zochampuii 8

ZOCHAMPUII (8)

Ziaktu : Toni Râlte

A tuk chu a hawn tum ni mah nise, ngaihchan thil a la neih avangin a cham leh ta poh a, a nuteii ten an lo thlahlel ve bawk nen, Judy nen an bazar a, Judy hi nula hmeltha leh pian nalh tak, inkhaithli zeih zawih tak mai a ni a. Mahse, sawi leh sawi hnu a nu sawi ang khan pasal neih lam hi a rilruah a lang tlat lo, ngaihzawng pawh a nei lo niin a lang. A ngaihsak lo ve tawp, a pa ú te school-ah principal-in a thawk a, a hlawh pawh a tlem hran lo. Amah a intodelh miau a, mipa a mamawh lo ni berin a lang. In chhungah nise a lo lal tawh bawk si,. Muanawma nen chuan an inzui dat dat a, a titi siam siam reng bawk. “School chawlh lai chu nise rawn zin ka chàk asin le, chawlh veleh ka rawn zin ang, Ànunu (Muanawma nu) pawh ka ngai tawh, Au Saii nen lah kan inhmu khàt tawh si” a ti bawrh bawrh a. Muanawma erawh chuan kawnga kal chunga titi chiam hi a thiam mang lo va, a lo é aw liam ve mai mai ringawt. A rilru kil khatah a keypad phone switch on mawlh chu a awm a, a ak ran naa, a la on lo. Sim card hi black-a a lei a ni bawk a, chutimaia awlsam chuan an rawn chhui chhuah a ring lo deuh. Judy lah chuan lei tur a hre si, 2nd hand lah chu a thing peih fahran bawk nen, Muanawma chuan hawn vat vat a chàk ngei mai. 

2nd hand a thin laiin a bulah a lo ding ngawi run a, chutia an lo indinchilh lai chuan an khaw mi leh sa Hriati te thiandun nen an inhmu ta hlawl mai. Hriati hi Muanawma te ruala zin ve tho kha a ni a, a putea damlo awmpui tura an chah a ni nghe nghe. “Engtikah nge hawn i tum? “ An inti tawn a. “Naktukah” muanawma chuan a ti a, “Kei chu kar leh lamah daih a niang, putea a la tha hleithei lo va, chuti chu ka nute thil tur ka thawn ang che aw” Hriati chuan a ti mawlh mawlh a, muanawma chu a lo bu nghut ringawt. “I number ka nei tho a, zanah Vala ka rawn inthlahtir lawk mai ang” a ti a, an inkalsan ta rih. Chawhnu lamah an riltam tawh bawk a, thil an ei a, hawn lam an hnaih tawh bawk. Judy’n thil ei paha titi a vawrh laiin a rukin a phone chu a on ta a. Sms chu a rawn lut ta zut zut mai. Judy hmuh laia en chu a rinhlelh a hlau bawk si, “Ka va zung lawk” tiin a kalsawn ta zawk a. Phone an en chuan, “Tu nge i nih? Chutiang zat zat pawisa ka nei lo, police hnenah ka kal dawn, i duh duh ti rawh” tih te, “Inhmuhna hmun tur chu lo sawi ta si che” tih te a ni nuai mai. A rin aia hmain a chingfel dawn nge, “Zanin dar 10-ah Zemabâwk daiah..a hmun dik tak chu ka rawn sawi leh ang” tih thu chu a va thawn ta a. A phone chu a off zui lehnghal. A phurin a helhhawlh ngei mai. Tihlan vak a rem si lo. 

In a thlen veleh a inbual fai vâk a, a nu nen an inbe zuai bawk. “Lo haw mai rawh, naktukah chuan..i vawkte  pawn an ngai tawh che” te a rawn ti. A hmabak kô tak lah an rawn hrethiam ve der si lo. A ruahman dan chuan Sawmliana chu zaninah a va hmu ang a, a theih chin chin kha thil thleng kha sawipuia an aw chu record a tum a ni. Risk sang tak erawh a ni si, police lam a pun mai dawn em ni aw a ti rilru neuh neuh a, mahse, a ruahmanna a lo tlawlh leh si khan aman a tuar daih thei tih a hre ve kur, chuvang chuan amaha tlawnken law law chu a tum ta zawk a. A rilru chuan a ṭawngṭai ve ngial a, chhanna hmuh erawh a inbeisei chuang law..a chhan duh a ring lo a ni ber e. Bmi’n a rawn bia a, mahse, Bmi bulah pawh a thiltih lai chu a zep tlat a ni, Nupuii takngial pawh a hrilh loh avangin midang tuma hriat a rem lo bur..Champhai lam a han be ve leh a, “Asang, thil dang pakhat min tihsak ta che. Vena kha i hnaih theih chuan number pakhat a phone atang khan min dial sak la, a save em tih ka hre duh a..” tiin number a neitu hria loh kha a hrilh ta a, thang chu a kam ta nual a, a per ang em tih erawh hunin a hril ang chu. Asanga pawh chuan, “Zaninah va kal ka tum sa hrim hrim alawm, ka lo tum dawn nia” a rawn ti a. Asanga te, Nupuii te ho nen hian college an kal laiin an inkawm ho vek a, Seni nen an inngaihzawn pawh an hriatpui vek a ni. Seni’n vanduaina a tawh lai khan Asanga pawh champhaiah a awm bik lo va, mahse, thil thleng a han hriat khan a tawrhpui ve em em a, theihtawp chhuaha puih a tum ta hial reng a ni. 

Champuii erawh chhun lamah khan a insu a, a u a nawmsam loh deuh avangin tlai lam pawh eirawng a bawl a, bawkbawn a chan mek laiin Lucy’n a rawn call a, “Aw, cy” a ti nghal var. 

“Hriati’n min rawn bia a, Muanawma nen an inhmuh thu a sawi a” a rawn ti nghal ngawt. Lucy leh Hriati te hi an pate unau an ni. An inthenawm bawk. “Chuan” a ti satliah a. 

“Hmeichhe pakhat nen an bazar dun thu leh chu nu chu a chhiat loh viau thu a sawi bawk” a rawn thutak angreng si a, Champuii tan pawh namnul theih a ni bik lo. 

“Chuan zel..” a ti ringawt a, “Chu chu a ni deuh mai, vawiinah in inbe tawh em?” A rawn ti a, a thiante hian an inkar hi an buaipuiin hlim se an duh ve bawk si a. “Be miah lo” a ti a, “Hmeichhia vang a ni lovang kan han ti tak naa, thil ni thei lo tak tak hi a awm bik lo va” a rawn ti niah niah a, a sawi tum a hrethiam ve vek. 

“Chuan,Naktukah Muanawma chu rawn haw a tum a niawm e” a tih zawm zat a. 

“Lo haw phawt se, keipawh inrinniah rawn haw ka tum ang a, hmaichhanah kan inchingfel ang chu ka ti” Champuii chuan a ti a. 

“A ṭha, lo haw ve ve phawt mai teh u” Lucy pawh chuan a ti ve a. An dah ta rih. 

A rilru tê tê chuan, Muanawma chuan bialnu dang a nei ngeiah a ngai tawh. Mahse, a chang changa a rawn be leh thin hi chu a inthiam loh vangte pawh a ni mahna le. Lo haw teh se, engtin chiah nge an in chachhuah dawn ni, an hre mai ang chu. Zanriah eikhamah a u fate nen dawrah an va kal a, Ziri thil thawn pawh kha a thlen zan khan an rawn lam nghal a, Ziri pasal chu a rin aiin a naupan hmel, zu in nasa hmel pawh a pu lem lo. Champhaiah hian hmelhriat em em a nei lova, a u te nupa bakah Zothana a ni deuh tlawng mai. An dawr kal haw chu Zothana leh a thianpa lo leng turte nen an innangching a, in chhungah an lut ho ta a. Zothana thianpa chu Vena a ni, palian bik lo tak, hmel erawh chhe hran lem lo a ni ve a, an han inchibai a, Zothana chuan, “Kan inthenawm chiah a, a hmu ve châk che a, Bungpuiah khan bialnu a nei ve bawk nen” a ti deuh kher a, Champuii pawh chuan nêl tak mai hian, “Ehe! A ni maw? Tu nge le, ka hriatzawng te a ni mial em?” Nui chung hian a lo ti ve a. Vena chuan, “He pa lah hi a duh duh a sawi a, ka nei lo ti ila, kan mumal vak lo tunlai chu..i hre lo maithei, Lateii a nia, Vengchhak lamah khan an awm” a ti ve mai a. Champuii chuan, “Lateii maw, hria e mawle, a fel kha, kan veng a inhlat ve deuh hlek a, kan inhmu khât angreng” a lo ti ve luam a. Lateii’n Muanawma nen an inngaihzawn vanga a lo ngei ve ringawt te chu a rilruah awm mah se; sawi rik chi a ni lo tih a hria. 

“I lo biak hnâp dawn nia, hei tlangvala pumpa a lunglêng hi a kûr duam duam mai a nih hi. “ Zothana chuan a ti a,. Vena chuan, “I va ho e aw, mipa kan lungleng ve ngai lo aw, nangmah zawk hi a nia khawngaihthlak tur chu, Champuii a han haw ang a, Bungpui zin i sawi vul leh chûk mai ang. “ A lo ti a, an nui ho dar dar mai. Champuii chuan thingpui te a lumsak a, an in mek laiin Vena phone chu a rawn ri a, “Aw , Asang, “ tiin a phone chu a bengah a chuktuah nghal. Lehlam ṭawng chu an hre thei lo va, “Hei venglaiah kan leng, Zothana bialnu kan rim a..” tih pahin Champuii chu a nuih suk a, Champuii pawh chuan a ngai haw hran lem lo. “Aw, lo kal la ni mai lawm..i lo thlen dawnah i lo sawi mai dawn nia.” A ti leh zung zung a, a dah ta a. 

“Asanga hi chu aw, a games pakhat a lo delete palh a, ka phone atanga rawn lak a tum a nih kha, a che hmanhmawh thei mai sia maw..” a ti nang nang a. 

Zothana chuan, “Asanga hi a bialnu nen khan an inthen ta daih mi? An inzui khât tawh riauin ka hria” a lo ti a. 

“Thenna a rei tawh, star dang a nei leh daih tawh zawk, ani hi chu hmeichhia ai chuan games a ngaipawimawh zawk” Vena chuan a lo ti ve a. Thil dang an sawi leh ta rih a. Rei vak loah Asanga chuan a rawn call leh a, Vena chu a chhuak zuk a, kar lovah tlangval lian lam, Muanawma aia hniam hlek tur si, ngo vuah mai nen hian an lo lut a. Champuii a hmuh rual chuan, “Zothana kan hmuh khât viau nachhan chu ka hre ta,.” Tih pahin a nui sâng a,. Champuii pawh chuan, “Fiamthu in va duh hlawm ve mawle” a lo ti ve mai bawk a. Asanga chu thingpui a va thlit ve nghal, Zothana nen chauha awmdun ai chuan hetianga a thiante nena awmho laih laih hi nuam a ti daih zawk, Zothana nen chuan sawi tur a vâng thei si. Asanga chuan, “Khawi i phone chu, ka ngei tak tak a ni, Zombie zawk kha uninstall ka tum a, a ni lo zawk ka uninstall daih alawm, ka ui lutuk a, ka rawn be ta ringawt che a nih kha..” a ti sawk sawk a, Vena pawh chuan ihê loin a phone chu a pe ve mai a, Asanga chuan games chu a inthawn nghal mawlh mawlh, “Call balance pangngai ka nei lo, ka thianpa ka’n be nghal lawk aw” tiin number a chhu kai zung zung a, Vena phone-ah chuan chu number chu chiang takin a lo insave kuau mai le..! Maktia a meng phâwk deuh chu an hmu hman ang tih hlau takin zahzelah, “Champui, mei zuk a rem em?” A han ti khawmawi a, “Rem e, zu rawh” a lo ti var a. Zial  chu a han ṭan ta a, Vena te leh Champuii te inkawm tui lai chuan Vena phone-a number lo insave dan chu a thla a la zauh a, call log chu a clear nghal bawk. Games pawh chu a inthawn thei ta a niang, Vena chu a pe ta nghal a. 

“Champuii chu khawi atangin maw i lo zin? “ A han ti a. Vena khan a zuk hruai khan Champhaia a lo zin thu a lo hrilh tawh vang a ni. “Bungpui atangin mawle” a lo ti var a. Asanga rilruah chuan, ‘Muanawma pawh i hria ang a..’ a ti rilru a. 

“Muanawma kha i hria em? Rinmuanawma, college kan kal laiin kan inkawm nasa thin alawm..” a ti ta vat reng a. Champuii hamhaih chu anni pawh chuan an lo hai miah lo, a inthup hman lo a ni ber e. Mahse, “Hria e, an thianho kha ka inlengte ber alawm an nih, an fel lutuk” a ti sep a. A awm erawh a nuam ta lo hle. 

“Nia, a fel ve a nia, hmeichhia a ngaihsak lo tih mai loh chu..” a ti nghut a. Champuii chuan a chhang tawh lo. Chutiang chuan inpawh takin an inkawm ta hlawm a, Asanga erawh chhuanlam siamin a haw hma a, Vena leh Zothana te erawh chuan thingpui vawi 2 an in hman. Dar 10 rik hma deuhin an haw ve ta hram. Champuii pawh a mu zui nghal a, a phone a han hmet eng a, Joela msg bawk chu,. “Champui, bulṭan ṭha leh ang, khawngaihin” tih thu chu. A reply lo. 

Muanawma chu Asanga nen an inbe zo chiah a ni. A thu hriat thil pahnihin a nghawng dan chu a inchen reng ni maiin a hria. Pakhatna chu Vena phone-a kha number an hriat châk em em a lo insave dan kha a ni a, pakhat leh chu Bungpui atanga lo zin Champuii, Zothana bialnu thlenna inah Vena a va hmu tih chu a ni bawk. Bathlarah a vei tuak sek a, a thaw leh hawk thin. A rilru chu a chawmawlh a ni tih loh rual a ni lo ve. Vena phone-a kha number lo insave dan chu,. ‘Lateii 2’ tih a ni tlat! Lateii chuan a thiannu phuba laksak nan khatiang khan chet a thawh a ni ang tih a ring thei mai a, mahse, engkim a hmuin a hrechiang tihna a nia, ti nge a tirah te khan engmah a sawi duh loh? Thuhretu-ah ti nge a ṭan duh loh? Seni ngei pawh kha, “ A lo rui ve thin tih ka lo hre lo reng reng” te a ti zawk a nih kha. Ti nge hun tam a liam tawh hnuah hetiang hian chet a lak leh si ang? Zawhna a ngah takzet, chhanna pe theitu chu amah Lateii ngei a ni. 

Zothana, Zothana, chu hming chu a hriat tawh hnu âng riauin a hria. Champuii bialpa maw lo ni a? Sunday-a a lenpui kha Zothana chu a ni chiang ang tiin amah leh amah a insawh tau a, Champuii nunhlui ṭenghneng tak tak a hriat hnuah pawh hmeichhe dang lakah a la pelhe san miah lo a nia, hmaichhana sawipui a la tum ve ngar ngar kha a nia. Ani Champhaiah a zin dêk dêk a, bialpa a han nei nghal a maw? Engtin nge khami kar lek chhung khan a tih theih? A hma atang daih tawh khan a lo kawp reng a ni zawk lo maw? Champhai zin a duh danah te hian..hetah pawh hian zawhna a ngah viau, a haw phawt zawng a ngai chiang a ni. A rilru buai atalângin Sawmliana lam pawh a lo hrechang tawh lova, harh thutin a phone chu a on nghal. Dar 9 a pel hlek chauh a, engtin nge hma a lak ang aw tih a ngaihtuah zui nghal. Sms engmah rawn thleng a awm hauh lo. Sawmliana hian s ṭhulh leh ta mai em ni ang? Amah zawk chuan, “Zanin dar 10 kha hrereng rawh.” Tih thu a va thawn a. A off rih ta lo. A rin ang ngeiin reivak loah Sawma chuan a rawn call ta ngei a, a lak ngei a ngai.

“Ka msg kha i hmu lo em ni?” A aw chu a tidanglam hlek. 

“Hmu e, tu nge i nih?” A rawn ti a, dâwihzep aw a lang tel tlat.

“Tu nge ka nih i hriat a ngai lo. Pawisa nen rawn kal la, pawisa ka hmuh rualin engkim thaibo a ni ang.” A han ti leh a.

“khatiang zat zat pawisa ka nei lo. Police hnenah ka report dawn che tih hre rawh” a rawn ti chhar chhar a. 

“I thu thu le, kan tâng dun ang a ni mai lawm..” cho zet hian a lo ti ve sak a, phone chu a dah nghal zat. Sawmliana chu a mangang takzet a nih chuan a rawn call leh em em ang tih a ring. Ngaihchan pahin ama phone pangngai chu a khawih kual a, Nupuii msg a lo awm leh vâng tawh a, “U Bmi nen in inbe leh tawh em?” A rawn ti a. 

“Be miah lo” tiin a va chhang a,. “Naktukah i haw dawn sia, zanin chu kan inthlah dawn lo em ni?” A rawn ti ngial a. 

“Hei ka insiam buai ve deuh a, bakah a tlai tawh ee, thla tharah ka rawn zin leh dawn tho alawm, kan dine out dawn nia.” A va ti ta ngawt a. Nuam chu a ti vak lo, Nupuii atana a ṭangkaizia a hre ve vek sia. Mahse, zanin chu plan mumal tak a lo nei tawh si a, pelhe hman a ni tlat lo a tin ni. A rin ang ngeiin Sawmliana chuan msg a rawn thawn ta a, “Khawi laiah nge?” Tih thu chu. 

“Ka rawn hrilh leh ang che. Lo inring reng tawp rawh.” A va ti a. Ani pawh muangchang loin a insiam sawk sawk a, Jerry’n a bike a hman zawk avangin a car a hmansak mai a ngai dawn a ni, a buai ruk nâk alaiin Hriati khan a lo call, “In Address chu lo sawi lawk la, kan rawn kal ang” a rawn ti. “Hei ka chhuak dawn a, khawi laiah nge in awm sawi la, ka rawn la mai ang” a ti ta zawk a, Hriati chu Bawngkawnah a a tho bawk a, a lamsak thei nghal mai ang chu. Anuteii hnena chabi a dil chuan, “Eng nge i tih dawn? A va tlai laklawh ve” a lo ti dam diai a, “Ka pa damdawi ka theihnghilh daih alawm, va lamsak a ngai a, ka rei lovang” a ti a, chabi a la a, a chhuak zui nghal. 

Hriati thil thawn tur chu a lamsak a, ani lah chuan, “Vawiin ami kha a va chhe lo ve a, Thenkhat te an rilru a na dawn chiang mai” mei nei deuh hian nui tet tet chungin a ti a.

“Ka û, ka nuteii fanu a nih kha, ka hmanhmawh deuh a, ka kal phawt ang aw” tih leh tlan chhuah a rual nghal..khatiang thil mai maia inhambuai hman a ni lo tlat. Zemabawk dai chu a thleng ta thuai a, dar 9:48 chiah a ni. A piah deuha waiting shed bulah chuan a va park a, mask a vuah bakah a hoodie lukhum chu a khum hlûn a,  tarmit fim, power awm lo a vuah bawk. Tihi chuan tu nge a nih hriat chu a har ve deuh mathei. Sawma rawn rik leh hun nghak chuan ngawi rengin motorah chuan a ṭhu ta ngat ngat a. Champuii leh Lateii ringawt a rilruah erawh an awm. Dar 10 minute 3 velin a la ri lo tihin Sawmliana call a dawng ta, a helhhawlh kher mai. “Hello, hei ka û nikhaw hre loin a tlu a, damdawiin kan chhohpui nghal a ngai, khawngaihin zanin chu min lo hrethiam ta che. Chhungkaw buaina a ni si a..” a rawn ti a, a âw atang chuan tider a ang lo, hlauthawng awrâwl a ni. Muanawma paw’n a hai hauh lo. “He thil hi midang tupawh i hrilh a nih ngat chuan Bawngkawn police station-ah ka tlan lut nghal ang tih hria ang che. Aw le, hun chu ka pe ang che. “ Tiin a dah ta a. Keypad phone chu dahin sim card chu a phawrh nghal bawk. Fimkhur tluk a awm lo. Hetia Sawmliana a han blackmail vel atang ringawt pawh hian Sawmliana chuan pawi a khawih ngei tih a hlauhthawn dan atangin a hriat reng tawh a, mahse, evidence a nei tlat si lo. Amah ngei inpuangin emaw thuhretu mumal tak nei nise chuan Seni chuan rorelna dik a hmu tawh mai tur,. Mahse, a beidawng lo. An khaw lam a pan ang a, thuhretu awmchhun a hmachhawn dawn alawm, chu chu a innghahna awmchhun a ni ta rih. Mahse, Sawmliana chuan dâwt a sawi leh sawi loh hriat a duh tlat avangin Damdawiin lam a pan zui ta nghal a, Civil Hospital-ah chuan Sawmliana û awm reng reng a hmu lo, Sawma û hming a hre bawk si lo. Loh theih lohin Bmi a va be ta nge nge a, “U Bm, khawngaihin min pui ta che” a han ti phawt a, “Sawi rawh” a rawn ti a. 

Sawmliana û damdawiina a awm leh awm loh Sawmliana chhungte zawhsak tur in a ngen ta a. Sawma û hming a zawt nghal bawk. “Zawh zawh a ngai hleinem, aw, nichin deuh lawk dar 10 rik hma deuh khan a inbual zo rawn chhuak kha a tlu ringawt a, stroke a nih hmel,Bethesda Hospital an panpui ta a nih kha, a hming chu Nunsanga aw, “ a rawn ti zung zung a. 

“Tu nge hrilh che a?” Ringhlel deuh hian a ti a, a inthiam lo leh deuh. 

“Sawma te thenawm nula hi ka thiantha tak a nia, min rawn hrilh ve alawm” a rawn ti nem diai a, Muanawma pawh chuan lawmthu hrilhin, Bethesda Hospital lam pan tur chuan a inher leh ta a. A va thlen chuan Sawmliana chuan dàwt a lo sawi lo a, Lalnunsanga, Ramhlun north chu an lo luhpui ngei e. Ngaihngam takin in lam a pan ta a. Tunah chuan an khaw lam hlir a rilruah a awm ta. 

Anuteii te in a thlen chuan mu mai lovin a insiam a, thawmhnaw a keng tam lem lova, a nuteii’n a nu damdawi tur leh thawmhnaw eng ilo a thawn nual a, a bawr phah dawn a ni. Sumo pawh a be tawh a, thawh hma a ngaih avangin muthilh theih a duh hle. A mut erawh a chhuak der si lo. A let tawn sek mai. A tawpa tawpah tlem chu a chhing ve hlek, a alarm riin rawn tiharhin, mit thial úrhin a tho chhuak a, Jerry exer la pawh rawn thleng ve deuh chiahin counterah a han thlah ta a,. Kar lovah Aizawl pawh chu an chhuahsan ta. 

Champuii pawh a u  a inentir avangin a fate chu a lo awm a, a bualfai a, naupang han chhawnchhaih vel hi a thiam vak lo. Mahse, an ngaina ve tho mai. A tuka haw tur a ni bawk a tiin a inhmakhua a, a inkhung deuh vek tawh. A ú pawh a rawn haw a, a chauh hmel viau. “Ka zunkawng a lawm lo ni lehpek, ka kawng nat dan atang khan ka ringhlel reng a. Damdawi ka han ei chho ang a, ka zia mai ang, nang pawh sunday chu hmang rih mai ta che, thawhṭanah i û-in a zuk thlah mai dawn che nia” a ti a. Champuii tan hnial dan tur a vâng hle, mondayah School ṭan dawn tho mah se; ṭan ni angah chuan eng em em an zir dawn lo va, an headmaster a dil chuan a phal dawn tih pawh a hria, a û a nawmsam loh laia han hawnsan daih kha nuam a ti si lo, “Nia, pu Chunga chu ka lo be mai dawn nia, va mu hahdam rawh” a ti ta thliam a. Joela nena an fa a chhiat ṭuma hmangaih leh duat taka enkawla bawihsâwmtu a û chu theihtawp chhuaha a awm chhung na nâ na chuan duat ve a duh a ni. Zari te a bia a, a haw theih rih loh chhan te a hrilh a, “Vawiinah Muanawma a rawn haw dawn asin” a rawn ti a. 

“Ka hria lawm, ka u a damlo sia, tihngaihna a awm lo a ni e” a ti sap a. “A dam ve mai ang, a rei tawh chuang hleinem, kan ngai tawh khawp mai che, thil tui deuh lo hawn rawh aw” a rawn ti a, an dah ta rih. 

Muanawma te pawh zan dar 7 rik hma deuhin an thleng a, Lawma te pawh an inah an lo awm tawh. A thil hawnsakte chu a han pe ve a, an lawm thiam ve hle. A nu chuan, “Bawiha chu i han inzir ngawrh deuh nge chaw i ei tha lo zawk, i cher deuh tlata ka hriat ni?” A ti a.

“Zir ve bawk e, bakah ka lungleng a, nangmah ka ngai che mawle” tiin a nu chu a han nuih a, fapa awmchhun a ni tawh bawk a, Muanawma hi chu han hauin zilh hlak hlak thin mah se; an duat em em tih hi amah Muanawma pawh hian a hai bik hauh lo. Chuvang chuan a theih chin chinah an rilru tihnat loh hram a tum ve bawk. A inbualfai a, chaw a bar thuak thuak a, len chhuah em em pawh a tum lo, a chau ve deuh bawk nen. Lawma te nen chuan a roomah an inkawm ta mai mai a. 

“Champuii pawh naktukah a lo haw dawnin ka hria” kima chuan a ti a. Lawma chuan, “Dawn lo, mondayah a ti, Zari’n a sawi a, a û a damlo leh sia, sunday a hmang leh si dawn a niawm e” a lo ti vat a. 

“Champhai chu nuam a ti hle a nih dawn chu” Muanawma chuan a ti nghut a. 

“Nang pawh Aizawl nuam i tih êm kha, Champuii pawh i tikhawngaihthlak lutuk, Hriati lah khan nula hmeltha deuh nen an bazar a tih che kha” Lawma chuan a ti a. Champuii ṭan chu a tina ve hle mai,  “Ka nuteii fanu a nih kha, Hriati te ho lah hi a, an thil hmuh leh hriat zawng zawng hi thudik niawm tak hian an sawi thin a..” a ti duh chauh. A ni ve bawk lah taka, Hriati te ho hi chu thurûk vawntir chi an ni vak lo. 

“Ti daih ila, Lateii in hmu ngai em?” Muanawma bawk chuan a ti a. Mak pawh an ti hran lo. “Hmu vak ngai lo, ani pawh kha Aizawl zin te kha a tumin ka hria, hmanni kan hnatlan khan a sawi zuk mai” Kima chuan a lo ti a. 

“Engtikah nge zin a tum a?” A rin aia hmain Muanawma chuan a sawi rang. 

“Ka hre bik lo, thla thar lamah a niang. Ngati nge Lateii chu?” Kima chuan Muanawma melh chung chuan a ti a.

“Aa..Senteii thlalak, ka kawl loh hi a la kawl em tih ka hre duh mai mai” a ti ringawt a. Seni chungchang chu an sawipui tha duh vak lo. A rilru an tina thar mai mai. 

Muanawma chu a khumah ngei a han mu ta a, hahdamthlak a ti viau nain a chhungril nun erawh ipik tak a ni. A phone chu a han hmet a, Champuii msg a awm lo. A awm lo reng ang chu, bialpa a nei a, tunah pawh an nui dunin an inkuah rial maithei asin. A û damloh chhuanlamin sunday pawh la châm a tum chu a ni sia, a bialpain a chelh tih chiang reng..a inngaihtuah ngut ngut reng a, a chang leh Lateii biak dan tur a ngaihtuah kai thul, a pik tulh tulh a, chau viau e ti lo chuan a mut lah chu a chhuak thei reng reng si lo. Vanduai bik leh khawvel paw’n a ensan nia inngaihna te neiin a inngaihtuah lungpuam chho a, a hnukte a ulh hial mai. Mipa intipa ve tak kha a ni naa, a hun tawn mek hi chinfel harsa a ti ve takzet a ni. 

Champuii pawh a mu meng kar mai. A phone a bih sek a, Muanawma msg reng reng a dawng thei si lo, Lawma te kâ atangin a haw ngei tih a chiang a, engtin emaw tal a rawn biak ve a beisei a, an inthen dawn emaw dawn lo emaw pawh ni se..mahse, a reh tlawk tlawk si, va biak hmasak lah tlawmah a la laklawh a, an inbiak hnuhnunber boruak lah khati kha a ni si. A muhil thei bik lo, Joela lahin a rawn text sek bawk si, hneawm lamah a kal. Zothana tak hi chu a danglam tawh viau, a rawn text paw’n ngaihzawng angin a text vak tawh lo, thu ho tê tê bak a sawi ngai meuh lo va, thian angin a en ve tak tak ta pawh a ni maithei. Dar 10 a la ri lo deuh tihin Zari’n, “ a rawn be tawh che em?” Tih thu a rawn thawn a. 

“Be lo” a va ti tawp.

“A chau ve deuh a niang, an rawn thleng tlai bawk sia” tiin a rawn hnem a, “Nia,  a ni maithei. Ka lo haw hma chu engmah lo sawipui su aw” a ti hram. “I thu vek alawm boss, e chuan taka..Hriati’n hmannia a bazarpui vel a sawi kha a nuteii fanu a nih thu Lawma te bulah a lo sawi a, a nih ka ring, hmanah pawh an lo zin tawh,. A hming ka hre ta lo “ a rawn ti a. 

“Nih pawh a niang, khalam kha chu ka ngaihven em em lo.” A ti ve mai a, nia, a rilru takah chuan Muanawma’n awlsam taka hmeichhe dang laka a hawisan mai chu a ring phal bik lo a ni. Mahse, thîkna rilru erawh a pu tho. 

Inrinni a ni bawk a tiin Lawma leh Kima te chuan lui kal an rawt leh a, Muanawma paw’n a rilru tihthawven a duh êm vangin a lo hnar phal bik lo. A beisei ang ngeiin nuam a ti leh hle mai a, a rilru mawlhtu te pawh a theihnghilh ve lek lek mai, an haw lamah a û dawr thlen hmain Lateii an tawk a, a lungphu a rang hle. Lateii chuan nui sâng chungin, “I lo haw tawh law? I titha em? I exam chu?” A lo ti chul a. 

“Aw, nizanah ka lo thleng, a pangngai a ni mai, taka! Late, naktuk chawhnuah ka rawn leng ang,. “ A ti a, Lateii bangbo hmel chu hrethiam takin, “Seni thlalak ka la neih loh i la kawl takin ka tia..” a ti a. 

“Awii, a van pawi, ka phone a chhia a, ka siamtirna lamah thlalak zawng zawng a bo vek asin, back up nachang ka lo hre si lova” Lateii chuan a ti niah niah a, Muanawma hmel chu hmuh theih khawpin a dur nghal, mahse inthunun leh vatin, “A pawi chuang lo, ka neihsa khu a tawk tho mai.” A ti ta ringawt a.

“Lo leng tho la, i lo leng khât tawh em mai” Lateii chuan a ti a, “Aa..chutia i kawl tawh si loh chuan naktuk chu Senteii thlan ka va tlawh zawk ang e. Lo kal ve zawk la.” A han ti khawmawi a, inngaihtuah niawm taka a ngawih dat hnuah, “Nia, kan tum dawn nia aw” tiin an inkalsan ta a.

“Bawiha, ti nge i Aizawl va kal hi Seni ringawt i ngaihtuah leh tak? Eng nge i va tawn?” Lawma chuan ngaihtuah hmel fê hian a han ti a. 

“Chulam pawh a ni lo, a thlan ka tlawh khât tawh êm alawm, champuii a awm chuang lo va” a ti mai a, rinhlelh enin an en bik chuang lo.

Zanah chuan, Champuii msg a dawng ve ta nawlh mai, a ruh no zawk na nâ na chu a tlawm zawkah a ṭang ta a ni maithei,. “Eng nge kan chanchin hi? Kan inthen nge kan inthen lo?” Tih thu a ni a, thu lawmawm em em chu a ni chuang lo. 

Chhan dan tur a bangbô riau, “ka hre lo, i ngaihdan dan” a va ti ta tawp a.

“Engvangin nge kan inthen tih erawh hriat ka phûin ka hria” a rawn ti a. A rilruin, ‘I hre zawk ang chu, lemchan rawn tum suh’ tih chu a rawn awm naa, “I hriat kha, a awmchhun ka nih theih loh chuan tawp se ka duh zawk..” tih thuin a reply a. 

“A awmchhun i ni lo em ni? Aizawl nula chu ka lo tluk lo hle a ni maw!” A rawn ti ve leh thung. Hriati thu veivir vel kha a nih a ring nghal. “Aizawl nula i tluk leh tluk loh turin tehna ka lo siam hleinem” a va ti leh ta khauh. 

“Muanawm, min fiam kual mai mai tur chuan ka lo ring lo che asin, kei aiin i naupang nachungin ka rilru ka pe che a, i zin a, i danglam nghal a, a chhan tal sawi la ka dawngsawng thiam ang. Nang aia ka upat vang zawk pawh a lo niang e, ni e, mipain thutawp i siam a, ka pawm e. “ A rawn ti ta a. Muanawma chuan vawi 3 a chhiar chhuak. Pehhel ṭul a ti ta lo bawk a, “Ni e, kawp nih ka duh lo. Kum thu hlaah chuan ka buai lo ve. Champhaia i la châm chhan pawh I bialpa Zothana’n a chelh che a ni lawm ni? Chuan, Champui, hmana i nunphung ang khan mipa te hi tumah fiam kual tawh suh. I hrethiam tiraw?” A va ti ve ta hmiah a. 

“Zothana chu tuin nge ka bialpa anga lo sawi a? Min ngaizawng ngei a, thianthaa harsa taka ka chhuah thei ka lawm em em laia hetianga min rawn puh ringawt le..mipa i nih ngai chuan ka bialpa a nih leh nih loh chu fiah ta che..” a rawn ti ve leh ngat. A la typing avangin a nghak det a, “Chuan, ni e, hmana Zochampuii kha tuna Zochampuii hian nih leh ka châk khawp mai. Ani kha chu hmangaihnain a tibuai ve lo. “ A rawn ti ta daih. A awmzia a hrethiam vak lo. 

“Pehhel vak a ngai lo,i nunhlui ka hria, engkim..Andy kha i hria em? Keipawn ka hria asin. Engpawhnise, nun hlim tak nei ang che.” Muanawma chu a naupannain a hneh leh ta nge nge a, a thinur hlur ringawt. 2nd thought hmang thin kha Champuii lakah a che phelh ve tlat, thil a ti hmawk hmawk ringawt mai a ni. 

Zochampuii chuan, “Aw le, ka tum ang.” A rawn ti ve ta hmak bawk. A reply tawh lo va, Champuii pawh a reh ta. 

Sunday tukah chuan a û pawh a rawn tha ta viau mai,. “Ka zia ta viau e, naktukah chuan i û chuan a zuk thlah dawn che nia, keimah vangin school i chawlh phah ringawt dawn sia” inthiam lo hmelpu deuh hian a ti a. 

“Inthlahrung mah ta che, Bungpuiah han thlakhlelh em em tur a awm chuang hleinem, ni khat school chawlh ringawt te chu min hrethiam lutuk” a ti dam thlap a. 

“In inṭhen ta mi? I bialpa nen khan..” a u-in a tih chuan, “Aw “ a ti tawi tak a. A hmel landan erawh a danglam em em hran lo.” Heta i lo zin vangte hi a ni em? A va zia lo ve” a nau lainat hmel deuh chuan a ti a.

“Ni lo ve, a buaithlak em mai, kei aiin a naupang bawk sia” a ti ringawt .

“Chuan, Zothana chu..” a han ti dêk dêk a, “Û, a ninawm, bialpa ka nei peih tawh rih lo alawm” a ti nghek, a u pawn a sawizui ngam tawh lo. 

 Inkhawm tura an kal hma chuan, “Hawh u, thla la ang u, kan la la miah lo” a u pasal chuan a ti pek a, an han la leh rih. Inkhawm banah Zothana hoin a u fate nen an leng kual leh a, Muanawma vanga a nguina te pawh a zia ve deuh huai mai. Zothana nen te pawh chuan thla an la dun nasa mai a, phul hmun zawla pher chunga an thut dunna pic chu status-ah a hmang a, captionah, “Ka ṭhian, vawiin hian i awm lovang tih ka hlau,. Ka ṭhian ni reng rawh aw..” tih thu a hmang ve ngat, Muanawma’n a hmu dawn tih a hre tlat alawm, a rawn puhna ngeiawm tak avang khan a thinlung a dam thei bik lo. Mahse, a nunhlui chungchangah erawh sawi theih a nei lo. Andy nen khan engtia inhria nge an nih a? A hming kha engtia rawn lam thei nge a nih tih a hre hek lo. Kalsan tawh emaw a lo intih a nunhlui chuan a rawn umzui zel chu a nih si hi maw..pawi tia inchhir hnuhnawh erawh a tum bik hauh lo, a sâwt dawn lo tih a hrechiang a, awmze nei lova inhambuai a peih lo. Mahse, zah erawh a zak, Muanawma’n khang hun liam tawha thil thleng a hrechhuak chu Muanawma thiam loh ni loin ama thiam loh tih a hria,. Muanawma va dem pawh a tum lo. Khang a nunhlui vanga muanawma’n thutawp a siam a nih pawhin âwm a ti, a bialnu thi tawh tan pawha kha chen lo rinawm tlut thei mipa tan chuan khang nunhlui kha a tenawm mah mah a ni. Chuvang chuan, Bungpuia hawn leh pawh a châk lo zo vek tawh. Muanawma hmuh a hreh takzet a ni. Tunah chuan mipa lam reng reng ngaihven loh a duh tawh,. Zothana pawh hian a nunhlui hria se la chuan hetiang taka a duh hi a ring miah lo. Amah pawhin thaiboa phumbo a duh em em chu midang tan phei chuan a bawlhhlawh dan tur a chiang tlat a ni. 

Muanawma pawn Champuii status chu a lo hmu ngei e, a caption pawh a chhiar uluk ngang mai. Thutâwp an sawi tak hnu pawha Champuii a la ngaihven tlat chu mak a inti a, a thutiam pakhat zawk pawh theihnghilhtir lek lek thei khawpa hmeichhe hîpna ngah Zochampuii chuan eng hun harsatna leh buaina nge a lo hmachhawn ve tawh ang tih hial a ngaihtuah chho a, a hmaa engmah a sawi duh ngai loh chhan te pawh khan chhan ṭha tak a lo nei reng ang tih a ringthiam ve mai. Mahse, intipachangin, “A tawp tawh alawm, tunah chuan ka tihtur la awmchhun ka ti ang a, ka awm zel dan tur chu chunglamin rêl rawh se” a ti a. Senteii thlan tlawh tur chuan a inkhalh chhuak ta a. 

Thlan hung thlap, fai hen mai chungah chuan thuin hming inziak chu a thlir ngawih ngawih a, an hlim lai, an nuih dun lai zawng zawngte chu hmaih nei miah loin a hrut chho leh ta. A thaw hawk a, Senteii nen an vanglai a ngaihtuah tel apiangin tel ve dang a rawn awm zel, Champuii a lo ngaihtuah kai leh thin. Chu chu a duh lo a duh hlawl lo. Aw thian kharh ri a hriat chuan a hawi let vat a, Lateii leh an thenawm mipa naupang pahnih te an lo ding ṭaih a. 

“I lo kal ve a ni maw? I lo kal tak tak pawh ka ring lo va” tih pahin a tho a. 

“Nia, ka tlawh khât êm a, ka inthiam lo deuh mawle..” a ti sep a. Naupangte chu thlanmual mawng lamah chuan an chhuk a. Senteii hming inziak chu an thlir dun a,. “I ngai viau ang tiraw?” Lateii chuan a ti sap a. 

“Aw ngai e” a ti ve mai a. 

“Mahse, ti nge midang i neihsan si?” Lateii chuan a ti a. A rawn melh bawk.

“Mitthi khuaah ka cheng hleinem, Late” a ti zawi ruih a. Thu dang sawi tam a ngai lo kher mai. 

An ngawih leh vang vang hnuah, “Late..engvangin nge i thiannu kha i ṭanpui loh?” Muanawma chuan a ti kha ta fak a! A mitmeng pawh a nêm lo hle. Lateii chuan makti awm deuh hian a rawn en a,. “I sawi awmzia ka hre lo” a ti a, a ri chang chang a ni. 

“Engkim ka hre vek tawh. Engvangin nge Sawmliana te inneihna kha i ṭhulhtir? Video kha engvangin nge i lo la kawl reng? Engvangin nge Sawmliana, Police ten an lak zanah khan video kha i tih viral ? Sawmliana chauhin i thiannu kha a that lo, nang a thianthabera a ngaih pawh hian i that ve a ni..a chiang em?” A ti ta nghut nghut a. 

Lateii chu a dâng bel mai a, chutiang em ema hmelhmai inthlak danglam rang chu Muanawma pawn a la hmu ngai lo.

“Ka that lo” a ti zawi sep a. Hnuai lam a bih tlat bawk. 

“Ka that ve dawn che nge? Thudik i sawi dawn?” Muanawma chuan a ti vawt raih a..

(Ka dar nâ tan hian min lo tawngtaisak r’u aw. Comment te kha uar leh tan teh u, ka tan a nuam ve a nia..