Zochampuii 2

ZOCHAMPUII..(2)

Toni Râlte

“Teh hmuk zel a che, insiam rawh..miss kan rim ang.” Lawma chuan thupe aw zet hian a lo ti a. Muanawma erawh a chechâng eih lo. A hnu deuhah muangchang hian zial a ṭan a, a pak talh talh a, “A inkhawm ang chu” a ti zawi sup a. 

“Khawm lo, chaw an ei tlai a, Muantuibura pawh a inkhawm lo, kan rawn peng kawi alawm.” Kima chuan a lo ti vat a. 

“Nangmahni khan bem zawk ang che u, ka duhzawng a ni lo, bakah kei aia upa hmeichhe ngaihzawn ka duh lo.” A ti leh nghut nghut a. 

“Nang aiin a upa dawn mi?” Lawma chuan a lo ti hû a. Lawma melh rulh pahin, “High school-a thawk thei, qualified si chu kei aiin a naupang thei lo hrim hrim.” A ti vut a. An chhang tawh lem lo. An nghak tlat si a, phur fahran lo hian a insiam a, tlai aṭang khan a awm a nuam chiah lo a, a chhan pawh zanriah ei hma deuh khan Seni nu Pi Zuali’n buhfaiṭham a rawn khawn a, Muanawma a hmuh rual rual chuan, “Awi, Marin, nizan ka mumangah Bawihi ka lo hmu nasa lutuk a, a lo hlimin a hmel lah chu a lo ṭha em em mai a, ka harh chuan ka ui teh mai asin..” a ti hlut a. Muanawma hi mi nawlpui chuan Muanawm tiin an ko na a, ṭhenkhat hian Mama, Rinmuan, Marin tia ko te pawh an awm ve nawk tho a, a hming tho a ni bawk a, complain a nei lem lo. Kha khan a nunah thu sawi thar lehin Seni ringawt chuan a ngaihtuahna a luah leh ngut ngut a tin a ni. Mahse, a ṭhianten tihhlim an tum ṭhinzia a ngaihtuahin zahawm a ti a, an sawmna pawh chu a hnial ngam ta bik lo a ni e. 

Muantuibura te in lam pan chuan an inzui ta ṭhâm ṭhâm a, dawrkai an ni bawk a, lut chhuak neuh neuh an nei deuh reng a, anni pawh dawrah lut kawi hmasain an nula Hmingi chuan a lo be sawt sawt hlawm a, Hmingi hian kum 17 mi lek a nih laiin pasal a um ve zuai a, mahse, kum a la tlin loh bakah a bialpa chu a nu duhzawng a lo ni lo bawk nen, tihian zan khat thlawi kan tih ang deuhin a leng ve leh ta a, dawrkai tih takah a nu ai chuan a mizia pawh a ziaawm deuh a, mi biangbiak pawh a ti mi ve phian mai, chutihrualin Champuii nen erawh an la inkawm nel lo viau thung. 

“In mikhual nula kan rawn rim dawn a.” Lawma chuan a ti sawk sawk a. Hmingi ner sak chu Muanawma chuan a lo hmu ru reng, “Va rim rawh u, inleng kawm pawh a thiam dawn mawni, a no em mai.” A lo ti deuh hawk a. A ṭawng dan kî chuan awmzia a nei deuh hlein a lang. Chulam ngaihtuah lem lo chuan in chhungah an inzui lut ta dam dam a. Champuii chu vengchhak tlangval pahnihin an lo ṭhutchilh ve ran a. “Lo leng rawh u” Champuii chuan nelawm chhuahin a lo ti sawk sawk a, an ṭhut fel hnuah, “In va fel ve, in inkhawm bik lo a ni maw?” A ti luam a. 

Kima chuan, “Zan lam hi chu kan skip zel mai..” a lo ti fiamthu a. Veng chhak tlangval Rina, mikhual nula hre thei em em, khual chhawn tia an koh ruk ṭhin chuan,”Lawma te ṭhianho hi zawng khual chhawn tih takah kan khalh hman meuh ṭhin lo chu a nih hi,.tu ber nge in zawrh leh dawn..?” Mei nei ru zet hian a lo ti a. Lawma chuan a run deuh hle chungin nui chung hian, “Ele! Hei Bungpui khaw tlangval hmelṭha leh lehkhathiam kan Rinmuanawma hi kan zuar mai a niang chu, to an tih viau leh kan discount mai ang chu..” a ti ta hlut a. Muanawma erawh a ngawi kur a, haw awm pawn a lang lem lo. Champuii chuan, “Fiamthu in va duh hmel hlawm em em..taka ana, nilaini khian insawn ka tum deuh a, min rawn pui ve u la..” nui sen sen chung hian a ti a. 

Kima chuan, “Pui ang, khawilai nge luah i tum tak?” A ti a. 

“Pu Ruatsiama te in hnuai saw kan tifel ta mai. Mahni chauha awmna atan chuan a tawk tiu teu viauin k hria “ Champuii chuan a lo ti vat a. Pu Ruatsiama te in chu Lawma te in nen pawh a inhlat hran lo. 

“Bungrua i ngah mi?” Muanawma chuan a lo khauh a, Va melh zauhin, “Naktukah hian dam chuan Champhaiah ka han lamkhawm ang ka tia, ka û te nupa an rawn chho dawn bawk a..” a lo ti ve mai a. 

“Miss, Lungleiah tiraw in awm kha’h ? Ih, Judy i hria em? Pian nalh ve deuh kha..ngo lam” Lawma chuan a lo ti leh hû a. Champuii ṭawng hma chuan, Muanawma’n, “Delhi-ah Raju-a i hria em? Tih ang vel a nih chu..” a lo ti zauh a. Champuii pawh a nui hawk hawk mai. Rina leh Hruaia te erawh Muanawma te huhâng an zo lo deuh nge an ngawichawi ta riau a, Muanawma chuan nuam a ti vak lo. Pi Duhi a rawn ṭhu ve a, “Muanawma te teh hlawl chu! In hmuh a va khât ve, i pa chu a lo la haw lo maw?” A ti nem leh diai a, a mitmeng erawh a ti leh zuk zuk tawh. Muanawma’n a chhan hnu chuan, “In sak ṭanpuina chu min han sawipui ve thei hlauh se ka ti mang e aw. Dawr hi zauh a ngai tawh lutuk a” a ti leh duam duam a. An khuaah anni leh Muanawma te in hi a laktlak ber pawl a ni reng si a. Muanawma ta pek chuan, “Nangni aia mamawh an tam hle sia..” a lo ti nghut, Kima’n a rukin a lo hmer a, a ngaipawimawh lem lo. Hlemhlêtna hi ama tawkah a haw riau a, a pa vcp hnu aṭang phei hi chuan a rin loh deuh deuh, mi pamham leh duhâm, dâwt pawh sawi hreh lo, mahni ṭanghma atan chuan a dik lo tih hriatreng pawh tilui duh, kohhran leh khawtlanga lansarh duh leh hle si a hre tam ve ta viau, hetiang mite hian Kristianna hi kawrah an hmang niin a hria a, a ngaisang lo ve hle. 

“Mamawh tih thuah chuan mamawh lo tak tak kan awm loh hi maw.” pi Duhi chuan a ti ve mai a. Champuii’n thingpui a rawn chawi ta bawk nen, an sawi zui ta lo. Thingpui an in zawh aṭanga rei vak loah Muanawma chuan hawn a rawt ta a, Rina leh Hruaia te chu dîp tlata a inhriat vang a ni pakhat. An hawn dawn chuan, Champuii chuan, “Muanawm, nilaini chu hman hram lo tum ve r’u aw,. Midang sawm ngam pawh ka nei si lo a..” a ti khawmawi a. 

“Nia, kan lo tum ang.” Tiin an inthlah ta a. Amahin an in lam a pan a, an in kawng hi thlanmual kawng a nih bakah an in awmna hi sawi tawh ang khan a fâl deuh avang hian a û phei hi chu zanah amahin a haw ngam ngai meuh lo. Mahse, hetia in fal reih rawiha khawsak hi Muanawma duhdan tak a ni thung. A pindanah lut nghalin, tukverhah bawk chuan a dak leh vang vang a. An in thlang ruama thlan lung rawng var an hnawih, lo intlar ṭhât chu a thlir vawng vawng mai. Khung thlan tam tak zingah khuan a hmangaih hmeichhia, ama nunna pawh hlut zo tawh lo khawpa thinlung kehsawm, dâwt leh thutak thliar thiam lo mihringten thlan khura an nawrliam kha a zâl ve asin. A kut a hum ruh a, zirna zawh vat vata a tum ram hmachhawn tura hmalak a châk tawh takzet a ni. 

Champuii pawh a mut hmunah phone khalin a meng kar mai. Facebook-a a luh chuan group pakhatah hian hmana amah tinaa hnuchhawntu Joela zai hi an rawn dah hlauh mai a! Nia, Joela kha a zai ve ṭhin a, lar hluai tia sawi theih ni lo mah se; Aizawl angah chuan hretu a ngah ve tawh hle. Amah a lo chhe zawk zawk lo bawk a, a chanchin a hriat leh hmasak ber kha chuan nupui a ruk thu  a ni a, a hnua a hriat leh chuan an inṭhen thu leh fa pakhat an neih hman thu kha a ni leh mai. Ngaihven a tum lem lo a, mahse, mipa dang hnaiha mipa dang laka luanliam leh chu thih hrehin a hreh a ni ber mai. Mahse, khatia phaia hnathawka a awm lai khan beer in a ching chho a, beer aṭangin zu-ah a kaisang a, a duty tibuai lo mah se;  a mimal nun erawh a nghawng nasa angreng. A chhungril natna thup bo nan zu chu a leklam a ni deuh ber mai,. Chu chuan pawisak neih lohna neihtirin zep nâk emaw mipa lakah pawh a sihhnip chho ṭan a, mahse, hnamdang erawh a kawp duh hauh lo thung. Mizo mipa, zirna emaw eizawnna avanga awm vete nen inkawp chhoin kum chanve dâwn chu a in luah rawn ṭawmpuitu pawh a nei hial a! ? Lka pawh chuan neih hial a duh, mahse, Champuii chuan a hmangaihin a inhre lo va, bakah a thinlung zawng zawnga mipa rin a harsat tawh avangin pasal neih lam chu a ngaihtuah ngai lo. Vawikhat an inhnial deuh a, Champuii chuan Lka chu a hnawtchhuak zui hmiah. Chumi hnuah mipa pahnih reivak lo a kawp leh a, mahse, an che na lem lo. Mahse, a tleirawl chhuah mizia nena ngaihtuah chuan chutianga mipa kawpa mipat hmeichhiatna han hmanpui lâwp lâwp chu rin a harsa lam deuh a ni, amah ngei pawh inthiam loin chu chuan harhfima khawvel hmachhawn harsa a tihtir ṭhin a ni. A tawpah Zu-ah bawk a ṭuan leh ṭhin. Nun khawhar leh tuihal taka a awm laiin , “Heti reng reng chuan ka thi thei mai ang, Joela avang pawn thi thei ka la ni lo, amah aia dinhmun ṭha leh sang zawka inhlangkai turin Mizoram lama ka hawn a ngai..” tiin a hna bansanin a rawn haw ta hial kha a nia. Tihian, tunah chuan zirtirtu hna zahawm tak a thawk ve dawn ta chu a ni reng mai. A nunhlui buṭu ve tak te hre miah lo khuaa a thawk te hi lehlam zawng tak chuan a lawm ru viau mai. 

Nilaini chu a lo thleng ta ngei a, Lawma leh Kima te’n an sawm ngawrh bawk a, Champuii insawn tur chu puih ve a rilruk ta a, a pa a lo haw tawh bawk a, a pa lahin pui turin a lo tur ve sek bawk nen. Pu Ruata te in hnuai chu té fel rin ren, mut pindan pakhat zau lutuk ni lo a chhawm ve thlap a, choka leh ṭhutkhawmna pindan erawh a inzawm a. Champuii khan Champhai lamah bungrua eng ilo a han lam khawm bawk nen, an han insuan lut chu ama tawkah a khat ve âm mai. Pu Ruata hi VC member a ni a, an khawsak pawh a harsa bik lo viau, pa fel leh titi nuam ti ve tak a ni a, tuna a nupui hi a nupui pahnihna niin an fate pawh an la naupang viau a, An  nu pawh pi Duhi ai ngawt chuan hrawn a nuam deuh ang chu. “Lawma, vawiin chu kan buai ve angreng sia, tlai lamah chaw kan eikhawm ang ka ti na a, kan hman dawn ta si lo va, naktuk tlaiah ei mai ang u aw. Uisa in duh ka ring a, ka hauh lawk vek tawh a nia. In fel, min lo pui a..” Champuii chuan a ti ve luam a, Lawma te ṭhianho bakah Rina leh Hruaia te bakah Muantuibura fapa Faka ten an rawn pui ve bawk a ni. “Chutianga chaw ei kher a ngai hleinem, a hautak mai mai, kan pui duh che a, kan pui che ni mai.” Lawma chuan a lo ti ve a,. Thingtlang khaw ṭhenkhatah hi chuan mite an la tlawmngai bawk a, in ṭhiah nikhua te hian an inpui liam liam zel a, a sak hunah lah an hman remchan niin phût let nei hauh loin an inpui leh mai bawk a, tiang khan an inpeizâwn tlâng ṭhin a, hei hi a nawmna pakhat a ni bawk awm e.

Muanawma inbual zo inthlak tura a pindan a luh chuan a phone a lo ri ve chiah a, lo call tu a han en chuan a mit a tizîm san mai. “Aw..ka ngaithla” tiin a bengah a chuktuah nghal a. 

Lehlam ami chuan, “A nupui tur nen hian hla ve deuh tawh aṭangin an inchhungkhat a niawm a, tunah hian a bialnu nau, Singapore-a awm mek lo haw theih hun an nghah avangin inneih hun kha an tikhawtlai leh ta hlek a..” a rawn ti dût dût a, tu chungchang tak sawi ang maw. 

“A ṭhat nasat chu, chuan, Champhai lam hi?” Muanawma chuan a ti sup a. 

“Khalam chu Asanga kutah ka dah deuh a, chanchin a rawn hrilh thuai che ka ring. “ A rawn ti a. An inbiakna a zo der. Ni e, a thil buaipui mek hi chutimaia bansan thei a ni tawh lo, a kal thui tawh mah mah. A chhungte erawh chuan engmah an hre lo thung, ṭul a tih hunah a hrilh mai ang chu maw. 

Zanriah an ei laiin a pa chuan, “Mama, in exam a hnai ve leh tawhin ka hria, zir ve ṭan tawh la,. Duh aiin i lênglâm tam tlat..” a ti chuar chuar a,. Regular class an kal loh avang hian inthlahdah a awl riau a, mipa an lo ni bawk nen, han zir melh melh chu a harsa ve bawk a ni. 

“Ni e, bakah inkhawm pawh i inthlahdah riau tawh a nia. Chawlhni tuk chauh inkhawm i tum a, lehkhathiamte in ni ve a, an beisei san ve tehlul che nen hian,.” A nu chuan a lo ti ve bawk a, a chhang lo hrim hrim. Saii chuan, “Mawina mikhual nula an rim ṭhin alawm. Kan miss thar kha” a lo ti zauh a. 

“A hmel chu a ṭhat reuh khi , a tê ve deuh tih mai loh chu,biak pawh a nawm viau kha mawle..” a nu chuan a lo ti var a. 

Muanawma chuan, “Ngo lo se a chhe ve âwm êm mai..” a lo ti hluk. A rilru niawm tak chu a chhungte chuan an hrethiam nghal, Senteii kha hâng ngaihnobei kan tih ang kha a ni miau a, hmeichhe ngo hluak hian a hîp mang tlat lo a tin ni. 

Champuii pawh mahniin a han awm chho a, a tihṭhan a ni bawk a, nuam a ti viau zawk, Thingtlang ngang a ni bawk a, inleng a nei kal ve reng bawk a. School lama a thawhpuite hi mipa vek an nih avangin ani nula awmchhun ta chu an duat viau mai a, nupui fanau nei vek tawh an ni bawk nen, an inngaina tlangin fiamthu pawh an duh hlawm viau. Hetihlai hian ngawrh deuha betu a nei a, Champhai khua a ni nghe nghe, Champuii u, Aizawla pasal nei kha a pasal hna avangin champhai lamah an awm ta bawk nen, heta a awm hma hian Champhaiah a zin ve zeuh zeuh a, chuta ṭanga inhria chu an niawm e. A hming pawh Zothana a ni nghe nghe. Tlangval fel leh vengva tak, KṬP-ah pawh hruaitu ni pha hial a ni a, a û chuan a duhpui hle. Mahse, Champuii nunah hmangaihna dik takin hmun a chang meuh tawh lo nge, Zothana chu a kalpah vel ta mai mai a, ngaihzawng nei lo va theuleu chu nuam a ti ta ber mai niawm tak a ni. Bungpui khuaah a han awm tlangnel chho a, Thingtlang mite hmusit mi chu a ni hauh lo nângin chu khua ami chu ngaihzawn loh a tum ve bur kha a ni a, a thawhpuite zinga a nel zual bik, Pa Zual tia a koh mai ṭhin hian, “Tihian thla hnih khat i han awm ang a, tumah hian an phù lo chein i hria ang a, kum khat i awm meuh chuan phu reng reng i nei tawh lo mai ang..” a ti fiamthu ṭhin a. A nui tawp zel. Hmelṭha han tih emaw amaha nghawng han nei dat thei he khuaah a la hmu lo niin a hria. Mahse, a hnathawhna te avang pawhin tupawh chu ṭha takin a be vek a, inleng neih loh chu a thlang ru zawk fó mai. Amaha awm nuam ti mi a ni si a. Lawma leh Kima te nen an innel fû tawh hnuah pawh Muanawma nen chuan thinlung takin an la innel ve thei reng reng lo mai a, Muanawma ze maksak angreng tak, a changa tak ngâk mai ṭhin chuan chhan a neih a ring ve tho, mahse, thil hriat châka philî chung chi a ni lem lo bawk a, a ngaihven hran lo. 

Zan khat chu an khaw pa ramvak a rawn haw thei tlat lo mai a, a nupui mangang chu a buai angreng hle, nidangah chutianga tlaiah a haw ngai si lo va, tuna a ramchhuak pawh hi a thangkam en tura kal kha a ni a, chawhnua lo haw leh mai a tum vangin chaw pawh a fun lo nghe nghe. Mahse, zan dar 9-ah pawh a la rawn haw loh avangin ṭhenawm khawvengte an pun ta ngawt a. Amah hi Pu Kawlzika a ni a, mi ramvachal tia sawi theih ni chiah lo mah se; thang hi a kam peih khawp a, awh pawh a âwk nasa ve tawh hle. Tichuan, YMA punin a zan azan chuan Pu Zika zawng tur chuan an inkokhawm ta chûk chùk a. Muanawma te ṭhianho pawh an kal ve ta vat. A thang kamna chu a hla lem lo a, an zuk thlen thlak chuan a thangkam pawh chu a lo sût fel diam a, amah chu hmuh tur a awm lo thung, an han au lauh lauh a, chhawntu reng an awm si lo,. Hmun li-ah inṭhen darhin an han zawng leh chiam a, hnuhma emaw han rinhlelh tur engmah an hmu bawk si lo, “Khawmu chawi bo a niang” ti tawk te pawh an awm ta hial mai. Dar 12 a pelh takah chuan, hruaitute chuan, “Tlaivar chuan zawng rih lo phawt mai ila, ei leh in tur kan inpai rih lo bawk nen, naktukah tha tharin i zawng leh zawk mai ang u.” Tiin thutlukna an siam ta a, an haw leh ta dam dam mai. Pu Zika te inah chuan nu leh pa ṭhahnem takin an lo nghak ve mek bawk a, nula hoin thingpui an lo sem zar zar bawk. Champuii pawh chuan a lo sem ve a, Muanawma te a pek lai chuan, “I fel phian hi..” Muanawma chuan a lo ti sup a. Midang phei chuan an hre pha kher lo vang. Champuii chuan, “A ngai a nih hi, in hah awm sia.” A lo ti ve a. A chhang leh tawh lem chuang lo. 

A tukah pawh chuan mi bo zawng tur chuan an kal khawm leh ta a, group 5-ah inṭhenin an kal darh sung sung mai. Muanawma te pawh 6 an ni a, an zawnna lamah chuan a awm pawh an ring hran lo, mahse, thil thleng ve thei a nih tho avangin an bei urhsun ve viau tho. Chawfâk a lo hun a, luite kamah chaw chhun chu an fâk ta a, an han ṭhut bial laih hnu chuan, an zinga phawk deuh ber Buanga an tih mai chuan, “Kan miss thar hi in rim ve tawh em? Hmanni deuh khan kan Lalhnema pekin a inbual lai bihthlak a tum niawm tak a ni, pi Zuali vawk chaw pe turin a lo hmu hlauh a, a va han zahthlak tak, engtin nge miss pawn a ngaih ang ni..?” Chaw hmuam ṭûn chung chuan a ti a. Mak an ti tlang hle, Muanawma phei chuan a hriat vawikhatna a ni nghe nghe. Buanga bawk chuan, “Lalhnema nuin pi Zuali te a ngen nasat em avangin an tlangzarh lo mai mai zawk alawm, miin an hriat chhan pawh amah Lalhnema zurui a inpuang pek a, mawl leh lutuk .” A ti hluk hluk a. An nui dar dar mai. 

Lawma’n, “Chu! Hnema chuan a hmu hman lo tihna ni maw?” A lo ti a, “Hmu hman lo chu a niang, a sawi zawm lo ém mai..” Buanga chuan a lo ti a,. Kima cousin Dina chuan, “Miss hi chu a hmel hi ṭha hluak tia sawi tur chu a ni lo naa, a duhawm ve thlawt a ni. Bakah tupawh hi a be thiamin a polite sia,. Khawpui nula tih takah” a lo ti ve suam suam a, Champuii fakna ri a nasa viau mai. Muanawma ngeng erawh a chhun pha meuh lo a nih hmel. Nilenga Pu Zika an zawn hnu pawh chuan an hmu zo ta hauh lo mai a, thim dawnah khua an lut a, a nupui fanaute an khawngaihthlak takzet a ni. An chhangchhe ve bawk si, nu ber phei chu a ṭap a ṭap tawh mai. Engpawhnise, mizo tlawmngaihna a la bo lo bawk a, ni 7 tal chu an zawn a ngai dawn a ni. 

Muanawma muhil chu a harh hlawl mai, tiharhtu zawng a nei chiang a ni. Senteii thih sarhu lai khan mangchhia a mang zauh zauh ṭhin a, amah Seni hmuh a châk theih tehlul nen a hmu ngai miah lo thung. Mahse, zanin erawh a dan a dang tlat! A han mu kha a chau ve deuh bawk nen, kar lovah a muhil zui a, mumang nge maimizial a hrethiam chiah lo a, a pindan tukverh thlanglam thlanmual ep chu rawn inhawng riai riain parda pawh chu a phe lâwp lâwp a, chutah a beisei loh lutukin Seni ngei mai kha a rawn pen lut ta mai a ! Tukverh hi a hniam chhe hran lo va, chutia mihring luh mai mai theih a ni lo. Seni chu a damlaia a hmel ang chiah khan a khum bulah a ding ngawi reng a, an inmelh dun ngawt ngawt a ni ber e. Ṭawng a tum a, a awrâwl a chhuak thei si lo. Hlauhna engmah a nei lo thung. Zawitê hian Seni chuan, “Lungpho mualah..” a ti sep a, a hmuh lai reng chuan a ral ta riai riai a. Mak a ti kher mai. Seni zawnga a hawi kual na lamah a harh ta kha a nia. Tukverh chu a en vat, a lo inkhar ṭhap si. Mak a tiin a mumang chuan awmzia a neih ngei a ring a, a beisei bawk. Tuna mi bo an zawnna nen hian inzawmna a neih a ring bur tawp mai a ni. Chutihrual chuan sawi chhuah tawp chu a hreh a, miin an hmu dik lo ang tih a hlau a ni ber. Muhil tawh lovin a tlaivar ta ṭhak a. 

A tukah a ruktéin a nu a hrilh ta a, a nu pawh chuan mak a ti tih a lang reng mai. Vawiin lama an zawn lehna turah a ṭhiante pahnih thurualpuia a ruk deuha Lungpho muala kalpui chu a tum rilru ta a. Kâwna an innghah khawm lai chuan Champuii school kal tur chu a rawn phei zân zân a. Blazer suit rawng uk, a vun nena inrem tak mai hain, flat dum simple tak a bun bawk a, bag lian lo tak hi a darbah bawk a, a sam chu sang taka ṭawnin hmuh a nuam takzet a ni. Muanawma meuh pawn hmuhnawm a ti ve deuh nge ni a lo melh ve vung vung mai. A inleng ṭhangte nen an inbe liam liam a, Rina lah hian a bialnu chei ve deuh ringawt lehnghal a, mahse, tupawn a nihna leh mizia an hria a, an ûksák tehchiam lo. 

“I melh dan kha ka hmu kiau mai ah! “ A beng bulah Kima’n a rawn ti sur sur a, nghawk pahin, “Awm mai mai teh. “ A lo ti nghut. 

An han inṭhen darh leh sang sang a, a lo sawi lawk tawh avangin anni pathum chu an inzui deuh bik a, an ṭhiante chu an hlat ru ta deuh deuh a, Lungpho mual an tih hi a hma nia chaw an fákna luité zawh chhuk zela peng a ni a. Ram a la ngaw ṭha a, Lungpho mual hi sapélte pawn an kal zinna ber a ni ṭhin. A mual zawl lai an va thlen chuan an ṭhu thlandai a, a ṭhian ten thil awmzia an hriatthiam meuh loh avang chuan a mumang mak tak chu a hrilh ve ta a, mak an ti ve hle. Tichuan, kal hrang ṭheuhin Pu Zika chu hmuh inbeisei takin an zawng ta sang sang a. Ramhnuaia chetla ṭhang vek an ni bawk a, hlauhna an nei lem lo. A kal dawn khan a nuin puanhlap a kentir thlap a, Pu Zika chu damin an hmu leh ang em tih hriat ni hek lo le..Phulraw hung chhah zet a thleng a, thâwk a lak vang vang hnua a pen leh chiah tihin a piah dinglam lei tlahniam deuh laiah chuan thawm a hre ta a. Zawitéa rum thawm ni maiin a hria, hmanhmawh zetin a va pan ta vat a, lei tlahniam kó pangah chuan an mi bo zawn mek pu Zika ngei mai chu a kekawr ṭet hnuang leh kawr pawh ha loin a lo bawksawp reng chu niin, ring zeta a ṭhiante chu au nghalin a pan ta sawk sawk a,. pu Zika chu a thaw a lo zawi tawh hle. A han mut ṭhattir a, Lawma leh Kima te pawh an rawn thleng rang viau, tui te tulhin an han bawihsawm vat vat a, network signal a awm loh avangin midang an pun thei si lo. Kima leh Lawma chuan hláng tur mau an sat ta sawk sawk a, an zawn haw mai a ngai dawn a ni. Pu Zika chu a ṭawng thei rih lo va, harh erawh chu a harh thawkhat tawh, a mitmeng chu a davâ riai mai a. Harh han tihah a la fim lo tih erawh a lang. Hlauh a nei aniang tih mai turin a hmel pawh a dâng bai mai. 

Hlâng pawh chu siam zoin engtin tin emaw Pu Zika chu an han dahrem a, a chawn veilam kak chu a thi duh em vangin an tuamsak bawk a, a bak hliam dang a neih awm erawh an hre lo. Tichuan, an pathum bungrua chu an zinga té ber Lawma’n a ak khawm a, Kima leh Muanawma te chuan an zawn ta a ni. 

Signal an neih veleh midang an pun ta nghal a, an rawn lang rang kher mai. Tichuan, Pu Zika chu khaw lam an panpui ta a. Khaw lam mite pawn an chin an lo hre tawh bawk a, an lo hmuak ve nual mai. Pu Zika chu an health worker-in a han endik zung zung a, amah eng han zawh hleihtheih ni hek lo, a dinhmun ṭha vak lova a lan avangin an tifai sawk sawk a, Champhai lamah entir turin an kalpui ta a ni. Engpawhnise, mi bo, dama an hmu leh chu a lawmawm hrim hrim e. Muanawma vang a ni tih hria erawh mi pathum chauh an ni. 

Zanah Champuii an rim ve leh ta nge nge a, lenna tur dang a vâng ve bawk a ni. Muanawma hian duh dertu, lo betu hi chu a nei ve zut mai, an khua angah chuan a vantlang leh zirna lamah pawh a sang pawl a lo ni ve bawk nen. Tin, a hmel a lo chhe lo tel ve lehzel bawk a, Seni nen an chanchin hre vek mah se; lo beisei ru ve deuh tawk chu an awm ve tho mai. Mahse, tumah a ûksâk duh lo, a rilru diktakah chuan, “A tawp ka thlenpui theih loh tur hnenah beiseina ka pe tur a ni lo. “ Tih hi a ni bur mai. Champuii in hrik Rina te pawh an lo awm leh ngei a, Champuii tak pawh hian a ruk tak chuan a ning ve thin ngawt ang.

“Vawiin chu in che hero hle mai,. Nangmahni zarah mi bo in hmu chu a nia.” Champuii chuan a ti hlut a. 

Kima lah chuan mark score sak tum takin, “Muanawma zar kan zo a ni e, kan detective hi a duai lo riau a nia” a lo ti zauh a. 

Muanawma lah chuan, “In ninawm..” a lo ti leh tawp. Sawi tur hi vâng a ti thei thin. A laih leh zah vang lah chu a ni der si lo. Champuii thingpui lum zo chu Muanawma bulah a rawn ṭhu a, a shampoo rim chu a nam hak mai. An han titi laih laih a, an len chhung zawnga Muanawma’n Champuii a biakna awmchhun chu, “I fai hle mai..” tih zawng a ni. A ṭhiante titi pawh a zawm chuang lo, a lo ngaithla vel mai mai. Len pawh an leng rei leh ta lo.

Muthmunah chuan a tum loh deuhin Champuii chu a ngaihtuah ta tlat mai a! A zan hmasa lama Seni vanga a tlaivar te kha han ngaihtuah luih a han tum ngial pawn a thei der lo mai. A insawh a insawh mai a, “He nu hi ka tan engmah a ni lo.” A ti chhuak ta hial a, a chauh tawngkhawng hnuah a muhil ve ta hram. 

Pu Zika pawh an lo admit a, a la ṭawng duh miah lo chuan ngaih a tiṭha chiah lo. Hliam na em em a nei lem lo naa a rilru lamah eng emaw chu a tuar niin a lang. Nakinah a dam hunah a la sawifiah mai ang chu. 

Veng tawntirha a nu tirh anga chawhmeh a va la a haw lam chu a û dawrah a peng kawi a, rin loh deuhin Champuii a lo ṭhu khiau mai. An han inhmu thut chu eng nge maw an hriat ni, lai thar thut ang hian an awm ve ve nia ! Muanawma pawh chuan mak a inti rilru hle, mahse, inthununin, “Eng nge i tih a?” A ti a. 

“Hei kawr ṭhuitir ka tum a, khaw nge i kal zawk ?” A lo ti ve mai a, a kalna chu a sawi a. A û bulah, “Nu Remi’n a kawr min chah a, ka chhuk leh nghal duh a nia..” a ti a. 

“Ṭhu ve rih mai rawh, hei ka laklawh lutuk. Kha Champuii nen khan lo inkawm r’u..” a la ti zui. 

Ner suk chungin a ṭhu ve ta nge nge a, “Muanawm, naktuk eng nge i tih dawn? Awii, lui kal ve ka châk e, Kima te nen kal ang u. “ Champuii chuan a lo ti sar sar a. 

“I kal vena chi a ni lo, a hla lutuk.” A rin aiin a chhang rang,. “Hmm, ka kal ve thei awm em mai, ramhnuai te chu ka kal ve nasa thei lutuk. “ A lo ti a. 

“Puakte i ngai ang a, i rih hmel si..” nui hmelpu lek lek hian a lo ti a, a rih dawn lohzia a hriatchian lutuk vanga sawi a ni tih Champuii pawn a hai lo va, “Awii, min paw zo tho ang, i lian thung alawm” a lo ti ve zat. Chutianga innel leh inpawh chuan an la inkawm ngai lo va, Muanawma pawh chuan nuam a ti ve phian. 

“Nia, Kima te hrilh la, eng nge kan tih ber ang a..” a ti ta hû a. Champuii chuan nui har har hian, “Ih, chakai kan man ang a, chengkawlte pawh, len den i thiam phei chuan sangha te pawh” naupangchhe bawl deuh hian a ti a. 

“Len den chu ka thiam, mahse, chakai ka man ngam lo” thutak zet hian a lo ti a, Champuii nuih a za telh telh mai, Saii pawh a awmhmunah a lo nui ve char char mai. A nau hi Seni boral aṭanga a danglam tak em avang khan a lainatin a khawngaih em em thin. Chuvang chuan hmeichhe dang hmangaih neiin nunkawng dik zawh thei se a duhsak takzet. 

Chutianga a tuka hmabak nei chung chuan an inthlah ta a, Kima te pawh an lo phur viau, Champuii pawn Zari leh Lucy te a lo sawm ve bawk a, anni bak hi hmeichhe ṭhian a nei vak lo. A tuk a rawn inherchhuak a, Ṭhian parukte chu hlim takin an khaw lui hnai ber Chakawk lui lam pan chuan an inzui ta ṭhâm ṭhâm a. An rin aiin Champuii chuan kawng kal a thei zék lehnghal. 

Lui an han thleng a, nuam an tiin an phur ṭan hle. Lui kam zawl laiah innghatin an thil kente chu an dah khawm a, lui mawng lamah an inzui thla leh dam dam mai. Hmeichhehoin chengkawl an chhar a, a lian lem lo hlawm hle,. Mipa lamin len an den bakah chakai an dap pah bawk a. An innghahna an thlen meuh chuan a chawhnu ve ta ruih mai. Mipa lamin thing an fawm a, mei an lo nun thung a, hetianga lui kama chaw han fakte hi Champuii châk sakhai a lo ni bawk a, a phur sârh reng mai a ni. Sangha pawh eikhawp chu an man ve a, buar nen an bai pawlh a, tumbu an rawh bawk a, Lawma hi rawngbawl thiam leh peih tak a ni bawk a, a che sûrh sûrh mai. 

An ngawih dat laiin, “Ti nge keini hi a kawpkim khera kan kal a?” A rawn ti thut mai. A tirah chuan an nui ṭhâw hlawm a, mahse, “Kei leh Lucy, Kima leh Lalzarmawii, Muanawma leh Miss..” a han tih leh lung lung takah chuan mi pahnihte nuih a za ta mang tlat lo. An inmelh zawk a, an mit intawng dun chuan an chhungrilah ‘Det’ a awmtir chiang a ni. Mahse, hun harsa lo paltlang ve ve tawh te chuan an tihlan a rinawm loh hulhual. Kima chuan an mitmei hrethiamin, “I zak em? Lalzarmawii ai chuan Miss ka duh fe zawk aw. Lalmiss, Muanawma hi chu duh suh, lian si, ṭawng nachang pawh hre lo, mawl si..” a lo ti hluk hluk a. Champuii pawh a nui ve ta hawk hawk mai. 

Chaw an han ei a, nula lam pawh an chaw lâk a ṭha ve khawp mai, Champuii chaw eikham a kam va ṭhuah bulah Muanawma chuan, “I ei zawng zawng kha lo lenpui thur thur rawh aw..” a ti a, Champuii’n, “Nangmah ang tiat hi ni ta ila, miin min râp ngawt ang” a lo ti ve sak, an nui dun a. An han ṭhut khawmuan deuh hnuah nula ho chu an chhak li lian vak loah chuan an han insilfai a, “Muanawma nen hian ni tak tak r’u, enteh, kan khaw tlangvalah chuan a tihtlak ber ang..” Lucy chuan a ti sur sur a. 

“I â siah, a la naupang em mai.” Champuii’n a lo ti thung. A rilru erawh chuan, “In khuaah hian ngaihzawng neih ka tum lo” tih a rawn ri nghal thung. 

Champuiin a kekawr a thleh chhoh mek laiin lui mawng lam aṭang chuan patling awrâwl rapawm zet an hre ta thut mai le..!