zochampuii 9

ZOCHÂMPUII (9)

Ziaktu : Toni Râlte

Lateii chu a tawlh hnung hrat a, naupang pahnihte lah chuan thlanmual mawng lama thlan lunga hming inziakte chu an chhiar lâwng lâwng a, an rawn ngaihven hauh lo. Lateii chu Muanawma chu a melh kar mai a, a thlabâr hle tih a hmelah a lang, Muanawma mitmeng lah a vawt raih a, lungpui sut zawh rual loh hmel a pu bawk. 

“Muanawm, eng nge maw i hriat le? Engmah ka ti lo.” A ti ṭial rian a. 

Muanawma a nui hawk, a zat vang erawh a ni hauh lo thung. “Ka hriat loh eng nge min zawt zawk ta che.” A ti ta khalh a. A awka chhuak reng reng chu a khalin a rum êl âwl hle a ni. Lateii tan pawh han dodal ngam chi niin a lang lo. 

“Ka haw dawn” tia kal a tum mai chu Muanawma a che zawk a, a hmaah tak a va ding siah mai. Kal luih chi a ni lo tih hriain Lateii pawh beidawn hmel zet hian a thaw halh a, Muanawma chu melh zawkin, “Aw le, ka hrilh ang che.” A ti ta a. Naupang pahnihte chu koin, “U Muanawma rual hian ka rawn haw dawn a, lo han haw rawh u, hla in zir dawn kha..” tiin a hnar haw ta a. Senteii thlan hung chhungah chuan inhmatawna ṭhu dun ranin rei fê chu an ngawi vang vang a. 

“Le..ka ngaithla e” Muanawma’n a tih chuan, Thawk la leh hawk hawkin, Lateii chuan, “A hmasa berin Seni kha khatia amah leh amah a intihhlum mai kha ka ring pha bik lo tih hi lo hre phawt rawh. Ka beisei phak bakin a che a, kei pawh tun thleng hian nun thlamuanna hi ka la nei lo asin. Nang ai mahin ka nun a hrehawm zawk ang. (A aw a thian kharh a) Chuan, ni e, ka u te inneih hma khan Champhaiah ka zin deuh reng tih i hriat kha, Vena nen kan inngaizawng tih pawh i hria. Vena cousin Sawma nen khan kan inhmuh phat atangin kan innêl nghal em em a, kan titi pawh a rualin engkimah kan inang ti mai ang,.Vena pawh khan a thîk lek lek hial thin. Tichuan, ka û te an han innei a, Seni kha ka thiantha ber a nih avangin ka hruai ve a nih kha. Khatiang thil kha a tawng ang tih ka ring bik lo. Tichuan, Seni’n Sawmliana a hmuh hma hauh khan Sawma’n a lo hmu tawh a, chhe lo a tih thu te ka bulah a lo sawi luam tawh. Mahse, bialpa a neih thu thlengin ka hrilh a, a beisei zui ka ring bik lo. 

Chuan, khatia inneih party lawma kan sahâwk lai khan Sawma chuan ngaihtuahna tha lo deuh a lo nei a, Seni lah ze zâwi chi tih takah  khatiang ri hut hut kha a ngaithei si lo va. Kei pawh Vena zu rui ka buaipui char char,. Vena lah a chatthla ta hmak si, ka thinrim viau nghe nghe. Sawmliana’n  motora Seni a kuah lut lai chu ka va hmu a, hâwkdâk thuhlaah ka va pan a, Sawma lah a lo rui ve tawh nen, motor tukverh glass chu a lo up theihnghilh nge ni, a car dahna kha a fâl hrim a, midang chuan an ûksâk tehchiam lo. Rilru dang ka pu ta thut a, Sawma chetla lai chu a rukin ka cover ta a, car chhung a ên deuh ruai avangin fiah vak lo chuan an lang thei, tin, amah Sawma khan camera a lo kam ru ve reng tih ka hre miah lo bawk. Ka tum dan dik tak chuan, Sawma te an neinung tih ka hria a, amah backmail-nana hman ka tum a ni. I hriat angin kha chen khawpuiah kan lo chetla ve tawh a, kan intichangkang ve laklawh a, fashion-ah kan mit a var ve tingtang si, kan khua atang chuan changkan a har si, chuvang chuan a nia pawisa ka mamawh ni. Sawmliana zawh hma khan ka kalsawn ta a, Seni thawmhnaw haktirtu pawh kha keimah vek a ni. Engmah hre lo angin ka awm thung. Tichuan, a tukah Seni kha ani khan a lo vau ve leh ta si. Seni lahin kan hriat a hlau em em a, kei lahin engkim ka hre si. Ka inthiam lo tho nain, dik tak chuan Seni kha a tirah a rui ve emaw ka ti tak tak,. Nangmah ngei pawh rawn hrilh che ka tum ut ut hman a, mahse, ka ṭhulh leh ta zawk a nih kha. Tikhan, a mizia a hloh ṭan ta a, a chhan ka hre si, hrehawm ka ti thei lutuk. Mahse, Sawmliana ka vau a, pawisa pawh sing 2 leh 5000 lai ka hmu thei ta a, ka duhâmna khan chintawk a nei ta lo va, Sawmliana kha ka rin aiin a lo fing a, ka la vau kal reng dawn tih a ring thiam nge ni, Police hrilhah min vau lêt ta daih zawk a, Tin, Champhaiah rawn zin lehin Vena hriat lohin kan inhmu ta a. Tah chuan, kan inhnial hrep a, thahah te hial min vau a, kut pawh ka tuar nasa, A nau pasal police a pun tur thu te nen lam min vau tak avangin kei lungmawl ve tak chuan ka hlau ta em em a, video pawh chu ka delete ta nghal a. Zu min in luihtir a, ka ruih hnuah min pawngsual ve leh ta a ni. Min pawngsual lai video pawh chu a cover leh ta ngei a, min vau nan a hmang zui ta nghe nghe. Ka mawl luat ka tuar lo a ni ber e.

“Ka tan i hnawksak tawh dawn loh chuan, ka ti leak out lovang, mahse, hei hi i ti tur a ni, nakinah Seni hian thudik puangin ka lakah case an file maithei a, chutih hunah chuan Police kuta ka awm rual rualin Seni nena kan video kha i lo ti viral tur a ni. Chu chu i ti lo a nih chuan nang leh keia video pawh hi ka thian pakhat ka pe ang a, ka tih viral tir ang. .” a ti ta a. Min dai khalh hneh ém avangin ka hnial ngam si lo. Tichuan, a sawi ang chuan Seni ten FIR an thehlut tih ka hriat zan la la khan video chu ka tlangzarh ta a, fake ac siamin Facebookah ka post a, ka ac pawh chu ka deactivate lehnghal. Facebook lamin remove-in min block nghal mah se, lo save hman an awm bakah messenger atangin ka hriat ngai pawh ni lo ho ka thawn ta bawk a. A chhe lam a ni bawk a, a viral chak khawp mai. Tikhan Sawma chu thiam loh chantir a nih ka ring a, kei pawh ka zalên tawh turah ngaiin ka lo lawm hman a. Mahse, Senteii a inawkhlum a, nâ ka tih em em laiin Sawma’n thiam a chang tih ka hre leh ta zel a! Thih ve daih kha ka châk lutuk. 

Seni kha keimah vanga intihlum a ni tih ka pawm alawm, vawiin thleng hian a hremna pawh ka la hmu mek rêng a ni. Sawmliana chuan ka video zawk kha min vau nan a hmang zui leh ta zel a, ka chawh ngawt mai. Thian phatsana hnuchhawntu tawrh tur chu ka tuar ta tlawk tlawk mai a ni. Aizawla ka zin apiangin nawmchen nan min hmang a, hun a lo kal a, chutia mudun ta fô reng mai chu nau hial ka pai ta a, amah Sawma nen ngei kan titla nghe nghe. A fa hial ka pai takah chuan Sawma chu ka haw reng thei ta hauh lo mai a. Kan lut thuk tawh sa sa, kan tihsual kan inhriatsak ve ve bawk nen tiin a rilru hneha min nei tura a siam ka tum ta a. Mahse, ani chuan kei thingtlang nula satliah chu eng atanmah min lo ti awzawng lo va, Bmi kha a ngaizawng ta a ni. A tawi zawngin, Bmi nen an innei dawn tih ka hriat khan ka rilru a nat bakah ka thinrim em em a, eng nge ka tihtheih ka entir ve ang tiin ka intihuaisen lui a, Aizawl ka zin ṭumin nu pakhat phone ka ruk sak a, chumi sim card hmang chuan Bmi kha thudik ka va hrilh a nih kha,. Tin, Sawmliana pawh ka vau bawk. Tu nge ka nih a hre si lo. A tirah chuan keimah min ringhlel a, kei lah ka lo insawi fihlim thiam si,. Seni a pawngsual lai video ka neih thu ka hrilh a, Chutihlai chuan Sawmliana bulah ka phone a chhiat thu leh ka siamtir thu ka hrilh zauh a, a hnu lawkah, “Seni nen kan video i lo lak ruk zawk kha i delete taeh emaw ka tia” a rawn ti a. 

“Delete e, ti nge?” Ka va tih chuan, “Khami video hmang khan tu emawin min vau a ni “ a rawn ti a. 

“Ehe! Ka google drive-ah a lo la awm a niang a, ka phone siamtirna te khan an hmu a niang.” Ka ti ta daih a. Tah kha chuan min ringhlel zui ta lo. A rilru tihbuai ve hrim hrim ka duh bawk a, a buai ta reng bawk a,. Mahse, pawisa tih vel engmah ka phut lo. Ka duh ber inneih an ṭhulh tawh a, kei pawn sim card chu ka hmang zui ta lo a ni. ..chu chu a ni e, thudik chu..” a ti ta dap dap a. 

“Mahse, Engtin nge Vena khan kha number kha a kawl theih?” muanawma’n a tih chuan, “Aw kha kha Vena ka biak ngei ngei a ngai sia, ka sim pakhat zawkah signal ka nei si lo, a chhinchhiah chuang lovang tiin khami number khan ka call ta tawp a, ‘Hei kan mikhualte phone ka rawn hmang, save duh suh. ‘ ka tia..a lo save tho a nih awm chu..” Lateii chuan a ti leh ta a. Muanawma chu a ngawi vang vang, a hmelhmaiah engmah a lantir lo. Lateii pawh chuan sawi tur a nei tawh lo nge hnuai lam a bih ngawi reng ringawt. 

“Aw le, Late, kal tawh rawh,. Eng nge ka tih dawn tih hrilh hriat kher che hi ka ba lo ve..” a ti chhum hmak a. 

“Muanawm, i duh phawt chuan min that rawh, ka phu alawm. Seni kha ka ngai thei lutuk, Ani chuan min ngaihdam theih pawh ka ring lo. Nang pawh i ngaihdamna ka dil dawn lo che. Ka zak a, hrehawm ka ti ngawih ngawih a ni..” Lateii chuan a ti a, a mittui chu a hru zauh zauh bawk.

“Tunah chuan keimaha awm ka duh. Kal rawh, haw rawh” a aw chu a hlauhawm kher mai. Lateii pawh a ranga rangin a kal ta nal nal a. Muanawma erawh Seni thlanah chuan ṭhu rânin a melh ngai a melh tlawk tlawk a. A hui leh pap thin. A thiltumah a chiang a, seni nu leh pate biak phawt erawh a duh. Lateii chu Seni nen an tan khan ṭangkai thin viau mah se; a thiltih rapthlak takte avangin hremna hmachhawn erawh a phu a ni. A bul ber leh a kaikuang ber chu Sawmliana a ni tho tho,. He mihring hi chuan dam pawh a phû lo. Muanawma châk ber chu Sawmliana nena insual a ni tawp mai, a mipatna rilruah chu bak thildang a leng thei mawlh lo a ni e. “Sente, i lo hmuin i lo hria ang tiraw? A tawp ṭep tawh a nia..” a ti sup a. A mittui lo hnâm chu khap pek sakin a tho a, ding takin Pu Ruata, Seni pa te in lam pan chuan thlanmual chu a chhuahsan ta a. 

Champuii erawh a tuka a haw tawh dawn avangin a insiam a, a û-nen an titi pah bawk, “Rawn kal ve chakawm viau mah se, Bawihteii te school an kal dawn sia,. Weekend-ah a remchan chuan kan rawn kal ve ang. “ A u chuan a ti a. 

“Nia, a khawharhthlak loh deuh ang chu” a lo ti ringawt. 

“I bialpa nen chuan in inthen tak tak em ni? Engmah chiangkuang tak hian min hrilh duh mang si lo..” a u chuan titau lek lek hian a han ti a. A u melh zauhin, “Then e, kei aiin a naupang sia, a buaithlak em mai, bakah ngaihzawng neih hi ka peih tawh lo. Nakinah fa nei leh la, chu chu ka inlak daih mai ang..” a ti ta ngawt a. A u lah chuan, “Nau hi ka pai leh thei ang e maw le..ka indang tawh si lova, ka rai thei tawh lo a niang” a lo ti ve a,. A la insiam lo nachungin tuna an fa naupang zawk Mampuii pawh kum 5 a ni ve tawh a nia, pai ve tawh awm tak chu a ni. 

“I pai ve leh mai ang,. Pasal neih pawh hi ka peih lo kei chu. “ Beidawn hmel lek lek hian Champuii chuan a ti a. 

“Chutiang sawi suh, Pathianin i tana a ruat chu i pumpelh thei miah lovang” a u chuan a lo ti malh malh a. Ni e, a tana Pathian ruat chu tu tak ni ang maw..?

Muanawma pawh Pu Biaka te inah a ṭhu ran mai. Seni nu chuan thingpui a rawn pe vat a, “I lo zin daih a, i exam te chu i ti ṭha em?” A ti sawk sawk a. “Ṭha ve pangngai a ni mai e. In lo dam ang chu tiraw?” A ti ve luam a, Seni û hian nupui nei ve tawhin fa pakhat an nei ve tawh a, tunah chuan an nute khua Biate lamah an zin rih a niawm e. Pu Biaka te nupa leh Seni te upa ber fanu a tette atanga an awmpui chu an ni deuh tlawng rih mai. 

Pu Biaka chuan Muanawma hmel a han enin eng emaw dik lo awmin a hria a, “Muante, eng nge rilru hahna te i nei em ni? I buai hmel riau mai. “ A lo ti var a. An nu pawh a bulah a ṭhu ve nghal. Muanawma chuan a aw a han thian kharh kharh a, “Ah, englo ania, Pa Biak, Senteii chungchang thil a nia, sawi ṭan dan tur pawh ka hre chiah lo. Englo a nia..” tia bul han ṭanin, Seni thihna leh pawngsual a tawh dan vel a chhui ruk thu te, Aizawla a thil va tih dan leh a tawpa Lateii inpuanna te chu a sawi ta vek a, a sawi zawh meuh chuan a thingpui pawh a lo dai diak tawh. Chutiang thu an han hre leh meuh chu Seni nu leh pate chu an sen âwp awp a, an rilru a na thar leh hle tih a lang. Chubakah Lateii ber kherin chutiang a han ti duh mai chu nâ an ti zual niin a lang. Seni thiantha ber anga an ngaih kha an fanu timualphotu a ni ta mai si, mahse, a kaikuang ber Sawmliana a ni tih an hai bik lo. Pu Biaka chuan a tarmit siamrem pah chuan, “A ni maw? Muante, a zia lo hle mai, a rapthlakin thinlung a tina zual ngei mai. Chuti tak chuan a ni maw kan fanu kha i lo hmangaiha i lo ngaihhlut le..kan lawm takzet a ni. Ni e, thin hi a dam thei lo va, Sawmliana khatia thiam changa a han chhuak khan min vilh ngut ngut a ni ber e, mahse, hei thudik kan han hre ta a, Mateii khan dâwt ngialngan zawng min hrilh kha ka ring miah lo reng a ni. Engpawhnise, engtia hmalak lehzel nge i rilruk?” Tiin a han zawt a. An nu erawh chuan a mittui a hru a hru mai. 

“Lateii inpuanna zawng zawng kha ka record vek a, khang bak kha evidence kan nei rih lo a, tin, court pawh thleng ila Lateii hi a inthiam loh êm avangin thuhretu-a ṭan a hnial ka ring lo bawk a. Aizawl lamah karleh lamah ka zu chhuk leh ang a, Police kutah ka thil kawl ang angte hi ka thlen mai a niang chu, ka duh ber chu Zoram mipuite hian Senteii an ngaihdan kha thlak se, rorelna dik hmu se tih hi a ni mai e..” a ti charh charh a. 

“Kei pawh ka kal ve dawn nia, Mateii’n rorelna dik a hmuh theihna a nih dawn phawt chuan ka neih zawng zawng pawh hi ka thâp ngam..” Pu Biaka chuan a ti hmiah mai. Chutiang chuan thu chu an titlu ta phawt a, Lateii pawh hruai ve an tum a, Muanawma’n a lo hrilh hre dawn a ni. A kal duh lo a nih vaih chuan Muanawma chuan tihmualpho hmiah pawh pawi a ti lo. Sawmliana bulah a zuk thlen leh vek hman êm lovang chu..rilru thawveng, ipik ru tho si chuan an in lam a pan ve ta a. Senteii thubuai chu a fel mai theih a beisei, tunah chuan thil pakhat chinfel tur a la nei, Zochampuii chungchang chauh a ni ta. A tukah a rawn haw dawn a, ani Muanawma lah thawhlehni-ah Aizawlah a zin leh nghal dawn si,  Zan khatah an buaina te chu a chingfelin thutlukna dik a siam thei ang em tih a hre lo. 

Champuii pawh muhil thei lovin a let sek a, a tuk maiah a haw dawn chu a nia, Muanawma nen an inhmachhawn ngei dawn chu a ni si a, eng thu nge maw a han sawi ang aw..a nunhlui engkim a hre tawh a, ngaihdam dil erawh a tum hauh lo. A chhan chu khang a nunhluiah khan Muanawma’n tel vena a nei lo va, hriat pawh an la inhre lo va, Muanawma thunun theih a ni tlat lo, a pawm thei ta lo a nih pawhin a chantawk khuarelah ngaiin hlim taka nun zui a tum tlat tur a ni. Mipa pathum hual velna hnuaiah a awm mêk a, pakhat chu Joela, vawiin thlenga a nun tibuaitu, ani kha tawng lo se Muanawma nen buaina an hmachhawn a ngai lo ang a, tin Joela nen khan an innei hial tawh maithei bawk. Pakhat dang leh chu a khawngaih, a hmangaih si loh Zothana a ni. Ani hi chu a mizia a duhkhawp lo tih mai lohah chuan a tan a ṭha a, hmel leh khawsakah phei chuan a phû lo hial awm e. Mahse, Muanawma vangin a tina miau si a. A pathumna chu Muanawma a ni, ani hi a hmangaih leh hmangaih loh a hre rih hauh lo nain Muanawma chet dan leh ṭawngkamin a nuna nghawng a neih nasatzia a hriat takah chuan a lo hmangaih tawh reng em mawni le tih chang a nei. A rilru chu ama tawkah a buai ve khawp mai. Tih vak dan lah a hre si lo. 

Muanawma pawh Champuii status en leh zuk zuk pahin ngaihtuahna a hmang kual leh hle. Naktuk zanah chuan an inhmachhawn ngei turah a ngai a, mipa zawk a ni a, a ṭawng hmasa zawkah a ṭan a ngai tih pawh a hria, Champuii chhanlet dan aziri a ni tawh mai ti ten a han inhnem thul. A phone a rawn rik takah chuan harh chhuak zawkin, “Aw..Nupui” a ti sup a. 

“Champuii nen chuan eng nge in chanchin?” A rawn ti teh daih a, a vei hle a nih hmel e. 

“A lo la haw lo va..naktukah a lo hawng ang, Chuan, tuesdayah ka rawn zin leh nghal dawn, kan bawhzui tawh dawn..” a ti a. 

“I va che chak ve, Champuii chu i then dawn ta em?” A rawn ti leh hram a,. “Ka hre lo. “ A ti bul hmuk. 

“Hre ta che, mipa i nih kha, ani khan a phu lo che, ani aia ṭha kha i phû” a rawn ti tân tân a. 

“Champuii ai chuan tuna kan buaina hi a veiawm zawk alawm, ani chu ngaihven suh, ka chingfel mai ang. “ A lo ti nghut a, Lehlamah Nupuii’n then tura a han nawr deuh hlek chuan a lungawi lo lek lek zawk zel, a chhan pawh a hre lo. 

“Chuan, number neitu chu i hre tawh a maw? Engmah min rawn hrilh si lo” Nupuii pawh chuan a rawn ti ve a. 

“Hre tawh e, ka rawn zin hunah le, engkim a tluan beisei phawt ang. U BMi chanchin i hre ngai em?” A ti ta daih a. 

“A la ngai reng ni maiin ka hria, Sawmliana pawn a ngaihven tawh lo a niang..e chuan, Sawma û kha damdawiinah chuan a la awm a, zia chu a zia deuh hlek tawh a niawm e. “ A rawn ti duah a. 

“A zia kha alawm ka duh ber, a nauin jail a tansan dawn sia” a nui hul hak a. 

Tukṭhuan ei khamah Champuii leh Zawma te pawh Bungpui khaw lam panin an tlan ta vang vang a. An titi nasa mai, “I û hi chu maw, a chang chuan ka tlawn deuh thin. A thin hi a rim ve mai mai ngai lo va, a rim tawh vek vek chuan kar khat te a daih a, ka be ṭawng zo ngai lo. Hahthlak a nia..” Zawma chuan a ti nang nang a, Champuii chuan nui chungin, “A nulat lai pawn a ni tho alawm , tihthinrim kan hlau ṭheuh zel..” a lo ti ve a. 

“Zothana hian a duh ve tak tak chein ka hria, ti nge maw i duh theih tlat loh le..” Zawma’n a han tih leh chuan, “Aa..duhzawng ka nei ve khanglang a, a buaithlak a nih hi” a ti ringawt. An tlan muang lem lo bawk a, an rin ai daihin an thleng hma. Champuii khan in chungah chabi a dah a, Ziri’n a lo tihfaisak thin a, a fel reuh ngawt mai. Hahdam takin an thleng thei a, in chungah Thingpui an in a, Zawma pawh chawhnu lamah tal hnaa kal a ngaih avangin awm khawmuang lovin a lèt leh ta a. Champuii pawh a inah chhukin a inrem fel nghal mawlh mawlh , a chau em em hran lo bawk. Zari leh Lucy te tlaiah an rawn leng nghal vat a, Champhai atanga a thil hawnsakte chu a lo pe ve a ,an lawm thiam ngei mai. In chungah chaw a ei dawn tho a, rawngbawl a ngai lem lo. 

“Rinmuanawma induhzia chu a..kan inhmu thuak ringawt chauh, a chhuak ngai lo nge pawh ka hre lo..” Lucy chuan a ti lang lang a. “A va mak ve” champuii chuan a ti ringawt. 

Zari erawh chuan Champuii vengthawng takin, “A damsam chiah lo a niang, U Saii khan a sawi tlat..bakah a lenna ber nang i lo la haw bawk si lo va” a lo ti a. Champuii erawh a ngawi reng. 

“Bawiha, Champuii pawh a lo thlen tawh kha, Zanin chu kan leng ang chu tiraw?” Lawma’n a rawn ti zur zur a, “Nia, kan tum dawn nia, ka rawn sawm ang che. Mahse, hun thawl ka duh dawn a, Kima pawh hrilh nghal rawh aw” Muanawma chuan a ti a. A tuka a zin leh tur thu erawh a sawi duh rih lo. Lawma nen an inbiak zawhah Lateii a call a, “I insiam fel tawh em? Kan motorin kan kal dawn tho a, hmanhmawh uchuak a ngai lo a nia” a han ti a.

“Ka chhungte hian an hrethiam chiah lo va, mahse, ka sawi mam thei hram e. “ A rawn ti. Nia, zinna tur chhuanlam te hi anni ang tan chuan a ngai ve thin si a, ‘Ka thiannu nau a boral a, min rawn chah nasa sia, zan 2 khat riakin ka kal ve mai ang, pawisa pawh ka kalna senso tum vek a inhuam a,.” Tia a ngen nasat êm vangin an phalsak hram a ni, a kal chhan diktak te chu hria nise mak an ti ve khawp ang le, Muanawma thu a hnial ngam loh chu thuhran, Sawmliana laka phuba lak a chak em em bawk a ni. Kha chen zalên lo leh hlauthawng reng rengin hun a lo hmang tawh a, tunah chuan a hun a thleng ve taah a ngai, tin, hetianga a tih hian Muanawma bakah Seni chhungte chuan an ngaihdam theih a beisei bawk a ni. Muanawma chhungte paw’n zin leh nghal chu an ngaithiam fahran lo va, mahse, “Thianthate berin nupui an nei dawn si a, ka lan ve loh chuan a vui nasa dawn lutuk, ka châm rei dawn chuang lo..” a tih tlat avang chuan an hnial hreh ve ta deuh a, engkim thudik zawng zawng hrilh vek mai tur em ni zawk aw a ti hman a, hrilh se a pate pawn an dan chu a ring chuang lo, mahse, a nu ber hi a hlauthawng leh vak ang tih a hlau a ni ber mai. Chuvang chuan dâwt a sawi leh a ngai tlat. An cham rei dawn lo bawk a, an remti ve ta hram kha a nia. Champuii ina leng tur chuan a chhuak ta a, a zâm chuan a inhre lo naa, han sawi ṭan dan tur a bangbo a,  a ngaihtuah a ngaihtuah mai. Lawma leh Kima te pawn an lo nghak ran tawh a. Tichuan, muangmarin Pu Ruata in hnuai luahtu Zochampuii in chu an pan ta ṭhâm ṭhâm a. 

Lawma chuan, “In awm em?” A han ti lauh lauh a, “Lo lut r’u “ champui aw ngei mai chuan rawn tiin, an pen lut nghal. Muanawma chuan hnuna rawn dâwl a, Champuii chuan an lo kal a rin sa avangin mak ti hmel a pu hran lo. An han ṭhu fel a, “I lo dam a maw? Champhai i ngeih chiang, i rawn thau haw” Kima chuan a ti a. 

“Nia, ka chaw ei a tui ve deuh a, mahni chauh chuan eitui a har ve èm alawm..” Champuii pawh chuan a lo ti a. 

“In inzinsan rei dun lutuk a, in lai hû-in ka hria..” Muanawma leh Champuii melh tawn zak zak chung chuan Kima bawk chuan a ti leh a. 

“Rei vak mawni le..” Muanawma’n a lo ti nghut. “Champui, i thingpui lum in a khat tawh êm mai, a sen hâng ngat khan han lum teh..” Lawma chuan a ti a. Champuii pawh a tho tharh mai,. “Chutia hotuten in tihte chuan” a ti zui hlak a. Muanawma chu a ni leh ni lo angin a inhmuamûp riau a, Kima chuan zawitê hian, “Nui ve teh, in boruak hi a rit lutuk. “ A ti sur sur. 

“Ka nuih a za ringawt hleinem..” a lo ti si. Reilotêah Champuii pawh chuan thingpui chu a rawn chawi phei a, amah pawn a in ve nghe nghe. An in chhung chuan Lawma leh Kima ten an thingzaina hmun hrân thu ngawt an sawi a, “In ninawm, mahnia awm ka nih hi. “ Champuii’n a lo ti a, a hlauh hmel em em loh thung. 

An in zo ta maw tihah, “Ehe! Kuhva ka ak emaw ka tia, ka lo ak miah lo, Kim, hawh va lei lawk ang..” awmze nei fahrana Kima signal pah chuan a ti zauh a, Kima lah chuan, “Hei ka nei alawm” tih pahin a rawn phawrh nulh, Lawma chuan a melh rum ngang mai. “Meizial pawh ka nei lo, farstar lei ka duh, kal ang” tiin a pawt tho a, Kima kha a lo hrilh hre hmasa lo bawk nen, a hrilhhai hmel letling. An chhuak fel ta maw tihah Muanawma chuan kawngka chu a va kalh ta hmiah mai. “Midang kan mamawh rih lo” a ti sup a. Champuii hmachhawn zawng chuan a ṭhu ve nghal zat bawk.

Champuii pawh a zâm deuh niin a lang. An ngawih reng hnuah a mipa zawk na nâ na chuan, “Tichuan, engtin nge?” A ti teh tawl a. 

Champuii lah chuan, “Eng chu?” A lo ti hû bawk. 

“Sundayah rui chunga ka lo biak che avang khan ka tihpalh. “ A han ti ngawt a. 

“A thleng vek tawh a, a ho lutuk” a lo tihsan a. 

“Champui, i nunhlui i thup te kha ka hre vek tawh a,. Chu chuan min tina a ni. Pawi ka ti, hre lo law law zawk ila a ṭha tur a nia. “ A ti ta hawk a. Tlem chuan a thleng thui ta deuh. 

“Nia, i hria tih ka hria alawm,. Kha vang khan alawm ka mimal nun ka sawi ngai loh. Khati mai kha ka ni e, dâwt sawi ka tum lo. I hriat ang ang kha ka nih dan a ni. “ A han ti kalh kalh a, a zâmna pawh a kiang deuh hawk mai. 

“Mahse, ka ngaih loh phah miah lo che, ka thikthu pawh a la chhia, i lakah hian..ngaihzawng nei anga ka hriat phei che kha chuan ka â lo chauh. Tin, ka phur tirit zualtu thil dang a awm bawk a..” a ti a, a chawl daih. 

“Sawi zawm rawh..” Champuii chuan a lo ti sap a. 

“Nakinah le, naktukah Aizawlah ka zin leh dawn a, a hun a thlen hunah i hre mai ang. Tunah chuan kan pahnih chungchang chauh sawi ang” Muanawma chuan a ti thawp sup a. 

“Aw le,..sawi vak tur pawh ka hre lo.min hria a, chiang takin min hre tawh a, insawithiam leh insawifiahna tur engmah ka nei lo. Thutlukna chu i kutah a awm. “ Champuii chuan a ti dam dap a. 

“Champui, kal ta ila min dem ang em?” Muanawma chuan a ti hlawl mai, Champuii chu a na zawk thei, mahse, intipachangin hlim hmel a pu lui hram hram a. “Engvangin nge ka dem ang che, nangin tihsual i nei hleinem..min tawng hi i tihsual awmchhun chu a ni e” a ti thei hram. 

An rilru ve ve chu a inpersan deuh a ni. Muanawma beisei dan chuan Champuii chuan tlawm takin a lo dawngsawng ang a, a thil lo tih leh sulhnu te avanga pawi a tih thu leh inchhirna thu hmangin a thinlung hneh a tum turah a lo ngai a, mahse, a lo ni awzawng lo, Champuii chu a hma ang thoa hmeichhe induhtawk leh inringtawk tak kha a la ni reng a, a hun liam tawha a sulhnute avang chuan kalsan nih pawh a pawisa lo, a inchhir miah lo tihna a nih ber mai chu..chu chuan Muanawma chu a tinâ a, tlawm a inti bawk. 

Champuii ngaihdan ve thungah chuan, Chutianga rawn leng lut tawh chu, ‘Champui, i nunhlui chu i nunhlui a ni a, sawi theih ka nei hleinem, bul ṭan thar leh zawk mai ang hmiang..” tia a hma ang boruak kha an neih theih a lo beisei ru kha a nia, a dik a dik chuan Muanawma hmel a hmuh phat khan a lo ngaihzia a hrechhuak nghal, a lakah thinrimin han khawng viau thin mah se; hmeichhe rilru no zawk a nihna laiah Muanawma thlah hlen tura a inngaihtuah paw’n a chhungril a na vawng vawng a ni..mahse, a tihdanglam leh siamthat theih tawh loh nunhlui chu engtin nge a phumbo tawh chuan ang? Hre tura a duh loh ber Muanawma’n a hre vek ta si a, tihtheih neiin a inhre tawh lo a ni. 

“Thutlukna siam harsa ka ti hle mai, mahni hmasial tak anga min hriatreng ka duh lo va, mahse, ka hma chu ka sial tho si. Ka hre lo awmdan tur. “ Tiin Muanawma chu a kun ngaih a. 

“Ka hrethiam che alawm,. Keimah vanga i hrehawm ka duh lo, tin, ka nunhlui kha midangin an hriat hun a la awm ang a, an hmuhsit che ka duh hek lo. Siamṭhatu ka ni thei lo va, pawi ka ti, chuvang chuan tihnat fô ai che chuan, hetia inṭha ṭhen mai hi a ṭha zawkin ka hria..” Champuii chuan upa zawk leh puitling zawk a nihna chu a takin a rawn lantir ta chiah e. 

Muanawma chu chhuat bihin a ngawi reng a, eng nge a ngaihtuah ang tih hriatthiam a harsa hle. Champuii paw’n hlauthawng ru takin a lo melh ve reng bawk a. Chutah, “Tihian ti ang, ka zin phawt ang a, chumi chhung chu ngawi rih ila, hun thawl insiamsak tawn ila, mahse, midang inneihsan lo thung ila,. Pathian ruat kan ni a nih chuan, kawng a rawn sial em em ang, chutah chuan innghat phawt mai ang hmiang..” Muanawma chuan a ti ta ta a. Champuii chuan, “A ṭha lawm, kei chuan midang i neih hma chuan tumah ka ngaizawng lovang..” a ti nghet charh mai. ‘ka tiam a che, ka ti a nih chuan..” a ti ve duah lo naa a thusawiah chuan a ding nghet ang tih a mitmeng leh hmel landanah chuan a fiah em em thung. Muanawma pawn, “Ka ring che alawm, keipawn midang neihsan che hi harsa ka ti ngawt ang. Mahse, tuilairap leh laklawh taka din dun reng loh kan tum dawn nia..” a lo ti ve a. Mi rilru sakhat ve ve, nunhluia ser lo nei tawh ve ve an ni bawk a, an thutlukna pawh mi nazawng ten an theih loh tur a ni hial ang chu, thinrim hmaisen inhmuh loin pangngai tak leh fîm takin hmaichhanah ngei an sawi dun a, an kum inthlauhna chuan harsatna a siamsak hek lo. Inthlahlel ru tawn si, tilangtu nih hreh ve ve si an nihna te chu lehlam zawng tak chuan a duhâwm angreng. A tuk maia zin tur a nih vang bakah sawi tur a vâng an ti ta deuh nge Muanawma pawh chuan hawn zai a rel ta a. Kawngka thleng a va thlah a, “Dam takin lo haw leh rawh aw..” Champuii’n a ti sep a. Muanawma pawh rawn hawiletin a nui sâng a, “Ka tum ang, lo inenkawl ṭha ang che.” A ti sup a, zawi muangin stepah chuan a pen chho ta a. 

A tukah chuan Lateii nen, Pu Biaka te nen chuan tukṭhuan eikhamah an khua chu chhuahsanin Aizawl lam an pan ta vang vang mai. Lateii chuan nuam lo a ti kher mai, Mahse, Pu Biaka chuan ṭha takin a bia a, haw âwm pawn a lang lo. Muanawma erawh a ngawi deuh hmuk, a ngaihtuahna a sawrbing ni maw..a tawi zawngin Aizawl an thlen chuan dar 9 a ri ṭêp tawh a, an thlen in turah a dah ve ve phawt a, a tuka inhmu khawm leh tur chuan an inthlah ta hlawm a. A nuteii’n a lo dawngsawng vat a, “I thianpate an inneih dawn thote chuan cham tlang hle hle mai tur a nia, i bialnu i ngai tawh hle a niang maw?” A ti fiam a. Muanawma pawh a nui ringawt. A intifai a, chaw pawh a ei peih tawh lo, a la puar bawk nen. A mu nghal daih, zêp nâk emaw Champuii a be châk takzet..mahse a insum hram hram a, inbiak rih loh rawttu kha a ni bawk si. A rilru tê têin, “Kei hian ka then thei dawn lo a niang a..Hmeichhe dang hian ka mit an la thei der bawk si lo” a ti nuah nuah mai. Nupuii pawh thil engkim a hrilh tawh a, naktukah an rualin a rawn kal ve dawn a ni,. Bmi an sawm tel bawk ang. A chau bawk a, a mutui kher mai. A mumang lah a nuam narawh e..

Ni e, pangpar tam tak zingah hian Senteii pipu uai lai hi ani chuan a lo thên a, eng nge an sawi chu hre chiah lo mah se, an hlim dun em em tih erawh a hria, a hnu deuhah Senteii chu a ding a, Pangpar vul chûkna tlang letliam lam pan chuan a tawlh hnung hret hrêt a, a kut a vai lauh lauh bawk, kha ta a nui hmel kha a ni a damlai pawha a hmuh nin theih ngai loh kha..umzui a tum a, a pen thei reng reng lo mai. “Min kalsan suh” tiin a au zui lawm lawm a, Mahse, Seni chuan uar taka a bân rawn vaiin mawi em em hian a rawn nuih leh a, a tawlh liam ta. Zinga a ṭhangharh paw’n a mumang kha chiang takin a la hre thei. A khi suk a, zing karah hian a ṭawngṭai ngai miah lo va, tukin erawh, “Lalpa, Pathian leh roreltu dik i nih ngai chuan, vawiinah hian hlawhtlinna min hmuhtir rawh, khawngaihin” tiin a ṭawngṭai a ni. Chhanin a awm ang em le..

Tukṭhuan an eikhamah chuan a insiam nghal a, “Vawiin chu bazarpui a phût ve sia, ka bazarpui lawk ang” tiin chhuanlam a siam,. A zawng zawng hrilh kher kha ṭul a ti lo a ni. Pu Biaka te a call a, Lateii pawh a lo inpeih tawh. Bmi an sawm phei leh a, Nupuii a front seat-ah a ṭhu vâng a, a hnungah anni pathum..an rilru chu inang lo tlang hlawm tak a ni. Mahse,tum thuhmun erawh an nei vek, Seni chunga rorelna dik thlentir chu an tum vek hlawm a ni. Police station an thleng a, Bmi hmelhriat an lo awm bawk nen, a tihzia kher mai. Tichuan, FIR chu thehlutin, Case IO chuan an statement chu a la ta diat diat hlawm a, Lateii chu a pawimawh ta hle mai,. Ani pawn zàm hauh lova a tihtur chu hlen a tum ve tlat. Kum a liam nual tawh naa, hetianga case tharthawh leh hi thil pangngai lo a ni hran lova, Police lam pawn engmah an sawi nawi lo. Sawmliana manna tur thupek chhuah nghal a ni ta bawk a, anni ho erawh Sawmliana an kuta a awm huna koh theih turin police station chu an chhuahsan ta rih a. 

A la hma tho bawk a tiin Bmi chuan phungthluin a patea te restaurant lama thil eipuiah a sawm hlawm a, an lo hreh hran lem lo. Tum thuhmun neia kal ho an nih avangin inhmelhriat ṭhat leh te pawh ṭulin an hre ve a ni mahna. Hlim takin an chawl ho a, Lateii chuan, Bmi bulah, “Ka tina che tih ka hria, hrehawm ka ti, mahse, kha thil ka tih loh kha chuan keimah hi ka inngaihdam theih ka ring tawh lo a ni..” a ti mawlh mawlh a. 

“Misual lak aṭangin min chhan chhuak zawk alawm, khatiang zawng khan ngai tawh miah suh..” Bmi chuan a lo ti thên a, he nu hi  a pui riau, a rilru ang vek hi pu ta ila Zoram pawh hi a nuam huai ang le..Pu Biaka erawh pa ṭawngtam lo tih takah a ṭawng ve mang lo. Thil an ei zawh hnu reivak loah , “Muante, ka û te tlawh lawk ka duh si a, a hla lem lo bawk a, koh ka ngaih thut chuan min lo call mai la, ka va tlawh ve lawk ang e aw..kan haw hun tur a hriat si loh a..” tiin a tho a, hrethiam takin Muanawma pawh chuan a lo buk khum zauh. 

Bmi leh Lateii te tui taka an titi laiin Nupuii chuan, “Champuii chu engtin nge?” A lo ti leh hmanhmawh. Ti nge maw a ngaihven em em le..

“Kan la inthen lo.” Muanawma aw chu a chang angreng hle. 

“Ngati nge? I pawm thei a maw?” Nupuii aw pawn ngaihno a bei tehchiam lo.

“Ka pawm theih mai a ngaih ka ring, a chhan chu midang ta ni turin ka phal tlat lo..” Muanawma chuan a ti dam ruih a. A mitmeng pawh a nung sar mai, chu chu alawm a buai rukna chu, Champuii hi kalsanin thlah ta se, midang ta nia midang nen an han awmdun tur a ngaihtuahin a ipik tlat,. A buai zel, chu chuan entir dang vak neiin a hre lo. Zochampuii hi a hmangaih a ni tih chauh lo chu..

Dar 2 bawr velah Police lam aṭangin call a dawng a..a la vat. “Sawmliana kan kutah a awm tawh e, in rawn hmu thei ang.” Tih thu chu..a khi suk a, “A tawp dan hlimawm ngei rawh se” zawi sup hian a ti a..