zochampuii 3

ZOCHAMPUII..

Ziaktu : Toni Râlte

An awmna hmunah an ding khawng far hlawm mai a, chu awrâwl râpawm zet chuan tawpsan a hnêkin a hma aia râwl lian hian, awmze nei si loin a rawn rak leh ta nawk nawk mai le ! Hmeichheho chu a rang arangin mipaho awmna hmunah an tlan phei a, Lucy phei chu a inpal thlu nawk nawk mai. Muanawma te pawh chuan an hriat ve vek avangin an chem an lo hum far hlawm a, lui mawng lam an hawi ṭhap bawk. Second reilotê a han reh duk hnuah lui mawng mai ni lo, anmahni kal hual ang hrimin nutling awrâwl hian, “Min pui r’u, min ṭanpui r’u, ka duh lo, ka kal duh lo. Min thlah rawh.” A rawn ti ta tuar tuar mai. Mipa awrâwl mah a râpawm tawh vei nen, chu hmeichhia ṭanpui ngai tih hriat taka a han au takah phei chuan an hmulthi a ding sung sung thei hial. Mahse, thla âi tih te hi an lo hriat ve tawh avangin thla âi a nih rinna an nei lian hle a, intipachang takin Muanawma chuan a chem lekkan pah chuan, “Tu nge i nih? Kan bulah lo kal rawh, engmahin a tina lovang che.” A han ti ta pawp mai a. Thawm chu a reh leh ta hmiah mai. Reitawk fang an ngaihchan hnuah pawh thawm riva dang an hriat tawh loh avangin an insiam sawk sawk a, an haw ta a. Khuaah engin nge hmuak ang tih mawlh chu an rilru mawlhtu a ni, mitthi an nei ngei dawna hriatna an nei a, tu nge tih lah an hre hauh si lo. Muanawma’n hnu a dawl a, hmeichheho a laiah an kal thung. An kal lam ai mahin an kal chak a, khua pawh an beisei aia hmaah an thleng a ni.

Mahse, an beisei ang em emin chhiatna chu a thleng lo niin a lang, damlo na zual deuh an hriat Pu Ringa lah tunlai chu a thawh harh ve lai tak a lo ni a, an thaw huai hlawm mai. Mahse, venglai an thleng phei tihah Muanawma patea maruti-ah chuan an in hnuai luahtu Pi Fâwni kha tlangval hoin an lo hlang lut mêk a, chu erawh chuan a tithlaphang ta deuh. Thil awmzia an han zawh chuan, “Chawhnu her velah âwmah khan huana a vawk chaw la tur a lum hlauh mai a, a insawh na deuh a niang, nikhua a hre lo zui nghal a, kan han bâwihsâwm deuh paw’n awmzia a awm si lova, tihian Champhai lam kan panpui mai a ngai ta a nih hi..” an ti hlawm a. Sawi tawh ang khan Pi Fâwni hi an khaw ṭhenawm aṭanga rawn pêm, zu an zawrh vanga khua aṭanga an hnawhchhuah kha a ni a. Hmeithai niin a fanu te pahnih nen an khawsa a, a fate pawh nula tia chhal theih an ni ve ve tawh a, Muanawma patea’n a in a luahtir dawn khan zu an zawrh dawn chuan an luah theih loh tur thu a hrilh a, chuvang chuan Pi Fâwni te pawh hian zu zawrh bansanin, neihthinglung khâwngin vawktê 6 lai leiin bul a ṭan ve a, a fate pawh a theih ang anga inhlawh vein an nufa eikhawp chu an thawkchhuak ve mai bawk a, tihian khawtlang leh kohhranah pawh an tlangnel chho ve zel a, mahse, nu ber chutia a han awm takah chuan a fate thla chu a phâng takzet tih an hmelah pawh a lang reng mai. Hetiang a nih takah chuan luia thla âi an hriat kha Pi Fâwni hi a ni thei mai ang em? Chu chu lui kal mi parukte rilru kamtu chu a ni ta, an la hre chho zel ang chu maw..

Muanawma paw’n zanriah an ei laiin an thil tawn chu a sawi ta nge nge a, a pa pawh chuan mak a tih ve hmel hle, “Fâwni thla a nih chuan a khu lam daih daiha han âi pawh chu, a va mak âwm tehdaih ve aw. Ti ila ka hrethiam leh si e, khu lai Chakawk lui râl lehlam tlang dungah khuan Fâwni pasal boral ta te khan thing an zai ṭhin tak alawm mawle, an thingzaina lamah a inhliam avanga boral ta pawh kha a ni rêng alawm. Chhuidawn dawn chuan a âwm ang viau tak mai a..” a ti chuar chuar a. “Bakah khulai tlang dungte chu khaw ṭhenawmte ram a ni phak tawh a ni law’m ni??” An nu chuan a lo ti ve zat a. 

“Ni e, a hma phei chuan chakawk lui hi ramri lui ti te pawn kan sawi ṭhin alawm, mahse tunah chuan a tu lam ve ve pawh kan intlawhpawh tawn tawh a, ram bîk ang pawn an nei hleithei tawh bik lo a nih khu..” Pu Ngura chuan a lo ti a. 

Zanah a ṭhianten leng turin rawn sawm mah se; a za lo tlat, a chau ve deuh bawk nen, mut hma a duh thu a sawi pawh chuan a ṭhiante pawh chuan an nawrlui lem lo. Mut pawh a mutui na ngiang reng e. Pi Fâwni te pawh an lo admit ta ngei a, a fanu tê zawkin a awmpui dawn a, a û zawk erawh Muanawma patea Pu Hluta te inah a awm rih mai dawn a ni. Pu Kawla kha a la ṭawng duh miah lova, doctor te pawh an beidawng titih, a taksaah hliam leh ná em em a nei chuang bawk si lova, damdawiina han awmtir reng pawh sum leh pai a lo hek bawk nen, in lama inenkawl turin Pi Fâwni te awm ve hnu ni 2-naah an rawn haw ve ta a. A zia a dangin, a hmaa a nungchangte kha a hloh ta vek ni mai âwm a ni. A hmate chuan pa ṭawng duh ve tak, nui huau huau, naupangho pawhin an nêl em em kha a ni ṭhin a, tunah chuan pa ngawichawi, tak rân mai leh chimbuai ngaitheilo tak mai a ni ta. A thil tawn hriat chak viau mah se; a ṭawng duh miau loh avangin tihngaihna vak a awm lo. A hunah chaw a ei a, mut hunah pawh a mu ve thlap, hna erawh thawh nachang a hre rih lo nge ram lam hrim hrim chu a hlau emaw tih mai turin an kawmthlang huanah takngial pawh a kal duh lo. An vanneih asiamin Pu Kawla farnute hi an khaw retailer an ni a, an khawsa thei ve deuh bawk nen, a û theih loh chhung chu an chhawmdawl a ni ber e. 

Hun a kal ve zel a, Champuii pawh thla 2 dawn a awm ve ta, nuam a ti telh telh mai. A khaw boruak a nawm chu thuhran, a mi chengte phungthlu lutuk leh tlawmngai em em te, an inpeizawn tlang dial dial thinte chu nuam a tiin a awmna tur dik tak niin a hre hial tawh a ni. Ṭhian erawh Zari leh Lucy te bak han kawmngeih fâl bik a nei hran lova, Lawma leh Kima te nen innêlin infiam bawrh bawrh thin mahsela, Muanawma bulah erawh a khawrin eng emaw hian a phuar rûn zel ni hian a hre thin. Lunglei lama a chhungte nen pawh an inbe pawp reng a, kum tawp chawlhah bak a haw ve thei dawn lova, mahse, pawi a ti em em hran lo. Joela chanchin a ngaihven ngai lem lo naa, a thian hlui thenkhatte hian rawn hrilh nulh hi an ching thin a, hmana Joela a atchilh lai ang kha chu nise nâ a tiin tawrh harsa a ti thin viau ngei ang, mahse, khang Joela phatsanna rah khan amaha Joela zûn la chambâng vete pawh a ṭhiahsak vek ti ila a tan engmah a ni tawh lo. Phuba lakna tlakah pawh a ngai meuh tawh lo, mahse, Joela aia dinhmun ṭha leh rem zawk rah erawh a la tum ve ngar ngar thung. Zothana lah chuan a la bem ngawrh vei phian a! Chuvang chuan Champhaiah pawh a zin tha peih vak lo, mipa sual phei chu a ni lo, hmelah phei chuan a phu lo hial zawk ang chu. Mahse, Zothana mize harhvâng lutuk leh nung vet vet lutuk chuan a hîp hlawl lo a ni ber, tin, tlema a insawithei deuh thin pawh chuan a tihel pah ve bawk. “Ngaihzawng neih ka peih lo.” Tih chu a chhanna ngai reng ni mahse, Zothana erawh chuan, “I peih hun ka lo nghak ang” a ti mauh mai si a! Mi rilru tihnat hreh ve tak a nih vangin a rawn biak hi chuan han chhan loh tawp a hreh ve thin nen, a han chhanlet ve deuh lahin a beisei a rawn tisang ve zel bawk si. Buaithlak a ti ru ve viau. Inkawma inrim reng e ti lo chuan Muanawma nen hian number an la innei tawn miah lo lehnghal a, Lawma leh Kima te chu a nei khiau, a dik adik chuan number diltu zawk nih an hreh dun ve ve niin a lang. Luia an kal hnu aṭang khan ram lamah an tâp leh tawh rih lova, Lawma leh Kima te thingzai thiarin an inhlawh chho char char a, Muanawma pawh exam a hnaih ve tawh deuh avangin a inkhung ve deuh a, a peih changin an kawmthlang huan a sam fai a, vawk chaw chhum nen hian hna dang a thawk hman meuh lo. Vawk hi pali an vulh ve a, amah a tlawngawl ber ta na nâ na chu a kutah an dah deuh tawp mai a, ani lah ranvulh lam hi a lo timi phian bawk nen, ar pawh a vulh tel a, ui erawh hmanah a ui duat em emin hri avanga a thihsan tak aṭang khan a vulh duh tawh lo, duh aiin a ngainain a hmangaih leh dawn tih a hria. 

Champuii school bang pawh a kawr thuitir lam turin Saii dawrah a peng kawi a, Saii leh Lateii an lo awm a,. Lateii hi sawi tawh ang khan Muanawma bialnu boral ta Seni thianthaber kha a ni. Seni thih hnuah Lateii leh Muanawma te hi an intlawhpawh lutuk ta lova, biak erawh an inbe chhe lem lo. Muanawma hian Lateii hi a hranpain a haw lo naa Lateii te khan thlahthlam lo se Seni khan vanduaina a tawk lo tur tia a ngaihtuah thin vang hian amah zawk hian Lateii hi a hlat hret hret a ni. Lateii erawh chuan chutiang rilru Muanawma’n a pu ang tih rinngaihna a hre lo hrim hrim thung. 

“Lo kal rawh, ka zo tawh, va ha chhin la..” Saii chuan inthlakna room kawhhmuh pah chuan a lo ti siam siam a, kawr chu lain ani pawh a lut zui nghal zat. Saii leh Lateii te pawn an thusawi lai chu sawi zawmin, “Ka ti tak tak, U Sai, Rinmuana hian eng emaw tak hi chu tum a neiin ka hria, Seni thih hnu hian hmeichhia hi ek tlukah pawh a ngai lo ka ti tawp, keipawn ka thian dangte sawipui ka tum ve fo, ka khawngaih vang hian, mahse, a sawipui theih loh reng reng. “ Lateii chuan a ti bawrh bawrh a, Saii chuan Champuii a awm ve tho avangin a mitmei a veng deuh nge, “Nakinah kan sawi tha dawn nia..” a ti ringawt. Mahse, an thusawi hre pha vektu Champuii chuan tu chanchin nge an sawi tih a chiang khawp mai. Ni e, Rinmuanawma chanchin ngei a ni. Mahse, a awmzia a hre hauh lo thung, Zari hian vawikhat chu Muanawma bialnu thih thu chu a sawi zauh tawh a, engvang nge tihlam phei chu a sawi hauh lo, ani pawn a zawt zui lem lo a, tuna Lateii sawi dan hmangah kha chuan Muanawma mizia leh a bialnu thihna hian inzawmna a neih a ring ta deuh, hriatchian a châk ru viau naa, midang nuna inrawlh vak hi a duh dan a ni lo bawk nen, mahse, a rilru erawh a mawlh ve ta deuh reng mai. Kawr pawh chu a ha tawk chiah a, Saii hian designing lam pawh a thiam viau reuh a, an khaw pum deuhthaw hian an thuitir ti ila kan sawi sual awm lo ve. “Thu ve rih rawh, a la hma tho hi, Lateii hi chu i hre tawh ang tiraw? I in hrik Rinliana te thenawm kha..” Saii chuan nui chungin a lo ti a. 

“Hria e,hmm, ka in hrik a ni kher lo aw..” nui chung tho chuan a lo ti ve a.

Lateii chuan, “Miss chu kan veng lamah te khian lo leng ve thin la, in veng ai saw chuan a nuam daih a nia aw. “ Inti nelawm tak hian a lo ti ve a. 

“Awii, ka hman lo ve thei lutuk, nia rawn kal a ngai, khua pawh hi ka la fang tha hman lo. School kal loh ni chuan insuk leh in vel tihfai a ngai ve thin nen..” Champuii pawh chuan a lo ti ve siam siam a. Rei erawh a thu duh lo, an thusawi kha a laklawh sia, a dipdal palh ang tih a hlau deuh. A chhuah hnuah Lateii bawk chuan, “Rinmuana te pawn an rim ve thin ni maw? An sawi tlat..” a ti sep a. 

“Rim zantin ve e, lenna tur dang hre hek lo, amah hi a fel reuh êm a..” Saii chuan a ti mai a. Lateii erawh a meng nur deuh nâng a, mahse, a pangngai leh vat, “Dik tak chuan Seni vang hian Rinmuana lakah hian ka thikthu hi a chhe deuh tlat zel mawle. “ A ti hnuhnawh a. 

“A awm ve tho alawm, Seni nen kha chuan a tak leh a mei kha in ni miau a.” Hrethiam takin Saii chuan a lo ti a. 

Eirawngbawl pahin a zai rât rât a, Champuii mak vena leh nuihzatthlakna riau chu mi hla thluk mil hian a duh duhin hla hi a phuah a, a sa âl âl zel, a in chungte pawh hian a rukin an nuih fo mai.Behlawi hnah a mal mawlh mawlh laiin Lucy a rawn lut a, “I va buai awm ve..” a rawn ti lut.

“Buai lo e, khaw nge i kal a” a lo ti var a. 

“I pa Muana te inah ka kal lawk, ka rawn peng mai mai,vawiin tlai chu ka û te inah chaw ka ei dawn a.” Thut pahin a ti a. 

Champuii ṭawng leh hma chuan, “E taka! Pi Fâwni kha tunah a thaw chiah an en tawh an tia, zanin pawh hi a daih an ring lo a niawm e.” A ti hlut a. 

“Awii, a van pawi,.ka khawngaih, a fate hmeichhia ve ve an ni bawk si.” A nu duhtak chân tawh a nihna rilru atangin a sawi a ni. Nu te meuh an thiha a natzia lo tem tawhtu a ni a, Pi Fâwni fate a mitthla lo thei lo. 

“Nia chu chu lawm, a thla kha a la âi ang em le ka ti, Muanawma te kha chuan YMA lam kha an hrilh ngei a, an zuk kal leh em ka hre lo. Thla âi te chu a koh hawn theih a ni lo’m ni?” A ti hê hâw a. 

“Theih e, mahse, pasalṭhat ve fe chu a ngai, an hmulthi pawh a ding tur a ni lo tih vel ten an sawi. Kei chu kan lui kal aṭang khan ka dawih vek tawh, ka in hi a zim êm zawk a, a zia. “ Hawi zak zak pah chuan Champuii chuan a lo ti ve a. 

“I hlauh viau chuan kan inah pawh a riah theih a nia, nih loh pawn, Muanawma te thianho hi sawm tawp rawh, an fel alawm.” A lo ti awlsam puat a, ner sak chungin, “I ti ang lo e a, miin engtin nge an ngaih ang. Chi loh lutuk, e taka! Muanawma bialnu kha a thi tawh tak tiraw?” Tiin a hriatchâk deuh thil kha a han sawi hmawrhmuh a, nuam erawh a ti chiah lo. 

“Boral tawh e, ka hrilh tawh che kha. Senteii khawngaihthlakzia kha aw. La dam se chuan an innei ve tawh maithei a ni.” Lucy chuan a ti a. 

“Engtia thi nge ni reng reng a..thalai thi hi chu a runthlak bik e..” hre châk lutuk anga lan hlau si hian a ti leh a. 

A aw a thian kharh a, “Aa..englo a nia, a video a viral palh a, a hrehawm ti lutuk kha a inawkhlum tawp mai a ni. A video covertu lah kha an chhuah zalên tawp lehnghal. Mitthi tawh khinte chu harsa hek lo. Ka ten a nia, kha pa kha. “ A ti ta zêk a, Champuii beng a vir laklawh tawh, an inzawt tui zel a, Lucy pawn a hriat chin zawng zawng a hrilh fai ta vek a. 

“Mizote chu kan á thin, a dik a dawk thlu loin a tam zawk thlêkna lamah kan thle dual zel a, kha video te kha han en ngun se Senteii kha a ruih vang ni loin che thei loin a siam tih a lang reng, rui chatthla angin an sawi vak a, amah kha an dem letling zawk a, kha kha a tuar zo ta lo a ni ber. Chintawk kan hre bawk si lo, tawngkam chhe pui puiin an tawngkhum a, kan khaw mite pawh an bang chuang lo. A thiannu ber Lateii ngei ngei paw’n, ‘Senteii chu a lo rui ve thin tih ka hre lo reng reng’ a ti a nia ! Tu nge tuar thei bik ang..amah leh amah a inthat pawh ka ti lo,mizo mipui mawl zual ten an that ka ti tawp kei chu..” Lucy chuan a duhthawh kher mai. A thinrim thar leh tih pawh a hriat. 

“I sawi dik, mi ka troll e te hi kan tia, kan thiam leh tak tak si lo, mi rilru na leh zak ngawih ngawiha siam hi kan ngah tawh ngawt ang, tuemaw nun tinuam lo reng renga rilru chhe lutuk han put tlat te hi a mak ka ti..engtin nge a theih pawh an theih zawk ni.” Champuii chuan a ti ve hlaih hlaih a,. An titi tui atalângin Lucy pawh chaw ei turin an lo call a ngaih phah hial mai. 

Lucy haw hnuah a inbual a, a inbual chhung zawngte chuan Muanawma ngawt chu a mitthlaah a awm mawle..a va vei leh a va duh vang lam ai mahin a hun lo tawn tawhte chu a ngaihtuah a, a khawngaih ta em em mai. Chu chuan a nunhlui ngaihtuah chhuahtir lehin Joela a han mitthla a, mahse, hman anga amah thlakhlelhna kha chhetemahin a nei tawh lo. Chu chuan a tilawm a ni. Champuii hi mahnia awm ṭhang tih takah eisiam lam hi a tithei phian reuh a, mahnia awm e ti lo hian chawhmehte hi a duhtui phian bawk, mi thenkhatin noodles te an rin mai mai laiin ani chuan chawhmeh pangngai a ti deuh thlap zel, bawkbawn leh behlawi hnah bai pawlh pawh in chungte a han suah ve leh a, an lo lawm thiam ve hle. A in chung Pu Ruata te hi an nupa bakah an fanu nuthlawi fa pakhat nei leh pi Zuali laka a fate pahnih an ni deuh tawp a, an nuthlawi hi Pu Ruata fa hmasa zinga a naupang ber a ni nghe nghe,. A nupui pahnihna Pi Zuali hi a sual lem lo bawk a, inngeih takin tihian an khawsa zui ta a ni. An nuthlawi Ziri chuan, “Champui, Pi Fâwni lah chu a kal mêk an ti sia, zanin chu tlaivar ve leh ngei a ngaih hmel” a lo ti bawrh bawrh a. 

“Nia, a zia lo tak tak, a thih chuan kal rual ila, “ a lo ti ve a. 

“Nang zawng kalpui châk che an tam leh awm êm mai..” nuih har har pahin a lo ti a. 

“Awihawm loh” a ti ringawt. Rinliana te hoin an rawn sawm hmain Muanawma ten rawn sawm hmasa zawk se tihte a ngaihtuah vel ta mai mai. A ngaihtuahna chu a nuihpui vur vur lehnghal. Chaw a ei lai mêkin a rin ang ngeiin Pi Fâwni thih thu chu an rawn puang ta lauh lauh mai. He khuaa a awm aṭanga mitthi an awm vawikhatna a ni nghe nghe. Zari’n a rawn call nghal ta reng a, “Kal ve ang u aw, Muanawma te pawh ka be tawh, Rinliana te rawn lan hmain kan inah lo phei ang che” a rawn ti deuh hmawk hmawk a, Rina hi an hnepui ve thawkhat a niang e. Champuii pawh a nui hawk ringawt, a chaw eina a singsa sawk sawk a, a insiam deuh nghal mai. Ruang pawh a lo la thleng lo naa Zari sawi ang deuh khan Rina te an rawn lan leh vat a rin ruk avangin thlim dan mawlh a dap a ni. Dik tak chuan Rina’n a intihneitu zia leh midangho bula a lo insawitheih dan velte a lo hre ve vek zel a, a mil tehchiam lo, amaherawhchu, nula a ni a, amah rawn rimtu chu eng mi pawh nise ṭha taka lo dawnsawn hram hram a tum ve a ni mai. Zanin mitthi lumennaa an kal dun a nih leh lek phei chuan, miin an inngaizawng angah an ngai tak tak ang tih a hlau a ni ber. Puan plain dum a bih a, top dum chungah cardigans grey a ha a, flat dum a bun leh a, a tawk der. Inchei chiam mi a ni lova, felfai thlarh, simple si hi a duhdan a ni fô. Bag a ak a, a mamawh tur a dap rak rak laiin pawn lamah khuh thawm niawm tak a la hre zui! Kawngka kha a kalh tho a, thawm pawh nei ngam loin a han ṭhu rên râwn a,a kawngka chu an rawn kik ta dat dat mai. An aw a hriat phawt loh chuan a chhawn mai duh bik lo. Chutah Kima aw hian, “A muhil mawni le..” a ti ta a, chuveleh a ranga rangin, “Kima, ka hman ṭêp, lawk aw..” tiin a mamawhte chu a bagah a khung sawk sawk a, a sam tuai puatin kawngka chu a va hawng ta a. Kima leh Lawma an lo ding a, anni pawh mitthi in kal dress-in an inthuam tawh. A hawihai deuh an hmuh chuan, “Muanawma chu a la inbual, a rawn kal ṭêp ang, Vanlalzari’n ‘Rinliana te sawm hmain zu kal vat r’u’ min ti sia, kan rawn sawm che..” nui hui chungin Lawma chuan a ti a. Kawngka te kalh felin Zari te in lam an pan ta dial a. Zari te inah chuan Muanawma pawh a lo thleng fel ve chiah a, Lucy an la nghak dawn a ni. Anni ho hi an inkawp laklawh a, engkimah a tu amai pawh inthlim an hreh ru ṭhûm tawh, tumah lah chu an inngaizawng chuang lem hlei lova. Muanawma chuan velvet kekawr dum dak hlarh mai a ha a, kamiz dum ban tluan hain a ban chu a banpuam vel thleng a thlep bawk a, a palian roh si, a háng chhe lem lo bawk a, Champuii pawh chuan a melh leh zauh zauh thin danah a dress chu inhmeh a ti ve a nih a rinawm. 

“Ruang thlen hma chu tihtur a la awm chuang lo, tiru in hnuaiah ruang nghah pahin ser zuk bâwl ang u.” Zari chuan a ti a, Ruang a thlen hma chuan an zai ngai lo a ni. An in hnuai hi Zari leh a nau room a ni a, a nau lah Aizawlah zirna avangin a awm daih si, chance han neih vel nan pawh a remchang phian âwm e, Lucy pawh a rawn thleng a..a engamah hmain a han nui chiam ringawt a! Muanawma chuan zawi sup hian, “Thla a de mawni le..” a lo ti. A nuihzat zualpui a reh ta maw tihah chuan, “Awii, Lalrinliana hrilhhai hmel leh khawngaihthlak bawk si kha..ka nui lo thei lo. “ Tiin a dul a han dawm leh ngâwng ngâwng a. Midangho pawh an lo khi ṭha mai. 

“Ka rawn phei kha, Pa Ruata te tualah khan U Ziri hoin an lo ding khawm laih a, ‘Khaw nge i thiannu hi..’ an lo tia,.”A kal tawh, min kalsan daih a, keipawh, ka ngeizia chu..” ka ti zân a. Rinliana chuan a lu thak lo pui hiah pahin, ‘Muanawma ten min hmakhalh leh ta ni maw’ a ti chhum hmuk a, U Ziri nen kan inmitmei a, ani pawh a nuihzat vangin an inah a tlan lut tawp alawm..” tiin a sawi zo thei hram. Muanawma tih loh chuan an nui ham ham a. Muanawma erawh chuan, tak ngêng ngâwng hian, “Chu ! A sava bu hual kan laksak tihna ni maw? Nge lawm lohna tur chhan ṭha tak a lo nei tawh zawk?” A ti ta.

Zari’n rum zeta melhin, “Rinmuanawm, inlak thutak vak a ngai lo, Rinliana mizia i hre vek, i ninawm” a lo ti hlak hlak a. 

“A intineitu thei êm alawm..an inngaizawng turah asin ka lo ngaih..” Muanawma lah chuan a lo ti duh lek.

Champuii thin a thawk thut nge, “Ani ang khi ka ngaizawng anga maw? Min va lo ngai hniam awm em em ve. “ A ti ve ta nghek mai. A ni lah taka..Rinliana chu tlangval hmelchhia chu a ni hran hauh lo, a mizia hi hmeichhe hîp lo chi a ni mauh mai a, insawitheih leh chapo a fâwmkêm a, a zurui phei chu a buluk thei si, hmeichhe ten chi mizia a nei ti ila a funkim ber awm e. Chutiang mi ngaizawng ve thei mai tura Muanawma’n a ngai chu Champuii chuan tawrh har a ti ve hle a nih hmel. 

“Aa..a sawi danah te chuan inhual tawh in ang zawk” a lo ti leh hmiah. Champuii pawh a tum bâr mai, “Hmela mai mai chu, engmah ka sawi duh ngai lova, ka nuihliam mai mai a, chintawk a hre lo a nih hi, ka chhal ngei ngei ang.” A ti ve ta hmak mai. Kima lah fing ta nghal lo chu “Dik chiah, Champui, la chhuahchhal ngei ngei rawh,’ ka thei tawh, ka mutpui tawh’ te pawh a lo tithei asin. I hriat lohin i hming a chhe viau thei tlat.” A lo ti pûng pûng a, Mahse, Muanawma bawk chuan, “Tak taka! Tuman an awih tak tak lo. A nihna takah chuan kei leh nang hi alawm an rinhlelh zawk, chu chu a hriat ve avangin ka bulah a insawithei vak ringawt alawm..ngaipawimawh suh.” A lo ti dam leh thlup roh a. A hunah chuan 2nd thought a hmang thin kan tih kha. An boruak rawn alh deuh hluai pawh chu a zia ta deuh a, titi dang an vawrh ta daih a. 

Ruang a rawn thleng hnai tawh bawk a, Mitthi in lam chu an pan ve ta hlawm a,  Pu Hluta te in hnuai hi a te chhe hran lova, bungrua awm ang ang an thiar chhuah phei chuan a dar ve huang tho mai. Ruang pawh chu a rawn thleng ta a, khaw thenawm a tanga rawn kal an chhungte bakah a fate pahnih chu an ṭap nasa hle, an khawngaihthlak khawp mai. A pasal boral hnuah ani hmeithai mai tan eizawnna a vân êm avangin a fate chawm nan khawtlang duh loh zu hial a zawrh a ngai a, chuta karah mualpho taka khua atanga hnawhchhuah a la ni zui! Tihian, Pu Hluta ten bulṭanpuiin ranvulh leh inhlawhna awm ang ang hmangin bul an ṭan ve chauh a, tihian a kal leh ta mai si! A fate lah hmeichhia ve ve an ni bawk nen, rilru chu a hah duh ngawt ang le. Champuii hi luhlul viau e ti lo chuan mitthi ina a kala an nu emaw pa emaw ruang bawha an fate ṭap hawm hawm a hmuh hian insum hman rual lohin a mittui hi a rawn luang ve mai zel thin, a chhan chu a nu duhtak, a hmangaih leh amah hmangaiha duat theihtawpa duattu a chunnu a lo chân ve tawh vang a ni. An rilru tur awm hi a hrethiam lutuk a, a thinlungah hian ‘che’ a awm thin a tin ni. Chumi zan pawh chuan a rukin a inhru zauh zauh reng a, a bula thu Muanawma leh Lucy te chuan hriat loh der tum viau mah se; an hre ve vek tih amah pawn a hria, nuam pawh a ti lo hial. Mahse, insum harsa a ti êm a ni. Champuii chanchin kimchang, an chhungkaw chanchin hi a tu khaw khain an hre lem lova, amah hian a sawi ngai lo bawk nen, Lucy te pawh chuan a hmeichhe lungno vangah an ngai ngei ang. 

Zing dar 1 pelh velah eitur an rawn sem a, an ei zo chu, zunram thiarin an va chhuak thawveng ve a. Rinliana te pawh thingpui lumna bulah chuan an lo thu thap mai. Champuii a hmuh rual chuan, “Ngati nge min lo kalsan daih a? Ka rawn sawm dawn che a..” tih pahin a ding hluai a, a mitmeng atang chuan a fim lo tih a chiang viau bawk. 

“Nia, Hei Muanawma te hian min rawn sawm sia, ka kal ta mai a nih kha..” a lo ti ve hmiah a. Rinliana ner nawk chu a haider lui tlat thung. 

“Ani hi i eng nge a nih a?” Pawr angreng tak hian a ti ta mai, zunram thiar hun lai, mi tam hun lai tak a ni vei nen, Champuii chu a zak rilru kher mai. Mahse, zâm miah lo hian, “Ele! Ka bialpa. “ A ti chhum hmak. Rinliana chuan Muanawma chu a melh zuk a, “A dik em? Muanawm” a la tizui! 

“I ṭhing a nih chu. Kal ang.” Tiin Muanawma chuan Champuii kaih leh hmalam pana kal a rual nghal. Rinliana lah chu Muanawma ṭawngkam kher kher chuan a tithangtlawm a ti deuh nge, a la na ngang mai a, “Hey, hnapa, eng nge ka ṭhinna? Ka nula i lo ngaihzawn ve ringawt vang khan ka awm mai mai ring hlek suh ang che.” Tiin a au ta lûng lûng a. YMA hruaitu pahnih rawn kalin, “Haw rawh, Sawma, hawpui r’u, zahpuiawm lutuk, hetiang zurui mawl hi kan mamawh lo. Ruih ve apianga buaina siam ve ziah mai, haw nal nal rawh.” Tiin an rawn nam dawt dawt a, Rina thiante chuan zah hmel deuhin an kalpui ta hnu hnu a, Rinliana phunglung tawh lah zah hre hek suh, Muanawma bakah an hruaitute pawh chu a tâwng a, a au lûng lûng tawh mai si, mahse, tharum nen a thiante chuan mitthi in hlat thei ang berah an kalpui thei ta hram a. 

Champuii thinrim biang pawh a tai hlar mai. “Awii, a va han zaktheilo tak..hmela kha” a ti hlak hlak a. 

Kima pui chuan, “Kan hriat lohin in lo inngaizawng a, ka lawm lo” a lo ti ve sek. 

Zari’n, “Mawla, i ninawm. Champui, engahmah ngai suh, Rinliana mizia an hre vek a, tuman engahmah an ngai dawn lo” tiin a thiannu chu bengdaih a tum hle. Lucy erawh nuih lamah a kal leh tawh, Lawma banbul leh a hmai insiktirin a dir leh char char, “Nang lah hi a..” Zari chuan a ti hlak a, mahse, ani pawh a khi ve ṭhaw tho. An vai nuih leh ta, Muanawma pawh a nui ve. 

“Kei chu luh leh pawh ka hreh tawh e, hawn mai ka duh” Champuii chuan a ti a, an nuihzat zualpui a reh takah chuan an thutak leh ṭan viau tawh. 

“Nia, haw mai rawh, a zahthlak ve alawm, ka va thlah ang che. “ Muanawma’n a lo ti hmiah. Champuii hrilh a hai letling zawk,. An thiante pawh chuan hnial pawh tum se, Muanawma mitmei an enin an pahniha hun thawl pek chu tha zawkin an hria a ni tehchêk ang chu, tuman hnialna thu an chhakchhuak lo. Mi luh rem tawh lamah an pahnih chuan Champuii in lam pan chuan an phei dun ta chhat chhat a. 

“Ka lo lut kher dawn em?” Kawt an thlen chuan Muanawma chuan a ti a, an kal chhung zawng khan a tu ve ve mah an tawng lo. An kal dun mawp mawp ringawt mai a ni. 

“Ka hre lo” tih chiahin Champuii chuan a chhang a. An ngawih dat laiin an piah lawk in rel atang chuan Rinliana inhrosa thawm an hre leh ta a, Champuii chu a meng zau kâwk. A inrin hmain Muanawma banah chuan a vuan ta chawt. Muanawma chuan hrethiam takin, “Kal rawh” tiin stepah chuan a nawr thla a, amah pawh a pen thla ve nghal. Inah chuan an lut ta a, kawngka a kalh khap bawk. 

“Awm rih lawk mai rawh,.” Champuii chuan a ti a, inthlak turin a pindanah a luhsan zuai. Muanawma pawh bet vak lo chuan a thu a, a zâm deuh em mawni aw tihtheih tur hmel a pu ve nia. 

Champuii a rawn thut takah chuan, “I bialpa maw ka nih?” A lo ti thut mai. Champuii hamhaih leh lai chu a nui lui a, a zak deuh tih pawh a lang. “Khatia ka tih mai loh te chuan, i hriat vek kha..” a ti ta ringawt. 

“Inngaihzawn tak tak pawh a pawi chuang em ni?” Muanawma chuan a ti ta hlawl mai. Amah pawn mak a inti lek lek mai. Chutia awlsam lutuka a sawi chu..

“Ka hre nang” a lo ti ve mai bawk a. A awmzia chu pawi a ti bik lo tih a tichiang tlat. Va thut hnaih deuhin, “Inkhualtelem kan ang, mahse, engkim hi a tak vek ni rawh se..a chiang em?” Muanawma aw-a inrintawkna chu Champuii chuan a haider thei bik lo. A bu ta nghat a, a chiang ta. 

Mahse, nunhluia ser thuk tak lo nei tawhte hringnunah hian hmangaihna a parvul thei ang em tih chu chunglam chauhin a hria ang chu..

(A kar awl a tam tih ka hria, mi buai ka nih hi,. Mahse, min hrethiam em em thintu te tan, Pathian zara kan dama Kumthar kan chuangkai a nih chuan, Kumtir atangin Story leh YT hi hna berah ka nei thei tawh dawn tih ka puang e. Kumin zawng kum chhiat ber kum a nih hi..