zochampuii 10

ZOCHÂMPUII..(10)

Ziaktu : Toni Râlte

Pu Biaka a be nghal a, ani pawn taxi a rawn hman tur thu sawiin, anni pali erawh Muanawma car-in Police station lam chu an pan ta nghal a. An va thlen chuan, Sawmliana pawh hmel ngui zetin custody-ah a lo ṭhu rân a. Muanawma te hmel a hmuh rual chuan a meng phâwk viau, Lateii leh Bmi an tel ve miau a. Lateii chu huat hmel zeta melhin a hriat tawk lekin a phun sup sup. Case IO chuan, “Zanin chu kan han kawl phawt ang a, nangni pawh eng emaw thulhah koh theihin in lo awm dawn nia..Le,. Sawmlian, kan nula hi i hmu tawh ngeiin ka ring a, tu nge a nih i hria em aw?” Tiin Lateii chu a kawk zauh a, Sawmliana chuan, “Ka hmuh vawikhatna a ni” a lo ti hmuk. Lateii chuan va pan hnaiin, “Min han en chiang deuh teh, hriat tawhna chu min nei chiang lo maw? I nawm amâka i hnuhkual, i vau zâm thin leh nangmah vanga a thiantha ber phatsantu kha ka nih hi, Sawmlian, mi tenawmpa, i thiltih man hi chu i hmu khawp ang. “ A ti tâwn tâwn a. Muanawma eraeh a chhungrilah a lawm, A tirah kha chuan Lateii hi a ring zo lo deuh a, Sawma hmel a hmu ang a, a rilru a thlak leh mai ang tih a hlau a ni. Mahse, a rin loh takin Lateii chuan Sawmliana a huatna chu a lo nasa a, kha chen mite hriatpui lohin rethei leh zalên lo reng rengin Sawmliana’n a lo sawp tawh a, tunah chuan a arpa chan lai a ni ve tlat. Mualpho pawh a huam em em ang tih a ring. Sawmliana chuan Lateii chu melhin, “Phatsantu tenawm ber i ni.” A ti ta a. Buichhia laih lohin a inpuang chu a ni ta ber mai. 

“Sir, ani hian ka video a la kawl a, tu emaw keimah ang bawka a bum theih hnenah a lo dah ru khiau tawh thei, khawngaihin hma min laksak u la ka duh a ni.” Tiin police lam chu Lateii chuan a hawi a, “Lungngai suh, chutiang a thleng a nih vaih chuan a hremna a pun belh dawn tihna a ni mai a. Mi â nileng tan lo chuan chutiang chu a ti duh lo tawp ang.” Awmze nei fê hian Police chuan a lo ti a. Pu Biaka pawh a rawn thleng ve a, Sawmliana a hmuh chuan ani pa zaidam, thinrim ve mai mai ngai lo chuan a fanu a hrechhuak a ni ngei ang, tharum thawh mai duh hmel hi a pu a, kha chen an fanu thihna avangin an nupain lungngai takin hun an lo hmang tawh thin. Tunah an fanuin mual a liamsan hnuah a fanu chuan a dikna chanvo a hmu ve chauh dawn ta chu a ni a, Senteii mangan leh rilru hrehawm theih dan tur a ngaihtuah hian a thinlung a na ngawih ngawih a ni ber e, Muanawma chuan a rilru hrethiam niawm takin a chhuahpui ta daih a. Evidence a tha thawkhat bawk a, Sawmliana tan chuan tal chhuah a harsa ve fat ang le..hunin engtin nge a nun a hman zel dawn tih chu a rawn hril ang chu.

A nuteii te in a thlen chuan Teteii a lo thu ve rân a, a lo nuih var var mai. Chaw eiah an sawm a lo ni. Ani pawh inbualin a han inthlak fel a, a khua a har ru veng veng, tu emaw chu a ngai a ni. Va biak hmasak dâwk dâwk kha a hreh ve tumhrang si, a whatsapp dp te chu a en a en ta ringawt. An khuaa a lo thawh hlima hmeltha a tih lem lohzia te, an innêl harzia te ngaihtuahin engtik lai atang khan nge a rilru a pek tak tih erawh a hrechhuak thei lo, a thleng ve tawp a ni ber. A ṭhianpa ex Toni quote a hrechhuak zawk, “Hmangaihna hi inring takin i hmachhawn thei ngai lovang, i zirchian chhungin a hnehlâk tawh ang che” tih thu te kha a hrechhuak a, ‘A va dik mai hmel ve le..then harsa ka ti em em tawh chu a ni si a’ a ti rilru vang vang mai. Chaw ei tura an rawn koh takah chuan choka lamah a phei zui ta a. 

Champuii pawh eng teh ual a ni bik lo, a phone chu ṭul hlei lovah a bih sek reng a, eng thil mah amah tilawma tihlim thei a hmu chuang der si lo. Va biak hmasak ngawt lah amah Muanawma’n an zin chhung chu hun thawl inpek a lo rawt tawh si. Rilru kawm melh melh chunga rawng a bâwl lai chuan Zari a lo lut hlawl, “I hre ve tawh em?” A rawn ti chûl a. 

“Eng chu maw?” A lo ti hû. 

“Seni pawngsualtu Sawmliana kha an man..A pa ten FIR an thehlut leh a, a case kha an zir chian leh hnuah an man, tunah chuan thiam a chang tawh lovang” a ti bawrh bawrh a. 

“Ngati teh thut nge a pa te chuan FIR chu an thehluh leh a?” Champuii chuan hrethiam lo zet hian a lo ti a. Zari chuan Champuii bai siam chawhsak rak rak pahin, “I bialpa Muanawma hmalakna vang mawle, kan hriat lohin a lo chhui char char alawm,. Amah ngeiin Sawmliana tal awh theihna turin thang a kam alawm..hei vang hi a lo nih dawn hi, a zin hmasaka a lo danglam chhan pawh kha..” a ti leh ta mawlh mawlh a. Champuii chu a bangbo deuh hû naa a harh ta zawk mai. “Muanawma vang a ni tih engtin nge i hriat?” A han ti leh a. 

“Seni nuin a sawi alawm, chuvang alawm Aizawlah pawh a zin leh thut ni,. Amahin a lo zir chiang ve ngat ngat a nih hmel..chuvang chuan, nang pawn hrethiam la, ngaidam la, inthen reng reng suh ang che u..” a ti leh hmawk hmawk a. Zari te hian an buaina bul ber an la hre lo tih a lang, Muanawma chuan khawiahmah a sawi chhuah a ring lo rêng a ni. Mahse, lan chhuah hun awm ta se..

“Chuan, Muanawma chu i bia mi?” A ti leh ringawt. 

“Be lo e, nakinah ka bia ang, i be hreh ve bawk sia maw, in luhlul dun si, in induhtawk dun bawk si, thiante kan chet a ngai. In induh ve ve, in kal hrang thei tak tak chuang lovang.” A lo tihsan leh hmiah. Zari chuan va be mah se; pawi a ti em em hran lo. Amahin a be thei si lo va. 

Zanah Rinliana te lo len hmain in chungah a leng chho a, Ziri leh a naute chiah an lo awm a, “Khaw nge Nu Zuali te” a tih chuan, “Pu Kâwla kha a na riau an tia, an va kan ve dawn a nih kha, lo thu rawh, ka khuahar, thil hrilh tur che pawh ka nei..” a lo ti siam siam a. A thu ve mai. “Awii enteh, kan pa chuan ningani-ah khian min lo hruai a tum a, ‘A ngai anga kan awm leh dawn chuan ka rawn haw dawn lo’ ka ti sa a, ‘Dawn tawh lo, in luah tur pawh ka be vek tawh’ a tia, rinngam chi a ni ang em le ka ti” a ti nghal mawlh mawlh a. 

“Ring rawh, mipa a nia, chutia a tih ber tawhte chuan in indang em em ang. Zu pawh a in tlem phah maithei asin.” A ti ve luam a.

“Nia, haw ve leh phawt ila, e chuan taka! Senteii pawngsualtu an man leh kha i lo hre tawh ang tiraw? Muanawma hi chu a naupan ang ai hian a va che pa thei reuh tak, i bulah heng thil vel hi a sawi ang tiraw?” A ti leh chúl a. An pa nen an inhmuh vat dawn vang ni maw a helhhawlh riau, a awmdan chu naupang thil thar nei ang mai hi a ni. Champuii chuan Muanawma’n engmah hrilh lo mah se, mak a ti ang tih hlauin Ziri bulah chuan, “Hrilh ve e. A chhuanawm khawp mai.” A ti ta ngawt a. 

“I tan chuan a nuam vak lo maithei, mahse, nang chu nula puitling tawh i nia, mitthi tawh thîk tur khawpa â i ni hleinem tiraw?” A han ti leh hnuhnawh a. 

“Umm, nia, ka thik hleinem, Muanawma hi ka khawngaih zawk thin a. “ A lo ti var a. 

“Kan chunga khuanu ruat hi chu kan dan theih a ni si lo a nih hi, Tikhan Muanawma pawn zalên leh thlamuang deuhin a kawp thei tawh che ang a, dik tak chuan a tan pawh a hrehawm ve dawn asin, Seni chhungte mitmei te hi a la vêng ni hian ka hria a, nau ang tak taka ka en ve avang hian ka lo khawngaih thei lutuk, Seni thih hnua a buaipui leh hmasak ber i la niin ka hria, a duh ve hle che tih a hriat reng..” a ti leh duah a. A ṭawng a kal khawp mai. 

“Aa..nia, kan awm zel dan tur chu Pathian thu thu a ni mai.” A lo ti sap a. Chutih lai tak chuan Ziri te kawngka chu an rawn kik a,”Lalzir, Ziri” a rawn ti dût dût a, Rinliana aw ngei a ni tih a hriat avangin Champuii chu a ranga rangin Ziri re nufa roomah a tlan lut nghal. Ziri pawh chuan a hrethiam nghal mai,” lo lut rawh u” a ti lâng lâng a. Rin ang ngeiin Rinliana leh Vana te an lo lut nghal. 

“I in hnuainu kha khaw nge a kal i hria em?” Rina chuan a ti a. A thu zui nghal bawk. 

“Hre miah lo, a awm na nge?” A lo ti hâ a. 

“Ti nge hetiang hian a awm tlat le..rim hi a hlau ngawih ngawih a nih hi, Muanawma te len chu a phalsak tho si, zirtirtu ve si mawl reuh lutuk.” A ti nuah nuah a,. A sawi hi Champuii pawn a dikna chen awmin a hria, nula ve a pumpa, tlangvalte rim hlaua hetianga lenglên hun vela a chhuak ziah hi thil mawi tak chu a ni lo alawm, nula te chu rim thiang an ni miau a, a awmna lah Thingtlâng a la ni ve bawk si. Mahse, a dik adik chuan inleng han neiha a mawi leh tha thei ang bera lo dawnsawn leh polite reng ngai chu a ning ve thin a ni ber. Amah pawhin a tlei tawk em em si a, tunlaiah chuan ngaihzawngte ni lem lo chu an inrim em em tawh lo. Rinliana hi chuan rim tlut tluta rim thluk theih a inbeisei a hi ngei ang. Rinliana te lah chu an ṭhu ve ta reng lehnghal,. Ziri te khumah a ṭhu tûm bûr mai, Ziri nen an titi laklawh asin mawle. 

Muanawma nuteii chuan, “Bawiha, naktukah maw i thianpa te chu an inneih dawn? “ A han ti a. 

“Umm, dar 11-ah daih a nia, ka hmanhmawh lo” a lo ti vat a. 

Zanriah ei khama Jerry phone han en chuan, “Ehe! Muana, hei Seni case kha an thar thawh leh a nih hi, Sawmliana kha an man leh tawh..” tiin group-a an lo dah ang ang chu a han chhiar a, Muanawma hmalakna rah a ni tih an hre hauh lo tih a lang. “A va lawmawm ve, thudik hi chu a tlo an tih rêng kha maw..” a lo ti ve boh a. 

“Awii, Bawiha, i rilru a thar awm mang e, mahse, i tawrh chhuah vek tawh kha aw..zu te kha i lo in phah hlauh ang e..” a nuteii lah hi aw..a ngaihtuah ve thei siah..

“Nge ka in ngawt ang, ka rilruah te chuan a hlui ngai reng reng hleinem..” thu tak deuh hian Muanawma chuan a lo ti khauh a, Pu Zauva chuan hrethiam takin thudang a lo sawi ta zung zung a, midang pawh chuan Seni chungchâng chu an sawi zawm tawh lo. “Ka bazar chau riau, Ka mu mai dawn,.” Tiin Muanawma chu roomah a lut zui ta a. A chau ve deuh tak tak bawk a, muthilh bawrh bawrh a châk viau. Mahse, a helhhawlhin a zauthau ti mai ang, engtin mawni hian a awm hûrh mai a, a mut a chhuak hleithei lo. Phone a han en a, Zochampuii dp bawk a hmetchhuak leh ta..

A insum thei ta ngang lo a niang e, “Zoi, Zochampui” a va ti thâwr mai. 

“Eih” a rawn ti a. 

“Ka thei lo” teh ngawt chuan..

“Eng chu maw i theih loh?” Champuii’n a rawn tih chuan, “Biak loh che hi” a ti ta a..amahah tlawm intihna pawh a nei miah lo. Chu nula tê reuhtêin zûn a ngahzia leh a phuar natzia chu mak pawh a ti,. Mi inngaizawngte angin an inzui tam hman miah lo a nia. Mahse, a ngai em em tho si, a rin danin amah ang bawka inringtawk leh induhtawk, luhlul bawk si a ni ve chuan a hîp ni berin a hria..

“Min be ta si che..” a rawn tih chuan a khi suk. 

“Eng nge i tih?” A va ti a. 

“U Ziri te roomah ka biru mêk, i hrethiam em?” A rawn tih chuan a nui hawk, Tute lak atangin nge a birûk a hrethiam pha ve. “Ka lo haw hunah artui chhumsa kan pe dawn nia” a va ti a, “Chu pawh chuan awmzia a nei chuang lovang” a rawn ti. Chutiang chuan thu ril leh lungkuai em em pawh sawi loin an uang kual a, an hlim dun reuh phian..

“Hei an haw ve chiah e, ka zu chhuk tawh ang e. Ka lo call ang che.” Champuii chuan a rawn ti a. 

Ni e, amahin msg hmangin bul a va ṭan thar leh a, Zochampuii’n a rawn call ve ta thung. Hetiang hmeichhia hi alawm a lungdumtu chu..an han inbiak chuan a hma ang tho kha a ni ti tawh mai ang, inhnialna leh inkheina a tel ta lo. “I zin hmasakin engmah min rawn hawn lo va, tun ṭum chu min lo hawn ve thei” Champuii’n a tih chuan, “Ka rawn hawnsak reng che a, mahse, ka thinrim a ka u ka pe daih alawm” a rawn ti a. An nui dun hawk hawk mai. Thutak deuh zawkin, “Chuan Seni case vel chu a fel thei dawn âwm em?” A han ti a, a inthlahrung deuh niin a lang. 

“Fel thei turah chuan ka ngai, police lamin an han kawm ve ang a, a inpuan mai ka ring.” A ti a. “Seni chungchang hi chu i bula sawi nuam ka ti lo” a tih zawm leh a, Champuii chuan, “A ho lutuk, ka hriat ve kha a pawi hleinem. Chuan, Andy vel kha tu hnen aṭanga i hriat nge?” A ti ta a. A hre duh tlat a ni. 

“A ho lutuk, khawvel hi a zim êm alawm, hre lo la a ṭha zawk..” Muanawma chuan a ti a, “Ka tenawm tiraw?” Champuii chuan a ti sap a. 

“Tupawn nunhlui chu kan nei alawm, i nunhluiah eng ang harsatna nge i tawh tih ka hre bik hleinem” Muanawma chuan a ti sup a. 

Chutiang chuan thu ho mai mai sawiin rei tawk an inbe ta a,. An boruak pawh a ṭha chho a ni ta reng mai. Muanawma hi sawi tawh angin mi tumtlang, mi sakhat ve tak mai a ni a, rilru vawi leh khata thlak zung zung chi a ni lo bawk nen. Champuii hi Seni thih hnua a ngaihzawng hmasa ber a lo ni bawk a, a nunhlui avang chuan nat châng nei mah se; chutimaia Champuii han hnar leh han pawm loh thut chu harsa a ti a ni. Champuii pawh mipa han kawp ve nual tho mah se; thinlung tak taka a ngaihzawn chu Muanawma a ni ve tlat, Muanawma kher lo pawh hi hmu zo lo a ni bik lo. Mahse, Muanawma mizia hian a hîp tlat mai a, Joela te anga fiahna nei îk lova kalsan tur chi niin a hre lo. 

Sawmliana pawh chu lungngai ru takin a ṭhu kun lup a, Police te chuan an han kawm chho ta a, Lateii leh Muanawma ten an dai khalh hneh êm avangin han ṭan nat vak theih pawh a ni lo, a hmate kha chuan Seni kha rui angin a sawi a, a pawngsual loh thu leh amah Seni zu rui chuan a sawmin a sawm lo chauh ang khan a sawi kha a nia, video-a a lan danah chuan a âwm ang ve viau bawk nen, finfiah vak ngaihna a awm ta si lo va, an sezâwl chhuah leh ta ngawt mai kha a ni a. Tunah erawh a dan a dang ta deuh, ani pawh chuan dan chêp a nihzia hai bik loin Seni chu a star rûk êm vanga pawngsual ta mai a nih thu a sawi ta a. Khatiang vang khan Seni nunnain a tawrh phah ang tih a hriat bik loh thu te, Khatia a vau zâm tawh hnu chuan hma a lak ngam a rin loh bakah tumah a hrilh ngam pawh a ring lo a ni. Mahse, a beisei loh takin chet a rawn la ta si a, chuti na nâ na chu tiin Lateii kha video thehdarh turin a hrilh ta mai a ni tihte thlengin a sawi ta a. A inpuang ṭha duh bawk a, dâwp rei pawh a ngaih loh bakah kutthlak pawh a tuar lem lo. A tukah Central jail lama phurhthlak turin Lock upah a mu ta rân mai. Mak deuh chu kum tam pawh liam se kan tihsual hian min la umzui zel a, tu emaw kan tihnat te, tu emaw kan diriamna te hi chunglam khian a hre vek a, hun hmangin phuba kan dawng leh nawlh thin. Chuvang chuan, kan mihringpuite hi thinlung na ngawih ngawiha siam tur a ni lo ve. 

Sawmliana a inpuang tawh a, jail-ah dah luh a ni dawn tih an han hriat chuan an thaw huai hlawm a, Pu Biaka hmel hmuh pawh a nuam ta hle. Muanawma erawh a lunglên a kaitho ti mai ang, a rilruin Seni a ko mawlh mawlh reng a, “Thiam i chang tawh a, rorelna dik i hmu tawh a nia, i lawm em? Ka lawmpui che aw..” tiin Seni thlarau a be mawlh mawlh mai. Media lamah an han tlangzarh ta bawk a, hmana Seni dema diriamtu te ho kha amah ṭana Sawmliana dem zawk an ni leh ta fur mai. Thenkhat lahin, “FIR a thehluh ngam danah khan kei chuan a pawngsual ngei ang tih ka ring rêng a ni..” an lo ti ve bawk. Zoram mipuiin Seni an ngaih dan chu a dang ta, a rilru hrehawm lutuk a inawhhlum thu an hriat lehzel phei chuan an rilru a na tlang hle, an inthiam loin Seni chu an khawngaih em em a, a hma atanga amah lo ṭan ve ngat ngattu te lahin, “Hmana in chirhtheha in vawm chiam vanga mahni intihlum a ni ngei ang,. Midang rilru tihnat hi kan hreh lo lutuk a, a sawhkhawk in la dawng ve mawlh ang..” an lo ti mawh lo bawk. Sawmliana chhungte lam pawh an zak ve a niang, chhuah pawh an chhuak ngai meuh lo. Bmi tak pawh a zak ve a niang, a thiam loh awm hauh lo mah se; innei mai tur an ni tih an lo hre ve ṭhup si a, a zak ve lo thei lo. Muanawma te chuan an duh ber leh an tum ber an hlen ta bawk a, a tuk chu bazar nana hmang vein a tuk lehah an haw leh ta dial a. Bungpuia lo nghak rengtu Zochampuii ta tur bakkilh mawi zet pawh a dah tha ve ran e. Khua an han thleng chu an lo lar hle mai a, Seni nu khan a lo sawi ve bawk nen, tupawh mai chuan an fakin Seni a hmangaihna chu chhuanawm an ti hle a ni. An thlen zan la lain Champuii inah a leng nghal a. 

Bakkilh pek pah chuan, “I kilh loh vaih chuan ka chhuhsak leh daih ang che” a han ti ngawt a. 

“Awii a va mawi reuh em em, tu thlansak che nge?” Champuii chuan nui var var chungin a lo ti a. 

“Keima thlan ve ngei a nih kha..” inchhuan hmel deuh hian a ti a. Tun ṭum chu Lawma te an tel ve lo, Kima nen chakai chhitin an lo kal daih a lo nia. Champuii nen chuan inngheng rialin an thu dun a, in thurual ang hrim hian, “Chuan..” an ti rual ṭhawt mai. An han nui leh rih a, tunah chuan boruak chhia a awm ta lo niin a lang. 

“Ti nge Lateii kha a kal ve a?” Champuii’n a tih chuan, Lateii chetdan zawng zawng chu a hrilh ta vek a, “Midang bulah erawh sawi suh, amah vangin Sawmliana kan mantir thei ang tluk a nia, huat pawh ka duh lo. “ A ti a. 

“Tumah ka hrilh lovang. Mahse, ti nge nang leh kei kan nih vang hian Lateii chuan min huat ringawt le. Miin an sawi a” a ti a. 

“Ka hre bik lo chu chu, seni lakah a thikthu a chhia a niang” a ti ve mai a. 

“Chuan, engtin nge kan awm dawn?” Upa zawk na nâ na chu a ṭawng huai ve deuh a ang. 

“Hei tihian ni mai lawm,. Mahse, dâwt engmah tel lo se” a lo ti sam êt a. 

“Dawt hi chu ka la hrilh miah lo che, ka nunhlui kha chu i hriat châk ka rin loh bakah nunhlui sawi zut zut mi ka ni lo va, min zawt lo bawk a, ka hrilh ta lo che a nih kha” Champuii chuan a ti duah a. 

“Ka hria lawm, keipawn ka hrilh bik lo che. Mahse, ka zêp lo, ka hriat tirh chuan nâ ka ti..” Muanawma chuan a ti sup a. Champuii chuan, “Nang chu i ka virgin awm sia, a na ang..tin, i rin phak bak a ni bawk ang a, mahse, khang ka nunhlui duhawm lo deuh deuhte khan chhan a nei ve tho tih min hriatsak la ka duh..” a ti sep sep a. Muanawma a lo bu nghut nghut mai, a rinsa kha a nia,.”min hrilh kher ka phut lo che nia, ka thikthu hi a chhe ve bawk sia. “ A ti a. 

Champuii’n thingpui a va chhuan lai takin a phone a rawn ri ral ral a, Muanawma chuan, lo en vein Joela tih a ni. Champuii chuan ner sak chungin a han la a, “Hello” a han ti a. 

“Champui, ka ngai che. Vawikhat chauh tal inhmuh leh ka duh a ni..khawngaihin” Joela ṭawng chu a sehchilh angreng hle. “I rui a ni maw? Rui chung chuan min lo be tawh suh. “ A han ti vin ṭhak a. 

“Nangmah vangin ka rui, aw..nia, min pawm thei tawh si lova, kan fa tal kha la dam se tiraw?” A la rawn ti ta deuh deuh. 

“Ka dah a nia, inleng ka nei” tiin a dah ta hmak. Muanawma chuan a lo melh reng a, zawhna nei hmel a put avangin, “Joela a nih kha, ka ex” a ti sep a. 

“In inbe thin em ni?” Muanawma chu a pawr hran lo, mahse, a lungni vak lo niin a lang. 

“Champhaia ka awm lai khan min rawn bia a, a number pawh ka lo nei tawh lo zawk a,.” A ti dat a. 

“Ti nge in inthen?” A va dilchhut tak. 

“Ngaihzawng dang a nei a” a ti sap a. Thil hlui ngaihtuah hmel a pu bawk.

“Kan ruih chhiat ber lai pawha kan la biak hram hramte hi chu kan tan an pawimawh asin..” Muanawma chuan a ti sup a,.”Ani zu rui mai mai biak kha ka peih hleinem,. Bakah a over si” a ti hlak a. Muanawma a nui huk mai. Thingpui chu an in a, Ziri a rawn lut hlawl..”Awii Champui, pu Kawla thih kha in hre tawh em?” A rawn ti hlut a. An meng phawk viau. A tha vak lo tih kha chu an hre tho nain thi mai tur chuan an lo ngai bik l a nih hmel. “Hre nang, engtikah nge a thih?” Champuii chuan a lo ti var a. 

“Nichin mai khan mawle, a zia lo e..ka pa te pawn an va kan a, a thi tur chalchang a rapawm lutuk an ti lehnghal. Ka khawngaih ngawt mai. “ Ziri chuan a han ti leh a, “A va zia lo tak ve mawle. Champui, kan lumen ve dawn em?” Muanawma chuan a han ti a, Ziri chuan, “Eheu! Inneih hma hauhin i ngam lo sa a ni maw?” A lo ti chul a, an han nui ho leh rih. 

“I zin chau sia, i tlaivar ve peih dawn mi? “ Champuii’n a tih chuan, “Chau em em lo e, ka kal ve loh chuan Rinliana ten an thutpui palh ang che” a han ti zauh a. 

“Mahse, kal hma lo ila, i duh leh chhing hlek la..” Champuii chuan a ti a, chuti taka duata caretu a neih lohna a rei ve tawh bawk a, Muanawma pawh chuan nuam a ti ru viau. Ziri chu a thu ve ta rih a, “U Zir, inpa chuan engtikah maw a rawn hruai dawn che” Champuii’n a tih chuan, “Naktuk kha a nia, mahse, ka pa a tha vak lo va, inrinniah emaw a rawn kal ka ring” a ti ve mai a. 

“Tikhan thlawi mai mai rawh, a nuam daih zawk ang..” Muanawma’n a lo ti vut, “Nia, dik tak chuan in dan loh chuan an ina awm leh chu ka peih tawh lo, duh leh sual pawh min ti mai rawh se..hetah ka nuamsa ve tho ém mai, ka nu lah hi a naupan ang ai hian a felin a fing bawk si” a ti ve ta duah a. 

“Champui, U Ziri hi maw a nulat lai chuan kan star thin, a chhe lo a nia aw, inchei a thiam sia, a rukin kan hisàp thin..” Muanawma chuan a ti leh ta pek a, “Rinmuanawm, ngawi mai mai teh, In tleirawl laia in lerh theihzia kha..nula chhaih in hrat si”  Ziri chuan a lo ti ve leh a. Zari leh Lucy te an rawn lut ve hlawl mai, mitthi ina kal tur thuamin an rawn inthuam ṭap tawh a, “Kal hma in va tum ve” Champuii’n a tih chuan, “Kan kal nghal dawn reng reng lo, Hei Lucy hian Isabella in ang u a tia, kan chhuak hma mai mai, Muanawm, nang mipa i nia, va lei teh, Muantuibura ten an nei..” tiin Zari chuan cheng 600 a pe a, pakhat 300 man a nia, um hnih lak an tum a nih hmel. 

“ In va han zak lo tak, hmeichhia te tê si..miin an hria che u nge, mitthi inah in kal dawn bawk si” Muanawma chuan a lo ti a, an ngai haw duh der lo. “Kal mai mai teh, nang pawn i in ve leh duh awm em mai, u Zir, sang ve la, um hnih chauh chu kan kham lovang” Lucy chuan a lo ti ve bawk a. Ziri lah chuan, “Lawk, ka duh ve lawm keipawn, pawisa ka han la lawk ang e. “ Tiin a chho nal nal, Champuii pawh chuan, “In a nuam sia, 300 chu ka lo thawh ve ang,.” Tiin roomah a va lut zuk a, a rawn chhuah leh chuan Muanawma chuan a lo melh reng tih hriain, “I phal lo mi? I thinrim dawn em?” A han ti a. Zari chuan, “Zu pawh a ni hleinem, Isabella te chu a ho lutuk, phal ve mai rawh.” A lo ti sawk sawk. “Ka phal lo tih ka sawi mawni le. Khawi ka va kal ang e,rui hlek suh ang che u. “ Tiin a han vau lâwk a, Ziri pawh a rawn chhuk leh tawh. Muanawma chu a chhuak ta a. 

Hmingi a lo awm a, “Isabella um 4 aw..” tiin pawisa a pe nghal. Hmingi chuan, “Awii i lo haw tawh law..i va che hero ve a, thu ve rih rawh” a lo ti sawk sawk a. 

“Aw vawiinah ka rawn haw, che hero vak mawni le..mitthi in kal i tum lo mi?” A han ti ve a. 

“Tum e, thalai an la kal ka ring chiah lova, i kal dawn chuan min lo sawm ve la..” Hmingi chuan a ti har har a, Muanawma hi a star tih amah Muanawma pawh hian a hria, mahse, Hmingi chu a duhzawng a ni lo tlat, hmeltha a ti hek lo. “Ka hre lo, ka chau ve deuh a, ka kal lo maithei” a ti ringawt. Isabella chu polythene-ah khungin chhuah mai a tum a, “Muanawm, Champuii nen hian in inthen mi a? Rinliana nen hian an inzura riauin ka hria. “ Hmingi chuan a lo ti leh a, “Then nang, ka then phal hleinem” a ti hmiah. Dâwt a hrilh leh vak ang tih hlauin a chhuak ta thuai a. 

An lo titi laih laih a, Muanawma chuan dawhkanah a thil lei dah pah chuan, “Lawma te awm ve se aw..hmeichhe hlang in ni sia, min pawngsual ang tih ka hlau.” A ti a, a nui ruh ruh bawk. 

“Chhe phak, kan ît zawng i ni leuh” Lucy chuan a lo ti a. An thil chu a va hawng rawk rawk a, no 5-ah a thli ker ker mai. In a harsa lem lova, an in thei pap pap viau. Isabella hi Hnahlan ho siam a ni a, a tui reuh phian, mahse, pum chhe tan chuan pumin a zo meuh lo thung. Alcahol a tel ve avang hian a kai ve theih a, Lucy leh Zari te pawh no hnih an in aṭang chuan an meng si sap tawh mai. Champuii erawh a la.kai ve hmel vak loh, ani zawng a hmain a lo ti ṭhang tawh bawk a, a thengthâwngah a thawk ve tehchiam lo hle. Muanawma erawh chuan no 2 bak a in duh lo. Dar 9 a pel ta, Mitthi ina kal chi ziazang an ni lo, Zari leh Lucy phei chu an zawi nguai mai a, an ṭawng duh barh barh kher mai, Ziri erawh nuih lamah a kal thung a, ho tê tê sawiin a nui khiah khiah reng mai. Muanawma leh Champuii chuan Ziri nui chu an lo nuih ve lehchhawng a, an hlim tlâng khawp mai. Lucy chu ding thutin, “Kal tawh ang u le..” a ti a. 

“Thu teh thu teh, khatianga mitthi ina i kal chuan i mualpho nghal a ni mai..” Muanawma’n a lo ti a, a thu ve leh mai bawk. Ziri haw tum pawh a pai nawk nawk, “U Zir, haw rih lo mai rawh, Pa Ruata ten an hau ang che. “ Champuii’n a lo ti vat a. A in tam ve nen Champuii chu a rui ve miah lo ni mai hian a lang, Muanawma pawn a dose chu a sang ru zêk a nih a ring. Tichuan, tlaivar ta lo chuan Champuii inah Zari leh Lucy chu an riak ta ringawt mai, Muanawma pawh dar 11 velah a haw..

Thlan an laihna lamah chuan an ri nak nak a, Lawma leh Kima te nen Muanawma te pawh an thu ho a, thlan khur lut zing pawl an niawm e. Tlai deuh tawhah Rinliana leh a nuteii fapa, Khawzawl ami rawn zin te chu an rawn kal ve a, intitlawmngai takin thlan khurah chuan a han lut that a, reivaklo a laih hnuah hah hmel deuha thawk la hawk hawkin a rawn chhuak a, “Ekhai! Ti nge in thut mai mai, Muanawma te kha in mawng a kham tawh ang, thlan lai tura kal kan nih chuan thlan laih mai tur a ni ngai e..” inla patling fahran hian a ti zuah zuah a. 

“Ve tak che hian, i rawn thleng chauh a, mi i han phut nghal ngawt a nia. “ Lawma chuan a lo ti hmuk. 

“Eng maw i sawi a? Lawmawm, ka chhang pawh rual pha lo i nih kha, i va zaktheilo ve” Rinliana chuan thinrimna a rawn paisa emaw tih mai tur hian a kawk ta sawk sawk mai. 

“Kei aia upa pawh ni la, ka ngam tho che..” Lawma chuan din pahin a han ti ve a, Muanawma chuan a chelh vat, “Duhtawk r’u, U Rin, nang pawh ngawi tawh rawh..” tia khap daih a han tum a.

“Khanglang a che, Seni case i chhui avang khan thei ber emaw in ti suh, ka beng duh mai ang che. “ Rinliana chu mak an ti ru hlawm viau, Muanawma nen an innêl lo tih chu an hre tho a, chutiang em ema a han thinur hlur chu a lo kal hmain a lem leh hlek ami aw an ti rum rum mai. 

“Seni hming hi i ka bawlhhlawh khan lam tawh hlek suh, Mi pangngai nih tum rawh, a la tlai lo” Muanawma chuan a ti ram hmak a. Seni hming a rawn lam avang khan a thinrim hle tih a lang. 

“Naupang, min chhang tawh suh, ka duh leh ka lam ang, ka thu thu, Lalrinawmi, seni..i bialnu inawkhlum..” a ti hman ṭâwk, a bek chu a ri no chawk mai. Muanawma chu tu chelh hman rual lohin Rinliana lamah tlan pheiin a bekah a va hnek a nih kha. Tupawn an thiam vek, Rinliana chaltlai lutuk leh ṭawng thei lutuk chu an lo ngei em em zawk. Rinliana leh Muanawma te chu an insual zui nghal a ni deuh mai,. Mahni tawka fitness ngaipawimawh leh insawizawi peih tak Muanawma chu a hneh lo han han ngei mai, YMA vice presidentin a ban a rawn phar ta a, Muanawma chuan a duhtawk ta rih. Rinliana hnar chu a thi hnu mai a, ṭawngkam chhe pui puiin Muanawma chu a ânkhum chiam chiam mai a. A cousin khan a hruai hrang ta daih a, an thaw huai hlawm mai. Muanawma erawh na a nei lem lo. Insual te chu a hmaa a tihṭhan a nia, a thiam lo hran lo.

Pu Kâwla chu an vui liam ta, a nupui fanaute an khawngaihthlak khawp mai. Pu Kâwla thlan an vur zawhah Muanawma te chuan Senteii thlan chunga hnahthel tla te chu an chhar a, a fai leh ta hun mai. Lawma chuan, “I chungah hian a lawm ve ngawtin ka ring, rorelna dik chu a hmu ta si a..” a han ti sup a. 

“Ka beisei” Muanawma chu a lo ti nghut..

Tichuan, zawi muangin an haw ve ta a, zanah Champuii te ho nen bawk khawhar inah an kal leh a, an inkawp chawt a ni bawk a, tlangval dangte chuan Champuii chu an beisei lem lo, Muanawma pawh chuti tho chu. A tuka Champuii school kal chu office a thlen rual deuhthawin an Headmaster Pu Chunga chuan a roomah a ko a, a va luh chuan, “Champui, lo thu rawh, eng emaw sawipui che ka duh a..” a lo ti var a, a hmel chu a thutak angreng hle. 

“Eng nge ni ta?” A han ti a. 

“Englo a nia, Pu kawla thih zan khan zu in rui em ni? Miin an sawi a, zirtirtu i ni si a, i than mawi loh chuan thingtlang kan lo ni bawk nen, i mualpho zêk thei a nia..” a han ti charh charh a. 

Champuii a phu zawk mai, engtin nge midangin an lo hriat theih le..khami zan khan inleng tumah a nei bawk si lo, a thiante leh Muanawma bak. Anni ho chuan an sawi a rinawm bawk si loh. 

“Sir, khami zan khan Isabella, Hnahlan grape wine kan in ve tih chu ka pha hauh lo mai. Kan rui ve deuh bawk a, lumennaah pawh kan kal ta lo rêng a, engtin nge in lo hriat daih theih zawk ka ti..a mak hle mai “ a ti khur dat dat a. 

“Hmn, ka rin dan vel a nih chu, zu ang khan an sawi ringawt a, kan nu min hrilh a nia, miin an hre tam tawh riau niin a sawi bawk a. A zia lo hle mai. Mahse, fimkhur tho rawh aw,.” Pu Chunga chuan a han ti leh a. “Nia, ka lo fimkhur tawh ang, kan thianho inrawt phurin kan han in ve ringawt a nih kha, chutia in reng pawh kan tum hran lo.” Champuii pawh chuan a lo ti ve a. 

Headmaster room atanga a chhuah chuan a inngaihtuah nasa hle. Zari leh Lucy te a video call nghal a, School piah di hmunah a va kal daih. 

A thil tawn vel chu a han sawi a, mak an lo ti ve nasa, “Awii, u ziri a nih êm chu ka ring si lo. Tu nge ni ta ang?” Lucy chuan a ti chul a, Zari pawh chuan, “Nia, Pu Chunga te meuhin an hriat tawh chuan a darh hle tawh a rinawm, keini pawh min lo sawi ve ngei ngei ang,.” Hlauhthawn hmel deuh hian a ti a. An dah ta rih. Muanawma a call leh a, a han sawi chuan, “Hmingliani a nih ngei dawn chu, ka va lei khan amahin alawm dawr nghak, nangmahni nena inho turah min ngai nghal tihna a ni mai. He nu tawng thei lutuk hi chu aw” a ti vang vang a. 

“Ka la kek ang, a nghal mah mah” Champuii pawh chuan a ti ram hmak mai. Muanawma a lo nui hawk hawk a, “Nang aiin a lian sia, i hneh dawn mi?” A rawn tih chuan thinrim fè hian, “Rinmuanawm, ngawi mai mai rawh, ka hneh awm êm mai, a cher ve tho” naupangchhia zet hian a ti a. 

A inngaihbel nge ni office-ah pawh chuan an melh hrek hrek ni hian a inhria a, hrehawm a tiin a zak takzet a ni. Zirlai naupang te pawn an hre fur awm sia, a rilru a buai ngei mai. Mahse, a zirtir mawp mawp tho a, a tui leh ta phian e. 

Banah Pu Muana te dawrah a peng ta ngei a, Hmingi leh an thenawm nula Zuali te an lo awm a. A mamawh ho a han la khawm a, Zuali chuan, “Champui, Pu Kawla thih zan chu in va che na awm ve a” nui tet tet chungin a lo ti ta ngei a, Zuali hi chu mi ngaihsam ve tak, fiamthu pawh duh, rilru zau tak a ni a, Champuii te lo rui pawh chu eng he hu-ah a ngai hran lo. “Nia, kha an lo sawi hlawm a, ka nuih a za zawk, tu dâwt phuahchawp nge mawni..in khuaah hian cctv in lo tam riau a nih dawn hi..” nui chung tho chuan a ti ve a. 

Hmingi chuan, “Pân lovah tho a fu lo an tih kha maw, sawi theihin in awm tihna a ni mai..” a lo ti deuh nghat a. 

“Pân loah pawh a fu thin tho alawm, a sawitu hi ka hre châk ngawt mai, ka beng duh hial ang mawle” Champuii chuan a lo ti hmak. Hmingi chu a ner nâng ringawt, a chhang zui ngam tawh lo a ni maithei. Champuii pawh a thil leite nen a chhuak zui ta nghal a. 

Lucy te ho bulah Hmingi vel chu a sawi a, “Awii amah a ni ngei ngei ang, Muanawma khan a va lei kher bawk sia, saw mihring saw ka kek châk teh mai a nia, ka pawi hi sawi se ka ti ngawt mai..” Lucy chuan a ti bawrh bawrh a, Ziri pawh a thinrim ve hle. “Saw nau saw a naupan lai pawn a ṭawng theih luat vangin chhuahchhalh a tawk hnem teh mai a nia. Muanawma a ngaizawng, a chang si lo i chungah a ṭuan ta ringawt a nih hi..” a ti ve hlak hlak mai. 

Zanah khawhar in an kal leh a, miin an lo melh hrek hrekte chu engahmah ngai lo niawm takin confi takin a awm lui tlat. Muanawma’n a dinpui a, a tawk a ti. Banah Muanawma nen an inzui hawng leh a, a la hma ve deuh bawk nen, thutthlengah Muanawma chu a tla zâl a, “Lo mu ve teh..hawh” tiin Champuii chu a kai a, chep zet chuan an mu dun a, “Inneih hmain kan ti dawn em?” Muanawma’n a ti sur sur,. “Ngai lo, dan khatnain kan innei ang chu” Champuii’n a ti a. 

“Ka zei dawn lo rapthlak a nia aw, ka la virgin sia” a ti leh nghut. “Tak takin Muanawm, i la virgin tak tak em? Awih a har e” Champuii’n a tih chuan, “Tak tak e, ka sual ve lai pawn hmeichhia ka kawp ngai lo. “ A ti dam thlup a. 

“Ka phu lo che ee, i la naupang zawk lehnghal” Champuii chuan a han ti a. 

“Min duat em em la a tawk mai. Nakkumah innei ang aw, ka nute pawh ka lo hrilh ang,. MA hi ka pass chuan,Night hostel ka siam ve ang ka tia. Zirna lamah kan thangharh ve tawh bawk a, a hlawk ve tho ka ring.” A ti mawlh mawlh a. 

“I chhung ten min duh ang maw? Ka upa zawk sia..” ngaihngam thei vak lo hian Champuii chuan a ti a.

“Duh duh, ninawm, ka upa zawk ti reng suh. Ka û mai tur che a nia, U Champui” uang zet hian  muanawma chuan a han ti a. 

“Hmela..” a ti hman ṭâwk, Muanawma chuan rawn bawhin a hmuiah a fawp nghal mial mial, infawh kher hi chu a zei ve pangngai. Champuii lah train chhuak tawh a ni bawk a, a dawngsawng thiam teh e. 

“Hmm, ka dik lo dawn tlat” tia a kap hup ṭûtin muanawma chu a tho ta nulh a. 

Champuii a lo nui char char thung. 

Sunday tlai a ni a, ni pawh a tla lek lek tawh. Thlan inhung khap hmaah chuan Rinmuanawma leh Zochampuii te chu ding dunin Thlan lunga hming inziak chu an melh ngawt ngawt a. Khatia Rinliana man a niha Seni’n rorelna dik a hmuh takah kha chuan tiin Pu Biakmawia te chuan Senteii thlan lung chu an phun ve ta a ni.

“Sente, ka hmu ve hman lo na chea hmeichhe tha tak i nih ngei ka ring. I kalsan tak Muanawma hi lo ngaihtuah reng reng suh aw, keiman ka lo enkawlin mi puitling ni turin ka lo chher dawn nia, thlamuang takin chawl hahdam tawh rawh aw” tiin a rilruin Seni thlarau a be mawlh mawlh mai. 

Muanawma paw’n a rilruin, “Sente, i aiawhtu Champuii nen hian kan theihnghilh tawh lovang che. Chawl hahdam rawh aw..ka hmangaih che a, ka hmangaih reng bawk ang che..” a lo ti ve mek bawk. 

“Ni a tla dawn, haw tawh ang.hmiang” Muanawma chuan a ti sup a. 

Thlanmual atang chuan an inzui haw ta hnak hnak a.

A TAWP TA.

(karleh lamah ka zin dawn a, regular lo deuha rawn dah ai chuan ka titawp ta mai aw. Next story tur ‘AW..LALSANGLIAN’ tih hi ka ziak ṭan leh ang a, ka inziah khawl deuh hunah ka rawn dah leh ang. Ka reh deuh paw’n lo dawhthei hram hram r’u aw..Aizawl lamah hna thilah ka zin dawn sia,min hrethiam ang che u aw..love u all..❤️