Resort lar tak pakhat ah chuan ‘ZO SEHHMEH’ hawnna party chu hlim leh nuam ti takin an lâwm ta hut hut a. Mahse, zu leh sa, ruihhlo a tel ve lo thung. An hlim leh phur dan enin Ruihhlo tel lo hian a lo hlim theih tih erawh a chiang em em si. 

Pool bulah chuan inhmatawnin an ding dun ran a, “Ka pi, i hnuaia hnathawk pakhat angin min siam ve rawh” Sangliana chuan rose par sen mal pek pahin a ti sup a. 

“I boss hi min zah dawn chuan” a lo ti ve chat. 

Chutah a ipte aṭanga bawm kil li nei lek chhuakin a han hawng a, “Ngurtinsang, ka nupui nih i duh ang em? “ Tiin a han ṭhingṭhi a. Rsa leh Petera te’n châng an lo tum raih a, Nguri chuan a mit khap sakin a nui a. “Tehreng mai” tiin a kut chu a va dawh a, au thawm leh khêk thawm a nasa kher mai. A kutzungṭang sei sâwla zungbun simple tak, manto tih hriat tak si chu buntirin tu emaw hian, “A fawp dawn em? A kiss dawn em?” A lo ti lauh lauh a. An pahnih chuan an nui dun a..

An inhual zan kha Valentine’s Day a ni tih a tukah Nguri chuan a hre chiah..! Va han romantic lo tak..mahse, Sangliana nupui hual a ni ve tlat..

A TAWP TA.