Lalsangliana 2

AW ! LALSANGLIAN,. (2)

Ziaktu : Toni Râlte

Nguri pawh chuan chanchin a rawn hrilh ve zel a, a patea leh a nî te’n, “I pa pension i duh vangin i nu hruai ve i tum tih hriat reng reng, i û te hi ngaihtuah ve ta che, nang chuan hlawh i nei a, anni inhlawhfa chawpin an khawsa dawn a, hmangaihna pawh i nei ve lo em ni?” Ti ten an lo ánkhum hrep a. Nu ber hnenah lah, ‘I Aizawl awm châk phiangsen vang a nih lek kha, pasal i mamawh a nih kha, hetah chuan Mama pa chhungte kan la awm si a, kan mitmei i veng ve lo thei lo va, saw tah chuan venthawn tur i nei dawn lo va’ ti thlengin an ṭawng elsen a. Nguri nu Pi Dingi paw’n chutiang em em chu a tuar thei ta bik lo a niang, Mama leh a nupui ten an tihduhdah dan leh an enhran dan zawng zawng bakah an monu Ruati chhungte nen lama an hmuhsitzia a sawi ve ta phiar phiar a niawm e. A kal tak tak ang tih hlauin Mama chuan zaidawh ve deuhin, ‘I kal ta a nih pawhin ka pa pension kha chu a fapa ka nih angin ka chan tur a ni’ a la ti ṭalh a niawm e, mahse, kha chen lo tuara rethei taka an lo siam tawh a nu chuan, ‘A teuh lo mai, pasal ka neih hma chuan ka ta tur a ni,. Pasal ka lo nei emaw ka lo boral ta a nih chuan, i farnu hian pasal a neih hma loh chuan a rochun zel ang. Chutitaka ka chhuahsan hlau chu ka lakah tlemtê tal paw’n ṭhat chhuah ve ta che u. Ka fate in ni a, ka hmangaih vek che u, mahse, in mi rulhlet dan hi ka kham zozai tawh a ni e. A chhe ber in lo tawng a nih erawh chuan ka tlanchhe lo vang, mahse, tunah chuan zir tur in neih hi lo zir phawt ula, in inchhir tak tak hunah ka lo lêt leh ang’ tiin midang khap tumna te chu hlau hauh loin a tâwn tlang a, Nguri chuan a hruai phei ve thei dawn ta a nih hmel. Chutiang an chhungkaw chungchang, engkim zawng zawng hrilha a hnena inbunruak thin hmeichhia chu Sangliana tan pawh han palzama han enliam mai a lo harsa ṭan tawh a, a tan bâng lovin a ṭawngṭaisak bawk. Amuana bula takngial pawh Nguri chungchang chu a sawi ngai lo thung. 

Hun a liam ve zel a, Sangliana te ṭhianho chu lenkhang zár tumin zan 2  lai riak turin an khua aṭanga hla ve tak, Khurchhe lui lamah an liam ta a. Nguri bulah a sawi sa a, a phone chu keng tho mah se; network signal a awm a ring lo, a lo awm lo rêng bawk a. Thianhoa lui han kal leh ramvah hi chu a nuam ve thawkhat bawk a niang, Nguri nen ni 1 leh zan 2 lai inbe lo mah se, a hlim tho mai. A muthmunah erawh a ngaihtuah rauh rauh zel mai. Mi nazawng kal ngai lohna lui a ni bawk a, sangha pawh an man hnemin hlawhtling an inti ve viau,. An rêp a, a hringa hawn chuan a uih hman a hlauhawm si, an chaw lâk pawh a ṭha tlâng thin teh e. Zan mut hma si hian mei chhemin an thut hual thap a, an titi ve nak nak zel. 

Dina hian tawngkam a thiam fû roh a, nula bulah erawh a dang a âwk tlat zel thung. “Serchhipah star tawk ka nei a, a number pawh ka nei, biak dan tur ka hre thlawt lo. Ti nge hmeichhe bulah hian ka kha a chih tlat zel le? Ka lo tuai reng te hi mawni aw te ka ti thin..” a tih chuan an nui dar dar a. 

Amuana chuan, “Thuthlung hlui hun laia ‘Mi tilreh’ an tih ho kha tuai kan tih ang hi an ni mai lo’ng maw?” A rawn ti deuh hû a. 

Sangliana chuan, “A nih duh hmel ka ti, mahse, tunlaia tuai thenkhat maksak leh eng emaw deuha khawsa ho ang erawh an ni lo thung ang.” A lo ti boh a. Buanga pawh chuan, “Nia, kan tunlai khawvela tuai kan tih tam zawk hi chu mawngkawhur ang deuh hian thenkhat hi chu an tâl tlat mai a, kha hmana pu Lalrema, khaw danga pem ta te pawh kha amah kha a aw pawh tuai rût, a tlangval lai pawha tui chawinaah pawh bel chhipchhuan thin an tih khawpa tuai a nia, nupui a nei a, fa hial pawh a neih ve kha. A pa chho ta hlauh a nih hmel, tuai han tih hian a hrang hrang hi an awm ka ti mai. English-a sawi hian a funkim a, mizo chuan mawngkawhur pawh hur ve lem lo pawh tuai kan ti vek tawp mai a. A buaithlak khawp mai.” A lo ti ve mawlh mawlh a. 

Amuana bawk chuan, “Gay pawh hi thenkhat chuan mipa tuai emaw mawngkawhur chauh sawina emaw an tia, mahse, hmeichhia, a anpui kawpte sawi nan  pawh an hmang ve tho. Hengte hi kan han sawi hian kan innuihzat a, patil tom boy kan tih te pawh hi lesbian an ni vek kher lo. Mizo chuan tuai leh patil kan nei deuh tawp a nih ber hi..” tiin a lo nui kur kur a. 

Dina chuan pawr hlur hian, “Min ngaihsak ve ta che u, star ka nei ka tih chu..” a lo ti a. 

Sangliana chuan, “A number i neih tawh berte chuan be ta che,. Han biahthu em em phawt la” inla zei fahran hian a lo ti a, Dina chuan ei loh hmel zet hian, “A..nang ber kher chuan advise min pe ve suh, ka ring lo che..” a lo ti hmuk si. An nui pût pût hlawm a. 

Buanga chuan, “Kan la lenpui dawn che nia, hmaichhana inbem tawp mai hi a tha, phone atanga inhmu lem lova inchhai vel hi chu tleirawl ho tih awm tawk alawm. Kei chu ka thutak thei miah lo.” A lo ti a, chu chuan Sangliana rilru a kap deuh, Nguri a hrechhuak nghal a, an inngaizawng miah lo, inngaihzawnna thu lam pawh an la sawi chuang lo. Mahse, inbe lo va ni khat awm pawh harsa an tih tawh danah ‘AWM’ chu a awm tawh tih an hrethiam ve ve. Sawi hmasatu nih an hrehna chauh chu an mutân a ni. 

A aw thian kharhin, “Mahse, a ni ngawt lo, opposite sex te nen inbiak reng chuan feelings hi a awm ve thei tho asin, inhmu miah lo paw’n. Chu chuan a daih rei leh rei loh erawh ka hre chuang lo va..” mahni thiam inchantir chungin a lo ti ve a. 

Amuana lah chuan, “Aw..biak nei hek che. Hman zan Lawmkima kan hruai zan paw’n bike mi khalhtir chung kha” a lo ti si, an inman titih chu a ni ta der mai. “Khate chu kan inhmu tawh alawm, ngaihzawng angin kan inbe lo” tiin dâwt var a sawi ta ngawt mai.  

Dina chuan, “Ka star chu kei aiin kum 3-in a upa a, mahse, kumte chu e a ho lutuk, min duh phawt chuan ka iai lo. Ka phu lo zawk, min lenpui hunah min tizak miah suh ang che u.” Tiin a thiante chu a han vau lâwk a. 

“Aia upate zahthiamin an thute awihin zâwm fô rawh..la la..,” tia Sangliana zai chu an melh thap a, a sak zawhah, “Khatiang khan a thu i awihin i zahthiam dawn em ni?” A ti zui zat. 

“Nghala” Dina chuan a lo ti hluk. 

Buanga bialnu nei thawveng tawh si lah chuan, “Hmeichhia te chu an tihtauhin ngawi ila, an án hrep hnuah ‘Min hauh hrep aiah’ tiin an biangah han chukz zauh ila, an khik ver ver loh paw’n min kuk lawlh mai ang, kha kha a ni mai, hmeichhia chu kehthei dawmin dawm la, kehthei lo ang maiin vuak a tul chuan vaw tho rawh..” a tih chuan an nui ho dar dar a. 

An haw lam chu kawng a thui tham bawk nen, titi peih pawh an awm meuh lo. Zingkara chhuak kha an ni naa, chawhnuher-ah in an thleng ṭâwk a ni. Sangliana nu paw’n a fapa chu a tihdan pangngaiin a lo be leh siam siam a, Nanui’n thingpui a lo siamsak nghal var bawk. A pa erawh huanah a kal a nih hmel. “Awii, in va man ṭha ve, Nu-i, i û te pawh pek ve a tha ang, a ei châk ve theih êm kha. Khaw nge maw Rotea hi a awm le?” Tiin a nu chu a hawi kual a, “Lawmkima thla hualna lamah a kal ve daih” Nanui chuan a lo ti a. Lawmkima thla kha hual ṭhaa an hriat ruk tlat avangin a pain an arpui a talh dawn a, Lawmkima thiante nen an eiho ve dawn a niawm e. Tunlai thalai thenkhat hi chuan ‘Thla hual’ awmzia hi kan hre fumfe lo mai thei a. Hmanlaia an hman dan tlanglâwnah chuan, tu emaw thih ngei ngeina tur emaw sapui emaw huai eng emaw tawngin, damkhawchhuak ta si se la, kha amah tibuaia râlkheltirtu tihlawm nan emaw amah venhim leh pangdama a awm zel theih nan ar an talhsak thin. Chu chu thla hual tia sawi a ni thin. Sawi dan dang deuh pawh a awm maithei, (comment lamah lo sawi mai u la aw) .

“Keiman a û te chu ka va pe mai ang, ka kawr thuitir en pah ka duh” Nanui chuan a lo ti a. Sangliana pawh a phone a charge nghal vat, a inbual zui ta bawk a. Bathroom-a faifuk rût rût hi a chin than a nia, a sim hleithei meuh lo. Zanriah ei hma siin a phone pawh chu a han switch on ve ta a. Whatsapp msg thenkhat chu a nam liam zung zung, Ngurtinsangi msg erawh a keu lo thei lo. 

“In lui kal chu in hlawhtling awm mang e, i reh rei sia, ka khua a har. Engtikah emaw luiah min la hruai ve rawh aw..” tih te,

“Aizawl pawh ka nu chuan nuam a ti ve chho dawnin ka hria. I chanchinte ka hrilh ve a..” tihte a ni nuk mai. Sangliana pawh a khi vur vur a, Nanui rawn lut chuan, “Kha, nang pawh i khik vur vur kha,. Khaw maw tu nge?” Tih leh a phone chu chhuhsak a rual, û bula zak rual ni tawh lo mah se; nuam a tih chiah loh avangin, “Khawi, i va nghal tak, ka bialnu ni lo” tiin a û phone ken lai chu chhuhsak a tum, a û lah chuan a lo bihsak ve bawk si, “Ngurtin..” a tih rual chuan a chhuhsak thei hram. 

“Ehh,! Ngur tih lam daih maw ni a..Khawi ami nge? Mawh?” A ti ta sek sek a. Sangliana chuan ner sukin, “Kal teh, i ninawm. Engkim hriat ve vek a ngai lo” a lo ti hluk. 

“Tu te emaw ka hrilh ang” awmze nei zeta kiai sak chunga a tih zauh hnuah a chhuak ta a. Ama hriat tawk lekin Sangliana chuan, “Nghal reuh sia a” a ti leh hluk. Nguri a chhan hnu lawkah reilotê a chhing sek a, chhung inkhawm nei turin an rawn kai tho ta a.  

Zanriah ei lai chuan a pa chuan a aw thian kharhin, “Taia, kha icon an buatsaih leh dawn a niawm a, a hun tak kha chu ka hre lo va. Tel ve leh te i tum em?” A han ti a. 

A ngawih fê hnuah, “Ka hre lo le, tel ve leh pawh a pawi lo, chânna pawh a ni chuang lo va” a ti satliah a. 

“Nia, bei nge sei run dûng an tih ang deuhin tumruhna nen chuan tihtheih loh a awm lo a nia. Tel ve leh turin han inbuatsaih chho ṭan la,. I nî te pawn tel ngei ngei rawh se an tih che kha.” A pa bawk chuan a ti a. Sangliana pawh chu a bu nghut nghut mai. 

Nguri bulah erawh icon-a tel a tum thu vel chu a sawi duh lem lo, a thlensan loh khan a zahthlak dawn hian a hre deuh a. A thianteah pawh Amuana bak a la hrilh lo, thla khat vel zên zâwn inbuatsaihna hun a la nei a, tun ṭum chu sang taka invawrh theih beiseina a nei lian ve tlat. Kuhva hi han ei ve leh zauh a ching a, chungte pawh chu sim chhoh a tum ta a. Tum hi chuan kawng a awm tih a ni bawk a, a ti ve thei mai zel, tlai lama a inkhelh erawh a la bansan chuang lo va, Mahse, a chhungte pawn hrethiamin hun thawl an pe tha bawk a, zai a zir nasa zual. Nuam a tih miau avangin a ning ngai lo. Rotea’n a pui zeuh zeuh bawk. Sunday zan a ni a, an inkhawm bang a phone a han en chu, Nguri misscall 3 lai a lo awm a, a inthlak sawk sawk a, a call back ta vat a. A aw thâm chhil chhelte chu hnar ping ṭawng ang maia a rik avangin a hritlan loh paw’n a ṭap ni ngeiin a lang. 

“Eng nge thleng?” A han ti tawl a. 

“Sanglian, kei chu ka ning. Buai reng hi ka ning tawh. U Mama a lo kal a, zu te a rui a, kei pawh kutte min thlak, buaina a siam nasat êm avangin ka in luahna te pawn in dang luah sawn turin min tia, ni 3 chhung chiah hun kan nei,. Ka rilru a na lutuk, ka nu chuan ka in luahna te ngaihdam a dil a, amah kan khaw lama a hawn chuan buaina a awm tawh loh tur thu te a sawi a, chuan keimah vangin hawn a tum ta a nih kha..” a rawn ti ta a. Sangliana a inhumruh, hei chen a dam ve tawh, hmeichhia kut a la thlak chu sawi loh, a farnute pawh ṭawngkam vin tak hmangin a hau ngai lo. Nguri û chu a ralkhat huat titih. 

“I nu chu tunah khaw nge?” A tih chuan, “Ka papuia, U Mama thlenna te inah U Mama nen an phei.” A insût hlawp hlawp a. 

“Tichuan, insawn chu i tum tho em ni?” A ti a.

“Aw, ka in luahna te hi an khirh ve lutuk a, engkimah thuneih hi an rawn tum reng a, a hma pawn in luah tur hi chu ka melh ru reng tawh. Bakah a to sia, ka budget-in a phak ve lo.” Inzêp lem lo chuan a ti a. 

“Ka thiante ho ka lo zawn kualtir ve ang, mahse, i nu chu i insawn dawn tho chuan haw tir suh. “ A han ti ngawt a, thu a nei ve si lo. 

“Ka hrethiam lo, ka nu chuan, ‘Ka haw phawt ang a, i pa pension hi zat leh zata insem an remtih chuan ka rawn fin leh ang che. Ka bank account te hi transfer a ngai hrim hrim a’ a tia, sawi theih ka nei rih lo.” A ti ṭiau a. 

Chutiang taka mizo zinga mi duhâm leh mahni nute ngei pawh zah zo lo, sum mena meng hi a rukin kan kuh ṭûn maithei a ni. Hetiang buaina tawk chhungkua hi Zoramah hian an awm nuk a rinawm. Sangliana pawn mak a ti viau nain, Mama te ang engmah thawh nei lo tan chuan a pa pension chu a îtawm viau ta ve ang,. Chuti a nih a hnu hmanah a nu chu duat ve se, a nupui pawh thununin chhungkaw hlim tak an ni ve mai tur, ti nge maw mi dang laka sual vak hi kan duh tlat le? Hei hi hriatthiam a harsa a ni e. 

“Ka lo video call ang che aw” a ti ta tawp a, vawikhatmah an la invideo call ngai lo.

“Naa, ka ṭap zo chiah sia, ka chhe awm” a rawn ti hak a, “Kha kha lawm ka hmuh châk, thil ka hmuhtir ve ang che” a ti sup a. Nguri paw’n a hnial ta bik lo. A va video call ta ngei a, Nguri chuan a sam a lo thlah hniang a, a thur deuh bám bawk, a mit chu a sen deuh ràm a, mahse, nui hmel a pu lui hram hram thung. Sangliana chuan, “Lo nghak lawk aw” tiin a phone chu a han kam te te a. 

A guitar chu lain, “Lo ngaithla tawp rawh aw” ti leh supin, “Manganna ka tawhte zingah” tih hla kha muang fân raih hian a sa ta a. ‘Lalpan mi ngaihtuah thin’ tih lai a sak phei chuan Nguri chuan a mittui a hru zauh mai. Amah Sangliana pawh a tui bawk a, zah a hre tawh lo va, a thinlung tak takin chu hla chu a sa a ni, Nguri nunah chauh lo ama nunah ngei pawh hna a thawk ngei ang le,. 

A han zai zawh chuan, “I va han zai thiam em em, ti nge i sawi ngai si lo. “ Nguri chuan a ti hlut a,  a hnuk erawh a la ulh deuh niin a lang. 

“Ka thiam lo, thinlung taka i ngaihthlak vang a niang” a ti mai a. 

“Ka ti tak tak, Taka, Icon an thlan leh dawn kha, tel rawh, tel ngei ngei rawh aw..” a rawn ti ta sek sek mai. Zep buai tum bik ta lo chuan tel a tum ve thu te chu a han hrilh chho ta a. An phur dun kher mai. “Kan inhmuh ve vat dawn chu,. Aizawl lama i awm chuan. “ Nguri’n a tih chuan, “Tu te emaw kan tithinrim ang e” a ti ta zauh a.

Nguri lah chuan hrethiam niawm takin, “Keima lamah chutiang an awm lo, nangma lam a nih chuan thuhran..” a lo ti awlsam êt si. 

“Chutiang an awm bik lo. A nih chuan..” Sangliana chu a lai ve deuh, Nguri chuan, “Chuan..” a lo ti ve tawp bawk si. An han nui leh rih, inthurual ang hrimin, “Inhmu phawt ila” an la ti rual ṭhawt zui! An nui dun ta hawk hawk a. Boruak pawh a thawvengin a zâng ṭan ta, Sangliana rilru pawh Aizawl lamah hlir a awm ta ve ang. 

Sangliana inbuatsaihna pawh a hun a hnaih ang zelin a nasa chho ve zel a, an khaw ho paw’n an hre lo thei lo va, an phurpui hlawm viau mai. A rilru kap deuhtu erawh a awm a, Kohhran leh khawtlanga inhmang tak, nulat tlangvalna leh ruihhloa hmingchhiatna la nei ngai lo a ni a, puipui nikhuaa a zai paw’n Pathian hla emaw ram ngaih hla emaw a sa tlangpui thin a. Inelna a nih dawn avangin Zoram boruak a han thlir vang vangin lengzem a tlak natzia a hai bik lo va, lengzêm chu sak ve mai a duh rilru hle a, a chhungte a râwn hnuah an KTP hruaitute ho a be leh ta a, a han sawipui chuan anni chuan, “Ekhai! Hetiangah te inrâwn a ngai hleinem, sa rawh, i rilru kaptu atan hmang miah suh, i mizia leh nungchang hrechiangtu kan ni alawm.” An lo ti hlawm a, a lawm hle. Pathian hnenah inhlan thar lehin a kawng sialsak turin a ngen nghal bawk. A hun a hnai ta, a helhhawlh ve tawh nasa, a naupanchhiatna te pawh rawn langsar chhoin zâmna te pawh a nei lo thei bik lo. Mahse, fuihna a dawng nasa bawk a, a intichak lui hram hram a ni e. 

Tichuan, a tum ram Aizawl pan chuan an khua chhuahsanin a liam ta vung vung mai. A rilruah Nguri lian tho mah se; an intihsiakna tur chuan a rilru a mawlh lian zawk lo thei lo. Salem vengah a nî te inah innghatin anni lam paw’n zâm lo turin an lo fuih sauh sauh mai. A tuk chu Nguri nen inhmuh an tum ni a ni. Zanah phei chuan a muhil hleithei lo, Nguri hmu châk, zak ru bawk siin a let sek mai. Nguri nen pawh an intext reng tho a, Nguri thawhna restaurant-ah inhmuh mai an tithlu ta a, A chhan pawh Nguri chuan hun âwl a ngah loh vang a ni pakhat a,. Tin, a in luah a sawn buai ata langin chawlh a la ve nen, hnaah a awl hleithei meuh lo a ni e. A zing tho mood pawh a tha thawkhat e, a nî paw’n mak a ti deuh nge, “Kan Taitea chu eng chu hria ni maw? A va phur teh hûrh ve le..” a ti a ti mai. Ani lah a nui ruh ruh ringawt mai si. Tukthuan ei khamah a inbual fai a, a thawmhnaw neih that leh inhmeh a intih ve berte chu thlang kualin a buai ve zêk, a chang leh, “Ka bialnu pawh a ni lo va, eng nge maw ka philî vak le..” a ti thul. A tawpa tawpah simple taka incheiin inringtawk tak tho siin in chu a chhuahsan thei hram. Nguri thawhna restaurant chu a hre tawh a, chawlh erawh a la chawl lo. Nguri a call nghal a, “Ka chhuak chiah,.” A ti a.

“Aw le, hunawl ka neih hun chu i hriat kha.” A rawn ti a. Nguri chuan dar 12:00 - 2 thleng hun awl a nei ve thei a,. 

“I thawhnaah chuan ka lo kal lo zawk mai ang, darkar 2 hun kan nei tho a, hmun dangah kal zawk ila..” a va ti a. 

“I tih dan dan, ka hman veleh ka lo bia ang che.” Tiin an dah ta rih a. Nguri hman hma chu a thiante ho tlawh a tum ta a, an han inhmuh leh chuan an hlim hlawm hle, Icon-ah a tel ve dawn tih an hriat phei chuan an lo phurpui nasa mai a, College an kal laia a kawm nasat ve ber fiamthu duh zet mai, Zotea nen phei chuan an titi hlut mai. “Ti daih ila, Cindy khan pasal a nei dawn an tia sin” Zotea chuan a ti thut a, Sangliana pawh a phu ve zawk mai. Cindy chu college a kal chhung zawnga a ruka a star, a hrilh ngam si loh, thian anga a chhuah tak ngawt kha a ni a, kawm pawh an inkawm nêl ve lutuk, mahse, a rilru kha a hrilh ngam tlat si lo. Chutia a kumhlun crush ve berin pasal a han nei dawn tih hriat chuan pangngai taka lo dawnsawn a har ve pawh a niang e. 

“Tu?” A ti hû a. 

“I hre lovang, an veng ami a nia, phaiah a awm thin an tia, englo, Cindy kha a lo rai a niawm e.” Zotea chuan a ti ban chhalh a. Sawi nuam a ti vak bik lo te pawh a niang. 

“Ee..a va zia lo ve, ti ila a lawmpuiawm chu. Ka aiawhin i va kal ve dawn nia,” nui chung hian a ti a. 

“Ka duh teuh lo mai, sawm pawh sawm hleih lova va kal ve ngawt te chu. Tak takin a ho êm mai, a nei tura te hi han innei sup sup phawt se, a tawpah a la bang kan thlang ve dawn nia..” Zotea chuan a ti huah huah a. An nui dun kur kur mai. Nguri’n a rawn call ta a, rang fahrana lain Nguri chuan an restaurant piah lawka a nghah thu a rawn sawi ta a. Zotea nen chuan inmangtha rih phawtin taxi la-in Nguri awmna lam chu a pan ta nghal a. 

A thlen dawn meuh chuan a zâm thar leh a ni ber e, a inhumruh a, a rilru tê têin, “Laltai, taite, i tithei..” tiin a infuih mawlh mawlh mai. 

Waiting shed-ah chuan patling pakhat leh nu pahnih bakah nula sam dum, a phone bih ngar ngartu chu a va hmu ta. A bul a va thlen chuan, “Nguri” a ti sup a. A rawn hawichhuak vat. Khalai boruak kha vai film chu nise music a rawn ri leh chuai chuai ang a, ruah a sur seng seng emaw chhum var pan tak a zâm riai riai maithei a ni..hehe..ni e, an mit leh mit intawng sak chuan chhungril a vilh ve tlat nia ! Ṭawng mai nachang pawh an hre lo, mipa zawk na nâ na chu hamhaih rei lo zawkah ṭangin a kut a phar chhuak a, Nguri pawn harhchhuak thut niawm takin a kut chu a lo vuan ve vat, an han inchibai ta phawt, a bulṭanna chu. Nguri chu a rawn ding chhuak a, “Khaw nge kan kal ang?” A han ti hê hâw a. Sangliana rilru chu a buai ru hle, rilṭam a hun tawh tho tiin Nguri thawhna ni lo zawk an piah veilama restaurant lam chu kawkin, “Tah sawn thil ei ila” a ti lawi rût a. Amah pawh chuan a zâm lutuk chu a inzahpui thei hial. Nguri pawh chu a bu nghat a, an inzui phei ta nghal. Dawhkan kila an han inhmachhawn takah chuan a tir boruak ang em em khan boruak chu a ṭang ta lo va,. 

“Min lo nghak rei em? Sawtah khan” Sangliana’n a tih chuan, “Rei vak lo e” a lo ti a. Nguri chu a thlalak nen danglamna an nei hran lo, effect tih vel a hmang ve lo a nih hmel, a vun pawh ngo hluak ni si loin a mamin a no chek mai. An eitur chah a rawn thleng a, ei pah chuan Nguri nu chungchangah an peng ta rih a, an pahnih chungchang ringawtah chuan sawi tur an vân rih te pawh a niang e. 

“Ka nu chuan a account a transfer-tir veleh rawn phei chu a tum a, zat leh zata insem kha a tirah an duh lo va, mahse, ka nuin, ‘Chutiang êm pawh in duh loh chuan tihtheih ka nei lo a nih chu’ a tih tak si-ah chuan an remti ve ta hram a niang. Karleh velah chuan a lo phei theih mai ka ring “ Nguri chuan a ti siam siam a. Sangliana pawh chuan, “Nia, i nu pawh hmuh a châkawm alawm, engtikah nge ka rawn len ang?” Nui sak chung chuan a han ti a. 

Nguri chuan lai deuh hian, “Zanah” a ti sep a. An inmelh ralh bawk. An chhungril nun inhretawn mah se; a taka thu hmang ngeia han puitlin chu an zuam lo nge an zak nge bulṭan dan tur an hre lo zawk, mahse, an mitmeng atang chauh zawng pawhin an rilru an inhriatthiamsak tho si. Chutiang chuan dinhmun lai deuhin an awm a ni deuh ber, inngaizawng tih dawna ni chiah si lo, inngaizawng lo tih dawna rem chiah bawk si lo, thiantha ringawt nih duhkhawp si lo tuilairap nun hi a chang chuan a nawm chang a awm châwk asin. Sangliana hian chet la se a fel thlup mai tur..an ei zawhah MC-ah  an va kal ve mai mai a, hla taka leng chi an ni rih si lo, Sangliana’n lirthei a hawl chhuak lo bawk nen. Mahse, an titi dun nasa a, chu chuan an inkar a pawh hnaih bakah innêl sawt bawk. Mi thenkhat angin inhlanin intiam dêm dûm lo mah se; an rilruah an nihna ve ve chu an inhrechiang tawk viau e. Nguri chawlh hun a tawp leh ta mai si, Nguri chu an dawr thleng a thlah a, an inbye bye liam ta rih phawt. Intihsiakna tur lamah rilru pek ṭan a hun tih hriain, a haw nghal vang vang a, hla 2 chu a sa chhuak leh hram. Ni khat hun an la nei tho a tiin Nguri sawmna ngaipawimawhin zanah chuan a in luahah va len hram chu a tum rilru a. 

Mahse,. A pain a rawn bia a, “Kha, Pu Rinliana kha zanriah ei hma deuh atang khan a chau riau an tia, zanin pawh a daihin an ring lo va, nang kan khaw mi khata awm sa i ni bawk a, i han lang ve dawn em mawni le? Chhiat tawk thei vek kan nih hi, hetiang huna khaw mi leh sate hmel hmuh thlamuanthlakzia chu e, chuvang chuan zanin chu han kal ve mai rawh..” a rawn ti leh ta si. A va phur tehchiam lo tak êm, amaherawhchu, Pu Rinliana te nen hian inthenawm hnai, engkima inban tawn reng reng an ni a, an intichhungkhat viau bawk. Damdawiinah an awm tih chu a hre tho a, kan pawh a tum rilru ve reng, mahse, tunah a dinhmun a pain a rawn sawi leh ta si. A pa thu hnial a hreh chu thuhran, kal lo thei lo niin a inhre ve tlat. A nî pawh chuan a hriat rual rualin, “Ka rawn kal ve ang e, ka number hi an nei reng si a, an buai phili deuh em mawni aw, min rawn biak vat tur a nia. Helaiah khaw mi leh sa awm reng a” a ti chuar chuar a, a la inti Bàwktlàng khua hle a ni. A nî nen, a nî fapain car a khalh a, Civil Hospital lam chu an pan ta a. Pu Rina hi chuap cancer niin a bawksawp rei ta viau mai. 

An han thlen chuan Bàwktlàng khua, Aizawla awmte bakah an chhehvel khuaa Pu Rinliana hmelhriattute pawh an lo ther fur tawh a, an tlawmngai thin ngawt mai. Sangliana te pawh chanchin ngaichàngin thutna remchang awmah chuan an thu ve ta chawt a, Pu Rina chu ICU-ah awm mékin, ventilator phawi ruala kal nghal thei niin an lo sawi hlawm a. A nupui fanaute tan chuan a va hrehawm duh dawn ém. Doctor te nen an han inberàwn a, duhthlanna harsa tak a va ni dawn ém..kha chen an lo inenkawl tawh a, senso lah a tam si, tichuan, a nupui leh fate bakah a unaute thutluknain ventilator phawi mai chu an titlu ta a ni. A dik a dik chuan amah pawh kha la dam se chuan, an duhthlanna hi pawi a tih a rinawm loh. An khawsak a chuti lua bik lo nen, an inséng nasa ve tawh ém a ni. 

Thil veiawm tak pakhat chu a pawi tawh hnua kan inentir emaw doctor kan rawn chauh zel hi, mizote hi chu kan chhel a, a tawrh theih chin chin kan tuar tawp a, nachhawknain a chhawk theih tawh loh chinah te damdawi in kan pan chauh a, a dik mawlh lo a ni. Enkawl dam theih tawh loh te a lo ni tlangpui zel a, sum tam tak sengin inenkawl dam kan tum leh ang lawi a! A tawpah nunna kan inchàn leh tho thin si. A pawi vawng vawng teh e. 

Pu Rinliana ruang chu an thlenna Venghlui YMA ten a kuang mawi taka siamsakin a zan la lain an khaw lam an panpui ta nghal a, Sangliana te erawh chu zui thei dinhmunah ding hek lo, a nî te nen chuan an haw leh ta a. Nguri bulah khan chanchin a hrilh tho a, ani pawn a rawn hrethiam viau, rawn lan ve a duh viau nain a in chungte naute birthday an lawm ve sia, an lo sawm ngawrh ve si, a rawn kal ta lo a ni. Hun remchang chu a awm leh ém ang chu maw. Sangliana pawh rilru dang put hun a ni tawh lo tih hriain zai lamah a rilru a pe ṭan ta a, Nguri pawn a hrethiamin a tibuai duh lem lo. Bâwktlâng lama a chhungte pawh an ṭawngṭai ngawrh khawp mai. An intihsiak hun chu a rawn thleng ta a, Sangliana chuan awlsam takin Audition round chu a paltlang ve ta mai. Kha kha chu a rinsa a nia, mak pawh a ti lem lo. A tuk zanah Nguri in luahah len ve ngei chu a tum ta a, rokhawlhna dang a awm tawh loh hram a beisei,. A ní bulah pawh fiamthu ti takin a sawi ve nuah nuah a, a ní pawh nu phawk ve tak a ni bawk a, “Rawn lenpui ve la, remchangah” a ti luam a. Phur takin a ní te in chu a chhuahsan a, Nguri nen an inbe zui zat bawk. Nguri hian Khatla-ah in a luah kha a nia, Chawnga road peng thleng taxi a la a, a bike a keng thla lo chu pawi a ti deuh viau mai. Rei erawh kein a kal lo, kawngsirah Nguri chu a lo ding to mai a, a inbual zo hlim ni ngei tur a ni, pyjama eng par leh tshirt var a lo ha a, a sam chu a la huh chap bawk. Make up tel miah lo chuan a hmeltha daih zawk. Nguri in luah chu a te fel khap reuh a, awm lo tur a awm lem lo. Insi rial chuan an han thu dun a, sawi tur an haihchham leh ta. A va buaithlak thin tak. 

“I zai thatzia kha..” Nguri zawk chu a ṭawng hmasaah a ṭang ta nge nge a. 

“Chuti maw?” A ti ringawt. 

“Chuti e, i tlin chhoh zel ka ring, engtikah nge in zai leh dawn?” A tih chuan a sawi a. 

“Thingpui in ang aw” tih leh thawh a rual nghal, a inrin hmain Sangliana chuan Nguri banah chuan a lo man chawt a, “Lawkin, thil sawi dun lawk ang,a la hma..” a ti sup a. 

Nguri pawh chu thu ve nghalin, “Eng lam?” Tiin a rawn melh hâw a, Sangliana insum zo tawh lo chuan, “Inngaizawng ang.” A ti ta tawl mai. Reivaklo chu a reh duk a. Nguri chuan a chil lem khawlhin, “I ti tak tak maw?” A ti sep a, ani pawh a zâm tih hai rual a ni lo. 

“Aw ka ti tak tak..nang pawn min duh tiraw?” A huaisen ta deuh e. 

“Aw” a lo ti teh tawp a. Sawi leh tur a vâng ngang mai. 

“Mahse, Sanglian, ka dinhmun i hre vek a, heti mai hi ka nia” Nguri chuan a han ti leh a. 

“Chutiang ka ngaihtuah lo. A ho, kan pahnih chauh ngaihtuah ang” a lo tihsan a. 

“A tha lawm” a ti ve leh thliam. Nguri mizia hi ti deuh tawp chi, nu hnêp lo kan tih tawh kha, a landan leh miziaah chuan Sangliana’n a hmaa a hmeichhe duhthusam a lo sawi thinte kha engmah a awm lo tihtheih a ni. A duhthusam letling chiah ni mah se; a duh em em tho si lai chu a ni a hriatthiam theih loh chu. A no ve duai lo va, a duty tha takin a hlen a, a hnaah a tui bawk. A ṭawng tam lo naa, titipui erawh a nuam tho. Chutiang hmeichhia chu Ngurtinsangi nihdan a ni. Sangliana chuan a nih ang angin a pawm thlap thung. 

A vawikhat nan an infawh ve ngei kha..an zei dun fahran lo hle, mahse, chu chuan an ngaih a titha zawk daih. Thingpuite in dunin thildang daih an sawi a, an titi a rual phian zel hi a mak angreng, Nguri a duhna chhan chu eng topic pawh sawi se, a lo sawipui ve loh paw’n a lo ngaihthlaksak thin. Chutiang chiah chuan Sangliana paw’n a theih ang tawkin Nguri chu a hrethiamin ngaithlatu a nih nasatzia kan hriat tawh kha. An veng a hla ve deuh bawk nen, dar 9 a pelh chuan hawn zai a rel ve ta a, intihsiakna lama rilru pek lehzual a ngaih dawn avangin an inhmu zen zen thei dawn lo va, a kal dawn chuan, “Ka ring che a nia..” tih thu a sawi, Nguri pawh a lo bu nghat. Hlim takin an in lam a pan ta vang vang a. 

Intihsiak leh tur chu guitar emaw keyboard nena zai tur a ni tawh a, amahin guitar a perh a, a zai ṭha lehpek hle, judge te comment pawh a ngaihnawm narawh e. Nguri pawn a lo en ve zat zat zel a. Boruak a sang chho tial tial a, Icon boruak chuan Aizawl khawpui pawh a tuam hneh chho tial tial bawk. Top 20 an thlang ta der mai. Kan Sangliana pawh a la inhlangkai ve zel a, ṭantu pawh a nei chho ve ta zut mai. Nguri nen erawh hun awlah an inbe fô a, tin, Sangliana nuna pawimawh leh langsar tak chu ṭawngṭai a thlahthlam ngai miah lo hi a ni. A ní te in a chhuahsan hmain a níin a lu chunga kut nghatin a tawngtai a, back stage-a thlenin a tawngtai leh a, a zai dawnah chuti bawk, a zai zawhah Ṭawngṭai chu a ṭhulh leh chuang hauh lo. Chu chu van lam pawhin a lo hriatsak a ni ngei ang, a chawimawi chho ta zel a, Top 10 aṭangin Top 5 a thleng ta der mai le..

Inelna boruak sang tak hnuaiah pawh a la tlinga te leh tla tawhte pawh inpawh takin an la inkawm bawrh bawrh thei a, boruak zangkhai tak an nei thei zel te chu a duhawmin a mawi takzet a ni. Amah a buai tawh em avang leh competition a san tawh êm avangin Nguri nen chuan an inbe tha hman meuh tawh lo. Mahse, Nguri pawh a vui hran lo va, Sangliana mize nghet tlet tlawt chu a hrechiang a, larna leh hmingthanna te’n a chiah zawp theih loh rinawmna chu an pahnih inkarah a la vul zel tih hi a inhrilh nitin thin. A rukin a lo ṭang ve em em a, Sangliana nen an inkar chu tuma bulah a sawi ngai hek lo. Amah Sangliana hminghliau theihna tur ang kha a ti duh lo bur a ni tawp mai. 

Final thlen nan ni khat a la awm ang tih zanah rem leh rem loin Sangliana chu a va leng a, an lo inngai ve hle tawh a niang e, an inkuah vawng vawng a, kiss pawh an uar dun tân tân e. A pawi tur chin erawh thlen loh an tum tih thu-in sawi lo mah se; a takin an lantir a, tawp hun an hre hle. Hun pawh an hmang rei thei lo va, a haw tur inthlah pah chuan, “I lar tawh sia, keini chu kan tla vawn vawn tawhin ka hria..” Nguri chuan a ti zauh a. A nui tho nain mawlhtu a nei tih hai rual erawh a ni lo. A bianga piai zauhin, Sangliana chuan, “Ka ring che tia ka sawi rual khan, rintlak ka ni ang tih ka sawi tel tih hrethiam tur khawpa fing i nih kha..a ni lawm ni?” A ti zawi raih a. Hnai set sawta inmelhin thinlung inhmu tak hian an nui dun var var a..