zochampuii 7

ZOCHAMPUII (7)

Ziaktu : Toni Râlte

“Hello” zawitêa a tih chuan, “Champui, phone kha dah lo hram teh, khawngaihin inbia ang” Joela aw ngei mai chuan a rawn ti a. A chhing sawk. “Eng nge ni ta?” A ti sep a, “Min hria tiraw? Keimah Joela” a han ti leh tê tê a. 

“Hria” tih chauhin a chhang. 

“I dam ṭha maw? Pasal i nei tawh em?” A rawn ti duah a, “Dam e, aw nei tawh” a ti hmiah. A phone chu a hum nghet viau bawk. Rum nghut ri a hre zui a, “Ka tlai a ni maw? Tu nge i pasal chu? Tunah khawiah nge i awm?” Zawhna a va ngah tak, engvanga a chanchin pawh chu ngaihven em em nge maw a nih le..

“Eng atan nge i tih? Eng nge i duh? Ka mu duh tawh a nia..” nelawm vak lo awrâwl hian a han ti a. 

“Min ngaidam rawh aw, min ngaihdam theih loh pawn ka phutâwk ka hmu-ah ka ngai ang. Mahse, i laka ka thiltih zawng zawngte kha ka inchhirin ka zak takzet a ni. Tunah chuan Isua neitu ka ni ve tawh asin, mahse, ka tihsual lian ber nang ka phatsanna che khan ka thinlung a mawlhin a kam reng a, ka mangang lutuk a, i number hi ka zawn kual fê hnuah ka nei thei ta a, hman zana ka lo call lah che khan min be duh bawk si lo. Hrehawm ka ti takzet a ni,. “ A rawn ti mawlh mawlh a. Mak a ti deuh, Joela piangthar chu a lawmpui rualin rinhlelhna erawh a nei deuh tho, a ngai dik lo laklawh tawh a ni ber e. 

“A va lawmawm ve, i piangthar chu. Khatiang nunhlui kha chu engahmah ngai suh, ka ngaidam vek tawh che alawm..” awlsam tak hian a ti thei ta. Amah pawhin mak a inti. 

A rawn thaw hawk a, “Ka lawm e, ka lawm takzet e, mahse, pasal la nei lo la chuan bul ṭanpuiah sawm che ka lo tum rilru deuh a, zaktheilo leh mahni hmasial viauah pawh min ngai maithei, mahse, ka tihsual tawh siamṭhat ka duh vang chauh a ni e..pasal ṭha tak i neih ngei ka beisei..” inla thutak fahrana a rawn tih chuan Champuii chuan a lo ei lo daih zawk, a sawi ang khan zaktheilo a ti ru hle bawk. Piangthar zia pawh niin a hre lo. 

“Ni e, ka pasal hian min hmangaih khawp mai, hei a rawn haw a, ka dah phawt ang. Mangtha le. .” tih leh hmeh hlum a rual a,. Thawk a la halh a, zangthal zawnga muin a chhing ta vang vang a. Zothana lah kha a inthlahrun vang ni maw a rawn kal ta miah lova, pawi a ti hran lo. A hriat loh karin a lo muhil a.  

Muanawma zing tho chu a rit bûr mai, zan lamah a che na ve deuh bawk a ni. A plan han flop ta chuan a mood a tichhe hluah hluah, ama thiam loh a ni tho bawk si. “Ti nge maw zu kha ka lo in kher kher le..” a ti rilru vawng vawng mai. Exam a la nei zui bawk si, a tawt up up mai. Buaina leh harsatna kan tawh hian thenkhat chuan ruihhlo hmanga chinfel kan tum fô, awmzia a neih chu sawi loh, a tizual sauh zawk tih chu a ti thin ten kan hrethiam ang chu. Kan Rinmuanawma pawh chutiang dinhmunah chuan a ding mek a ni. Exam chu a huphurh em em hran lo hlauh a, vawiinah chet a la lo a nih vaih chuan chance a nei chhe tawh viau ang le. Tukṭhuan an kil laiin anuteii’n, “Bawiha, zu ṭhing rim i nam tlatin ka hria, nge i û zawk?” Tiin Jerry leh Muanawma chu a melh tawn a, an ngawi dun ve ve si, Jerry paw’n zan lamah khan a lo in ve tho vangin a ṭang na ngam bik si lo. 

“Exam lai i ni tih hrereng rawh,.chhungte hmuh loha awm vanga petek mai hi mi puitling lo zia a ni, i lo in a nih pawhin vawikhatmah in tawh suh ang che.” A ti leh charh charh a, an ngawi ṭhap mai, a nuteii pasal Pa Zaua hi pa ṭha leh zaidam tâwp, ṭawng ve mai mai ngai lo  a ni a, a fate pawh nu zawk hian a zilhhau nasa zawk reng a ni, chumi tukah pawh chuan engmah a sawi lo. Muanawma chuan a zah ru viau thung. Chaw eikhamah a inbual zawk zawk a, zirlai ennawnna hman pawh a nei lo, a insiam sawk sawk a, a chhuak a ni deuh mai. Centre a va thlen chuan an lo tam tawh viau, kar lovah exam pawh chu an ṭan leh ta a. A beisei ang ngeiin Sawmliana leh hmeichhe pakhat te’n an rawn veng ta ngei a, a lungphu pawh a rang leh ṭan, remchang melh rân a ngai tih a hria. A thiam ang ang chuan a han chhang sawk sawk a, a fail a ring lem lo. A exam aia a rilru kaptu a awm avang erawh chuan subject dang ai chuan a tichhe maithei. A chhuah hnuah pawh a bul thingpui dawrah chuan a ṭhu leh ta reng a, nghah a nei miau a. A tawpa tawpah chuan Sawmliana te pawh rawn chhuakin a beisei loh deuhin a ṭhutna thingpui dawrah chuan an rawn lut ve a, pathum lai an ni. An titi mam mam a, Muanawma erawh chuan ngawi rengin thingpui a in a,. 

“Ka ha ka lo tat hriam hman tawh asin le..ṭhianpa” tarmit vuah, cher lam chuan Sawma dara ben thuk pah chuan a ti a. Sawma chuan, “Lo tat hriam zel tho rawh” a ti mai a. A nuih erawh a za vak lo niin a lang. Muanawma chuan thingpui a in zo tawh si, chhuanlam tur a hre tawh si lo, pawisa a pe a, a chhuak rih ta phawt. Nupuii nen an in text a, Nupuii chuan Amawii hnen aṭanga a dawn ve tho, Bmi hnena video lo thawntu number chu a rawn thawn ve lehchhawng a. Muanawma chuan a save ta hmak mai. A han call chhin a, a tlang lo nasa, a rinsa tho kha a nia. Tichuan, Sawmliana te rawn chhuah hun chu a nghak ta ngat ngat a, rei erawh a nghak lem lo. Sawmliana chu bike-in a inkhalh haw a, phurh a nei lo hlauh bawk. Muanawma pawh chuan a umzui ve ta nghal a. Sawma chu thawmhnaw dawr lar tak pakhatah a peng ta a, Muanawma chuan mask a vuah sauh sauh a, a lut ve nghal hmak. Thawktu chuan polite takin an lo dawngsawng a, ani pawh chuan kamiz te chu a’n enkual vel a, Sawma erawh an manager niawm tak nula hmeltha zet nen an lo inbe mek thung. A va hnaih hret hret a, vanneih asiamin Sawma chuan a phone chu phawrhin eng eng emaw hi a enkual a, hmeichhia nen khan an la inbe reng tho. A phone a en zawh chuan ak ta mai lo chuan a keng ta reng a, Muanawma rilru a lo hmanhmawh nasa, an inbiak zawhah a phone chu a kekawr ipteah a khung ta zân a, a phone dahna a hrechiang ta bawk a, dawr atang chuan a chhuak ta daih a, kawtah chuan a lo nghak ran mai. Sawma lo chhuak chu darthlalang phên atang chuan a lo thlir ran a, dawr kawngka a rawn hawn rualin hmanhmawh hmel zeta dawr chu panin stepah an insu palh ta hlauh mai,. “Ka tihpalh lutuk, ka tihpalh” a han ti chul a. Sawma pawh chuan, “Kawng en tha tawh rawh aw, a pawi lo ve” tiin a bike lam a pan ta a. An insut pah khan Muanawma’n a kekawr ipte atangin a phone a lachhuak tih hria angin a lang lo. Sawma a tlanchhuah rual chuan ani pawh a ranga rangin a bike lam a pan nghal a. Sawma khan a thawmhnaw vel atangin hria angin a awm a hre lova, candidate khati zozai zingah a lo notice bik lo a ni mahna, Muanawma chu a lawm rilru hle. Hmanhmawh takin Nupuii nen an inhmuhna tur hmun lam chu a pan ta a. A va thlen chuan Nupuii chuan a lo nghak ran tawh.

“Min lo nghak rei tawh em?” Thut pah chuan a ti a. 

“Rei vak lo ve, eng nge chanchin?” A lo ti var a. 

Sawmliana phone a ruksak chu lek vâ-in, “Hei” tiin a khi var var a. Nupuii pawh chu a lo nui ve sâng mai. Tichuan, phone chu patern a dah avangin an han risk ta phawt a, a dik lo zel mai si. An beidawn tawh lamah Muanawma chuan L shape a han thai mai mai a, a lo inhawng ta mai, an phu zawk thei mawle. Phur em emin Bmi betu number chu Muanawma chuan a han type a, a han call nghal bawk. “Who?” Tihin a lo insave nia! A va mak dawn ve le..he number neitu hian Sawma pawh a lo be ve tho a nih hmel, a number a save dan atang erawh chuan tu nge a nih a hre bik lo tih a lang. Whatsapp an han lut dawn a, password a ngai tlat, risk ngaihna thlawt an hre ta lova, an hriat duh ber an hre tawh tho tiin thil dang chu an en em em lo, sawmliana chu a fimkhur hle a nih a rinawm, application pawimawh deuh ho-ah chuan security password a dah vek a, gallery takngial pawh an hai thei lo. Chuti taka a fimkhurna te chuan rinhlelh a tizual tulh tulh zawk. A phone a bo tih a hre tawh ngei ang a, tia an sawi dun rual deuhthawin an rawn call ta chiah a, Muanawma chuan Nupuii a pe ta vat. 

“Hello, aw hei ka chhar a, aw, Ih, thawmhnaw dawr pakhat bul lawkah a nia, patern a dah bawk sia, tihian an lo call hun ka nghak tawp.” A ti ta zung zung a, a thluak a tha fahran hle mai. “Aw, tunah chuan city park-ah ka awm a, rawn la mai ta che. Lirthei ka nei si lova, rawn pek dawn chein..aw le, ka lo awm ang .” a ti leh sawk sawk a, a dah ta. 

“A phone a rawn lam dawn,. I hawn vat a ngai, a hmuh che chuan a tha lo” Nupuii chuan a ti a. 

“Mahse, nangmah hi a hre lo che maw? Amawii vang pawn” Muanawma’n ngaihtuah hmel taka a tih chuan “Hre lo, kei chuan ka hmu tawh a, ani chuan min la hmu ve lo hrim hrim, hmanhmawh rawh.” Tiin a tur ta sek a, Muanawma pawh chu hmanhmawh takin park atang chuan a chhuak ta a. In lam a pan ding nghal, Sawma phone chu hman vék vàwka chinleh a chàk kher mai. Mahse, a hriat chhunah a lawm tho mai. Tih vak ngaihna awm chuang hek lo le..kha number kha Bmi te lam pawn an chhui tawh kha a nia, a booktu hnen atanga rukbo a nih lehzel si, chhui zui vak ngaihna a vâng dawn hian a hria. A khat tawkin a call leh zauh zauh thin. Switch off ngat ngat mai chu a nia,.hmm, tihtheih a nei ta vak lo. Call a dawng a, a fimkhur hle, number ringawt a nih avangin..

Tîm angreng tak hian, “Hello” a han ti a. 

“Hello, Muanawma a ni em aw? Bmi ka nia. Amawii thiannu kha..” a rawn ti tliang ral a, mak a ti hle. “Ehe! Aw hria e, eng nge ni ve teh mial?” Hamhaih ru deuh hian a han ti a. 

A aw thian kharhin, “Aa, englo a nia, Amawii hnen atangin kan chanchin hi i ngaihven riau niin ka lo hria a, a chhan te a awm em?” A rawn ti ta mai. 

“Maw?! Chutiang ka va’n hre lo, engtin nge a sawi a?” A han ti ngial a. 

“Nupuii khan Amawii kal tlangin video vel min rawn thawntu number kha min rawn dil a, Amawii bulah nangma diltir angin a sawi sia, ka ngai haw chuang lo a nia,. A chhan ka hre duh mai mai” nem diai hian a rawn ti a. Muanawma rilruah thildang a rawn lut, “Bmi hi engkim hrilh ila, thawhpuiah ka siam thei maithei asin” tih hi..

“Nia, UBm, englo a nia, thil pawimawh tak hrilh che ka duh a ni. Mahse, phone-a sawi chi a ni lo..” a han ti a. “Sawi mai la , hmaichhan nen a inang reng alawm” a rawn ti naa, “Tunah chuan ka thei rih lo “ a tih tlat avangin, “Aw le, naktukah eng nge i tih dawn?” A rawn ti a. 

“Exam ka nei leh dawn a, mahse, chawhma chauh” a ti a. 

“In exam zawhah kan inhmu dawn nia..a tha em?” A rawn ti a, tiang chuan rem an ruat ta a ni. Nupuii a va be leh, “Ka hming i sawi tel em ni? Eng nge kan hmachhawn dawn ka hrethiam ta hauh lo mai.” A va ti a. 

“Amawii khan min ringhlel tlat a, ‘Muanawma khan hriatchian a chak tlat a, engvang nge ka hre bik lo, chhui a tum a niang, u Bmi a khawngaih vang a nih ka ring’ ka ti ta tawp a nih kha..” a rawn ti a, han thinrim viau dawn se Nupuii chu a kut ke ber a nih bakah a la ṭangkai nasa dawn si, “A pawi lo e, tihdan a awm mai ang “ a ti ta ringawt a. 

Zochampuii a hrechhuak thut, a ngawihsan leh ta vang vang kha a nia. Han call leh pawh a tîm deuh tlat, mahse, thupha chawi a duh, a ruih laia a duh duh a lo sawi khum kha. A nunhlui chu engpawh lo nise, ralkhat atanga rilru hrehawm taka siam chu a duh bik lo a ni. A call ta nge nge a. A ring ral ṭhak. A luhlul a chhuak nge ni a call nawn leh ngat, a rawn la ve ta hram a, “Eng nge ni ta?” Awki ngaihnobei vak lova a rawn tih chuan nuam lo a tihna a zual hle.

“I va buai awm ve” pangngai tak chuan a ti a. 

“Nia, hei inleng ka nei a.” A ti hmuk. 

“Champhaiah maw?” A ti hû a, an khua chu nise Rinliana te an leng ngei mahna. “Aw, ka û te inah” a ti duah a. 

“Aw le, a ṭha, kawm rawh. Mangṭha le” tiin a dah zui nghal, khatiang thil thleng zawng zawng a hre vek tawh chung pawha Champuii laka a thikthu la chhe tlat chu mak a tiin tlawm a inti bawk. Tu mipa tak chuan rim ang maw..lehkha pawh a zir tui hleithei meuh lo, a tuk chu an exam zawh nî a ni tawh a, a tum dan chuan Nilaia hawn kha a rilruk a, mahse, Bmi nen an hun tawn azirin a haw tlai pawh a ngai maithei. Rei pawh zir loin a mu ta daih a, a mut erawh a tui tehchiam lo. A mang a chhe ve bawk a ni, Sawmliana nen lei pakhat awngrawp tawh takah hian an lo insual chiam mai a, a hnuai chu tuipui thuk hmel zet a ni nghe nghe, Sawma lah chu a chak phian a, a bet zawkah a ṭang ta zeuh zeuh, lei lah chu a sang bawk si, a che lûi lûi lehnghal a, an insual tui em em lai chuan lei hmawr lamah chuan hmeichhe pakhat, a hmuh tawh hnu niawm tak hian tawpsan vat turin a rawn au tuar tuar mai a, tu nge a nih chiah tih a va hrechiang thei si lo. Chutia chu hmeichhia hriatchian tuma a thlek vang vang lai tak chuan Sawmliana chuan lei sang tak atang chuan a hnuai tuipui dum kûkah chuan a namthla ta vawn vawn mai,.a lu a tauh chawrh avang chuan a mang ram aṭangin a harh ta hlawl a, khum atangin a lo tla thla a lo ni. Chhuat vawt zetah chuan a lo mu reng mai a, rang zeta thoin khumah a inthawlh zui nghal vat. A muhil leh tawh mang lo a ni e. A mumang chu a ngaihtuah zui vang vang a, awmzia a neih a beisei hle. 

Zothana nen chuan titi phung satliah sawiin an ṭawng dun ve bawrh bawrh a, Zothana chuan amah beiseina lam hawi ang thu vel chu engmah a sawi tawh bik lo. Champuii pawh chuan thian angin a kawm ve mai a, a rilru kil khatah erawh Muanawma a awm reng tho, a rawn biak khan a lo chhang tha duh lova, mahse, a inchhir hran lo, a duh hun huna biak thata biak chhiat theih a ni bik lo. Eng mi pawh nise hlutna a nei ve a, hluttu pawh a nei ve bawk. Muanawma nen an inkar chu engtin pawn lo tawp se a tuar thei lo zawka ṭan a tum lo bur bawk. A tuka haw tum kha a ni naa, a û ten an chelh ve bawk nen, bakah a û te uapna hnuaia awm rih chu pawi a ti lem lo bawk a, cham rih a tum ta mai. Muanawma vanga hawn phei chu a tum lo bur, duh zawktu anga lan reng kha a duh tawh bik lo. Zothana haw hnuah a u mu tur chuan, “I bialpa nen in tha vak lo mi? I zia hi a dang riauin ka hria” a ti ta chiah reng a, a nu boral hnuah nu ang maia a en, amah enkawla buaipuitu ber a ni bawk a, a lo chîk ru hle tih a hre thei. “Umm, nia, kan boruak a tha lutuk lo va, mahse, a lo haw ang a, a zia mai ang.” A ti ringawt. 

“Mate, kei chu Zothana hi nei thei la ka ti êm mai, i rethei dawn lo a ni tawp, Bungpui khua ka hmuhsitna lam ni loin thingtlang atang chuan changkan te hi a har asin, aniin eizawnna a neih loh phei chuan..” a ti mawlh mawlh a. 

“Kan innei dawn tihna pawh a ni kher hleinem, kan inthen lovang tih pawh a sawi theih loh hi..” a ti mai a. Zothana erawh Muanawma nen inthen mah se; ngaihzawng anga han en mai chu harsa dawn hlein a hria, chu eraeh a sawi duh kher lo thung. 

Muthmunah Joela a ngaihtuah a, ti nge hepa hi a lo ngaihtuah leh thut zel ni,. A la rawn be leh lo va, pasal nei anga a insawi vang khan a inthlahrung te pawh a ni mahna,. A pawi hran lo. Mahse, a rawn be pawp leh kher khan a rilru a rawn tibuai leh vek, “Lalpa, ka hmalam hun chu i thu nise, i thu dodal lo turin min pui ang che” tia ṭawngṭaiin muthilh tumin a chhing ta vang vang a. 

Muanawma exam pawh vawiin chu a helhhawlh nge ni a duh ang paw’n a ziak hleithei meuh lo, Bmi nen an inhmuh tur hlir a rilruah a awm a, eng nge a hmachhawn ang tih ngaihtuah loh luih hram a tum pawn a thei lo achha a ni e. A zo hma berah a ṭang a, Bmi nen inbiain Bmi patea te restaurant-a inhmu tur chuan an intiam a, muangmarin Bmi address sawina lam pan chuan a inkhalh chhuak ta a. A va thlen chuan Bmi pawh a lo thleng ve deuh chiah a, a lo nuih sâng mai. A nelawm viau naa, Muanawma chuan nuam tih loh rûkna a nei tlat, a inthiam lo a ni ber ang chu. An han ṭhu a, Bmi chuan coffee a laktir a, a rawn thlen hnuah chuan muangchang hian, “Han sawi teh le..” a ti ta a. 

Muanawma chuan coffee chu a han in tê tê a, chutah Senteii aṭanga bulṭanin Sawmliana’n a pawngsual dan, damdawi hmanga a hrai ruih dan leh Senteii thih dan te chu a hrilh fai ta vek a, Sawmliana man a nih hnua thiamchanga a chhuah leh thu te nen lam. Bmi chuan ngunthluk fahran hian a lo ngaithla a, a hmelah mak tihna pawh a lang lo, a hriatsa vek thil an ni bawk a, mahse, mak a tih tur erawh Seni chu Muanawma bialnu a lo ni reng tih chu..

“Chuvang chu a ni maw, Amawii te inah pawh khan i û chungchangah dâwt i sawi?” A han ti a. Muanawma chu za vak lova nuiin, “A ni mai ang chu, engtin nge i hriat?” A ti ve thung a. 

“Ka ring thiam mai, kan chanchin i ngaihven tih ka hriat khan i û vangah ka han ngai deuh a, mahse, chuvang pawh chu nise keini daih daih i ngaihven khan chhan dang a kawk thei tih ka ngaihtuah bawk a ni. Chuan, engtia hmalak nge i tum?” Tiin a mitah tak a rawn melh a, Muanawma chuan zahawm a ti rilru hle. Mahse, tlang takin, “Zoram mipuite hian thudik hria se ka duh a, Senteii hian rorelna dik hmu ngei se ka duh a ni.” A ti nghet charh a. 

Bmi chu a bu nghat, “I tawrh chu a namai lo hle mai, kei pawh ni ila i tih ang tho hian ka tih ve ka ring. Kei chu min vengthawng suh aw” a han ti té té a. “Puih theihna che ka neih chuan sawi hreh lo la” a tih zawm leh a. 

Muanawma chuan Bmi mitah tak en ve chung chuan, “Let leh tumna i nei tawh miah lo em ni?” A han ti té té a. 

“Aw..ka tum tawh lo, ani pawn min beisei hek lo.” A ti nghat a. 

“Min puih i duh ang maw?” A han ti leh a, “Aw, i bialnu pawisawilo khan a dikna chanvo hmuh a phú alawm, a thlarau pawh a chawl hahdam thei nang” a ti hap a. Thil thui tak ngaihtuah hmel a pu bawk.

Muanawma chuan a chil lem khawlhin, “Min puih i duh tak tak a nih chuan, Sawmliana hi hnaih leh la ka duh a ni” a ti ta a. Bmi chuan makti deuh tak hian a melh ngawt ngawt, a rilru pawh a buai hmel viau, nula puitling, fingvar leh rilru thianghlim, dik chu dik, dik lo chu dik lo ti ngam chin a ni ve tawh a, Muanawma chu puih a duh, mahse, pui tura a ruahmanna chu a tan a awlsam dawn hauh lo tih a hria. 

“Ka theih ka ring lo” a ti ta tawl a. 

“Ka ring reng a, chuvang chuan tuna kan sawi zawng zawng hi nangmah chauhin hria la, lo vawng ṭha la, keiman hma chu ka la mai ang” inringtawk takin Muanawma chuan a ti ta a. Bmi chuan tîm deuh hlek hian ,”A nih Sawma chu hnaih ta ila, eng nge ka tih ang?” A ti ta thung. 

A kutzungtanga dawhkan tlir zaih zaih chung hian, “Kha number, video rawn petu che kha Sawmliana hian a hria nge hre lo tih hriat tum la ka duh a ni.” A ti nghet charh a,. Bmi chuan a chal a chuar nâng a, “A hriat ka ring hauh lo, ka hmakhua a ngaih avanga khatianga a ruk arala min rawn betu chuan engvangin nge ka pasal hual chu a biak duh ang?” A ti ve ta khauh a. Engkim sawi law law thaa a hriat avangin Muanawma chuan Sawmliana phone an ruksak thu leh kha number a save dan te kha a hrilh ta a, “Nangin kha number kha i pe a nih loh chuan engtin nge a phone-ah khan a awm theih?” A tih zawm a. 

“Number kha ka pe hauh lo, tumah ka pe lo, ka pa nen airtel office-ah kan va chhui a, ka pa chuan number kha a vawn pawh a vawng lovang, bakah Sawma chu a pe lo hulhual bawk ang. Engtin nge a lo neih ve mai le?” Rilru buai hmel tak hian a ti a. 

“Chutak chu alawm, kha number neitu khan a va be ve tho tih a lang a, a blackmail nge, eng thil chiah nge an inhrilh tih hi ka tan hriat pawimawh lutuk a nia. Kha number neitu kha hre thei ila chuan amah kha thuhretu atan kan hmang nghal thei dawn tihna a ni a, khati khawpa chianga thil hria chuan thil thlen hunlai khan engkim a hmuin a hria tihna a ni..mahse, tu nge a nih kan hre si lo.” A ti ta duah a. Bmi pawh a inngaihtuah ve ta rauh rauh mai. 

“Muanawm, i zahawm chu ka tia, mahse, engkim ka titawp tawh a, va hnaih leh chu ka tan a tlawmthlak bakah ka chhungte ngaihdan a nih ka ring lo. Tu emaw rawih tur kan zawng mai dawn em ni?” A han ti a. 

“Engtia ruaiin maw?”

“Aw..sawmliana ngaizawng dertu tur, mipa lepchiah tak a nia, a hmeichhe duhzawng ka hria alawm, mahse, tu nge kan han rawih ang aw..” a ti vang vang a. Chuti taka Bmi inpekna chu hlû a ti a, zahawm a ti bawk. “Aa..U Bm, inrawlh tawh lo zawk mai rawh. An hrechhuak palh ang che, min pui angah tikhan inngai rawh, ka lawm tawk lutuk, keiman ka chingfel mai ang, hun a lo duh deuh a nih pawhin ka nghak thei alawm..” a ti ta a. A rilruah thil eng emaw ruahman a nei ru khiau tawh thung, chu erawh sawi kher ṭul a ti ta lo. 

“Thil dangah puih theihna che ka neih chuan sawi hreh miah suh aw” Bmi chuan a ti hram a, hmeichhe mak ve tak zawng a ni e. Muanawma pawh rilru engthawl takin a haw ve ta a. Zanriah ei laiin anuteii chuan, “Bawiha, i û hi hau ve teh, mo kan awt ve tawh si, ani lahin neih a tum reng reng si lo , kan Judy lah lentar tum bawk, a hahthlak lutuk” a ti hlak hlak a. Jerry a lo nui ruh ruh mai. 

“Hauh ngawt chi pawh a nih loh chu, a duh miau loh te chuan..” muanawma chuan a lo ti a. 

“Tunlai ṭhangtharte hi chu nu leh pate zarah in khawsa nuam tawh lutuk a, nupui pasal neih pawh hi inngaihtuah tawh lo, nulat tlangval hi in kham thei lo a nih ber mai hi maw, Judy pawh ‘Mi inah ka mo peih lo’ te i han ti rawk a, i thatchhiat vang mai mai a ni, hna chhetê in nei a, mi ina lawi in han hreh ringawt a. Hetiang hi in ni reng dawn lo a nia, nakinah kan boral hunah engtin nge in awm ang? Nu leh pa sûn te hi nupui pasalte nen chuan a nat dan a ziaawm ngai, bakah mal ngâwka awm reng ai chuan min dinpuitu an awm te hian kan lang zahawm ve asin. Tin, in han upa ang a, tuin nge enkawl ang che u, fa te hi neih ngei ngei tur..in mak lutuk em mai, nawmsak in duh leh lutuk zawk nge ni..” tiin anuteii chu a han âng leh hlak hlak a, a tih fô dan a ni a, tuman huat enah an en lo. An pa zawk chuan, “Chaw eikhamah tal áng rawh, an chaw ei i titui lo zo ang” a lo ti sup a. 

“Nang lah hi nêm duai ringawt zel mai. Engmah lah hi ngaihtuah ve lo” a lo ti hawk a. A tûm bâr mai. Jerry chuan, “Mom, a huntêah chuan i fapa hi ka rah dawn alawm, lungngai hmarchate..” nui chung hian a han ti a. A nu chuan a melh no lo teh e. Judy pawh chuan, thawh pahin, “Pasal neih ka peih ngang si lova, sâwn tal pai phal mai r’u” a la ti zui.

“Lalnunmawi, ka hlap mai ang che aw..” anuteii chuan a ti vin ṭhak. Mahse, ani zawng tikhan a han âng hlak hlak a, a thinrim zualpui a reh a ni deuh mai. Hei vang hi nia Muanawma pawn a ngainata thlen in atan ber a hman thin ni. 

Champuii pawh a û fate nen an infiam vel mai mai, Zari leh Lucy te nen an invideo call zo deuh chiah a, Rinliana lahin a rawn call sek bawk, a la duh der si lo, sual chu a inti ve reng. Lawma leh Kima te erawh thingzaiin ramah an riak a niawm e, signal an nei lo a ni maithei. An rawn dîkdâk lo êm mai, Bungpui lam pawh a ngai ve tho mai, Zari te bula inbunruah te a châk a, mahse, Muanawma nena hmaichhana thil sawi dun phawt tha a ti bawk si. A rilru a insual nasa viau. 

Joela’n a rawn call leh a, lak loh a tum zet a, eng nge a sawi duh tih hriat a chak leh si avangin a pick up leh ta nge nge a, “Hello”

“Aw, Champui, ti nge dawt min hrilh?” A rawn ti ta mai. 

“Eng a? Eng dâwt maw?” A ti hâ a. 

“Pasal i la neih loh kha,.” A rawn ti. 

“I hre ngawt ngawt mawni le” a ti hap a. 

“Hria hria, I thiannu Bawihi ka zawt alawm,.” A rawn ti ta. Ni e, Bawihi chu an college kal chhung zawnga a thiannu ve ber a ni, hetia an han kal hran hnu hian an inbe khat ta deuh a, biak erawh an la inbe zeuh zeuh tho. “Nih chu” a ti ta ringawt.

“Min hnar i duh luat vangin dawt i sawi tiraw?” A rawn tih chuan, “Aw” a ti hmiah. A ni miau sia lawm le. Joela za lo zeta a nui hak chu a hre thei, “I lo danglam ta hle mai tiraw?” A ti a.

“Mihringte chu kan hun tawn azirin kan danglamin kan danglam lo fô alawm, ti nge min lo biak ziah a?” A ti ta a. 

“Thil pakhat zawh che ka duh a ni” thutak fê hian a ti a, “Sawi la” ngaipawimawh lo zet hian a lo ti. 

“Ka fa kha i titla nge i chhiat?” A rawn ti ta a. Champuii pawh a meng buai deuh, pangngai leh vatin, “A pawimawh em ni? “ A ti ve ta khauh. 

“Pawimawh e, ka hre duh a ni, thudik tak min hrilh hram bawk rawh” ngenngawl zet hian a ti a. 

“Ka chhiat” a ti tawi tak. A mitmeng chu a ling hlar mai,. “Ti nge a tirah khan min hrilh loh?” Zaidam tak hian a rawn ti a. 

“Hrilh che khan awmzia a nei em ni? “ A ti let ve thung.

“Min hrilh ni la chuan thil a danglam deuh tur a nia” a ti zawi sup a, Champuii chu a nui hawk, “Khatin thuhnu rawn tharthawh leh chu tum buai duh suh, ka danglam tawh, Joel,.” A ti fiak ṭhak. 

“Dah suh aw, engkim ka hrilhfiah thei che’ a rawn ti ṭâwk ṭâwk a. Champuii pawn zahngaihna lantir hun a lawm tiin a dah ta bik lo. 

“Nancy kha i hria em? Ka thianpa Chhuana cousin kha,. Khanu vang vek khan ania thil kha a chhiat tak” a rawn tih chuan, Champuii insangmar ṭeuh pawh chu a bengdai ta deuh a, “Hria e, ani chuan eng nge a tih a?” A awkâ erawh chuan ngaihno a la bei tehchiam lo. 

“Ka’n sawi ang e aw. Tun hnuah ka hrechhuak leh sia,. I rai hma atang tawh khan Nancy khan i thian mipate nen in ruih thin thu te, ka tel lova in len thin thute a sawi thin a, mahse, ka awihsak ngai lo. Mipa i kawm thang tih ka hria a, thik pawh ka thik ngai loh kha. Nau i han pai a, neih che kha ka tum lo a ni lo, ka pa nen kan inhau hrep a, aniin nupui neih a la phal si lo, zan khat phei chu kut min thlak hial a, Chhuana te inah zan 2 lai ka va riak ta nghe nghe a ni. Chutih lai chuan Chhuana nu a damsam loh avangin Nancy khan a lo awmpui ve a, Chhuana te chu a nu leh amah bak an nih loh kha..I rai thu leh nangmah vanga ka pa nen kan intihthiam loh thu vel ka han sawi chuan, ‘I fa a nih i ring tak tak elo?” Min ti ta a. Mak ka ti lutuk. 

Ani chuan video pakhat, Inferno kan hman zana Hall phêna in thianho lamna vel chu min entir a, khami tum khan kei chu ka nau an zai avangin ka rawn kal loh kha..in lamna ringawt chu min entir a tum ber a lo ni lo va, tu ber nge ka hre lo, chu pa nena a bike-a hmun danga in inphur lai chu min entir ta zel a, mipa hostel lam panin in tlan nghe nghe, a bak chu a awm tawh chuang lo. Nancy chuan, “Tikhan i fa a nih i la ring tho em? Bumin i awm tih i inhre si lova’ a ti kual a, a tirah chuan ka awih phal lo. Lo biak che ka tum a, i busy char char bawk si chu ka thinrim ta em em a.

Ina ka haw hnuah pawh ka ngaihtuahna a luah ta reng a, nangmah rinhlelhawma i awm theihna tur lam hlir ka ngaihtuah a, i nau pai pawh ka fa a nih loh ka ring ta hial a. Ka chiang ngam tawh lo a ni ber. Inah ka haw a, sâwn man an rawn ṭhing bawk a, pe turin ka hrilh ta a nih kha. Tikhan titla turin ka ti che a, ka fa a nih takzet chuan a titla lovang ka ti rilru a, mahse, a hnuah khan i rai ta si lo. I titla ta ni ngeiah ka ngai ta a. Tun hnuah Nancy kha ka pi cancer ka awmpui ṭumin ani pawh chhul cancer vangin a lo awm ve reng a, khang hun lai khan min lo ngaizawng ru lutuk a, khatiang khan chet a la ta mai a ni tih thu a sawi ta a, a sawi dik ang tih ka rinna chu nang leh kei kan inthen hnu khan Nancy chuan min lo be nasa thin, mahse, ka duhzawng a nih loh bakah Chhuana cousin a nia, ka be tha ve ngai lo a beidawng ta a niang, a reh ta a. Keiin bialnu neiin nupui hial ka nei ta a. Mahse, kan inthen leh a, tunah hian ka fapa pawh keiman ka enkawl a ni..nancy inpuanna avang chuan hrehawm ka tiin ka ngai thar leh em em che a, Pathianah piantharna ka lo chang ve bawk nen, ka inchhirna chuan nitin min tibuai a ni ber mai. Chuvangin ti hian ka theihtawpa i number dapin ka rawn bepawp leh ta che a nih hi..” 

Joela thusawi zawng zawng chu hmaih awm hek loin a lo ngaithla a, a lungphu a rang kher mai. A ṭah te pawh a chhuak tel nghe nghe. Nancy hmel chu a la mitthla thei, an inkawm ngai lo va, biak pawh an inbe ngai hek lo. Engtin nge chutiang chuan ‘Hêm’ a lo thlak theih le? Khami zana bike-a phurtu kha a thianpa Tetea a ni tih Joela chuan hria se a danglam mahna, Tetea chuan bialnu nghet a neih bakah a unaupa ang a ni, an hostela an kal chhan pawh amah Champuii khan vawt a tih deuh avangin leh an hostel a hlat deuh avangin Tetea kawrlum hak hawh tur an zuk la tih te thlengin a la hre thei, khatianga an chetla lai kha Nancy chuan a lo cover vek a nih awm chu! Hrep tak chuan..

“Jo, tuin nge ka virgin hawng?” A ti sap a. A mitah mittui a tling piau mai.

“Keiman” a rawn ti ban charh a. 

“Tikhan phatsan tur chein min la ngai thei a maw? Chupawh fiahna awm lo, keimah tal kha min zawt la thudik i hre mai tur, nangma thuin thutlukna i siam a, nangmah leh nangmah i intichhia a nih kha. “ A ti ta sak sak a. Joela chu a ngawi reng..a ngaihtuahna a kal thui ve hle ang chu.

“Ka tihpalh” a rawn ti thâm ṭuak a. 

“Aw, tikhan ka ngaidam che. Rilru nuam takin awm tawh rawh. Chuan, inbe tawh lo ang..” Champuii chuan a ti hawk a. 

“Ka thei lo” a rawn ti hmiah..

“Keiin ka thei alawm” tiin phone chu a dah ta a, a chhungril khur der der chu a duh lo hle. Joela nen an kal hran chhan dik tak a hriat chuan ‘Feelings’ a lo la nei reng tih a inhrechhuak chiang kher mai. Mahse, a hma ang a ni thei tawh lo, a tuar zo tawh. Hmalam hun atana ke pen a thlang zawk. 

Muanawma chuan, msg a type malh malh a. 

“Nangmah vanga pawisawi lo nunnain a tawrh phah hialna, hmeichhe thianghlim i pawngsual dan dik tak leh video hi zoram khawvela ka tlangzarh i duh loh chuan, Cheng nuai 3 ka sawina hmunah i lo dah tur a ni. I ti lo a nih chuan, a tir aṭanga i chetdan leh a tawp thlenga ka video kawl hi ka phawrh nghal ang. Police i pun a nih leh jail run thim kan bêl dun mai a niang chu..” tiin. Sawmliana numberah chuan a thawn ta hmak a..chu keypad phone, tlaia a hawnlama a lei chu switch off leh hmakin lukham hnuaiah a rawlh ta thân a.