Skip to main content

Featured

Hmangaihsangzuala last

HMANGAIHSANGZUALA (Last) Ziaktu : Toni Râlte (Emergency-a zin thut ka ngaih avangin ka titâwp rih aw. Season 2 a awm ang) Duhawma te chu an dâwp ta ngei a, keini paw’n kan va hmu ve. Rei pawh an dâwp hmain Mawizuala zet zawt khan, “ZCP camp-ah a khawsa, an camp chu Sumsuih ramah a awm, ka hruai thei ang che u” a lo ti a. Sawrkar lam beng pawh thleng vatin a tuk la lain Sumsuih ram chu police eng emaw zat leh Mawizuala te chuan an zu fang ta a. An camp chu rauhsan tih hriat takin an zu hmu ta si, bungrua engmah a awm tawh lo, thlam ram tawh ang mai a ni. An lo insawn chhuak hman chu ka lawm rilru viau thung. Mahse, Mawizuala bawkin, “Dinkimi leh ZCP te kha an inbe pawp ngei ang, anin an insawnna a hriat ka ring, an inzawm alawm” a lo ti pek a nih chu! Ka va haw tak. Tichuan kei pawh Police custody-ah ka thu ta ran mai. Boss -in min thlamuan a, kei pawn hlauhthawnna ka nei hran lo.  “Tumah an hming ka hre lo, an sawi lo miau a, an camp chu Mawizuala hriat tho kha a ni ka hriat, an in...

lalsangliana 6

AW..! LALSANGLIAN..(6)

Ziaktu : Toni Râlte


Malsawma chu a ngaihtuah zui ta nuah nuah a, mipa sual tak niin a hre thei lo. Nguri a ngaizawng ang tih chu a ring thiam mai a, Nguri pawh khan a sawi thawi zauh tawh bawk a, tiang khan a thikthu pe chhe lutuk khan Nguri kha an inngaihzawn thu a hrilh luihtir ngawt kha a nia, khatiang a hriat tawh hnuah pawh Nguri te chetsual thu rawn hrilhin tun thlengin a la ngaihsak em em chu a ni si a. Nguri tan pawh huat chu a har ve khawpin a ring a ni. Ani hi lo tawng hmasa lo se Nguri paw’n a duh ve mai te pawh a ring rum rum, tunah chuan thik enah pawh a en tawh lo. Malsawma chuan mipa diktak zia a pu niin a ngai nghet hmiah tawh mai a ni. A ní te in a thlen meuh chuan a chauh ve zia a hrechhuak nghal. A inbual sawk sawk a, zanriah an ei zui ta nghal a. Nguri te chetsual thu vel te kha an lo la hriatchian loh avangin a han hrilh ve thuak thuak a, pawi an tih ve hmel hle. Zanriah an eikham tawh hnuah a manager-in a rawn call a, an inbe rei angreng, Kar thar lo thleng tur kar tawp lamah Bangalore lamah an zin leh dawn a, zaia sawmna an dawng miau a, kal loh phal chi pawh a ni chiah lo. Mahse, Nguri chu a ngaihtuah ru hle, Damdawi in atangin chhuak tawh tal se ngaihngam takin a zinsan thei ang chu. A pate pawh chanchin a han hrilh ve a, Nguri hmasawn chho zel chu an lo lawm ve hle. 

An ngaihzawng te-ah hian a nu leh pate hi an inrawlh thuk lutuk ngai lem lo va, “Nangmahni’n in duh a nih chuan in nei ang a, an lo ṭha ta lo a nih leh in tuar mai ang chu, inrawlh vak kan tum lo” an ti hmiah mai a. An khirh lo viau nain anmahni paw’n duhthlanna fel tak an siam thiam a pawimawh zual bik hle. Sangliana chuan tun dinhmunah chuan Nguri tluk tur a la tawng lo va, Nguri hi a hmeltha fâl lo, a pian lah hmeichhe pangngai pian ve mai a ni, a hausa lo, hmuhsit vang ni loin hmeithai fanu a ni bawk. Mihring lamah chuan chhuan tur a nei miah lo, thlarau lamah nise ṭawngṭai pawh thiam ṭha mang lo khawpa ngawng kha a la ni zui ! Chutah chhungkaw thilah buaina a tawk fô mai bawk a, dik tak chuan midang zawng aia han thlanna chhan tur hi sawi chat chat dawn chuan a awm lo tluk a ni, mahse, hmangaihna hi a mak khawp a, hei tak hi a hlutna chu a ni mai. Duhthlan theih a ni lo lai hi, kan tum loh leh beisei loh dan daihin min pawt kual fo a, hei vang hi a ni lawm ni? Kan mizo hla tam zawkah pawh ‘Di Hlui’ la thlah hlen theih lohna, la ngaih veng vengna , hla lungkuai tam tak a pian tak ni. Nunhlui ngaih reng hi tuman an duhin an thlang bik lo, mahse, duhthlang thei dinhmunah dintir lo khawpin hmangaihnain a salbet a, a thunun miau si a ni. Hei hi hmangaihna chu a ni mai. Chhut buai chiam chi a ni lo. Sangliana paw’n a chhut buai peih lo, Ngurtinsangi chu a nih ang angin a pawm a, a duh a, a hmangaih ta hial mai a ni. Chutah chuan a hlim a, a lawm tâwk em em bawk, chu bak bak eng nge beisei leh tur vak a awm em ni? A hlim miau alawm.


Modeli erawh a roomah a insawh tau bur bur a, Zingkarah Sangliana Aizawlah a chhuk tih Arami te ka aṭanga a hriat khan a thin a rim hlur ringawt mai a ni. A chhuk dawn rau raute chuan hrilh ve mai se, a ruala chhuk ve a châk tehlul nen. “Eng ang paw’n lar rawh, ka thil duh chu ka nei ṭhin. Eng nge ka tihtheih chiah lo en rawh, Sanglian,. Engmah ka pawisa dawn lo. Ka ta ka la nihtir tho tho ang che.” A ti tân tân a. A rawn lar tirh phat aṭanga a atchilh ngawih ngawih kha a ni ve tlat a, ani pawh hi a demawm hran loh, model kei ka ni inti ve tawk tak, model zingab rau rau pawh a nalh leh itawm ber pawl a ni a, Youth icon ni lo se Sangliana te pawn phû loh ena an en tur kha a ni ve chiang alawm,. Mahse, a beisei leh duhthusam angin Sangliana chuan a dawngsawng tha tlat si lo va, chu chu tlawmthlak a tiin, bialnu a nei a nihte a ring rum rum. Arami kha a han zawh ngial lahin, “A neih awm ka hre miah lo.” A ti tlat bawk si. Nguri a hruai chhoh ni kha Arami te zin hlan a lo ni ve bawk a, a lo la hre bik lo a ni maithei, ani lah a lênglâm lo chi, mi thusawi lengvâk hre tam lo tawk vela tawmim a lo ni ve bawk nen, Sangliana chuan bialnu a neih awm reng reng a hre bik tlat lo a ni. Khumah chuan a mu zangthal a, “Sanglian, ka thihchilh tawp mai dawn che mawni le?” Te a ti vei thul, khawvel hi chu a chang chuan a nunrâwng alawm,. Ni e, a dik,. Kan duh leh hmangaih ngawih ngawih te’n min hnawlna leilungah hian min duha min chhawmdawl châk ngawih ngawihte kan lo hnar ve fô lawi a ! Engmah hi a fair tak tak thei lo a nih hi maw. Mahse, hei erawh thudik a ni, tu emaw thinlung na taka kan hliam hian a vuaklêt kan tuar ngei ngei tih hi. 


Aizawlah a awm leh tawh si avangin Falkland lamah pawh zaia sawmtu a nei a, Serchhip lama an concert tur erawh eng emaw vangin an cancel leh rih hlauh a, Bangalore an zin haw hnuah Champhai lamah an zin leh a ngai dawn bawk, a programme hi a full ve ṭân zel bawk si. Mi pakhat chauh a ni bawk si lai hi a buaithlak a ni e. A tukah chuan Nguri nu chhâwk tur chuan a chhuak leh ta poh a, a la âwl ve rih bawk a, a tihzia phian mai. 

A va thlen chuan doctor in ward a lo fang tawh a, Pi Dingi chuan, “Taite, a lawmawm lutuk, tunkar tawpah chuan in lama inenkawl pawh a theih tawh maithei tih doctor khan a sawi a, amah lah hian chhuah a châk tawh bawk si a,.” A lo ti chul a. 

“Ee! A va lawmawm ve le. Nia, hma hi a sawn châk khawp mai, Pathian vang liau liau a ni” a lo ti ve hlut a. Mama pawh a rawn lang ve hlawl mai, Lungleiah khan an inbe tuitam hman lutuk lo va, an han inchibai tha leh hnuhnawh a,. “In lo awm hi a lawmawm ka ti lutuk, ka nauin heti taka duhsak leh lainattu a lo nei hi,. “ A ti dam thluam a. Zu pawh a in zui tawh lo niawm tak a ni, a hmelhmai pawh a lang thar sur mai. 

“Aa..i tizahthlak, kan tihtur a nia lawm..” a ti ve mai a. Pi Dingi chu hahchawl turin an tir haw leh ta a, “Nang pawh U Mam, i duh chuan va haw rawh, ka awmpui thei a nia” a tih chuan, “Ni lo e, ih, englo vawiinah a thawhpui leh thian thenkhat ten an rawn kan dawn a, an hmuh che chuan thil a felhlel palh ang tih ka nu khan a hlauthawng a, chuvangin min rawn ko alawm, an rawn kal hunah chuan i lo bibo rih dawn nia. “ A ti ta sur sur a, anni lehzelin chutitaka a hmakhua an ngai chu mak a tiin, nuam lo pawh a ti ru zawk hial mai. 

“A ho e, min hmu se a pawina a awm hleinem. Nakinah an la hre dawn tho tho “ a ti ve mai a. 

“Akhai! I lar ṭan chauh a, i fans ten an atchilhzia che kan hre ve vek alawm, an lungawi lo palh ang, hetiangah chuan thikthu hi a chhe duh teh mai a nia” Mama chuan a lo ti vut a. Chhan vak ngaihna a hre bik lo. 

Dar 12-ah gate chu an hawng ta a, Mama thurâwn angin canteen lamah a chhuk ta daih a nurse pahnih lo kal pheite chuan an rawn hre nghal chat mai. “Awii, Taite, thla kan lo lakpui thei che ang em?” Zah hmel deuh, phur tak si hian an ti a, “Tehreng mai” tiin thla chu an la ho ta a, an chhehvel amite chuan lo hmuin an lo hre ve zel a, an rawn pung ta hluai mai. A tan lawmawm viau mah se; a rilru a hmanhmawh ru viau thung. Chutia an bawr laih laih lai chuan, “Laltai, helai daih daihah, eng nge i tih?” A aw hriat ṭhan tak chuan a rawn ti a, Modeli ngei mai kha nalh zetin a lo ding to mai. “Nia, hei damlo ka kan a, eng nge i tih zawk?” A ti ve mai a, Chu nula huhâng chu a na deuh nge ni , amah bawr lêt lêttu thenkhat chu an kal kiang deuh a, hnaih tawk erawh an awm tho. A rawn pan hnai a, “Ti nge Aizawlah khan ka tel lo va i chhuk kher a? I thinrim mi?” Thle hâw chung hian Modeli chuan a ti leh a,. Sangliana chu a hrilhhai letling, “Ka hmanhmawh deuh a” a ti ta ringawt. Midangho chuan an melh hrek hrek tih a hrereng, nuam lo a ti kher mai. 

“Nih chuan, min treat thei, hawh, tah khuan thil tui deuh an nei” tih leh kaih a rual ta mai. Tuman an hriat loh nan lukhum hmathlawk khumin mask a vuah ve thlap kha a nia, nurse te khan rawn hre lo se engkim a kal dik mai tur. A chhan sawi fak hleihtheih si loh hian a thinur hlur a, midang awm laia Modeli han tihbeidawna tihzah kha a hreh ve tawh bawk si, ani lahin zah hre tawh hek lo, a pawt tlat tawh mai si a, a zui ve ta ringawt. Restaurant an luh chuan, “Mate, Hei Taitea ka rawn hruai” Modeli chuan a ti lâng lâng a. Mateii a tih chu a rawn lawr nghal vat, Dawrah chuan customer an tam lutuk lo hlauh. 

“Awii, a va nuam tak, khawi thla la ang, Taite, a takah ka hmu thei che hi ka va lawm tak..” a zuanin a zuang lo chauh, a phur thak ni berin a lang. Sangliana pawh a nui lui hram hram a, thla chu an han la zo a, fâl deuh taka dawhkan âwlah chuan thuthmun an rem ta a. 

“Ka hmanhmawh deuh a, kei chu coffee bak ka duh lo aw, thil ka ei tawh a..” Sangliana chuan a ti nghal hmiah. A ril chu a ṭam reng, mahse, awm rei a duh lo, eitur chu canteen-ah a pack-tir ang a, Nguri bulah a ei mai ang chu. 

“Tlaiah tihtur i nei lo tiraw? “ A lo tihsan daih a. 

“Nei e, falkland-ah programme ka nei” a ti a. 

“Tak tak maw? Yes, min hruai ve thei. Ka kal ve duh” a ti hawm hawm a. 

Sangliana thin chu a tâwt ru hle, “Nia, kan ngaihtuah dawn nia, chuan, coffee hi ka in zo ang a, kal leh mai ka duh, bill chu ka lo pe nghal mai ang. Ka hmanhmawh sia” a ti sawk sawk a. Modeli mitmeng chu a rum sâwt hle,. A duh angin engmah a thleng leh dawn lo a nih hi maw..


“I mak e, ti nge min pehhel dan ngawt hi i zawn? Ka msg ni se i seen ngai si lo, call i la duh bawk si lo. Min hua mi?” A ti ve ta thlâwt a. 

“Ka buai êm atin ni..” zaidam tak hian a lo ti a. 

“Min ngaihtuah ve ta che.” A lo ti hlar a.

“Ngati maw?” A lo ti hû !

“Ka rilru i hre vek a” a tih mek laiin coffee chu an rawn dah a. “Engtia i rilru maw?” Coffee no chawikan pah chuan a ti a. 

“I hria” a ti leh ringawt. A ngawihsan ta daih a. Modeli eitur chah pawh rawn thlengin a ei ve nghal mai a.. reifê an ngawih hnuah, “Bialnu i nei tiraw?” A ti ta a. 

Sangliana chuan melh kâwkin, “Aw, ti nge?” A ti ve ta hmiah mai. Hei lo chu kawng dang a nei lo. Thudik sawi mai kha a tha zawk. Tikhan a beiseizui thei tawh lo ang a, a tan pawh a hahdamthlak deuh ang chu. 

“Tu nge?” A melh ngai melh reng chung chuan a ti a. 

“Ka la hmelhriattir dawn che nia” a ti ve zel si,. Modeli chu a rilru a na tih a lang reng, Sangliana pawn a hai bik lo, nuam a ti bik miah lo nain thudik sawi mai loh chu kawng dang a hre ngang lo a ni e. Coffee a in zawh chuan, “ A nih ka kalsan phawt ang che aw, ka hmanhmawh sia” tiin a tho a, “Zanin chu engtin nge?” A la ti ṭâlh a. 

“Ka rawn hrilh dawn che nia” a ti satliah a. Bill a pek hnuin dawr chu a chhuahsan ta a. Hmanhmawh zetin canteen-ah a chho a, eitur chu a pack-tir sawk sawk, Nguri thiante an lo la chhuah loh avangin hmun reh deuh leh fianrial deuh nia a hriatah chuan phone a va hmang a, tu ten emaw an rawn hmu leh ang a, a che buai leh vak ang tih a hlau. Gate khar a hun ṭêp tihin Damdawi in chhungah chuan a lut ve ta a, stepah Nguri thiante niawm tak nen chuan an intawk hlawm a, an hre deuh ni tur a ni, an melh hrek hrek mai, mahse, hmanhmawh taka a pen pâwk pâwk avangin an lo be ding ngam lo a ni mahna le. Ward a va luh chuan Mama chauh chu a lo awm tawh a, a thaw huai mai. Eitur chu Mama pawh a lei kep a, an ei dun a, Nguri pawh soup a hawptir ve a, a aw pawh a hma ngawt ai chuan a rawn fiah chho ve ta deuh e. 

“Chawhnuah hian kan khaw lamah ka haw dawn a, dar 3-ah, tunah chuan insiam te ka ngai si a, ka chhuahsan rih phawt ang che u aw. Taite, ka nau chunga i thatna avang hian kan lawm takzet a nia. Kei pawh thil ka va tifel ang a, ka fate nen kan rawn kir leh vat ang. “ A ti luam a. Kawngka thleng a va thlah a, “Lo ngaihtuah suh, hma a sawn zel ang.” Sangliana chuan a ti ve luam bawk. 

Nguri nen chauh an han awmdun takah chuan zawi tê têin an titi a, “Chhuah ka chak tawh êm mai,. Inbual fai hiara mut ka châk” a ti leh a, inbual ngawt pawh chu aw. “ I chhuak ve thei ṭêp tawh ang. E chuan! Zanin chu programme ka nei a, chuan karlehah Bangalore lamah kan zin dawn bawk a. Kalsan che hreh viau mah ila” Sangliana chuan a ti a. 

“Umm, i programme hi keimah vangin bawhpelh miah suh. Kei chu ka nu a awm alawm,. Bangalore-ah chuan i cham rei ang em?” A lo ti sap a. 

“Ka hre lo, rei lovang, kan lo hawn veleh Champhai lamah kan zin leh a ngai dawn bawk a. “ Inthlahrun hmel deuh hian Sangliana chuan a lo ti leh a. 

“Champhai lam khi ka zin ve châk thei tawp, ka la kal miah lo” Nguri’n a tih chuan, “I lo dam that deuh tawh chuan ka hruai ve dawn che nia” tiin a nui hak a. Chutihlai tak chuan nurse hian drip rawn khaisak a tum a, An venflon vuah sa kha a rei tawh deuh avangin an phelh tawh a, a thar vuahsak an tum leh mek a ni. Nguri taksa a mâm si a, a vein a hmuh hleihtheih loh, a beirei kher mai, duty ve dang pakhat nen an beih rawn ta a, an ti thei ta hram e. Drip chu an khai ta nghal a. Mut duhna a tel avangin kar lovah Nguri pawh chu a muhil ve leh ta bawrh bawrh a.  Pi Dingi rawn chhoh hnu reivakloah Sangliana pawh chu a haw ve ta a. 

Guitar perha a zai lai takin Cteii, Lunglei ami khan a rawn call hlawl mai, ani hi a reh deuh vang vang a, a rawn lang ve leh ta hlawl a nih hmel. “Aw Cte” a han ti a. 

“U Taite, Aizawlah ka lo zin a, Aizawlah i awm tiraw?” A rawn ti chul a. 

“Aw tunah chuan ka awm lai tak, eng nge i lo tih a?” A ti a.

“Ka û inentir ka rawn zui ve mai mai, kan inhmu thei ang em? Khawi vengah nge i awm?” A rawn ti nghal mawlh mawlh. “Tunah mai chuan ka va hman loh hmel ve aw. In la cham rei dawn chuan hun remchang a awm maithei asin” a ti ve luam a. 

“Awm hram rawh se, ka hmu châk lutuk che. “ A rawn ti no leh ngher ngher a,. Buaithlak , rilru tâwt lai laia midang lo tlazep ve chhên hi. 

“Nia, a awm mai ang” tiin an dah ta rih a. Dar 7 pelh hlekah Icon-a a contestant pui Mawimawia leh Petera te nen Falkland lam panin an tlan ta vûk vûk a, Rsa te ho pawh an lo awm tawh a, an han inhmukhawm leh ta chu nuam an ti tlang dar dar hle. An in zai chhâwk diat diat hlawm a, kal khawmte pawh an tam over lo va, a nuam tawk chiah. Birthday lawmna kha a ni miau bawk a, a nawlpui telna chi ni hek lo. An break lai chuan an phone an khawih mial mial hlawm a, A bula thu Samsona chuan, “Taite, Bangalore chu engtik maw kal in tum?” A ti a, a sawi a, Samsona ṭawng tum lai tak chuan Mawimawia chuan, “Ehe! Hei, Taite, i video a viral” tih leh damdawi in kawta modeli’n a kaih luih lai video kha a entir ta mai. An vai chuan an en hû hû hlawm a. Sangliana chuan phone chu la vatin, “Tu nge maw lo cover hman le? A va zia lo e” a ti nang nang a. 

Petera pek chuan, “A chhiat loh tho kha, in ni mi?” Satliah deuh hian a ti a. 

“Ni mai mai lo, engtia tih chi nge pawh ka hre lo..” beidawn hmel lek lek hian a ti a. 

“Thawkkhat lai kha chuan a lar ve riau kha, model a ni lawm ni?” Rsa chuan a lo ti ve a. 

“Ni ve e, mahse, a buaithlak..ka sawi thiam lo” A heh liah zauh pahin Sangliana chuan a ti a. 

Petera chu a ding hluai a, “Het, Laltai, kan hriatpui lohin bialnu reng reng i nei tur a ni lo. “ Tiin a han kawk vah a, an boruak han ṭang deuh at pawh chu a zân phah ta deuh. “Khatiang kha chu en liam mai mai rawh, engahmah an ngai tak tak lo vang” Samsona pawh chuan a lo ti ve a. Chutihlai tak chuan Sangliana’n chu video chu a û Nanui hnen atangin a dawng ve leh chiah bawk. “Eng nge awmzia? Ti nge he nu hian a va inti neitu che ve a” a rawn ti zui.

“A â tawh a niang. “ A han ti ringawt. Ngaihtuah zui a peih lo. 

A tukah pawh Saitual lamah programme an neih avangin an zin ho leh dial a, Nguri chanchin erawh a zawt ve reng a, Pi Dingi sawi dan chuan a tuk lamah chuan chhuah theih mai an inrin thu te leh amah Nguri’n chhuah a châk tawhzia te chu a hria a, Doctor te lam pawh an hmin ṭan viau tawh a nih hmel. A chhuah theih chuan Sangliana tan pawh kan a awlsam deuh dawn a ni mai a, Bangalore an zin hma ngeiin chhuak thei se a duh takzet a ni. Saitualah chuan chaw hlui an kil ho nghal a, lawmtu leh ngaisangtu an kat ve nuk bawk nen, khawi hmun pawh hi a nuam thin e. Zanriah a eikham a kut a silfai lai chuan Modeli call a dawng ta a, lak loh a tum zet naa video chungchang vel kha a nih takin tiin a laksak ta nge nge a. 

“Taia, kan video viral kha i lo hmu ve tawh em?” A rawn ti ta chiah a. 

“Hmu e, a ho tak tak a ni, khatiangte lo cover reng reng” naran zet hian a ti lui a. 

“I bialnuin a hmu ve tawh em?” A rawn ti ngat a, Sangliana chuan a ngei ve deuh nge ni ,” Aman alawm min rawn thawn, a nuih a za a ani chu..” a ti hmiah. 

A ngawi det a, “Ti nge a nuih a zat a?” Awki ngaihnobei vak lo hian a rawn ti leh a,. “Ka hre nang, ‘I luck thei si’ a tia..a rawn nui vak ringawt” a ti ve leh mai a. “A nih chu, a va mawl ve” tih leh dah a rual daih. Sangliana a khi suk mai. 

An duhthusam ang ngeiin Nguri pawh a chhuak ve thei dawn ta. A ngen nasat vang a ni pakhat ve bawk a,. A chhuah ni-ah lah Sangliana chuan programme a lo neih leh avangin a ṭawiâwm leh thei ta bawk si lo, nuam lo a ti angreng hle. Zan lamah erawh len ngei a tum thung. A fans ten ama puala mawza leh tshirt an siamsak te chu  ama hnen aṭanga lei ngei an duh sia, a lo zuar a. Fans intlar an tam khawp mai, autograph sign bakah thlalakpui tur apui an kat nuk a, a indaih lo lam mah a ni e. Tlema amah ngamtlak deuhte chuan, “Taite, i video viral kha eng nge a awmzia? Kha nu kha i bialnu em ni?” An ti ve ngam a. 

A nui hawk ringawt, “Ni lo e, ka bialnu a ni lo. Thil a kal sual palh a nih kha” a ti ta ringawt. “I live leh veleh lo sawifiah kan phût a nia aw” an tih chuan a bu nghat a, “Lutuk, zanin zantirah rawn live ka tum ang” a ti ve a. A fans te pawn lungawi lo hmel an pu lem lo. Chau angreng takin a haw a, a ní te bula thleng si hian an inhmu khât khawp mai, chaw a ei chhuak ve reng bawk nen. Aní te paw’n ngaiah an nei tawh a ni ber e. 

Zantirah chuan a lo sawi tawh ang ngeiin a live ta ngei a, “Ka video viral chungchangah zawhna ka dawng nual a, kha kha hriatsual palh a ni e, ka bialnu ni loin ka thiannu em em a nia,. Min lo hrethiam hram dawn nia. Hetiang thu lêngvâk karah hian thu belhchiandawl lo thehdarh kan ching em em a, khatiang kha keini chuan ti ve lo hram ang aw” tiin a han sawifiah ve a. Fans te pawh an hmin leh diam tawh. Modeli erawh awmhmunah a lo insawh tau leh nasa tawh mai. A nihna takah chuan a thianpa tuai rawngkai nena an plan a nia, kha thil kha. Khatia a pawh luih vel lai kha a thianpa lo cover vek a ni nghe nghe, a beisei leh ruahman dan chuan kha video kha a viral a nih chuan mi ten Sangliana bialnu angah an ngai ang a, Sangliana bialnu pawhin lo hmuin an inhmuh thiam loh a beisei bawk. Bakah lar a khel ve pah hrim hrim bawk a, attention seeker kan tih ang chi kha a lo ni ve bawk nen, mi ten en rawn se, ngaihven se tih a duhna a ni pah bawk. Mahse, amah Sangliana zawkin engmah a nih loh thu hmangin a rawn chhilh bo ta daih si, han lawm viauna tur a hre tlat lo a ni. 

A live zawhah Nguri hmu turin a chhuak zui leh ta nghal a. Pi Dingi a be hmasa a, inleng an neih loh hram a beisei. Mahse, ani damdawi ina rei tak awm tawh, chutia lo chhuak ve nafam chuan inleng neuh neuh a lo nei lo thei bik lo va. An in luahna te bakah thenawm te ho an lo awm ve nual a. Sangliana chu a tîm hle. Lo awm vete paw’n an hmuh chuan mak an ti ru ve hle tih a lang reng, Nguri chu a lo ṭhu mu a, a la chau ve deuh tih hai rual a ni lo. Eitur a kensak chu a pe a, “I hman leh pawh ka lo ring chiah lo va” a lo ti sep a. 

“Nia, zanin chu ka awl ve hlauh a. I lo chhuak bawk nen..” a ti a. A hmazawn chiaha thu an in luahna te fanu nula chuan, “Taite, thlalakpui che kan va duh ve..” a rawn ti ta a. Nula pangngai a ni tawh bawk a, zak chei chui ang khan a awm lem lo. 

“Tehreng mai” tih leh thawh rual nghalin an han la ho leh ta rih. 

“Nguri te nen in lo inhria a ni maw?” An han tih chuan, a chhan hma hmain, “School kan kal ho thin alawm, a lar tak hnu hian a induh ta deuh zawk..” nui chungin Nguri chuan a lo ti vat a. Tuman an ringhlel hauh lo. Nguri bialpa a ni tih hria se mak an ti zawk daih ang. Inlengte pawh an ṭin ve ta pheuh pheuh a,. Pi Dingi pawh chuan hun thawl an mamawh ang tih hrethiamin a mutsan ta a. 


“Nâ i la nei em?” Tiin a biang leh chal vel chu a va chul dan dan a. 

“Neih pawh ka hre lo, ka lu hi a rawn na leh zauh thin tih loh chu, nachhawkna min chawh kha ka ei khalh zel a, a zia” a lo ti ve mai a. 

“Chuan, i lu chu i su tawh em ni?” Nui chung hian a ti a. 

“Ka nuin min suksak alawm, a balh dan a namên lo rap..” tiin a nui a. “Mondayah ka zin tawh dawn a, kar tawp lam kha an ti naa, an rawn hmanhmawh leh thut a” Sangliana chuan a ti a. 

“A tha daih zawk alawm,. Chuti naktuk chiah hun kan nei tawh a ni maw?” A ti sep a. 

“Ka inkhawm zuai ang a, chawhnu chu ka off mai ang, ka rawn phei ang.” A lo ti a. 

“Kan chetsual lai khan ka nu leh nangmah chiah ka rilruah in awm mawle..a mak tak tak” Nguri chuan a lo ti daih a. 

“Min hmangaih alawm, a ni lawm ni?” A mitah tak en chung chuan Sangliana chuan a ti thawp sup a. Nguri chuan lai hmelpu lek lek hian, “A dik ngei ka ring” a ti a. Rei tak a fawh tawh loh Nguri hmui chu a va fawp zauh a, “Kei pawn ka hmangaih che. “ A ti dam dap a. 

“Ka mumang a nihte ka ring thin. A mak ee, keini hi ti nge kan intawn ve tawp le?” Nguri chuan a ti sap a. 

“Bulṭantu chu nangmah” Nui chung hian a lo ti a. Nguri chuan a chum taih a, “A ni kher bik lo aw” a ti hak a. “Thingpui hâng ka va inlum teh ang, i nu a mu tawh bawk sia” tiin a tho thut a, choka leh sitting room hi a inzawm vek, thingpui chu a va inchhuan ve hmiah. Nguri chuan a lo thlir reng a, a lungawi hmel kher mai. Kurtai an lo nei hlauh bawk a, thingpui sen hâng chu an in dun ta a. “Kan zin hunah eng nge ka lo hawn ang che.” Sangliana’n a tih chuan, “Payal aw..” a lo ti. Rum zeta melhin, “Vai pawh i ni lo, a ṭul lo” a ti hmuk. Nguri lah chuan, “A nih swalware suit tal” a la ti ta deuh deuh, na lo têa a chala pen pahin, “Keiman ṭha ka tih ka lo hawn zawk mai ang che” a ti a. A phone a rawn ri tlang tlang, a silent emaw a tia a lo theihnghilh a nih hmel, a ner suk a, Cteii bawk chu! 

Dah mai a tum laiin, “Pick rawh, tu nge a?” Nguri chuan a lo ti satliah a. 

“Lunglei a mi a nia” a ti ringawt. A ring ral tir ta a, mahse, a rawn ti leh nghal, “A pawimawh a niang, laksak ve mai la” a tih chuan a la ve ta nge nge a. “U Taite, phone i va la duh lo ve a, i buai mi?” A rawn ti làng làng a. 

“Hei ka leng chhuak a, eng nge ni ta?” a ti bak hluk a. “Ka be chàk che, naktukah min lenpui la” a la rawn ti ta deuh deuh,. “Ka inkhawm dawn alawm, naktuk te chu” a ti leh a. 

“Aw..chawhnuah mawle” a rawn ti leh hram a. 

“Ka hman ka ring chiah lo, ka zin dawn a, insiamte ka ngai dawn a..bakah..” a tih mek laiin, “Ka lo insiampui ang che aw, in awmna lai tak ka hre lo va” a rawn ti ! 

“A ngai lo, ka lawm e. Nidangah kan tum zawk dawn nia, hei ka leng rih sia, ka dah rih phawt aw” tih leh dah a rual nghal daih. Chík taka lo en rengtu Nguri chu melh zauhin, “Tleirawl ho tak hi chu” a’n ti ve ngial a. 

Nguri chuan a aw thian kharhin, “A nih i video viral chungchanga  i insawifiahna kha a dik takzet maw?” A ti ta a. A la hmu ve lo emaw a tih laiin a lo hre daih tawh a nih hmel. “Dik e, dik ti ila i bulah chuan zép neih ka tum hran hleinem, kha nu khan min ngaizawng alawm” a ti ta tawl a. 

“Ka hria alawm, a awmdan aṭang khan” a lo ti leh hmiah. 

“Chuan..i thinrim mi?” Sangliana chuan a ti a. 

“Rimna chhan tur chu ka la hmu chiah chuang lo va” a ti niah niah a, “Ngur, tiang thil velah hi chuan i rilru a zau tih ka hria, min la hriatthiam zui zel pawh a la ngai maithei a nia. I hrethiam tiraw?” Tiin a kut a vawnsak a, “Hrethiam e, mahse, i fimkhur a ngai, hmun fâlah awmpui lo la, tupawn phone kan chelek vek tawh a, hotê-ah i hmingchhe vak ang tih hi ka hlau a ni. “ A lo ti dam diai a, Sangliana rilru pawh a zâng hawk mai. Nguri hi Nguri ni ta lo se chuan, hmeichhe thenkhatin an bawr nasa thin angreng sia, an inhau fôin a nia a rin ni. Nguri a venthawn avangin hawn lam a hnaih ve ta a, a tuk chawhnua inhmu leh tur chuan in vailiam ta phawt. 


A pain, “Khawi hmunah pawh awm ila, kohhran hi han bêl chat mai zel ila, engkim hi a fuh zel tawh mai. Pathian hnaih tluka ṭha hi a la awm ngai reng reng lo a nia.” Tia a fate a fuih thinna chu Sangliana pawh hian a zawm ṭha thin khawp mai. College a kal lai paw’n Kohhran hi a bel ve ngar ngar zel a, chu chuan kawng tam takah a nun a vawng a, tluk sual leh dai pelhna awm thei lakah pawh a chelh ding hram hram thin. “A inkhawm ve ziah a, engmah a ni chuang si lo. Ka ei thlawt lo” tiin tu te emaw inkhawm ṭhin, suala tlu ve leh zauh thinte hi kan han diriamin kan han chirhtheh vel thin tak naa, “Sual chung chung paw’n a inkhawm hram hram zel a, a va fakawm êm” ti zel thei zawk ila, mi, a sual tih inhrereng chung pawha Pathian bel ve tlat chuan ṭhatchhuah hun a nei nge nge thin. 


Chawhnu inkhawm erawh a tuk maia zin tur a nih tawh si avangin Nguri va hmuh hram a duh a, a inkhawm ta lo mai. A inthlak sawk sawk a, Nguri te in lam chu a pan ta a, eitur a lei nual bawk. A va thlen chuan amah chauhin a lo awm a, a nu a lo inkhawm daih a lo nia. A eitur kente chu an ei dun a, Nguri thil ei pawh a tui chho ṭan a, a ei ve tûn tûn mai. “Insiam te i ngai awm sia,.” A tih chuan “Zanah ni mai,. Zan chu ka rawn phei hman loh paw’n min hrethiam mai rawh aw” a ti a. A lo bu nghat. 

“Zuk fimkhur la aw, beer te kha i zuk in ve ringawt ang e” tiin a han zilh zui zat a. “Ka in ve chhin châk, ka in ve ang” a tih chuan a lo melh rum ngang mai. “A nih dik takin zu i in tawh em?” Sangliana chuan a han ti a. Nguri chu a han ṭhu ṭha tê tê a, “In tawh e. Cigaratte pawh ka zu ṭhin. Aizawla ka awm kha ka pa boral hlimchhawn ve deuh a lo ni bawk nen, ka tuar na lutuk a, ka stress nasa lutuk khan vawi hnih chu zu ka in ve, ka thiante min pek a nia. Mahse, ka luak vak a, a nawmna ka hre lo hrim hrim, cigaratte chu sahdah tih vel ka hmuam loh avang hian chaw ei kham vela zuk ka ching a, ka addict hman ṭêp alawm. “ A ti ta mial mial a. 

“Kei ai chuan i thleng thui a nih chu..” a lo ti sup a. 

“Mahse, thil hi tihchhin vek loh a ṭha” a lo ti khauh a. Sangliana pawn chu chu a pawm hle. “Engtik nge i incheck up hun?” Tiin a zawt ta daih a. “Karleh nilai khi a nia..ka nu nen kan kal leh mai ang” a lo ti a. 

A ṭawng leh hmain, “Taka! Mama te kha inṭhen an tum tak tak a, a buaithlak lutuk, he lama a fate nena awm ho a duh a, mahse, U Ruati khan inṭhen hlen chu a ngam chiah lo nge ni, bungrua pawh an la la chuang lo. “ A ti mawlh mawlh a. An inpawhna em em chu chhungkaw thil thlenga an inhriatsak tawn thin hi. Sangliana pawn a hriat tur ṭul a tih chu a hrilh ve mai zel bawk a, hei hi inngaihzawn lai aṭang pawn thil pawimawh tak a ni ve. 


Hun a liam a, Sangliana pawh Bangalore lamah a zin bo ta vang vang rih mai. An inbe reng tho naa, programme a tight thin êm vangin han titi duahna hun erawh an nei mang lo. Nguri pawh a tha chho ve zel a, a incheck up leh paw’n doctor te mak tih a tling hial! Heti taka a tha chak leh hma a sawn chak hi,. A lawm pawh an lawmpui narawh e. Sangliana paw’n thlemna hautak angreng tak a hmachhawn lehpek a! Amah a hmel hi a ṭha veng reuh si, a nungchang a mawi bawk nen, zai lah a thiam hlerh hlerh bawk si a, nula kei ka ni inti ve tan chuan beisei mai pawh a awl viau ta ve ang. A lar ve tawh mai bawk sia. 

Bangalore-a lo mikhualtu Pu Jimmy te chu an felin an polite kher mai. Sangliana chauh a kal lo va, Rsa leh Zothana te nen an pathumin an ni a, zo takin an lo mikhual a ni. Pu Jimmy te hian hostel an nei bawk a, tribal bak awm an remti lo thung. Mizo eng emaw zat an awm a, pu Jimmy te chenna building bul lawkah hostel hi a awm nghe nghe, chuvang chuan hosteller ho paw’n Sangliana te chu an lo ngaisangin an lo atchilh ve hlawm nasa a, an hostel huaihawtin zai turin zan khat phei chu an request hial a, a tira an tum dan ni lo mah se; a tam zawk mizo an ni bawk a, anni lam paw’n an lo remti a,. Hlim takin Hostel-ah chuan an pathum chu an va zai a, an hlawhtling hle nghe nghe. Chutah chuan a nia Sangliana chuan thlemna hautak angreng tak a hmachhawn ni. Hosteller zinga hmelthat vanga lar, Zirna avanga Bangalore-a awm mizo nula ngei mai, Melody chuan chawp leh chilhin Sangliana chu a vei nghal bur a ni mai e. An zai zawh hnu lamah pawh a vei zui zel a, Sangliana te thian thum pawh chuan Melody chu hmeltha an ti viau, an sawi zui ve nak nak a, chutia ngaihzawng anga va en erawh an ni hran lo. Melody erawh chuan tum nghet tak a nei bur mai a, amah hi hmeichhe tha lo leh sihhnip a ni hauh lo,. Zirlai thiam thei tak, harhvâng leh midangte puih nuam ti em em mai a ni nghe nghe, Aizawlah pawh a khawsa thei pawl an ni a, amah hi a tette aṭanga phaia lehkhazir a lo ni bawk nen, Phai lam chu nuam a ti tawh zawk a. Mizo a nihna erawh a theihnghilh ngai lo thung. Nilai zan a ni a, Pu Jimmy chuan Bangalore student’s welfare hruaitute sawmin chaw hlui an kil ho a, anmahni pui turin Melody leh a thiante pahnih an rawn tel bawk. Ei leh in tuihnai tak tak an rawn chhawp chhuak a, Sangliana te pawh an puar ngei mai. An pathum hi in chung lamah mikhual room-ah an mu mai zel a, room erawh lian lo takin a inping dang thliah thung. Nguri nen an inbe zo a, a thiante titi pawh a va zawm ve nghal a. Zanin chu programme an nei rih lo a ni. Welfare lam te an ṭin hnu lawkah Pu Jimmy chuan call dawngin Mizoram lama an hmelhriat tha tak mai, thih ngama dam lo mêk chu a chauh zual thu an rawn hrilh a, a nupui nen a ranga rangin a awmna damdawi in-ah an tlan phei ta a. Pu Jimmy te hian fa pahnih neiin an fapa chu USA-ah hna thil avangin a awm mek a, an fanu erawh Shimla-a a zin lai a ni thung. “Tikhan in lo nghak mai rawh u aw, chanchin kan inhrilh leh mai dawn nia. Lo hahchawl rawh u” tiin Sangliana te chu an chhuahsan ta kha a nia. Anni pawh tihtur em em awm ta lo chu mut mai an tin tuah a, Melody te pawh chuan an tihtur an ti zo thawkhat tawh. Mahse , melody chuan tum a lo nei ru reng chu niin, Sangliana te mut hma chuan cold drinks hi an thianho chu a va thlitsak a, A thiante pahnih erawh Hostelah inleng an neih avangin an phei tawh a. Melody pawh chuan, “Tikhan han mu hahdam rawh u, ka lo tifel ang, kawngka chu kalh a ngai lo, Pu Jimmy te kha an rawn haw leh dawn sia” a ti diam a. Cold drinks an in zawh chuan muangmarin in chung lam chu an pan ta a. 

Dar 12 a ri thuak tawh ang tihin Sangliana chu a harh zawk mai, a chhan chu a bianga  chultu an awm tlat! Khatia a mu kha a muhil nghal bawrh bawrh a, a chau ve ngang a niang. Mahse, tunah hian amah chauhin a mu lo tih a hria! Rang lutukin a thu chhuak a. A sirah chuan Melody ngei mai chu thawmhnaw pan zet hain a lo mu ve reng mai le!..

Comments

Popular Posts