zochampuii 5

ZOCHAMPUII (5)

Ziaktu : Toni Râlte

A rin aiin exam chu a tiṭha phian mai. Mahse, next hi tlem chuan a huphurh ve deuh. A inzir lâwk êm êm bawk si lova. Anuteii te inah tlang nghal a tum zet naa hun remchang chu bawhpelh tum bik lovin an exam centre piah lawk thingpui dawrah chuan Sawmliana chu a lo nghak ta a. Rei nghah pawh a ngai lem lo, Sawmliana inkhalh chhuak chu hmanhmawh ru tak, rinhlelh theih si lohin a zui ru ta a ni. Ramhlun North leh South inrina bawr velah Sawmliana chu a ding ta a, a chabi vaivir zuk zuk pahin a piah maia building hlui ve tawh lam, lian deuh si-ah chuan a lut ta a, Sawmliana te in a hre ta phawt a, a hun hman dan tlem tlem a hre bawk. Sawmliana nupui tur nen an inhmelhriat hun chauh nghah a ngai ta e. Anuteii te in lam panin a haw ta vang vang mai. 

A inthiam chiah loh deuh avangin Champuii a call a, “Vawiin chu ka tiṭha thawkhat e, in bang tawh em?” A ti nghal thâwr a. 

“A lawmawm chu, bang tawh..” a lo ti nghat thung. A la lungawi chiah lo tih a hriat reng, mahse, a ngaipawimawh duh lo lui ve a. 

“Chuan eng nge i tih? Nizan lamte inleng polite tak i nei leh em?” A han ti vel a. 

“Nei lo, ka nei peih lo, Aizawlah chu nuam i ti tih a hriat e..” a rawn ti ve leh ngat a. 

“Ka tih pawh ka hre hran lo, nih chuan next a mi tur hi la zir nasat ka ngai deuh a, ka’n inen leh lawk ang e aw..” tiin Muanawma chuan a dah ta rih a. A hawn huna hmaichhana Champuii a sawipuidan tur bak a ngaihtuahnaah a awm chuang lo. Sawipui harsa a ti dawn tih pawh a inhria, hre lo angin a awm law law ang nge, a inthup rei thei chiah ang em? Tihte a ngaihtuah kual a. Champuii’n a mimal nun vel a sawi ngai miah lo te kha heng vang hi a nih a ring, Nupuii kha chuan dâwt a sawi dawn si lo, Andy pawh a hria, mipa pangngai tak pawh a ni. A mi hriatchian tak leh a bialnu an lo inkawp tawh tih leh nupa ang thawthangin an lo khawsa ṭhin tih hrereng chunga inkawp zui zel chu a theih a ring chiah lo a ni. Engpawhnise, hmalam hun chu chunglamin a rêl tawh mai a niang chu. 

Zanah lehkhazir duh viau mah se; kalna tur pawimawh a nei tlat. Nupuii cousin bakah Sawmliana nupui turte nen inhmelhriatna hun an nei dawn miau a ni. A tan a pawimawh lutuk tlat, bakah ni khat chawlh a la nei tho a, a zir hman tho ang chu maw. Nupuii te in a va thlen chuan ani pawh a lo inpeih tawh a, an chhuak zui nghal. Nupuii cousin Amawii birthday an lawm dawn a, Amawii nen tak hian Muanawma hi an inhre lutuk lo, a chhan pawh Amawii hi phaia awm reng reng ṭhin a ni. Andy nen pawh khan rei fê in pawh an luah dun nghe nghe, chhungkhat vek an ni bawk nen. Amawii te in an va thlen chuan an lo ri laih laih tawh a, a hmelhriat a hmu mang lo. Sawmliana nupui tur hi Bmi an ti mai a, Biakmuani a niawm e. A hmel chhiat loh bakah an neinung a, tin, a senior khat ve tawh bawk. Engvanga an inneih tur chu ṭhulh rih nge an nih chiah tih chu tuman an hre lo, amah Bmi hian a sawi duh bawk si lova, a chhungte hi chuan an hre mahna, a chhan nia an sawi lah inneih khamna êm tur niin a lang si lo, Sawmliana farnu lo haw theih rih loh vang maia inneih ṭhulh chu a holam deuh mah mah a ni. Nupuii chuan Bmi leh Amawii te chu zei takin a han hmelhriattir a, Bmi pawh nula fingvâr tih takah a polite kher mai. Amawii erawh a puala party huaihawt a nih avangin a besâwm hman meuh lo. Nupuii nena an ruahman lawk ang ngeiin Bmi chu an kawmfâl thei ta deuh a, Muanawma lah a ṭawng nuam tawk lekin a lo lem ve sek bawk nen. An titi ve ta hlut mai. 

Champuii erawh Zari te inah a leng phei leh a, lenglên hun awm velah chuan a leng bo daih zel, zari chhungte pawn an hrethiam ve vek. Zari roomah an awm dun a, Muanawma awmdan danglam dante chu a hrilh ve mial mial a, “Aizawl nula a hmu ang a, min hre tawh lo a niang..” a ti a. A nui lui hak bawk. Zari chuan, “Chutiang a nih ka ring lo, an exam vang a nih loh paw’n thildang kaptu a nei a nih ka ring, Muanawma hi ka hriat chinah mipa tum tlang leh nghet ve tak a ni a, in nihna pawh a la rei lova, chutia a tih leh hni hnê ka ring lo. Ka lo be ve dawn em ni?” a han ti a. 

“Aih, a ngai teuh lo, ka chingfel thei ang.” A lo ti hmiah. Ni e, a mimal nunah midang inrawlhtir hi a duh ngai lo, amaha a chingfel thei lo a nih chuan a tawp tihna a ni mai. 

Zari ṭawng leh hma chuan, “A kal dawn zana rawn betu hmeichhia nen khan ka ringhlel deuh, ani lah khan ka aw a hriat rual khan a dah deuh hmak bawk sia” chunglam melh chung chuan a ti leh hap a. 

“Awii, tikhan ringhlel nghal ngawt lo la, hmeichhe dang vang a nih ka ring lo. Engpawhnise, a lo haw hunah hmaichhanah sawidun zawk rawh u, phone aṭang chuan a buai tulh tulh zel..” Zari chuan a lo ti mawlh mawlh a, a sawi dik reng. Mahse, Champuii ngaihṭhat lohna a kian phah lem hlei lova. Mahse, upa zawk a nihna angin hmaihma ngeia sawi dun chu ṭha a ti ve tho mai. Joela vanga a nun chuai leh rawp tawh rawn khaichhuaka khawvel thara ke penpui mektu Muanawma chuan a phatsan leh a nih ngat chuan a nunah mipa hian awmzia an neih theih a ring tawh lo bur. 

Muanawma te erawh an la phûl hlut a, a rilru kil khatah Champuii awm ve reng mah se, a thiltih lai chu a laklawh tawh a, bansan chi a ni tawh lo tiin a inhrilh mawlh mawlh. 

“Pasal i nei dawn kha an tia, min sawm ve dawn em?” Nui sâng chung hian a han ti a. Bmi chu a meng hnual deuh, mahse, inthunun leh vatin, “Nei tur chu ka nia, mahse, kan ṭhulh leh rih a, ka neih hun hunah chuan ka sawm ngei ngei ang che.” A ti a.

“Ehe! Inneih han ṭhulh chu! A va zia lo ve, harsatna lian tak a awm a ni ngei ang, hrehawm i ti awm, ka û pawh hi an inneih dawn kar khat vel la awm tihin a pasal turte lamin an ṭhulh ringawt a. A tuar na teh mai asin, tun thlengin a la nulat phah..” dâwt ngialngan tak han sawi chu hrehawm a ti ru ve hle, a ṭul tlat si. Chutah Bmi chuan ngaihven hmel fê hian, “A ni ve tho maw? A va pawi ve, ngati nge han ti ila, min hrilh duh awm si lo va..” a han ti a. Inthlahrung hmel pawh a pu deuh. Muanawma chuan a beer ken lai chu han lem leh zauhin, “Englo a nia, i dinhmun nen a inán vangin ka sawi mai mai ang, sawi chhuak tawh chuang lo la, Ka û hi a tleirawl laiin kan kawmthlang pathlawiin a bum ti tawh mai ang, ani tleirâwl la á ve tak chuan lo ringin chu pa nen chuan zan 3 vel an tlan dun ve a, ka pain neih a remtih loh vangin phaiah ka nî te bulah a dah ta daih a, an inru ve tih hria pawh an tam lo. A rawn nula chho a, tikhan a pasal tur nen an han inngaizawng a, inneih hial an tum tawh hnuah kha thil hlui kha tu emaw ten a pasal turte lam chu an lo hrilh khanglang a, ‘Kan laka zêp nei mo kan duh lo’ tiin an rawn ṭhulh ta hmak mai a ni. Nunhlui nei lo kan awm si lo, ka û kha ka khawngaih asin aw..” a ti vâwng vâwng a. Bmi chuan a mit a khap fak fak a, a melh ngai a melh reng bawk. 

Reivaklo hnuah a aw thian kharhin, “I û chu a khawngaihthlak hle mai, chutiang thil mai mai vanga ṭhulhte chu a..a nep lutuk, tuna kan inneih ṭhulhna chhan nena khaikhin phei chuan nêp tak a ni..keini chu..” a ti hman zuau a, a ngawi leh daih. Muanawma chuan a  chîk ru hle, “Aa..sawi kher tur paw’n ka nawr lo che nia, ka û nen in dinhmun a inán vangin ka hrilh ta mai che nih kha. “ A lo ti a. Bmi erawh inngaihtuah nasat hmel deuh hian a chhing vang vang, a rawn men leh chuan a mittui a parawl kiang a, Muanawma chuan a ruk tak chuan a lainat hle. 

“I û pasal tur chuan a hmain pawngsual case a lo nei tawh tih hre ta la, i û nen an inneih i phal kher ang em?” A ti ta a. 

Muanawma chuan, “A pawngsual ngei em tih ka fiah phawt ang a, a fihlim a nih chuan ka phal ang.” Cho zet hian a lo ti a. Bmi chu a nui tawi tak, “Nia, thiamchantir chu a ni ngei mai a, mahse, khatianga rinhlelh leh police nena inkungkaihna a lo nei tawh hrim hrim kha kei chuan pawm harsa ka ti..” a ti a. Muanawma ṭawng tuma a án zuau laiin Amawii a rawn kal ta si, “Hey, lo lam ve r’u, in cool lutuk..” tih leh Bmi kaihthawh a rual ta mai si, Muanawma chuan a ruk tak chuan a ngei hle. Han sawi zawm chi a ni tawh mang si lo. Bmi leh Sawma te inneih ṭhulh  kha Sawma te lamin an rawt vang emaw a lo ti zawk kha a nia. Tuna a ngaihthlak danah chuan Bmi te lamin an rawt zawk niawm takin a lang si, Bmi chuan ,Sawma chu pawngsual case vangin man a lo ni tawh tih engtin nge a hma daih aṭang khan a lo hriat loh theih? Veng thuhmun ni lo mah se, inngaizawng, inneih hial tintuah si te chu inhriatchian ve awm tak a ni si a. Sawma te lam hian an thup hneh viau em mawni le..A nih chuan an inneih dawnah chauh Bmi chuan engvangin nge a hriat leh si ang? Ama tawkah a rilru a buai ve kher mai. A thluak a fim chiah loh avangin lu thing nawk nawkin, “Nakinah harhfim hunah” a ti sup a, thlanglam bathlarah chuan a kal zui ta daih a. 

A thlenna hmasa te an ni bawk a, Champuii school bang pawh Muantuibura te inah chuan a peng kawi ve a, bawlhlo eng ilo lei a ngai hrim hrim bawk a. Hmingi’n dawr a lo nghak a, “Khaw nge ka pa te?” Tlangnel takin a han ti a, en pawh en lovin, “Huanah an kal” a lo ti deuh hmak a. Hmingi hian heta a awm aṭang hian a mil vak lo tih a hre tho a, engvang nge tih erawh a hre lo, pawi a ti lem lo bawk. A mamawh ho chu a han dap khawm a, “In pa Aizawl zin chu a lo la haw na nge?” Hmingi chuan a ti a, a ṭawngkam reng reng hian eng emaw ken tel hi a nei ṭhin hian a hria. “Haw lo, an la zo hleinem” a lo ti ve hmak a. Polythene pek pahin, “Nangmah khan lo inkhung ve mai teh..chuan, Muanawma hi i ring sual maithei a nia, Seni ai kha chuan engtikahmah i tla na dawn lo.” A ti leh hmuk a. 

“Lo ngaihven vak duh suh, i buaina tur a ni lo.” Champuii pawn a ti ve fak, eng nge mawle zahpah lo taka ṭawngkhumtu lakah chuan ṭawngkam mawi a chelek peih fahran bik lo. Amah aia naupang zawk lehnghal. 

“I duh hmel teh huam êm a, i zar nasa an tih kha..” nui lui leh elsen tih hriat zet hian Hmingi chuan a ti leh a. “Amah zawt ula ti nia, ka zar leh zar loh chu, a thuhrimin kan chungchang chu i va ngaihven ve, muanawma hi i lo ngaizawng ve zawk em ni?” A ti ta siah mai. Hmingi’n a chhan hma chuan pawisa a pe a, “Min kir lo mai rawh, i rilru a rethei êm mai, i rilru damdawi atan ka lo present ang che “ tih leh chhuah a rual nghal. Mahni lo maha mood off sa tehreng nen, Hmingi’n khati fakaua a lo ti kha a lâwm loin Muanawma chawp chawp chuan a ngei zo vek tawh. Lawma te in a thlen phei chuan thing a lo ek a, an han indinchilh rên râwn a, midang awm hnai ve an awm lo bawk nen, hmeichhe ziain a kentel chu Champuii pawh chuan thup thei lovin Hmingi nen an inbiakna zawng zawng chu Lawma a hrilh fai ta vek a. Lawma lah chuan a lo la thutak tehchiam lo, “Hmingliani thusawi mai mai te chu mênah thlak daih rawh, tuman engahmah an ngai lo, an nufa sawn kan khaw cctv an nia, fimkhur erawh a ṭha” a ti duh lek a! Mahse, Champuii awm nuam lo erawh a thêp phah ve huai mai. “Zanah rawn leng r’u aw, sawi tur dang ka la nei..” tiin an inkalsan ta a. 

Muanawma pawh a tuk maia exam nei leh tur a nih avangin a inzir ngawrh ve hle. Champuii nen call tak chuan an inbe leh tawh lo va, zingah erawh amah zawkin, “Morning, titau tawh lo la, ka lo haw hunah kan sawi dawn nia.” A va ti a. A seen a, a rawn reply lo. A la titau aniang tiin a be zui tawh lo. An inngaihzawnna a la rei loh bakah msg-in an inbe khat a, chutia an han inngawihsan pawh chu hrehawm tihna em em a nei hran lo, a rilruah helhkam dang a nei bawk nen. A lehkha zir pawh a tui hleithei meuh lo. Nupuii nen zan tirah an inbia a, “U Bmi khan a sawi che a, ka ngainat zawng tak a ni, bakah a û nen kan dinhmun a inang sia, ka lo unau en ve tawp” a ti che asin “ a tih chuan a nui suk. Bmi chu amah aiin a û hlek ang a, a thusawi engkim a lo awihsak chu lawmawm a ti. 

“Naktukah kan hmelphaka kha ka hmu leh dawn alawm,  eng emaw tak chu tih a ngai a ni.” A han ti hluk a. A insehruh leh ringawt. 

“Exam zo phawt rawh, i rilru pe rawh, i zirlaiah khan. Hun i la ngah” Nupuii’n a tih chu dik a ti viau thung. 

“Exam zawh veleh ka hawn phawt a ngai dawn a, thla tharah chin awm lova châm turin ka rawn zin leh zawk ang” a tih chuan, “Champuii nen in inkar sawifel i tum phawt tihna em ni?” A rawn ti khauh. 

“Aw” ti chauhin a chhang. 

“A ṭha lawm, i ṭhen dawn nge? Engtin nge?” A rawn ti lehzel a. 

“Ka hre lo” a ti leh tawp. 

“Ṭhen la ka duh, mi chûl hnu rihte chu tlawmthlak i ti lo em ni?” Nupuii’n a tih chuan a ner sawk. Ni e, Andy mai bakah mipa dang dangin an lo chinleh kual hrep tawh hmeichhe han sawngbâwl chu a tuiawm dawn loh hian a hre lutuk. “Nia, hunin hril rawh se” a ti ta ringawt a.  

Lawma leh Kima bulah chuan Champuii chu a lo inbunruak mawlh mawlh a, anni chu an lo bu nghut nghut mai. “In ṭhianpa mizia hi a ngaihna ka hrethiam lo a ni, Aizawl a thlen zan aṭangin a danglam nghal vek a, a mak ka ti lutuk..” a ti mawlh mawlh a. 

Lawma chuan, “Hmeichhe dang vang lam chu a ni lovang, khalamah chuan ringhlel suh. Exam bakah thil dangin a rilru a mawlh a nih ka ring. A lo haw hunah engkim a fel vek mai ang. “ a ti suam suam a. Kima pawh chuan, “ Ni e, lungngai suh, keini paw’n kan lo be ve ang, Lalhmingi te thusawi vel mai mai kha chu ek tlukah pawh ngai suh” a lo ti ve puat a. Champuii pawh tlem chuan a rilru a dam deuh, an ngaihtuahna hria niawm takin an ngawih det lai chuan, Champuii phone a rawn ri ta ral ral a, Muanawma a lo ni. 

‘Hello” a tih rual deuhthaw chuan, “Ka lo haw hunah kan sawi dun dawn nia ka tih kha, engvangin nge Zari te ho i hrilh kher a, ka rilru an rawn tibuai vek alawm..” lungawi lo tih hriat fê hian a rawn ti ta mai. 

A ngaihna hre lo fê hian, “A lo bia che maw?” A ti há a,. “Bia e, bialnu dang i nei mi? Champuii i timangang te a rawn tia, kei aia upa i nia, i handle thei rih ngang lo em ni?” Amah demna âwka rawngkai hian a rawn ti a, Muanawma naupanchhiatna a lang tel. “Ka bia ang a tih paw’n , ‘a ngai lo, ka chingfel thei’ ka tih mawlh mawlh kha, Lalzari chu thu a va awih lo ve mawle” Champuii chuan a ti bawrh bawrh a. 

“Amah Zari ka va ngei lam a ni lo a nia, i ṭhiante chu i lo hrilh a nih pawhin anmahni pun kher a ngai lo, kan pahniha inkar chu kan pahnihin kan chingfel ang.” A rawn ti nghet charh a, “Ni e, chu chu ka duhdan a ni rêng alawm, Hmingliani min ṭawngkhum dan pawh ka hrilh bik che em ni? Khatin thiamloh min rawn chantir vak suh.” Champuii chuan a ti hlak hlak a. 

“Ka dah lawk, call ka dawng a, a pawimawh lutuk..” Muanawma chuan a dah nghal daih. Champuii thinrim chu a alh phat mai, a biangte chu a tai hlar a, mahse, Lawma te avangin han tihlan vak kha a rem si lo. 

Lawma te chuan a chhan vel an han zawt a, ani pawn zep lem loin an inbiak dan chu a hrilh ta vek mai. “Kan Rinmuanawma mai mai chu’h! Ti nge maw hetia a awm tlat le..keini pawh min rawn be khât lutuk, kan biak loh chuan min biak a tum lo. Eng emaw tak thiltih a nei a ni..” Lawma pawh chuan a ti ta nge nge a. 

Champuii erawh chuan hmeichhe rilru puin Zari a call nghal, an han inchhal deuh ngial a, “Aa..i rilru hrehawm hmel kha hmuh hrehawm ka tia, a mize danglam thut chhan ka zawt satliah ringawt alawm, pawi ka ti lutuk, ka ngaihtuah vang zawk che a nia..” a tih ve tlat si avangin Champuii tan pawh engtia han tihzui theih a ni bik lo. Chumi zan chuan mut pawh a muhil tlem viau nghe nghe. 

Lehlamah Muanawma pawh Champhai lam aṭanga rawn betu Asanga nen chuan zawitê têin an phun dun sup sup a, “Vena chuan khami zana thil thleng kha a hriat loh thu bakah Sawmliana nen khan cousin ni mah se; an innêl viau loh thu te a sawi a, min rinhlelh ka hlauh avangin ka zawt thui duh rih lo. Mahse, thil thleng a hriat ka rin lohna chhan chu ani pawh kha a rui ve viau niawm takin an sawi tlat..lo hmanhmawh lo la, Police kuta a luh tawh hnua video ti viraltu kha chu hriatchhuah a ni vat ang. Lateii pawh a nih theihna lai a awm, Sawmliana nen khan an inclose riau a, mahse, ani kha chu nangman i chinfel a ngai ang” a rawn ti sur sur a, Muanawma pawh a bu nghut nghut mai. An inbiak zawh chuan lehkha a’n zir dawn ngial a, a hlawhchham, Champuii pawh be tawh lem lo chuan a mu ta daih a. 

Champuii te pawh vawiin hi an exam zawh ni a ni bawk a, tlem chuan a phur ve deuh. A phone a han en chuan, “Morning..ka duat..” Muanawma hnen aṭanga a dawn a ni, a inrin hmain a nui sak. Muanawma hian vawikhatmah a la ko duat ngai lo atin ni..”Morning, all the best” a va ti ve a. An inbe zui tawh lo. In aṭanga a chhuak chho chu in chung nuthlawi Ziri puan lo pho mêk chuan, “Champui, Champhaia chhoh i tum deuh em ni? “ A lo ti a. 

“Aw..tum deuh, vawiinah kan zo dawn a, sunday ka han hmang ve dawn mawni ka tia” a ti a. Kar khat lai an chawl ve dawn a, Muanawma a awm chuang si lova, Champhaia a û te bula han zin daih chu nuam zawkin a ring a ni. 

“I zin dawn chuan min hrilh chiang teh aw, thil ka thawn ang che, naute pa ta tur a nia” nui chungin a ti a. Champuii pawh a nui ve tawp, Ziri leh naute pate hi zu vanga inṭhen mah nise, an inhmelmak hran lo va, an la inbe ve reng tho , chutihrualin zu a nghei hma chu haw tawh loh a tum ve bur mai a, an pa hian naute thil tur eng eng emawte hi a rawn thawn fô a, Ziri pawh hian eng emaw thawn ve a tum niawm tak a ni. Pu Muana te in a kal pelh dawn lai chuan, A pa Muana chuan, “Champui, i va lo leng khât ve, vawiin tlai chu i û Dami te an lo zin dawn a, chaw eikhawm kan tia, lo ei phei ve rawh aw, hmuh pawh in la inhmuh loh kha. “ A lo ti duam duam a, ani hi chu pa ṭha tak zawng a ni, a nupui leh a fanute hi an tawrhhlelhawm deuh a ni mai. Dami a tih chuan Faka chhang chiah, Khawzawla pasal nei a ni a, an chhungkuain an lo zin dawn a niawm e.

“Tlaiah te chuan an lo thleng hman dawn mi?” Champuii chuan a ti a. 

“Tunah khaw ṭhenawm an rawn thleng tawh, an rawn zan tlan a, kan ring che a nia, ani pawn hmuh che a châk kha, lo phei ngei ngei ang che.” Duhthawh zeta a tih si avang chuan phur lo ru zetin, “Aw le” a ti ve ta hram a. Hmingi a hmu peih hlawl lo a ni. Dami chu a danglam deuh a beisei hle. 

Muanawma pawh exam hall-ah a ṭhu ran tawh a, mahse, kha hmelphaka ni lo zawk ten an veng tlat mai. A lawm lo viau naa, subject 2 a la nei a, a hmuh leh ngei chu a beisei, a huphurh ang aiin a chhang ṭha a, a pheikhai pawh a zâng hle. Chawhnuah Nupuii nen Amawii te inah an leng phei a, Amawii te nen chuan an lo inhre tawh bawk a, an titi bawrh bawrh mai. Amawii te in chunga an chhoh hnuah Nupuii chuan, “Bawih, enteh, U Bmi pasal tur khan a hmain pawngsual case a lo nei tawh elo? An sawi ka hre tlat” a ti ta phawng mai. Ruahmanna anga kal a ni tho naa, Amawii tan erawh a danglam ang. Za vak lova nuiin, “An tia lawm, ka hrechiang ve vak lo, phaiah ka awm char char bawk sia, mahse, thiam a chang an tih kha” a ti a. Bmi hi a best friend a nih avangin a thlavâng pawh a hauh na dawn tih a hriat. 

“Nia, mahse, khatianga puh han nih hrim hrim kha hei mizote ngaihdanah chuan case nei ang thawthângin an sawi ta nih chu, chuvang chuan mawni aw U Bmi nena an inneih pawh hi an ṭhulh ka ti” Nupuii chuan a ti leh ta zel a, Amawii chuan Muanawma a melh zauh a, a mitmei a veng deuh niin a lang, hrethiam takin Nupuii bawk chuan, “Ani chu care duh suh, ani pawh a û te hian an inneih dawn kar khat velah inneih an ṭhulh ve tho alawm..” a lo ti hmiah a. Amawii pawh a ngaih a ngam ta nge ni, “Aa..nia, sawi nuam chu a ni lo, midang hriat chi phei chu a ni lo. Bmi hian tlai khawhnuah kha thil kha a hre ve chauh a, tu nge hrilh tih pawh an hre lo, amah paw’n a hre lo, number pakhat aṭangin min rawn hrilh a ti ringawt a, chu number lah chu chhui zui theih lohin a bo leh hmak bawk si. Sawma a han zawh lah chuan, ‘Pawngsual case ka awrh hleinem, min puh ringawt chauh a nih kha, i hre daih tawh turah ka ngai a’ a lo ti daih sia. Bmi chu i hriat kha, nula nungchang ṭha leh ze zawi, rilru no ve tak a ni si, ‘Puh theiha i awm hrim hrim pawh chu a rapthlak’ a tia. Mahse, an inthlem lungawi ta tho a. Mahse, a tuk zanah number dang aṭang bawkin video a dawng a, Sawma, Pawngsuala an puhna chhan ber video viral kha, keipawh min entir ve nghe nghe, chuta hmeichhia chu a i awhhlum thu te nen lam a hre ta a, chu chuan a vaw na lutuk a, a pa bulah engkim sawiin inneih ṭhulh a duh thu a sawi ta a nih kha. A rilru hi a ṭhain a thianghlim asin, ‘Nunna hi a hlu a, kan siam leh din a ni lo, ka pasal hual vanga kha nula kha thi a ni a, indirect-in tual a that a ni, chuvang chuan ka nei thei lo’ a ti hmiah mai, a chhungte pawn an hnial zo lo. A duh tawhna lamah a luhlul sia, mahse, Sawma te lam hi an chapo ve a, midang bulah chuan anmahni zawkin inneih ṭhulh an rawt zawk angin an sawi daih. Bmi te lam hian an ngawihsan mai mai a nih hi..” a ti ta dap dap a, Muanawma lo insangmar nasa lutuk chu a hah vek thei, Amawii chuan a hrethiam lo hlauh. Chung thil zawng zawng chu engtin nge a thlen theih le? 

“Chung video vel thawntu chu an hrechhuak ta chuang lo em ni?” Muanawma chuan a lo ti ta khauh a. A insum thei tawh lo a ni ber. 

“Aw, an han chhui ngial paw’n a sim card booktu kha chu an hrechhuak, mahse,  ani chuan a phone a bo thu leh a sim card pawh a hmuh let loh thu a lo sawi si..a ru botu chuan chung vel chu a ti a nih a rinawm. Tichuan, khatianga a tih zawh hnuah sim card kha a tichhe ta daih a nih hmel, tihngaihna an hre lo, bakah Bmi khan, ‘Chhui a ngai lo, ka hmakhua ngaiin min rawn thawn a, amah hriat kher hi a ṭulna a awm lo, engkim a chiang tawk alawm..” a ti tlat a, police lam pawh an pun duh ta ting tang lo a ni..” Amawii chuan a ti a. 

“A nih chumi number chu Bmi chuan a la hria ang em?” Nupuii’n rawn sik vâwt mah se, hriat ngei a duh tlat a ni. 

Amawii pawh chuan mak a ti deuh nge Muanawma chu a thlek deuh hâw a, mahse, “Ka hre lo le, la hriat awm tak chu a nia” a ti ringawt. Muanawma rilru a buai ta hle, hmakhalhtu an awm tihna em ni ang? Tu nge ni ta ang? Engtin nge? 

An hawn lamah Nupuii nen pawh mak an tih thu an sawi nasa mai. “A mak êm mai, ka ngaihtuahna a buai vek, Sawmliana a huat vanga ti a nih a rinawm tho si, ka hrethiam lo” Nupuii chuan a ti lâng lâng a. 

Muanawma erawh chuan a ngaihtuahna a kawm melh melh thung. A rilru pawh a buai takzet, in a thlen pawn a ngawi rûn rûn reng a, a chhungte ngaih pawh a tiṭha vak lo. Jerry pawh a tukah a rawn haw ve dawn a, Jerry bulah hian engkim sawi se ani hi hetiang lam chhui peih tak a ni a, tihdan a hre mial mahna. Mahse, a nu leh paten a thiltih mek chu hre ta si se engtin nge an ngaih ang? Chu chuan a tibuai leh vek, he thilah hi chuan Nupuii leh Asanga chiah thawhpui a duh rih a ni. Champuii’n a rawn call ve teh mial a, a rilru lakpen nan tiin a la ta vat, “Eng nge vawiin lam te? I ti ṭha em?” Zangkhai tak hian a rawn ti a. 

“Aw ka beisei ai daihin ka tiṭha ve, nangni in zo tawh tiraw?” A ti ve luam a. 

“Umm, hei Pa Muana ten chaw eiah min sawm a, ka phur vak lo naa phei loh kha a nuam si lova, Dami te an lo hawng a..” a rawn ti a. 

“Ee..U Dami chu Hmingi letling kha, in inngaina viau ang, a fel lutuk, va ei rawh, keini pawh kan ei ve ṭep ang. “ A ti a. 

“I ṭha takzet maw? I awki kha a danglam tlat..eng emaw helhhawlh nei i ang.” Champuii’n a rawn tih chuan a chhing sawk..he hmeichhia hian a lo va chîk âwm em em ve le..”Nei lo, ka exam ka tihṭhat vang a niang, hei ka inbual dawn mek a, ka dah rih ang aw.” A ti a. An dah ta rih. Champuii lam pawh a ngaihtuah thei rih meuh lo a ni e. Tu nge chet khalhtu hi hriatchhuah phawt a duh takzet. Sawmliana laka kut lek pawh hmanhmawh lutuk ṭulin a hre ta lo. 

Champuii pawh a inbual zawhah muangmarin Muantuibura te in lam chu a pan ve ta a, Rinliana te a la tawk zui! “Min pehhel chu i tum ve hle mai maw? Lungngai suh, kan lo rim lovang che, ka induh e te lo tih ve khanglan..” Rina no hnih khat lem chu a hriat leh ngei mai. 

“Ka lawm e” ti hmiahin a kalsan daih, Rinliana chu a hrilhhai letling hle. Ni e, Muanawma a zin tih a hriat khan a zin hlana Champuii rilru hneh ngei tumin zantin rim tumin a kal ziah a, kawngka a lo inkalh ziah ! Mi â nilêng lo tan chuan hriatthiam a lo harsa bik lo va, “Rim a duh loh vangin a leng bo daih zel a nih hi” tih ngaihdan nei ve thiam tur khawpin Rinliana hi a fing ve tlat, chu chuan a run em em a, han tih vak ngaihna lah a hre der si lo. Muanawma zawk a haw hlur ringawt mai a ni. Pu Muana te in a va thlen chuan an lo bengchheng angreng hle, Dami nen chuan an han inchibai a, an pa pawh a hmuh tlak fû mai. Fa pahnih harh zet zet an nei a, an hlimpui viau thung. “Ka pa hian a sawi ziah che a, kan inhmu chu ka rin dan chiah i ni. Kan cham chhung chu chaw lo ei ziah rawh aw..Awii, Lunglei lama ka ṭhiante ho min tingai” Dami chuan a ti chul a, Hmingi te nufa ang chu a ni ve lo tih a lang nghal. Ri ve bawrh bawrh chi, zaidam bik vak lo, mahse, thinrimna pai reng ang chi ni si lo mizia a nei tih a lang, hetiang mite hi an rilru a hrisel tlangpui. Hmingi leh a nute erawh chuan Champuii chu an be lumlâm lem lo, Pi Duhi zawk chuan a mawihnaiah, “I rawn leng khât lutuk a, nakinah pasal pawh nei dawn la, hetah bak innghahna tur i nei dawn lo a nia” a ti a, mei tawitê a nei leh tho,. An khuaah hian pasal a nei kher ang em tih pawh hriat va ni suh, a sawi dan kî chu Champuii pawn a man thiam vek. A ûksák duh miah lo thung. Chaw pawh chu a rin ai daihin a ei tam ve, Dami a titi bawrh bawrh reng a, nuam pawh a ti chho ve ta viau. Chaw ei khamah thleng a sil sak a, Hmingi erawh phone a hmet char char thung, a thleng sil zo a han ṭhut ve hnu chuan, “Champui, U Rinliana leh Muanawma te hi i kawp chiang” Hmingi chuan a ti a, a nui naa a nui hmelah chuan elsenna a lang thei. 

“Rinliana chu tu nge? Zu rui mawl deuh kha maw?” Champuii lah a thluak hi a ṭha zêk zel. 

“Ha..ha, han hriat loh der kher, i zak ami? A ho lutuk..a rawn rim ziah che kha, Muanawma zin pawh an hmang ṭangkai hle an tih kha..” kiai sak chungin Hmingi chuan a ti leh, Dami te chuan a ngaihna hre lo zetin an lo en tawp. Champuii chuan a thinurna chu thunun hram hramin, “E! Kha pa kha maw..tlangval pangngai elo? Awii, a van zia lo, mi huihphâi ang deuhin asin ka lo kawm vel, ka bâwl nasa thei si, ka van zak e..” a ti ve leh ta hmiah a. Hmingi erawh a nui ṭha duh tawh vak lo, “Rinliana chu a hna thawhsak turin, Muanawma erawh a sum eisak atan a hmang an ti che nia aw..” a ti leh a, Dâwt ngialngan lutuk chutianga a sawi theih mai danah mi nawlpuiin Hmingi te nufa an lo ngaihdan pawh chu mak a ti ta hauh lo. 

“Muanawma leh a ṭhiante lawm ka chhawr ṭhin,. Rinliana chuan Muanawma a hlau rap..” a tih mek laiin Muanawma’n a rawn call ta hlauh a, a lawmzia chu a..”Aw, Muanawm” a’n ti nghal hmak bawk a, Hmingi tûm hmel chu a va nuih sak bawk. 

“Umm, aw , hei hawn ka lo tum mêk a, aw..yes boss” a’n ti vel a. Phone chu dahin, “Dam, ka phei phawt ang, naupangho answer paper check ka ngai a, naktukah lo len leh ka tum dawn nia. “ Tiin Dami chu a nuih a, Dami pawh chuan kawngka thleng a va thlah a, anni chuan Hmingi leh a nu meng râng chu engahmah an ngai lo a nih hmel e. 

In a thlen hnuah Muanawma nen inbe lehin Hmingi ṭawng dante chu a hrilh ve ta vek a, Muanawma lah chuan, “I bula thing ding pakhatah ngai tawp rawh, chhanlet pawh a ngai lo, chuan, champhaiah chuan i chho dawn maw?” A rawn ti a. 

“Aw ka tum alawm, i awm si lo va” a ti niah niah a. 

“Nia, a pawi lo, karleh nilai velah chuan ka lo haw thei ang. Chumi hma chuan haw lo tum la tiraw?” A rawn ti duam a. A mize danglam thut thut chuan a tihrilhhai thin. A changin a thlahlel lo va, a changin ngai âwm takin a awm leh bawk si. 

“Nia, ka lo tum dawn nia. Eng nge min lo hawn ang?” A han ti fiamthu a, “Eng nge i duh?” A han tih chuan, “Nangmah” a ti lawi si, an han nui dun leh rih. An boruak a han ṭha chho leh chuan Champuii rilru pawh a tinuam huai mai. 

Muanawma erawh khatiang khan Champuii chu han besâwm vel tak mah se, a rilru mawlhtu chu a kiang thei chuang lo. Mahse, tuna a châk ber erawh Champuii bula awma a kut vawn a ni lawi si! He nu hi a lo hmangaih hman em mawni le? A lu a thing a..”Aih, ni lo, a teuh lo. Ka thutiam ka hlen hma loh chuan tumah ka hmangaih thiang lo, Ani ber kher phei chu. “ A ti sup sup a. Beidawn hmel taka mu thlawpin chunglam a melh a, “Tu nge i nih tih chhuichhuak tur hian ka theihtawp ka chhuah ang? Engvangin nge ka ruahmannah hian i lo tel ve ringawt? Sawm loh mikhual hi ka lâwm viau hleinem. Tu pawh ni la, ka tan ṭangkaina nei pawh ni la, a chhan erawh ka hriat ngei a ṭul a ni..” tiin a insehruh a. A mitthlaah Senteii a rawn lang nghal. “Sente, min pui teh..” a han ti ngawt a. 

Champuii pawh Muanawma vanga mood fuh zetin mutmu a tuah ve a, a muhil siar siar tihin call a dawng, ner nâng chungin a han en a, number ringawt a ni, dar 10 a ri tawh a, a pawimawh a niang tiin a pick up ta hram.

“Hello, Champui, i dam maw?” A aw hriat ṭha êm êm chuan a rawn ti ta a. A ṭhu ta hlawl..

“Joel,.” A ti sap a.

“Ka ngai lutuk che, ka mamawh takzet che a ni, khawngaihin..” ngenngawl taka rawn titu chuan eng nge maw a duh le?

“Ka mamawh ve lo che” tih leh phone dah a rual a. Mahse, a rawn call lehnghal, a reject ngat ngat hnuah a switch off ta hial a..mahse, a muhil thei tawh hauh lo. Joela chuan eng buaina nge a tawh tak le? Tih ngaihtuahna avangin chu zan thuhmunah chuan Muanawma nen rilru buai takin an tlaivar ta ṭhak mai. Mahse, an tlaivar chhan erawh a inang si lo. Joela chu a lo la hmangaih reng em ni? 

Muanawma chet khalhtu hi Senteii bialpa ve tho em ni?

(Ka bân a nâ vek, ka inthlahrung tawh sia 😭