Lalsangliana 1

AW..! LALSANGLIAN,. (1)

Ziaktu : Toni Râlte

Zing dar 7 a la ri lo deuh hlek a, nimin lamah an lui kalna kawng a chhuk chho ve deuh bawk nen, a la muttui hle laiin a pain a rawn kai tho lehpek a, “Hei, Taia tho rawh, Tûkpui, tho rawh le..tlangval mut a hun tawh lo.” Tiin a sawi nawk nawk a. A zi ṭiah ṭiah a, a hâm bai bai bawk, chiang mang lova a pa en chungin, “Ka la tlangval tak tak lo, ka râwl alawm” tiin a saisir a, a muthmun a siam rem sauh sauh mai. A nu zawk chuan, “Aww, kai tho rih lo mai rawh, an lui kal a chau ve a nih kha..vawk chaw chhum i ngai lo em ni?” Tiin an pa chu a lo khap ve a. 

“Ngai e, Rote, nang i pu Zaua te leh i û te chaw nawi va la lawk rawh” tiin an fa tlum ber chu a han tir a. Rotea pawh thingpui in zawhah bucket khaiin a chhuak ta nghal a. Dar 8 a la ri lo deuh tihin Sangliana, Taite tia an koh mai thin pawh chu rawn tho chhuak vein a tih fó danin tuilum leh nimbu tui pawlh chu a in leh khalh khalh a, nimin an lui kal an hlawhtling thawkhat bawk a, a mood pawh a fuh viau mai. Lui kal leh ramhnuaia han theuleu vel mai mai hi a nuam tihzawng a lo ni bawk nen, a hun âwlah chuan kal fô a duh thin. Ani hian kum 23-na a hmang mêk chauh a, T. Romana college aṭangin a graduate tawh a,Master degree lam tak hi kal zawm a tum rih lo niawm tak a ni. A chhungte thu thu pawh a niang e. An khua hi khaw lian a ni lem lo va, Bâwktlâng niin Serchhip district a ni. Mahse, nuam an ti viau thung. Mihring tam vak lo ta na nâ na chu an inhrechiang hlawm a, an inpawh em em vek mai. Pa ber vawk chaw chhum pawh a rawn so chhuak ta bawk a, tukṭhuan an ei zui nghal mai. 

“Nanu, zanin kha hla zir a ni em?” Sangliana chuan a ti a. 

“Nih kha, u Hruaia a hman dawn lo lehnghal, nangman min tihpui a ngai dawn a nia.” A û chiah chuan a lo ti var a. Inchhangbung an ni bawk a, a û hi a hmingin a ko ve mai a ni. “Nia, ka rawl bawk sia, vawiin chu inzir nan ka hmang mai ang..” a lo ti ve sup a. 

Pu Dika chuan, “I û pawh karlehah chawlh hmangin a rawn haw thei dawnin ka hria, a sawi ṭha duh vak lo nain..Rote, thil te kha i lo chah ve leh vak ang e, hawn loh hi a hreh thin si, kan khawsak dinhmun hi hrereng rawh u.” Tiin Rotea chaw bar mial mial chu a han melh zuk a, ani chuan a rawn melh ve lem lo. “E! Taka! Ka û a lo hawn dawn chuan Aizawlah guitar string min lo hawn se ka va ti, ka chah ang, a to chuang lo, ka guitar string saw a ṭha tawh lo tlat..” thawh pahin Sangliana chuan a ti a.

Nilêngin keyboard nen zana an hla zir tur chu a zir a ni deuh mai, ani hi zai lama a tui bakah music a thiam tel lehzel a, an kohhran hian an chhawrin tunah pawh KṬP zaipâwlah Asst. Conductor a ni ve hial reng a, a la naupan ngaihtuah hian a puitling ru ve zêk a, a naupanchhiatna erawh tihlan chang a nei ve tho mai. Tuna an sawi kha an upa ber dawttu  Bensona a ni a, mahse, Bena tih hi an koh dan tlanglâwn a ni deuh ber, an upa ber hmeichhia erawh chuan an khaw mi pasalah neiin tunah in hrang an chang ve tawh a, chumi nau chiah Lalramsangi niin a chhang chiah hi tuna kan sawi mêk Lalsangliana chu a ni. An tê ner Rokhuma hi naupangber tih takah an la naupang chhe chei ve deuh a, amah a pangchang thiam ve bawk nen, a len ûr tawh hnuah pawh an duat râwn a la ni ve reng mai. 

Tlaiah a ṭhianṭha ber Amuana’n volleyball benpuiah a rawn sawm leh a, an hman a nih phawt chuan tlai lam hi chu an missed ngai lo tih theih a ni. Sangliana pawh a insiam sawk sawk a, sports lam a tui ve lehzel bakah a rualpawl tawka zirna lam a ti ve thei pawl a ni lehzel hi a chhuanawmna lai tak pawh a niawm e. Volleyball phei chu infiamnaa nuam a tih leh thiam ber a ni nghe nghe. An ṭhian dangte pawh an lo ṭhu ṭhap tawh a, an ṭan ta a, Amuana nen an inman bawk a, an team lam an chakpui leh thei hram e. An hawn kawngah chuan, “Bawiha, ti nge Terini nen hian in va inbe ngai ta lo ve, engmah lah hi i sawi ngai si lo va.” Amuana chuan a ti a, Sangliana chu a nui hak, “Kan inbe lo ve tawp, min duh tawh lo a niang..” a ti a. 

“Keipawh min be ngai tawh lo, Aizawla i zuk zin lawk hlan khan in inhmu thiam lo a niang ka tia, i rawn haw a, in inbe zui ta bawk si lo va..” Amuana chuan a ti leh nuah nuah a. 

“A buaithlak, ka zei lo a niang bro..hehe, tak taka midang a nei a nih ka ring,..aa sawi tawh lovang. Zanin hla zir kha aw” a ti zui zat a. 

Zana an hla zir boruak chu a nuam angreng hle, Nanui thiannu phawk zet mai, ṭawng phawng phawng hi tlai zetah a rawn kal a, a hming pawh Lawmi a ni nghe nghe, Sangliana’n ṭawngṭai tura Hmuna a sawm mek laiin nui ruh ruh chungin a rawn lut a, Sangliana chuan, “U Lawm, i tlai ṭêp alawm, ngati nge i nuih?” Nui chungin a lo ti a. A puak ta pawp a niang chu, a nui thlêr ta uarh uarh a, a nui chu an lo nuih chhawng ve, a mittui te a tla phung a. 

“Ih..haha,..ih saw lai Pu Kaia te in bul bawlhhlawh paihna kawrah sawn kawr ruak ha pa hi a kawr hian..” tiin a han nui khur leh ngat ngat a, “A kawr hian a mit chin zawng a khuh a, a lo e a..mikhual niin ka hria. “ Tiin a han khek leh tuar tuar a, sunday school hall-ah hla an zir hlauh a, Biak in chu ni se ṭhenkhatte mit a mim leh hle mahna le..lo ngaithlatu te pawh chu an lo nui ve tlâwrh tlâwrh a,. An nuihzat ber erawh, ‘Kawr ruak ha’ a tih kha a ni zawk mah. Kawr ruak tawh na nâ na han hak leh chu an ti hlawm a. Hla pawh an zir lawk thei lo. An nuihzat zualpui a han reh deuh takah chuan Sangliana pawh inthununin, “Le, duhtawk ang aw. U Lawmi paw’n kan hla zir boruak uap lutuk tur a rawn tizangkhai a, a zia e. Le, Hmuna ṭawngṭai turin kan sawm ang a, tichuan, kan zir chho mawp mawp dawn nia..” a ti a, an ngawi ta ṭhap mai. Tichuan, an hla zir pawh an tui chho ta viau e. 

Sangliana hi sawi tawh ang khan a naupan lai pawha naupang fel leh thuawih tak, lehkhathiam ve tak mai a ni a, vun ngo lam, hmai tung lam lek lek a ni a. A hmui hi a chhah lam pawl deuh, zuk leh hmuam ti ta lo chu heh sen hiam reng a ni reuh a, a mitmeng erawh a thin kan tirim ang a, a duhtawka nâin min melh ang tih erawh hlauhawm lek lek khawpa fiah leh chiang, rum lam lek lek a ni a, amaherawhchu, hlim hmel pu thei reng a nihna hian a mitmenga hlimna lo lang ve pawh a tilangsar ṭhin. Palian tia sawi tur ni lo mah se; a vantlang tawk zawng a ni e. A hranpain gym te kal ve lem lo mah se; tlaitin ball ben leh pet ṭhang ta na nâ na chu a taksa pawh a inphut mawi tawk viau. Ama insawi ang deuh khan mipa zei leh hmeichhe lama han harhvâng tehchiam a ni lo va, zakzum tak ni chiah si lo, mahse, lâi ve thei fu roh ang hi a ni ve a. A tette aṭanga a nu leh pa zilhna ngaipawimawh mi a ni bawk a, an unau hrim hrim hi thenrual zingah pawh thuawih pawl an ni deuh zel mai. Ngaihzawng la ngah viau lo mah se; star nei ve zûl, a ziaktu ang deuha va ngaihven tum em em lem lo, ralkhata lo star ve tlut ang chi deuh kha a ni ve a, (Hehe) ..

Hun a kal ve zel a, zai lama tui na nâ na chu mal zai-ah pawh an kohhran aiawh te pawhin hmun dangah te pawh a zai ve fô mai. In lamah ni se Rotea nen an ri ve tlang tlang zel bawk a, an in hi a an sakna a la rei lutuk lo va, an upa ber Bena sipai hlawh bakah a pa hi a taima a, huan neih lama tui tlut mi a ni bawk nen, an eikhawp zawng an hmu ve mai zel. Zan khat a muhil tawh titihin phone call a dawng a, a la tlai chhe lem lo. A han chhan chuan hmeichhe aw thâm chhil chhel hian, “U mam, ka nu ka hmu duh, khawngaihin..” a rawn ti ta ringawt mai. A rawn call sual tih a hrethiam nghal mai. 

“Min hresual a niang, thiannu,.” A han ti a. 

“U Mama i nih reng kha, harsa takin i number hi ka nei asin. Ti nge ka nu hmuh chu i phal tlat loh a? Mawh?” Ṭap aw titih hian a rawn ti ta mai. Sangliana pawh a ṭhu chhuak ta nge nge a, “Min hrethiam teh, Mama ka ni lo tak tak, i tisual alawm. “ Zaidawh tak hian a han ti leh a. Mipa zaidam leh zawldawh thei tak a ni hrim a. 

“I va mak ṭâng ṭâng e aw, a nih chuan police-ah ka kal dawn, hetia ka nu in khung bet reng hi ka tuar thei tawh lo. “ A rawn ti hlak hlak a, a thinrim hmel hle..

Sangliana pawh chu a mangang ta deuh a, “Enteh, tha takin thil sawi ang, Mama ka ni lo va, kei chu Bâwktlâng khua Sangliana ka nia, i biak tum nen kan number hi i hriat pawlh a ni ngei ang..” a han ti dam leh thlup a. Inhnît feih feih thawm a hre ta mai, “Thiannu” a han ti leh. 

“Ka tihpalh, hei hi min pek ngei kha a ni si a, min hrethiam rawh aw, thianpa..ka..ih, pawi ka ti lutuk..” insum tih hriat fahran hian a rawn ti a. A dah zui nghal daih bawk. A mutchhuak pawh a reh ta daih mai. Zangthal zawnga muin a han ngaihtuah vang vang a, tuna a number hman hi Aizawla a phone a tihbo tumin sim card siksawi leh book nan hun a neih si loh avangin a thianpa Lka’n a hman tawh loh sim card a hmantir kha a nia. Lka lah an graduation party an lawm zo, an hawn lamah bike accident-in kâ pawh chhâwn lovin a boral tawh si,.Kha nu khan Mama number angin a hria tihna a ni thei ang em? Nge an pe sual ve hrim hrim zawk ni. A hriat loh karin a lo muhil  ta daih a. Zinga a han ṭhangharh pawh chuan kha nu bawk kha a ngaihtuahnaah a rawn lut, a manganzia kha a aw aṭang ringawt pawh khan a hrethiam thei, a inhnit faih faihte kha tider chu a ni lo chiang, nge a thian phawk zet zette hian an bâwl zawk le..aa..engpawhnise, a nih nih ni mai teh se ti rilru chung chuan a tho ve ta a. 

Nilêngin an huanah Rotea nen a pate nen an feh a, Rotea bialnu neih velte sawiin an infiam hlut a, ani lah ṭan taktêa ṭangin, “Ka nei lo, kha nu kha ka duh lo, a hnutê a lian si” a lo ti hlur thung a. A pa chuan fiamthu hian, “Nautê, tunlaiah mipa te chuan hnute lian in duh emaw ka tia, i û pawn hman zanah nula hnute lian leh mawngbawr lian deuh deuh thlalak a hmetchhuak, ka hmu reng..” a lo ti. Sangliana zak bawk si lai tawh bawk si chuan, “Khangte chu IG-a ka follow ho an nia, ka like ngai lo hrim hrim, hmuh an nuam ve mai mai alawm, a ho ee” a ti nuah nuah a. Rotea thung chuan, “Kei chu hnute leh mawngbawr lian tih vel ai chuan an chhungril lam ka en tlat alawm..len ringawt lam a ni lo, ka u..” tiin a han inla puitling sasâwi a, a û leh a pa nuih a tiza hle. An hawn kawngah an venga rawn awm thar ti ila thla 2 dawn chu an awm tawh ang, an tleirawl leh a nu te thingphur haw te nen an inchhawm hawng a. Sangliana hian Rotea leh an pêm tleirawl Biteii te inbiak thinna a lo hmu ru zuk tawh a, inbem ngam tak tak si lo hian a rukin an feelings an thup tih a hrethiam ve kur roh sia, ‘Ehem’ a ti deuh sek a, Rotea lo run lah chuan, “I va ninawm ee..kal hmasa rawh.” A ti hlur a, Sangliana a nui ruh ruh mai. 

Zana an hla zir laiin a phone a rawn ri a, a pick up lem lo. Bana a han en chuan nizan lama rawn betu tho kha a lo nia, bâwl tum vang nge buaina a tawk zawk tih ngaihtuah rauh rauh chungin call back a tum zet a mahse, a thian te an rawn len avangin a ṭhulh leh ta a. A mut tawh hnuah a rawn call leh ta chiah, a pick up ta nge nge a. 

“Min hrethiam la, U Sanglian, ih,. Englo a nia, he mi number ngei hi min pe si a, nangma book a ni ngei em tih ka hre duh a. “ A rawn ti thâm leh ṭiak a, a aw chu a mawi tihzawng tak a ni. 

A aw a thian kharh a, “Aa.nia, ka thianpa min pek a nia, ka book chu a ni miah lo. Tu nge petu che chu ka hre thei ang em?” A ti ve thung a. 

“He mi number hian whatsapp i khawih em? I khawih chuan ka lo thawn ang che, chuan khawngaihin i thianpa number pawh chu min pe thei ang em?” A rawn ti ve a, a aw pawh tlem chuan a zangkhai ta deuh e. Tichuan, whatsapp atang chuan an inbe chho a, chu hmeichhe hming chu Ngurtinsangi a ni a, Nguri tia an koh thin thu te a sawi ve luam a. Nguri hnena a number petu a rawn thawn lah chu a hriat ngai loh chu thuhran a number pawh a save lo hrim hrim,.”Ka thianpa he mi sim card min petu hi a boral tawh si a, a chhungte number ka nei miah lo va, engtin nge niang aw” tih msg a va thawn a. 

“A va pawi lehzel êm..” a rawn ti teh tawp a. Buaina lian tak a tawk a nih a ring thiam ta mai, va inrawlh ve kha nuam a ti chiah si lo. Mahse, “Buaina i tawk em ni?” A va ti ta tawp a. 

“Aw” a tawi fel hle mai. Zawh zui zel chi niin a hre ta lo va, “Mamawhna min neih chuan min lo be mai rawh aw. Muttui phawt le” tiin a dah ta rih a. Zingah chuan, “Nizan kha ka mood a lo chhe deuh a, tihpalh. Ka buaina hi a buaithlak a ni tawp,.chhungkaw thil a nia.” Tih thu chu Nguri hnen atangin a dawng a. 

“Aw le, a pawi hle mai.” A ti ve hram. Tu te emaw anga msg reply duh loh tawp te hi a mizia a ni vak lo,. 

Chaw ei khamah vawk chaw thing tur thing sak zet a ek a, a hah viau mai. Amah aiin Rotea hian thing eh chu a thiam zawk mah. “Nanu, thingpui lum teh” a u phone bih chunga khi vur vur chu a va melh a. 

“Lawk” tiin a lo la chhang zui. “Phone bih hian khi vur vur zel suh, chhul ṭha lo emaw an ti mai ang che” a ti sup a. 

“En ve la, i nuih loh atakah” tiin a û chuan a phone chu a han pe a, pa pakhat len dêng thiam lo lutuk, a fapain a nuih nghek nghekna video hi a lo ni a, Sangliana pawh a nui nasa kher mai. Thingpui a in laiin Nguri bawk khan, “Zanah i hman chuan ka hrilh ang che. Inbunthâwlna ka mamawh lutuk a. I rintlak ang tiraw?” A rawn ti a. Chutia phone atang mai maia a hriat a ring nghal mai chu mak a ti angreng hle, mahse, “Min rin leh rin loh chu i thu nise, mahse, thurûk chu ka vawng thei ang.” A va ti ve a. 

Zanriah an ei lai chuan YMA information aṭanga rawn auin, an khaw dai-a pickup chetsual thu leh an hliam tuarte buaipui leh bungraw  thiar turin YMA hnatlâng an rawn ko ta a, “Taia, ei vat vat r’u, a zia lo hle mai a, kei pawh muangmarin ka rawn lang ve ang” a ti chuar chuar a. Sangliana leh Rotea te pawh an eikham veleh insiam nghalin motor chetsualna lam pan chuan an inkhalh chhuak ve ta nghal a. Rin aiin an lo la tlem, YMA president hoin mi 10 bawr vel chu motor liamna hmun awih angreng takah chuan an inzui thla ta dam dam a. A lo lum thui angreng viau lehnghal, pickup chu a lo thal huah mai a. Bungrua lah a lo let phung mai, dawr bungraw laa kal an nih hmel. Mi chuang zat tak hriat a ni lo thung. Hliam tuar pahnih chu an hmu ta phawt a, an na angreng hle. Pakhat chu driver niin thei leh thei lo hian mi pali an chuan thu a rawn sawi ta a, pahnihte chu hmuh an la  ni lo. A thlang deuha buhfai bag niawm tak let phung lama kal Rotea leh a thianpa te chuan hmeichhe ruang, hmai hmuh tlak loh khawpa vun inhik vek an zuk hmu ta a! An rak ṭhawt. An la nau ve deuh bawk nen, rang takin rual û zawk te chu an zuk tlan thla ta a, puanin a hmai chu an khuh ta thuai a, hmeichhe pakhat zawk pawh a piah lawkah bawkkhupa muin an va hmu ta a, ani pawh a lo thi tawh. A taksa lang thei chinah a ban leh ke veilamah bak hliam na em em hmuh tur a awm lo naa a kawchhung lamah hliam a tuar fe a nih hmel. An lo pungkhawm tam zel a, hliam tuarte leh mitthi ruangte chu tlawmngai takin an zawn chho ta a. Kawngpui an thlen chhoh hnu reivakloah driver pawh chuan a tlin ta lo a niang, a mar an hmu zo ta lo. A manganthlak hle, a mar la phu awmchhun chu hmanhmawh takin North Vanlaiphai lam panpui a ni ta a. Ani pawh kha ngaihtuahawm tak a ni. Tichuan, YMA hruaitu lam ten ro an han rel zung zung a, bungrua chu a thenin an la khawm a, thenkhatin ruang an lo buaipui bawk. An buai ve mam mam khawp mai, chutiang anga chhiat an tawh hi an la tawng zen zen lo bawk nen, ruangte phone aṭangin an chhungte niawm deuhte chu biain chanchin an inhrilh thei ta hlauh a, YMA hall-ah ruangte chu dahin kuang an siam nghal chûk chûk hlawm bawk a, a tu amah chu âwl thei pawh an awm lo. Sangliana leh Amuana te pawh a buai pawlah an ṭang a, Rotea leh a thianpa Lawmkima te erawh an ruang hmuh râpawm zet khan an thauah a man nge mawni dawn ni, an khuate chu a sik ni hialin an hria. An dawihzep vang erawh a ni lo hul hual, a rapthlak ve lulai êm bawk a ni. An awmdan chu hrethiamin, an Vice President chuan, “Rote, nangni chu lo va mu hahdam rawh u. Hei kan indaih tho hi..” a va ti a. Han haw bik kha nuam an ti chiah si lo. An thu ve ta reng ringawt a. Kuang pawh an peih fel ta vat a, ruang pawh dahin an khaw lama dahsak chu an tum naa mitthi chhungte lamin lo nghak rih mai tur leh ruang la tura an lo kal mek thu an rawn sawi avangin an lo nghak ta zawk a ni. 

Sangliana rilruah erawh Nguri thil sawi tur kha a awm ru reng mai a, a phone en hmanin a khawsa meuh si lo. An zawh fel deuh hnua Amuana nen boruak hîp thawveng tura an chhuah chuan a phone chu a en ve ta chauh a. Ngurtinsangi tia number a save atang chuan msg chu a dawng ta ngei e. 

“Ih maw, ka pa hi a boral tawh a, ka nu hoin ka u mipa te nen rei tak kan khawsa thin. Ka pa pension ka nuin a lak theih avangin kan khawsak pawh a harsa em em bik lo va, ka u-in kum 4 liamta khan nupui a nei ta a, a nupui chu an inngaihzawn lai ang kha a lo ni ta hauh lo mai a. Kei hi zirna lam ka tui thlawt loh avangin eisiam lam ka zir ta daih a, chuan Aizawla restaurant changkang ve tak pakhatah chef hna ka thawk ta a, ka nu leh ka u te chhungkua chu an awm ta tihna a nih chu. Kei ka awm ta si lo va, mo kan nei pawh ka nu pawh a khuahar lo deuh ang chu tih nâk alaiin a lo ni awzawng lo va, kan monu te lam hi an khawsak a sang ve a, ka sawi awmzia chu hausa tia sawi theih ni si lo, khawsak tisang ve deuh ang kha an nia, incheina pawh kan khuaah chuan a sang ber pawl an ni awm e. Mi rêl chan ka chang pawh a ni maithei, mahse, dâwtin tumah ka puh ngai lo..”

“Chuan, ka u te pawn fa pahnih an nei ve ta a, an chhang a zing ve deuh bawk nen,. An chhangchhiat berh lai pawhin ka nu chu an tan a ṭangkai em em a, mahse, kan monu chu a lawm chuang lo. Ka nu hi ka lakah a vui ngai lo va, mahse, ka thianthaber, kan thenawm maia cheng hian a hre ve vek si a, min lo hrilh thin si, ka rilru a hrehawm em em a, ka u pawh ka va hau ve sateh a, mahse, ka thusawi aiin an nu thusawi a awih zawk a, kan monu chu a sual a ni mai a, ka u thiam loh vek a ni zawk, a nupui a thunun thei lo miau a. Chutianga ka û ka va hauh avang chuan an nupain ka nu chu an lo ankhum hrep lehnghal a, ka nu rilru nâ lutuk chuan ka pa damlai atanga a chhuahsan ngai loh kan in chhuahsanin ka thiannute inah a riak ta hial a, ka tuar zo ta bik lo nen, ka nu chu ka bula awm turin ka sawm ta a, ani pawn a hnial lo. Mahse, sawi tawh ang khan ka pa pension hi ka nu account-ah a lut miau a, a tlem chhe lo bawk nen, ka u te chuan chu chu hre ve karin ka nu awmbo chu an lo phal awzawng lo mai a, A tirah ngaihdam dilin tha takin an bia a, mahse, rei a daih lo. A ngai ang têin an tiduhdah leh si a, ka phone a chhiat avangin ka number neihsa zawng zawng a bo vek a, mahse, ka nu nen kan inbiakna ber a nih vanga ka vawn ve em em ka thiannu number erawh ka la hre ve, ka û te phone atangin ka nu nen kan inbe ngai lo va, number vawn hi ka harsat êm avangin ka number leh ka thawhna te leh ka thiannu number bak ka vawng lo. Ka thiannu a number pawh ka lo thawn che kha, kha kha ka u te number ka va zawt ta vat a, min rawn hrilh angin ka call a, nangman min lo chhang ta sia. Ka thiannu ka zawh nawn leh lahin, ‘A dik alawm’ a ti tlat bawk sia..mak ka la ti tâwp thei lo. Hei hi kan chhungkaw buaina chu a ni, ka nu hi ka bula awmtir ka duh ngawih ngawih..ka rawn inpuang vak a, hetianga sei hian msg ka la type ngai lo reng reng.” Tih thu chu a ni. Sangliana a khi sak thung, Nguri a khawngaih loh vang ni loin amah paw’n hetiang em ema msg sei hi a dawn vawikhatna a nih bakah mizo ṭawng dik ngaipawimawh tak a nih avangin Nguri’n thuziak sei tak hawrawp dik thlapa a rawn thawn chu a lâwm a ni. 

“A zia lo hle mai, sawi vak tur pawh ka hre lo. Hei, kan khuaah accident an awm a, ruang la tur kan nghak mek a. Nakinah sawi ṭha ila tiraw?” A va ti ve a. 

Amuana’n, “Msg type i thatchhiat nen, tun hnai hi i type ve mual mual zel a” tih pahin a rawn melh zuk zuk a. 

“A ngai ve nih hi..” a ti ringawt. 

Ruang la tur te pawh an rawn thleng tawh a, An khaw lam an panpui hnuah mi pungkhawm tam zawk pawh an ṭin darh ve ta hlawm a, Sangliana paw’n a nau chu a ngaihtuah deuh bawk nen, a haw hmapui ta a. Rotea chu a la pangngai chiah lo a, a zak ve deuh bawk si, a pain, “Ekhai! Naute, zak reng reng suh, thisûk i nei ve deuh bawk a nih kha, bakah kei pawn khatiang kha hmu ila mi râp ve tho ang, mutpui i duh paw’n i û kha hrilh hreh suh aw” a lo ti dam duai a. Rotea pawh a muang huai huai mai. 

“Riahpui em em ka ngai lo” a ti tak naa, a chhungrilah erawh a naupanna bakah a pangchanna avang chuan a û bula riah pawh chu a pawiti fahran lo thung. Mipa a ni si a, intipa rual lek an ni bawk nen, rilrua ṭawngṭai mawlh mawlhin a room lam a pan ta a. Sangliana pawh a mu nghal, mahse, a nau chu a ngaihchân pah avangin a phone chu a khawih pah a, Nguri msg pawh a lo awm leh vâng tawh. 

“I number hi Lalmami ka han thawn a, a rawn nui vak ringawt. A tawpa 9 tur kha 1 emaw ka lo tia, whatsapp-a thawn loin a rawn sawi a, nine tih leh one tih chu a inang ve êm a ni. Ka tilui miah lo nia aw..” a rawn ti a, Sangliana pawh a khi leh suk mai. 

“Ka awih lo, min be châk ve hrim hrim a nih kha” tiin a va fiam zuk a. A dp a en nghal zaih bawk, Ngurtinsangi chu nula vantlang tawk vel, effect a hmangte a nih loh chuan a vun pawh ngo lam, glow ve deuh mai hi a ni a, hmeltha a tihzawng a ni em tih a hrethiam chiah lo. A sam chu a dum hlap a, a tehkhin thiam dan ber chuan zaithiam Avril nen khan inang deuhin a hria, nu hnêp chi a nih loh hmel, a thawmhnaw hak duhzawng atang chuan. Mahse, hmeichhe chhe lo tak erawh a ni e. 

“I sual” tih chauh a rawn thawn a. Chhan mai ngaihna a hre leh ta pek lo, “Nia..” a va ti ringawt. 

Nguri pawh a reh ta daih. Rotea thawm a reh ta bawk a, ani pawh a chau ve deuh nen a chhing zui ta vang vang a. 

A tuk aṭang chuan nitin Nguri nen chuan intext loh lai an nei lo tih theih a ni, chanchin pawh an inhre pawp chho zel a, Nguri pawn chawlh lâk vata a nu va hruai a tum thu te, tuna Aizawla mi in hnuai luaha a khawsak thu te leh a u te nen an inbiakna thu thlengin a hrilh ve zel a, Sangliana pawn an chhungkaw chanchin thenkhat pawh a hrilh chho ve zel a, inhmu miah lova thla chanve dawn nitin an han inbiak takah chuan inngainatna bakah eng emaw lo piang a awm lo thei ta lo. Feelings an nei ve ve a, mahse, a tu ve ve mahin hetiang nulat tlangvalna lam hawiin thil an la sawi dun ngai hauh lo. Inbia tihah khan mi hman deuh deuh anga inbe nilêng zankhua an ni ve lem lo, an hna tur, an tihtur an inhrilh tawn a, chaw ei tui chu muttui tihin a zawm châng pawh a awm. Mahse, a tho hmasa zawk Nguri chuan ‘Morning’ tih a ṭhulh ngai miah lo,. Nguri morning wish hmu lo thut ta se Sangliana buai dan tur chu..aw..a thleng ngei alawm, Sunday zing a ni a, Sangliana harh chuan a phone a han bih nghal a, Morning tia lo hmuak ziahtu hming zawn chu a ruak ta tlat! Makti zetin a han ennawn leh ngial a, a danglam phah chuang si lo. Amah zawk chuan, “Morning, ka thawh khalh che ni maw?” A va ti a. Tukthuan an ei kham hnuah pawh a seen thei ta reng reng lo chu Sangliana a buai ta. A chhungte hriat a hlau bawk si, bathrooma a awm laiin a call ta a, a la tlang thei lo zui ! Eng thil nge Nguri chuan a tawn tak ang le? Tlai ngai miah lo kha a tlai satliah lo, biak theih lohin a awm tlat si. Phur fahran loin a inkhawm ta poh a, a ni leh ni lo angin Nguri ringawt chu inkhawm chhung zawng a rilruah a awm nia mawle..

Banah hmanhmawh zetin a phone a en, engmah a awm lo. Ngaihdan leh rindan tam tak a nei a, a awmhmunah a insawh a insawh ringawt mai a ni. Chutia a buai ruk em em lai chuan, Amuana leh Buanga te rawn lutin, “Lawmkima khawsik a sâng lutuk a, Serchhip-ah an kalpui dawn, Pu Zauva thlaphângin zui ve turin min tia, insiam rawh.” An rawn ti a, an hmanhmawh nasa mai. Sangliana pawh a va insiam sawk sawk a, Nanui chuan, “Nizana an ruang hmuh vang kha mawni le..Rotea pawh hi ka ngaihtuah riau a ni.” A lo ti a, Rotea erawh a inkhawm ban khan Muana te inah games an khel nghal kha a nia. 

“Nih pawh a ni maithei, a zia lo êm mai, Lawmkima chu ka khawngaih reuh, an la nau ve deuh bawk a ni. “ Buanga chuan a lo ti ve a. 

Sangliana inpeih hnu chuan Dina sawm phei vein an pali chuan Serchhip lam panin an tlan ve ta vang vang a. Lawmkima chu a lo serious viau mai a, an lo admit nghal bawk. Damdawiin kawtah chuan amah ngaichângin an khaw ṭhalai eng emaw zat chu an ṭhu dul mai a, Lawmkima chhungte tan chuan a va thlamuanthlak dawn èm..mizo nih hi chu a lo nuam a ni e. 

Lawmkima a han zia deuh takah chuan Lawmkima chhungte ngenna angin thalai lam pawh chuan an haw san ta a, chanchin inhrilh zel tura inthlahin an invailiam ta a ni. A bike khalh lai chuan a phone a rawn ri ṭung ṭung a, a hnunga thu Amuana bulah chuan la lawk turin a hrilh a, “Tu nge?” A tih chuan, “Nguurrrtin..” a tih rual chuan a ding nghal chawt, “Khaw maw” tih leh phone chhuhsak a rual a, a bengah a chuktuah nghal. “Khalh rawh” tiin Amuana chu a hrilh zauh a, a hnungah amah chu a ṭhu nghal. 

“Ka ngaih a tha lo hman alawm, chanchin lo sawi ve tur alawm” a ti a, a aw pawh a vin ve lek lek mai. 

“Nia, ka zin thut sia, kalkawngah signal ka lo nei bawk si lo va, sorry lutuk. “ A rawn tih chuan a thêp leh suai suai, mahse, nêm taka lan chu a duh bik lo va, “Reh thut dawn pawn inhrilh lâwk tur..” a han ti ngawt a, Amuana a lo khek tuarh, “Ka sawi awmzia chu, reh thut loh tur” a ti leh hnuhnawh. An tlan laklawh avangin an inbiakna an titâwp ta rih a. Nguri chuan remchang a hmuh awmchhun a nih avangin zing dar 4 bawr velah an khaw motorin an khaw lam panin a lo zin daih a niawm a, mutchhuak chunga kal a ni bawk nen, phone pawh a lo ngaihven hman bik lo a ni. An khua hi chhim lam daiha awm a ni a, tuna an inbiak khan an thleng deuh chiah a niawm e. A hlat tham vang a nia chawlh la lova zin a remchan loh. A nu chu va hruai chhuak thei tak ang maw..

“Taia, Master Degree lam hi i tintuah ta vak lo nge? Hnaruak te hi i ngaihven lutuk bawk si lo va..” a pain a tih lai chuan a nuin, “Sipai chu ka remti tawh lo a nia” a lo ti vat. Nanui lah a nau a nih vanga ngam ta reng reng chu, “Awii, ṭang duh mah se, long jump leh High jump-ah a tla nghal ang” a lo ti a, Rotea nen an nui tet tet. A chhan an hriat vang a nia, ni e, Long jump hi chu a ti ve thei sawlh sawlh a, high jump hi chu an pawh luih takngial paw’n duh loh rai ang maiin a tûm khum bûr a, tuman an zuantir thei ngai lo. Sangliana chuan, “Sipai lam chu ka ti vak lo, B.ed te hi ka zir ve dawn mawni ka tia, D.el.ed te pawh” a lo ti a. A nu leh pate enrawn a ni tih a inhre ve a,  a hmalam hun hi a ngaihtuahin a rilru pawh a buai ve fat fat thin khawp a ni. Mahse, tunah chuan thildang han zir leh dawn pawn a laklawh chho rih si a, kumthar lama eng emaw tak thiltum neih chu a tum ru ve kar a ni. Lawmkima pawh an hlauhthawn ang aiin that lam a pan chak a, khawtlang pawh an lawm hle. 

Nguri nen an inbiak chuan, “Ka u te chuan an remti lo nasa khawp mai, ‘Ka pa lu nghahna in hi i chhuahsan a nih chuan uirê chhuahin i chhuak ang. A lung êm pawh kan la phun lo va, i ti ang lo êm mai’ an tia, Patea te ho an lo fuihpawrh kual vel bawk nen, ka rilru a hah e, Sanglian..” a rawn ti a. A aw a thâm sa avangin a ri chang chang chauh. A lungchhia tih a hre thei. 

“Ṭawngṭai rawh, Ṭawngṭai ang hmiang..” a rilrua rawn awm a sawi thut a ni ber mai,. Hnem dan a hre ngang lo a tin ni. Buaina a tawh apiangin Nguri chu a hming lamin a tawngtaisak thin a, tunah pawh chu bak chu hmanraw dang a hre thlawt lo. Nguri chu a thaw hak a, “Ka ṭawngṭai thiam lo” a ti ta mai. 

“Thiam a ngai lo, i natna, ka bula i sawi zawng zawng kha Pathian bulah sawi vek la, i buaina chinfelpui turin ngen tawp rawh, keipawh ka lo ṭawngṭai ang. A ṭha em? “ Thutak zet hian a ti a. Nguri insut hraih chu a hre nghal,. “Nguri, i thei alawm, hlawhchhama hawn i duh loh chuan tawngtai rawh.” A chhungrilah nawrtu nei et et ang hian a awm a ni ber mai. Pathian hnathawh a nih ngei pawh a ring. Nguri pawh chuan, “Aw le, ka lo be leh ang che.” A rawn ti ta a. Ani pawh an chhungkaw ṭawngṭaina bîk pindan te tak tê-ah chuan lutin zawitê hian Nguri tan chuan a ṭawngṭai ta mial mial a. Hei hi a ni Sangliana nuna duhawm leh mawi êm êm, amah a landan aia langsar, a duhawmna leh hmelthatna aia parmawi leh vûl thin chu. 

A phone chu a rawn ri leh ral ral a. La vatin, “Aw ,Ngur..” a han ti a. 

“Ka veng hawk mawle, ka lawm e aw..” a rawn ti thawp sat a. 

A nui sak a, “Keipawh ka lawm, hun i ngah tawh lo va, tawngtai tam a ngai a nih kha, helamah pawh ka lo tawngtai zel ang. “ A ti a. Hmeichhe thenkhat chu nise, ‘Inla christ lutuk, ‘inla eng emaw’ an ti ngei ang mawle. Ngurtinsangi erawh chutiang a ni ve lo..a nu tawrhna hi a tihtâwpsak thei a nih ngai chuan a hlawhtlinna phêna langsar ber tur mihring chu LALSANGLIANA a ni ngei ang le..

Cont..