Lalsangliana 5

AW..! LALSANGLIAN..(5)

Ziaktu : Toni Râlte

“Tunah khawiah nge an awm? Engtin nge a awm?” A auin a au a ni ber, a nu leh Nanui te pawh a pindanah an rawn tlan lut hial. Malsawma chuan, “Inbengdai rawh, tunah hian Ṭawipui PHC-ah an dah rih a, Nguri nu chu a biak theih tawh a, Nguri tak chu a la harh lo” a rawn ti dam thluam a. Sangliana lungphu chu a inthum rawn tlut tlut mai. A mangang takzet a ni, “Tichuan, A thi lo tiraw?” Khur dar dar hian a han ti leh a, “A la dam e,. Lunglei lam an panpui dawn a niawm e. “ A rawn ti a. Khumah chuan a thu hnawk, a nu chuan, “Taite, eng nge thil awmzia? “ Tiin a fapa hnungzangah chuan a han chul a, “Nu, Nguri te an accident a nih chu” a ti thei ṭâwk! A hrawkah hnawhtu a nei tlat. Mipa a ni a, ṭah êm chu a hreh ve. Nanui chuan, “Awii, a van pawi tak, mahse , eng êm a ti lovang. Chuan, engtia awm nge i tum? “ Tiin a nau chu a melh a. 

“Lungleiah ka chhuk nghal a ngai” a ti a , “Nanu, ka inthlakna tur kha min lo siamsak lawk ta che” a ti sawk sawk a, amah pawh a insiam zui nghal. Rotea paw’n an thawm chu lo hriain a rawn lut ve a, “Û, ka zuk kalpui dawn che mi? Nge U Amuana ka be dawn?” A ti a. Anu chuan, “Amuana be rawh, zuk kalpui rawh se, nang chu exam tur i ni si” a lo ti var a. Kar lovah Amuana pawh chu a rawn thleng ve nghal a, “A zia lo hle mai, Thianpa, mahse, engtin êm a awm bik nang..Pathian a awm alawm” tiin a thianpa chu a han hnem ve ngial a. Nizan lawkah an hlim dun vei nen chuan aw. Sangliana rilru chu a mang vek avangin Amuana zawkin bike pawh a khalh a, Lunglei lam pan chuan an tlan ta vang vang a. 

Ṭawipui lam pawh an buai mam mam viau mai, an khaw thlen hma lawk khâm-a sumo accident-na lamah chuan an liam sung sung a, Driver bakah mi 6 an chuang a, Nguri te nufa, nu valai 2 leh pa upa tawh lam 1 bakah tlangval la naupang lam deuhte an chuang a ni. A hmunah driver leh pa upa lam bakah nu valai pakhat zawk chu an boral nghal a, Nguri nu leh tlangval erawh mak deuh maiin hliam em em an nei lo. Nguri nu hian Sangliana number a lo la nei lo chu niin a neih ve ber Malsawma kha a va be ta ringawt mai a ni. Nguri chu a la harh lo va, Ṭawipui ṭhalai tlawmngai te’n hliam tuarte leh ruangte chu zawn chhuakin PHC-ah an phur chho nghal a, nurse leh doctor te an phe nghal char char mai. Nguri chu a lu a thi nasa hle mai a, a mitko dinglam a kak bawk a, an ṭhui ta nghal, tin, a malpui veilam pawh thuk lutuk lo hian a kak bawk a, chupawh an thui ta tho, chubak chu lang thei chinah hliam dang an hmu lem lo, pilh leh khem nin nian ang chu a nei nual naa, a harh thei lawk loh chhan chu a kawchhung lam emaw a thluak lamah eng emaw tak felhlel a awm a nih a rinawm. YMA hruaitute lam chuan rorêl nghal zung zungin hliam tuar na deuh pahnih Nguri leh nu valai pakhat zawkte chu Lunglei Civil Hospital lama phurhthlak turin an insingsa ta sang sang a, Mizoram nawmna a lang leh ta,. Khawi hmunah pawh kan mizopuite tan hi chuan tu amah hi kan tlanchhe ngai lo tihtheih a ni. An bungrua pawh an lak chhuahsak nghal vek a, Nguri nu pawh Lungleiah a fanu rual chuan a chhuk ve leh ta a, a fapa pawh chanchin a va hrilh tawh a, ani pawn a rang thei ang bera lo phei a tum a niawm e. A fanu chu a khat tawkin a ko mawlh mawlh reng a, Nguri erawh engmah hre loin a let reng mai si. An chetsual dan an han chhui deuh chuan driver khan zu a lo rui deuh niawm tak a ni, a muthlu deuh sek kha kawng kawi laiah kawi zo tawh loin a tlan liam ta mai a nih hmel. Motor khalh chunga ruih pawizia hi aw, ama nunna ngei paw’n a tawrh phah ta si a. Lunglei an thlen meuh chuan nu valai zawk chu a mar an hmu ta mang lo, an mangang ṭan hle. Chhiat tawh thu chu Media lamah pawh tlangzarh tawh niin Nguri te in luahna te bakah a thawhpuite pawn an lo hria a, pawi an tiin an mang a lo ang ve kher mai. Emergency word-ah dah luh nghal a ni a, nu erawh ICU-ah an nawrlut ta nghal. Doctorin Nguri chu a han en zung zung a, a hliam leh kak te an lo ṭhui fel diam tawh a, a kawchhung lam test chu a ni deuh tawh mai. CT scan tih nghal turin Nguri chu an nawr lut ve leh ta nghal a, hetih lai hian Sangliana te pawh an tlan chak bawk a niang, Pukpui an rawn lut der tawh. A rilrua ṭawngṭai mawlh mawlh mai loh chu tihtheih a nei rih lo. 

“Thianpa, i rilru tihah lutuk suh, a hmuna a boral nghal loh chuan a damchhuak ngei ngei ang. Amaherawhchu, engpawh tawk ila, hmachhawn leh dawnsawn dan thiam tur erawh chuan ṭawngṭai a ṭha” Amuana chuan a ti mawlh mawlh a. Boruak chu a vawt ve sûk tawh a, khaw vawt pawh chuan an rilru a la peng thei lo achha a ni e. Civil Hospital an thleng ta. Amuana chuan Nguri te chanchin chu a han zawt nghal var a, nurse fel tak pakhat chuan Emergency word lam chu a lo kawhhmuh ta var a, pawnah chuan Ṭawipui thalai te pawh kha chanchin ngaichângin an lo la awm nual a, an tlawmngai khawp mai. Sangliana te ward chhunga an va luh chuan Nguri chu Doctor leh nurse te’n an lo bawr deuh laih tih an va hmu a, hlauhthawnnain a khat nghal. Mahse, an va kal hnai ta tho a, mask a vuah avangin tu khaw kha chuan an ngaihven lo hlauh. Doctor te kal kian tak hnuah chuan Nguri nu chu va biain, “Ka pi, keimah” tiin a mask chu a phelh zauh a, a vuah zui leh nghal. 

Nguri nu chuan ṭah aw ṭeuh hian, “Taite, i number ka nei si lo a, Bawihteii phone hi ka hawng thiam bawk si lo, Malsawma khan a lo hrilh che em ni?” A lo ti a, a mittui a hru zauh zauh a. “Aw, min rawn hrilh a, kan rawn kal nghal. A la harh lo em ni?” Lawi rût hian Sangliana chuan a ti a. 

“Aw a la harh thei lo, mahse, a bp vel chu a pangngai an tia,. Nichin lawk khan CT scan an tia, result kan la hre lo.” Mangan hmel zet hian a lo ti a. Sangliana chuan Nguri nikhaw hre lo va mu bâm chalah chuan a han dawm a, a mitko lah an tuam var lûk bawk si. A lu thi kha chu an titawp tawh a, a thisen chhuak vangin a samte pawh chu a khawng deuh iaih a, thisen kha a hloh hnem ve deuh bawk a ni, a hmai pawh a dâng bâi mai. Lainat hmel zetin a thlek ngawih ngawih a, Amuana chu a rilru fim zawk a lo ni bawk nen, “Ka pi, i ril a ṭam awm si a, tirawh, thil zuk ei ang hmiang, Tihian, Taia hian lo awmpui se..” tiin a la hriat ngai miah lo Nguri nu Pi Dingi chu a han bia a, Sangliana pawh chuan, “ Nia, Nu Ding, zuk kal r’u, coffee min lo hawn ve dawn nia. Ngaihtuah suh ka lo awmpui ang, chauh pawh i chau viau ang.” A lo ti ve a. Nguri nu pawhin hnial chi a ni lo tih hriain Amuana chu a zui ve ta a. An pahnih chauha an han awmdun takah chuan, Nguri kut vawt thler chu humsakin, “Ngur, i harh vat a ngai a nia aw. I nu leh keimah vang tal paw’n,. Khawngaihin” tiin mittui parawl kiang chungin a kut chung chu a fâwp vawng vawng a. Hetiang taka Nguri a lo hmangaih hman hi amah ngei pawn mak a ti, khatia an chetsual thu a han hriat chiah khan a lo hmangaih tawhzia a hrethiam chiah. Hun harsa tak avanga intawnga tun dinhmun thleng chho ta an ni bawk a, Nguri chuan a peih lohsan mai ang tih a hlau ngawih ngawih mai a ni. 

Zing dar 4 a ri lek lek tawh tihin ICU-a an nawrluh tak Nu valai kha a chatthla ta nge nge a, an chhiat tawhna chuan a nghawng pawi thui ta hle mai. Ṭawipui thalai lamin a ruang chu an khaw lamah phur phei lehin kuangte siamsakin an khua Sangau lamin ruang an rawn la dawn a ni. Amuana leh Sangliana te pawh an tlaivar ta ṭhak mai. Amuana lakah chuan a inthlahrung ru hle, mahse, a ṭhianṭhaber a ni bawk a, a tan chuan a inhuam em em ang tih a ring tho. Khua a lo var chuan, “Hotel lam pan phawt ang, Nu Dingi pawh kan book kep mai dawn nia, saw lai lawkah sawn ONO hotel a awmin ka hria” Sangliana chuan a ti a. Chhungte han bel chi an ni chiah lo, an kal chhan ngaihtuahin. Pi Dingi chu an va bia a, “Awii a ngai lo, kei chu ka tha alawm, Nangmahni zawk kha zuk hahdam rawh u.” A lo thliam a, mahse, hliam chhetê nei ve tho a nih bakah a chau tih a mitmeng aṭangin a lang reng si,. Intihfai te pawh a duh dawn ngei,. Amuana chuan, “Nu Dingi nen hian kan zu book phawt ang a, lo awmpui leh mai la, kan intihfai zawhah kan lo kal leh ang a, i zuk intifai ve thung dawn nia” tiin rem a lo ruat zung zung a. Pi Dingi tan han hnial ngaihna awm thlawt loin an nawrseh tawh si, inthlahrung si, lawm ru tho bawk siin Amuana nen chuan an inzui chhuak leh ta nge nge a. 

Nguri chu a la harh ta chuang lo. Sangliana chu a beidawng lek lek tawh. Doctor te lahin engmah an la rawn sawi bawk si lo. Mahse, dar 11 bawr velah Nguri nu chu an rawn ko ta a, Doctor nen an va inbe ta a. Nguri nu rawn lut leh hmel chu ngun zet hian a lo en a, nguina a hmuh rual chuan hlauhthawnnain a khat nghal. Pi Dingi chu bench-ah chuan a thu hnawk a, a fanu kut chu vuanin, “Aww, bawihte..ka va lainat tak che êm, keimah vang a ni. Zin kha lo rawt lo ni ila tunah pawh hrisel takin i awm mai tur” tiin zah pawh sawi loin a ṭap ta hlawp hlawp a. Sangliana chu a zâm takzet a ni. Amuana zawk chuan “Nu Ding, insum rawh, eng nge doctor chuan a sawi?” A lo ti dam dup a. 

A inhru hul sawk sawk a, lungchhe takin, “A thluakah thisen a tling a niawm a, hetah an zai ngam si lo va, Aizawl min refer a ni. Thluaka thisen tlingte chu damna chance a chhe lutuk an tia. Kei zawng..” tiin a shawl chuan a hmai a hup vawng vawng a. Sangliana a tho hluai, ngawi rengin a chhuak a, toilet a pan nghal. A insum zo ta ngang lo a niang e, bang chu chumin, “Lalpa, Nguri hian i eng pawi nge a sawi? A nu fanu neihchhun a nih hi. I tihdam ngei a ngai a ni, i khawngaihna ka ngen e, Lalpa, min puitu i nih thin kha, keipawn ka tuar zo lovang. Tidam rawh..khawngaihin..” a ti mawlh mawlh a. A châk ber chu a nu malchunga bawha ṭah hawm hawm a ni. A dik a dik chuan a kum a la upa bik lo va, amah rilru puitling chi a nih vang hian a ngaihtuahawm ngai lo mai zawk thin kha a ni a, tuna an hun tawn zet erawh pachang taka hmachhawn harsa a ti êm a ni. A rilru tithlabar tur zualin nikum mai khan a patea fapa hi a thluaka thisen tling vangin a lo boral tawh bawk nen,. Nguri chuan chance a la nei ang em? Chunglam hian chet a la ang em le? 

Tichuan, Pi Dingi lah ro han rêla ruahmanna han siam chi ziazang ni hek lo, Sangliana te thian dun chuan ruahmanna an siam mai a ngai dawn ta a ni. Mahse, vanneihthlak takin Nguri ú Mama kha a rawn thleng ve ta hlawl mai a, an thaw huai mai. Ani pawn a farnu chu a lainat hmel kher mai, a hmelah inchhirna a chambàng bawk. Chumini la laa Aizawl lama phurh phei chu an rel thlu ta a, Ambulance-in an kal thei dawn hlauh bawk. Sangliana te pawh an khaw lamah an haw leh phawt ang a, amah Sangliana chu a tuka Aizawla chhuk nghal turin ruahmanna an siam ta a ni. Aizawl lamah chuan chhungkhat te an lo awm ve bawk a, han zui zel chu duh viau mah se; Amuana lakah a inthlahrung ve tawh bawk si, Mama pawh chuan lawmthu a hrilh mawlh mawlh reng mai. Tichuan, anni pahnih chu Bàwktlàng lam panin an inkhalh haw leh ta phawt a. A rilruah erawh thildang a leng thei hlawl lo a ni e. 

Nguri te nufa pawh Aizawl panin an liam ta a, a rang thei ang bera zai a ngaih avangin an rilru a hmanhmawh hle nghe nghe. An thlen aṭanga reivak loah OT-ah an nawrlut ta nghal a, a serious thawkhat tih chu a chiang reng mai. Mama leh a nute bakah a papuia te chhung leh Nguri nu cousin te ho pawh an rawn lang ve ta ṭiam ṭiam a. Chhiat meuh han tawh takah chuan an nau fanu chu Nguri papuia te paw’n an lo tuithlar thei awzawng bik lo va, thisena inzawmna hi chu a nghet bawk a ni. Tin, an in luahna te bakah Malsawma te, a thawhpuite pawh an rawn tel ve a, Nguri nu chu a ṭap a ṭap mai, chutitaka an ni nufa rethei leh baihvai tak chunga ṭhat an han chhuah chu. An zai chhung a rei viau mai a, thinphu dêp dêpin an lo ngaichâng a ni ber e. 

A tawpa tawpah Doctor a rawn chhuak ta. Mama chuan chanchin a lo zawt vat a, a tarmit chawisang zauhin, “Kan hlawhtling thawkhat chuan ka hria e. In rilru lo tihah lutuk suh u. Hmalam hun erawh chunglam kut a ni thung. “ A ti ta a. An thaw huai hlawm mai. Ṭawngṭaipuitu a ngah ve bawk êm a ni, Sangliana te chhungkuain an zai chhung zawng khan an lo ṭawngṭaipui reng a, damdawiina awma lo ngaichângte lah bang lo, Ṭawngṭaina chhangtu Pathian kan nei hi chu ringtute tan malsawmna hlu ber a va ni chiang êm..

Sangliana paw’n chanchin a lo hria a, a thaw huai e. Pathian hnenah lawmthu a sawi nghal mawlh mawlh bawk. A tuka Aizawla chhuk kha a tum dan a ni naa, YMA te’n one day sports tournament an huaihawt si, zai tura an ngen nasat bakah volleyball-ah a thianten a tel ve loh hlauin an rawn zim an rawn zim bawk si a, Nguri nu pawhin, “Lo ngaihtuah reng reng suh, lo chhuk vat kher pawh a ngai lo a nia, mutmawh hnâr mawhah khan nei suh. A chhungte kan awm a, an zai hlawhtling niin a lang bawk nen, i hahdam vena hun kha nuam deuhin hmang rawh, amah Bawihteii lah a la harh chuang lo bawk nen, “ a rawn ti diam a. Chuvang chuan a then leh rualte hmai a zah êm vangin chumini chuan programme chu hman ve theih a tum ta a ni. Field -ah a pui a nawiin an pungkhawm a, Thingtlang khua a ni bawk a, hetiang huau huau hi an tawng khât ve bawk nen, mite ngaihhlut a hlawh em em thin. Opening song pawh mawi takin a han thlawh leh ta hlerh hlerh a, zai hi zawng a thiam zet mai. Tichuan, programme pawh ṭan chho zelin Volleyball pawh nuamti takin a khel ve thei ta. A rilru kil khatah Nguri châm reng mah se; midang tana hmuh nuam lo leh a bula awm hrehawm khawpa inthununtir a duh bik lo va, a inkhel tui ve zel mai. An team pawh chakpui lehin an inrawt phur a, a tuk tlaia chaw eikhawm an han rel thlu leh ngawt a. Zanah erawh Kohhran zaipawl ten hla an zir a, ani pawh ina tawm ngawt ai chuan tiin a zir ve a, rem hunah erawh a tel hman a ring chiah lo. Hla zir hi nuam a ti ve hrim hrim a,. An bang har lem lo bawk a, Amuana te inah an peng kawi a, Amuana farnu Mimi chuan, “Laltai, khawmaw i bialnu thlalak chu ka lo en ve, ka hmu ve châk lutuk..” a lo ti nghal bawrh bawrh a. Khamini Nguri a hruai haw ṭum khan lo hmu leh hretu an lo awm ve nen, Thingtlang ta ngang chu an lo hre darh leh deuh vek tawh a niawm e. Ani pawh chuan, Nguri thlalak chu a entir ve mai bawk a, “A va’n nu hran lo, mahse, chhe lo ka tih chi tak a ni..” Mimi chuan a ti a. 

“A chhungril a nu hnêp alawm” Sangliana chuan a lo ti thung. 

“I lar hmaa ex tu che ho kha an inchhir tawh awm” Mimi chuan a ti lehpek a. Ani hi chu ṭawng ve phawng phawng chi a ni bawk nen, chutia a sawi ta bawl pawh chu a mak hran lo. “Inchhir kher lovang, min duh lo va min bân ni nâ nâ a..” Sangliana chuan a ti mai a. Ex tih vel lam chu a ngaihtuah buai peih lo. Liam tawh nunhlui auhlêt a sâwt lo a, hmalam pana ke pen a hlawkthlâk ber tih a hre ve tawh tlat. 

Amuana nen chuan Amuana bialnu Parteii rim turin an chhuak ta a, Parteii hi Amuana ai chuan a û deuh a, mahse, nula fel leh Kohhran khawtlanga mite entawn a ni. Amuana chhungte paw’n an iai lem lo, upa zawk mah se..an inzuina a rei ve thawkhat viau a, inneih lam erawh an la tintuah chiah lo a nih hmel. 

“Taia, Nguri chu an zai hlawhtling maw? La hmu lo mah ila, ka lo ṭawngṭaipui nasa ve ania, a lawmawm tak tak a ni.” Parteii chuan a lo ti var a. “Nang hi chu aw, i va han fel thin tak. “ Sangliana chuan a ti ringawt. Amuana’n Parteii bulah hian zep a nei ngai bik lo va, Parteii hi chuan engkim hre mah se; Sangliana paw’n pawi a ti hran lo. Thingpui te in in an titi satliah a, Call a dawn avangin a chhuak zuk a, “Hello” a tih rual chuan, Pi Dingi chuan, “Taite, Bawihteii a rawn harh asin. “ Hlim hmel zet hian a rawn ti a. Sangliana chu a lam lo chauh, “A ni maw? A ṭawng peih em? Thil chu a la ei thei lovang tiraw?” A ti nghal mawlh mawlh a. 

“Ṭawng chu a la ṭawng peih chiah lo, mahse, a lo harh hrim hrim kha ka lawm, Lungleia in lo kal thute kha ka hrilh ve a, a lawm ve hmel lutuk..” naupangchhia tak hian a rawn ti leh chul a. Sangliana pawh a hlim kher mai. Amuana te bulah pawh chuan chanchin a sawi ve nghal mawlh mawlh a, an lo lawm ve hle. Chumi zan chuan Nguri vang nge ni dawn ni thinthiin a muhil ve ta bawrh bawrh mai. 

“U, tho teh,.û,. Taia, Taitûk..” Rotea chu a vin sâwt hle, Sangliana chuan meng chiang mang hlei lo hian, “Eng nge? Muttui lai laia” a ti ve hluk a. 

“Saw , hmu duh che an lo kal alawm le aw..i fans te” Rotea chuan a ti nuah nuah a. Sangliana chu a ner ru deuh, zingkarah ber kher, engpawhnise, amah ngaisanga duhsaktu an nih si chuan tiin a tho ṭuah ṭuah a, a hâm bai bai mai. A va chhuah chuan nula pahnih an lo thu rân mai. Pakhat chu Model-i ngei kha a ni. Mak a ti nasa, tun hnaiah Nguri vanga a rilru buai nen msg lam a reply vak ngai lo va, call pawh pawimawh lem lo anga lang chu a reject deuh zel mai. Model-i pawh chu a be khât viau. 

“Teh hlawl che u chuan, helai daih daiha ?” Nui sâng chung hian a ti a. 

“Nia, Serchhipah kan kal a, kan rawn tlawh châk che sia, zingkarah kan rawn kal tawp” Modeli chuan a ti a. Modeli hi a hming sawi kher lo mai ila,. “Eng nge Serchhipah in tih? In va fel ve..Nanu, thingpui lo lumsak la” tiin a û chu a ko lûng lûng a. 

“Zin satliah a ni mai, in khua tlawh pah kan châk sia, ka thiannu hi chu Serchhip khua a nia, Nancy a nih hi” Modeli bawk chuan a lo ti a. Choka lama che mêk Nanui chuan zawitê hian, “Zingkarah pawh a nalh hle mai, high heels nen a ni rap mai a, a va taima tak” a ti niah niah a,. A ni lah tak bawka a rawn nalh leh viau a ni. Thingpui chu a va pe a, “I û nen hian in va inang em em, Rotea kha chu ka hmu tawh a, a hma khan..” inti tlangnel tak hian a lo ti leh a, Nancy zawk chu a ṭawng ve mang lo. 

Thingpui dâwt ri khulhin, “Chuan, engtik nge i haw dawn?” Sangliana chuan a lo ti ta daih a. 

“Naktukah a niang, engtik nge Aizawl chhuk i tum?” A lo ti let ve a. “Ka hre chiah rih lo” a ti satliah a, a tum dan chuan a tuk chu a tum ru ve tho a, mahse, a ruala haw a tum ang tih a hlauh vangin a sawi tha duh lo mai mai. Thingpuite an in zawh chuan, “Vawiin lam engmah i ti lovang tiraw? Ti bik suh, Hei Nancy cousin te inah hian chaw kan ei dawn a, chaw eikhamah in khua min fanpui ve rawh.” Modeli chuan a ti no hnâp a. Sangliana chuan chhuanlam tur a dap nghal ruai mai, “Ka va hman hmel loh ê, ka pa nen huana kal kan lo tum a” a ti ta ringawt, an ṭawng ri hre phak Nanui chu a nui vur vur mai, a pa te chu North Vanlaiphaiah a kal daih kha a ni sia, palaiin. “Naa, ka rawn kal chhan ve em em che a, i mak êm mai aw. Kal lo mai rawh” ngenngâwl tak hian a ti leh ta zel si, “Nancy cousin te chu tu te nge a?” Tiin Nancy zawk chu a en ta daih a, Nancy chuan, “Arami pa saw ka putea a lawm, i hria ang tiraw? Arami chu?” A lo ti var a, Arami chu an upa ber pasal nei tate in bul lawka khawsa an ni nghe nghe, “Hre lutuk e, a va tha ve aw.” A ti ringawt. An chhuah dawn chuan, “Taite, ka ring che nia aw, chaw eikhamah kan rawn kal leh ang. “ Modeli chuan a ti leh hram a, nuam lo a ti ve deuh nge ni, “Nia, ka lo tum dawn nia” a ti ve ta ngawt a. Tukṭhuan an ei laiin, “Ngati nge dawt i sawi ringawt a, ka pa pawh a awm tawp si lo” Nanui’n a tih chuan, “Ka chhuak peih lo lawm, bakah ani kha chu a buaithlak” a ti ringawt, Rotea ta pek chuan, “A chhiat loh êm kha, a ngaizawng chiang che. An hausa em?” Tiin a û chu a melh zuk a. 

“Hausa ang, an in pawh ka la hmu lo. Model a nih kha, i hmu fô ang chu” a lo ti liam puat a, anuin Nguri chungchang a sawi tak avangin an sawi zui ta lo. 

Chaw eikham veleh Pi Dingi a call leh ta nghal a, “Eng nge kan chanchin le?” A zuk ti dam thlup a. 

“Ekhai! Hei hma kan sawn dawn niin a lang, lo ngaihtuah suh. Doctor pawhin, ‘A tha chho vat mai ang, zai a nih avangin hun erawh a duh ve deuh a, hlauhthawn tur chu a awm tawhin ka hre lo’ a tia..” zangkhai takin a rawn ti a, Sangliana pawh a hlim hle. “Dam chuan rokhawlhna dang a awm loh chuan, naktukah hian lo chhuk ka tum deuh a,. Mahse, lo la hrilh suh aw” a ti deuh ngei ! Naupangchhia thei siah. Tihtur em em a nei lo, phur fahran loin Modeli te chu a lo nghak a, Amuana a hman loh avangin Dina a call a, amah chauha kal a duh tlat lo , Buanga lah Aizawla a awm lai a ni bawk si, Dina a lo hman remchang mial a, a va lawm tak. Rei pawh an nghak lo, an rawn lang ta vat a, Pheikhawk sang ém chu a rawn bun ta bik lo e. Dina bike-ah Nancy a chuang a, lohtheih lohna avangin Modeli nen chuan an inphurh a ngai. An khua chu han fan em em tur a awm lo naa, thalaite len vena ber Middle school tlangah an tlan chhohpui ta ringawt a, a hmun hi a nuam ve riau a, a dai bawk nen. Modeli te pawh chuan nuam an ti viau mai. Thla an la deuh reng bawk a, Taia chu rem leh rem loin an selfie pui thul, Dina pawh a hawi a hawi ringawt mai. A hnu deuhah an eitur ken te chu an siam a, an ei khawm ta laih laih a, “Dik tak chuan maw Serchhip zin hi chu ka chhuanlam mai mai, in khua hi ka hmu ve chàk tawp a. Chuvang a nia” nui har har chung hian Modeli chuan a ti a. 

“Nuam i ti em?” Dina zawk chuan a lo ti a. “Umm, nuam reuh tawp, Taitea seilenna khuate chu a nuam lo thei nang..” tih pahin Sangliana chu a va melh zeuh a, a khi sak bawk. A lo lai deuh hú thung a, a heh liak zauhin, “Aa..chutiang” a ti nuah nuah ringawt. Nancy leh Dina chu an inkawm thei fû a, Nancy chu Modeli ang lo takin a zia a zàwiin a sawi turah a fimkhur hle tih a lang. Sangliana pawn chu chu a lo notice ve chat mai, Modeli erawh a ṭawng phar phar reng a, a thawveng halh bawk si, lehlam zawng tak chuan a zia chu a awhawm viau zawk mai. Chawhnu lam a ni ta bawk a, an thu rei thawkhat bawk nen, Sangliana chuan hawn a rawt ta a, Modeli chuan a la kham loh hmel hle. Mahse, an haw ta tho a, a tum leh beisei anga Sangliana mitmei a hmuh loh vang nge mawni dawn ni hawn lamah chuan a tûm bâr mai a, Sangliana lahin besâwm tang e a ti lem hlei lo va, an tlan dun mawp mawp ringawt. Arami te in thleng chuan a va thlah a, lo peng ula an tih paw’n, “Hei , Dina hi mau sahpui lawk a ngai a, kan kal phawt ang” a ti deuh tlat. Dina lo hawihai chu a mitmei zauh a, music a lo man ve nghal mai, “Nia, ar in tur mau sah ka ngai a, Laltaia hi ka sawm a, kan va sat tawh ang e. Tluang deuhin in haw dawn nia” tiin a ban a vai a, an kalsan ta. 

Sangliana te inah an inzui lut a, “Ti nge khatia dâwt i sawi kher a? Nancy kha ka la kawm châk tho asin le..” Dina chuan a ti ta roh a. 

“I lerh sia, nang lah hi a. Aa..ka zo lo, thianpa,.” A ti ta thlawt mai. Modeli chu a sual pawh a ni lo, a hmel pawh a tha, a changkang bawk. Mahse, a mizia chu Sangliana chuan zo a inti tlat lo, a kawm thiam lo te pawh a niang e. 

Nguri pawh a rawn meng diar diar a, ngaihtuah hmel taka lo en rengtu a nu chu a han melh a, ṭawng a tum a, a aw a chhuak thei lo. A nghawng leh dar vel chu a kham ṭhûm hian a hria a, a mut nasat vang a ni maithei. Thisen chaw an pe kal reng a, a nu chuan tuilum va lain a taksa chu a hruksak ta a, a sam erawh suk hleihtheih a la ni si lo va, a ngai ang ang khan an la dah ringawt mai a ni.A rilru chu rawn harhfim chho tial tialin an chetsual lai kha mumang ang ruai hian a mitthla thei a, a thlaphanzia leh an chetsual darkar , minute tlemtê-ah pawh a rilruah a nu leh Lalsangliana a ngaihtuah chhuak tihte thlengin a hrechhuak thei ta. Sangliana..ti nge tunah hian a bulah a awm ve loh? A kalsan ta mai em ni? Ani damlo a thuchâng a lung a no tlat mai a, a mittui te chu a parawl kiang mai.  A nu chuan, a rilru hria niawm takin, “Taitea pawh naktukah rawn chhuk a tum kha, khi lamah programme a nei ve deuh reng a, a duh ang hunah pawh a rawn lang thei lo a nih hi. A hmu châk tawh ngawt ang che” a ti siam siam a. Sangliana khan lo la hrilh suh kha a ti tih a hrechhuak leh hnuhnawh, a sawi zo vek tawh si, a inthiam lo ru hle. Mahse, a fanu hmela hlimna lo lang avang chuan a lo sawi ta mai pawh chu pawi a ti leh ta lo. 

Mama pawh a rawn kal a, chaw a rawn kensak a, “Riah phal se chuan ka han riahchhawk tur che a nia, i chau tawh ngawt ang” tiin a nu chu a melh zauh a. “Chau lo ve, Ruati nen chuan in inbe leh tawh em?” A lo ti daih a. Mama hmel chu a rum sawt mai, “Bia e mawle, mi rawn ânkhum leh hrep a, biak pawh kan inbe rei lo. Bungraw lak kan duh, lo,haw rawh a tia, Pu Zuia te inah chabi ka dah, i bungrua kha chu lo la mai rawh ka ti ta hmiah a nih kha..” a ti hluk hluk a. 

“Akhai aw! Chutiang ngawt a ni thei nang, bungraw lak pawh la sawi a ngai lo, karah fanau in nei tawh. Inthen hi tha ka ti lo, in nun sim ve ve ula, inrem takin khawsa leh rawh u, in fate an khawngaihthlak lutuk. “ Nu chu nu nge nge an lo ni thin. Mama erawh a ngawi ta reng a, “Engpawhnise, hei kan zia chho ve zel a, naktukah haw phei phawt mai teh. Pu Zuia kha tir la, Ruati chu kohtir rawh, ani pawn inthen tak tak te chu a duh bik lovang” a nu chuan a ti leh a. 

“A ze ngaitê bak a chhuah leh dawn chuang lo. Ka haw a nih pawhin in saw midang ka luahtir ang a, ka bungrua nen ka fate nen he lamah kan rawn phei mai ang,. Duh leh in lian leh pangngai zawk luah tur kan zawng ang a, kan hlim zawk daih ang. “ A lo ti hmiah hmiah a. A nupui ze diktak a han hriat chhoh zel takah chuan inṭhen chu a cho at at ngei mai. A ni ve lah tak bawk a ni. Ruati zawng kawl reng a har ngang a niang e. 

Sangliana pawh zanah a insiam lawk vek a, zing kara chhuah a tum rilru deuh,. Thlen hma kha a tan chuan a tha ber mai. A pain, “Kan lo ṭawngṭaipui reng ang che u, Nguri pawh a tha chho ve zel mai ang. Amaherawhchu, hei i hriat angin mite hriat hlawh te i lo ni ve ta a, fimkhur tluk a awm lo a nia, i fans te an pawimawhzia leh an duhsakzia che i hria a, thenkhat chuan a ngaihte pawh an ngaizawng hial ang che tih ka ring. Chuvang chuan Nguri i enkawl leh bawihsâwm danah mite mit tikham tur khawpin zu khawsa lo la, mite mitmei hi ven hun a awm ve ngai a nia. “ Tiin a hrilh malh malh a, sangliana pawn a vawng ve khiau ang chu. A tuk maia a bialnu  Nguri hmu tur muta a han mu ta chu zan dang ang ngawt ai chuan a nuam ta deuh e. Dar 5:30-ah a nuin a rawn kaitho a, thawhphan awm hlek lova inperh tho nghalin a insiam nghal sawk sawk a, Rotea leh Nanui te phei chu an la tho lo, a nu leh pate nen chuan an invai liam leh ta phawt a. Tluang takin Aizawl pawh a thleng thla a, a ní te in a pan ta phawt. A intihfai zawhah chaw a bar thuak thuak a, Nguri kan tur chuan a chhuak zui leh ta nghal a. 

A hmain Pi Dingi aṭangin an awmna ward a hre tawh a, chu lam chu a pan nghal, thil la ei thei lo mah se; eitur eng eng emaw chu a lei ve nual tho a,. A va luh chuan damlo pawh an lo tam lutuk lo a, a tihzia angreng. Nguri chu a lo muhil a, Pi Dingi pawh khum bawhin a lo muthlu a, a khawngaih hle, a chau tawh ngawt ang le. Fate tan chuan engpawh tih hi an huam tawh thin si a. Zawitêin a darah a sawi a , a rawn hawi chhuak vat, “Ehe! “ A ti hluai a. 

“I va chau awm ve, chaw i ei tawh em?” A ti zawi sup a. “Aw ei tawh e, ka rin aiin i rawn thleng hma a” a mit a nuai chawt chawt a. 

“Nia, ka rawn zing tlan a. Zuk haw la, zuk chawl hahdam rih rawh, vawiin chu tihian ka lo awmpui ang. Intihfai te pawh i duh ang” a ti a. Pi Dingi chuan a han hnial dawn ngial a, “A rawn harh hma hian kal vat rawh, lo ngaihtuah suh, eng emaw a thlen chuan ka rawn bia ang che.” A ti sawk sawk a, Pi Dingi pawh chu a kal ve ta mai bawk a. Tichuan, Nguri harh hun nghah pahin games te a khel vel ta mai mai a, a hma khan Mobile Legend hi a khel ve nasa thin a, a thiam pawh a thiam ve fú, Thianzahoa khelh an uar tak tak lai phei chuan men pawh an meng rei ve thei viau, mahse, ML te, pubg angte hi chu addict awl lutuk a nih avang hian a bansan ve ta hret hret a, nunphung a tikhaihlak ve nasa bawk nen, khelh leh hi chu a châk thut zel. Tunah chuan a rem ṭeuh tawh lo. Word te a rem khawm ta vel mai mai a nih hi. An ward-a awm ve dangte chuan an rawn ngaihven lem lo nangin nurse duty pahnih te hian an rawn melh leh zauh zauh tih a hre ru ve kar, mask vuah mah se, a hair style bakah a mit te atang chuan Sangliana a ni tih a hriat ve bawk lah tak a, a lar vanglai a ni bawk nen. An rawn be thut ang tih a hlau angreng. Reivakloah Nguri chu a rawn che deuh ṭiah ṭiah a, a phone chu dah vatin a lo chalah a va dawmsak a, a rawn meng ta hlawl mai. A nu hmuh tum lutukin Sangliana hmel a han hmu ta chu a meng phâwk viau nghe nghe, “I rawn harh tawh maw? I mutui em?” A lo ti sawk sawk a. 

A lo bu nghat ringawt. Sangliana chu a lo ngai ve hle tawh nge ni dawn ni mit la lo lêk hian a melh ta vawng vawng a, chu chuan Sangliana rilru pawh a hneh kher mai, a kut chu lain a han hmer a, “I dam ṭêp tawh a nia aw. “ A han ti a, hnema han tih hluak dan a thiam vak lo. 

A rin loh lutukin zawitê thâm ṭik ṭiak hian, “Ka tui a hal “ a rawn ti ta. Sangliana chuan a rawn ṭawng ta chu a lawm lutuk a,tui pek lawk nachang pawh a hre lo. Harhchhuak vatin tui chu no-ah bun chhuakin Nguri lukham chu a kamsansak a, tui chu a tulh ta a, a hal tawh hle a niang, a in khawlh khawlh mai. A harh phah ve deuh hawk a niang, a hmel pawh hmuh a nuam ta viau a. Thei leh thei lo va nuiin, “Ka rimchhia em?” A rawn ti hram. Ber kher chuan aw..Sangliana nuih a za hle, “I rimtui lutuk. “ A lo ti a. 

“Ka ha te hi ka nâwt châk tawh” a ti leh a, balh ngaithei lo tan chuan damloh inbual theih bawk si loh hi thil hrehawm ve tak a ni ve bawk a ni. “Nakinah ka nawhsak dawn che nia, umm..” tiin a biang chu a chulsak a. Natna khuma a mut mek lai pawn midang lakah Sangliana chu a la vengthâwng niawm tak a ni, “Fimkhur rawh, an hria che nge” a la ti ṭâwk ṭâwk a, “A ho lutuk, hre daih ang hmiang. Pawi ka ti ve lo” a ti hmiah mai si. A nu a haw thu te chu a hrilh ve a, “Engtik nge ka chhuah theih ang le..” a ti sep a. 

“A rei tawh lovang, hahdam tum la thil ngaihtuah vak vak lo la , i dam vat mai ang” a thiam ang tawkin a lo ti ve a. Tichuan, Nguri pawn muthilhsan a hreh ve deuh a niang, a la ṭawng tam thei vak lo nen, Sangliana chuan facebook lama an post story te chu a chhiarsak ta keuh keuh a, amah pawh a inawi muthlu lek lek a ni, Nguri pawh a chhiar zawh meuh chuan a hnâr leh sâk sâk tawh. 

Pi Dingi pawh chaw nen a rawn lang leh ta a, Sangliana chungah chuan lawmthu a sawi mawlh mawlh mai. Sangliana chu kawngka thleng a va thlah a, “In lama inenkawl theih vat tum u la, doctor pawh lo râwn leh la maw..” tiin an inthlah liam ta a. 

Gate a thlen dawn lai takin mipa lian lam, hmelchhe lo tak hi eng emaw khai bawr ṭeuh hian a rawn chho ve mek a, Sangliana a hmuh chuan a ding chawt, Sangliana pawh chuan mak a ti deuh a, a hria a nih a ring. 

“Taitea i ni tiraw?” A ti ta chawt reng a. A mask phelhin, “Aw ni e” tiin a nui sâng a, a mipatpui ten an biaka an duhsak hian a lawm hle thin. 

An inchibai a, “Malsawma ka nia, Nguri thianpa kha” a tih chuan Sangliana chuan a mitah tak a melh a, “I chungah ka lawm e aw, U Malsawm..” tiin Malsawma kut chu a hmer na salh a, “A tana ka tihtheih ang ang chu ka tihsak zel ang..” Malsawma chuan a lo ti dam thlup a. 

“Kei pawhin..” Sangliana chuan a lo ti ve sup..Midang an rawn lan tak avangin hmanhmawh taka inthlahin an inṭhen hrang ta nghal a..