zochampuii 6

ZOCHAMPUII (6)

Ziaktu : Toni Râlte

Tlaivar ve ve ta chu thawh pawh an hai chiang hle. Muanawma te chu a karleh daiha exam tawh tur an ni bawk a, pawi a ti hran lo. A chhungte paw’n chaw an lo eisan tawh a, a lehkhazir mengreiah an ngai a ni maithei. A nu nen an inbe zuai a, “I pa pheikhawk ṭhuina tur hrui hi lo hawnsak teh” a la rawn tizui! A va han timing lo thei tak, “Nu, ka lo hawn dawnah lo sawi rawh, ka theihnghilh leh hman ang” a ti a. A mood a off viau nain a tette aṭangin a nu leh pate hi awka vin takin a be ngai lo tihtheih a ni, a han petek ve zuai lai pawh khan an hmuh laiin rui angin a awm ngam ngai lo. A rim aṭanga an hriate a nih ngawt loh chuan a chhungte pawn an hre mai thin lo rêng a ni. A han sual ve tak tak lai pawh khan Pu Ngura te nupa hian Seni vang a ni tih an hrethiam a, hauh vak vak a sâwt lo tih leh a hel mai mai zawk ang tih an hlauh avangin ṭha takin an sawipui thin. A tawrh kha a na ve êm mai a, bakah a la puitling bik lo nen. Hmangaihna thinlung nen chaw nghei leh tlaivar zak te’n an nupain an ṭawngṭaisak thin a, an ṭawngṭai chhanna pawh kar lovah an hmu ve ta mai bawk a, Pathian hi chu a lo awm takzet a ni. Champuii msg pawh a lo awm vâ a, “Morning, thawh ka hai a..” a rawn ti. “Keipawh” ti chiahin a reply. 

Champuii pawh naupang exam paper a check zawh hnuah in te a han tifel leh tê tê a, tihfel tur vak erawh a tam lo, chumi zawhah a insiam ta a. A tuk inrinni-ah Champhai lam pan a tum a ni. A û te lahin an lo nghakhlel tawh nasa, boruak thar hip pawh a mamawh ve hrim hrim mai. Bungpui aṭang hian Champhai sumo pakhat bak a tlan lo va, Driver number a nei si lo, Zari te in bul lawkah in an luah tih hriain len pahin rawngbawl hma deuh si chuan a va chhuak a. Dami te chhungkua nen an intawk hlawl, “Khaw nge in kal dawn?” A lo ti vat a. “Hei, U Zuala patea te kan va tlawh ve dawn a nih hi, chaw pawh kan ei nghal ang, nang zawk?” A lo ti siam siam a. A kalna tur a sawi chuan, “Hmm, kan lo zin veleh min zinsan leh dawn si a ni maw? I phakar ve e, tak taka han zin rawh. Ṭhenkhatte an la zin tho bawk sia.” Awmze nei zeta mit kiai sak chung hian a ti a, Champuii pawh a nui ve ringawt. Dami hi chuan a nu a chhun lo ve khawp mai. An in chung nuthlawi Ziri sawi danin pasal a neih hma chhan pawh hi a nu vang a ti, a nu hian Hmingi hi a duat bik bakah Dami chu an khaw thenawma pathlawi hausa, fa pawh pathum nei tawh nei turin a nawrlui a niawm e. Ani lahin a duh bik si lo, Pu Muana lahin a nupui a ngam mang si lova, tichuan, tuna a pasal Zuala nen hian an inru ta ngawt mai a niawm e. Pi Duhi chu mi pawn an dem viau niawm tak a ni,. Hmingi lah a nu siar a nu siar a lo ni bawk nen,. An tlangval Faka lah ṭham ṭhen a nih avangin in chhungah thu a nei tlem nasa si a, an in chhung roreltu chu pi Duhi a ni tawp mai a ni. Chuvang a nia an in chhung a nawm loh em em. Zari te in a thlen chuan amah a lo awm lova, Vengtharah a lo kal daih, driver te inah chuan a va lut ve ta tawp a, a kal vawikhatna a ni. A nupui a lo awm a, “Naktukah seat ka la chang thei ang em le?” A ti a. An nu chu amah ang thoa nu tê ve, ngo vir ver, nelawm reuh tak hi a ni a. “Lo thu rawh, tui a chawi lawk a, a lo haw ṭep ang, i lo kal khat em hi” a lo ti sawk sawk a. A thu ve mai bawk. An pa lo haw hma chuan an titi ve nasa a, a hriat ngai loh thil pawh a hre ta nual, Nunui chu fel viau mah se; thil zêp thei vak chi a ni bik lo a nih hmel.

“Muanawma nen in ni hi thenkhatte chu an lawm lo teh asin, a bikin hmeichhe ho..” tiin a nui har har a. “Tu te nge maw lo lâwm lo ve ringawt le..” a ti satliah a. 

“Saw, i pa Muantuibura fanu te, khiitah Lateii te ho te, an awm nual..” a ti bawrh bawrh a. Hmingi tak kha chu a rin ruksa a nih avangin mak a ti hran lo va, Lateii tehdaih a lo lawm lo ve ringawt chu mak a ti angreng, “Lateii i tih chu Muanawma bialnu boral ta Seni ṭhiannu kha a ni em?” A han ti phawt a, a nih thu a hrilh chuan, “Ti nge ka lakah a lawm loh ringawt le..Muanawma a ngaizawng azeng pawh a ni si lo “ a ti sep a. 

“Seni lakah a thikthu a chhia a niang an ti mi pawn. A áwm ve tho, an inkawmngeih êm a, mahse, a boral tawh a, a laka thikthu lo tihchhiat vak kha a ṭul hran lo e ka ti..lawmpui zawk awm tak a nia” Nunui chuan a ti a. Champuii ngaihdan pawh a ni. 

“A buaithlak a nih hi, Muanawma hi ṭhen ila miin min ngei lo mai ang..” a tifiamthu a, “A ṭul lo, ṭhen miah suh, in inhmeh kan ti thei lutuk,. A chhungte pawh khu an lawm ru viau ang, Muanawma hian hmeichhia a ngaihsak lohna a rei tawh sia maw..” a tih mêk laiin an pa tui chawi pawh chu a rawn haw ta a. Champuii chuan a kal chhan chu a han sawi a, “I vannei chiah chiah, seat khat chiah a awm tawh a, a hnung berah i thu peih ang chu tiraw?” Nuna chuan a ti a. 

“Peih e, a hla chuang lo bawk a.” A lo ti sam êt a. Tichuan, an fel thawkhat. Rawngbawl a hun tawh avangin ani pawh a haw ve ta nghal a. Ankasa a kan laiin Ziri a rawn chhuk a, “Zin chu i tum ta tiraw? Gpay tih vel ka khawih ve si lova, tihian envelope-ah hian pawisa ka dah a, kan pa chuan a rawn lam mai ang, i û te in awmna pawh ka hrilh tawh kha..” a ti zung zung a. 

Champuii chuan, “U Zir, hetia inbe reng tho si chu innei leh mai u la, naute in tikhawngaihthlak, ani paw’n zu te chu nghei hun a nei ve mai law’ng maw?” A han ti a. Ziri chu beidawn hmel fê hian a ṭhu deuh hnawk a, “Kan buaina hi zu vang ringawt a ni hleinem, a chhungte pawh hi an tel alawm. A nauin nupui a neih hnuah pawh in dan an phal si lo, kan pa tha hi chhawr loh an hlau ka ti mai. Kan chhungkua kan rual tawh si, an farnu nuthlawi ve tho lahin fa pahnih a rawn hruai lut a, a naute nupa lahin fa an nei ve bawk nen, keini lo ni bawk. Ka nu nuṭa kan awmpui bawk si, khawsak a harsa ve zel a, kan pa hi a taima êm zawk a, zu te chu han in ve thin mah se, hnathawh a ṭhulh phah ngai lova, a hlawh lah ka hmu ve ngai lo, ka nu ten an pumbilh nghal zel a, stayfree eng ilo mamawh pawn dil zel an ngai a, dil lahin an phun ziah bawk si. Kan pa lah a nep ve bawk a, ka kutah a zahtve tal dah rawh ka tih pawn, ‘Dil hreh suh, ka thawhchhuah tho alawm’ a ti zel a. Chuvang chuan tihian ka hrem rih a nih hi..ka han awm lo chiah chu an khawsak a buai ve hle a niang, kan pa pawn ka harsatna te a hrethiam chho a, hna a thawk duh ta miah lova, karlehah hian khawmpui an nei dawn a, kamiz leina tur ka thawn dawn a nih hi, khawmpui hi zo se, ka rawn hruai ang che, kan in dang hmak dawn nia, a tia lawm..” a ti ta mawlh mawlh a. Champuii pawh chuan, “A nih chu a, zu vangah riak ka lo ngai asin” a ti ve mai a. 

“Zu chu chutin a in nasa lo, mahse, in lo se ka duh lutuk. A hnathawk hi a chau ve thei sia, a nau lah khi a nep ve bawk sia, an nu lah a nute in lamah a tâp chawt a, engmah tih reng reng tum lo, an nuthlawi lah ka sumdawng e a tia, parh zet zetin a inchei a, a fate kan kutah a dah tawp a, ka phur kha a rit ve êm a ni. Tihian ka han awm lo ta a, an buai zia thu ngawt kan pa pawn a sawi alawm, ka nu ber a chetu a nia, min ngeih lo ber khan min ngai ru viau tawhin a nia ka rin ni. “ Tih pahin a nui hak hak a. Champuii pawh chuan, “Hmeichhia hi chu kan lo sual a nih hi tiraw? Moin a nu a sêl a, a nuin a mo a sêl bawk a, inrem taka khawsa ho thei reng, ti nge rilru hrisel lo deuh hi kan put tlat zel ni..” a ti ve duah a.

Ziri bawk chuan, “Mo thenkhat hi chu kan sual alawm, kan pasala chhung ten fanu ang tak taka min en turin kan duh a, kan chhungte ang tak takin kan en ve thei chuang si lo. Kei chu mo ka nia, an fanu ka ni lo, an fanu angin min en se ka ti miah lo, ka nu pawh ka nu min hringtu ang takin ka en thei bik chuang lova, mahse, inrêl lo ila, sawisel kan ngaihna zawnah insawisel tawn ngam ila, kha kha ka duh zawk. A ruk arâla thil tih kual vel hi ka ngaithei lo..” a ti ve bawrh bawrh a. A sawi chu Champuii pawn dik a ti viau,. Ziri hi mi rilru chhia a nih lohzia chu tuna a nuhrawn pi Zuali hi amah aiin a kum a tam over miah lo nachungin a zah thiamin a inthlahrung thiam a, Pi Zuali lah nu â lo tih takah Ziri fa pawh a duatsakin a tu ang tak takin a en thei rêng bawk a ni. Hei hi chhungkaw nihdan tur a ni. Kan kual thui leh dawn, duhtawk ang. 

Muanawma pawh ni 2 hun a la neih avangin a inthlahdah ve deuh a. Jerry a lo haw bawk nen, an titi ve hlut a, Jerry chuan zanah a bialnu rimpuiah a sawm a, boruak thar hip a mamawh bawk a, a remti ve ta nge nge a. Nupuii nen an la inbe leh lo va, Bmi pawh a number chu nei tawh mah se, va biak a tum rih lo. Thil kal dan thlir phawt a duh a ni. A hmanhmawh luatah manchhuah a ni palh ang tih a hlau ve deuh. Zanah Jerry bialnu rim tur chuan an inzui chhuak ta a, a bialnu hi Teteii niin a nulian fû mai a, Muanawma erawh chuan a bialnu tê reuh tê Champuii a hrechhuak zawk mai. Hmeichhe lian deuh hian a hip vak lo, an zei lo tlet tlut hian a hre tlat, Seni pawh kha a lian lem lo hle. Teteii chu a felin ṭawng a duh bawk a, Muanawma nen pawh an inbe ve bawrh bawrh mai. Thingpui lum tura a thawh lawk hlanin Andy leh a thianpa te an rawn lut ve hlawl mai. Andy a hmuh rual chuan engtin emawni hian a awm a, a sawi thiam chiah lo. Andy pawh chuan a lo la hre ve a, an han inchibai leh hnuhnawh,. Andy kawihlet hrep tawh kha a bialnu a ni tih Andy hian hre ta se a ngainep ang nge a nuihzat ang? A khawngaih ang nge a hmusit ang? A rilru a kawm tui luat vangin koh pawh a hre thei lo va, “Muanawm, Muanawm, hei, eng nge i lo ngaihtuah veng veng a..?” Jerry chuan mak tih hmel fê hian a lo ti lung lung a. Harh zawkin, “Aa..eng vak mah,.” A ti ringawt. Andy thianpa Fela chuan Teteii nau Seni ve tho a lo rim ve chu niin, chuvanga in pakhata inhmu khawm ta an ni. Andy chu sawi tawh angin nupui a nei kan tih tawh kha. 

“Andy, engtik nge naute hmel kan hmuh ve dawn?” Teteii’n a tih chuan, “Aa..ka hre lo le, kan nu hi a rai thei lo nge mawni” nui lui tih hriat deuh hian Andy chuan a lo ti a. 

“I beidawng hma a nih kha, mi te pawn kum 2 chuangte asin an nghah” Jerry chuan a lo ti ve a. 

“A ni ngawt lo, inneih chuan fa kha kan thlir hmasa ber lo thei lo. Nia, mahse, engkim hi Pathian ruat a nia..” a ti ve leh thluam a. Pa hmeltha leh lian, hmeichheho duhzawng tak tur hi a ni a. Champuii khan engvanga neih kha duh lo tlat nge maw a nih dawn chu ni..

Andy te chu Seni’n hla a zir dawn avangin an thu rei lo, Seni hi a zaithiam ve reuh a, an hma lawk khawmpuia zai tur a nih avangin zaninah pawh hla an zir leh dawn a niawm e. Andy te chhuah hnu chuan, Teteii chuan, “Andy chu ka khawngaih thin ngawt mai, fa hi a awt ve sia, hei kum khat dawn chu an innei ve tawh a, an rai thei bawk si lo. An nu nge amah zawk hi dik lo pawh ka hrethiam lo.” A ti niah niah a. 

Jerry chuan, “Amah te hi ka ringhlel deuh rum rum asin, a chhan chu phaia a awm laia a kawp, nupa ang thaw thanga a chenchilh nu pawh kha a rai thei tlat lo, a in dang nge chu ka hre chuang lo va” a ti ve mai a. Muanawma bengah erawh chu thu chu a ring ngang mai. Tu nge an sawi chu a hre ru kur si. “Ni ve tho mai, kha nen khan an innei turah ka lo ngai tawh a nia, ngati nge maw an inthen ni, an induh ve hle khan ka hre sia..” Teteii chuan a ti a. Muanawma chuan sawi zawm zel tawh lo se a duh tehlul nen. 

“A hmeichhia zawk khan a then daih alawm, ‘Pasal neih ka tum lo’ a ti deuh tlat a niawm e. A zia kha a dangdai hrim hrim, mipa ho kha a chhaih kual vel mai mai niin ka hria, a serious vak ngai pawn ka hre lo, hnamdang kha chu a kawp duh thak bik lo thung a, a that vena riau ka ti mai. “ Jerry chuan a lo ti a,. Muanawma hre ning tawh chuan, “Phone ka’n hmang lawk aw, ka lo theihnghilh daih alawm” tih leh thawh a rual ta a. Pawnah a chhuak zui ta daih. Thawk a la hawk hawk a, a hrawkah hian hnawhtu awm ang maiin a hria. A bialnu chungchang a chhe lam ringawt hriat chu tawrh harsa a ti a ni. Bul an tan ve chauh a, hetiang taka tuihnailo chanchin a nei tih a han hrechhuak chuan a deng na telh telh ni maiin a hria, Nupuii sawi ang deuh khan an kal thui hmaa ṭhen mai chu a tum ta a, thutlukna erawh hmaichhana sawiah a la khek hram hram a, a thei ngût ang e maw..ti nge maw amah tina thei dang hmeichhia a la tawn fo ni. A hlimna tur emaw a tih, a beisei ve rilruk kha a mah tinaa hliamtu a ni leh ta si. Mipa dang chu nise , ‘Nunhlui chu nunhlui alawm, liamtir mai mai rawh..’ an ti mah na, ani erawh chuan a thei ve tlat lo. A lo hmangaih tawh vang nge a hmangaih loh lutuk vang zawk pawh a hrethiam tawh lo. An hawn lamah pawh a ngawichawi hle, Jerry lah chu a mood a fuhin a ṭawng reng mai bawk si, a ning lek lek. Champuii msg lo awm pawh chu seen loin a mutsan ta daih, zan hmasa lamah a muhil lo a ni bawk a, a beisei loh deuhin a mutui ta phian a. 

Champuii erawh a muhil leh thei lo, Joela kha a reh ta rih a, a beidawng ta a ni maithei. Chu chuan a rilru a tibuai hran lo, Muanawma danglam leh ta chu a ni tibuaitu chu, a msg takngial pawh a seen duh lo va. A mu tawh a niang tiin a inhnem ta ringawt. A tuk maia zin tur a ni bawk nen, muthilh hram a tum a, a chau tawngkhawng ve ta a niang, ani pawh a muhil ve ta bawrh bawrh a, zing dar 6-ah Nuna’n a rawn call harh a, a tho nghal vat, a insiam sawk sawk a, thingpui te a in hnuah Champhai lam panin an tlan chhuak ta a, a û te a be nghal bawk. Muanawma erawh a be duh bik lo, va duh huam leh va ngai huam anga lan kha a duh tawh bik lova, a awm ang anga enliam theih a tum ta tawp mai. Bungpui aṭangin Champhai a hla lo bawk a, khaw pakhata thingpui ina an chawl zawk tih loh chu an tlan leh ta par par a, a chuanpuite chu an titi nak nak a, a bula thu a la hriat ngai vak loh mipa lah chuan biak teh a tum thin a, a rul tawk bakin a chhang lo, motora chuan laia ṭawng reng hi a nin bakah phone call hman rengte hi a zah zawng tak a ni roh a, ngawi rengin muthlu chuang si lovin a chhing hmiah, a bula mi pawh chuan biak luih a tum zui ta bik lo. Champhai pawh an thleng ta vat a. Counterah a û pasal Zawma’n a lo nghak ran tawh a, Zawma nen hian an inngainain a û ai mahin a duat zawk emaw tih mai tur a ni a, a zaidam bakah a puitling bawk a, an han inhmu chu an nui var var mai. A bag te khaisakin a motorin an in lam an pan ta vang vang a. A û pawh a lo awm a, an unauah a û nen hian an inpawhin an inngai ber bawk a, an inkuah chûk chûk mai. A û hi Tepuii a ni a, fa mipa pakhat leh hmeichhe pakhat nei ve tawhin mampuia leh Bawihteii ti bakin an ko ngai meuh lo. Anni pawh hian an nuteii chu an hmuh ṭhan ber a nih avangin an ngaina ve hle. A han intifai a, a chau hran lo. 

“Zothana pawh a phur khawp kha, zanah a lo leng ang. “ A û chuan a lo ti var a, a ner sak. “Ninawm, Zothana ti reng mai, bialpa ka nei tawh” a lo ti nghat. 

A û chuan mak tih hmel deuh hian, “Bialpa a?! Tu maw? Khawi ami?” A ti chûl a, a hma khan a û hi a hrilh duh rih lo a ni. 

“Bungpui khua a nia..” a ti chauh a, a u chuan, “Awii, Bungpui khuaah ngaihzawn tlak an awm mi?” A lo ti hmawk hmawk. 

“Awm lo se ka ngaizawng nang” tum deuh bâr hian a ti a. A u lakah hi chuan a tau ngam ve bawk a. Zawma chuan, “Champui, i u hi chu a ninawm ngawt mai tiraw? I bialpa tur lehzelah thuneih a tum a..awmtir ve mai mai teh” an nu en pah chuan a ti a. Tepuii pawh chuan nui chungin, “Zothana hi ka duhpui êm alawm, an hausak bakah a fel a, a hmel pawh a zahpuiawm loh a..” a ti a. 

“Chutiang hmuhin ka hmu ve lo” Champuii chuan a lo ti daih. Thildang an sawi ta rih a. 

Muanawma pawh inrinni te a ni bawk a, a bazar hman tawh loh takin tiin a va bazar ve zuai a, a nu lahin a chah ngun bawk a, a pa pheikhawk ṭhuina tur hrui chu a lei hmasa ber. A ṭhiante pawh thil manto vak lo a hawnsak ṭheuh a, Aizawl te hi an tan kal zen a harsa ve bawk nen. A rilṭam ve deuh tawh bawk a, restaurant pakhatah chuan lutin menu a en nghal a, a then chu a la hriat ngai lohte an ni, mi vir tak a ni lo bawk a, thil mak deuh deuh, hming hriat loh to deuh deuh ei ai chuan a hriatchian ve deuh deuh fried rice tih vel chu a chah ta mai. Chutia a eitur nghaka a thut lai chuan a rin loh deuhin Sawmliana leh hmeichhe pakhat hi an rawn lut ve hlawl mai a, a bul lawk dawhkan chu an rawn kil ve ta mai. A lungphu a rang leh hle, hmeichhia chu a hmuh vawikhatna a ni. An inbiak dan velah chuan inngaizawng an âng riau! Bmi nen inneih an thulhna pawh a la rei lo va, tunah hmeichhe dang a kawm leh thei a nia, a bialnu a lo ni kher lo a nih pawhin chutia ualâu taka han kalpui chu thil tih chi-ah pawh a ngai lo. Bmi’n hmu se a rilru a nat ve tho a ring. An ṭawng chu a ruk deuhin a bengkhawn hle. 

“Zin bo rih pawh a pawi lo, nia, in boruak hetiang hi a ni sia..khawiah nge zin i tum reng reng?” Hmeichhia chuan a ti a. 

“Shillongah ka zu zin mai mai dawn mawni ka tia, ka thianpa te an awm tho bawk a. Hetiang chuan zawhna ka dawng sek a, ka ning..” Sawmliana chuan a ti nghut a. A awki-ah chuan a lungawi vak lo tih a lang. 

“Nia, zuk zin rawh, mahse, lo haw har lo la..Bmi pawh ka lo titipui leh ang a..a rilru a thlak maithei asin.” Hmeichhiain a tih leh takah chuan an inngaizawng lo ang tih chu a ring thiam. Bmi thiannu a nih a ring ta zawk a. 

“A ngai lo, sawipui a ngai tawh lo, a rilru a thlak chuang lovang, bakah a chhungte min tihdan kha ka lawm tehchiam bik lo, ka chhungte pawn inrem leh hi an duh kher tawh lovang. Ani lo pawh hi an tam ee,.” Sawmliana chuan a ti phar phar a. A la hawisan hmel vah vah khawp mai. 

“Mahse, a chhan diktak miin hre ta se i tan a mualphothlak zual dawn asin.” Nulain a tih chuan, “A tu phiangsenin nge maw kha video kha lo thawn ni? Bakah tun ang thleng thlenga khatiang video te lo la kawl, keipawn ka nei tawh lo a nia..” a ti leh tún tún a. Nula erawh eitur an dawn dah avangin a ngawi ta rih. A bak an titi dang chu hna thil leh nula sumdawnna vel deuh vek a ni tawh. Muanawma pawn a ngaihven ta vak lo va, mahse, a rukin nula chu thla a lak ruksak thei hram, an hmu lo hlauh e. He nu pawh hian pawimawhna a lo nei ve thei tlat tih thu hlaa a thla laksak mai chauh a ni. A eikhamah bill pein a chhuak ta vang vang a. 

“E! Kha, Champui, chaw in eikham tawh maw? I û te khaw nge?” Zothana rawn ṭawng lut chu lo melhin, “U Zawma te thawhpui a na thut a niawm e, chu chu an va kan ve dawn a..” phur fahran lo hian a lo ti a. 

A bula rawn thuin a rawn thlek deuh hû a, “I cher deuh tlatin ka hria, Bungpui i ngeih lo a niang. Engtik thleng nge i cham dawn?” A ti leh zung zung a. 

“Tuesday-ah ka haw leh ang” a rul tawk zelin a chhang,. Zothana lah chuan a hrethiam lo nge a phur hurh mai lehnghal a, “Naktukah leng ila, Champhai ka fanpui ang che” a ti sur sur a. 

“Awii, a chakawm viau naa ka û te hian min thlahlel ve sia, ka theih pawh ka ring lo. “ A ti niah niah a. 

“Ka dilsak dawn che nia” a la ti zel zui! Champuii mood chu a off takzet tawh, “Ka peih vak lo va” a ti hmiah mai. 

“  I lo zin khat êm hi, chuan thawhtan tlaiah chaw lo ei rawh aw..” a la ti deuh deuh. Champuii chu a ṭah te lam lam a chhuak. “A chi nang, a zahthlak e a” a ti nghat a. 

“I mak ve e, heti khawp hian ka duh ve che a. A rei tawk tawh bawk alawm, i rilru dik tak min hrilh ve tawh la” a ti a. 

“I hriat tawh kha, bialpa ka nei alawm” a ti ta nge nge a. Zothana chu a meng phar deuh a, mahse, “Min hnar nan dawt i sawi a ni lo maw?” A la ti ta deuh deuh. A khawngaih lek lek zawk a ni. “Tak takin ka nei alawm, pawi ka ti lutuk, nang chuan kei aia ṭha i hmu dawn lutuk, kei chu ka sual lutuk, min la hrechiang lo a nih kha” a ti a. Nuam a ti vak lo, Chutitaka duhtu mipa ṭha ve pangngai tak an awm ve reng laia a changa duha a changa hlat leh thintu Muanawma laka a la nghet tlat chu mak pawh a inti. Mahse, mak deuh chu mihringte hian duhzawng kan nei ṭheuh a, “Hmeichhia leh a uitê a chulnêl peih peih” tih te hi chu tih ve mai mai a ni, chulnêl mai theih hmeichhia khan a ruka a lo duh ve vang a ni zawk, duhzawng ni lo na nâ na chu eng ang paw’n a bulah tâpin tawlh hrut hrut mah se; hneawm mai an chang zawk. Chuvang chuan mihring kan ni a, duhzawng ni lo pui lakah chuan innawrluih chi a ni lo. A tuartu tan a thaw ipikthlak a, kan tihrehawm mai mai a ni. Zothana paw’n hei hi a hrethiam lo a ni, Champuii a duh luatah Champuii’n a duh let ve kha a phût tlat a, chu chuan Champuii lakah helna a piantir bakah a hneawmna a tipung ting mai zawk a ni. 

Zothana chuan, “Ti nge min duh thei ngang lo mi?” A ti ta thlâwt a, Champuii pawh chuan a khawngaih ru viau, mahse, khawngaihna atang hian hmangaihna a piang thei ngawt si lova, kan khawngaih nazawngte kan hmangaih thei lo, kan hmangaihte erawh kan khawngaih tel thin thung si, hringnun teh hrep hi chu aw..

“Zothan, min hrethiam rawh, ṭhian ni zawk ang..” a ti ta ngawt a. Zothana chu a ngawi vung vung a, nasa taka inngaihtuah hmel a pu. A thaw hawk a, “Kei aiin eng nge a thatna?” Amah pawh en lo chuan a ti zawi ruih a. 

“Ka mipa duhzawng tak a nia” a ti ta tawp. 

“I mipa duhzawng chu eng mi nge?” Amah rawn melhin a ti lehzel a, nuam lo a ti angreng hle, “Zothan, duhtawk ang. Min hrethiam hram mai rawh, Pathian ruat kan ni lo a niang” a ti ta ngawt a. Vanneih a siamin a û te an lo haw ta hlauh, a thaw huai mai. A u leh Zothana chu an inbe hlut a, Zothana pwh chuan pangngai takin a be ve mai, a fing ve khawp mai. Mahse, rei pawh a leng ta lo, a haw dawn chuan Champuii chuan kawngka thlengin a va thlah a, “Naktukah chuan min lenpui tho la, khawngaihin” a tih ngawih ngawih takah chuan, “Aw le, ka lo tum ang e” tiin an inthlah ta kha a nia. A muthmunah pawh Zothana chu a ngaihtuah a, ti nge maw a duh ve theih tlat loh le ti ten, amah chu sual a inti thul, thiam a inchantir thul. Muanawma lah a reh vung vung si, va biak hmasak lah tlawmah a la ve tlat si. A reh hlen ta a nih pawhin a tawp an thleng ang a a ni mai a ti tawp tawh. Tui tak chuan a muhil ve ta tho e. 

Muanawma chuan Nupuii msg chu a chhiar nawn leh a, “Kha nu kha U Bmi cousin a nih kha, Mapuii an tiin ka hria, vawi 2 vel chu Amawii te inah U Bmi hian a rawn lenpui tawh alawm. Amah kha an puarak ber a ni thin, Amawii hi he lamah a awm tam loh vangin. Chuvang chuan Sawmliana mangangin Mapuii kha a ruai pawh a ni maithei ni. Mahse, ka ring lutuk chuang lo, engpawhnise, ngaihṭhat loh nan chuan hmang chuang suh, U Bmi chu i be tawh em?” Tih a ni. 

“La be lo, ka hmanhmawh ta lo law law” tiin a va reply a. Champuii a la be miah lo tih hrechhuakin call a tum zet a, mahse, a thulh leh, Jerry leh Teteii te thusawi kha a bengah a rawn ri nawn leh tlut tlut a, a msg tur a type pawh chu a delete leh vek,. Ngawihsan hlen mai tur em ni ang tih thlengin a ngaihtuah a, mahse, mumal taka inṭhenna thu hmaichhana sawipui loh chu a mipat loh thlak a ti ve deuh bawk si, “Hunin hril mai teh se” tiin a inhnem ta ringawt a. Amah lo chet khalha Bmi lo be hmasatu a hriatchhuah chuan kawng a awlsam a beisei, a chhan chu he thil titu hian Sawmliana thiltih hi a hrechiang hle tih a lang, thuhretu atan pawh a ṭangkai dawn hlein a hria a ni. Tharum thawha dân pela chet kher ngai lovin Seni phuba hi a la thei maithei asin,  chu chu a duhthusam pawh a ni. Dik tak chuan Sawmliana lakah dân pelin che ta se, ani ngei pawn thiam loh a chang ve thei, amah chu a inngaihtuah lo, a chhungte rilru tur a ngaihtuah hian dân ang taka chetlak theih chu a duhthusam a ni. Mahse, engtin nge hma a lak tak ang aw..a hmasa berah chuan Sawmliana phone a mamawh a ni, a contact list aṭangin kawng a inhawn a ring tlat. Bmi pawh kha number kha a dil a ngai ang, ni lo, Amawii hmangin a tih a ngai, a chhan chu a ringhlel dawn. Ngaihtha thawkhat tak chuan mutmu chu a tuah ve thei hram. 

Champuii pawh inkhawm turin a insiam mawlh mawlh a, chaw ei lai khan a u bulah Zothana nen an len chhuah tur thu a lo sawi tawh a, a u chuan a remti ngang mai. An inkar engmah hre ve hek lo le. Zothana te nen hian an lawina kohhran a inang lo va, banah chuan leng tur dress-in a indress a, a nalh tiu teu viau, Zothana pawh rei a rawn thang lo, ani pawh a rawn intinalh kher mai. Zothana car chuan Champhai khawpui chu an fang kual ta a, thian ang maiin an titi dun a, chu chu a nia Champuii pawn a duh ber ni , inngaihzawn kher chu a tilui thei ngang si lo va. Champhai tlak lam, thalai ten len khawthawn nana an hman thinna hmun chu panin fâl deuh hlekah thu dunin an eitur kente chu an ei ve a, midang pawh an awm ve nual mai. Chutia an thut duna an titi tui lai tak chuan Muanawma’n a rawn call thut mai. Champuii pawh a phu zawk mai, “Hello” lehlam hawi pah chuan a ti a. 

“Eng nge i tih!” A rawn ti a. 

“Hei kan leng a” a ti ve hmak. 

“Tu nen”

“Ka thianpa nen”

“Tu i thianpa ?” 

“I hre chuang lovang” 

“Ka hre duh” 

“Nih tak chu, ti nge min lo biak?” A ti nghat a. Zothana chuan a phone a lo khawih ve mual mual mai.

“Ka be thei lo che em ni? Ka bialnu biak dawn hian a phalna lak hmasak phawt a ngai tih ka lo hre lo va” a rawn ti nghut nghut a. 

“I reh hlen dawn emaw ka tih vang zawk a nia” a kalsawn ta nge nge a, Zothana’n a ngaithla ve kur sia, nuam a ti lo. 

“Chu! Reh hlen turin min duh tihna em ni?” A va chimawm tak.

“Ka duh ka tia mi? I reh char char a nih kha..” a ti khur dat dat a. A thinrim tih lehlam atanga lo ngaithlatu tan chuan hai theih a ni lo. 

“Mipa dang i rehsan ang khan min rehsan zawk dawn emaw ka lo tia” a rawn tih chuan Champuii chu a meng zau kawk.

“Rinmuanawm, eng nge i sawi awmzia?” A ti ṭhawt a. 

“Nakinah le..len nuam phawt le..bye” tiin a dah zui hmak. Zochampuii thinrim chu a meng tal tawp tawp a ni ber e, a khur der der bawk. 

“I tha em?” A phu nasa kher mai. Zothana chu a hnungah a lo ding reng mai. 

“Ka tha alawm” a ti khur dat a. A biang sa hat hat chu a hre thei,. “I tha lo a nih kha, eng nge thleng?” Zothana chuan ngaihtuah hmel zet hian a ti a. 

“Min hawnpui la ka duh. Khawngaihin” a ti ta a. Zothana pawh chuan a hnial bik lo, ngawi rengin an tlan dun mawp mawp a, a u te in thlen hma kâwnah chuan, “Champui, engpawh tawk la, i tan ka awm reng tih hi hria la ka duh a ni” Zothana chuan a ti a. Chu chuan Champuii thinlung pawh a hneh viau mai. 

“Ka lawm e aw..nakinah ka la hrilh vek ang che “ a ti sap a. Hmalam a bih ngar mai. A u te in kawtah a chhuk a, “Zanah ka lo leng thei ang em?” Inthlahrung taka Zothana’n a tih chuan, a khawngaih ta em em a, mittui tling pamin, “Tehreng mai” a ti sep a, a luhsan ta a. 

Muanawma chuan a vawi 6 nan zu no chu lek kang lehin a han thawk khat leh piap a, a rilru nu but chuan amah mawlha kap rengtu thilte chu reilote tal a theihnghilhtir mahna le..Zochampuii lah kha khati tehhrep khan a va ṭawng khum a, a rilru tâwt el ul, amah kap rengtu chu tlem chuan a kiang ta deuh e. Mahse, Champuii bulah khan Andy hming a va lam ri teuh tak. Inngaihtuah fim thutin tikhan a dah ta ringawt a nih kha. Engvangin nge Zochampuii khan mipa a len chhuahpui tehreng ni..a lo reh deuh a nih pawhin amah runluih ang ziazanga mipa nena lendun kher a ngai em ni? Eheu! Chu pa a hmuh leh hriat pawh ni lo chu a thik ringawt elo? “Rinmuanawm, Zochampuii hi i hmangaih lo, i hmangaih lo. I hmangaih chu Seni chauh a ni, chu chu hriain pawm tlat ang che. “ Tiin amah leh amah chu a inbe mawlh mawlh a, hetiang tak hian zu a la rui ngai lo. A nuteii te inkhawm hlanin a thianpa a chah sauh sauh a, a hmuh theih awmchhun stag um khat chu a in zo lek lek tawh a ni, a tum dan kha chuan kal chhuaha Sawmliana phone ruksak kha a nia, mahse engin nge mawlh tehreng ni, zu in a lang tlat si, “I hlawhchham dawn a nih hi” a han inti a, mahse, “A teuh lo, ka hlawhtling khawp ang” a han inti leh thul. 

“Sente, ka mamawh che a ni..ka mamawh che” tia chunglam melhin a biangah mittui a rawn luang a. Inti mipa ve tak kha thil hrang hrang, amah delhtu leh a phurrit lutuk avangin a mittui a luang ta chu a nih hi..

Amah ang thoin Zochampuii pawh zanriah ei peih loin bathroomah tui herh hawin a ṭhu tlawk tlawk a, Engvanga Muanawma ṭawngkhum dan kha nâ ti em em nge a nih? Ni e, a tunhma nun a hriatchhuahtir miau a tin ni. Zawimuanga thoin bathroom atang chuan a chhuak a, a inhruk hul lai takin a phone a rawn ri leh ta, hlauthawng ru taka a han en chuan, ‘Joela’ tia a save hnen atangin call a dawng leh ta tlat mai. Engvang teh hrep zel nge mawni le.

Engkim hi a buarchuar telh telh..