zochampuii 4

ZOCHAMPUII (4)

Ziaktu : Toni Râlte

Muanawma leh Champuii te inkar chu an ṭhiante bakin a chinchhuakin an la hre lo, hriattir kher pawh ṭul an ti lo bawk. Rinliana erawh a buluk tak viau hnu khan zilhhau a tawk ve deuh nge, a zia pawh a zawi angreng viau mai. Pi Fâwni te chu hmeithai an ni bawk a, mi khawngaih an hlawhin râlna sum pawh an dawng ṭha hle niin an sawi,. pu Hluta te nupa an felin nu leh pa chan an chang thiam hle mai a. Engkima Pi Fâwni fate chu an tuamhlawm a ni ber e. 

School pawh an la kal tluang ve zel a, Champuii pawh a tlangnel chhoin naupangho tak chuan an ngaina em em a, English subject-ah pawh hma an sawn viau mai, an Headmaster Pu Chunga pawh a lawmin,result tha tak an neih ve ngei a beisei bawk. Muanawma pawh a inzir chho ve ṭan a, Aizawla exam tur a nih avangin kar hnih vel lai a zin a ngai dawn a, a zin hmain a ṭhianten lui kal an rawt leh a, a hnar phal bik lo, ram lam hian a lung a lên miau a. Tichuan, an ṭhianho bawk chuan Dampa lui lam an pan leh ta dal dal a, eng emaw thil an tawn tawh loh hram an beisei a ni. Picnic type-a kal an ni bawk a, an sangha man te pawh insem kher lovin an siam vek a, an innghahna hmun lah a rem si, an hlim nui ri pawh a ring ṭha viau. Hun thawl an mamawh dawn tih hriain an ṭhiante chuan tumbu leh eng ilo vâiin an kalsan ta hlawm a, anni pahnih chu an piah lawk lungpher hlai zetah chuan ṭhu dunin an inngheng rial a,. Tleirâwl pawh an ni tawh lo nachungin an awmdun tawh hi chuan an lai dun em em zel mai hi anmahni pawn mak an inti thin. Kum 5 laiin a hmeichhia zawk a upa naa, an awmdun chuan inrualkhat âwm vel an ni. Champuii hi tar har chi kan tih mai ang hmel leh pianziaah a ni ve deuh bawk nen..

“Exam zo tawh u la, lo zin ve daih la ṭha tur a nia.” Muanawma chuan a ti thuphung a. 

“Nia, mahse, a rei chuang hleinem, kar hnih chauh alawm.” Tiin a lo chhang a,. Naupangchhia zetin an kut chu an inkhalhsak neuh neuh reng mai.

“I lo rinawm ang tiraw?” Muanawma chuan thlek zauh pahin a ti a,. “Umm, awm ang. “ A tih chuan, Champuii hnara tuai zauh pahin, “Reply tawi thei si” a ti hak a. 

“Ka peih loh zawk chu maw i awm loh chuan Rinliana te ho an rawn hrâng leh ang tih ka hlau, lenna tur hi a vâng bawk sia” Champuii chuan a ti nang nang a. 

“Aw..chaw ei kham veleh in chungah i chho daih zel ang a, dar 8 velah i haw thla leh ang a,.” A lo ti ve ngial a. 

“Len hi ka peih vak lo, nangni in nih loh chuan inleng neih pawh hi ka peih vak miah lo. Keimah hian ka tlei ve riau zel. “ A lo ti a. 

“Thil dang daih, chhungkaw chanchin vel hi kan la sawi dun miah lova, kei chu i hmuh ang hi kan ni mai. Kan khuaah ka patea leh ka nî te an awm a, a bak chu hmun dangah. Inngaihzawn chuan hetiang lam hi a ṭul zualpui chu inhrilh a ṭha ve asin.” Inla patling zet hian Muanawma chuan a ti a. Champuii erawh a ngawt dat.

Mahse, a hnu deuhah rawn ṭawngchhuakin, “Nu ka nei tawh lova, tuna ka nu hi ka nu a ni lova, ka sawi awmzia chu ka nuhrawn a nia, mahse, a sual lo. Û te duat rawn ka ni ve a, kan khawsak chu a pangngai a ni mai e.” A ti a, a duhtawk der. Muanawma paw’n zawh zui zel a tum lem lo. An ṭhiante thawm chu an hre pha tho naa, an rawn lang chuang lo bawk a, kiss te pawh an inkiss ve ang chu..mahse, Champuii rilru kilkhatah hian hlauhthawnna a riak reng thin, a nunhlui ṭenghneng ve tawh takte kha he pa Rinmuanawma, a bialnu thihsan tan pawha kum eng emawti chhung lo rinawm tawh hian a hria a nih vaih chuan, a hma ang bawka hnawl a nih a inring a ni. Chu chu amaha inrintawk lohna piantirtu a ni ta chiah reng a, chutiang bawkin Muanawma paw’n a hmalam huna a tihtur hnachhawp chu Champuii hian a hria ang tih a hlau ve tho. Innel leh inpawh tak chung siin rilru kamtu leh mawlhtu nei ve ve siin an inzawmna chu an kalpui hram hram a ni ber e. Chutia mite anga va induh hiam hiam ang pawn an lang hran law, mahse, mi rilru sakhat ve ve chu midang inneihsan erawh an tum lo ve ve bur thung. Eng tak ang zel ang maw..

Puar taka chaw an ei kham hnuin muangchangin an haw leh ta diah diah a, Muanawma zin tur vang nge an ngui deuh riau hian a lang a, tuman an sawi lang chuang lo. A tuk tuk leh chu Muanawma zin hun tur a lo ni ta bawk nen, a tuk nilêng deuhthaw chu School chawlh a ni bawk a, Muanawma pawh Champuii bulah a tâp chawt mai, chu chuan an pahnih inkar pawh a tiṭhain a vawng nung em em a, an inhrechiang tawn ve ta viau bawk. A zin dawn zanah chuan Muanawma’n a ngen nasa bawk a, Zari leh Champuii ten an rawn insiampui a, An inkar thu hi Pu Ngura te pawn an hre ve vek tawh a, sêlna em em an nei lo. Kum thuhlaah lah tunlaiah chuan, “Kumte chu number mai mai” tih hi kan thuvawn a ni deuh bur tawh nen.. 

“Muanhnap, hawh u, mizo movie thar ‘Thih leh Dam’ kha en ang u, lei teh. “ Zari’n a laptop chawi pah chuan a ti a, Rang lutukin Muanawma’n laptop chu a va chhuhsak lawp a! Zari pawh a hrilhhai angreng viau. Muanawma nuam ti leh si lo chuan, “Aa..englo, ka laptop hi a chiang tawh lo lutuk a. Lawk aw..” tih leh hawn a rual a,. Engvanga Zari te khawih phal lo nge a nih tih chu a wallpaper rawn lan takah chuan a chiang viau. Amah Muanawma leh Seni te, leilet phaizawla an inkuah vawng vawng lai, Lawma ngei maiin a laksak kha a lo lang ta kulh mai. Muanawma chuan Champuii mitmei a veng ve deuh nge, a khup leh thuai a,. “A ho lutuk, ka hre vek tawh..” Champuii chuan a lo ti sep a, a ngaipawimawh duh lo lui tlat. Nunhlui nei lo tu nge awm bik? 

“Champuii inah chho tawh zawk ang u, Lawma te’n ar kan an sawi kha” Muanawma chuan a ti ban charh a. Zari te paw’n a mood hrethiamin an e aw ve ta mai. An chhuah dawn chuan a nuin, “Meng rei lutuk lo la aw, sumo-a kal tur i ni sia, i tho hman leh lo palh ang..” a lo ti a. Car leh bike chu an kawl ve tho nain, a bike chian loh lai a ni a, an motor lah a zin rei deuh dawn vangin he lama hman a ngai ve tho nen, sumo- ticket an la ta zawk a ni. 

“Champui, lo la leng fo r’u aw. “ Tiin a nu chuan a thlah leh thlap bawk. Pi Mawii hi chuan a iai lo khawp mai, tin, a fapa, a bialnu sûn tawh, hmeichhe dang reng reng ngaihtuah thei tawh loin hetia bialnu a han nei ve leh ta hi a rilru tak tak pawhin a lawm a ni. 

Lawma’n ar a thawh hmiah bawk nen, phur takin an puah sauh sauh a, an hem hmin dawn a ni. Lawma te pui tura a va kal hlain dawhkana a phone dah chu a rawn ri ta ral ral a, Champuii chuan auh a han tum zet a, rawn call tu chu ‘S1’ tih tawp a ni. Mak a ti deuh a, a pickup ta nge nge a, hmeichhe aw hian a ṭawng ve hma hmain, “Min rawn call back ta mai si lova, msg i seen thei bawk si lo, naktuk chu dar engzatah nge i lo thlen ang?” A rawn ti tliang ral a. 

“Aa..englo, amah hi a buai lawk a, ka lo hrilh ang.” A ti ta ringawt. Lehlam ami chuan,”Ee..a ni maw? Aw le aw le..” tih leh dah a rual nghal. Champuii pawn a ngaipawimawhzui hran lo. Muanawma lo phei leh hnuah a hrilh a, a ngaihbel nge Muanawma mitmeng chu a ṭi deuh dui hian a hria a, “Eng nge a sawi?” A ti ta vat reng a. “Naktuk i thlen hun tur a hre duh a” a ti ringawt. 

“Ka’n call back lawk ang e” tiin pawnah a chhuak zui daih. 

Hawi kual zuk zukin S1 chu a call a, “Keimah ngei ka rawn kal dawn tho avangin ka rawn call back duh ta lo che a nih kha, lo phili lo la, i hna kha ṭha takin lo thawk mial mial phawt rawh. Nang nen min hmuh dun chuan thil a kal dik lo thei ania. “ A ti zawi sup sup a. 

Lehlam ami chuan, “A nupui neih tur hi an ṭhulh nge nakkum lam an tinzawn zawk ka chiang thei lova, a neih hun tura an sawi kha chu a pel tawh chu a nia. A neih hma ngeia chet i lak a ṭhat ka ring.” A rawn ti a. 

“Chu chu ka tum dan a ni. Chuan, ka lawm e aw. Thil ṭha tawk ka leisak ang che “ Muanawma chuan nui hak chungin a ti a. 

“A ngai lo, nangmah kha a tawk mai..” a rawn ti no ngher ngher a, chutah, “Tu nge ka call lo latu kha, i bialnu mi?” A tih zawm zat. 

“Aw nih kha. Mahse, engmah a hriat a rem lo aw” Muanawma chuan a ti nghet charh. Lehlam ami erawh a ngawi reng. 

A va luh leh chuan Champuii’n a chîk ru hle tih a hre thei, a hre ve tawp a ni ber e. Mahse, engmah a zawt chuang lo. Ar pawh an hem hmin a, coffee sa ver vawr nen an ṭhei ta mial mial hlawm a, Kima lah ta pek chuan, “Hawh u, Zu in ve ang u..” a ti ta roh a! An melh ṭhap ringawt. A inthiam lo leh deuh si chuan, “Aa..a sehhmeh kan nei ṭha êm a, ka ti mai mai. A lakna pawh ka hre lo hrim hrim, Lawma hian a hria ang. “ A ti leh ta zaih a. 

Lawma’n, “Kimsek, i zak chai em? Hman zanah pawh Pu Kaia te inah i va lak dâw dâw kha..min puh daih suh.” A lo ti pawr hlur mai. 

“Arsa hem hmin a awm vanga zu in tel tum kher, Kimsek, ṭhing thin suh.” Lucy’n a lo ti ve bawk. 

An rin loh deuhin Muanawma chuan a wallet phawrhin, “Kha, i châk hmel kha ka hmu peih lo, va lam rawh, mipahoin pack khat ṭheuh kan in ang a, a la bang chu i hawn dawn nia” tiin cheng 500 tlang a pe a. Kima chu a ṭang der eih lo, an arsa lei lai mek chu a la lawk a, “In lo ei zo palh ang, ka thukru dawn” tih leh chhuahpui a rual, an êê dual ringawt. Kan Kimpuia hi zawng a ngaihna a awm lo e. Amah hi Kimsek tih awm renga sek a ni a, hei ai hian han sang hlek phei se chuan pian nalh tak ni thei a ni, a sang lo lulai ve êm a tin ni. Kawm erawh a nuam a, a tel tawhnaah chuan nuih dar darna a thleng châwk. Kima nghak chuan an ṭhu ta ṭhap mai, dar 9 a pel awrh chauh a, an hmanhmawh vak lo. Kawngka chu kik khawmawi pawh awm loin a rawn inhawng rawk rawk a, beisei loh lutukin Rinliana leh Hruaia te an lo lut hlawl mai le..

“E! Kha, in va hlim awm dar dar ve,.” Intih nelawm tum takin Rinliana chuan a ti a. A ṭhu nghal hmak bawk. Hruaia erawh a inthlahrun hmel angreng. Champuii chuan, “Nia, hei kan lo titi mai mai,.” A ti ve mai a. 

“Tunlai chu rim theih pawh i ni lo, nula ve si, i leng reng zel a, inleng neih hlau ang hrimin.” Rinliana’n a ngam bawrh bawrh danah a rui leh tih a lang reng. 

“Nia, inleng neih peih loh lam pawh a ni lo, kan naupangte ka tlawh kual thin a.” Tiin a lo chhang a, a ni ve deuh tak tak a, lenglen hun âwm velah hian an school naupangte tlawh kualin an thiam lohte a hrilh kual thin a, exam a hnai tawh bawk nen, an hlawkpui viau bawk. 

“Miss nge nge i tiṭha thin e, taka! Muanawm, naktukah i zin dawn elo?” Hruaia chuan a lo ti var a. 

“Aw ka han exam ve leh ang e,. “ A lo ti mai a. 

“Nang pawh MA hi pass vat la, kan khuaah hian thawk ve nghal daih la a ṭha ang. Khawtlang mi leh sa nge nge chuan thahnem pawh in ngai ang a..” polite takin Hruaia bawk chuan a ti a. Hruaia hi chu chhungkaw pangngai tak atanga lo zi chhuak a nih bakah amah hi mize zawi lam, zaidam tak mai a ni a, Rinliana te nen an inthenawm vang hian an inzui mai chauh a ni. Chutianga inkawmngeih tia sawi tur pawh an ni hran lo. 

“A thawh ringawt theih nang, B.ed ka la nei bawk si lova, bakah Zirtirtu lam hi ka line chiah ni pawn ka hre lo..” Muanawma pawn a lo ti ve a.

“Tunlai BA, MA satliahho ai hi chuan english hi ka thiam zawk ka ring, an ngawng ém mai, tunlai mite hi chu. Ka ngaisang tehchiam lo, pianpui BA nih hi a tawk viau mai..” Rinliana chuan a lo ti phar phar a, Hruaia’n a nghawk deuh sawk pawh chu hre awmin a lang lo. Lucy phawk a chhuak leh ta, “Dik chiah tiraw, U Rin, nangni hranghluiho hi chu in thiamna a nghet alawm, taka! Pawl 12 kha i pass em khah?” A lo ti khauh, Zari chu lehlam hawiin a khi vur vur..champuii erawh a insum thei viau mai. 

“Pass ang chu ka ni, ka exam zo peih ta lova, peih ila chu distinction var var ka ni ang, a ho ém mai, pawl san leh san loh lam a ni lo, kan inchawm thei em tih lam a ni zawk..” Rinliana chuan a ti a. A sawi hi a dikna chen zawng a awm a, mahse, a sawitu hi nu leh pate chawmhlawm a la ni miau a, amah hrechiang tan chuan lem a harsa maithei.

“Dik chiah, i inchawm thei tho sia, nupuite hi nei ve tawh la..i nu leh pate an upat ve tawh khi, an khawngaihthlak..” Zari’n a lo tih chuan, “Nei dawn e, sawrkar hnathawk ngat ka la nei dawn alawm, lo ngai reng mah rawh u.” A lo ti pawr huar a. Champuii’n an bawl zui zel ang tih hlauin mitmeiin a lo khap a, Kima a rawn lut chiah bawk,. An arsa ei bang chu a ngai ngaiin a rawn pawm lut leh a, dawhkanah a nghat. Rinliana te an awm ve si avangin a zu lei sa pawh chu a paipawn ta reng ringawt a, Hruaia chuan thil nihphung a hriatthiam avangin hawn a rawt ta chung a, Rina lah chuan a lo hreh nasa, “Nge nulate chu pasal an neih hmate chuan rim thiang alawm an nih. A ho lutuk.” A ti deuh tlat a. Kima zu in chàk tawh bawk si chuan, “U Rin englo a nia, Hei Muanawma zin tur thlah nan ar kan hem a, Nu Mawii ten min lo ko sek tawh bawk sia, chhuk mai kan tum asin.” Bahlah miah lo hian a ti ta a, tah meuh chuan Rina pawh a nem ta deuh, Hruaia chuan chhuah pahin thupha a chawi mawlh mawlh mai. Ani zawng mi pangngai a ni bawk a, a rui chhe ve lem lo bawk. 

An chhuak fel ta maw tihah Kima’n kawngka a va khar rap a, a zu lei a phawrh nghal. Buh zu sial an tih ang kha a ni a, Amawii tih vel nen chuan a taste pawh inang lo tak a ni. No pathumah a thli kerh kerh a, Lucy chuan, “Mawla, no pathum chauh chu ti nge? A va fair lo ve, kan duh ve tho” a rawn ti. Zari lahin, no a va la rawk rawk, mahnia in luah a ni bawk a, no panga bak Champuii chuan a nei si lo, Muanawma chuan Champuii melh zukin, “I in ve dawn mi?” A ti sup a. 

“In in vek laia lo dry bik te chu ka duh hleinem.” A lo ti vei hmak bawk si. No an indaih ta si lo, bowl pakhat chu lain Kima chuan, “Tah hian ka in mai ang, in zak si lova maw..in ka rawt laite khan serafim angin min khak vel a, in duh leh tho si..” a ti thur thur a,. “In zo vek law law mai ang u, a bang ka in hawn ang tih nâk alaiin..” a ti leh mual mual. Mahse, a lungawi lo hran lo. Tichuan, inlungrual tak chuan zu no chu an dawm ta far a, thilsual ti-ah pawh an inngai lem lo. Bakah tumah rui chhe khawpin an in dawn lo bawk a, no 2 ṭheuh chuan an insemzai thei ta a, a zu a ṭha bawk a, hmeichhe lam erawh an meng dava ṭan tawh, arsa pawh chu a zo titih,. Muanawma ngaihtuahna kil khat erawh a chawl hauh lo. Champuii zu in dan a hmuh chuan zu in ṭhang, in ve fê tawh niin a lang tlat! Lucy leh Zari te chuan an hnar an hup a, an uak bawk. Champuii erawh a zei thlarh mai a, a tlak ve pup pup hauh lo bawk, zu ngawlveiho in dan angin tlem tlemin a sip a, chu chuan a ngaih a tiṭha thei mang tlat lo. Champuii nunhlui engmah hriat a nei lova, hriat kher pawh ṭul a ti ngai lo kha a nia, mahse, zu hnathawh lo lang ve deuh nen, zanin chu Champuii hriatchian châknain a khat ta tlat. A zin haw hunah an la inzawt chhuak êm ang chu maw.

An haw tur inthlah chu an inkiss zauh a, “Ka tel loin tu bulah mah zu in suh aw..” tiin a chah ta thlap, a rilruah riak reng hek. Champuii pawh chuan, “Nang leh i ṭhiante leh ka ṭhiante bakin zanina thil thleng kha an hre ngai lovang.” A lo ti nghet charh a, a ngaih chu tlemin a ngam ta deuh. 

A tukah a nuin a rawn kai tho a, a lu na miah lo chu a lawm ru angreng hle. Zu hi a in thin lai pawh khan no 3 hi a dose san ber a ni tlangpui, a tuk lam a ngaihtuah tel thin vang a nia. Hetia kohhran leh khawtlanga a inhnimphum chhoh ve tak hnuah phei hi chuan eng emaw ni deuhah lo chuan a in ngai lo, chupawh Lawma leh Kima te bulah bak a in ngai lo bawk. A hma anga saltanna atana hman kha a tum tawh lo bur mai a ni. Aizawl lam pan chuan an liam ta vung vung a, a exam tur ai mah chuan thildang a tihtur hmabak kô tak a neih chuan a mawlh nasa zawk a, a khur lek lek hial, a helhhawlh te pawh a niang e. 

A nuteii te inah a innghat a, a nuteii hian a duat bawk a, a fate nen lah an inkawmngeih bawk nen, nuam a ti ber mai. Zanah Champuii a biak zawhah mi pakhat hmu turin a chhuak ta a, a cousin Jerry bike a hawhsak a, Jerry hi tunah an dawr bungrua lain phaiah a zin mek a, a farnu Judy leh an awmpui bakah a nuteii te nupa an ni mai. Venghlui lamah inkhalh pheiin kawng peng lo awmah chuan a tlan lut a. Step thui vak lo a zawh hnuah building lian ṭha angreng fû hnuaiah a lut thla leh a, kawngka chu a kik ta dat dat a. Rawn hawngtu nen chuan an innuih ver ver mai, he nula hi a hmeichhe thian awmchhun tihtheih, a mi rin em em Nupuii a ni. S1 tia a save ngei mai kha. An inkuah thuak thuak a, in chhungah an lut ta a, Nupuii nu leh Nupuii naute nen chuan an inbe hlut a, reivakloah Nupuii roomah an inzui lut ta a. Khumah chuan ṭhu dunin, “Vawiinah khan a nupui tur cousin nen kan inbia a, inneih chu tiam chin awm lovin an ṭhulh rih a niawm e. A chhan tak erawh a sawi thei bik lo. A nupui tur erawh a lungawi vak loh thu a sawi,.eng emaw tak chu a ni ngei ang. “ Nupuii chuan a ti mial mial a.

“Hmm, ka lawm thin, mate, ka ruahmanna hi a kaltluan chuan heta ka awm chhung pawh hian ka chinfel theih mai ka beisei. Mahse, buaina ka nei a..” tîm deuh hlek hian a ti a. 

“Eng buaina maw?” A mit tizim san chungin Nupuii chuan a lo ti a. 

“Englo a nia, bialnu ka nei ve leh a, ani hian kan ruahmanna hi engmah hre lo se ka duh a, a tawp kan thleng dawn a nih chuan jail hial ka luh pawh a la ngai maithei. Engpawh huama ti ka ni tawh a, ka bialnu bulah hian engkim hi a bul aṭangin i lo hrilh vek dawn nia, ka awm ta lo a nih chuan..” a ti nghut nghut a. Nupuii chuan a bana vuan vatin, “Chutiang sawi suh, engtinmah i awm lovang, dan hmangin alawm hma i lak dawn. “ A lo ti var a. A ngaihtuah hmel hle, “Hun a liam tam ve ta bawk nen, a khirh ve zêk dawn a, amah Sawmliana dahbo ngau ngau chu a harsa lovang a, inpuantira Zoram mipui te thudik hriattir hi a khirh ber tur lai chu a ni. “ A ti charh charh a. 

“Nia, inpuantir tawp chu a harsa ang, mahse, Bawiha, hei hi hrereng rawh, dan chunga leng tumah kan awm lo tih hi, dan palzût zawng chuan che lo hram ang che.” Nupuii chuan a lo ti ve hliai a. An ngawih vang vang hnuah Nupuii bawk chuan, “I bialnu chu a thlalak te i kawl lo mi? Ka va hmu ve châk..” a rawn ti phawng mai. 

“Ka phal dawn mawni le..” ti chungin a phone chu a hmet mual mual a, Champuii nen an selfie-na fiah zet chu a lek kang a, Nupuii chuan phone chu lo ban vatin a en uluk ngang mai. A ner leh nâng thin, a chalte a chuar thul, Muanawma pawn mak a ti deuh a, “Ti nge i hre ngai mi?” A ti hawk a. Hlauhthawnna riau a nei bawk. Nupuii chuan thlalak thlêk vang vang chung chuan, “Zopuii a ni em? Zochampuii” a ti ta ! Muanawma chu engtin emaw a awm, engtin nge Nupuii hian a hriat teh daih? A va mak êm..

“Ni e, engtin nge i hriat?” A ti chhuak thei hram. Nupuii chuan a phone pek let pah chuan, “Ka hrilh duh che ang em tihah ka buai. I hre duh takzet a maw?” A ti a. A aw chu a chang mah mah. 

“”Sawi rawh, engkim” a chil lem khawlhin a lo ti a. 

Nupuii chu a thu tha sauh sauh a, “Ih maw, Andy kha i hria em? Bangalore-a awm thin ka cousin kha,. Tunah chuan nupui a nei tawh a. Kha nen khan an inkawp thin alawm, an inkawp hma lawk paw’n mizo tlangval tho nen in an luah dun a, nupa ang thawthangin an khawsa, an inthen hnuah thla rei vak lo Andy nen an inkawp leh a, zu pawh a in thei ve hle niin a sawi. Sex lamah pawh a sang thawkhat, mahse, a that ve riauna chu hnamdang a kawp ngai miah lo thung. Chuan, Andy nen an inthen hnu lawkah Mizoramah a rawn haw a, Andy laptop-ah a thlalak a tam êm avangin ka zawt a, min hrilh ta vek, Andy pawh khan neih hial pawh pawi a ti lo, mahse, amah Zopuii kha mipa pakhata lungawi thei lo chi a niang, inneih a sawi atangin a hlat ta daih a. Tihian, tunah chuan nupui te hial a nei ta a nih hi..” a ti ta mawlh mawlh a. Muanawma chuan a kut a lo hum ruh nasa hle, a rin ai daihin Champuii chuan a nunah thu a lo nei tawh nge, Nupuii thusawiin a nghawng dan chu a dang zar mai. Sawi mai tur pawh a hre lo, a melh ngai a melh reng ringawt. 

“I tan chuan ngaihthlak a hrehawm maithei, ka hrethiam lutuk che. Mahse, i luh thûk hmain then la a ṭha ka tihpui che, nang phei chu khang natna zawng zawng lo tuar tawh i nia, i nat leh ka phal tawh lo..” Nupuii chuan a ti a.

“Um, nia, a dik alawm. Mahse, Champuii aia pawimawh thil dang hi ka chingfel phawt ang” a lo ti thâm ṭuak mai. A ná tih chu hai rual a ni lo. Amah pawhin mak a inti, an inngaihzawnna thla khat êm pawh a tlin hmaa chuti taka Champuii vanga a na thei chu. Hawn vata inngaihtuah harh a mamawh a ni. Nupuii la remti lo chung a haw lui a, a nuteii te pawh a be lumlâm peih meuh lo, a chauh thu chhuanlamin a mu ta thuai a, Champuii msg pawh a lo awm vâng mai. 

“I mu tawh em ni? I chau ngawt ang, mu hahdam rawh.”, tih thu chu. Anni pahnih hian msg inthawn vel hi an uar tehchiam lova, in call tawp mai hi an duhdan a ni ṭhin,. Mahse, zanin chu Champuii a be châk tlat lo. A hel ta viau tihna erawh a ni hran lo, a phurna a tlahniam rih a ni zawk. Nunhlui nei lo kan awm lo tia namnul a han tum ngial paw’n ani Seni bak ngaihzawng bulfuk la nei ngai lo, tlangval virgin ngat tan chuan a holam viau thei lo a ni e. Dem ngawt chi pawh a ni lo, Champuii chu amah aiin a upa a, tawnhriat a ngah zawkin thil tam tak pawh a zir chhuak tawh ngei ang. Mahse, ti nge chutiang nun lepchiah lutuk chuan a lo nun thin mai le..zu te chu lo in pawh nise, mipat hmeichhiatna kawnga tlan kher a ngai em ni? A serious si a..Chau viau e ti lo chuan a mut chu a chhuak thei reng reng lo mai a, a han ṭhu leh hluai thin. A hui leh pawp pawp thul, Senteii thlarau hmingchhala a thutiam hlen phawta a chinfel zawha Champuii chungchang chu ngaihtuah ṭhat leh mai a tum ta a ni. A thei ngût ang e maw..

Champuii pawh Muanawma reh hma ta lutuk chuan a ngaih a tiṭha chiah lo, mahse, a chau ve a niang tiin a inhnem a, va biak buai a tum hran lo. Naupangho exam an ṭan ve tawh dawn a, exam chawlh pawh a rei dawn loh vangin hawn pawh a tum lo. Bakah Lunglei lam hi a ngai vak lo, a awm tam lo bawk nen, Champhai lam hi nuam a ti zawk mah. A tuk zingah pawh Muanawma morning wish a dawng miah lo va, mak chu a ti ṭan ve ta deuh, a la tho lo a niang tiin, “Morning” a va ti a. A insiam zui nghal. School tlai hi a duh loh ber a nih avangin staff zingah a thleng hma ber a ni thin rêng a ni. School a thlen hnuah a phone chu a han en a, Muanawma chuan a seen a, a reply lo. A lungawi ta vak lova, a call ta nge nge a. 

A ring ral dawn tawh ang tihah a la ve hram, “Ngati nge? Eng nge i hriat a?” A ti vin hlak hlak a. 

Muang fân ruih hian, “Nia, ka buai deuh a..” a rawn ti ringawt. 

“Ka msg pawh i seen vek a, reply a har viau em ni?” A ti leh hlar a. 

“Nia..” a rawn ti leh ringawt. A duhkhawp lo kher mai. “Aizawl i thleng ta chu min hre tawh lo a ni maw? A tha lawm. Hlim rawh.” Tih leh phone chu dah a rual nghal hmak. A thinrim chu a sen awp awp thei, Muanawma awmdan teh hrep chu a ngaihdan a ni lo chiang khawp mai. A chhan a hre bawk si lo, a rilru erawh a buai ru ve tho mai. Rilru bet lo zetin exam chu a va veng a, a ngaihtuahna luahtu thildang a awm avangin an biakna pawh a lo hre lawk thin lova, a hawi deuh hû zel a, Pu Biaka paw’n, “Ṭhenkhat te an han zinbo meuh chuan thenkhatte chu kan hawi â ho mai alawm le “ tiin a fiam nghe nghe, a nui ve tak naa, a chhungril erawh a rûm tlat! 

Muanawma pawh exam ṭan hun dar 1 daih a nih avangin hmanhmawh lovin a inbual a, muangchangin a insiam a. Ani pawh Sawmliana lakah rilru a pe hleithei bik lo, Champuii ringawt ani a rilruah  awm ve tho ni. Champuii’n phone a dah tauh pawh khan call back a tum chuang lem hlei lova, phone atang chuan thil chinfel a harsat bakah an insawi buai tulh tulh zawk zel a, a hawn hunah hmaichhanah tha takin a sawipui mai a niang chu, a thei kher ang em tih erawh a chiang ngam bik lo. Senteii leh Champuii a han khaikhin a, danglam tak an ni, a tha zawng leh tha lo zawng pawn. Mahse, danglam viau mah se; Muanawma thinlungah an tla na ve ve thung si. 

Dar 12 rik hmain Jerry bike bawkin an examna tur lam chu a pan ta a, a nuteii hi a thlarau mi khawp a, a kal dawn pawh khan a lu chunga kut nghatin a ṭawngṭaisak thlap a ni. Muanawma pawh záng huaiin a inhriat kha. An exam-na tur hmun a va thlen chuan candidate dangte pawh an lo awm ve nual tawh a, a seat tur te a han enfel a, a ennawn leh thuak thuak naa a rilruah a lut tehchiam lo. Exam hall-a an thut fel hnuah Invigilators an rawn lut a, mipa leh hmeichhia an ni. Mipa hmel a han hmu chiah chu a ṭhu ngil awt mai! Eng nge ni ta ngai?! Engvangin nge hetah a awm ? Zawhna tam tak a lut nghal zut zut, ni e, a hmaa ding paper sem mêktu chu tudang ni lovin, AMAH a hmangaih em em Senteii pawngsuala, thihna hruivalaha tal awhtirtu Lalsawmliana ngei kha a nih chu! He thil hi chu a hre lâwk miah lo. Sawmliana chu a taka a hmuh vawikhatna mahnise, Sawmliana a ni tih chu a hming a hriatchian tluk zetin a chiang a ni. A chhan chu a thlalak tharlam ber ber a laptop leh phone-ah a kawl tuarh alawm le..a luak a rawn chhuak thut, “Mipa ka nih hi..Rinmuanawm, pachang takin le..” tia a rilrua infuih mawlh mawlhin, a tum leh beisei aia hmaa a hmelmapa a han hmu thei chu thil lawmawm lama ngaih a tum lui tlat a ni. Paper pawh a rawn sem ve ta ngei a, a mitah chiang fahran hian a lo melh kal mai. Sawmliana chuan hmana a pawngsual, Seni bialpa kha a ni tih a hre hauh lovang. 

A han ziak dawn a, a tha a khur tlat! A âwm ve bawk a ni. A chhing vang vang a, Chutah a beng bulah Senteii aw ngei mai khan, “I tih a ngai, i paltlang ngei tur a ni..” a rawn ti sep a, a meng kâwk..a hmelmapa va melh leh zawkin pen chu nghet takin a hum a, thinrimna rilru leh insumtheihna inbuan thiak thiakna karah chuan a zawhna chhanna te chu a ziak ṭan ta a..

(A thui lo ka hria. Zanin aṭangin , Lalsangliana story ziah ṭan ka tum bawk nen, hmana story pahnih kal lai ka neih ang khan chapter 1 hi a sei vak thei tawh dawn lo ve ve aw..guys ❤️