Lalsangliana 3

AW..! LALSANGLIAN..(3)

Ziaktu : Toni Râlte

Youth Icon Final zan a rawn inherchhuak ta a, Aizawl mai bakah khaw hrang hrang aṭangin entu an tamin an ṭan zawng inan loh vanga lo inhnial bap bap tawk lah bo lo, Sangliana paw’n ṭantu a ngah viau mai a, amah a hmel felfai leh a nungchang mawi tak chuan mi thinlung a hneh deuh bawk a, nula lamah pawh a tla na angreng hle. Zep nâk emaw a tawp an khar tawh dawn bawk a, a lungphu pawh rang ve tak chu a ni, a ṭang ulh ang tih a hlau ber a, a rilruin a ṭawngṭai mawlh mawlh reng mai. Zaia intihsiakna an han nei chho leh a, a hma zawng zawng aiin a zai ṭha a ni tawp mai, a ṭawngṭaina te chunglamin a lo ngaihthlaksak reng tih a hriat kher mai. Judge te hmela lungawina chu ani pawn hmuh hmaih bik lovin a chhungril chu a lawm ru veng veng mai. Hetih lai mek hian tv aṭanga lo thlir ve rengtu a bialnu Nguri pawh a lo ṭang kher mai a, a lungphu pawh a rang narawh e, a thiam ang tawkin a han ṭawngṭaipui ve ngial a. A rilru kil khatah erawh mawlhtu a nei, Sangliana hi pakhatna ni ta se ani hi thlauhthlak a ni mai lo’ng maw? Dinhmun leh hmingthanna hian mi thenkhat nunah chuan an tana lo awm reng tawh thinte thlauhthlak duhna rilru a piantir thei tlat si a! Mahse, Sangliana mizia a han thlirin chutiang mi a nih loh chu a beisei ve tawp mai a ni, chu beiseina bak chu tunah chuan neih a nei rih lo. A nu chungchangah chuan thil a fel thawkhat tawhin a hria a, a nu nena khawsak duna nufa hlim tak nih zel a duh, amahin a tal rei tawh naa a nu a tel ve chuan a nun a nawm phah sawt ngei ang le. 

Bâwktlâng lam boruak pawh a pui kher mai. Sangliana ṭhiante bakah an chhungkhat, a tu amai pawh chu an ṭangin an khaw tlangval chuan chakna chang se an duhsak em em ṭheuh a, result puan dawn lai phei chuan YMA lamin naupang chenin tumah phun rik pawh an remti lo, an ngawi ṭhuap a, thinphu dêp dêpin result chu an ngaithla a ni. Le..Sangliana leh a thiante stage-ah an ding ta ṭhap mai. Result chu an han puang chho ta, rin leh besei ang ngeiin Lalsangliana ngei chu Youth Icon-a puan a ni ta ! Kut bêng thawm bakah mipui au thawm chu pui tak a ni. Lawmpuitu a ngahzia a hmuh chuan a hnukte pawh a ulh ve hial mai, a hmasa berah Pathian hnenah lawmthu a sawi nghal mawlh mawlh a, tuna a châk ber erawh an khaw lama hawna a chhungte leh a ṭhenrualte hmuh a ni. A behbawm hi chu a pawimawh ber lem lo bawk a, sawi vek kher lem lo ila..

Aizawlah rei a châm lem lo, a châm chhungin vawikhat chiah Nguri nen an inhmu, chupawh hun fianrial leh hmun fianrialah pawh a ni thei lo. An han inchibai chu Nguri chuan a nuih sâng a, “Ka lawmpui takzet che. I phû a ni” a ti sep a. 

“Ka lawm e, i lo ṭawngṭai tiraw?” Sangliana pawh chuan a lo ti ve a. Nguri a bu nghat, an kut chu rei tak invawn duh viau mah se; midang an awm ve nual si avangin hreh zetin an inthlah a, a tuk maia an khuaa haw tur a nih tawh avangin an inngai lâwk hle. Sangliana kawm duh leh lawmpui duh an tam si avangin atan chhuah nulh emaw kalbo daih emaw kha a rem ṭeuh si lo. “Hun thawl chu a la awm em em ang, min hrethiam rawh aw..” ngenngâwl tak hian a ti a. Nguri chuan buk nghat pahin, “Fimkhur kha i tan a ṭha, nula ho hi i lakah an thikthu a chhe dawn si,. Ka hrethiam che.” A lo ti sap a. Sangliana chuan Nguri a duhna chu a pung sawtin a hria, hmeichhe dang anga inla neitu taka han nâwk leh han kaih kual vel a tum ve miah lo te, midang mitmei a venpui zawkte chuan a rilru a hnehin ,’Hmeichhe mak tak chu a nih hi. ‘ a ti rilru ve hial mai. 

An khaw lama an han haw pawh boruak a nuamin a hlim a, hmuaktu tam tak zinga mittui far fap fapa lo hmuaktu a nu duhtak nen chuan an inkuah ngawih ngawih a, “Taite, Pathian hi a va ṭha tak êm tiraw?” Hnukulh ṭeuha a nuin a tih phei chuan a mittui a hnâm ve sawk mai. A pa pawh a lawm a ni tih a hmel aṭang chuan a hriat, tupawh mai chu an hlim a ni e. Rotea lah a lo phur ve nasa, a û chu a lo chhuang ru ve êm êm a, han tihlan vak dan lah a hre lem hlei law..chutiang chuan Icon boruak sarhu lai chuan an buai deuh nuaih ti mai ang, amah Sangliana pawh zep nâk emaw a chau ve em em a, mipui huhâng a zawh loh bakah chibaitu apui an tam a, tupawh mai chu hlim hmel taka hmachhawna dawnsawn reng a lo ngai ve bawk nen, nuam ti viau tho mah se; mihring ve tho a ni a, a chau vein mut hahdama tuma chimbuai loha awm der der chu a châk ve takzet a ni. Nguri nen lah an inbe hleithei lo, msg a dawn nasat luatah seen pawh a seen kim thei lo, call lah a dawng ve reng bawk si. Nguri lakah pawh a inthlahrung ru viau. A hrethiam êm ang chu maw..

Hetia Sangliana a buai ruk ve em em lai hian Nguri paw’n amah atchilha um duan duantu a lo tawng ve ta tlat mai. Department pakhata hna nei, a hlawh pawh tlem chhe hran miah lo a ni a, an dawra rawn chawl fo thin a ni, mahse, Nguri hi kitchen lama a awm daih zel avangin a lo hmu ngai lo va. Tlai khat Nguri haw hma tur nen an inhmu ta hlawl mai a, a vawikhat hmuhna atangin chupa pui chuan a vei ta riau mai a, amah hi Malsawma niin pathlawi fa pakhat nei tawh a ni a, a hmel pawh a chhe lo, an khawsak a harsa lo bawk a, a fapa pawh an awmpui nghe nghe. Nguri te manager nen hian inhmelhriat tha tak an ni bawk a, Nguri chanchin chu a zawt ta tawl mai. Ani pawh chuan a hriat chin chin a lo hrilh ve zel a, a number hial a nei thei ta hlauh bawk. Va biak nghal thâwr chu a zak ve deuh a, a tuk tlaiah Nguri nen chuan an inhmu leh ta ngei a, tah chuan a be ve ta chawm mai. Mipa zaktheilo tia sawi theih a ni lo a, a mawi tawk leka polite a ni, Nguri pawn tha takin a lo dawngsawng ve a, an customer hlun a ni tih a hre ve kur bawk nen, lo biak chhiat chi a ni lem lo. Zanah Malsawma chuan rawn be nghalin pehhel kual mang loin a duh thu chu a hrilh ta hmiah mai. Nguri phei chu a hrilhhai letling hial, a rang teh thut em a ni. 

“Bialpa ka nei a..” tih chhanna chu a pe a. Malsawma erawh beidawn a hnêkin Nguri a duhna a pung daih zawk, Ani ang sawrkar hnathawk, in leh lo khawsak thuhlaah pawh vantlang chunglam, hmelah lah vantlang tawk ve tak mai, chutianga Dawra thawk nulain a lo hnar mai chu tlawmah a la ti ila, frank taka bialpa a neih thu a sawi mai te chu Nguri chu hmeichhe satliah lo tak, rinawm leh nghet tak a ni ang tih a ring nghet bur mai a, chu chuan a duhna chu a tipung a ni ber. A ni têlin a zual zel a, an dawrah lah a chawl rei tawlh tawlh bawk. Manager lahin thil nihdan hai hek lo, Malsawma a rawn lan tawh chuan Nguri buai lai pawh ni se koh chhuah dan tur a lo dap ve ran zel bawk a, tum lo deuin an inhmu an inhmu ta mai. Nguri chuan a be chhe chuang miah lo, mahse, bialpa a nei tih a hrilh kha tawk a ti a, a beisei zui zel a ring lo a ni. Mahse, a rin dan a lo ni hauh lo. An inah te thleng thleng manager chuan a rawn lenpui ta a, a nu lah chuan fel a lo ti riau lehnghal. Misual ni lo miau hek, mahse, a thinlungah mipakhat a awm tawh a, Malsawma tan chuan hmun a awm thei tlat lo atin ni. Manager tel lo pawh chuan Malsawma chu a rawn leng ta fó a, lo biak chhiat ngawt thu a awm bawk si lo, Sangliana lah zaia sawmna a dawng nasain biak pawh an inbe hleithei lo a ni si a, Malsawma chuan a khawhar a hnem ta phian a, mahse, inngaihzawnna lam hawia inkawm erawh a duh bau lo, Malsawma pawn chu chu hriain zawi zawia Nguri rilru hneh chu a tum ta a ni. 

“Hello, Ngur, naktukah ka rawn chhuk dawn asin..” Sangliana chuan a rawn ti phur nasa mai. 

“Eng tiin?” A ti zet a, “I lo zin har ka ti reng a” a tih zawm a. Hun thawl an neih leh theih pawh a ring lo, Sangliana programme full zia a hrethiam si a. 

“Hun thawl kan neih hram ka beisei” a rawn ti sup a. 

“Keipawn” a ti halh a, “I thinrim lo tiraw? Kan inbe mumal thei si lo va” a rawn tih chuan, “Rim lo e, ka ngai che tih mai loh chu..” a lei chhuah zuk pah chuan a ti a. 

“Keipawn ka ngai che lawm, kan inhmu vat dawn nia..ka dah phawt, hei inleng ka nei a” Tiin Sangliana chuan a dah leh ta rih. Icon a nih hmaa rei tak tak an inbiak thin lai te kha a ngai ta hle, tunah chuan milar bialpa a nei tawh a, nuam pawh a ti em em chuang lo. Sangliana career tichhetu nih a hlau a, a thawhpui ten an starzia leh zaithiam an tihzia an phulpui hlut paw’n engmah a sawi ve ngai lo, mahse, a ruk chuan a chhuang ve em em tho. Malsawma chungchang pawh hrilh hriat kher ṭul a ti lo. Tlaia a hnathawk bâng in a thleng chu a rin loh deuhin a û te nupa an lo awm a, an hrilh lawk bawk si lo nen, mak a ti hle. Ṭha takin, “Eng nge in lo tih dawn? Lo sawi tur alawm..” a ti luam a. 

A û chuan, “Ka nu signature hi a ngai sia, amah a rawn zin duh tawh si lo va, kan rawn kal chilh mai lohin” a lo ti hmuk a. 

A nu chu a va melh a, a lungawi vak lo tih a lang. Lehkha pawimawh chu a û chuan rawn lek chhuakin, “Tah khan i 60% kan chan tur tihfelna a awm a, i signature chiah kan mamawh” tiin a nu bulah chuan a theh phei a, a nu chuan “Zat leh zat a nih dawn loh chuan ka sign dawn lo.” A lo ti ve hmak. A hmaa a va zin khan zat leh zat an duh miau loh avangin a account a transfer hnuah a rawn phei leh ta daih kha a nia, tihian an duhâm luatah an rawn umzui zel a nih hmel. An va han pamham tak. 

“I mak ṭâng ṭâng ka ti, Nguri’n hlawh a nei a, zaa 60 chu kei i fapa tan hian a uiawm viau em ni? Zaa 40 i la chang a, lawm hle zawk rawh.” A la ti ngam nia! He an thiltih kual dan hi dan phal loh thil a ni naa, Zoram a ni miau a, hmelhriat ṭha an nei te pawh a niang e, engtin tin emaw tihdan kawng an hre ve mai zel. A nu erawh chuan luhlul hmel zetin, “Ka sign dawn chuang lo, zaa 50 in pawm thei a nih erawh chuan ka tihsak thei che u. Chu chu ka thutâwp a ni e.” A ti ve hmak. A hlau duh tawh bik lo. Nguri pawh a fanu a ni, a dampui reng dawn lo, a hmalam hun a ngaihtuahpui ve tho a ngai tlat atin ni. Mama chu a thin butut a chhuak leh nge a ding hluai a, “Heti em ema i fapa i hmangaih lo hi mak ka ti, eng ang nu nge maw i nih le?” A ti khur dat dat a. 

A nu pawh chuan a mita melh kar chung hian, “Heti em ema duhâm leh mahni nu ngei pawh hmangaih thei lo fapa hi engtin nge ka lo hrin theih che le?” A lo ti ve hmiah. A û thinur chuan thil pawi a khawih leh mai ang tih hlauin, “U Mam, insum rawh aw, kan in neitupa hi Police a nih hi..” tiin a lo vaukhân ve bawk a, “Khanglang a che, nangnu hian a nih hi ka nu thluak lo sua lo tikhawlo ni..” tiin a nau chu a kawk sawk sawk a. 

“I ngaihdan dan le, rethei leh hrehawm taka ka nu awmtirtu i ni tih hi theihnghilh reng reng suh.” Nguri chuan a lo ti chang fak. An innawr fê hnuah pawh a nu chu tawlh duh hek lo le, beidawngin an chhuak ta a. An rawn lan leh ngei erawh a rinawm. 

“Nu, i sign mai lo a ni, buaina hi ka ning tawh ania. Kan awm thei em em ang..” a û te chhuah hnu chuan a ti a, a nu chuan a lu thingin, “A teuh lo, ka sign a nih chuan ka thih hnuah a vaia neih dan an ngaihtuah ang a, nang an thlauhthla hmak ang che, an mizia leh tumdan hi ka hrechiang lutuk tlat tawh. “ A lo ti hmiah a, Nguri paw’n a nu rilru chu a hriatthiampui viau tho mai. Zanriah an ei laiin Sangliana chungchang leh a lo zin tur thute chu a hrilh ve a, a û te chungchâng an sawi zui tawh lem lo. 

Sangliana pawh a û Nanui’n a insiampui mawlh mawlh a, “Taia, bialnu chu i nei tak tak mi? I fans ten min zawt nasa sia, i sawi ṭha duh si lo.” A ti sar sar a. A guitar kuah lai chu dah thlain nui chung hian, “An sawi ve mai mai nih chu, a ho em mai. “ A ti a, mahse, Nanui chuan a nau dawtsawi thiam lohzia a hre tawh a, eng emaw chu a awm tih a hrethiam ve mai. A nau hi a chhuang ru ve em em a, mahse, a status leh story-ah pawh a tarlang ve chuai chuai lem lo, miin , “A chapopui” an ti ang tihte a hlau ve a, tin, nulat tlangvalna kawngah a hmingchhia ang tih a hlau ru em em bawk, chu chu an chhungkaw ṭawngṭaina pawh a ni. Ruihhlo-ah hi chuan an vengthâwng lem lo, a dik a dik chuan tunlai khawvelah ṭhangthar boruak ngam tak tak hi an tam ve tawh a, khawthlang lam ngaisang tih takah kan duhzawng neih ngei tuma phe suau suau kan ni tawh si a, Sangliana pawh amaha in luahte kha an han sawi deuh naa, tun tut tutah chuan a chetchhiat phah ang tih hlauin a ní te bawk a zu bêl leh rih dawn a niawm e. Mahnia in a luah chuan nula zahpah nei lem lo, amah Taitea atchilhtu thenkhat tlema boruak ngam fâl ten an lenchilh te pawh a hlauhawm an ti a ni mahna le..mipa ta na nâ na chu inven zawh loh hunte pawh a lo awm thei si a, an chhungkaw thutlukna chu amah Sangliana paw’n a pawm rih viau. A hma khan Nguri nen an sawi dun thlap tawh a, interview neuh neuhte a la neih fó dawn avangin a single leh single loh zawhna te pawh a la dawng thei, chutah chuan Nguri a ngaichâng ve a, “Ekhai! I lar ṭan chauh a, ‘Ka single lo’ i tih vaih chuan, i fans thenkhat an kiam duak maithei asin, i zai ai maha i hmel leh nungchang vanga ṭantu che hi an tam viau ang tih ring rawh. Chuvang chuan kan inkar hi Zoram khawvelin a hriat kher a ngai lo, min vengthâwng suh.” A lo ti diam a, Nguri zet zawng a huamhap lo takzet a ni. A inngaihtlawmna leh Sangliana career a ngaihtuahzia chu amah Sangliana ngei pawn mak a tiin a ngaihsan phah hle nghe nghe. A tuk zan maia Nguri hmu tur muta muin a muhil thei lawk lo lehnghal. A tuk a rawn inherchhuak ta, an kawtkaiah a chhungten an rawn thlah liam liam a, hlim leh phur takin a bike thar ngei chu khalhin Aizawl lam chu a pan ta vuah vuah a. A ní te pawh an lo dam tha a, a zin kual reng a ngaih dawn avangin a ní te inah hian a thawmhnaw leh bungrua pawh a tam zawk a dah a, a tan a awlsam zawk bawk nen. Zanriah ei khamah a mawi tawk a ṭhut ve hnuin Nguri hmu tura chhuah chu a tum ta a, faifûk rût rût chungin a insiam a, a ní chuan, “Hmuh tha i va hmu dawn em ni? I va thawveng ve” tiin a lo fiam a. 

“Hmu dawn chiang e, ka zun a chhuak sek mai, ka helhhawlh a niang..” a lo ti ve mai a. Phur zetin a chhuak ta a. Nguri pawh a be fel tawh, va surprise a duh viau nain a zin dawn tih a hrilh laklawh tawh si a, a ti leh ta lo mai.

Nguri erawh a lo buai ru viau, a chhan pawh Malsawma a rawn leng tlat miau a ni. Sangliana a hmuh vaih chuan thil a kal dik loh a hlau a ni. Sangliana’n a rinhlelh lam ai mahin Malsawma chuan tu te emaw bulah Sangliana’n Nguri a rim thu a sawi vaih chuan, an sawi darh vak a hlau, Sangliana tan zawk a pawi thei tih hriain Malsawma chu hawtir dan tur a ngaihtuah char char. A tawpa tawpah hreh zetin, “U Malsawm, ka lu a na lutuk a, zanin chu mut hma mai ka duh, min hrethiam mai ta che.” A ti ta tawp a. Malsawma lah mipa pangngai tak a ni bawk a, “Khai aw! A va zia lo ve, e..mu rawh mu rawh, i chau thin viau ang, kei pawh hna ka nei nual a, ka va haw tawh ang e. “ Tiin a tho ta nalh a, Nguri chuan a hmaizah ru viau, mahse, chutia tih mai loh chuan kawng dang a hre hlawl si lo a ni. Malsawma chhuah hnu 4 minutes velah Sangliana ngei mai chu a rawn lut ta zàn zán mai. A nu nen a han inhmelhriattir sawk sawk a, a nu pawh chuan, “Ekhai! I zai hi kan play reng mai a, keipawn ka vawng vek tawh ang. I zaithiam khawp mai.” A lo ti ve luam a, Sangliana chuan lai ru zetin, “A va lawmawm ve aw, ka thiam hran hleinem.” A ti ve mai a. Nguri nu chu nu à a ni bik lo va, a fanu leh Sangliana te tana hun thawl hmuh fuh a harsatzia hrerengin, “Tikhan lo inkawm teh u, kei zawng ka kawng a na lutuk, vawiin ka che nasa deuh a, ka mutsan mai teh ang che u..” tiin rei pawh thu loin pindan lamah a luhsan ta thuai a. An duhthusam hun thawl chu an nei thei ta. 

An ngawi dun vang vang a, an in en a, an han innuih leh ringawt thin. An lai si, inngai tho bawk si, an awmdan chu a hrehawm nuam ang kha a ni deuh ber. A tawpa tawpah Nguri zawk chuan, “Engtik thleng nge i chàm dawn?” A han ti a. 

“Aizawlah tak chuan ka awm rei lovang, zinna tur ka nei nual a, naktuk tuklehah hian Kolasib-ah kan zin ang a, kan lo haw hnuah Lungleiah..aaa a awm nual..” a ti nuah nuah a. 

“I chau thin awm..” Nguri’n a tih chuan, inla zei fahran hian, “I hmel ka hmu a, ka dam vek” a’n ti ve ngei a, Nguri lai si, lawm bawk si chuan a bengah va piaiin, “Ka awih lo, chhe lo deuh deuhin an be nasa che si” a ti a. Thík anga lan erawh a hlau ru hle tho. 

“Hmm, ka phek en deuh tawp, a chang chuan i hmel hi ka lo zawng ru ringawt zel” a ti a, hei chu a ti tak tak. A zai laia mipui phusa suau suau karah Nguri hmel hi a zawng ru deuh tak tak zel. “Lammuala in concert hunah chuan ka rawn kal ve ang, karleh tiraw?” Nguri’n a tih chuan, “Ka kal dawn lo pawh ti mah la, hruai che ka tum tho tho “ Sangliana chuan a lo ti bung deuh nghut a. 

“Hruai kher ka duh lo, ka thiante nen kan lo kal ang, i fans rinawm ka nia” awmze nei deuha melh ralh chunga Nguri’n a tih chuan Sangliana chuan hmeltha a ti lutuk nge a insum zo ta ngang lo va, Nguri khabe chu chawiin alamah a kuai phei a, a fawp ta chawt mai. Nguri paw’n a lo hnar íkhaw bik lo. An han infawp zo chu an thaw hawk a, “Thingpui ka lum ang aw” tih leh thawh a rual a, “Thingpui vawi 2 in turin ka lo leng a nia aw” Sangliana chuan a lo ti ve bawk. Enghelh leh helhkam nei miah lo va an thlakhlelh em em an hun thawl an han hmang dun ve ta chu an hlimin thianghlim tak siin an induhna pawh an lantir ve nasa. Nguri chuan, “Ih maw.. i lar belh zel dawn a, kei aia tha leh changkang, hausa bawk si i la hmu chho mawlh mawlh dawn sia, a chang chuan ka rilru a hah thin. Mahse, ka lawmpui tho bawk si che a.” A ti ta nge nge a,. Sangliana lo rindan pawh a ni. “Ka hrethiam alawm i rilru tur chu, mahse, chutianga nghet lo leh lelo chu ka ni bik lo a nia aw. Nangmah alawm single angin insawi rawh titu pawh, keite chuan engkim sawi pawh pawi ka ti hleinem..” Sangliana chuan a ti a, Nguri kut chu a khal niap niap a. 

“Kha chu i fans te an pawimawh ber vang alawm,. An rilru i tihnat ka duh lo. I tan an theihtawp an chhuah a, an inpekzia hi, an fel ka ti lutuk. Dawrah te hian ka thawhpuite hi i fans groupah an awm ve sia, an sawi nasa thei si, ka ngawi reng ringawt zel, mahse, ngaihthlak nuam ka ti thei lutuk..” tiin a nui sen sen a. Sangliana chuan a bianga rawn piai nawk nawkin, “I va han duhawm tak.. Ka bialpa alawm ti mai ta che” a han ti a, Nguri’n a hmui a lo tipawrh, Sangliana’n a va fawp thut a, Sangliana samah na lotêa kekin, “Min phatsan dawn paw’n na lotêin aw..” a ti sap a. 

“Phatsan sawi suh,.khalam ka sawi peih lo. Tak a! I û te nen in boruak a tha em? “ Thudangah a pakai pui ta daih a. Chutianga tui taka an titi chhung chuan zan pawh a lo rei ve ta viau a, Sangliana pawh chuan hawn lam a hnaih ve ta a. Kawngka bulah ding dun lehin, “Naktuk chu min chei dawn a, ka thiante nen kan kal ang. Tun ai hian ka hmeltha tawh dawn, Ngurtinsang..” lawmawm zet hian a han ti sawr sawr a,. Nguri chuan nui chungin, “Lalsanglian, Taituk, ka ta i ni tho..” inringtawk zetin a lo ti ve thung. Chu chu Sangliana bialnu Nguri phawk ve thiam dan a ni a, a bialpa erawh a tilawm hle thung si. 

Hun a kal ve bek bek a, Sangliana te Kolasib zin pawh an hlawhtling thawkhat e, min duhsaka min ngainatute bul chu khawi hmun pawh nise a nuam thin. Sangliana tan pawh khawvel hi a parin a par a ni ber e, mahse, eng ang pawhin larin hmingthang mah se; amah siamtu leh he dinhmuna hlangkaitu Pathian a theihnghilh ngai lo, hei vang hi a niang e chawisana a awm zel ni. A chhungkua a hrereng bawk a, hmeichhe pakhat nen. Aizawl an rawn thleng leh ta, a tuk zanah Lammualah concert an nei leh nghal dawn a, a hahdam hman meuh lo a ni e. An thlen zan pawh Nguri hmuh a duh viau nain a tukah an chei dawn vangin chhuah leh a ngai dawn si, hahchawlhna hun a neih loh chuan harsatna a tawk ang tih a hlau a, hma takah a mu ta daih. Nguri pawn a rawn hrethiam lutuk tlat. Ani pawn rimtu a nei, Malsawma bawk. Sangliana a rawn kal dawn lo bawk a, a lo hnar ta bik lo, Malsawma hi sawi tawh ang khan a polite riau a, Nguri lawm loh zawng leh ngaihdan ni lo zawng hian a awm ngai miah lo. Hei vang hian Nguri tan pawh na taka siam a harsa ve a, “Nguri, tunah ka tan hmun awl nei rih lo mah la; inṭhen hun in la neite a nih ngai chuan, tuman min chet khalh lovang, chu chu ka lo nghak ang” a ti mauh mai si. “Ka duh dawn chuang lo che” tiin Nguri pawn a hnar fithla ngawt thei bik lo, a va duh ve vang lam ai mahin Malsawma chu a khawngaih ru deuh a ni ber e. Ṭhianṭha tak angin tihian an inkawm ve zel chu a nih hi. 

“Ngur, naktuk zan concert chu kal ve i la, a châkawm ve lawm..i nu chu ka dilsak ang che.” Malsawma chuan a ti a. Thingpui hâng a dawm ran bawk. “Nia, ka lo tum ve deuh alawm, mahse, Lalrini te nen kan lo tum laklawh a, i lo tel ve duh leh duh loh ni mai.” A ti a. Lalrini chu dawra a thawhpui a ni, “A pawi hleinem, ticket pawh ka lo tum vek dawn nia, engzat nge in nih dawn?” Inhuam takin a lo ti a. 

“Lalrini leh Sawmi te nen kan ni mai, ticket te chu kan lei ve thei tho alawm” Nguri’n a tih chuan, “Engmah ka la tihsak lo che, i duh ngai si lo va, tun ṭum chu nangmah chauh ka tihsak dawn chuang lo che a, rem i tih tawh ngei ka beisei..” awmze nei deuh hian Malsawma chuan a ti a. 

“A tha lawm, kan va lawm dawn ve” Nguri pawh chuan a ti ta nge nge a. Sangliana nen lo intawng hmasa lo se chuan Malsawma hi han iaina chhan tur awmin a hre hauh lo, mi tha tak zawng a ni chiang alawm. 

A tukah Sangliana leh a thiante pawh beutician lar tak tak te’n an han chei leh ta a, Icon top 10 chin concert kha a ni bawk a, an inpawh hlawmin awmkhawm tawh chuan uang ta reng reng hian an khawsa a, tudang an ngai vak lo. Zanriah pawh Regency-ah sawm an nih angin an ei nghal a. A dik a dik chuan thil thenkhat chu an la tawng ang tih an rin ngai loh te pawh a ni ve, an dinhmun leh nihna hmasa ngaihtuah chuan a tam zawk chu an tan thil thar a ni a, malsawmtlaka an awm vang bakah vanneihnain a kentel te pawh a ni ve bawk e. Zan dar 7 rik hma deuhin Nguri te pawh lammualah an lut ve ta a, Malsawma khan ticket a lo cut to bawk a, a hma lamah an kal zel a, chiang takin stage pawh a thlir theih dawn ta. Mipui an tamin thenkhat lo phusa leh rui nawi ve tak tak pawh an awm, mahse, a tu amah chu an inngaihven hman meuh lo. 

Le..concert chu an ṭan chho ta. A hawn nan Icon Sangliana chuan a hla hit pakhat, ‘I tel lo chuan’ tih hla chu hot leh zei takin a rawn sa ta a, mipui lam an ding suau  suau mai, tumah chu an thu hle hle thei lo. Lalrini leh Sawmi te pawh chu awmhmunah an lo lam ve nasa mai a, Nguri erawh lám lam hi a tih chi a ni ve chiah lo a, kut erawh a lo beng ve. Chhuang ru takin a bialpa zai chu a thlir vawng vawng a, a bula thu ve reng Malsawma lam reng reng a ngaihsak thei tawh lo. Chibaitu an tam si, pangpar leh eng ilo petu an kat nuk bawk, tlema a boruak hap sang deuh ho lah stage-ah lawnin thla an han lakpui thul, mahse, “Nguri, i rilru tizau rawh. I tawn tur thil a nih hi..” tiin a infuih ru mawlh mawlh a. 

Chutiang chuan boruak nuam leh zangkhai takah concert chu an nei chho zel a, Midang zai laiin Nguri phone chu a rawn nghawr dat dat a, a han en nak chuan Sangliana a lo ni, thawm a bengchheng si, ring zet zeta inbiak a ngai. 

“I lo kal ta em?” A rawn ti a, “Aw, a hma lamah khan kan thu” Nguri chuan a ti a, a auin a au a ni ber. “Back stage-ah ka awm, khawi lai berah khan..” a rawn ti, “Ka sawi thiam lo, a laihawlah stage hmazawn chiahah khan,.” A va ti. 

“Mipui an tam sia, i thut daih bawk si chuan ka hmu thei hleinem che. “ A rawn tih chuan, “Ka lam thiam si lo va, ka ding hreh alawm” a va ti, “Tunah khan ding lawk rawh, hei mi tlem deuh lai a nih hi, ka hmu thei ang che, ding lawk teh” a rawn ti tàng ṭâng a. Nguri pawh chu thuawih takin a ding ve mai, “Min hmu em? Stage hma zawn chiah a hmalamah khan” a ti lâng lâng a. Back stage aṭang chuan engtin tin emaw a lo hmuh theih nge ni dawn ni, “Aw..ka hmu che, i va hmeltha tak,.lawk..tu nge i bula thu kha” a rawn ti ta. 

“U Malsawma nih hi, chu! I hming an lam, dah rih rawh.” Tiin Nguri zawk chuan a dah ta daih a. Sangliana an koh leh tawh vang a ni. A chhan em em pawh awm chuang lo va a sak nalh em vang chauha Nguri’n a duh em em, ‘Hmangaih Hmangaih’ tih hla ngei mai chu Sangliana chuan a rawn thlawh leh ta. Nguri chu a mur chuai hian a inhria, he hla hian engtin emawni hian a hneh tlat a ni. Sangliana chu a zai pah chuan a rawn hawi a, ngaihbel theih tur si hian a rawn kawk deuh titih thin. Nguri chauhin an hrethiam thung ang. Chu boruak zet chu a va nuam si em..

Nguri chu Malsawma’n a thlah haw a, “Ngur, tu nge nichina i biak vak vak kha,.ka hmingte kha i sawiin ka hria, “ an in thlen dawn chuan Malsawma chuan a ti a. 

A chil lem khawlhin, “Ka thiannu a nih kha, ka kal ve leh ve loh min lo zawt a” a ti ringawt a. 

“I hming an lam te kha i tiin ka hria” rinhlelh hmel lek lek hian a ti leh a. Hmalam melh daihin, “I hre sual a niang, Sangliana hming an lam sia, Sangliana hi a duh êm a, dah rawh ka ti a nih kha..” a ti ta ngawt a. Malsawma pawh a hmin ta a nih hmel, a sawi zawm ta lo. Engvanga Malsawma chu vengthawng ringawt nge maw a nih le..Sangliana lakah a inthiam lo ru deuh hial, mahse, Malsawma a duh vang ni loin amah Sangliana a venthâwn vang a ni tih amah chuan a pawm thlap, Sangliana’n hre ta se a pawm ve thei ang em tih erawh a hre lo. 

“Morning” Sangliana msg a hmuh chuan a khi sak. Vawiin chu an pu ber te chhiat tawh vangin dawr an khar dawn a, a mu rei ve deuh, a nu eirawngbawl ri rak rak chu a hre thei, a hnaa a kal ni pawh hian a nu hi a thawhkhalh ngai meuh lo. “Morning, i va tho hma ve” a va ti a. 

“Hma tawh loh hi, ka pa phei chuan hria se min hau leh tawh ang..” a rawn ti duah a. 

“Kei pawh vawiin chu ka mu rei ve, hna kan chawl a” a va ti a. 

“Tak tak maw? Nice, lenna chance kan nei” a rawn ti hluai a. 

“Programme i nei lo em ni?” 

“Nei lo , vawiin chu hahchawlhna hun min pe alawm. Chaw eikhamah ka lo lam ang che, lo inpeih rawh aw.” A rawn ti zung zung a. Hnial chi ni pawn a hre lo, a thlahlel ve tho bawk sia. A nu bulah pawh chuan a sawi a, “E! Hun remchang in neih khât em hi, hun awl hman tangkai te hi a tha ngai. “ A lo ti diam a. 

“Nu, Sangliana nen kan inkar vel hi tumah hrilh chi loh aw” a ti ngial a, “Buai suh, ka naute, ka hrethiam ve alawm..” a nu chuan a lo ti sap a. An nui dun var var mai. A û te nupa an la rawn lawr leh rih lo va, an thil buaipui kha an la chhunzawm a ni maithei. A papuia te pawh a û lamṭang an nih avang hian Nguri pawh hian a tlawhpawh ngai lo hle, chhiat an tawkte a nih ngawt loh chuan lenluh a tum bik bau lo, heti taka a nu an han deu leh an ensan hi mak a ti ve êm a ni. Hmeichhe thiltihtheihna chakzia hi aw, a û Mama a tlangval laia tlangval fel leh zaidam, tu pawi mah sawi ngai lo pawh a nupui neih hnuah heti khawp hian a danglam thei a nia, a nupui hi a ngam lo tih tlanghriat khawp a ni ta hial mai chu a nia. Amah Mama zir loh chu ni tho mah se, an monu hi a huaisar ve bawk êm a ni, hmeichhe pangngai tak ni se Mama zaidamna te chu amah hnehchhiah leh a thuhnuaia dah nan a hmang awm chai si lo. Chawr chhuahna chhungkua hi a lo pawimawh khawp bawk mai, an monu zia chu a seilenna ngaihtuahin a demawm em em loh, an chhungkuaah nu ber a lalin a thu zawk miau a. Mipa hian mipa nihna hriain chhungkua uap se, rik a ngaih hunah ri ṭhak mai zel se, Hmeichhiain pasalte chawimawi thiam bawk se chhungkua chu a pangngai mai. Hei hi Zorama chhungkaw thenkhat buaina tam ber niin a lang ta. 

Hmai chei a thiam vak lem lo bawk a, a insiam zo rang viau. In chhungkhur hi a ngaihpawimawh ber avang hian incheina leh thawmhnaw tih vel hi a enghelh lutuk ngai lo va, hemi ṭum pawh hian a bialpa nen an leng chhuak ve dawn si, vawi 3 ngawt a inthlak hman. Thawmhnaw a lo lei duhthawh lo thin chu a inchhir ve lek lek mai. A tawpa tawpah jeans body fit pawl dak tha deuh leh top dum ban tlawn hain a kawr chu a thun a, belt a hreng leh tawp a, a sneakers duh ber Puma dum a bun leh tawp a, sling bag dum ak lehin a duhtawk ta ringawt, chubak neih a nei chuang lo. A sam erawh a thlah ve hniang a,. A hmui pawh a hnawih ve. A mit erawh tihngaihna lam a hre lo. “Duhtu a ngai, duh lotu a ngai” tia a inhnem tak ngawt kha. 

Kan Sangliana erawh inchei a thiam reuh a, a nalh simple leh thluam mai. Full face helmet erawh a khum, Nguri’n a hauh a hlauh vangin. Phur takin a bialnu te in lam pan chuan a inkhalh phei ta a,. Ani pawh nghah a ngai hran lo, thingpui hâng erawh a in hram, Nguri nuin duhsak takin a lo thlitsak miau si a. Tichuan, khawi lam nge an pan dawn tih pawh sawi lem loin an inphur chhuak ve ta poh a. 

“Khaw nge kan kal dawn?” Nguri’n a tih chuan, “I hre mai ang” a ti ringawt si. 

“Min kidnapp dawn em ni?” A han ti fiamthu a. 

“Maithei, ka hawn daih dawn che.” A la ti zui! 

An tlan rei telh telh a, Nguri a bo tulh tulh, “A va’n hla awm em em” a han ti leh ngawt thin. Sangliana a ngawi hmuk bawk si. A rin loh leh beisei loh lutukin Sangliana chuan an khua Bâwktlângah a hruai ta reng mai le. Nguri hamhaih leh hrilhhai lutuk chuan a hnungah a chum ringawt. “Ti nge i sawi loh?” A tih chuan “I hnial ka hlau alawm” a lo ti sam êt si. Khaw tawntirhah an ding zuai a, “Awii, Sanglian, i tizahthlak e, mawla, sawi ta che” a han ti pawr hlak a. Nui hak hak chungin, “An lo awm kim thap dawn nia aw” a la tizui! Rum zetin a melh a, thinrim chi a ni tawh si lo. Sangliana chhungte hmuh chu a hreh em em pawh a ni lo, mahse, a rang teh thut lutuk a, a inring hman lo a ni ber. Khaw laili deuhah Sangliana te in chu a lo ding lurh mai, an khua angah chuan in ṭha pawl tak a niawm e. 

In chhungah chuan a kai lut a, Nguri chu a khur te’n a inhria..a sawi ang tak tak khan an lo thu deuh thap mai a. A zak lutuk chu a sen awp awp thei hial..”Nu, Pa, hei hi Nguri chu a nia. “Sangliana’n a tih lai te chuan a vai ruai hian a hria a, “ A ni maw? Taia hian a sawi thin che alawm, lo inchibai ila” pi Mangaii Sangliana nu chuan a rawn ti var a, an han inchibai a, chutah a pa nen..A farnu Nanui nen an inchibai lai chuan “Ka single e de de dei a ti vel a, lo thukru khiau sia” tiin a nau chu a sâwt hlak. Rotea pawh chuan, “Aizawl kal i lo châk em em kha a lo mak vak lo a nih hi..” a lo ti ve. Fiamthu duh tak chhungkua niin a hria a, a awm pawh a nuam ta deuh..

Chutah Pa ber chuan, “Nguri, i nu leh pate an la dam em? Khawi vengah nge in awm le?” A lo ti dam duam a. 

“Ka pa chuan min boralsan tawh a, ka nu nen tunah hian kan khawsa ve a” felfai tak hian a ti a. 

Chutihlai tak chuan Sangliana best friend Amuana a rawn dak heu mai, “I bike ka hmu a, eheu! Kan monu tur chu’h,..” tiin Nguri chu a rawn thlek hû a. Sangliana chuan, “Hnapa, i lo hmu tai ang e aw..ka phal lo a nia” a lo ti ve salh. Nguri phone a rawn ri ral ral a, “Min lo hrethiam lawk aw, ka nu a nia” tiin pawnah a va chhuak a, “Aw nu,.” A tih rual deuhthaw chuan, “Khaw nge i awm bawihte?” A nu thlaphâng awrâwl chu Nguri chuan a hai hauh lo mai le..