Lalsangliana 4

AW..! LALSANGLIAN..(4)

Ziaktu : Toni Râlte

Hlauthawng takin, “Nu, eng nge thleng? Ka û te an lo kal leh em ni?” A ti sek sek a. Sangliana ngaihṭha lo pawh chu a rawn chhuak ve a, “Kal lo e, thildang zawk a nia,. Taitea nen in awmdun em?” A nu chuan a rawn ti a, “Awmdun e, ih, an khuaah kan kal a” hreh zetin Nguri chuan a ti ta a. A nu phun sep thawm a hre zui, mahse, eng nge a sawi tih a hre lo thung. “Lo haw hma dan ngaihtuah u la tiraw? Mahse, i ngaih tiṭha lo suh aw, ka ṭha a nia” a rawn ti a. A dah nghal daih. Amah en rengtu Sangliana melh zawkin, “Ka nu a nia, ka ngaih a tha lo riau, haw ang.” A ti a. 

“Kan thleng ve chauh sia, thingpui tal in ila, khawngaihin..” Sangliana chu zahawm a ti a, a chhungte pawh, chuvang chuan hlim hmel pu lui hram hramin an lut leh ta a. Nanui nen chuan an titi thei viau, an nelawmin zawhna an ngah vak lote chu a lawm hle. Thingpui an in lai chuan nu ber chuan, “Nguri, chaw in ei ve nghal ang chu tiraw? Kan ei hma ang a..” a ti a. A ṭawng hmain Sangliana zawk chuan, “Aih, nu, ei lovang, keimah zawk hi zanah programme ka nei sia, kan chhuk leh nghal deuh mai ang, Nguri hi hmelhriat ve u la ka tih vang a nia ka rawn chhohpui zuai ni, hei kan thim haw tawh maithei a ni. Lungleiah ka va zin leh phawt ang a, chuan kan khua ka rawn direct nghal daih ang.” A lo ti zung zung a. A nu pawh chuan a sawi nawi lem lo. Tichuan, rei pawh awm loin an invailiam leh ta poh a. 

“I nu chuan eng nge a sawi?” Sangliana chuan a ti a. 

Eng em em a sawi loh thu leh lo haw phawt ula a tih ringawt thu chu a hrilh a,. “Mahse, a aw kha nidang a ang lo, a pangngai lo, ka û ten an va rîkrâp leh mawni ka tia..” a tih zawm zat a. 

Ngawi rengin an tlan dun mawp mawp a, kawng a tha tawh bawk a, an tlan rei hran lo. “Chaw ei chhuahpui che ka tum asin. Kan khuaa ka lo kalpui che chu ka inchhir leh deuh..” Aizawl daia an chawlh zawk lai chuan Sangliana chuan a ti a. 

“I chhungte bula min zahpui lo kha ka lawm lutuk, an fel si”  Nguri chuan a lo ti daih. A va pan hnai a, unau hmelhai vel a ni tawh âwm e, motor veivak pawh a tam vak lo. Kawng thlang lam chu thlir dunin, “A chhan chu ka nupui tur i la nih vang a nia” thutak zet hian Sangliana chuan a ti a. Nguri chuan a chil a lem khawlh ringawt, chutiang thil chu a beisei phak bak a ni a, sawi tur a haihchham tlat. 

“I nu chu be leh teh..” Sangliana chuan a ti leh ta daih a, Nguri pawh chuan a call zui nghal, “Hello” a rawn ti tliang ral a. A hma ai khan a aw pawh a zangkhai leh ta deuh. “Nu, i tha tiraw? Hei Aizawl dai kan rawn thleng tawh a” Nguri chuan a ti dam diai a. 

“Tha e, chaw ka lo eisan ta mai che asin,. In ei chhuah ka lo ring a.” A nuin a rawn tih chuan a aw hre phak Sangliana chu a khi suk mai. A plan a hlawhtling dawn e. Nguri ipikna pawh chu a kiang ta duak a, “Nia, hei dinner min leisak a tum a, ei zawh veleh kan lo haw ang aw” a ti a, a nu pawn a lo Amen ve leh thliam. Ngaihṭha takin chaw ei chhuak tur chuan an inphur liam leh ta a, Falkland-ah hmun biru ve deuh lai a lo book thlap tawh a, an manager nen hian an inhre tha a, “Ka cousin ka rawn hruai dawn, phaiah a chhuk leh tawh dawn a, thlah nan min phût ve sia,.” A lo ti lâwk thlap tawh a ni. Nguri paw’n pawi a ti lem lo. An zu thlen thlak chuan Manager pawh chuan a lo welcome vat a, hnathawkte chuan an lo en duh nasa, an phun sar sar bawk a, Sangliana chu thlalakpui an châk tih a lang reng mai, Nguri pawn a hai lo. “Ka lo va lut ang, va lakpui rawh” tiin hun thawl a pe a. Sangliana chu eng emaw sawi tumin a ang zuau a, mahse, Nguri a kal hman tawh si, nula ho nen chuan thla chu an la ta a. Chumi hnuah Nguri chu a va zawm ve chauh. An chaw order pawh a rawn thleng rang viau,. “Nuam an ti awm” awmze nei fê hian Nguri chuan a melh a, “I ho thei e” Sangliana’n a lo ti nang nang. An eitur pawh a tui e, Nguri’n mipa chaw a ei chhuahpui vawikhatna a niawm e. Nuam pawh a ti, Sangliana bulah chuan a him a, a khawr ngai lo, a duh duh a sawi a, ani lahin dawhthei takin a lo ngaithla bawk a, Chumi zan zet chu Nguri night a ni ringawt, a nui hmel lo thlir ngawih ngawihtu Sangliana lah a lo lungawi bawk si. Chaw lah an ei rei narawh e, an eikham meuh chuan dar 8 a pel thuak tawh. Muangmarin Nguri te in lam pan chuan an haw leh ta a, In chhung an va luh chuan Nguri nu chuan a lo dawngsawng vat a, hlim hmel a putna phêna eng emaw awm chu Nguri chuan a hmuh hmaih hauh lo, Sangliana a awm ve avangin a inthup mai mai tih thlengin a hrethiam. Sangliana pawh practice a la ngaih avangin thingpui hâng a in zawhah a haw phei ve ta a. Kawngka a kalh tê tê hnuah Nguri nu chuan, “Bawihte, lo thu teh, Vawiin khan engmah ka rawn sawi duh ta lo a nih kha, in boruak tihchhiat ka hlau a. Englo a nia, vawiin khan i û te chu an rawn kal leh ngei a, ka tawlh duh bik miau loh avangin pawisa chu 50% an chang dawn ta a nih chu, nâ ka tih ber erawh I papuia min ṭawngkhum dan kha a ni, ‘Tikhan ka nau mipa fa awmchhun Mama hi chu kan thisen a la ni bawk a, ani hi chu kan tuamhlawm ang. Nangni nufa erawh chu kan chhungte in ni tawh lo” a ti a, ka mang vek a ni ber e. ‘Ka nau lung pawh kan phun thuai ang a, in nufa hming erawh a lan beisei suh u’ a ti bawk a, ka na a ni. Bawihte, min tuithlarna chu ka pawisa lo, mah se; i pa lungphun chungchang a sawina khan min sawisa rethei khawp mai. An eng pawi hi nge maw ka sawi em em le? Heti taka i û danglam ta hi mak ka ti, awih harsa pawh ka ti, ka hmangaihna kha a la dai hauh si lo. Tunah pawh dan bawhchhiain tihian i pa pension pawh ka sem ṭhen zawk chu a ni si a, ka hming pawh thei se chuan an paih daih duh hial ang. Mahse, ka la dam ve ṭêk ṭêk chhung chuan tuman an tina ngai lovang che..” A nu rilru natna thûkzia chu a hrethiam lutuk tlat. Nguri chuan sawi mai tur pawh a hre lo. A rilru pawh a na ve mang lo, a thinrim hluah hluah zawk. “Nu, a ni em em tawh lo ve, papuia te chu ka’n bia ang e..” tih leh phone chuh a rual a, a nuin lo khap mah se, a dial hman tawh. A ring ral ral a, a papuia ngei mai chuan a rawn la ta. 

“In thiltih dan tenawm tak leh ka nu in lo ṭawngkhum danah hian ka lungawi hauh lo a nia, in nawm amâka in ânkhuma in chirhtheh tur a ni lo aw, Papui..” a ti ve ta tâwn tâwn a. 

“Ee! Khatiang khan nangtê zit zet khan min rawn ṭawngkhum reng reng suh. I nu, mahni fapa pawh hmangaihna nei lo kha kan mamawh lo ve. In nufa khan in awm awmin awm rawh u” A papuia aw pawh chu a chang kher mai. 

“Tehreng mai, in puihna tel loin hei chen hi kan damkhawchhuak ve tawh e, kan mamawh bik reng reng lo che u. Tin, ka û pawh kha lo hrilh la, dân angin hma ka la ang, ka pa pension hi in duha in pawhpen mai mai theih a ni lo, 50% pawh kha ka lakir leh vat ang. Chu chu in lo hre dawn nia, a chiang em? In khawsak theih vang khan dan chunga leng emaw in inti em ni? In la hre dawn khawp e. “ Inringtawk zetin a ti ve ta nghat nghat a, a reh duk a, mahse, “I va han zaktheilo pir per tak, i duh duh danin ti rawh, engkim kan tifel vek tawh, i nu hming kha kan paih loh a hnu lawm hle zawk rawh u. Mai mai che u hian” tih leh phone dah a rual ta daih a. Nguri chuan a nu chu enin, “Nu, ka pa lung chu an duh leh an pualin phun rawh se, kan nufa pualin kan phun ve mai ang. Lungngai suh, Pathian zarah kan damkhawchhuak em em ang, anni sawn engtik lai mahin min ṭanpui ngai chuang lo va, kan mamawh lo. “ Tiin a han hnem ngial a, a nu pawh tlem chuan a hmel a zangkhai ta deuh e. Zan te a rei ta deuh bawk a, mut zai an rel ta rih a, an mu tlem nufa kher mai. Sangliana nen pawh an inbe rei lo. 

A nuin a ngenna avang chauhin a pa pension vanga an buaina chu a khawih zui ta rih lo va, mahse, a pa lung erawh a ú ten an phun hma ngeia phun turin ruahmanna a siam thung. Hetiang em ema mihring rilru danglam thei hi mak a ti, mak a ti fó bawk ang. A ú mawlh chu a ni, nakinah inchhir hun zawng a la nei ve chék ang a, a tlai tawh si ang tih a hlauhpui a ni. A nupui hian ui thi hnu hnuh takin a hnuk tak dawr dawr mai si a, lo hausa thur thur rawh se. Anni nufa zawng an ngaihtuahawm loh nasa, ama hlawh ringawt pawh an khamkhawp tawk e. Tlaiah Malsawma a rawn peng leh a, coffee hi a rawn in tlaitin thin. Nguri thlah haw a duh vang a ni pakhat bawk. Malsawma car lam pana an phei dun lai takin an piah maiah Icon top 10 ho chuan chibai an lo sem a, an zin chhuak tur an thlah a ni mah zawk àwm e, Sangliana kha chuan a rawn hrilh tho naa, an kal daih tawh turah a ngai a, a rawn hrilh lai kha an buai zual lai tak a lo ni bawk nen, “Ka rawn thlah ve lo mai ang che aw, i lo haw hunah ka lo hmuak zawk ang che” tiin an inthlah kha a nia. Chutia an lo la chhuak lo chu mak a ti viau nghe nghe, mahse, mipui lamin an bawr nasat ém avangin va inrawlh ve tum ta lo chuan Malsawma nen chuan car-ah lutin an in lam panin an tlan ta daih a. Mipui kar aṭangin Sangliana chuan a rawn thlir ṭâwk ṭâwk tih reng a hre si lo, Sangliana mood chu chawp leh chilhin a off nghal hmiah. Petera chu a bekbawr zauh a, zawi zawiin an kal kiang ta hrat hrat a, an kalna tur motor a rawn thleng ta bawk nen, midang ho pawh chu an rawn lut ta dial a, tichuan, Lunglei lama concert nei leh turin Aizawl chu an chhuahsan leh ta vang vang a. 

“Vawiin khan in va chhuak har ve, i chau em? In thleng tawh em?” Nguri msg chu a chhiar a, a reply lo. Tukverah chuan dakin ngaihtuahna chawl deuh hian a awm a. A ngaihtuah ber pawh a hre lo. Engvangin nge kha pa car-ah khan a chuan? Chu zawhna chhanna chu a hre duh a, mahse, thikthu avanga a insum theih loh hlauin Nguri msg pawh a reply duh rih lo a ni. Lunglei an thleng a, an chau ve deuh bawk nen, Sangliana phei chu a inbual sawk sawk a, thil pawh ei peih loin a mu nghal daih. An thlenna hotel hi a changkang riau a, a thianghlim bawk si, Lunglei a vawikhat zinna a ni bawk a, nuam dawn hlein a hria, mawlhtu erawh a nei reng. Dar 11 a ri ṭêp tihin Nguri hnen atangin call a dawng ta a, lak loh ngawt chu harsa a tih avangin a laksak ta nge nge a.

“Ti nge i reh char char a, chanchin tal chu min hrilh ve ta che..” lungawi hmel vak loh hian a rawn ti a. 

“Nia, ka chau deuh a..” a ti ringawt. 

“Chupawhnise, ka msg kha reply a harsa viau em ni?” A ti leh hlak a. 

“Motor kan chuanlai a nia. Hei ka inbual a, ka mu nghal daih” a tih chuan, “Thil pawh i ei lova maw?” Ngaihtuah hmel fê hian a rawn ti a. 

“Ka ril a ṭam lo” a ti bung nghut a, Nguri chuan a rilru hrethiam niawm tak hian, “Lungawi lohna i nei em ni? Ka rawn thlah loh vang che kha em ni?” A rawn ti sawk sawk a. 

“Ni lo ve, ka hmuh lai renga mipa dang motora i lut lai ka hmuh vang kha a niang” a ti ta khawl mai. Thil zêp hni hne a thiam ve lem lo bawk nen a sawi ta bawl mai a ni. Nguri thaw hawk chu a hre thei, “Ka ring reng ah, min lo hmu a ni maw? Mi khan an bawr nasa che u sia, rawn inlan kha ka hreh deuh a, min thlahtu kha chu U Malsawma kan customer hlun a nia..” a ti ta a. 

“Chuan?” Awmze nei zet hian a va ti leh, “Chuan eng nge? Engmah kan inkarah a awm lo, thiantha kan nia, chuzawng chu..” Nguri’n a tih chuan, “A nih chuan Sangliana nen kan inngaizawng tiin a bulah sawi ang che, a tha em? “ A lo ti hmiah. Nguri chu a ngawi dat a, “Taia..” a ti sep. Taia, Taite ti hian a ko ngai mang lo. Sanglian a ti deuh lawl lawl zel, a chhan chu Sangliana tih hi mawi a tih vang a nia. 

“I hrilh lo a nih chuan thil pawi zawk a thleng ang..” Sangliana chuan a inrin hmain a ti ta mai a ! “Eng thil pawi maw?” A rawn ti vat. 

“Hriat kher i duh ka ring lo” a ti leh daih a, “Ka hrilh loh chuan ngaihzawng dang neih i tum tihna..a dik em?” Nguri chuan a rawn ti ta fak a. “Tum lo. Mahse, keiman ka hrilh ang” a lo ti chhum ve hmuk. 

“Aw le, naktukah ka lo hrilh ang, a tha em? I lungawi tawh em?” Tlema nem zawk hian a rawn ti a, a lungawi chawpchilh deuh ringawt. Nguri lakah hian ti nge maw a nem hma em em mai ni. Tui tak chuan a muthilh ve leh tak mai kha maw..

An thlenna hotel neitute chuan fanu pahnih an nei a, a upa zawk chu Sangliana te nen an inrual khat vel awm e, a felin a polite kher mai. A nau zawk erawh tleirawl tituai nalh zet mai, hmel pawh tha fiah kâk kan tih ang kha a ni a, a û angin a rawn pawh ve vak lo, a la zakzum deuh a ni maithei. Sangliana erawh a en duhin a lo melh leh ngawt ngawt thin. A star hle tih chu hai rual a ni lo. Chumini chu hahchawlh nan an hmang ta rih a, Lunglei khaw chhung an fang kual zuai zuai a, nuam an ti hlawm hle. Aizawl ang em emin a chêp ve lem lo bawk nen. An let leh hnuah lunch special tak an lo hlui a, Sangliana pawh a ei zawhah a inbual zui nghal. A inbual zo a inthlak laiin tleirawl Cteii an tih mai kha a rawn lut hlawl mai a, “Ah! Tihpalh” tiin zak deuhin a kalsawn leh vat. A inhak zawhah, “Cte, lo kal rawh, ka inthlak zo tawh alawm” tiin a han ko a, Coffee a rawn kensak a lo nia. Khumah chuan rawn thu vein, “Ih, U Taite, i number min lo pe” zah hmel zet hian a ti a. A lo pe ve mai bawk. A tho ta nalh a, “Ka lo biak che chuan min lo reply ve rawh aw” tiin a nui sen sen a, Sangliana pawh a bu ve nghut mai. Nguri nen an inbe zuai a, “Malsawma chu i hrilh tawh em?” A han ti nghal ngawt a. 

“A lo la kal hleinem” a lo ti sap a. 

“I hrilh loh vaih” tiin a han vau leh a, “Hrilh kher hi tul ka va ti lo tak, mi bulah a sawi dawn ngei a, an rilru a na ang e, ka tan a nuam hleinem” Nguri chuan a ti tân tân a. 

“A ho, khatiang i care dan em em kha, keimah vang pawh a ni lovang, nangma lamah khan dik lo a awm a niang.” A ti pawr hlur a,. A lungawi lo laklawh tawh tlat si. “Chutianga i ngai dawn a nih chuan ka hrilh ang ka hrilh em em ang. “ Nguri pawh chuan a rawn ti vin ve ṭhak. Tun tum an zin zawng an inbiak ve apiangin an inhnial zel a, a buaithlak a ni e. Zanah Hotel balcony-ah guitar perhin an zaiho ṭhap ṭhap a, boruak a nuam tawk viau bawk nen Cteii te unau pawh an rawn tel ve a, Cteii chu Sangliana bulah a thu chat mai. 

“U Taite, ka msg pawh i reply duh lo” zawitê hian a ti sep a. 

“Ehe! Sorry, ka phone ka lo en lo va, lo reply ngei ngei ang che “ a ti satliah ve mai a. Cteii’n a melh dan leh ṭul hlei lova a ban leh nâk bawr vel a rawn ngheng leh zauh thinte chu a haider lui tlat, a awmdan chu mipa tan hai chi a ni bik lo. A fans te zingah a tam zawk chu hmeichhia an ni ngei e, tlema han che over fal deuh pawh an awm ve, mahse, a taksa han khawiha han nêk deuh salh salh hi ama lam a lo inveng ve deuh bawk nen, an awm mang lo va. Cteii erawh chu zan a rei tual tual a, a che foul tial tial a ni ber mai, zakzum âwm tê anga lang si khan boruak a hap sang ta riau. A kut te chu midang hmuh theih loh turin a rawn vawnsak thul, a awm a nuam ta chiah lo hle. Vanneih asiamin a phone a rawn ri ta hlauh a, Nguri a lo ni. 

“Eng em em nge i tih a? “ A rawn ti vin leh hlak hlak tawh. 

“Kan zai a” a ti ringawt. 

“Zai pawh ni ula, ka msg tal chu seen ta che. Hmeichhia nen in awmdun a nih kha” a rawn ti vei lâng lâng a. Chutia thîkthu nei anga a han lang vete chu Sangliana chuan a lâwm rilru hle zawk mai. “Awm te chu awm e, mahse ka thiante nen kan awm vek alawm” a ti hram a. 

“I roomah lut rawh, naktukah concert in nei dawn a, tuna lo zai vak vak kha i aw te kha a chak loh phah anga sin. Bakah a tlai tawh” thupe aw zet hian a rawn ti a,. “Yesii” tiin a thiante a buk khum zauh a, a pindanah a luhsan ta hlawm a. Cteii hrilhhai hmel erawh a hmu ve lem lo. 

“I hrilh ta em?” A han ti leh a, “Chu reng, msg i seen thei lo a nih kha, hrilh chiang e. A tirah a awih lo va, mahse , kan thlalak ka entir a” a rawn ti niah niah a. “Chuan zel?” Sangliana’n a tih chuan, “A awih ta a, mak a ti lutuk, min lawmpui thu leh i vanneih thu te a sawi..haha..” a rawn nuih danah a fiamthu pah tih a hrethiam. 

“A ṭhat nasat chu, tikhan sawi darh mah se, a ho êm mai. Mihringte chu mipa leh hmeichhia kan nih angin kan inngaizawng ve bawk ang chu, venthâwn kha ngah viau zel suh. “ Inla puitling fahran hian a han ti ve a, Nguri nuih a lo za. 

Lunglei lamah pawh an tla na bawk a, concert pawh a hlung narawh e, thilpek an dawn nasat bakah hotela kal chilh tawk an awm ve reng bawk a, Mizoram pawh kan changkang chho ve zel a, mi lar te treat dan tawk pawh kan thiam chho ve ta viau mai. An hawn dawn zanah chuan balcony-ah bawk an zaiho leh a, Cteii pawh a ngaitêin a bulah a rawn thu ve leh ta chat. A msg pawh a chhansak ve tawh a, a ngampa thar deuh niawm tak a ni. Tin, Sangliana, ruihhlo chu sawi loh zuk leh hmuam ti ngai lo ta chu a hnar a fingin a rim hriatna a tha bawk a, Cteii rim danglam chu a hre nghal vat mai a, zu rim a nam thar thar tih chu ! A la naupan nen ngaihtuahawm a ti rilru hle. Amaherawhchu, khawvel hi a hmanhmawh tawh khawp a, ti thei âwma kan rin loh leh beisei loh naupang tê tê te paw’n sualna kawng hi an lo dai fê tawh thin a, ruihhlo bakah nulat tlangvalna kawngah lah kan tlan nasa, hei hi chu chhungkua atanga bulṭan chi niin a lang. A tuk zingkara chhuak tur an nih avangin an manager chuan mut hma a rawt a, thuawih takin an pindan lam an pan ta ṭheuh a. Nguri msg kha a hmain a lo hmu tawh a, mitthi an lumen tur thu kha, chuvang chuan va call loh law law chu tha zawka hriain a inthlak hnuah a mu ve nghal mai. Mahse, Cteii’n a rawn call ta tlat. Call dang dang pawh hi a dawng awl lo naa a chang chuan a la vek seng bik lo nen, ring ral tir hi a nei ve nual, a induh leh inlak vang erawh a ni hauh lo, an buai bakah an hun awlah chuan hahdam an thlahlel ve em em a ni. Cteii erawh an thlenna hotel neitu an nih miau avangin a laksak ta hram a, dar 10 a pel tawh. “U Taite, kawngka min lo hawn lawk” a rawn ti ta mai. Nuam lo ti ru deuh hian room kawngka chu a va hawnsak a, Kawr themlem fahran leh kekawrbul chhing zet nen a lo ding teu mai a, nalh zawng a nalh reuh ngawt mai. “Eng nge ni ta? Cte” a ti satliah a. 

A rawn lut a, khumah thuin, “Naktukah in haw tawh dawn sia, ka rawn thlah dawn che a” a ti no ngher ngher a. A nui seih seih bawk. A ngaihna hrethiam vak lo hian Sangliana chuan, “A ni maw? I va fel ve” a ti ringawt a. Sawi tur vâng a ti ngei mai. A fans te zingah hetiang taka amah hnaihtu hi an la awm miau lo a. 

“Lo thu ve la..hawh” tiin a rawn kai ta mai, a thu ve mai bawk a, a thu fel chiah tihin a inrin hmain Cteii chuan khumah chuan a bawhthlu ta mai,. A hamhaih atalângin engmah pawh a sawi lawk thei lo. Cteii chuan a hmuiah rawh fawh a tum a, a harh chhuak zawk, namkiang vatin, “Ekhai! Cte, hetiang tur a ni lo, tho rawh. I chhungten min rawn hmu palh ang e. A zia lo êm mai..” tiin a nam a, amah pawh a inperh tho ve nghal, Cteii chuan zak hmel pawh a pu chuang lo, “Ka duh êm che a ni, min duh ve lo em ni? Mawh?” A la ti zui ham ham. Tihdanglama a awm miau avangin zahna chu a bosal lo thei lo ve bawk a, “Min hrethiam rawh, bialnu ka nei a ni. “ Sangliana chuan a ti nghet charh a,. Hetiang thil hi nakin zelah tawn leh a hlau ru kher mai. 

“Tu nge? Kei aiin a tha zawk em ni? Kei chu i duh dan danin ka awm, U Taite, min duh ve rawh..mawh..” a ti ṭiau a, khawngaihthla te pawh a la lek lek alawm le. Mahse, Sangliana chu hetiang zawnga dawr chi a ni hauh si lo. “Min chhuahsan phawt mai teh, ka haw lo che a nia, thiantha tak kan ni reng dawn nia” tiin dim têin a kai chhuak a, kawngka a kalh nghal rap bawk. 

“Lalpa, thlemna min hnehtir avangin ka lawm e.” A ti sup a. A mutchhuak pawh a reh ta vek mai, nasa taka inngaihtuah vak vakin a chauh tawngkhawng hnu zing lamah a muhil ve ta chauh a, an rawn kaihthawh chuan a mut a la chhuak kher mai. An motor chuang pawh a harhvâng lo berah ṭangin a thiante titi pawh a zawm peih lo va, Mausen an pelh hnu lawkah a muthlu zui ta bawrh bawrh a. 

Malsawma chuan a zial chu a han pak talh talh a, ral lehlam tlâng, romeiin a bawh pawt chûk lam chu thlirin a rilruah erawh Nguri thil hrilh ringawt chu a awm thung. Youth icon Sangliana nena an thlalak a hmuh atang khan a la dik hleithei tlat lo, Hmel leh dinhmunah chuan Sangliana chu el pha tawkah inngai ve mah se; Nguri thinlung a lo ruksak hmasa zawk si a, chhuhlêt thei dinhmunah a ding miau si lo, Nguri’n fiah leh chiang taka an inngaihzawn thu a hrilh khan a awih phal lo kha a nia, mahse, Concert an kal zana Nguri call dawn leh an inbiak dan te a han chhuikir chuan thil ni thei a ni tih a hrethiam, Nguri chu a lo duh thûk tawh êm avangin tawrh hrehawm chu a ti ve khawp mai. A chang leh amah amah inhauin, ‘Mitmei pawh a hmuh lo che a, a tirah pawh bialpa a neih thu a hrilh mawlh mawlh che a, nangmah leh nangmah i intina a ni” tiin a thinlung chu a chhal zut zut a. Nguri chu a haw thei chuang der lo, huat ve ngawtna chhan tur a nei hleinem. An inhmuh hmaa thil thleng kha ani hian a tidanglam thei miau lo va, Sangliana hi Icon an ṭan phat aṭanga a lo duh ve em em, zaithiam a tih leh a ṭan ber kha a lo ni ve mauh bawk a ! Chu a lo ṭan em em leh a hmeichhe vei ngawih ngawih chuan inzawmna nghet tak an lo nei bawk si, tih vak ngaihna pawh a hre lo. Midang bulah erawh khawiahmah a sawi chhuak lo, mipa a ni a, va tlangaupui zûrh zûrh chi mizia kha a nei ve lo. “Engpawhnise, Nguri, thiantha anga min la pawm thei a nih chuan, ka lawm tawk em em a nia, ka haw lo che aw..” ti khan a thlah kha a nia, Nguri nen kawng hran zawha inhre ngai miah lo anga awm chu a theih a ring lo, chuvang chuan thiantha ang tala inkawm zui zel pawh a la duh fan a ni. Engvanga he nula hi duh em em nge a nih pawh a inhrethiam tawh bik lo. 

Nguri tlaivar chau pawh chu an manager a hrilh sa tawh tho a, dar 10 velah dawr a thleng ve chauh, a phelh phang mai a, a thothang pawh a zang vah lo hle. Vanneih asiamin customer an neih tlem ni tak a ni hlauh zawk a. Vawiinah Sangliana te an rawn haw dawn tih a hria a, a intichak hram hram, a ngai ve tawh viau a, a rilru kilkhatah Malsawma pawh a riak ve reng tho. Khawngaihna hi hmangaihnaah chuan inlet thei nise Malsawma hi hmangaih duh lohna chhan tur a nei hauh lo mawle, mahse, Hmangaihna aṭangin khawngaihna hi a lo piang zawk thin si a, khawngaih ringawt chu a tawk zo lo a ni. Sangliana call a dawng a, dar 4 a ri ṭep, “Umm, in lo thleng tawh em ni?” A ti a. 

“Kan rawn lut chiah, motor siamin min dang rei lutuk a, in bang tawh em?” A rawn ti a, “Aih, bang ve ṭêp ang” a ti sep a. 

“I aw chu a va chau ve, i tlaivar ve kher a nih kha,. “ A rawn tih chuan a chhang lem lo. “I thianpa chuan a thlah leh dawn che mi?” A rawn ti leh kher a, Nguri a ner sak, “A la rawn lang miah lo, a lo kal dawn lo a niang” a ti a. 

“Taxi la mai rawh,. Ke chuan haw suh, i chau a nih kha, zanah rawn len ka tum asin” a rawn ti zangkhai vah thung a, “Ka lo awm ang. “ Nguri chuan a ti sap a, an dah ta rih. 

Zanriah an siam laiin Mami hnen atangin call a dawng a, “Awii, Ngur, i û te nupa an inhau a, in monu chu a tlan leh a. I û lah chu a rui bawk si, bungrua te a suasam a, ka pa ten an zuk buaipui a” a rawn ti mial mial a, Nguri a chhing sawk, a rawlthar chhuahtirh atanga zu far khat pawh tem ngai lo a û chuan zu a rui a maw?! Thil hi a lo va danglam thei ngai êm. “ A va zia lo ve, an hlim viau emaw ka tia sin” a tih chuan, “U Ruati (an monu) te chhung hian thuneih an tum êm a, a ngaithei ta bik lo a nih hmel, koh pawh ka ko dawn lo, a duh hunah rawn haw ve mai rawh se, amah vangin ka nu leh ka farnu te nen kan inhlat phah a, ka lawm lo te a tih ve kha, a inchhir ve ṭan a niang” Mami chuan a rawn ti leh mawlh mawlh a. 

“Chutia a inngaihtuah harh ve chuan a that chu, chanchin min lo hrilh leh rawh aw” tiin an dah ta rih a, a nu nen zanriah ei chhung chu a û chanchin an sawi. A pa kha chu la dam se hetiang ngawt zawng an ni lovang mawle. 

A inbual zo a inthlak fel deuh chiah tihin Sangliana ṭawng ri a hria a, a rawn hma viau mai. “Lo thu lawk rawh, ka hman tep” a va ti lâng lâng a, a nu nen an lo inkawm ve a, thingpui sen hâng an dawm leh tak kha. Nguri rawn thut hnu lawkah a nu pawh chuan, “In chung te inah ka han leng lawk ang e,.” Tih leh chhuah a rual nghal. 

“I nu hi a romantic reuh e” Sangliana’n a ti zui hak a. A nui hui bawk. 

“A zei reuh alawm” Nguri pawh chuan a lo ti ve mai a. 

“Ka ngaih tawhzia che hi, tun ṭum kan zin chu ka ngai ngawih ngawih che mawle” tih leh kuah a rual a, Nguri pawh a chauhna te chu dam huai huaiin a inhria, “Kei chuan englaipawn” a ti sep a, infawp zauhin, “Lunglei chu a nuam em?” A ti zui zat a. 

“Nuam ve reng, awm ve phei la chuan a nuam lehzual ang..” a lo ti a. A thil hawnsak te chu a han pe ve ngei a, bracelet simple deuh hi a ni a, bazarna hun kha an ngah lutuk lo nen, a hmuh ang ang kha a leisak ve tawp mai kha a nia. Nguri erawh a lawm thiam ngei mai. Inkuah dun chial rengin insi loin an awm thei lo ni berin a lang, “Tunah tak chuan programme lian tham ka nei rih lo va, kan khuaah ka han haw ve zuai ang a, ka han hahchawl ve ang a, ka rawn chhuk leh vat ang. Min ngai ang em?” Sangliana chuan a han ti a. 

“Chutiangte inzawh a ngai em ni?” A lo ti khauh. 

“Kha pa kha lo inrimtir miah suh ang che.” A’n ti leh hmiah mai a, Nguri a ner nawk, “Ka thunun theih pawh a ni bik hleinem, nula ka nia, min rim ve bawk ang chu” a ti a. 

“Nula angin inngai lo mai rawh. “ A lo ti ngawt a, “Engtin chuan? Nuthlawi angin em ni ka inngaih dawn?” A lo ti hâ a. 

“Pasal hual nei angin mawle” a mita rawn melh chung hian a ti thawp sup a. Nguri a hamhaih deuh..”Min melh kur hian ka hlau deuh thin,i meng chiang thei si” a ti ta daih a. Sangliana a nui ruh ruh ringawt. Tiang chuan thil dang dang sawiin dar 10 chu an thleng leh ta der mai. 

Sangliana pawh an khaw lam a thleng chho ve leh ta a, a thlen zanah an khaw YMA te’n cheraw kan an lo zir a, a thianten an sawm ve leh tlat si a, a chau em em lo bawk a, a han kal ve leh ta poh a. Sangliana makna chu a lar viau hnuah pawh a mize diktak kha a la chhawm nung reng a, a phawk a chhuah chang paw’n a hma ang thoin a tilang hreh ngai lo va, lar tak avanga thian hlui leh hlui lote unfollow tih luklak vel kha chu a mizia a ni ve lem lo tih a lang, a ngai reng a, a ze duhawm leh ngainatawm tak kha a hma ai mahin a parchhuak nasa zawk emaw tih mai tur a ni, chuvang chuan mi tupawh a tê ber thlengin mi lar ni tawh mah se; a bulah an ngampa a, an ngaih a ngam a, an kimki ngai hauh lo. Hemi zan pawh hian an cheraw kanna bulah chuan ka kân ve e tiin a lo inthehṭhil ve nasa mai a ! An nuih nasa hlawm viau mai. Amah lah a hlim ber berah a la ṭang zui. A lam buai atalângin Nguri call pawh a lo la thei lo chu niin, msg-in rawn chhu zui ta hrep lehnghal, an haw hnuah inthlahrung ru zetin a call ta dûk dûk a. 

“In khua chu a va nuam awm em em ve a” a rawn ti hlak hlak a. Sangliana a nui hak hak, “Tinsang, nuam ve bawk e..” a ti a, “Hmela, khatiang khan vawikhat pawh min han ko leh teh aw..” a rawn ti vin leh ṭhak. 

“Ngur tih hming pu ve si, Sailo hnam pawh han nih loh “ hetia tih el kual vel hi nuam a ti riau zel. 

“Pautu ve si, han zaithiam..lerh bawk” a rawn ti ve, “Ngurtinsangi Pachuau han nih daih mai chu’h! “ 

A rawn sa tawh nasa, Sangliana erawh a nui pût pût thung. An tawpna boruak erawh a hlimawm e, a cheraw kânna video te kha a zu thawn ve a, “Lâm hi chu i englo thênna a ni lo, awmhmuna i zai paha i phar thin hi a tawk, lam ve vak a ngai lo” a rawn ti.

“Eng nge ‘englo’ chu?” A zuk ti leh kher. 

“Lalsanglian, i hria..nghal viau suh. Tak ana ka û te khuaah kan zin dawn” a rawn ti ta a. 

Tlema thutak deuh zawkin, “Engti turin, buaina i va tawk leh ang e” a tih chuan, “Ka û te kha an intithiam lo va, an nu a tlan a, chung vel chu mawle, keipawn ni 3 chawlh ka la a” a rawn ti a. A û te bawk maw? Heiham, inrawlh tawh lo law law se a duh. An buai leh vak a hlau a ni ber e. 

A tukah chuan a lo châk sakhai tawh angin a ṭhiante nen lui lam an pan leh ta dial a, len den bakah tui te pawh an thehkang ang chu, an khaw lui ho hi sangha an lian vak lo nain an la tam ve a, tui thehkang mai maiah pawh an man ve nual zel. 

“Laltai, lar hi a nuam em?” Dina chuan a ti leh hû a. 

“Nuam a, nawm loh chang pawh a awm tho..” a ti ve mai a. 

Buanga chuan, “Nang chu Aizawl nula chhe lo fe fe, sil loh pawha ei tlakho ang khan an atchilh che sia, i zuk che na riau lo maw?” Zawi sup hian a lo ti ve a. An khi ṭhâw hlawm mai, “Akhai! Chutiang min atchilhtu an awm lo, ka zai an duh ringawt alawm. Bakah tunlaiah natna tha lo a tam tawh sia, HIV te hi a veite chalah a inziak si lo va, hmuh apiang mutpui ngawtte hi thil tih chi a ni miah lo nia aw thianpa..” thutak ru deuh hian a ti a, a thil vei ruk em em a sawi chhuak a ni ve mai.

Amuana chuan, “Dik chiah, kan rin loh pui pui, Kohhrana inhmang tak takte pawh hi a ruka vei an awm nual ka ring asin. Mizote chu sex education ngaihthah si, a ruka hur hlur chi hi kan tam sia, kei chu inneih dawn pawn thisente hi test hmasak phawt ka duh ang. Tumah kan inhrechiang tak tak tawh si lo.” A lo ti ve a. An titi tui khawp mai. 

Buanga hian len den a thiam bawk a, a man thei hle, Sangliana leh Dina’n tui an lo thehkang ve bawk a, kaikuang bakah sangha an man ve ta nual e. Chawfâk a lo hun a, hei mawlh hi a nia Sangliana thlakhlel thin chu..tumbu nen sangha leh kaikuang te chu an bai thak a, sawhthing rim nam châk châk te chuan an rilṭam a tizual ngei mai. An chaw lâk pawh a tha e. Tlai dar 5 rik hmain vawikhat ei ṭheuh tur an insem hnuin hawn zai an rel ve ta a ni. Amuana hi chuan Nguri chungchang kha a hre vek tawh a, mahse, midang bulah a sawi duh bik lo, a thianpa a vengthawng lo thei lo ve bawk a. 

Cteii khan a la rawn be fô thin a, tin, Cteii ni lo Aizawl ami model pakhat chhe lo zet leh Aizawl ami tho tleirâwl duhawm fahran te hian an rawn be nasa fal hle bawk. A fans hrim hrimte chuan an be thin tho nain anni pathum hian an beisei an rawn tisang zual bik a, biak dan tawk thiam har a ti ve thin hle. Model-i lah a zeiin a nalh ngang mai si, a confi viau bawk. Sangliana te nen hian programme pakhatah an lo tel ho tawh a, zanriah an kil ho lehzel nen, khata ṭang khan a rawn be âwl lo a ni ber. Tha tak chuan a chhang ve zel tho nain, zep nâk emaw model te, actress te bakah zaithiam lar tak takte hi hmuh nuam tiin en manhla ti viau thin mah se; a hmeichhia ni turin a la suangtuah ngai hauh lo va, a lar hma te kha chuan han star viaute pawh a nei tho nain khatihlai pawh khan han ngaihzawn tak takna rilru kha a pu ngai mang lo. Duhthlang thei dinhmuna a han din tak hnuah phei chuan a rilru nghehna chu a rawn langsar zual sauh emaw tih mai turin engmah a nih loh laia amah thlanga inlaichinna a lo neihpui Ngurtinsangi-ah bak rilru a pe thei ta meuh lo va, mi zawng zawng a tilâwm thei lo va, chu chu amah pawn a pawm a ngai tih a hria, amaherawhchu, hei erawh a vawng ve tlat, ‘Mi zawng zawng a tilâwm thei lo a, mi rilru pawh a tina lo thei” tih thu hi. A theih ang chin chinah amah ngaisanga duhsaktu te chu ngaihsak let ve a tum tlat a ni, hei hian a fans te thinlungah pawh hna a thawk tha ngiang reng a. 

An hla zir zo a inthlak laiin call a dawng a, a save miah lo. A ring ral tir a, a laklawh deuh vang a ni. A rawn call leh takah chuan a la ta a, “Sanglian, min hre kher lo maithei, Malsawma , Nguri thianpa ka nia, Nichin mai khan Nguri te chetsual thu ka dawng a,. Ṭawipui south thlen hma âwih-ah an tlan liam a niawm e.” Mipa aw thum lam hian a rawn ti ta mai le..! A vir muai muai ni maiin a hria..Nguri, engtin chauh nge i lo awm? Engtin? …